HOTEL JOHN__5

HOTEL JOHN--5

Vanlalpeki Fanai

*****************

Nguai bûr chunga ka lo indawm kun tlawk tlawk lai chuan min rawn be tu awm thut in, ka han hawi chhuah nak chuan amah tho kha alo ni leh a. Ka melh rum nghal em em ringawt. 

" Tinge, lungawi lohna I nei emni?" zaidam taka a rawn tih te chuan ka thin te chu lo rim sauh sauh in amah biak chakna chu ka neih loh phah zual hle a, ka ngei hluah hluah a ni ber e. 

" Engtinnge heng ah te i rawn Kal hman zawk a. I buaipui tur kha va buaipui hmasa ta che. He lam chu rawn ngaihtuah suh" rum deuh taka ka han tih chuan mak tih hmel  fe hian min rawn en leh ta vang vang phawt a. A hamhaih hmel takzet. Pawi pwh ka ti love. 

" Eng chungchang nge maw I sawi hi le" rawn ti ve deuh nghut in amah pawh melh duh lem lo chuan 

" I hre zawk ang chu. Min kalsan rawh hna ka thawk dawn" ti leh puat in ka tihtur te chu ka chhunzawm san ta mawlh mawlh a, ngawi reng leh ngaihdan nih loh hmel zet hian ani pawh chuan min lo la melh ve tlawk tlawk thung. Ka hre lo der lui ngar ngar tawh. Mahse, ka biak duh tak tlat si loh ah chuan ngawi reng a min kalsan in a office lam a pan zui ta hnak hnak a, hei hi a nihna diktak a nih takzet chuan kan inkar hi tawp mahse ka pawi tilo zawk a, ka duh daih zawk bawk. Mi rinawm lo nena inzawmna neih leh, ka hun khawhral reng hi ka duhthlan pawh a ni lova, ka peih ve lo. 

Nileng in Kan inbe chhunzawm ta lova, a vei vah pah a mitmei min rawn hmuh pawh in keimah zawk chuan ka lo melh tha duh hlek lo. A hmuh tur leh hriat tur kher hian Samuela te chu ka be lui vak vak a, ka nuih pui uarh uarh reng bawk. A thikthu kha a chhe ve thjn sia, a huat tawk pawh a tling leh viau maithei a ni. 

A text leh call engkim mai chu chhang duh tawh lo in ka reh san hmak a, amah ah chuan ka reh zui hmiah tihna a ni ber ang chu. A chhan te min zawt in min biak țawng chu tum viau thin mahsela tun a tan chuan ka thei rih lo. Hun thawl mamawh niin ka inhria a, ka thil hmuh leh hriat te kha thudik an ni em tih pawh hre fiah turin hun tlem chu ka la mamawh tih pawh ka inhre bawk. Ni e. Thil hrechiang lo leh rjn thu mai mai a khawsa rual chu ka ni tawh lo, tin, ka duh dan lah a ni bik bawk hek lo. Mahse, mita chiang taka hmuh fuh ka nei a, eng thil chiah nge tih hre chiang lehzual tur pawhin tunah rih hi chuan amah kha biak chakna chhete mah ka la nei rih lo phawt a, tlemin hun te hi han ral leh deuh Sela ka zia ve thei mahna. 

Ka mu tui lai chu ka phone ri in min rawn kai harh in, peih lo zeta meng Chung hian ka han en ta a. Amah maw? Tun ang zanrei tawh lamah lehnghal. Hna chungchang pawimawh te pawh a ni thei e tiin call chu hreh ru angreng tak Chung hian ka han la ve ta nge nge a, mahse, Aw hniam ruih leh hlim loh hmel em em si hian ani chuan

" Ilo chhuak lawk thei a ngem. Khawngaih in, hmuh che hi ka mamawh takzet a ni khawngaih in Rosa" a rawn tih chuan kei chu ka lo ngawi reuh vang vang phawt a. Engtia tihtur nge ka hrethiam lo. Ni e, khami ni a ka hmuh dan vang khan ani hi ka hua in ka ngei a, ka lung pawh a ti awi lo ngei alawm. Mahse, ka ngai em em reng a, hmuh pawh ka chak in ka thlahlel takzet. Amah erawh chu, kei hmeichhe lunglian leh luhlul tih mawh em em hian ka thinrimna te kha la pai dai thei lo in tunah hian ala in mun mek a ni si a, engtinnge maw ka tih dawn le. Chutihrualin, vawikhat tal a insawifiahna chu ngaihthlak sak a phu ve lawm ni ti Chung hian zawimuang chuan ka tho zui ve ta nge nge a. Ka hreh ru ve reng. Nia, tute nen pawhnise thinrim lungawi lo chunga han inhmachhawn hi ka tih țhin dan a ni lova, ka thiam lo. Tin, ka duh ngai lo thin hle nghe nghe bawk. 

Pawn ka va chhuah chuan kan bathlar ah khan vawt tih hmel deuh hian inkuangkuah hlun chungin alo țhu reng tawh a. Min lo en nghal vat. Chutihrualin kei chuan ani chu melh pawh melh țha duh lo hian hul deuh hak in, 

" Eng nge tun ang hunah I duh a"  ti zui nghut in, muangchang hiaann a rawn tho chhuak ve ta nge nge a. A tih fo thjn dan anga chiang leh uluk zeta min en vang vang pah chuan 

" Lo kal rawh. Hetah ni lo motor chhungah sawn va inbe dun lawk ila" rawn ti ve in, ka han hawi kual deyh chuan piah hla vak lo ah a car rawn ken kha a dah tih ka hre ve ta chiah bawk a. Ngawi reng in a car lam pan chuan ka kal zui nghal ta hmawk hmawk mai. Car kawngkhar te chu min rawn hawnsak ve ngei tum mahsela ka duh lo leh te te phawt a, mahse, a hawn luih țalh avang erawh chuan țhu lut ve ta nge nge in ka la tum deuh bur reng mai. 

Chutah, nuam lo tih hmel fahran a min rawn en deuh zak Zak Chung hian

" A chhan tal te chu min hrilh ve dawn lo em ni?" rawn ti hul hak in, kei chuan ka hma zawn chiah ka lo melh ve thung a, luhlul hmel fahran hian ka la ngawi deuh ran mai bawk. 

" Rosa, kan inngaihzawnna hi fiamthu ah I ngai deuh tihna emni? Tunlai I khawsa zia hi ka hrethiam lo takzet a nia aw"  a rawn tih leh chuan ka thinrimna a chawk tho ta nge ka hre bik lo. 

" Kei hian fiamthu ah ka ngai a maw. A ruka min kawp dan zawng zawng te hi hrelo turah min ngai emni? Ka hnunglam ah hian eng tiang chiah in nge min lo bum a, kei hi fiamthu thawh nan min hman tawh zawk le. Heng zawng zawng hi hmu lova haider thei turah min ruat a maw? Tu nupui hlui nge a ruka j hmuh thin a I chhuah pui thin tihte thleng hian ka hre ve bawk e aw" ka tih zui tak hmawk hmawk ah chuan ani chu tlemin a hmel lan dan a dang zui ta hlek thei a, alo thaw ve leh hak hak thin bawk. 

" Ka chanchin chhe lai an sawi zawng zawng chu i ring a, I dah pawimawh zawk bawk a, ka sawi ve hi I awih duh lo ang maw" rawn ti chuai raih in, tleqmm chuan nuam lo chu ka ti ve deuh. Mahse, kha VIP nupui hlui nena an inzui chhuak lai kha ka hmu chiang ve em a, kha zet kha chu phatmar ngaihna a hriat bik ka ring lo. 

" Kawp mai mai ni tur hi chuan ka inphal bik ring lo la, i chunga thleng nise j duh bik bawk hek lovang. Chuvang chuan i rilru Siam fel la, kan inkar pawh hi chin fel law law a tha ang" ka lo tih chuan phawk fe hian min rawn en leh a, 

" Eng chungchang ah nge ka rilru chu Siam fel tura min duh a, nang hi ka Bialnu ini a, midang ka nei hek lo. Kan inkar pawh hi sawifel turin awm in ka hre lo a, a awmzia chu, tawp tura sawi fel hi ka duh lo. Tunah hian eng ber hi nge i thinrimpui, min biak duh loh nachhan hi ka hre thei lo bawk nen, tihian zanrei pawh sawi theilo in ka rawn pan tawp che a nia i thinrimna chhan diktak chu min han hrilh tawh ta che. Ka tan pawh hian awmdan thiam a harsa a, a hrehawm takzet a nia aw " rawn ti leh mawlh mawlh in, kei chu a khât tawk in ka lo rum ve leh dat thin bawk. Chutah, 

" Nitin maia Mc I Kal ve fo nachhan te kha han sawifiah nghal law law ta che. Chuan, chumi hnu lawkah I Mc Kal ve ziah nachhan nen khan khaw laiah hmuh dun tur in awm leh bawk a, amah vang khan zan khat tal tawp chu min reh san in party te in buatsaih nghe nghe a ni lwm ni. A nuam ngawt ang chu. Kei hi chu min theihnghilh tawh la, ani tan khan inpumpek law law rawh. Ka kal dawn" tih pahin motor kawngka chu ka hawng rawk rawk a, na zet a khar zui lehin mahni in lam pan chuan ka pen zui nghal hlawk hlawk mai. Ani pawh khan motor chhung atang a rawn chhuak in min rawn ko zui ve lawm lawm mahse la vawikhat pawh hi ka hawi let chhin eih lo. Huatna leh thikna hlir in ka khat tawh a, kan inkar hi kan Siam tha thei dawn lo a nih si chuan tawp hlen zawk mai rawh se. Inkawp tih vel hi ka thiam ve lo ve. A peih pawh ka peih lo. 

In chhung ka luh hnuah pawh chuan vawi tamtak rawn call lehin ka lo reject hmak hmak thung a. Ani biak chakna kha ka nei thlawt rih lo a ni e. Mu mai thei lo hian rei tak chhung chu a awmdan thlithlai duh vang in ka han meng ve leh phawt a, ka țhu deuh reng. Tin, a khât tawk hian a in khalh chhuak tawh em tih en tumin pawn lam lan theihna darthlalang atang te chuan ka va bih leh dek dek thin a, ani chu ngawi reng hian a motor nen khan a dinna ngaiah an lo la ding reng zel a nih chu. Ka van ning tak. Min biak theih loh te chuan haw ve tawh mai tur hi a nia. A lakah hian thinrim in lungawi lo ve viau mah Ila amah ngaihtuahna tamtak hi ka la nei ve tjo bawk si a, zanin pawh amah vang hian ka muhil thei lawk pawhin ka ring lo e a. Minute tin deuh thaw in ani chu ala awm nge awm lo tih en tum hian ka va bihthla thin a, alo la awm fo mai. Chutah, a Khawsak dan chu tha lo ni a hria in phone ka ban vat a, ka va text ta nge nge e. 

" Haw rawh. Kha tah khan mi â ang maiin ding reng tawh suh" tih ka va thawn chu rang em em hian alo seen thuai a. 

" Ka insawifiahna tal I ngaihthlak hma chu ka haw lo ang" rawn ti ve in, ka thaw chhuak hawk thei. 

" Mihring hian insawifiah kan mamawh tawh chin ah chuan thil hi kan ti dik lo nasa hle tawh thin" lo ti let ve in, keimah bawk chuan

" Haw phawt rawh. Tunlai khawvelah khatiang a pawn boruak tem reng kha a him tawh lo. Haw la, naktuk lamah Kan inbe zawk dawn nia"  tih chu thawn nawn lehin, ka thawn atanga reilote ah ani pawh chuan a motor chu ti nung zui vut vut in a tlan chhuak ta nge nge in ka hria. Ka va en leh pawh khan a motor chu hmuh tur alo awm tawh lova, a haw tlang nghal em ang chu maw. Heiha! Bialpa neih te pawh hi a, buai lohna tura buai reng ngai mai. 

Zan lampang kha ka mengrei angreng bawk a, a tuk chu thawh ka hai nasa hle. Phur lo zet a insiam in hna kal tur chuan ka chhuak zui leh ta a. Hmuh loh tur pui pui kha ka hmu leh ang tih hlau in ka scooty khalh pah te chuan hmun dang pawh ka melh tha ngam lo zo va, ka hawi zau vak ngam lo. Mahse, eng thilmah tawng tawh lo in hotel chu ka thleng fel thei ta hram e. A thawventhlak huai. Chutah, hotel thlen rual rual hian Sir Johna message chu ka han dawng zui zat bawk a, ka en peih lo nghal kher mai. 

" Hotel I thleng tawh em. Vawiin chu tihtur pawimawh ka neih dawn avangin ka rawn tlai deuh dawn a, tlai lamah Dinner ei chhuak turin ka rawn lam phei dawn che nia" a rawn tih chuan seen ve ringawt mah Ila ka reply peih lo. A duh duh chu ti se, duh leh Mc ah te khan Kal in nuam chu va tawl leh se la ti nia. Ka ning, ka hne, ka kham. 

Ziah fel tur ang ang ziak a ka lo kun ngar ngar lai chuan.

" Iva buai awm ve a" min rawn ti thut mai a

Ka hawi chhuak rang kher. Samuela lo ni reng chuan. 

" Nia, tih fel tur hi a tam lutuk a. Ilo thlenna a rei tawh em" lo ti nghal var in, ani chu awmze neilo hian alo khi ve suk. 

" Rei ve tawh tho mai. Hei, momo ka lo ken sak che a. I riltam hunah ilo ei dawn nia"  tih pahin a momo box khai lai chu ka dawhkan ah chuan rawn dah in, kei chuan lawmthu ka lo hrilh ve mawlh mawlh reng a. 

" Vawiin chu a rawn tlai deuh maithei a ni. Mc ah khan ka rawn hmu a, a tihtur a hrilh che em" a rawn tih lai chuan a sawi awmzia ka lo bang bo deuh hlek. Chu chu hrethiam in amah bawk chuan 

" Aw, ka unaupa chungchang mawle ka sawi" rawn ti ve leh in, ka ngaihtuah let a, ka țim zui sawk thei. Mc ah bawk maw alo VA kal leh tak tak a. Ni rawh se. Chiang takin kan inkar pawh hi tawp nghal bawk rawh se. Mai mai chuan a. Ka pen hum tur ringawt te chu ka kut khur nasa ta lutuk chuan a ti harsa zo vek tawh a, a ruk tak chuan ka buai a ni. Ka buai takzet. Hemi ni zet hi chuan mu leh mal pawh nei thei lo khawp in ka khawsa a, mikhual ho pawh kha ka lo dawngsawng tha hlawm em ka hrethiam niaih nuaih tawh love a. A khât tawk hian Samuela khan ka that leh that loh te chu min rawn zawt ve thin in, mikhual te thleng mai khan ka buaipui hah pawh ngai hauh lo in alo buaipui fel ve zung zung hlawm a, min chhawk zangkhai thiam takzet zet. 

Tlai alo ni a, a sawi ang chiah khan dinner ei dun tur pawh chuan sawmna ka dawng nawn leh tawh lova, a rawn in lan bawk hek lo. Ka haw hun aia hma hret ah chuan night shift ho lo thleng khawm in ka haw hma theih phah ta hlauh a. Ka haw zui nal nal bawk. 

In ka thlen hnu pawh chuan mumal neilo zet hian ka tal zui ve nawk nawk reng a, ka inbual lai te pwh kha mumal takin ka hre lo. Ka nu in 

" Bawihi, I phone a rik char char hi" a rawn tih lauh lauh takah chuan harh chhuak ve deuh zawk in, ka inbual zawh hnu khan thawmhnaw pawh inbel mumal lo hian ka khum chungah chuan ka lo thu ngawi veng veng a ni tih ka hre zui ta chiah a. Ka phone ka han en nak chuan amah ngei kha alo ni e. Ka chhang duh a ngem tih chu rei tak chhung in ngaihtuah hmasa leh phwt in, a tawp ah erawh zawng ka chhang ve ta nge nge e. Chutah, 

" John Lalnunhlua hi a nung chunga ila hmu duh a nih chuan ka awmna ah hian a rang lam in rawn Kal ang che! A njh loh chuan a damlai hmel hi I hmu leh tawh ngai lovang" rawn ti tu chu ka hmangaih John-a aw kha ni lo in, ka hriat ngai loh mipa dang daih aw a ni tlat. Eng nge thil awmzia hi. A aw leh a thil rwn sawi dan atang kha chuan a fiamthu lova, a rawn ti Mai Mai lo tih pawh chiang takin ka hrethiam a, mahse, eng aiah nge kei kher. Engvangin nge a chhungte a biak sak zawk mai loh. Ni lo, chutiang thil chu tun a tan chuan ngaihtuah hmasak chi pawh a ni rih lo e. Engtinnge ka tih ang le ka hrethiam lo a ni. 

" I awmna hmun chu rawn sawi rawh. Chuan, John-a kha ilo ti na a njh vaih chuan i hre ve khawp ang aw" lo ti let ve khar khar in ka huaisenna zawng zawng chu a zo nghal vek nimai hian ka hria a, ka khur dar dar thei hial. Tichuan, a awmna hmun chu min rawn hrilh in amah bawk chuan

" Police emaw, midang tu pawh, I rawn hruai a nih a rinhlelh tura I khawsa a nih vaih zawngin I bialpa hian a mit hi a meng leh tawh ngai lovang" a rawn tih chuan midang ka hruai loh tur thu chu lo hrilh ve in, phone a cut zui ta hmak bawk a. Keipawh chu taksa khur bawp bawp Chung chuan ka insiam zui ta nghal mawlh mawlh. 

Ka chhuah chhan tur chu chhuanlam chi hrang hrang Siam leh in a rawn sawina lam pan tur khan scooty nen ka in khalh chhuak ta puat a. Mahse, kawng lakah chuan ding zui leh dawt in, ka han ngaihtuah chiang a, an awmna hmun ni a a rawn sawi kha khaw chhung atanga hla ve pangngai tak niin, mahni mai a han Kal chu a him zo taktak a ngem ka hrethiam lo. Ka phone chu phawrh zuk in police call mai ka han tum zet a, ka ngaingam leh ta chiah lo thung. Chumi hnu chuan Samuela talin min hriatpui se tiin biak mai ka han tum leh a, mahse, ni leh lo. Thil zawng zawng hi a kal buai phah thei a, a rawn chawk buai vek thei tlat. Um, an duh dan ang ngei khan mahni chauh in va kal ila, a nih nih kan ni tawh mai ang chu tiin scooty chu ka ti nung leh ta a, ka tum ram lam pan chuan ka tlan zui ta vang vang zawk a ni. 

Chutah, an awmna hmun ni a an rawn sawi ka va thlen phei lai chuan boruak chu alo reh tha em em mai a, zan boruak te alo ni tawh bawk nen Ramhnuai chu a ngainatawm viau hran loh a ni e. Zawimuang a pen zel in, ka hma zawn hla lutuk lo ah chuan farm house niawm tak, in lian em em pawh ni lo nalh hmel fahran a chei ni si hi lo awm in, ala thim khup leh ta nghal a. Ka râp deuh lek lek mai. Mahse, tun dinhmun ah chuan hlauh leh râp dang sawi theih a ni tawh lova, ka hmangaih kha ka chhanhim a țul miau si a ni. Zawimuang a pan phei zel in, ka ding zui leh ta chawt. Ka phone chu phawrh in Sir John-a ngei mai chu ka han call ta ringawt a, alo pick thei miah lo zui a. Ka hlauthawng ta tulh tulh mai. Ka thlen har em avangin khang misual te khan a nunna chu an lo laksak ta mai tihna emni ang. Aih, Rosalind, chutiang thil țha lutuk chu ngaihtuah pawh ngaihtuah tawh suh. 

Phone a lak theih tak siloh ah chuan ka phone chu ak tha leh in, ka inhumruh ta sauh sauh mai a. Nasa zet hian ka thaw chhuak zui leh ham ham phawt. John-a lo thi suh. Ila dam a țul a nia. Dam taka kan intawn leh hma zawng chu thi thei Ila ni lo, min thihsan thei I nilo, rilru a sawi mawlh mawlh Chung chuan kut khar dar dar in chu thlam kawngkhar chu ka han hawng zui ta țial țial a, zau taka ka hawn hnu thleng pawhin a chhungah chuan ka lut tha mai ngam lo fo va, ka bih hmasa kual vel phawt. A thim em em reng avang chuan ka hlauthawng takzet tawh a, boruak reh duh bawk si nen, thil awmzia chu ka hrelo lehzual kher. Tichuan, muangchang a pen țan in, a chhung ka lut fel chiah tih ah chuan ka luhna kawngkhar ngei mai kha na zet hian pawnlam atang in a rawn in khar zui ta pawp mai a le! Ka phu nasa lutuk chu ka duh aia thuiin hma lamah ka kat phei zui ta dawrh lehnghal aa, Chutah chuan tu emaw hian min lo pawm zui ta chawt a nih kha! 

" Ilo thleng thei maw. Ilo Kal duh taktak pawh hi ka ring lova, ka lawm e!"  rawn tiin, a hmel ka han en chian nak chuan amah Sir Johna ngei kha alo ni daih nia! Eng nge thil awmzia hi ni tjin a. Misual in an hreng bet a, an phuar bet tlat a ni lo emni? Thawklehkhat ah a mi pawm behna ata chu tal chhuak in amah hlat thei ang berah chuan ka va ding zui ta daih pek a. 

" Eng nge thil awmzia. Nang, nang te chu chhanchhuah ngai in I awm a. Ih, tunge min lo be tu kha" ti bah nuaih in sawi ngaihna tak pawh hi ka hre lo ve a. Kei hi bum chhuah ka ni a, engvang nge? Eng chungchang ah nge tih chu hre hauh lo mah Ila kei hi chiang taka bum chhuah ka ni tih erawh chu ka Chiang hle thung. Nui var var chunga min rawn pan phei ve in

" Chhanchhuah ka ngai alawm. Ka Bialnu in min hua a, min do bawk a, min la be duh lo zui. Lo hnai teh. Ka thlakhlelh tawh zia che hi I hria em" ti Chung chuan ka kut chu rawn kai in a vuan nghet phian lehnghal. 

" Engah nge hetiang hian min tih. Min tih hlauhthawn zia kha I hria em. Nang lah chu tihian Thlamuang em em in ilo awm vel mai mai a"  tiin ka țawng tawp lam phe kha chu ka hnuk a ulh deuh avangin a zuih ral zo va, a fiah lo ta vek. Chutah, a hma aia nghet zawk khan mjn rawn kuah leh in ka hnungzang te chu a chul pah leh hliau hliau thin bawk a. 

" Ka tihpalh. Hetia ka ruahman mai loh chuan min pehhel dan tur ringawt I zawng si a, ka tan tih dan tur dang a vâng ve em a ni. Tin, nang hi chan che ka duh lova, min kalsan daih tur hian ka phal bawk hek lo che. I hrethiam em? Chuvang chuan khatiang khan ka thiante ruai in ruahmanna ka siampui ta a, ka rawn biak tir ta che a nih kha. Hlauthawng taka ka siamna che ah khan min ngaidam thei em" ti chungin ka khabe chu a rawn vuan chat a, min kuai dak nghal bawk. Kei chuan fiah taka lo melh let ve kar in, ka hmui khur der der tawh chu a rawn fawp hman tep ang tih ah hnuailam in thawm a rawn chhuah a, ka zanriah ei loh rah kha rawn lang chhuak in, ka pum chu a ri zui ta ruk ruk mai le! Alo țhen deuh sak thei. Ka zak lutuk kha khuk Chem Chem a khuk ral daih mai ka duh tawh a, a theih bik bawk siloh. Tichuan, ka tihtur chu țhulh in, ka kut a min la kai bet reng Chung chuan choka lam niawm takah hian min hruai lut leh ta a. Chuta light a han on nak chuan dawhkan nalh leh te fel zet mai chungah khan eitur Siam sa chi hrang hrang tui hmel tak tak hi lo in chhawp teuh in, a țhen te phei kha chu Siam zawh hlim tih hriat tak hian an la khu vat vat thei lehnghal a, ka chil chu ka lem zui khalh mai. 

" Ei phawt ila ka lal Fanu, ka lo nghak reng che alawm" tih pah a min rawn en chuan a hmelthat zia ringawt ka lo ngaihtuah leh tawh. Tichuan, dawhkan lam chu pan phei dun in, ka thutna tur min siamsak thlap hnuah ani pawh kha ka hma zawnah a rawn țhu ve ta zat a. Nui sang chunga wine min thlit sak lai chuann

" Hei hi I farm house tihna emni?" lo ti sap in, ani chuan min rawn melh deuh zawk a. A wine chu lem leh te te in a tep zui chap chap phawt. 

" Aw ni e. Ka lei thar e ka tia. Ala rei lo" rawn ti ve Mai in, zawhna ka zawt zui tawh lova, ka hmaa eitur inchhawp ang ang te chu ei nghal mial mial in, ka ei hnem kher lehnghal. Bialpa te bula thil ei vanga ei puar ngam loh tih vel kha ka duh ve ngai lova, mahni inhremna ka ti Mai. Ei mawi loh pawh hi ka hlau ngai Chuang lo, ka ei hmiah hmiah zel. Kan ei theih chin kan ei zawh hnu chuan kan tih hnawk te kha ti fel dun leh in, sil tur awm ang ang te kan silfai dun leh phawt a, kan haw tawh mai dawn emaw tih laiin ani chuan thut khawmna pindan a pan leh te te. Chutah, wine bottle bawk chu rawn phawrh leh in no pahnih a keng bawk a, 

" In leh phwt ila kan haw dawn nia" ala rawn ti ham ham. Kei chuan sana ka han bih deuh zauh phawt a, rinai taka ala tlai chhiat loh avang chuan  ni e tiin a wine in na bulah khan ka va țhu ve ta phawt. 

" In ve rawh" tih pah a wine thlit sa min rawn pek a tum lai chuan lo hnial ve in ka puar rih thu leh ka in theih pawn ka rin tawh loh thu chu lo hrilh ve in, ani lah khan

" I puar belh lo ang" tih pah hian no pakhat zawk chu min rawn pe lui ta țalh a, in duh lo ni lem lo ta chuan ka lo khiat ve tak khalh kha. Ka pum chhung chu a sa thla nghal vung vung thei a, a no hnih naah phei chuan ka lu ah hian a rawn par chhuak chhap ni ber in ka hria. 

" Lo hnai teh" tih pah a a bul lama min pawh phei nawk nawk lai te chuan nui var var ching hian ka lo awm ve hle hle tawh a, ka hma zawnga ka lungawi lohna leh thin ur na te kha chu um bo ang duak hi ni tawh in, tunah tak hi chuan Khawvel a hmeichhe lungawi ber leh hlkm ber thlang dawn ta Sela, ka pakhatna thei hial in ka rjng a ni. Chutia thu ho mai mai sawi pah a kan lo titi mawlh mawlh lai chuan ka muhil ta nge ka hrelo, dimdawi taka min nghah riai riai lai chuan rawn harh chhuak leh in, a hmel chu phawk fe mai hian ka han melh ta kuau a nih kha. Ani pawh chu a bang bik hran lo e. Kan in melh chiang ngang Mai. 

" Khawnge ka awm" tih pah a ka han thut chhuah chuan ka bulah khan lo țhu zui ve in

" Khum Chung ah" a rawn ti hmuk a! Rang fahran hian ka tal thla zui nghal buan buan thei. 

" Haw ang. Haw a hun. Inah ka haw duh" ti mawlh mawlh Chung in ka pheikhawk te kha ka zawng zui ruai leh ta nghal a. Ka talbuai angreng hle. 

" Zanin hian in a haw ka tum hleinem! Tunah zanlai dar 1 a pel tawh a, zanrei a pawn boruak hrisel loh zia pawh I hriat ve tho kha" ka tih dan zira a rawn sqwi chhuah leh takah chuan ka thil tih lai chu tawp in, ka ding khwng nghal awt thei. 

" I haw dawn lo maw. Eng nge hetah hian tihtur ila neih a"  lo ti let hmuk in, ani chu a rawn tho chhuak ve ta țiah țiah mai. Chutah, ka bula rawn phei pah in ka kawng ah a rawn kuah a, ka darah chuan a khabe chu rawn nghat leh in

" Zanin na na na chu i bula awm ve hi ka duh a. Min phal sak thei a ngem. Khawngaih in, ka hlauhawm miah lo ang" a rawn tih tak sar sar ah chuan chhan let mai ngaihna pawh ka lo hre lo. Diktak a sawi chuan a bula cham hlen hi theihnise ka duh ber ber zinga mi a ni ve hial ang chu. He hmun ka thlen phei chhan pawh hi amah vang a ni lo emni. Mahse, nupa pawh ni silo a hetiang a zan hun han hman dun ngawt chu a tih chi dawn em ni ka ti. Ka hrelo le. Tun ang hun tawh a mahni chauh a hmun hla tak pan erawh chu ka zuam bik ikhaw tawh silova, awle, tiin ka zia chu ka han thlak ta thut mai a. Ka che sawn nghal vat bawk. 

" Mu ang. Che lo in Kan mu ang" tiin khumah chuan ka lawn kai zung zung mai a. Ani thung kha chu alo nui kar kar reng mai. 

" Inkuah tal te chu phal ve la miss"  tih pah a ka mu țha hle hle lai mjn rawn kuah thut chuan a ban chu ka lo phih sak nghek

" Lehlam hawi teh. I rim lah kha ala na em em zui"  lo ti zui ve hmak in, thu lah chu a awih lo angreng phian lehnghal a, min rawn kuah zui lehnghal zat. Chutah, a bawp sei leh rit zet mai hmang khan min rawn khan zui leh zat in, kei chuan a theih dan dan hian ka lo phih thla ve zung zung zel a, a bawp kha chuan min rawn khan zui tawh lo. Mahse nghet fahran a min kuah behna erawh a thlah duh ta hauh lova, ka tal buai peih tawh bik lo bawk.

" Muhil ang. Mut a chhuak. Che lo a mut tur j tih kha eng nge i chet sek le" te chu ala rawn ti deuh deuh lehnghal a. Ka nghawk sawk dawn emaw ni le. Tichuan, hriat loh kara lo muhil ve in, vartian tak takah hian ka harh ve leh mai bawk a. Thawh chhuah mai tuma ka han chet nak chuan a nghet thei ang bera min kuah hian a bawp hmang khan min lo khan bet tlat reng bawk chu a lo nia! Ka thawh bosan a hlau nge maw ni le. Chutah, sana chu en leh in khaw chhung a hla tih ka hria a, tlai mai dawn a ka inhriat takah chuan dim lo zet hian ka sawi harh zui ta nawk nawk. 

Peih lo zet a a mit chu rawn meng ve suar suar in a ham pah bai bai reng bawk a. A bula mu leh tur bawk chuan min kuai tlu leh tawp mai nia. Ka va han ning tak. 

" Reilote chiah"  tiin min kuah bet hlu hlu reng a, a thaw deuh sâk sâk reng mai bawk si, kei chuan meng kar Chung leh che țha ngam eih lo a a thaw ri lo Ngaithlak pah chuan thil tamtak ka lo suangtuah ve bawk a, tihian nupa ni tawh in, mitmei ven tur leh hlauh tur awm miah lo ni tawh se, tihte ka lo ngaihtuah lai chuan ka biang ah a rawn dhuk ta thut a. Ka harh chhuak zawk. 

" Tak tak a, tho mai ang hmiang. I chhungte pawn an ngaihtuah lutuk dawn che. Hna kal ngai te Kan la ni bawk si a" rawn ti zung zung in min pawt tho zui nghal a, ka lo meng rang nasa kher. 

" Chutiang te chu nizan atang khan ngaihtuah lawk daih tawh tur che alawm" lo ti let hmuk in, ka tum zui leh bur bur tawh. Nui vur vur chunga a thawmhnaw inbel mawlh mawlh pah chuan min rawn melh leh zauh thin a. 

" I thin te lah hi a rim ve thin si a" rawn ti duh lek in kei chu room atang khan ka lo chhuak hmasa ta daih a. Tichuan, kawngka leh tukverh te kan kalh fel leh vek hnu chuan haw turin kan chhuak zui ta nghal a. Duh eng ang mahse la a car a ka chuan ve a rem lova, keini scooty chu muangchang a khalh haw in, ani pawh a car nen khan ka hnung lawkah a rawn tlan ve ta zel a. A duh hun hunah horn lah kha a rawn hmet ri thjn lehnghal a, min ti phu nasa thei lutjl ringawt. 

Khaw chhung kan thlen hnuah pawh muangchang tawh lo in mahni in lam ve ve chu kan pan zui ta phawt a. Ka chhungte pawhin zawhna ninawm zet zet min lo zawt tawh lo hlauh e. Zan lam erawh kha chu ka thiante in a ka riah an rin thu an sawi thung a, ka him ta lel mai. Tukthuan pawh ei ta lo chuan ka insiam zui ta zung zung zawk a, hna kal turin ka tlan chhuak lehnghal vang vang. Mak takin hemi ni hi chuan hnaah min lo thlen khalh ve teh mial a, ala intithei em em zui. 

Hemi ni hian VIP mikhual kan neih leh avangin Sir Johna nen pawh chuan zingkar a kan inhmuh bak kha chu inhmuhna hun kan nei leh thei meuh tawh lova, mikhual pawimawh te hotel chhung a fan kualpui pah a a mit min rawn siai leh țhin tih chauh loh kha chu a hranpa a inhmuhna hun leh inbiakna hun takngial pawh kan nei thei tawh lo. Ka ngai veng veng reng mai. Amah hmu pha reng a ka awm Chung pawh hian amah tho  kha ka ngai a, ka khua a ti har veng veng reng mai. 

Zan lo thleng in, hemi zan hi chuan a rawn len hman loh tur thu chiang taka sawijn a tihtur te pawh chiang takin min rawn hrilh lawk thlap a. Ngaihtha takin ka lo awm ve ta mai. Mahse, Samuela zawk kha zantir ah rawn leng lut ve teh mial in, ruih nei hi a ang riau leh ta nghal a. Ka lo be țha peih lo lek lek hman. Mahse, thawh puite a nihna laiah leh thian anga ka lo neih ve tawh te a nih ah khan han biak duh loh ngawt chu thil awm leh mawi a ni lo va tiin țha tak leh pangngai tak chuan ka lo be lui ve zel a. Rui chhe lutuk anga a lan loh hrkm hrim bawk avangin ka nu leh pa te phei kha chuan a rui tih kha an hrethiam ve kher in ka ring lo. 

" Zanin chu min lo hrethiam teh aw. Natna thuk tak pai mek mihring ka ni a, zu chauh hian min hnem thei bawk si. Min hrethiam dawn nia"  tiin a khât tawk hian ka hriattur tawk lekin thupha chu a rawn chawi leh mawlh mawlh thin a, nuih te pawh a ti za lek lek zawk e a. 

" Um ni e, misual ini lem lova, hetiang Chang te hi chu a awm ve thin alawm"  ti a lo hnem ve in a țawng loh chuan sawi tur pwh hi ka hre ve lo a, zurui phei hi chu mahni harhfim kur si chuan kawm ngaihna vak ka hre lo thin. 

" Ihmaw Rosa, thil kalhmang leh in lum leh dan hi I hrelo thei lutuk a. Ah, ila hre chho ve zel turah pawh ngai ila, zanin pawh chhungkaw chaw eikhawm leh inkawm hlim an rawt ve a, kei chu ka kal peih lo. Unaupa pawh a kal Chuang hleinem. Ani hi chu" tiin a thil sawi laklawh lai chu a tawp zui ta daih a. Kei chuan ka lo melh ve vang vang ringawt. An chhungkaw inhmuh khawm tur chungchang chu ka hre lova, mahse Sir Johna kha chuan kan hnam dang mikhual kan VIP te kha an tihtur țul tih puiin, an haw leh hma ngei a tih fel pui hman vek a tum thu erawh kha chu min hrilh ve. Tunah tak hi chuan inah pawh ala haw in ka ring lo. 

" Tinge. Chhungkaw inhmuhkhawm te chu a nuam a, awm ve hram hram tum tur asin" tia ka lo chhan let chuan ruih vanga meng suar suar chung hian a han khi veleh suk thin bawk a. Chutah, 

" Ih e, ka chhungte hi ka do a, ka hua tihna ni miah lo in, hmuh peih loh fe fe hi ka nei ve a. I hmuh angin kei chu heti mai hi ka nih hi. Mi hi ka zilh hau ve e an han tih ngat phei chuan thin hi alo rim ve tûk zel Mai a ni" tih pah hian za lo fahran in a rawn nui chhuak leh huk huk thin a, ka lo kiai ve sak ringwt. 

" A thuhrim in I unaupa te chuan zanin ah tihtur a nei a, inhmuhkhawm ah pawh a Kal ve thei nang" ka lo tih chuan ngeiawm zet a rawn țhen deuh sak in 

" Dawt a nih chu! Thudik a ni tih i hriat chian hma loh chuan thil hi huai deuh in sawi duh suh aw. Kei hian ka hrechiang a e, tunah pawh Mc a dawr pakhat chhungah khan nui huah huah chungin a țawng leh zut zut tawh ang chu"  a rawn tih chuan ka thin a khei zui leh ta Zak mai. Ka bialpa hi ka ring lova ka ringhlel reng tihna la ni lo in, hetiang zawnga amah hrechiang a a thisen zawm pui ngeiin a chanchin a han sawi hi chuan ka diklo nghal vek zel ni berin ka hria. Chutah, Samuela bawk chuan fiah mang lo pui hian

" Thil tamtak hi hriat loh j nei ka tih che kha. Tinge maw, I hriat rei theih miah loh le" rawn ti leh in, mut hahdam ka duh tawh thu chuan ka lo chhang let daih thung a, tlem chuan a rawn meng phar ve awk ni berin ka hria. 

Peih lo zet a min haw san hnu chuan Sir Johna chu biak tumin ka han call zui vat a, mahse, a phone chu a la thei hauh lo nia. Dar zat chu en leh in, a mut hun niin ka la hre lem lova, Samuela sawi ang tak tak khan Mc lamah chuan alo VA kal leh nge ni ang. Hneawm zozai ta hle mai.

Ngaihtha lo zet chunga muhil in zing ka țhanharh rual chuan a message a awm leh awm loh ka check nghal vat a. A lo awm lo. Mood off ru zet a tho chhuak nghal in, Tukthuan pawh chu ei loh aiah ka han ei lui ve nial nual a, ka puar leh puar loh pawh ka hre zui hran love. 

Hotel ka thlen rual hian Samuela khan phawk fe mai hian kei chu min rawn pan nghal dawr dawr mai a. A ngaihna ka hriat loh em avangin za lem lo tak Chung chuan ka lo nuih ve var var ringawt. Chutah, 

" Unaupa kha nizan ah chesual in a car nen a accident palh hlauh a! Biak theih loh a ala awm reng avangin a chhungte tan rawn hrilh ngaihna che a awm silova, Keipawn zingkar ah khan chanchin ka hre ve chiah a ni e" a rawn ti ta mai a! Ka khawng nghal vek thei. 

" Tunah pawh hian mumal takin ala harh chhuak theilo an ti nghe nghe a. Damdawiin ah chuan Iva kal ve duh em" rawn ti leh zung zung in ka in thing Harh deuh nawk. 

" Kal duh e. Engtinnge accident chu a tawh theih zawk a" ti leh zung zung in ka hmai te chu a rawn sa zui pup pup thei nimai hian ka hria. A hrehawm lutuk. 

" Ka Chiang bik chiah lo. A thiante ho nen an leng chhuak a, an ti Mai a! Ka Chiang bik lo kha chu"  rawn ti leh zung zung in hospital Kal phalna han la tur chuan in Chung lamah a tlan chho nghal nulh bawk. Ka rilru hah leh tawt tawh lutuk chu tihtur ber pawh hre lo hian ka dawhkan bulah ka âwm dawm in ka lo tei kual chhen tawh a, Samuela pawh chu rinai in a han thang rei ka lo ti tawh kher. Minute 20 dawn ka nghah leh hmu chuan rawn tlan thla ve leh in, 

" Kal ang hmiang. Awm rei hman kan ni dawn silova" rawn ti zung zung Chung hian ka kut chu a rawn vuan zui ta mai a. Ka meng phawk hman hle. 

" Mahse, tunge hetah hian lo duty dawn a" ka tih deuh chul lai chuan Sir Johna secretary Tluangpuii kha nui sen sen Chung hian a rawn thleng thla ve ta chiah a. 

" Rawn ngaihtuah suh"  ti sap in, ka lo thaw deuh huai thei. Tichuan, keini pahnih pawh chu rilru phawklek leh hmanhmawh ru zet chuan kan chhuak zui ve ta nge nge a ni. 

Ka scooty keng lo in Samuela bullet zawk ah chuan min phur ve ta mai a. A speed chu a ti sang angreng bawk nen, ka hlau lek lek thin mai. 

Damdawiin kan thlen hnu pawh chuan ka kut chu rwn vuan lehin a chhungah min tlan luh pui nghal a, sawi tur pawh hi ka hre tawh lo. A mi kaih ang ang chuan ka kal ve zel ringawt mai a ni e. Chutah, a khum chunga lo muhil mek ka bialpa, ka duh leh ka hmangaih em em lam chu zawimuang a pan hnaiin, a kut dai diak mai chelh sak tu nei lo te la kangin ka vawn sak zui ta vang vang mai a. Mittui tling piau hian a hmel pawh chu ka melh ngar ngar ringawt. 

" Tinge, keini pahnih inkawp ve hi buaina hian min umzui bik zel le tiraw" tia phun chhuak sapin ka mittui chu a rawn luang thla pah ngiai ngiai reng a, chutihlai chuan Samuela pawh kha ka bulhnaiah rawn Kal in, a âwmah min bei tir zui ta hle hle a, ngawi reng hian ni khaw hre lova natna khum Chung bel mek ka hmangaih hmel chu kan thlir dun ta tlawk tlawk ringawt mai a ni. 

Damdawiin ah chuan rei tak pawh awm thei lo in hna lamw kan kir leh phawt kha a țul rih miau si a, zan lama kal leh tur in Samuela nen pawh chuan kan inzui chhuak leh ta rih phawt. 

Eng thil mah hi ka ti phur thei tawh lova, Sir Johna mawlh kha engtikah nge mumal leh pangngai taka a rawn harh chhuah theih ang tih chiah chu ngaihtuah in hun ka chhiar liam a, ka ipik ru ngawih ngaiwh reng bawk. 

" Tinge chanchin engmah min hrilh ve loh a. Staff dangte pawn hospital a va Kal ve chu kan chak vek dawn asin" Mahruaii khan lawm lo tih hriat taka rawn ti ve in, kei erawh chu ka lo thaw ve hak hak ringawt. Tin, ka hriatna ala rei bik loh bakah chawp chilh taka hriattir ve tho ka nih thu te, hetiang thil hi pawn lam mi te ngat phei chuan hre lo se an duh zawk vanga puanzar loh leh thup tlat a nih thu te pawh chu ka lo hrilh ve ta zung zung a, a lawm zo chuang lo ni ber in ka hria. A tum zui bar reng mai. Ka dem hauh lo. Mahni hnathawhna nei tu ber ten chetsual tawkin thih leh dam karah an leng mek a ni a, chutiang thu pawh hrilh hriat an han ni lo ringawt chu a lawmawm dan a lawmawm dawn lo em a ni. Diktak chuan Keipawh hi Samuela khan beng var chhuah in min hrilh lo ni ngat se chu tunah pawh hian amah ngaihven ru em em in ka la hawi buai vel mai mai ang ka ring. Samuela hi a bengvar thin a, a țuan nise a țha in a mawng a zang bwk a, ka hriat ngai loh tur tamtak hi ka hriat phah ve thei zel a tihtheih ang chu. 

Zanriah eikham rual rual in damdawiin pan tur chuan ka insiam lehnghal zung zung a, thian dang te pawh ngaichang lem lo in mahni chauh chuan ka kawh chhuak ve tawp. Vanneihthlak takin damdawiin ka thlen lai hian Sir Johna pawh kha a lo harh tawh tih chu min hrilh in, a cabin pawn la a lo țhu, sir Johna nu khan min lo be zui luam a, ka kut te chu chelh bet tlat in min hnem a tum nge ka hnem a beisei zawk tih pawh ka hrethiam tawh lo. Reivsklo hnuah chuan ngawi reng a min thlah ve leh maiin kei chu cabin chhung lamah chuan muangchang hian ka lut zui ve ta nge nge a, cabin chhung boruak chu a reh a, a rit nghal vek thei nimai hian ka hria. Ka thawm hria in khum chunga lo țhu ngawi reng ka duh a ka mi ngaih em em pa chu rawn hawi phei vat in mawi zet hian a rawn kiai ve ta sak a. Chutah, a kut hmanga min rawn hui zeuh zeuh pah chuan

" Lo kal vat vat" rawn tiin, a bul lawkah khan thawm dim fahran hian kei chu ka va țhu phei ve ta a. Min lo en chiang nasa bawk si nen ka lai leh lek lek thei mai. Ka kut pakhat zawk chu rawn ban in a kut hrawl leh pa zet mai hmang khan a han hum lum zui ta vang vang mai a. Amah ka lo thlakhlelhna leh mamawhna te, ka ngaih em em na te inkhawl khawm khan insum theih lohna min rawn pe in, zah pawh dqwn lo hian a kut lum vung vung chu ka fawp zui ta vang vang ringawt. Min lo en ve reng a ni tih chu hre tho mah Ila zah ka sawi thei tawh lova, ka zah duh lova, amah ka thlakhlelhna te khan a tawpkhawk thleng in a tawng sang ve chiang em a, a baw liam zawih zawih te pawh a tihtheih ang chu. 

" Keipawn ka ngai tawh lutuk che alawm. Lo tawlh hnai teh" tiin a lamah chuan dimte hian min han pawt hnai te te a, min kuah zui ta veng veng mai. 

" Engah nge i accident zan khan I car nen I len chhuah mai mai a. Tu thu in nge i len sawi rawh" titau aw leh tum deuh bar Chung a ka han tih chuan ka biang te chu rawn piai zui deuh nawk nawk in

" Enga? Ka tihtur te chu ka hrilh sa vek tawh che kha. Chutin alo thlawn in ka leng ve Mai Mai hleinem" rawn ti ve leh in, han hauh hrep mai chu duh ve viau mah Ila damlo a nih miau avang khan ka insum leh ta hram zawk a. A bul dawhkan a apple hmin tai hler hlawr zet kha ban nghal in ka vel zui ta ringawt. 

Chutia apple ka lo vel lai chuan cabin kawngka kha rawn inhawng in a rual rual hian ka thawhpui te ho kha an rawn lut zui ta huk mai a. Samuela leh Mahruaii te khan hma chu an la rawn hruai zui a. An thawm a na in an balloon rawn ken luh te kha a tam tham angreng bawk si a, an rawn bawr lut takzet hi a nimai e. 

" SIR, eng nge ilo an tawh a. Iva that hmel tawh si em" Mahruaii khan nui sang chunga  rawn tih zet zet pah hian a sarang khai lai te chu ka kutah a rawn dah deuh chawt bawk a. Mit min la siai hram zui. 

" Nia, ka dam țha tawh lutuk e. Damlo kan tute hi in lo pawimawh ve em a ni"  sir pawh chuan awmze nei taka lo ti ve in, ka hnungah chuan na vak lo hian mi la rawn sik zeuh zeuh leh ta nghal. A over ve thin deuh chu a ni. 

An ni ho, mi 10 Chuang tehmeuh an rawn luh ve takah chuan chu cabin chhung chu damlo awmna pawh ni tawh lo in party buatsaihna hmun a nih duh tawh hmel zawk a, kan ri zui hulh hulh ta mai. Tichuan, reilote ah damlo in Kan hun pawh chu tawp in haw alo hun ta a. Kalsan ka huphurh ang tho hian ani pawhin ka kalsan leh tur chu a ngai ngam lo ve tho a, a phallo tih pawh ka hrethiam vek. Ka kut te chu chelh bet tlat in, midang zawng zawng chhuah twh hnuah pawh khan ka chhuak tur chu min la ti khaw tlai lui ngar ngar a, rilru a ti hah ru duh kher. 

" Dam chuan naktuk lamah rawn tlawh leh che ka lo tum ang aw. Chaw te lo ei țha la, kan inhmu leh vat dawn a nia" zaidam taka ti ve in, ani lah chuan ka kut chu a vuan bet reng a, mi pawh en lem lo hian a hma zawn chu ding takin a melh vang vang reng ringawt. 

" Min riah pui la ka duh tehlul nen, ka nu hian a chuh ve tlat bawk si a" lawm lo tih hriat taka a rawn tih chuan amah chu ka lo nuih ve ta var var a, a kut te chu chul sak hliau hliau pah hian

" Ila awm rei dawn te chuan ka rwn riah pui em em ang che. I lungngai hma thei lutuk a njh kha" tiin ka tho zui nghal a. Chutah, 

" Chuti a nih chuan kum khat vel tal chu la awm belh leh hi dil ila a țha ang" rawn tiin a nui zui ta vur vur lehnghal a, kei lah chuan damlo a ni tih theihnghilh țhak in a malpui ah ka lo chum sak ta zawt. A aiah ring teh asin aw. 

" Tak tak chuan va chhuak ve tawh mai rawh. I thiante khan an kalsan hla lutuk palh ang che. Zan thil a ni tawh bawk si a" tih pahin ka biang chu a rawn chuk leh ta zauh mai a. Ka ner zui sak. Engtikah nge hmui lampang hi kan in chuktuah tir ve anga lungchim taka kan infawh ve theih ang le! Infawh ve dawn apiangin ala flop bik ziah ringawt mai. 

In ka thlen hnuah pawh call leh text hmangin Kan la inbe chhunzawm char char reng a, a khawsa zia leh awmdan atang hi chuan min ngai ve a, min thlahlel ve takzet tih pawh ka hria in, lawmna hlir hian ka khat zui thei a, ka muttui phah lutuk ringawt. 

Zangkhai vah a tho chhuak in ka hna kal turte pawh chu ka phur angreng phian. 

" Unaupa pawh Pathian zarah a țha chak viau a niawm e. Vawiin lamah test neuh neuh te an han nei leh anga, naktukah chuan alo chhuak thei tawh ang ka ring. A rawn be tawh che em" Samuela khan lo ti zung zungin alo phur thei bawk sia, zan hmasa lama kan inbiak thu leh tukin hian Kan la inbiak miah loh thu te, phone pawh mumal taka ka la khawih loh thu te thleng chuan lo hrilh ve in ka kalsan dawn a ruai ah

" In ni nghet ve taktak tawh em. Nge, in in close ve satliah zawk" a rawn ti chhuak leh ta phawng mai. Ka nui ringawt. Heti khawp hian a hmuh leh hriat laiin kan lo inzui nasa ve tawh a, tinge maw he zawhna hi min zawh nawn fo mai le ka ti. A unaupa nen a kan inkawp hi a ring thei thlawt lo nge, a awih duh lo nge. Chu chu ni ta se, awih duh loh tlat nachhan te hi a nei thei mai angem. He pa hi ka hrethiam theilo. 

" I unaupa nena Kan inkawp taktak hi ila rjng thei thlawt lo a nimaw" tih pah a ka han nuih har har lai chuan za fahran lo hian a  rawn kiai ve ta suk suk ringawt a. Ka kalsan nghal daih. Chutah, ka dawhkan chu thleng in ka bag dah fel pah a chhuat lam ka han melh nak chuan thil engemaw tak hi hmuh nei in ka inhre zui ta a. Ka chhar zui ta vat. Damdawi kawr ruak maw!? A hming chu uluk em em in ka chhiar a, ka google nghal bawk a, damdawi sang tak leh chak em em niin, ruih nan a an hman tam ber a nih zia pawh ka hrechhuak nghal bawk. Mak chu ka ti hle. Night shift receptionist te hi an fel lo in an che țawp thei hle tih chu hre tawh tho mah Ila, hetiang em hi chu an tih duh ka ring ngai lo. Chutihrualin an sulhnu atang erawh hi chuan ruih neiin an duty fo thin ang tih erawh chu a chiang viau thung lawi si a. Nitin mai hian an sulhnu hnawk pawr taktak chhui leh then fai tur a awm ziah a, tun țum chu ka dawhtheihna pawhin a tlin tawh em eem bik lo e tiin damdawi kawr ruak chu ka dawhkan chungah ka dah sauh sauh a, a thla laksak in Sir Johna ka va thawn zui ta hmak. Ka hne zozai ve tawh em a tin ni. Tin, hun reivaklo liam ta ah khan sir Johna hnen atang hian an Khawsak dan vangin warning pawh an lo dawng tawh bawk a, chuti Chung pawh chuan engahmah ngai duh lo in tihian an la palzam zel Mai lehnghal a, hremna engemaw tak zawng hi chu an phu ve tawh in ka hria e. Ka thik a ka er vang leh hotel Neitupa ka bialpa a nih vang ngawt a hetiang thil hi ti ka ni lova,thil țha lo leh diklo na na na hi chu thup bo mai lo in thian fai zung zung zawk ila tute tan pawh alo tha ngai e ka tih vang chauh a hetiang thil hi ti pawh ka ni. Tin, tuna an Khawsak dan tha lo tak hi en liam ta maimai zel ni Ila nakin zelah he hotel tan pawh hian thil pawi zawk ala thleng thei tlat. A hriat miah loh. 

Sir Johna'n ka message a hmuh rual chuan rawn call nghal in action a lak nghal tur thu pawh a sawi zui ta a. Tin, thawk tur thar lak chungchang ah notification lo chhuah turin mjn ti nghal nghe nghe bawk. 

Zanah pawh chuan a ngai te bawk in hospital ah ka kal leh a. Ka hmel a hmuh rual a a lawm lutuk hmel leh mitmeng mawlh mai khan ka rilru hneh in kei chu a insum thei lo zawk ah ka țang leh ta a. Kuah zui thlawp in a hmui dang bil bel zetah chuan a vawikhatna atan dim angreng tak hian ka fawp zui ta ngawt a nih kha. Rei pawh fawp lo in ka in la hrang zui leh vat a, min lo en chiang kek kawk hle. Nia, ka Khawsak dan teh thut khan a țhawng viau in ka ring e. 

" Iva thiam em em ve. Tuin nge zirtir che" tih pah hian a lamah chuan min pawt hnai tha leh in, duhthawh zet chuan min rawn fawp zui leh ta vang vang. A duhthawh tual tual a, min nawr na tulh tulh bawk a, min vuan nghet em em reng bawk si. Chutah, dawhtheihna tlachham lo chauh a kan infawh zui tak bawrh bawrh ah chuan rilru fim put a hun tih hria in ka in la hrang zui ta thuai a nih kha. Ani chu alo thaw zui deuh hawk thei hial. 

Reivaklo chhung ngawi renga kan thut dun vang vang hnu chuan chiang zeta mjn rawn melh pah hian a han nui leh ta var var ringawt a. 

" Ka tihpalh. Insumtheihna hloh tep khawp a ka Khawsak vang khan ka tihpalh" rawn tiin, ka kut chu a rawn ban nghal a, a hum lum leh ta vang vang mai. 

Damlo kan hun a zawh chuan mahni chauh a haw leh hnak hnak in, kawng laklawh ah Samuela kha ka hmu ta hlawl mai a. Mahee, ani thung kha chuan min rawn hmu ve pawhin ka hre lo. Chak zet hian a bike kha a khalh pur pur a, a hma lam ding taka en in a meng rum hle tih pawh ka hmu hman hram a nih kha. 

In ka thlen fel rual rualin Samuela chu ka va call nghal a, mahse alo la thei hauh lo mai. Ka inrawlh a ka buai na tur a awm em tih chu hre hauh lo mah Ila a hmel landan leh a bike khalh dan mawlh mai khan ka ngaih a tih that loh em avanga va call ka ni a, min lo la chhang thei lo zui. Ti nawn duh tawh lo in phone pawh chu ka dah a, ka muthilhsan zui ta a ni. 

"Nizan khan min  lo call emni?" ka hmuh rual rual a a rawn sawi hmasak ber niin, ka dinchilh nghal vat. 

" Aw, call e. Hospital atanga ka haw lamah khan ka hmu deuh thuak che a. I țha meuh maw" lo ti let ve in, tunah pawh hian a hmel landan chu a la dik tawk lo niin ka hria a, mut kham lo hmel hi pu in, a Sam nise a pawr phen phung lehnghal. Ani leh ni lo ang takin a rawn in tuai mam țha lo tlat vawiin chu. 

" Aw tha e. Keini ang te min lo ngaihtuah ve a ava lawmawm ve a. Nia, nizan kha chu ka lenna lamah intibuai an lo amw pek a, Ka'n țhelh dai hmasa leh e ka ti a nih kha. A zialo taktak a ni" rawn tiin a nui zui deuh var var bawk a. He mihring han ngainatawm dan hi chu aw. 

Hnaruak, a bikin receptionist seat ruak dil theih kha notification ka chhuah tawh angin hemi ni atang hian dil tuma hotel rawn pan Thalai chu an tam angreng hlemai a, interview nei tur te chu manager office ah tir lut zelin, an zavai khan Thalai rual mi 50 zet chu an niawm asin. Chutah lah a tling taktak leh qualify deuh kha mi 3 chiah lak tur an la ni dawn zui a. Heti khawp hian a nimaw kan Ramah hian hna tha thawh tur alo tlem a, lehkhathiam tan pawh thawh tur alo awm loh ni tih te chu ka ngaihtuah kai zung zung. Thalai zawng zawng te hian infiamna ringawt hi kan tuipui vek kher lova, kan thei vek bik lo tih leh, chhungkaw chawm na tlak hna tha thawh tur duh Thalai mangang au rawl hriatsak thei ram hruai tu hi nei ve ni ngat Ila, ram intodelh, hnam intodelh nih te hi a harsa dawn lo niin ka hre ve khanglang nia. 

Chumi ni chuan interview chu zo fel nghal vek in, result erawh chu Sir Johna rawn chhuah theih hunah tih chhuah tur a ni dawn a, a tute tak kha tling hlawm ang maw tiin ka lo zeldin zui ve vak vak. 

Record ziah fel lai laiin phone lah kha alo ri ve sek lehnghal a, ka chek deuh hlak thei. Mahse, phone ka han en nak chuan Sir Johna kha lo ni reng in, tun ang hunah eng tak chu ni ang maw tih pah a call ka han lak rual chuan ti lui tih hriat fe mai hian a rawn khuh deuh khak khak phawt a. Kalo țhen zui sak thei. 

" Sir, eng thil pawimawh nge ni ta" nui hauh lo chunga ka han tih chuan amah zawk kha a rawn nui chhuak deuh ta hawk mai. 

" Tikhan min ko ve ziah tqwh suh ka tih che kha. Staff dang hriat lai chauh in mjn ko tawh rawh" rawn ti leh zung zung in a thutak hmel ta phian a. Chutah, kei chuan ka Chimawm chhuah in ka aw te chu ka han ti puam zui ta vel a. 

" Awle John Lalnunhlu, eng thil nge i duh ve tak le" Ka'n tih leh meuh chuan za fahran mai hian a rawn nui chhuak ta hawk hawk mai a. Keipawh chu ka insumthei tawh bik lo, ka nui ve tawp. 

" Tak tak a vawiin lam te i zia deuh em" ka han tih leh chuan la nui deuh kur kur Chung hian

" Um, zia ve zel e. A khawharthlak angreng lutuk a, I awl deuh lai a nih takin tih thu ah en thlak pah che in hei ka rawn be mai mai che" a rawn ti khanglang a nih chu mawle. 

" En thlak pah a inbiak mai mai maw ni a" lawm lo fahran a ka tih tak nghek ah chuan alo chek zui hlak thei.

" Aw, en thlak hi I țul thin alawm. Mikhual pawh ni lem lo tlangval dang hian an lo dinchilh hnai thei em che a, eitur te kha in lo inpe ru leh palh ang tih a hlauhawm" a sawi duh dan vel kher kher chu. A unaupa Samuela a sawi chhan tih chu hre vek tho mah Ila ka hrelo der lui ve ngat. 

" Chutiang an awm pawh ka lo hre reng reng hleinem. Ava zialo ve a. Ben hrep tlak an nih chu" lo ti let ve zat in ring zet hian a rawn chek zui leh ta hlak mai. 

" Over suh aw. Mipa dang hrim hrim kha chu lo hnaih lo la a țha a nimai" thu pe aw zeta a rawn tih leh chuan min hmu thei chuang lo tiin ka ner zui nasa ta mai a. Ka nuih te hi a ti za tawh zawk. Damlo ve si mi te a en thla kual vel a, nghal lutuk. Ka dawhkan rawn cover tu cctv hi a hrui ka hlip vek ang nge ka chep chhe zawk dawn ni. Nghal lutuk. 

Hna Kan ban rual in thian ho a chhuah kan tumna picnic spot lam chu ka han belchiang hmasa leh te te a, kan tum dan takah chuan picnic pah a zanriah eikhawm nghal kha a ni a, ala rei dawn si ka riltam tawh nen, chaw ei sa in ka va Kal hmak mai dawn emaw ni. Picnic tur chu ni tho mah Ila ka inbual fai te te hnuah thingpui te chu țam hnem atan tiin ka han in leh te te phawt a, thianten min rawn call tak sekah chuan hmanhmawh fahran hian ka chhuak zui ve ta nal nal. Mahni lirthei theuh ken tur a nih tho avangin innghah khawmna tur an tih lam chu pan in muangchang angreng tak hian ka tlan ve ta zel a. Chutah, ka thleng phei tep tih ah hian ka speed laklawh lai tibuai vek khawp a min lo phar ding tu an awm ta tlat pek a. Ka ding zui chawt mai. Ka helmet phelh a an hmel ka han en chian nal chuan night shift receptionist pahnih Duhzuali leh Parmawii te kha an ni tih ka hre zui ta vat a. Mak pawh ka ti angreng viau. 

" Eng thil nge ni ta" tih pah a ka scooty atanga ka chhuk tur chiah chu Duhzuali zwk khan mjn rawn pawt thla zui tawp in, ka rak zui that thei hial mai. 

" Zawngi, lo Kal teh. I kâ bawlhhlawh hi I chip hmak theihnan engemaw tal chu i tawrh ve a ngai a ni" tih pahin ka sam ah chuan na zet hian a rawn țham zui leh a, a kut chu phih thlak sak tumin kei chua theih tawp ka lo chhuah ve bawk. 

" Eng thil chu nge in duh a. Țha deuh in sawi mai ta che u" ka swi zo hman chiah tih in ka hmai chu a rawn ri zui chawk ta mai a. Ka hnar thip na lutuk mawlh mai kha a thlawn dawn ta emaw ka ti hial mai. Um, ka hnar atang chuan thisen a rawn chhuak chiang a ni tih ka hrethiam. 

" Hre rawh. Nang vang hian Kan hnathawh lai Kann chân phah a, min hmu em keini pahnih hi. Nangmah vanga hna nei tawh lo kan nih hi hria ang che. Chuvang chuan i thla tin hlawh atang khan za ah 50 min chan tir ve tur a ni ang! I chawh!" tih pahin ka scooty hnung lam deng dawt khawp chuan ka lu chu a rawn nam zui leh pawp a, a na lutuk ringawt. Min thlah rual rual khan ka hnar thi pheng phung chu hru zui nghal sawk sawk k in rum zet hian anni pahnih pawh chu ka han melh dun ta ram ram mai a. 

" kei hian ka hek che u tih hi finfiahna in nei em. In neih chuan rawn show rawh u. Hna atanga theh chhuah nih in duh loh te chuan a tir atang khan tha takin hna kha thawk ta mai che u" ka lo tih ve takah chuan  Duhsaki zawk kha rawn pawr tha lehin

" Chu nau mai mai chu" tih pah a min rawn khawih leh a tum laiin Pari zawk khan alo man bet hman ta hlauh a. 

" Zuali, a tawk rih e. Chuan Rosalind, nangpawh, lo hre rawh. Nang bak hi min hek tu tur an awm lo tih kan chiang tawk a, kan sawi tawh ang khan I thla tin hlawh atanga 50% kha chu kan chan pual a ni tih lo hre tawh la, min pehhel tum buai duh suh ang che. I thei chuang lovang" rawn ti zui leh zat in amah bawk chuan 

" I Kal thei. Kal rawh" a rawn tih leh chuan ngeiawm taka anni pahnih chu nuih khum deuh sak Chung hian ka hnar chu ka tuai zui puat a. Helmet chu khum lehin ka tlan chhuak nghal ta vang vang. 

Ka hlawh atanga 50% hi an kutah ka theh lut zel ang maw? Teuh lo mai. An ni khan ka hlau viau turah an inngai nge maw ni le. Nahi nahi.. 

Innghahkhawm na hmun tur ka va thlen ve chuan ka thiante ho chu an lo awm kim vek tawh a. Inthlahrun a na duh hle. Chutah, thian zinga awrawl ring ber Remruati lah khan

" Awi karei! Rosalind, I hnar chu ava thi nasa awm em em ve. Kha, I jacket hma lam ah pawh tlem chu ala kai alawm. Tinge, I nuam sam lo emni?" rawn ti lung lung in thian dang te pawh khan kei chu hnai zetah hian min bihchian tumin min rawn hual nghal tuau tuau mai a. A chhan diktak erawh chu hrilh țha duh lo in thudang ka sawi daih. An pawr leh hlawm dawn nasa si a ka buai thui peih lo. 

Picnic spot Kan thlen hnuah pawh chuan phurna chhetemah ka nei tawh lova, boruak vaw chhe tu ka ni ang tih hlau in phur hmel em em chuan ka lang ve maimai reng a, chaw te pawh kha chak lo chung Chung in ka ei lui ve ta nial nual a nih kha. 

Spot ah chuan awm rei lo in reilote ah Kan haw zui leh ta mai bawk a, ka chau ve phian tho. In ka thlen hnu phei chuan ka chau tulh tulh emaw tihtur hian ka lu nise ala na em em reng lehnghal a, ka dik hleithei thlawt lo. Ka lu na lutuk chu muthilhpui thei dawn a ka inhriat thlawt loh avangin nachhawkna ka ei ta ringawt a, ka mu zui leh hmak. 

" Samuela khan hotel a rawn thleng ve twh em?" ka phone call dawn dan teh daih chu mak ka ti ru angreng kher. Sir Johna hnen atang jn ala ni zui a. Tichuan, hawi kual nghal zung zung in Samuela hmel reng reng chu ka hmuh awm ka la hre hauh lo tak tak a, ni dangah te kha chuan a tlangpuiin min thlen khalh tu leh min lo welcome ber tu a ni thin a nih kha mawle. Tunah hian dar 10:30 lai a ri tawh si a, a chungah eng thil țha lo tak chu thleng ang maw. Tunlai phei chu a Khawsak dan a maksak in a danglam riau bawk si ti rilru neuh neuh Chung chuan alo la thlen loh thu chu ka hrilh ve ta a. 

" Engati teh daih nge Sir, tuk dangah pawh a chanchin hi min rawn zawt ngai silova" ka han tih ve chuan Sir Johna chuan

" Samuela chu a tlanbo a nih dawn chu!" a rawn ti ta a. Ka meng zau nghal kawk thei. Engvanga tlanbo leh Engvanga rawn zawng ta chiam chu nge a nih ang. Eng nge thil awmzia hi?? 

****************************************************