MALSAWMDAWNGA

MALSAWMDAWNGA 

*********************

Vanlalpeki Fanai

" Mikhual Kan nei dawn a nia. Tlangval ngat lehnghal" nui hawr hawr Chung hian ka thian kawm ve ber Ramhluni chuan min han fiam pah zeuh zeuh a. A khât mawi tawkin ka lo kiai ve sak sak ringawt. 

" Tlangval hi ka râwp hmel ngawih ngawih bik in ka hria"  ka tih ve leh chuan a hma ai mah khan alo nui nasa lehzual zawk a. 

" I mamawh ve tawk tawh bawk alawm le" rawn ti leh hram in, kei chuan a hma aia thutak deuh zawk hian

" Taktak a, khawi lam mikhual tlangval nge ni dawn a. In chhungte nge" ka lo tih chuan ani pawh chu pangngai tak a lo awm ve tawh in, a nui hmel te chu a bo zui ta bawk. 

" Ka patea fapa MALSAWMDAWNGA a nia. Mamit lam product a ni e. Hetah hian private motor khalh tur a rawn hmu hlauh mai a, kan bulah a khawsa rih phawt ang chu. A fel asin, ilo hriat lawk a tan a hmeltha a, mamit ah phei chuan a to ve thin tehmai a nia" rawn ti zui duah in kei chu ka lo nui ri veleh hak tawh a, a unaupa bialnu tur a tan pawh chuan mi va han duh awm em em ve le ka ti hial. 

" A fel chuan a that chu. Ka va haw phei ve phawt anga naktuk alo thlen hunah hun awl te ka neih theih chuan ka rawn Kal tha leh zawk dawn nia"  ti liam ve leh zung zung in ka tho nghal a. Ani pawh chuan la nui deuh har har reng Chung hian min thlah ve Mai bawk. A sawi ang khan a unaupa chu fel in a man te pawh chu to taktak ang maw. Lalramhluni hi chu thu hi a uar ve thin hrim hrim a. 

A zanah chuan college lama ka thiante ho chu rawn lang ve tehmial in, 

" Lehkha zir ang u" an rawn ti ve khanglang a. Mipa rual țhah mai an la ni zui bawk nen, a hu ho a lehkhazir tih vel hi ka thiam vak bawk silova, kalo nuih liam ve ta ringawt. 

" A thuhrim in I hmel hmuh te pawh Kan chak ve a, Iva induh reuh ve" an zing a pakhat Thanmawia khan rawn ti chhuak khauh ve in, a tukkhum chu ri zui nghal fawk. 

"Khanglang a che. Nitin in college ah Kan inhmu a, nangni lo chu thian dang kawm thin pawh ka nei lo lehnghal. I over hret"  nui sang chunga ka han tih chuan midang ho lah khan Thanmawia chu an lo la support em em zui leh ta nghal a. Hemi te 5 zet hi chu an tangrual thiam thei thin asin aw. 

Tunah hian bachelor kum 3na zirlai vek kan ni a, keini ho bik hi chu inkawm tam leh engtiklai pwh a inzui thin kha Kan ni ve a, kei tih loh chu hmeichhe dang reng reng hi an kawm ngailo tijtjeih a ni a, Keipawh in thian dang hrim hrim Ramhluni tih loh ah chuan hmeichhia pawh ka kawm ngai lem lo. Ramhluni erawh chuan zirna chawlhsan tawh in tikhan in lamah a țul țul a thawk ve Mai țhin a, han inthurual vel chu rem lo thin viau mahse la kan inthlah thei ngai bik Chuang lo. 

Tichuan, lehkha lam reng reng chu kan rilru ah a awm hlawm ta silova, 

" Eitur chhum mai ang u hmiang" Dintluanga'n a rawn ti ta a. Eitur sawi rik rual rual a ka hmel hlim nghal surh mai chu anni ho khan rawn hmuh hmaih hauh lo in min kuah rawn ta luai luai a, 

" A leina tur I tum vek anga, Dintluanga hian a Siam thung ang" rawn ti sap sap in ka ner nasa ta kher. Rei zet mai ka in ngaihtuah leh hnuah erawh chuan eitur leina man tur chu phawrh chhuak in a leina man tur tum vek pawh chu ka pawi ti ta lo a. Ni dang leh hun dang zawng zwng ah khan heng ho hian min awl vek zel zawk a, tun țum chauh te chu a pawi lo e ka ti ve thei ta hram. Uikawm leh lutuk pawh hi alo dik ber lo. 

Tichuan, lehkha pawh chu zir leh ta lo in Kan zinga eisiam thiam leh nuam ti em em Dintluanga'n eitur a chhum zawng zawng te Kan ei zawh fel vek hnu cuan chuan min haw san zui ve thei ta hram a. Ka thaw hawk thei. Heng ho bula awm rei lutuk hi chuan lung te hi a zing ve ngawih ngawih zel. Hrisel a ngai lutuk. An rawl a ring hlawm in a lu ruh a ring si a, mipa e ti lo chuan sawitur a hre thei phian bawk si. An zingah rau rau chuan Dintluanga kha țawng tam lo ber niin, a hmel pawh a tih tlak ber a, college lamah nise nula ho umzui hlawh ber ala ni zui bawk. Ve ngei in a. Chu mai ala ni nang, tunlai hmeichhe ta tak duhzawng ngeiin eisiam a thiam a, a Siam tui a, a luck reuh lutuk. Mahse, Bialnu erawh a nei peih lo thung. Amah duh ve tu te tan chuan ngeiawm tawp ka ti lo theilo. Tin, Thanmawia erawh kha chu lehkhazir atchilh tawp chi hi ni ve thung in, a thiam pawh a thiam thei reng a, a lehkhathiamna hian a hming te pawh chher tir in college lamah chuan zirtirtu te duhsak hlawh pawl tak leh teacher choice ang kha a ni ve a, hmeichhia a ngaihsak lo ve tho. Rammuanpuia thung hi chu thildang ah nawi ru em em mahsela thlalak nalh dan erawh a thiam hle a, kan college photographer hial te pawh a ni pha ve tlat. Mahse amah hi a mi nel zawng te bulah lo chuan zakzum ru tak a ni ve reuh a. Bialnu a nei theilo. A zei thlawt lo a ni e. Zothantluanga thung hi chu Mizopa tawp ang chi kha a ni ve a, lehkha lam a ti thei viau bik hran lo. Chutihrualin thiam thei lo ti a sawitur pawh a ni leh Chuang lova, tin, a vak zau peih in a hawi zau a, a Mawl hauh lo. A tlawmngai hrep bawk. Nula ai chuan air-gun a duh zwk a, a kawl deuh reng bawk a, a remchan dan apiangin kan awmna Aizawl piah lam ram ruak velah te hian a air-gun nen chuan sava veh turin a chhuak  daih tjin. Chuti vel chu a ni e. Aw chuan, Lalsiamthara ala awm ve tak e. Ani hi chu fiamthu duh leh țawng nuam ti em em, mi pwisawi Chuang silo harh tha tak ang chi kha a ni ve a, an zingah rau rau chuan nula a lawm in Bialnu pawh a thlak ngun ber a ni a, mahse, a duh tui ngai hauh lo. Ka uang a nih kha. Hmeichhe tha vak lo ang chi hi chu a hre hrang ve thei lutuk. Chutiang hmeichhia te chu a duh lo ve nasa a nia aw. Tin, a hmel en aiin Bialnu lah chu ala nei țha thei phian zel lehnghal a, a zei ru hle a nih ka rjng deuh. 

Kei hi chu Lalhriatpuii niin, hmeichhe pangngai ang kha ka ni ve Mai a, ka tha fal bik lem lo. Mahse, min hrechiang tute erwh chuan  'I te fel êt reuh a, I mit leh I hmui hi a nalh' min ti ve thin. A bak chu sawitur vak ka hrelo thung. Hmeltha pawh ka inti lem lova, pian phei hi chu ka sang bawk silo nen ka sawi buai lo law law mai ang. Hmeichhe harh zawk zawk tihtur chi kha ka ni lem lova, chu chu a nimai e. 

" Min lo haw san ru. Ramhluni te inah tih kawi tur lawk ka nei" class ban rual chuan ka ti leh zung zung a, ka thiante ho kha an hawi hai angreng kher. 

" Ramhluni hi I bialpa emni?" Siamthara khan rawn ti khauh in, midang ho erawh chu za fahran hian an lo nui deuh hak hak reng a. 

" Kal mai teh" tiin ka tlan liam san nghal daih. 

Ramhluni te in ka va thlen chuan ani chu chhuat nawt chungin alo zai deuh hlarh hlarh reng a, ka tek lut nghal nawk. Ka hmel a rawn hmuh rual chuan phur zet a lo țhen nghal vur vurin a chhuat nawhna a dah zui a, thutthlengsei lamah min nawr phei nghal. 

" Ilo Kal dawn ta lo emaw ka tia. Lo awm rawh. Thingpui Ka'n lum nge" ti leh zung zung in a tho zui a. A Kal pah chuan choka bul lawka an mikhual riahna kawngka kha va kik pah zeuh Chung hian

" Bawiha, lo chhuak la. Thingpui kan in dawn nia"  ti nghal zauh in, kei chuan Mamit lama an nau chu alo thleng tawh a nih pawh ka ring thiam ta chiah. 

A koh atanga reivak lo ah mikhual room kawngka chu rawn inhawng in, a chhung atang chuan tlangval la naupan hmel tak, a mawi tawk chauh a ngo leh body nalh fahran mai, tawnzau chauh inbel chunga lo chhuak chu uluk theihpatawp a lo melh ve in, ka mit mawlh mai chu ka veng hman mang lo. Ka melh tlek tlek ringawt mai. Chutiang bawk in ani pawh khan kei, sitting room thutthleng chunga lo thu ngawi reng chu mjn rawn hmu zui ve chat in, a mitmeng pa leh fiah ru zet khan min rawn melh zui kawk. A hmeltha tak mai te, a hnar ngul jn vuah fuh tak leh a khabe ruh kual mawi zet mai te kha, a... Kei hi eng thil em em nge maw ka lo ngaihtuah kual chiam zel le. A zahthlak thin zawk e a. Thiante nau ala ni zui a. Tih chi loh theih lutuk mai. Mahse, kan mit mawlh mai chu ni. Tum lawk em em pawh awm lo hian alo intawng palh leh țhin a, thingpui no chawi a lo phei mek Ramhluni mawlh khan keini pahnih chu min hrethiam mai ang tih ka lo hlau kher.

" Lo inbe ve bawrh bawrh ta che u. Puite, hei Mamit a ka nau ka sawi kha nia, Malsawma a nih hi. Bawiha, hei hi ka thiantha ber, Hriatpuii nih hi. Ú angin ko duh kher suh aw. Puite iti ve Mai dawn nia"  Ramhluni chuan rawn ti leh zung zung in, min û lo tura a ti pawh chu pawi ka lo ti lem lo. Mahni aia lian zawk daih ten min han û lauh lauh tawh hi chuan kan panna a rei tawh hmel bik ngawih ngawih zel. Malsawma pawh chuan Ramhluni thusawi chu hriat fuh hmel em em in a lu alo bu ve nghat nghat reng a, nui hmel erawh ala pu Chuang hauh lo. Tin, ka mitah pawh mjn rawn melh țha ngam tawh lo in a phone chu chhuanlam a tan a han en pah leh zeuh zeuh thin bawk a, a awmdan Mawlh chu a lai chhe ve deuh niin ka lo hria.

" I rawn kalna lamah te i chau em, kawng lah hi a chhe thei angreng bawk si a" ngam leh ngam lova ka han tih ve takah chuan rawn hawi chhuak deuh zawkin keimah pawh min melh lo hian tv lam chu a melh zui leh daih a, ring lem lo takin

" Chau hran lo ve. A hahthlak loh. Nangmah zawk Iva fel ve a I rawn leng lut ve a" lo ti let ve ngial in a ruk hian Ramhluni nen khan Kan lo in melh leh zauh zauh thin a.

Chumi chin chu thu pangngai mai mai sawi ho in Mamit ah chuan hmelhriat te pawh ka neih ve thu ka han sawi zui ve ta hram a. Chutia han biak tak ngat ngat ah chuan ani pawh kha tlem a rawn Inthlahdul ve țan in a rawn țawng duh chho ta phian a, kawm chu a nuam zek. Mahse, hmun leh hmun a khatia kan inbiak chhung zawng khan vawikhat pawh hi ka mitah chuan min rawn melh leh tawh hauh lova, a unaunu Ramhluni lo awm ve reng bawk nen chuan a Zak ve deuh pawh a ni ngei ang. Ala naupang em a ka hrethiam tho e.

Darkar khat zet ka thut hnu chuan haw  phei san veleh phawt in zan lamah erawh lehkhazir tur ka neih ang ang te chu ka han thai let kual ve leh a, ka thiam thei hlawllo. Nia, Malsawmdawnga hmel ringawt mai kha mitthla ah rawn cham in, ngawi reng hian ka lo ngaihtuah leh vung vung thin a, a hmel chu sawi loh, a pian mawi tak leh a ban tha chak hmel em em a phiar fat mai te, a thisen zam kal vel lang riak mai zawng zawng te nen khan ka phur ta lutuk leh awmngaihna hre lo chu khum chungah chuan nula pui si kha ka han tal zui ta taktak mai a! Ka va han zaktheilo tak aw. Pawilo. Ho lutuk. Hetiang a ka awm lai hi tuman an rqwn hmu in an hre ve tawh Chuang hleinem le.

" Test a in dawt chho leh zut dawn a nih hi. Ram vah na hun pawh ka nei leh thei dawn ta lo"  Zothana chuan rawn ti chuai raihin, kan lo nuih zui hak hlawm.

" Engtinnge ram vah te hi nuam I tih theih em em rneg a. I hlau lo emni? Kei chu Ramhnuai hi ka ngaina lo reng reng, a reh thei ropui si"  ner nâng nâng chunga ka lo tih chuan amah bawk khan rang fe hian

" Chu tak chu alawm a nawmna. Han reh tha em em mai Sela, sava chauh nilo, ramsa te thleng hian veh zui an nuam a chân an nawm phah thin bawk" rawn ti leh ham ham in Thanmawia alo inrawlh vat. 

" Nang hi chu forest lam hotute hnenah ka la report ang che mawle. I hrap ve hraih hraih em mai"  a rawn tih chuan Dintluanga te nen khan Kan lo nui chhuak deuh hak tawh a. Zothana bawk khan thutak fe mai hian

" Min report nachhan tur I neilo ve r. Ramsa chu sawi loh, sava pakhat pawh ka la kap thla lo a nia. Silai nena vah vel hi a nuam hranpa hrim hrim. Nangni ho hian peih ve ni ngat ula chuan hiking tura chhuah ve te hi ka chak thin" rawn ti zui leh duah in, kan lo chhan let hma hian Kan lam pan a lo Kal mek, kan college miss ni bawk leh kan veng chhung a cheng, pa hausa Pa Biakmawia Fanu Vanlalhruaii chu lo thlir deuh thap in, Rammuanpuia kha Kan melh leh a, kan nui zui ta dar dar. Chutah, Rammuanpuia chuan a mit chhing suar suar chung hian zawi angreng takin

" Lo kal hnai lo hram rawh. Hetah chuan lo Kal lo hram rawh" alo ti ve mawlh mawlh tawh a, keini ho chu kan nuih alo za tulh tulh thung. Mahse, a dilna chu chhan in a awm dawn lo niin a lang ta tlat. Hruaii chuan a dar a rawn kuah chawt pah hian

" Ilo tha maw Muante. I ril a țam em? Eng nge i ei chak. E taka, mjn lo zui lawk la maw, nalh tawka thlalak na hmun tur ka hre thar a nia" rawn ti ham ham in keini ho chu min rawn melh kual leh den den phawt a, a țhen sâwng reng bawk. Rammuanpuia thung kha chuan chhang let duh lo in a kun ngar ngar reng a, a hmaa inchhawp eitur te chu melh ran Chung hian a chawk kual vel mai mai tawh bawk. Chutihlaiin midang zawng kha chu kan lo ngawi ve thap reng thung. 

" Mawh Muante, lo Kal lawk la, a reilo ang I fel em kha"  rawn ti nawn leh in keini ho pawh chuan Rammuana chu kan lo nawr lui ve ta nge nge a, a hreh hmel takzet thung. Mahse, vawi tam tak lo zar buai a lo be buai ve tawh tu nula chhelo leh zah hre map silo ni bawk Vanlalhruaii bawk chu huphurh hmel angreng tak hian a zui chhuak leh ta nge nge a, an chhuah rual rual chuan midang zawng kha chu kan nui chhuak nghal hak thei. Kan sawi tawh ang khan Rammuanpuia hi chu a lan dan maiah iaiawm loh in nula mi hmel viau mahse la a zakzum lutuk ber mai hi a buaithlak thin a, a tuina thlalak lampang leh zahzum lutuk chu a inmil lo phian bawk. Tin, he Vanlalhruaii hian hman ata tawh khan a ngaizawng thei hle thin a, veng pakhat chhunga khawsa vek nih phei chuan a dinhmun a dah chep thei hle. Rammuanpuia duhzawng tur hi a ngaihven peih in hriat a tum nitin a tihtheih ang chu. Pakhat lah hian alo hlau a, a râp em em mai a! Han tih pui vak ngaihna pawh hi kan hre thin lo a ni e. A buaithlak duh lutuk. 

Tichuan, duhzawng tak hmu fuh tihtak ah Keipawh chu a remchan dan apiangin Ramhluni te in lamah chuan ka tei lut ve ta zut mai a, tunhma te pawh khan lo leng lut ve ziah tho mah Ila zir lai mai kan la nih angin sunday leh holiday tih velah lo hi chuan ka leng hman ngai bik meuh lo kha a nia, tunah ve thung chuan tihian class ban rual apiang in Kal kawi tur emqw kati tawh a, Malsawma kha a awm emaw, awm lo emaw pawhnise kal kawi chu ngai ah ka nei tawh a ni ber e. 

" Lalram, I nau chu tute bulah nge a thawh ve tak a. Tu motor chu nge a chelh dawn tak" Ka'n tih chuan Ramhluni pawh khan pangngai tak hian

" Pu Biakmawia te motor saw a khalh sak dawn ta a nih kha. I hriat tawh angin Pu Biaka saw fapa neilo a ni a, nitin a office a kalna tur motor khalh sak tu a mamawh ve thin si a, amah sawn khalh ngam thlawt hek lo. An bulah em chuan an Khawsak tir lo anga mahse, fapa neilo na na na chu, Bawiha lah hi alo sual lem silova an duat ngawt in ka ring. An neih ten alo phak tawk bawk a" lo ti veleh zung zung in keimah bawk chuan

" A thuhrim in I nau hian motor khalh lampang hi a tui ve nge ni a, a inhmeh lo reuh ka ti tlat a nih chu"  ka han tih leh chuan ani chu thaw deuh hawk Chung hian ka bulah a rawn thu zui ve ta nge nge a, a hmel lan dan te pawh chu a thutak ve phian mai. 

" Tui em em pawh awm hran Chuang love. Ka patea te pafa bi chu an vanduai ve a,?Malsawma nu hian mi pasal um san tawhin chu pawh Malsawma tlangval hriat tawh hnuah lehnghal Mawle. An chhungkaw Khawsak harsa sa ve nen Sawma pawh hian pawl 12 thleng bak kha chu lehkha pawh zir zawm thei tawh lo in tikhan a pa, ka patea che hleithei tawh lo enkawlnan khan a țul țul thawk in zirna a chawlhsan alo țul ta si a, unau pianpui a nei bik bawk silo nen khan a khawngaihthlak thin asin. Tikhan, a inhlawhna thenkhat a dahthat ve atang in motor khalh te pawh chu a zir chho ta hram hram a, license hial a neih fel hnuah tihian ka pa ten remchang takin Pu Biaka an lo biak sak leh ta a. Tun hun hi an lo thleng ta a nih hi. Bawiha hi chu ka lainat thin a nia, kum naupang te anih lai atang khan rual pawh pawl ve hman lo in chhungkua a enkawl nghal a țul zawk ta si a, an dinhmun hrereng in amah lah hi a inthlahrung zo vek a tih theih a, a nungchang te hi alo zawi awi ve bawk nen, mi hausa deuh fapa ni tur hian ka it ngawih ngawih zel"  a rawn tih chuan ngaihtuah uluk fe chungin ka lu chu ka lo bu ve leh nghat nghat thin. A that vanglai pawh Chen hleithei lo in tihian chhungkaw tan a ke a pen chhuah a țul ta si a, keini, mi nung tal satliah ve Mai nen chuan in ang lo tak te pawh Kan niawm e. Ka duh rukna pawh a zual leh ta Sawt mai. Sawi chhuah chi lah chu a ni mang bawk silova, engtia rei nge ka zep theih dawn ni. 

" Vawiin chu Hruaii pawhin rawn thlah tu a nei ve tlat mai. A pa driver thar a ni maithei"  Lalsiamthara'n hawi deuh vung vung chunga a han tih chuan a hawina lam chu kan melh zui nghal thap a. Rammuanpuia a rawn râk deuh that. Dintluanga khan a ngum ah alo sik ngar ngar chu niin. 

" I chhass chuan a phatsan dawn che a ang ta hlemai"  fiamthu deuh reuh a Dintluanha bawk in a rawn tih leh chuan Rammuanpuia erawh chu a meng dur nghal khap khap thei a, a hne hmel takzet bawk. 

Kan Vanlalhruaii mai mai chu. Amah rawn thlah tu Malsawmdawnga bân ah te chuan kuah huam huam in a nui hawr hawr reng lehnghal a. A dar te thlengin a ben fai sak vep mawle. Ka duh ai hian a che over leh hret thin. Chubakah, hemi te driver ni tur kher kher a a rawn Kal pawh hi ka lo duh pui lem lo. Vanlalhruaii sawn zah a hre mang silova, mipa hmeltha leh chhelo a hre thei ropui si. A nungchang mil lo deuh mipa nungchang tha ala hre fuh thei phian lehnghal a, kan Lalsiamthara nen hian inkawp mai mai Sela an inhmeh tawk viau ang mawle.

Chutia Vanlalhruaii che over lai lo thlir ve reng chu peih tawh lo in ngawi reng leh tum bar Chung hian ka kalsawn zui ta daih a. Ka thiante pawh khan phun zui nak nal Chung in kei chu min rawn zui ve lehnghal zat. 

Nileng zakin Malsawma ringawt mai chu ka mitthla ah rawn cham zui in ka ngaihtuah tawp hleithei ta reng reng lo mai a. Ka lehkhazir thleng chuan a tibuai pha zo vek tawhin ka hre hial. Ka ning lutuk. Test tur lah chu ala in dawt chho zut zui lehnghal a, engtinnge maw ka tih dawn ni. He Malsawma hi in ngainat tir a ka bialpa nih tir hial ka duh, mi zaktheilo Vanlalhruaii hian chet a lak leh hma hawt in ka chet khalh a țul tih pawh ka hria, mahse, engtinnge ka in ngainat tir ang tih mawlh chu ka buaina a ni leh ta. A phone number hi Ramhluni hnenah khan dil ta ngawt dawn ila, a.. A ni leh lo. Ramhluni chu ka thiannu a ni a, a number ka dil tur ber lah chu a nau ala ni zui bawk. A fuh theilo. Engtin chuan nge maw ka tih dawn le. 

Sunday a nih angin chawhma inkhawm ban rual rual chuan Ramhluni bawk chu ka zui haw leh ta phawt a. Duhthusam ang ngeiin Malsawma pawh kha hmuh tur alo awm ve leh tawh e. Ala hmeltha em em zui a, ka ti hi a ti za leh tlat zel. 

" Ilo leng a ni maw" lo ti ve ngeiin kei chu ka nui deuh sak. 

" um, leng a nih hi. Ka lo leng ziah zawk a, hmuh tur I ngai lo thin em a" lo ti let zat in, ani chu a lai leh titih der tawh a, ka lawm thin ngawt mai. 

" Nia, Sunday tih loh chu hun awl hi ka nei ta silova, lo leng ziah tho rawh aw"  eng rilru pu in nge ani hian hetiang a min lo biak hmasak ve chiam tak chhan hi ni ang ka ti. Ka awih theilo zawk hial e a. Ka lawm viau tho bawk si. Hemi ni hian awihawm loh khawpin Malsawma nen chuan kan inkawm ve nasa a, a hma zawng ai kha chuan min lo nel ve tawh tih pawh ka hria. Nuam pawh ka ti. Tin, chumi zan vek chuan thu lawmawm em em mai hian min rawn umzui in Ramhluni khan Malsawma'n ka phone number a dil thu chu min rawn hrilh ta mai a. Lawm avangin ka thin hi alo phu zui ve dawt dawt thei. 

" Pe rawh. Pe ngei ngei ang che aw" nui hawr  hawr chunga ka han tih chuan Ramhluni pawh kha a rawn nui zui leh ta ar ar mai. 

" Ka pe fel vek tawh zawk" ala rawn ti zui a. Lalramhluni zet hi chu, a nau ngaihzawng tur hian min duh hluah hluah ni ber in ka hria. 

" Unau pianpui mipa hi chu nei Ila ka mo a tan hian ka awt ber che "  min ti ve thlawt thin tu kha a ni bawk a, a awm tho e. 

Ali sawi lawk tawh ang ngeiin rei pawh rial lo hian Malsawma chuan min rawn be ta ngei mai a. Ka phur lutuk kha awmdan tur ber pawh ka hre tawh lo niin ka hria. Ka helhhawlh ve ringawt. Chumi zan pawh chuan rei tak inbia in thu ho deuh deuh hi kan sawi dun ve a, mahse, a hlimawm em em tho. Ka kham thei lo zawk. 

A tukah pawh a thawh rual rual in min rawn wish ve ngei lehnghal a, mood hi a fuh zo vek ka ti Mai. Class ah nise a khât tawk in ka phur lutuk chu ka lo nui leh vur vur thin a, canteen ah te pawh khan a khât tawk hian ka phone chu ka bih ve deuh sek avangin ka thiante ho pawh chuan min fiam leh laih laih thin a, ka phone te thleng chuan min chhuhsak hi an lo tum fiam thul. Kei lahin ka lo phal aw zawng bik silova, kan ri zui leh ham ham zel Mai. 

" Lalhriatpuii hian  chhass a nei chiang lutuk. Emaw, star a nei thar chiang mai" Thanmawia khan rawn ti chhuak khauh in, kei chu lai tih hriat fe mai hian kalo nui leh suk suk thin a, ka ngawi kar reng thung. 

" Chhass chu ka ring chiah lo. Star a nei zawk a ni ang" nui put put chunga Zothana'n a rawn tih veleh takah chuan

" In ninawm"  lo ti zui hlak in ka tho  chhuak nghal a. Anni ho pawh chu an rawn ding zui ve leh suau mai. Ka kid te ho tak hi chu. 

Chutianga ngaihtha taka ka lo awm ve lai chuan class ban dawn a ruai ah hian Malsawma bawk kha Kan college lamah a motor nen tho khan hmuh tur a rawn awm leh tawh a. Vanlalhruaii bawk a rawn lam leh dawn a ni ngei ang le. Hm.. Ka rin ang tak takin Vanlalhruaii chuan Malsawma hmel a hmuh rual rual hian phur zet leh inti engemaw fahran in a awmna lam chu a pan zui ta vat bawk a. Ngawi reng in ka lo thlir ve dauh dauh ringawt tawh. 

Malsawma kut te chu chelh sakin a Sam te pawh a tuai sak puat puat renga, ka thik lutuk chu ka lo mur chhuak vek thei ni hial hian ka inhria. 

" Eng thil chu nge maw ilo thlir reng le"  rawn ti thut tu an awm avang chuan in thing harh zui ve nawk in ka hnung lawk a lo ding reng tawh ka thiante ho hmel kha ka han thlek chho nghal he haw bawk a. Ka thlirna lam kha an thlir ve vek tho tih ka hriat takah chuan thawh chhuah nalh pah hian

" Nangmahni nghah pahin saw mite che vel saw ka lo en mai mai a" ka han tih chuan nui ri deuh hak Chung hian Lalsiamthara chuan

" An driver nen sawn an inhnim hnai deuh tihna maw ni le. Pangngai taka han in hruai ve Mai awm hi, Lalhruaii saw a che over leh hret thin ka lo tia" a rawn ti chhuak ve ta nge nge a, chutah, za lo fahran hian Rammuanpuia pawh kha alo khi ve ta suk mai. Siamthara sawi ang khan anni pahnih saw an lo inhnimhnai taktak a nih vaih chuan aw, an chak dawn lo nasa a nia. Ka ten ngawt ang. Tin, Malsawma pawh hi ka be zui tawh lo anga, a chhungte hnenah a chanchin pawh hi ka hrilh vek bawk ang. Heng hi ka thik vang piah lam ah Vanlalhruaii kher kher saw chu kawp lo se ka duh pui vang a ni a, kei min duh loh rau rau a nih chuan midang tha zawk, an chhungkaw milpui ngei te pawh thlang se ka lo duh. Vanlalhruaii te ang hmeichhia hi chuan reilote ah an thlauh thla leh mai duh dawn a, a hmusit viau bawk ang tih hi ka hmu tlang sa vek. Rilru a insawh tau nghawng nghawng Chung chuan ka kal ve ta zel a. Ka kalpui ka thiante ho thil sawi leh an fiamthu thawh chi hrang hrang te kha chu sawi chhawn tur takngial pawh ka hre tawh lo. Ka beng kawrawng ah hian a lut ve satliah ve Mai a ni e. 

In ka thlen rual rual in Malsawma chu ka va text lehnghal pang a. 

" I nei chhelo bik hlemai" tiin ka va text a. Duh aiin he pa hi ka duh mah mah dawn niin ka inhria. In control deuh hlek chu ka ngai dawn a ni. 

" Tu nge ka neih chu"  ti a min rawn chhang let ve vat in, ka lo ner deuh sak a. Tichuan, Vanlalhruaii nena Kan awmdan zawng zawng te kha ka hmuh thu va hrilh ve nghal in min rawn call zui pang bawk. Thin chu a phu nasa duh teh e. 

Call ka lak fel rual chuan za em em lo angreng tak hian a rawn nui chhuak nghal ta hak hak mai a. Ka lo la ngawi deuh reng. 

"Mahruaii te chu ka hnathawhna te Fanu a nia, ka Bialnu pawh a ni hleinem. Nau angin min en a min ngaina ve sia a a bak a awm lo"  rawn ti zung zung in kei chuan sawi tur ber pawh ka hre leh tawh lova, tin, a Bialnu ka la nih miau loh avangin a laka thikthu lo tih chhiat ve ngawt chhan tur pawh kha ka nei lo tih chu i hrethiam in ka inthiam lo hnuhnawh ta kher. Mahse, Vanlalhruaii berkher kha chu kawp lo thei se ka duh em em a ni. Ramhluni te chhungkua pawhin hre ngat sela chuan an hauh ve tho  ka ring bawk a, an duh pui bik hauh lovang. 

" Insawifiah vak kha a țul hleinem. I Bialnu pawh ka nih loh hi" ka han tih leh chuan a nui lai chu tawp hmak in a han ngawi zui ta vang vang phawt. 

" Ka Bialnu ini duh emni?" a rawn ti vei sup nia. 

" Aih. Vanlalhruaii ka hlau" lo ti ve nghal zat in, za em em hian a rawn nui leh ta hak hak mai a. Ka nuih pawh hi a za ve lo ve a. 

" Ani saw ka engmah a ni lo e. Ka sawi tawh ang khan ka hnathawhna te Fanu a ni ve Mai a, nau angin min en bawk. A bak a awm lo. Ho lutuk" a rawn tih leh pawh chuan a zawhna kha lo chhang țha duh lo in Kan inbiakna pawh a ti tawp hmasa tu ah ka țang ta phawt zawk a. Min rawn text zui leh hram tho. Chu erawh chu țha deuh in ka lo reply ve zel bawk a, rilru hi a Phir a ni e. Ani nena in ngaihzawn nan chuan ala hma ka tih rual in midang tan erawh ka phal Chuang silova, lehlam ah ka thiannu a nihna leh kum lamah pawh kei aia  naupang zawk a nihna hian min hnar ve thin bawk si a, mite hian min dem in mjn kawh rawn angem tih te thleng chuan ngaihtuah kai zel in ka rilru chu a insual buai ta nuai mai. Ka thiante pawh khan amah hi chu a hranpa takin hre ve tawh mahse la, keiin ka duh a ka vei hle tih erawh hi chu a them pawhin an la hre ve lo thung. An hria ang tih hi ka hlau a, hriatchhuah hun an la nei ngei dawn tih ka hre bawk a, chu tak chu a ni ka huphurh ber chu. Min deusawh leh nasa dawn lutuk hi maw. Mahse, a hmel ka hmuh tak fo ah leh, han inbiak ve tak reng ah chuan rei pawh rial thei lo in Malsawma chu ka duh tih ka hrilh ve ta nge nge a, a duh kha tih puitlin sak in tunah chuan bialpa nei ka lo ni ve ta. 

Kan han in ngaizawng chho chu a bultanna ah chuan kan lai chhe dun ve em em thin a, kan in a a rawn len luh ve Chang te pawh hian a naupan chhiatna kha rawn lang leh țhin in ka chhungte takngial pawh chu a zah a, an biak hmasak lou phei chuan biak tumna pawqjj a nei hran lo. A be ngam lo hrim hrim zawk hi a ni ber e. Chuti khawp a naupang chhia chu la ni ve mahse la ka thinlung ah erawh hi chuan thawm a nei lian em em reng a, a lian tual tual thung chu a nih si hi. 

Kan hun awl neih ve chang apiangin kan inzui chhuak dun thin a, khawi khawiah emqw te leng kual in duhthusam tinreng kan sawi dun ve a, inthen tawh lo tura thu tiam dun in Kan thutiam chu tih puitlin ngei pawh Kan tum ruh dun ve viau. 

" Zep miah loh chuan Bialnu hi ka la nei tam lo ve a, nangmah hi a pahnihna I ni nghe nghe. Diktak a sawi chuan ka bialnu hmasa ve ber kha chu Bialnu ti a chhiar tlak pawh hi a ni meuh lo. Ka ngaihsak thiam lo in thiante min dem fiamna zara inkawp ve ringawt kha Kan ni bawk a, kan inthen lai te pawh khan ka na hran lo. Mahse, nang hi chu zan khat lek kan inbiak loh pawh hian awmngaihna ka hrelo nghal zel a, I lungawi lo ang tih mawlh mai hi ka hlau thin bawk. Tlawm leh zah pawh hi I tawnah hi chuan ka dâwn theilo a ni ber e" ani leh nilo ang in a rawn sawi ril ve ta phian mai. Ka nuih chu alo za lek lek thei zawk. Ka kut te chu rawn  hum lum vang vangin tim dai chung hian a han chuk ve ta zeuh pek a. Ka lo en kar ringawt. 

" I rinawm theih phawt chuan kei chu min ngaihtuah duh suh. Ngaihzawng hi ka nei mai mai ngai lova, ka neih ve chhunah erawh chuan ka rinawm ve thin lutuk a nia" kei chuan lo ti let ve in, nui var var Chung hian min rawn melh nghal vat a. Ka chal ah chuan a rawn chuk ta zauh mai. 

" Lalhriatpuii hian bialpa a nei thar chiang lutuk. Tunlai chu a phone ringawt hi a sik neuh neuh reng mai a" Zothantluanga'n a rawn ti ve leh a. Amah chu melh rum nghal nghek in ka lei ka lo chhuah ve zeuh zeuh bawk. 

" Nia, en ta che u. Hmanni deuh atang khan keini ho pawh hi min ngaihsakna a nei tawh lo reng reng mawle. A bialpa thar hi tunge tih kan hriat chhuah vat a țul a ni" Dintluanga lah khan a rawn chhunzawm zat bawk a. Hun rei tak hnuah tihian bialpa te ka han nei ve leh a ni a, an mak a ni. Hrilh hriat ve hma hma hian an lo phi cheng zel hlawm mai. 

" Tak tak in, remchang hmasa berah keini ho hi la ram chhuak teh ang u. Zan khat vel lek kan riak anga, ramhnuai a chaw han ei vel te pawh kha a chakawm tawh alawm le" Zothana bawk khan a rawn tih leh chuan kei tih loh midang zzawng te kha chu an lo phur nghal em em tawh a, a hun tur te pawh chu rel nghal zung zung in class test zawh veleh chu an Ruat fel nghal hmak mai nia. Ka peih ve dawn em tih pawh hre hmasa hawt silo hian ngaihzawng te hruai awih loh an han ti zui bawk a. Hm, engpawh chu nise, ka peih emaw peih lo emaw, ka tel ve leh ngei chu a țul hmel e.

Malsawmdawnga nen pawh chuan inzui ngawrh tual tualin tunah chuan Ramhluni pawh khan Kan inkar te chu min hriatpui ve vek tawh a, alo phur ve em em ringawt zel. Tin, ka thiante pawh khan tunge ka bialpa tih chu hre ve tawh in, hmai chhan ah erawh an la inkawm chiah lo thung a, min pawmpui ve viau chuan ka hria e. Mahse, a khât tawk erawh chuan a tu emaw ber khan

" Inpa chu eng ang mizia nge. A duat che em" tih zawhna hi min zawt ve leh khauh thin a, a fel zia thu hlir in ka lo chhang liam ve Mai țhin. Nge, dawt ka sawi Chuang hleinem. A fel miau sia lawm. Lalsiamthara lah hiann

" Hmaichhan ah chuan kawm ila second reilote chhung in a mizia tur chu ka hre nghal thuak thei ang. A zawng zawng a nih loh pawhin a chanve tal chu ka hre hrim hrim"  a rawn ti leh ham ham thin a, ka lo nuih pui ve Mai Mai zel thung. Lo hre tehreng pawhni Sela Malsawma sualna leh chhiatna lai hi chu sawi tur an hre tam lo ve khawp in ka ring e. 

Nitin zantin inhmu ta chu in ngainatna a lo zual a, kan inthlahlel zual tial tial bawk a, inhmuh theih loh hlek in awmdan kan thiam tawh lo a ni ber e. Ani hi private driver tihtak ah hian koh thut thut theih tur a inpeih reng a țul si a, engemaw Chang hi chuan a zan rawn leng te pawh hi laklawh laia chhuah leh thut a țul ve thin. A hna kha a ni miau mai a, kei a tan lungawi loh a lak emaw, lo phal sak loh ve ngawt kha thil tih chi a ni hauh lo tlat. Chung hunah te pawh chuan ka ngai thin em em a, phone kaltlang hian inbe ve reng mah Ila ka kham thei mawlh lo a ni ber e. 

" Vawiin chu class I nei Chuang lova motor ka la chhuak thei dawn bawk a, leng chhuak dun ve mai mai Ila" rawn ti ve ngial in, ka lo phur nghal em em ringawt tawh. Ka aw chu ka pawh rang kher bawk. 

Tichuan, a sawi tawh ang ngeiin a motor vawn lai nen khan kei chu min rawn hruai ta thlap bawk a. Ka hmel a hmuh rual chuan a rawn nui nghal var var mai bawk. 

" Khawnge Kan len ang" ka lo tih chuan ngaihtuah zui deuh vang vang phawt in, chutah, 

" Sunday apiang a in ngaizawng ho lenna thin tlang sang lamah khan thlifim han dawng dun ve mai mai Ila" a rawn ti ta khauh. 

Engtinnge chutiang hmun te chu a awm tih pawh alo hriat leh hman zawk ni. Kei, a veng chhung mi leh sa zawk pawhin kal nachang ka hriat ngai lohna tlang kha a nia. Nuih chu a ti za lek lek thei mai. 

" I tih dan dan a nimai boss" tih pah a motor chhung ka han luh fel rual chuan ka biangah rawn khawih zui neuh neuh in a hmer zui ta vak. Ka lo țe ve țhat thei hial a ni. 

Tlâng sâng kan tih mai, a hming ang chiah a kan veng chhung tlang pawng sang lai, kan han thlen chhoh chuan vanneihthlak tak hian midang kal ve hmuh tur an lo awm hauh lo pek a, a thawveng nasa mai bawk si nen nuam chu kan ti zui dun ta phian. Venthawn tur awm ta lo na na na chu inkuah rial in hmun pakhatah Kan țhu dun ta ren rawn phawt a, thlifim lo thaw leh heuh heuh thin te chuan awm chu a ti nuam in min ti thawveng ve sawng sawng thei hial in ka hria a, ka bula awm mek hian alo zir ve hranpa bawk si a, nuam chu ka ti lutuk ringawt. Mahse, kan thut fel atanga darkar khat em pawh a liam lo ang tihtur ah chuan phone call dawng in, a hmel chu a rawn dur chhuak nghal vek thei a. A phone nise a melh pah vung vung reng bawk. 

" Hruaii a nia. Tun ang hunah te eng thil nge ni ta ang le" ti nuah nuah Chung chuan call chu chhang zuiin, rei pawh a biak hma chuan phur loh hmel fahran mai hian

" Awle awle, ka lo Kal dawn nia" ti leh maiin, kei chu min rawn en nghal vat a. A in thiam loh hmel angreng fu. 

" Haw phawt Mai Ila. Hruaii khan chhuah duhna a nei leh thut a, ka va thlah leh mai loh chuan" ti leh nuah nuah in a tho chhuak a, min kai tho ve nghal zat bawk. 

" A ho lutuk. Inthiamlo duh suh aw. I hna leh I eizawnna a nia ka hrethiam che alawm. Hun remchang dang a awm ve leh mai ang"  lo ti ve zung zung in motor dahna lam chu kan pan dun ta a. Ka hmui a a rawn fawh leh zawk hnu chuan veng chhung lam pan in Kan tlan dun leh ta a ni. 

Mahni in lam pawh pan ta lo chuan Ramhluni te inah bawk ka in drop tir leh te te a, Ramhluni'n kan hmel alo hmuh rual chuan awmngaihna pawh hre lo hian a chiau zui leh chul tawh a, a hlimawm thei thin a nia. 

"In leng chhuak dun ve ngei emaw ka tia. In lo let leh hma si ve"  a rawn tih chuan ner sak sak chu g hian sofa chungah khan ka țhu thla nghal hnawk thei a. 

" Vanlalhruaii leh bawk mawle. Motor hman a duh  deuh a nih hmel" lo ti ve sap in, Ramhluni thung kha chu ring zet hian a rawn chek zui ta hlak mai. 

" Ka va han awih lo ber mai tak. A thuhrim in Vanlalhruaii te chuan a khalh thiam ve tawh tho a, license nise a nei thlap tawh bawk. A over hret thin he nu hi chu" lo ti zui ve hlak hlak in ka bulah chuan a rawn țhu thla zui chat bawk a. Ka awm te chu a ti nuam lo leh zo vek tawh. Chutah, amah bawk chuan 

" Hmun dangah motor khalh tur hi zawn sak vat vat ila a țha ang. Saw mite chhungkaw over lutuk saw chu ka chek hian a mil thei lo hrim hrim. Hun thawl reng rneg inpek awm lo mai" rawn ti leh hlawk hlawk in kei chuan sawi tur ber pawh hi ka lo hre tawh lova, haw mai te chu ka duh tawh zawk hial. 

Ding chhuak hluai in haw mai ka duh thu ka han sawi chuan maktih hmel fe hian min rawn thlek chho ta hâ mai a. Ka lo nuih ve sak ringawt. Haw thuai thuai a Malsawma pawh chu call hmanga va biak ve hrim hrim te ka duh. Vanlalhruaii nuam ti lutuk tur pawh kha va tihbuai ka chak ve hrim hrim. Mahse, in ka thlen hnua ka han call pawh chuan phone reng rneg chu a la thei ta hauh lova, thinrim chhan tur chu hre miah lo mah Ila ka inhum ruh ve ngawt ngawt reng mai. Message a seen lova, call na a chhang let bawk silo, Chung chen chen chu eng nge a tih tawh ang. Tunah hian khua nise a thim țan tawh a ni a ka ngaihtuah chian phei hi chuan thinrimna leh ngaihthat lohna hlir in ka khat thei tawh a, ka lawm thlawt lo a ni e. 

Zan dar 7 lai a rik hnu chuan ngaihtha lo ru fahran hian mut hmunah thil chi hrang hrang ngaihtuah kual in ka mu zui deuh dar dar tawh a, chutihlai chuan message pakhat hi ka dawng ve ta nawlh. Ka'n en nak chuan ka rindan ang khan Malsawma a lo ni leh miah lo. Vanlalhruaii hnen atang zawk a lo ni e. 

" I bialpa hi hna nei lai a ni a, vawiin ang khan vawikhatmah hi I duh duh hunah chhuahpui tur che in lo sawm tawh suh ang che! Manni lirthei hmang te chu ni ula ka hrethiam a, chutiang pawh ala ni lo zui. Ka lo rin lawk dan ang chiah a hmeichhe țhing tak chu ilo nih hi " tih thu chu min rawn thawn duah in, ka mu lai pawh chu ka tho chhuak nghal zawk thei hial. Ava han zaktheilo pap pap tak aw. Thinrim kut khur hlak hlak Chung hian Malsawma number kha ka hmet chhuak zat a, ka call nghal bawk. Mahse, a hma ang bawk khan ani chuan call chu alo la leh thei ta miah lo mai a, ka thinrim lutuk tawh chu ngawi reng hian ka insawh zui nawk nawk thei tawh a, awmngaihna min ti hrelo. Chutah, zah pawh dâwn lo in Ramhluni zawk chu ka va be buai ta ringawt. Malsawma chungchang chu zawt nghal in ani chuan Malsawma chu in chhung alo luh rual rual a a room lam a pan nghal thu leh, a muthilh nghal thu chu min lo hrilh in, tlem chuan ka awm pawh a nuam ve ta deuh e. Mahni inah a awm ve tawh tih ka hriatna hrim hrim khan min ti eng thawl suai suai thei a, a hnen atang khan text leh call pawh dawng lemlo mah Ila tlem chuan a ngaihthat thlak ve hrim hrim tho e. A chau ve deuh te pawh a ni mahna. 

Chumi zan chuan Vanlalhruaii pawh kha chhang let peih lo in rilru thawpik ru zet Chung chuan ka lo muhil lui ve ta hram a, ka mu tui lem lo kher. Ka țhang harh sek ringawt. 

A tuk mai chu kan test neih hun tur kha la ni zui in, thiam mumal pawh hi ka neilo reng reng. Test chhung zawng te pawh chuan Vanlalhruaii khan kei chu min rawn mitmei ru reng thin a, a khât tawk hian Kan in melh leh râwm râwm zel. A kham awm duh takzet a ni. Chutah, classroom ka Chhuahsan rual deuh thaw chuan ani pawh khan min rawn umzui ve nghal zat in, min pawt ding deuh lawp a, tum loh deuh hian Keipawh chu ka inher zui sawk thei mai. 

" Ka driver hi I mimal thil ah lo pawt hrang tawh suh ang che ka tih kha aw. Zaktheilo reuh lutuk mai. Ka beng hrep mai tur che asin" rawn ti zui hlak hlak in kei chuan fiah zet mai hian a hmel chu ka lo en ve reng bawk a, ka thin te chu rim ve tawh hle mahse la Helai hmunah hian buaina chawh chhuah ka duh loh avangin chet lak erawh ka tum ve lo thung. Mahse, kan Lalhruaii zet chuan a duhtawk thei ta reng reng lova, ala inhumruh pan pan reng nia. 

" Ka sawi chu i hria em. Engah nge ngawi reng a khatia min en a. Țawng rawh. Min chhang ta che. Ka ti sual nawn leh tawh lovang ti ta che!" rawn ti leh bawrh bawrh in kei chuan zawi sap hian

" Chapo ve hlemai"  ka lo ti ta daih a. Chu chu rawn hre fuh in ka sam chu a rawn țham zui ta chat mai. Chutah, Engtin mah pawh ka tih let ve hma hauh chuan kan lam pan a rawn au thawm hi hria in

" Thlah rang rawh" a rawn ti a. Dintluanga aw ngei kha niin ka hria. Kan bul a rawn thlen phei chuan rang tak hian Vanlalhruaii kut chu a rawn man bet zui ta nawk nawk lehnghal a, a Khawsak dan khan  a ti lawm lo hle tih chu a hriat theih awm e. A meng thip angreng viau bawk. 

" Engvangin nge ka thiannu hi kut thlak te ilo tum ve ngawt a. I Zak lawm ni? Haw zui vang vang rawh" ram hmak a a rawn tih chuan Vanlalhruaii thung kha chu ala zam tha duh lo angreng hle a. Ala hawi vah vah reng bawk. 

" Ve lutuk a che a. Mi bialpa  len chhuah pui hi lo sim tawh Sela hetiang hian Kan Khawsak kher a țul lovang" a rawn tih meuh chuan amah chu kuai her deuh sawk in, 

" Engmaw I sawi kha" ka lo ti zui ve zat a. 

Min chhang tawh lo hian ngeiawm em em a rawn ner nawng nawng chungin a phone chu a phawrh zui ta daih a, chutah, 

" Aw Bawiha, ka hruai theih tawh a nia" ti zui leh zat in, mjn rawn melh leh rawm rawm hnuah a kalsawn ta daih. Kei chuan thil hriatchian duh ka neih avangin amah chu umzui a zawh chian ka han tum zet na a, rang lutuk in Dintluanga zawk khan min lo pawt bet hman ta hlauh. Ka bialpa chungchang kha engtinnge khatiang khan a sawi theih zawk. Min hmuhsit theihna dan hi a nei bik emni. Hrep tak chuan. 

Ka awmdan a dik loh em avangin Dintluanga chuan a bike nen min thlah haw ta ringawt a, engmah pawh min zawt zui lo in a hranpa taka tawngkam a min han hnem vel pawh a tum Chuang lova, ngawi reng hian ka awmdan chu a lo thlir ve mawp mawp ringawt. 

In Kan thlen fel hnu chuan ka phone phawrh sawk sawk in Malsawma bawk chu ka han call leh ta vat a. Ala chhang har em em zui lehnghal. Mahse, ka luhlul chu chhuah in call a lak hma zawng chu ka ti nawn ta ngat ngat mai a, a tawpah chuan a rawn la ve thei ta hram e. Mahse, thildang reng reng ka sawi ve hma hawt chuan

" Ka la buai deuh hlek a, nakinah ka rawn bia aang che aw" rawn ti nghal zung zung in phone chu a dah leh ta daih. Ka sa zui tawh angreng kher mai. Dintluanga lampang pawh ngaihtuah hleithei lo chuan ka buai mawp mawp hi a ni ber a, ka na a ni. 

" Ngaihtuah loh luih tum la, hahdam rawh aw" Dintluanga chuan rawn ti ve sup in, a mitmeng atang kha chuan min ngaihtuah ve takzet tih chu a hriat theih a, thu tam sawi lo mahse ngawi reng a alo awm ve ringawt pawh hian nasa takin min thlamuan a, min ti zangkhai takzet zet. 

Hemi ni vek hian MALSAWMDAWNGA pawh in min rawn be ve leh in a rawn insawifiah nasa kher lehnghal. Ngaihdan tur ber pawh hi ka hrethiam tawh lo e a. 

" Mahruaii hian min ngaizawng a, I bulah chauh pawh nilo, a a thik zawng deuh hmeichhe dang bulah hian kei chu a bialpa angin min lo sawi zel lehnghal a, engtia tihtur nge ka hrethiam lo. Ka khap hneh rih thlawt lo a ni ber mai" a rawn tih chuan kei lahin bung nghut mai hian

" Bang la midang bulah thawk daih rawh" ka lo ti let ve thuai bawk a. A ngawi zui deuh vang vang. Mahse, zaidam tak bawk hian

" Ni e, kan la ngaihtuah dawn nia" rawn ti țha veleh maiin rei pawh inbe lo chuan kan ti tawp a, chumi zan chu a rawn leng ve leh hlawl mai. Mumal taka kan inhmuh lohna alo rei ve ta bawk nen a hmel ka hmuh rual khan ka lung te hi a chhe thei lek lekin ka hria. Ka ngai tawh em a tin ni. Hemi zan hian rei tak leng ve in, rawn ko peng tu an awmlo bawk a nuam kan ti dun ve hle. Tin, Vanlalhruaii leh a kaih hnawih thil kha chu sawi chhuah nawn fo pawh Kan duh lo bawk a ni. 

Test Kan neih chhung zawng khan zan lamah a hun awl neih ve chhun rawn hmang tangkai in Malsawma chu a lo leng ve ta ziah a, kei cuan lehkha pawh ka zir thei ngailo. Pawi tihna pawh ka nei chuang lova, amah phei chu ka hrilh duh lo hrim hrim. A inthlahrung anga, a reh le hmak mai ang. Chutiang in test naah pawh ka ti chhe bik Chuang lova, ka own-word hmiah hmiah mai a ni. 

" Naktuk chu ka pu zinpui a țul dawn tlat mai a. Zan khat emqw vel chu kan riah ka ring"  Malsawma'n a rawn tih chuan pawi pawh ka lo ti lem lo. Naktukah hian Kan dam țha a nih chuan thianho a ramhnuai riah chhuah kha kan lo tum sa ve tawh bawk nen, ka hmuh phak loh a a awm dqwn rau rau a nih chuan a pu chu zui daih rawh se ka ti. A naupan chhiat thlak ve thin ngawt a ni. 

Tichuan, sawi lawk tawh ang ngeiin a tuk khua a rawn var rual chuan Keipawh tho zui nghal sawk sawk in Kan riahna lama pawimawh ang ang te chu khung khawm zung zung in ka indaih lo ve hle lehnghal a, Malsawma pawh khan an chhuah chiah thu te chu rawn sawi ve in a rawn call a, chumi tih loh ah, ka thiante panga ngawt lah khan chumi kha mi chu i theihnghilh palh a nge, chumi chu i rawn keng em? Tih mai mai sawi tur hian min rawn call buai ve sek bawk a, ka indaih lo phiangsen a ni ber e. 

A hun chu rawn thleng in tukthuan eikham hnu chuan Zothana motor ah inhnawh khawm in Kan tum ram, Aizawl atang a hla lutuk lo, hiking nana hmun duhthusam ni si chu kan pan zui ta vang vang hlawm a, boruak awmdan in alo zir vei bawk nen chuan a nuam dawn khawp in ka hria e. 

A hmun kan thlen fel hnuah pawh kut awl lai reng reng awm thei lo in tihtur țul ang ang te chu kan ti lehnghal zung zung hlawm a, kan indaih lo lek lek zawk tawh. 

Tent te Kan Siam zawh a, a țul zual pui kan tih zawh meuh chuan hah thlan tla hluam Chung hian thut hmun chu kan han rem leh te te hlawm a, Dintluanga khan mei te lo chhem in coffee leh eitur alo Siam zo vek bawk tawh nen, riltam zual pui hnawh khah nan Chung thil te chu kan han ei leh zung zung hlwm a, titi  pah hian Kan nui leh dar dar thin bawk. Chutah, Lalsiamthara pek chuan nui hmel pawh pu duh hauh lo leh fiamthu tih hriat theih tho si hian

" Lalhriatpuii chu kan lo sawm ve duh kher kher che a ni. In lamah ngaihtuah tur mi pawimawh tawpkhawk i nei bik bawk sia" rawn ti chhuak khauh in kei chuan ka lo melh rum zui nghek a, Dintluanga tih loh midang zawng kha chu an lo nui zui hak hak reng bawk. Thanmawia lah khan rawn tui hnih ve nghal zat in

" Tukin khan ka hmu tak asin. Hruaii lah khan a bye bye nasa mai a" rawn ti zauh in ka nuih chu a za lo țan hle tih pawh Dintluanga kha chuan a hrethiam ve a ni chek ang chu, min rawn melh ralh ralh Chung hian

" Vawiin chu khawi lamah nge Kan han vah chhuah ang aw. Khua lah chu a nuam nasa mai si a, a tih zia khawp mai" tiin, kan titi chu thlak a rawn tum tih ka hrethiam ta nghal a. Ka lawm ru viau mai. Chumi chin chu Dintluanga thu rawn sawi kha sawi chhunzawm lehin an ri nghal laih laih reng hlawm a, kei erawh ka la ngawi kar reng thung. Rilruah chuan Malsawma hlir a awm tawh a, an zinna tur hmun te chu an thleng ve tawh a ngem tih mai mai te chu ngaihtuah in phone chu ka bih sek reng tawh. Ala reh hmak mai lehnghal. Ka ngai a ni. 

Mahse, chhun chaw te Kan eikham hnu chuan ramhnuai vel a vah kual chu tum in Kan inbuatsaih zui ta sang sang hlawm a, tlem in rilru pawh chu kan thil tihtur lamah chuan a awm zui ve thei ta deuh. 

Ramhnuai pik tak taka min han hruai kual fe hnu phei chuan rilru ah Malsawma lam reng reng a lang thei tawh lova, vangvat ka kai angem. Rul kan hmu thut a ngem tih ringawt chu rawn awm tawh in nuam lah chu ka ti ve phian tho si a, ka khek leh tuarh tuarh thin. 

Chau hnep hian Kan bûk te awmna kha khaw thim fel vek tawh hnuah kan thleng leh thei ta hram a, midang zawng kan chauh tawh em em laiin Zothana erawh chu ala fit hmel hliah hliah bik. Sawi tur tharlam a hria in a tuk pawh chu riah belh leh hial mai te ala duh thu a sawi tak deuh deuh a, ngawi reng hian Kan lo melh peih ve țWk a ni. Chutah, ka phone chu rawn ri in Malsawma a nih tawh ring zet hian phur em em in phone chu ka han en ve a, Ramhluni zawk a lo ni daih. 

" Thiani, in inah ka lo kal a. Ilo awm silova, tunah eng nge itih I buai em" rawn ti hmasa te te in a awki chu a zuai em em a, thu lawmawm tak chu a rawn neih pawh ka ring ngam ta hauh lo. 

" Eng thil nge ni ta Lalthian. Ava pawimawh awm em em ve nang meuh te Kan inah  I lo VA Kal ve tak a"  tiin phur angreng fe chuan ka lo zawt let ve sawk sawk tawh a. A rawn thaw zui deuh ta hak mai. 

"Eng lo a nia, sawi chhuah pawh hi ka hreh ngawih ngawih. Min ngaidam tawp mai teh. Vanlalhruaii khan nau alo pai a! Chu chu a.. Kan nau Malsawma hi a rawn puh ve deuh a nih hmel e!" zuai raih chunga a rawn tih chuan ka Bing nghal mup mup nimai hian ka hria a, ka awih thei lo. Vanlalhruaii khan engah nge a naupai chhan ah chuan ka bialpa chu a rawn puh ve ngawt a. Ni lo, puh chhan tur tha tak alo nei zawk em ni ang. Ka ring phallo. 

" Malsawma'n a hre tawh em" aw khur dar dar chunga ka han tih ve chuan Ramhluni pawh kha alo insut ri ve hraih tawh a, hrehawm a ti dawn lutuk tih chu ka hre sa vek. Min hmaizah ngawt bawk ang. 

" Aw hre tawh e" rawn ti hul leh hak in kei chuan rang fe hian

" Engtin nge chhanna a pek" ka lo ti zui ve zat a. Mahse, 

" A pha thei lo a nih kha! An lo chesual dun fo tawh a nih hmel bawk"  rawn ti lehzel in ka thinrim lutuk chu Ka puak Keh lo chauh tawh a, ka sa chhuak nghal vek thei bawk. Haw nghal rum rum mai te pawh chu ka duh tawh hial. Engtinnge hetiang hi ka chungah a thlen theih zawk. Ka va han na tehlul em. 

Ka thiante mawlh chuan min hrethiam ang tih hlau in a tir atang khan ka inthiarfihlim char char tawh zqwk a, thim chin ah chuan thut hmun rem in  dan Sen rual loh a ka mittui rawn tla te pawh chu hru fai seng thlawt lo Chung hian ka țap zui ta hliam hliam mai. 

"Pui, chaw ei kan hman asin" rawn ti lauh lauh thawm te pawh kha beng khawn thei lo in ka mittui far chuan min tibuai zel si a, awmngaihna tak pawh hi ka hre tawh lo. Chutah, an mi kohna ka chhan tak mai siloh ah chuan Dintluanga khan min rawn ngaihtuah ta deuh a ni ngei ang chu, ka awmna lamah chuan thawm nei miah lova rawn phei ve in dimte hian ka dar chu a rawn vuan zui ta a. Ka lo hawi let nghal vat bawk. 

" Engati leh ta nge. Min hrilh rawh"  zaidam tak a a rawn tih chuan insum hman lo lek in ka lo insut  zui ta hraih hraih mai. 

"ka tihpalh. A harsa em a ni Dintluang, tinge hetiang hi ka nih bik le"  lo ti let țiau in amah chu ka han kuah zui thawr bawk a. Nghet fe mai hian min lo kuah let ve chat bawk. Reivak lo amah kuah bet Chung a ka țah leh hlap hlap hnu chuan insum ve ta hram in thil awmzia te pawh chu ka hrilh ve ta mial mial mai a. A ngaihdan alo nih loh hmel kher. 

" Zawnga chu! Mipa pawh inti ve tawh suh se" rawn ti chhuak nghat in, chaw ei tur chuan ngawi reng hian thian dang te awmna lam chu min pan pui ta phawt. Ka chaw ei pawh a tui thei nek love a. Hemi zan hian chhin khat chhing lo in ka meng tlaivar ta țhak lehnghal a, ni e, ka thu hriat te khan min deng na em a, tui taka han muthilh theihna chi ziazang a ni lo ve bawk a ni. Ani nen khan thla reilote chauh la inzui ve mah Ila ka nghet hman em em si a, diktak in ka lo hmangaih hman ve tawh hial bawk. Inhmangaih tur hian hun tam leh kum tam liam tir kher alo țul hran lo tih chu amah atang hian ka hriat chian phah ta viau mai. Ani kha ka la hmangaih a ni. Mahse, bum ka ni ta thung si a, a na ngawih ngawih hi a ni ber e. 

Khaw var rual in Kan insiam leh sang sang hlawm a, tukthuan eikham hnuah chuan kan haw zui nghal bawk. Khaw chhung thlen rual rual hian kei chu mahni in lamah pawh lut hmasa lo in Ramhluni te inah bawk ka tawp leh chat a. Amah chu lo awm tho mahse Malsawma erawh hmuh tur ala awm ve hauh lo thung. 

" Khaw thim rual in a rawn thleng thei ang ka ring. Awi! Ka thinrim lutuk hi e, rawn haw teh se ka kek thlu nghal tawp duh in ka ring" lo ti zui buan buan in kei chu ka rilru hi a chaw mawlh zo vek tawh a, thinrim ngaihna tak pawh ka hre tawh lo zawk in ka hria. A khât tawka ka mittui rawn tla leh țhin chuan ka rilru puthmang tur chu sawifiah thei ni ngat se chuan ka bulhnai a awm te hi mittui tla lo fa an awm pawh ka rjng thei lo hial zawk. Ka na tih hian a sawifiah zo lova, chu aia thuk leh ril zawk chuan ka na miau a tin ni. 

" Dar 7 velah kan rawn thleng thei ang. Inhmuh ka duh a nja aw" chu message chu en tlawk tlawk in ka thaw chhuak leh halh thin bawk a, ka khap zui fak dak mai. 

Mu leh mal neilo zet a hun ka lo chhiar lai chuan phone call dawng zui in, amah ngei alo ni nghe nghe a. Muangchang hian ka la ve ta nge nge. 

" Aw, eng nge i duh" lo ti ram nghal hmak in, amah thlahlel a be chak em em Chung si khan tun dinhmun ah hi chuan ka be chak tawh thlawt lova, ka hne a ni. 

Inhmuh a duhna hmun a rawn sawi chuan peih lo ru em em a chhuak ve in kawng laklawh ah Dintluanga kha ka la tawk zui bawk a, ka kalna tur te min zawh luam hnuah Keipawh jn dawt tlem belh in ka kalsan zui ve mai bawk. A hmun ka va thlen chuan ani pawh kha alo awm fel ve thlap tawh mai a, a zin haw kha in chhung pawh rap lo in a rawn Kal tlang tih ka hre thei mai. Ka hmel a rawn hmuh rual chuan inthiam loh hmel deuh a rawn nui chhuak hak Chung hian hnuai lam a melh leh vat thung a. Ngawi reng in kei chuan ka lo thlir ve ngawt ngawt ringawt tawh. 

" Ka tihpalh a ni. Min ngaidam thei a ngem? Mjn ngaihdam theih phawt chuan Vanlalhruaii hi ka nei lo zawk ang! Ka duh lo. Ani neih hi ka duh lo asin" a aw chhung ril khur hlak hlak tawh te pawh chu thup Sen rual a ni tawh lova, ka hrechiang lutuk ringawt. Ni e, he thil hi chu a pawm thei biklo alawm. Mahse, a tihsual tawh miau avangin a tihsual rah pawh a seng ngei chu a țul si a ni. 

" Ngaidam che mah Ila awmzia a nei tawh lo e. I fa pai tu ngei kha nei la, kei nen chuan awmzia a awm tawh lo. Kan tawp. Chiang takin kan tawp e"   ka mittui rawn tla tur chu dan beh ve hram hram pawh ka tum a, a harsa lutuk ringawt. 

" Hetiang thil hi a thlen theih ka ring biklo asin. Ani kha min ngaizawng tawh lo tur leh min hnaih tawh lo tur pawhin vawitam ka hrilh thin. Mahse, ka hna nena inzawmna nei a nih miau avangin in hlatsan erawh chu a harsa thin si a, a pawi a ni. Eng aiah nge kha zan khan zu ka lo ruih kher kher le"  rawn ti chuai leh raih in a thaw zui ta hak mai bawk a. Ka lo en ve reng ringawt. 

" I tisual tawh a, a tawp I thleng ngei tur a ni. I mawhphurhna hlen la huaisen takin paltlang ang che. Mipa j nih ang ngeiin I fa lo piang tur tan chauh chuan in hlan ral tawh la ka duh. Ka kal a nge"  ti sap a Kal mai ka tum lai chuan ka kutah hian chiang zet in mjn rawn man bet leh ta tlat mai a. Ka ding zui nghal chawt thei. 

" Ni lo Kal suh. I tello chuan ka awm thei dawn lo tih i hriat kha. Min ngaihdam theih phawt chuan he nu hi nupui a tan neih ka tum lo. Ka nei duh lo" rawn ti leh in, min vawn behna kut chu ka lo phih thlak sak hmak thung a. 

" Nei duh lo tur te chuan a tir atang kha felfai takin thil ngaihtuah hmasa ta che. I tlai tawh. I tuh rah i seng a hun a I tlan chhia ang maw? Ka ten che. Ka ten hluah hluah che" ti leh bawrh bawrh in Kal leh mai ka han tum chu nghet fe hian mjn rawn vuan bet ta tlat pek a. 

" Min ngaidam thei miah lo tihna emni? Ka tihsual ah khan ka inchhir a, pawi pawh ka ti lutuk. Mahse, ka nei duh lo a ni. Ka duh lo hulhual" tiin a țap zui ta hlap hlap mai a. Ka ding tlawn ve reng ringawt. 

" Ka ngaidam che. Mahse, nangnen hi chuan a rem thei tawh lo a ni e. Min hrethiam la ka kal zawk a nge" ka tih pawh a min la vawn beh tlat reng avang chuan a kut chu phih thlak tumin ka talbuai zui nasa ta Mai a. Ani lah khan min thlah duh hlek lo in min rawn kuah a min fawh chu a tum ta Mai. 

" Kalsawn teh. Kal rawh. Ka haw duh" tih pah a nam sawn ka tum lai chuan a hmai chu rawn ri no zui chawk in, a țe chhuak țhat thei hial. Dintluanga hian Helai ah hian eng thil nge a rawn tih ve. Mjn zui ru zel tihna emni. 

" Min thlah rawh a tih lawm lawm tawh chuan thlah ve ta mai che" tih pah hian Kan hma lawk a a hmai dawm vang vang Chung a ding khawng reng Malsawma chu ava pan hnai leh  ta mai a, a kawr âwmah khan VA țham zui hnawk in sehchilh rap rap Chung hian

" Mipa I nih ve ngai chuan hmeichhia hi zah la, tin, I tihsual rah ngei chu seng ngam bawk ang che. Ka thiannu hi ilo tibuai leh tih ka hriat vaih chuan maw, kha kha chu a aite chhinna angah ilo ngai dawn nia" tih pah hian hnung lam ah chuan na zet in a paih zui ta dawrh mai a. Ka lo phu zawk thei.

" Kal ang" rawn ti zui nghat in, ka kut khur dar dar te chu a rawn chelh zui chat mai bawk. Tichuan, Malsawma awmdan thlir vang vang Chung chuan ka kalsawn zui ve ta nge nge a ni. 

Khawngaih in hmangaih hle mah Ila ani khan min phatsan tawh a, min bum a, hetiang chung Chung hi chuan lungdam takin ka pawm thei tqwh lo a ni ber e. A harsa lutuk ringawt. 

Dintluanga chuan kan in thleng a min thlah haw in, thu țha tinreng hi min fah pah mawlh mawlh reng bawk a. Ka dam deuh sawng sawng thei. 

" Ngaihtuah duh tawh suh. Ani aia țha kha I phu a nia. Ani ang mipa kha chuan an phu thlawt lo che tih hria la, theihnghilh daih tum rawh" ti sap sap in ka sam thur bum mai te pawh chu min siamthat sak pah hliau hliau reng a. Kei erawh chuan amah pawh en lem lo hian Malsawma ringawt kha ka lo ngaihtuah ve thung. Ni e, ani aia țha kha ka phu alawm. Mahse, ani aia duh leh hmangaih kha tun dinhmun ah hi chuan ka nei rih lo zawk a ni. Inhnem na tawngkam tamtak te hian ka mittui ko chhuak in min ti zuau zawk ni maiin ka hre thin a, min ti na tulh tulh zel bawk. 

Tunah chuan duh lo eng ang mahse la Malsawma chuan nupui a neih tho tho chu alo țul ta si a le, a nupui neih dar a rik hunah kei hian engtinnge hun ka lo hman ve tak anga, khawiah nge tawm bo na ka lo zawn ve ang. Ka hrethiam lo. Ka mittui te hi an tla dawn em ka hrelo, mahse, a tlak ngei erawh chu ka ring zawk e. A pawi lo, huaisen takin ka hmachhawn a nga ka dam em em ang. Tin, ani aia țha kha ka la tawng leh ngei bawk anga, chu nen chuan hma hun hlimawm takte pawh kan nei ve thei tawh ang chu. Ani aia țha kha ka phu e. 

**************************************