A PÂR DAWN SI LO

A PÂR DAWN SI LO

BY : Vanlalpeki Fanai

BUNG __5 (Last)

******************

Țap zawih zawih Chung hian inchhung ah chuan ka in pal lut deuh nawk nawk tawh a. UThana te pafa khan min lo en duh kher. Chutah, room lama lo tawmbo mek ka u chu va luh chilh in an nupa khumah chuan țap zawih zawih Chung hian ka va țhu ve ta hnawk bawk a. Min rawn ngaihven rang kher.

" Mami, tinge? Eng nge thil awmzia?" rjng lem lo taka a rawn tih chuan nat lutuk vang hian țawng chhuah hi alo harsa thin a ni tih ka hrethiam ve ta chiah a, chhungril atang lahin min rawn hnawh tut tut tawh bawk si nen, ka tawng hleithei meuh lo chu a ni e. Mahse, ka țawng chhuah theih rual rual chuan zaidam tak hian

" U, tinge hetiang thil hi ka chungah I thlen tir a! Tinge, hetiang em em a na tur hian kei hi min Siam tak a. Mawh! Tinge?" ka aw te chu a thâm chhe zo vek tawh a, ring taka au chhuah nghek pawh duh mah Ila ka theilo. Tha a khur chhuak vek tawh a, mittui nise a hul duh der bawk silo, a hrehawm ngawih ngawih hi a nimai e.

" Eng chungchang nge maw I rawn sawi hi le. Eng thil chu nge sawi i tum a" a aw chu a khur ve țan tih ka hre thei a. Ka sawi tum awmzia pawh hi a hriat ngei ka ring.

" Engah nge Hriatsanga kha dawt hmanga thu ilo fah a, kei hi dawt a min puh nachhan. Heti em em a kan inkar tih chhiat j duh nachhan hi ka hrethiam theilo. A chhan min hrilh rawh. Sum vangin maw!?" ka thinrim lutuk chu ka sa deuh pup pup tawh a, mahse, ka râwl erawh ala rjng chuang lo. A pasal fanau te khan Kan thawm hi rawn hre ve lem lo mahse a pawi pawh ka ti hran lo.

" Dawt a inhek maw? A tu chu maw dawt ka lo hrilh a, ve leh ngawt thin che hian. Hriatsanga te in lam atang I rawn haw chho chiah a, an ni khuan dawt hmangin I thluak kha an lo suk sak leh tawh zawk che a ni lo maw" ngaihdan nih loh hmel fahran a a rawn tih leh chuan ka theihpatawp a vin leh țap chungin

" Dawt a ni lo. Nang hian thil țha lo tamtak hi ka chungah thlen tir I hreh ngai lova, I thlen tir fo tawh bawk. Nangmah vang vek a nih hi I hria em? Hetiang a ka awm chhan hi nangmah vang. Mi pahnih inhmangaih em em te inkar ti chhia a min țhen hrang tu pawh nangmah tho, I hria em. Ka haw lutuk che" tiin ka țap zui leh ta bawrh bawrh a. Ka insumthei tawh thlawt lo a ni e.

" Aw, a nih chuan engkim chawk chhe vek tu ah chuan min han puh ta pauh che. Kei hian maw I tana tha lo tur chu ka ngaihtuah ngai lo tih hi ilo hre tawh dawn a nia"

" I hlawk ve na tur a nih dawn phawt chuan nang hian tih hreh reng reng I nei hleinem. Theih se chuan Keipawh hi min hralh duh tawh hial ang chu Mawle" ka sawi zawh rual chuan ka biang lehlam chu a rawn thip nghal ta zawk mai a. Khati em em a ka unaunu thinrim insehruh leh inpet ruh Kha ka hmuh awm pawh ka la hre lo hial. Chutiang bawk in Keipawh, hetiang em em a ka nat leh thinrim hi ka ring phak ngai lo zawk. Hriatsanga nupui neih tur thu ka hriat lai ai fe khan tunah hian ka na tawh zawk niin ka inhria a, nia, tha te te a thil kal ve laiin dawt thu hmang a boruak tichhe vek tu an lo awm leh a, a ti tu pawh tu dang mah nilo in ka unaunu, ka pianpui leh ka thisen zawm ngei mai hi ala ni zui. A na ve chiang em asin.

" He inah pawh hian ka awm peih tawh lo. Ka chhuak dawn!"  ti let ve hmak in ka mittui hru hul pah sawk sawk Chung chuan ka room lamah ka tlan phei nghal a, ka u thung kha chu alo ngawi kar tawh mai.

A theih dan ang anga ka thuamhnaw te pawh khung fel ve sawk sawk in, a khât tawk hian ka mittui bawk chu a rawn tla leh țhin a. Chu mawlh chuan thil tih zung zung chu a ti harsa in min ti khawmuang vek ka ti lo theilo. Ka thaw leh kawk kawk zel bawk. Ka insiam zo, bag khai bawr luk chung a room ka han Chhuahsan lai min lo hmu tu UThana leh a fate chuan a ngaihna hrelo tih hriat fe hian kei chu min rawn bawh zui ta tuau tuau a, naupang pahnih te phei kha chu an țap tith tawh zawk.

" Muante, eng nge thil awmzia. Tun ang hunah te bag nen khan Khawnge i Kal dawn a"  UThana chuan ngaihdan nih loh hmel fahran hian a rawn ti zui ta mawlh mawlh a. Ka chhang let lem lo

Naupang pahnih te lah khan țap chunga min kuah bet nawk nawk in

" A nute, khawiahmah kal suh aw. Kan lo Kal duh" an lo ti ve hliam hliam reng tawh a. Ka mittui mawlh mai chu dan sen rual pawh hi a ni tawh lo e. Chutah, UThana chu lungawi lo tih hriat zet hian an room lamah khan a tlan let zui ta hmawk hnawk a, hetihlai hian Keipawh inchhung chu Chhuahsan a inkhai chhuah ka lo tum ve mek bawk. Naupang te lah chu an țap uar tulh tulh lehnghal emaw ni. 

" Eng nge thil awmzia. Eng thil nge thleng a?" ti tuarh tuarh in kei chu an awrawl vin lutuk leh ring em em bawk si avang khan ka lo chhing zui leh sawk sawk thin a. Chutihlai vek chuan ka phone chu rawn ri ve in, ka thian pakhat, Ruathlui tih loh a thuruk engkim min vawnhim pui thin tu Mahmingi chuan min rawn call hi alo ni a. Nichin ka insiam pah khan ani hi chu ka chanchin te va hrilh in ka text lawk vek tawh hrim hrim a, min rawn hruai nghal a tum nghe nghe bawk. 

" Ka lo thleng tawh a. Khaipui te i țul dawn em" rawn ti ve sawk sawk in, a ngaih loh thu chuan ka lo chhang vat a. Tichuan, naupang pahnih keimah vanga țap lawm lawm reng te pawh chu mittui nen kalsan in Mahmingi awmna lamah chuan ka kal zui ta zawk a ni. 

Mahmingi hi thingtlang nula ve tho niin, aizwlah hian hna vanga a kum Chuang fe lo khawsa ve tawh a ni a, mahni chauh a In luah țhang a lo ni sa bawk nen, tihian a theih chhung chu a chenna lamah ka va fin ve rih phawt dawn a ni e. Ka tan pawh hian a țha zawk. Ka unaunu bulah kha chuan zan khat lek pawhnise riah chhunzawm leh hi ka thei tawh lova, a hmel ka hmuh rual a ka natna te hriat chhuah thar leh ngai fo tur pawh kha ka peih tawh lo hrim hrim. 

" in chanchin chu zia lo ka tiin pawi ka tih pui hlemai che. Nia, a tira Hriatsanga'n thil awmzia min rawn hrilh hriat pawh khan mak ka lo ti ve Riau tawh a, USangi chu hetiang ti duh mi ni thei turah hian ka lo ruat ngai lo reng reng. Mak ka ti ve thlawt. Heti em em a sum thil tihtheihna in alo bual â ta Mai hi a inhmeh lo. Mak ka ti ngawih ngawih "  Mahmingi chuan rawn ti ve mawlh mawlh in, min hnem pah a, ka sam te chu a chul pah hliau hliau reng bawk. Kei ve thung erawh chuan țah nan hun ka chhiar a, sawi tur ber pawh hre lo in a khât tawk hian ka mittui te chu ka lo hru leh mawlh mawlh thin ringawt. 

" Um, engpawhnise, awm hahdam tum la. USangi pawh thil tisual tu nimahse I unaunu a nih angin ngaihdam hram hram tum la maw, ani pawhin inchhir hun ala rawn nei ve leh em em ang. Chuan, hetah hian inthlahrunna tur pakhatmah a amw lova, I duh chen chen i khawsa ve anga, heta țang in hna te pawh Kan Kal rual thin tawh ang chu"  a rawn ti leh ta zung zung a, ka thutna khumah chuan zawi zet leh kawm chial hian ka mu thla ve nghal hnawk thei. Ka chau a ni e. Ka chau hluah hluah. Zan khua mai khan muhil hleithei lo in Hriatsanga nena Kan nunhlui te kha ka han ngaihtuah kir ve ngial a, a nia sin, ani nen khan kan hlim thin a, tudang mah hi kan ngai bik lo. Ni e, USangi a rawn inrawlh țan a, engkim a rawn tih chhiat vek hma chuan midang reng reng ngai lo in hmangaihna kha Kan chen dun ve a, tudang mah kan ngaihven lo bawk a, kan pahnih hma hun chauh kha kan thlir lawk ve thin. Khang hun leh ni te kha kohkir theih ni dawn tawh lo mahse la, siamthat leh tluk a chak erawh hi chu ka nei lo thung a. Mahse, tun a tan chuan a theih tawh silo. A theih tawh ngai dawn bawk hek lo. Hei hian min ti na zual em em a, engkim tichhe vek tu ka u chu ka huat zual phah takzet a, siamthat theih ni tawh lo mahse mi pahnih hmangaihna ti chhia a, ti khaw lo vek tu a nih vaannh hrim hrim pawh hian ka haw zual ngawih ngawih a ni ber e. Ka thin te thleng chuan a rawn tawt zui leh up up thei nia. Chutah, muhil thei dawn lo takngial a inhria in thawm dim tak chuan ka tho chhuak a, pawnlam ah ka chhuak zui ta ringawt. 

Pawn boruak nuam leh thawveng tak te, thlifim thaw heuh heuh thin leh van boruak zau taka thla leh arsi pe tuarh mai te chu inchawih mawi vel ka tiin, van lam chu ka thlir chho ta vang vang mai a, ka khua hi ava han har tak em. Amah kha ka ngai a ni. Mahse, ani kha chu ka ta ni tawh lo in mi pakhat tan chauh a inserh hrang tawh tura Ruat a ni tawh a, ka tan hi chuan a awm ve thei tawh lo. Chung thil te chuan min ti na em em reng a, engtinnge kei hian hmalam ka pan in ke ka pen theih ang. Chak taka kal ka tum ve laiin hetiang boruak hian min rawn um pha leh țhin si a, ka tlu leh nge nge zel chu a nih hi. Mahse, ka tho chhuak ang. Ka tho chhuak thei tur a ni. Hei hi ka hma lam hun tura Chung khuanu duan fel tawh a nih avangin mahni chauh a Kal chu ka zir that leh a țul dawn tih pawh ka hria a, ka thei em em in ka ring. 

Ni thum chhung vel kha chu chaw ei a tui thei lo lehpek a, zan nise ka mu chhe em em bawk a. Ka taksa te pawh kha an tla ve kawk kawk theiin ka hre nghe nghe. A thiam dan dan hian Mahmingi pawhin min hnem ve mawlh mawlh thin a, min fuih nasa bawk a, Keipawh in insiamthat chu ka tum leh ta sauh sauh mai. Chawlhkar khat a liam leh meuh chuan Pathian zarah ka zia awm chho leh ta viau a, ka thil lo tawn twh leh ka hrehawm tawrh hnu te pwh kha ngaihtuah tam duh tawh lo in  ka hma a thil awm engpawh mai chu ka paltlang thiam ta viau zel e. 

" I u nena in chanchin kha vawiinah ka lo hre chauh a, a mualphothlak duh thin hlemai. Midang in an hriat tam hma khan haw phei leh la a țha ang. A chhan leh vang nise a ho lulai nasa mai si a, haw phei leh vat ang che"  ka nu khan phone atang in min rawn hau ve hmuar hmuar reng a, chhan let ngaihna tak pawh hi ka hre thin lo. Tin, tun mai ah hi chuan haw let tumna pawh ka la nei hran lova, a țul a nih chuan mahni pawhin ka in vawm hrang ve lawp lawp tawh mai a ni ang chu. Chu erawh, Mahmingi hian a remti kher lo maithei. Engpawh thleng in ka u khan ngaihdam pawh min rawn dil leh ta tehreng mahse thil hi a hma ang khan a awm thei tawh dawn chuang lova, a ngaihdam dilna pawh chu ka phut buai peih ta lo law law e. Ka nu chu ka u hnena kir leh ka tum loh zia thu te lo hrilh in, mjn ngaihtuah hah lo tur chuan ka ti zui nghal bawk a. A ngaihdan chu a ni lo hle. Mahse, sawi thui tur erawh a nei zui lem lo thung. Ka duh tawh loh chin a thlen a kaihhruai ka harsat theih zia hrechiang tu chu amah ka nu ngei hi a ni miau a tin ni. Nula puitling tia chhiar theih ka ni ve tawh a, mahni ka in enkawl thei tawh bawk a, min lo ngaihtuah hah duh suh se ka ti ta mai. 

". I lo dam țha maw?" 

Ka ke pen lai tawp chawt in ka melh ngai chu ka melh ta tlawk tlawk ringawt a. Um, kha aw kha, ka hriat hnu ngei a ni e. Ka hre lutuk tlat. Chutah, zawimuang a ka han inher nak chuan amah ngei mai kha min hmachhawn zawng hian min hnaih takah chuan alo ding ta ran mai tih ka hmu ta a. Ka lung phu te hi an rang zui vek tawh nimai in ka hre hial. Hun engemaw chen liam tawh hnua intawng leh Kan nih vang nge, amah ah khan danglam tamtak alo awm ve tawh a, ka hmu thei bawk. A mitmeng, hman atanga la danglam ve lo, kha mitmeng thuk tak leh pawisawi lo zet a min rawn melh tak vang vang ah chuan Keipawh in a lak atanga mit laksawn chu harsa ka lo ti ve hle tawh a, ka in control hleithei ta thlawt lo a ni e. 

" Ka dam alawm. Nangzawk?" tia ka han chhan let takah chuan amah pawh chu rawn che zui ve ta hrut in, rang zet hian a mit te chu a han khap zui leh ta sak sak phawt a, za vak lo tjh hriat zet hian a rawn nui zui leh ta sak. 

" Ka dam chu a nimai e. Ti rawh, țhu phawt ila" amah zawk in a rawn tih leh takah chuan kan awmna hmun chu Mahmingi inchhung a ni tih ka hrechhuak leh ta chauh a. A zia lo thin teh e. Thutthlengsei a kan thut fel leh te te hnu chuan țawng nachang pahw ka hre ve leh ta chauh a. 

" Ka awmna hi tu in nge rawn hrilh che a" ti chhuak hmasa ber in, hman a a tih fo thin dan ang bawk khan alo nui sak sak reng mai.

" Hriat theih dan hi chu a awm zel mai. Chu chu dah țha ila, I dam țha takzet em tih hi rawn hriat ka duh a, chuan, I ngaihawm lutuk ringawt bawk" a rawn ti leh ta a. A thil sawi zawh chiah vang khan kei erawh chu ka lo mur ru ve chuaih chuaih thei in ka hria. A hmel ka hmuh hma a ka sawi duh leh sawi chhuah chak thil tamtak te kha, a hmel a rawn lan rual hian an bo zui nghal duak thei a, ngaihtuah chhuah takngial pawh chu thil harsa tak a ni. A mi uap hi a na thin em a, a hma ang tho khan a kiangah hi chuan ngai ka awh hleithei lo chu a njh ber hi maw....! 

" I nupui neih ni te khan I hlim niin ka lo hria a, a nuam ngawt ang tiraw nupui neih chu"  amah han melh ve zauh Chung a ka tih leh chuan ani pawhin keimah atang hian a mit mawlh chu laksawn harsa a ti tjh ka hrethiam mai a, min la melh ve vang vang reng mai. 

" Ka hlim chu i ring tak tak em? Hlim turin min duh em?" rawn ti veleh sap in, ka nui hmel te chu an bo leh duak tawh a. Hrehawm ka ti. Dinhmun khirh lutuk a din reng mai hi hrehawm ka ti hluah hluah. 

" I hlim ka beisei. I mamawh bawk alawm"  lo ti veleh in, zawimuang hian ka mal chunga ka dah ka kut chu a rawn ban zui ta de de mai a. A che vel chu thawk pawh thaw tha ngam tawh lo in ka lo en ve kar ringawt. Chutah, ka kut a rawn hum fel chiah tih in pawn lamah khan thawm a rawn awm ta a. Reilote ah Mahmingi kha inchhung ah chuan rawn lut zui ve in, keini pahnih chu kan lo meng phawk nasa teh asin. Mahmingi lah chuan inthiamlo tjh hriat zeta nui vur vur Chung hian

" Ehe! Hriatsanga chu ilo leng ve teh mial elaw a!? Ka lo luh hun hi a fuh lo viau em"  rawn ti lut nghal bawrh bawrh in, Hriata nen khan Kan lo nui zui ve hak hak reng a, kei chuan alo haw hun hi a fuh tawk chiah ka ti ru ve thung. Ni lo se chuan ge mihring lakah hian ka tlawm nawn leh ngei anga, tlukna ngai bawk ah khan ka tlu nawn leh ang tih mawlh chu ka hlau a. Bultan that hi a theih tawh loh tih hrechiang tu ber ka ni a, ani nen hian engti khawp pawhin la inhmangaih ve mah Ila bultan that chu kan tihtur ni ve tawh lo in, tawp san theih kan tum zawk tur a ni a, intheihnghilh tawn ila kan pahnih tan chuan chu tluk chu a awm lo tih pawh kan hrechiang e. Na dawn hle mahse chu chu kan beiseina neihchhun a ni tawh miau a tin ni. 

Mahmingi rawn haw hnuah chuan hun rei pawh thu zui tawh lo in, ni danga a rawn Kal leh tur thu chu a sawi a, min haw san ta rih phawt. Ka ngai nghal veng veng tih hi zep tur chuang pawh a awm tawh lova, a awm ve lohna hmun hi chu ka tan chuan hmun reh leh thim, engmah lo ang mai a ni țhin miau alawm. Tin, heti em em a kalo hmangaih hman pwh hi a ama thiam loh nge ni anga, Keima thiam loh zawk. Dawt thu pakhat vangin ani kha chuan awlsam takin min kalsan thei a, kei erawh chu mal taka hringnun hmang tura hnutchiah ka ni tel bawk a nih kha. Ka theihnghilh reng reng lo asin. Mahse, a rim ka hriat a, a hming leh a aw nalh tak ka hriat rual a ka danglam leh thinna erawh hi chu a thiam loh ni tawh lo in, ka thiam loh liau liau zawk a ni ta ngei ang. Tum ve viau thin mah Ila a lakah hian ka thinrim rei thei ngai lova, ka ngai a ka mamawh zia ka inhrechiang bawk a, ka thlah hlen taktak thei lo chu a ni e. Mahse, mahse tih thumal hi ngaihtuah chhuah a vawn nun reng a țul leh țhin si. Engtikah tak he ka buaina chhum pui hian min kiansan ang maw. Kiang vat vat Sela, nun thar leh Khawvel thar hlak a chen ve tawh ka va han chak tehreng em. Chumi hunah chuan  thinlung takin ka nui ve thei tawh a nga, ka hlimna hian a vawrtawp a thleng ve tawh ngei bawk ang chu. 

Hun chu a Kal ngai reng in ala kal ve bek bek zel a. Ramchhuanmawia pawhin min beidawnsan chu khawi lam ah, ka awmna hmun te chu khawi atang emaw lo hrechhuak ve lehzel in, min rawn zawng chhuak leh ta nge nge a nih kha. Zantin mai hian min rawn len chilh chu a tum leh ta tluk tluk a, mahse, he thinlung khawhar leh beidawng tawh bawk si hian ani chu hnar chikim a lo hnar tawh lo in, a mawi tawk lek hian ka lo kawm ve fo tawh zawk. A hlim phah ve viau thin in ka hria. Zan khat pawh boruak dang hip vel pah a len chhuah dan chu a rawn rawt ve miau avangin ka lo re tihsak ta hram a, a lawm kher. Chumi zan chuan Aizawl khaw chhunga Thalai ho fuankhawm na ber leh, mite tlawh pawh tamna hmun hrang hrang, nuam taktak te chu tlawh kual dun in nuam pawh ka ti ve phian. Mahse, haw mai tum a kan lo inbuatsaih lai vel chuan Hriatsanga leh a nupui leng chhuak ve te nen khan Kan intawk vel ta chiah a! Kei leh Hriata mawlh mai chu sawifiah thiam phak bak a nasa in Kan lung phu a rang awm asin. Inbiak tum a din kher chu a ngai lo, kan in Kal pelh pah te khan ani nen chuan khaw dang hawi thei lo lekin kan mit zawk chu a intawng fuh laklawh a, chu chuan thu tamtak a sawi pah mawlh mawlh bawk awm asun. Tin, a rawn meng thip țha râm râm viau bawk a, inbe thei ni ngat Ila chuan, a lungawi lohna thu tamtak a sawi chhuak leh ngei ang le. A nupui in duat taka a kuahna te, hlim nui sang chunga a biak seuh seuh na te pawh kha ngaihven thei lo khawpin keimah ah chauh a rilru chu a dah tawh zawk a ni tih chiang takin ka va hmu thei a, ka na zual leh ta ngawih ngawih. Tunhma ang kha chu ni thei se chuan Ramchhuanmawia bula awm tur pawh hi ka ni lova, a kiangah ngei sawn hlim taka awm ve in, hlim hui hmel ka pu ve bawk anga, inthurual tak khan Kan pahnih chauh in kan duhzawng thil chi hrang hrang te kha kan sawi dun leh mai mai tur hi a ni a. Mahse, eng thil nge maw ka ngaihtuah kual tak chiam thin le ka ti. Zomuanpui, heng i ngaihtuahna awmze nei lo tak tak te hu vawm bo la, hma lam pan a hlim taka awm tum tawh rawh. I thei. I ti thei tih hi inhria ang che. An ni saw I ngaihtuah chhuak fo tur pawh a ni tawh lo a nia. Ka ngaihtuahna fim zawk chuan harsa takin ka mit te chu min lak kiansak thei ta hram a. Ka thawl zui hawk thei. Chutah, 

" Haw tawh mai ang aw. I chau deuh tawh in ka hria"  Ramchhuanmawia'n a rawn tih chuan ngawi reng in ka lu chu ka lo bu ve nghat nghat tawh a. Haw thuai thuai a mut hahdam vang vang mai chu ka chak tawh ber reng a ni. 

Inchhung ka luh rual rual in Ramchhuanmawia pawh chu ka ngaihsak tha peih meuh tawh lova, room lamah ka tlan lut nghal vat. A polite loh thlak viau tih chu hre tho mah Ila, keimah hi ka awmdan a dik leh thei tawh lova, ka insum hman lo. A duh dan dan khan lo awm ve phawt rawh se. Amah kawm turin Mahmingi a awm ve tho alawm. 

Khum a ka mut rual rual chuan ka phone te chu ka han bih ve leh thuak thuak phawt a, Chutah, Hriatsanga message thar chu alo awm ve reng a ni tih ka hmu nghal a. Ka en vat bawk.

" Zanin zet chu i rawn chhuah pui chhelo khawp mai. Ka thik thei mai dwn alawm. Tak taka, hlim deuh khan awm ru aw"  tih hi alo ni a. Nasa zet hian ka thaw zui nghal hawk thei. A message tur chu type ve leh nghal vatin

" Thik love. Nupui tha tak I nei tawh a, patling nih tum la, chhungkaw innghahna tlak pa nih tum bawk ang che"  ka lo ti ve ta a. A seen rang viau bawk. Chutah, 

" Thik suh intih ngawt theih a ni lo asin. Thinlung atanga rawn chhuak a nih tawh hi chuan a harsa ve duh thin em a. Min hrethiam dawn nia"  rawn ti ve leh in, chhang let lo chuan a message zawk chu ka melh ta vang vang ringwt. Mahse, a tawp nan tiin

" Duh tawk ang. Hetiang chungchang hi sawi dun tur pawh kan ni tawh lo. Hetah hian tawp ila, biak tam loh te zir bawk ang"  ka va ti leh ta a. Phone chu dah in muthilh zui hmak chu ka han tum ve bawk a, mahse, message tone rawn ri leh ral ral thin chuan rang zet ka phone bawk min ban tir leh ta nge nge. 

" Min ngaidam dawn nia" tih ringawt hi alo thawn let a. Thil thleng tawh zawng zawng ah khan ka ngaidam fel vek a ni tih hi a hrethiam lo takzet emaw ni le. Ka engkim hian an ngaidam a, theihnghilh sak vek a ni tawh zawk asin. 

Khatiang a nih hnu kha chuan a hranpa a inhmuhna leh inbiakna mumal kan nei dun tawh ngai lova, mahni hna a lo buai ve  bawk nen chuan thildang pawh hi ka ngaihtuah tam vak hman lo thin. Chutihrualin, ka awmna hre fuh tawh tu Ramchhuanmawia ve thung kha chu ala rawn Kal zantin ve a. Tunhma ai thlawt kha chuan Keipawh in ka lo ngaina ve tawhin, ka kawm thiam phian tawh a, ka do ren run tawh lem lo bawk. Chutihrual erawh chuan hmasawn pui tumna rilru erawh ka la Pu lem lo thung a, hun lah ka ti hek lo. Rilru kil khat a riak reng mihring hi ka theihnghilh hmin hma loh chuan hma pawh hi ka sawn hleithei tawh in ka inring lo hial e. Chutiang zelin Ramchhuanmawia chuan nitin deuh thaw hian ka hna bang chu min rawn nghak ve thin a. Ka hnial duh tawh lem lo ka tih kha. Eitur chi hrang hrang lah hi min rawn ken sak reng a, a lawmawm hrim hrim ka ti tawh mai. 

" In bang tep tawh em" call hmanga min rawn zawt tu chu Ramchhuanmawia nilo in Hriatsanga zawk alo ni daih pek a. Ka thin a phu zui dup dup thei. 

" Kan bang chu a nimai. Tinge?" tia ka han chhan chuan ani chu alo khuh leh khak khak phawt a. 

" Hetah. Kawngpui ah khan ka lo nghak che a. Lo chho la" a rawn ti leh a nih chu! Tinge, theihnghilh tum che a theih tawp ka chhuah veleh hian ilo in lan lehzel thin le. Ka hringnun ah hian I bet nghet tawh lutuk a, theihnghilh theih I ni tawh lo tihna a niang tiraw? A pawi ngawt mai. 

" Um" ti ringawt a chhang let ve in phur lem lo tak chuan ka kal chho ve ta hnak hnak a. Awle, tunhma ang tho khan ani chu a bike ngheng ar ar Chung leh, kut kuangkuah hian alo ding ngawi leh reng tawh a. Min la hmu ve Chuang lo tjin reivaklo chhung chu thawm chhuah lo hian ka melh ta ngawt ngawt ringawt. Engvanga theihnghilh harsa em em nge maw inih le ka ti thin. Hetiang reng reng a mipa ka lungdum tu leh ka thinlung in a hnawl bo theih loh hi ka tawng ngai lova, a vawikhatna a njh vang te pawh a ni nge. Ka dam chhung a ka hriatreng tawh tur sulhnu min hnutchiah in ka tan erawh a par zui thei tawh Chuang silova, khuanu hi ava fair lo tak em ti a chunglam dem rum rum chang te pawh ka nei ve ta fo mai. 

" Hi! Eng thil nge i rawn ngaihtuah chhoh vung vung a"  min rawn tih takah chuan harh chhuak deuh zawkin, ka meng zau nghal kawk thei a. Ani chu ka hma chiah ah hian alo ding reng tawh nia!

" Aih! Eng ni love. Hetianga I tih kher hi ka beisei lo lutuk a, chubakah a țha ber angem tih hi ka ngaihtuah bawk" ka lo tih ve lai chuan a thaw ri deuh hawk chu hriat tur a awm zui a. Min rawn kuah nghal nghe nghe a nih kha. 

" A thim zawng hlir hian thil hi thlir lo la, nupui pasal in neihsan tawh hnuah pawh a inbiak theih tawh loh a, inkawm tawh loh tur tih thuziak leh hnutchhiah a awm kher emni? A awm lo tiraw?"  nui sang chunga a ranw tih chuan ka lo kiai ve sak. 

" Mahse, thil țha ber leh dik ber a ni tawh Chuang silo alawm. Inhmu tawh lo zawk ang. Min haw san rawh " ka lo ti let ve leh hmak hmak bawk a, min nuih zui ta var var mai. 

" Lo kal phawt teh. Ka va thlah haw ang che"  ti leh hram in, a bike awmna lamah chuan min nawr phei ta dawt dawt. A Mize ngai reng kha ala nei a ni tih ka hriat chuan tlemin ka awm pawhh a nuam ve leh ta deuh. 

Bike a ka thut chhung zawng khan thu pakhatmah sawi belh tur hi ka hre tawh lova, ka khâ a chih zo ta nge ka hre bik lo, ka ngawi reng ringawt. 

In Kan thlen hnuah pawh chuan tirh hawn leh tumin tawngkam nen theih tawp chu han chhuah ve bawk mah Ila, awmzia erawh a nei tam lo kher. Inchhungah chuan min rawn zui lut ve zel in, thawklehkhatah min pawt ding zui ta chawt! Ka khawng nghal vek nimai hian ka inhria. 

" Min la ngaidam thei lo emni? Engvang in nge hetiang hian min Khawsak khum reng a. Hman a nangmah kha ini leh thei a ngem?" a aw chu a vawt ruih tawh a, a khur der der bawk niin a lang. 

" Ka ngaidam vek tawh che. Siamthat theih awm tawh lo mahse ka ngaidam vek che. Mahse maw, hman a keimah ang kha chu beisei tawh lo la ka duh. A theih tawh loh a ni" mittui tling piau chunga ka sawi zawh rual chuan a lamah min pawt lehin, chiang em em hian a âwmah chuan min bei tir ta hle hle a. Ka che zui țha ngam tawh lo hrim hrim. 

" Min en teh" zawi sap a a rawn tih leh lai te pawh chuan men ngaihna hre lo in ka mit te chu ka ti che kual ralh ralh reng a, chutah, ka khabe chu rawn dawm in min kuaidak ta vat. Kan inmelh chiang lutuk kha chhuanlam siamna hun a awm map tawh lo. 

" Min la hmangaih a min theihnghilh thei bik lo a ni tiraw?" a rawn ti leh ta. Ka chil te chu ka lo lem zui khalh tawh mai. Engtinnge chhanna ka pek tak ang ka hre Mai tawh lo. A zawhna kha thudik vek a ka chhan let chuan keimah ah tawp thei lo in min kiansan duh lo ang tih hi ka hlau ve si a, ka tha te chu a rawn khur lek lek tawh mai. 

" Aih! Ka duh tawh lo che a, ka hmangaih tawh hek lo che! Khawmgaihin min kiansan la, i nupui leh i fa lo piang tur tan chauh I rilru kha pe tawh zawk rawh. Khawngaihin" mittui tla phung chunga kalsan ka tum lai chuan ring deuh hlek hian a rawn au chhuak ve ta țhat mai. 

" Dawt I sawi! Dawt I sawi tih ka  hria alawm. Ka kalsan theih che i duh vang chauh in hetiang tawngkam hi I rawn phuh chhuak tih pawh ka hrethiam vek. Mi Mawl ah min ngai suh aw"  a țap lek lek tawh tih chu ka hre reng. Ka khawngaih a ni. 

" Mi Mawl I nih si loh chuan eng aiah nge i inchhir lehna tur thil kha I tih a. Sawi teh. Kei hian khang hun chhung zawng zawng khan ka lo nghak ve che a, min biak hun nghak in zan pawh mu țha thei lo khawpin ka ngaihtuah tjin che asin. A hunlai khan engah nge thudik kha min hrilh hriat mai loh. Min ring tawk lova, hetiang hian I duh loh lakah I dam chhung hun j hman ral țhak a țul dawn ta a nih hi. A hunlai khan thudik hailan tumin bei ta che"  thinrjm luat vanga țap zawih zawih in ka duh aia tam chu ka sawi chhuak zo ta vek mai. Fiah em em hian ani pawh khan min lo en ve reng ringawt bawk. 

" Ka tihpalh. A hunlai khan ka na em a, tin, rinhlelh theih tur khan mipa rang inleng tlangnel tak ilo nei ve thin bawk nen, ka tihpalh takzet a ni. Thudik pawh hriat tum hmasa lova hetiang thil ka thlen tur hi maw hrehawm ka ti. Mahse, nang lo chu hmangaih dang ka nei thei tawh lova, ka neih leh theih pawh ka inring bawk heklo. Bultan that I duh em. I duh phawt chuan sawi la, engkim hi mualpho huam in I tan chuan ka paltlang vek mai ang. Khawngaih in sawi teh"  ngenngawl taka a rawn tihna chu chawp leh chilh a lo hnawl sakin, ka lu te chu ka lo thing zui deuh nawk nawk bawk. 

" Ka thei lo. I nupui leh I fa lo piang mai tur te kha hrehawm taka dah ka duh lo. Keimah vanga ka hmeichhiatpui na tuar lai hmel hmuh hi ka theilo a ni. Min haw san la, rawn inlan tawh lo zawk mai rawh. Khawngaih takin. Ka ngenna che hi min ngaihthlak sak la, min zah sak hram rawh" ka țap hlawp hlawp tawh mai a. Chutiang bawk in ani pawh kha a bang bik hauh lo. A mittui hru pah fuap fuap chunga min rawn pan hnai in nghet zet hian min rawn kuah leh ta chawt mai a. A tap zui ve ta bawrh bawrh. Mjn ti na takzet thin a ni. 

" Kal tawh rawh" tia kalsawn tir ka tum lai chuan rang em em hian ka biang tawn tawn ah a rawn dawm bet a, chiang lutuk in min fawp zui ta vag vang mai. Ka lo hnial thei bik lo. Hrehawm ti ru tak chunga lo in dawh ve in, a tawpah erawh chuan ka namsawn ve thei ta hram a. Ka hmui te pawh chu a hmuh ve reng lai chuan na zet hian ka hru fai nghal zung zung bawk. 

" Min hawsan phawt rawh. Heng hi thil țha ber a ni lo tih i hriat kha. Pathian ruat kan nih a, a samsuih takzet kan nih phawt chuan kan la intawng leh em em ang. Pathian khian keini pahnih tan hian Khawvel hnuhnung leh thar zawk  alo buatsaih ngei in ka ring e"  ka ti zui leh malh malh a. Ngawi reng hian alo khap zui ve fak fak reng. 

" I duh dan in ka kal ang. Mahse, engtik hunah pawh I tan hian ka awm reng anga, koh theih rengin ka awm ang tih hi chu min lo hriat sak ve dawn nia. Mamawh i neih hunah pawh kei hi min rawn hre ve reng thin ang che. Ka kal a nge" tiin, hreh em em Chung chuan ka kut pawh chu a thlah ve thei ta hram a. A kal liam tur mawlh chu ka  en zui theih tak thlawt loh avangin room lamah ka tlan lut nghal thuai a, khum chungah chuan țhu in theihpatawp hian ka va țap zui ta hlawp hlawp a nih kha. Hetiang kan ni bik hi chu a pawi ngawt mai tiraw. Ka sawi tawh kha, chunglam khian zah a ngai anga, kan pahnih tan hi chuan Khawvel hnuhnung zawk alo buatsaih ngei ngei ang tih hi ka ring tlat a ni. Lungngai suh aw. Ni e, Keipawh hi i tan ka ding reng anga, I mamawh hun a I pan theih turin ngawi reng hian ka lo thlir ve thin dawn che alawm. Ka la hmangaih takzet che. Hriatsang, par chhuak ve ngai lo tur kha kuhmum kha tichhe mai lo in ka lo nghak fan fan anga, a par chhuak dawn ta lo a nih pawhin khuanu remruat danah kan lawm zel Mai a ni ang chu tiraw. Nang leh kei hi chu intawng tura duan ni siin, kumkhua erawh kan tan a ni ve ta lo a nih dawn hi. A na khawp mai. Mahse, ka tuar chhuak thei em em thung ang tih hi ka ring tlat a ni. 

Hemi hnu hi chuan inbiak chhunzawmna nei lo in hun leh ni te Kan chhiar chho ve bek bek reng a. Țah chang te pawh la awm ve thin fo mahse la, Pathian hian lungngai taka hun kan hman reng hi alo phal bik lo te pawh a ni ang. Hlim taka nuihna tur thil tamtak te mjn tawn tir ve thin in, Chung hunah chuan Mahmingi hi a pawimawh zual lawr lak ka ti lo thei lova, hetiang em em a min hmangaih tu leh ka hma lam hun min thlir pui thiam tu thiantha ka nei hi ka lawmin ka hlim a, chakna tamtak min pek belh a ni ka ti lo theilo. Ani tih loh ah chuan Ramchhuana hi a pawimawh leh bawk a, ani pawh hian tunah rih chuan hmangaihna chungchang te kha min sawi pui tawh rih lo in thian ang hian Kan inzui ve ta thin a, nitin deuh thaw inhmu ta na na na chuan ngainatna chin tamtak ka nei ve tawh bawk. Tin, misual a nih lohna hian ka rilru hi a nei lian zual em em a, ka hlim theihna tur a duh in a theih tawp a chhuah ve thin tih ka hmu tawh bawk a, a kianga han awm vel pawh ka thlahlel in ka phur thar ta thin khawp mai. Thiantha tak a ni e ka ti lo theilo. Tunah chuan ka nu leh ka unaunu te pawh khan ka duhthlanna min pawm sak ve tawh a, min ti lui tawh ngai bik lo. Tin, ka u pawh khan vawi tam min thlem in a kianga awm tur pawh chuan min rawn sawm ve thin mahse la, ka duh tawh lem lo thung a. An hnen a awm kha ka duh lo a, ka chak tawh vang lam nilo in, awm duh lohna chhan lian tak dang ka neih zawk vang a ni e. Nia, ka u te chhungkaw bula ka Khawsak leh chuan amah ngei mai kha loh theih lohna vanga ka hmuh fo kha a țul Leh dawn tih ka hria a, ka zuam tawh lo a ni ber. Keimah ka inhriat chian tluk zetin kha mihring hnawl harsa ka tih țhin zia kha ka hrechiang thawkhat ve tawh a, a hmel ka hmuh rual a ka danglam leh tur zawng zawng te nen hian hmuh fo loh ka thlang ta zawk a ni e. Ka tuar chhuak theilo mai ang. 

Mahse, zan khat erawh chu kan veng chhungah chuan tlangval mitthi pakhat kan nei palh hlauh mai a, loh theih lohin kan inhmuh leh ngei a țul dawn tlat. Hei hi chu ka hriat lawk kha a ni ve reng reng a, a chhan pawh, tuna kan veng mitthi hi Hriatsanga thian pakhat ni ve in, a boral tih ka hriat rual rual khan ani pawh kha a rawn Kal dawn tih hi chu ka lo ring lawk sa daih tawh. Alo Kal ta reng bawk a. 

Nula han nih ve takah chuan veng chhunga chhiat tawk te chu kal loh ngawt thu awm hek lo, kei leh Mahmingi pawh chu mitthi in lamah chuan kan inzui lut ve ta nge nge a. Ruang zan zalhna bulhnai lamah chauh chuan thutna tur thutthleng awl alo la awm zui. Hmun dang reng reng chu an thut khah vek tawh avangin Zak Chung Chung chuan chu lam chu kan pan dun ve ta rawih a. Ka țhu fel, ka tawngtai zo chiah tih a ka han hawi chhuah leh nak chuan kan hma chiah tlar hnungah zawk khan Hriatsanga kha ka va hmu fuh leh ta mai a! Chiang em em hian min lo la en reng zui chu niin. Ka mit zui sulh nimai hian ka inhre tawh. Rang taka ka mit chu la sawn nghal in, hmun dang te chu ka han thlir kual ve takngial a, mahse, awmzia a awmlo. Amah ah bawk khan ka mit chu tawp leh țhin in, ani lah khan a hma ang tho khan min lo la en reng zel bwk si a, Mahmingi hnenah chuan thutna inthleng pui mai te chu ka rawt hman lek lek tawh. Mahse, awmzia a awm tam dawn Chuang lo tih chu ka hrechiang. Kan inhma tawn ve chiang em a ni. Ka tihnghaihna hrelo chuan maimitchhing chunga zai ve ngial te chu ka han tum thin a, ka thei thlawt lo. Ka thiam lo a ni zawk mah. A mitmeng leh min rawn melh dan em em ah chuan a pawi ka sawi ta emaw intih hial te pawh a awl rum rum dawn a, a meng thip si. A lungawi lo viau a ni tih chu ka hria alawm. Nia, ka chungah hian lawmna tur eng thilmah a nei tawh lova, beidawng turin ka Siam a, ka kal tir bawk a, ka ti na em em ang tih chu ka ring. Mahse, hun hmasa lama min tih dan kha ka ngaihtuah kir Chang erawh chuan ngaidam fel vek tawh mah Ila, ka na nawn ve leh țhin. Ka mamawh laiin a awm duh lova, biak ka tumna a Haider lui char char bawk a, ka u dawt sawi ah tawlh thlu in thudik hailan a tum miah lo bawk a nih kha. Tin, zu leh sa ah tlan in tikhan fimkhur lo tak leh kei min ngaihtuahna chhete pawh nei hauh lo khan nula dang ava kawp zui leh duh bawk a nia. Khatih hun chhung zawng khan kei hian eng thil nge ka lo tih ve. Rinawm takin ka lo nghak a, alo let hun tur thlir in hun leh ni te kha ka lo chhiar thin a, mittui nen ka lo nghak fan fan a nih kha. Tun thleng hian kei chu tihian ka la rinawm reng asin. Heng zawng zawngah hian ka ngaihdam tawh thu sawi zo vek tawh mah Ila theihnghilh erawh harsa tak a ni e. A theih loh. Ka damchhung hian ka theihnghilh tawh lo bawk ang. 

" Kan va zung ve lawk dawn emni" Mahmingi'n a rawn tih chuan ka lo mu thlu veng veng tawh a ni tih ka in hrechhuak chiah a. A zialo thin teh e. Ka mit ka men leh rual a ka thil hmuh hmasak ber chu amah tho kha niin, chiang fahran hian min lo la en ve veng veng tih ka hria a, ka hawi sawn nghal daih. 

Pawn Kan chhuah fel rualin zunna tur hmun biru deuh chu kan zawng nghal sawk sawk a. Nuih te hi a za duh lek lek zawk. Zanin hi tlaivar zan tur a njh angin a khât tawk in zunna tur Kan la dap chawp reng dawn chu a nih hmel a, a peihawm loh teh e.

Kan zung zo, kan puanbih te Siam tha mawlh mawlh a kan lo titi dun ve nak nak lai chuan hnunglam atang hian min rawn be ta phut mai a. Ka phu zuang dawrh thei. Min la nuih zui. 

" Min lo nghak ula, kan lut rual dawn nia"  Hriatsanga'n a rawn tih chuan Mahmingi nen khan Kan lo in melh leh ralh ralh thin a. Mahmingi'n 

" Nghak mai Ila"  a rawn tih tak tlat si ah chuan mahni chauh a lo zu luh thu awm hek lo, ka aw ve ta ngawt. Tichuan, a meizial zuk zawh te Kan nghah leh te te hnu chuan lut Turin Kan inzui leh ta țham țham hlawm a. Chutah, Hriata bawk chuan 

" Ka bulah rawn insawn daih rawh u. Aizawl khaw bul lawka an chhungte kha an rawn thleng khawm tep tawh a, in thutna kha an rawn luah duh ang ka ring"  a rawn tih chuan Mahmingi nen bawk khan kan lo in melh ralh tawh. Ka duh a ngem tih pawh ka hrethiam lo e. Mahse nia, an chhungte nge nge hi chuan ruang kil hi an duh ve thin si a tiin Hriatsanga bulah chuan kan țhu sawn ve ta zawk a. An inkarah kher min la thut tir zui. Hemi te pahnih over zia hi chu aw. Mahmingi pawh hi a, nupui nei lai a ni tawh tihte pawh a hre ve reng a, min duhpui lutuk leh min lainat thin lutuk hi amah hi ka lo khawngaih let tawh zawk. Kan chanchin engkim a bo a bang awm lova min hriatpui vek tu kha a ni miau a, a tih awm tak a ti e, ka ti ta mai. 

Chutiang a inhnaih fahran a kan han thu dun leh ta chu ka awmdan zawng zawng hi a buai zo vek niin ka hre leh tawh a. Ka khawr țut mai. Ani lah khan a ruk thei ang berin ka kut te chu a rawn vuan a, a hum lum zui vang vang bawk a. Mihring kan thahnem ve bawk nen ka lo hnial duh ta bik lo a nih kha. Mahse, chhungrilah erawh hi chuan inthiamlohna ka nei ve lo thei lova, hrehawm pawh ka ti a, kut inhum sak mai mai anga lang mah nise, a nupui rilru tur kha ka dâwn tel lo thei lo. Nuam pawh ka ti thlawt lo a ni. 

" Muante, Zomuan, khua a var dawn. Harh ve tawh rawh"  tia min rawn sawi nawk nawk takah chuan muangchang hian ka han meng chhuak leh ta diar diar a, ka awmna hmun chu mitthi in a ni tih pawh ka hrechhuak ve leh ta chiah.. Tin, Hriatsanga dar ngheng Chung khan ka lo muhil bawk tihte chu ka hre leh a, amah chu ka han melh chho nghal vat. Ani lah chu bang ngheng Chung hian thlamuang em em in alo la muhil ve sek sek reng a chubakah, ka kut pawh kha nghet fahran mai in alo la hum bet tlat reng bawk tih chu ka hre zui leh. Ka nui zui ve ta suk mai. Ka kalbo san daih chu a hlau awm hlemai ka ti. Kalbo san hi ka chak loh tehlul vei nen hian. A.. Ka ngaihtuah nawn tluk tluk peih tawh lo e a. Min ti hah. 

A kutah chuan na vak lova kheuh sak leh zeuh thin in, ani pawh chu a rawn meng chhuak ve ta hlawl mai a. Mut te chu ala kham loh hmel takzet zet. A meng phelh Phang mai alawm. Kan lam a rawn hawi lai tak chuan Mahmingi nen khan nui țha Chung hian Kan lo melh ve reng si a, a che lai ve zeuh tih pawh ka hria. 

" Kan bang tep tawh a nimaw" rawn ti vei supin, kei in ka lu chu ka lo bu pah ve nghat nghat reng a. A khât tawk hian a ham pah leh bai bai thin. Mahse, chuti Chung Chung pawh chuan ka kut a chelhna kha chu ala thlah duh Chuang hauh lova, a chelh nghet zual sauh emaw tihtur hian thlah mai chu a la tum loh hmel nasa. A hre tawh lo zawk emaw ni le ka ti hial mai. 

Ban hla sa tura kan din lai te, kan zai chhung zawng te pawh khan ala thlah duh Chuang hauh lova, a khât tawk hian ka han melh chho leh zeuh thin. A hre chhuak tawh lo reng reng nia. Mahse, Lal tawngtaina hun kan neih dawn a ruaiah chuan a darah khan han nek leh salh thin in, a ngaihna hriat loh hmel zet hian min rawn chhuk melh ta hû mai a. Mitmei hmang hian Kan kut chu ka zu melh pah ta zauh zauh. A hrethiam ve ta chiah. Chutah, rang em em a min thlah Chung hian

" Tihpalh" a ti zui leh nawk nawk a. Ka lo nui ve vur vur ringawt tawh. 

Ban rual rual chuan mahni in lam theuh kan pan nghal sang sang avangin ani nen khan inhmuh falna hun kan nei thei tawh lova, hmuh nawn tawh loh pawh a pawi ka ti lem lo. Insumtheihna ka hloh vaih zawng in a pawi dawn em mai. 

In Kan thlen hnu a ka zan lam thuamhnaw ka thlak lai te chuan ka taksa te chu an rawn na zui ta țhem țhûm mai a. Ka ruh chuktuah tin mai te hi rawn na chhuak in, vawt ka ti vak a, ka khua chu a rawn sik zui leh ta hluah mai a nih kha! Zan khat lek tlaivar te pawh hi ka zo lo thin bik asin aw. Vawt nasa tak chuan min rawn tuam nghal hlup hlup in ka chal ka dek zui vat a, alo sa vût tawh mai bawk. Chutah, rang lutuk a khum lam pan pah chuan khur hlawk hlawk chungin 

" Thiani, ka mu lawk dawn aw. Ka na vek. Ka khua a rawn suk leh thut a"  ti nawk nawk in khumah chuan ka tlan lawn a, puan chhah fahran nen chuan ka inlukhup zui ta nghal. A vawh dan chu pui tak a ni. A nuam lem lo. Heng thil vang te pawh hi a nia, zan hi chu ka men rei ve duh ngai miah loh ni. Ka tlaivar hlek tawh chuan tihian a tuk zingah ka buai zui tlangpui zel. 

Rinai takin ka khawsik chu a reh tha duh lo phian mai a. Damdawi ka ei tawh hnuah pawh chuan awmzia reng reng nei thei lo in ziaawm lam ka pan thei thlawt lova, ka taksa na nise a reh tha duh Chuang bawk hek lo. Chutiang zelin Mahmingi mang pawh chu ka ti ang ru țan tawh tih ka hria a, tihngaihna vak ka hre bik Chuang bawk silo. 

" Damdawiin a Kal te i duh em. Hetiang ringawt hi chu a dik thei in ka va hrelo tak. I khawsik nise a reh tha duh miah silova, in check up thei tal la ka duh hle mai". Mahmingi 'n a rawn tih chuan lo chhang let peih lo in ka inlukhup lui deuh tlat a, ka mit thip lutuk mai te pawh chu tih hahdam nan tiin ka chhing zui vang vang bawk. Diktak a sawi chuan ka awmdan hi a nuam hlawl lo ve bawk alawm. Mahse, damdawiin a va in entir kher kher chu ka huphurh piahlam ah, natna dangdai leh hlauhawm taktak te kha ka neih thu min lo hrilh palh ta se, ka duh lo ni rawh se. Ka ngam thlawt lo a ni e. 

In check up chungchang ah Mahmingi pawh ka tih beidawn tak țhak ah chuan a ngawi zui ve ta hle hle a. Min nawr lui duh tawh lo bawk. Tin, ni hnih chhung zet khawsik in min thlah duh loh takah chuan chaw ka ei thei mang lova, mut nise ka mu tlem em em reng a, chu chuan ka taksa te pawh chu rawn tichhe ve țan in, ni hnih chhung lek khan ka tla ve kawk kawk hman hial. Ka damloh ni khatna ah kha chuan Mahmingi pawh khan a hna te kha țhulh in nileng mai khan min awmpui ve a, mahse, a hna chu țhulh reng chi ni mawlh hek lo, tunah erawh chuan ka duh dan angin hnaah pawh a Kal ve leh tawh a. Mahni chauh chuan nileng Zak in ka lo awm dawn ta a nih hmel. Khawhar thlak duh ve hle mahse la, keimah vang mai mai a ka thiannu in a hna a țhulh phah reng kha ka duh dan a ni ve bau lo. 

A ni thumna rawn inher chhuak leh in, ka khawsik erawh kha chuan chhetemah in min la thlah ve duh eih lova, a hrehawm in ka hne tawh takzet. Chumi ni chuan khum a mut beh reng chu ning ve tawh in taksa chak lo Chung Chung chuan thut khawmna lamah ka lo va țhu phei ve leh rih thin a, tv te pawh chu en ve ngial han tum țhin mah Ila ka mit thip lutuk vang ber khan ka mengrei hleithei tlat lo. Chutia, muhil leh hil lo inkara ka lo awm ve mek lai chuan kawngka kik thawm rawn awm in, kawngka chu chhung lamah ka lo kalh hran lo bawk a, hawng mai tur chuan thei leh theilo hian ka au zui ve ta țawk țawk. Ka țawng chu pawnlam ami khan a rawn hre ve thei a ni chek ang, reiloteah hian kawngka pawh chu a rawn hawng zui ve ta mai bawk a. Ka meng phawk nasa nghal teh asin. Ni e, khatiang a kawngka rawn kik tu kha tu midang mah ni lo in amah Hriatsanga ngei alo ni a! Mak tihna hlir hian ka khat bawk. Engtinnge inah ka awm dawn tihte hi a rawn hriat chak zawk le ka ti. 

" E, nang chu!" zawi sapa lo ti ve nghal in, ani thung kha chuan nui var var Chung hian kawngka te pawh kha a rawn kalh tha ve leh mai a. A che vel chu ngawi reng hian ka lo thlir zui reng ringawt. 

" I damlo tih ka lo hria a, ni thum lai a ni tawh lehnghal a nimaw! Engvang in nge damdawiin ah i Kal loh"  rawn ti zui nghal bawrh bawrh in ka bulah chuan a rawn țhu thla ve a. Thawk han lak zui halh pah hian ka chal te chu a rawn dek leh a

" In entir ang. Hetiang ringawt a khawsik tawmbo pui reng hi chu a țha lo a nia. Kal ang aw"  rawn ti leh mawlh mawlh in, kei chuan nasa zet hian ka lu chu ka lo thing ve leh nawk nawk tawh a. Ka duh lo. Damdawiin a Kal hi ka chak hlawllo. 

" Aih! Tihian damdawi te ka han ei tam leh deuh anga ka dam ve thei mai ang. Damdawiin a kal chu ka duh lo. Min hruai lul suh" ka țap lo chauh tawh hi a ni ber e. Mahse, keimah ang tho a mi luhlul Hriatsanga lah chuan 

" Ni love. Engmah hlauh thawn tur thil a awm dawn lo. Doctor te khan i taksa tana tha tur damdawi an lo chawh che anga, I dam vat thei zawk dawn asin. Ti rawh, insiam pawh a ngailo, tikhan a nimai" ti leh zung zung in ka hnial hneh thei dawn Chuang lo tih ka inhria a, hreh zet mai chuan ka lo bu zui ve ta nge nge e. Ka va han huphurh tehlul. 

Wipes hmang a ka hmai mawm lutuk a rawn hruk fai  thuak thuak hnu leh, ka sam bawr chhawr zet a rawn khuih mam leh vek hnu chuan pawnlam ah zawimuang leh dimte hian min kai chhuak ta det det mai a. Bike seat a țhu chho tur ringawt pawh khan Keima tha chakna chauh chu a tawk zo leh tawh hauh lova, Hriatsanga puihna tello  chuan mi derdep leh chak lo tak mai chauh ka lo ni e. 

Damdawiin kan thlen hnuah pawh Hriatsanga chu a hmanhmawh tawh in a phi ruai reng tawh hi a ni hawt a. Keini aia kal hmasa zawk in entir tur te kha an ngaih thiamna va dil kual leh zung zung in kei chu ka  emergency tawh zia thu chu ava sawi kual zui leh ta par par mai a nih kha. Lo inthlahrung hle mah Ila ka tan khan tih theih a awm ve lova, ka meng hram hram chauh a ni tawh bawk si. A hrehawm takzet zet hi a ni ber e. Mahse, Pathian khian mite thinlung ah khan hna rawn thawk in, Hriatsanga dilna te chu an lo pawm ve ta sap sap hlawm a, a hnuhnung ber ni tur kha mite thatna zarah khan

ka in entir hmasa thei ber ta a ni. Ka lawm takmeuh meuh. 

Tichuan, ka thisen te chu la in, ka zun te thleng mai chuan min test sak fai ta vek a, result chu rei lutuk pawh nghah ngai lo in a rawn chhuak ve leh mai. Engkim chu a țha ti Ila, ka zunkawng lam hi alo fel chiah lo ve deuh a, chu chuan khawsik sang tak rawn Siam in, nachhawkna damdawi mai mai kha chuan min lo chhawk har deuh ta a nih hmel chu. Ka result ka hriat rual khan lawm avangin ka thaw zui huai thei a. Chutihrual chuan tunhma aia ka in enkawl uluk lehzual chu a țul dawn tih pawh ka hria. A harsa lo turah ngai phawt Mai ang. 

Hemi ni atang hian chhum lo chat lo in Hriatsanga pawh chuan ka damlo chu min rawn vil leh ta tluk tluk mai a, a nupui lakah pawh khan ka inthlahrung ru ve viau. Rawn hmu in rawn hre ve khero pawhnise keimah ah hian inthiam lohna lian tak a awm sa tlat tawh a. Hrehawm hi ka ti bang thei thin lo zawk a ni. 

Chutiang a mahni chhungkua leh mahni hna pawh ngaihsak hleithei lo khawp a kei ringawt min buaipui takah chuan hrehawm ti tak chungin ka kam khat leh ta nge nge a. Mahse, engatanmah a ngai duh Chuang lo nia. 

" I dam chian hma chu ka enkawlna hi I mamawh alawm"  lo ti ve tlat in, tihngaihna tak pawh hi ka hre thin lo. A khât tawk hian Ramchhuana pawh khan min rawn ngaihven ve tho mahse la, min inti neitu taka Hriatsanga alo Khawsak ve fo tak ah chuan a rawn inlan khât ta tial tial a, a rei hnuah phei kha chuan a reh zui ta hmak a nih kha. 

Ni khat erawh chu ka message dawn thar chuan min ti phu ve deuh zawk thei a. Ka nghilh zui dup nimai hian ka inhre nghe nghe. Nia, Hriatsanga nupui hnen atang khan message chu ka dawng miau a tin ni. 

" U Muante, ka pasal Hriata nen hiann in tunhma nun thil thleng engkim te kha rawn hmu in hriatpui ve lemlo che u mah Ila, khawngaihin hun tha min han pe ve la, ka pasal rilru hi hneh a, nang a theihnghilh theihnan che hian min han pui zawk ta che. Tunah chuan kan pahnih inkar a kan fa tur pawh hi alo piang ve tep tawh a, ka fa hian pa a nei lo tur leh, a pa a hrelo tur hi ka ngaingam thei ngang bawk silo. Khawngaih takin fahrah dinhmun a ding thei reng kan fa lo piang tur mawlh hi a hma hun tur min han ngaihtuah sak ve la, Hriata hi khawngaih takin lo haw tir tawh ta che. Hetah, a nupui leh a fa piang mai turin nghakhlel takin kan lo thlir reng tawh a nia"  tih chu a rawn thawn ta nual mai a! Thin phu dup dup Chung leh mittui tling piau in a message chu ka chhiar chhuak ve ta vek. Ka ti ril te hi a rawn khur der der tawhin ka hre hial a. Chu erawh, thinrim vang ni hauh lo in Hriatsanga hnawt bo hlen tur anga ka in suangtuah vanga chhungril natna zawk niin, ka tih ngei erawh a țul dawn tih ka hrechiang a, ka na lawk a ni. Harsa ka ti lutuk ringawt. Tin, a nupui lakah pawh khan ka inthiam thei ngai dawn lova, thupha nise ka chawi seng bawk hek lovang. Tunah chuan tawngkam ringawt a inthiarfihlim tir tum aiin ngawi reng a kalbo san mai chu ka tan a țha zawk dawn tih ka hrethiam tawh a, chu hun lo thleng tur mawlh mai chu mittui nen ka nghak ta a ni. 

Dam tha pangngai taka thil engkim ka tih leh theih hnu chuan office te dawr kual in, ka tih theih ang ang chu ka ti kual zui nghal mawlh mawlh a, ka zo fel thei ta hram e. Tunah chuan ka Chung a mite thu chhuak chiah nghak tawh in, Hriatsanga ka kalbosan hun tur alo hnai ta! Ka huphurh a ni. Mahse, ka huphurh a ka hreh vang ringawt hian thil zawng zawng te kha an that leh phah tawh dawn Chuang lova, chutihrual erawh chuan Hriatsanga nupui tan erawh kha chuan hlimna chhete tal pawh alo thlen thei ve tlat. 

Ka dam fel tawh hnuah pawh a khât mawi tawk a rawn Kal chu ala sim duh Chuang reng reng lova, tunhma ang em em kha chuan a rawn lawr nitin zantin tawh bik lova, ka tan pawh hian a thawven thlak lehling zawk hial e. Chutihrual in, ka ngai em em a, ni e, ka zep lo. Ka ngai lutuk ringawt. Nitin mai hian ka kiangah awm thei se la, hun te hmang ral dun in hlim takin titi dun leh Ila tih tluk a duh leh chak hi ka nei awm lo asin. Engkim mai te kha siamthat leh theih niin, hun hi her let leh theih chu ni ngat se zawng, khang hun tluk a her let leh chak kha ka hringnun ah hian ka nei leh tawh kher in ka rjng lo ve. Hmanlai chang ve Mai tur kan pahnih nunhlui te kha chhui kirin, zan hun chu ka hmang liam ve a, leiah hian  ka hmangaih kha nei thei dawn lo mah Ila, Khawvel tharah erawh chuan ka ta tur liau liau a a rawn pian ve tawh hi ka ring nghet tlat. Rin tlat pawh ka duh. 

Thla khat dang a liam leh hnu chuan ka dilna te pawh kha chhanna hmu ve thei tawh in kei chu thingtlang khaw lamah transfer ka lo ni dawn ta a. Ka phur hauh lo. Mahse, tun atang chuan kei leh ka chhungte tan chauh nun hi ka hmang ve tawh anga, nun bul ka țan tha leh anga, hma lam pan tumin chak takin ke hi ka pen tawh dawn a ni. 

Thu ka dawn dan bawhzuiin min transfer na tur thingtlang khaw pakhat lam chu midang pawh hrilh hre vak lo in ka pan zui ta nal nal. Tin, Aizawl khaw chhung ka Chhuahsan rual rual khan mittui tla zawih zawih Chung in Hriatsanga number leh amah biak pawh theih na tawh phawt chu ka delete a, ka block fai nghal vek bwk a. Heng zawng zawng te hi kan pahnih tan a țha ber tur leh rilru fim pu chunga ka thil tih an nih bawk avangin ka inchhir leh hian ka ring lo. Inchhir tur lah ka ni bawk hek lo. Eng ang pawhin hrehawm se, na tawpkhawk pawh tuar dawn mah Ila he thil hi chu ka tih tawp ngei ngei a țul tih ka hria a, mualpho aia thlan awm zawk inremna leh hlimna thlen tu nih hi ka thil duh ber a ni țhin reng a ni.

Aizawl khaw pel a hmun hla em em mai han pan vang vang chu hnuk no te hi a chhuak awlsam bik in, lung hlui pawh a leng zui nghal rum rum thei hial a. Ka awmna tur khua ka thlen hnu ngat phei kha chuan ka lung hi a leng zual em em tawh a, kir leh daih mai te kha ka chak hman rum rum hial nia. 

Thla khat dang ka awm leh hnuah pawh ka lunglenna chuan min la kiansan tha duh hauh lova, ka hmangaih kha ka ngai em a ni. A tel ve lohna hmun hi chu hmun reh leh khawhar mai niin, a ho ru duh em em mai ni hian ka hre bawk a. Va biak that leh mai te kha ka chak phah thin hial asin. Mahse, chu chu thil tih chi leh tha ber a ni tawh lo tih hrechiang tu chu keimah hi ka ni a, ka duhthlanna vanga helai hmun a awm pawh hi ka ni bawk. Ka tuar ve tur a ni. Thiannu Mahmingi sawi dan ah chuan khatia ka kalbo hnu reivaklo ah khan Hriatsanga chu alo va leng phei leh niawm tak a ni a. Ka chanchin ngaihven tur a Kal a ni nghe nghe. Mahse, khatia ni engemawzat chhung hmuh tur awm lo a ka reh zui tak vang vang ah kha chuan ka phone number ah lah min be tlang thei tawh bawk silo nen a mangang khan Mahmingi chu ka chanchin alo VA zwwt ta sek mai a. A tawpah chuan thudik chu an lo inhrilh ta ngei a ni ang. A tuar thiam lo hle tihte thlengin min rawn hrilh ve a, tin, min biak pawh theihna tur number te pawh chu alo dil a, mahse, Mahmingi erawh kha chuan ka phone a chhiat thu in alo chhang hlauh mai. Hetiang a ngawi reng a ka kalbosan dan ah hian a nupui kha mawh chhia in alo haw tir bawk a niawm a! Mahse, nau nei mai tawh tur a nihna ah amah Hriata chhungte zawk chuan amah pawh râwn lem lo in a nupui tlan chu an lo va koh sak leh a niawm a, heti Chung pawh hian Mahmingi chu lo va tlawh awl lo in ka chanchin tih loh chu sawi tur a hre thin silova, a țap leh ngawih ngawih zel tih thu te pawh min rawn hrilh thin. Ka khawngaih lutuk hi ka tilak vek thei niin ka inhria a, engemaw Chang phei chuan ka ngaihtuahna te hi kal sual ve leh thut thin in, a nupui chu țhen tir a, mualpho pawh huam a amah neih mai te chu ka duh leh rum rum thin hial a. Mahse, ngaihtuahna fim ka hmang zui leh vat thin thung. 

Chatuan hi keini pahnih tan a Siam leh duan a ni ve lova, tihian lung dam lo tak chunga dam chawp kan zir hi alo țul dawn ta a nih hi. 

Bawiha, nang leh kei chu he khawvelah hian rem ve thei dawn lo mahse la, Khawvel tharah erawh chuan kan pahnih chauh a leng dun tawh turin ka lo nghak reng dawn che nia aw. Lo dam țha la, him dam taka kan la intawn ve leh ngei theihnan Chung khuanu khi lo dil ve thin ang che. Khawvel thar hi a awm ve thei ngai te a nih chuan i awm ve lohna hmunah ka awm duh tawh lo a nia aw. I kiangah chauh awm ka duh a, I ke pen rual zel a pen ve in I ta chauh nih ka duh tawh ang. Ni e, chumi hunah chuan kan inhmangaihna kuhmum te hian par an chhuah ve ngei tawh dawn si a. 

THE END

"" "" "" "" "