HOTEL JOHN__1( ROMANCE/CRIME)

HOTEL JOHN-----1(Romance / Crime) 

Vanlalpeki Fanai

******************

" I thawhna tur hotel bul lawka hotel hlui ve tawh tak room pakhat chhung ah khan ruang an chhar a njh awm chu!" rawn ti tu ka cousin Ramthari chu phawk fe hian ka lo melh tlawk tlawk reng a. Mak ka ti ve viau. Tak tak nilo hram se pawh kati. A chhan chu hetiang ruang chhar tih vel nena inhnimhnaih lutuk hi ka duh ve lova, ka rap ngawih ngawih.

A rawn sawi thuak tawh ang khan an ruang chharna hotel bul chiah hotel thar leh changkang fe pakhat ah chuan receptionist tur nula an mamawh tih hria in dilna ka va theh lut ve ta kha a nia, tichuan vanneihthlak takin ka dilna kha an lo pawm ve ta hlauh bawk a, Receptionist hna chu thawk țan tura lak fel ka lo ni ve ta a ni. Tin, vawiin hi ka hna țan ni hmasa ber tur niin, hna kal tura ka lo insiam ve mek laiin tikhan ka cousin Ramthari khan thu thin thawng tak kha min rawn hrilh in, ka thawhna tur hotel chhunga thil thleng chu ni hran lo mahse hmun inhnaih taka awm an nih avang erawh chuan ka huphurh phah ve hlek.

Tichuan, insiam zo zung zung in ka hnathawhna tur   'Hotel John' lam pan chuan ka chhuak nghal nal nal a, ka ni khatna tur chauh alo ni ve bawk nen tlem chuan ka zam ve hlek in ka inhria. Ka ti ril te pawh hi a khur ru der der thei nia. Ava țul lo thin tak.

Hotel lian leh changkang tih hriat em em mai kawtah chuan ka ding zui ta vang vang phawt a. Pui ka ti rilru hle. Nia ka thawhna tur hmun mahnise he hotel hi chu ka hriat tirh ata tawh khan pui ka ti ru em em tawh a, ka thawk chak thei viau bawk. Tunah chuan tihian ka suangtuahna leh duhthusam thenkhat te chu thleng dik chho in a chhunga lut thei tur leh thawk thei tura ruat ka lo ni ve ta reng a nih hi. Ka phur lutuk hi ka zauthau lek lek tawh mai.

Zawimuang hian chu hotel ropui tak leh fai em em mai chhungah chuan ka han tei lut ve țan ta a. Rin loh lutuk hian ka thutna tur dawhkan bulah chuan staff thenkhat niawm tak te hian an uniform nen min lo hmuak thlap a nih kha! Ka awmdan pangngai kha ka theihnghilh zui vek a, ka lai chhe teuh tawh kher.

" Chibai u. Ka hming chu Rosalind Lalhruaitluangi a ni a, Helai hmuna thawk ve thei tura thlan tlin ka han ni hi ka lawm in ka hna te pawh tlin tak leh rim takin ka thawk ngei ang tih ka sawi duh a ni" tia inhmelhriat tirna ka neih zawh hnu chuan anni ho khan an kut chu rawn beng zui dar dar in, hlim hmel an lantir theuh bawk a, ka tlangnel nghal Sawt thei niin ka hria. Tichuan, introduction zawh hnu in mahni hna theuh ah Kan lut zui ta sang sang hlawm a, Keipawh chuan ka dawhkan tur chu luah ve nghal in ka rilru zawng zawng hian ka tawngtai pah ve reng a, ni e, he ka bultan ni atanga chesual lo tur leh, a neitu te mit tlung taka ka thawh theihnan pawh Pathian hnenah ka dil zui ta tluk tluk.

Diktak a sawi chuan ka graduate hnu khan receptionist hna hi chu ka rilru ah a awm ngailo hrim hrim a, zirtirtu ka nih loh vek pawhin company lian hnuaiah ka inziak lut ve anga tih ka ngaihtuah thin. Mahse a pawi love, tuna ka hna pawh hi a hniam Chuang lova, hlawh nise a țha thawkhat viau dawn bawk.

Rinai takin hotel thar chu nimahse kan lun zui ve ta phian reuh a, ka thlen hnu atang khan thut chawlh mai mai ka la nei meuh lo tihtheih a ni. Chhun chawlh laiin a neitupa ber Pu Sangvunga pawh kha rawn tlawh ve zuaih in a haw leh vat thung a.

He hotel hi mi hnen atanga ka lo hriat dan chuan Pu Sangvunga hian a fa neihchhun, a fapa tana a din leh a kut a a dah ni tel bawk in an sawi a, mahse, a fapa erawh chu a hmel takngial pawh ka la hmu ve hauh lo nia.

" I chau tawh em?" rawn ti tu lam ka han hawi nak chuan he hotel a room service hmeichhe pakhat kha a ni tih ka hre nghal mai a. Min lo nuih sen Sen mai. A hmel chu țha ka ti takzet bawk.

" Chau hran love. Nangni zawk" lo ti let ve in, a bulah chuan room service ve tho mipa hi rawn tel ve in, ani pawh kha tlangval hmeltha tak ni ve in ka hria. A sang tha phian lehnghal a. Anni pahnih nena thu dang dang sawi a kan lo titi barh barh lai chuan kawngka bula duty security te kha pawn lam ah tlan chhuak thut in, car nalh zet pakhat lo thleng thar chu an lo buaipui nghal zung zung ta mai a. Ka lo thlir deuh vang vang. Chutah, ka dawhkan bula ding reng room service Mahruaii khan zawi ser sawr zet mai hian

" Hotel neitute fapa chu amah saw a nia. Alo lut anga i hmu mai ang" rawn tiin, kei chu engamah hma hian ka thin alo phu zui nghal zaih zaih ringawt a. Eng chu ka hria nimaw. Ka hlauthawng ni ta berin ka hria e.

Chutah, he hotel neitute fapa, an fa neihchhun ni bawk chu rawn pen lut zan zan in a bulah chuan a secretary niawm tak hmeichhe pakhat leh patling pakhat te chuan in keng bawr luk chung hian an rawn zui ve dat dat mai a, ngawi reng in Kan lo thlir thap rjngawt. Chutah, kan zawn an rawn thlen lai chuan ding deuh dat in an fapa ngei mai chu a rawn hawi phei ta a. Kan mit a intawng chiang kher. Ka țim zui sawk thei nia. A secretary bulah chuan

" Vawiin mikhual neih tawh dan kha receptionist thar sawn alo record fel em  ka en duh a nia" ti hmuk in kei chu min melh leh tawh lem lova, a kalsawn daih. Tichuan, a secretary pawh khan nui var var chunga min rawn pan ve nghal in list chu min rawn dil a, ka lo pe nghal vat. An Kal liam rual rual hian keimah a zawhna awm țeuh te chu Mahruaii leh Tanpuia te hnenah khan ka zawt zui nghal mawlh mawlh mai a. An lo nui tawp ringawt.

" A secretary Tluangpuii leh Hotel manager Pu Ropuia te an nih kha. Thawhpui an nuam dun lutuk. Mahse, amah, sir John-a ber hi a khirh ve thei reuh lutuk a, a ninawm lek lek thin" ner nang nang chunga Mahruaii'n a rawn tih chuan he hotel neitute fapa hming chu ka hriat phah ve ta chauh a. A hming te chu nalh lo ka ti ru ta kher. Țul lo thin asin. Tin, kan sawi hmaih hauh loh tur chu, he hotel chhunga hian spa lampang dah tel ve a ni a, chu chuan a hranpa in receptionist leh manager te, staff te pawh a nei tel teuh bawk a, hotel chhung hi alo lian țha ve bawk nen a nuam in a pui em em tih mai loh chu sawi ngaihna ka hrelo. Chu mai bakah, restaurant pangngai anga kal pui ala ni lehzel bawk a, spa tih loh ah chuan kei hi  day shift receptionist ka ni tel vek a tih theih a, hna a tam dawn in mawhphurhna a sang dawn khawp mai. Pu ber lah kha a hmel leh in thuam dan, an sawi duh dan atang reng reng pawhin a duh khirh hmel nasa mai bawk si a, ka fimkhur viau pawh a țul dawn a ni e.

Chutia, tih leh mai tur pawh hrelo a ka lo hawi kual veng veng lai chuan ka dawhkan chunga telephone kha a rawn ri ta thut pek a. Ka phu zawk thei hial. Kut khur ru dar dar chunga la kang nghal in pangngai thei ang ber chuan lan ka tum ve a,

" hello" ka tih rual rual hian

" Manager roomah lo chho lawk ta che. Hmanhmawh deuh in aw" hmeichhe aw no nalh tak hian a rawn ti ta thut a. Ka thin chu alo phu zui leh dup dup tawh. Phone chu dah in hmanhmawh fe hian ka dawhkan chu ka kalsan nghal a, mahse, khawiah nge manager room pawh chu a awm a!? Staff ka hmuh remchan hmasak ber kha ko ding ringawt in manager room awmna chu ka zawt chawp ta rih phawt a. Ava hahthlak thjn tak.

" Chhawng Chung ber number 10 naah aw. Elevator saw hmang rawh" nui sang chunga rawn tiin, lawmthu te ka hrilh leh thuak thuak hnu chuan a sawi ang khan elevator lam chu ka pan nghal a. Chhawng Chung ber chu khur lo chauh in ka pan ta a ni. Sawi tawh ang khan hotel lian leh ropui tak a ni a, a Chhawng awm zat rjngawt pawh hi Mizoram angah chuan a vawikhatna a ni hial em aw ka ti. Chhawng 10 lai a awm tlat.

Tichuan, Chhawng 10 na ka thlen rual rualin manager room chu ka han zawng chawp leh lailawk a, ka hah tawh takzet a ni. Mahse, vanneihthlak tak hian zawn hmuh chu alo harsa lo hlauh a, ka hmu ve Mai.

Kawngka chhah țha zet chu kik karh karh in reilote ah an rawn hawng ta vat a. Ka thaw zui deuh hawk thei. Tluangpuii khan nui sang chunga min lo chhawn var in, chu room chhungah chuan hotel manager Pu Ropuia leh Sir John-a te kha an lo thu ve ran tawh bawk a. Ka zam tulh tulh. Chutah, ka hmel an rawn hmuh rual rual hian Sir Johna chuan a bula kal tur in min la rawn hui tak deuh deuh lehnghal a. Ka hreh ru lutuk ringawt.

" Eng nge ni ta ka pu" amah pawh melh țha ngam mang lova din zum zat pah chuan ka han ti chhuak ve hram a. Ani lah khan uluk leh chik mangkheng hian mjn lo melh ve reng mai bawk si nen, ka hmai te hi a sen vek tawh hial in a nia ka rin.

" Receptionist thar maw. Tak taka hei, vawiin chawhma chhung a I hnathawh te Kan lo thlir vel a, I laktlak dawn riau in Kan hria. A lawmawm khawp mai. Tin, hei hi hria la ka duh a, I hna hi thil awlsam leh palzam mai mai chi a ni dawn lova, I hmuh ang hian keini hotel chu a lian tham em em a, heng zawng zawng hi I kut ni ve in, lut leh chhuak pawhnise I duty chhung na na na chuan  felfai taka I record thlap thlap reng a țul dawn a, I hriat vek tawh kha. In daih loh zual chang pawh I nei dawn tih ka hria, Chung hun a tan chuan i partner tur midang pakhat vel hi chu kan lak belh pawh a țul ngei ang. Chutihrualin hotel thar, nangpawh mi thar ila ni ve a, in kaihruai tur in la awm Chuang lo bawk nen nang hian tlin takin I hna hi lo thawk ve phwt mai la, nakinah I kaihhruai tur chu kan la lak belh dawn a nia. I thawh that dan a zirin I hlawh pawh hi ala pung chho ve zel anga, bonus I dawn Chang pawh a awm ang tih kha hre reng la aw. Sawi ve duh te inei em? " a sawi duh a sawi zawh hnu chuan min rawn zawt let lehin kei chuan ka lu chu ka lo thing deuh mat mat reng a, a hmel kha ka en țha ngam thlawt lo. Ni e, a hmeltha in a zahawm tehreng em a ni. A palian in a inthuam dan a zahawm khap bawk si a, chuta kara chiang leh uluk fahran mai a min la melh kar reng phei chu zam awm duh vet vet tak a ni e.

" Nei lo e sir. Chutihrualin, hetiang a hotel changkang leh Chang tlung lutuk a ka thawk ve thei hi ka lawm in lawmthu ka hrilh nghal che ni zawk rawh se" zawi tea ka han tih ve chuan a lu chu lo bu zui deuh nghat in, bung nghut hian ka kal theih tawh thu chu min hrilh ve a, ka melh rum hman tep. Mahse, ka dinna hmun hi khawi hmun nge tih ka hre chiang ve em a, ka insum hman leh ta hram. Chu room ka Chhuahsan dawn thleng pawh chuan Sir Johna khan uluk zetin min la thlir zui reng tih chu hre tho mah Ila hawi let ka tum hran lova, ka hrelo der vel mai mai. Tin, he tih lai tak hi chuan zam na engmah ka nei hran lova, ka inringtawk ve viau bawk in ka hria e. Nuam ru duh tak a ni.

" I hna thar chu a nuam dawn bawk em?" In a ka haw hnu in chu zawhna chu ka chhungte hnen atang ka dawng ngun malh malh hle a. Ka nui deuh var var ringawt.

"Nuam dawn e. Mahse, ka shift hi chhun lampang a nia, rin aiin kan lun ve bawk nen a hahthlak vei phian. A rei anga ngaiah ka nei ve Mai ang" lo ti let zung zung in ka inthlak zui sawk sawk a. Zan lam shift receptionist te ka khawngaih lawk. Zan lam phei chu emergency deuh deuh a tam hmel thin si a, a hahthlak zual ngawt hian ka ring.

" Pu Sangvunga te hi an thawk tha ka ti khawp mai. An ni hotel ang te chu Aizawl mai pawh nilo, Mizoram angah te chuan a lian ber a nih hmel a, heng te te te hi kan ram hmel lanna zel a nia, an ti felfai phian lehnghal bawk nen, ropui hi ka ti taktak asin aw" zanriah kil laia ka nu in a rawn tih chuan ka pa kha a rawn chek vei hlak a. Nuihza insum hmel hi a pu deuh reuh lehnghal.

" Chutiang chu a nih rual in, anni ang hian Kan hnathawhna lamah eiruk tur thahnem tak te hi nei ve ta ila, duh bawk ila, kan ropui ve thei tho lo maw!?" ka pa zawkin a rawn tih chuan phawk hrâ Chung hian ka pa chu ka lo en ve vat a.

" Pa, an eiru nasa I tihna emni? " kei chuan lo ti ve vat in, ka pa bawk chuan

" Nasa e. Nasa lo nise sawrkar hnathawh hlawh pangngai atang hetiang pui pui tih hi thil harsa deuh mai a nia. Loan tamtak nena tangkawp in an bei tih hi ka hre ru deuh tlat. Pu Sangvunga hi chu hman ata tawh khan a eiruk nasat zia hi mi sawi hlawh a ni tawh a, mite hian an ti chhe ngam lo mai mai alawm" rawn ti leh in, mak chu ka lo ti tulh tulh mai. Nia, Mizoram angah chuan an thla hlawh pangngai atanga hetiang ropui han din thei tur hi an awm meuh in ka ring lo. Sumdawng lian leh hlawk kumkhua thin te tan pawh an thil tih ang zet hi chu a harsa ve tho tho in ka ring. Engtinnge an tih kha? Ram hruaitu a that lohna ram ah mi rethei kan tam an ti emni kha? A nei te lah hian an neih belh thur thur a, an duham em em reng tho bawk si.

" In hotel bul chiah hotel room chhunga an ruang chhar kha Engtin nge maw hma hi an lak tak zel dawn le. Amah lah kha civil mi niin, a nupui nen an intih thiam loh vanga khata riak chhuak ta kha niin an sawi lehnghal a. Tun lo pawh hi kha hotel chhungah khan ruang an lo chhar tawh tho niin an sawi a, tun hi an khar tir ta rih niin ka va hre ve" ka pa bawk in a rawn tih leh chuan ham bai bai chung hian ka lo chhang let ve a.

" Um, an khar rih dawn. Tiam chin awm lo in an tih kha. Chubakah, an hotel saw a țawih ve țan tawh a, lut chhuak lo chhinchhiah thlap thlap tu tur receptionist mumal nise an neih lohna a rei tawh a, a remchang chang sawn an ziak fel mai zel e an ti bawk a, an kalphung a felfai lo ve em a ni. An khawngaihthlak zawk" kei chuan lo ti let duah in, Chung zozai ka hriat ve theih dan pawh chhun lamah khan Mahruaii'n min hrilh nasa em a, ka hriat ve hmel zo vek.

" Nizan lam te i mu țha thei meuh em aw" min rawn ti thut tu an awm avang chuan phu deuh zawkin ka awmdan ka hre chhuak chiah a. Eng thil nge ka ngaihtuah tih pawh hriat loh hian ka dawhkan chungah chuan kiu nghat in ka hma lam chauh chu ka lo melh vang vang niin. Ka zak kher. Khatiang a min rawn be tu lah kha a neitu te fapa Johna kha alo la ni zui bawk nen, alo thlen lai pawh ka lo hre hauh lo a nih chu mawle. Ka hawi chhuah chuan a tih fo thin angin uluk em em hian min lo melh leh tawh, a zam awm duh thin teh e.

" Aw.. Ah mu țha chu a ni ve Mai ang chu. Nang zawk Sir" lo ti let ve var in, a mit chu a la sawn ve ta chauh. Nui deuh var var Chung hian

" Nizan chu kan buai reuh khawp a, zan lam receptionist te lah hi kan run tirh atanga rawn thawk ve tawh mahnise an hna hi an hneh sawh lo ru riau bawk nen, ka rawn hre chhuak rum rum thei che alawm. Mahse, a tih ve theih nawk nawk zel e" la nui sang chunga rawn ti ve in kei pawh chu ka lo khi ve var var reng a.

" Min rawn ko tawp mai lo a nih chu. Zanah nise eng em em mah tihtur ka nei lova" tih thu ka sawi lai chuan chiang tawk a min rawn melh leh Chung hian ngaihawm zetin a han nui leh ta var var a.

" Khai a, chuti em em te chu. Um, engpawhnise mikhual kan nei dawn in ka hria, tha takin ilo thawk zel dawn a nia" ti zung zung Chung chuan in Chung lamah min chhoh san zui a. A ruk tak hian ka lo ui ru ve veng veng thei. Ni e, a hmeltha tak leh a pian nalh zet te kha hmuh theih in awm reng mai se tih hi ka duh a, ka en ning thei mawlh lo. A.. Eng thil nge maw ka lo ngaihtuah ve vak vak hi le. Ka phu lo  lutuk ringawt. Lo phu ta tehreng pawh ni Ila ani chu dan phalloh leh Pathian pawhin a phalloh eirukna a inhnamhnawih fapa a ni tlat si a, ka phu lo pawh hi ka lawm zawk e, ti tawh mai ang.

Pathian tanpuina zarah ka hnathawh chu ka tluang in malsawmna ka dawng ve zel a, tih sual pawh neilo leh chetsual pawh neilo in ka la kal ve thei zel. Chutiang zelin sir John-a nen pawh khan innel em em tihtur chu la ni chiah lo mah Ila, kan in nel ve tawh viau tho a, an sawi dan takin tun dinhmun atan chuan thawk thar ber ka la ni rih bawk nen, a biak chhiat loh awmchhun min ti hial thin a, a nuam dangdai ve riau. Mahse, min biak chhiat ngai loh chhan erawh chu min duh a min ngaihzawn vang lam nilo in  ka hna hi ka ti felfai a tih em avanga min duhsak ve satliah mai a nih pawh ka ring. Ka phu tawk a ni lova, kei ang nula level hniam lutuk hi chuan an ni ang hi chu an phu ve ngai dawn lo hrim hrim ni te pawhin ka hria.

Ni khat pawh record ziak fel a ka lo buai ve map map laiin min rawn din chilh a, min rawn be leh thut. Kei lah hi biak thut ka dawl lo si, ka ning tlat.

" Ekhai! Receptionist I nih kha, biak thut hi I dawl lo thei em mai" nui var var chunga a rawn tih chuan ka lai chhe hneh lutuk a, ka tum deuh vuau reng ringawt. Amah bawk chuan

" Ilo thlen hlim atang khan I la thawk ngar ngar a nia aw. Chawl ve lawk rawh. I ril te a țam em?" rawn ti leh zung zung in, kei chu ka lo ngawi deuh vang vang phawt a. Ka riltam tawh zia erawh ka hre chiang viau. Eitur hlir mai hi ka mitthla ah chuan rawn lang nghal zut zut in chicken momo chu a lang lian ber thung a, ka ei chak lutuk ringawt. Mahse,

" Aih tam hran love. Ka chau hleinem Sir. Heihi ka record zawh chuan reilote ka chawl ve zuaih thei ang" lo ti ve in, ani chu ngawi reng hian a tei chhuak zui ta nulh ringawt. A ngaihna ka hre lo lehpek kher. Mahse, ava thang bo tak vang vangah chuan ngaihthat lohna pawh nei hran lo in ka thil tih lai bawk chu ka lo chhunzawm leh mai a, ka zo tep tih ah hian dawhkan ah chuan thil engemaw ni hi a rawn tla thla tawp mai a, eitur dahna box ni ngei pawhin ka hria. Ngawi reng a ka han hawi chhuah nak chuan amah bawk khan nui var var chunga min lo melh leh vang vang tawh in

" Ei phawt rawh. Ka hnuaia thawk ni mahla riltam taka I awm hi ka duh lo a nia" rawn tiin, ka thil tih laklawh lai te chu min dah fel sak ta zung zung mai a, ngawi reng hian makti fe in ka lo en ve reng ringawt.

" Sir, hetiang chu" ka ti ve hman chauh tih in a lu chu a rawn thing ta nawk nawk mai.

" Ei phawt tur. Ei zawh ah heng hi chu i ti leh chauh ang" ti zung zung in a office lamah min chhihsan leh ta daih a nih kha. Ka thlir zui ta vang vang ringawt.

Tichuan, nuam lo ti ru zetin a thil min rawn pek chu ka han la hnai ve ta hram a. Ka'n hawn nak chuan mak tih lutuk vang hian ka mit sulh lo chauh hial a ni. Ka ei chak em em leh ka mitthla a cham reng chicken momo ngei mai kha duhtawk a eitur in alo hawn teuh a nih chu mawle! Lawm lutuk vang hian ka biang te hi a rawn sa zui ham ham thei a, ka bing mup mup reng mai. Muangchang leh inthlahrung ru taka ei țan in, ka ei chakna a rei ve tawh bawk a ka ei hnem kher lehnghal. Ka zak hnuhnawh zawk. Chutah, ka ei laklawh lai chuan room service Mahruaii leh staff dang te kha nui var var Chung hian ka thutna lamah chuan an la rawn Kal diah diah zui a, thil awmzia chu an man nghal vek tih ka hrethiam a, ka Zak ru veng veng thei. Ka rin ang ngei ngeuun Mahruaii ber lah khan min nuih hak hak Chung hian 

" Eh! Vannei deuh hi chu kan awm chiang a ni" rawn tiin, midang te pawh kha an lo nui zui deuh ham ham hlawm a, ka Zak tih chauh loh hi chu sawitur em em pawh ka hre tawh lo. 

" Night shift receptionist te chuan an thik dawn mang tak che e aw. In chan hi a in that hleih em mai. Pep pep mai a" Laltanpuia khan rawn ti kher in, engtinnge night shift receptionist te chungchang chu a hriat zawk pawh ka hrelo e a. 

" Engtinnge min thik dawn tih i hriat theih. Alo duat ve viau maithei asin" nui rah rah chunga ka han tih chuan Tanpuia kha alo ner ve nasa ta mai a. 

" Teuh lo lutuk. Night shift ah hian ka unaunu a thawk ve a room service ve tho in. A rawn sawi nasa thin alawm. Sir John-a hian a ngaihsak lem lo a ti. A hmeichhia te lah khan an beisei nasa thei sia, an hmuh fuh tawh hi chuan chhuanlam Siam in an lo ko ve sek zel a niang. Ka huat zawng tak" kei tih loh midang zawng chu an lo nui deuh hak hak reng hlwm a, kei chu ka nuih pawh hi a ti za ve hran lo. Ka khawngaih zawk. A chhan chu, Sir John-a te ang tlangval  smart leh hausa bawk si hi chu kan phu lo tih hi hria ila, hnim hnai vak lo law law thei Ila Kan tan a tha zawk. Tunah pawh hetia chhun eitur min rawn lei sak ringawt pawh hi ka tan chuan hlu vet vet tawh tak leh theihnghilh theih loh tur a ni tawh hrim hrim a, ka lawmna hian a tawng sang hle a tihtheih ang chu. 

Chhun reh lai tihtak ah, mikhual rawn lut thar pawh an tam vak rih lova, thawk tute pawh Kan indaih rih viau. A țhen te kha chu kalsawn tawh mahse la mjn rawn kawmngeih zual tu mi tlem te nen chuan la titi khawm mai maiin thu ho deuh deuh hi kan sawi a kan nui thler leh duai duai thin. Chutah, Mahruaii bawk khan zawi ser sawr fe mai hian

" Awi, he dawhkanah hian nang chu țhu lo la kan sakawlh-a khian min rawn hau leh daih tawh ang chu. Day shift receptionist hmasa, thla khat pawh thawk hman lo nu a rawn thawn thin lai phei kha chuan tihian kan va din chilh a, kan inkawm ve zuaih thin a, hetia ring deuh hlek a kan nuih Chang te hian min rawn hau vat zel. Chuan, din khawm leh awm khawm hrim hrim te kha a remti ngai lo mawle. Min hauhna tur ringawt kha a zawng ka ti Mai. Ka ngei thei lutuk. Mahse, hei I rawn thawh ve chin ah chuan kan nuih rin deuh pawhin min la hau ve miah lo chu a nia. A mak tawp" rawn ti zui duah in, kei chuan an thil sawi te hi rin tur nge rin loh tur tih pawh ka hrethiam lova, ka nui liam  ve ringawt zel.

Tichuan, kan inkawm khawmna chu duhtawk in mikhual thar te an rawn awm leh nak nak takah chuan mahni hnathawh tur theuh ah Kan kir zui leh ta sap sap hlawm a, thildang reng reng chu ka ngaihtuah hman leh tawh lo a ni ber. Tlai a rawn thlen meuh phei chuan ka chau tan tawh angreng viau a, hna ka la ngah ve bawk si nen buai tak tak lai hi chuan hawi pawh hi kan hawi chhuak țha hman ngai meuh lo a tihtheih awm e. Mahse, reilote ka han hawi chhuah ve zeuh lai chuan thil hmuh ka va nei leh ta ngei a. Ka mit te chu ka la sawn nghal zawk thei. Mi chi hrang hrang tei fua fua reng na karah chuan kil khat atang hian sir John-a ngei mai khan kei chu kut kuangkuah chungin uluk fe mai hian min lo thlir reng a ni tih chu ka va hmu fuh thut a nih chu mawle! Ka bing zui nghal mum mum thei a, eng thil nge maw a hriat thin le ka ti. Min ti lai chhe thei lutuk em mai. Tichuan, hawi chhuak ngam tawh lova minute 20 vel zet ka kun leh ngar ngar hnu chuan nuam ti bik chiah lo in ka han hawi chhuak leh ta hram a, ani kha chu hmuh tur alo awm tawh lo hlauh e. Ka thaw zui huai thei nghe nghe a nih kha. Ka bulhnai a a rawn awm hian nuam tihna in min tuam vel thin mahse, awmdan tawk ka thiam lo leh țhin si a. Engtia awm zui tur nge ni dawn le. Khawnge a Kal tak daih ang tih ngaihtuah paha amah. Ka lo zawn ruk deuh lai chuan telephone kha rawn ri thut in ka phu zui leh zawk. Rang taka ka han chhan nak chuan amah ngei kha alo ni leh daih a. 

" Khatin mi zawng vak vak suh!" rawn tiin, a rawn nui hmasa leh te te phawt a, ka Zak tulh tulh. Sawitur pawh ka hrelo. Ka ngawi reng ringawt. 

" Tak tak a, I puar maw. Momo kha I ei duh ka ring a ka rawn leisak ve ngawt che a nih kha. Ka ngainat ber a nia" rawn tiin, a thil rawn sawi chuan ka thin hi a ti phu leh zaih zaih tawh a, ka lo ngaithla kar ringawt. Chutah, sawi ber tur pawh hrelo a ka lo ngawih tak reng avang chuan ka hming ngatin min rawn ko ta a. Ka suangtuahna ram ata chu ka harh zui zawk thei. 

" E aw Sir, ka puar lutuk e. Momo kha a tui ka ti lutuk ringawt. Momo hi chu ka favourite a ni ve hrim hrim a" Ka'n tih tak duah ah chuan ani pawh kha lo nui deuh hak hak reng in

" Kan inang chiah a nih chu. Dine out naah pawhh momo hi chu ka order tel ngei ngei thin" rawn ti ve leh in ka lo nui chhuak deuh hak thei. Momo kan ngaina ve ve, ava nuam tak em. Remchang hmasa berah ka siamsak anga ka la ken sak hrim hrim ang ti rilru neuh neuh in Kan inbiakna pawh Kan ti tawp zui a, ka thaw zui halh. 

" Aw Lalpa, he mihring hi ka ngainat lutuk loh na turin mjn tanpui teh. Ka inven Sen loh hun a rawn thlen vaih chuan kan pahnih tan pawh hian a țha dawn hauh lo a nia. Chutiang bawk in ani pawh hian min ngaina lutuk lo se, min hnaih viau lo se ka duh. Ka phu lo ka tih tawh kha Lalpa" tiin Pathian chu ka thian biak ta hmiah hmiah. Ka mangang țan tawh taktak alawm.. Kan pahnih hi chuan engtikahmah a rem ve thei dawn lo tih hi ka Chiang a, a hnuai a hnathawk angin min en mai mai se, Keipawh in ka boss angin en hle hle thei Ila ka duh ber. Thildang hi rawn tla zep lo thei se ka duh ngawt mai. Chutihrualin kei a kara min rawn ngaina der ve em em tu lo hnar kha thil nuam leh tih chi ber a ni Chuang hauh lova, ka mizia lah a ni ve hek lo  bawk. Boss a ni emaw, chhiahhlawh hniam ber thleng pawhin ni rawh se, min ngaina a min hnaih duh tute ka hnar ngai lem lo. Ka tana mi tha lo an nih erawh chuan ka kalsan vang vang thin thung. 

" Eh! Hna thar I neih atang hian biak I harsa ta Sawt riau in ka hria" Lalawmpuia leh mai mai țhin hi a. Hemi ni hi Sunday a nih bakah, ka off day a nih angin in lamah chuan hmuh tur ka awm ve a, eng lai mai pawh a kan in hrik ni țhin Lalawmpuia pawh chu a rawn lawr ve leh tawh. 

" Rak rak lo khan lo Kal mai mai teh. I dam țha maw?" nui sang chunga lo ti ve in, ani pawh chu a tih dan ngai te hian a rawn zai lut leh ham ham tawh a, zaithiam emaw a inti  tlat thin hian min ti hah ve thei khawp mai. 

" Nge i inkhawm loh a" rqwn ti zui leh hlut in, kei chuan ka chauh zia thu leh a lehpek atang chuan inkhawm ngei ngei ka tum tawh thu chu lo hrilh ve in a nui deuh sak. 

" Hna thar I nei a Pathian hloh phah nan I hmang dawn a ang ta riau. A tih chi loh viau ang aw. Ti daih ila, in hotel chu ala thar that bakah Mizoram chhung bik angah chuan a lian ber leh Chang tlung ber a ni rih mai lo maw. A er phak tur an awm pawh ka la hrelo. Midang tan cho na tha tak a nih dawn hi ka lo tia" rawn ti deuh duah in a dik zia thu chuan ka lo chhang let ve ta luam bawk a, he pa nen hi chuan kan titi hi a rual in Kan sawi dun leh nghek zel. Inkawm awm reng pawh Kan ni e. 

" Off day te i hmang nuam em?" min rawn ti tu Sir Johna chu en in ka kiai ve sak. 

" Ka mu nileng Zak mai" lo ti liam puat in, ani pawh chu a rawn nui ve ta kar kar mai a. Rei pawh indin chilh tawh lo hian a office lamah min kalsan zui daih. A mak ka ti. Ka hriat miah loh laia amah ka lo en zui leh vang vang thin te hi, ka inven hneh lohna lam tak niin ka hria a, hrehawm pawh ka ti ve thin tho. Amah ber ber hian a hrethiam ang tihte pawh ka hlau ru ve zek zek thin alawm. 

Chutiang ringawt ngaihtuah Chung a record ka lo ziah fel mawlh mawlh lai chuan telephone kha rawn ri leh thut in, ka phu leh zawk. He telephone ri hi ngai ag ka nei thei thlawt lo a nih ber hi a, ka ning. 

" Hello, hotel John ah Kan lo lawm a che" tiin aw ti puam deuh țalh Chung chuan ka tih fo thin dan ang khan ka han ti leh a, mahse, 

" Keimah. Office ah lo chho lawk teh" rawn ti chang fak in, ka thin te chu a phu zui leh ta dup dup mai. Tun țum chu ni dang ne a țawng dan ki a danglam tlat a, a nem lo hle. Tichuan, a thupek angin huphurh ru tak Chung chuan a office lam pan chuan ka pen chhuak ve ta a. Eng tak chu ni ang maw tih ngaihtuah pah te chuan ka thin hi an phu chawl theilo reng reng. 

" Eng thil nge ni ta sir?" tiin a dawhkan hmaah khan ka han ding zum ta zat a, a hmel te chu ka melh țha ngam meuh tawh lo a ni ber e. 

Chutah, 

" Receptionist kan rawih tawh leh rawih mek te zingah hian I laktlak ber niin ka lo hria a, mahse, tih sual lian tham tak i nei ta tlat!" Chang deuh fak a a rawn tih chuan amah chu phawkk fe mai hian ka lo melh nghal hrawk thei a, a thil sawi kha mak ka ti taktak alawm.. 

" Ka tih sual chu min hrilh rawh sir. Ava mak awm ve mawle" lo ti let in, ka aw te pawh chu a khur lek lek theiin ka hria. Ka sa nghal pap pap thei bawk. Thla khat dawn lai chu ka lo thawk ve tawh a, tih sual neih hi ka duh loh bakah ka fimkhur ve viau thin asin. Ka hlauthawng ta kher mai. 

" Saturday record ah hian room number 54 hi book lawk sa thlap angin ziak leh chhinchhiah a nia, mahse en teh, a rawn book tute hming leh tuna room luah tute hmjng hi a in ang tawh miah lo! Tun mai khan call ka dawng zo chiah a, a book hmasa tute hi an lawm lo hle tih hi lo hria la, i duh chuan en ve rawh hei" tiin ka hmaah chuan record bu chu a rawn theh thla zui nghal tawp bwk a, mjn melh run reng mai bawk nen a hrehawm duh takzet tawh. Kut khur der der Chung hian record bu chu ka lo ban ve Mai a, Saturday record ka han en nak chuan a sawi ang taktak khan room no. 54 chu a rawn book lawk tute leh tuna room an pek tak te hming a lo in ang  ta reng reng lova, tin, rawn book tute hian ka hnenah booking hi an rawn ti nghe nghe. Lawkin, an rawn sawi dan kha chuan Monday a tan a rawn book niin, chu chu vawiin hi a ni si a, mahse, nimin kha ka off day a nih angin hna ka chawl a nih kha. Chuti chu hei hi tu tihsual ber nge ni thei ta ang. Kei chu ka ni lo chiang bal tihna a nih chu. Lawm lo ru taka hawi chhuak in, amah chu ka han melh ta kalh mai a, min lo la en ve reng a nih chu mawle. 

" Sir, booking hi chu ka hnenah an rawn ti ngei alawm. Mahse nimin chhun leh zan lama duty ten ang angin nge an lo dawn sawn ka hrethiam tawh lo. Heta a in record dan ah chuan nizan dar 6:00 bawr vel a rawn lut an nih hmel viau a, ka duty loh zan a ni tlat" tiin ka tih sual a awm ve ta lo bawk a ka Confi zui hle. Ani lah chuan thudang pwh sawi tawh lo hian chiang leh uluk em em in min lo la melh ve reng mai a, a țawng tawh dawn lo emaw ka tih hnuah zawi sup hian

" Kal rawh. Țha takin I hna zu thawk tawh ang che" a rawn ti duh lek nia! Thil felhlel awm hi ka duh loh avangin tunah pawh hian chin fel dan tur min hrilh se, ka ti hreh hauh lo ang. Mahse, thu dang engmah a sawi dhh miau si loh chuan amah a chin fel theih a inring a ni hmiang tiin ngawi reng chuan ka kalsan ve leh ta zawk a, nuam chu ka ti bik hauh lo. Helai hmunah hian thla khat em pawh ka la thawk tling lo a ni a, tihsual neih hi ka duh lo asin le. Rilru a tawngtai leh mawlh mawlh in Pathian hnenah ka tihsual tawh loh nan ka han dil tha leh a, hrehawm ka ti takzet. Nilengin ka mood a fuh theih loh phah zo a, engkim mai hi a ho zo vek ni ta ber te hian ka hria. 

" Chhun lampang chu treat tu I nei țha leh dawn em?" min rawn ti tu Mahruaii chu melh zawk in, za lo fahran hian ka han nui ve ta suk a. A za thlawt lo a ni. 

" Neilo ang" muang ban charh a ka lo tih ve lai chuan Mahruaii bawk khan min rawn mitmei ta zauh zauh a. A hawina lam ka va en ve nak chuan sir John-a kha mitmeng rum ul Chung leh ding zet a Kal in, pawn lamah chuan vung zet hian a chhuak tlang ta daih a. Mak chu ka ti ru ve kher. Hetianga kan in nel ve deuh hnu phei hi chuan a lut leh chhuak reng reng hian pawimawh neilo pawhnise min rawn tlawh hmasa hram hram thin a ni si a, vawiin erawh chu a dan a dang ta tlat. A office ka Chhuahsan hnu atang khan a hmel ka hmuh hmasak leh berna a ni ve a, min la ngaihsak duh miah lo zui. Ka thil tihsual kha a țha lova, a pawi viau tih pawh hre tho mah Ila hetianga han inbiak duh loh phah thutna a tan erawh hi chuan a ho ka ti ve deuh. Mihrngte chuan chet pelh Chang leh tihsual chang kan nei vek a, hrehawm ka tihtur zia te hi a hrethiam ve miah lo nge le ka ti. Ka țah te hi a chhuak ut ut thei hial niin ka hria. Nuam pawh ka ti tawh love a. Nuam pawh ka ti tawh love a. 

" A be miah lo che mawle. Nichin a a rawn koh che khan in inhau deuh tihna emni?" Mahruaii pawh chuan mak a ti ve hle tih ka hrethiam. Kei lah chuan ka dar chu lo chhin ve ak in, 

" Tihsual chhete a lo awm palh a, chu pawh chu ka off day a thil thleng kha a nia, Keima tih vek emaw tiin min ngei deuh pawh a ni mahna. Ka hrilhfiah vek tawh Chung pawhin a hrethiam theilo reng reng. A hrehawm duh khawp mai" ka ha tih chuan Mahruaii pawh khan alo ngaithla uluk ve hle a. A lu te chu alo bu ve nghat nghat. 

" A that ve leh mai dawn chu. Amah hi buaina dang ngah ve hrim hrim a nia, hetah pawh a rawn awm rei ngai miah loh hi" a rawn tih chuan kei lah in rang zet hian 

" Eng buaina dang nge i sawi chu?" ka lo ti let vat a. Ani pawh chuan min chhang țha ve duh zel. 

" A.. Tunah chuan a pa kut leh ke ber hi a ni tawh a. A pa chu i hmuh ve tawh kha. I rawn thawh hnu hian helai pawh hi vawikhat bak ala rawn tlawh tawp nang. A nu phei chu ala rawn in lan lo hrim hrim. An sawi thawm ka hriat dan phei chuan a nu hi a hriselna a țha vak tawh lo a nih hmel a, a tuallim viau tawh lo a niawm e. Tin, a pa hian a fa neihchhun chu tiin tihian a fapa kutah engkim hi a dah zo vek tawh a, zirna kawng ah pawhnise Sir John-a hian a pa duh dan ang khan a zir sang ve khawp mai. Chung atang chuan hmelhriat tha te lo nei chho in phai leh foreign vela khawsa țhang tih takah thil changkang alo hmu tam tawk bawk a, tihian ropui takin Mizoram a a vawikhatna a tan hetiang hotel ropui leh budget turu lutuk hi an rawn din chhuah theih phah ta a ni an ti alawm. Pianpui unau neih hi a chak ve thei ngawt in ka ring " rawn ti leh daih in amah chu ka lo melh ve kar reng a. Ka bu zui ta nghat nghat. Hetiang hotel ropui lutuk din thei tura an thawhrimna leh sum leh Pai an peipun dan vel te hi Mahruaii hi zawh chhuah kher pawhh ka tum hran lo. Ka pa sawi kha ka awih a, ka ring zawk rih tlat. Keini ang ram rethei leh hnuaihnung lutuk ah hi chuan budget turu lutuk hian eng thil mah a tih taktak theih loh a, fair taka ti tur phei chuan a ngaihna ala awm lo tih hi ka hrechiang viau. 

A office a min koh luh ni atang khan sir nen chuan boruak tha hi kan nei hleithei rih meuh lova, kan la inbe miah lo bawk. Ni dang ah chuan ka hmel a hmuh rual khan min kal pel mai lo in chhuanlam fahrah te te Siam khan min rawn dinchilh a, min be ve hram hram thin kha a ni si a, tunah erawh min hmelhriat loh kal pelh mai maiin min hmu lo der thin ni zawk hial hian ka hria a, min pehhel a tum ti Ila a dik ber ang chu. Kha thil vang khan hrehawm ka ti ve tho a, nuam lo ka ti ve ngawih ngawih tho tih hi a hrethiam duh lo nge le ka ti. A ni tel chuan ka ngawi chawi tual tual a, sawi tur pawh hi ka hrelo. Tin, phurna chhetemah ka nei tawh lo bawk. Eng chu ni lo mah Ila ani hian hnathawh a ti nuam ve thin a, phur leh zangkhai taka ka chhuah ve fo thin nachhan pawh kha amah hi a ni tih inhrethiam se, eng angin nge min ngaih ang le. A hmel chu nitin in hmu ve fo thin mah Ila a ruk hian ka ngai ngawih ngawih reng a, ka hmuh fuh Chang te pawh hian ka lo thlir leh veng veng zel. Sawi tawh ang khan ani erawh chuan min hmu țha duh lo der in min Kal pel vawk vawk reng a, min rawn tlawh pawh tawh ngai hek lo. Tin, tunhnai hian ka ngaihbel nge chu ka hre lova, a hmel hi a hlim lo in a mengrum deuh ul reng nimai hian ka hre leh ta nghal. Keimah vang chu ni lo turah ngai phawt ang. Kei vang mai mai a midang an hlim loh hi ka duh lova, mi zawng zawng hi inrem in awm se, hlim takin hringnun hmang hlawm Sela, hma lam hun eng tak nei theuh bawk se tih hi ka duh bawk. Kei ve mai mai vang hian tute mah hian tluk chhiat phah lo se, hnunglam pan lo bakw se ka duh. Chutiang zelin sir John-a lung tih awi nan hian Engtin nge thupha ka chawi ang ka hrethiam tawh lo. A țul kher a ngem tih pawh ka hrethiam Chuang lo. 

Remchang tak hian thurawn lakna tur Mahruaii chu chhun chawlh laiin ka bulah a rawn Kal leh ta hlauh mai a. Ka lo zawt tlang ta ringawt. 

" Mahruai, hetiang ringawt a awm chu a hrehawm duh em mai. Sir hnenah hian thupha ka chawi a țul niin ka hria. Engtin nge ti Ila min duh" tiin tlawm leh zah pawh ka dawn thei tawh lo. A nuam lo ve bawk em a tin ni. Chutah, Mahruaii chuan ka bengverh tur zawng tak thu chu rawn sawiin ka phur thar ta hle. 

" Thla thar ni 2na chiah hi Sir Johna nu piancham a ni dawn a, Hotel ah hian a lawmna pawh an buatsaih dawn niin ka hria. Hei hi official taka puanna la neilo mahse hetah hian a lawmna party chu an neih ngei ka ring. Chumi hunah chuan thawk tu zawng zawng te pawh Kan Kal ve ngei a țul dawn a, thupha chawina hun a tan chuan a remchang khawp in ka ring" tih thu a rawn sawi takah chuan ka zangkhai zui hawk nimai hian ka hria a, ka thawl deuh suai suai thei. Tin, thla a thar tep tawh bawk a eng thil chiah nge thupha chawinan chuan tih sak ila tha ang ka la hrethiam mai lo na in, inbuatsaih erawh chu ka tumruh ve hle. Tin, thla thar hma hawt atang chuan amah tih lawm tumin țan ka la ru ve reng bawk a, vawikhat phei kha chu a tihdan zirin zan lama ka momo siamsak ngat kha ken sak ve in a chhun eitur a tan ka han pe ve leh kha a nia, mahse, ka hmuh ve reng lai chuan a secretary kha pe in, ei daih tur khan a ti ta mai a nih chu! Sawi buai duh hauh lo mah Ila ka kut tum erawh ka hum ruh ve nasa hle a, heti em em a min haw zui tur hian a eng pawi nge maw ka lo sawi le ka ti. Mahse, a pawi Chuang love, chance ka la nei țha tho alawm tiin ka awm chu ka han ti nuam chawpchlh leh vat a, ka nui zui ta ver ver mai. 

A khât tawk hian a vei vak vel te chu lo ko ve thin in, rawn hawi ve zuk chang chu nei mahse la a ding khaw muang duh ta ngai hauh lova, a Kal tlang daih thin. Chutiang chu ka chunga a chet duhdan ni țhin mahsela engahmah ngaih loh ka tum lui ve ta țan a, nat loh pawh ka tum lui ve nasa ta hle. Hun thawl ka neih phawt hi chuan zan lamah momo pawhnise ka la siamsak lui ve fo thin a, a Chang phei hi chuan ka hmuh tur ngei hian bawlhhlawh bawmah te a rawn paih lui kher zel a nih chu! Ava han sual thiam tak aw. Chung thil zawng zawng hmu a lo hre ve thin tu Mahruaii lah khan alo ngei ru ve em em tawh a. A rawn sawi zui leh hrep zel. Engahmah hian ka ngailo lui tawh. 

" Mahse Rosalind, pawi ti reng reng shh aw. Hetia ngawi reng chunga ala run luih peih chhung che hi chuaann ala haw tawk taktak lo che tihna a nimai. Thinlung zawng zawnga Kan huat tawh te hi chu e, run pawh hi kan runluih peih tawh lo a nia" tiin min han hnem ve thin bawk a, a dik dawn em ka hre lo le. 

Tunah chuan țul leh pawimawh pawh awm se kei chu mjn rawn ko tawh ngai lo in a secretary khan engkim a rawn ti fel vek tawh thin a, a che ngeiawm ve thin ngawt mai. Thla khat em pawh ka la thawh tlin hma hma a hetiang buaina han neih chu a namai lo in, lung hi a ti zing ve mup mup thei a, hna kal te pawh hi a ti phurwm loh zo vek thei. 

" Mambawih, in hotel thenawm chiah a an ruang chhar kha engtinnge ni ta zel a. A hlim chhawn khan a han alh ve hluai a, a reh leh ta vung vung mai emni hei" ka pa in a rawn tih chuan chhan dan tur ka thiam lo angreng hle a, ka ngaihven loh zawng tak alo ni ve bawk nen, ka pa chu ka melh ta vang vang ringawt. Mahse a hnu lawkah chuan in ngaihtuah harh leh in 

" A case kal dan kha chu ka hre zui hauh lo na in a hotel erawh kha chu an run chhunzawm leh tawh a. An lun em tih vel phei chu engmah ka hre thui zui tawh bik lo" lo ti ve in, hetiang lam ka pa hian a ngaihven ve riau zel a, a bikin kan ram chhunga tualthahna hluar ta lutuk te leh, ruang chhar nawlh nawlh tam ta lutuk te hi pawi a tiin a vei ve em em a, a case zui zel dan thleng hian thui taka hriat ve zel a duh thin. Mahse, a hnu chhui tu ni ve ta lo chuan engmah hre thui thei bik hek lo le, hetianga a han zuih ral leh mai mai țhin te pawh hi pawi a tiin, a rilru thleng hian alo na ve a, awm hmunah tihtheih nei si lo hian alo insawh ve nasa thin a ni. Ni e, ram hmangaih tu tan chuan a rilru nat thlak a, a vei awm ve thin em bawk a ni. 

Tunlai chu sir Johna hi a buai theih hmel in hotel ah pawh hian a awm rei hman ngai meuh lova, tlai tak takah rawn kalin, record vel a rawn en fiah thuak thuak hnuah a chhuak leh daih thin. Thildang pawh a rawn buaipui ngai meuh lo tihna a njh chu. Tin, record a en fiah hnu a a chhuak hi a rawn let leh tawh ngai lo bawk a, zan lamah tal a Kal leh em tih erawh chu ka hre zui tawh lem lo thung. 

Ni khat erawh chu chhun chawlh lai bawk in ka dawhkan ah Mahruaii leh Tanpuia te nen khan Kan lo titi ho leh a, Mahruaii'n

" Zanin chu Mela-ah khan kal ve ang u aw. Zan lam kan off tho a, a remchang dawn em mai" a lo tih lai tak hian Sir Johna kha Kan zawnah a rawn tei deuh puat a, kan thil sawi chu a rawn hre pha ve ni ngei tur a ni, a ding deuh chawt a, rawn hawi phei zuk in kei nen chuan kan inmelh hman zawk nghe nghe. Mahse, rei pawh ding lo chuan a tihdan ngai te bawk khan rang em em hiaann a car dahna lam bawk chu a pan lehnghal a. Kan lo nui deuh sak ringawt. Khatiang a a khawsa lai kha ka thiante pahnih chuan hmu ve lem lo mahse kei erawh in ka hmuh chian em avangin ka lawm lehling hial a, a ruk hian ka hlim zui deuh veng veng thei. Nia, a rilru zawng zawngin he mihring hian min haw lova, min la ngaihven ve reng tih tal ka hriat phah alawm le. 

Sawi lawk tawh ang ngeiin zan alo thlen chuan hmanhmawh tawk hian ka insiam ve ta sawk sawk a, Mahruaii leh Tanpuia te khan min rawn sawm phei an tum avangin ka rilru chu a hmanhmawh ve angreng hle. Ka insiam zawh hnu reivaklo ah an ni pahnih pawh chu car nen rawn thleng zuiin, an Mela siam tharna lam pan chuan kan thawk chhuak zui nghal. A hmun kan va thlen chuan rin phak bak bak in mihring pawh an lo tam tihtheih a ni a, a nuam hut hut hle. Chutianga tihtheih zawng zawng ti a, a chuan theihna zawng zawnga kan chuan kim vek hnu chuan tih ber tur pawh hre tawh lo hian eitur keng in Kan tei kual ta vel mai mai a, mi che vel te chu hmuhnawm ti tak leh nui hawk hawk chunga kan lo thlir ve reng lai chuan tum loh deuhin Sir Johna kha ka va hmu ta hlawl mai a! Ka meng phawk nghal hru thei. Eng ti tih a heng lai hmun te rawn thleng phei ve nge maw a nih le. Ka thiante pahnih pawh chu hrilh duh lem lo in a che vel chu ka thlir ta reng ringawt a, ani thung kha chuan min rawn hmu ve hauh lo lehnghal. Chu lai a rawn thleng ve ringawt pawh chu mak ka tih tawh tehlul nen, amah chauh in ala rawn Kal zui niawm tak hi a ni a, nuam pawh a ti zawk emaw ni le. An ni ang, mi pangngai chung lam tan chuan heng hmun te chu a ho awm ropui si a a rawn Kal hah peih zawk ka ti e, tih vel ka lo ngaihtuah lai chuan ka ban ah rawn chelh thut in ka thiante pahnih khan

" Tih kim loh pakhat kan la nei. Kal ang u" ti hluai Chung hian an sawina lam, Sir Johna awm lohna lamah chuan mjn kai zui ta dawr dawr lehnghal a, a ruk tak chuan ka lo ui kher. Kan boruak that lai kha chu nise va biak te pawh ka ngam loh nachhan tur ka hre bik hauh lova, mahse, tunah erawh chuan boruak a inthlak thleng tawh miau avangin biak chu sawi loh, min hmu fuh palh ang tih pawh ka hlau ru zek zek tawh chu a ni si a, hetia ngawi reng a a che vel lo thlir mai loh hi chu tihtheih ka nei rih lo tlat a tin ni. A hrehawm duh ve thin khawp mai. 

Zan mut naah nise amah ngaihtuah lova muthilh hi ka la nei Mang lova, mumang ram thleng thleng hian lo hmu țhin in, Chung hunah erawh chuan kan lo inkawm a, kan hlim dun viau a, mumang mai mahnise a thik awm duh thin khawp mai. 

Zan lamah khan Kan lo tal chau ve bawk nen, a tuk zing chu thawh ka hai chiang ve hle a, ka thawh chhuah meuh chuan hna kal tura chhuah alo hun daih tawh nia. Tichuan, tho chhuak zui sawk sawk in tukthuan pawh ei ta lo chuan scooty ka ti nung vat vat a, ka dawk chhuak nghal par par. Mahse, hotel ka va thlen phei nak chuan rin loh tak hian Kan hotel kawt leh a chhung te, a thenawm lawk hotel chhehvel ah te khan police leh mihring dang tamtak hi an lo phusa ta nuai nuai mai a, min ti hamhaih kher. Scooty ka hun fel leh phawt hnu chuan muangchang hian hotel chhung chu mi tamtak karah inzep a pan ve nghal in ka lut thei hram a. An ri deuh nuai nuai mai bawk nen a ngaihna ka hrelo tulh tulh. Chutah, ka dawhkan ka thleng fel chiah tih in police pakhat khan mjn rawn pan nghal vang vang a, ka lo en tawp ringawt. 

" Hei a receptionist pawh alo thleng ta bawk a, an manager leh hotu dang te kha min han kohsak vat sela ava țha dawn ve" a rawn tih phei chuan ka hlauhthawn lutuk na lamah ka khur chhe lo chauh tawh mai a, ka buai zui vek. 

" Ka pu, eng chungchang nge ni a, eng thil chiah nge thleng mek hi ka va hrethiam lo ve" ka lo tih chuan police khan uluk fe hian min han melh ta ngar ngar phawt a, a khap zui sawk sawk bawk. Chutah, 

" Helai hmun a thawk ve reng Chung hian I thenawm lawk hotel chhunga thil thleng pawh saw I hre thei lo tihna maw?" rawn ti hmasa te te in kei chu ka lo hlauthawng leh tulh tulh. Chu hotel chhungah chuan eng thil rapthlak chiah nge maw lo thleng leh ta le ti rilru neuh neuh in police hnenah chuan 

" Eng thil chiah nge thleng leh ta a. Ka lo thleng ve chauh bawk nen engkim hi ka hrethiam lo vek" ti let nawk nawk in, police pa khan fiah fai angreng tak hian 

" Tualthahna a thleng! A vawithumna ni Turin saw hotel chhungah bawk sawn tualthihna a thleng leh a, ruang chhar alo ni tawh thin bawk. Chuvang chuan rang takin I pu te ho kha han call teh le. Thu hriatte pawh an lo nei ve mial maithei asin" rqwn ti leh zung zung in kei chu ka khur chhe lo chauh. A mak mawlh mawlh teh e ka ti. Ka thawh ve hnuah pawh hian saw hotel atang sawn ruang hnih ngawt kha a lo chhuak tawh a ni a, kan inhnaih chilh bawk nen hian ka rap ve ta angreng viau mai. Ka tui lo zual vek tawh. 

Tichuan, kut khur dar dar chungin telephone chu ka ban ta a, sir Johna number kha hmet chhuak in ka call zui ta nghal a ni. 

****************************************************