HOTEL JOHN - - 3

HOTEL JOHN--3 (Crime/Romance)

Vanlalpeki Fanai

*****************

Zan riah eikham hnu, hotel kam Chhuahsan hnu thleng pwh chuan ka thiante ho khan min la fiam zui laih laih reng a. Ka zak tawh kher. Sir Johna lah khan tikhan ring zetin min rawn ko ringawt a, eng dang mah sawi zui leh Chuang in a nui sak ringawt a, a Bialnu kha min biak san leh daih a nih kha. Ngeiawm lutuk mai. Chu chauh pawh ala ni lo, kan chhuah dawn ah pawh khan min la en zui ve reng tho a, min hmelhriat loh kal liam tir ta vel mai mai tho bakw si. Ka ngei ngawih ngawih. Khatiang a a khawsa duh rau rau a nih te chuan a tir atang khan min hrelo der tlang ve law law zawk Sela, heti khawp hian ka thiante pawhin min chhaih zui lo tur hi a nia. Phuba lak dan tur hria ila tun dinhmun ah tak hi chuan lak ka chak hliah hliah. Ka ngei lutuk chu ka inhumruh ngawt ngawt thei nia. Ngei tak ka ni.

Hotel kan Chhuahsan hnu pawh chuan hmun hrang hrang ah leng kual leh mah Ila, nuam tih taktak na ka nei thei tawh lova, ka hne vel vek. Nia, ka mitthla ah chuan amah leh a Bialnu te ringawt kha an cham zui tawh a, an hlim nui hmel mawlh mai te khan ka thinlung chhungril chu vel țap in, min deng nawn awn awn hi a ni ber awm e. Ka na a ni. Zan hmasa lawkah khatiang khan ka Khawvel chu rawn ti famkim tawh in min ti hlim em em a, tunah erawh tihian hmeichhe dang ne an hlim dun lai ka thlir leh ta mai chu a ni si a. Mipa tenawm leh nikhua lo tak niin ka hria. A thuhrim in Keipawh hian ka hnaih tawh lo ang tih kha ka intiam tawh in ka hre sia, engvang a bawhpelh leh mai nge maw ka nih le. Amah ka duh a ka vei lutuk na hian khua min hmuh tir thei lo zo vek a, duh aiin ka lo hnaih leh mai țhin zawk a ni e. Kan thiam lo ve ve.

Kan thian ho chhuah thawven boruak chu ka tichhe zo mai ang tih hlau in hlim luih hram chu ka han tum ve bawk a, a harsa thei ngar ngar khawp mai.

In ka thlen fel meuh chuan khua pawh chu lo thim chhah tawh in, zan dar 7 lai chu alo ri ve tawh a. Inbual tur hian bathroom ka pan nghal vat. Rei pawh inbual lo in ka zawh fel hnu chuan mu turin ka insiam zui leh mai a. Phone pawh chu mumal takin ka en hman ve leh ta chiah. Chutah, Samuela message chu alo awm reng a ni tih hria in ka seen nghal vat a.

" Zanin chu khawiah emaw kan chhuak thawveng dun ve mai mai dawn emni? Boruak a nuam sia, min chhuah pui peih a ngem?". Tih chu a rawn thawn a. Ka chek zui hlak. Hemite unau hian eng thil chiah nge maw an hriat hi le. Kei hi an duh hun hun a len chhuah pui theih emaw min ti nge le ka ti.

" Khawnge Kan Kal anga" tia ka chhan hnu chuan a rawn call zui ta nge nge a. Ka be peih lo ru kher. Mahse, call han lak sak duh loh ngawt chu a mawilo tiin rei fe hnuah ka chhang ve ta hram a. A rawn hello thum chhak leh ta nghal. A takah pawh tih tawh laiin phone atang phei chuan a aw chu alo nalh zual lehnghal tih ka hre ve chiah a, amah hre sa lo ni ngat Ila chuan a aw atang rjngawt pawh hian ngaihzawn tham niin ka hria a, a vei awm duh khawp in ka ring bawk.

" Min hlau deuh emni? Aw min va pawh tha duh lo ve" nui hak chunga a rawn tih chuan ka inthiamlo hnuhnawh leh viau a, ka lo chhang țha peih lo lutuk chu keimah pawh ka in dem zui ta rum rum. Chumi hnu chuan that chhuah luiin khawi hmun a len nge a chak tihte pawh chu ka han zawt hnuhnawh leh bawk a. A ngawi zui deuh vang vang phawt.

" Hmun thawveng, eng thawl taka titi dun theihna tur kha a nimai. Ka hrilh tawh che ang khan ka thian kawm thin ten hna vangin min kalbo san vek tawh si a,, nang lo chu thian ti a sawi tur pawh ka nei tawh lo a ni e. Min len chhuah pui peih ang tiraw?" ngen ngawl angreng taka a rawn tih leh takah chuan lo hnial buai duh tawh lo in ka insiam zui ta nial nual a. Min rawn sawm phei tur chuan ka ti ta bawk. 

Tichuan, ka thiante ka chhuah pui leh lawk tur thu chu ka chhungte hrilh ve in, reiloteah Samuela pawh kha a rawn thleng chhunzawm ve a, amah nena inhmeh tur zet hian bullet nalh fahran mai hi a rawn khalh nghe nghe. Tawi khaw muang tawh lo chuan kan inzui chhuak a, amah chu ka hnaih hreh deuh vang nimaw, a hnung lawka ka thut chhung zawng khan amah si lova thut ka tum lui ngar ngar a, ka hnaih duh hauh lo. Ani pawh chuan eng dang mah sawi lo in ngawi reng hian min phur ve zel a, a tawpah chuan cafe nalh leh nawm hmel em em kawtah chuan min din puiin, a bike atanga ka chhuk tur chu uluk leh chik em em hian min lo thlir ta reng pek a, ka lai chhe ve tep. Hemite unau hian in an na tamtak an lo nei ve a nih hi. A langsar zual ah chuan tuna chik leh uluk taka min melh ang chi te hi, Sir. Johna pawh khan a hrat ve thin khawp mai. 

Tichuan, cafe chhungah chuan inzui lut in, a chhunga lo chawl ve mek mi thenkhat te khan keini pahnih chu min lo en uluk hlawm khawp a, a bikin Samuela mawlh chu kil khata nula thu ho khan an en duh zual in ka hria. Nia, ka kalpui tlangval hi a chhelo a, a hmel nise a langsar vei reuh em a ni. 

" I duhna ah chat kan thu ang" rawn tiin thutna turah duh min han thlan tir nghal a nia. Hetiang thil hi ka tawn ngai pawh ka la hrelo e a. Hawi kual nghal zung zung in tlem a khaw thlir na nuam tur ni a ka hriat lam chu ka pan zui ta nal nal a, ani pawh khan ka hnung lawkah muangchang hian min rawn zui ve hnuk hnuk bawk. 

In hma tawn a hnai angreng taka chutia kan han thut dun takah chuan a hmel mawlh chu en chiang in, alo hmelthat zia ka hrechiang lehzual ni hian ka hria a, a engkim mai chu a in vuah dik thlap a tihtheih a a fuh vel vek ka ti Mai. Nula ho tan kha chuan lo melh tlawk tlawk loh chi pawh a ni lo a nih hi. Hmel leh pian na na na hi chu a nei fuh ve thlawt a, chumi ti famkim tur chuan a nungchang nise a țha in, ala fing fel em em zui. 

" Ei chak deuh te i nei em? Menu hi en la I duhzawng kha kan order dawn a nia" rawn ti leh sup in, menu chu ka han keu kual vel a, ka ril pawh ala tam chiah lo mawle. Mahse, chhuah dun ve takah chuan tiin coffee tal chu in ve ka pawi ti ta lem lova, ani pawh chuan pawi alo ti bik lo. Coffee no hnih tlawng chu kan chah ve ta a ni. 

" Nuam lo iti em? I Inthlahrun hmel ka ti. Țawng ve bawrh bawrh la"  a rawn tih leh lai te chuan ka mitah hian chiang em em in min lo la melh ve kar reng a, ka melh tha ngam hauh tawh lo thung. Mak tak hian keimah ah nuam lo tihna ruk hi a awm ve reng a, he pa bulah hian ka thla a ngam viau dawn emaw ka tih laiin inthiamloh rukna ka nei tlat a nih chu. Ni e, min duh ve lo tu kha mihring kha phatsan a bum tu ah ka in ngai deuh tlat. Ani nen khan fanghmir tiat pawh Kan inkarah engmah tlazep a  awm lo tih hrechiang tu chu kei hi ka ni a, engvang a inthiam lo ve ngawt nge maw ka nih le. Tih taktak ah chuan ani pawhin nula a chhuah pui fo a, a duh dan in a awm bawk a, kei hian ka Khawvel hi ka chen ve theilo tihna maw. Ka bialpa pawh a ni teh chai hleinem,tia infuih țha sauh sauh in mahni chu ka inhnem chawp mawlh mawlh reng a, tlem chuan ka dam ta deuh e. 

Coffee chu alo thlen rual rual in kei chuan ka dawm nghal vat a. Chhuanlam tur dang hi ka hre thlawt lo. Sawi tur nise ka haihchham bawk si. 

" Tun ang hunah te len chhuah I rawn rawt ve teh mial a. Bialnu i neilo emni?" ti ringawt in, ani chuan min rawn melh ve zawk a. A nui zui suk leh ta nghal. Tichuan, kan thutna bul tukverh lam chu hawi in, pawn lang thei chin eng pe tuarh mai te chu a han thlir zui ta vang vang phawt a. 

" Nia tiraw. Bialnu ka neih lohna chin pawh hi ka hre tawh lo hial. Ka tluang vak lo thin a" rawn ti dam dap in, a hmel chu ngun zet hian ka lo melh ve vang vaang reng. A sawi chhuah mek a nunhlui te chuan chhete talin an la tibuai ve thin tih chu a hriat reng mai. A hmel landan pawh a hnim ruih thei hial a ni. 

" Sawi zawm dan a awm tawh lo emni?" nui sang chunga ka lo tih chuan a lu chu rawn thing deuh nawk nawk in a then zui ta sak. 

" Aih. Awm pawhnise keimah zawk hi ka rem tawh lo. Min bum duh tu tan khan hun ka neih tawh loh bakah tunah chuan ka thinlung hian duhthlan dang a nei ve tawh a, ka thei tawh bik lo"  rawn ti ram hmarh in, chhan let ngaihna ka hre tawh lo angreng kher a. Ka bu deuh nghat ringawt. 

" Nia tiraw. Inngaihzawnna pawh hi tluan loh laklawh chuan a nat ve theih lutuk asin. Mahse, intih chak nachang te i hria a, tluk chhiat phah nan I hmang duh lo bawk a, Mifel deuh, nangmah I nihna ang anga pawm thei tu che ila tawng leh mai ang" lo ti ve in, han hnem vak ngaihna chu ka hrelo angreng hle a, hnem vak țul pawhin ka hre Chuang lo. 

" Nia, I sawi dik chiah. Tunah chuan ka thinlung luah khat tu hi suangtuahna nen ka umzui ve mek zel a, țan ka lak taktak chuan min pawm ve thei maiin ka ring" nui sang chunga a rawn tih ve chuan a hmelthat zia a chiang lehzual hle in ka hria. Ka lo en leh ngawih ngawih thin. 

" I thinlung neitu tan chuan țan ka lo lakpui ve dawn che a nia. Tihtheih ka neih phawt chuan ka pui hreh lo ang che aw" lo ti ve in, ani pawh chu alo bu ve ta nghat nghat. Min rawn melh chiang kek kawk hle lehnghal. Tichuan, kan coffee te chu in zo fel in chu cafe pawh chu kan Chhuahsan ve leh ta a. Khua nise alo tlai ve leh ruih tawh mai. Tin, ka mut nise a chhuak em em tawh bawk a. Mut hahdam veng veng chu ka chak tawh ber. 

Kan In thleng a min thlah fel leh hnu chuan țha taka inthlah liam in kei chu ka mu zui nghal thak tihtheih a ni a, thildang reng reng hi ka ngaihtuah peih tawh lo. Mut chiah chu ka mamawh. Chutia ka mu chu ka muthilh lai pawh hre hman lo in ka phone ri zawk chuan min rawn ti harh leh ta tlat a. Ka harh chiang kek kawkk hle lehnghal. Phone ka han en nak chuan kan manager hnen atang khan lo  niin, mak chu ka ti angreng viau. 

" Hello" ka tih rual rual hian Kan manager chu a rawn ri zui nghal nawk nawk ka ti Mai. A landan mai ah chuan a phawk lek a, a hlauhthawn hmel viau bawk. 

" Sir, eng thil nge ni ta" tiin Keipawh ngaihtha vak lo Chung chuan khum atang ka chhuk thla zui sawk sawk. Chutah, manager chuan thu thin țhawng zet mai hi rawn sawi in, 

" Kan hotel chhungah tualthahna a thleng!? Lo thleng phei vat rawh" rawn tiin, ka khawng zui nghal vek nimai hian ka hria a, ka ding khawng lah thei. Eng aiah nge Kan bulhnaiah chhehvel ah hian tualthihna rapthlak zet zet hi a thlen fo mai le ka ti. Ngaihngam taka Khawsak a harsa ta hle mai. 

Mumal lo zeta ka lo inthlak mial mial lai chuan ka nu kha hlauhthawn nei tih hriat zet hiaan roomah chuan a rawn dak lut ve ta hlwk bawk a. Ka lo melh zawk rjngawt. 

" Ilo tho ve tawh maw. In thawhna chanchin te kha I hre ve tawh em" rawn ti sawk sawk in, kei chuan ka hriat tawh thu in ka lo chhang a, ka bag lak leh nawlh pah hian

" Ka kal vat a ngai a" tiin room chu ka Chhuahsan zui a, ka nu pawh chuan min ngaihtuah hmel em em hian kawgka bul thleng chu min la rawn thlir zui ve țawk țawk thei. 

Thin phu dup dup in hotel chu ka thleng phei a, a compound leh a chhehvel hrim hrim ah chuan mihring chu lo zi nuaih nuaih tawh in Chung thil chuan min ti mangang zual vek thei in ka hria. A chhung ka luh chuan ka dawhkan ah khan zan lam receptionist duty te pawh kha haw lo in an lo la awm ve tih ka va hmu chiah a, tlem in min ti awm nuam ve hlek. 

" Tu ruang nge an chhar chu" aw khur hlak hlak chunga ka han tih chuan receptionist duty pakhat zawk khan mitmeng phelh Phang chunga min lo melh ve reng Chung hian

" VIP kha!!" a rawn ti hul ta hak mai a. Mak ka ti lutuk chu ka tlu lo chauh hial. 

Engtinnge hetiang thil rapthlak hi kan hotel chhungah hian a thlen ve theih zawk a. Hetiang a a khât tawka tual that thin hi mi pakhat mai a ni thei a ngem. Lo ni ta se eng aiah nge hetiang hian a chet chhuah fo mai. Phuba lakna nge suahsual vang hrim hrim ni ang. Tichuan, manager thurawn ang khan kei leh receptionist dang te chuan staff la thleng kim lo leh off day nei ho zwng zawng te pawh chu phone a be kual in chanchin chu kan hrilh zui ta hlawm a. A chhan chu, inhnamhnawihna an nei emaw nei lo emaw, mit a hmuh leh hriat an nei emaw neilo emaw tualthihna thlenna hmun a hnathawk an nih vang hrim hrim in police te thu ang chuan koh khawm an ni ta a. Hetihlai hian Sir Johna leh police thenkhat te pawh kha rawn thleng ve tawh in, investigation kalpui nghal a ni a, kan zi mup mup reng mai a tihtheih awm e. Chutihlai vek chuan an room lam atanga VIP nupui țap hlswp hlawp a an rawn hruai chhuah chu mittui tling piau chunga lo thlir ve in, amah rawn kuah chhuak tu hmeichhe police lah khan pi ber tap mek chu kan kutah rawn dah in

" Shock treatment a lak a ngai dawn a, ambulance lamah sawn lo VA kuah lut ta che u" a rawn tih tak avangin receptionist dang te nen chuan rang zet hian Kan che chhuak ve ta nghal a. Pi ber erawh kha chu nasa em em ni silo hian ala țap ve hlap hlap reng a, ka khawngaih takzet. Chutihrualin țap thlem hi ka thil thiam loh zawng tak a nih vang erawh chuan ngawi reng a tawrh pui bak tihtheih ka nei hran lo. 

" A hma zawng zawngin kan thenawm hotel chhungah hetiang thil hi vawi tam tak alo thleng tawh thin a, tunah chuan hei, kan thawhna hotel chhungah ngei tihian alo thleng ve ta mai chu a nia. Ruahmanna a nih theih I ring em? Kei chu hrehawm ka ti. Nuam pawh ka ti tawh lo" zawi ser sawr zeta Receptionist pakhat zawk Duhzuali'n a rawn tih chuan chhan mai dan tur ka lo hrelo hle. Ruahmanna thil ni ta se, engvang nge ni ang. Sir Johna te chhungkua hian er em em tu leh hmelma te hi an lo nei ru reng zawk nge ni ang. Chuti ni se, engvangin nge a thenawm hotel zawkah khan chhiatna a thlen tir fo nachhan ni ang. Nge ni a, he hotel inhnaih taktak pahnih te hian do tu leh haw tu an nei hranpa ve hrim hrim ni zawk dawn. A... Kei mi thluak tlem lutuk hi chuan eng thilmah hi ka ngaihtua mil kual thiam velo a ni e. 

" Zualte, nizan duty in nia, police hnen atang pawh zawhna I dawng nual dawn a nia. I zam em? Zam hlek suh aw" ka va tih chuan min rawn melh ve ta ralh a. Za vak lo tih hriat zet hian a rawn kiai ve sak bawk. 

" Zam nachhan tur ka nei hleinem. Tuna boral VIP te nupa hian zan dar 7 velah zanriah an eikham a, chubak chu an hmel hmuh tur pawh awm lo in an room lamah an tawm zui  ngat ngat" rawn ti in, kei chuan mak ka lo ti ru ve deuh. 

" Chuti chu engtinnge hetiang thil hi a thlen theih zawk le tiraw. He hotel security hi a khauh țha em em reng si a, hmun tinah Cctv awm bawk in an room a luh ruk chu thil awl ai lo tak a ni ve ang. A r thuhrim in a nupui pawh a awm ve reng tihna a nih hmel a, a hre bik hauh lo tihna emni le. Dar engzat vel a thil thleng nge a nih hmel reng reng" zawhna lah hi ka ngah thei si a. 

" Ka Chiang chiah lo. Khaw var dawn hnaih a thil thleng vel a njh ka ring. Mi zawng zwng mut tui chhoh lai vel kha a ni dawn a, keini pawh Kan lo mu thlu zeuh zeuh reng alawm. A.. Sawi thui vak rih lo teh ang. Min ti hrehawm zual" nui suk chunga a rawn tih ve chuan kei chu lo thaw chhuak deuh halh in, ka bu zui ta nghat ringawt. 

Rei tawk fang hnuhma enfiah nana hun an hman hnu in police ho leh forensic mi thiam te, sir Johna te ho rual chu inhnuai lamah rawn chhuk thla ve in, police thenkhat te chuan staff ho zawng zawng chu zawhna min zawh duh vangin hmun hnih ah an inthen hrang ta a. A tam zawk kha hotelah chuan cham bang in, sir Johna kha thu zawh fiah leh turin station lamah police thenkhat te chuan an hruai chhuak thung ta a. Ka lo ngaihtuah ve em em ringawt. A hnung khirhsak in diriam Chuang hauh lo mahse la, hetiang thil ama hotel chhunga a han thlen ve takah chuan thu zawhfiah a tulna tamtak a awm ve dawn tih a chiang reng a, chubakah, nimin lawk te kha he VIP nen hian an va inzui chhuak vang vang a nih tak kha. Engvang tak chu ni ang maw. Min ti hlauthawng tulh tulh mai. Ni lo, eng aiah nge Sir Johna chu ka han rinhlelh ngawt ang le. A mualpho theihna tur leh a tlak chhiat vek theihna tur thil engtinnge a thlen tir duh tehlul anga. Mawl thlak lutuk. 

Tichuan, police hnen atang in zawhna chi hrang hranf chu a mal te te chuan kan dawng țan ta a. Kei chuan sawitur ka hre lo thei kher. A bikin, night shift ho khan zawhna chu an dawng hnem lehzual a, ngun leh uluk tak hian ka lo ngaithla ve kar reng ringawt. Chutah, an zawhna pakhat chu staff pakhat, room service ni bawk khan hetiang hian fiah fai zetin a rawn chhang ta a. Kan phu deuh zqwk thei hial. 

" Aw Kan boss Pu Johna hi zanriah eikham hnu velah khan hetah alo Kal a, in Chung lamah chho tlang in ama office ah a kal tlang em chu ka hre bik lo. Mahse, Vip te hian order an rawn neih avangin an room lamah chuan rei fe hnuah ka han chho ve a, Chutah chuan Sir Johna pawh hi alo awm ve nghe nghe! "  a sawi laklawh laiin zawhna zawt tu police kha alo inrawlh ve leh a

" Eng thil nge an rawn order chu. Tin, I han hmuh lai chuan eng thil chiah nge an lo tih. Vip nupui hi I hmu ve bawk em" lo ti lehin, chu room service paqb chu reilote a ngawih leh hnuah hetiang hian a rawn țawng chhuak leh ta a. 

" Chicken lampang an rawn order a, thildang pawh kha an rawn order ngun angreng. Ka han hmuh dan chuan zu an in ho niin ka hria a, Aw, a nupui pwh kha a tel ve e. Zu kha a in ve em tih phei chu ka hre hauh lo thung. Ka awm rei zui lo bawk a"  a rawn tih leh chuan midang ho kha chu an lo in melh kual hrek hrek reng tawh a. Hetianga kan boss hming meuh a han lang ve ta reng mai hi kan duh lo tlang in, kei ngat phei chuan ka duh lo lehzual a, min ti hnim ruih thei hial niin ka hria. 

" In boss in hotel a chhuahsan hunlai tak hi in hre hlawm em" inspector khan a rawn tih leh chuan kan lu chu kan lo thing zui deuh nawk nawk hlawm a. A zialo hi ka ti tulh tulh. Chutah, Zualtei lam hawi Chung chuan

" Nangni pawh hian in hre hauh lo maw? Sawi rawh u. In zep pui hun a ni dawn hauh lo a nia" rawn ti țha leh in, Zualtei chu a zam tawh hle tih ka hre thei. Mahse, fiah fai tak hian night shift receptionist ve tho Pari zawk khan 

" kan hrelo taktak ka pu. Kan hmuh leh hriat chin chu kan hrilh vek tawh che kha. Tin, kan boss te hi chu a khât tawka lut leh chhuak reng an ni hlawm a, buai lai tak a an lo chet ve reng phei chuan hmuh fuh loh palh hi an awl ve thin a, record ah pawh Kan dah lut ve ngai hek lo bawk"  a rawn tih chuan dik ti zet hian ka lu ka lo bu ve nghat a. An hriat duh viau te chuan cctv en let tur a awm reng a, en ta Mai se tihte chu ka lo ngaihtuah kai duah. Chumi ni a tan a staff te zawhna chu duhtawk phawt in, mahni duhna hmun hmunah kan Kal darh ta sang sang hlawm a, hotu ten engtinnge Kan hotel chungchang hi ro an rawn rel dawn a hriat theih mai bawk siloh nen, hrilhhai leh bangbo zetin dawhkan nghak chuan ka țhu zui ta tlawk tlawk ringawt a, mahse, hemi ni atan a mikhual lak belh erawh chu an phalloh ang khan hotel khar chuang silo in Kan awm vel ta Mai mai a nih ber chu. Hetiang a receptionist ho Kan hawi vel mai mai lai hian room service lam erawh chuan tihtur an ngah angreng fu a. Mikhual awm sa te kha an la chhuah hlawm tlat loh avangin anni ho bik chu an buai lo theilo. 

" A zialo hlemai tiraw?"  rawn ti tu chu Ka'n en nak chuan Samuela kha ka dawhkan bulah lo ding in, a ngaihawm tawk lek hian a lo nui leh var var tawh a. Zan hmasa Kan len chhuah dun dan vel te kha ka hre chhuak nghal uarh uarh thei. 

" Ilo thlenna a rei tawh em" tia ka zawhna chu, a awm char char tawh thu a min chhang in, chanchin a hriat atang khan ala kalsawn miah loh thu min lo hrilh a. Mak chu ka ti ta viau. Ka thlen tirh atang khan tun bak hi a hmel ka hmuh awm ka lo la hre hauh lova, ti Ila, ani ngaihven a khawsa hman kha ka ni ta lo hrim hrim a, ka lo hmu lo palh te pawh a nia nge. 

Khua pawhin tlai lam pan zelin, Sir Johna hmel reng reng chu hmuh tur ala awm theilo fo. Chu ringawt chuan min ti rilru hah in awm nuam hian min dah theilo hrim hrim a, second khat lek pawh amah ngaihtuah lo a awmna hun hi ka neilo tihtheih a ni. 

" Kha, hei tal hi ei ve teh" tiin Samuela lah khan eitur tuihnai fahran mai hi min lo leisak chu niin

" Chhun chawlh laiin engmah I ei ve duh silova, I riltam na lamah I pum a na vek mai ang" rawn ti leh in, za vak lo Chung chuan ka lo nuih let ve ta sak. A thil rawn ken pawh chu ka ei chak em em vang ni lo, amah ka hmaizah vang chauh in tlem azawng chu ka ei ve ta hram a, a la tui phian leh ta nghal. 

Khaw thim hnuah pawh haw duh lawk lo in Sir Johna chu ka lo ngaichang ve deuh a, mahse, a reh tak vang vang si ah chuan Manager thurawn ang leh night shift ho an rawn thlen kim tak si ah chuan tiin hreh zet hian ka haw ve thei ta hram. 

In ka thlen fel meuh chuan zan dar 7 ri thuak tawh in, zanriah te chu ka ei zui nghal sawk sawk a, ka pa lah khan a dan ngai te bawk hian zawhna alo ngah lehpek hle a, a nihna thlap thlap pawh hrilh lo in a tlangpui chauh ka hrilh thuak thuak hnu chuan inbual fai turin bathroom ka pan san a, ka chau ngawih ngawih ni ber hian ka inhria. Ka inbual tur bathroom ka lut fel tawh te pawh chu chhuat ah chuan țhu zawi leh ngawih ngawih phwt in, tum loh deuh hian ka mittui te chu a rawn tla leh ringawt bawk a. Ka țap ring palh ang tih hlau in insum chu ka tum ve nasa lutuk. Tin, bucket ah khan tui ka herh haw zui vat a, țah hlawp hlawp chu ka chak ber. Mahse, hetiang hi ka awmdan tur a nilo tiin ka insum leh thei hram hram zawk a ni. 

Chutah, inbual pawh țan hma hma hian ka nu lah khan ka phone chu a rik reng thu min rawn hrilh reng bawk a. Ka chhang let peih lo. Ka ngawi tawp ringawt. Peih leh peih lo a jnbual tihtak ah, reilote ah ka zo vat Mai a, roomah chuan lut in phone ka han en nak chuan sir Johna missed called vawi li ngawt alo awm teh reng anih chu Mawle. A hming inziak ka hmuh ruala phurna nge maktihna nasa zawk pawh ka hrelo, ka thin te chu rawn phu zui zawih zawih in, ka kut nise a khur titih thei nia. Tichuan, rei pawh rial tawh lo in rang lutuk hian ka call let ve ta nghal a, a la tawh dawn lo emaw tih hnuah a rawn la ve ta hram e. Ka thaw zui huai mai. 

" Iva buai awm em" amah zawk chuan rawn ti hmasa in, a aw ka han hre leh ringawt te chu ka hahdam phah sawng sawng thei niin ka hria. 

" Ka lo inbual daih a. Eng nge i an? I țha em?" ka ngaihtuah tih hi ka up bo rei thei tawh thlawt lo a ni ber. Chutah ani chu rawn nui chhuak deuh hak hak in, kei erawh hrilhhai fe hian ka lo ngawi ve vang vang thung. 

" Tinge. Ka damlo hleinem. Ka țha lutuk ringawt mai. I țha zawk maw" rawn ti let in, Keipawh in ka that thu chu ka lo hrilh ve a, 

" Chuti chu intih harh nan min len chhuahpui leh duh a ngem?" rawn tiin, ka meng phawk hru thei a. Engtia chhan tur nge tih pawh ka hrethiam lo e a. 

" I Bialnu kha sawm tawh zawk la" zawi sapa  ka han tih chuan mak tih hmel fe hian

" Maw!?" a rawn ti let deuh hu mai. Ka inthiamlo leh deuh. Mahse, eng nge sawi sual ka neih. Kha nula nen khan țum hnih lai an inzui hi ka lo hmu fuh ve tawh a, thenkhat lahin a Bialnu a nih thu an lo sawi ve zel bawk nen, chuti chunga keiin remchang chuh a lo len chhuahpui ve ziah kha ka duh bik lova, ka tan hian a nuam reng reng lo bawk. 

" Tinge Eunice kha ka Bialnu emaw intih ve ziah hlawm a. Naupanlai atanga ka thiannu ve a nia, remchang ah Kan inzui chhuak a kan ințawiawm tawn thin bawk a, a bak a awm lo. Eunice te kha chuan Naga bialpa hausa zet mai a nei reng alawm. Tunah pawh a mipa bula khawsa turin a Kal dawn " rawn ti let duah in, ka zawhna ni miahlo thleng thleng a a rawn chhan tel tak duah ah chuan thudik ni turah pawh ka ngai ta ngawt a. Thu hi a Kal kual a kal kual chuan thudik pawh dawt ah a Chang thin an tih ang deuh kha niin ka hria. Ani pawh hi Eunice - I nena an inkar chu a dik ber hre silo in an lo zeldin sak kual a, a then lahin a nupui hual ah te an lo chhuah sak thul. A buaithlak a nih hi. Mahse, a sawi hi a dik zawk a ka rinna chu pakhat chu, kan thianpa Lawmkima khan Naga bialpa a neih thin thu alo sawi lang ve thuak tawh a, Receptionist pahnih te thusawi ai kha chuan ka ring zawk fe bawk e. 

" Chuan, zanin chu. Khaw thlir theihna lamah khan Kan Kal leh mai dawn emni? I peih vak loh chuan sawi hreh lo la aw" a rawn tih chuan rang zet hian chhuanlam tur ka lo Siam ve nghal zung zung a. 

" Aih. Ka peih alawm.. I thil sawi te kha ka lo zeldin thui deuh mai mai a" lo ti ve zung zung in ani chu a rawn nui chhuak leh ta hak hak mai.. 

" Um, a nih chuan lo insiam rawh. Ka rawn sawm phei ang che. In thenawm khaw thlirna kha a nuam ka ti thar riau Mai" nui kar kar chunga a rawn tih leh chuan Keipawh chu ka lo khi ve ta sak a. A thil sawi reng reng te chu ka ngaithla liam vel mai mai niin ka hre tawh. Eng ber hi nge ka ngaihtuah tih pawh ka inhre fumfe tawh lo e. 

Tichuan, alo thlen hun nghak in pawnlam bathlar ah chuan ka lo ding ngawi ve ta vang vang phawt a. Ani pawh chu alo thleng har lo hlauh e. 

" Ka rei em" nui var var chunga a rawn tih chuan ka lu ka lo thing ve Mai a. A mak ka ti. Hei leh Chen hi kan lo inhmu ve tawh a, hna ah nise nitin inhmuh loh lai kan nei hek lo. Chuti Chung pawh chuan a hmel hmuh hi ngai ah ka nei thei reng reng lova, ka hmuh ngun pauh leh ka zam chhe thjn ni ber te hian ka hria e. Awm ang lo thin ngawt mai. 

" Kal nghal mai Ila" amah bawkin a rawn tih leh chuan Kalkawng hre sa tawh a lo ni bawk a, tun țum chu a hnung lamah ka zui ve dat dat thung. 

" Eng thil nge i rawn ken chiam a" tiin sarang dum a a thil rawn khai chu ka lo melh ve vang vang reng a, a rawn hawi let ve zawk. 

" E, titi pah a kan ei dun mai mai tur a nih hi. Hmeichhia hi chuan kamram te hi in lawm ve thin sia"  a rawn ti leh a, ka lo nui deuh var var. Kamram hi ka ngaina a ka heh vang hrim hrim nilo in, chhuanlam atan a țha ve ka tia, chutiang nilo ah chuan a hranpa in ka ei ngai lem lo thung. 

Tichuan, hman zan lawka kan lo Kal dun tawh na, khaw thlir theihna tura an dawhsan chungah khan lawn dun leh in, khua chu a thiang nuam ve angreng bawk nen, van lam te chu ka han thlir zui leh vang vang phawt a, van boruak zau taka arsi lo pe tuarh te chuan keini pahnih chu mal min raw sawm se, suihzawm in awm ve Ila ka va han duh tak em. 

" Thlir chho nasa vang vang ve" a rawn tih chuan harh chhuak deuh zuk in, amah chu ka va melh vat. Mjn lo en ve reng bawk si nen Kan mit chu a vawi engemawzat nan a intawng chiang lehpek hle. 

"Arsi khi en la, an mawi em khi. Ka phone camera hi țha ve se chuan ka hmet de nasa ngawt ang" lo ti vel duah in, ani chu a rawn thaw chhuak deuh hak. Chutah, a kekawr ipte chu zen lah rak rak phawt in a phone a rawn phawrh zui a, van lam hawi chuan a keng zui ta vang vang mai. 

" Ka phone camera chu a țha. Mahse, thlalak erawh ka thiam lo" a rawn tih chuan a hmel te kha a pha zui ve dai nimai hian ka hria a, a Inthlahrun hmel lutuk ringawt. Tichuan, a bulhnaiah va ding zui ve vat in, a phone ken dan chu Ka'n siam remsak nghal a. 

" Aw, khati chiah khan hmet rawh le" lo ti ve in, a hmet de ve nghal zung zung bawk a. Phone camera țha leh manto chi ah nge nge chuan van Chung sanga arsi pe tuarh te pawh chu an lo lang fiah tha kelh kawlh teh e. Ka lawm lutuk chu ka nui zui ta var var bawk. 

" Min lo thawn ve dawn nia" tiin thutna turah chuan ka țhu thla zui nghal a. Ani pawh chu reilote ah a rawn thu zui ve Mai. 

" Ti daih ila, kan vawiin hun tawn teh hrep kha chu a hrehawm ve thlawt. Engtinnge police te hian hma an lak chhunzawm zel dawn le" ka han tih chuan chek deuh hlak in, a thei tui rawn ken chu a han kheuh hawng hmasa leh te te phawt a, a in zui nghal khalh khalh bawk. Chutah, Aw dam dup mai hian

" kha lam kha chu ngaihtuah hah duh suh. Min er tute thil tih bak a ni dawn lo. Diktak chuan VIP nen khan tunhma atang daih tawh in thiantha lutuk kan lo ni tawh a, a nupui pawhnise, misual an nih a hmelma an neih awm pawh ka hre ngai lo e. I rilru tihah duh suh aw. Heng te hi ei la, in rawh" rawn ti zung zung in, kei chuan a thil rawn ken te chu ka lo melh ve tlawk tlawk reng a, ei chakna em em pawh ka nei hran lo. 

" Chuan, tihian a hma ang khan lungmuang deuh in hotel pawh saw Kan kalpui leh thei dawn I tihna emni?"  ka lo tih chuan a lu chu a rawn bu zui ve ta nghat nghat a. 

" Nimai e. A bak tihtheih dang eng nge Kan neih. Vawiin lamah khan station ah reilote ka va awm ve a, zawhna ka chhan zawh hnuah sawrkar office pawimawh te ka dawr kual leh nual a, ka thianpa ruang pawh ka va kil ve hman hram kha. Buaina tur a awm rih lo. A ti tu ber, pawi khawih tu an man theihnan keini pawhin kan lo pui ve anga, kan fimkhur thar hle bawk anga chu chu a ni rih mai"  lo ti leh in, tlem chuan ka hahdam phah ta deuh e. 

" Ka len chhuahpui ve ringwt thin che a, I Bialpa alo thinrjm em lo ang chu maw" rawn ti leh khauh in, ka theitui in lai chu ka phuh chhuak lo chauh. 

" Thinrim tur awm nise ka zui duan duan peih dawn che emni?" lo ti ve vat in, bialpa K neih loh zia te hi hria se, keimah ah hian nghet charh thei se ka duh takzet. 

" Chuti chu a tih zia hlauh e"  rawn ti leh ringawt in, a bak chu sawi belh tum angin a lang tawh miah lova, a ngawi zui daih a, chips te chu a seh ri leh rap rap ringawt. Ka tlawh zui zawt dawn emaw ni le. Sawi zawm mai a tum tak siloh ah chuan tiin keimah zawk chu ka țawng chhuak ve ta nge nge e. 

" Nangmah zawk hian ilo nei ru reng anga, kan buai phah vaih chuan aw. Ka duh dawn miahlo a nia" naupang chhia zeta ka han tih chuan alo nui chhuak leh ta hak hak a, a kut te chu beng fai zui thak thak in a ding deuh hluai a, cigarette chu a rawn phawrh leh te te. A țawng chhuah hun tur nghak a ka lo thlir vang vang lai chuan hmanhmawh lo fahran hian a cigarette chu a han țan leh a, a pak khu ta hlat hlat mai. 

" Kum 15 ka tlin kum a ka neih vak kha chu Bialnu tia sawi tur fumfe pawh hi ka nei leh ta miah lova! I awih em? Awih lo mahla thudik a ni tlat. Ngaihzawng nghet neih ve te hi chu a chakawm ve thin alawm, mahse, hun hi ka ngah lo thei em a, hmeichhia phei chu care in phutna a sang si a, enkawl hneh in ngai nasa bawk nen, ka la zuam rih lo a ni ber e" a rawn tih chuan a hmuh loh tura ner zui nak in, hmun dang ka hawi sawn ta daih a. A thil rqwn sawi zawng zawng te kha awih tur an ni nge nilo tih pawh ka hrethiam ta niaih lo ve. Chutihrual in, he ka bula țhu mek, mipa hmeltha leh hleitling em em, zuanzang tak ni bawk si hi ka ta nilo tur a tan chuan ka phal thei lova, hmeichhe dang țang bel tur chuan ka phal thlawt lo. Suangtuah pawh ka Suangtuah ngam lo zawk e a. 

" I mut a chhuah tawh hmel sia, kan haw phawt Mai dawn emni?" a rawn tih leh chuan duh aiin ka suangtuahna Khawvelah ka lo cheng nasa mah mah tih ka inhrechhuak chiah a, ka inthiamlo hnuhnawh leh hle. 

" Chhuak lem love, thil hi ka ngaihtuah kual leh chiam zel a. Haw kha chu i tihdan dan a nimai. Ala hma chu ka ti"  ti zui zauh in, ani chu a han hawi kual deuh vang vang phawt a. 

" Haw mah Ila mut bak hna ka nei tawh lo"  rawn ti ve sup in, a hmel mawlh chu ka lo la en reng. 

" Hotel ah I Kal dawn lo tihna emni?" lo ti ve vat in, a hmui chu a han pet sawi leh te te phawt a. 

" Dawn lo. I duty loh hi chuan ka kal vak vak peih lo deuh" țhen sak Chung chuan rawn ti kher in, chiang fahran hian min la rawn melh zui a, ka țim ve sawk thei mai. Ka awm loh chuan kal chak nachhan a lo nei lo vel a maw. He mihring han dawt theih zia hi. 

" Ka va han awih lo tak aw. Night shift receptionist te kha kei aia chhelo zawk vek an ni a, hmuh pawh an chakawm daih zawk ang chu"  lo ti ve ngat in, a hmui chu a ti sawi leh ta. 

" Mit hi an tlung thei thlawt lo. An hna nise a phuai luai bawk si a engemaw Chang phei hi chuan rui Chung te hian an rawn duty thin ni tlat in ka hria a, ka en thla mek a ni e. Ka dawhtheih loh tawpah chuan warning pawh pe lo in ka ban vang vang ang ka lo ti deuh a"  rawn ti ve leh in, chutiang ringawt chu țha ka lo ti ve hauh lo. Ka receptionist pui an nihna leh ka hmeichhiatpui an nih a laiah min tei theilo hle mahse ka țan ve lo theilo. 

" Chutiang ringawt chu a dik theilo. Chance pe rawh. I duh dan ni lova an awm chuan warning pe hmasa la, Chutah pawh an la ziaawm theih loh fo erawh chuan boss I nihna angin ro dang i rel leh mai dawn a. Mihring te chuan tihsual palh Chang Kan nei thei vek a, insiamthat nan pawh hun hi jan mamawh ve thin alawm "  lo ti ve leh duah in, ngun zet hian min rawn melh leh ta veng veng e, a kiai zui ta sak. 

" I rilru lah hi a țha phian a" rawn ti sup in, kei chu ka lo lai chhe leh tawh kher. Chutihlai vek chuan a phone kha rawn ri in, rang zet hian a la nghal vat bawk. Kei chu ka lo țhu ngawi kar thung. Reivaklo phone a biak hnu chuan a jacket te chu ha tha zui sawk sawk in

" Kan Kal mai dawn emni? Ka pa a nia. Inbiak lawk a duh a nih hmel"  rawn ti leh puat puat in ka tan lo chelh luih tlat na chi aw zawng a ni lo tih chu ka hria a, ka tho ve ta vat. Tichuan, kan thil ei ruahna bawm ruak te chu chhar fai leh sawk sawk in chu lai hmun chu kan chuahsan thei ta hram. Muttui tia min thlah zawh hnu in ani chu a tlan chhuak zui vang vang a, a tlan liam dawn thleng chuan ka lo thlir ve ngar ngar bawk. Ka ngai nghal em em mai nia mawle. 

Mut hmunah pawh a dp bawk kha en leh in, ka zoom ngat ngat reng a, ka lung hi a ti awi hlia hliah a ni ber e. Ka hriat loh kara lo muhil ve in, chil thli tla phung hian ka lo muhil a ni tih chu ka harh hnuah ka hre chauh a, ka harh ruala phone Ka'n en nak chuan a dp chauh ka en emaw ka intih kha, chat ah lo lut in, message awmze neilo leh maksak zet zet hi ka lo VA thawn nghek tih chu ka hmu zui zat a, mak a rawn ti ve hle. 

" I kaw chhungah ramhuai a lut emni? Ramhuai hawrawp emni?"  te a rawn tia, ka phone chu ka delh sual nasa awm hle mai ka ti. Min reply dan chuan ka nuih te pawh a ti za e a. Nghal ve thin lutuk tlat. Tichuan, reply zui lem lo in tukthuan ka ei sawk sawk hnuah ka insiam leh thuak thuak a, ka chhuak zui nghal. Chutah, amah nen chuan hotel chu kan la thleng rual dun em em lehnghal a, min rawn nuih deuh var var Chung hian

" Nizan khan ramhuai țawng I zir ta emaw ni ka tia"  nui rah rah chunga a rawn tih leh phei chuan ka Zak ru Chem Chem thei tawh a, amah ah ka lut a, kan inbiakna hlui ka hmet chhuak tih kha a chiang tawh lutuk a ka Zak ngawih ngawih. I dp ka zoom a tih chi lah kha a ni tawh der bawk silo. 

" Nia, whatsaap ka en laiin ka lo mu thlu daih a"  ti liam ve puat in, ka hmai thak lo pui te chu Ka'n hiat zui ta neuh neuh mai a, min la en kar reng mai bawk si nen, zahzel ah, kawng ka bula lo duty Samuela zawk kha nasa zet hian ka han insiam chhiat khum ta ringawt a, a ngaihna a hrelo teh ang chu. 

VIP chunga khatiang thil rapthlak a thlen hnu atang kha chuan a khât tawk hian Kan hotel chu police department lam atang tlawh tu a nei awl tawh lo ti Ila, kan sawi sual lo ang chu. Tin, Vip riahna room bik kha dah awl niin, tu tan mah luah zui phal a ni rih lova, a hnu chhui tuten a khât tawka rawn en dik ve reng an duh vang pakhat a ni bawk nen, crime scene te chu khawih danglam loh in ala awm thlap hlawm a, a rukin vawikhat vel chu Mahruaii nen khan Kan han bihthla ve tawh a, rapthlak ka ti takzet. Tin, a taka tualthahna hnuhma ka vawikhat hmuhna a ni bawk nen, ka hlau angreng fu bawk. Thisen te kha hmun tinah darh in, bungrua nise a darh sarh nuaih mai bawk a, a landan ah chuan amah bei a that tu nen khan an in chai buai ve hle in a rinawm. Chuti a nih chuan engtinnge a nupui khan eng thawm mah a hriat loh a a harh loh theih zawk ka ti. Police zawhna a chhanna ah kha chuan thawm pawh hrelo a a mut ngheh takzet thu a sawi a ni a, police te pawh khan an awih kher angem ka hre tawh biklo. Ka ngaihtuah thui peih vel lo e a. 

Hun a ral leh hret a, boruak danglam thleng chu awm tawh lo mahse, hnu chhui na erawh a Kal ve bek bek reng a, thenawm hotel tualthihna te nen pawh khan chhui zawm niin, mi thuhmun an nih theih mai rinna lian tak alo awm ve bawk a, uluk leh muangchang takin an hnu chu an chhui chho ve zel. Chutihrualin kei chuan chhui dawn ngaihna ka hrethiam ve lova, tin, hotel lehlam crkme scene ka hmuh loh bakah, ka hna a nih loh miau bawk avangin helam kawng ah hi chuan kal thui vak chi ka ni lo. Kal thui pawh ka tum bawk hek lo. Kan bulhnaia thil thleng a nih vang zawk hian ngaihven loh theih loh in Kan khawsa a, chung nilo se, Sir Johna tih loh chu ka rilru luah tu an awm lo in ka ngaihven peih lo bawk. 

" Theatre ticket 2 ka nei a nia aw. A free ngat a ka neih ala ni zui. Zanin chu min zui ve dawn em. Movie thar a awm dawn"  Samuela'n a kut a 5D theatre movie ticket keng va va chunga a rawn tih chuan ka lo ner zui sak. Ka chak zawng tak ala nui zui a. Mahse, zan lamah tihtur ka nei em tih chu ka han ngaihtuah deuh vang vang phawt a, ka thiante khan rawn len ve an tum tih ka hre chhuak leh ta chiah. Chutah, ner chhuak nang nang chung hian 

" Van pawi tak. Zanin berkher chu ka thiante ho inhmuhkhawn an lo rawt bawk sia. Zan dangah a rem mai a ngem?" lo ti let in, ani chuan a mit ko chu a rawn san ta ak mai a. A ner zui ve sawk bawk.. 

" Zanin ah alawm an tih chhuah tawh dawn. Buaithlak tak ve" lo ti ve nuah nuah in, han chhan beidawn tawp mai kei tak pawh hian hrehawm ka ti ve tho a, tihnghaihna dang ka hre Chuang bawk silo. Ka en chak ve tho bawk si. 

" Chanchin ka rawn hrilh leh ang che. An rawn țhulh leh tak thut in" tia thlah in ka nuih ta var var bawk a, ani pawh chu bu deuh nghat nghat Chung hian a duty na lamah a phei zui leh ta hnak hnak. 

A zanah chuan ka rin lawk ang ngei in dar 7 a rik tawh pawh chuan ka thiante ho hmel reng reng chu hmuh tur ala awm thei ta lova, ka phone kual nghal zung zung. Chutah, ka rin ang ngei hian a țhen hna ban tlai vanga remchang thei ta lo te, a then lah chu an lirthei chiangkuan loh vang te ni in, ngawi reng hian an lo țhulh ta duak tih ka han hre zui a, ka ngei hlawm lutuk ringawt. Saba chu en leh vat in dar 8 em pawh ala rj Chuang lo tiin Samuela chu ka va be pawp zui ta vat a. Alo chhang rang kher. 

" I hman thei dawn maw. Ka lo ngaichang reng che a"  rawn ti ve in, min rawn sawm phei a tum thu pawh chu a rawn sawi ve a. Ka lo insiam zui nghal mawlh mawlh. Nula luck tak tia sawitur ni silo hian hemi te unau hi tunlai chu a in chhawk in ka la chhuahpui Zak Zak reng chu a nia. Ka lakah hian eng rilru nge an put ka hriat loh ang bawkin an lakah pawh hian eng rilru nge ka put ka hrethiam ta love. Mahse, pakhat zawk hi chu ka duh chiang a, pakhat dang erawh hi chu ka ngaina satliah nimai hian ka hria. An fel dun ve em bawk a ni. 

Theatre chhunga kan awm tawh hnu, movie țan hma a kan lo thut vang vang lai chuan Samuela bawk khan pop corn eitur hi min rawn pe in

" Eng thil nge i ngaihtuah. UJohna chungchang bawk emni?"  rawn ti chhuak nulh in amah chu chiang fe hian ka lo melh zui nghal kawka. Ani erawh chuan hmun dang alo thlir daih. 

" Eng nge ani chu ka lo ngaihtuah ve ngawt anga" lo ti let deuh hmukin, ani chu a rawn nui nghawr nghawr dat dat theiin ka hria. 

" Ka unaupa hi chuan buaina tur hi a ngah ve khawp a, tunah pawh station lamah an ko leh tawh maithei" a rawn tih chuan ka phu deuh zawk nimai hian ka inhria. Ka thil ei lai te chu chawl meuh in a lam hawi chuan ka inher țha nghal sawk sawk a. 

" Engah maw station ah chuan an koh leh anga, ani te chuan thiam lohna a nei lova, a zalen thei alawm"  ka han tih ve chuan a hma aia nasa zawk mah khan alo țhen leh sak sak tawh. 

" Thil hi I hrelo a ni. VIP boral ni a an inzui nasat zia te, a zan lamah nise an nupa khan zu an inpui leh a, a nupui lah kha a in mi ve tho a nia, engtinnge room chhungah khan an Khawsak ang tih pawh hriat va ni suh. Ka unaupa mahnise, a dik lohna leh thiam lohna ah hi chuan zep a thup sak ka duh lo. Mahse, heng thu hi I hnenah chiah ka sawi chhuak aw"  a rawn tih leh chuan ka țhu hle hle thei tawh lova, mawnga hawlh ang mai hian ka za sek tawh. 

" I unaupa hi Mifel leh tha tak a ni asin"  tih chauh lo chuan chhan let ngaihna pawh ka hre tawh lova, ka mittui te chu a tla mai dawn in ka hria. 

" A sual ka ti reng reng hleinem. Diktak chuan hman zan, tualthahna thlen zan te khan a haw hun diktak in hre theilo hlawm a ni lawm ni. Cctv ah nise engmah hmuh tur a awm bawk silo. Khami tuk zing khan hma takah exer ka lak avangin ka tho daih tawh a, haw dawn ah va tlawh kawi hram in chutihlai chuan zing dar 5 vel a ri tawh mahna, ani chu a zan leng ala haw loh thu in min lo chhang asin! Diktak a sawi chuan ka unaupa ka thisen zawm a nia, buaina a tawk ang tih hi ka hlau ve tho. A him dan tur ngaihtuah in heng ka thu hriat mak taktak te pawh hi I hnenah lo chuan sawi chhuahna ka la nei hauh lo. A hming chhiat hi ka hlau ve takmeuh"  rawn ti leh bawrh bawrh in, kei chuan sawi tur ka hre tawh lo. Ka ngawi tawp a, ka hnuk ulh chu thup tumin ka țawng chhuak duh tawh lo zawk a ni. A sawi zawng zawng hi thudik lo ni se, ka mumang mai nise ka va ti tak em. Chumi zan zet chu kan movie en ah pawh ka rilru ka pe hleithei thlawt lova, ka khur ru der der reng mai. Hrehawm duh tak a ni. Movie a tawp hnuah pawh Samuela min biakna te chu hriat loh ka nei ta nual reng a, mak chu min tih hmel kher asin. 

" I awmdan hi a dik lo. Ka unaupa chu ngaihtuah lutuk duh suh. Eng thil țha lo mah a chungah khan a thleng lovang. A tihsual loh na na na te chuan eng nge man chhan tur an neih ang"  rawn ti leh jn, ka awm erawh chu a nuam lo tulh tulh thung a. Ka chhang let hleithei lo tlat. Tichuan, ngawi reng a kan in thleng min thlah leh hnu in ngawi reng bawk hian min tlan liam san leh ta a. Muttui tia thlah nachang pawh ka hre tawh lo a nih kha. 

Chumi zan zet chu zankhua a muhil thei lo in Samuela thil sawi rjngawt khan ka rilru a luah khat leh ngut ngut tawh a, ava han hrehawm duh tehreng. A hmel pawisawi lo tak phen ah khan nunrawnna alo inphum ru ve reng em. Nge ni a, Vip nupui hmeltha tak nen khan thuruk nei dun in a pasal khan a man chhuak anga, hetiang thil hi alo thleng ta ni ang tih ringawt te chu ngaihtuah kai in, ka muhil thei ta hlek lo nia. Chutiang mihring alo nih vaih chuan e, ka rin ang leh beisei ang mihring hi a ni dawn lo lutuk a, ka ten in ka haw zui khawp ang le. Huiham! A thuhrim in a thiantha pawh lo ni se khami zan khan eng nge an room chhungah khan tihtur a neih ve. Han len chilh a, zu han in pui vel kha eng nge a țulna. Ka ngaihtuah thui pauh leh ka thin chu a rim tual tual a, mut hmunah chuan tihtheih nei silo hian ka inhumruh em en ringawt mai. Ka taksa te hi an na zo vek tawh ni hial in ka hria. 

A tuk zingah pawh chuan zan lam muhil thei lo ta chu hma lutuk ah ka tho chhuak a, tihtur dang hre hek lo, hna kal nan ala hma bawk si nen ka taksa te chu sawizawiin intih harh luih hram chu ka tum ve a, ka thei meuh lo chu a ni e. Tichuan, darkar chu liam ve zel in, tukthuan eikham hnu chuan phur lo leh tha tho lo zet hian hotel lam chu ka pan zui leh ta a. Ka peih lo ru takzet. 

Hotel ka thlen phei lai chuan Sir Johna kha alo la thleng ve lo tih ka hre thei a. A motor ala ding lo tlat. Kawngka bula duty Samuela khan min lo welcome vat in, hlim hmel min lo hmuh bawk a, peih lo zet hian ka han nuih liam ve tak kha. Chutah, ka thlen atanga darkar pawh a liam lo ang tihtur ah hian Sir Johna pawh chu rawn thleng zui ve in hmanhmawh fe hian in Chung lam a pan zui zat a. Min rawn melh eih lo nia! Kei thung chuan a Khawsak dan teh thut chu ringhlel zui tulh tulh in amah ngeina leh duhna rilru nen chuan ka lo melh ru ve reng thung. Mahse, ka awm ve tih chu a hre ta lo emaw tih mai tur hian a tei fua fua ringawt a, Chutah, a room a thleng chho tawh angem tihtur ah hian hotel kawtah khan police motor rawn ding veleh dat in, uluk zet hian ka lo thlir ve vang vang tawh. Chutah le, chung police rual khat ho chu rawn lut zui  dam dam in, an zinga pakhat chuan

" In pu, John Lalnunhlua hmuh kan duh a. Han ko ta che" mjn rawn tiin, chet lawk nachang pawh ka lo hre lo hial a. Mahse, ka hriat chhuah rual hian telephone chu ban nghal in Sir Johna chu ka call vat. A aw phawi atang kha chuan mak tihna leh hlauhthawnna engmah a hriat hleih theih loh a, Chung thil te hlei hlei chuan amah ka rinhlelhna awm sa chu rawn belhchhah in, K duh ngai miah loh rilru ka nei nghet tual tual a, ka ringhlel zo ta vek. 

In Chung lam atanga a rawn chhuk thla lai hmel te chu lo en vang vangin, pawisawi lo hmel hi a pu asin le. Chutihnakalaiin a hmel ah khan danglam na engmah hmuh tur a awm lova, police lo ding khawm thap a rawn hmuh rual te pawh khan a hmel ah thlaphanna chhete mah ka lo hmu ve eih lo nia. 

" Sir John, I hotel chhunga tualthahna chungchang ah khan rinhlelh I nih avangin man ini ta e!!"  tiin inspector chuan thu a rawn chhuah ta rup mai a! Sir Johna chu alo bu zui nghat nghat ringawt mawle. 

Tichuan, a kut pahnih chu hnung khirh sak in hotel chhung atang chuan thudang sawi tawh lo hian an hruai chhuak ta a. Ka melh zui ve vang vang ringawt. Ka na a ni. Ka na vawng vawng. Țap lo tur chuan ka insum ngar ngar reng a, ka natna hi midang hian min hmuh pui ve lo se tih ka duh. Mahse, ka khaw hawina ka sawn rualin kawngka bula duty Samuela khan kei chu min lainat hmel em em hian min lo thlir reng a ni tih chu ka hmu ta thut a. Ka mittui tling piau tawh te pawh chu khap zui sak sakin, ka inhru fai nghal mawlh mawlh bawk. Pathian, heng harsatna zozai te hi la kiang tawh lul teh. 

****************************************************