MAPUIA

MAPUIA

Vanlalpeki Fanai

*****************

"Innei tawh rawh u. In inngaihzawnna pawh a rei ve tawh thawkhat alawm le" chu tawngkam chu Mapuia nen Kan inkawp thu hria apiang ten min tih duh dan leh fiam thjn dan tlanglawn a ni tawh a. Ka nuih liampui vel mai mai zel. An sawi ang deuh khan Mapuia nen hian kum 2 Chuang chu kan lo inzui ve tawh reng a, kan inhriat țan na pawh, khaw khat kan nih chu thuhran lo ni ta se, amah hi khaw dang daih a sawrkar hnathawk a awm bo thin a nih vangin kan khaw chhungah hmuh tur a tam lo em em a, keini chhungkua ve thung hi thingtlang khaw pakhat atanga helai a pem lut ve leh Chhawng kan nih ang hian ka tan chuan ani chu mikhual emaw tih mai awl tak a ni a. Zan khat KTP inkhawm zanah khan ani pawh kha rawn inkhawm ve mial in, chu chu ka vawikhat hmuhna a ni nghe nghe. Chutah chuan mikhual tlangval emaw tiin hmeltha ka ti ru em em a, ka melh zauh zauh lehnghal a nih kha.

Inkhawm ban rual chuan ka thian ka kawm ve ber thin Nunsangi hnenah chuan tunge a nih a, tute mikhual tlangval nge a nih ka han zawt chhin vel a, LalNun Sangi lah chu a nuih alo za ta phian bawk si. Nui uarh uarh chunga Mapuia va pawh nawk nawk pah hian

" Puia, ka thiannu hian mikhual tlangval emaw a ti che a. Hmeltha pawh a ti tel maithei che. Taktak a, engtik in nge ilo haw a" ti zui duah in amah lah chu ala khek ang duarh duarh a, ka Zak lutuk kha khuk ral Chem Chem mai ka duh phah hial. Chutihlai a Mapuia hmel mawlh chu ni, khatiang thu ka thiannu in ava hrilh lai pawh khan amah ah danglam hi a awm eih lova, melh khat pawhin min rawn melh hek lo. Amah hmeltha lo ti ru ve em em tu tan chuan beidawnthlak deuh mai asin.

Nunsangi nen chuan inbe zui luam in, kan in kalsan ve thei ta hram a. Ka sik zui ta nawk nawk.

" I at theih zia hi maw. Hmeltha tih vel kha sawi tel kher pawh a țul em ni. Hmeltha pawh ka ti lo hrim hrim" lo ti hluk hluk in ka lungawi lo angreng hle. Nunsangi lah cuan ho tih hmel tawk a min ner khum sak sak Chung hiam

" Mapuia te chu e, kan khaw tlangval luck leh hmeltha a nia, khatiang tawngkam kha chu ngai ah a nei tawh ang. Amah hi mi chapo chi leh han induh chi a ni hran lova, kan la be phak mai. Mai alawm. Khaw thenawm nurse chhelo zet pawh sawn a rawn hel thin tak asin. Mahse, alo hnar ta niin ka hria" ti zung zung in, a thil sawi ringawt mai chuan min luah ta ngut ngut pek a, ka ngaihtuah tawp thei ta reng reng lo mai.

Tunhma zawng khan engtinnge ka hmuh loh a, ka hriat loh theih zawk. He khuaah hian kum leh a chanve lai chu awm ve tawh in, ani hi ka hmuh awm rneg reng ka lo la hre ngai lova, mak ka inti zawk. Mahse le, thingtlang khuaah pawh khaw te chhe lo tak Kan nih ve avang hian in hriat kim vek chu a Har ve tawh maithei e. Mahse la ti hram teh ang. Hetiang ang tlangval hmeltha leh chhelo te chu hman hmanah khan lo hriat daih tawj awm tak ka la ti fan tho.

Keini chhungkua hian eichawp dawr te neiin chu chu nitin in ka nghak ve thjn a, tin, kei hi Lalhmingmawii niin, unau pathum zinga a upa ber ka ni nghe nghe a. Ka nau te hi mipa ve ve an ni bawk. Kan chhungkua hian huan Lo ram zau tak nei ve in Chutah chuan ka nu leh pa te hi an dam phawt chuan nitin mai hian an thawk chhuak ve thin bawk a, chhungkaw hlim leh inngeih tak tia sawi theih Kan ni bawk. 

" Mawii, tukin chu thawh i hai ve deuh a nimaw" rawn ti lut lawng lawng tu chu UDuha niin, kan veng chhung a tlangval senior tia hriat Lar hat hat tawh a ni a, hmelchhia tia sawi tur ni miah lo mahse kei chuan țha ka ti lem lo. Chutihrualin hei chen chen nupui nei lova ala awm nachhan ber erawh hi chu a hmelthat loh vang lam ai mah chuan a duhtui a, a hausakna chiah ei pui tum tu hmeichhia a tawn fuh thin vang niin an sawi. UDuha hi sawrkar zem zen a nih piah ah, an thlah tute atang tawh a mi khawsa thei chhungkua kha an ni tawh hrim hrim a, sum lamah chuan an buai lo hle ni tur a ni. Tihian, zing tin mai hian ka dawr hi rawn len luh nan a hmang ve fo thin a, min rawn ngaina der ve hle thin. Keipawh in chutianga min ngaina tu na na na chu nel na chin ka nei ve a, mahse amah chu ka duh phah Chuang hauh lo. Ani hi chuan he khua kan pem tirh atang khan min duh tih hi ka hre daih tawh a, ka bula a sawi piah ah mi hrang hrang bulah alo sawi tawh bawk. Thenkhat phei chuan inngaizawng chhuah hial pawhin min chhuah titih tawh. Duh lo teh mah Ila thingtlang angah ngat phei chuan thu hi a darh chak si a, min fiam tawk hi chu an la awm ve reng. 

Rilru kil khatah Mapuia kha a cham zui reng a, a reh thei ta reng reng lo mai. Amah chu hmuh duh in thlahlel eng ang mah Ila Kan veng hi a inhnaih teh chiam lova, duh hun hunah a hmuh fuh theih ngawt loh. Kan pahnih inkarah chuan eng thil mah la thleng hauh lo mahse amah kha ka ngai ru veng veng thin a, hmuh leh chakna hian ka tui hal ni ta berin ka hria. Ka zak zawk. 

Tuk khat erawh chu KTP hnatlang an rawt angin Mapuia hmel hmuh theihna hun tha ni turah ka ngai a, ka phur phian. Phur em em a insiam in ka feh chhuak ve ta a, ka duh dan ang ngei chuan Mapuia pawh chu alo hnatlang ve taktak. A rawn chhelo lehpek kher lehnghal a. Min ti tuiral zo vek dawn in ka hria he mihring hian

" Mapui, helam ah lo Kal ve la, i awmna kha chu a hahthlak bik lutuk, lo Kal daih rawh" Nunsangi'n a han tih chuan Mapuia pawh chu rawn hawi phei vat in, kan mit leh mit chu ala intawng siah zui a! Ka țek chhak. Tichuan, ani pawh chu ka rin loh dan deuh hian ihe lo in kan awmna lamah chuan a rawn Kal ve ta Mai bawk a, ka mur leh sung sung tawh nia. He mihring hian min ti danglam hneh thjn ka ti. A ngaihna pawh ka hre bik lo. 

" Nangni thian dun chu in inkawmngeih hmel hle mai. Ti daih ila Sangi, I thiannu hi ka va hmu ngailo ve" Mapuia chuan hnathawh pah chuan a rawn ti ve ta khauh a. Ka ngaihtuahna hmangin ka lo let zui deuh tawp tawp thei. Ka thiannu bulah ka chanchin a zwwt ve a nih chu. 

" Hmu ngai lo ang. I awm khat bakah, anni hi khaw dang atanga rawn pem lut ve tho an nia, mahse a rei ve leh tawh. I lo haw khat em alawm" lo ti duah in Mapuia chu a bu deuh nghat nghat renga. 

" Nia haw khat. A hming a hna han neih ve si chuan chawlh hi a zing lo ve em a, tun pawh hi ka rawn dil lui mai mai. Ka nu in min rawn chah nasa bawk nen" A aw te hi ava han pa ngawih ngawih tak em. Ti nge le, hetiang em em a mipa pakhat ka han vei tak viau chu ka ti. Hetiang hian ka awm ngai pawh ka hre lo e a. 

 " Mapui, khawi khuaah nge i thawhna chu ni reng reng a. Nula te an hmeltha awm sia, nupui inei ve tep tawh anga" Zak Chung chunga ka han tih ve chuan ani chu alo nui zui ta hak hak mai a. 

" Rawchhip lamah daih a nia. Nei mai bik love, chutiang tur pawh ka la melh hman meuh lo chu ni e" rawn ti ve in, dawt nge thutak tih chu hrelo mah Ila ka lung hi a lo awi ve hliah hliaj ringwt. Chumi nileng chuan kan pathum bik chuan kan inzui char char a tih theih a, thla te la ho in ka phone camera chu alo tha deuh ber bawk nen a rim malh malh hle. 

Chau in hah ve hle mah Ila hemi ni hian ka hlim ru veg veng reng a, mahni In thlen hnuah pawh chuan ka nui lut vur vur lo chauh. 

Inbual fai hma hauhin ka phone chu ka han en leh a, chhun lama kan thlalak ho te kha bih nawn leh vek in Mapuia bik chu ka zoom ngat ngat a tih theih. Ava han tha chiang tak aw. 

Chumi hnu chuan intifai sawk sawkin eirawng ka bawl chhunzawm a, ka rilruah erawh chuan Mapuia tih chauh loh chu thil dang reng reng hi an awm theilo. Dawr thil lei tum a min rawn ko lung lung thawm te pawh chu hre reng mah Ila kal nachang te ka lo hre lova, ka zai rat rat reng ringawt a, Mapuia zun chuan min bual a zo vek tawh a ni ber e. 

". Mawitei ini em?" tih message ka dawn chu en vang vangin a dp hmuh theih a dah a ni silova, a hming a dah lang Chuang bawk silo nen ka reply lo teuh kher. Mahse, pawimawh te alo awm takin tih thu ah Mawitei ka nih thu chuan tawi fel takin ka han reply ve ta nge nge a, a rawn reply leh rang phian. 

" Mapuia ka nia" tia min rawn reply chuan ka thi dang mai dawn hian ka hria a, ka helhhawlh zo vek thei. Reply mai nachang pawh hrelo in chu message ringawt chu ka en ta ngawt ngawt reng a, eng thil nge ka ngaihtuah ber pawh hi ka hret tawh lo e a. 

" Mawite, vawiin a kan thlalak ho kha mjn lo thawn ve la I phal chuan" rawn ti leh in, chutah chuan ka harh chhuak chiah a tihtheih a, ka reply nghal ta vat. Chhuanlam ah ka buai zeuh thu chu dawt var va hrilh in thlalak ho pawh chu ka thawn chhuak ta zung zung a, a lan that viau thu te pawh kha ka thawn tel ta nawk. A rawn lawm der ve hle lehnghal. 

Chumi zan atan chuan inbe chhunzawm lo in, a tuk zing atang min rawn wish ve teh mial a, mak chu ka ti lehpek hle. Be chak viau e ti lo chuan a rultawk lekin ka chhang let ve zel thung a, kan inbiak hma zawng a be chak em em tu khan Kan han inbe ta cheng a, sawitur ka hre leh silo. Ka sawi tur hi a bo vek ka ti Mai. Tichuan, a kalbo leh hma zawng chu phone ah inbe thin in a khât tawk hian dawr ah te pawh chuan a rawn leng lut ve ta zauh zauh reng a, ka lai chhe thei hle. A lo len lai tak hian UDuha lah kha alo thut fuh lai tak hi a ni ve thin si a, ka bialpa emaw a tih phah daih lehnghal. Mahse, nasa taka kan in hrilhfiah hnuah erawh chuan ka thusawi chu awih ve Mai in a intiam lo ru lutuk te pawh chu a ziaawm phah ve deuh a, a rawn leng ngun ta tulh tulh. A ruk takin nuam chu ti ve viau thin mah Ila amah hi ka zah a, a bulah chuan ka tim a, ka insit ru tlat zel bawk a, a hrehawm thei lek lek zawk thin. Mahse, hmel hlim lo hmuh in lungawi lo hian ka chhuah tir ngai lo thung. 

Chumi chin chu tuk zan in inbiak loh lai hi kan nei ta mang lova, chutihrualin inngaihzawnna lam hawi erawh kan sawi ngai lo thung. Sawi hmasa tu nih pawh kan hreh ve ve niin a lang. 

" Naktuk hi dam a kan awm chuan ka let leh hun tur a nia, ka ngai dawn khawp mai che" kan pahnih chauh a dawr kan nghah lai chuan a rawn ti ve khauh pek a. Amah chu ka melh ta zawk. Engtinnge chhanna ka pek ve ang ka hrethiam lo

Chutihrualin ngawih reng chi lah ni bawk silo chu zahzelah ka aw te ka han thian ta vel a. Ka nui vei sak. 

" Nangpawh i ngaihawm dawn. Engtik hun velah nge ilo haw leh theih ang" tia ka han zawh chuan reilote a han ngawi zui det a. 

A melh ngai chu melh vang vang in

" A hla leh tawh ang ka ring. Entirnan, rei deuh hlek chawlh te kan neih theih chuan thuhran a nia nga" alo ti ve leh mai a. Ka bu zui nghat ringawt. Mak takin hemi zan a haw tur hi thlah a phut ta tlat pek a, ka bialpa ni silo han thlah vel chu ka in thiamlo ru viau na in tih lungawi loh ka hlau ve tho bawk si a tiin ka thlah ve ta ngawt. Chutah, kan in sir thim laiah chuan min pawt lut in ka biang tawn tawn chu a rawn dawm ta mai a. Uluk fe hian Kan in en ta reng. 

" Ka fawp duh che a. I phal em?" rawn ti thlap in, min ti hamhaih angreng hle. 

" I Bialnu in a hre hlauh a nge aw" khur dar dar a ka lo tih chuan a lu chu a thing zui nak nak mai. 

" Ka nei lo. Khatiang rinhlelhna kha dah bo nghal la ka duh aw" rawn ti ve in a aw chu a vawt ruih tawh lehnghal a. A ruk hian ka lo hlim ve veng veng. Tichuan, ka hmui, vawt tih vang pawh ni miah lova vawt deuh thlar tawh ah chuan rawn fawp in, a dim em em a, chhan let ngaihna ka lo hre hauh lo thung. Ka ding tlawn ringawt. 

" Tun atang chuan ka ta chauh ni tawh rawh aw. I rinawm thei ang tiraw?" rawn ti leh sapin, kei chuan a tan chauh a kalo awm tur thu chu ka sawi ve nghal a, ka va han hlim tehlul em. Ka hlim veng veng. Chumi zan ka mu te chu mu tui tak hi ka ni ringawt a, ka mumang ti bo vek khawpin ka mu hial a ni. 

A hnathawhna khua a thlen fel hnu pawhin inbiak hi kan awl hman meuh lova, vawikhat inbiak ah darkar 2 Chuang te inbe thin in ka chhungte phei chuan min chhaih fiam laih laih reng tawh. Kan inngaizawng tih hria in Nunsangi lah khan nuam alo ti em em khawp a, hamthatna hmuh ngei tum hian kei chu min rawn tlawn thar sauh sauh in Mapuia nise a fak char char a, Mapuia bulah kei chu min fak awl hek lo bawk. A hlimawm thin teh e. 

Hetia kan han inzui hnu hian ngaihbel theih turin Mapuia chu a rawn haw ngun ta riau te hian ka han hre thar leh hnuhnawh vel a, kan inhriat hma kha chuan kum khat ah vawikhat vel hi a rawn haw țawk ang an tih țhin kha ni siin, tunah chuan thla tin deuh thaw mai hian chawlhkar tawp hmang tur in a rawn haw ve ta thin a, hun kan ngah ve phah in ka tan nise a ngaihthat thlak a, a nuam zawk daih bawk si. A thawhna hmun kja thingtlang ve tho mahnise kan khaw inkar ah hian paltlang ngei ngei tur khaw lian ve deuh pakhat a tla zep a chuta mi chu thil eng engemaw te hi Nunsangi nen khan min rawn hawn sak ve thin a, kan lawm thei angreng phian. 

" Mapuia nen in inkawp chin chu khuaah pawh a hmel hmuh tur a tam ve ta hle mai. Nuam iti thei awm" tiin a khât tawk hian UDuha lah khan min fiam leh zuk zuk thin a, thikna ti lang ngam chiah silo, thik tho si a a Khawsak avang hian a khawngaihthlak thin lehling zawk. 

Kum chanve lai Mapuia nen a kan inzui ve hnu phei chuan kan khaw chhungah min hre lo tu tumah reng hi an awm tawh lo a tih theih a, kan lar dun vet vet hle. Justin Bieber leh Selena Gomez te inkawp chhoh vanglai ang mai kha Kan ni e te pawh kan ti thei ang. Thil lian tham nilo case chhete pawh awm se a khaw khah hian a khat nghal vat thin a, Mapuia alo haw tawh dek dek chuan patling thenkhat uang thuang te hian kan dawrah an rawn zawng risk tawp thin. Chutiang khawp a mi lawm leh duhpui rawn hlawh chu ni mah Ila buaina hian a tute mah hi mjn kiansan bik rneg reng lova, intihthiam loh chang hi kan nei ve fo. A hnathawhna hmun a a awm lai taka ka thinrim khum Chang te hian hrehawm tiin awmngaihna a hre thin lova, a call leh text ka chhan duh miah loh phei chuan Nunsangi kaltlang ten thu a rawn chah thul. A Chang in ama chhungte kaltlang te pawhin a rawn chah thin bawk a, a chhungte a rawn chah tum phei hi chuan ka Zak thei lutuk a, kan inkar chu a that phah leh nge nge zel. A zei vel phian. 

Ni khat erawh chu mood fuh em em in ka tho chhuak a, kan inkar boruak that vanglai tak a ni zui bawk. Mahse, ka thawh rual a text message pakhat ka dawn ka han en nak chuan mjn țhawng zui ve dawt dawt mai. 

" Lalhmingmawi, Mapuia hi ka bialpa hlui a nia, kan la induh tawn em em a, mahse nang hi ilo tlak zeh ve sek avangin engkim I rawn tibuai zo ta a. Ilo kalsan tawh dawn nia. A nih loh chuan ka nasa zui tawh viau ang. Ka ngawi mai mai tawh lo bawk ang" tih chu rawn thawn duah in ka tjin chu a phu zui ve dut dut thei a, a tu teh hrep nge a Bialnu hlui chu tih pawh ka hrethiam lo. Kan Khua ami chu ni ngeiin a lang bawk si. Nunsangi zawh chhuah vat a țul ta a ni e. 

Ka duh ang ngeiin chumi ni chuan Nunsangi pawh chu a hun awl neih veleh dwrah chuan a rawn Kal leh ta a. Inleng awm loh lai takin ka message dawn chungchang te kha lo hrilh ve in, a bialnu hlui mawlh chu tunge a nih ka zawt zui nghal bawk. Chutah, Nunsangi chuan hmel ner sawk sawk khawp a thinrim angreng fe hian

" Awi theihnghilh hmiah rawh kha nu ve kha, mi zaktheilo lutuk a nih kha aw. A hming chu Zoremsiami niin a hming ang lo tak hian awmna hmun apiangah remna Siam ai chuan buaina a nei a, a chawk chhuak a, mi nupa inkar tih chhiat thleng in a hreh lo fai vek. E chuan, tunhma, Mapuia rawn tlangval țan tirh lai vel khan reilote chu an inzui ve tak e, a reilo rapthlak. Thla khat vel awrh chauh a niang. Mapuia phei chuan a Bialnu hlui tluk ah pawh a ngai lo ange" rawn ti zung zung in a au ring nasa mai si a, ka Zak lek lek. Tin, a thil sawi zawng zawng te chu awih tur nge an nih a awih loh tur tih pawh ka hrethiam chiah rih lova, ka la tawt up up rih tlat. 

Mapuia nen pawh Kan la țha dun ve zel a, a Bialnu hlui in min rawn biak vel chungchang kha chu sawi chhuah chi ah pawh ka ngai lo. Ka peih rih lo. Rinhlelh tura an awm a, ngaihthat lohna tur thil an ti a nih ngawt loh chuan thinrim phah nan va hman pawh ka tum heklo. Nunsangi sawi pawh kha alo dik zawk ve maithei asin.

" Ka lo haw leh hunah chuan ka awmna ah min zui phei ve la" Mapuia'n a rawn tih chuan ka ngawi zui deuh vang vang phawt a. Chhan dan tur ka hre Mai lo. Mahse, nui deuh rah rah Chung hian

" Min ru dawn tihna mi?" ka han tih chuan ani pawh chu a rawn nui ve ta hak mai

" Ru dawn rih lo e. Ka awmna te min hmuh pui ve anga, zan hnih khat I rawn riak bawk anga, ka thlah phei leh phawt ang che"

" Eng nge chu chu tih a țul kher na" lo ti let vat in ani chu a rawn thaw deuh hluai phawt a.

" Ka nupui tur I nia, ka awmna hmun chu i awm ve na tur a ni bawk a, nuam iti dawn em tih te i en fiah ve ang mawle. Heng laia mite pawh hian ka nupui tur hi tunge tih hria se ka duh bawk a" rawn ti let duah in ka lo nui leh a. A ruk tak chuan ka chak ve reng. Ka chhungte hian remti ngat se chuan ka zui ve ang.

" Lo haw phawt la, kan la rel tha leh ang chu tirqw?" lo ti ve in, ani pawh chuan țha a tih thu chu a sawi ve ta a. Ka phur thar ta kher. Lo haw vat vat se ka ti.

A sawi lawk tawh angin Mapuia chu alo haw Har ta lo reng bawk. Tun țum alo haw chu a hma ai khan a rawn cher ve deuh tlat a hriatna ka nei a, mahse, ava thawk rim zual deuh ni turah ka ngai ta ngawt. Ka khawngaih phian.

" Ilo dam țha maw. Hei, thil ka lo hawn che a" rawn tiin night dress a suit chi ngat, ka duh em em ang chi kha min rawn hawn sak thlap a. Ka va han lawm thin tak. Mahse, ka zak ve lek lek tho.

" Iti lawmawm thei e nang chu.. Hawn sak fo pawh hi ka ngai lo nia aw, I hek lutuk palh ang" han ti ve bawk mah Ila, a theng thawng ah a thawk hran lova, thil min lo hawn apiangin ka sawi ve ziah a, min hawn chu a țhulh phah Chuang bawk silo.

" A thuhrim in I rawn cher haw riau a ka hriat chu. Iva damlo nge i thawk hah lutuk zawk" lo ti leh in, ani chu a kiai ve sak a.

". Thawk hah hran love, ka awmna khua saw a lum ve lutuk a, a hmelthat theih thlawt loh" tih pah hian a rawn nui deuh hak a. Lei ka lo chhuah khum zawk thei.

" I țha sa tho alawm. Kei in țha ka tih chhung che chuan i chhe theilo hrim hrim" Zak Chung chunga ka han tih chuan ka bul lawkah a rawn thu phei nghal a, min kuah a chak tih chu hre mah Ila, dawr nghak ka nih vangin mawi a ti chiah bik bawk silo. Min melh leh ngawt ngawt thin ringawt.

" Chuan, engtinnge thu tlukna chu ilo Siam tak. Min zui thei dawn ta em?" rawn ti leh in, kei chu ka han ngawi deuh vang vang phawt a. Ka nu leh pa te kha chu ka hrilh tawh ngei mai a, mahse, mumal takin aw min la pawh ve chiah lo bawk nen thu tlukna Siam dan ka thiam mai lo tlat.

" Zanin ah ka chhungte ka lo be nawn leh dawn nia. An remtih chu ka ring" lo ti ve sap in, thu dang dang Kan sawi kual a, rei pawh țhu zui tawh lo hian a haw ve Mai.

Zan a rawn thlen chuan ka chhungte pawh chu ka be țha leh ta a. Ka rin loh dan deuh in min lo phal sak teh mial a nih chu. Ka lawm lutuk ringawt. Ka chhungte rem tih dan chungchang chu Mapuia hrilh ve nghal in ani pawh alo lawm ve hle a, ka phur ru zek zek tawh.

A hun chu rawn in her chhuak in tukthuan eikham ah Mapuia nen chuan a hnathawhna khua chu kan pan dun ta a. Nuam ka ti hle. Tichuan, darkar tam pawh tlan lo in chu khua ngei mai chu kan thleng ta a. A khaw chheh nise a nuam in a fai thianghlim phian lehnghal a, ka ngainat zawng tak a ni.

A chenna hmun, amah a a invawm hranna hmun kan thlen chuan ka hah hi a dam sawng sawng nimai in ka hria. In lian lo tak nimahse a felfai at reuh a, engkim mai chu a nih dan tur thlap in a rem a, a dah fel tihtheih a ni. Mipa tam zawk tih peih loh a tih peih tlat na hian amah min ngaihsan tir thin a, ka duh zual phah hle bawk.

" I chau ngawt ang" tiin a rawn nui var var a. Kan bag ken te pawh kha a rem țha nghal zung zung bawk.

" A nuam taktak... Nuam ka ti lutuk. I chenna nise I ti fai tha bawk si" lo ti ve in, ani chu a nui leh mai a.

" Zanah chuan khumah I mu anga, kei chhuat ah. I mu ngam ang tiraw room ah sawn" rawn ti daih in, ka han ngaihtuah vang vang a, in lian lemlo nimahse mahni chauh a room hran a han mut daih chu ka ngam a ngem ka hrelo. Mahse, beisei tur dang awm Chuang lo, mut dun ngawt chi ni bawk silo chu a tawpah chuan ka ngam tur thu in ka chhang ve ta nge nge a. A lo bu deuh nghat nghat mai.

Duh ber kiangah nge nge chuan khawhar leh lunglen pawh hrelo lek in hun ka hmang ral a, khaw lum lutuk mai te pawh chu ka theihnghilh zo vek ni ber hian ka hria. Nuam ve chiang em!

Tlai lo niin, eirawngbawl a kan pahnih a Kan lo buai dun map map lai chuan kawngka kik thawm a rawn awm ta a. Kan hawi rual nghal zawk thei.

" Ka va hawng a nge" tiin ani chu kawngkapui lamah a pen zui nghal nal nal a, ka lo ngai Chang ve kar thung.

" E.. Lo lut rawh. Chawhmeh min rawn suah leh dawn emni a" nui hak hak chunga a tih takah chuan ka chhuak phei ve nghal vat a. Phawk fe hian an ni pahnih chuan min lo melh ringawt. Kawngkaah chuan nula niawm tak, kei aia naupan hmel zawk leh hmelchhe lem lo tak hi chawhmeh plate keng in alo ding a, a bul mai ah Mapuia pawh kha lo ding ve in kei chu ngawi reng hian min rawn en dun vang vang. Ka tihtur hrelo leh hrilhhai lutuk chu choka lama luh leh mai tum hian ka han inher zet a, mahse, Mapuia kha a rawn tawng chhuak ta hlauh.

" E taka Rinhlu, ani hi ka thiannu Mawitei a nih hi. Hmingmawii a nia. Hei, chawlh hahdam pahin hun reilote chu min rawn awmpui ve lawk dawn a nih hi" lo ti zung zung in Keipawh cju ka inher let leh a, za lem lo fahran hian ka nui ta var var ringawt. Tichuan, in chibai leh te te phawt in, Rinhlui chuan hmeltha min tih thu te chu a han sawi khaw mawi ve a, rei pawh awm tawh lo in min Chhuahsan zui leh ta a ni. A chhuah rual rual hian kei lah chuan tum deuh bar bar Chung in

" He mi khuaa I Bialnu a nimaw? Ka lo awm thut sia, a thidang lo chauh in ka hria" tiin ka bai siam te chu ka chawk tau zui sawk sawk mai a. Alo nui ringawt.

" Awihawm loh thei tak. Helai a ka chhungte neih ve chhun an nia, ani pawh kha ka nau a nih kha" lo tiin ka biang te chu a rawn piai zauh a, ka lo thle sawn zel thung. Chutah, ka inrin hma hma in ka kawng ah a rawn kuah a, min pawm kang ta nawl nawl mai a, ka rak deuh that thei.

" Ka thikthu ka ti chhia e te iti ve vel a mi a? Hrem I ngai a nih hi" tiin room lama min pawm luh chu a tum ta Mai a. Ka au zui vak vak. Ka nuih a za tel tho bawk si.

" Min thlah teh. Midang an lo Kal leh thut a nge" ka tih pwh chuan min thlah chu sawi loh, min pawm nghet tulh tulh a,

" Kal tur an awm lo" ti chungin room lamah chuan min pawm lut ta nge nge e. Khumaj chuan dim te a min mut tirin, ka chungah a rawn bawk titih nghal zat a. Kan in melh hnai ta kher.

" Tho rawh. Kalsawn rawh" ti a lo nam sawn ka tumna te chu a duh lo nasa. A țang khauh tlat.

" Kalsawn dawn lo. Ka thlahlel che tih i hriat vek kha" tiin a thaw ri te chu a ring tawh angreng hle a, kei ni Ila ka bang Chuang bik hek lo. Tichuan, thu dang awm tawh lo in nupa ni miah silo khan nupa nun chu a khum laizawl ah ngei kan hmang dun ta a. Hmangaih ber nen a chen dun e ti lo chuan ka thla erawh a muang thei chuang hauh lo nia. Ni e, nupa kan la ni lova, hei hi kan tihtur a nilo miau a tin ni. Pathian hian min ngaidam thei a ngem le....?

Tih loh loh tur kan tih tak vang emaw ni, Mapuia hmel chu hmuh nuam lo ka ti thar riau a, ka inthlahrung a, ka Zak bawk a, ka lai thar ta vel tlat. Ani erawh chu danglam ang pawhin a awm lova, min duat thar em em zawk a, min ngaihsakna a tilang nasa lehzual bawk a, ka tan a Inthlahrun awm ta tulh tulh. Mahse, ka bialpa a nihna ala bo miau loh avang erawh chuan a kiangah hian him tawkin ka inhria a, ka duhna a tlem phah heklo. Ka lai chhe thei deuh e tih mai loh ah chuan.

"Zanin chu ka thiante in velah leng kual ve Ila. Thian phei chu ka ngah lo na in, a awm ang ang tlawh kual ila, I peih em" a rawn tih chuan ka peih leh peih loh pawh ka hrelo. Ka lu chu ka lo bu deuh nghat ringawt.

Tichuan, a sawi tawh ang in zan a rawn thlen chuan a thian thenkhat te in chu min pan pui ta a. An lo fel hlawm phian lehnghal. Kan inneih hun tur te min zawt luam in, ti ve vat vat tur te chuan min lo fiam chiam hlawm a. Mapuia nen pawh Kan nui hul hak hak ringawt. Inneih chungchang vel hi chu mipa thu tlukna Siam hmasak turah ka dah ve tawp thin a. Mapuia hian a in peih hun hunah sawi ri ve se, ka in peih reng. Ani nei tur hi chuan eng lai pawhin ka in peih a, ka in hawng sa reng a tih theih ang chu.

Mahni khaw lama ka let leh alo hun ta der mai. Mapuia vang hrim hrim pawhin chu khaw Chhuahsan chu ka hreh ve hle a, ka ngai lawk nghal em em ringawt. Ani chuan zan khat lek riak Turin min rawn thlah ve thlap a, let leh tawh lo Mai se ka ti. A hmel hmu lo a han wm leh vang vang tur chu a ngaihtuah pawh hi ka ngam lo, ka ngaihtuah thui ngam thlawt lo.

" Min kalsan leh vang vang dwn sia, mahni khua ah te hian transfer dil daih la, i duh zawk lo emni?" tia ka zawh chuan ka kut chu rawn khalh niap niap in, amah chu a vawt thlur nimai hian ka hria a, mak chu ka ti deuh hlek. Tin, chutia a hmel ka en reng lai chuan a hnar chu rawn thi ringawt in, min ti phu zawk thei a, hnar thi thin a nih awm reng reng ka hre ngai bawk silo nen min ti hamhaih ta kher.

" Awi Mapui, I hnar kha a thi ringawt a nia, engtinnge ni dawn" ti nghal chul in ka tho chhuak a, lapua lak tum a ka kal lai chuan ngawi reng hian a hnar thi chu lo hru pherh in alo in tuai ve nuap nuap reng a, mak a tih ve hmel tho.

Ka let leh lamah pawh a hnar thi chu lo la tawp lo in ka thiam dan ang ang chuan ka han buaipui zui ve bawk a, rilru a ti hah duh kher.

" A zia mai ang hei chu. Ka han haw chho phawt ange, naktuk chhuah hma ka ngai leh dawn sia, mut hma ka mamawh nih hi" tiin a tho zui uaih a, ka en tlawk tlawk ringawt. Engvang a a hnar kha rawn thi ringawt nge maw a nih le. Ka awm a nuam zui thei ta lo reng reng. Ani lah chu tikhan a haw a, a tuk thleng pawhin a reh zui ta vang vang mai si a, min rawn be chhunzawm eih lo. Kei lah chu dawr leh a chhehvel ah ka buai nileng Zak a, be hmasa hman in ka lo khawsa tawh bawk silo nen, chumi nileng chuan kan inbe ta lo țhak a, ka hman fel ve meuh chuan khua pawh alo thim der tawh mai. Ka phone chu en hmasa ber in mak deuh hian Mapuia hnen atang call leh text pakhatmah ka lo dawng hauh lo lehnghal a, mak ka ti angreng viau. Tichuan, ka hman lai tak a ni bawk a tiin ka va call ta a. A pick miah lo. He pa hi eng nge maw a awmzia ni dawn le. A hnar thi te kha a reh fel tawh angem. A țha zui zel a ngem tihte pawh ka hriat chak tehlul vei nen hian.

Chumi chin chu phone pawh khawih leh tawh lo in ka buai san leh ta daiha. Ka hman a, ka mut fel meuh chuan zan dar 10 alo ri thuak tawh mai. Chutah chuan ka phone bawk chu ka han khawih leh ta a. Whatsaap ah mjn lo be ve mial e.

" Ka thlenna ala rei vaklo. Khaw thenawm ah ka in entir a, ka thang rei ta deuh a. Mu tawh em?" tih hi dar 9 vel khan mjn lo thawn in a last seen pawh dar 9 tho. Thawk la halh Chung hian ka ngaih tawh zia leh, dam țha zel tura ka dhh thu chu type duah in ka reply ve ta a. Tichuan, youtube ah lut in thil hrang hrang ngaithla pah chuan ka lo muhil ve ta a ni.

A tuk chhunah chuan Nunsangi rawn leng leh in Kan ti ti a, ka va kalna chanchin te chu sawi dun in Kan hlim viau. Chutah, Mapuia chanchin te sawi chho zel in, Nunsangi zawk chuan topic a rawn thlak ta daih mai a.

" Thiani, nizan chu Mapuia nau Sangsangi'n min rawn be ve hlawl mai a. Kan inbe deuh reng nghe Nghe. Ani hi chuan buaina a neih deuh hian a u angin min ngai ve thin a, min rawn be ve fo hrim hrim bawk a. Tihian a tia, nizanah a uMapuia leng haw kha hnar thi phung in in chhung a lut a niawm e. An ni ngaihtha lo lah chuan mi kut a tuar emaw tiin a chhan an lo zawt chiam pek a, mahse, kut thlakna hnu hma engmah awm bawk silo, a hnar thi chhan lah sawi duh bawk silo chu, ngawi reng a bawihsawm bak tihtheih nei hek lo le. Chutia a hnar thi buaipui a an lo buai laih laih lai chuan thawklehkhatah Mapuia bawk chu a thut hmun atang chuan a rawn luak zui leh ta nghek pek a a ti! Rang takin bathroom ah a tlan lut a, a luak chhunzawm thei tawh Chuang lo. A rawn chhuah leh meuh chuan hmel pawr fap hian a rawn chhuak a, a lu a hai zia thu sawi in a khua pawh a sik lek lek niin a sawi a, chhungte tan a ngaihthat thlak loh tur zia chu maw. Tikhan, rei pawh țhu peih tawh lo in a mu zuii ta a. A tuk zingah a nu ngaihtha lo in a hnathawhna lamah pawh a zui phei a, in entir ngei ngei turin an ti a niawm e. Zing lama kan inbiak leh dan ah kha chuan a in entir ta ngei a, a thisen te an la a. Mahse, result erawh phai lamah an thawn thlak daih avangin an la hrelo a nih hmel. A mak ka ti lutuk a, I bulah engmah a sawi lo emni? " rqwn tiin, kei chuan ka thil tih laklawh lai te ka dah vek a, ngaihtuahna pakhat ah chauh ka cheng tawh. Tichuan, a Kal hma zan a rawn len lai pawh a a hnar chu a thi tawh thu te lo hrilh ve in, Nunsangi nen chuan mak kan ti tual tual a, kan hrilh a haiin Mapuia hian Kan lakah eng nge a zep ruk ang tihte thleng chuan kan ngaihtuah kai ta a ni. Ka awm hi a nuam tawh hlawllo.

Nunsangi haw hnuah ka phone chu phawrh in amah chu ka va be ta ngei bawk a. Vawiin lam chu a ziaawm viau thu te lo sawi in, hna ah pawh a Kal mek thu min hrilh a. Ka ngaih erawh chu a țha chiah em ka hrethiam lo.

" Mapui, tunhma in khatiang khan I awm thin em le" ka han tih chuan a ngawi zui deuh vang vang a, mahse, hreh hmel deuh hian

". Ka hnar hi chu a rawn thi zeuh zeuh fo tawh a. Mahse, hnar thi hrat hrim hrim hi awm ve a nia, ngaihthat loh nachang pawh ka hre ngai lem lova" a rawn ti ta a. Ka ngaih chu a țha lo tulh tulh. Ka bialpa hi a damlo niin ka hria. Engtinnge ka enkawl tak ang le.

" Enkawl I duh em? I awmdan hian ka ngaih a ti țha miah lo a nia aw. Ka lo Kal mai dawn emni?" Ka'n tih erawh chuan a that ve zel thu a min chhang in, damlo anga en chu a lo duh hauh lo mai hi a nia, a duh lo lutuk chuan nuih a ti za zawk hial. Tichuan, chumi chin chu mahni hna lam ve ve a buai nen Kan inbiak dan a mumal lo chho țan a, nileng țhak țhak a inbiak loh te hi nei chho dun in, kei lah buai nileng thin bawk, mut alo hun meuh hi chuan ka chau a, phone takngial pawh khawih zui peih tawh lo in ka mu mai tawh thin a, tin, phone ka en ve chhun ah pawh a mi biakna ka hmuh ngai tak loh avangin tunah chuan inbiak loh chu ngaiah ka nei titih tawh hial.

Zan khat erawh chu ka muthilh theih lawk loh avangin text hmang chuan ka va be ta nge nge a. Ani pawh ala online ve reng tho sia, mi te rawn biak hmasak ve awm ka ti. Ka lungawi lo ve lek lek thei mai.

" Eng nge i an? I țha em? Min biak i tum bawk silova, eng nge thil awmzia" ka va tih chuan rinai takin a rawn seen rang leh ang phian a. Ka thaw deuh hawk thei.

" Ka tha chu nimai e. Vawiin chu thawh hlim atang khan khawsik ang hian ka awm reng mai a, hetah lah in entirna tur a awm remchang bawk silo nen, nachhawkna ka ei ngawt a, ka zia tawh e" a rawn ti leh ta a. Ka bialpa hi a damlo takzet niin ka hria. Khua var Sela, a awmna hmunah hian ka va Kal tawp mai dawn nge tihte chu ngaihtuah in, nuam lo erawh ka ti ve tho bawk si. Nupa em pawh Kan la nih hma a chutia han in tlawh pawh teh fo pawh chu ka tan tak hian a zahthlak a, a mualpho thlak thei niin ka hre bawk a, ka thulh phah leh mai țhin.

Tichuan, a tuk zingah pawh ka chhungte chu chanchin hrilh ve in, va awmpui a va enkawl lawk mai chu ka duh zia thu ka han sawi deuh luam a, ka rin lawk ang deuh hian ka pa zawk chuan alo remti ta hauh lo mai. Min hauh zui phah hrep zawk leh ta nghal.

" Mami, chutiang em em in ngaihzawng te hi lak nat tur pawh a ni lo a nia. I duh huam huam chuan a ten che anga, a hne vat zawk ang che. Tunah pawh hian kei chu a damloh taktak pawh ka rjng hran hleinem. Kan veng thenawm nu pakhat sawi dan phei chuan a hnathawhna hmunah Bialnu a nei a, a Bialnu hian a riah chilh deub reng mai te an tih kha! Thenna tur che in chance a zawng mek tih hi ka rin dan a nia, kal chilh ai chuan then fel a thlah fel theih kha tum zawk ta che"  ka pa in a rawn tih chuan ka na vawng vawng thei. Chutiang thil chu Mapuia hian ka chungah a ti duh dawn emni? A thuhrim in tunge a hnathawhna khuaa a Bialnu chu ni ta ang. Ka va zin phei ve laia chawhmeh rawn suah tu kha amah nen inhnimhnai thei nula ka hriat awmchhun chu a nimai a, a bak ka hrelo. Kha lah kha ka chhungte anga ka en an nia, ka nau a ni a ti tlat bawk si. Eng ber hi nge thudik chu ni ta ang le.

Rilru hah leh thawpik ru zetin chumi nileng hun pawh chu ka chhiar ta a. Min dawr tur a rawn Kal te reng reng pawh khan min chik deuh se chuan ka natna kha an rawn hmu fiah kuarh thei hian ka ring hial a ni. Ka na lutuk ringawt. Mahse, mittui tla lova ka la tawrh theih zel nachhan erawh chu ka pa thusawi kha a dik em tih finfiahna ka la neih loh vang chauh a nimai. Nunsangi lo Kal hun ka nghak a, ani lah chu hemi ni berkher hian a rawn Kal har hrep leh ta nghal. Ka nghak ngat ngat. Tichuan, chawhnu her dawn ah thingpui in pah Turin a rawn lang ve leh ta hlawl mai a, ka lawm zia kha aw.

" Thiani, I damlo ve emni? I hmel ava dik lo ve" rawn ti hmasa ber in, kei chuan ka lu ka lo thing mai a. Ka țap lek lek tawh zawk.

" Sangi, Mapuia hi țhen mai ka duh! A awmdan hian ka ngaih a ti țha tawh lo takzet a ni" zawi sap a ka lo tih chuan a rawn meng phawk ve nasa hle in ka hria.

" Eng nge awmzia? In induh tawn viau khan ka hre sia. A chhan han sawi teh" rawn ti nghal chul in, Lalnunsangi zia a lang leh dawn țan e.

Tichuan, tunhnai a kan boruak tha lo taktak te, kan inbiak tlem Sawt dan leh ka pa thil sawi thleng te khan ka hrilh fai ve ta vek a. Mak a ti lutuk chu alo ang phuau reng ringawt tawh.

" Chutiang a ni thei dawn emni? A dik ka ring lo. A damloh thin vang leh hna vang bakin a buai lo tawp ang. Hmeichhe dang dang a pakai kual chi a ni lo ka tih tawh kha. Then hlek suh ang che. Ngaichang phawt rawh"  a aw ki te chu a dik tawh lo ni ber hian ka hria. A thinrjm nge a hlauthawng tih pawh ka hrethiam lo e.

Tunah chuan thla a ral a, hun leh ni an liam a, ka hmangaih Mapuia erawh chu a ni telin a reh ve tial tial thung a. Min rawn be tawh ngai lova, ka be tawh ngai bik lova, ka thinlung chhungril natna leh rinhlelhna te hian amah biakna chu min neih loh tir zo va, ka thlakhelhna te erawh an bo Chuang silo. Ka ngai ngawih ngawih reng fo va, mahse, ani kha chu ka ta ni ve tawh lo tlat a ka hriatna te hian amah hlat duhna mjn neih tir thung a, chuvang chuan biak loh ah ka tlak leh mai țhin. Eng ang pawn hmangaih in duh in thlahlel in ngaihtuah mah Ila, amah ber in chutiang chu ka lakah eng thilmah a thlen tir ve tawh siloh chuan ka tan tihtheih a awm lova, a lak atanga inlak hran mai loh chu duhthlan tur dang ka neilo. Ani chu tikhan hlim takin awm zui Sela, a duh thlan leh hmangaih ber kiangah chuan hun leh ni te chhiar se la, kei zawng ka liam a nge. Tunah chuan a nupui neih tur thu in min den hun nghak in hun leh ni ka chhiar țan ta a ni.

Nitin hian hlim ni hmel ka hmu thei tawh lova, tih luih ka tum takngial pawhin harsa ka ti thin. Zanah nise ka lu kham huh hmasa lo chuan mutmu ka tuah hleithei tawh lova, mitmeng bui chur a zing tin mai han thawh takah chuan ka inleng UDuha pawh khan alo hrethiam ve a ni chek ang chu. Min fiam tha ngam chiah silo hian a chhan chu min zawt ve ta fo mai a. Ka hrilh tha duh mang bik bawk silo nen, a thin a rim thei kher.

" Mapuia nen jn tha vak lo a nimaw. Tunlai chu ani pawh hi a rawn haw khat deuh in ka hre reng a ni" ti leh zuk thin in, a tam zawk phei hi chu chhan en ah pawh ka en duh lova, ka sawi nawn fo peih lo zawk. Rilru na a thar mai mai.

Tuk khat pawh lu na ber bûr nuam lo fahran a tho chhuak in, hemi zingkar hi chu zep tur a awm lo, ka nuam lo takmeuh meuh a ni. Tin, hemi ni vek hian mak takin keimah chu ka danglam ru riau a, mawlh tu nei ang mai hian ka awm mai mai lai te hi ka thaw zui leh kawk thin.

Chawhnu a rawn her chuan ni sa rumrût zualpui kha Kiang in, chhum ruah tui pai a rawn inlar țan a. Kawlkil lamah te chuan ruah tui pai chhuk dum khup mai chu in zar pjarh in, hmun thenkhat ah phei chuan ruah a Sur tan tih hriat tak hian a paw phet phut tawh a, ngawi reng in ka thlir ta veng veng mai. Mal leh khawhar taka hringnun ka hman lai hi chuan saw tiang tlang let liam lamah te sawn va kal thei Ila, boruak thianghlim leh thawveng tak te saw va hip thin bawk ila ka hah hi a dam sawng Sawngin ka rjng thin. Kan naupanlai phei kha chuan heng tlang sang pui pui chhip a chhum zing paw khat chuk te hi kut a khawih theih niin lapua a ang kan ti thin a, kan Kal chak thei hle. Khang hunlai a ka kal chak dan leh tun hnua ka kal chak dan chu a dan ava dang ta em ka ti.

Chutia ral lehlam hmun hla tak thlir a ka suangtuahna ka lo kawm melh melh lai chuan kan veng information atang thu puan tur an rawn nei ta a. Ka beng chu ka chhi zui nghal kar. Chutah le,

" Information centre atang chhiat tawh thu kan han puang a nge" tia bultan in ka Khawvel, ka hmangaih, ani lo chu ti a a kut ka lo chelh sak thin, a hmel hmuh leh chak a nitin ka suangtuahna ram luah khat tu Mapuia boral thu chuan min rawn deng ta a le! Ka nghilh zui dup thei. Engtinnge hetiang thil hi a thlen thut theih ka hre bik lo. A damlo zeuh zeuh reng tih bak chu han thih pui khawp natna a neih ka hre ngailo a, min hrilh ve hek lo bawk a, hetiang thut hi chu ka ring phallo asin.

Ka thutna ngaiah chuan ngawi reng a la țhu in thil engkim ka ngaihtuah kual a, ka mittui tla pawh chu hruk hul nachang ka hre tawh hek lo. Chutah, hmanhmawh zet a min rawn sawi hlawk hlawk tu an awm takah chuan harh chhuak ve in, Nunsangi khan mittui tla par Chung hian kei chu min lainat hmel em em in mjn lo en reng a, ngawi reng hian Kan in melh deub vang vang phawt a ni.

" Thiani, Mapuia ruang alo thleng tep a, kan va Kal ve dawn emni? A ngai tawh ngawt ang che" a rawn tih chuan ka hnuk ti ulh zual in ka țap chhuak nghal hawk a, Nunsangi chu kuah pahin kan țap dun ta hlawp hlawp mai. Ka keh chhe mek a ni tunah hian. Sawitur ber pawh ka hre lo. Min thawng chiang em a, ka awih thei lo bawk.

Muangchang a inchhawm chho in a ruang lo thlen hun nghak chuan in chhungah ngawi reng hian Nunsangi nen khan kan lo țhu ve ta ren rawn a. Mite chuan mjn en duh bik riau ni te hian ka hre leh țhin. A nuam lo duh takzet. Mahse, rei pawh nghah ngai lo in ruang pawh chu a rawn thleng chhunzawm ve ta a. Awi! Duh tawk a țah ve theih a, a ruang dai te pawh duhtawk a han kuah kha ka va han chak tak em.. Mahse, thu mumal pawh awm lova inthen ang kha Kan nih vangin keimah ah hian inkiltawihna a awm lo thei lova, ka awmdan chu a laklawh in ka lai kual vel vek. Chutah, a ruang bul lawka amah melh vang vang Chung a ka lo din tlawk tlawk lai chuan Mapuia farnu khan min rawn kuah thut in min han țah khum ta tak tak mai a, ka insum zo leh ta lo. A ruang chu bawh hnawk in ka kuah a, ka țap a, a hmui dai diak ah te chuan fawp in ka melh vawng vawng reng a, chhungril hi a na a ni. He thil hi ka awih thei thlawt lo asin.

" Mama, ka fapa, engvang in nge hetiang thil hi I tih a. Ka dam tawh min ngaihtuah suh u iti a ni lawm ni? En ta che, I ngaih em em thin I thiannu kha hei alo Kal ve asin.. Lo be ta che" a nu țah hla chuan a bulhnai a thu te chu min vel tap nasa lehzual a, han inhnem tur Chuang bik hi kan awm awm lo ve. A na thlawt a ni.

Ka hmangaih hun hnuhnung hmanna chu a zo fel tawh a, ka thinlung ah erawh chuan ala nung țan dawn chauh bawk si. Engtia awm zel tur nge ka hrethiam tawh lova, dawr nise ka ngaihsak thei hek lo. Ka chhungte chuan min hrethiam takin thil engkim ah hian min awl a, min awi hneh em em vek a, chuti nilo phei se Khawvel hi Chhuahsan ve nghal mai ka duh tawh zawk hial ang ka ring.

" Hello!" phak chual chunga ka han tih chuan lehlam ami khan a aw a rawn thian ta kharh a

Hmeichhia a ni nghe nghe.

" Mawitei ini em le aw. Hetah Mapuia hnathawhna khua atang khan a nia. Min hriat dan tur chuan a nau anga a en Rinhlu-i nu kha ka ni e" a rawn tih chuan ka va zui phei țum a chawhmeh rawn suah tu nula, khami nu kha tih ka hrethiam ta chiah a. Eng tak chu ni ang maw tiin ka ngaihtuah nghal neuh neuh. Tichuan, ka hriat ve thu a lo chhang in, eng nge thil nge ni ta ka han zawh chuan

" I theih hmasak berah lo zin phei la kan duh a. Nangmah pawn intih harh I duh dawn a, tin, Mapuia sulhnu te rawn chhui kir pahin ilo Kal theih chuan ava lawmawm dawn em kan lo tia. Lo in ngaihtuah rawh aw" a rawn ti ta a. Ka țim zui sung sung thei. Mapuia sulhnu tih tawngkam ringawt pawh chuan ka lung chu rawn ti chhe leh in, ka inhnit zui nghal faih faih thei a. Min rawn be tu pawh kha a bang bik in ka hrelo. Alo insut ri ve hraih hraih reng mai.

Ka call dawn dan chanchin chu ka chhungte leh Nunsangi hnenah pawh ka sawi Chhawng ve leh ta a. Va Kal ngei ngei tur chuan min duh pui hlawm viau. Tin, Nunsangi khan mjn kalpui chu a tum ruh bawk a, tlemin ka hrehawmna pawh a zia phah ve deuh e.

Tichuan, hun chu liam leh hretin Nunsangi nen pawh Mapuia hnathawhna thin khua chu kan pan dun ve ta a. A sulhnu chu hmu chakin ngai viau mah Ila, chhungril ah hian ka huphurh takzet thung a. Ani nen a kan inkar min hriatpui tute han hmachhawn ngat phei chu ka hreh leh zual a tihtheih awm e.

Reilo ah kha khua, hlim taka zan tam pawh nilo kan lo len dun a, kan lo nuih dun na ngei mai khua kha thleng leh in, ka lung chu  a leng nghal vawng vawng thei a. Rinhlu-i te chhungkua khan keini thian dun chu min lo hmuak thlap lehnghal in, kan han inhmu chiah chu țap chung hian kan inkuah zui thlawp a, insum thei reng reng kan awm lo. Kan na tlang a ni e.

Theih tawp a min biak hlim a, min kawm hlim chu tum hlawm mahse la a Chang chuan hlim luih chu thil harsa tak niin ka hria a, a der tal pawhin ka nui theilo leh tlat thin. Ka bulhnai a awm a tu mai te pawh hi Mifel leh dawhtheihna ngah vek an ni hlawm bawk a, kei hian hriatthiam ka la hlawh ve zel chu a ni e.

Tichuan, Mapuia sulhnu chu chhui let in, amaj chauh a lo Khawsak thinna, a in luah te fel at mai ah te khan va Kal in, a thih hma thleng khan felfai takin a enkawl tih a hriat theih a, hnawk eih hi hmuh tur a awm lo reng reng nia. Chu in chhung Zim leh tereuh te ah chuan ka han vak kual a, a zavai mai khan Kan pahnih sulhnu tih theih tur vek an chang zo tawh si nen ka mittui bawk hi ka dang seng lo leh țhin. A damlai pawh a min lo kalpui tawh na a thian neih ve chhun te ho pawh kha tlawh kual in, tunah chuan mittui nen a chanchin kan sawi ho a lo țul ta a. Hma hun hi kan va hre lo tak em. Hmanni lwk kha chuan heng ho nen hian hlim takin kan la titi tlang a, a hlim ber berah kan țang kha a ni chauh si a. Pathian remruat dan hi chu hriatthiam a harsa thin ka ti.

" Mawite, Mapuia sawi dan chuan a damloh taktak hnu khan in inbe ta miah lo niin a sawi a

A dik em?" Rinhlu-i nu, nu Thangpuii chuan rawn tiin, kei chu ka lo bu ve nghat nghat thung a.

" Mapuia kha tlangval fel lutuk leh zaidam. Em em, taima bawk si a ni a. He khua a thawhna hi alo rei ve ta bawk a, a rawn awm tirh atanga a belh ber te Kan lo ni bawk nen Kan hrechiang ve hman viau chuan ka hria a. Tlangval lerh lo tak a niin, a hmuh zawh ang ai khan nang tih loh kha chu hmeichhe dang nen a hmehbel tur reng reng hi kan la hre ngai lova, a hmangaih takzet che niin kan hre bawk. Tichuan, thawkkhat lai atang khan hnar thi leh lu hai tih vel te, khawsik ser ser tihte kha a sawi chho ve ta zeuh zeuh reng a. Kan lo ngaihtuah thin viau. Mahse, mi tuar chhel tih takah, a tuar dam a, in entir pawh duh hran lo in tikhan hna thulh phah nan nise a hmang hek lova, a dam țha ve ta viau emaw kan lo tia. Tun a damloh tak tak hma khan khatiang neuh neuh kha rawn nei țha leh in tunah phei chuan luak nen khawsik sang tak nen a bei ta nghek nghek mai a, kan ngaihtha lo khan a chhungte kam biak sak ta a. Aw chumi hma in, chutianga a nat zual lehna chu heta I rawn zin, a thlah haw che a alo let leh hnu atang khan a ni tak e. Tichuan, a remti lo Chung Chung a chhungte kha Kan rawn hrilh sak a, nang phei chu hrilh che a remti lo bur. Hrilh che kan tum deuh ni a a hriat te khan a thinrim lek lek fo si a, kan tilui ngam ta lova. Tin, a chhungte hnenah pawh khan vawi tam nang hi chu hrilh lo tur che hian a chah thjn a, nang chauh ni lo, in khaw mi leh sa hrim hrim te pawn a damloh thu kha hre lo se a dhh bawk. Tichuan, damdawi nen a in enkawl in, a thisen test result aj khan Thisen cancer stage 4 lai a ni tawh  tih an hmu chhuak ta a. Chu erawh chu amah khan a result kha a lak miau avang leh doctor bulah pawh midang hriat tir a duh loh thu a ngen takmeuh meuh a alo ngen avangin a thih dawn darkar ah khan a natna ber pawh chu kan hre ve ta chauh a ni! A ruk thei ang ber in treatment a la a, a ruk thei ang ber ber takin a in enkawl a, keini chhung chuan mahni in lama haw a in enkawl tur leh, damdawiin pawh pan leh tur a kan han tih te pawh khan a țang kawh tlat mai bawk si a, a chhungte nise a ruk a hrilh kan han duh viau na in, ani kha natna khum bel deub reng tawh a nia, a lung tih awi loh sak chi ni tawh in Kan hre lova, a hun hnuhnung chu ama duh dan ang ngeiin hmang se kan duh pui ta zawk a ni. Mahse, tun hnuah hian ka inchhir takzet tih hian hrilhfiah ngaihna pawh a awm kher lovang. Engvang in nge a ruk tal pawj khan nang emaw, a chhungte tal kha ka lo biak ruk loh che u le ka ti. Ka inchhir hian tawp chin a neih pawh ka rjng tawh lo. A hun hnuhnung ah khan duat taka enkawl a, pawm tu a nei lova, kan riah pui takngial pawhnise a duh bawk hek lova, ih maw Mawite, a be chak lutuk che khan a Chang phei chuan i hmjng hi hmet chhuak in a phone kha kut khur dar dar khawp hian a hum fo thin asin. A insum hmel te, be lo tur che a a in dang hram hram hmel inpet ruh fan fan te kha a ruk hian ka hmu fo thjn asin. Mapuia kha zawng, ka lainat lutuk em mai" tiin a sawi tawp lamah chuan a țap chhuak zui nghal hawk hawk thei a, ka va kuah ve ta vat. Keipawh chu thlem ngai khawp a țap chhunzawm veleh in, chu in chhung chu țap thawm jn a luah khat leh a, thawm dang reng hriattur a awm lo. Ni e, kan hmangaih, Mifel leh țha lutuk kha Kan chan miau a ni.

" I thlan khawhar takah hian nitin rawn Kal thin ila I duh em? Pangpar te rawn ken sak ziah che ila I duh em? Tinge, I hun hnuhnung ah takngial pawh min hmachhawn duh lova min bikbosan tlat le. Ka enkawl chak zia che I hriat vek kha Mapui" tiin a thlan a dah tur Pangpar chu dimte hian ka dah thla ta riai riai a, ka mittui chu hru fai lehin ka han ding chhuak a. Kawlkil a ni tla tur Sen phut lam chu thlir in ka thaw zui ta hak mai.

Mapui, ilo kir tawh lo ang maw?

****************************************************