A PÂR DAWN SI LO

A PÂR DAWN SI LO

BY : Vanlalpeki Fanai

BUNG __4

*************

Nileng maiin ka tihtur ah chuan ka rilru ka pe hleithei lova, a khât tawk hian phone te chu ka bih leh zauh zauh thin. Mahse, a hnen atang khan eng message mah chhiar tur tharlam a awm ve thei tawh lova, ka phone te thleng mai chuan a hlutna hi an bo zo tawh nimai in ka hria. Ka khawih țha peih mang tawh lova, min ti chau zual zawk ka ti Mai.

Vawikhat eitur min rawn kensak atang khan Ramchhuanmawia chuan chhun chawlh hun apiang hian eitur chu min rawn kensak a tum ta mai a! Ka duh lo ru thin hle. Mahse, thawhpuite hmuh ve reng lai a ngeiawm lo chhuah kher kha chu a țha ber lo tih hria in, ka ngawi zel zawk a, ani lahin a rawn zawngchhang zel bawk a, ka hne leh tawh hle a ni. Lo tih lan vak vak kha thil țul leh tha ber a ni bawk silo nen, tihian ka tuar leh ta tlawk tlawk mai a ni e. 

Ka unaunu lah khan a ni telin ani chu a lo be țha ang sauh sauh a, kei nen tak hi chuan la inbe tha hleithei lo viau mah Ila Ramchhuanmawia hmel a hmuh tawh hi chuan a dik chho vek zel tawhin ka hria. Amah nen hian innei law law mai sela ka lo ti thin. Tin, hetiang a Hriatsanga boruak a han reh deuh hnu phei hi chuan Ramchhuanmawia mawlh mai kha zantin deuh thaw rawn len ve a tum tawh ka ti Mai a, naupang exam hnai tawh inbuatsaih duh vel lai phei hi chuan a hneawm zual duh ve thin khawp mai. Mahse, sawi tawh ang khan ka unaute awm ve reng lai hi chuan engtia han tih mah hi ka tum hran lova, ani pawh in suahsual rawng te a bawl lem lo bawk nen ka ngawi hmak a, min biak hmasak loh phei chuan biak tumna pawh hi ka nei hran lo. Inhmu phak ah in thut chilh reng pawh ni Ila keimah atang hi chuan biak hmasak hi ala hlawh lo hrim hrim a tih theih ang chu. Hetiang em em a ka duh loh leh hnawl theih nachhan hi eng ber nge ni ta ang tih chu hrethiam bik chiah lo mah Ila, hmangaih dang ka neih tawh vang ka ti lo thei lova, ani chu ka thinlung ah a ber niin ka thinlung hi a ta kha a ni tawh miau a, midang tan a rem ve thei tawh lo a ni e. A dik alawm. Heti khawp a min beidawnsan duh lo tu leh lungawi lo hmel pawh min hmuh duh miah lo tu Ramchhuanmawia chunga ka Khawsak dan hi chu a sual thiam thlak tih pawh ka hre ve reng, mahse, duh lo te hnen a beiseina siamsak hi ka duh dan leh tih țhin dan a ni ve miau lova, chuvang a hnar țang țang tjin pawh chu ka ni e. Engtikah emaw chuan Hriatsanga pawh khan lungawi hun ala rawn nei ve ngei anga, Chung hunah chuan kan inkar hi tha leh in a hma ang tho khan hlim leh inlungrual taka kan awmdun leh theih ngei pawh ka beisei. Ka beisei takzet. 

Zan khat ka muhil thei lo chuan ka phone bawk chu check kual leh in whatsaap status te pawh ka han en kual ve thuak thuak a, status te hi ka view khat thin si a, ka thian thenkhat te phei chuan mjn rawn hau leh sap sap thin. Hun ngah loh chu thuhran, keimah hi social media lawm lo chi leh han inpholang tam lo chi ka lo ni ve hrim hrim a, social media ah na na na hi chuan ka hriatna te hi a zau lo thin hle bawk. Chutia mi chi hrang hrang status ka en kual lai chuan Hriatsanga pawh khan chhun lamah status chu alo nei ve ngei a ni tih ka hmu zui ta a. Ka en nghal vat bawk. Mahse, thu thar danglam vak awm lo in a zinna khua, khaw chhehvel thlalak a rawn tarlanna mai hi alo ni a, ka thaw zui hawk thei. Tichuan, ka insumtheihna te chu hloh leh vek tawh in, amah chu ka va text hmasa leh ta nge nge a. 

" Muttui aw" tiin. Rin loh tak in alo la meng ve ngei ni tur a ni. A seen rang phian. Mahse, min reply duh ta Chuang lova, heiham! Eng thil chiah hi nge a lungawi loh pui a, min do tak tlat chhan hi ni ta ang le. Mak hi ka ti tawp theilo a ni. Chutah, ka thin chu rawn thawk leh thut in, reply duh lo eng ang mahse tiin message bawk chu ka va type leh ta duah mai a, ka inbunruak pah a ni ber mai. Ka chunga a lungawi loh chhan te leh, min biak duh miah loh nachhan te chu zawt in, duh dang a nei ta emni tih thleng mai chuan ka zawt nghal duah bawk a, tin, ka ngaih zia pawh ka sawi tel nghal nghe nghe. Rang takin lo seen zung zung mahse la chhanna erawh ka dawng ngai Chuang lova, a tih ngaihna tak pawh hi  ka hre tawh lo e a. 

Hetiang kan lo nih takah chuan zing thawh thlengin phurna reng reng ka nei thei tawh lova, ka thil tih tur engkim ah phurna min pe thin tu ber a awm tawh loh miau avangin ka tha te hi an țhum zo tawh a, ka chau a ka na bawk a, Pathian hnneah ka harsatna te hi thlen turin chakna reng reng ka nei tawh bawk silo. Ka chuai ta rawih rawih a nih ber chu. 

Tlai khat ka hna bang pawh ka insumtheih tawh thlawt loh avangin in Chhung pawh lut hmasa lo chuan Hriata te in lamah ka tlan tlang nghal nal nal a, amah chu lo awm lo mahse la UDuhsangi tal biak ka duh. 

Inchhung ka luh rual rual chuan ni dang leh hun dang zawng a mjn lo chiau-au thin tu ber UDuhsangi khan min lo melh ve zeuh ringawt a, min biak tumna pawh hi a neih hmel lem loh kher. Mak pawh ka ti zawk hial. 

" UDuh, Hriata hi alo la bang ve lo emni?" inthlahrung taka ka han tih chuan UDuhsangi pawh chuan bul angreng tak hian

" Zingkar ah khan lehkha sem turin an zin chhuak leh daih tawh" lo ti let ve nghut in, hman a ka hriat thin nu fel leh biak nuam em em mai UDuhsangi kha a ang ta lo takzet. Tunah chuan min biak hmasak tumna pawh a nei ta ngai lova, min biak ve chhunah pawh hian min ning tih hriat ngawih ngawih in a awm tawh thin bawk. Ka chunga an unau Khawsak dan danglam ta hi hriatthiam harsa ka ti a, engvang a hetiang a awm ta tlat hi nge an nih ang tih ka hrethiam thei lo. Hun hmasa lam a kan lo awm tawh dan te ka ngaihtuah let ngial pawhin an pawisawi na ka neih awm ka hre lova, an lung ti awi lo tur zwng a ka chet lah ka hre hek lo. Hriatthiam harsa hi chu ka ti ve thlawt a ni. 

UDuhsangi takngial pawhin khatiang a min lo chhawn that duh tak siloh ah chuan awm ve reng na chi pawh ni lova hria in, ka Chhuahsan zui leh ta vat vat zawk a. Tih hmasak ber tur pawh hi ka hre tawh lo a ni e. Naktuk maiah hian Kan school naupang thenkhat ho in exam an hmachhawn tawh dawn a chu lamah pawh chuan ka rilru hi ka la dah hleithei thlawt lo. Ka chavai a ni ber e. 

" Tunlai chu chaw te hi Iva ei tlem thei em em ve a, school lamah tu in emaw a rawn chawm hneh deuh che nge" nui put put chunga ka unaunu in a rawn tih chuan amah chu melh in ka hawi phâwk nghal hrâ thei a, ka en ta tlawk tlawk bawk. Ka u hian engtinnge Ramchhuanmawia thil tih zawng zawng te hi alo hriat ve theih thin ziah le ka ti. Ramchhuanmawia nen hian eng ang taka in close nge an lo nih ang. Țul ka ti lo viau bawk. Ka chaw ei laklawh lai pawh sawi lo chuan ka tho zui nghal sawk sawk a, insiam nial nual in In chu ka Chhuahsan zui ta vang vang. Ka kalna tur hi ka hrechiang a, ka tihtur nise ka hrechiang bawk. 

Taxi chu phar ding vatin, Ramchhuanmawia nghah ve thin an cafe awmna lam kha ka pan zui ta vang vang a. Ka thinrim lutuk insehruhna lamah ka kut te pawh chu lo hum ruh ve ngawt ngawt tawhin, ka sa chhuak vek bawk nimai hian ka inhria a, ka tawt up up reng mai bawk. 

A tawp a tawp ah chuan cafe pawh chu thleng ve thei hram in, customer tam loh lai tak hi hlauh pek a, a tih zia dawn e, tiin ka lut nghal dawr dawr mai. A chhung ka han luh rual chuan a neitupa ber Ramchhuanmawia pawh kha lo awm langsar ve hlauh in, tih zia lutuk ti Chung chuan amah chu ka va pan nghal nal nal mai a. Chutah, lehlam a hawi lai chu kuai her nghal sawkin thinrjm ha Chang țhial bap bap chung a melh rum hrak hian

" Hey nang hi! I thil tih leh ka chunga I thil țha tih te, ka treat dan zawng zawng che engkim mai kha ka unaunu hnenah khan lo thlen duh tawh suh aw. I hria em. Tin, ka duh lo Chung chu nang hian min rawn zar buai in min rawn um buai tawh suh ang che. I hmel te hi ka hmu peih tawh thlawt lo tih lo hre rawh! Ka hne zozai hle che tih hi hria la chuan mjn hmu tur pawhin ka awmna apiangah I rawn inlan duh tawh lo hial ang chu. A chiang maw? " ka ti zui ta buan buan mai a. A dawr chhung a awm ve customer tam vak lo leh a staff te ho khan kei chu mak tih hmel em em hian min rawn en zui ta sap sap hlawm a. An phun zui mar mar mai bawk. Chutihlaiin kei ve thung chuan zah reng reng hi ka hre tawh lova, zahna tih vel ai chuan thinrimna zawk kha a lian twh em a, zahna te chu eng thil nge a nih tih pawh ka hre chang tawh lo rneg reng. Chutiang a ka duhtawk ka sawi zawh hnu chuan a țawng chhuah ve hun pawh nghak tawh lo in cafe chu ka Chhuahsan zui leh ta vang vang mai a, mahse ka chhuah atanga reivaklo ah hian a hnen atang khan call dawng lehnghal in, ka la lo chiang teh e. Ka thil tih zawh chiah vang te, ka thinlung tawt lutuk vang te chuan ka kawng kal lai pawh chu thinlung rum vawng vawng in mittui hian min rawn chiah piah zui nghal a, ka dang seng mawlh lo. Kal laklawh lai lai chuan mittui tla tur hru pah reng reng in ka buai a, ka mi tawh tur te hmel pawh kha ka melh tha ngam hlawm lo bawk a, thenkhat kha chuan ka awmdan kha mak an tih lutuk vang ringawt pawhin min en zui vang vang tih chu ka hre reng. Mahse, ka pawi sa zo tawh lo a ni e. He thinlung hi a na a, a chavai a, tihtur ber pawh hre tawh lo in a vai ruai ruai chu a nih mek si hi. 

" Zomuanpui! Zahna hi ilo va tlachham em em ve a. Engtinnge Ramchhuana te cafe ah khan lo va kalin mi zwng zawng hmuh laia ani kha ilo va ankhum theih zawk a. Zahna hi ilo pianpui ve lo hlemai"  Inchhung ka luh rual rual chuan ka u khan min lo ankhum lehnghal bawrh bawrh a. Ka ding zui chawt thei. Mahse, zam chhe hmel erawh pu duh Chuang hauh lo hian

" Chung zawng zawng chu khawi atangin nge ilo hriat ve leh tawh zawk a. Ka duh loh zawng engkim kha ka va hrilh zo chiah emaw ka inti a, thusawi a ngai pawimawh duh lo hlemai maw"  ti let ve sakin, ka sawi zawh rual hian ka hmai chu a rawn thip nghal zawk a. Ka u hian ka hriat theih chin ah thinrjm vang a kut min thlak hi ka la hre ngai lova, tun hi a vawikhatna a ni hial awm e. A mi ben na chu na em em hran lo mahse, min ben duhna thinlung dik lo lutuk a put chhan zawk khan min ti thin ur hluah hluah thei a, ka sa Zak bawk. 

" Kha mihring vang khan kut min thlak a maw!? Kha mihring, lam țang tur zawng reng vang khan I nau hi kut min thlak ang maw. U, I mizia zwng zawng I hloh nasat tawh zia hi in en fiah nachang hre mawlh teh. Tunah chuan mihring sum duh lutuk mai ini tawh e"  ti zui ve leh bawrh bawrh in ka țap zawih zawih a, roomah ka tlan lut nghal bawk. Puipuia khan min rawn umzui ve vat bawk a. 

" A nute, a na em? A nu chu a sual e tiraw?" ti Siam Siam Chung hian ka sam te chu rawn zut ve delh delh in a thiam dan ang ang a min hnem chu a tum ve nasa tih pawh ka hrethiam a. Chu chuan nasa taka ka thinur na ata chu min chhawk zangkhai ve in, tlem chuan ka dam phah ve huai thei a, Puipuia chu lungchim tak leh mittui tla zawih zawih Chung hian ka kuah let ve ta hnawp mai a nih kha. Tunah chuan lungchim tak leh min thlahlel tih hriat taka min kuangkuah ve thin tu kha hla takah kalbo tawhin hmuh phak loh ah a thamral zo ta si a, ka ngai em a ni. Hriatsanga lakah hian ka beidawng tawh em ka inhrethiam bik lo, mahse, phone call leh message reng reng chu a chhang let duh tawh lova, mangang taka zu Kal chilh ve pawhin a hmel takngial pawh kha hmuh tur a awm ngai tawh silo. UDuhsangi hnen atanga a chanchin ka hriat ve theih awmchhun chu hna thilah a zin chhuak leh tawh tih chauh hi a ni thin a, thu thar hriattur a awm lo thin hle. Amah kha ka ngai a, a hmel te kha hmuh leh a a taksa si chet a awm leh veng veng tluk a chak kha ka neilo. 

Ni khat erawh chu, exam kan zo office atanga kawngpui ka thlen chhoh rual hian amah ang zet kha a bike nen a inkhalh chhuak tur chiah hi ka han hmu hman a, thui vak lo chu umzui ve hman in ka ko pah bawk. Amah ngei kha chu niin ka hria a ni. Mahse, ani chu a rawn hawi let lova, ka kohna ri te khan ani chu a ko ding zo ve tawh lo a ni. A thuhrim in heng laiah hian eng thil nge a rawn tih ang tih chu ka ngaihtuah zui ta tluk tluk mai a, amah ngei kha chu niin ka hre bawk si. Chuti a nih chuan he pa hian min la theihnghilh hmin țhak lova, min la hre ve reng a ni tih chu ngaihtuahna ah a rawn lut nghal in, za vak lem lo chuan ka nui zui ta sak. Chutiang chu lo ni ta se engah nge ka chungah hetiang thil hi a tih a, min biak duh loh a, min do tlat mai le ka ti. A lungawi loh chhan te, ka tihsual te chu min hrilh ve Sela, a tan a nih phawt chuan insiamthat hi ka hreh lo reng reng. Mahse, Chung te chu beiseina beidawn thlak mai niin, min hnaih chu sawi loh, a ni tel hian min hlat dan a zawng a, min kal hlat san tual tual a, a reh a, a reh ri a rjng a, beisei tur min Siam duh hek lo. Tin, insawifiahna hun takngial pawh min pe lo leh thil awmze hriatna hun takngial pawh min siamsak lo in tikhan a bo hmak a, a reh ri mawlh hi keimah ah chuan a ring em em thin si a, heng zawng zawng te hi min rawn hriatthiampui ve hauh lo mahse min khawngaihna chhete tal te hi chu a nei ve lo emaw ni le ka ti. Ani kha ka mamawh takzet zet asin. 

" UDuh, Hriata hi a zin chhuak leh tawh emni?" chumi zan chuan insumthei lo lehin zah pawh dawn lo hian ka zu leng thla leh rawih mai a ni a. UDuhi pawh kha țum dang ai chuan tlemin biak pawh alo nuam ve ta deuh e. 

" Aw zin leh tawhh e. Tunlai chu khaw thlang lamah an zin tluk tluk reng mai"  nui sang chunga a rawn tih chuan a sawi tum awmzia chu hre lo mah Ila, muangchang hian ka lo bu ve nghut nghut reng a. Ka khap deuh fak fak reng bawk. Chutia sawi ber tur pawh hrelo a ka la ngawih tak reng ah chuan amah bawk kha rawn țawng chhuak lehin

" A thuhrim in tunlai hi in thawm ava reh dun ve. In inbe tawh lo nge"  a rawn ti leh ta nge nge a. Min la en kar reng zui. Ka zam chhe ve lek lek thei nia! 

" Um, be tawhk chu a nimai. Hman deuh khan a chhan pawh ka hriat si loh hian min rawn be duh lo ringawt mai a. Hei thla khat chu a tling ve leh tep tawh mai. I bulah hian a chhan ni thei tur awm ang te a sawi thin em" lo ti veleh nghal zat in, ani chuan a lu chu a rawn thing zui ta nak nak a. 

" Sawi lo reng reng. In la țha reng turah ka lo ngai zawk a. Mahse, tunlai chu nangmah zawk hian a chanchin hi min rawn zawt leh tjin si a, chuvang a nia ka han zawh tawp che" a rawn ti leh a. Thil thar han hriat belh tur a awm lo thin teh e. 

" UDuh, kei chu ka rilru hi a ti hah tawh lutuk a. Kei ni lo duh dang te hi a nei ta nge ni ang ka ti hial tawh. Hetiang hian ala awm ngai bawk silova, a hrilhhai thlak duh takzet a ni" ka han tih leh chuan UDuhsangi khan uluk leh chiang em em hian min lo melh ve kar reng a, a hmel te chu a thutak takzet bawk in ka hria. 

" Ka hre hauh lo. Ka rin dan chuan nangmah zawk hian duh dang i nei anga chu chu lo hre ru ve in a lungawi lo ta mai ah ka lo ngai zawk a" a rawn tih chuan rang zet leh nasa em em in ka lu chu ka lo thing zui ve nawk nawk tawh a. Thudik a nih loh zia hi hre ve se ka va han duh tak em

" Engtinnge ani hi midang ka neih san theih ang le. Tunah pawh min biak that duh loh vangin ti khawp hian ka buai phah a ni a, engti kawng mahin midang hi chu ka kawp san thei lo hrim hrim. Chutiang chu a rin pawh ring duh suh se"  lo ti let ve mial mial in, UDuhsangi pawh kha alo thaw ve leh hak thin a. 

" Ka hre tawh lo le" a rawn ti hul zui ta hak. 

Hemi zan hian zankhua in Hriatsanga chu biak pawh tumin ka call ta ngat ngat a, mahse, alo reject ta hmak hmak mai nia. Engtinnge a theih zawk le. Khati khawp a min ngai thin leh, ka biak loh hlek pawh a talbuai thin ni si kha tunah erawh chuan min be hreh em em tu alo ni tawh zawk a, engtiang chiah a na in nge a rilru kha ka lo hliam ang aw ka ti a ni. Hrehawm tawpkhawk a ni e. 

Tunah chuan hun leh ni, thla te hial pawh vei ve tawh in, kan inbiak lohna pawh thla thum Chuang lai a ni ta. Hetih chhung zwng hian a chanchin hriattur a awm ngai lova, inhnaih taka khawsa si khan a status vel a ka hmuh tih loh chu a hmel takngial pawh ka hmu tawh ngai lo. Ngaihzawng dang a neih leh neih loh chu va hre thui viau hran lo mah Ila, mipa a nihna ah tu emaw tak chu biak a nei ve ang tih rinna lian tak ka nei tawh a, a status ah te pawh hmeichhia a biakna niawm tak hi rawn hmang veleh thin in, hla thu awmze nei tak tak te pawh rawn status a hrat zual ta hle a. Chutihrualin keimah nen a inhmehbel theih tur chi erawh chu a nei ngai hauh lo thung. Heng thil te hian amah vanga ka la dam loh zia chu min hriatchhuah tir leh țhin in, ka na nawn mawlh mawlh mai tihtheih a ni a, ka mittui te hi ka va han seng thlawn hnem tak em. Engah nge a lakah hian ka beidawn duh miah loh le ka ti. Ni lo, ka duh loh vang ni lo in ka theih loh vang zawk a ni e. Ni tam ral tawh mahsela kan inbiakna hlui ka la delete phal loh zawng zwng te thleng mai khan mittui nen a chhiar chhuah chang ka la nei ve fo thin a, engtik lai pawh a ka phone luahlum reng thin tu kan pahnih hlimthla te kha thlir in a hmel mawlh mai chu ka thlir ning thei lo ti Ila ka sawi uar awm lo asin. A hmel ka hmuh rual a ka mittui rawn tla leh țhin te hian ka thinlung chhung ril thu awm zawng zawng hi min  hrilhfiah sak zo kher lo mahse, amah a ka rilru put hmang te erawh chu an rawn lan fiah tir chiang viau thung si. Ka na a ni. Ka hrilh a hai bawk. 

Tlai khat ka school bang erawh chu thu thin țhawng zet mai hian min lo hmuak in, ka u khan Hriatsanga chanchin chu min lo hrilh ve teh mial a! Mahse, a zinna atanga nupui a rawn ruk haw thu chu lo niin! A nupui tur chuan thla 2 mi nau a pai mek thu pawh a sawi nghal a! nia, ka hmangaih em em leh kha chen kawp a ka pasal tur ni hial a ka lo ngaih tawh Hriatsanga fa kha a pai mek a nih chu!! Ka thu hriat zet chuan min țhawng in min deng na em em a, ka hamhaih takzet bawk a ni. Chutiang chungchang ka unaunu in a sawi zawh rual rual chuan zawi zet leh ngaihtuah dang pawh nei theilo hian sofa chungah chuan ka țhu thla nghal hnawk thei a. Ka thaw te hi a rawn tawt deuh up up theiin ka hre Mai. Ka na em atin ni. Ka na lutuk kha ka țap hleithei lo zawk a, ka Bing deuh mup mup tawh bawk si nen tih ber tur pawh hre lo hian chu sofa chungah chuan ka țhu zawi ta tlawk tlawk k reng a, zawn nei ang mai te hian ka hawi zui ruai ruai reng bawk. 

" A nute, I damlo mi" ti a naupang pahnih ten min lo biak ve thin na te pawh chu hla taka țawng ri ang maiin ka hre pha ve vuai vuai tawh chauh a. Kei hi ka na a ni. Ka Keh chhe vek. Hetih hunlai hian beisei tur pawh nei tawh lo ni hial in ka inhre hman a, Pathian chu ka rilru in ka au ta vawng vawng mai. 

A dik alawm. Ani nen khan sulhnu tamtak te chu lo nei ve tawh thin mah Ila, thla thum chhung zet kha chu inbe lo le inhmu lo in kan lo khawsa tawh ngei mai. Mahse, chumi a nih vang ringawt chuan he thinlung hmangaih ve na te zozai hi an reh nghal ngawt thei tihna a ni lova, theihnghilh lah a harsa bawk. A harsa lutuk. Engvang a he mihring hi theihnghilh thei lo tlat nge maw ka nih a, ka hriatrengna ata hi nawh reh theih a nih loh tlat le ka ti. Na taka min siamtu hian amah hmangaih tu thinlung ah hian la cham ve reng a phu emni? Bo se, bo hlen vang vang tawh se la ka duh zawk asin. 

" I na vuah ang tih chu ka hria. Mahse, a tir atanga ka hrilh tawh che ang khan nangmah hmangaih a zah pawh sawi lova umzui reng thin tu che mipa dang i nei reng a, lo fing hma deuh chu ni la heti em em hian j na lo tur asin. Ka nau, tunah chuan tihngaihna a awm tawh lo a, ani khan nupui neiin a dam chhung kawp tur mi a thlang fel tawh a, reilote ah an inkar atangin Pathian malsawm fa a lo piang dawn bawk. Theihnghilh tum la, i dam hma zawk ngei ang. Khawngaih takin ani kha chu theihnghilh tawh rawh"  ka u chuan kei, a nau mittui tla leh thinlung na lutuk chu ngawihbo san reng thei lo in a tawpah chuan tawngkam a rawn nei ve ta nge nge a. Mahse, a mi hnem tumna tawngkam te khan kei mi kehchhia hi min va han hnem tam lo si em. Theihnghilh maw? A harsa lutuk. Tun mai ah chuan ka thei dawn lo tih pawh ka inhria. Tum pawh ka tum buai peih lo law law.

A status te chu ngam leh ngam lo hian ka check thin a, ni e, tunah chuan thil zawng zawng te hi tih danglam a awm tawhin, nasa takin a inthlak danglam tawh a, a status takngial te pawh chuan min danglam san nasa tawh asin. Tunhma kha chuan kan pahnih thlalak te khan luah lum ve thin in, nitin deuh thaw khan ka thlalak thar lam kha hmuh tur a awm ve thin a, tunah erawh chuan a nupui lo ni ta, ka tluk loh hmeichhia ngei mai khan rawn luah khat zui ve tawhin, kei chu hnawl leh paih thlak ka lo ni ta asin. Ka thil tawn mek ang hi lo tawng a lo paltlang tawh mi tamtak an awm ang tih chu ka ring. Engtinnge an paltlang dan tih chu hre hauh lo mah Ila tun dinhmun ah hi chuan min dem loh hram ka beisei e. Ka la tuar dam thei rih thlawt lo a nih ber hi.

Chaw ei a tui thei lova, mut nise a tui  lo zo vek bawk a. Thil engkim mai hi paltlang a harsa in a sak zo vek tawh a, a hlimchhawn ah phei kha chuan nui hmel te hi ka put leh theih pawh ka inring lo hial a nih kha. Mahse, Pathian ah chauh innghahna ka nei tih inhre chiang in amah ah chuan ka innghat tawp a, harsa hle mahse tawngtai chu țhulh ka tum lova, ka ti lui ve țang țang thin. Chu chuan nasa taka min pui in a ni tel hian ka dam tual tual tih ka hria a, chaw ei pawh a tui chho țan in, thil reng reng chu a eng zawng a thlir dan ka lo thiam ve țan ta bawk a, țhen rual te pawh harsa Chung Chung chuan ka kawm lui ve zel. An ni lahin an theih tawp an lo chhuah ve a, min hrethiam in min hnem awl lo bawk a, nupui a neih atanga thla 2 liam leh hnuah phei kha chuan dam tawh tak ka ni e. Tin, hetihlai hian vanneihthlak takin an nupa khan aizwlah hmuh zui tur an awm lo hlauh a, an khaw lamah an haw chho rih a niawm e. A hmel hmu lova ka awm chhung zawng kha chuan ka dam ve niin ka hria a, mahse le, thingtlang ah chuan an tawm bo reng thei dawn lo tih ka hria a, rawn haw hun an la nei ve ngei dawn bawk. Chung hunah chuan engtinnge ka tih anga, engtinnge ka lo hmachhawn ang engmah hi ka hre lawk bik lo. Pathian thu thu ni rawh se.

Tunah chuan  ka beiseina neih ve zawng zawng te kha kalbo tawhin ka mipa hmangaih leh a awmchhun chuan țang dang belin nupui hial min lo neihsan ta si chu a ni a, Keipawh in harsa viau mahse ka beidawnsan a ka hawisan ve a hun tawh tih ka hria a, hma lam ka pan a hun ve tawh tih in hrereng Chung chuan chakna ka dil a, ka chak chho ve zel bawk a, tunah chuan mahni inrintawkna pawh nasa takin ka nei ve leh thei tawh e. Lalpa, ka lawm e. 

Chutiang chu thil awmdan a nih rualin mipa dang han biak a, han kawp zui tumna erawh chu ka la nei hran Chuang lova, duh dang lah ka nei hek lo. Sawi leh sawi hnu, Ramchhuanmawia kha misual nilo in min beidawnsan duh lo mahse la amah ah khan eng thinlung mah han hlan tur ka nei thei tlat lova, inthiamloh chang te pawh ka nei ve bawk e, mahse, ka thei tlat silo a tin ni. Chutihrual erawh in tunhma a ka lo en thin dan ang em em kha chuan ka en tawh bik lem lova, a chungaj pawh khan nasa taka that chhuah ve tawh in, biak hmasak a țul Chang te pawhin ka be hmasa ve lawp lawp tawh thin a. Chu tak chu ka u lawm ah tla in, keini pahnih chu inkawp rem ve tak tak turah te pawh min lo ngai a ni ngei ang. Tunhma zawng ai khan ka u pawhin min duat thar a, kawng engkim ah min duhsak thar ta hle mai bawk. Ka rilru chhung ril chhete mah hi a hrethiam pha ve Chuang silo. Hei tak hian min ti hrehawm hle thin a ni ber e. Hma lam pan a chak taka awm pawh ka tum ngei e, mahse, hetiang hi hma lam pan ka tum dan leh chak tura ka infuih dan erawh a ni ve bawk silo. Ala hun lo ka ti Mai zawk a ni. 

" Tlai lam chu min lo nghak la, ka rawn lam kawi leh ang che chu"  Ramchhuana'n a rawn tih chuan hnial buai ka tum tawh lem lova, hun engemaw ti atang khan chhun lama eitur min rawn pek leh office ban hnu a min rawn hruai te hi a hrat chho ve Sawt riau a, a tirah kha chuan lo hnial ve thin in ka duh lo ve hle thin a nih kha. Ka duh loh zual nachhan em em pakhat chu, hetianga school ban hnu a inphurh haw hi Hriatsanga nen khan kan lo ti dun fo tawh thin si a, keini pahnih phei kha chu haw tlang nghal mai lova len kawi kan la hrat zui a nih kha. Engkim mai, sulhnu Chang tawh tur tuai thar a a han awm leh tur kha ngaingam lo in Ramchhuana pawh hi inthlah haw chungchang ah kher kher chuan ka lo hnial rei ve khawp mai. Mahse le, hmalam pan a intih chak ka tum tawh miau avangin hun rei ve tawh tak atang khan a thlah haw pawh kha ka lo remti ve ta hram a, a lawm thiam ve thei viau. 

" Mami, naktuk tlai lam chu zanriah ei chhuahna tur kan nei dawn a nia aw" phur fahran a ka unaunu in a rawn tih chuan a ngaihna hrelo fe hian amah chu ka lo en zui vat a. A hmel lan dan atang ringawt pawh khan a phur thak tawh hle tih chu a hriat theih awm e. Khawiah tak ni ang maw. 

" Ramchhuana te chhungkua in Kan chhungkua a chaw ei phei turin min rawn sawm ve mqwle! A nuam dawn lutuk" a rawn ti leh ta mai! Ka țhu tha hle hle lai chu ka kâng deuh awk nimai hian ka hria a, tlaiah pawh khan Ramchhuana nen chuan kan inhmu tawh tho sia, ka bulah te pawh khan han sawi ve nghal mai awm. Ka unaunu tih lawm dan leh han tlawn lungawi dan hi chu hman atang tawh khan ala thiam chho char char a nih dawn hi ka ti ta. 

" Nih chu. Ava lawmawm em em ve a. Hman hram kan tum ve dawn nia"  phur lemlo taka lo ti let ve in ka thawhsan nghal daih a, ka kalsawn ta nal nal bawk. 

An khaw lama an inneihna boruak chu a nawm hmel angreng khawp mai. UDuhsangi status ah leh amah Hriatsanga status ah te pawh chuan ka hmu ta chuai chuai a. Monu ber pawh kha a hmelthat hmel phian e. Tin, a fel hmel viau pawhin ka hria. Hlim takin innei se la, fanau maltluan chawiin damchhung daih tur hmangaihna pawh an inkarah khan lo piang mawlh rawh se. Chubak chu an tan khan tihsak theih ka nei ve tawh lova, duhsakna zawng zawng hlan mai loh chu tihsak tur thil ropui ka nei ve lo a ni e. Ni e, ka hmangaihna nen. Ka hmangaihna hian zui reng se la, a tan khan a țha ber tur chauh ngaihtuah bawk rawh se. 

Sawi lawk tawh ang khan a tuk tlai lamah chuan Ramchhuana te in a chaw ei turin keini chhungkua pawh chu kan phei zui ve ta dial a. Ramchhuana khan phur em em in min rawn hruai deuh thlap bawk a nih kha.

An ni chhungkua hi chhungkaw khawsa thei leh mi challang vek tak an ni tih chu hre tawh tho mah Ila, an chenna hmun meuh han hmuh takah chuan ka lo ralkhat hriat ve ngawt na te kha chu dah nil rem rem tak a ni e. In leh Lo ropui tak piah ah hian inchhung mawlh mai kha! Ka rilrem zawng taka sak niin Mizoram a kan mi hausa te in ropui nazawng nen hian tehkhin ngawt chi pawh a ni awm lo asin. Pui tak a ni ringawt. Chaw ei hunah pawh chuan puih ve chu tum sateh mah ila an remti loh chu thuhran, kan che hman ve lo hrim hrim zawk. A nghet a an lak awmpui nula kha pahnih awmsa in, a nghet ni lo, lâng kal ringawt kha 4 lai chu an awm awm asin. Ngaihtuah thui deuh phei chuan kan awm mekna hmun chu mimal khawsakna inchhung pawh ni lo in, hotel changkang lutuk te pawh a ang thei mai dawn a, hetiang inchhung ah hian vawikhat tal chaw ei turin ka la Kal ve ang tih hi ka inring phak ngai lo. Ropui tak a ni. An chenna hmun chu engpawh lo ni se, a mihring khawsa te mawlh mai hi, an fel in an țha em em a, keini, mi daikil kara khawsa ve Mai Mai pawh chaw ei tura min han sawm duh ve ringawt te pawh hi phu lo ka in tiin, te chem chem te hian ka inhre tawh hial. 

".Muante, ei teuh ru aw. Inthlahrunna tur a awm miah lo nia. Chubakah hei, I hming na na na hi chu kan inchhungah hian a mikhual tawh lo khawp mai a, chuvang in nangpawh mikhual angah inngai suh aw" nui Sen Sen chunga nu ber in a rawn tih lai chuan chiang zet hian Ramchhuana nen khan Kan mit chu alo intawng chat bawk a. Engtin mah ka awm lem lo. Chutihrual in ani kha chu a han Zak thar leh hnuhnawh deuh nge ni, rei pawh min melh tha ngam lo hian hmun dang a melh zui lehnghal dajh a. A naupan chhiat tawh loh nen, mahni inchhung ah chuan a che naupang chhia ve khawp in ka hria, a chhungte bulhnai a a awm vang te pawh ni mahna. Inhmeh lo lutuk. 

Chumi zan chuan zanriah kil zawh hnuah pawh haw mai lo in kan la țhu khaw muang leh te te phawt a, kei chuan sawitur vak hre ve lem lo mah Ila ka kalpui te leh Ramchhuana nu leh pa te mawlh kha an țawng duh hlawm em em a, a ninawm hman thlawt lo a ni ber. Chutah, Ramchhuana nu bwk khan nui var var Chung a kei leh a fapa melh tawn Zak Zak Chung chuan

" Bawihi, kan titi hi in zawm thiam ve chiah lo in ka hria, hrehawm te kha in lo ti palh hlau ange, duh leh, in Chung sang lamah in pahnih khan han inkawm fal daih ula. Boruak țha hip pah a nimai a, tiraw?"  rawn ti leh in, ekhai! Nu ber hi a zei ber dawn niin a lang ta riau. Tin, a thil han sawi te pawh kha lo hnial ka tum lemloh avangin Ramchhuana pawh chu mitmei hmang hian ka va signal zui ta zauh zauh bawk a, hrethiam takin ani pawh chu alo tho ve mai bawk. Tichuan in Chung sang lam pan tur chuan kan inzui chho dun ta a ni. 

An chenna In hi Chhawng thum a sak niin, Chhawng khat ringawt pawh hi a zau in a lian țha em em a, a Chhawng Chung ber kal chhoh chhung pawh chu a rei duh angreng khawp mai. Kan thlen chhoh meuh chuan kei mi in tha zo lo lutuk hi chu ka hah thaw leh hlwwi hlawi tawh a, Ramchhuana pawh khan min lo nuih ve kur kur tawh. 

" Taksa sawizawi nasat I mamawh a nih kha. Mahse hei, Helai chu thlifim a thaw heuh heuh reng a, I hahdam vat ang" rawn ti zui ve zatin, ka kut chu a la lawk a, verandah zau leh thawveng em em lamah chuan min tlan chhuahpui zui ta dawr dawr a nih kha. Chutah, ka inrinlawk hma a min dinpui zui leh chawt in

" Han thaw kawk kawk phawt teh le. Naktuk zing atang ke ngat a Kal tam i zir nasat țan a ngai dawn si" nui hak hak chunga a rawn tih chuan za lo tih hriat fe hian ka lo kiai ve leh sak sak thin a. Ka hah pawh chu a ziaawm țan e. 

In Chung zawl awmna chu a sang țha pangngai bawk a, kan hmalam a Aizawl khaw chhung eng pe tuarh mai te chu han thlir vel a remchang in, a hmun hma hian a zir em a, lung te pawh a tileng thei rum rum dawn alawm le. 

" Muante, ngaihzawng hi engzat chiah nge i neih tawh a" min melh pah kar chunga a rawn tih chuan Keipawh in amah chu chiang fe hian ka lo melh let ve zauh bawk a. Ka lai ve lek lek. 

" Ngaihzawng satliah hi chu ka ngah ve tawh reuh lutuk. Mahse, hmangaih erawh pakhat chauh"  tiin zep nei lem lo chuan ka lo sawi tlang hmiah a. Ka sawi zawh rual khan ani pawh kha alo bu veleh nghat nghat thin. Min la en kar reng tho. 

" Chuti chu, I hmangaih pahnihna leh a hnuhnung ber ni turin kei hi min duh ve angem?" a rawn ti leh ta mai. Ka thin te chu alo phu zui dup dup thei in ka hria a, chhan dan tur ka hrelo takzet. 

" Um, I hmanhmawh lutuk a nih kha. Dawhtheih kha han zir phawt la, i la hlawh chhuak ve maithei asin"  chhuanlam ah ka nui zui var var reng a, ani pawh chuan tihnghaihna hriat loh hmel zet hian hrilhhai takin min lo la en ta reng ringawt. A khât tawk hian a rawn thaw leh hak tjin bawk a. A duh ang chhanna ka pek theih loh avang khan nuam lo chu ti ru ve tho mah Ila, hmangaihna chungchang ah hian in nawr luih a in pawh luih ngawng ngawng theih a ni lo tih hi ka hrechiang ve tawh em a, beisei awm a kan awm loh lai pawh a min thlah lo tu leh, min kalsan tum ngai reng reng lo tute hian min lo hmangaih ber nge nge thin tih ka hria. Ka lakah hian Ramchhuanmawia pawh hi bet nghet viau mahse, hun te ala ral tam lo bawk a, min beidawnsan dawn nge dawn lo you chu hun in ala rawn hril zel ang chu. 

"Eng pawh chu nise, ka lo nghak reng dawn che nia. I tan hian ka hun țha tam zawk ka khawhral tawh a, ka inhmang ral tawh ta sa sa, ka beidawnsan lo tawp ang che"  a rawn ti leh ta mauh mai a. A thilsawi chu tha ti zetin ka lo bu ve ta nghat nghat ringawt a nih kha. 

" Ramchhuana chhungte chu an that hmel iti em? An fa mo han ni ngat la chuan e, an duat lutuk tur che hi an duat hlum thei ang che ka ring"  thiannu Ruathlui chuan a rawn ti leh bawr bawrh tawh a. Zanriah kan va ei thu kha Ramchhuana khan alo hrilh leh vek tawh tih ka hre Mai. He pa tak hi chu aw. Ka chanchin sawipui thei tute hi chu hmaih lo in a kawm peih a, a be peih vek nimai hian ka hria. A lawmawm ve reng reng e. 

" A lawmawm rual rualin an chhungkua kha ka mo chakna chi a ni lo! Duh aiin an Khawsak a sang mah mah a, kei ve hi ka awm rei theilo tawp ang. Ka thiam dawn lo"  ka tih leh tak tlat ah chuan Ruathlui thinrim lutuk chu alo insawh tau ve nghawng nghawng thei a. Min beng chak ngawt hian ka ring a ni. 

" I Mawl dan em em hi e, mawli! Tunlai hmeichhe tamtak ten an duh leh chak chu tunah hian i duh thu in I nei thei reng a, awi! I Mawl zia hi. Hmeichhe dang chu nise e, an bawh nghal huam huam tawh ang chu Mawle. Tinge I at em em reng a. Hriatsanga kha theihnghilh tawh rawh"  rawn ti leh kher in kei chuan ram hmak hian

" A hming pawh kha rawn sawi ri tawh suh. I hria maw"  tiin ka kalsan ta hmak a. Ka hnung lawkah chuan a rawn tlan ve leh dat dat tho. 

A hming lam rik a nih rualin ka awmdan a danglam nghal vek thei a, ka hlim ve tawhna te kha lak bo ang mai a awmin ka nui hmel a bo a, ka chakna neih ve chhun derdep zet te pawh hian min kiansan leh zo vek niin ka hria. Ani kha ka theihnghilh thei dawn lo tihna emni? Engvang in nge he thinlung ah hian bu alo khuar ngheh em em le aw ka ti. Chãng dang reng reng kân thei lo a min siamtu chu amah ngei kha alo nih hi. 

Nula tuak thar te chu Aizawl lamah rawn let rih lo mahse la, UDuhsangi te chhungkua erawh kha chu an lo haw ve tawh thung a. Ka u remtihna leh rem hriatna in vawikhat tal chu zu leng thla ve teh ang tiin an rawn thlen zan chuan hreh ru angreng tak hian ka chhuk thla ve ta nge nge a. A tir lamah kha chuan an inneih boruak vel te kha la sawi dun in, an mo thar chetsual dan nuihzatthlak tak tak te kha a sawi nual a, kan nui dun ve bawk bawk. Mahse, chumi hnu a a thil rawn sawi leh zet chuan min barakhaih in ka awmdan engkim kha a thlak danglam zo leh ta vek a. Ka thu hriat duh loh ber ka hria te pawh ti Ila a dik thei tho ang chu.

" Mama chu ka khawngaih reuh lutuk a. Eng lo a nia Muante, an inkutsuih dawn ni te khan a hma zan atang tawhin a muhil hleithei lo țan tawh a! An nu kha a pazawn tur te in a a riah phei lai alo ni bawk nen, a khât tawk hian ka bulah chuan rawn phei leh țhin in, nangmah hi phone sak tur che in min ti chhen ta mai a! A tir chuan a ngaihna ka hre lo hle. Tin, thil lian tham tak a tihsual thu leh, chuvang a a hmangaih pawh ni miah lo nupui a neih a țul tak vang te chuan hrehawm a ti a, I hming kha zankhua deuh thaw in a lam ri thei hial ang. Ka pasal khan a rawn hria ang tih hlau in mut chhuak tawh Chung Chung chuan pawn dai ah te kan va inhnem leh lawp lawp kha a nia, a khawsa zia khan min ti hrilhhai ve angreng khawp mai. A tuk inkutsuih hma pawhin bathroom ah alo țap ngar ngar lai ka va hmu leh a, nupui neih kha a hreh ve ngawih ngawih tih ka hria. Tin, a hmangaih miah loh damchhung kawppui ni tur a han neih kha a hreh lehzual a, mahse le, mipa a nih angin a tihsual rah a seng kha a țul miau mai si a, a mawhphurhna a hlen a țul bawk. Thudik ka han hrilh ang che a nga, khatiang a ka nau mizia a danglam chhan diktak kha chu, ni khat kha I Usangi khi rawn leng thla in chuta chuan nang hian bialpa nghet midang I neih thu leh, inneih mai pawh in tum hnaih thu te a rawn sawi ta vak mai a! Tin, ka nau pawh chu nangmah rawn be buai a rawn zar buai tawh lo tura a duh thu te sawi nghal in, kha tawngkam khan keini unau chh min ti na zual ta em em a, tin, ka nau hi I tana a that tawk loh thu leh, a tlin tawk loh zia te pawh a sawi teuh ta awm e. Mama phei kha chu mipa e ti lo khan a ruka a tap lai kha ka va hmu fuh leh țhin hial. I hriat ve tawh loh chin ah khan a ruk a zu in te kha a rawn ching chho ve țan a, a hnathawk rawn haw te pawh kha zu rim nam chunga rawn haw chang a ngah ta viau. A hna vanga a zin chhuahna ah nise ava rui chhe thei Sawt viau bawk a, zan riah ngai miah lo angah te pawh khan ruih vanga haw thei lo khawpin a riak zui ta fo bawk. Khatiang dinhmun hrehawm lutuk a thla khat chhung a awm hnu kha chuan zu ruih chu ngai ah rawn nei tawh in, kei chuan ka hau sim hleithei lova, ka en Mawl tawp tawh. Tichuan, Lunglei lama an va zin thinna ah hian tuna an nu nen hian va intawng in a ruih lai tho intawng leh chesual kha an ni a, fimkhur tawk nachang hre tawh hek lo le, tun hi an lo thleng ta a nih hi. Diktak a sawi chuan i Usangi vanga hetiah dinhmun a ding hi in ni a, ka khawngaih khawp mai che u. Chutihrualin, a hlimchhawn, I u thusawi ka lo awih em em lai kha chuan ka thinrim ve hle a, nang thleng thleng pawhin ka biak that peih loh phah che a nih kha. Mahse, Mama khan a tlai hnuah chauh I thiantha te hnen atang in thudik engkim kha a hrechhuak leh ta chauh sia. A ti sual tu nilo a a tuar tu ber I nih zia thleng pawhin a hre chhuak leh ta vek a, mahse, khua a lo tlai hman tawh si. Ngaihdam dil che a bultan that pui leh che pawh tum ve in a tawp nan, a nupui ruk hma lawk pawh khan in thawhna sikulah a rawn Kal a, mahse, a hmachhawn ngam leh thlawt lo che a nih hmel. Muante, kan unau hian min ngaidam la, dawt thu mai mai awih a kan lo lak thutak chiam avang khan min ngaidam rawh aw. Kan tih natna che thu ah zawng zawng pawh khan ka nau hmingin khawngaih takin min ngaidam mawlh mawlh rawh"  UDuhsangi'n țap zawih zawih chunga a rawn sawi ve takah chuan Keipawh chu ka lo insumthei tawh bik lova, ka na thar leh awn awn hi a ni ringawt e. Ka na ngawih ngawih. Tin, heng thil zawng zawng te hi a hma a sial luat vangin ka unaunu hian ka chungah ngei pawh alo thlen tir duh a nimaw tih chu ka rilruah rawn awm nghal in, thinrim rilru na zet chuan ka inhumruh leh ta sauh sauh mai a. Thil kal liam tawh zawng zawng te kha siamthat theih ni dawn hauh lo mahee vawikhat tal chu ka unaunu hi a inhmuhchhuah ve theihna tur in ka la hrilhfiah leh hlek chu a țul dawn niin ka hria. 

" Ka haw phawt ang" ti nghut in mittui tla phung Chung chuan ka tho chhuak zui ta vat a. UDuhsangi pawh chu hlauhthawn nei hmel pu Chung hian alo ding chhuak ve leh zat. 

" Um, tui deuh khan han mu la  khawngaihin he boruak hi chu rawn thar thawh tawh suh aw. Khawngaih takin Muante, siamthat leh theih eng thilmah hi a awm tawh Chuang lova, theihnghilh a țha zawk e" rawn ti ve lawm lawm mahse la inhumruh teuh Chung chuan a thusawi te pawh kha chhang let tawh lo in mahni In lam pan chuan ka chhuak zui ta vang vang zawk a nih kha. 

***************************×××××***********