A PÂR DAWN SI LO

A PÂR DAWN SI LO

BY __ Vanlalpeki Fanai

BUNG 2 NA

************

Boruak danglam takin min chiah piah takah chuan ka awmdan te hi a danglam zo ve vekin ka inhre tawh a, ka ni huih mai. Ka thian ni țhin kha tun chin ah chuan ka bialpa lo ni tawh in, ka thikthu pawh ka ti chhe ve ngam dawn ta. Haha..

A hma zawng pawh a min ngaihsakna a tih lan nasat tawh tehlul nen khan tunah phei chuan sawifiah thiam loh khawp in min ngaihsak zual a, a thikthu te pawh hi a chhe ve ta viau in ka hre nghe nghe. Hnathawh naah nise, a hun awl remchang apiangah min rawn biak a tum thin a, zin chhuah pawh ngai sela tun hma kha chuan ngawi reng in a zin mai a, tunah ve thung erawh chuan a zin hma zanah hun rei taktak rawn leng hmasa phawt in, min rawn men hrep phawt anga, chutiang a nih loh chuan a ngaih hi a țha thei thlawt lo niin ka hria.

 Zan hnih khat lek riak tur pawhin han zin chhuak dawn sela min ngai em em reng a, min rawn biak reng a tum thin bawk a, ka biak ve loh hlek te hian a rawn thinrim thin bawk. Zalen taka thildang tih ve na hun hi ka nei theilo a ni ber mai e.

Tunah chuan kan inkar hian thup bo a mamawh tawh lova, thup reng lah a țul bawk hek lo. Kan û te ve ve pawhin keini pahnih inkar chu hrechhuak ve tawhin, an nuih hi kan ti za tlat leh ta nghal a, thutak hla takah pawh hian min ngaihsak duh lo reng reng.

Hetih chhung zawng pawh hian Ramchhuanmawia khan beidawng duh lo in min la rawn birh ve tluk tluk reng tho a, tunah tak phei chuan chhuanlam pawhin a daih seng tawh lo zawk a ni a nge, kan inah te chuan rawn Chuang kai ve tawh thin in, ka u te nufa lah chu a rawn tlawn thiam em em khawp lehnghal a. Alo Kal tawh hi chuan naupang pawhin nuam an ti a, naupang mai nilo, ka u chen hian nuam an tiin, ei leh in tur nise a rawn duhsak nasa thei bawk si. Ka thin hi alo rim ve hlur zel a. Ka hne lutuk. A rawn len luh ve tak fo ah chuan lo biak loh ngawt kha thil ni thei ni bik hek lo, chhuanlam turin a daih seng tawh lo ka tih kha, phur lo leh hrehawm ti ru takin a rawn len chhung zawng chuan ka in veng ru tawh thin a, a leng rei thei bawk si ka ning thei lutuk ringawt. Tin, hetiang a a rawn len luh zan hi Hriatsanga zin chhuah hun lai alo ni ve ziah bawk a, a mak thin asin. Chutiang a rawn leng lut ve ta fo leh, ka unauten an lo biak chhiat loh vang bawk chuan keimah ah pawh a hma zawng aia rawn tlangnel thar leh in, min rawn biak reng te chu a tum ta Mai a, ka chhang tha peih ngai Chuang lo. Tin, beiseina ka Siam sak duh lo bawk. Siam sak pawh hi ka tum lo hrim hrim. Hne mah naklai a!

Hriatsanga nen Kan inzui nghet tual tual a, kan inkar boruak a la țha bawk a, midang reng reng hi kan mamawh pawhin kan inhre lo thin hial. Chubakah, kan chungchang engkim, bialpa ka nei tih thleng pawhin Ramchhuanmawia chu ka hrilh ve bawk thin a, a engahmah a thawk lo ni hmiang, a nun phung a thlak danglam phah lova, a rawn Kal uar sauh zawk emaw tih mai tur. Sawi tawh ang khan ka u hi a rawn be thiam em em a, a rawn len ve te pawh hian kei chu min ngaihsak ang taka lang tho si hian ka u te nupa a kawm tam daih zawk a, an mood tih fuh tumin an duhzawng zawng zawng hriat fai vek a tum bawk thin a, hetiang mizia a neih miau avang hian ka u te nupa tan chuan han tih chhiat phal chi a ni hauh lova, an induhsak tawn vel a ni ber ang chu. Ka ten hlawm a nia. Engemaw Chang phei chuan ka school ban hun te hi alo chhinchhiah thin nge ka hre biklo, kawngpui han chhuah chhoh rual te hian a hmel hmuh tur alo awm leh nulh thin a, be lova kal pelh mai ka tum Chang lahin min lo ko ding tlat a, mjn nghah thu a sawi leh ringawt zel. Engtinnge Hriatsanga awm loh hun hi a rawn hriat fuh chat chat zel tih pawh ka hre tawh bik lo. Hrilh tu an awm thin a ni ngei ang. An lo awm a njh taktak chuan ka u te nupa thil tih hi a ni thei mai angem. An ni lo chu rin tur dang pawh ka hre Chuang lova, an nih ngei pawh ka ring bawk.

 " A hranpa in Ramchhuanmawia hi in lo be ve thin tihna emni? Engtinnge Hriatsanga zin bo hun tak hi a rawn hriat fuh ve chat theih thin a" thinrim ru tak chunga ka han tih chuan ka u te nupa khan kei chu uluk angreng fe mai hian min rawn melh ve kar tawh a. Hetih hun hi zanriah kil lai a ni nghe nghe a, ka chaw ei thleng pawhin a tui loh phah zo in ka hria. Chutah, ka unaunu zawk chuan dawih aw angreng tak hian

" A rawn len laia kan lo biak bak chu a hranpa a biakna kan  nei ngai lo hrim hrim. Tinge Chung chu min zawh thut a. I lungawi loh hmel em em lehnghal" rawn ti zawm zat in, kei chuan ka chaw bar tur țhulh țhak hian

" Lungawi viau hranlo. Amah ka duh loh zia chu amah mai nilo, nangni pawn in hre ve vek a. Heti chunga mjn la rawn beisei ve reng nachhan hi eng nge ngaihtuah ve tawh rawh u. In chhungah nise inti tlangnel em em reng a, in lo be țha zel bawk sia, tin, Hriatsanga zin bo lai kher kher hian țan a rawn la ve ziah lehnghal. Engtin nge a hriat thin tih pawh hi ka hre duh" lo ti let duah in, ka unaunu thung kha chuan ram deuh hmak hian

" Chung te chu hriat a harsa awm lo e. I buaina a ho lutuk. Mi an rawn leng duh an rawn tlangnel duh viau te chuan a lawmawm zawk daih alawm

Anni ang mi awm thei leh dinhmun tha lutuk mipa in an ngaizwng duh che hi chu lawm viau zawk ta che! Lo be țha ve hle hle twh rawh " rawn ti leh hram in, kei chu ka thutna atang chuan ka tho zui hmak a, ka chaw thleng keng Chung hian aw khur hlak hlak in

" Ka duh ve lo. Ka phu tawk hi kawp ila ka hlim zawk. Chubakah anni ang mipa kha chu e, ka ten! Ka ten hluah hluah" ka sawi zawh rual chuan ka u khan vin deuh hlek hian

" Zomuanpui! I tawngkam kha!" a rawn ti ve țhat a. Thudang chu sawi lo mahse ka thinrimna chuan ka mittui zawk chu rwn ko chhuak in mittui tla zawih zawih Chung chuan ka chaw eina kut te chu ti fai leh zung zung in roomah ka lut nghal daih. Thinrim zet a khum chunga ka thut tlawk tlawk hnu chuan ka phone chu ala rawn ri zui a, Hriatsanga ala ni zui. Ka va han be hreh tak. Mahse, a call hi ka lak loh vaih chuan ka u te nupa phone ah leh UDuhsangi phone atang min rawn biak a tum leh dawn tho tho tih ka hrechiang tawh a, ka lak ngei a țul tihna a nih chu.

Ka mittui luang te ka hruk hul leh te te hnu chuan inthup ru tak Chung hian call pawh chu ka chhang ve ta hram a, mahse, ka lo inthup seng lo deuh nge ka hre bik lo.

" I damlo emni? Nge i țap zawk. I aw kha a dik miah lo a nia"  a rawn ti leh ta nge nge e. Hetiang em em a beng leh rilru chak bialpa hi ka nei ang tih pawh ka lo inring pha ngailo zawk.

" Ka tha. Ka țap lo hrim hrim. Tlem in ka ngai ve deuh tawh che a chuvang a niang"  ka sawi zawh rual rual chuan ngaihdan nih loh hmel fe hian

" Hmm.. Tlemte chauhin maw min ngaih bik a. Nih chuan naktuk chu ka riak tlang leh law law mai a nge. Ka lo haw lo mai ang" ava han Chimawm ngat ngat tak aw.

" I ngam leh lo haw lo la. I lo haw hun hunah ka vel tho tho ang che" lo ti let ve nghal zat in ani chu a rawn nui chhuak ta hak mai a. Chumi chin chu pangngai taka inbe chho leh in ka u tawngkam leh Kan boruak vel kha chu ka theihnghilh zui leh ta vek.

A tukah chuan Hriatsanga pawh chu hma takah rawn haw ve thei in, ava zinna lamah a chau ve hlek a nih te pawh ka rjng e, a rawn pawr haw chhap mai a. Ka khawngaih reuh lutuk.

" Vawiin chu ka off dawn a, mahse in hna ban hunah chuan ka rawn hruai tho ang che" la ti ve hram in, Keipawh chuan ka lo hnial duh ta lem lova, chubakah, mihring tlangnel lutuk Ramchhuanmawia khan min rawn hruai leh te a tum ang tih ka hlauthawng ve viau bawk. Ka hmuh turah hian rawn inlan tawh lo hram teh se.

Krismas thlen nan chuan chawlhkar khat vel chauh a awm tawh a, boruak erawh ala vawt em em hran lo hle. Khawvel pawh hi a danglam zo tawh a, sik leh sa inthlak a thlasik a thlen hunah pawh boruak uap churh hi chu ala awm thei zel tho mai. Krismas ti krismas lehzual tu khang boruak vawt nuam tak thin te kha khawiah nge maw an awm zawh tak ni ka ti. Ngaihtuah chet chet hi chuan naupanlai hun bawk kha alo ngaihawm leh țhin a ni e. Eng dangmah ngaihtuah hah lova hun leh ni kan chhiar liam ve lai te, thinlung zawng zawng a thil engkim mai kan tih leh kan hmachhawn tjin hun lai te kha, engtikahmah hian alo kir tawh awm silova, ngaihtuah pawh hi ka ngaihtuah thui ngam lo thin zawk a ni.

Tunah chuan school pawh chu khar ve tawhin chawlh hahdamna hun kan nei ve tawh a. Hunpui thlen hun chiah ka nghak tawh a tih theih ang chu. Chutihrualin Hriatsanga te erawh chuan chawlh mumal an la nei ve lem lova, krismas tak tak a thlen hunah lo chuan chawlh pawh hi an neih theih ka ring lo hial e.

" Urlawk zan leh a tuk krismas te chu kan chawl ve ang. A bak zawng erawh chu a ngai anga thawh leh char char a nimai" tjin amah lah chu ala hlim phian zui a, a hna hi chu nuam a tiin a tui chilh ve thlawt ka ti Mai. A fakawm zawk. Heti khawpa a thawk rim Chung leh chawlh hahdamna hun pawh a nei mang lo Chung hian phur takin a hna a thawk thei zel a, chau hmel leh ning hmel takngial pawh hi a lan tir ngai lo reng reng tih theih a ni awm e. Ka bialpa nimahse he thilah kher kher hi chuan ka chhuang ve thlawt.

Krismas a hnai tual tual a, Ramchhuanmawia lah kha alo lang zing tulh tulh bawk a, a rawn tlangnel lutuk tawh mah mah.

Zan khat pawh Hriatsanga chu a zin chhuah loh avangin thim hlim atang hian a rawn leng țan tawh a, chumi zan berkher chuan Ramchhuanmawia pawh kha hma takah rawn lang ve in, Hriatsanga nena Kan lo in thut chilh reng mai kha mak tih hmel em em hian min rawn thlek kual ta vel a nih chu mawle! Chutah, nui sak Chung hian

" Muantei chu bialpa i neilo emaw ka lo tia!ka va ring dik lo chhiava ve. I u te hi Ka'n kawm phawt Mai a nge" tih pah chuan nui kur kur Chung in ka u te thutna lamah a Kal zui nghal nul nul a. Zaktheilo ti fe hian ka lo melh zui ve tlawk tlawk ringawt. Kha leh chen kha a beidawn theihnan tiin ka be țha duh lo tawh a, ka biak ve chhunah pawh bialpa ka neih thu hrilh nan ka hmang thin. Chuti Chung pawh chuan hetiang hian zam lo angreng takin min la rawn țawng khum duh chu a nia le, zanin hian Hriata hi awm lo ni ngat se chu ka țawng khum duh ve hial maithei. A khawsa zia hi a ninawm piah ah a tenawm lek lek tawh ka ti Mai. Ka kham zozai lutuk. Hemi zanah tho hian Hriata chhuah hma loh chu a haw duh bik miah lova, a țhu lui ve ngar ngar. Hriata zawk khan a chauh deuh thu leh mut hahdam mai a duh thu chu sawi in dar 10 velah chuan min Chhuahsan ta hram a, a hnu lawkah Ramchhuanmawia pawh chuan haw mai a duh thu sawi ve in min haw san ta bawk. Ka ngei lutuk tihnghaihna hre silo khan rum zet hian ka lo melh ve tlawk tlawk reng ringawt a.

Khum ka thlen rual a phone Ka'n en nak chuan Hriatsanga message hi alo awm reng tawh a. Rang zetin ka en nghal vat.

" Tunge kha pa kha. Ava rawn tlangnel em em ve" tih hi lo niin, ka thaw zui nghal halh thei. Ramchhuanmawia phiangsen vang vek. A message chu reply ve vat in, ani kha chu ka u te hmelhriat leh an thian a njh thu in dawt mu hlum chu ka sawi ta ringawt a. Ka hrelo der hmak. Ani pawh chuan thudang min zawt zui tawh lo in a ngawi ve leh mai a, muttui ti a kan inthlah hnu chuan harsa ti tak hian muthilh chu ka tum zui ve ta zawk a ni.

Urlawk ni chu rawn thleng in, hemi ni hi chuan Hriata pawhin chawlhna hun a hmu ve thei hlauh a. Bazar kal nan te hun chu hmang dun ve in, ka u fate kha Kan hruai tel ve bawk a, eitur tui tak tak te ei puiin anni unau pawh chuan nuam an ti ve kher. Hriatsanga lah chuan thil min lei sak phet hi alo tum ve reng bawk a, ka hnial fithla thei hram a njh kha. Bialpa te nimahse la englai pawh a an hnen atanga thil thlawn pek dawn reng hi ka duh dan a ni ve lem lova, țul pawh ka ti hran lo. Ka piancham a thil min pek kha ka duhtawk rih viau a ni e.

" Zanin chu eitur tui tawk tawk Siam ve Ila, in in lamah kan hmang liam ve Mai Mai ang chu tiraw?"  Hriatsanga'n a tih chuan kei ka lo bu ve nghat nghat reng a, a ruk chuan ka phur ru tawh angreng fu lehnghal. A chhan chu, zanin hian ka u te chhungkua pawh hi UThana nu leh pa te in lamah Urlawk na boruak hman phei daih an tum si a, reilote chhung tal pwh mitmei ven tur awm lo kha a thlakhlelh awm hrim hrim ka ti a ni. Chutiang zelin Ramchhuanmawia pawh kha a rawn in lan loh hram ka beisei nghal bawk. Mahse, zan a rawn thlen meuh chuan beiseina te chu vawm bo ang duak hi an ni tawh mai a, ka duh loh dan hlir in thil chu a Kal zui ta tlat.

Zan tir lamah ka u te chhungkua chu chhuak tawh in, an chhuah atanga reivaklo ah Hriatsanga pawh kha eitur keng țeuh Chung hian a lo lut ve nghal a, Keipawh chu ka lo inti felfai zo ve chiah bawk.

" Dar 12 thleng te chu kan tlaivar ve thei ang chi tiraw?" nui var var chunga Hriata'n a rawn tih chuan kei chu ka lo nui ve Sen sen reng tawh a, a thut na bulah chuan rang fe hian min pawt thu nghal hnawk bawk. Insi rial a țhu dun in Kan titi pah Siam siam reng a, thu ho tak tak sawi in keini pahnih awmdun ve hi chu kan thu leh hla a ho thei em em a, kan țawng zawi thei bawk si. Hrechiang ve lo tan chuan thu ril lampang hlir sawi dun te pawh hi kan nih ve duh hmel viau. Chutia thu ho mai mai sawi a kan lo nuih leh kar kar thin lai chuan tuemaw hi rawn Kal ve leh in, a rawn ri zui phar phar leh ta nghal a, Hriatsanga nen chuan thawm lo chhuahna lam chu hawi rual dun vat in, karei!  Ramchhuanmawia a lo ni lej tak tak tawh!

" Muantei chu zanin na na na chu kan pahnih chauh in hmang dun ve ang kan ti emw ka tia! Ava mak dawn ve" hmai uang miah lo hian a rawn ti lut ta bawrh bawrh mai a nih chu! Ka țhu țha hle hle lai pawh chu ka tho chhuak zawk thei a, Hriatsanga pawh kha rawn inperh tho ve nghal in, Aw hriam leh rum angreng tak si hian

" Thianpa, tuna I sawi zawh chiah kha eng nge a awmzia ni a? Min han hrilh chiang deuh ta che" tih pah hian Ramchhuana chu mitmeng rum angreng takin a melh pah ngar ngar reng bawk a. Ramchhuana pawh khan zam hmel pu duh bik Chuang hauh lo in alo la melh let ve kar reng mai. A zaktheilo hi ka ti ve thlawt a ni.

" Ka hrilh tawp ang che thianpa, I Bialnu emaw tia duh tak a ilo kawp ve he nu hian maw a bum mai mai che tih hi hre tawh rawh! Tin, a chhungte pawhin kei hi min duh sa hrim hrim a, ka phatsan a ka biak duh tawh loh te hi an hlau zek zek teh mai a nia! Chuan, eng chiah nge ka sawi tum chu i hrethiam tawh em le!? " a sawi zawh rual chuan kei ka lo insumthei tawh lo. A hmai ah chuan chiang zet a beng zui țhuai in, ring fahran leh fiah țhak hian

" Iva zaktheilo ve a. Kan inkar tih chhiat tum hian theih tawp ilo chhuah ve ngam a maw? Hre rawh! Engti khawp pawhin ka chhungte hmang hian țan rawn la mah la e, nang kher hi chu chatuan pawhin ka duh phah Chuang lo ang che. Min Chhuahsan teh!"  lo ti zui ve tuarh tuarh in Ramchhuanmawia pawh chu a ngawi zui ve Mai bawk a. Mahse, a hmel landan ah erawh kha chuan zam hmel chhete mah ka la hmu ve Chuang hauh lo nia. A zaktheilo fumfe ka ti Mai.

" A țha alawm. I tih tlat te chuan ka kal mai a ni ang chu" ngeiawm zet a nui sâwng Chung hian min Chhuahsan ve ta hram a. Ka thaw zui hawk thei.

" Kha mihring kha tunge ni ve ziah a" rawn ti vin hlar tu Hriata lam hawi chuan ka inher zui ve vat a. A mitmeng ah khan thinrimna leh lawm lohna tamtak ala cham bang tih pawh chiang takin ka hmu ve thei hial e.

" ka sawi tawh kha. Ka u te thian a nia, min zar buai reng a tihnghaihna vak pawh hi ka hre tawh lo. A chungah khan that ka chhuah duh lo Chung pawhin min beidawnsan duh silova, engtia tihtur nge ka hre tawh lo"  ti bwrh bawrh in thutthleng ah bawk chuan ka țhu thla leh hnawk a. Ani pawh chu a rawn țhu ve leh mai.

" Um a pawi lo. Ka tan hian I rinawm tih ka hria a, ka tan chauh I awm bawk thin tih ka hre bawk a, hei hian min ti lawm tawk viau a ni. Ka duh chu maw, rinawm dun reng thei Ila in phatsan lo in hma lam hun chauh thlir dun thei bawk ila, tute pawhin min țhen hran chu tum rwh se, keimahni pahnih hi kan pawimawh tawk tih hre hmasa phawt Mai ang aw. Kei aia hausa leh dinhmun tha zawk mipa I tawn hunah kei hi min kalsan daih lo ang tiraw? "  rawn ti sap in, ka kut te chu a hum zui leh vang vang a, keipawj chu ka lo bu ve nghat nghat reng mai.

" Nang in min thlauh thla a nih loh chuan ka kalsan theih che hi ring duh suh. Chân che hi ka duh lova, ka tum lo bawk"  lo ti let ve in, zawimuang hian ka hmui ah chuan a rawn fawp zui leh ta vang vang phawt a. Boruak pawh chu tlem in a zangkhai leh ta deuh e.

Chumi zan chuan dar 12 thleng chu thu dun ve in a eitur rawn ken ang ang te pawh kha kan Siam dun a, kan ei bawk a, kan hlim zui veleh ta viau.

" Pawnlam boruak chu a hrisel dawn lo em mai. Tihian in chhungah inkawm mai mai ang aw. Nge ni, mut I duh tawh zawk" a rawn tih leh chuan ka la mu duh lo tih entirnan rang fe hian ka lu chu ka lo thing ve nawk nawk reng a, a nui zui sak.

" Chuti chu lo Kal rawh. Ka lo kuah lum ang che" tih pah a min pawt hnaiin, a awm ngheng chial chuan ka bei ve ta thlap a. Ka zep lo. Kei hi zan mengrei theilo chi ka ni ve hrim hrim a, dar 12 a rik tawh dek dek hi chuan mut chhuak hian min rawn tuam hlup hlup tawh thin. Tunah pawh hian mut chhuah vangin ka mit te chu an thip țan leh der tawh a, ka meng hleithei tawh lo chu a ni ber e. Rin lawk ang tak takin khatia min kuah lum tak viau ah chuan ka lo muhil ta ngei a ni chek ang chu, ka harh leh nak chuan ka khumah hian puan sin thlap in ka lo mu fel diam tawh a, khua nise a var iarh tawh lehnghal. Krismas a ni ta! Phur ru em em chungin room atang chuan ka pen chhuak a, e khai! Sitting room sofa pakhat chungah chuan Hriatsanga chu puan pan angreng tak sin Chung hian alo muhil ve reng tih ka va hmu ta a. Ava han zialo thin tak. Khaw vawh tawh tehlul nen engtinnge saw tiang sawn zankhua a alo muthilh theih zawk ka ti. Min kuah lai khan ka lo muhil ta daih si a, min tih harh hlau in min haw san hreh chuan tihian rem leh rem lo in mutna alo insiam chawp tih chu ka hrethiam ta mai. A muhil hmel, fiah leh țha zet mai chu ka en ta ngawt ngawt a, ka lainat ta riau. Ka puansin chu va la leh sawk sawk in dimte hian ka sin thuah tir ta ngawt a, harh Chuang silo in a rawn tal zui ve dat dat thei. Ka nui zui sak ringawt.

" Hmeltha pa" ti a phun chhuak sap in a hmui ah chuan dimte bawk hian ka zu chuk sak leh zauh a, eirawngbawl turin choka lamah ka luh san zui ta a ni.

Tukthuan ei hun hma in ka u te chhungkua pawh kha an rawn ri lut ve nak nak hlawm a. Naupang pahnih te lah khan thawm dim nachang pawh hre lo lek hian sofa chunga lo muhil mek Hriatsanga chu an chil zui bawrh bawrh mai a, a Chung ah te an țhu thul.

" Sakawr!" an tia, an chil harh zo ta vek mai.

" E.. A pa Hriata muhil tui lai in va chil harh zo vek alawm. In va â mai mai tak aw" ka u in a rawn tih lang lang lai chuan Hriatsanga pawh khan la mu reng Chung hian a chunga thu mek naupang pahnih te chu alo chhaih nui ve iarh iarh tawh a, ka u thusawi te kha chu ngai pawimawh ang pawhin a awm lem lo.

" A tlai tawh a, duh aiin ka lo mu rei zawk. Nizan lam te in va hmang nuam maw" lo ti zui ve zat in, ka u nen chuan rei tak chhung chu an han inbe leh te te phawt a. Chutah, rawn tho chhuak thut Chung in

" Ka zu haw ve tawh a nge. Ka chhungte pawn chaw ei an duh ve tawh ang. Inkhawm ve ngei ka duh bawk sia"  nui var var chunga min rwn melh in a tho ta sawk sawk a, a puansin te a thleh that leh  te te hnu chuan min hawsan zui ta nghal a ni.

A chhuah hnu reivakloah chuan keini chhung pawn chhung inkhawm te hmang leh in, tukthuan chu kan ei zui ve ta a. Chutah, chaw bar laklawh lai takin ka u bawk khan thu ninawm lam hlir a rawn sawi chhuak leh ta pek.

" Nizanah Ramchhuanmawia ilo beng a nimaw!? Iti awm ang lo hlemai" rawn ti deuh nghat in, UThana nen chuan amah chu mak tih hmel fe hian Kan lo melh rual deuh zawk tawh a. Ka hne zozai thin teh e.

" A rawn hrilh leh thlap che emni?" ning zet a nui hul hak Chung chuan Keipawh in ka lo ti let ve vat.

" Hrilh ang chu. A chunga ilo Khawsak dan kha thil lawmawm tak ni hek lo mawle. Ching tawh ngai reng reng suh"  a sawi zawh rual chuan ka lo au zui veleh țhat a.

" Hriatsanga'n kut alo thlak lo kha a vannei zawk ngawt alawm! A rawn luh rualin tawngkam mei nei leh ngeiawm lutuk a rawn hmang nghal a, a zaktheilo hrim hrim"

" Chupawj nise, kut lo thlak kher kha eng nge a țul na. Lo ngawihsan mai ula, in be peih loh a njh leh a haw ve leh mai dawn a. Khatiang khan mi pangngai kan ti tur a ni lo hrim hrim" a rawn tih leh rual chuan

" Mi pangngai chu khatiang khan mi in chhungah an khawsa ngawt ngai lo. A pangngai lo tawp a nih zawk kha. Sawi pawh sawi tawh suh ka ten a nia" tih pah a dawhkan ka thawhsan rual chuan ka u bawk khan

" Mi pangngai lo te iti vel elaw!? Nang zawk inih kha mi pangngai lo chu. Mipa rintlak leh innghahna tlak in an rawn beisei ve che a, hetiang hian ilo dawng sawng thin ang maw. Tuna j mipa kawp mek ai hi chuan a laktlak deuh lo ang maw!" a rawn tih leh tak kher ah chuan insumthei tawh lo in vin zet mai hian

" Ka u" ka ti vin zui ta țhawt mai a. UThana pawh khan alo khap ve vat bawk. Ka unaunu hian eng rilru nge a put zawh tak ka hrethiam thei lo. Sum duhna leh it na hian a tibuai zo ve ta Mai em ni ang. Tunhma khan hetiang mi hi a nih ngai pawh ka hre lo asin le. Ka hrethiam lo takzet.

Chumi ni chu inkhawm pawh inkhawm peih lo in ka nawm sam loh thu Hriatsanga bulah chuan ka chhuanlam a, ka mu nileng ta zak. Ka nat vanga ka mittui far te zozai hian ka u thinlung chhung ril kha thleng phak Sela, a rilru thleng mai khan han khawih ngil sak se ka va ti tak em. Eng aiah nge ka unaunu hian sum hi alo Pathian tak em em mai le ka ti. A nulat chhung zawng khan nula fel leh inthlahrung mi zet, țawng pawh țawng tam em em lo leh, midang tih lawm pawh thiam lem lo, ama thatna turah takngial pawh midang be hmasa hreh chi hmeichhia kha a ni ve thin si a, hetiang teh hrep a a rawn inthlak danglam ta hi chu mak ka ti ve thlawt. Ka sawi bang theilo. 

Inkhawm ban rual rualin Hriatsanga chu ka bulah a rawn Kal lehnghal chat tawh a. Ka unaunu in a chungchang a sawi duh dan engkim vang khan ka lung hi ala awi hleithei lova, a hmel ka hmuh rual te hian lainatna hlir in ka khat zo vek. Engpawh thleng rawh se, a zep bo theih chhung chu ka zep anga, he pa hi ka thlah phah hlek lo bawk ang. Chuti maia awlsam a thlah leh tur khawpin ka hmangaihna hi an nghet lo hleinem le. Ka vuan tlat dawn. 

" I lo ziaawm deuh tawh em" zaidam taka min rawn tjh chuan mittui tling piau Chung hian ka lo en ve reng ringawt a. Ka khap zui ta fak fak bawk. 

" Tinge. I țap em ni?" rawn ti lehin, ka sam te chu dim angreng tak hian a rawn chul pah hliau hliau lehnghal. Ka hnuk no hi a chhuak leh thei takngial dawn in ka hria a. Ka țah belh si, ka ning! 

" Țap lo ve. Ka tha tawh lutuk a nia. Chuan, zan lam inkhawm leh i tum em" lo ti let vatin, ani chuan ka kut chu nghet angreng fe hian a rawn hum țha leh sauh sauh mai a. Ka lo la melh ve kar reng. 

" Tum pawh ka hrelo zan chu. I bula awm hi nuam ka ti zawk e" a ngaihawm tawk lek a nui san san Chung hian alo ti ve leh a. Ka nui ve ta sak mai. Ka chhungte an rawn haw ve tak si ah chuan thudang pawh sawi dun thei tawh  lo in choka lamah kan thu dun ta reng a, ka unaunu pawh khan a lang ah chuan a be chhe ngai hran lem lo. Mahse, a ruk tak erawh in hnawk sak a ti țan tjh erawh chu a mitmeng leh a tawngkam atang te khan a hai theih loh bur. Hei tak hian thlamuang leh awm nuam in min awm tir hleithei lova, alo lan tawh hi chuan tlem in ka lo tim ve leh lekk lek thin. Mahse, ka inthup thei a, tih lan lah ka tum lem lo bawk a, a zia viau rih e. Ramchhuanmawia pawh kha a thawm a reh rih a, ka u pawhin tunah chuan Ramchhuanmawia thlavang hauhna thu leh, Hriatsanga hmuh hniam na thu a rawn chhak chhuak tawh ngai rih lova, a thawventhlak hrih viau. Chutihrualin kan boruak hmasa te khan chhungril ah min la chen chilh Miau avangin chuti mai in theihnghilh theih an ni tawh lova, ka unaunu thung chu țha tak pawhin ka la be thei rih tlat lo. Ka sual vang a ni em? Ka luhlul lutuk zawk nge, ka hre bik lo. Mahse, harsa hi ka la ti ve rih em a ni. Tin, thisen zawm, chhul khat chhuak unau kan nihna ah hian inhuat hlen a indo ren run pawh a țha ka ti bik Chuang lo. Tun hunah erawh hi chuan ka luhlulna te hian min la delh hneh ve em zawk a, chuvang chauh chu a nih ka ring. 

" Naktuk atang kum hlui thlah ni thlen hma zawng chu hna lamah bawk ka zin chhuah a țul leh dawn a, ka ngai leh ngawt ang che" zawi angreng fe a rawn tiin, ka kut te chu a khal pah neuh neuh reng bawk a, kei lahin a kut chet vel dan ngawt chu ka lo thlir ve reng ringawt bawk. 

" Cham rei leh a ngem"  ka han tih chuan reilote chhung chu a ngawi zui ta dat phawt a, a rawn tlak deuh karh hnuah chuan

" Reilo turah ngai ang. Khua hi tha se la kawng chhia te a awm lem loh chuan a lehlan theih vek tawh a"  a rawn ti veleh ta a. Engemaw Chang hi chuan a hnathawh hi thlah daih sela ka lo ti thin. Hetiang hian khual khuaah dâk lehkha phur kual reng reng in hun an hmang a, kawng chhiat leh khaw chhiat alo intawn fuh Chang phei chuan hmelhriat awm Miah lohna khuaah te riah leh lawp lawp an țul chang a awm bawk thin. Chung hunah chuan ka ngaihtuah zual bik thin em em a, tunlai Khawvel chhe tawh tak leh, sual tamtak a pun tawhna Ramah hian tih hreh neilo mihring hi kan tam tawh si a, tiin hetiang hunah bik hi chuan ka ngaihtuah zual ngawih ngawih thin a. A tlangpuiin hetianga a riahna a sawn Chang hi chuan mahni khumah pawhnise zan mu hi ka nghet theilo tlangpui ziah niin ka hria a, ka zan mu tha lo hi ka lo damloh phah ve lek lek thin. 

Tichuan, a sawi ang tak tak khan a tukah chuan khaw var rual deuh thaw in khaw thlang lam chu a thawh pui pa nen khan an pan dun leh ta a. Ka ruak zui huai nimai te hian ka hria e. Nileng a a hmel hmuh tur awm lo tur te, a motor khalh chhung zawnga biak leh theih loh tur ngawt te chuan min ti nguai leh zo vek tawh a, phurna leh tha tho na reng reng hi ka nei lo te pawh Kan ti thei ang chu. Mahse, tun țum a zin chhuak chu vanneihthlak takin an va thang rej lo hlauh a, tin, a vanneih lehzualna em em pawh aizawl an rawn thlen hnu a ruah baw hawk vang te pawh kha ka ti ta mai. Ni lo se chuan kawng chhia leh leimin neuh neuh a awm leh ngei dawn tih hriat sa a ni a, ngaihtuah pawh hi ka ngaihtuah thui peih lo zawk e. 

" Zanin chu ka chau lutuk a, ka mu hma mai dawn aw" rawn tiin, a zin haw a rawn thlen rual rual chuan min rawn call nghal a, Keipawh in sawi buai neilo hian ka lo phal sak ve ta mai bawk. Tui taka mu tura ka thlah hnu chuan call pawh chu ti tawp ve vatin, kawngka kik thawm hriat tur a rawn awm nghal Zat a, ka u Fanu Mimite-i khan rang zet hian kawngka chu ava hawn sak nghal vat. Chutah, ka hmuh peih loh em em mai Ramchhuanmawia bawk kha rawn ri lut leh hlut tawh in, tun țum phei chu thian ala rawn nei zui emaw ni. Amah chauh pawh kha hmuh hne tawh naklai hian, sawi pawh hi ka sawi tha peih lo. Ka kham. 

" Mimite, Khawnge i nau. Hei, eitur tui tawk tawk ka lo ken sak che u a" rawn ti lut duah in, ka u te nupa lah khan an lo dawngswng tha lehpek em em bawk a. Ka ten hlawm a nia. Hausakna leh sum in a pawh khawm chawp vanga inlungrual mai mai an nih zia hi an inhre hlawm lo tihna emaw ni. 

" Helam ah lo țhu ru, hei Muanpuii pawh ala meng ve țang țang a nia" ka u chuan nelawm thei ang ber tura rawn tiin ka thutna lamah chuan a rawn phei pui ta diah diah hlawm a. Melh pawh hi ka lo melh peih lo. Ka hmu lo der hmiah. 

" E, hei hi maw thianpa in chhum lo chat lova alo sawi chhuah fo chu. Sawi rik fo tham khawpin alo hmeltha tak bawk a nih hi"  a thianpa zawk khan a rawn ti deuh duah lehnghal a, a rukin ka lo ner ve leh sawk sawk thin. A thiante bulah hian in ngaizawng angin min lo chhuah hial thjn lo maw le ka ti. Zahna lah hi a tla chham ve ropui mai sia. 

Ka bul chiah ah chuan an thian dun in an rawn țhu thla ve a, tawlh sawn duh pawh ni Ila tawlh sawnna tur reng reng a awm tawh bawk silo nen, ka taksa si kher kher a rawn thu zawk Ramchhuana chu in sik tir loh hram tumin țang țeuh Chung hian ka țhu tluan ve ta parh mai a le! A hahthlak duh ngei mai. Kei nen tak chuan inbe zui em em lo mah Ila ka u te kha an la awm ve reng avangin ka tan chuan vanneihna a ni ringawt a. Vanneihthlak lehzual turin hun rei pawh leng lo chuan dar 9 velah min haw san ta hlauh mai a, ka thawl zui sawng sawng thei hian ka hria. Ka mu zui nghal hmak bawk. 

Hun chu a Kal ngai reng in a Kal a, keini erawh school te Kan chawlh tawh avangin nitin mai hian in chhungah a țul țul tihtur hmabak kan ti ve thung thjn a, chutihrual chuan Hriatsanga erawh chu a hna lamah khan ala buai tluang em em reng a, Aizawl atanga khaw hla lem lo takah te hian zin kual in kum hlui thlah ni tur a thlen hma zawng chu a buai kual Zak Zak a ni ber mai e. A chau thei ngawt ang ka ring. Mahse, hun rei a ni lo. Kan kum hlui sual leh bawlhhlawh te, kan țah leh hlim ni te her liam pui tawh tur chuan hemi kum a tana ni hnuhnung ber tur chu thlang kâwlah alo her liam dawn ta reng mai. A hma atanga alo sawi lawk tawh ang khan Hriatsanga pawhin hna lamah laklawh a nei leh tawh a, loh theih lohin zin chhuah chu a țul leh ta tlat mai. 

" Zanah ka lo thlen leh hman chuan kan leng dun ve dawn nia. Ar te pawh kan kaang ve anga" ti ve in, tukthuan eikham ah chuan Champhai lam chu pan in min Chhuahsan leh ta vuah vuah mai a. Hemi ni tak hian khua a chhe bawk nen, ruah chu a buak hian a rawn baw leh hawk hawk thjn mai a, ka ngaihtuah takzet tawh a ni. Rilru a tawngtai mawlh mawlh reng in him dam taka rawn hruai let leh tur chuan ka tawngtai sak a ni ber ang chu. Amah Pathian hnenah engkim hi ka hlan tawp mai a ni. 

Chawhma chhung zawng chu ka u nen inchhung tifai in kan buai a tih theih a, chawhnu lamah erawh bazar turin an nufa chuan min Chhuahsan ta daih thung. Hetihlai hian a pasal UThana thung kha chu inah a awm ve lova, an inpui lamah zan hun an hman dan tur te rel felin alo VA awm lawk ka ti Mai. Hmun dang ah hmang chhuak vek hlawm teh se. Hriatsanga a rawn thlen hman phei chuan mahni chauh in lo awm Ila, emaw, UDuhsangi te bulah a lo haw hun nghah pahin lo zu tal ve mai mai Ila a nuam zawk ang tiin mahni ngaihdan te chu ka han nuihpui leh vur vur thin a. Ka hlim tawk viau. 

Zanriah tur buatsaih laiin ka phone chu a rawn ri ta ral ral mai a, ka en nak chuan Hriatsanga a lo ni reng mai. Phur zeta call ka lak rual chuan

" Hello, I hre thei em. Ruah a Sur hnem lutuk a helam chu a bengchheng khawp mai" amah zawk kha a rawn ti zui nghal mawlh mawlh a. Ka nui ringawt. 

" A nih dawn kha. Heta țang pawhin ruahsur thawm chu ka hre thei alawm. In lo let leh tawh em?" kei leh kei lo angin ka au ring ve khawp mai. A hriat hleih theih loh mawlh kha ka hlau em a tin ni. 

" Aw let leh tawh e. Mahse hei, kan la thleng hla hman lo khawp mai. Champhai kan Chhuahsan atanga hla vaklo ah kawng chhia in min dang pek a, a rei leh tawh. Signal lah hi a chhe char char bawk sia ka rawn hrilh lawk theilo zawk che a nih kha. Chaw te in ei tawh em? " rawn ti leh zung zung in kei chuan chaw ei ka Siam mek thu ka lo hrilh ve vat a. A zialo ka ti hle bawk. 

" Chuti engtinnge ni dawn ta a. Zanin ah a that leh hman a rinawm em? " ka lo tih leh chuan a ngawi zui deuh vang vang phawt a. Chutah, 

" Hman mahse zanrei lam a ngaih tawh hmel. Pawi ka ti khawp mai. Kawng hi chhe lo se la chuan Aizawl pawh Kan rawn lut tep tawh tur a nia, pawi ka ti lutuk. Min hrethiam mai a ni ang chu tiraw"  zuai raih a a rawn tih chuan min hmu thei lo tih theihnghilh in ka lu chu ka lo bu zui ve nghat nghat reng a, ka hre chhuak leh thut. 

" A pawi hleinem. He lam chu rawn ngaihtuah hah duh suh. Nangmah kha inngaihtuah tha la, in thuam lum hram hram rawh aw. Zanin riahna tur leh pum puarna tur te kha in ngaihtuah tel bawk dawn nia" ka lo tih ve leh chuan a pawm tih hriat tak hian

" Awle. A awm thei mai ang. Chuan, ka ngai tawh lutuk che nia aw"  rawn ti thawp leh sat in kan inbiakna pawh chu kan ti tawp zui ve ta a. Ka ruak lehnghal huai mai nia. Amah kha ka ngai zui veng veng thei. Chaw ei thleng pawh chuan ka chak loh phah zo vek jn ka hria a, phurna reng hi ka neilo a ni ber e. 

" Tinge Hriatsanga chu. Kawng lakah an chhia tihna emni?" ka u khan rawn ti ve in, kei lah chuan amah pawh en lem lo hian ka lu chu ka lo buk khum ve ta nghat zawk a. Chaw pawh chu ei loh aiah tak tak ka ei ve hi a ni deuh ber e. 

" A va mak ve. Champhai kawng te chu a țha tawh lutuk an ti emaw ka lo tia. An lehlan zung zung thei tawh kha a ni sia"  rawn ti veleh in an pa zawk khan alo chhang let ve ta hlauh mai a. Ka thaw huai. 

" Hetiang boruakah chuan Mizoram kawng hi a țha rei thei tak tak lo a ni e" lo ti ve in, dik pawh ka ti. Mak zozai ka ti bawk. Um, engpawhnise zanin hian a rawn thleng hman dawn ta lo a nih pawhin mahni chauh a hun khawh ral dan țha ka hre tawh a, movie ka en ve tawh mai ang chu tiin mahni leh mahni chu ka inhnem phur chawp a ni ber e. 

" Mahni chauh a awm chu i khua te alo har lutuk a ngem. Rawn Kal ve Mai la" an chhuah dawn a ruai ah ka u chuan rawn ti leh in, rang fe hian ka lo hnial ve thung a. Min sawm lui duh ta bik lem lo hlauh. 

Laptop ah movie en tur hmet chhuak sauh sauh in eitur thahnem fe nen room lamah chuan ka inchhawp lut ta rawih mai a. A khât tawk hian Hriata nen pawh chuan kan in text pah ve reng bawk. Mahse, a signal a chiangkuang lo tih hriat takin ka message te chu a dawng har thei em em a, a hne ve tawh ngawt ang chu. Ka khawngaih zawk e a. Chutia chips vel ei pah a tui ti zet a movie ka lo en dauh dauh lai chuan kawngkapui kik thawm a rawn awm thut mai a! Ka phu chiang lutuk ringawt. Mahse, thawm pawh ka chhuah ve hma hauh hian pawnlam atang khan Ramchhuana ni ngei tur hi a aw ka hre fuh ta a. Ka ner zui sawk thei. 

" Muante, Keimah Ramchhuana. Kawngka hi lo hawng la, Ila meng em" rawn ti lung lungin ka thil en lai pawh chu ka hmet tawp zui ta thuai. Thawm chhuah duh lo in ka thutna ngai ah chuan chet pawh che tha ngam lo hian ka țhu ngawi ta reng ringawt a, Chutah, a thawm ngaichang a ka lo ngawih veng veng lai chuan laptop dawhkan a ka dah ka phone zawk kha a rawn ri chhuak ta phut mai a! Ka va han phu nasa tak. Rang zet hian phone chu ban nghal in amah kha alo la ni zui! Reject silo hian phone zawk chu ka hmet silent ta ringawt a, thawm reng reng chhuah ka tum lo. Tin, saw mihring saw zanin berkher ah hi chuan in chhungah hian luh tir ka tum lo hrim hrim bawk. A teuh lo hi a ni tawp mai. 

Vawi engemawzat min rawn call hnu pawh a ka lak duh tak siloh ah chuan beidawng in a haw ve ta nge nge a ni ngei ang. A reh zui ve ta hmak. Chumi hnu pawh chuan thawm chhuah țha ngam lawk lo in hun rei angreng fe chu ka la thut ngai reng in ka la țhu deuh ngar ngar reng a, ka phone chu ka bih tluk tluk reng ringawt. Chutah, ka u hnen atang zawk khan call dawng leh in ner sak sak Chung hian ka chhang ve ta hram a. Min rawn hrawk nghal khur khur lehnghal. 

" I muhil tawh em ni? Engah nge Ramchhuana kha ilo biak that duh miah loh a! I chanchin min rawn zawt a, ilo be țha duh lo ngei a nimaw. Iti awm ang lo thin em mai"  rawn ti nghal hluk hlukin kei chu ka lo chek deuh hlak hlak tawh. 

" Tun ang hun, mahni chauh a ka awm lai lehnghal hi chuan rawn Kal miah lo mahse a pawi ka ti hleinem. U, engkim j hriat vek tawh kha. Ka sawi tha peih tawh lo ka hne! Min awm tir ve mai mai teh u" ka lo tih let tak zek ah chuan ka u chu a hma ai mah khan a rawn țek leh ta sauh mai a. 

" Țhen ang che! Kha mihring Hriatsanga kha thlah la, then nghal ang che! Ka sawi tam tawh lo ang, then la a nimai. Ka nu te pawh ka be fel vek tawh!"  rawn ti nghal zung zung in ka thin chu alo phu zui ve dup dup tawh a. Ka u hian eng chungchang nge a rawn sawi tih chu ka hria, mahse, engvang a khatia rawn ti ta chiam nge a nih ang ka hrethiam thei lo. Hetiang em em hian Ramchhuanmawia hi makpa atan alo duh ang tih hi ka ring pha ngai lo. Nun hi infiamna atan a hman tur a nilo asin le. Hmangaihna hlawh chhuah harsat zia te hi ka u hian a hrethiam pha ve lo tihna nge ni ang. Eng ah nge kei, a pianpui a unaunu ngei mai hi hetiang a min tih kual tak chiam chiam le ka ti. 

Ka u thil rawn sawi avanga mittui tla zawih zawih chung hian laptop dawhkan bawh Chung chuan thil chi hrang hrang ka ngaihtuah kual a, a țha ber tur ka hrethiam lo a ni. Ka chaw mawlh vek tawh bawk. Mahse, ka thinlung hian tunge a chelh a nga, tunge a thlan ang tih erawh chu ka hria e. Chu chu ka zawm anga ka thlauhthla hek lo bawk ang. Tichuan, ka ngaihtuahna tamtak te chu chauh puiin hriat loh kar hian ka lo muhil zui ta barh barh mai a. 

*********************