HOTEL JOHN__7(LAST)

HOTEL JOHN__7(Last) 

Vanlalpeki Fanai

*****************

Damdawiin ab chuan rei pawh awm zui lo in release ka ni thuai a, ka dam tha tawh angreng viau bawk. Ni e, ka taksa chu a dam mahse, ka thinlung zawk hi hliam in a awm tawh a, hei hu engtikah nge a dam ve tawh ang ka hrelo. A nat dan hi a thuk in a ril em a, a ti dam thei tu ber in a hnawh khat leh anih loh chuan he thinlung ruak leh mal tak hi mahni chauh a mal tlat in a hawi hai dawn hle a nih si hi. 

Zan riah eikham hnu a chanchinthar ka han en nak chuan Samuela case pawh kha chinfel thuak tawh niin, tunah hian Jail chhungah a chunga ro an rel dan tur nghak in a awm ve mek tih ka hre ta a. A dam chhung zawngin tang se ka duh ngawt a ni. Tv chhunga hmel lo lang mawlh chu uluk taka lo thlir in kha zan rapthlak zet kha ka mitthla ah chuan a rawn in lan chhawk zut zut reng bawk a, ka chhungte min koh mawlh mawlh na pawh chu ka lo hre tawh reng reng lo niin. 

" Bawihi, Johna pawh alo harh tawh e an ti a nih chu aw" ka nu in a rawn tih sap chuan min deng deuh dawt ni ber hian ka hria a, kal nghal rum rum mai chu ka duh. Ka țhu mai mai te pawh chu ka bet tawh lo hle tih hrethiam in ka pa chuan min khawngaih ta dehh a ni ngei ang, a motor la chhuak in Chuang ve tur chuan min rawn ti ta nge nge a, phur angreng tak leh huphurh ru bawk si chuan ka Chuang zui nghal vat. 

Damdawiin Kan thleng a, ICU kan thlen leh hnu chuan rinai takin amah hmu tura rawn Kal then leh rual te pawh an lo thahnem tawh angreng phian a, mahse, a chhung a luh ve chu ka dil tak tlat avangin kei erawh min phal sak ta hram a nih kha. A nu leh pa ten ka hmel an lo hmuh rual chuan Sir Johna awmna lamah min pawt hnai vat in, a nu zawk khan

" Mama, hei i thiannu kha. Ila hria em. I ngaih em em thin a hmjng pawh I lam rik fo thin kha, I hre tawh lo emni? Lo be ve ta che" a țap zui nghal hlawp hlawp. 

Ni e, khum Chung a mu mek chu amah Sir Johna ka bialpa ni ngei mai leh ka mipa hmangaih em em kha la ni reng mahse la tunah erawh chuan thil engkim hi alo danglam zo ta si. Min hria ang pawhin a awm ta hauh lo a nih chu! Ngawi reng hian min en vung vung reng a, a kut te chu khawih sak tum in chelh sak ve mah Ila alo duh ta hauh lo mai! 

" Ka hriat zawng ini silova, min khawih lo mai rawh. Ka Bialnu a thinrim palh ang" rawn ti hluai in, mittui karah chuan ka han nui chhuak leh hak phawt a. Bialnu a nei thin tih chu ala hre ve tho a nih dqwn hi ka ti. Harsa takin a nu leh pa te pwh hrilh hriat a ni tawh a, kei erawh, min hrechhuak leh tur chuan hun ala duh deun hlek in ka ring. Mahse, in hriat chhuah tir ngei erawh ka tum a, ka ti ngei ngei bawk ang. 

Damdawiin an Chhuahsan hnu pawhin rei rial lo hian ka va kan ve fo thin a, a eitur duhzawng a bikin, chicken momo mawlh mai kha Keima Siam ngei ka ken sak thin bawk. 

" Khawiah nge in awm ve a. Tunge i hming?" tia a zawhna te pawh chu tha taka chhang zel in, dawhtheihna ka zir tel bawk a, ka thei Sawt viau e. 

" I hming chu a nalh hlemai. Ka hriat tawh hnu te pawh a ang dawn dawn alawm" a tih te chuan keimah ah hian lawmna nasa tak rawn Siam in, ka lawmna te hi a beitham Sawt si a, mahse, engtikah emaw chuan ani hian min la hrechhuak leh anga, alo kir leh ngei ang tih hi ka ring tlat. Eng dinhmun ah pawh ding se kei chuan ka phatsan in ka kalsan ngai dawn lova, ka la pawm reng zawk dawn a ni. 

Nitin mai hian ka hun awl neih dan a zirin a bulah chuan ka tap chawt thin a nimai a, ka kalbo san rei thei lo. Tunah chuan min la hre chhuak lem lo mahse min ngaina ve tawh viau a, a thian chhar thar ang mai a min ngai in a khât tawk hian min tihtauh khum te pawh a ching ve thin. A bik takin ka hmel a hmuh har deuh Chang te hian a lungawi lo ve thin hle a, ngaihdam te hi kan in dil leh lwp lawp zel Mai țhin a ni. 

Tunah chuan motor khalh ka zirna ah pawh zir chhuak ve thlap tawh in, license thleng a pek chhuah ka ni tawh a, ka pa motor chu a rim thei tlauh tlauh hle. Nia, ka scooty nen ringawt kha chuan Sir Johna  len vah pui chu thil harsa tak niin car tal ka khalh thiam ve a țul tiin ka zir ta kha a ni a, tin, ani lah hian khawi khawiah emaw len chhuah pui alo beisei ve thin nen, ka thiam ngei ngei kha a țul tlat a ni. Ka enkawl dan zawng zawngah hian a chhungte chu an lawm em em rualin an inthlahrung ru takzet thin tih pawh ka hria a, lawmman tha taktak min pek te pawh chu tum hial thin mahse la keimah zawkin ka duh lo. Lawmman beisei a ani hi enkawl ka ni lova, dawn let duh ka neih awmchhun chu a hmangaihna chiah kha a ni e. Min hrechhuak leh se la, hman ang tho khan min hmangaih leh se tih chiah hi ka duh. Chu chu lawmman hlu berah ka ruat anga, a hlawh chhuak tur pawhin thih tha nen ka bei ngei ang. 

Zan khat pawh zan rei tawh lamah hian Kan thenawm khaw thlirna, amah nena Kan lo Kal dun tawhna thin ngeiah khan kalpui lehin a hmel chu uluk tak hian ka en ta vang vang a. Ani erawh chuan ralkhat a Aizawl veng thenkhat eng pe tuarh lam chu hawi in, ngaihtuah muk tak nei ve niawm tak hian a ngawi reuh vang vang reng a. Tunhma a ka koh thin dan ang tho kjan

" Sir" ka han ti ta sap a. Ani chuan phawk fe mai hian min rawn melh zui nghal vat. 

" Tinge khatiang khan min koh Vee ziah a. Sir tih chi pawh ka nih loh hi" nui suk chunga a rawn tih chuan ka lo nui ve ringawt. 

" Ka tan chuan hman atang khan ka boss leh ka sir, ka engkim ini daih tawh alawm" lo ti let ve in, ka mitah pawh min en leh tawh lo hian a thlirna ngai bawk kha a thlir zui leh ta daih a. Chutah, thawk rawn lak deuh halh pah hian

" Helai chu nuam ka tih chi tak a nih hi. Ka kal tawhna hnu a ang ti dawn ila, ka ke lah chu heti hi a ni si a" rawn ti chuai raih in, a kut kha rang zet in ka lo chelhsak leh ta vat a. Nui sang Chung hian 

" I Kal fo tawh alawm sir. I ke hi hetiang a a awm hma hian a hmeichhe hmangaih em em nen khan in Kal dun tawh thin asin" mittui tling piau chunga ka lo tih ve chuan mak tih hmel fe hian min rwn melh zui ta vang vang a. Kan in en ta tlawk tlawk. 

" I hria maw? I ke that lai hi inti ve ziah hlawm a, hriatchhuah theih lah ka nei Mang bawk silo. Chuan, ka Bialnu chu i hre thin maw?" rawn ti ve in, kei chu ka lo bu zui ta lawp lawp. Ka mittui luang mai tur te chu hru ru leh zeuh zeuh thin in bei hi ava ti dawng tak em. Lalpa, min pui rawh. 

" Hotel ah khan I Kal duh em. I tlawh khât tawh bawk si a" ni dang daih a ka va tih chuan mak alo tih hmel lehpek kher. 

" Eng hotel. Khawi ami!?" rawn ti let deuh hu in, kei chuan thawk chhuak ve hawk pah hian

" Ihmaw Sir, nang hian Aizawl mai pawh nilo, Mizoram pum a hotel lian ber leh changkang ber I nei asin. I hre tawh lo a maw" tiin eng khaw sawi set set lo chuan a thawmhnaw bawm chu ka hawng zui leh ta rawk rawk mai a. Ngawi reng hian min lo thlir ve ta reng ringawt. Chutah, a damthat lai pawh a a rawn hak chhuah fo thin coat suit nalh fahran mai kha phawrh chhuah sak in ka hak tir zui ta mawlh mawlh mai a. Ka chei gel chhung zawng chuan bang lo in zawhna hi min lo zwwt ve char char reng a, a rultawk te te bak in ka chhang let lem Chuang lo. 

A wheelchair chawp in car ah chuan amah chu kan pawm lut leh a, tichuan, a nei tih pawh a inhriat tawh loh a hotel lam pan chuan kan chhuak dun leh ta a ni. Staff ho hnena ka lo sawi lawk vek tawh ang khan hotel kan va thlen chuan thawk tu awm zawng zawng te khan lo hmuak in, zahna chibai hi an lo buk tliar tliar hlwm bawk a. Nuam a tih ve hmel takzet. Hotel chhungah te pawh chuan staff engemawzat te khan zahna chibai lo buk zui zelin ani chu lawm tih hriat tak hian a han hawi kual zung zung a, Chutah, ka thin ti phu dawt thei tur hian ka dawhkan, Receptionist thutna dawhkan ruak huai lam chu va hawi in, ngawi reng hian uluk em em in a melh zui ta veng veng mai a nih chu! A mitmeng ah khan lungvhhiatna tamtak inthup awm tlat hian ka hre lehnghal a, chu mawlh chuan min țhawng takzet a ni. Chu lam hawi a minute 10 dawn lai hun a hman ral hnu chuan a office lamah Kan chhoh pui zui ta vat a. 

" sir, keimah ka ni tih hi la hre chhuak lo mah la, ka awm ve thin tih erawh hi chu i hre chiang alawm tiraw?" rilru ti zui neuh neuh in a hmel chu ka han en leh țhin a, ka mittui bawk hi alo hnai leh vat zel. Mahse, ka beidawng dawn lo ka tih tawh kha. A tawp ka thleng tep tawh a, kawng laklawh a bansan leh thei ka ni tawh lo tih ka inhria. 

" Khawnge min kalpui I tum leh tak" ti a rak nawk nawk in, a pa nen chuan a dan ngai te khan car chhungah bawk kan hnawh lut leh ta rawk rawk mai a. A lawm lo kher. A thut fel rual rual in kei chu ka tlan chhuak zui ta vang vang a, farm house lam kha ka pan pui dawn a ni. 

" Nang hi, min blackmail I tum chiang Mai" nui rah rah chunga a rawn tih chuan ka mit sir hian ka lo melh ve leh zawk thin a, ka nui chhuak lek lek. 

" I pa pawhin I kalna tur a hre ve vek a, ka blackmail peih lo mai che. I chhungte khan an khul leh duh silo che anga, nei daih rawh min ti palh ang" nui har har chunga ka lo tih chuan rang zet leh thutak fe hian

" Min nei daih anga a țha zawk alawm" lo ti zui zauh in, ka va en leh chuan pawn lam alo thlir zui leh daih a. Ala nui tha duh hauh lo lehnghal. Ka kiai ve ta sak ringawt. 

Kalkawng ah chuan eitur leh Siam tur te lei phei in a hmun kan han thleng fel chiah chu maktih hmel em em hian a thlir zui ta vawng vawng mai a, a che zia chu ngawi reng hian ka lo tjlir ve ta reng ringawt. 

" Farm house" tia rawn phun chhuak sap in, kei chuan beisei nei tak hian amah kha ka bih hnai nghal vat a. 

" Aw.. I farm house kha. A dang eng nge Ila hriat chhuah sawi zel rawh" lo ti zui sawk sawk in, 

" Heihi ka farm house maw!?" a rawn ti leh ta hu mai a nih chu. Beidawng zet a thaw chhuak halh Chung hian muangchang in thlam lamah chuan ka nawr phei ta daih a. Kawngka hawng tura ka rik rak rak lai te pawh chuan a khât twk hian

" Farm house. Hei hi ka farm house " tiin a rawn phun chhuak leh țhin a, ala hlim pui viau leh ta nghal. Kei erawh chu ka tûm deuh bûr tawh ringawt. Ka njng zozai. 

" I farm house a nih hi. Theihnghilh tawh suh ang che" lo ti let hmuk in, thlam chhungah chuan ka nawr lut ta a. Light ka han on Kim vek hnu phei chuan a chhung chu hmuhnawm hmel a tiin a hawi kual nasa ta mai a. Mahse, a hmel ah khan hriatchhuah engemaw tak nei hmel a put reng avangin beiseina sang tak nen kei chuan kil khat atang in ka lo thlir ve char char thjn a. 

" Eitur ka Siam sak ang che aw. Mahse, hetab chuan chicken momo a awm theilo tih kha hria la, tui deuh in I duh dan tak khan rice ka Siam sak dawn che nia"  ti leh in, choka lamah chuan ka nawr phei zui leh a. Alo bu ve nghat nghat ringawt. 

Chair a kan in thut fel tir leh hnu chuan kei chu eitur Siam in ka buai zui ta char char a, ani erawh chuan a thut hmun atang khan choka chhung vel chu hmuhnawm tih hmel tak hian alo thlir kual vel a, a khât tawk hian a rawn chek leh hlak thin bawk. 

Reilote ah zanriah tur pawh chu peih fel in rice chu ka han barh hmasa leh te te phawt a, hetia ka tih chhan chu eng dang vang ni lo in a duh ang tawk a a kut pahnih te kha ala hman that theih loh vang a ni pakhat. Tin, a hmuh phak a ka awm tawh phawt chuan ka barh ngei hi a duh thin bawk. 

" Wine I duh em" ka han tih chuan rawn dak chho he haw in min melh zui leh ta kar. Hman ang tho kha a ni. A mi melh hi a na in a thuk bik ngawih ngawih zel a, tun thleng pawh hian ngai ah ka la nei thei lo chu a nih ber hi a. 

" Chaw eikham hnuah le" rawn ti fel ve Mai in, thil ka ei puar tir hnu chuan sitting room lamah ka nawr phei leh ta a. Keipawh chuan hmanhmawh ru zet hian zanriah chu ka ei zui ve ta mawlh mawlh mai. 

Sitting room ah chuan țhu dun leh ren rawn phawt in kan puar a tlak fel hnu chuan wine bawk kha kan lem dun leh ta a. A kai hma kher. 

" Hetah hian riak mai ang aw" tih pahin wheelchair ah bawk chuan ka hlang leh a, tichuan khum awmna lam kha ka pan pui ta a ni. Sawi buai neilo hian ani chu a ngawi reng a, ka khawih dan ang ang khan a awm Mawl tawp mai a ni. 

A taksa lum nuam leh deh nuam tak mai chu duh thawh fahran a kuah bet in, ani erawh chuan min kuah nachang pawh hre lo hian a mut ngai reng in alo mu khawng ve ar reng a, a che eih lo. Chung chuan thil tamtak min ngaihtuah chhuah tir in Helai a kan pahnih chauh a zan hun kan hman dun lai te khan ka kuah let ve thlahlel takjn alo awm ve awm chu a ni si a, tihte ngaihtuah kai chho in kha zan thil thleng engkim mai kha a mal te te hian ka chhui kir leh ta dap a, ka ngai takzet a ni. Ka bul mai a mu, ka khawih phak reng a awm mihring hi ka ngai a, ka mittui luang chuan a ban puam lai chu far huh vek tawh in a rawn tawng chhuak ta nge nge 

" I țap emni?" rawn ti sup in, kei chu ka lo ri zui ve hraih hraih reng tawh a. 

" I pawi ka sawi emni. Tap tawh suh a nuam lo a nia" a rawn tih leh pawh chuan ka țah chu a chhuak tulh tulh thei a, ka insum leh thei ta ngang lo. In beng kang rawk rawk in a hmui ah chuan chiang em em mai hian ka han fawp zui ta thlawt mai a le, alo meng bial ve pawp pawp thei ni hial in ka hria. Rei pawh fawp lo hian ka in la hrang zui leh ta vat a. Ka inthiam lo ru hle bawk. Mahse, ka tihtur ang ang chu ka ti fel vek tawh a, sût leh theih a ni tawh lo. Chumi chin chu eng thu mah sawi tawh lo leh, eng thilmah ti chhunzawm tawh lo in Kan mu ve țha ve ta a. Ka muhil har lem lo bawk. 

" Tho tawh la" zaidam taka a rawn tih ri ah chuan ka muhil lai chu harh deuh zawk in ka inbeng kang nghal zawk thei a, ka lo mu rei lutuk chu ka inthiam lo ru tawh kher. Mahni duh dan dan a che thei lo damlo enkawl tu ka ni a, chuti chen chen han mut san mai chu a zahthlak duh in inthiam loh a na duh kher mai. Tho sui sawk sawk in ner nawng nawng Chung a  lo la mu khawng reng ka bialpa chu zawimuang hian ka han tung tho leh ta a. A nuihzatthlak duh lo takzet. 

" Tihpalh tihpalh" tiin bathroom lamah ka nawr lut vat a, amah zawk k chu a rawn inthiam lo let daih lehnghal. 

" Ka bulah chuan riak duh tawh suh. I duhtawk a mutna hun I nei thei ngai dawn lo a nia" rawn ti ve in kei chuan engahmah ka ngaih loh thu te thupha te chu ka lo chawi zui leh ta chiam zawk a. Chiang zetin min lo la en ve reng mai. Chutah, kan mood chu thlak danglam tum in

" Tual zawlah khan han infiam lawk ang hmiang" lo ti daih in, a rawn nui zui ve ta var var mai. A chak ve tho tih pawh ka hrethiam ta chiah. 

Tual zawl lamah chuan in nawr chhuak leh in ball te ka ben pui a, nih loh leh rannung thlawk te um pui in, phengphehlep nalh zet pakhat phei kha chu man ngei tum hian Kan in nawr kual dun nasa hle. Hlim dun tak Kan ni. Eng ang mi pawhnise, amah a nih chhung chuan a bulah hian ka hlim thin a, ka zangkhai phah in ka thla nise a ti muang tawk bawk. Ani hian min mamawh ang tho in Keipawh in a let za tamtak in ani hi ka mamawh ve bawk a, chutiang mai a awlsam in ka kalsan theih hi ka in ring tawh lo. Ani hian beidawng taka min Siam a min kal luih tir ta te a nih ngawt loh chuan chuti mai a awlsam a beidawn pawh chu ka tum lem lova, eng thil chiah nge ka tih theih tih hi hriat fiah a Khawvel hi hmuh tir ka duh a ni ber e. Engpawhnise, a hmasa ber a tan chuan a hmangaihna ngei mai kha neih let leh a min hriat chhuah hun nghah hi ka tihtur chu a ni tawh e. 

Chau hnap in in chhungah kan lut leh a, a ngai te bawk khan ani chu ka ei rawng bawlna bulah chair chungah thut tir in, gas lam hawi hian keiin ka hnungchhawn ve thung a. 

Chutia ngawi reng a kan awm dun melh melh lai chuan thawklehkhat ah fiah zet hian ka hming ngei mai khan min rawn ko ta a. Ka thil tih lai pawh chu ka tawp zui ve chawt thei. 

" Tunah khan min ko em" tia hawi let in ani chuan fiah em em mai hian min lo melh ta reng mai a nih chu. 

" Rosalind, Ila da maw!?" rawn ti chhuak leh sap in mjn la en reng a, Keipawh chuan ka melh ve reng. 

" Sir" țah aw țiau a ka han tih chuan a mittui tling piau mai chu alo khap hnan ve sak sak tawh. 

" Hnathawhna ah chiah khatiang kha chuan min ko thin rawh ka tih che kha"  a rawn ti leh ta a nih chu. Hei hi thil taktak a ni thei a ngem? Lawm em em in a bul lawkah chuan ka tlan phei nghal a. Ka kuah zui ta chawt bawk. Ani pawh khan a theih ang anga min lo kuah ve chu tum in 

" Rosa, heihi ka mumang chu a ni lo tiraw? Samuela'n hliam mjn hnutchhiah hnu khan hriat zui ka nei tawh lova, I thi ta emaw ka ti hial asin. Ilo la Dam chu ka va han lawm tak em" tiin hnai em em ah hian Kan in melh dun ta reng a. Tichuan, muangchang in min rawn fawp zui ve ta a ni. Ka duhthusam te chu an thleng dik ta. Ka dilna chhan in a awm tih ka hria a, rilru zawng zawng in Pathian hnenah lawmthu ka sawi nghal mawlh mawlh mai. 

Hetiang hian Sir Johna hi a țha hlen tawh a ngem ka hre hauh lo. Mahse, ka tawngtaina erawh chhan sakin ka awm tih ka hria a, ka lawm a Ka hlim bawk a, chuvang chuan khaw chhung lama kir leh vat vat pawh ka chak thar ta viau. Ka duh ruk ang ngeiin tukthuan kan ei fel hnu chuan kan haw dun ta ngei a, mahni in pawh pan ta lo hian an In lam bawk chu kan pan zui lehnghal. Chuta, a chhungte nen an han inhmu leh zet chu lawm avang hian mittui a luang lo theilo a ni e. A nu phei kha chuan ka chungah hian lawmthu a sawi bang theilo tihtheih a ni a, mahse, kei a thil tih rah nilo in Pathian thatna vang zawk a nih thu ka lo sawi zel. 

" Ka fapa, tunah chuan engkim hi a țha leh tawh dawn niin a lang bawk a, I nau Samuela chu ngaidam mawlh mawlh rawh aw. I hriat angin chhungkua, thisen inhnai tak kan ni si a, a zahthlak in a mualphothlak takzet a, a hrehawm ngawih ngawih bawk a nia" pa ber in a han tih chuan Sir Johna chu alo bu ve nghat nghat. Mahse, 

" Ka ngaidam fel vek tawh e. Mahse ka pa, ka ngaihdam vang khan engkim hi a that phah leh dwn tihna a ni lova, chuvang chuan a phu tawk hremna pawh chu hmu ve se la, a nun dan tha lo te hi a sim tih a chian hma lou chuan jail ah pawh awm rawh se" lo ti zui hmak in kei leh a nu, nu ber te kha kan lo bu zui ve nghat nghat. Ni e, jn ngaihdamna hian eng rah tha mah a chhuah dawn silo a nih chuan kan tawrh tur leh kan phu tawk mil hremna chu kan paltlang ve phawt tur a ni dawn lawm ni. Sual hi ngaidam zel lo in en liam zel lo ila, hei ai hian Kan ram in hma a sawn ve zawk angem? 

" Engpawhnise, vawiin lam chu court ah pawh ka va in lan ve a nge. Chumi hma in intih fai phawt ka duh ang" Sir Johna'n a rawn tih leh chuan amah chu kalo melh ve ngar ngar tawh a, ani pawh chuan kei chu min rawn melh zawk Chung hian

" Rosa, I duh chuan lo va haw hmasa la, hna kal te i țul dawn bawk nen. Chawhnu lamah ka rawn hmu dawn che nia" rawn ti leh zung zung in Keipawh chuan haw phawt chu ka lo duh ve tawh bawk nen, tha taka in enkawl tura kan in chah leh Luam hnu chuan ka haw san ve rih ta phawt a ni. 

Sawi tawh ang khan tun hnai te hi in kalsan mang lova in awmchilh râwt Kan nih vang nge, chutia kan han in hmu lo zuaih tur ringawt pawh chu amah ngai in ka khua a Har zui nghal em em thei a, theih chu nise, run hmun a len dun a inthlah tawh lo tura kumkhua a tan tih ve tawh te pawh ka chak ru ngawih ngawih. Mahse, tun dinhmun ah chuan buaina leh chin fel tur tamtak nei mek ala ni si a, a rilru ah pawh khatiang lam kha chu a awm kher lo maithei a ni. 

In ka thlen lai hian ka nu leh pa te pawh lo la awm ve in, zawhna an lo ngah leh nasa mai a, Keipawh chuan thil awmzia leh thlen dan engkim te chu felfai takin ka hrilh ve mawlh mawlh bawk. Ka lawmna tluk zet in an lawmna kha a sang ve ni mai in ka hria a, ka nu phei chu a mittui hru nuap nuap Chung hian a nui leh sak sak thin hial a nih kha. 

Hnathawk turin hotel ka thleng fel tawh a, tunah chuan chhun lamah pawh mahni chiah a duty tawh lo in ka partner tur receptionist ve tjo pakhat chu lak belh a ni ve tawh bawk. A nuam dawn khawp e. 

" Ilo thleng thei maw?" nui sang chunga lo tiin ka chhan let hma chuan amah bawk khann

" Sangsangi ka nia. I hming hi chu ka lo hre tawh a, I hmeltha ka ti lutuk ringawt" nui Sen Sen chunga a han tih leh chuan amah chu chiang zet hian ka han en ve a, kei aiin a hmeltha daih zawk sia. Tawngkam țha a ui lo ve khawp Mai.. Ka tluk lo a ni tih chu rilru ah rawn awm zui duah in, ka nuih let ve ta var var mai. 

" I hmeltha daih zawk. I hming pawh nise a nalh khawp mai. Țha takin Kan thawk dun thei ang chu tiraw" lo ti let ve in, ani pawh chu nui var var Chung hian alo bu ve ta nghat nghat a. 

Tunah chuan zan lam receptionist felfai tak pahnih kan nei thar ve ta bawk a, hna thlen rual a hah pawh sawilo a chet nghal na tur ang chi kha a awm ta lem lo. A hahdamthlak duh viau. Tin, ka thawhpui thar Sangsangi chu a fel phian reuh a, senior zawk tiin min zah der thiam ve em em bawk a, ka tih ai te hi min tih sak leh lawp lawp thin bawk. Fel tak a ni. A Chang phei chuan ka hahdam leh lutuk chu ka inthiam lo lek lek thin hial a, a hming a hnathawk ve Mai Mai ni te hian ka inhre thin. Mikhual kan ngah zual chang deuh lo phei chuan ka awl thei veng veng khawp mai. 

" Court ah ka kal zo chiah a, vawiin chanchin pawh zan lam news ah ngaihthlak theih in a rawn awm hman ang. Chuan, zanin chu dinner ei chhuak ila tiraw. A lawmnan a nimai" Sir Johna chuan a lo thlen rual rualin a rawn ti nghal zung zung a, kei pawh chu phur tih hriat tak hian kalo bu ve ta nghat nghat. Sir Johna a Kal liam chiah tih in ka bula la ding ve reng Sangsangi khan meng dur khap chunga amah lo thlir vung vung Chung chuan

" In chanchin kha kalo hre ve a, ka khawngaih ngawt mai sir chu. A fel hmel tehlul nen. Awi en teh, thlah miah suh aw. Nei ngei ngei rawh" rawn ti zui hluai in kei chu ka lo nui leh var var ringawt. 

" Nia, a fel taktak a ni" ti ringawt a chhang let in, sawitur dang pawhh ka hre mai tawh lo hial. Ka lai ve deuh a ni ngei ang. 

A sawi lawk tawh ang ngeiin zanriah ei chhuak dun tur chuan kan inphur chhuak leh ta lawp lawp phawt a, a hma ang tho khan kei chuan motor chu khalh leh in ani thung chu ka bul lawk a thu Chung hian alo tawng leh char char tawh thung a, hetia accident a tawh hnu hian a țawng duh zual sawtin ka hre ta tlat. A lawmawm phian lehnghal a. 

Chutia zanriah ei a kan lo titi dun mawlh mawlh lai chuan ka phone chu rawn ri ta thut in, Ka'n en nak chuan Duhzuali kha alo ni teh tlat pek a, ka thin chu a rawn phu nghal zaih zaih thei. Ka la lo mai dawn emaw ni tih pah a ka hmeh tawp rual chiah in a ngai ang tho khan a rawn ri chhunzawm leh ta zat nia. Ava han Chimawm tak aw. 

". La phawt rawh" Sir Johna'n a rawn tih chuan hreh zet hian ka pick ve ta hram a. 

" Hello" ka tih rual rual hian lehlam ami chuan vin angreng tak in 

" Zawngi, I thla hlawh pawh I la fel vek tawh tih ka hre ve reng a nia, engvang in nge i awih bo reng a. Ka number ah hian cheng 5000 rawn thawn nghal ang che" a rawn ti ringawt nia mawle. Ava han zamlo pap pap tak aw. 

" Pawisa hi thawn nachhan tur che ka nei miah lo. Hetiang zawng a min rawn tih fo dawn chuan maw police ah report ka theh lut ang, lo hre rawh u" kei chuan lo ti let ve hmarh in, ani erawh chu ala rawn zam lo nasa mai. Ngeiawm taka rawn nui chhuak hak Chung hian

" A ve khanglang chuan a! Min report nge report lo chu kan hria ang chu le. Darkar khat liam hma a I rawn thawn lo a nih chuan i chan tur I hmu ngei ang" ranw ti leh khar khar in, phone chu a ti tawp zui nghal bawk a, ka phone hmai chu ka en zui deuh tlawk tlawk mai. Chutianga ka awm lai chu Sir Johna khan ngawi reng hian min lo melh ve ngar ngar tawh bawk a, 

" Eng thil nge. Pawisa chungchang te kha I sawi in ka hria a, eng nge thil awmzia" Chang deuh faka a rawn tih chuan hrilh ve loh tum in engmah a nih loh thu chu ka han sawi zet na a, rang zet hian ka phone chu a rawn phih zui ta lawp mai nia. Ka phu zawk thei. Chutah, mjn rawn be zo chiah tu number chu hmu nghal chat in kei chu rum fahran hian min rawn melh nghal ngar mai bawk a, nuam lo ka ti tawh kher. 

" Pawisa a rawn dil che tihna maw? Sawi rawh. Ka bulah hian zep nei suh ka ti lo che emni? Thudik min hrilh rawh" a rwn tih leh tak chhar chhar ah chuan thil awmzia chu ka hrilh ve ta nge nge a, a chek zui ta hlak mai. 

" Lo lungngai suh. Haw hunah keiman tihdan ka hria alawm" tih pah a bu nghat nghat Chung chuan chaw chu a ei chhunzawm leh ta a. Ka lo ngawi ve ngawt ngawt ringawt. Ka mood an rawn ti chhe zo leh vek alawm le. Ninawm zozai ngawt mai. 

Duhzuali rawn sawi ang khan darkar khat liam hnuah pawh pawisa chu ka thawn tak tlat loh avangin a hnen atang khan chhiar Sen loh call ka dawng ta tluk tluk mai a, ka pick duh hauh lo lehnghal. A tawpah phei chuan hne lutuk vangin ka phone te chu ka han switch off zui ta ringawt a, ka chauh deuh vang nimaw, ka muthilhsan zui daih bawk. Mahse, a tuk zing ka țhanharh rual a ka phone ka han on leh nak chuan message dengkhawng zet zet hi alo hnutchhiah tuarh mai a le! Chhiar pawh ka chhiar zo peih lo. Rapthlak tak a ni.. 

" I hna ban rual jn ka hmel hi hmuh lo in beisei rawh" tih te a ni nawkk mai. Ka en zo peih lo. 

Mahse, hotel ka va thlen hnu reivak loah chuan Duhzuali leh Parmawii te ngei mai kha inchei nalh fahran mai hian hotel ah chuan an rawn lut dun ta hah hah mai a, zah an hre lo in midang hmaizah na chhete mah hi an nei silo a, an la chapo dun em em zawk. 

" Kan boss hi chu a ngilnei in mi hi a duhsak thin asin. Hei tunah pawh Kan ban hlen taktak phallo in min rawn ko leh a, kaan hna ngai bawk kha Kan chelh leh dawn a ni maithei. Nang chu ka hre lova, I bula duty he receptionist thar lam leh night shift duty chu an bang zui vang vang ang. Keini hian Kan tlin ber bawk sia" ti ham ham in an thian dun chuan an in melh a, an nui zui leh ta nghek nghek mai. Ka va han kek chak mai mai tak em aw. Chutiang thu an sawi lai chuan thil chin chang la hre ve vak lo Sangsangi khan hlauh thawn hmel em em hian min rwn melh ta a, a mittui te kha a tling piau tawh nimai hian ka hria. 

" U Rosa, an ti taktak emni? Boss hian keini ho hi min ban leh vek dawn maw" hlauthawng tih hriat taka a rawn tih chuan chhan let ngaihna ka hre lo hle. Sir Johna pwh chuan eng rilru pu a hemi te hi chhawr nawn leh tum nge maw a nih le ka ti. Ka kut ah khan dah fel ta law law Sela Helai hmunah pawh hian hmuh tur an awm lo nimai tur hi a nia. Ka ngei hluah hluah twh mai. 

" A teuh lo mai. I lamah ka țang a nia" kei chuan lo ti let ve sup in, Sir khan hemi te pahnih hi chhawr nawn han tum leh vaih teh se, keimah chawp hian min hnawt chhuak tihna ah ka ngai ang. Chutiang khawp chuan an ni nen hian Kan inmil lova, ka hmu peih lo bawk. Hre rawh se. 

Sir Johna hmel an hmuh rual rual hian Duhzuali te thian dun chuan awmngaihna an lo hre leh tawh lova, an phi deuh Chung hi a ni ber mai. Ka ngei hluah hluah lutuk hi sawi ngaihna pawh ka hre lo zawk. Sir Johna chu lo bawh deuh huam huam in nui har har Chung hian

" Sir, awi Mifel pa, hmeltha lutuk pa, kan lo nghak reng tawh che alawm" lo ti huam huam in amah Sir Johna chawp chuan ka melh no lo fai vek tawh. 

" Awle, awle, staff zawng zawng kha han ko khawm ula, thu puan tur pawimawh tak mai a awm tlat. Ko khawm zung zung ru le"  Sir Johna'n a rawn tih takah chuan staff zawng zwng koh khawm hna chu Sangsangi nen chuan kan thawk zui nghal a. Thawk tu kan lo thahnem ve tawh bawk nen in koh khawm chhung pwh chu rei ve duh tak a ni. A tawpah chuan jn ko kim thei hram in kan dawh kan bulah khan Kan phusa ta luai luai hlawm a, Mahruaii pawh chu hmuh tur alo awm ve leh ta. 

" Eng thil nge ni ta a" rawn ti sur sur in kei chuan a ngaihna ka hriat bik loh thu ka lo hrilh ve Mai a. Chutah, Mahruaii bawk chuan a laihawl a ding nui vur vur reng Duhzuali te thian dun chu va melh leh rawm rawm Chung hian

" Saw zawng pahnih sawn eng nge an rawn tih a. Ka vaw thlu chak dun a nia" rawn ti zui leh hmarh hmarh in kei chu ka lo kiai ve sak sak rjngawt. Tin, a chhan ka hriat bik loh thu in ka chhang nghal vat bawk. Chutah, Sir Johna kha rawn au chhuak thut in bengchheng tawh lo tur chuan thu min rawn pe ta nghal bawk a. Kan ngawi zui ta thap hlawm mai. 

" Hei le, vawiin chu thu pawimawh leh maksak tak mai puan tur kan nei thut pek a, in hnathawk lai kan rawn tihbuai che u vangin ngaihdam pawh Kan dil nghal ni rawh se. Sawi nghal ta zung zung ila, tunah hian Kan hotel chhungah hian misual, pawi khawih pawh hreh lo leh Mi tih nat pawh engatanmah a ngai lo mihring kan kawl mek tih hi hria ila ka duh hmasa a, thenkhat chuan in lo hre tawh zawk maithei e. Chutiang mihring chu hun rei tak ka lo chhawr tawh avang pawhin ka zak a, hrehawm ka ti bawk a, thupha hial chawi ka duh. An ni hi tunah hian tute nge an nih ka sawi chhuak anga, he hotel ah pawh hian an rawn luh ve phal sak an ni tawh lo bawk ang. An rawn tawh tur a ni hlek lo tihna a nih chu. Hetianga ka ti hi hrethiam lo in awm maithei, an thil tih hi a namai lova, police hnena dah luh hial tlak nimahse ngaih thiamna nasa tak nen he thil hi ti tawh lo Turin Kan ngen ta zawk a ni e. Anmahni chu hei, ka bulhnai ber a ding te pahnih, night shift receptionist hlui Duhzuali leh Lalparmawii te hi niin! An ni pahnih hian ka Bialnu leh Kan day shift receptionist țang lai ni bawk Rosalind-I hnena tih luihna hmanga sum leh Pai an lo dil tawh thin vang leh kut hial an lo thlak tawh vang niin hetiang hian an chungah action lak a tul ta a ni. Tun atang chuan hetiang thil hi ti nawn tawh lo se la kan duh a, a thleng nawn leh a nih erawh in a pawi thui tawh khawp ang tih kha ka han swi duh a ni e. Duhzuali leh Parmawii te khan min Chhuahsan tawh rawh u le. Thu dang sawi a țul lo, kal rawh u. Ngawi reng in Kal rawh u" a rawn ti ta piap piap mai a, midang ho pawh chu makti tih hriat zet hian an lo in melh kual haw haw hlawm tawh. Tichuan, Duhzuali leh Parmawii te chu zah hmel em em in hawi pawh hawi chhuak ngam lo hian pawnlam ah an chhuak zui ta hnak hnak mai a, an lo insawitheih a, an lo phur ve tawh tehlul nen khan an khawngaihthlak zawk tawh mah mah in ka hria. Tin, Sir Johna nen pawh chuan in melh zeuh in Kan nui dun ta var var bawk a. Ka hlim a ni. Hetiang a min tanpui inpeih reng leh min hmangaih em em tu bialpa fel leh tha tak ka nei thei hi ka lawm a, nuam pawh ka ti hliah hliah bawk. 

" Awi! Ka hlauthawng hman lutuk kha a hrehawm ngawih ngawih. Tunah chuan ka thaw ta huai e" Sangsangi chuan rawn tiin, a âwm a dawm a, a thaw leh sawng sawng thin. A tir kha chuan engemaw vang takin ban tir a ni dawn emaw a inti hial hman a nih kha. Mahse, rin loh dan hlir a thil a han Kal leh tak si ah chuan a lawm ve khawp ang le. Keipawn ka lawmpui zawk hial. 

"I ti țha lutuk. Ka lawm lutuk a nia aw"  kan pahnih chauh a kan awm dun lai chuan ka han ti ve sap a. Ka kut chu a rawn chelh zui vat. Tunah chuan a duhtawk in a kut pahnih pawh hi a hmang ve leh thei tawh a, in enkawlna a țha in nitin deuh thaw check up nei tur hian hospital a pan ziah bawk a, tin, keioawh in a theih chin chin ah ka la țawiawm ve reng bawk nen tunah chuan a kut tal a hmang leh thei tawh a, hma a sawn chak takzet zet a ni. Chutihrual in a ke lampang hian hma ala sawn ve meuh loh avang zawk erawh chuan motor khalh thei ala ni lo hrim hrim a, a rawn len duh chang pawhin an awmpui tlangval ten motor nen an rawn thlah a, an rawn hruai leh mai țhin bawk. Hun awl ka neih chang apiang in kei chuan a ke chu exer te lak pui thin in ka thlahthlam ngai hauh lova, engemaw Chang hi chuan kal ve thei tur ang mai te pawh hian a rawn ti che ve leh zuk zuk thin. Mahse, a daih rei ngai lem lova, a tlin rei lo bawk. 

" Ti daih ila, hman zan news kha I en hmel siloh a, Samuela chungchang pawh I hre ve lo anga" a rawn tih ve chuan amah chu ka lo thlek zui ta vat a. Ka hriat loh thu in ka chhang let nghal vat bawk. Chutah, thwk han lak deuh halh pah hian

" Eng lo a nia, a thil tih te vang khan a case kha rip viau tur a nih laiin a nu leh pa leh ka pa te khan lainatna nen ngaihnathiam na an lo dil pek a, dam chhung tang tura tih aiah kum 10 tang turin an ti fel ta a nih kha. Ka lawm lo teh a nia. Ka pa pawh hian a hmangaih leh lutuk a, a insiamtha duh Chuang bawk silo, engtia tih chi nge ni dawn ka hre tawh bik lo" rawn tiin, a lawm loh taktak hmel viau. Tin, Keipawh ka lawm bik hauh lo. Kha zanah khan kei leh amah ngei hi min thah pawh hreh lo in a khawsa a ni a, hei a unaupa phei chuan a kut tuar hial in tihian mi pangngai lo ah a chhuah ringawt lehnghal a, chuta karah Zak map lo in a hotel te saw chanvo neitu nihna ala dil fel hmak zui. A case kha ngaihtuah uluk viau chuan a rit lo thei lova, damchhung tang tur chu a ni tawh hrim hrim. Sir Johna phei hi chu thah hial a tum zawk a ni a, vanneihthlak takin tihian a Dam chhuak leh ta hlauh zawk a, chuti ni lo se chu e, kei hian ka ngaidam hauh lo ang mawle. Tenawm lutuk mai.. Lo ti rilru ve neuh neuh in a hriat turah erawh chuan

" Tuar hram. Hram la, engkim hi a țha leh zawk maithei asin. Pathian hian kan chan tura ruat lo hi chu min tawn tir ngai meuh lo a nia" zaidam taka ti ve in, min rawn nuih ta sak mai a. Ka biang chu a chuk nghal zeuh bawk. 

". Thil hi I thlir thiam thin e. Ka ke hi han dam fel se la nang hi chu neih che ka duh tawh a ni" a rawn tih ve chuan ka lung phu chu rang tawh tak a ni. Ka lawm, ka lawm ngawih ngawih. Ani hian kei ve tehlul hi min lo nei hreh lo tihna a nih chu. Ava nuam chiang. 

" I ke chu a dam vat ang. Damdawi mum lian ka awm alawm" nui sang chunga ka lo tih let ve chuan uluk taka min en Chung hian ka khabe a rawn dawm a, min fawp ta vawng vawng mai. Ka lo chhing ve diar diar bawk. 

" Tum rawh! I thei tih ka hria a nia. Han țang leh deuh teh le" tih pahin a wheelchair chu ka vuan bet a, ani in a wheelchair thawh san a ke a Kal chu a tum ve mek bawk. A ruk hian ka țang lutjl chu ka lo in hum leh ngar ngar thin a, ka na vek thei hial in ka hria. 

A wheelchair thawh san in a ding chhuak thei tep tih ah chuan 

" A na lutuk" tiin a thu zui leh ta hnawk mai a. Ka lo thaw zui ve hawk mai. A pawi lo, ala rei hleinem. A thei dawn tih ka hriatna chuan phurna nasa tak min pe a, beidawnsan hi ka tum lo reng reng. 

Hun chu ral leh hret in Keipawh hna ah ka buai ve thin viau a, receptionist pahnih awm tawh mah Ila buai a Kal tluan hi chuan indaih loh a la na ve tjin viau tho. Thut chawlh mai mai hi kan nei hman meuh lo. Chuti Chung chuan Sir Johna ngaihven Turin an in lamah ka hun awl neih Chang apiang hian ka va kal ve fo bawk a, exer ka lakpui thin bawk. Tunlai tak hi a taksa lam a chak lo deuh a, hna ah pawh a rawn in lan theilo tih chu min hrilh dan niin ka ngaihtuah zual em em thin a, theih chu ni Sela a kiang a hun hman a, haw san tawh loh mai te pawh ka duh ve thin. Mahse, hei hi ka hna a nih Miau avang leh ama duh ang zawk in ani chu hna țhulh phah nan ka hmang ngai lem lo thung a, a lawm zqwk viau. 

" Ka piancham a hnai tawh si. I dam vat hi a ngai a nia aw" a khât tawk a ka tih chuan alo nui ve Mai țhin a. A dam tawh thu hlir in min chhang thung. Ka piancham thlen hma a dam fel hman ngei chu a tum ve hle pawh in ka hre bawk. 

Ni khat pawh ka off day a nih angin an in lama len phei chu ka rilruk deuh a, mahse, chumi hrilh tura ka han call erawh chuan call alo chhang thei hauh lo thung a, vawi engemawzat ka call hnuah pawh a pick theih tak tlak loh avangin a nu chu ka va be zui ta ringawt. Chutah, a nu lah chuan in a a awm loh thu ringawt a mjn lo chhang in a kalna a hriat loh thu ala rawn zui. Ka awih lo lutuk chu ka lungawi lo ru viau tawh a, ka tum nghal bar thei nghe Nghe. A tuk mai hi ka piancham a nih tawh dawn avangin kan pahnih chauh a hman dan tur te pawh rel pui ka duh ve a, mahse, ani lah chu biak theih in a awm duh bawk silo. Ka thin hi a rim hluah hluah tawh a ni ber e. Min be peih lo na na na chu tiin an inah pawh chuan ka kal duh ta bik lova, inah tawm in lehkhabu te ka chhiar kual vel ta ringawt. Rilru ah lah chuan ala lut lo em em zui a. 

Hemi zan hian thawm a rawn nei zui miah lo bawk a, eng thil nge a hriat teh hrep pawh ka hrelo e. A khât tawk a ka call na te pawh kha a hmu lo nge a chhang duh lo lui tih pawh ka hrelo. Min text lova, mjn call let hek lova, a reh tawp tihna a nih ber chu. A awmdan maksak lutuk chuan ka ngaih a tih that loh em avangin a nu bawk chu ka va call leh ta a, mahse, a zing leng chhuak kha ala haw loh thu min lo hrilh leh nia. Eng thil nge a tih ang. Khawnge a Kal ang. Tawh sual a tawk a ngem. Tinge a tihtur chu min hrilh ve loh a, a kalna tur chin a awmdan tur takngial pawh min hrilh  lawk ve loh le. Kei hi a engmah ka lo ni ve lo tihna a ni thei a ngem. Inneih a duh chungchang a sawi te pawh kha dawt vek a ni tihna a ni thei mai a ngem. Hman a ka rilru put thin ang kha put nawn leh ka duh tawh lova, a lakah hian Rinna nghet tak neih ve ka duh tawh a ni. Chung tur chuan amah pawh hian zir se, ka rinhlelh lohna turin khawsa ve bawk se ka duh takzet. Eng pawh chu nise, a ke țha lo nen khan khawiah em em nge a Kal ang tih chiah ka ngaihtuah tawh. Ngaihtuah ngai hian khawsa lo hram thin se ka duh asjn mawle. Mawla hi ah. 

Chumi zan zet chu tui taka ka mut tak awm pawh ka hrelo a, ka harh dehh sek mai. Ka thanharh apiang hian ka phone lah chu ka bih ve sek bawk a, mahse, beisei tur a awm lo. A reh hmak mai a ni. Tihian, ngawi reng a min kalsan a min beidawn tir a tum ta tihna nge niang. A teuh lo, ka beidawng awm lo ve. Muhil hleithei lo a darkar khat chuang ka awm leh hnu chuan khaw var dawn hnaih ah reilote ka lo chhing ve ta sek a ni ngei ang. Ka harh leh meuh chuan khua pawh a lo tlai ve duai tawh a, hna chu ka tlai țhelh a ni e. Pawi thei lutuk. Mahse ka thiam loh na em em pawh ka hrelo e, amah vang vek kha a lawm. 

Hotel ka han thleng chu ka meng phawk chiang teh asin. Ni dang pawh a an tih ngai hleih loh hian a chhung luh hma atang in hotel compound chu cheimawi vek alo ni a, pangoar nen balloon leh thildang cheimawina nalh zet zet mai nen chuan an lo bei nasa kher. Thil awmze hrelo zet in ka scooty chu ka dahna thin ah ka han dah fel leh phawt a, a chhung ka lut tur te pswh chu la hawi kual nasa tak hi ka ni e. Mikhual pawimawh kan nei dawn emaw ni le tih ngaihtuah pah a ka han luh nak chuan luh rual a hmuh theih tur hian a Chung sangah khan banner lian puiin ka thlalak pakhat hi an lo tar a, hawrawp nalh fahran a 'Happy Birthday' tih intar kulh pawh chu hmuh tur a awm nghal zat. Ding khawng lah Chung hian chu thil chu hmui hup chungin ka thlir zui ta vang vang mai a, ka lawm a ni. Lawm avang mittui tling piau Chung in keimah vanga rawn pung khawm. Mek staff ho hlim hmel chu ka lo thlir ve ngar ngar reng bawk. Mahse amah ber kha hmuh tur ala amw ve hauh lo nia. Heng thil hi a ruahmanna vek a ni tih chu hre tho mah Ila Khawnge amah ber hi ni ta a. 

Chutah, ka hnunglam atang hian min ko thawm ka hre ta a. Ka hawi nghal vat Mai. Awle, tunah chuan ka mi duh ngei mai chu wheelchair nen rawn in lan hlim hmel a pu a, a nui sang reng bawk. Tin, ni dang ang lo tak hian vawiin chu a rawn nalh takzet bawk a, coat suit dak nalh zet nen khan a rawn inthuam leh ta zar mai nia. 

" ka Bialnu duh tak, I piancham ka lawmpui a che. Chuan, ka dilna tlawm tak hi min pawm sak la, dam chhung a tana ka kawp pui ni turin ka ka dilna che hi min pawmsak thei angem" tih pahin zungbun bawm a rawn phawrh ta a. Hawng zui rak rak in chu zungbun hlu leh nalh zet mai chu ka hmaah a rawn hawng ta a nih kha. 

" Rosa, kei hi min nei duh a ngem?" rawn ti leh sap in, kei chu min thawng chiang lutuk a hmui hup chungjn ka lo ngawi ve reng ringawt. Aw, he pa hi ka nei duh alawm. Ka duh takzet. Mahse, ka lawm lutuk vanga ka hnuk ulh chu a reh theih lawk loh avangin ka la ngawi mai a ni. Nui var var chunga ka mittui te chu hru hul zui sawk sawk in ka neih duh thu chuan ka chhang ve ta a. Chu veleh, staff dang lo awm ve te pawh kha lawm vang hian an lo ri zui ve ta dar dar hlawm a, kan hlim tlang a ni e. Chutah, chu chu a tawpna tur emaw ka tih laiin alo ni hauh lo mai le, Sir Johna chu a insiamtha sawt Sawt a, ka rin ai a awlsam leh zangkhai hian a thutna wheelchair atang chuan a rawn tho chhuak ta mai a nih chu mawle! Ka mak ti lutuk chu ka lo ang phuau tawh a, ka meng phar awn awn reng bawk. 

" Ka ti thei tawh asin"  rawn ti chhuak sap in a nui leh var var thin a. Kei chuan țap pur Chung leh rang em em hian a kut kha ka lo VA chelh sak vat thung. Tichuan, in dinchilh chungjn chu inhualna zungbun mawi em em mai pawh chu min bun ve thei ta a nih chu. Heng hi ka suangtuah ngai lova, a lo thleng ang tih rinna nei mah Ila tunah mai chuan ka rjng bik lo. Tin, ka pian a hnu lama ka piancham hlu ber leh ka hman nawm ber hun a ni tih hria in he ni hi ka theihnghilh theih ka ring twh lo hulhual. Pathian thatna hi ka chungah hian ava han lang nasa zual tak em ka ti thin. 

Chumi ni chu hlim taka hmang in cake an lo order fel vek bawk a, staff ho zawng zawng nen chuan cake te ei in hotel chhungah chuan ka piancham chu kan lawm zui a, kan hlim lutuk ringawt. Tin, keimah min la hre chiang lo leh thawk thar staff te pawn min lawmpui thu chu min rawn hrilh leh sap sap thin in hemi ni zet chu milar tenau ka ni rjngawt e, a tihtheih hial ang chu. Nuam ve tak a ni. Tin, ka piancham pual hian hemi ni bik atan hotel chuan thil țha tak ti zui in mikhual reng reng te pawh chu an room luah man a free ta vek a, hemi ni bik a tan tho hian restaurant lam a lo leng lut te thleng pawhin ei leh in chu free vek lo mahse special gift a pe chhuak vek bawk a, hetiang thil hi ka tawn ngai loh anih angin keimah ber chuan awm dan ka thiam lova, ka zak lek lek thei hial nia. 

" Ka nupui tur, tih ngat in Ka'n ko tawh teh ang che! I hlim em? Heng zawng zawng hmuh hi I phu a, khang kan inngaihzawn tirh atanga buaina leh harsatna zozai min paltlang pui tu inih vang pawh khan heng hi chu i phu takzet. Ka chunga I thil tih leh phun nawi miah lova min enkawlna te zozai kha ka rul seng lo zawk  che. Mahse, ka hmangaih che a, ka hmangaih kumkhua tawh ang che tih erawh hi chu min hriat sak ve rawh aw"  Sir Johna'n a rawn tih chuan nui sen Sen Chung hian amah pawh melh lo in hnuai lam ka lo melh daih a

" Keipawn ka hmangaih lutuk tlat che. Ka kalsan miah lo ang che tih hi I hre ve bawk dawn nia" lo ti let ve in, ani chu a rawn nui zui ta hak hak mai. 

" Nimin kha, heng vel hi buaipui ka duh sia, surprise ka duh bawk che nen, ka nu khan Iva biak thu min rawn hrilh thin a, a khawngaih lutuk ringawt che. Keipawh min hauh phah hial a lawm" tih pahin ala nui kar kar reng a, kei chuan ka lo chum zui nghal zawt mai. Nia, amah vangin zah pawh dawn lo khan a nu zawk ka va be buai hle a nih kha. An nufa hian an țang rual thiam leh lutuk a, ka la vel ve ve ang mawle. 

THE END

****************************************************