A PÂR DAWN SI LO

A PÂR DAWN SILO! (True Story Based)

By __ Vanlalpeki Fanai

BUNG - 1

**************************

" I hna thar chu a nuam dawn bawk em? Nitin mai hah taka mi dawr nghah hlawh fo ai kha chuan a nuam zawk ang chu" Ka laizawnnu Sangliani'n a rawn tih chuan ka phone en lai chu dah thla in amah chu nui var var Chung hian ka va en ve vat a. Ani chuan eirawngbawl pahin a phone atang khan pasaltha thawnthu hi alo ngaithla ve mek a, ka khi zui sak thei. Pasaltha thawnthu ngaithla peih lo chi ka lo ni kher kher hi chu a hahdamthlak takzet. Chuti nilo se an zun ah te hian ka han uai ve ngei emaw a ni leh anga, ka hah phah leh dawn lutuk. 

" Nuam zawk daih e. Chubakah, hlawh nise a intam hleih hrim hrim a, a țha lutuk ringawt" ka û chu chhang ve in inbual tur hian bathroom ka pan nghal daih. 

Kei hi Zomuanpuii niin, ka kum 25na ka hmang chho ve mek a, tin, tunah hian sawrkar zirna inah hna te pawh hmu thar ve in ka thawk țan dawn chiah a ni a, tihian tulna avangin aizawla pasal nei ta, ka laizawnnu te chhungkua ka han bel ve rawih a ni a, ka pian seilenna erawh chu thingtlang khaw lam daih a ni thung. Ka unaunu te hian fa pahnih nei ve tawhin an fate pawh an fel ve tawh viau a, min ngaina fu lehnghal. Chutiang zelin Keipawh hian ka duat a, ka ngaihsak em em reng bawk. A upa zawk Mimi-I hian school te pawh lut ve thei tawh in a nau Puipuia erawh chu țawng zir thiam țan ve chauh ala ni thung a, a pangchang thin ve nasa. 

Ka thawhna thar ah hian kum laklawh lutuk a lak luh ka nih angin tihtur hmabak nise ka ngah phah bik hle a, ka chau ve ngawih ngawih thin a ni. Ka Ú te chhungkua lah hi naupang nawi nei tih takah hian an buai ve thei em em a, chau hnêp a In thlen tawh hnuah pawh hahdamna tur awm thei lo reng reng, nau te hi lak chhawk leh țhin lawp lawp in ka len kualpui fo bawk a, Chung hunah chuan a tlangpui thu in ka u mopui nu, an kawm thlang lawka cheng leh khawsa ve tho UDuhsangi te inah chuan ka Chuang kai ngun ve viau. Ani lah hi mi tawng duh tjh takah, mi hi alo titi pui chiam zel a, duh aia rei mah len Chang pawh ka nei ve ta fo awm e. 

" Tihian chhangchhe ho karah I tal tam deuh anga, pasal tur chu ila hmu ve thuai mai ang"  nui awr awr chunga UDuhsangi'n a tih fiam fo te chuan za lo angreng tak hian ka lo nui liam ve leh mai țhin a. 

Ni khat pawh naupang ho  nen bakw chuan an inah khan kan leng thla leh tawh a. Hemi ni hian school kan chawlh ve avangin ka u fate pawh chu ka awm nileng țhak a tih theih a, naupang ninhlei lutuk tihtur an nih loh avang hian a hahthlak em em hran loh hlauh. Mahse, hemi ni hian UDuhsangi te chuan mikhual tlangval an lo nei ve khiah pek a, ka han hmu thut kha chu ka phu zui ve zawk thei hial nia! A chhan diktak pawh ka hre tawh bik lo e a. 

" E, Mimite, lo leng ru. Hei Muante, vawiin chu ka nau alo thleng thar ve a, kan bulah hian a rawn khawsa ve rih dawn a nih hi. Thenawm inhnai tak kan ni bawk a inkawmngeih ru aw. Inkawm rual lek in nih hmel bawk a" UDuhsangi bawk khan lo ti zung zung in, buk nghat nghat pah hian ka lo nui ve var var mai. Chutihlai chuan a nau tlangval pawh kha rawn thu chhuak ve zat in, a kut te chu a rawn phar chhuak nghal a. 

" Chibai. Lalhriatsanga ka nia. Hriata min ti Mai dawn a nia. Chuan, Muani maw I nih" tih pah hian Kan han in chibai zui nghal a. Keipawh chuan a ngainat awm thei ang ber tura nui sang Chung hian ka hmingpum te chu ka lo hrilh ve a, a duh dan dan a min ko tur chuan ka ti nghal zat bawk. A kiai ve ta sak mai. Ava hmeltha tak. UDuhsangi te unau hi an lo hmeltha a nih hi ka ti ta. UDuhsangi pawh hi tunah chuan chhangchhe nu ni tawh mahse la, a nulat lai thlalak ka hmuh tawh atang kha chuan nu hmelchhe lo tak leh ama tawka luck ve thin tak a nih pawh ka lo ring tawh thin a, ka ring sual lo tawp ang. 

" Ka nau hi tun atang chuan kan bulah a rawn khawsa ve tawh dqnw a, hei, post office lamah driver hnaruak rawn bawhzui in a tling ve ta hlauh a nih hi. A zin kual Zak Zak tawh mai a ni ang chu" UDuhsangi bawk in a rawn tih leh chuan sofa pakhat chunga țhu mek a nau Hriata pawh kha alo țhen ve sak sak reng a, min rawn melh leh ralh thin bawk. A mitmeng te saw, ava han pa chiangkuang tak. Ka single lai a ni lehnghal a, a rawn Kal fuh reuh hle mai. 

" Nia, thian dang kawm tur em em ka nei Chuang bik lova, min kawm hreh loh phawt te chuan kan inkawm char char tawh dawn a nia" kei chuan lo ti veleh in amah kha awmze nei fe hian ka va melh pah ve ralh ralh reng a, ani pawh kha a bang bik Chuang lo. Mahse, vawikhat inhmuhna te ala ni ve a, tlem chuan a zah ve hmel hlek in ka hria. 

Hemi chin hi chu Hriatsanga nen pawh khan Kan inhmu chho mawlh mawlh a tih theih hial a, chenna hmun inhnaih tih takah kei lah hi tunhma atanga leng lut tam sa ka lo ni ve tawh bawk nen, la innel em em hran lo mah Ila kan inbe ve bawrh bawrh tawh thung a, a nuam phian. Mahse, amah zawk hian a hna thar kha a zawm tawh avangin zin chhuak tam chi alo nihna laiah in chhungah chuan hmuh tur a tam lo sawt viau a, a chhuah vahna lamah te khan Bialnu alo VA nei hman ang tih te hi a nia ka hlauh. A palian in a hmel nise a țha a, a pa hrak mai bawk a, a engkim mai kha hmeichhe tana duan bik niawm reng a mawiin a fuh vel vek bawk si nen, a luck viau ang tih hi ka ring a, amah lo hmu ve thin tu nula dang thleng thleng chuan ka thik thei mai dawn in ka inhria. Ka ning. 

Nitin mai a in Kal pawh thin ta chu, inhmuhna hun te kan lo ngah lo thei lova, a zin haw hian eng engemaw hi ka nau te, ka u fate pahnih chu rawn hawn sak ve thin in, tunah chuan a chhaih ve thei tawh viau a, naupang te pawn ani chu an ngaina tawh takzet bawk. Tin, an In lama Kan len thlak loh Chang te pawh hian amah zawk chu rawn leng chho ve fo tawh in, ka u lah hian alo fiam ve leh zuk thin a, a Zak thei fu lehnghal. 

" Hriata chu nula rim nachang te i rawn hre ve a, I fel hlemai. Lo leng ziah rawh aw"  ka û in alo tih chang te hian nui put put chungin 

" Nula pawh a nilo, ka thianpa a nih hi" te hi min ti leh daih zel a. Nula leh hmeichhia ang ah hian min ngai duh lo reng reng mawle. A rilru taktak a sawi chhuak em tih phei chu hre Chuang lo mah Ila ka lunghnur ru thei viau. 

 " Vawiin chu min lo nghak la, haw rual ve Ila" ka message dawn thar chu ka bih zui ta run run mai. Chutah, nui deuh sak chunga chhang let ve in

" Awle, in bang hma ve thei dawn emni?" ti let nghal vat in, Hriatsanga pawh chuan rang em em hian min rawn reply ta vat a. 

" Bang hma dawn e. Nangni ai pawhin kan bang hma hial ang" a ranw tih chuan ka lo nui ve sak sak reng a. A phur awm duh angreng hle mai. Tichuan, chanchin inhrilh leh tura in tiin kan inbiakna pawh Kan ti tawp zui a, hna lamah chuan rilru pek a hun leh ta. Ka nui ver ver reng tawh mai a ni. Ka thawhpuite ho hian ka hlim em em chhan hi rawn hre ve ngat se zawng, min chhaih fiam leh luai luai tawh ang chu. 

Tlai dar 3 a rik rual chiah in hna chu kan bang a, hmanhmawh ru angreng tak hian office pawh chu ka Chhuahsan ve nghal. Chutah, kawngpui ka han chhuah chhoh rual in Hriatsanga bike kha ka han hmu nghal a, amah pawh kha a bulah chuan lo ding ve in a phone a phawrh a min rawn call a tum a ni ngei ang. Um ka ring dik. Ka phone a rawn rik rual rual chuan rang zet a lo pick up nghal in  ring fe mai hian

 " Hello" ka han ti nghek mai a. Ka awmna la en chuan a rawn hawi rang angreng hle. 

Kei lah chuan lo nuih zui nghek nghek Chung hian

" I van phu nasa em em ve Dawiha!" lo ti pah uarh uarh in ka thin chu ka dawm a, ka la nuih lui ngat ngat. Ka hmel a rawn hmuh fuh takah chuan za fahran lova khi ve suk suk Chung hian lai tih hriat zet in

" VA han â thei tak aw"  ti sup in a bike ah chuan in tha zo fahran mai hian a lawn kai nghal tharh bawk a, a dinna chu ka thleng zui ve ta vat. 

" Min lo nghak rei em?" thawk lak hak pah a ka tih zawh rual chuan a lu chu rang em em hian a ranw thing zui ve ta nawk nawk a, 

" Rei lo. Ka thleng ve chiah lawm. Lo thu la, kan Kal mai dawn emni?" rawn ti veleh in kei erawh chuan ka chhang let tawh lem lova, ngawi reng hian bike ah chuan ka lawn kai ve Mai bawk. 

Speed pangngai taka Kan tlan delh delh lai te chuan amah chu kuah beh tlat chak viau mah Ila ka ngam thlawt bawk silova, ka kut pahnih te pawh chu ka hum ruh leh ngar ngar thin. Chutia ngaihtha fahran a ka lo hawi ve veng veng lai chuan kan tlanna kawng chu inthlak thut in Kan in lam kawng Kan pan ta reng reng lo tih ka hre chhuak thut pek a. Ka harh zui kawk kawk tawh nimai hian ka hria. 

" Hey, Khawnge Kan Kal dawn a. Kawng I bo tihna emni?". Hnung lam atang chuan lo deuh chul in ani chu a rawn nui nghawr ve leh dar dar thin a. Ka ner zui nasa hle. 

" Ngaihtha tak khan awm rawh. Ka hriatna chu ka la hloh em love" rawn ti ve lehzel in kei chuan a ngaihna ka hre lo telh telh. 

" Kan kalna tur hmun chu sawi mai mai teh. Ka ngaih iti tha miah lo a nia" lo ti zui leh hram in, ani chu a ngawi chhunzawm ta hmak mai. Min chhang let duh tawh lo rneg reng nia. Chutia mahni veng ni lo lam kawng hlir kan zawh hnu chuan dawr lian ve tak pakhat kawtah hian a bike bawk chu a ti ding zui leh ta chawt a, a ngaihna hrelo zet hian kei ka lo hawi kual ve reng ringawt thung. 

" A reilo ang" tiin chu dawr chhungah chuan a tlan lut nghal zuaih a. Chhanna pawh ka pe hman lo a ni e. Tichuan, a sawi ang tak tak khan reilote hnuah rawn let ve leh maiin Sarang dum ah hian thil engemaw ni a rawn khai chhuak țat țat mai bawk a, min la ranw nuih suk zui lehnghal. Ka lo nuih let ve Mai bawk. 

" Ka hman leh tawh e"  zawi sap a rawn tih pah hian in tha zo zet bawk in a bike ah khan a rawn kai nghal a. Kan tlan chhuak ta nal nal. 

" Eng thil nge ni a"  tia ka lo nuih var var lai chuan ring fe mai hian

" A ho lutuk. Birthday gift tur mai mai" rawn ti liam puat in kei lah chuan ka hmui ti sawi bâr bâr Chung hian

" Hmm, I chhass pek tur a nimaw. Chocolate a ni chiang mai"  lo ti let vat in, ani chuan ngawi a chuh leh ta tlat a. Min chhang let duh tawh lo reng reng mawle. Hmm, a Bialnu a pek tur a ni chiang mai. He pa hian chhass a nei lo emaw ka lo ti ve char char a. A hnathawhna lamah Bialnu thar alo va chhar ta nge maw ni le. Ka rindan te hi thudik an nih ngat chuan ka tan hian a lawmawm dawn loh takzet a, tin, a bulhnai a Khawsak leh amah lo biak a, lo kawm ve te pawh a inthlahrunawm zo vek dawn niin ka hria. A ruk hian a hrehawm zui veng veng thei nia. A nuam miah lo. 

Kan in kawt a min drop lai te chuan hlim hmel ka pu lui hleithei tawh lova, mahse, engkim mai kha  tih lan chhuah vek erawh a tih chi Chuang bawk silo. Ka hah zawk. 

" Tinge. I nuam sam meuh lo emni?" min rawn tih chuan ka lu chu lo thing zui ve nawk nawk in ka nawm thu leh, tlem a ka chauh ve hlek thu chhan ka lo chhang let mai a, ngawi reng hian min en zui ta veng veng. Chutah, ngawi reng a ka chal rawn deh leh pah chuan

" I khua chu a sik silova, khawi maw I pum te hi a na zawk emni?".  Tih pah a ka pum rawn khawih fiam a tum lai chuan tum loh deuh hian ka lo nui chhuak ta hak pek a. Ani pawh kha a bang biklo, a nui zui ve ta var var. 

" Um, a nui thei ta. Lut tawh rawh le. Hun a awm chuan zan lamah inhmuh kan tum dawn a nia" ti leh zung zung in a bike ah bawk khan a lawn kai leh a, kei pawh chu ka lo bu zui ve ta nghat nghat ringawt. 

Zawi zet hian in chhungah chuan ka lut ve ta hnak hnak a, ka û khan mjn lo en duh kher. 

" Va chau awm ve a, I ril te a țam em?" lo ti ve sawk sawk in kei chuan a țam loh thu hian ka lo chhang let vat a. Roomah chuan lut tlang lehnghal in ka inthlak zui ta sawk sawk. 

A sawi lawk tawh ang ngei khan zan lamah pawh a rawn leng lut veleh ta ngei a. Kei lah khan ka Chimawm lo chhuah in

" I Bialnu i rim dawn lo emni?" ka lo ti zeuh pek a, ka chal chu a rawn ri zui fawk mai. 

" Ngeiawm viau thin lo teh" inlak nuih mawi tum zeta a rawn tih leh chuan a malpui ah ka lo sik zui hrep. A thuhrim in tunlai chu he pa hian eng thil nge a hriat ka hre bik lo. A nungchang nise a tir lam ai khan a danglam chho in, ka bula a Khawsak dan hrim hrim pawh hi a danglam ta vek a, a inthlak nasa a tih theih ang chu. 

Kan inhmelhriat tirh atanga kan innel țan lai vel te kha chuan hmeichhia ang ah pawh min ngai miah lo a nih kha. Tunah ve thung erawh chuan min dim thar ta em em a, nula diktak treat in min treat ve tawh te pawh ti Ila Kan sawi sual tam lo ang chu. Hemi zan pahw hian zan dang a a tih ngai hauh lo ang takin phone pawh min khawih san duh ta miah lova, ka bulah chuan a țhu tluan ve Zak. Chu mai pawh chu la duhtawk lo in a haw dawn a ruai ah hian

" Sunday chu leng ve Ila" ala rawn ti ham ham zui a. Sawitur pawh hi min ti hre tawh lo zozai e a. Len chhuahna tur chi hmun nuam deuh ka hre ve thin bawk silo nen. 

Hemi zan atang hian a mizia, nungchang engkim mai chu a danglam chho țan ta taktak tih ka hrethiam a, inrinni chhunah te pawh hian hna chu kal bik thin mahsela a hun awl neih rual rual in min rawn be fo thina, min rawn call chhen zel bawk. Inrinni tak phei hi chu ka hun awl neih ve ni a nih angin mahni in lamah tihtur ka lo ngah ve viau thin si a, phone takngial pawh hi ka khawih tha hman mang meuh lo. A call te hi han chhang hman lo hlek Ila vin fe mai hian 

" Call kha la ta che. Eng ek em nge i tih a" te hi min rawn ti leh nghek thin a, min ti hrilhhai thin viau a ni. A Bialnu angin min treat nge, a unaunu emaw angah min ngai zawk tih pawh hi ka hrethiam tawh lo. Engtia awm tur nge tih pawh hi ka hrethiam lo tak tak tawh a ni. 

" Sawi tur hre lo deuh hian mi hi I rawn rim ve thin a, pick up loh hlek in min hrawk hrep bawk a, sqwi tur tak tak hre ngai Chuang der silo" tum bûr chunga ka phun nuah nuah lai chuan ani chu rawn nui chhuak ve hak hak in ka darah min rawn kuah zui a, 

" Kan kalna hmun hi a nuam ngawt mai

Ti rawh, saw lamah sawn va țhu thlan dai ve phawt ila"  lo ti leh daih in, chu tlãng pawng lai taka thut hahchawlhna tur an Siam lam chu kan pan dun leh ta a. Ka la tum bâr bâr reng tho. 

Vawiin hi Sunday niin, a sawi lawk tawh ang ngei khan tihian hmun pakhat ah Kan han leng chhuak dun ve ngei chu a nia, ka khawr vek hian ka inhre tawh. Sawi tur zawng zawng a bo zo va, awmdan tur ka hre lo vek tawh a, awmze awm lo hian ka hamhaih kual vel ni ta ber in ka inhria. 

" Kan eitur ken te hi ei zo ila kan haw leh mai dawn a nia"  awi! Kan VA han zeilo dun lulai tak em. Nui rah rah Chung hian amah bawk chuan chips bawm te chu a han hawng kual leh den den a, ei chakna em em pawh hi ka neilo zo. Kan awmdan hi a hahthlak ka ti. 

" Ei ang le" a rawn tih leh sap hnu chuan kiai sak sak chungin ka lo bu ve leh nghat thin a. Ka zak ru veng veng reng mai. A sawi ang khan eitur kan ken ang ang te kan ei zawh hnu chuan tih leh tur em em pawh hre tawh lo hian Kan haw zui ta vang vang. In lamah chuan kan inkawm chhunzawm ta ringawt bawk a. 

Ka unaunu lah khan nui har har Chung hian 

" In leng chhuak dun ve ngei chu a ni si a, sawitur te in va hre ve maw. Nge, in va hawi vel mai mai" nui uarh uarh Chung a a rawn tih chuan keini pahnih chu kan lo lai chhe leh vek tawh a, a ruk hian Kan lo in melh leh hrek hrek thin ringawt. Mahni lo mah a zah tawh sa naklaiin, unaunu hi chu min ti Zak zual thin ngawt mai. 

" Mate, Hriatsanga nen hian in ni ve țan deuh tihna nge. Tunlai chu hmuh dun tur hi in tam riau in ka hria a" ka û chuan zanriah ei lai hian a rawn ti chhuak ve khauh pek a, ka meng kual zui ralh ringawt. Bei zia lo thin teh e. An pa, UThansanga ala awm ve reng lehnghal a, ani pawh kha za em em lem lo hian alo nui ve var var reng in ka hria. Unaunu hi chu min ti Zak thei chet chut ngawt mai. 

" I bei zia lo em mai a. Hriata nen te chuan thian bak kan ni hleinem. Chubakah, kan inhriatna pawh ala rei lem lova, inngaihzawn nghal rum rum te chu" tum vuau chunga ka lo tih chuan UThana pawh kha a rawn inrawlh ve ta vat a. La nui deuh vur vur Chung hian

" Ni ngawt mai. I u hi chu a hmanhmawh thei leh lutuk a" lo ti ve zat in, ka u lah chu ala nui chhuak hak leh ta nghal a. 

" A ho mai mai" a ti duh chauh lehnghal. Ka va melh rang zui ta nghek. 

Zan riah eikham rual rual hian ka u fate pahnih chu Hriatsanga te In lamah ka tlan thlak pui leh vat a, ka u te pahnih mawlh khan min chhaih leh ang tih chu ka hlau a ni ber awm e. Mahse, in chhung kan luh rual chuan Hriatsanga hmel hmuh tur a awm lo nghal a, mitmei hmang hian ka zawng pah ruai bawk. Chutah, Hriatsanga farnu UDuhsangi kha ka lam pan a rawn phei pah hian

" Zanin chu Mama pawh khawi lamah nge maw a len chhuah ve teh tlat ni. Zanriah eikham rual khan a bike a ti nung vut vut a, a bo zui ta vang vang mai. A kalna tur nise a sawi miah lo lehnghal a" a rawn tih chuan inrinlawkna pawh awm lo hian ka nghing dawt a tih theih ang chu. Chhan ngaihna tak pawh ka hre lo zawk. A hna lamah emergency a nei nge ni a nga, thildang vang zawk ni ang. Ka hrethiam tawh lo kher. Ka țhu mai mai pawh chu ka nghet lo zo vek tawh a, ka bet lo takzet. Rilruah Hriatsanga ringawt kha a awm tawh miau bawk si nen chumi zan pawh dhyan rei tak ka leng zui peih ta lova, naupang ho pawh chu ka haw pui leh ta ringawt. In chhung kan luh rual rual in room lam ka pan nghal nal nal a, eng dang mah ngaihtuah lo hian khumah chuan phone khawih in ka mu zui hmiah. Mahse ka muhil mai thei ta chuang lova, rilruah hian thil pakhat chiah a rawn awm ngut ngut reng tawh a, heti em em a amah ngaihtuah vanga ka muthilh theih loh pawh hi ka lo ring ngai lo asin le. Mak pawh ka inti zawk hial e. Kei hian ani kha thian satliah lo ang deuh in ka lo en tawh zawk tihna emni? Ka duh emaw duh lo emaw tun a ka rilru puthmang leh Khawsak dan ah hi chuan ani kha ka vei a, ka bialpa ang mai in la en țan tawh tih chu ka hrethiam mai. Lalpa, min pui la, hetiang rilru hi min put tir lo hram teh. Min lak kian sak tawh rawh. Ani nen kha chuan thian mai chauh kan ni a, kan inkarah hian boruak tha lo Siam a thlen tir tu nih ka duh miah lo. Khawngaihin. Rilru a tawngtai mawlh mawlh Chung chuan na zet hian ka phone te chu ka hum zui leh vang vang thin a, ka mittui chu a rawn luang ve ringawt nia. Tinge maw, ka soft em em thin le ka ti. A hun lo thin ngawt a ni. 

Chumi zan chuan zankhua mai in min rawn be ta lo bawk a, ka hrethiam lo. A tuk hna ban dawn ah erawh chuan min rawn text tha ve leh maiin, amah lo nghak tur chuan min ti veleh mai bawk a, zan hmasa lama a kalna kha ka zawt chhuak ngei ngei ang. Ngawi reng in a reh zankhua țhak thei a nia, ti awm ang lo ve em bawk a ni. 

" I hman tawh em. Ka lo thleng"  call hmang a a rawn tih chuan ka lo thaw hmasa leh hak phawt a, 

" Ka lo Kal" ti bul leh hmak in call pawh chu ka off zui a. Mak chu min ti ru ve tho ang mawle. 

Ka rin lawk ang tak takin a bul ka han thlen chhoh chuan ngawi reng hian min lo melh ta kar mai a, nui hmel a pu hauh lo lehnghal. Tlem chuan min ti zam ve lek lek thei mai. 

" Ti nge i hmel chu. I nuam sam lo ve deuh emni?"  lo ti nghal zung zung in kei chuan ka lu chu ka lo thing ve Mai a. Thildang min zawh belh tawh lem lo hian  a bike ah khan a lawn kai nghal tharh. Ka ngawih tak reng avang chu nimaw, nuam lo a ti leh deuh pwh a ni maithei, amah bawk chu rawn țawng chhuak hmasa ah țang leh in

" Nawm sam loh te chuan sawi ve Mai tur a nia. Hna ah pawhnise kal loh mai tur" a sawi zawh rual rual chuan kei lah in

" Nizan khan Khawnge i len bo daih a. Kan lo leng ve em em a"  ti nghal zat in, a zawhna kha chu ka chhang lo hle. 

" In lo leng maw. Nia, nizan kha chu ka thiante ho in inhmuhkhawm an rawn rawt ve tlat pek a, ka va Kal zuaih. Ka haw har lem lo"  lo ti ve leh maiin, ka ngawi zui ta daih thung a. Ka țawng peih tawh lo. Chutah, bazaar lamah chuan min tlanpui luhpui zelin  ice-cream dawr kawtah hian min din pui ta thut pek a, ka la ngawi reng tho.

" Ka reilo ang" rawn ti sap in a bike atang chuan a chhuk sawk sawk a, dawr chhungah khan rei pwh va awm lo in ice-cream pahnih chu a rawn keng chhuak leh ta va va mai a, mawi zet hian ala rawn nui phei var var zui. Ka mood hi a fuh phah leh tep tawh in ka hria. 

" Kha le" tiin pakhat zawk chu min rawn pe nghal a. Ka lo ban ve Mai bawk. 

" Thupha chawina ice-cream a nih kha!" a rawn tih chuan za lo fahran zet mai hian ka lo nui chhuak ve ta hak pek a, fiah zet in  min lo la en kar reng chu niin, ka nui lehnghal hmak thei. 

" Thupha chawi I ngai emni?" ram hmak a ka lo tih chuan muangchang a rawn buk deuh nghat pah hian

" Nizan vang khan. I lo leng ve em em a ka lo vak bo daih bawk sia. Nakinah Ice-cream aia țha zawk ka la leisak ang che"  rawn ti zui lehin chu lau hmun chu kan Chhuahsan ta nge nge. Kawng tluan mai hian a fiamthu thawh nuihzatthlak loh zet zet te chu nuihpui ve vur vur reng in, in Kan thlen hnuah meuh chuan ka mood pawh kha inthlak danglam tawh tak a ni a, ka hlim zui ta viau. 

" Pa pakhat lui kal pawh khan sangha manna tur lèn a ken theihnghilh avangin tumbu a khawrh haw daih" tih vel te hi a fiamthu thiam ve chhun an ni țhin a, nuihzatthlak lem loh hle mahse a sawi tu khan a zir em a ka hlim pui zui ve viau zel. 

Hemi chin hi chu boruak pawh a țha chhunzawm leh tawh viau a, kan pangngai zui ta fu. Kan û te pahnih lah khan keini  chu mjn fiam chhen reng tawh lehnghal a, an hriat dan ah tak phei chuan inngaizawng nghet tak hi kan ni tawh zawk mawle. Thil te lah hi an hre thui lo ve  sia maw. An ngaihruat na hi ka duhthusam ni mahsela tun dinhmun ah erawh chuan ala harsa lutuk ringawt. Kan zei lo dun ve chiang em a ni. 

" Muanpui, mipa hi ngaihsak ve tawh rawh

Tunah pawh duh em em tu che an awm ve reng a, I be țha peih lo thei lutuk a, hlawh tam tawk nei ngat lehnghal" thiannu Ruathlui thin lah hi a. Tunlaiah sum hian thil ti thei in Chung nung tawh viau mahsela mipa sum ngah nazawng hian min hip ve lem lo asin. Hmangaihna leh rinawmna chiah ka dah hlu thung. Tin, a hmasa zawk bawk. 

" Hlawh tam mahse a nungchang khan min hip hleinem mawle"  nui rah rah Chung a ka lo tih chuan a hmui chu min rawn tih sawih khum in a meng rang kual vel te te phawt a, min ei loh hmel viau a ni. 

" Tunlai khawvelah chuan sum hi alo hlu a thil a ti thei ber tawh bawk. Awi! Hmeichhe rang chu nise he pa kher hi chu an bawh huam huam tawh ang mawle. Tunah pawh doctor Fanu in a hel mek an ti lehnghal a. Che chhuak ve tawh teh" rawn ti si leh zat zat in kei lah chuan ngai pawimawh lo tih hriat fe hian

" Duhsakna ka hlan e. Chubakah, mipa zawk pawh se dinhmun inthlau lutuk hi chu nakin hun a tan ka duh chuang hauh lo kei chu. Mahni tum tawk hi hria ila an fel phawt te chuan a nghei theih tak tak loh" lo ti veleh nghal in, Ruathlui chu a ngawi zui ta hmak. A ngaihdan a nih loh hmel viau bawk a ni. 

A chanchin kan sawi mek hi min ngaizawng a min rawn be ve fo tu Ramchhuanmawia niin, zep thu a cheng lo, mi hausa fapa a ni a, Aizawl mi hlun chhungkua atanga lo chawr chhuak ni bawk in, a pa hian sumdawnna lian tak mai a bei ve reng a, a hlawhtling hle a, tunah chuan Mizoram khawpui lian hmun thum ah hian in leh lo țha tak tak leh dawr lian tak tak te pawh neiin, Aizawl bikah ringawt pawh hi a in țha tak tak an hung thluah ta awm e. Tin, hotel leh cafe changkang tak, lun zet mai hi an nei tel bawk a, an cafe kan va chawlh ve thinna atang khan a nia kei pawh hi min lo hriat țan tak ni. Tin, he an cafe enkawl tu ber pawh hi amah chu niin, a kut a awm deuh tawp hi a ni a, chumi piah ah ka thiannu Ruathlui nen hian tunhma khan an lo inhre ve deuh sa bawk nen, thil reng reng chu a nih tur angin a thleng ta te pawh kan ti thei ang chu. Pawi ta ber erawh chu, amah hi ka mi ngainat zawng leh ka mi duhzawng a ni ta lo tlat lai hi a niawm e. Hmel leh pianphung ah pawh sawisel tur em em chu hre Chuang lo mah Ila a chapo hmel ka han ti tlat pek a, ka ngaina theilo bur. Khatiang a kei min lo ngaina ve tih ka hriat hnu atang phei kha chuan an thil Siam te pawh tui thin viau mahse an cafe chu tlawh nawn leh ka duh ta hlek lova, mahse, Ruathlui bulah khan ka phone number chu lo dil ve in a khât tawk hian min rawn ve ta sek mai sia. Ka ning thin viau a ni. Hriatsanga hian min hriatpui ve ta se eng angin nge thurawn min pek leh ang tih hi ka hre chak thin khawp mai. Mahse, hrilh hriat loh law law kha ka duh zawk bawk si nen, tihian eng thilmah thleng lo ang maiin ka ngawi ta hle hle zawk a nih rih hi. Hrilh pawh ni ta tehreng ila tihngaihna vak a hriat bik ka ring lo. A nui leh suk anga, be chhe lo turin min ti leh tawp bawk anga, a zo der. Mawl chet chut lutuk mai. 

" Ka piancham a hnai tawh sia, eng thil nge min pek ve ang" pangchang aw taka ka han tih chuan chiang zeta min rawn en pah hian a hnar chu a tum zui ta dat a. A hmui te pawh chu a ti sawi kual vel. 

" Naupang pawh I nih tawh loh kha. Engatan nge thil pek te chu itih" rawn ti let kher in, ka hlap chak lutuk hi ka za chhuak nghal vek thei in ka inhria, sual thiam leh lutuk mai a. 

" Naupang tan chauh thil pek hi dawn tur tih a awm hleinem. Pawi lo, min pe ve lo mai rawh. Ka tan hian ilo uikawm hle tih ka hriat phah a, a țha tho mai"  ti zui hlak in a bul atang chuan ka kalsawn nghal a, thutthleng dang ah ka va țhu zui ta hmak. 

" Deuh duah zel a che. Titau hma thei leh lutuk mai"  nui var var chunga a rawn tih chuan melh pawj ka lo melh tha duh tawh lova, ka tum deuh bûr reng bawk. Ka lungawi lo hmel te hlei hlei chuan a nuih chu an ti za zual Sawt emaw tih mai tur hian nui vur vur chungin ka bulah bawk chuan a rawn insawn phei ve lehnghal a. Chutah, 

" I present tur te chu ka lei lawkna a rei tawh mai. I lungngai hma lutuk thin a nih kha"  rawn ti țha ve leh maiin, kei lah hi mi lungawi hma chi tihtak ah, a thilsawi te chuan min hnem leh zo vek tawh a, ka mood pawh chu chawp leh chilh in a danglam zui nghal vek bawk. Chutah, amah bawk khan

" Titau hma si, thlem sam bawk si. Nang hi chu i țha ve Mai Mai ngawt mai" tih pah a min rawn kuah bawk nawk takah chuan tihluihna pawhh awm miah lo hian Ka nui chhuak leh ta ver ver mai a. He pa lakah hi chuan ka thin hi a rim rei thei thlawt lo ni berin a lang. A bulah hi chuan famkim riau niin ka inhre thin a, ka thla a ti muang hliah hliah a, ka hlim bik viau thin bawk. Mahse, duh ai hian ka lo pangchang leh mah mah thin a, hei hi chu insiamthat ve hlek a țul dawn a ni. 

Naupang test tur buaipuiin hun ka hmang chho ve a, ka piancham hnai tual tual leh Kristian te hunpui krismas lah nise alo hnai ve tual tual bawk si a, rilru chu a kal kual nasa duh kher. A phâwk lek te pawh a ni zawk mah ang chu. Tun chu kum tawp lam tihtakah Hriatsanga pawh hi a hna lamah a buai zual ve viau a, khaw hrang hrang ah te zin kual leh tawhin a Chang phei hi chuan signal awm lohna hmunah te a Kal thut Chang a awm thin a, chutiang hunah chuan a khawharthlak duh thin viau. Ani hi ka nun a a rawn inlan hma kha chuan mi pakhat ve Mai niin, ka u fa, naupang duhawm takte pahnih buaipui a infiampui ve thin mai kha ka ni a, mahse, Hriatsanga ka hmelhriat hnuah erawh chuan thil reng reng te pawh hi danglam zo tawh in reilote chhung lek a hmel hmu lo pawh hian ka awm thiam mang tqwh lo ka ti Mai a. A buai zual changa a han biak theih loh leh a han reh hmak thin mai te pawh hi tawrh hrehawm tih Chang ka ngah ta khawp mai. Ka ngai veng veng thin a nih ber chu. Ni khat lek a hmel hmu lova awm hi tuar hrehawm ka ti a, ka awm thiam tawh mang lo. Chutihrualin, Ramchhuanmawia thung kha chuan min rawn be ve eng ang mahse la ka chhang tha peih ngai lo thung a, ka lunglen vawrtawp lai pawhnise ani kher kher kha chuan min hnem zo lo ka ti ve tlat. Zan lamah te hian vawi tam tak min rawn rim ve a, rawn len ve ngei te pawh tum thin mahse la ka lo hnial fithla țhak zel a, chhuanlam Siam in ka nawm sam loh thu leh mut tawh thu dawt hlang hlak ka lo hrilh thin. A awih a ngem tih phei chu hre hauh lo mah Ila min nawr lui lova, ka duh lo Chung min ti lui ngai bik lova, chu chu a that ve na awmchhun niin ka hre ta ber. 

" Krismas hunah in khaw lama haw chhoh te i tum em?". Hriatsanga'n a rawn tih chuan rang zet hian ka lu chu ka lo thing zui ve nawk nawk a, a nui ringawt. 

" Keipawh hi ka haw chho hman lo ang. Kan hna lah hi emergency a Pai ve si a, I haw dawn bik loh phei chuan heta krismas hman ka duh daih zawk "  ti Chung hian uluk leh fiah em em in min ranw chhuk melh nghal ran mai a. Ka lo nuih ve var var mai. 

"Nia, kei chu duh pawh ni Ila ka haw hman lo hrim hrim. Kum thar țiak rualin exam Kan hmachhawn nghal dawn a, krismas pawh hi nuam taka hman a har dwn khawp mai"  lo ti let ve siam Siam in ani chuan dik tih hmel fahran hian a lu te chu alo bu zui ve nghat nghat reng a. Sawitur dang chu kan hre zui leh tawh lo hle. 

" Happy Birthday 🎂!"  zing zingah, Lalhriatsanga han bengchhen zia chu aw. Sana chu bih nghal thuak in zinga dar 6:30 chauh ala ni zui lehnghal a. Zan lamah khan naupang test paper tur ka buaipuina lamah duh aiin ka lo mengrei hlek a, ka tho hma ta lo zo vek. Room atanga ka chhuah phei ve lai chuan ka chhungte ho pawh kha lo tho kim vek tawh in an lo vei suau suau tawh mai a. A nuam lo duh kher. Tin, Hriatsanga pawh chu rose par Sen kuang khat keng va va Chung hian sofa pakhat ah alo thu deuh ar ar tawh a. Ka hmel a rawn hmuh rual chuan za lemlo tih hriat zet in a rawn nui ve ta vur vur. 

" I piancham tukah em te hi chuan tho hma ve la. Nang aiin ka lo Zak zawk"  a rawn ti khanglang. A sawi zawh rual khan choka lama eirawngbawl mek ka unaunu lah kha za em em mai hian ala rwn nui chhuak hawk hawk leh ta nghal a. Hemi te pahnih hi duh aiin an inthurual deuh mah mah thin ka ti. An over mah mah. 

" Khawi" tih pah hian a rose par rawn ken pawh chu a kut atang chuan ka phih thla nghal nawk pek a, hnim zui leh vang vang in inphih fai tur hian bathroom lam ka pan  san ta daih. Min wish hmasa ber tu chu nimahse la ka lo dawngswng tha lem lo tih ka in hrechhuak. Nge, ka hmel a hmuh rual rual a min hauh nghal ringawt teh ei! 

" A nute, happy birthday"  tiin ka hmai phih zo chu ka unaunu fate pahnih chuan min lo kuah bet nghal chûk chûk mai a, an pahnih chuan a rualin ka pawm nghal lawp mai bawk. 

" Ka birthday a nih manah vawiin chu thil tui deuh kalo hawn sak ang che u aw" ka han tih leh phei chuan an ni pahnih phur lutuk mai chu ri zui nghal teng tung in an bengchheng zui ta kher. 

Hriatsanga pawh kha lo la thu ve reng in, ka hmel a rawn hmuh leh rual chuan a thut hmun chu a thawhsan zui thuai a, min rawn melh pah zeuh Chung hian

" Ka'n haw phawt a nge. Tlai lamah inhmuh leh Kan tum dawn a nia" zik mar ar ar pah hian a rawn ti a, chelh khaw tlai theih pawh a nilo, hna kal ve tur tho kha ala ni si a tiin kan inthlah liam leh ta phawt. 

Nileng in naupang test ka vil tluan Zak a, nileng han tih lem ah, chawhma chhung a ni zawk ber ang chu. Chumi hnu chuan naupang zawng zawng chu haw tir vek in keini zirtirtu ho erawh cuan office ah thut khaw muan hun kan nei leh te te phawt a. Chutah ka piancham a ni tih hria in ka thawh pui te ho khan cake lian ve pangngai tak hi min order sak ta maia, min lawm sak leh phawt. Ka hlim takzet a ni. He school ah hian a junior ber ka ni rih Chung pawhin ti khawp hian min ngaih pawimawhna an ti lang thin a, ka tan chuan hei bak bak hi chu a awm thei tawh pawhin ka ring lo hial. Ka phulo takzet bawk. 

Cake te kan ei zawh fel hnu chuan haw turin kan insiam zui leh ta sang sang hlawm a, chutihlai chuan ka phone kha alo ri ve leh sek tawh bawk. Mahse, Ka'n en nak chuan Hriatsanga call alo ni reng a. 

" Teh hlawl che chuan" ka han ti nghal tawng a, a lo nui zui ve ta hak. 

" Haw hma ka dil a, in bang hma dawn tih kha ka hre bawk sia ka lo nghak che"  rwn ti leh ringawt in, rang fe hian pawn lam chu ka han thlek chho ta vak vak pek a, a bike ang deuh lo ding reng pawh chu ka han hmu ta ngei e. 

" I va han over tak. Ka lo Kal nghal"  ti zui leh hlak in office chu ka Chhuahsan nghal nal nal a, kawngpui ka han thlen chhoh chuan nui deuh sang Chung hian min lo en reng tawh. 

" Happy birthday nawn leh! Ala hma bawk a khawiah emaw kal kawi lawk ang hmiang" rawn ti nghal zat in, kei chuan ner deuh nang nang Chung hian

" Kal kualna tur I neih leh vang a nimaw ilo haw hma ve a" ka thin chu a rim leh ringawt dawn e. Ka ning thin. 

" ni nang. Ni deuh tho. Mahse, I tel ve na tur chi a nia. Kal rawh a tlai hma hian kal teh ang" rawn ti leh zung zung in bike ah chuan min hlang chho ta nawk nawk mai a, ka Zak lutuk ringawt. 

" Che muang lutuk a nih kha!" ala rawn ti hram a. Tuman min hmu lo hlauh a a tih zia viau e. 

Kan tlan chhuah hnuah chuan thu dang pawh sawi tawh lo in Aizawl khaw pawn fianrial lam chu min pan pui leh ta a. Ngaihthat lohna chhete mah ka nei hran lo. Ka bula awm hi tunge tih ka hrechiang thawkhat a, ka thla hi a muang ve tawk. 

Fianrial, mihring hmuh tur tam vak lohna hmun a thut hahchawlhna nuam zet pakhat ah chuan min din puiiin, bike atang khan min pawm thla leh a, eng nge a hriat pawh hi ka hre thin lo. Keimah chauh pawn ka chhuk ve thei reng tho sia. Hm, a tha ve hrim hrim e. 

" Tah hian thu ang"  tih pahin thutna lamah chuan min kai phei zel a, ka la ngawi kar reng mai. 

" Kha le" rawn tih leh pah hian Kan thut fel hnu lawk chuan present box lian vak lo leh nalh angreng fe si chu mjn rawn pe in, ka lo en deuh ngawt ngawt. Hetiang thil hi tih nachang a hriat ve tak tak pawh ka lo ring ngai lo asin le. Ka kut khur ru dar dar Chung in present chu ka han hawng chhin a, a chhungah chuan chocolate manto em em chi leh perfume bûr tereuhte, changkan hmel viau si hi alo awm ve ran mai a! Ka nui zui ta sak. 

" Hetiang hi I rwn tih ve kher pawh ka phut taktak lo asin le" zawi te a ka tih lai chuan a Chimawm rawn chhuah in 

" Keiin ka tih sak loh che chuan tihsak tu tur che bialpa takngial pawh I nei ve silova!" a rawn ti leh khanglang a. Ka melh rum zui ta nghek. Alo nui ve Mai. Tin, he chocolate ka hmuh hian thil pakhat hriatchhuah ka nei nghal zawk thei a. Kha mi tlai, hna ban rual a kan inphurh haw țum a a lei haw kha a ni tih ka hre nghal mai. Hmeichhe dang a pe daih twh ang chu tih laiin tihian min pek tur atan alo la kawl tha ve reng chu a ni awm sia. A fel ve chiang alawm. Chutah, 

" Ka lawm e aw" ka tih rual chuan rang zeta ka hmui chu rawn hup phui nghal in ngawi reng leh uluk em em si hian ka mitah tak chuan min en ta vang vang mai a. Min rawn fawp thut a nih chu mawle! Ka inrin lawk loh lutuk na lamah khan chhan let ngaihna pawh ka lo hre ve mang lova, meng kur Chung hian ka lo in dawh Mawl ve tawp ringawt. Min țhawng em a tin ni. Tichuan, rei pawh chutiang a kan awm leh hma chuan in la hrang zui vatin a hma aia uluk leh chiang zawk khan min la en ta reng thung a, ka melh let ve kar ringawt. 

" Muanpui, ka duh che. Ih, ka hmangaih bawk che niin ka hria! Min pawm ve thei a ngem?" zam angreng taka rawn tih pah chuan ka kut te chu a hum lum zui vang vang mai a. Ka mur deuh sung sung thei tawh in ka hria. Ka Zak bawk si. 

" Min chhang la" tih pah a ka khabe a rawn dawm beh lai te chuan awmngaihna tak pawh ka lo hre leh tawh lova, ka buai zo vek. Amah bawk in

" Ka mitah hian min en teh" a rawn tih leh tak sap ah erawh chuan hreh zet leh tha khur ru dar dar Chung hian a mit chu ngam leh ngam lo in ka han melh chho ve ta hram a. Min lo la en kar. 

" Min duh ve em tih tal hi sawi la. Min duh lo a nih pawhin ka ti lui lo ang che. Ka nghak thei bawk che" a aw thawp mawi em em te chu tuar zo thei dawn lo in ka inhria a, eng thil hi nge ka la nghah a, he pa hi hun rei tak ata kha ka lo nghak tawh zawk a ni lo em ni? Eng aiah nge tunah hian ka la ngawih reng. Hun țha zawng zawng paih a in nghah liam tir hi ka duh hleinem, rilru a ti mawlh mawlh Chung chuan 

" Ka duh che alawm" zawi sap hian ka lo ti let ve ta nge nge e. A hmel a lawmna nasa tak lo lang chhuak mawlh mai te khan min va han ti hlim tehreng em. Ka piancham ka hman ral tawh zawng zawng ah tun hun hi a hlu in ala danglam ber a, ka theihnghilh thei tawh pawhin ka ring lo hial zawk e a. Ka hlim takzet a ni tunah hian. 

Chhanna ka pek hnu chuan lungchim taka min rawn kuah leh vang vangin kan ngawi dun ta reng a. Tunah chuan ani nen hian hma hun suangtuah tur Kan nei ve thei ta a ni e. Ka hlim khawp mai. 

Ni e, ngaihzawng hi ka la ngah lo khawp mai a, khang kal liam ta te ho kha ka hmangaih lova ka duh lo thin tihna ni lo in, a hunlai chuan ka duh in ka vei ve em em vek tho. Mahse, kan mihring tawn tawh te ah hian keimahni a danglam bik leh thawk na bik hi chu an awm thin chiang a ni tih pawh he Hriatsanga atang hian ka hre fiah ve ta kuarh in ka inhria. Ani hi ka tan a danglam bik a, a țha tawk bawk a, ka rin zawh tur leh rin ngam tur ngei mipa a ni tih hi ka Chiang viau bawk. Ani hian min tih nat a min phatsan duh hi ka ring ngai lo bawk a, ka ring phal bawk hek lo. Hma hun hria leh swi lawk thei mihring chu ni lo mah Ila keimah ah hian fiah in a awm ka ti Mai a, kei in tihnat ka duh dawn loh ang bawk hian ani pawh hian kei hi min tih nat a ka mittui tla lai hmuh hi a duh bik ka ring hauh lo. Ka hlim theihnan engkim a ti thin zawk a nih kha. Tin, a tan hian ka awm reng ang tih pawh ka intiam nghal ni rawh se. 

×*****************************