ZARI

ZARI! 

BY :  Vanlalpeki Fanai

***********************

Chu khaw dur khup leh kawl phe eng zuai zuai te, a khât tawk a khawpui ri leh rum rum thin te chuan eng thilmah rawn lantir lem lo mahse la, awm nuam lo khawp in mihring te erawh chu min Siam ve tlat a tih theih a. A nuam lo ru duh viau.  Hetihlai hian zan dar 10:30 a ri twh vel mek maithei, kei erawh chu chhun lama kan thil zir te kha en nawn leh in ka duh aiin ka Mengrei ta phian a, tunah hian mu Turin ka inbuatsaih vel mek bawk. Umm, ruah mal hraw zet zet mai chu an rawn tla zui ta phuar phuar e, mut a nuam viau ang tiin hmai te ka phih zawh a, mut hma routine awm ang ang ka zawh fel leh vek hnu chuan mu tawh tak tak turin ka mut pindan lam chu ka pan ve ta nge nge a, ka inkhuh zui nghal hmak.

" UKimkim, tukthuan hmeh a tan eng nge i ei duh ang?"  ka zing tho, kawngka ka hawn rual deuh thaw chuan pawnah hian in neitu te nula, he ka thlenna home stay neitu te Fanu Zari khan min lo zawt nghal hlawl pek a. Ka Meng phawk zuk hman hial a ni. Mahse, amah a ni tih ka hriat rual chuan pangngai zui ve leh maiin nui hmel ka hmuh a, duh bik ka neih loh thu ka hrilh ve nghal zat. Chumi hnu chuan ani pawh chu ding khaw muang rei tawh lo in in Chung lamah a tlan chho ve leh mai a, ka en zui deuh vang vang.

Ka thlenna Home stay neitu Pu Ruata leh Pi Hmingtei te Fa neih chhun Zari hi kei ai hian kum 4 vel zet in a naupang zawk niin ka hria a, a hmeltha ka tiin a hleitling phian ka ti bawk. Mahse, nulat nachang la hre em em lo, zah hre rual tawh tho si kan tih ang chi kha niin, a nungchang nise a țha vei phian reuh a, a țawng tam lem lo hle bawk. Chu chu engpawh nise, kei hi Laltlankimi niin kan khua, thingtlang khaw lian  em em pawh nilo ah hian a hming in high school zirtirtu a tan thlan tlin ka lo ni ve a, ka thawhna pawh ala rei viau hran lo hle. Zirtirtu te chuan a khât tawk a training Kan neih thjn ang hian ka hna ka zawm atang tun hi training tura ka chhuah vawihnihna a ni hial bawk a, khawpui lamah hian chhungte chu nei ve thliah thluah mah Ila mahni a tal hran nuam ti chi ka lo nihna ah tihian tunah pawh ka thu in home stay ah ka in vawm hrang leh hmiah a, tuman min ti lui thei ngai lo. Tin, chawlhkar hnih khat chauh cham tur kan ni bawk a, thlen man alo to lo bawk nen zalen taka boruak han hip vel hi a nuam zawk em a, tihian Pu Ruata te homestay man tlawm leh nuam takah hian ka va in vawm lut ve ta rawih mai a nih hi. Helai hmunah hian zan hnih ka riahna a ni ve ta chiah a, a neitu te chhungkua hian ka room Chung lamah khian chenna hmun nei ve bawk in an awmchilh tawp bawk a, a thlamuan thlak viau.

Tukthuan te tui ti taka ka ei zawh hnu chuan a dan ngai te bawk a chhuak leh turin ka insiam zui mial mial a, chutia ka hmanraw chi hrang hrang dap khawm a ngawi reng a ka lo buai rak rak lai chuan ka hnung lam ah thawm ring vak lo ka hre ta thut. Hawi chhuak nghal zawk in eng thilmah phei chu hmu lem lo mah Ila, ka room parda phe deuh zeuh erawh kha chu ka va hmu hman. Mahse, thli thaw in a rawn chhem chet nimai turah ngai in ka ngaihtha awm chhunzawm ve leh mai a, thawm pawh kha a reh ve leh mai bawk nen ka hriat tawk lek chuan ka hui zui ta pap pap. Ka insiam zawh taktak hnu chuan kan training center lam pan turin ka chhuak zui nghal dawr dawr a, pawn a ka scooty dah ti nung tura ka buai lai chuan in Chung lamah ring lutuk lova zai rat rat thawm ka hriat avangin ka han hawi chho leh zuk. Chutah, keimah min hnaih lama an verandah pangpar tui pe mek tu Zari bawk kha han hmu leh thut in ani chu pangpar tui phuh seng seng pah hian zawi te in a lo zai rat rat reng hi alo ni a, mahse, a pangpar tui pek ah khan a rilru a dah hauh lo a ni tih chu chiang takin a lang awm e. Ni e, keimah ringawt chu ngun thluk lutuk in min rawn melh ngar ngar reng a, a mit ti Zim sêt in a hmai var dâng pap nen khan min huat hmel em em hian che eih lo in min rawn melh tlat a ni! Keipawh chuan ka tum loh deuh in ka thil tih lai țhulh țhak khawp chuan second 10 chhung vel kha chu amah melh nan hun ka han hmang ve hman bawk a, a awmdan kha ka hrethiam lo em a tin ni.

"UKimkim, I țha em?"  chutia min rawn ko thawm ka hriat tak thutah chuan in thing harh zawk in ka awmdan te pawh chu ka hrethiam ve leh ta chauh a, nia, ka scooty pawh kha ti nung lem lo in in Chung lama Zari che tla vel ringawt thlir chuan hun ka lo hmang tih ka inhre chhuak leh hnuhnawh a, nuam lo ka ti ru kher. Ani lah chuan pangpar tui kha pe tawh lo in keimah min buaipui tum niawm tak chuan ka awmna lam a rawn pan mek leh ta nghal a, ka hamhaih vek nimai hian ka hria. 

" Aw tha e. In pangpar khawi ho khi an nalh reuh lutuk a, ka lo thlir kual mai mai" nui sang Chung a lo ti let ve in scooty bawk chu ka han ti nung tha leh ta a. Ani pawh chu a rawn nui zui ve var var mai. 

" Nia, ka nu hian pangpar nalh hi a hre thei khawp asin. I Kal tawh dawn emni?" rawn ti zui ve leh Siam Siam in kei chuan kal kal tum tawh thu ka sawi a, ka scooty chu ka her kual nghal bawk. 

A kut no tak hmanga min rawn vai liam lai te chuan a hmel kha chik takin ka lo en ve kar reng a, amah hi hmeichhe hlim thei tak anga lang thin nimahse, amah ah hian kim lo riau a awm tlat a hriatna ka nei leh ta tlat pek a nih chu! A hmel nise a dang bel reng bawk a, a hlim nui hmel phen ah hian thup tamtak a neih ve ngei pawh ka ring ru thin reng a ni. 

Nileng a training nei a hmun pakhat a hun kan hman nilen hnuah chau hnep in ka thlenna hmun ka inkhalh thleng ve leh thei hram a, he tih lai hian zan dar 7 vel chu a ri tawh awm e. Tin, kan training na hmunah zanriah hi chu kan ei mai țhin avangin Tukthuan tih loh chu ka thlenna ah hian chaw ka ei ngai lem lo. Chutia ka room kawngka hawn tuma ka lo rik rakrak lai chuan kil khat atang hian thawm a rawn chhuak leh a, ka thil tih lai pawh chu ka tawp zui chawt thei. Mahse le, sam thur bum Chung leh mitmeng val kuau si hian Zari kha chu thawm awmna lam atang ngei mai chuan a rawn chhuak ta hlawl pek a! Ka phu nasa lutuk chu ka zuang sawn dawrh lo chauh hial a ni. 

" Awi! Zari, min ti phu nasa lutuk alawm. Eng nge i tih a? Tinge kha lai kawm kar atang khan I rawn chhuah teh daih a" lo ti zui nghal chul in amah chu fiah zet hian ka en pah reng bawk a. Ani erawh kha chu a hmel leh mitmeng atang ukhan a chiangkuang vak lo em aw tih theih turin a meng â deuh ruai niin ka hria a, a kâ te pawh chu a ang phiau reng bawk. 

"UKimkim, tui min lo pe" tih chauh chu rawn sawi chhuak in kei chuan rang em em hian kawngka pawh chu ka hawng zui ta rawk rawk a. Zari thil min dil tui la tur chuan hmanhmawh zetin tui dahna lamah ka tlan nghal dawr dawr bawk. Fridge chhunga tui dah vawh bottle ka lak chhuah leh sawk sawk hnu a a awmna lam ka pan phei leh lai chuan mak tihna leh hlauhthawnna hlir hian ka khat ta tlat pek a! Ka awmdan kha ka inhrethiam chiah bik lo, hlauh ruk nei ang mai hian ka tiril te pawh chu a rawn khur der der thei nia! Mak tak a ni. Chu thil ringawt pawh chu mak tih tawh sa naklaiin, 

" Zar, hei aw I tui in tur chu..." tih pah a bottle pek mai ka han tum lai chuan Zari awzawng hmuh tur alo awm tawh lo! A dinna hmun kha alo ruak hiai tawh a, kawngka nise chhung lamah felfai zet hian alo inkalh thlap bawk nia! Eng nge thil thleng mek leh thil awmzia hi ka hrethiam ta lo tlat. Tun lawk khan tui in tur min rawn dil a, hetah ngei hian min lo nghak bawk a nih kha. Mahse, tunah Khawnge a Kal bo leh tak daih si a... A mak tih chauh lo chu sawi tur ka hre lova, ngaihtuah ngaihna tak pawh ka hrelo a ni. A finfiah nan tiin kawngka inkalh tawh sa te chu ka han hawng țha leh ta vel a, pawn zawng zawng pawh ka en fiah nghal vek bawk. Mahse, eng thil mah hmuh tur a awm lo. A reh a, thil che eih pawh hmuh tur a awm tawh lo a ni. Chu ka thil tawn zawh chiah leh pawn boruak awmdan zawng zawng te chuan chhung ril ah hian hlauh rukna riau min rawn thlen leh ta tlat pek a, rang lutuk hian kawngka pawh chu chhung lam atang chuan ka kalh tha lehnghal sawk sawk bawk. Ka khur a ni.. Ka khur chhe takzet lo chauh. 

Ti ril khur ru dar dar chungin room lam ka pan a, khum ka thlen phei meuh chuan ka thaw te hi a rawn sak ta vek tih theih a ni tawh a, ka hawi kual hrek hrek reng mai bawk. A khât tawka pawn lam a thli thaw leh vuk vuk thin thawm te, kawlkil eng phe zuai zuai thin te pawh chuan ka hlauhna zozai te chu tih nep ai mahin an rawn belh chhah ta emaw tihtur hi a ni tawh a, zanin hian tui taka ka mut hilh theih ngut pawh ka ring ta lo ve a. Khur ru dar dar reng Chung chuan engkim ka ti a, mutna ka Siam bawk a, a tawpah chuan kawng dang ka hriat thlawt tawh loh avangin Pathian hnenah ka tawngtai ta ringawt. Um, ka tawngtai zawh hnu atang erawh chuan tlemin ka hlauh zual pui te pawh kha an reh ve ta deuh a, muhil thei tawh lo tura ka in ngaih hnuah Pathian tanpuina vang liau liau in ka muthilh lai pawh hrelo chuan ka lo chhing zui ve ta nge nge a nih kha. 

A tuk zing khaw var  chuan beiseina min siamsak leh a, hlauhna te pawh a bo tawh in tunah chuan mihring tamtak thawm hriat tur te alo awm ve leh ta bawk nen ka thawl deuh huai in ka hria. In phih fai sawk sawk in ka thawmhnaw hak tur te ka lo thlan fel mawlh mawlh lai chuan kawngka kik thawm a rawn awm leh ta a. Ka phu zuang deuh zawk. Hlauhna khan min kiansan tawh emaw tih laiin alo la dai fel hauh lo tih chu ka hre thar leh. Mahse, eng thil teh chai nge ka hlauh a, talbuai a min siamtu hi hriat ka duh. Tin, hetiang hian ka khawsa tur a ni lo bawk tih chu infuih nan a hmang in ka thil tih lai te pawh chu ka dah țha sawk sawk a, kawngka lam pan chuan muangchang hian ka kal zui ta Chhat chhat. Chutah, kawngka ka hawn rual a Zari hmel hmuh tur lo awm nghal chuan ka lungphu chu a rawn ti rang zual leh ta hle mai a, amaerawh chu, ka insum zui hman ta hlauh. Pangngai takin ka awm zui tur a ni. Nui hmel ka lantir rual rual chuan amah Zari zawk chuan

"Ukim, I hman chuan eitur ka rawn dah thei tawh a" zangkhai tak hian a rawn ti leh nghal ta var mai a. Ka thaw zui huai thei. Mahse, zan lama a Khawsak dan mawlh mai kha ka la theihnghilh thei lo tlat a, ka zawt nghal rum rum mai dawn emaw ni ka ti hial. Mahse, 

" Awle.. Ka lo ei mai dawn nia" ti a chhang let in amah chu chiang tak hian ka han en leh vang vang phawt a, amah ah khan dik lohna em em pawh awm in ka hre hran lova, fello lai han hmuh tur leh sawitur ang chi pawh ka hmu hran Chuang lo. Tin, zan lama a hmel a felhlel leh hlauhthawnna ka hmuh zozai te pawh kha an bo ta duak bawk in ka hre hial a, thil engkim mai chu an tha leh vek nimai ah ka ngai tawh bawk. Chuvang chuan tun a tan chuan zan lam chanchin kha chu sawi chhuah rih loh mai ka duh leh ta zawk a, ka ngawi ta phawt. Tichuan, tukthuan ei tur min rawn supply ang ang te chu ei zuiin ka ei zawh ah chuan ka dan ngai te bawk in ka inkhalh chhuak ve leh mai bawk a, lawk in, ka thlenna ka tlan pelh thui hma hauh chuan ka thil hmuh khan ka scooty speed chu a rawn ti danglam vek a, ka break deuh tuarh hman. Nia, keimah min tawk zawng hian ka thlenna Neitupa Pu Ruata leh nu pakhat, la valai angreng tak leh make-up hmang nasa em em mai, hmai fang pawh chhelo takte rawn inzui phei Chhat Chhat chuan ka mit hi an la fuh em a, min rawn hmu ve kher lo mahse kei chuan chiang takin ka hmu tlat si a ni. An thlen chin leh ka thlen chin chu a inhlat hran loh em avangin reilote ah kei chu Pu Ruata zawk khan min rawn hmu fuh ta thuai reng a, ka lo la en kiau. 

" E Kim kimi chu, I Kal ve dawn chiah emni?" nui vur vur chunga rawn ti suam suam Chung hian a bula kal mek hmeichhia a vawnna kut pawh kha a thlah ve nghal bawk a, ka lo melh chiang thei si... Ka ning zawk. Chutah, harh chhuak zawk niawm tak hian ka che deuh hrut, 

" Aw.. A nih hi.. Pu Ruat, ka kal mai" ti chungin scooty ka ti nung tha leh a, ka tlan ta daih. Ka tlan pelh tawh hnuah pawh kha a hmeichhe kalpui kha chuan leh hawi meuh hian min la rawn thlir reng tih chu side glass atang ka hmu ve thei reng a, a hmel landan atang ngawt pawh khan kei chu min ngaina lova, hlauhthawn a neih hmel ka ti zui nghal hrim hrim. Khawi lam nu tak chu ni ang maw. Pu Ruata hian a nupui fanau te hriat loh hian ngaihzawng alo nei reng em ni ang. Tuna a kalpui nu kha a ngaihzawng lo ni ta se engah nge an in lam panna kawng ah kher kher chuan a kalpui bawk si. Hlauhthawnna a nei ve miah lo nge, nge, a ngaihzawng nilo in a hmelhriat emaw, a unaunu te hi an lo ni daih zawk emni ang. Engpawhnise thudik chu nakinah a rawn lang anga, Keipawh hian ka la hre em em ang ti rilru Chung zel in ka hma zawnah ngawi rneg chuan ka tlan ve zel a, engmah hi ka ngaihtuah kual peih tawh lo. Kan thil zirlai ah chiah hian rilru pek tum tawh ila a țha ang. A țha khawp ang. 

" Kimbawihtei chu mite rawn tlawh nachang I hre hlauh a avan tih zia tak. Zanin chu chaw ei la riak ve nghal daih la"  ka nî Tluangi te inchhung ka luh rual rualin ka nî Fanu nula senior ultra Umapuii chuan min lo be nghal suam suam a. Kei erawh chu thut pindan lamah lut tlang in hah zet hian ka țhu zui nghal hnawk. 

" Riah em chu ka hre lo le. Chaw erawh ka ei ang. Zanin chu kan thil zir kan bang hma a, zanriah kan ei nghal lova" lo ti liam ve leh maiin Umapuii bawk chuan 

" Awi a nih chu.. Riak ve nghal la ka tih nen. I nî te lah chu damdawiin ah riah daih an țul dawn sia, mahni chauh a riah ka hreh mawle" a rawn tih leh chuan kalo thaw deuh hawk. Ka nî te chhungkua hi an thahnem lo ve angreng a. Ka nî te nupa leh an Fanu Umapuii hi an ni deuh tlawng mai. Tlem tawh naklaiin tunah tak phei chuan ka nî pasal ka pa Ruala hi bawrhsawmna avangin damdawiin ah ala awm mek zui bawk nen a khawhar thlak ve thin ngawt ang ka ring. Ka phur thut chuan zanin pawh ka riah pui maithei a ni. Ka khawngaih ve riau. 

Umapuii zanriah buatsaih tuihnai taktak te chu ei dun in Kan titi zui luam a, ka thlenna te min zawt bawk a, an hnen a insawn daih tur te chuan min thlem pah titih reng bawk. Ka um aw liam vel mai mai a ka rilru tak erawh chuan insawn chhuah ka tum lem lo. Ka thlenna hmunah sawn thil mak taktak leh thin ti thawng taktak te pawh lo tawng ve thin mah Ila a hmun hma saw a nuam ka ti a, chutiang a hmeichhe dawih zep uchuak ka lo ni hranpa lo bawk nen, ka insawn chhuah chu ka ring lem lo. 

Chumi zan chuan ka riah ve nghal mai tur thu ka han sawi a, a lo lawm thiam kher. I duh duhna ah mu rawh min ti bawk a, an mikhual room zau țha deng dung zetah chuan mahni in engthawl takin laikhum ka zal zui ve ta a ni. Hemi ni hi chu chhun lama ka tlat velna ah ka chau chhe hran lo bawk a mut hmunah pawh rei fe chu phone khawih in ka la meng zui thei a. Mahse kei a rei fe tih hi chu zan dar 12 bawr vel awrh hi a ni thin awm e. Khatia phone ka khawih kha ka chahthlak lai pawh hrelo in ka lo muhil leh der chu a nih hmel. Kawngkapui rawn chum vak vak thawm ah chuan ka țhang harh leh ta zawk mai a. Ka mutna room light chu ka off lai hre silo in a lo thim vek tawh bawk. Tin, hei hi ka nî te mikhual pindan kha ni pawhin ka hre chiah tawh lo. Ka thlenna Zari te home stay zawk kha nimai te hian ka hria. 

Kawngka kik thawm chu a reh thei hauh lo. Umapuii pawh chu ava han mu nghet awm em em ti chunga phun nuah nuah pahin ka tho chhuak a. Ka nî te hi a zan a zan hian an rawn haw thut nge ni ang le tih mai mai te ngaihtuah Chung chuan Kawngkapui ri reng lam chu ka pan phei zui chhut chhut. Mahse, kawngka ka han hawn chiah chuan thawm zawng zawng chu a reh zui nghal duak a, kawngka rawn kik tu tur awm ang reng reng pawh kha tumah hmuh tur an awm miah lo nia mawle. Tun ang hunah a infiamna chi loh ka ti khawp mai. Phun nuah nuah chunga kawngka chu kalh țha leh in ka mutna lamah bawk phei lehnghal mai ka han tum a, pen hnih vel awrh ka pen hman ang tihtur ah hian door bell zawk chu a rawn ri ta rawl rawl mai le. Door bell vawi li vel a rik zawh hnuah a ngai ang chiah bawk khan kawngka chu dim lo angreng takin an rawn kik leh ta vak vak mai a, ka in her zui nawk thei. 

" Iva han mak vak vak tak e aw" tih pah a ka han hawn nak chuan le, pawnah chuan Zari kha a thawmhnaw zawng zawng huh phung hian alo ding khur hlawk hlawk mai a. Ka khawng nghal vek ni berin ka inhria. 

" Zari! Eng nge thil awmzia. Engtinnge hetah ka awm tih i hriat" zawhna hlir in ka lo khat nghal a. Luh tir nachang pawh ka hre lawk lo. 

Chutah Zari lah chuan hlauh nei ang mai a meng kual vak vak Chung leh khur hlawk hlawk reng Chung hian kei chu min rawn kuah titih nghal a. Awmdan tur ka thiamlo kher. 

" Ukimkim, min pui rawh. Min tanpui rawh. Min thah an tum a nia" a rawn ti leh ta mai. Chuveleh rang lutuk in kawngka inhawng huau reng chu ka pawt khar ta sawk sawk a ka kalh nghal hmak. 

" Tu in maw Zari" tia ka zawhna chu chhan pawh tum lo in a ngawi zui reng a, a hawi kual vak vak bawk a, a hmel ah khan hlauh na hlir ka hmu tih chauh lo chu min ti hamhaih takzet a ni mai e. 

" Lo awm rawh ka u ka va kai tho lawk ange" ti a Umapuii room awmna lam pan ka tum lai chuan ka hnung lam a ding Zari bawk kha a rawn țawng chhuak leh ta a. 

" Ukimkim, engvangin nge min riahbosan, engvangin nge kha roomah khan I riah loh" a rawn ti ta chher chher mai a. Ka ke pen lai chu tawp in amah Zari lam hawi chuan ka inher zui riai riai. 

A sam sei tak tla hnuang kar atanga rum em em a min rawn melh Chung hian min huat hmel zetin a kut te pawh chu a hum ruh vek tawh bawk a, ka meng phawk chhunzawm nasa kher. 

" Engvang in nge kha room Chhuahsan khan Helai ah I riah bo. Haw rawh! Engah nge min riah bo san! Engvang nge?" a rawn au zui ta chiam mai a nih chu mawle. A hnuah phei kha chuan kut min thlak duh tih hriat takin min rawn pan phei a, a sawi ngai reng a sawi bawk a au ring tual tual mai bawk nen ka hlau lutuk kha ka mit zui sulh a, chet ngaihna pawh ka hre tawh lo a ni ber e. Chutia min rawn hnaih chilh lai tak chuan hla tak atanga min rawn au vawn vawn thawm hi hria in zawimuang hian ka meng chhuak riai riai a. Umapuii khan min lo ko mawlh mawlh tih chu ka hre ve ta chiah. Chuveleh rang em em a thu chhuak nghal in ka hawi ta vut vut mai a. Zari kha ka zawng ni berin ka inhria. Mahse, khua a eng ut tawh bawk nen Zari leh thilmak dang hrim hrim kha chu hmuh tur an lo awm tawh lo a ni. 

" U mapui, eng nge thil awmzia. Engtinnge ka awm" hrethiam lo tih hriat zet a ka han zawh takah chuan Umapuii pawh chuan ka sam rawn chul hliau hliau pah hian

" I hre lo tak tak a maw. Nizan khan I muhil tawh hnu kha I rawn tho chhuak hlawk hlawk a. Kawngka Iva hawng ringawt a, biak nei ang te hian I awm a. I awmdan kha mak ka tih tak hlek avangin ka rawn ngaihven zui che a, min hlauh hmel em em hian I tawlh hnung a, I au a min vai Kian te kha I tum a tichuan ni khaw hrelo in I awm zui ta alawm. I hre miah lo maw" a rawn tih takah chuan mak tihna hlir hian ka khat leh tawh a. Mak tih loh chi reng reng ni lo chuan. Ni e, nizan khatia ka talbuai vel lai khan Umapuii reng reng hi hmuh tur a awm silo a, Zari ringawt ka bia a ka hmu a ka buaipui bawk kha a ni si a. Engtinnge khatiang Umapuii sawi ang kha a thlen theih ka hrethiam lo. Tunlai hi eng buaina nge ka neih ang ka inhrethiam lo. Ka damlo dawn hnai nge ni anga, eng thil chiah hi nge min tibuai em em tu hi ni ang le. Thil hmuh sual ka hrat in ka hlau thei em em mai bawk si a. Doctor hi ka pan risk tawp mai dawn emni le. Ka buai a ni. 

" Bawihi, in training boruak te chu a nuam maw? Chanchin hi min rawn hrilh ve ngai silova, mi biak hi I peih lo thei lutuk a" ka nu in call atanga min rawn tih chuan ka han thaw deuh hluai phawt a. Nia, phone call hmang a mi biak te hi ka peih lo. Chhungte an ni emaw, thiante an ni emaw tu pawhnise call hmang hrim hrim a mi biak hi ka ning. Sawi tur ka hrelo. Ka bo vek zel. Chuvang chuan text hmang a inbiak hian ka biak tlak zawk tihna a nih chu. Tichuan ka nu bulah chuan engkim a that thu chu ka han sawi ve ta ngawt a. A țha chiah em tih pawh hi ka hre tawh lo. Tunlai ka chunga thil thleng leh engkim thleng zawng zawng te hi chin fel dan tur ka thiam lova, a dik lo tih chu hre tho mah Ila tu hnenah nge sawi tur ka hre lova, a ruk tak hian ka mangang takzet a ni. 

A khat tawk hian Umapuii lah khan an bul a in sawn mai tur in min lo ti chhen thin bawk a, ka hrelo le, ka la insawn duh hial maithei a ni. He home stay hi ka ngeih hlawllo ni te in ka hre tawh. Han ti dawn ila, ka nî te in a zan khat lek ka riah chhung ringawt pawh khan ka buai tho chu a ni si a. Heiha! Engmah hi ka hrethiam tawh lo e a. 

Tlai lam dar 5 a ri thuak tawh ang tih ah chuan ka thlenna home stay pawh kha in khalh thleng ve leh tawh in, zan hmasa lam a Zari ka mumang lam a ka hmuh nasat zia dan em em kha Nilengin ka theihnghilh thei thlawt lova amah pawh han hmuh a engkim hrilh hriat ve chu ka rilruk ta ringawt. Tichuan, in chhungah lut hmasa leh te te in ka inti felfai hmasa ta phawt a. Ka tihtur ang ang te ka tih zawh hnu chuan ka thlenna neitu te chenna in Chung lam pan chuan zawimuang hian ka chho ta bek bek a. An reh tha kher mai. 

" Hemite chhungkua hi an leng bo zo nge maw ni le" ti rilru nuah nuah Chung a an kawt zawn ka thlen chhoh chuan an kawngkapui chu alo inkalh hauh Chuang silo. Ka thaw zui halh. Chutah, kawngka ka kik dawn chiah tih in chhung lam atang chuan anmahni zawk khan an rawn hawng zui ta rak rak mai a. Ka phu zawk thei. Inchhung atang chuan Zari nu Nu Hmingtei kha a rawn chhuak ta heu mai lehnghal a. Kan in melh chiang kek kawk khawp mai. 

" E Kim kimi tehmial chu! Ilo leng dawn emni? Lo Kal rawh" lo ti nghal zung zung in Keipawh ka kiai ve sak ringawt. 

" Aw, reilote chauh a niang" ti hul hakin thildang pawh sawi lo chuan kan inzui lut nghal a. Inchhung kan luh rual te chuan ka hawi kual nghal chiam chiam ringawt. Zep miah loh chuan ni engemawzat Helai hmunah hian lo awm ve tawh mah Ila Zari te Inchhung hi ka vawikhat luhna a ni teh tlat a! An dek nuam in a fai țha phian. Zari hi nula fel tak a ni tih pawh a chiang Sawt in ka hria. 

" kimkim, I duhna lai lai ah khan lo țhu rawh. Thingpui te Kan in dawn nia" rawn ti leh in kei chuan ka lu ka lo bu ve nghat nghat ringawt a. Ani pawh chu choka chhungah a lut tlang nghal daih bawk. 

Khawnge maw Zari leh a pa Pu Ruata pawh hi an Kal bo daih le. Zari pawh hmun dangah a len chhuah ka hre ngai silova, a reh ve hlemai... Tih rilruk neuh neuh pah a ka lo la hawi kual vual vual lai chuan Nu Hmingtei bawk kha Thingpui no hnih keng Chung hian a rawn phei ve leh tawh a. Ka lo nuih deuh vur vur. 

" Eng thil chu nge ni ta a. Haw I tum hnai deuh tawh nge. I haw daih chuan kan ngai awm che r" ti siam siam in ka bul lawkah chuan a rawn țhu thla ve nghal zan a. Ka chhang let lawk lo. 

" Nu Hmingte, Khawnge Pa Ruata leh Zari hi an va reh em em" a chhungte hming ka sawi rik laia a mitmeng chu a danglam ve zawk hian ka hria. Mahse, a chhan tur awm ang erawh ka hrethiam lo thung. 

" Nia, I Pa Ruata chu a zing len chhuah leh ta a nih kha. A nitin tih țhan dan hi a nia ka khap dai zo meuh lo a ni e" nui var var chunga a rawn tih chuan ka lo khi ve leh suk suk ringawt. Zari awmna chu zawt zel tawh lo mai ang tiin ka aw chu ka thian ta kharh kharh mai a. 

" Eng lo a nia maw nu Hmingte, nizan ah ka nî te inah ka va riak phei a, chu chu thilmak deuh hi ka mumang lamah ka hmu a. Ka mumang ti Ila, a tak a ang zawk khawp mai. Ka sawi thiam chiah lo" tia bul ka han țan chuan tlemin a mitmeng bawk kha alo danglam leh tawh a. A ang deuh phiau bawk. 

" A nih chu. Eng ang mumang maksak nge ni a. Han sawi ta che" zawimuang a a rawn tih ve chuan hrilh tlang nghal vek chu ka tum ta zawk a. 

" Zari hi ka lo hmu a! Engvang a riah bo san nge ka nih tih te kha min lo zawt vak vak a, a au nasa sia, a thinrim hmel em em bawk a.. Ka lo hlau khawp a" ka sawi zawh fel rual rual chuan amah Nu Hmingtei bawk khan

" Ava mak tak ve mawle. Zari chu chiang takin I mumang ah I hmu a maw!?" rawn ti ve he haw in kei chuan ka hmuh ngei thu chu ka lo hrilh zui zat. A ngawi zui ta vang vang a, a melh ngai chu melh in ngaihtuah ngun thluk tak nei ang mai hian minute 2 chhung vel kha chu che mang lo hian a awm reng a a rawn thaw chhuak leh hak thin bawk. 

" Nu Hmingte, thil diklo a awm emni? Tinge khatia I ngawih tak reng mai a" ka han tih leh dek dek hnu chuan muangchang hian a rawn hawi chhuak a, ka mitah tak chiang takin min rawn melh nghal kiau bawk. 

" Zari hmel chu i hre chiang maw. Amah ngei a ni tih i chiang a maw Kimkim" a rawn ti zuai ta raih mai. Kei chuan ka lu lo buk nghat nghat pahin amah ngei a ni tih chu ka chian thu ka sawi nghal a. Engvang a a fanu hming ka lam chhuah apianga a awmdan danglam leh mitmeng danglam nge a nih ang tih chu ka ngaihtuah. Ka hrethiam theilo. 

" Aw chiang e nu Hmingte, tinge Iva hlauhthawn hmel ve. Thil diklo a awm emni" mangang ru deuh a ka han zawh chuan tihian min rawn chhang ta a. 

" Bang a thlalak kan tar khi I hmu ang tiraw? Khi khi Zari chu a nia. Amah ngei khi a ni tih i chiang a  maw" a rawn ti țha leh a. Chutih pah chuan an bang lai taka nula hmeltha tak Zari ngei mai thlalak lian em em a an print tir chu a han melh chho kar bawk. Ka hmu alawm. Ka luh hlim a ka hawi kual pah khan ka hmu fel vek tawh. 

" Aw ni e. Zari chu ka hre lutuk alawm. Helai ah hian ni engemawzat ka awm ve tawh a Zari te chu engah nge ka hriat loh ang. A fel ka ti reuh asin" ka lo tih zet zet lai chuan Nu Hmingtei chu a rawn țawng chhuak leh ta sap. 

" A chhan chu amah khi a boral tawh tlat a tin ni!" a rawn ti ta a! Ka khawng nghal vek thei. 

Zari ka hmuh thin ngei mihring taktak nilo in thlarau rawn inlar a ni thei ang maw. Ka awih lo. Awihawm loh lutuk em mai. 

" Nu Hmingte, eng thu nge maw I sawi tak hi le. A awihawm loh em mai a. Zari te chu Helai ka rawn luh hlim atanga min buaipui char char tu kha niin, zing tin in tukthuan min siamsak a, min rawn pe thlap thlap thin bawk a, mitthi tawh chu a ni theilo a ni" ka khur der der thei nimai hian ka inhre tawh e. Mahse, khang ka thil sawi ve zawng zawng te khan nu Hmingtei thinlung ah chuan thu an sawi ve hauh lo a tih theih a. A țanna ngai ah ala țang tlat reng tho. 

" Zari hi kan fa neihchhun liau liau a ni a, a bak kan nei tawh lo. A pian dawn khan doctor in thu min rawn fel sa thlap tawh a. Ani lo chu fa dang reng reng nei tawh lo turin leh, ka nei lui leh a nih vaih chuan ka nunna hian a tawrh theih thu thlengin min hrilh. Chuvang chuan Zari ka neih dawn pawh khan doctor ho kha an hlauthawng a, an fimkhur em em bawk. Tin, Zari kha thi lo a ruang in ka nei bawk. Chumi chin fa dang neih tum lehna kan nei ta lova, kan neihchhun amah Zari kha kan duat tawpkhawk bawk a ni ber e. A pa nen ngat phei kha chuan an in duat sual mai ang tih ka lo hlau thin a, a pa kha ka hauh tam phahna a ni fo mai. Tichuan hun rawn Kal zelin a rawn țhang lian a, a hmel lah kha a țha vei phian leh ta nghal. Ka Fanu mahnise hmeltha kha ka va han ti thin tak aw. Nulat a rawn hre chho ve a, amah kha a hrisel lo ta vei phian nen khan lehkha pawh zir hleithei lo in a bawrh sawm chho ta em em a, damdawiin hmel kan hmu ngun ta malh malh hle. Khatiang kha Kan dinhmun a nih tak si ah chuan a pa khan a khawngaih em em thin a, school pawh chu kal tawh lova bang rih mai turin thutlukna kan Siam dun ta nge nge a ni. School chu kallo mahse a mawlmang lutuk ang tih hlau in in lamah a pa nen theih tawp kan chhuah a, a theih chin chin kha chu kan zirtir ve thin. I hriat tawh angin Kan pa hi high school zirtirtu a ni ve bawk a, a harsa lutuk lo. Hun a liam a, a hrisel loh ang ang khan hmeichhe hlim thei tak leh hmel hmuh nuam tak a ni ve thin a, mi ngainat pawh a hlawh ta viau. Mahse, tuk khat erawh chu a rawn thawh chhuah har tak em avangin kaitho tur chuan a pindan lamah ka va Kal ta a, kha ni kha ka theihnghilh theih ka ring tawh lo. Ka Fanu, ama roomah hmuh tur awm lova inhnuai kudam  chhung ngei a alo inkhaihlum ni mawlh mai kha! Engvang nge ka hrelo. Harsatna a neih awm reng reng a sawi ngai lova, buaina a neih leh neih loh pawh hi a pa nen hian Kan lo ngaihtuah pui ngai hauh lo tih te thlengin ka hre chhuak a, ka inchhir ngawih ngawih asin. Engvang a mahni nunna hlu tak pawh zah zo lova inkhai ta mai nge a nih ang tih hi tun thleng in ka la ngaihtuah thin a, ka inthiam thei tawh thlawt lo a ni. Keimah vang liau liau a ni ang tih rinna lian tak hi ka pai reng a, ka dam chhung zawng hi chuan ka inthiam theih pawh ka ring leh tawh lo hial. A chhan leh vang hriatna turin lehkha hnutchhiah pakhatmah a nei bawk silo a, a pa nen hian tun thlengin engvang nge ni ang tih hi kan la inzawt tawn fo thin. A boral atang chuan hun in mumal a nei thei tawh lova, kan in chhung boruak chu a dai duap nimai hian a hriat a, kan mang vek. Kan eng tihmah hi a tui thei tawh lo. Zan kan mu tha thei lova, chaw mumal nise kan ei hleithei hek lo. Kan Fanu boral chhan chiah kha hriat kan duh a a nihna takah chuan puitu kan ngai in kan nupa hian Kan chavai takzet a ni. Tunah tihian nang lahin amah chu i hmuh thin thu leh i mumang thleng pawh a a umzui thu che I rawn sawi leh ta si a, a boral chhan tal te chu a hrilh theilo che emni? Kei a nu hian hriat ka duh takzet asin" mittui tling piau chunga a rawn tih chuan ka lo insut ve hraih hraih tawh. Tunah tak hian hlauhna ka nei lova, ka khawngaih takzet zawk a ni. Puih theih dan hria ila puih ngei pawh ka chak. Ka inhuam bawk. Mahse, Zari chu thlarau mai a ni tawh a, duh hun hunah a hmuh theih tawh tlat loh. Mahse, thil pakhatmah hriatthiam theih loh ka la nei fo mai. 

" Nu Hmingte, Zari chu a boral tawh a nih takzet si chuan tunge khang hun chhung zawng a ei leh in tur min pe thin tu leh min lo be thin tu nula kha ni ta ang. I sawi hmangah chuan fa dang in nei miah bawk silo a"  kei chuan ti leh hram in Nu Hmingtei chuan a mittui chu alo hru pah ve niap niap reng a. Ka khawngaih reuh taktak a ni. 

"I hre miah nange. Engtinnge khang hun chhung zawng khan keimah kha ka Fanu Zari hmel ang taka min hmuh theih thin zawk a!! Kimkim, engtik lai mahin Zari angin ka lo kal ngai lova, khang zawng zawng kha keimah vek ka ni. Chaw eitur a ko thin tu che leh be fo thin tu che kha keimah ngei ka ni e. Zari a ni lo!! "  tukin zing ka thu hriat ho zet chuan min ti phu nawn awn awn hi a ni ber e a. Engtia han dawn sawn chi nge tih pawh ka hrethiam tawh lo e. 

In Chung atang chuan rang takin ka tlan haw a, ka thawmhnaw ka Siam zui nghal sawk sawk bawk. He hmunah hian darkar khat takngial pawh ka awm zui thei tawh lo ang. Ka thei thlawt tawh lo. Zari kha ka hlau em ka hrechiang bik lo. Mahse, thlarau, mihring pawh ni tawh lo te nen a in chiah piah reng leh hmuh thut thut thin kha ka lungphu pawhin a zo tawh lova chuvang chuan a rang thei ang ber a Helai hmun hi ka Chhuahsan thuai thuai a țul tih ka hria. Eng thilmah hian min dang tur a ni lo bawk ang. 

Ka awmna man ka pe fel vek tawh a, tunah chuan ka awmna thar tur ka nî Tluangi te in ka pan hun chiah ka nghak ta. Ka insiam zo thawkhat ta bawk a, ka scooty ah chuan a theih dan dan a inhnawh in a biling a balang hian ka tlan chhuak a tih theih hial awm e. Zari mai pawh nilo, a nu leh pa, ah, an chhungkaw hmel hrim hrim kha ka hmu duh tawh lova, he home stay pawh hi hmuh nawn leh ka duh tawh heklo. A râp in min râp ka ti Mai. 

Ka nî te in ka va thlen chuan UMapuii chiah kha lo awm leh in min lo lawm thiam em em a, sawi tawh ang khan ka nî te nupa chu damlohna avangin damdawiin ah an awm ka tih tawh kha. Heng vang tak hian UMapuii pawh mahni chauh a khawsa tih takah a khua a har in min thlahlel zual viau a, damlohna thil te alo ni bawk nen, kei pawh chuan Aizawla ka cham chhung na na na chu awmchilh a puihbawm ve a țha zawk ka ti ta a ni. 

" UMapui, engtik velah nge ka nî te chu an rawn chhuah theih I rin deuh a" zanriah kil lai a ka han tih chuan UMapuii pawh chu a rawn hawi chhuak ve vat a. 

" Hre lo le.. Ala rei viau maithei a, an rawn chhuak thut maithei bawk. Doctor min hrilh dan a nia, a chiang chiah lo. Nang zawk engtik thleng nge ila cham theih ang" tia min rawn zawt let in kei chuan ka chaw thial lai chu tui ti tak hian ka lo la thial chap chap reng a. 

" Keipawh ka Chiang lo. Mahse, ka haw ve theih tep chu ka ring. Lung te pawh a leng ve lek lek țan alawm" fiamthu chuan ka han chhunzawm a. Umapuii pawh chu alo khi ve suk. Kei hi nula lunglen leh khawhar em em hre lemlo chi ka ni a, khawiah pawh zin chhuak ila chhungte pawh call ngai lo, reh zui hmak ang chi ka ni țhin. Ka hetih vang hian hmeichhia na na na chu chhungte hian min lo ngaihtuah lo thei silova, ka nu pawhin min hauh tamna ber a ni țhin. Rei zet zet chanchin hrilh lo in ka awm a, chhungte tan chuan a lungawi thlak loh ve thin dawn em asin.

" UKimkim, mahni intihlum ka nilo asin! Kei hi thah ka ni asin!! Khami ni khan he Khawvel eng hi hmu ve tawh lo tura dah that ka ni!!" Zari aw chuan ral hla tak atang hian min rawn au vau vau mai a. Ka phu nghal zawk thei. Hawi chhuak in amah chu ka han zawng vel a, ka hmu har lem lo bawk. Ka hma hla ve pangngai tak ral lehlam tlang chhip atang chuan min rawn au in ding tak hian ka awmna lam chu a rawn hawi tih ka hre thei bawk a, a ngaihna ka hrelo kher. 

" Zari" ti a phun chhuak sap in, ani chuan a hriat phak pawh ka rin loh nen min rawn chhang zui lehnghal vat a. 

" Aw UKimkim, kei hi thah alawm ka nih. Chu pawh ka pa kutah ngei ala ni zui asin! A țhawng ngawt ang che tiraw? Nia, mahni pa ngei in a fa hrin a han that tur chu a rapthlak em a ni" a hma ai khan a țawng chu a dim tawh a, a ring lo bawk a, mahse chiang em em in ka beng erawh hi chuan a hre fiah thung si. 

" Engtin maw? I pa, Pu Ruata sawn I nunna a tih tawp sak che a maw? Engtinnge chutiang chu a thlen theih a. Zari, dawt I sawi lo tiraw?" ka hamhaih lutuk na lamah chuan ka tha te hi a khur lek lek tawhin ka hria. 

" Dawt a ni lo. Khawngaih in ka dikna hi min hailan sak rawh UKimkim. A nih loh chuan he ka thlarau rethei tak hi dikna hmu theilo in lei ah a vakvai a, kal ngaihna a hrelo a ni" rawn ti lehzel in awmdan tur pawh ka thiam tawh lo. Rilru ah zawhna hlir a rawn lut a, kei a chhan sen rual a ni bawk silo. Ka hamhaih takzet a ni. 

" Engvangin nge nangmah hringtu ngei che I pa chuan a thah duh ang che. Sawi chiang rawh" ka han tih leh vak lai chuan ani chu alo bo tawh a. Hmuh tur reng reng hi alo awm tawh lo. A bo tawp mai a ni. 

Mangang taka țhu in a khât tawk hian ka thaw ri leh hak thin. Engvangin nge Zari khan kei hi min tihbuai reng mai le ka ti. A sawi ang taktak khan a nunna chu ama duhthu a ti tawp lo in thah alo ni taktak emni ang tihte chu ka ngaihtuah thleng vek a. Mahse, amah thattu ah erawh chuan a pa kha ka ring thei hlawl silo. Ka awih thei thlawt lo a ni. Engtinnge pa in a thisen a fa ngei chu a kut hmang a a dah that theih ang tih ka ngaihtuah a, ka rap lutuk chu ka mur chum chuk thei hial. Tichuan, Zari pawh khan thawm a rawn neih zui tak siloh ah chuan keiin tihngaihna dang hlawl hre hek lo le, thil thlen dan kimchang engmah hriat ka la nei lo bawk nen ka nun phung pawh chu a ngai angin ka la hmang chho ve ta zel a. Ka nî te bulah tho khan la cheng ve in rilru ah erawh Zari ringawt a awm thung. Mahse, ani kha chu mihring damlai a ni tawh lo miau a, duh leh mamawh hun hunah a koh chhuah theih loh tlat. Ama duhthu ngei a a rawn inlan hun chu nghak in chu tah chuan thudik hi ka zawt chhuak anga, a țul anga hma pawh laksak ngei chu ka duh ve ta a ni. 

Nitin hian a rawn inlan leh hun chu ka nghak thin a mahse a reh hmak mai. A thuhrim in a sawi kha lo dik ta ni se, eng aiah nge a pa chuan a thah ang tih ringawt ka la ngaihtuah a, a chhan tur awm ang ka hrethiam thei thlawt lo. Nge ni a, a pa ni a ka lo hriat Pu Ruata kha a pa taktak nilo in a pa hrawn te hi alo ni zawk angem? Tihte ka han ngaihtuah kai a, a pa hrawn chu ni ta se amah Zari chungah khan alo tha lo thin viau anga kut han inthlak nachhan tur tha deuh te pawh chu a awm ve thei tho tihte chu ngaihtuah kai ve zel in mahnj tawkah ka buai ve kher. Thil chi hrang hrang engemawzat ka ngaihtuah a, ka zeldin kual a, keimah ber pawh hian awih tur dik pawh ka hre tawh lo a ni e. Tun a tan chuan amah Zari rawn inlan hun chiah ka nghak a ni ber mai. 

" Zari, I pa a awm remchang em?" kawngkapui inhawn rualin pawn a lo ding reng hmeichhe pakhat, nutling hmelchhe vak lo chuan alo ti nghal a. Chu nu chu a hmel han en mai chuan nu ngainat awm tak ti a sawitur ni lem lo, mitmeng pe thip lampang hi a ni ve a, a kum upat tawh hmel ngaihtuah a la in uluk ve tak leh incheina vel pawh la uar ve tak a ni ang tih chu a ngaihruat theih awm e. Tichuan, amah kawngka lo hawn sak tu Zari pawh chuan hlim hmel pu sang Chung hian a pa chu a awm thu leh an inleng nu pawh chu lo țhu rih tura tiin a pa ko tur chuan pindan pakhat lamah a tlan lut nghal thuai a. Reilote ah pindan atang chuan rawn chhuak leh in an inleng nu bulah chuan a pa chu lo nghak lawk turin a han ti nghal bawk a. Thingpui lum tumin rang tak hian choka lam a pan zui bawk. 

Zari kalsawn hnu rei vaklo ah Pu Ruata ngei mai kha pindan pakhat chhung atang chuan inti nalh ve tak mai hian a rawn chhuak zui zat a. Chutia an sitting room chhunga nu pakhat lo thu reng tawh pawh chu a vawikhat hmuhna a ni lo tih hriat takin a rawn nuih zui nghal var var bawk. Chutiang bawk in a hmeichhia pawh khan alo nuih let ve a, anni pahnih chu thutthleng pakhat ah in haw lo tih hriat tak hian an thu dun zui a, a khât tawkin an in mitmei leh zauh zauh thin. Engvang tak ni ang maw. 

Chutia thu tam em em pawh sawilo a an lo thut dun lai chuan Zari bawk kha choka atang hian Thingpui no hnih keng in nui sen sen Chung hian a rawn chhuak ve leh a, a pa leh an inleng nu inthut hnaih dan te chu hmu ve vek mahse la a hmel ah danglamna a awm lem lova, pawi ti ang pawhin a lang hek lo. A hlim hmel em em zawk a ni. Nia, Zari hi nula hlim thei leh thil reng reng a eng zawnga thlir thin mi a ni ve bawk a, tu lakah mah hian rilru chhia a pu ngai hek lo. Eng anga mihring ngainat awm loh pawh hma chhawn mahse hlim hmel a lan chhuah tir thei a, țha takin a dawng sawng a a be thei reng bawk. 

" Zari, Bawihi, hei ka thiannu nen hian hna thilah kan chhuak leh lawk dawn a, I nu in ka chanchin alo zawh che chuan ka sawi ang khan ilo sawi mai dawn nia" Pu Ruata chuan ti liam leh puat puat in Zari pawh khan thuawih tak hian a lu chu alo bu ve nghat nghat reng a, a pa leh a thiannu te pawh chu a melh uluk angreng hle. Mahse, a hmel ah erawh eng thil danglam mah a lantir lem lo thung. 

" Aw, nang hian ngaihzawng I nei a, I uire reng bawk a, kei I nupui hi min phatsan in hmun tinah I fawr kual thin bawk a, zan engzat nge i hmei vanga mahni in pawh luah lum lo leh haw lova I awm tawh pawh hi ka hrelo. I Fanu saw I nihna diktak hi ka hrilh zawk dawn emni ang. Ruata, ngaihtuah chiang ang che. Tunah hian patling Fanu nula uaih tawh nei mek ini tih hi hre rawh. I Zak ve eih lo emni? Min chhang teh " ti tuarh tuarh in Nu Hmingtei chu a ang nasa hle a, a țap pah char char bawk nen, an thawm engkim hria a lo ngaithla ve reng tu room lehlam a awm Zari tan chuan a Mangan thlak in a hrilh hai thlak a, a hrehawm takzet bawk a ni. 

Ni e, a pa Khawsak dan tha lo leh nalh lo zozai te kha a hre ve a, a hai mawlh lo. A tan tihtheih a tlem em avanga haider thin mai zawk a ni asin. Tin, Zari hian a pa hi a hlau hle bawk a, chuvang chuan eng ang pawn lo khawsa mawilo mahse sawi theih a nei lo. A inrawlh ngam hek lo bawk. 

" I ngam phawt chuan hrilh rawh. Engatanmah ka ti lo e Hminglian" ti ve hmuk in Pu Ruata chu an nupa pindan atang a rawn chhuak a, vin em em mai hian pindan lehlam ami Zari a rawn ko nghal bawk. A pa kohna aw mawi lemlo tak a hriat rual chuan rang takin Zari chu a tlan chhuak dawr dawr a, a pa hmel pawh chu a en tha ngam meuh lo a ni ber e. 

" Lalzarmawi, I nu tawngkam kha ilo hre ngei anga, he kan chhungkaw chanchin hi tu bulah mah sawi suh ang che I hria em. I sawi chhuak tih ka hriat ni la la in I tan a pawi ang. Chu chu hre reng rawh" chu a pa tawngkam mawlh chu a tan chuan na tawpkhawk a ni a, hliam nasa tak a Siam belh sak bawk a. Fanu in a pa chanchin chhe lai leh mawilo lai a hriat vanga tawngkam dawn tur atan chuan a na mah mah bawk maithei. A mittui chu rawn tla in chhuatah chuan a far nghal zung zung bakw a, chhan let ngaihna pawh hrelo hian a roomah bawk chuan a tlan let leh nghal. 

Zari hian thian a kawm tam lo jn rual a pawl lo hle a, nula taptawm leh mahni a awm chet chet chi a lo ni bawk nen tin, a nu sawi tawh ang khan hrisel lohna avangin sikul a kal rei thei lova, heng vang te pawh hian pawn lam ah chuan thian a nei lo tih theih tluk a ni a, a hming in pakhat erawh chu a nei ve awm e. Chu a thian neih chhun chuan nitin deuh thaw hian a rawn len chilh ve thin a, an inngaina viau bawk. Chutia a thiannu ve ber in anmahni in a a rawn len chilh leh lai chuan Pu Ruata tlai leng chu pawr fe hian rawn haw thut in a fanu leh a thiannu inhnaih taka lo titi mial mial lai a han hmuh chuan a thin chu a rim zual ta em em mai a, Zari chuan a ngaihna a hrelo kher. 

" Lalzarmawi, I roomah lut rawh. Nangpawh Faki, min lo va haw san phawt rawh" ti nghal hmuk hmuk in Zari chu rang tak hian a tho vat a, a pa thupek ang  khan roomah chuan khur dar dar Chung hian a tlan lut nghal bawk. Hetih hunlai hi tlai thim thet thet hun tawh niin nu Hmingtei bazar chhuak erawh alo la haw ve lova, Zari leh a pa chauh chu in a awmchhun an nimai. 

Pindan a a luh hnu reivaklo ah Pu Ruata chu a fanu room ah chuan lutin thinrim hmel pawh kha a la pu reng tho a, Zari chuan a pa mawlh mai chu khur dar dar chung hian alo la thlir ve reng bawk.

" Pa" a ti hman chauh ang tih in a hmai chu a ri nghal țhuai a, a na kher. 

" Ka chanchin hi tu hnenah mah sawi suh tih kha ka hrilh lo che emni?" thinrim sehchilh nawk nawk chunga a rawn tih chuan Zari chu a hlauthawng zual hle. 

" Ka sawi lo. Khawiah mah ka sawi lo" rawn ti khur ve hlak hlak in Pu Ruata erawh a thinrim sosang zual sauh. 

" I sawi si loh chuan engtinnge i thiannu Faki khan a hriat theih. Tu in nge hrilh. Nang bak hrilh hre tu tur an awm lo tih hi ka Chiang khawp mai" rawn ti ve leh hmarh hmarh in a fanu chu a sawisa chhunzawm zel a, a samah țham in a kuai her sawk sawk a, a khât tawk hian a hmaiah chuan a ben sak leh pawp pawp thin. Zari chuan na a ti tawh in chhantu a mamawh takzet a ni. 

" Pa, I chungchang hi khawiah mah ka sawilo a, tu hnenah mah ka sawi darh hek lo. Sawi chi a nilo tih hrechiang tu ka ni ve asin" a rawn tih țawk țawk lai te chuan a pa mawlh mai chuan khum atang a hnuk thla a, chhuat ah chuan a chhir zui leh a, chil a chhak khum a a fanu chu pawi nasa tak khawih a man chhuak ang hrim in a diriam a a kut thak hnawih nan a hmang chhunzawm ta a ni. 

Darkar khat tlin tep hnuah Pu Ruata chuan a thil tih mek chu hre chhuak in a harh chhuak zui hawk mai. Thaw hlawi hlawi Chung hian a kut thlak tuar tu chhuat a mu hlawm reng a fanu ngei mai chu a han belchiang ta a. Khua a tlai zo tawh tih a hrechhuak chiah. Zari a awm tawh lo! A thi tawh! A fanu ngei mai chu ama kut tuar in, a taksa na lutuk chhiar Sen loh te avang chuan nunna nei tqwh lo in a mu hlawm reng a, a pa kutah ngei a thi ta a ni. 

Chu thil a han hriatchian hnu chuan rang tak hian a phone a phawrh zung zung a, tuemaw chu call in a thil tih rapthlak tak chu a hrilh ve nghal bawk a, lo Kal vat vat tur hian ava ti sek bawk. 

Phone a dah atanga darkar chanve dawn ah a hmei leh a Bialnu ni bawk kha hmeichhia ngei mai kha hmel a hlauhthwnna nasa tak lang chhuak chung hian rawn thleng chhunzawm ve in an pahnih chuan chhuat laia mu hlawm reng, nunna nei tqwh lo mi khawngaihthlak Zari ruang chu an thlir dun reng a, theh thang dan tur an sawi dun nasa hle bawk. 

" Tun atanga reilote ah a nu a rawn thleng tawh ang. Chumi hma chuan tihdan ngaihtuah a ngai" Pu Ruata chuan rawn ti țial chhuak ruaiin a thil tih pawi zet mai chuan inchhirna a pe a, hrehawm a ti ve hle tih pawh a hriat theih. Chutah, a hmeichhia zawk chu tho chhuak hluai in Zari ruang chu a hnuk sawn hmasa tu ah a țang ta a. Pu Ruata pawh kha alo inperh tho ve hluai mai. 

" Chawi rawh a ke kha! Tihdan ka hria" tiin pindan chhung atang chuan ruang chu an chawi chhuak aa, inhnuai kudam thim lamah an luhpui ta a ni. Chutah chuan Zari ruang ngei mai chu mahni intihlum anga a lan theihnan buaipui chhunzawm dun lehin an khai ta a. An kalsan ta a ni. Tichuan, khaw thim rual deuh thaw a rawn haw ve Zari nu chuan a fanu chu zawng kual chiam in Pu Ruata pawh khan a lemchan chu a chhunzawm zel a, a kut zala boral tawh a fanu awmna chin chu a ngaihven der ve ta zel Mai. A tawpah chuan tikhan Zari ruang awmna ngei chu thleng thla in a nu chuan a fanu, a duat em em mai nunna nei tawh lo ruang chu a zu hmu chhuak ta a nih kha. A rapthlak a ni. 

Hemi chin ah hian mumang ang mai a mang nei tu kei chu ka mu tui lai  harh chhuak zawkin ka thaw țha hleithei lova, ka  ri zui deuh bawrh bawrh bawk. Ka âwm chu dawm bet in tun lawk a ka thil hmuh zawh chiah te kha ka han ngaihtuah let a, a tak ang chiah anni tih ka hrechiang hle bawk. Zari hian hrilh tum leh hmuh tir duh min nei tih chu a chiang hle tawh a, chu chu ka hmu zo chiah bawk niin ka inhria. A nih chuan kha kha thil thlen dan diktak a nih si chuan kei hian tih ve tur ka nei dawn lawm ni. Hawi chhuak nghal zung zung in tunah chuan khua pawh alo var chiang kuar tawh bawk a tiin ka khum chu ka thawh san a, rang tak hian   UMapuii pindan lamah ka tlan lut nghal. 

Umapuii mu tui lai chu va sawi zui nawk nawk in tih harh ngei chu ka tum. 

" tho thuai teh Umapui, I tanpuina ka mamawh takzet a nia" ti zui bawrh bawrh in ani pawh chu reilo ah a rawn inperh tho ve nghal a. Ka Khawsak dan chuan a ti hrilh hai hle tih ka hre Mai. A meng â vek thei. Mahse, ka uang hauh lo a ni tih a hriat chian hnu erawh chuan in thing harh zui sawk sawk in

" Eng nge ni ta Kimbawih, Iva han hmanhmawh em em ve a" rawn ti chhuak in, kei chuan police station a min kalpui thuai thuai turin ka nawr ta sek mai a, a hawihai angreng kher. Mahse, zawi muang a tho chhuak zuiin a phun deuh nuah nuah reng a, a ngaihna chu a hrelo tak meuh a ni. 

Umapuii inpeih hnu chuan rang takin in chu kan Chhuahsan a, thu dang kan sawi tawh lo. Ding tak hian Police Station hnai ber chu ka panpui ta chawt ringawt mai a ni. 

Police Station chhung Kan luh rual rualin duty ka hmuh hmasak sak hnenah chuan ka tlu zui nghal rawk rawk hi a ni ber a. Ka thil hmuh leh hriat te kha ka theihnghilh hma ngei a sawi chhuah vek ka duh tawh a, Zari dikna chanvo pawhnise hmuh sak ngei chu ka tumruh hle. 

" Khang zawng zawng kha ka hmuh leh hriat chin te chu an ni a ka pu, khawngaih in min pui rawh. Tunah hian I duh phawt chuan ka hruai thei che asin"  ti zui nghal buan buan in chu police duty chu alo chek deuh hlak mai. A hreh tih ka hria a, ka thil hrilh zawng zawng te pawh kha a awih hek lo tih ka hrethiam bawk. Tin, ka thusawi lo hre pha ve tu ka Umapuii ngei pawh chuan min awih sak hran lova, hrehawm tih hmel zet hian ka bulah chuan alo țhu ve ngawt ngawt tawh. 

" Kimte, haw zawk mai teh ang. In lamah chiang zawkin kan ngaihtuah tha dun leh alawm tiraw. Hawh, I haw phawt zawk ang" rawn ti sar sar chung hian chu hmun atang a min hruai chhuah chu a tum hle a, mahse ka la țang deuh tlat. Mahse, darkar khat Chuang zet kan awm tawh Chung pawh a hmalak tumna hmel a awm tak awm loh ah chuan beidawng in ka thut hmun ka thawhsan a, Umapuii hnungzui chuan ka haw ve leh ta phawt zawk a ni. 

In Kan thlen hnuah pawh Umapuii chuan thil awmzia chu min la zawt uluk angreng hle a, sawifiah ngaihna pawh ka hre tawh lo. Station chhung a ka sawi ang bak kha chuan ka sawi chiang thiam tawh lova, thunei tute zawkin an finfiah te a nih si loh chuan sawi thui theih pawh ka nei tawh lo a ni ber e. Ngawi reng in room ah ka lut a, Umapuii zawhna tamtak te pawh chu chhan letna pe hran lo in ka ngawihsan ta daih a. Ka țawng peih tawh thlawt lo a ni ber e. 

Ka hna a Kal zai reng ngaihtuah lo in khumah ka mu tawm tlat a, engmah hi ka ti țha peih lo. Ka phurna zawng zawng te kha an bo vek nimai hian ka hre tawh. Chaw ei tur takngial pawhin ka tho chhuak peih lova, ka ngaihtuahna chu kawm in ni ka hmang liam a tih theih awm e. 

Police hnen a kan Kal atang in a ni thumna a liam leh ta. Hun hi ka ui thin mange. Mahse, tihtheih ka nei Chuang bawk silo. A khât tawk hian kha nula thlarau rethei Zari lah khan min rawn tlawh leh fo thin a, min ti hlau tur zawng in khawsa hran lo mahse a nuam Chuang hauh lo. Ni e, ani kha chu mihring damlai a ni tawh lo tih ka hrechiang em a, hmuh nawn fo pawh hi ka duh lo a ni. Mahse, eng nge duhthlan tur ka neih chuan. Tanpui na a beisei a a mamawh bawk a, a hun nghak in kei hi min thlir reng chu a ni si. Alo Kal Chang a kan inbiakna te hi ka Umapuii khan a awm hmun atang in alo hre fuh ve thin ni ngei tur a ni. Ka pindan ah chuan a rawn lut thut thut thin a, tunge ka biak tih hriat tum hian a hmanhlel thin hle. Engti ang pawhin ka bul lawka țhu Zari chu kawhhmuh ve pawh tum mah Ila a hmu thei miau silo. Umapuii chen hian ka tibuai a, ka ti ralti zo vek ka ti Mai. Mahni in chhungah takngial pawh a che zia a danglam a, a dawih zo vek tawh. 

A zan li naah chiah chuan kha mumang, a tak ang chiah si kha lo hmu leh in ka au chhuak ta chiam mai a, a rang a rangin Umapuii chuan min rawn buaipui nghal bawk. Tichuan khawvar hnuah ngaihtha thei tawh thlawt lo Chung hian police station ah bawk khan min va kalpui leh ta nge nge a, ka buaina ngai bawk chu hrilh in ka awmdan mak a tih theih zia te pawh a hrilh ta nghal vek a. Hetah hi chuan police duty te pawh khan awih lo Chung chungin min puih ve chu an tum ta a. A tawp a tawpah chuan amah that a a nunna hlu tak lak sak tu ama pa ngei mai Pu Ruata chu thu zawhfiah turin an hruai chhuak thei ta a ni. He thil chungchang hi Zari nu khan engmah hriat alo nei ve lo thung a. A ngaihzawng neih erawh a hriatpui chiang hle thung. Tichuan, Pu Ruata Bialnu kha hmeichhia ngei mai pawh kha police te chuan hruai veleh in thu ngai chiah chu zawh a ni veleh ta a. A tawpah chuan a țang zo ta ngang lo a ni ange. An inpuang ta nge nge a nih kha. 

Chutia a pasal leh a a pasal Bialnu in inthurual a a fanu, a hmangaih em em an tih hlum sak thu a han hriat rual chuan Nu Hmingtei chu a tliak hnawp a tih theih a, a lainatawm takzet. Ka khawngaih lutuk ringawt bawk. 

Tunah chuan amah that a a nunna tih tawp sak tu amah hringtu ni bawk Pu Ruata leh a hmei te chu dam chhung lung in tang tura tih niin chhuah lailawk khap sak an ni bawk ang. 

Zari hlim hmel leh ka chunga a lawm hmel hmuh tluk a nuam chu tun dinhmun ah hian ka tan a awm awm love. Bang lo in lawmthu min hrilh a, tih sak theih min neih pawh chu a chak viau tih ka hria. Mahse, a nei lo. Ka beisei lo bawk. Thlarau mahnise ka tanpuina a mamawh miau avangin ka pui a, phut let ka nei heklo. Tun atang chuan ani chu a awmna tur diktak ah a kal tawh anga, Keipawh in ka hna ka thawk leh tawh ang. 

Ni e, ani chuan he lei anchhedawng leh hrehawm tak hi a rawn ngaihtuah hah a țul tawh lova, hlim leh engthawl takin a chatuan hmun chu a pan tawh dawn a ni. 

Zari, ka ngai ngawt ang che. He lei piah lam ram ka rawn thlen ve hunah in tawh leh ngei kan tum dawn nia tiraw? 

******. ***************. ********  ******** ***********