Malsawmfela

MALSAWMFELA 

___________

19/09/2025

BY : VANLALPEKI FANAI 

----------------------

" Tunge i nih tih hi ka ngaihtuah ber hranpa lo! Min hnaih tawh lo la, min be nawn fo tawh lo bawk la, keimah in min awm tir rawh. Ka duh lo che! Ka duhzawng lah ini hek lo!" ti piap piap in chu mihring, ka hma lawka ding khawng reng tawh chu ka kawk pah sawk sawk mai a. Ka va han nasat hmel tak. A dik alawm. Hmeichhe zaidam leh nunnem ti a hriat Lar thin ka ni ngai lova, ka thinchhe rapthlak lutuk tlat. Mahse, ka rilru erawh chu a chhe hranpa pawhin ka hre lem lo. Tin, ka duh loh zawng ah chuan rapthlak ve thei tak mai hi ka ni bawk a, ka luhlul khat tlat bawk. Chuan, he pa teh hrep pawh hian engvang a tun thleng thleng a min la umzui a min la be lui ngar ngar nge maw a nih le ka ti thin. Min hmangaih in min lo duh ve takzet pawh chu a ni maithei e. Mahse, ka hrilh zawh chiah tak ang khan amah hi ka duh lo. Ka duhzawng a ni pît lo! Ka ten deuh.

Lalsangzuali ka ni a, hmeichhe inkhaithli pangngai, pian model em em leh Chuang hauh lo niin, vun ngo lam pawl deuh zawk mah hi ka ni ve a. Tin, hmai bial lam ai mah hian hmai sawl lam ka pawl deuh zawk mah bawk. Tunah hian college kal lai, chhungte chawm hlawm zirlai ve mai chauh ka la ni a, amah erawh chu, chhungkaw Khawsak harsa lutuk erawh kan ni bik lem lo. A hming in ka pa hi kan khaw High School ah headmaster nihna chelh mekin a awm ve a, a hna vanga he khua pawh hi in ben belnan a hmang ta kan ni a tih theih awm e. Chutiang zel in ka nu hian sumdawnna lam a kalpui ve mek a, a hlawhtling thawkhat angreng hle bawk. Kei hian unau pianpui mipa pakhat ka nei ve a, Lalchhandama niin ka nau a ni nghe nghe. Ka nau zawk mahnise kei ai a lian daih a, intih tlangval nachang erawh a hre leh Chuang miah lo.

" Kan class ah ka lian ber a, ka huai ber bawk" ti thin ang chi kha a ni ber e in hriatthiam dan tur chuan.

"Sangzual, Khawnge i ui!?" hnunglam atanga min rawn ti tu avang chuan rang zet hian ka han leh hawi nghal a, a mai mai chuan! Laltlankima lo ni phiangsen in. A zawhna min zawh duh dan vel leh Tlankima hmel teh hrep ka hmuh rual khan keimah ah hian thinrimna hlir a rawn lut nghal ka ti Mai. Ka inhumruh nghal pan pan a, ka insehruh ve viau bawk.

" Tlanhnap, ngawi hmak rawh aw! Inhmuh remchan apianga Khawnge i ui min tih ziah chu le. Keipawn I hmel ka hmuh rual apiangin Khawnge i sakawr? Ka ti ngai bik che emni? I hneawm lutuk" ti zui buan buan Chung chuan ka kalsawn a, Tlankima leh a thiante nui zui hak hak ri pawh chu ka hre pha reng. A dik alawm. Ka hmel a hmuh remchan apianga khatiang zawhna ninawm zet min zawt fo kha ka lawm lo. Tih taktak ah chuan ani pawh kha kum hnih leh a chanve a hnung zui tawh tu a Bialnu nghet leh urhsun em em, kan college ah pawh nula hmeltha ber ni pha ngat lemlo Lalhriattiri, a sakawr ti a kan koh fiam thin awmna ka zawt fo ngai bik hleinem. Ve mai mai a. Khawnge i ui? A rawn tih tak phei kha chu ka bialpa pawh ni lo, nimahse la englai pawh a min at chilh a min duh hlum lo chauh tu Malsawmfela a ni tih ka hria a, ka thin a ti rim zual thin bawk. Min chhaih hian ka lung ni lo thin lutuk tih an hriatchian tawh em avangin min chhaih uar sauh zel lehnghal.

Nia, Malsawmfela chu kan class ami ve tho a nia, kei aiin kum 3 velin a naupang zawk bawk. A hmelchhe lova, a nungchang a cool raih bawk a, a zakzum ru angreng phian bawk. Hmeichhe lamah hian a tla na viau em tih chu hre lemlo mahila hmeichhe thenkhat erawh chuan Zak Chung chunga melh pahin an in dem fiam ve fo tih erawh ka hmu tawh thin. Mahse, heti khawp a min atchilh tu hi ni mahse, ka engahmah a thawk ve lem hlei lova, ka duh ve theilo. Ka type a nilo a nih ka ring. A mak lutuk. Chuti Chung Chung pawh chuan zantin a la rawn leng ve peih ziah tho a, phone atang nise min text awl hek lo. Class kal tura mjn rawn sawm Chang te pawh hian a bula kal duh lo lui thin in ka hmu lo der hmak a, chak zet hian ka ke ka pen khum vawk vawk thin. Ka che ngeiawm thiam ve thin asin a lakah hi chuan. Nia, hmeichhia hi chuan kan duh loh zawng te hi kan pe na ve thin em alawm. A bikin kei ang hmeichhe thinchhia leh chapo ve tak, hawi sang ve fahran ang chi te hian Kan hrat lehzual in ka hria.

" Tinge maw min umzui reng le. I mawl nge kei hi ka mawl zawk? Mawh? Ka duh loh zia che leh ka hnar chian zia che chu ka khawsa zia ah pawh ka tilang fai vek tawh a, heti Chung Chung a min la umzui reng mai hi chu I Mawl ka ti lo theilo. Mi ang lo inih dawn hi" hmaichhan ah te chuan ti let phiar phiar mah Ila, ani chuan zaidam tak hian

" Ka hria asin min duh loh zia hi chu. Mahse, ka hmangaihna che hi a lem mai a ni lo tih i hriatchian hunah meuh chuan min hmangaih ve thei tawh ngei ang. Engtia rei pawh nghak dawn ila ka nghak ang" zaidam takin ala ti let thei zel nia! Dawhthei ngar ngar dawn khawp mai. Engtikah tak ka hmangaih let ve hun tur chu lo thleng ang maw. Pa chauh lo chuan a hriat pawh ka ring lo e.

" Hotute lam atang a kâr awl rawn hnawh khat lailawk turin zirtirtu pakhat rawn dah belh an tum deuh a. Rawn thleng thuai se ka ti khawp mai. Tunlai chu indaih loh a zual a, thawhpui te pawh an hah, an chau zo" zanriah kil lai hian ka pa chuan a rawn ti ve chuar chuar a, amah chu kan melh nghal thap. Chutah, ka nau, a taksa phu lova Mawl leh lerh nachang hrelo emaw ka lo tih țhin khan 

" Pa, mipa NGe hmeichhia an rawn dah dawn" a rawn ti chhuak ta pheu mai a! Ka chaw hmuam lai ka phuh lo chauh a ni. Ka pa lah chuan thutak chhunzawm chung zel hian

" Hmeichhia ai mah chuan mipa kan mamawh a. Mipa a nih ngei ka ring e a Mama" alo la ti zui. Ka pa in a chhan zawh rual a ka nau hmel nûr nasa lutuk leh beidawn hmel lutuk mawlh mai kha aw... Ka khawngaih zawk. Engpawh chu nise, nula pawh rawn dah ta tehreng se ka nau-a hian a chhai ve ngam a inring tawh reng reng em maw ni le. Thawkkhat lai khan an class ami amah phu lova hmeichhe tereuh te a imaita ve deuh an tih thawm kha chu ka hre ve a, kha takngial pawh kha bawhzui ngam lo in tihian a kut chi lo hawi vel mai mai leh bawk sia, zirtirtu nula pwh chu rawn dah thar eng ang mahse he nau hian eng vanram mah a thleng leh Chuang hlei longe ka ti. Huiham! Tinge maw keini unau hi kan chhiat loh ngaihtuaha bem tu kan neih khat em em mai le. Kan fing var vak lo a nih ka ring. 

Ka pa in zirtirtu thar chungchang a sawi atanga chawlhkar khat a liam leh hnu chuan a sawi tawh ang ngei in Kan khaw high school zirtirtu thar tur mipa ngei mai chu an rawn dah ta a. Thawk hlen tur nilo mahse ava han chhelo chiang teh kher em! Thiannu Ramnghaki phei kha chuan a melh tawp theilo ka ti tawp mai. Alo melh leh ngawt ngawt thin. Nia, a rawn thlen ni atang khan Kan inah kan lo mikhual lailawk phawt a, in ruak luah tur a hmuh veleh a lut nghal thei turin keini chuan that Kan lo chhuah a ni ber e. Rinai takin in ruak lah kha alo vang phian bawk si nen Kan inah chuan a duh aia rei a thlen phah ta ngei lehnghal a, a inthlahrung phian zui. Mahse, kei leh Ramnghaki lawm ah a tla ve thung a, Ramnghaki phei chu zingkar atang a rawn dak lut țan tawh thin. Mipa chhelo deuh te hi a lo hre thei ve phian zel bawk sia. 

" In in a rawn innghah chu a man hla in a zawng chhak thlak khawp mai. Sangtei lahin chawhmeh a Siam tui thei bawk si a, hetiang te chuan mahni a awm hran pawh Kan peih lo mai dawn alawm le" nui deuh hak hak Chung hian Kan mikhual, zirtirtu thar Mapuia chuan a rawn ti vei luam a. Kei ka lo ner sak. Chawhmeh Siam thiam tiin min han fak der ve ngei chu a nia, kha leh chen chhungkaw eitur eirawng ka lo bawl tawh na ah khan vawikhat pawh ka chhungte atang hian fak der na tawngkam ka la dawng ngai miah lo ania. Ka chhungte hian min fak hreh nge, Mapuia hian mjn fak der tih pawh ka hrethiam tawh lo. Mahse, ka lawm thlawt. Tihian kan bulah ni 3 a awm ve na tur a ni tawh a, nuam ka tiin kawm a nuam a, a tawk lekin a țawng duh bawk a a hawizau tih hriat hle bawk. Tin, han sawi belh ta zel ila, heng a lehkhathiamna piah ah hian a nungchang a mawi a, midang bula awmdan tur a hre em em a, a pian nalh leh mawina mai piah ah hian thawh hreh a nei dawn lo tih a hriat hle bawk. Hmeichhe tan chuan amah tluk a mipa, pasal a tana neih chakawm leh innghahna tlak tur hi an awm dawn Chuang em ni ka ti. Pasal tlak hrilhfiahna sawi turin min ti ta se he tlangval ngei hi a hrilhfiahna atan chuan ka hman ka ring. Ka mitah chuan a tling tawk a, hmeichhe tamtak pawhin ka ngaihdan hi an tawm ngei ka ring bawk a ni. 

Chutia, kan khua in mikhual tlangval chhelo tak mai, hlawh nei ngat lehnghal kan han neih atang chuan titi thar a tam in, nula ho an țang na Sawt angreng hlemai a, kan mikhual alo nih ve na laiah a chanchin min zawt leh nawlh nawlh tawk pawh hi an awm fo. Ka rin loh deuh deuh te hian min rawn zawt leh nulh thin. Nuih te pawh an ti za zawk e a. 

" In mikhual tlangval chu engtik thleng nge in bulah a Khawsak dawn a" Malsawmfela chuan a rawn ti ve khauh mai a. A message chu reply loh a dah țawih țhak mai ka duh. Alo buai ve na tur hi a awm lo chiang e ka ti. 

" Engatan nge i tih ve" ti ringawt a reply leh in a lo seen rang em em khawp a. 

" Nuam itih hmel em a ka zawt mai mai che. An sawi lar hlawm bawk sia" a rawn ti leh a. Ka ner sawk. 

" Nia, hmeichhe duhzawng nungchang leh pian a nei miau a. Kan bulah hian awm hlen duh se kan tih naklaiin" ti ngat a reply leh in ani chuan a seen vek a, a seen zone ta ringawt. A ruk tak chuan a lung chu ka ti awi lo leh viau in ka ring. Mahse eng nge pawi. Ani kha ka bialpa pawh a ni lova ka engmah a ni lova, ka care peih hranpa vak lem lo. A țulna pawh ka hre lo. Mahse, zan lama ka reply dan avang khan a thin alo ur mai mai hauh lo chu niin, a tukah pawh class kal turin min rawn sawm leh ta tho a, hmel hlim lo nise min hmuh hek lo. Rilru hi a ti hah thin zawk e a. Eng ang a tawngkam na leh ngeiawm pawn chhang let ila min biak chhiat phah duh ngai lova, min ngaihtuah Sawt thin zawk emaw tihtur a ni. Ka duhzawng leh ka hmangaih mai theih tur mipa han ni ve se zawng, hmeichhe vannei tak ka ni dawn tih chu chiang sa. Mahse, tun dinhmun ah erawh chuan ani hi chu a leng ve lo a ni rih ber e. Ka thinlung ah hian hmun a Chang ngai lova, tunah tak phei chuan chang lo nasa turu tak a ni. 

Mapuia pawhin tunah chuan amah a in vawm hran ve na tur in ruak nuam tak luah tur a hmu tawh a. A insawn chhuah ni pawhin kei leh Ramnghaki khan Kan zu pui ve nghe nghe a nih kha. A lawm thiam lehpek khawp mai. Tin, tunhnai tak hian amah ka duhna lamah ka inngaihbel nge chu ka hre lova, Mapuia min melh dan hi danglam riau a hriat Chang ka nei ve leh zuk thin. Ka inrin miah loh lai te hian min lo melh ve vung vung thin tih hi ka hre thar a, kan mit pawh hi vawi duai lo a in tawng fuh tawh nghe nghe. Chutiang hunah chuan ka awm dan ka hlauh ve fo a, ka che lai khawlo zui nghal vek zel nia! Ka duh a ni he pa hi. Ka duh mah mah dawn in ka hre tlat. Hetiang rilru hi amah ah hian pu nghet țan viau tawh mah Ila, hmeichhe inthup thei tak ka nih ve na laiah tih lan vak kha ka tum ngai hran lova, mahse, amah zawk in min duh a ni tih thu hi vawikhat tal min hrilh se chuan e, ka hnar bik lo tawp ang. Chhanna ka pe nghal ang ka ti lo, ka rial rei hauh lo thung ang. 

" Sangzual, Malsawmfela nen hian in va ni nghet tawh awm ve"  Kan class ami ka bul chiah a thu ve Siamtei chuan a rawn ti leh ta hlawl mai. Ka va han hne zozai thin tak em. Hawi chhuak in za lo zet hian a hmel chu ka han en leh ang ren rawn a. 

" Tunge ti?" ka ti bul hmuk. Ani lah chuan ngaihsam hmel fahran a a dar lo chhin âk Chung chuan

" Tu'n ti love. In inzui nasa reuh sia, a huat hmel loh che bakah I bula a khawsa zia hi a danglam bik hrim hrim a. A duh hmel che a ni deuh tawp mai. In ni lo tihna emni?" rawn ti thar leh hluai Chung hian amah lah chu a țhu ngil zui sawk sawk a. Eng nge maw vawiin chu he nu hian a hriat le. Ni dangah pawh min be ngai em em silova, ka dâwp dawn chiang khawp. Chutah, Keipawh chuan ka thut dan te chu siamtha ve leh sauh in nui lui har har Chung hian

" Ah. Ni love. Ani nen te chuan thian satliah mai mai alawm Kan nih. Ani pawn min duh dawn lova Keipawn thian ang bakin ka en bik lo. Malsawmfela hi chu a hming ang chiah hian a fel em asin" ka ti zui duah a. Alo ngaithla uluk kher. Ka țawng zawh rual a a hmel a phurna nasa tak rawn lang chhuak kha ka hmuh hnaih thei lova, a ruk takin he nu hian Malsawmfela hi alo duh ve deuh em ni aw ka ti hman. Mahse, tlar hmasa lam a hmeichhe thu ho chu va melh pah zuk zuk Chung hian

" Nia, a fel ka ring. Chubakah amah hi a mipa mizia riau in ka hria. Eng lo a nia, chutia in lo inngaihzawn tak siloh ah chuan saw, Awmtei saw I hria anga, zakzum ve zet saw. Kan thiannu a nia. A khat tawk hian a chanchin hi a a rawn sawi chhuak ve leh țhin a! Mipa dang chanchin hi chu a sawi ngai miah lo, a lerh lo bawk a. Mahse, a mak lutuk. Malsawmfela kher hi chu a duh chi ve ngang a nih kan ring. Tun hi midang daih bul a ka sawi chhuah vawikhatna a nia, lo sawipui ve deuh teh a. Hmeichhia zawkin a han tih hmasak chu a hreh ve deuh sia" a rawn ti ta! Hm.. A thiannu tan alo hual ruk duh vang a nih chiah hi. Ava han tih zia tehlul em. Sawipui tum nghal char char teh ang. 

" A ni maw? Avan țha tak! Ka lo hrilh nghal ang haw rual in. I thiannu chu lo lungngai duh reng reng suh se, Malsawmfela te chuan ka thu a awih ve chiang alawm" phur zet chuan ka ti let ve nghal zung zung a, Siamtei hmel pawh chu a eng zui nghal Sawt Sawt ni ber hian ka hria. 

Siamtei nen a kan inbiak tawh loh hnu thleng pawh chuan ka thil ngaihtuah chu țha ti em em hian ka lo khi leh vur vur thin a, ka phur thar hurh hi a ni ber e. Ban vat vat ka chak. 

Class ka Chhuahsan rual rualin Malsawmfela kha ka zawng ru nghal ruai ruai reng a. A vâng hrep. Ni dang zawng zawng a min nghak thin si, tun a taka hmuh tur a han awm miah loh le. A chak lo ang chu aw.. Min haw san tawh a nih ringin phur lo leh muangchang hian Kan in lam pan chuan mahni chauhin ka kal thla ve ta bek bek zel a. Ka hmu ta! Ka hma pen tam pawh nilo ah chuan amah ka mi zawn Malsawmfela ngei mai chu muangchang a kal lai hi ka zu hmu fuh ta hlauh mai a, ka tlan nghal dawr dawr. 

" Mala, min lo nghak teh. Ding rawh?!" hah vanga thaw hlawp hlawp Chung chuan ka han ko pah bawk a, a rawn meng no lo angreng kher. A bul ka thlen hnuah pawh țawng hleithei lo in hah lutuk vang bawk chuan ka han thaw leh hlawi hlawi rih phawt a. Min lo melh ve ngawt ngawt thung. 

" Sawi la. Tunge rawn um che a Iva han hmanhmawh reng reng ve"  lo ti ve sup in, ka awmdan teh hrep avang chuan a nuih a za tih chu ka hre reng. Ka chek deuh hlak thei. 

"  Bialnu j nei dawn!" ti deuh thawr in thu dang chu ka sawi zui lem lo. Min chhanna ka hriat duh vang a nia ka ngawih zui leh daih ni. Ani chu a han reh hlek phawt a, chu tah a rawn thaw deuh ham ham ri ka hriat hnu chuan ka phur zual Sawt. 

" Leh mai mai țhin che hian aw. Khawi ami nge" rawn ti ve in, a aw chu a zangkhai vei phian reuh a, ka awih lo zawk e a. A tir kha chuan a ngaihdan a ni lo lutuk anga chhan let en ah pawh min en ka ring lo kha a nia. Ka ring dik lo ve tlat. 

" Kan class ami hmeichhe hmeltha deuh Awmtei khan a duh che lawm" ka tih leh pawh chuan a hmel ah danglamna ka hmu lo. A nui sak ringawt a, a hma zawn chu ding tak hian a melh ngar ngar rjngawt mai a ni. Beidawnthlak thei teh e. 

" A țul leh kan la nei ve ang chu. Mahse, tunah chuan nilo in" awmze nei zet a min rawn melh pah chuan a ti liam leh puat a, min kalsan zui daih nia mawle. Vawiin chu eng nge a hriat a, a mizia a tih danglam vel em em chu le. Eng lai pawh a a tihbuai thin kei takngial pawh hi min han ngaihsak țha duh hauh lova! Hm.. Ka sawi nawn pui leh tho tho ang tih rilru pu in ka hma zawn ah chuan ka insawh kal ve ta zel a. Ka tum zui bur bawk. 

" Eu! Va rawn tum haw lian bur bur ve a. Vawiin I fuh vak lo emni?" min be tu aw ka hriat rual chuan rang tawka hawi chhuak in kan in kawt ka lo thleng der tawh tih ka hre chhuak a. Kan in atanga rawn chhuak chiah Mapuia hmel hlim sang chu ka hmu zui nghal chat bawk. Ka awmdan mawlh mai kha ka insiam tha rang teh asin. Tun lawka ka thil tawn te kha chu theihnghilh in Mapuia hmaah chuan nui hmel ka pu lui leh a, a ngainat awm thei tur ang ber a awm leh a hun tawh tlat alawm. 

" Fuh lutuk e. Tlemte in ka chau ve tep a. Ilo leng nge, haw I tum tawh emni?" ti ve nghal zung zung in a hma lawkah chuan ka ding zum zat reng a, he pa hi chu ka zah a ni. A hmaah hian tlin loh ka hlau a, mawi loh mawlh ka hlau thin. Famkim lo mihring hi he tlangval hmaah hi chuan famkim ber nih tumin a inhumruh ve nasa thin asin. A hre ikhaw mang silova. 

" Leng em em love. Ka thil hawh ka rawn dah lawk mai mai. Chubakah I lo awm silova han thut ve reng pawh a nuam lo. Ka kal mai ang ka tia" kan la inmelh chiang dun nasa sia, ka lai chhe leh lek lek tawh zawk. 

" Lo lut la, thingpui ka lum sak ang che" ti ve leh zat in hruai luh chu ka tum nasa alawm. Alo lut nawn leh ngat tur hi a ni ringawt. He pa kher kher hi chu chhuah ka tum lo, kher ngar ngar kher lo mah ila ka chhuah lo ang. Ka ta tur a nih hi! 

Chutia ka sawm nawn tak hnap ah chuan ani pawh chu nui var var Chung hian a in her țha leh a, a rawn lut nawn leh ta sak e. Khatih lai a ka lawm zia khan van chu tawng kher lo mahse la, a sang tha khawp ang. Khitah a niang khitah. 

In chhung ka luh rualin pindan ah ka lut tlang a, ka inthlak hmasa leh te te phawt. 

" Mapui,  zanin tlai chu hetah zanriah te pawh ei ve nghal daih la" thingpui lum a ka rik rak rak laiin ka nu chuan alo ti ve lang lang reng bawk a. Tu hmuh ve siloh hian choka lamah chuan ka lo khi leh ver ver țhin. Kei tluk zetin ka chhungte pawh hian Mapuia hi chu an ngaina a, an ngam tlak tawh in an kawmngeih hlawm em em bawk. Chutiang zel in a Mapuia tak pawh hian ni reilote chhung kan hnena a rawn thlen lai atang khan alo ngaina hman a, he khuaah hi chuan kan in chhung tih loh hi chu midang chhungkua hi a pal vak lem lo. Mamawh a neih in hetah a rawn lam a, chawhmeh tha a neih in hetah min siamtir a, kan ei ho leh mai țhin. Chhungkua tluk ah min ngai a, ka nau Chhandama ngat phei hi chu a pian pui a nau ang chiah in a cheibawl ka ti Mai a. A duat in a kawm thiam hle. Hetiang vel mai mai ka ngaihtuah thui deuh hi chuan ani leh keini chhung hi insuihzawm tur reng kan ni emni ang tihte ka ngaihtuah phah a, mahni chauh pawhin a hlim theih thin khawp mai. 

Hemi hnu atang phei hi chuan kan inchhung chu a rawn Chuang kai tam sauh a, chhunah hnathawk in buai thin hle mahse zanah tal a hmel chu hmuh tur a awm ziah thin. A nihna takah chuan ka pa chu a thawhpui a nihna ah rawn chhuanlam ve ziah mahsela keimah ber hi a rawn Kal chhan leh a hmuh duh diktak chu niin ka inhria a, min rim ve țan tihna a ni berin ka hria. Mahse, amah Mapuia hi mi zaktheilo leh ri phawr phawr chi ang kha a ni lem lova, keimah ang bawk a mi inthup thei ve chi, misual ni Chuang hauh silo mizia hi ni ve in ka hria. A rawn len chhung zawng a kan mit in tawng fuh chat chat thin te, min duh hmel em em a min lo thlir vang vang thin na te leh, ka hmuh rual a nuam ti lo tih hriat taka a hawisawn nghal thin na te, a hmeltha zet nen a nui hmel min hmuh ve thinna te khan amah ah beiseina thar lam leh danglam tak min siamsak chho mawlh mawlh a, ka awmdan hi ka insawifiah thiam tawh lo zawk. Ka duh a ni. Amah hi ka duh ber chu a ni. 

Nitin inhmu tam tual tual leh inbe hnem tial tial ta Chu reilote ah a hma ai zawnga in ngainatna kan inkarah rawn piang chhuak in khawi hmunah pawh kal dawn Sela min hrilh ve thlap tawh zel a, ni e, in ngaizawng tura Kan tih hmasak tlangpui thin, kan induh thu inhrilh tawnna ang tawngkam kha keini pahnih ah hi chuan ala thleng hauh lo, mahse, kan in hai lo tawn a, kan inthup si se tawh lo bawk a, tihian mizotawng taka in ' Bem' na ang kha awm hranpa hauh lo in inngaizawng chu kan ni ve ta der mai. A tirah kha chuan kan awmdan teh thut chu hrethiam lo teuh viau mah Ila, zawimuang in hun a Kal chho ve zel ang hian Keipawn ka pawm thiam zel a, inngaizawng nghet tak ni tur hian tawngkam thlum chhah chhuah hmasak kher alo țul lem lo a nih hi ka tih phah ta a ni. 

Kan inngaihzawnna chu hlimna hlir a khat in Kal chak vut vut viau lo mahsela, a hahdam thlak a, a bula Khawsak leh awm rneg reng pawhnise a thlamuanthlak em em vek a, min ngaihsak lutuk hi a Chang phei chuan ka pangchan phah nimai te hian ka inhre thin. Thikthu chhiat lamah chuan 50-50 ka ti Mai. Kan inbuk tawk chiah. Thikthu chhe zawk ti a sawitur kan awm lo. Mahse, kei aia a fin leh na thung chu, thik tur diktak chin a thliar thiam a, a remchang apiang a thik ve ringawt ngai lo. Tin, thinrim hun leh tihtauh hun a hre em em bawk a, kei angin thil ho te te a thinrim pui a a, a tum pui zui bur bur ngai hek lo bawk. Min dawm thiam lutuk mawlh mai hi ka sawi ban theih loh chu a ni e. Hmeichhe tan chuan hei bak hi a awm dawn Chuang emni ka ti hial a ni. Ti khawp a ka hnawl Chung pawh a min dawm thiam thin tu Malsawmfela pawh khan tluk lohna tamtak ala nei ve cheu tho mai. Mahse, ka tehkhin tihna ni lo se, Malsawmfela pawh kha amah duh tu leh amah pawh in a duh hmeichhe tan chuan mipa diktak a ni e ka ti ngam. 

Hun a liam chho ve zel a, kan zirna lamah pawh thlah lo a bei ve ngar ngar na na na chu inziah pass hun kan lo nei ve nge nge a, kei takngial pawn Bachelor chu kum 3 hnuah ka chhuak ve thei ta a nih kha. Chutiang zel in sawi tel loh theih loh Malsawmfela pawh kha țha tak a inziak tling ve in ani chuan ram dang ah zirna dang chhunzawm zel ala tum tih thawm te ka hria a, ama kâ atanga ka hriat nilo mahse ka lawmpui. Tih zel peihna thinlung ala pu chu ka lawmpui ve tawp. Kei leh Ramnghaki ve thung erawh chuan tih peih taktak hi kan nei lem lova, kei tak hi chuan engmah zir chhunzawm tum tawh lo mah Ila ka pa te sikul ah hian a khât tawkin mi ai ka kal sak ve thin a, ka duh tawk mai. Ramnghaki pawhnise, duhtawk a thawmhnaw design leh thui pum a thiam tawh a, dawr hial te pawh a hawng thei tawh bawk nen, a duhtawk viau niin ka hria. 

Zan khat kan zan riah kil zo chu thlengsil tur a ka lo inpuah chah vel mek lai hian ka phone chu a rawn ri ve ta tlang tlang mai a. Ka hawi hai hman viau. Nia, Mapuia nen hian inzui nghet ve viau tawh mah Ila call hmang tak hi chuan inbiakna kan la ngah hran lova, thil hmanhmawh thlak ang chi te a nih lem loh chuan text message leh video call hi kan hmang rim dun viau. Chutiang a nih loh erawh chuan ka phone hi a ri chhuak khat ve khawp a, ka nau Chhandama hian nula phone  ve si ti a min fiamnan tak hman a hrat lehnghal. Ho em mai. Whatsaap leh social media platform dangah biak Sen loh ka nei ve thung alawm. 

Phone ka han lak nak chuan ka rin loh lutuk in Malsawmfela call alo ni teh tlat a. Eng tak chu rawn sawi tum ang maw, ti Chung chuan muangchang hian a call chu ka pick ve ta hram. 

" I dam maw?" lehlam atanga a aw dam dap ka han hriat chuan ka hnung zui a a Kal hnak hnak thin lai te kha min ti hrechhuak hial a, ka vin leh hrawk hrawk thin lai te nen lam khan. Ka khawngaih thar thut. 

" Dam alawm. Nang zawk?" tia ka chhan let hnu chuan vei nei ang mai hian a rawn thaw chhuak zui hak.

" Dam e. Eng lo, thildang daih. Ka zirna chhunzawm tur khan naktuk mai hian khua Chhuahsan ka tum tawh sia, zanin chu khaw thlirna tlang ah khan inhmu ve lawk ila ka ranw ti dawn a. I rem chan chuan" a inthlahrung lutuk aw mawlh mai chuan min hneh ru riau nia. Ka khawngaih zwk emaw ni. Chutah, ka aw chu thian zui kharh kharh in zangkhai awm ang taka lan chhuah ve chu ka tum ni berin ka hria. 

" Nia, hei zanriah kan eikham chiah a, ka tih felfai zawh ah rawn Kal ka lo tum dawn nia. Nang zawng rilru I nei a, sang tak thlengin zir ang che" ti zui duah in ani chu alo nui chhuak ve hak hak. 

" Awle, ka lo nghak ang che"  rawn ti hul leh hakin call Kan dah a. Ka thaw chhuak nghal hawk thei. Engvang a min hmuh chu la duh fo nge maw a nih le. Hun engemaw chen atang tawh khan ngaihzawng ka nei a ni tih te, ka ngaihzawng thleng pawhin a hrechiang em em vek tawh si a, chutia a Kal bo dawn tak avanga min han hmuh leh duh thut chu ti rilru zui neuh neuh Chung chuan thleng chu ka sil pah rawk rawk reng a, ka rilru ah erawh ka bialpa reng reng in hmun a Chang rih lo. Malsawmfela ringawt chu ka ngaihtuah zui ni ber hian ka hria, mahse amah ka va duh a ka ngaih thar tak thut vang erawh a ni hauh lova, a zia hi mak ka ti thin em zawk a ni e. Heti khawp a ka hnar chiang tawh Chung pawh a min la haw thei chuang miah lo te hi a mak ka ti. Min lo hmangaih ve taktak emni le ka ti ve fo thin. Heiham! Ka ngaihtuah zui peih tawh lo e. Engpawhnise, a duh angin a tawp nan zanin ah va hmu ve phawt ila, a Kal bo daih tawh dawn tho alawm ti chung chuan ka insiam zui ve nial nual a. Ka chhuak nghal tharh. 

A hmun rawn sawi khaw thlirna tlang lam pan chuan mahni chauh in ka kal chho ve bek bek a, phone ah erawh chuan video call hmang in Mapuia nen Kan inbe pah mek tho. Ka kalna tur chin chu ka hrilh hre ve vek tawh a, remtih lohna hranpa pawh a nei Chuang in ka hrelo. A thikthu a chhe em em hran lo ka tih tawh kha. A bikin Malsawmfela ngat phei hi chu thik en ah pawh a en duh lova, engkim hrilh hre vek tawh ka nih vang te pawh a ni mahna le. Va kawmngeih Chuang lo mahsela a thik ngai hauh lo nia. 

Tlang chhip zawl lai ka thlen chhoh chuan mihring chawlhna tura an Siam chhungah khan amah Malsawmfela ngei mai chu ngawi reng hian alo thu voh voh tawh tih ka va hmu nghal a. Ka thaw hawk. A awmna lam chu zawimuang a pan chho hret hret zel in ka thlen dawn tep ah ka han ding khawmuang leh te te a. Ka aw te chu ka thian ta vel. Chuveleh ani chu rang taka rawn leh hawi nghal in, ka hmel a rawn hmuh rual chuan a tho zui vat a, a rawn nui zui var var bawk. 

" Min lo nghak rei tawh em?" tia bul han țan hmasa leh phawt in, ani chuan a lu alo thing zui nawk nawk a. Nge maw ni, kan inhmuh khât tak deuh vang nge ka hrelo, tlem in a hmel ka hmuh rual chuan ka zam ve lek lek a, tunhma ang kha ka ni lo. A bulah chuan ka che khawr ve deuh tlat tawh nia. Ka zam ve hlek a nih ber chu. 

" Lo lut la. Țhu hah chawl ve phawt rawh. I ril a țam takin ka tia hei chips te kha I ngaina sia ka ranw keng teuh. I ei dawn nia" lo ti ve zung zung in a bulhnai ni tho si, hnaih lutuk lo ah chuan ka țhu thla ve nghal a. Ka melh pah Zak Zak reng bawk. Sawitur ka va han haihchham em em ve mawle. Ni dang ka ang lo reng reng. 

" Chuan, engmaw Helai a min hmuh duh chhan chu. I duh te chuan inah pawh rawn len ve Mai tur a nia. Che dangdai thei e"  tih paha ka han melh chhoh lai tak chuan chiang em em hian min lo en ve reng tih ka hre zui a, ka mit chu ka la sawn rang kher. Ani erawh chuan nui deuh var var chung hian

" Nia, a ni tho a, mahse, in inah chuan vawi tam tak ka rawn Chuang kai tawh thin a, hetia pawn lam a han inkawm ve te hi a chakawm ka tia. Chubakah naktukah ka kal tawh dawn sia, titi dun mai mai ka chak deuh mawle. I ngaihawm dawn em a" 

" Engtia rei nge i zir dawn. I rawn let leh vat ang chu" eng nge mawle. A rawn let leh har dawn em dawn lo em tih mai mai pawh chu ka buaipui tak viau ni. A duh chen chen thang bo se ka tan eng nge pawi. 

" Rei lutuk lo ang. A rei berah thla 6 chu a ni dawn a, chumi hnulam chu ka sawi lawk theilo. Ka zir zawm dawn a nih pawhin thla ruk hnuah chuan hna ka thawk phawt hrim hrim anga, chumi pah te pawh chuan kan zir zel ang chu" rawn ti ve leh in Kan han ngawi dun leh rauh rauh phawt a. Ani chuan a melh ngai melh in a mit chu a khap fak fak reng a, kei erawh chuan ka kut chu ka nuai ka nuai thung a, ka che khawr vek mai chu tihngaihna tak pawh ka hrethiam lo. Hun rei pangngai tak inhmuhna mumal pawh awm lova inbe tawh ngai bawk silo hetia han inhmuh leh tak thut chu sawitur a vâng duh ngang mai. 

" Thla ruk hnuah chuan hna te i nei anga, nupui tur te pawh j rawn ngaihtuah ve tawh ang chu. I chhungte pawn mo an mamawh ve tawh alwm tiraw" nui vur vur chunga ka han tih chuan alo khi vei sak reuh a. Ka thil sawi te kha a ngai thutak lo in ho a tih hmel takzet. Nia, nupui leh Bialnu tih vel hi chu keimah ka nih dawn loh chuan Malsawmfela hian engatanmah a ti lo ka hria alawm. Ka hrechiang khawp mai. 

" Bialnu pawh tih laiin, nupui tur phei chu ka hmanhmawh lo lutuk. Ka sawi tawh ang khan nang ka neih theih  dawn loh che chuan tlangval leng rei ti a miten an fiam rawn luai luai nih pawh hi ka pawi ti hleinem. Hmangaih miah loh neih a midang nun tih hrehawm sak hi ka duh lo. Ka tum lo hrim hrim" a sawi nawn leh ta ngei e. Engtin hian nge chhanna hi ka pek tak ang le. Vawi sang Chuang pawh hnar in hnawl tawh mah Ila a khauh ngai reng in ala khauh a, awmzia a nei thui silo. Keimah ah hian a beidawng duh thlawt lo ti Ila a fuh ber awm asin. Ka tihngaihna hrelo lutuk chuan thawk ka han la leh hak phawt a. Min lo en kar mai. 

" Mala, kei chu sawi ngai sawi nawn reng hi ka peih tawh lo. Hman atanga tun thleng hian I laka ka rilru puthmang te chu an la pangngai..." ka sawi zawh hma in min lo chhang let nghal

" Ka hria Sangte, ka ti lui lo che. Zanin pawh hian nawr lui tur che a ko che ka ni hleinem. Mahse, ka awm bo chhung zawng a ka hmu theilo tur ringawt che pawh hian natna min Siam a, heng I hmel duhawmna a khat te leh i nungchang I engkim, I aw thleng pawhin" tih pah chuan zawimuang hian ka sam chu a rawn chul heuh heuh a, a tirah kha chuan lo țhu ngawi reng mah Ila a dik danw lo tih hria in ka tawlh hla zui hret. Chuveleh ani pawh chu harh zui hawk niawm tak hian a inthing deuh nawk a. A tawlh hla zui veleh mai. 

" Ka tihpalh a ni. Ka nunah hian tlangval rilru put nachang ka hriat chinah nang tluk a duh leh vei hi ka la nei ngai lova, ka hmuh hmasak ber atang tawh che khan ka ta tur I nih loh reng reng ka ring ngai lo. Mahse, a dik loh zia chu kan hre chho dun char char a, ka tuar ngawt ngawt bawk a, ka tuar chhuak ve thei tep tawh ang tih laiin a rawn zual zel bawk si. Min hrethiam rawh. Hetiang a awm reng hi ka duh dan a ni biklo asin. Tlangval la upa lo tak kan ni ve tawh a, a hming in duh der tu te pawh Kan nei ve fir fer alawm. An ni ho hi duh in hmangaih thei dawn ila chuan e, ka rawn tibuai tawh ngai lo ang che. Mahse, ka hmangaih theih loh tur te khawvel tih hrehawm a natna siamsak ka duh lo ka tih tawh kha. Nia, ka hmangaih thei dqwn miau silo a, ka ti na mai mai dawn tlat a tin ni". A han tih charh charh chuan sawi dik ka ti khawp mai. A tirah pawh ka sawi tawh anng khan amah hi mipa pangngai leh chhelo tak a ni a, a nungchang in ala zir em em zui. Hmeichhe tamtak duh tu leh beisei tu pawh a hmu. Ngaihzawng hi nei duh nise a biak hmasak ngai miah lo in an be nasa tih pawh ka hmu a ka hriatpui thlap. Hmeichhia ah buaina tur a neilo chiang bal. Mahse, mipa rilru țha leh ngil lutuk a nihna hian a pawt kal tlat a, a hmangaih theih ngai loh tur hmeichhe rilru tih natsak kha a duh lo miau a tin ni. Mipa zawng zawng te hian a rilru ang hi pu in nei ve se ka ti thin. Chutiang a nih chuan hmangaihna hi kan țah pui fo tawh dawn silo a. 

" Ni lo, Keimah hi min hrethiam la min ngaidam zawk teh. Ka in hrethiam tawh bik lo, engvang a nang ang mipa țha lutuk hi hmangaih thei miah lo che nge maw ka nih le ka inti thin. Min ngaidam rawh. Tunah chuan ka kalsan tawh phawt ang che" tih pah chuan ka tho zui a. Ani pawh chu a rawn inperh tho ve vat. Ka kal tur chu ka kutah rawn chelh leh in ka ding zui a, a lam hawi bawk chuan zawimuang hian ka inher zui lehnghal. 

A mitmeng a min la thlakhlelhna leh min hmangaihna te mawlh mai kha ka hmuh hmaih lo asin. Mahse, ka theilo. Ka thei lo hi a ni tawp. 

" Vawikhat chiah a hmasa ber leh a tawpna ni turin ka kuah thei ang che ngem?" a aw thawp sat a a rawn tihna chu hnar sak duh lo in ka lo phalsak ve thung a. Ka remti tih a hriat rual rual chuan rang zet leh lungchim takin min rawn kuah zui ta vawng vawng a. Keipawh chuan a tawp nan tiin inthiamlo Chung Chung in ka lo kuah let ve ta a nih kha. 

In chhung ka luh rual in Kan sitting room sofa Chung a Mapuia lo thu reng tawh chu ka va hmu hmasa nghal ber bawk a. A meng no lo teuh viau na a, a dai ve leh mai niin ka hria. 

" I va thang reilo angreng ve. In țhulh leh zawk nge" lo ti zui luam in, a rilru tak chuan ka thang rei min ti tih ka hre vek a. A fin vanga khatia rawn țawng chhuak mai mai zawk kha a ni tih pawh ka hre vek. 

Za fahran lova lo nuih let in a bulah chuan ka va țhu thla ve zat a. Ka kut vawt thler tawh mai te chu rang tak hian alo hum lum nghal sawk sawk bawk. 

" Taktak a, ka rawn luhna ala reilo. KTP Committee ah ka kal hmasa leh phawt Mawle. Commitee member ah te hian min dah ve si a, ka kal khat tawh lutuk ka tia, min lo beisei ve thin bawk nen" a rawn tih leh chuan ka lo nuih deuh sak a. 

" Nula in an rawn sawm chhuak che a nih kha ka hre vek" ka sawi zawh rual chuan ka chal a ri zui nghal fawk a. Kan nui zui dun ta har har mai. Mahse, 

" Bawihte, naktuk sikul exam kan țan dawn a. Chawlhkar khat vel a nih ka ring. Exam zawh rualin ka haw thlak ve zuaih a țul dawn a. Ka chamrei lo ang" a rawn tih chuan ka mitmeng a buai a, ka nui hmel a tawp nghal bawk. 

" Hww kher chu eng nge a țul na. I hriat angin kei hi I nupui ka ni lova, lo dang bet ve ngawt thei che chu ka ni lo. Mahse tinge"  ka phurna zawng zawng te hi an bo nghal vek ni ber in ka hria. A cham rei leh reiloh ah ka buai lo. Amah hmu lo hiam rei ka awm thei lova, ka ngaih a țha lo nghal zel tih pawh a hre ve reng sia. Eng nge haw kher chu a țul na ka la hrethiam theilo. 

" Ka pa doctor check-up neih a hun leh tawh dawn a. Ka kalpui kher loh hi chu a duh tjin lo mawle. I lungngai a nih kha Bawihte. Aizawl chu a hnaih em kha. Ka chamrei dawn lo. I tello hian rei ka awm theilo tih pawh I hriat kha. Tiraw? Nui rawh le. Thil tha deuh ka ranw hawn ang che"  ka la nui thei chuang lo. A kal tur thu a sawi atang in hetiang hi ka ni sa tawh a nia. A Kal taktak hunah phei chuan engtinnge ka lo awm ang le kati. Ka nghet lo vek nimai hian ka inhria. Ka ning. 

" Kar khat aia rei I zu cham vaih chuan ka tlanbo daih ang" titau pah a ka han tiu chuan ka biang chu a rawn piai deuh nawk nawk a, min fawp zui nghal vang vang bawk. 

Malsawmfela pawh khan a awmna tur hmun a thlen fel tawh thu te min rawn hrilh in, kan 2 hun hman tawh zawng zawng a theihnghilh theih loh thu te leh min ngaih lutuk vang a a mittui a tlak hial thu te chu text message hmangin min rawn thawn ve duah a. Ka nui sak. 

" Hlawhtlin tum ngei in zir la, kan inhmu leh ngei dawn nia" tiin ka han chhan let ve tak kha. Tunah tak chuan ka bialpa haw tur ringawt hian ka rilru a luah khat hneh rih a, ka huphurh lawk em a ni. Chawlhkar khat a ni emaw, ni khat chauh pawh ni rawh se, a tello a hun lo hmanna tur a nih tawh hrim hrim chuan a rei ka ti hluah hluah. Ka ngaihzawng neih ve tawh te zingah ani ang em em a duh leh ngaih hi ka neih awm pawh ka la hre lova, heti em em a ka thinlung hneh tu mipa hi ka tawn awm pawh ka la hre ngailo. Tun a tan cuan ani kha ka ta a nih loh reng reng ka ring tawh lova, midang ta ni turin vawikhat pahw hi ka la suangtuah chhin ngailo. Tihtak em ah chuan mahni pawh hi kan in thik lo chauh thin a ni zawk a, engtinnge hmeichhe dang te chu ka pek phal tehlul ang le. A teuh lo mai. 

" Pa, UMapuia hi engtia rei nge hetah hian ala thawh theih ang" zanriah kil lai bawkin ka nau Chhandama khan ka pa chu a rawn zawt teh nawlh a. Ka lo melh vat. Ka hre chak ve tho alawm. 

" Ka Chiang chiah lo. Amah hian insawn chhuah ka duh e a ti te a nih loh chuan a aiawh tur tumah an awm Chuang lova, tihian han thawk ve ngar ngar Sela, ala nghet daih lo ang tih pawh a sawi theih hleinem" ka pa in a rawn tih ve takah chuan a ruk tak hian ka lo thaw ve huai thei. Amah UMapuia kha chuan hmun danga insawn chhuah tih vel kha sawi a nei ngai hauh lova, hetia kan han inkawp chhoh hnu phei hi chuan min dah ngheh hun ka nghak. Ka kalsan lo ang che min ti thin. A tawngkam thlum pakhat lekah pawh ka tawlh thlu pawp pawp reng chu a ni si a, hei ai hian tawngkam thlum han chhak chhuak tam ngat phei se chu ka va han nasa dawn lo tak em. Ka â vek tawh ang ka ring. 

Chawlhkar khat chu liam leh in a sawi tawh ang khan Aizawla a chhuk thlak pawh alo hun ve tawh taktak ta. A chhuk thlak hma ni chiah chuan khaw chhe hnuaiah a thawmhnaw ken tur insiam pui turin a inluah ah ka zu kal ve hial a. Tun hi a chenna hmun a ka vawihnih kalna chiah a niawm e. Hmeichhia, nula ka la nih ve angin ngaihzawng te pawhnise an chenna in thleng thleng a umzui hi ka duh dan a ni ve thin lova, ka zak bawk. Tin, ka nu leh pa te min enkawl danah hmeichhia zawkin mipa luh chhuah fo lou tur tih hi kan dawng ngun thin bawk a, ka vawng uluk ve thei khawp mai. Mahse, tun țum erawh chu ka nu leh pa te phalna thlap a kal ka ni bawk a, ka thla pawh a muang viau. 

" Chutiang a insiam tehchiam a țul lo asin. Rei ka cham dawn lova ken vak pawh ka tum hran lo. Mahse, ilo len theih phah a, a nuam. Eitur te kan Siam anga, kan inkawm mai mai dawn nia" lo ti suam suam in a khât tawk hian ka hmuiah chuan a rawn chuk leh zauh thin bawk a. A hlim tih ka hria, Keipawh ka hlim. Mahse, chhungrilah erawh chuan ka lung hi a leng lawk veng veng reng a, inhmu leh tawh ngailo tur ang mai in keimah hian ka ngai ni berin ka hria. A zialo zawk e a. 

Thawmhnaw tam vaklo a ken tur ang ang a bag chhunga kan hnawh luh fel hnu chuan eitur te chu Siam dun in a choka lamah chuan kan ri dun leh rak rak thin a, kan infiam pah ve reng bawk nen Kan hlim dun ve phian. A Chang leh a mi fiam dan chu duh lo in ka han titau leh lawp lawp a, kan in thlem chhawk zak Zak reng hi a ni ber e. 

 Kei hi mihring titau hma lutuk mai chi ka ni a, mahse, ka lungawi hma leh em em thung thin. Chu erawh, a thlem tu leh min thlem dan a zir a ni tawh mai. 

Tichuan, kan eitur Siam ang ang te ei a kan rik bawrh bawrh hnu chuan khua pawh alo tlai ve țan tawh bawk a tiin mahni in lam pan tur chuan ka in puahchah chho a, mahse, in chhung ka Chhuahsan hma second tlemte taktak ala awm ang tih ah chuan a tam a tam thei ang ber tur ruah baw hawk chuan min han dang zui leh ta a nih kha le.. Nihliap ka keng tho alawm tiin chhuak lui ringawt pawh ni Ila ruah khati zat surah chuan ka him dawn lo chiang nasa tih ka hria. Tin, amah Mapuia pawh khan haw lui rih lo tur leh nghak deuh tura min tih ang chuan ka aw ve ta zawk a. Duhthusam ah chuan haw kher hi țul tawh lo in tihian hmun khatah awmdun tawh zqwk ila ka ti thin. Mahse, kei chu ka in ngaihtuah lo, ka chhungte rilru tur zawk hi a ni ka ngaihtuah daih ni. Um engpawhnise tun a ka dinhmun tak hi chu min rawn dem em em bik lo turah dah tawp ang. 

" Vawt iti em? A Sur hnem riau mai a" Mapuia'n a rawn tih chuan kuangkuah hlan Chung hian a thutthlengsei chungah ka lo thu khiau a, ruah thawm bengchheng turu tak mai chu ka lo ngaithla nge pawh ka hrelo. Ka ngawi reng. 

" Lo kal rawh ka lo kuahlum mai mai ang che. A vawt riau" rawn ti leh in ka bulah chuan a rawn thu thla ve a. Min kuah zui nghal bawk. 

" Ka zin chhung in tunge ilo kawm ang. Bialpa min lo neih san vaih" nui put put chunga a rawn tih chuan ka kiu hmang in ka lo nghawk deuh salh a, min kuah nghet leh Sawt. Chumi hnu a thil thleng chu mi zawng zawng hriatthiam theih tur a ni tawh a, nia, a vawikhatna atan Angel te dai ngai loh ram kan dai dun a, ka hmangaihna a pung Sawt bawk a, a Kal tur mawlh chu ka huphurh zual phah. Amah ah khan eng angin nge hna ka thawh ve ang ka hre lo. Mahse, engemaw palh pawh Kan inkarah hian lo thleng mahse min theihnghilh tawh bik in ka ring lo a ni. 

A kal ta. 

Khua a Chhuahsan tih ka hriat rual khan kei chu ka ruak nghal vek ni berin ka inhria a. He Khawvel ram zau mihring engemaw zat chenna Ramah hian ka mal tlat riau a inhria in ka țah te hi a rawn chhuak ut ut thei nia. Khawhar lutuk a in dah chu duh lo lui in, tihtur ka dap a, ka che reng bawk a, a ziaawm duh viau mai. Mahse, kut a awl rual rualin amah bawk kha ka ngai a, ka mitthla ah a rawn lang lehnghal zel. A tawpah phei chuan ka tihngaihna hrelo lutuk khan Ramnghaki ka call rjngawt a, leng tur a sawm in ka țah mai dawn thu te ka va hrilh ta vel. Min ei lo leh ang chu aw. 

Ramnghaki nen a kan inkawm tawh erawh hi chuan Mapuia chungchang ai mahin hun rei tak atanga alo hmelhriat tawh zawk Malsawmfela chanchin kan sawi hnem thin zawk a. Mapuia min duh pui lo tihna lam nilo in Ramnghaki hi chuan Mala kha a khawngaih em em a, ani tluk a kan chanchin hrechiang ve tu hi an awm lo hrim hrim bawk nen, a sawi bang theilo thin a ni ber e. 

" Malsawmfela te chu hmun dangah zirna belin a awm a, hmeichhe dang tha tak tak te pawh a zu tawng ve tawh ang chu" Ka'n tih ngial pawh chuan Ramnghaki lah chuan a lu alo thing deuh nawk nawk. 

" A teuh lo lutuk. Nimin lawkah pawh ka zu call a, I chanchin bak sawitur ala hrelo! A be ngam tawh chiah silo che a, I chanchin erawh hriat a chak bawk si nen, ka khawngaih reuh taktak a ni" a rawn ti leh ta. Ava han buaithlak zozai tak aw. Min beidawnsan ve tawh em em se ka ti. Tinge heti em em a amah duh lo tu tawn ah hian a beh ngheh mai le aw ka ti thin. A tir kha chuan a khawsa zia vang khan hua in hne hluah hluah thin mah Ila, tunah erawh a beidawn duh loh lutuk na hian min ti danglam tawh a, ka khawngaih daih tawh zawk. Kei leh ani kha chu a rem ve lova, hmeh rem tum țalh chi lah a ni hek lo. Mi va hmangaih theihna hi thilpek anga inpek ngawt chi a nih loh avang hian a pian chhuah hun kan nghah hram a ngai ve thin a, mahse, chu erawh chu amah ah khan a thleng ve thei silo. Hmangaihna hlut zia hi aw ka ti ve vawng vawng thin. Sawi mai ai hian a hlu daih. 

" Bawihte, min ngai tawh em? Hei ka pa entir turin damdawiin lamah ka hruai dawn chiah a. Hun ka neih Chang apiangin ka rawn bia ang che aw. Ka ngai lutuk che a nia" a chhuk atanga a ni hnihna chiah niin, ala awm rei dawn si, ka rilru hi a hah sa. Ka thaw te hial a hah phah dawn in ka hria. 

Ka rawn be leh ang che ti si kha nileng in a reh chhunzawm a, an buai ta deuh a nih ring in ka zuk be buai zui duh ta bik lo. Mahse, mut hunah em em pawh ala reh leh tak zel avang chuan ka ngaih a țha thei tawh lova ka call ta ngawt. Ala pick up theilo zui. A țha em ang chu maw. Kan inbiak hnuhnun ber khan lirthei te kha a khalh chhuak si a, a chesual chu a ni em lo ang chu maw. Ka ngaihtuah zia lah hi a rawn hre ve tawh silo a maw. Kan mimawl pa chu. Min ranw biak hun hunah a chak lo khawp ang. 

Chumi zan zet chu zan dang nen a danglam tak em avangin ka mut pawh a tui hleithei lova, ni e, kha leh chen kan lo inzui tawh naah khan zan khat chauh pawh muttui ti a inthlah lo hian Kan la awm ngai lova, hetia a han reh tak hmak ah chuan awmdan thiam a harsa duh khawp mai. Aw Lalpa, ani kha lo venghim ang che aw. Ka hmuh phak lova a awm lai te pawh hian hetah amah ngaihtuah a amah hmangaih em em tu leh zantin a tan bang lova tawngtai sak thin tu a nei tih hi inhria se la, lo lungphang suh se. 

Ni khat tal tawp inbe lova kan awm tukah chuan a rawn call ve teh mial a, mahse a uar em em tjin video call nilo in call pangngai a ni teh tlat.

" Bawihte ka tih palh lutuk nimin kha aw. Damdawiin kan thlen hnu khan tihtur țul neuh neuh kha alo tam nasa mai a, ka pa tan engmah tih theih ni heklo, keimah vek ka ni bawk sia, kan haw tlai nen. Ka chau ta em a ni. I thinrim lo tiraw?"  a inthiamlohna aw ka ri hriat chu nuam ka tih vangin reilote kha chu ka titau der hman. Mahse, a chau dawn tih ka hriat erawh chuan ka thinrm khum rei duh ta lova, rei zet chu kan inbiak leh tak tho kha. 

Ni a liam ve zel a, Mapuia pawh a rawn haw chho ve leh ta. Tunah zet chuan famkim leh tawh niin ka inhria a, tu dang mah hi ka ngai leh tawh lo reng reng. A rawn haw chhoh atang in chawlhkar khat dang a liam leh tawh a, ka tan hian hun hi a inher danglam dawn tih reng reng ka hre lawk bik lo. Mahse, a thleng miau si. 

Tlai khat chu ka nawmsam vak loh avangin ka nu chuan eirawngbawl min chhawk hlauh a, kei erawh chu khumah mu zalin ka muhil thei chuang hauh lo thung. Thil tamtak ngaihtuah in ni dang pawh a ka ngaihtuah thlen ngai loh ka hma hun tur te chu ka ngaihtuah lawk ve ta chiam pek a, a ngaihna ka hre lo kher. Kei hi thil țha lo leh duhawm lo tak hma chhawn tur ang mai a inhriatna ka nei lian em em reng a tunhnai bikah hian. Mahse, han sawi zawm dawn in eng thil nge ni ang ka hrethiam bik bawk silo. Ka hah a, ka chau nghulh reng mai bawk a, thil reng reng mai te pawh hi ka hne em em vek ti Ila ka sawi uar lo viau ang. Ka sawi aia nasa mah hian ka hne dan chu ala turu zawk. Awmna ngaiah ka awm rei thei lova, thil thar hma chhawm ka chak Chuang bawk silo. A ruk tak chuan Mapuia pawhin ka awmdan chu a hrethiam lova, tihngaihna a hre Chuang bik hauh silo. Min ngaihtuah tih chu ka hria, mahse tihngaihna a hre tamlo hle a ni ber. 

" Bawihte, i eng hi nge tha lo ber ang le. In entir Ila I duh lo emni. I duh phawt chuan ka kalpui thei reng che a nia" te hi a ti leh ringawt thin a, mahse ka peih lo. Eng tih mah hi ka peih lova, ka hne vel vek ka tih tawh kha. Khati khawp a ka duh leh ka hmangaih em em Mapuia takngial pawh hi engemaw chang chuan hmuh peih miah loh tlat chang te ka nei thin a, mahse, Chung em chu ka la insum ve thei zel a, kan inkar pawh ala tha ve hram hram zawk. Ka chhungril a a rawn thawh dan dan ang hian che chhuak thin ila chuan a tu amah hi ka bulah an amw duh pawh ka ring tawh lo. Ni e, ka damlo mek a ni kei hi. Ka damlo takzet. 

Zanriah ei tur a ka țhu fel chiah tih ah chuan ka nu khan a chawhmeh Siam arsa kan hmui em em mai kha a rawn chhawp zui zat a, a rim kha chiang lutuk in ka lo hip fuh pek nge ka hrelo. Ka uak dawn! Rang zet a tho chhuak lehnghal in bathroom ah ka tlan lut a, ka va luak ta nghek mai le. Ka nu mangang tihngaihna hrelo chu rawn tlan lut ve nghal in thil awmzia min zawt zui nghal chul bawk a. Chhanna pek tur nei hek lo

" Tunlai chu ka pum a țha lo a chhuak a, engmah hi ka ei hleithei lo ka tih tawh kha. Ka hne vek" chau em em Chung chuan ka lo ti ta ngawt a. Ngaihthat loh hmel fahran in ani chuan min lo melh ve ngat ngat thung. Ka chau a ni. 

Tichuan Zanriah pawh chu kil ve ta lo in ka pindan ah ka lut tlang nghal a, rang lutuk in Ramnghaki ka call nghal vat. Ka awmdan mak zet te chu hrilh ve nghal zung zung in ani pawh chuan tihngaihna alo hre lo ve angreng hle. 

" I pumpui țha lo hnathawh chu a nih ka ring sia, in entir phawt Mai rawh. Kalpui I duh em" a rawn ti ve leh ta. In entir hi ka peihlo. Damdawiin leh doctor tih tawngkam ringawt pawh hian min ti damlo zo dawn in ka hria. Ka hah.

Mahse,thudang kan sawi teuh hnu a call tih tawp mai ka tum lai tak chuan amah Ramnghaki bakw khan hmanhmawh hmel em em hian

" Lawk in thiani, nang hi I rai dawn a ni lo maw!? In test na I nei tawh em" a rawn ti ta a. Ka harh zawk. Khatiang lam reng reng kha ka lo ngaihtuah chang hauh lova, thil ni thei ve tho chu a ni. Raino hian pum tha lo leh luak chhuak reng te pawh a keng tel thin e an tih tak kha. Um, chubakah Mapuia lo haw leh hnu hian vawikhat dang kha kan chesual leh tawh a, hmehbel dawn chuan hei tluk a hmehbel tur awm ang hi a awm hauh lo ang le. Tichuan, Ramnghaki chu engkim hrilh in test ka la neih miah loh thu ka hrilh ve ta a. Amah bawk chuan a zan a zan a test na hmanrua chu mjn rawn pek intiam in call pawh chu kan ti tawp zui ve ta a ni. Ka thaw hawk mai. Ngaihtuahna hman zui dan tur ka hre lova ka bo viau. Lo rai ta ila engtinnge. Mapuia hi a lawm ve angem. Kei chu result ka hriat hma atang hian ka lawm nghal. A chhan pawh ka hmangaih ber fa ka pai a nih dawn bakah a pa pawhin ka lo rai palh a nih pawh a min tlan san loh tur thu min tiam nasat em vang a ni. 

Ramnghaki chuan a ruk thei ang ber in rai leh railoh test na chu min rawn pe ru ta a. Ka beng bulah zawite hian

" Naktuk zing I zun hmasa ber I test dawn nia. A hman dan tur pawh a kawr ah a awm vek kha" a rawn ti sur sur a. Ka lo nui tawp. Ka tan hian a inpe zo thei lutuk a, ka chhungte pawh hian min hauh phah fo thin. Heti em em a thian fel ka chhar chung pawh a hlut nachang ka hre miah lo hi ka chhungte hian min ngei phah thei khawp mai. Ka Mawl a niang ka hre tawh bik lo. Mahse, amah tih loh chu he khuaah hian thian dang pakhatmah ka nei Chuang lova, ka kawm peih hlawm hek lo. Ka hmalam ah tha zet zetin min bia a, min kalpelh rualin min sawi chhe thei nghal. Khatiang mihring te chu tu in nge kawm thei anga hnaih duh tehlul ang le. Ramnghaki hi ka tan chuan alo tha ber mai e. Ani tluk an awm lo.

Ramnghaki min hrilh lawk tawh ang ngei in a tuk zing ka zun chhuak hmasa ber chu test nan ka hmang ve ta ngei e. A result nghah chhung a ka lungphu ran nasat hman zia kha. Karei! A rin khatna a Kal zo va, a rin hnih na turah chuan fiah lutuk lo, mit lawnga hmuh theih ngar ngar ang hian alo inrin ve riak a nih chu le!! Kei hi ka rai ang maw? Thaw zui hawk in ka nghilh nghal dup ni ber hian ka inhria a, ka test neih hma a ka ngaihtuahna ka hlim pui em em te kha chu an thlawk Bo chiang lutuk ringawt. Chu test result chuan nasa takin min luh chilh a, min ti chau nghal vek bawk a, ka tum aia rei mah chu bathroom chhungah pawh chuan ka awm phah ta hial. Diktak a sawi chuan tunah hian pasal neih vang a naupai tur chu ni Ila hlim em em in a biling a ba langin ka tlan chhuak anga ka au chiam chiam bawk ang. Mahse, chu chu a theih loh bur. Hei hi, ka kut a ka ken mek result hi mi zawng zawng hriattir ve chi a ni hauh lo mai. Pasal nei Chung a naupai tur ka nih ve miau loh avangin kri chuan ngaihtuah tur huphurh awm taktak ka nei nghal duah a, sawi pawh ka sawi seng lo zawk. Rai theuh theuh pawh dinhmun a in ang thei dawn ta lo tih te thleng chuan ngaihtuah chho in ka mittui chu a rawn hnai ta mai a. Mahse, ka nu in min ko thawm ah chuan harh chhuak in ka in control leh thei ta hram chauh a ni. 

Bathroom chu zawimuang a Chhuahsan in ka chhungte hmel hmuh pawh chu ka va huphurh tawh tak em. Mapuia bulah engtinnge ka sawi tak ang. Min nei nghal mai turin ka hmin thei angem. Engtinnge Khawvel hi ka hma chhawn chhoh ve tak ang le. Ka hma hun chu thim in a bawh a, a in zial thim mup mup țan tawh a, kei erawh chu thawpik lutuk vanga tih ber tur pawh hrelo in khumah ka va thu zawi leh ngawih ngawih phawt. Hei hi a taktak ni lo se ka va han duh tak em. Tih sual vang emaw, a test na dik loh vang emaw ni hram zawk se aw. Pasal neilo a naupai te chan chhiat zia leh mualpho thlak dan tur ka han ngaihtuah kai phei chuan ka a mai dawn hian ka hria. 

A hmasa ber a tan ka test na chu midang hmuh ve loh tur hian ka bag mawng ah ka khung tha sawk sawk phawt a. Rang lutuk in Ramnghaki ka call nghal vat. Chanchin ka han hrilh a, a rawn Kal nghal tur thu min hrilh te chuan min ti manganga, ka chungah hian thil tha lo tak a thleng dawn nimai a hriatna ka nei lian reng bawk si. Ka hah zo vek tawh. 

" Khawi maw uluk deuh in min lo entir teh" ka room ah chuan rawn lut in thawm a rawn dim ve hle a, Keipawh chuan țawng vak hun a ni lo tih hria in ka dah that na atang khan ngawi reng hian ka phawrh ve nghal zal zal. Test kit chu bih vang vang in a rawn thaw chhuak ta hawk mai a. Min ti hamhaih thei thin ngawt mai. 

" I rai a nih ka ring. Kha hei pakhat ka lo keng leh a, a tih chian nan naktuk zingah lo ti țha leh la. Emaw kar leh lam pawh a pawi lo. Ilo rai a nih pawhin nau kha ala te dawn lutuk a a lang fiah har ve thin a" tih pah hian test na tur dang chu min han pe leh ta a. Sawitur reng reng hi ka hre tawh lo. Ka nihna hi hriatchian vat ka duh a, hetia ni leh ni lo a awm reng hi Keima tan pawh a hrehawm ngawih ngawih. 

" Thiani, lungngai lutuk mah ta che. Nau ilo keng ta a nih pawhin pasal neih i hnai tihna a nimai a, a pa turin nise a hnawl ka ring hek lo. Pasal tha tak I nei dawn tihna a nimai" a rawn tih leh chuan ka lo nui ve suk. Mi han hnem vel dan te hi a thiam thei sia ka thiani hi chu ka tan hian a țha ve thlawt a ni e. 

Ramnghaki sawi ang thlap in chawlhkar dang a liam leh hnu chuan ka zing zun hmasa ber bawk kha ka test leh ta a. Aw Lalpa! A hmasa zawk ai khan a inrin 2na chu alo fiah tawh zawk nia! Tin, ka thla tin bi neih dan ka chhut in ka neih a hun chho tawh a, mahse, thla dang ang khan engmah thil thleng a awm lova, thi ka nei hek lo bawk. Kei hi ka rai chiang a nih hi tiin thinphu dawt dawt Chung chuan Ramnghaki bawk chu ka be buai leh. Tun țum chu amah zawk ka va lenchilh ve thung a, ka en tir leh thlap bawk. A en vang vang hnu chuan a lu chu rawn bu deuh lawp lawp in a kiai ta sak mai nia. 

" Hei bak bak a chiang tawh te chu. A tlem berah thla khat a tlin tawh ka ring. Thiani I tlai chhiat hma hian a pa hrilh la a țha ka ti. Eng pawh thleng dawn se a tlai hma hian tih hram zel tur"  a rawn ti ta. Ka va han mangang ru tehlul em. Hrilh hriat tur an awm a nih chuan Mapuia chu a hre hmasa ber tur chu a ni tehmeuh mai. Mahse, ni dang ang khan ka hmu chak huam huam lova ka hreh ngawih ngawih zawk. Khang hun chhung zawng a a insawi thin ang khan a tawngkam kha a um phak angem tih ka hrelo. A um phak ka rinna chhete chuan tlemin ka zam chhiat lutuk na chu a rawn thai bo ve deuh a, alo pawm ngei ka ring bawk. 

Ramnghaki ka Chhuahsan hnu chuan Mapuia chu call in ka be ta a. Hrilh tur pawimawh lutuk ka neih thu ka han sawi chuan alo hre chak tawh nasa. Zana rawn len a tum nghal thu chu sawi in aw ka han ti zet a. Ka țhulh leh. In ah hi chuan ka chhungte an awm ve reng zel nen, ani ngaihdan hriat hmasak hma hauh a ka chhungte hrilh hriat kha ka la duh rih lo a ni ber e. 

" Zanin chu ka hrilh chhung chauh che inhmu lawk ang khawiah emaw. Ka nuam vak silo a, mut hma ka duh tlat" ka tih leh zawk tak si ah chuan ani pawh chuan pawm lo angreng tak chungin a pawm lui ve ta a. Tichuan kan in bul lawk a waiting shed ah ka lo nghah tur thu chu ka hrilh ta thung a ni. 

Zanriah pawh ei peih lo in thim thet thet ah chuan ka tei chhuak nalh a. Waiting shed ah chuan alo Kal hun tur nghak in ka lo va thu zui ta veng veng. Ka awm tawh tih ka hrilh hnu lawkah rei pawh rial lo hian a rawn lang chhunzawm ve a, a hlim em em mai lehnghal. 

" Tinge I nawm loh reng mai le aw"  rawn ti nghal zung zung in ka chal te chu a han dek thuak thuak a, ka khua hi a sik awzawng lo. 

" Eng thil nge ni ta a. Ava han pawimawh awm em em ve Bawihte. Sawi la" tih pahin ka bulah a thu a  ka kut chu a hum lum nghal vat bawk. Engtinnge bul ka țan ang ka hrethiam lo. Khuh mawi dan lah ka hre hek lo. Tin, thup mawi chi pawh a ni hek lo. 

" Ka rai"  hul hak a ka han tih chuan boruak chu a reh nghal vek nimai hian ka hria a, ka lungphu ri tih loh chu thawm dang reng reng ka hre tawh lo. 

" Tu maw rai. Nangmah maw?"  maktih hmel zet a min en Chung hian a rawn ti a, ka lu chu ka lo bu deuh lawp lawp tawh. Chuveleh ka rin lutuk loh dan in min kuah zui nawk a, ka biang te chu a rawn fawp nghal mawlh mawlh nia. 

" Engah nge tikhan hlauthawng taka I awm a. Hlauh thawn tur a awm emni? Engtinnge ka hrilh tjin che kha. I rai pawn ka tlanchhe lo ang. Ka nei ang che ka ti lo emni?"  a rawn ti ta a. Engtia awm tur nge ka hre lo. Ka thawl nghal vek nimai hian ka hria a, ka in hrethiam chiah lo. Ka hlim ve nghal em em ringawt mai a ni. 

" I ti taktak ang maw. A nih chuan nau a len hma hian tifel vat ila, a zahthlak dawn a nia aw. Ka chhungte pawh ka la hrilh ngam lo hrim hrim" pangchang aw taka ka lo tih leh chuan amah bawk khan

" Um lo hrilh duh rih suh. An hrawk nasa lutuk ang che ka phallo. A lan taktak hma in inneih kan rel ang. Mahse, ka chhungte ka biak ve hun chhung min pe la. Thla thar veleh kan innei dawn nia. Hlauhthawn tur I neilo aw" rawn ti leh in a awm ngheng chuan min pawm bet sauh sauh a. Ka hlim a ni. Ka dam nghal vek nimai te hian ka inhria. Lalpa, ka lawm e aw tiin ka rilru chuan ka tawngtai zui hial mai. 

Hemi zan zet hi chu tui takin ka mu ve thei a, ka taksa na zawng zawng te khan min kiansan nghal vek nge tih pawh ka hre lo, an dam nghal vek a nih chu mawle! Ramnghaki hnenah pawh chanchin chu hrilh ve zel in alo hlim ve em em a, min lawmpui a ni ber ang chu. 

" Ka tih reng kha" intithei deuh hian min tih khum sek reng mai a ni. 

Chutia a fa ka pai tih a han hriat takah chuan Mapuia chu a phur thar em em mai a, min ngaihsak tawh sa tehlul nen khan min ngaihsak lehzual a, tunah phei chuan darkar takngial pawh hi a rial tawhlo ka ti Mai. Sikul pawh kal se an chhun chawlh ah a rawn lang anga, ban rualin a rawn lang leh a, a in luah khu chaw ei nan leh riah nan taktak chiah a hmang a tih theih awm e. A Chang phei chuan hetah te chaw kan ei tir ve nghal thin a, a hlim awm dangdai thin khawp mai.

A rawn Kal apiang deuh thaw lah hian nu tan a hrisel si, nau tan a pawi tur ni silo ei leh in tur hi min rawn hawn sak fo bawk a. Ka nu takngial pawhin mak alo ti deuh nge ni a fiam zauh zauh tawh mai.

" A hma zawng kha chuan chips leh thei tui mak deuh deuh I rawn hawn sak a, tunah erawh chuan thei tui deuh deuh hlir mai kan dawng leh a. I bulah hian alo inti damlo viau em ni le aw" nui hak hak Chung hian alo ti thin a. A che lai chhe thei nasa asin.

A sawi ang in amah chu ka nghak a, thla pawh a ral ve leh tep tawh e. Tihian kan tum dan a kan awm theih chuan thla thar ah pasal nei ka han ni ve tawh anga, fanau duhawm tak nei in chhungkua kan awm khawm anga, ava han hlim awm dawn tak em tiin. Ka pasal tur lah chu Khawvel a ka hmangaih ber ala ni dawn zui bawk si. Hmeichhe awhawm tak chu ka ni ve rih in ka hria. Ka ngaihtuahna ho mai mai thleng chuan ka hlim pui a, ka phur tawh lutuk hi ka za vek ni berin ka hria. Tin, naupai tih inhriat theihna tur keimah ah lang chhuak neuh neuh a awm ve țan tawh a. Mahse ka chhungte hriat ah erawh dhuan engkim ka la thup thei thung. Taksa na leh nuam lo ka neih zual Chang te hian Mapuia bulah chuan ka pangchang zual thei em em a, ani lah hian a theihpatawp in min lo duat leh țhin bawk si nen, khang hun tluk a hmeichhe tan a nuam leh thlamuan thlak kha thildang sawitur a vâng ve ngawt in ka ring a ni.

A ni tel in Kan intiam hun chu a hnai tial tial a, Mapuia Khawsak dan ah pawh engmah danglam han tihtur ka la hmu lo zel chu a nia. A chhungte pawh a biak deuh tawh thu chu min hrilh a, mahse, kan inru hmasa anga engkim a fel zawk ang a tih avangin ka aw ve zel bawk. Hetiang lam a tawn hriat la neilo ka nihna ah ruahman dan engmah ka hre ve lova, amah ah khan ka innghat tawp mai a ni.

Tunah chuan ka nau pawhin thla hnih a tling ve der tawh a. Ka duh aiin Mapuia chu a che muang ka ti ta riau.

" Engtinnge kan awm dawn. Nau hi a lian ve zel a, thla thar ah phei chuan a rawn lang tan tawh hial maithei. Eng nge i ruahmanna chu" ti a text message ka thawn chu a seen har em em khawp a. Vawiin chu vawikhatmah ala rawn lang lo hrim hrim bawk nen ka ngaih a ti țha lo ru riau tawh.

Darkar chanve zet min reply lo a a awm hnu chuan a seen ve ta hram e.

" Ka nei theilo ang che Sangte!!? Ka pa duhthlan angin naktuk hian ka haw thla anga, aizawlah ka hna pawh hi ka chhunzawm ang" a rawn ti ta a nih chu! Ka thu hriat hi dawt nge thutak ka hrethiam lo. Eng thil chiah nge min hrilh hi ni a! Ka mang vek a, rilru put dan tur pawh ka hre lo nghal vek thei. A thuhrim in hetiang thu hi ka pa hian engvang a min hrilh ve lo nge a nih. Thinrim taka insehruh Chung chuan room ka Chhuahsan a, sitting room a tv en a lo thu mek ka pa chu pan phei in ka va dinchilh ta sauh sauh mai.

" Pa, eng thu nge ka hriat hi. Mapuia chu aizawlah an sawn tawh dawn a maw" ka țah loh nan ka mittui chu dan ve hram hram ka tum. Chutah ka pa chuan

" Ah. Sawn pawh nih chiah loh kha. Amah in sawn kha a dil a, a pa in a pui bawk e an tia. Naktukah a Kal ang" ka pa in alo tih leh lek phei chuan ka tliak vek nimai hian ka hria a, hriat thui ka duh tawh lo. Ka hriat chin te pawh hian min ti na tawk tawh viau a ni lo emni?

An sawn dawn nilo in amah in insawn a dil a. Kei, a fa thla hnihna pai mektu pawh hi min kalsan a hreh lo bawk a. Helai ah hian baihvai takin min hnutchhiat a tum a maw. Engtinnge a tih theih zawk le ka ti.

Khumah chuan let thla tawp in inchung ceiling ka melh pah ngar ngar reng a, ka na a ni. Ka na ngawih ngawih. Khang ka hlimna zawng zawng te kha chu chuaiin mual an liam a, an bo zo ta.

Zan a rei tual tual a ka harh tulh tulh thung a, ka tho chhuak leh thut. Heti ringawt hian ani kha ka kal tir thei lo ang. Kan sawi fel tur a ni ti Chung chuan ka tho chhuak a. Ka chhungte pawh an mut reh vek tawh avangin thawm dim tak chuan in chhung chu ka Chhuahsan a. Pawn boruak vawt vur mai ah chuan hlauh dang pawh nei tawh lo in Mapuia chenna lam pan tur chuan ka kal zui ta vang vang.

A kawngka chu a hriat ngei ngei tur a kik karh karh in ani pawh chuan reilote ah a rawn hawng ve Mai a. Chutia zanrei tawh a ka hmel a han hmu thut chu a meng phawk ve deuh tih pawh ka hria. Mak pawh ka ti ve love.

" Tun ang ah eng nge i duh a" a mit nuai chuar chuar Chung a tih pah chuan a lut lehnghal mai. Ngawi reng a zui lut ve in ka lo rin lawk tawh ang taktak khan a bungbel engkim mai chu alo pack fel thlap tawh mai a, ngawi reng a min kalsan hi a tum dan diktak zawk emaw ni le ka ti. Hetiang em em a rilru chhia hi mihring hian alo put theih a ni maw tih thlengin ka ngaihtuah a, ka na tulh tulh.

" Ngawi reng a min kalsan I tum a maw. Kei hetah I fa paiin hrehawm takin ka awm anga, nang in mahni khuaah nuam I zu chen a nga maw. Kal suh. Min kalsan suh aw" tiin zah pawh dawn lo chuan a kut chu ka va chelh thawr ringawt a. A ding zui chawt thei.

" I sawi dik alawm. Mahse, ka nei thei lo che min hrethiam rawh. I pai mek kha ka fa a nih leh nih loh ah ka buai lo. Mahse ka nei thei lo che a ni. Min ngaidam dawn nia" 

" Chutiang tur si chu engah nge nghak tur che a min tih a. A tirah khan beiseina min siamsak lo in sawi tlang nghal law law ta che. A harsa viau emni?" ka au lo chauh tawh hi a ni ber e. Ka na em a ni. Ka mittui rawn luang chhuak nguah nguah te chu dan sen pawh an nilo a, dan buai pawh ka tum peih lo law law.

" Harsa e. A chhan chu maw, kha kha ka fa a ni tih ka pawm tlat a ka tan pawh hian tlang taka thil sawi kha a harsa ve tho asin. Chuvang chuan beiseina hloh tir che kha ka hreh em a, ngawi reng a kalsan dan tur che ka zawng ta zawk a ni e. Mjn haw san tawh rawh. Naktuk zing thawh hma ka ngai dawn a nia"

" I thawh hun turah ka buai lo. I fa a ni tih I pawm tawh ber a hnu engah nge min neih duh siloh. Tunah hian hnawl la, alo pian chhuah hunah I inchhir leh silo ang maw" țap chunga ka han tih leh chuan a lu chu alo thing ve nawk nawk reng a. 

" Chhir lo ang. Inchhir lohna turin engkim ka ruahman fel vek tawh alawm.. Kei chuan ka nei thei lo che a, nau nen pawh khan ka pawm theilo che. Nupui nei thei ka ni rih lo a ni min hrethiam rawh. Mahse, engtik lai pawh a hmangaihna nen a en thin tu che Malsawmfela kha va pan zawk mai ta che" tum lawkna pawh awm lo hian a hmaiah chuan ka beng zui nghal chawrh a. Ka thinrim takzet a ni. 

" Tun dinhmun ah hian ani kha engvang a rawn sawi chhuak nge i nih a. Inrawlhna nei ve lo kha engvang ngawt chuan in nge ka va tihbuai an sawi rawh" amah chu ka sawi nawk nawk tawh a ni ber e. 

" Englai pawn eng dinhmun ah pawh ding la a pawm thei che tih ka hria. A hmangaihna che kha a tak a, a tel ve lohna fa pawh pawm mah la nangmah I nih chhung chuan a pawm ang che tih ka Chiang" ka tihngaihna hre tawh lo chuan a hmaiah chil ka chhak a. Ka khur hlawk hlawk thei bawk. 

" Hremhmun ah kal ang che. A tawk khawp mai. Khua rei ah inchhir lehna sihsen tiat pawh nei la ka hmel hi I hmuh nawn leh ring tawh suh" tiin a inchhung chu ka Chhuahsan a. Hmuh nawn leh pawh hi ka duh tawh lo. Tun atanga chatuan in min ti na tu chauh a ni tawh anga, ka natna tur bak a thlen tawh ngai hek lovang. A țha e. Engkim hi ka chhungte hnenah thlen vek Ila a nih nih ka ni tawh mai ang chu tiin mahni leh mahni chu ka infuih ta sauh sauh a. Chu zan chu ka muhil lo chiang kher. Mittui nen zankhua ka thlah liam a, a Chang leh mahni intih hlum daih te ka ngaihtuah a, a Chang in tih tlak dan tur ka ngaihtuah thul. Rilru mumal pawqh hi ka pu hleithei rih lo a ni e. He thil hian min thawng na em a, engtia hmachhawn tur nge ka hrethiam tawh lo. 

Ani chu a kal tawh tih thawm ka hria a, alo kir tawh lo bawk ang. A pawi lo Kal rawh se. A tello. Pawh khan ka ti thei em em ang. Ka nu leh pa an la dam a, ka thei em em ang. Mahse, ka nihna chu hrilh dawt mai ka hreh em avangin thiannu Ramnghaki bawk ka ruai leh ta a. Ani chuan min hrilh sak in an hriat rual a an na hmel mawlh mai kha. Ka pa phei kha chuan kut min thlak lo chauh hial a, Ramnghaki leh ka nu kha awm lo phei se chu ka chak lo viau maithei e. 

" Khatiang a pa pawhin a duh loh leh hnawl lehnghal ka enkawl dawn lo hi a ni tawp mai. Ti tla vang vang rawh se" ka pa chuan ka hmaah ngei min tih khum bawih bawih reng a, min be duh lo a, min haw hlum lo chauh bawk a, ka tan chuan a na ve takzet asin. Ka nu pawh tunah rih chuan nu a nihna a ti lang hleithei lova, hetiang thil a fanu Chung a a han thleng ve ta mai hi awih harsa a tiin a na lutuk tih ka hria. Ka dem love. Ka chhungte hi ka dem miah lo. Engkim hi ka thiam loh vek tih ka pawm alawm. Tuar tur an awm a nih chuan keimah ka ni anga ka tuar vek bawk ang. 

A thla thumna kan hmang țan a, ka pum erawh chu ala hriat em em lem loh thung. Hetih hun chhung zawng pawh hian ka chhungte kha chuan min la be țha duh lova, mamawh ka nei em tih takngial pawh hi mjn zawt duh hek lo. A hming takmeuh meuh in chaw pawhnise ka ei ve a tih theih ang chu. Ka chan chhiat dan chu khawlai ui cho vakvai nen pawh tehkhin ila ka chan ala chhiat zqwk tho ka ring hial e a. 

Aizawl a thlen thlak hnu atang vawikhat pawh hi min la rawn be leh lova, a reh hmak a ni ber ang chu. Tihsual nei in min hnutchhiat a, engmah tisual lo ang hmak in a bi bo leh daih bawk a, mihring hi alo sual theih khawp mai tih min hrilhfiah chiang alawm. 

Mapuia chu reh fel hmak mahse Malsawmfela zawk erawh kha chuan ka chanchin hi min rawn zawt ve leh zeuh thin a. Ka be chak lo viau na in inbiak lohna te a rei tawh a tiin ka lo chhang ve hram hram thin. Ka tun dinhmun nen hi chuan tumah hi ka be peih lova, mjn hnem thei an awm hek lo. Ka na a ni. 

" Naktukah lo haw chhoh ve zuai ka tum a. Thil țha deuh ka rawn hawn ang che" Malsawmfela message chu en in ka melh ngawt ngawt a. Hei hi amah Mapuia min rawn biakna zawk kha nise tiin ka lo ngaihtuah kual leh chiam hman tawh. Heiham. Thleng lo tur hi ka suangtuah a, ka zeldin a, a dik thei taktak tawh bawk silo. Min nat belh tir tu mai mai an ni tawh e. Tihian kei chu chhungte pawhin an hmuhsit leh an biak k peih loh niin ni ka chhiar liam anga, ka nau a rawn pian hunah khaw tlang en dawng leh sawi rawn ka han hlawh chhunzawm leh bawk anga. Ka tuh rah ka seng a vui thei ka ni Chuang bawk silo. Engtinnge ka awm tak ang le Lalpa. 

Chawlhkar a liam a, Malsawmfela chuan khua a rawn thleng tawh tih hre mah ila kan la inhmu leh miah lo thung. Um.. Ani pawh khan khawi atang in emaw ka chanchin hi a hre ve anga min iai chhunzawm ve leh ta a nih dawn hi. 

Zanriah eina te ti fai a kan lo buai nak nak lai chuan kawngka kik thawm ka hria a, muangchang hian ka va hawng zui. Pawnah chuan kan veng pa fel taktak pahnih te hi lo ding in len luh chu min han dil a. Ka luh tir zui nghal vat. Eng chungchang nge ni ang aw ti a ka ngaihtuah laiin an thut fel hnu lawk chuan ka nu le pa te bulah chuan thutak leh uluk em em mai hian keimah vang a rawn Kal an nih thu leh, mi tu in emaw palai atan a an rawn tirh ni angin an insawi ta a. Keini chhung chu kan hawi hai angreng hle a ni. Chutah ka nu zawk chuan Hlauhthawn hmel em em mai hian

" Pu Val, in lo Kal chhan diktak chu han sawi vat vat teh u. Hriatchian a chakawm alawm le. Eng nge thil awmzia" alo ti thuai a. Pu Vala pawh fhu a rawn nui zui ve ta hak hak. Mahse, thutak zui lehnghal vatin 

" In fanu hi veng chhak lama chhungkaw pakhat te khian mo a tan an it deuh a niawm a! Min rawn dil tir rawih mai che u a nih hi." a rawn ti leh ta a. Ka pa pawh kha a thu ngil zui awt thei niin ka hria. 

" Tu te nge ni a Pu Val. Ava bangbo theih em em ve mawle. Han sawi chiang deuh teh u" ka pa in a rawn tih zawh rual chuan Pu Vala lo kalpui Pu Rema zawk kha a rawn țawng zui ve ta a. 

" Khi. Pu Vanmawia te chhung khi an nia, nangni pawn in hre vek ang chu anni chhungkaw dinhmun leh nungchang mizia engkim te chu. Kan veng chauh nilo, kan khuaah pawh hian an ni chhugkua tluk a mo chakawmna inchhung khi hmeichhe tan a awm dawn emaw ni le ka ti"  ka thil hriat chuan nikhaw hrelo in min awm tir lo chauh a. Ka bul mai a dawhkan tlang chu ka hmer zui ta ngar ngar ringawt. An sawi zawh chiah te chhungkua kha tudang mah nilo in Malsawmfela nu leh pa te ngei an ni e! Malsawmfela rawn haw hian eng thil nge maw a rawn tih le aw ka ti hial. 

Chutah rang takin room ah ka tlan lut a, phone chu ban in Malsawmfela chu ka call zui nghal ta ringawt. 

" Eng thil nge ti ni a I inhriat a. Pasal nei thei ka ni lo. Tu pawh ni la pasal nei thei ka nilo" ka ti zui nghal buan buan a. Alo nui deuh hak ringawt mawle. 

" Min nei rawh. Tunah hian min nei la I tan a țha zawk ang" a rawn ti let hmak nia! 

" I Zak lawm ni. Eng aiah nge ka neih che avanga ka tan a a thatna tur chu. Chubakah ka chanchin hi ilo la hrechiang tawk lo deuh a nia nge, kei hi pasal nei thei ka ni lo" ka au ring mah mah tep. 

" I chanchin hi engkim ka hria. Ka hmaih ngai lo bawk. Tun a I dinhmun mek pawh kha ka hria e. Ka hriat vangin khua ka tlai hma a nei tur che in ka lo haw a ni e! Ka chhungte pawh ka hmin fel vek tawh a, I duhthlanna chiah kan nghak" a leh ta deuh deuh chuan. 

" Tu in nge ka chanchin chu hrilh che" ram hmak a ka han tih chuan a rawn chek tlak phawt a. A thaw zui leh hawk ri pawh chu chiang takin ka hre thei. 

" Kha I bialpa j hmangaih em em leh a hmangaih ve che emaw itih pa khan thla liam ta daih tawh khan nau I pai thu hi min rawn hrilh a! Mahse, nupui neih chu ala duh loh bakah fa neih ala inpeih loh thu chen in min rawn hrilj bawk. A tir chuan engvang a chutiang chu min rawn hrilh nge a nih ka hrethiam lova, ka thin pawh a rim hman teuh kher mai. Mahse, I lakah hian ka thinrjm rei thei ngailo tih hre tu inih kha. A fa leh a fa pai tu chu a duh loh phawt chuan keiman ka pawm thei reng tih thu chu lo hrilh in țha taka lo enkawl phawt tur che khan ka chah ta a. Ka inpeih veleh a rawn haw chhoh ka tum thu pawh ka hrilh nghe nghe. Tikhan thil tileng chu i hriat vek tawh kha. Duh lo che mahse tilang miah lo in a duat der ta vak vak che a, a ning thin lutuk tih thlengin min ranw hrilj. Mahse, mualpho a hlauh ve tho avangin ka thu kha a awih a, tikhan a enkawl zui ta che a ni. Tin, amah ngei in a hnathawhna an sawn sak theihnan dilna a theh lut a, khatiang kha a thleng ta a ni e. Sangte, ka nei ang che. I rai tih hi mi zawng zawng hriat hma in ka thup pui thei che. Tunah hian min nei la, mi zawng zawng sawiselna tur che lakah I him zawk ang" a rawn ti leh ta a. Ka a vek dawn nimai hian ka hria. Chutiang tak chuan a nimaw min lo neih duh loh a mjn tlan san dan a lo zawn char char ni. Ka nat belh leh hi a ni hawt e 

A thuhrim in mahni thisen leh fa ngei pawh pawm thei lo khan engtinnge midang te alo rawih ngam zawk le ka ti. Ka ten hluah hluah. Kha mihring kha Khawvel a zawnga mipa tenawm ber alo nih kha le. Ka haw lutuk em mai. 

Tunah chuan ka pawm emaw pawm lo emaw, ka hmangaih emaw hmangaih lo emaw, duhthlan tur dang min Siam miau loh avangin Malsawmfela nei tur chuan harsa ti takin thutluk na ka Siam ve ta nge nge a. Ni e, kei chauh ka ni lo, nakin a ka naute lo piang tur hma hun hi ka ngaihtuah tel ve zel a țul tawh si a. Inrawlhna nei ve miah lo zawk Malsawmfela chu ka fa lo piang tur chuan a pa taktak emaw tiin a pawm ve ngei a țul dawn ta a nih hi. A pawi lo, fahrah nih a, pa hmel hmuh tur neih ve loh ai chuan a țha ka la ti fan e. 

***********  ************  ********** *************