A PÂR DAWN SI LO

A PÂR DAWN SI LO!

BY :  Vanlalpeki Fanai

BUNG __3

***********

Lu na ber bûr zet a tho chhuak in ham bai bai chung hian bathroom lamah ka lut tlang nghal a. Ka muthilh hma tehreng nen mut lah chu ka la kham lo hle lehnghal. Hmai ka phih zawh rualin ka u te chhungkaw rawn haw thawm pawh hriattur a awm ve nghal zat a. Kawngka chu ka va hawn sak thuai bawk.

" A nute" tiin naupang pahnih te khan hlim em em hian min rawn kuah nghal vat a. Ka lo kuah let ve Mai. Mahse, an nu leh pa te hmel erawh kha  chu hmuh nuam lo khawp hian a rawn dur lut ve thung a, melh khat pawh hi min melh duh eih lo nia. Zan hmasa lama ka unaunu thusawi te kha hre chhuak leh in ka awm pawh chu a nawm loh phah zo nghal vek thei a, a hrehawm duh thin teh e.

" In ril a țam tawh hlawm em. Ka tho ve chiah a, thawh ka lo hai deuh alawm le"  ti zui nghal mawlh mawlh in ka unaunu khan rang zet leh ram hmarh si hian

" Kan ei tawh. Tun angah chaw ei loh a hun tawh emni" rawn ti nghak hmuar hmuar in, kei chu ka ngawi zui leh ta kar mai. Mahse, UThana zawk kha alo inthiamlo deuh a ni ve maithei. Zaidam tak hian

" Thawh tlai Chang te chu a awm ve tur alawm. Inthiamlo duh suh. Tihtur em em a awm Chuang lova, inkhawm kan duh vangin kan rawn ei sa mai mai" alo tih tak hlauh ah chuan ka u chu va melh ralh ralh Chung hian room lamah ka lut nghal daih a. Ka hmai huh hluam reng te chu ka va hruk hul leh thuak thuak hnuah eirawngbawl tur chuan choka lam ka pan ta chauh.

Eirawngbawl a ka buai chhung zawng pawhin ka u nen kha chuan vawikhat tal pawh inbiak hi kan nei miah lova, min biak hmasak a tum lem lova, kei lahin ka tum bik hek lo. Zan hmasa lam a min tawngkhum duh dan khan kei hi thinlung na takin min Siam tawh miau a, min hliam a, ka unaunu, ka thisen zawm ngei nimahse la amah biak chakna hi ka nei tawh lo reng reng. Mahse, ka be lo hlen tur tihna erawh chu a ni hauh Chuang lo. Ka thei rih lo mai a ni e.

Tukthuan ka ei mawlh mawlh laiin ngawi reng hian inkhawm tur chuan min Chhuahsan ta hlawm a, ka thaw zui huai. Kumin zet chu ka pian a hnu lama krismas ka hman nawm loh ber tum ala ni hial anga. A ho riau bawk. Kum hlui thlah in kum thar kan Chuang kai twh a ni tihte pawh hi ka theihnghilh tep alawm le. Kum bih alo tam ve tawh te pawh a ni ange.

" Hello! Khawi lai nge in thlen tawh a" ka tih chuan Hriatsanga chu alo ngawi deuh vang vang phawt a. Min chhang dawn ta lo emaw ka tih hnuah hian hah hmel fahran in

" Khawvar rual khan Kan rawn chhuak a, kan lo lut ve tep e" a rawn ti ve ta hram e. A lawmawm. Tichuan, rei pawh inbe lo in kan ti tawp leh vat a, ka jnbual fai zawh hnuah len thawven pah tiin UDuhsangi te in lamah chuan amah Hriatsanga hmuah pahin ka chhuk thla zui ta nal nal a. Kan unau inkar hetiang alo nih tak si ah chuan in chhung nuam tihna hi ka nei thei tawh lova, an hmel hmuh chakna te pawh ka neilo zo. Naupang pahnih te hi awm lo ni ngat phei se chuan a hrehawm zual ve khawp ang mawle.

An inah chuan darkar 2 zet K thu leh tawh ang tihtur ah hian Hriatsanga pawh chu vanneihthlak takun a rawn thleng ve ta hlauh mai a. A pawr fap tawh in ka hria. A chauh hmel takzet a ni. Mahse, ka hmel a rawn hmuh rual chuan hlim hmel a pu lui ve leh hram hram a, ka bulah te chuan a rawn thu zui nghal vat. A thawmhnaw hak lai leh amah hrim hrim pawh chu an bal phing pheng reuh sia ka khawngaih tlat pek a nih chu. UDuhsangi pawh khan tha taka lo dawng sawng ve zung zungin

" Mama, Muani khan I inbualna tur a tan atia, tui te pawh alo ti lum vek tawh asin. Inbual nghal mai la, chuan, nizan lam te engtinnge in Khawsak zui tak a" lo ti zung zung in Hriatsanga pawh chuan fel mjn tih zia thu chu a rawn swi nghal zat bawk.

" Nizan chu Khawzawl pelh hnu lawkah khan Kan tang tlat sia, kan la tlan hla Chuang lo tiin kan tlan let leh a, Khawzawl Hotel ah Kan riak ta ringawt a nih kha. Mahse, ka muhil mang lo tih theih a ni" a rqwn tih chuan UDuhsangi bawk khan pawi tih hmel em em Chung hian

" Engah maw. Motor ah te in riak anga tiin kan lo ngaihtuah zawk che u a" alo ti ve nghal vat a. Lalhriatsanga lah chuan min rawn melh leh zauh thin in

" Hei te hi ka ngai tawh reuh lutuk a, signal lah kha a țha hleithei bawk silo thinrim thlak deuh asin aw. Thin thi pawhin a mut theih loh reng reng" a rawn tih leh chuan za em em mai UDuhsangi chu alo nui chhuak ta hawk hawk mai a. Kei erawh chuan lai angreng zet in a hnungzang chu ka lo chum sak ve taih taih tawh mai. 

" Va inbual mai mai teh" lai zet a ti chung hian a inbualna tur tui te chu ka Siam sak pah mawlh mawlh reng a. Tunah tak hi chuan ka hlim ve alawm. Zep tur a awm lo. Mahse, tlai lam a ka u te chhungkaw leng lo haw chuan boruak zawng zawng chu rawn chawk chhe leh vek in, a hma aia duhawm loh zawk boruak chhia kha an rawn nei leh tlat pek a. Thil reng reng hi an ti khawlo zo leh vek a tih theih ang chu. 

Eirawngbawl a ka lo buai em em lai chuan ka u zawk kha vung zet mai hian ka bulah chuan a rawn Kal ta thur thur mai a! Ka lo en reuh tawp ringawt. Chutah, hnai taka min rawn din chilh sawk sawk chung hian

" Then rawh ka ti che a ni lawm ni!? Engah nge maw khu mihring țhing zet nen khuan hmuh dun tur in la awm reng le" rawn ti nghal buan buan in a Khawsak dan teh hrep chu mak ka lo ti tawh hle. Hei hi ka unaunu kha a ni thei tak tak ang maw tihte thleng in ka ngaihtuah zo vek a, ka ring thei lo. 

" U, tinge hetiang I awm tak tlat a. I nau ka nih hi" mak ti zet leh hrilh hai angreng fe a ka lo tih ve chuan a hma aia vin zawk mah khan

" Ka hria. Ka nau inih vang tak khan alawm I tan a țha tur ngaihtuah a mipa tha ka thlan sak reng che. Eng aiah nge nang hian I ring hi I tih khawng ve tlat chu le. Kan chhungkaw dinhmun diktak I hria a, chhungkaw Khawsak nuam kan ni lo tih te thleng pawn I hre vek. Chuvang chuan i rilru kha Siam fel la khu mihring khu thlah theih tum ang che. Ka sawi nawn tam peih vak tawh lo a nia" a rawn ti zui leh ta khur khur mai. Ngawi reng leh che miah lo hian amah chu ka lo en ve tlawk tlawk reng ringawt tawh. Awmngaihna hi min ti hre lo in sawitur ber pawh hi min ti hre lo zo tawh a, ka hamhaih takzet a ni. 

Ni e, ka hria alawm. Kan chhungkaw dinhmun hi ka hrechiang lutuk ringawt. Mi hausa leh mi awm thei fa kan ni ngai lova, sum leh Pai chhuan tur nise kan nei hek lo. Mahse, chutiang a nih vang ringawt chuaann ka hmangaih hi thlah in ka kalsan phah tur tihna maw. A teuh lo mai. Kei chuan mi pahnih inkar a hmangaihna piang tawh hi infiamna a tan hman ve ka duh lova, ka hmang ngai lo bwk a, ka hman theih lah ka ring hek lo. Sum duh luat vanga hmangaih te phatsan tih ngat phei hi chu ka pawm zawng leh duh dan a ni ve lo hulhual. Ka tihtheih pawh ka in ring ngut lo ve. 

" Tinge Iva hlim lo ve a. I nuam sam lo leh deuh nge"  tih pah hian ka kut awm tha hle hle lai chu rawn vuan in kei erawh chu ka lo la ngawi kar reng thung a. Sawitur tamtak nei mah Ila ka țawng chhuak chak thlawt lo a ni ber. Ka țawng chhuak a nih chuan ka mittui hi a hnai dawn zel si a, ka dinhmun hi hrehawm takzet tih hian a hrilhfiah zo kher in ka ring lo a ni. 

" Ka tha lutuk"  tih chiah chu sawi chhuak ve in, uluk leh chik em em a min lo en reng tu Hriatsanga erawh chu ka melh tha ngam ve hlawl lova, a hmel ka hmuh rual te hian ka na zo vek tawh ni berin ka inhria. Amah khawngaih na hlir hian ka khat a, a dinhmun hniam bik a vanga hnawl leh hmuhsit diriam a han hlawh ta mai hian kei, amah hmangaih em em tu thinlung hi a chhun na takzet zet a ni. 

" I țha lo. Tihsual ka nei emni? Khawngaih in min hrilh rawh. Ka insiamtha vek ang. Mawh!" inthiam lo tih hriat tak, hmel pha dai mai pu chung a a rawn tih leh chuan ka lo khawngaih leh takzet tawh a, tihngaihna pawh hi ka hre thin lo a ni e. Tih sual a neih loh zia leh ka hmangaih em em zia te, kalsan ka duh loh zia mawlh te hi Engtin nge maw ka han hrilhfiah theih dawn tak le. 

" Tihsual I neilo. Engmah hi I ti sual lo" tih pah chuan nghet zet in ka kuah zui ta vang vang ringawt a, ani pawh khan rang em em hian min rawn kuah let ve nghal vat. Mahse, ka u te thawm Kan hriat takah erawh chuan rang taka inthlah vatin pangngai tak hian Kan lo thu țha veleh mai a. Hemi Zana a rawn leng hi chu ka u pawh khan be țha lui duh hauh lo in a hmu lo der char char zawk ka ti Mai a, room ah lut bo in a rawn len chhung zawng kha chuan vawikhat pawh hi a rawn chhuak nawn leh tawh lo bawk. Chutihlaiin UThana te pafa ve thung erawh kha chuan an awmdan an thlak danglam ve lem lova, Mimi-I te unau ngat phei chuan an Pa Hriatsanga chu tunhma ang tho khan an rawn bawh leh hiam hiam tawh a ka lo nin pui zawk viau. 

Tunah chuan hun pui leh huau huau boruak te pawh kha zo fel ve tawh in, mahni hna lamah theuh rilru kan pek alo hun tawh tqwh bawk a, châk lem lo eng ang mah Ila Kan tihtur leh mawhphurhna a nih ve miau avangin hnial lova kan hmachhawn zel kha a țul tlat si a, heng zawng zawng te hi puitlinna in a ken tel mawhphurhna leh mihring dam chhan thil te chu a ni ve thei lo ang maw. Hma lam hun thlir a rilru mah a hah tawh sa naklaiin, ka unaunu lah chu a ni tel mai hian in chhungah chuan a hrang tual tual hi a ni ta ber mai si a, ka zalen lo ngawih ngawih. Hman a a nungchang leh Mize ngainatawm tak ni țhin te kha tunah chuan vawm bo ang diak a lak bo ni tawh in, sakawlh fa chuam ang chauh alo ni ta a! In chhung pwh chu nuam lo tih tawh sa lai a Hriatsanga hmel a hmuh apiang a a hlim hmel bo daih thin te, a zia zawng zawng a hlauh phah thin te hian nasa takin ka hlim ve na te pawh chu min um bosak zo tawh a, lungngaihna min thlen tu mai a lo ni ta. A ruk tak chuan Hriata pawh hian a Khawsak dan danglam tak hi chu a hai tawh bikin ka ring lo ve tho a, a swi chhuak lo mai mai chauh niin ka hria. A lakah pawh hian ka inthiam lo em em reng a, ka inthlahrung ru ngawih ngawih. Chutihrualin a hmuh lai a hmel hlim lo put erawh chu ka duh dan a ni hauh lova, engti kawng pawhin ka u lakah chuan lungawi lo mah Ila, hlim hmel put luih hram hram erawh ka la tum ve fan reng a, ka in thup a, ka zep rei theih pauh leh kan unau inkar hi chu a hre chhuak har dwn nimai ah ka ngai. Hriatchhuah tir loh hram hi ka duh bawk a ni. 

" Nu, hna hi bansan a lo haw daih mai ka duh tawh" țah aw țuau Chung a ka nu ka han biak chuan za lem lo tih hriat fe hian alo nui ve hak hak reng a, a rem tih hmel viau hran loh bawk. 

" A engah teh ngawt maw. I thawk ve țang țang ang chu"  rawn ti liam satliah ve leh maiin, kei chuan

" A.. Tunlai chu maw, ka pa nen khan ka ngai ngawih ngawih reng che u a, ka hmu chak lutuk ringawt che u"  pangchang aw zet a ka lo tih leh chuan ka nu pawh kha a rqwn nui chhuak ve ta har har mai. A aw ka han hriat leh takah chuan mahni nu te na na na chu ngaih an lo awlsam in, ka ngai reuh taktak. 

" Lo lungngai lo la, naktuk mai ah hian iu Dingtei pasal neihna turah khan rawn Kal ve ngei kan ngai dawn sia tiin I pa nen rawn chhuk zuai kan tum alawm! Ngaih man Kan awm dawn hle tihna a nih chu"  a nui zui leh ta har har a, kei erawh chu min țhawn em avangin ka lo meng bial ve kawk kawk thei thung a. Chuti em em a rang chuan kan inhmu ang tih pawh ka lo ring pha hleinem. Ka lawm bawk si chuan sawi ber tur pawh hi ka hre tawh lo. 

" Eng nge in rawn tih dawn" ka han ti țha leh he haw a, ka helh hawlh zo vek tawh hi a ni ber e. Nu te nge nge. 

" Aw,, ka sawi zawh chiah kha. I u Dingtei pasal neih na turah khan I pa hi pa Lal a tan hman ve an duh tlat mai a. Kei lahin man ka lo ei dawn bawk a, kan rawn chhuk ngei ngei a țul ta a nih chu. Ah, nangni unau leh Mimite-i te unau  pawh hmuh in chakawm ve tawh hlawm a, chawhmeh tur Kan lo hawn sak teuh ang che u"  rawn ti leh Siam Siam in ka lo thaw zui huai thei. Ka nu in ' I u Dingtei'  a tih kha chu amah, ka nu nuța neih chhun ka Pute-a Fanu niin, naktuk tuk leh mai hian a pasal neihna turah man hlan hun an Ruat a, Keipawh hi ka va lan phei ve ngei chu a țul dawn a ni. 

Chutiang a ka nu te rawn Kal tur thu ka han hriat takah chuan tlemin ka awm te pawh a nawm phah ve ta deuh a, ka u pawhin a zia te hi a lo thup phah ve deuh ang chu maw! A nih loh vaih chuan ka pa ka fuihpawrh leh anga, naupanlai ang khan ka hlap tir leh Chuang ngawt anng chu. Ti daih ila, USangi nen hi chuan in chhang bung kan nihna ah hian naupanlai atang tawh khan Kan inhlau lo fal thei bik em em a, kei lah hi ka luhlul in ka tih mawh thin si a, ka u pawh hi ka duh lohna ah kha chuan ka sual let ve țak țak thin. Min hlau thei lutuk. Ka duh dana a awm loh palh vaih chuan kei hi ka pa Fanu duat bik tihtak ah, ka pa hnenah khan ka zualko zet zet reng a, thudik leh dawt phuahbelh in ka u hi chu ka hek chhe char char thei thin. A tawpah chuan an in hlap phah leh nge nge zel a nih kha. Ka nu khan min va ngei thei tak aw. Naupan at lai hun te ka han ngaihtuah tak tak hi chuan lung te pawh hi a leng ve duh in alo nuihzatthlak duh tawh thin khawp mai tih ka hrechhuak. Panlai hun ang mai mai khan tun hun te pawh la ni chho char char thei se la, rilru a eng helh leh vei ren run neih te hi ngai lo bawk se la, Khawvel hi chu a nuam nimai tur ka ti thin. 

A tuk alo inher chhuah chuan ka nu leh pa te pawh chu an rawn thleng ve ta hram a. Inhmuh lohna lo rei ve tawh deuh nen an hmel ka hmuh rual rual chua ka kuah nghal chuk chuk hi a ni ber awm e. Ka ngai ve chiang em a ni. Rin lawk ang tak takin ka nu leh pa te hmel hmuh tur a han awm takah chuan ka u pawh khan a nungchang leh Khawsak dan engkim mai kha a thlak danglam ta tak tak a, a daih rei dawn lo tih chu hre tho mah Ila reilote chhung hlimna ringawt pawh hi ka thlahlel lutuk tawh ringawt. Tunah rih chuan Hriatsanga pawh lengin a duhtawk in  rawn sapatal mahse la a sakawlh zia te kha a thup bo ve hram hram rih a, thlarau thianghlim za Chuang pai ang maiin a nun chu a nem leh tawh hle. Lawmawm tak a ni. Tun dinhmun ah tak hi chuan a kâ ah pawh zen ila min seh lo ang tihtur khawp in a zaidam fal leh tawh a, Hriatsanga pawh chu a duhsak thar leh ta thut mai. Ka lo ngei phah lek lek thin zawk. 

Tichuan, UDingtei man hlan hun pawh chu rawn thleng ve in, chhungkua a Kan Kal bakah Hriatsanga pawh khan min rawn țawiawm ve thin a, nuam te chu kan ti dun viau. Tin, ka u khan buaina mjn thlen lova, min be chhe lo dun bawk a, Hriatsanga pawh chuan ka chhungte bula han Khawsak vel chu nuam a ti ve viau in ka hria. A tute mai pawh khan lo duat in an en hrang lo hlawm a, an be bawrh bawrh reng thei a, kei tak pawh hian nuam chu ka ti in ka hlim viau. 

" Mami chu i thianpa pawh a fel hmel khawp kha. A hmel nise a țha a, a mawng a zang phian lehnghal. Tun ang laiah mipa fel leh tha hi hmuh fuh ann harsa tawh khawp a nia, fimkhur la, rei tak kawp ngei tum ang che aw" ka nu chuan a rawn ti ve mial mial a, ka pa erawh chu lo ngawi kar reng mahsela ka nu thusawi vang khan a lu te chu alo bu ve leh nghut nghut thin thung a. Chutihrualin ka unaunu erawh kha chuan nui hmel pawh pu hauh lo hian min lo melh ve hrek hrek reng tawh a. Min ti awm nuam lo zo leh vek tawh. 

Chutiang zelin ka nu leh pa ten min haw san hnuah chuan boruak pawh a hma ang tho kha ni lehin, ka u pawhin a ze pangngai bakw kha a rawn chhem alh tha leh ta a. Ngai kan awh leh ta a nih ber chu. Ka nu leh pa te kha ka ngai nghal vang vang thei mai. Min hrethiam tu awmchhun te an ni ve asin le. 

" In lo dam țha hlawm maw?"  Kan school office chhung a rawn ti lut phar phar thawm ah chuan rang takin ka hawi chhuak ve nghal a. Karei leh! Ramchhuanmawia hian Helai ah hian eng thil nge a rawn tih ve dawn a!? Tiffin box tereuh te pakhat hi rawn keng lut in, inti polite em em mai hian a rawn nui vur vur leh ta nghal a, mak tak in ka thawh puite ho lah khan an lo la be țha hlawm em em lehnghal. An inhre sa hlawm hial emaw ni. 

" Hello miss Muante! Ilo dam țha thin maw!?" min hnaih taka rawn din pah hian nui vur vur chungin a rawn ti leh ta. Ka va han hne zozai tak aw. Ka thawhpuite ho lah khan min la en thap zui lehnghal a. 

" E, sir chu, miss Muantei te nen hian in lo inhre thin reng a nimww" thawhpui pa Remzuala'n a rawn tih ve lai te chuan men ngaihna pawh ka hre tawh lo. Ka lo ip pah zawk zawk tawh a, a hrehawm thlawt a ni e. 

" Hria e, hre tha lutuk alawm" Ramchhuana lah chuan lo ti ve zung zung in, keimah bawk chu min rawn melh leh ta kuau mai. 

" Miss Muante, hei I chhun thil eitur aw. Special thei tur ang ber a ka nau te ho ka rawn siamtir thlap a nih hi" tih pah hian a tiffin rawn ken kha ka dawhkan ah chuan a rawn dah zui a. Ka melh zui ve zawk. Min lo la en reng zui a. Ka hawi sawn leh rang teh e. Kan office ah chuan rei pawh awm tawh lo in tiffin a dah zawh hnu lawkah chuan min haw san ve leh mai bawk a, a kal ta maw tih rual ral hian thawhpui te ho lah khan min han chhaih zui ta tak tak lehnghal a, hmeichhe thenkhat lahin, anni ang chu mi langsar leh mite hriat hlawh, mi khawsa thei chhungkua an nih avang khan duh ngei ngei turin mjn lo ti ve sek hlawm bawk a, ka rilru puthmang chhete pawh hi min hriatpui ve phak bawk silo. A nuihzatthlak zawk alawm le. Tichuan, a tiffin rawn ken te chu hawng in, a chhunga mono tuihnai tak, thahnem tham tak leh a Siam thiam Siam ngei mai ni si chu ka thawhpuite ho nen chuan kan ei ta sap sap hlawm a. A tui zek lehnghal. 

" Zanin chu Iva nalh ve a. I rim tui phian bawk si"  Hriatsanga'n min kuah Chung Chung pah a a rawn tih chuan ka lo kiai ve sak sak reng a, hetihlai hian ka u te chhung kha chu an awm lo bawk nen, mitmei ven tur awm ta lo chu ani pawh a rawn thaw pawr ve ngam deuh niin ka hria. 

" I nalh a I rimtui zawk fe" ka lo tih ve lai chuan lai tih hriat fe hian min rawn melh leh Zak Zak thin a, a Zak leh lai hmel mawlh mai hian min ti hlim thin. A lawmawm thei lutuk tlat. 

" Nang chu.. Inti zei deuh in tawngkam te Kan rawn nei ve thin a, mjn chhaih lai nghal zel bawk sia"  naupang chhia zet a rawn tih pah chuan a han titau der leh ngei bawk a, ka seh hrep dawn emaw ni le. 

" Inneih te hi I chak ve tawh chhin reng reng em"  a zawhna chuan ka nui hmel chu rawn ti tawp nghal in, thil hi thui takin ka ngaihtuah zui lo thei lova, chhan mai dan tur pawh chu ka hre lo hman tep a ni. Mahse, 

" Chak ve thin tho e. Mahse, duh ai chuan kan kum hi ala tam lo dun hret ka tia" ti a ka lo chhan let rual chuan nui hmel pu sâng chung hian ka kut bawk chu a rawn khawih leh malh malh tawhh a, kei erawh chuan amah ringawt chu ka lo melh tlawk tlawk reng a, 

" Fa engzat nge neih ve I chak!?" a zawhna hi a khirh thei e. A naupang chhia thei bawk si. 

" Pathum ka duh. Nang zawk?" ti a ka han zawh let ve takah chuan inla thutak fahran mai hian a khabe te kha a han dawm leh vang vang phawt a. Chutah, 

" Pali ka duh ang. Pahnih te khan nangmah hi chhun che se, pahnih dang erawh chuan keimah min chhun thung sela" a rawn ti leh ta heu mai a. Kan nui dun zui ta nghek nghek. Chutihlai chuan ka u te chhungkua pawh kha rawn haw ve leh chiah in keini pahnih mood zawng zawng chu an rawn ti chhe lehnghal vek ta mai a. Ka u lah khan tunhma ang tho khan Hriatsanga chu a duh lohna leh ngaihtheih lohna mai kha a rawn ti lang lehnghal mawlh mawlh mai si a, țha taka alo biak ve na te pawh chu chhang let ve hmuk hmuk in roomah a fate nen chuan an lut zui ta dial a, UThana erawh kha chu la țawng suam suam Chung hian ala thu khaw muang ve rih thung a, ka tan hi chuan a nuam lo duh takzet thin a ni. A Inthlahrun awm ngawih ngawih. 

" USangi chu a nuamsam lo deuh a niang a"  Hriata chuan rawn ti ve sur sur in, ka hmui ti sawi Chung hian ka dar ka lo chhin ve ak thung a. 

" hre bik lo le. A dam ang. A chau ve satliah mai mai a nih ka ring" lo ti liam ve puat in, ani pawh chu rei țhu  tawh lo hian a haw zui ve ta mai a. Hemi zan hi chuan ka u pawh kha rawn in lan leh tawh miah lo in a reh zui ta veng veng mai a, ka mu chhunzawm ve nghal daih. Mahse, a tuk khua a rawn var chuan ka thawh chhuah ve hma hauh hian thinrim tih hriat taka ang thawm chu ka hre hmasa ta ber a. Zawimuang hian ka tho chhuak ve ta țhem țhem. Ka u mawlh mai chu, ka hmachhawn huphurh takzet zet a ni. Chutah, 

" Zomuanpui, rawn tho vat teh! Eirawng te hi rawn bawl ta che. Nula ve si mu tlawn zuar reng ringawt mai"  rawn ti vin țhak in ka speed pawh chu ka han ti chak ve ta sauh a. Eng thil hi nge maw a hriat thin le ka ti. 

Choka ka va luh a ka hmel a rawn hmuh rual rual chuan rum mangkheng a min rawn melh rawm rawm Chung hian

" Ka thu hi vawikhat pawh I zawm duh miah lo a tiraw? I u hi engatanmah mjn ngai lo tiraw?" lo ti nghal buan buan in ka thin chu a rawn phu zui ve zaih zaih thei tawh a, nula naupang tak ni tawh bik lo mah Ila, mahni u te na na na hi chu hlauh na leh zahna chin kan la nei ve lo thei silova, hetiang a a khawsa thut thut thin hian min ti mangang takzet zet tawh a ni. 

" U, engati leh ta nge. Eng ber chu nge i lawm lohna chu ni a. Tha takin min hrilhfiah la zawm ve pawh ka tum dawn alawm"  ka han ti dek dek chu, a rawn pawr zui leh ta viau mai a, ka phu zawk thei nghe nghe. 

" Ngawi rawh! Ngawi hmiah rawh! Țha taka thil nihna ka hrilh lai che khan I zawm em? I zawm lo. I zawm duh miah lo nang hian. Kei chu ka hne, ka kham. I hna hi bansan la khuaah han haw tawh mai rawh. Hetah mahni u te thu I zawm țha duh chuang lova, ka enkawl thiam chi I ni tawh love! "  a rawn tih leh tak piap piap ah chuan a duhthusam leh a sawi tum awmzia chu ka man fiah nghal vek niin ka inhria a, ka na nawn leh dawn tih pawh ka inhre mai. Mittui sur zung zung chungin choka chu ka Chhuahsan a, 

" Chuti a nih chuan ka chhuak mai a nge. In Kiang a khawsa ve tur hi ka lo ni ve lo a ni ang. Ni e, ka mipa hmangaih kalsan a ka duh ngai miah loh zui chu ka thei lo tih i hriat tawh kha. Chu ai chuan ka duhthusam um turin mahni a tal hran ka lo zir tawh zawk mai ang e" ti chunga ka insiam mawlh mawlh lai chuan UThana kha ka roomah chuan rawn lut ve in, min rawn thut chilh zui bawk a. Min melh kar mai. 

" Muante, hriatthiam tum hram hram rawh aw. I u hi chu a mizia ve reng a ni tih i hria a, hetiang a thinur thut thut te hi a ching ve reng a nia. Nakin lawkah a dai ve leh mai ang. Chhuah pawh kha a țul lo hrim hrim aw" zaidam taka a rawn tih ve chuan ka mittui luang mek te chu lo hru pah ve mawlh mawlh in lung chhe zet si hian ka la insut ri hlap hlap reng thung a, Chutihlai chuan ka u thung kha chu a ngawi kar reng tawh mai. Ka Chhuahsan tak tak tur hi chu a ngaingam lo tih ka hre ve reng a, chuti nilo se chuan tunah te pawh hian tawngkam na tak takin min la rawn ankhum a nga, mjn bei leh nghek nghek bawk ang tih hi a chiang reng. 

" I thawmhnaw te kha khung tawh suh. Insiam la, khi, office kal a hun tawh zawk alawm. I chhuah daih mai te chuan engtinnge mimi-I te unau hi an awm theih anga, reilote an hmuh loh che pawhin an zawng ngat ngat thin zawk che a nia. Lungawi taka awm kha tum ula, inhau tawh suh u. Saw, I u pawh a ngawih hle hle tawh saw"  UThana bawk chuan thahnem ngai taka rawn ti leh in, Keipawh chu ka ngawi zui ve hle hle tawh a, ka thuamhnaw te pawh ka bag ah chuan ka khung belh duh tawh lem lo. Tichuan a dawhthei tu zawk hi awm a țha ngai e tiin hna kal tur zawk chuan ka insiam zui ve leh ta a. Chaw erawh ei peih lo in canteen a inhnawh puar chawp tur chuan ka insiam zawh rual rualin inchhung chu ngawi reng hian ka Chhuahsan ta daih a nih kha. 

Eng thil tih mah hi ka phur tawh lo zo a, ka hlim hek lova, thil engkim ah hian tha tho na leh phur na reng reng ka nei tawh lo taktak a ni e. Ka chau a ni. Ka dinhmun leh thil tawn mek engkim mai hi Hriatsanga kha chuan min han hriatpui ve ni ngat se la zawng, hetiang mai mai a ka Khawsak hi phallo in min neih duh zawk pawh ka ring ve rum rum hial a ni. Mahse, keimah zawk hian pasal neih mai hi hun ka la tih loh bakah, nei thei ka la inti lem lova, retheihna hmang a bultan tur kha ka peih lo pakhat bawk. Ka dinhmun hi hre fiah ngat se zawng, min va han khawngaih dawn tak em.

" Nu, eng Chungchang nge i sawi a! Nang lehzel hi chuan tikhan min ti lo la" ka nu thu rawn sawi chuan ka țah te hi a ti chhuak rum rum tawh in ka hria. 

" Lo then fel kha tum la a nimai! Ila naupang a, I tana țha ber tur I hrethiam lo a nih kha. I bialpa kha thlah la, ngaizawng tu che mi țha fa zawk kha neih tum ang che! Keipawh in ka duh pui zawk fe che a nia. I hrechiang maw ka sawi chu"  USangi leh ka nu Mize in chhun fuhna a rawn lang leh ta. 

" Nu, nang lehzel chuan khatiang khan min rawn ti lo la. A thuhrim in Hriatsanga te chu nangpawh in țha itih em kha. Tinge, tunah hetiang hian I thu I rawn zûk leh tak daih a" ka țap thei mai dawn in ka inhria. 

" Ka sawi tam peih tawh lo. Min hmangaih tu rethei berh ve tak te aiin, nakin lawka kan la hmangaih ve theih tur mi țha fa te hi thlan thiam a pawimawh zawk a nia" ti lehin phone lah chu a dah zui nghal hmak mai a. Ka nu mahnise, a thu lak dan mawlh mai khan min va țhawng chiang tak em. 

". A nih chuan nu, ka pa hi engvang a nei nge i nih. Ka pa hi thlah tu bul atanga mi tha fa I sawi ang kha a ni ve hauh silova"  ti a phun chhuak ve sap in ka mittui rawn luang ngiai ngiai te pawh chu ka hru fai zui leh ta nawk nawk a. 

Ka chaw ei a tui thei lova, ka eng tih mah hi a tui thei tawh lova, ka u te chhungkaw hmel takngial pawh chu ka hmu hne hluah hluah tawh. Diktak a sawi chuan he hmunah  hian naupang pahnih te vang chauh in ka la awm ve ti Ila a dik ber awm asin. Anni hi awm lo ngat se zawng, tlanbo san vang vang pawh ka duh tawh zawk ngei ang chu. 

Zanriah ei na te kan tih felfai zawh hnu chuan Hriatsanga chu a reh em mai tiin an in lamah naupang pahnih hruai chuan a Chanchin ngaihven Turin Kan chhuk thla leh ta nge nge a. Ka u hnenah erawh dawr a Kal tur angin ka insawi daih thung. 

" UDuh, Hriata hi alo la haw lo tihna emni? Vawiin chu a reh ve Riau a" ti lut nghal bawrh bawrh in UDuhsangi erawh kha chuan mjn lo melh ve zawk ringawt a, a thil tih lai chu dah sawk sawk pah a tho chhuak in min chhang dawn tawh lo emaw tih hnuah phur loh hmel em em hian

" Haw daih tawh e. A zin chhuak leh tawh zawk!"  a rawn ti ta a! Ka lo ang zui phuau ringawt. Eng thil nge maw a sawi tak hi le. Ni dang leh hun dang zawng zawng ah kha chuan eng pawh tiin khawiah pawh kal dawn se la min hrilh hre hmasa lo hian a awm ngai silova, vawiin a Khawsak dan erawh chu danglam ka ti ru ve kher. Chawhma lamah hi chuan a tu ve ve pawh hi kan buai thin em avangin kan inbe tlem thin hrim hrim a, mahse, chhun chawlh hnu atang erawh chuan hun awl neih hlek apiangin kan inbe tawh thin thung. Chutihrual erawh in vawiin chhun khan vawikhat pawh min rawn be lo tih ka ngaihtuah chhuak a, nileng a naupang ho exam suggestions tur ka buaipui avang leh ka nu nena Kan inbiak da avang te khan ka lo ngaihtuah chhuak lawk lo zawk a ni. Ani hi phone pawh khawih hman lek lo in a buai chhunzawm char char tihna a ni thei a ngem. Tlem a a buai zual chang hi chuan phone pawh a khawih lo law law thin a, chuvang zawk pawh chu a ni maithei e. 

Zanjn kher kher chu UDuhsangi hmel hmuh a nuam lo bawk nen rei pwh leng ta lo chuan naupang ho pawh chu ka chhuah pui leh ta vat vat zawk a, ka tawt zui deuh up up nimai hian ka inhria. 

Inchhung luh rual rual chuan room lamah ka lut tlang nghal puat a, khum a ka dah ka phone kha va la leh vat in, whatsaap chu ka check ta zung zung. Mahse, a hnen atang khan eng message leh biakna mah hmuh tur alo awm Chuang lova, ka thaw zui hawk thei. Mahse, ngaihtha lo Chung chung a a last seen ka han leh nak chuan a ni theilo. Nichin lawkah pwh alo online reng a, min rawn be miah lo tihna maw!? Hetiang hian țum dangah khan ala khawsa ngai miah lo asin. A chungah hian eng thil nge thleng ta ang le. A phone hi midang in an hman hawh sak anga, an lut kual vel tihna nge, a phone hi misual in an ruksak zawk tihna emni ang. Ka thawpik lutuk chu tihnghaihna tak pawh hre silo hian a khât tawkin ka han thaw chhuak leh halh thin a, ka call tawp mai dawn emni ang. A buai zual lai te a ni thei angem. A motor khalh laklawh lai te alo ni angem. Thil thleng thei tamtak chu ngaihtuah in ka buai ru takzet tawh a, thudik ber tur pawh hi ka hre thei love. Um, dar 9 a rik hun pawh a min la rawn biak miah loh chuan ka call tawp mai ang ti rilru in naupang ho exam question tur chu ka buaipui țan ta phawt a. Ka tawt a ni. Tunah hian ka hlim thlawt lo. Ani khan engvang a min rawn be miah lo nge a nih. Nge ni a, nitin deuh thaw min be hmasa tu a nih thin avangin ka biak hmasak ve hi a phut ta zawk ni ang. Heiham! Rilru ah hian thildang reng reng hi a leng lo a ni e. A hrehawm lutuk. A khât tawk hian sana te chu ka han bih leh zauh zauh thin a, dar 8 chiah alo la ri zui. Ka hun tiam dar zat a thlen hma loh kha chuan biak mai chu ka hreh ve tum hrang bawk si a, rilru erawh a awm hle hle thei tawh lo a ni e. A hahthlak a nih hi. 

" Yess! Eng nge min lo hawn" naupang ho au thawm ah chuan ka harh zui kawk ta mai a. Ka laptop dawhkan bawh hian ka lo mu thlu pek a nih chu! Țhu chhuak nghal zawkin a tu chu nge an lo lawm tak chiam tih hriat tum chuan ngawi reng hian ka tho chhuak ve a, Hriatsanga alo haw ta ni turah te ka ngai hman hial bawk. Ka phur ru viau lehnghal. Mahse, Hriatsanga ni lo in Ramchhuana zawk kha alo ni tih ka hre nghal a. Room chhungah chuan ka back lut lehnghal tep a ni. Mahse, ka chhuak kha mjn lo hmu hman vek tawh si nen, chutiang thil chu tih chi a ni lo tih hrethiam in ka la ding ngawi ta reng ringawt a. Chutah, ka hmel a rawn hmuh rual rual chuan Ramchhuana lah khan nui deuh vur vur Chung hian

" Ilo tha maw. Lo țhu ve rawh. Hei, I fate chu chocolate te ka rawn kensak a, I duhzawng kha ka hre ve chiah silova, dawrah kan va lei dun mai dawn emni?"  rawn ti nghal zung zung in, kei chu za lo fahran hian ka lo kiai ve ta sak a. 

" A ngai lo" ti nghut chungin a thut lohna zawk thutthleng pakhat ah chuan ka va țhu zui daih bawk. Ka u chuan min mil lo tih hriat fe hian min lo en deuh vang vang reng tih paw chu ka hre ve vek a, ka hmu lo der char char ringawt. 

Dar 9 a rik tawh pawh a chu mihring haw nachang hre miah lo, la țhu bet ve reng mai chuan min ti thinrim ru tawh takzet a, ka tho zui nghal tharh bawk. 

" Mi biak lawk tur ka nei a, phone Ka'n hmang lawk a nge"  tih khum salh Chung chuan room lamah ka lut zui nghal a. Ka u chu a lawm lo leh teh ang chu aw. Mahse, room atanga ka chhuah leh hnu erawh chuan ka u zawk khan nui hmel pu deuh sang Chung hian, 

" Ka mutsan phawt Mai ang che u aw. Tikhan lo leng reng la, nuam ti deuhin ilo awm dawn nia. Inthlahrung reng reng suh" ti mawlh mawlh in sakawlh rual ho chu an han in mangtha leh hluak hluak phawt a, an lut bo zo ta. Kei erawh chuan an thil sawi te kha ngai pawimawh lo ang fahran a awm in phone te ka khawih san daih a, a mak e. Tinge heng chen chen hi min be duh lo a a reh tak tlat mai hi le. Pawi lo. Ka call anga ka hrawk hrep ang ti rilru sauh sauh Chung chuan Hriata chu ka va call ta nge nge a. Alo la har phian lehnghal. Chutah, a aw ka hriat rual rual a hrawk hrep tum nakalaiin, chauh hmel fahran leh, tha tho lo tih hriat zet chuan min rawn chhang ta a. Ka zuai nghal rawih rawih theiin ka inhria. 

" Tinge, I chau dawn tih chu hre tho mah Ila vawiin chu i reh nilen țhak mai a. Miin kan ngaihtuah ve em em che a, tinge min rawn biak i tum miah loh a" ring lemlo tak chuan ka ti zui nghal hmuar hmuar a, hetihlai hian Ramchhuana kha chu in chhungah la awm in, tv a en a, kei erawh chu pawn lamah ka chhuak daih tawh thung. 

" Nia, ka chau ve khawp mai. Tunah in ka thleng fel chiah a, ka mu dawn chiah"  ti țha ve maiin, a bak chu a sawi zawm leh Chuang hauh lova, a danglam zo vek a ni. A danglam takzet ka hre thei. Ka sawifiah thiam loh leh hrilhfiah thiam si loh hian he pa ah hian danglam a awm a, a lung hi ka ti awi lo em ni ang. Ka hrethiam thei lo. A hrehawm takzet a ni e. 

" Um, mu hah chawl phawt Mai la, zingah pawh I tho hmasa leh ngei awm sia, min rawn wish leh rawh aw" lungdam lo ru tak, beisei tha ngam silo awrawl a ni tawh zawk mah awm e. Chuti Chung pawh chuan ani chu a ngawi zui deuh reng a, min chhang dawn tawh lo emaw ka tih hnuah rawn ham deuh bai bai chung hian

" Nia, ka hman tak leh ka rawn ti dawn a nia" ti lek a min chhan let takah chuan sawi chhuah thiam si loh hian chhung ril ah ka na zui veng veng thei a, mahse, tih lan nghal rum rum erawh chu ka tum lem lova, na lo anga lan leh Dil chhut vel vak pawh ka tum duh ta lo bawk. 

" Awle. A țha alawm. Nih leh, muttui aw" ti leh in, peih loh hmel fe hian

" Muttui" a rawn ti ve leh hram bawk a. 

Zan dang nen kha chuan danglam tak hi a ni ber e. Zan dang zawng zawngah te kha chuan kan in mutsan dawn thleng hian thlum deuh deuh jn kan la jnbe thin kha a ni a, zanin zet zawng, a danglam zo ta a ni e. A pawi lo e, khua hi var se la, engkim hi a țha leh vek turah ngai mai ang aw. 

In chhunga ka luh leh hma chuan ka phone chu na zet hian ka han hmer leh vang vang phawt a, an chenna in lam te chu mittui tling liau Chung hian ka thlir thla leh veng veng phawt. Tunah tak hi chuan ka ngai tih tawngkam pawh hian a sawifiah zo kher in ka ring lo asin. Ka ngai takzet a ni. A lakah khan eng thil nge ka tihsual a heti tak mai a mjn do tak nachhan tur thil pawi hi eng nge ka tih ang ka hrethiam thei lo. Ngaihdam chu dil ringawt ta ila min lo ngaihdam duh kher a ngem. Eng chungchang ah ber nge ngaihdam pawh chu ka han dil tak ang. Ka va han hrethiam lo tak aw Lalpa, ka hma hruai la, min tanpui lul teh. 

Inchhung ka luh leh hnuah chuan ka mut chhuah tawh thu chhuanlam Siam in mut mai ka duh thu chu ka sawi chhuak ta nge nge a, chuti na na na chu Ramchhuanmawia pawh cuan min lo hnial duh lem lo hian a haw zui ve ta hnu hnu mai a. Khawngaihthlak pawh ka ti lo ve a. Rilru ipik laia a hmel hmuh tur lo awm ve sek thin hian min chhawk zangkhai lam ai mahin min ti hah zual zawk ni ta berin ka hria. Ka kham zozai lutuk. 

Hemi zan ka mu zet hi chu mu tui lo tak ka ni awm e. Thin thi dap in ka muhil thei lova, a khât tawk hian ka harh reng ringawt. Ka thanharh rual apiang lah in ka mutna sir a tukverh rawn chhun tlang tu thla eng no nghulh mai rawn zam paw lut chiai mai chuan ka awm tinuam thei lo in ka lung te hi a tileng veng veng reng mai a, ngawi reng leh ngaihtuah bing bik nei Chung hian minute 2 Chuang te ka lo thlir leh veng veng thin. Mut hi a chhuak hleithei thlawt lo a ni ber ang chu. Amah kha ka ngai ngawih ngawih a ni. Ka hmuh phak maiah hian ani chu cheng ve in ka koh eih phak lekah awm ve mahse la, tun dinhmun ah erawh hi chuan ka biak leh koh theih in a awm duh tawh lova, ka tan chuan a inkharkhip tlat rih mai bawk si. 

Tho chhuak in tukverh te chu thawm dim angreng tak hian ka han hawng leh ta rak rak phawt a, thla eng no phût leh, zan boruak reh tak hnuaiah chuan ka hmangaih chenna in kha thlir thla vang vang in ka thinlung chhungril mawlh hian a hming chu rjng takin alo lam ri ve mawlh mawlh tawh bawk a. Engtiklaiin nge ka mittui hi a tlak tih pawh ka hrelo, ka inhriatchhuah leh meuh chuan mittui luang chungin ka lo khap fak fak reng tawh hi alo ni a, ka inhru fai nghal sawk sawk thei. Chutiang chuan tukverh pawh chu khar tha leh tawh lo in ka muthilhsan ta rih phawt a, ka muthilh lai tak pawh hi ka hrelo. Ka harh leh meuh chuan khua pawh kha chiang taka lo var ve tawh in ka chhungte pawh an lo tho kim leh vek tawh tih ka hre thei mai. Ka thaw zui nghal hawk. Chutah, beisei deuh, beisei ngam chiah silo a phone ka han en nak chuan ka beiseina neih ve te leh hlimna neih ve chhun te hi thawklehkhat a lak bo ang duak in an Bo zui nghal vek a, ka khum pawh ka thawh Chhuahsan hma hauh chuan ka chau chhe zo leh tawh a. Ka zawi vek thei. 

Nia, tuk dang a phur em em a morning wish mjn rawn thawn thin tu khan tunah chuan min danglam san tawhin a reh zo ta! A message thar chhiar tur a awm tawh lova, ka lakah chuan awm ve lo ang maiin a reh zo ta a ni. Ka mit zui sulh nimai hian ka inhria a, ka ni thar hman leh turah pawh hian phurna reng reng ka nei tawh lova, hma hun thlir dan tur takngial pawh ka hrethiam lo zo ta a ni e. 

Khawngaihin ka hmangaih, kei hi min danglam san hlen suh aw. 

 

******************××××××××***********************