ZOCHHUANI A BO!?

ZOCHHUANI A BO!? 

*******************

Vanlalpeki Fanai

*****************

A Sam sei dum hniang mai chu zut delh delh in darthlalang hmaah a țhu a. Darthlalang chhunga lo lang ama hmel rapawm tak leh hmel ti pawh a sawi theih loh khawp tura sawr bawl, chhe țawih em em tawh te chu hmeltha tiin a phun pui zui sap sap reng a. A in nuih ta sak.

" Zochhuanmawi, he mihring pa nen hian inkawp tawh suh u vawi engzat nge ka tih dawn tak"  nu upa lutuk lo, hawi harh leh mawng zang em em Pi Dingtei'n a tih hlak hlak lai chuan Zochhuani chu sitting-room sofa ah ke thluang zar hian ngaihsam hmel zetin alo thu ve dar dar reng a. A nu tawng pawh kha ngaithla ve reng mahse a beng kawrawng chhungah chuan an lut meuh lo tih a hriat theih. Chutah, 

" Vawi 10 vel a niang" tia a nu thil sawi chu rawn chhang let in, Pi Dingtei pawh chuan a Fanu chu rum zet hian ava melh ta tlawk tlawk a. 

" Kei hi min hlau lo mah la e, I pa hi ka hrilh hneh vaih chuan i chak lo ve khawp ang" a nu bawk in a rawn tih leh pawh chuan Zochhuani kha chu a awmdan ngai reng in ala awm a, a nu thusawi te kha chu engah teh vak mah a ngailo tih a hriat theih awm e. 

Chawhnu herah chuan a bialpa, Tluangpuia nen inzui chhuak leh in hmun fianrial lam bawk chu an pan dun leh ta a. Tluangpuia hi tlangval harh țha tak ni siin, taima tia sawitur ni leh hauh silo chi hi a ni ve a, chhungkaw awm thei leh hausa fapa neih chhun chu nimahse a laktlak loh hle. Zirna ah a sang lova, a zir thui peih lo bawk a, hmeichhia a hria in ruihtheihthil nise a hmaih meuh lo tihtur ang chi kha a nih ve avang hian tu nu leh pa te tan mah makpa atan chuan han it chi kha a ni lo ve hrim hrim. Heng vang tak hian amah leh a chhungte mizia hrechiang tu Zochhuani nu leh pa te hi chuan an Fanu pasal a tan leh kawppui tur hrkm hrim atan hian an duh theilo bûr a, kawp tawh lo se an ti thin hle. Vawi tam an Fanu pawhin an tawngkam na taktak a tuar phah fo tawh Chung pawhin tihian an lo inzui chhuak leh țhin a, an inthlah duh hauh lo. A khat tawkin Zochhuani pawh hi hremna te chu han pe ve fo mahse la amah ah awmzia a nei lem lova, a sim phah lova, a bialpa thung chu a duh dan a zual telh telh emaw tih mai tur. A chhuah ruk ngun phah sauh. 

" I nu leh pa te hi chuam min duh lo ve thlawt a ni" Tluangpuia'n a rawn tih sar sar chuan Zochhuani kha alo ner ve sak a. A ngaihdan a nih ve loh hmel. Kher. 

" Keiin ka duh thlawt thung che alawm"  lo ti liam ve puat in a bialpa hmel chu uluk zet hian a han melh chho zui a, hmeltha hi a ti vet vet em

Ni e, Tluangpuia hi a hmeltha a, a mawi tawk lekin a vun nise a ngo bawk a.. A hang chhe lo. Hmeichhe tleirawl ho duhzawng takin a pian hi a sang vei thlarh lehnghal a, mipa chhelo tak a ni e ti Ila a fiah ber ang chu. 

" Tihian kan inkawp lui zel anga, inneih kan duh hunah min duh theih tak hlawl loh leh kan tlanbo dun daih anga nimai lawm tiraw?" tiin amah lo en reng tu a Bialnu chal chu a han chuk sak zeuh a, an nui dun ta ver ver. 

" Zochhuanmawi, a mak ka ti. Engah nge Hmingtluangpuia saw ilo la zui teh fo a? Eng nge i hriat. An chhungkua saw kan duh lo chu chu hre tawh rawh. Kei chu ka hne zozai tawh em mai hetiang thu swi ngai reng hi maw" zanriah kil laia nu ber in a rawn tih leh hlak hlak chuan midang kha chu an lo ngawi deuh thap reng a. Zochhuani thung erawh kha chuan a ngaih pawimawh hmel teh chiam loh. A ner kual vel mai mai. Chutah, pa ber pu Zika chu rawn țawng chhuak ve leh in muang ban charh leh rum ru tak si hian 

" I hre dawn nia, kei chuan tun bak hi chu ka sawi nawn duh ring tawh suh. A lehpek a awm leh a nih chuan thu a sawi sawi lo in I Chan tur I hmu fel tawh ang" a rawn ti zui ta hmarh mai a. An ngwi leh ta thap. A hnuah pa ber bawk chuan a fapa, Zochhuani nau mipa rawlthar ta tir lam chu hawi in, 

" Naktuk chu hna ka chawl thei dawn a, in hnuai khu kan pahnih in kan Siam dawn nia. Min pui ang che"  a han ti zui leh a. Zochhuani nau Ramtea pawh chu alo bu ve nghat nghat. 

A pa sawi lawk tawh ang ngeiin a tuk tukthuan eikham hnu atang Pu Zika te pafa chuan an inhnuai chu thawm that hna an bei dun țan ta a. A khât tawk hian Zochhuani pawh chu an tir kual zeuh zeuh reng bawk. An ni chhungkua hian eichawp dawr lian ve tak an veng chhungah hian an nei ve a, chu chu nu ber in nghak thin in, Pu Zika thung hi chuan Sawrkar zirna inah zirtirtu hna a chelh ve thung a, an fate Zochhuani leh Ramtea te hian zirna chawlhsan ve ve tawh in, a țul țul ah an nu leh pa te hi an pui ve mai țhin. Tunhma chuan chhungkaw felfai, inlungrual leh hlim ve thei tak, midang awt ngai miahlo a khawsa thin kha an ni a. Hetia Zochhuani vanga an buai hma zawng kha chuan khi khi an dinhmun a ni țhin. Tihian Zochhuani'n nulat a rawn hre chho ve a, a hmasa ber atan an duh loh em em mipa a rawn kawp nghal chat bawk a, tu nu leh pa te nge lawm reng ang ni. 

An pafa inhnuai siamtha chuan ni khat chhung lek in an hna an ti zo nghal vek a. An hnehsawh dun hle. 

" Pa, inhnuai khu tu in nge rawn luah dawn a. I siamtha ve ringawt bawk sia" Zochhuani'n a han tih chuan pa ber kha alo khuh vei huk phawt a. 

" An rawn luah dawn tih pawh awm Chuang love, duh thut te pawh an awm ve thei a tih thu mai mai. Khu tia dah țawl reng ai te chuan a hmuh nuam zawk hrim hrim alawm" rawn ti ve nghut in, Zochhuani phone chu a rwn ri zui ta ral ral a. A tho nghal vat. Chu veleh, a pa khan a rawn call tu chu tunge tih lo hrethiam nghal vek in eng thu maj sawi lo hian a Fanu chu rum elhkhen in a melh zui ta vang vang. 

Zochhuani phone hmang chu roomah tawm bo veng veng in, a rawn chhuah leh meuh chuan a rawn inchei nalh tawh angreng hle a, a chhungte khan an lo melh deuh thap. 

" Nu, ka chhuak lawk dawn Ania. Ka rei lovang" ti liam puat in chhuah mai chu a han tum a, mahse, a pa kha a rawn inrawlh ta vat Mai le. 

" A țul lo țhu rawh. Vawiin ni hian khawiah mah I Kal chhuak dawn lo. Nula ini a, in chhungah pawh khawih sen loh hna tamtak a awm tih I hria em? I thawmhnaw kha va thlak la, rawn thu rawh" ti ram hmak in, an pafa chuan an in melh ta ran mai a. Zochhuani pawh kha a che chhuak lui ngam bik Chuang lo. Chutiang boruak an neih lai mek chuam a phone lah kha rawn ri ve sek in, Tluangpuia hnen atang vek ala ni zui bawk a. A lung phu chu a rang tawh kher. 

" I phone kha off la, i roomah lut lehnghal rawh. I chhuak dawn lo ka tih kha" a pa bawk in ram hmak a a rawn tih leh hnu chuan Zochhuani pawhin hnial lui duh bik lo in zawi zet hian a room lamah bakw a inher lut leh ta a. A tawm bo zui ta vang vang. 

Tlai eirawngbawl hun lo thleng in, nu ber ngaihtha lo chuan Ramtea chu a unaunu ko tur in a han tir a, mahse, Ramtea'n a u Zochhuani room ava lut chu a phu zui zawk thei. A u hmel reng reng hmuh tur alo awm hauh lo nia! A bo! 

A nu hnena chanchin a hrilh rual in Pi Dingtei chu a tal buai nghal vek thei a, a nihna takah chuan a thinrim luruk talbuai a ni ber awm e. 

" Bawiha, I pa phone nghal rawh. Rawn haw rawh se. He mihring nu hian a chhungte hi engahmah min ti lo a nih hi. I pa hremna hi dawng Sela a hre fiah kuarh kuarh mai ang"  ti chang fak in choka chair ah chuan lungngaih hmel em em hian a thu thla zui hnawk bawk a. Thil tamtak a ngaihtuah tih hriat tak hian a melh ngai melh in a hma zawn a en reng bawk. 

Ramtea'n a pa a call hnu rei vaklo ah Pu Zika pawh chu rawn haw ve in, thinrim leh lungawi lo sa a rawn haw a ni bawk a, a hmel hmuh a nuam lo duh kher. 

" Khawiah maw kan Zochhuanmawii chu a awm a. Ava chak dawn lo rua em. Kei, a pa thusawi zawng zawng te kha hai der in min zah lo takin a khawsa lui ngam fo a maw" ti pung pung in a phone chu a hmet pah nuap nuap reng  a. A Fanu chu a call nghal bawk. Mahse, Zochhuani chuan a phone reng reng a la duh lova, a rei hnuah phei chuan a switch off hmak ta nghe nghe. Chu mawlh chuan a pa thin rim chu belh chhah in, a sosang tual tual a, in chhung atang chuan a tei chhuak zui ta vut mai. 

Ding takin a hma lam a pan ngar ngar a, a Kal tumna chu a chiang hle. Tichuan, an veng thenawm lawk a a Fanu bialpa Tluangpuia te in chhung chu dim map lo in a rap a, a lut tlang buan buan mai bawk a, tu hmai eng mah hi a zah tawh lo a tihtheih ang. 

" Khawnge in awm. Khawnge in fapa, suak sual leh ka Fanu bum a tlanbo pui tu kha han ko chhuak teh u. A thil tih dan ah hian Kan lawm thlawt lo tih hi lo hre nawn leh ang che u" ti zui hlawk hlawk in, chu in chhung zau leh reh tak si ah chuan a hawi kual zui vak vak a. Chutianga patling an inchhung a rawn au ta vak vak chu makti in amah hmuh tum chuan in chhung kil tin atang khan an rawn chhuak khawm ta sap sap mai. Tluangpuia pa chuan maktih hmel taka Pu Zika rawn melh ram ram Chung chuan

" E khai! Pu Zika teh daih chu. Eng thil nge ni ta buan buan a. Tu ber nge rwn hmuh I duh deuh ni" lo tiin thutna tur te chu a han kawhhmuh zui a, mahse, Pu Zika erawh chuan thut khaw muan a tum ve hauh lo thung. 

" In fapa Tluanga khan ka Fanu hi kan remti lo Chung chungin alo tlan chhuahpui fo mai a, kan duh lo. In fapa chu sqwi loh, in chhungkua hi kan duh lo hrim hrim che u. In eizawnna nise Kanhria, Nangni nena inzawmna neih hi kan duh ngai hek lovang. Lo hria ula, in fapa pawh chu kan Fanu zar buai tawh lo turin lo hrilhfiah bawk ang che u. Ka kal a nge" ti leh in, a inher a, a Chhuahsan nghal ta vang vang. Tluangpuia chhungte kha chuan thinrim a hnial let an tum lova, an duh bawk hek lova, mualpho kha an hlau a ni ber ang chu. A nihna takah chuan Pu Zika Fanu leh an fapa inkawp hi an remti bik hauh lo, mahse, naupang mai an la ni a, fate tih nat ai chuan tiin tihian an en liam twp rih a ni mah zawk a, nakinah hun tha te rawn inher in, inthen theih hun an la neih ve ngei pawh an ring zawk a ni. 

Pu Zika let leh chuan thinrim tak chungin a Fanu rawn haw hun tur chu a nghak ta ngat ngat a. Call nise a lak duh miau loh avangin chutia ngawi reng a a lo haw hun tur nghah mai loh chu tihtheih dang vak a awm lo. 

Zanriah ei hunah takngial pawh Zochhuani chu a reh ta veng veng mai a, a chhungte thin ur na a ti zual tawh kher. 

A khât tawk hian a nu chuan call tumin a han bei ngial thin a, mahse, Zochhuani erawh chu lak bo ang hmiah hian a reh vung vung tawh bawk si. 

Chhungkua chawk buai a, an hlimna țhiah sak tu Zochhuani chu khawiah tak kal ang maw le. 

Dar 10 a rawn rik meuh chuan Ramtea chu mu turin a insiam țan a, a room a pan chiah tih in kawngkapui inhawng thawm a rawn awm ta a, lut leh ta lo chuan a chhuak nghal vut. Chutah, kawngka atanga rawn pen lut chiah a farnu hmel pawr fap mai ava hmuh takah chuan phu deuh zawk in a ka a ang nghal phuau thei lehnghal a, mitthi tho leh hmu ang mai hi a ni e. 

" Nu, pa, au alo haw e" tia au zui nghal in, a nu leh pa te mu tawh pawh chu an la muhil bik lo tih hriat tak hian room atang an rawn dawn chhuak nghal vat a. Kawngka bul lawka ngawi renga lo la ding mek Zochhuani chu an melh rawn ta thap mai. Ani lah chuan Inthlahrun ve hmel tak hian a chhungte ho hmel chu ngam leh ngam lo jn a rawn melh kual ve relh relh a, sawitur pawh a hre chiah lo niin a lang. Chutah, pa ber khan rum khel khawl fe mai hian

" Mu rawh. Mu la, naktukah I awmdan tur Kan rel fel ang. Kan thawn bo dawn che nge, um mu phawt rawh. I chhuak leh a nih vaih zawngin ka fa inih na hi a bo hlen ang tih ilo hre dawn a nia" ti hmak hmak in, a nupui nen chuan an room lam an pan dun leh ta vat a. Ramtea pawh chuan thudang sawi tawh lo in a farnu chu lainat hmel tak, tihtheih nei silo mitmeng hian a han melh pah ralh ralh a, a luh bosan ve ta a ni. 

A chhungte ho anmahni room theuh a an luh bo zawh rual chuan Zochhuani lung chhia chu a inhnit zui ta faih faih mai a. Ni e, vawiin ni ngei hian a hmangaih em em a bialpa hnen atang a duh lo Chung Chung a thianghlimna laksak a ni a, kutthlak a tawk bawk a, tunah khan en chiang hlawm ngat se zawng, a biang duk ruih te chu an hmuh hmaih kher in a rinawm loh. A nia sin, Zochhuani hian sawi chhuah loh harsatna tamtak pai ruk a nei ve reng a, ngaihthlak sak tu a nei lo mai chauh zawk a ni. A nihna takah chuan a bialpa hian a hmangaih angin hmangaih let na chhete mah a nei ve lova,,theih tawp chu han chhuah ve thin bawk majsela a hmangaih thei ngai Chuang lo. Tihian, he tleirawl thinlung thianghlim tak hi bum kual in a hnuk kual a, pakhat lahin alo hnar theih thlawt bawk siloh avangin a kalna apiangah a zui kual duan duan a, a thlah duh lova, a umzui reng. Chu chu hmang tangkai in Tluangpuia hian tunah a thianghlimna chu a laksak leh ta a ni a, alo tih fo thin tahw ang khan kut pawh a thlak leh bawk. Inngaihzawn lai atanga mipa kutthlak hrat chu inneih hnuah pawh an danglam lo tih thu hi Zochhuanmawii, tleirawl rilru thianghlim mai hi chuan hrethiam pha ve hek lo le, a thlah duh loh man chu a hmu fo reng a nih hi. A chhungten an duh loh zawh pauh leh a zui chakna a zual a, a hmangaih tulh tulh bawk a, engtikahmah a kalsan theiin a inring tawh hek lo. 

Tap hlap hlap chung a a mu lai chu lo muhil zui daih in, a ban rawn thip zawk chuan a ti harh lek lek a, mahse, meng chhuak ta lo hian a ban rawn thip avanga țhen deuh sak sak Chung chuan a muhil zui ve leh mai. Mahse, khaw var hnua a mit a rawn men chhuah takah erawh chuan a awmna hmun chu a khum Chung a nilo tih a hrethiam ta chiah a, a hawi buai hman hle. Țhu chhuak zawt in, a awmna chu hmuh fiah pawh a tum ruh ve hle a, Aw, anmahni inhnuai ngei a ni tih chu a hre ta. Zanah kha chuan a khumah ngei khan a mu ve thlap kha a ni si a, engtinnge tunah hetah daih daih alo awm leh si. A chhuk thlak lai a hre miah silova, engtinnge a thlen theih zawk le. Tichuan, phun nuah nuah chunga tho chhuak in, in Chung lam pan chu a han tum a, mahse le, a chhuahna tur awmchhun kawngka ber mai chu a hawn theih leh ta hauh lo nia! A sak khat tlat. A tha neih zawng zawng sawm khawm a nam hawn a han tum takngial pawh chuan pawn lam atang a inkalh nghet hle tih chu a hriat theih a, a hawn theih bau loh. Țap țuau chunga hawi kual in a chhungte chu a han ko thin a, mahse, thawm reng reng a hre thei hauh lo. Ni e, an chenna In hi concrete phui țha taka sak niin, tuna a awm mekna room phei hi chu a zau lem lova, a phui khup mai bakah a pa khan tukverh dah a duh lova, chu aiah chuan tiin ventilation aia te hret hian pakhat a Siam ve țawk a, cju pawh chu a Chung sang, ban mai mai phak loh ah ala dah tir dakh zui bawk. 

Khawi atang in nge a chhuah theih tak ang. Engtinnge a tih dawn tih ngaihtuah pah chuan a han in dap chhin vel a, a phone nise a keng thla hauh bawk silo, ken thlak chu sawi loh, engtik lai khan nge hetah hian a thlen thlak pawh a hre lo a nia. Chutia awm Mawl tawp chu thil ni thei ni a hrelo jn a awrawl tawp tawp chuan a chhungte ho chu an hming kim in a han au leh ta tuarh tuarh mai a, mahse, ama aw chu ama hnen bak a thleng pha lo ang tihtur khawp hian chu room zim leh phui lutuk ah chuan eng thawm mah a chhuak hleithei lo tlat. Beidawng leh chau zet a țhu hnawk in, a țap leh hlawp hlawp tawh a, a ril pawhnise a rawn țam takzet ta. A chhungte khian hetah hian a awm tih hi an rawn hria a ngem. Engtinnge hetiang thil hi a thlen theih zawk. A lungngaihna chu thinrimna in a rawn thlak ta thut a, a ke chu chhuatah chuan leng vak vak in, a țap pah tuarh tuarh reng a, a chau in a thaw pawh a ipik hluah hluah. Helai hmunah hian a awm rei tur a ni lo. Rei pawh a dam theilo tawp ang. 

Chutia tih hmasak tur ber pawh hrelo a alo thut vang vang lai chuan thawklehkhat ah hian kawngkharpui sir hnuai a awng tereuh te ui luhna tawk tur vel a an awng Siam chu a rawn ri ta rak rak mai a. A hawi phawk nghal hru thei. Rang taka tho in chu lam pan chuan a Kal zui nghal a, chutah, a nu kut ngei maiin chaw leh tui a rawn dah luh lai chu va hmu fuh in makti zet hian alo en zui ta tlawk tlawk. 

"Nu, nangmah ini em?" lo ti thawp sat in, pawn lam ami erawh kha chu a han ngawi deuh vang vang phwt a. Ala kalsawn lo tih erawh chu Zochhuani chuan a hre chiang viau. 

" Nu, engvang a helai a khung beh hi nge ka nih. Ka pa nen tangrual in tihian min khung bet tihna emni? " mangang tih hriat taka a han tih leh chuan pawn a la ding reng a nu kha a rawn tawng chhuak ve ta a. 

" Nu leh pa thu I zawm lova, I pa thu angin I khawsa duh bawk hek lova, I pa chuan Helaiah hian thla khat vel awm rih turin a duh che a ni e" a rawn ti ta Mai a! Thla khat chuang maw!? Chung hun chuan a luhluh na te hi siam tha in a nun nise a thlak thleng phah an ring tihna emni ang. A thei teuh lovang, Helai hmun hrehawm lutuk ah hian thla khat chuang em em a khawsa thei teuh lo.. A theih loh tiin a che chhuak phut a, kawngka bawk chu ava sawi leh ta chiam mai le. Mahse, awmzia a neilo. A hma ai mah khan alo sak zual ta emaw tihtur hian a tha theih tawp a chhuah Chung pawhin kawngka kha chu a che ve laih ringawt chauh. A beidawnthlak a ni e. 

Beidawng takin khum anga Siam ve deuh reuh chhe țawih tak chungah chuan ava mu leh ringawt thin a, a thaw halh halh reng bawk. Engtinnge a chhuah theih ang. Muhil thei silo jn khum chungah chuan a in let tawn chhen reng a, a hne zual Chang in kawngka chu ava sawi leh chiam thin, mahse, awmzia erawh a neilo hle thung. Tichuan, chhun zan in a chhungte chaw rawn pek hun nghak chuan a awm ta tluk tluk mai a, chhuah pawh chu lo dil ve thin mahsela awmzia a neih loh em avangin a ngawi tawp tawh. 

Chu room uap leh thawpik zetah chuan ni 3 lai chu alo awm tling ve ta. A sam a thur in amah pawh chu a bal Sawt hle a, a zawi ngawih ngawih reng bawk. Chhuah dan tur kawng dap tur pawhin a tha neih derdep zet hian phurna a pe tawh hlawl lova, a na em em vek tawh a, a chau takzet a ni ber. Engtinnge hetiang reng te chuan Helai hmunah hian ni 28 Chuang tehmeuh ala Khawsak theih tehlul ang le. 

An chaw rawn pekna thin awng tereuh te khan thawm rawn nei leh in, tuemaw ber chuan a rawn ko ta sur sur mai a. A ti harh ve deuh zawk thei. 

A theih anga chak in a tho chhuak a, chaw awmna zawn ava thlen chuan a nau Ramtea ngei mai khan zawi ser sawr fe mai hian alo bia chu niin. A harh sawng sawng tawh. 

" A u, lo awm hram hram rawh aw. Nakinah a pa te an chhuak bo leh vek anga, kawngka hi hawn dan tur ka rawn zawng dawn nia. Lo bengchheng lo la aw" rawn tiin, Zochhuani pawh cuan a bengchhen loh tur thu alo hrilh ve vat a. A phur ta kher. Helai hmun atang hian a chhuak thei hlauh a nih chuan aizawl lamah chhuk thlak nghal vang vang a duh a, a chhungte hi chu hmuh leh pawh a duh tawh hek lo. 

A rindan in chhun lai vel a nih tawh hmel a, boruak chu a reh ngawih ngawih bawk. A nau Ramtea pawh chuan a tihtur chu rawn ti vat vat se, he hmun Chhuahsan hi ava han chak tawh tehreng em. Chutih a hnek in, Ramtea lah kha a darkar Chuang fe chu a reh leh tawh a, a rawn theihnghilh ta mai nge ni anga, a thil sawi kha a chhungte zawkin lo hriatpui in a chhuah an remti ta lo nge niang. Mangang rilru buai zet chuan a awmna hmunah a insawh deuh reng tawh a, a țhu hle hle thei tawh lo bawk. Chutah, kawngka chu rawn ri ta rak rak in, pawnlam ami chuan rawn hawnsak ngei a tum tih pawh a hrethiam ta a. Nghakhlel tak hian alo thlir ve ta ran ran mai. Mahse, a hawng thei tep tawh anga tihtur ah hian thawm chu a reh zui hmak a, inhau thawm in a chhunzawm ta tlat! 

" Hetiang hian Kan hmuh loh karah kua ilo hreuh ngam a maw? A Mai Mai che chuan. Helai hmunah hian I awm ve duh zawk tihna emni? Sawi teh" tiin Pa Ber chuan a fapa Ramtea chu a beng ta țhuai țhuai mai a, Ramtea tan chuan țawng chhuah ve na chi hi a ni tawh lo reng reng. Chutah, kawngka chu rawn inhawng zui in, pa ber Pu Zika ngei mai kha a rawn lang ta heu mai a. A mitmenh nise a rum in a lungawi lo hle tih a hriat si a, a lan dan chu a hlauhawm takzet. 

" Pa, ka tihpalh. Helai hmun atang hian min chhuah tir tawh hram ta che. Tluangpuia pawh ka kawp tawh lovang a, in thu thu in ka awm tawh ang" khur dar dar chunga a pa alo biak lai chuan na zet hian a hmai chu a ri zui thlawp mai a. A au nghal that thei. Chutah, pu Zika chuan la duhtawk mai lo in a chhip samah a țham sak leh a, chhuat char leh vawt thlur maiah chuan hnuk kual hawn hawn in a khât tawk hian a beng țhuai țhuai reng bawk a. Zochhuani chu a rak nasa tawh hle. 

" Pa, min ngaidam rawh. Pa, ka tihpalh" ti mawlh mawlh mahse a thusawi chuan a pa beng an thleng mawlh lo. 

" I nau thlem in chhuah dan tur ilo sawi pui vel a maw. Iva ngam zawk ve" rawn ti pawr hrak in khumah chuan a theh mu hnawk a, ngawi reng hian a Chhuahsan zui leh ta a ni. Chutah a pa chhuah rual rual chuan Zochhuani pawh chu tho chhuak nghal in, kawngka mawlh mai kha ava bei leh ta chiam a, mahse pawnlam ami khan a kalh ngheh hneh em avang erawh chuan a che eih Chuang lo. 

" Ka chhuah hunah I hre khawp ang. Ka chhungkua ka thisen zawm pawh in nilo, ramhuai in nih hi" ti nghek nghek in a țap hlarh hlarh reng a, a hnar thi hnuang reng te pawh chu a ban hmangin a hru kawi nuai tawh. Mi â ang maiin chhuat ah chuan a țhu sawp nuai reng a, a khât tawk hian a Sam thur em em te pwh chu a țham leh nawk nawk thin bawk. A â tak tak lo chauh tawh zawk a ni. 

Chawlhkar a liam a, thil thleng danglam leh beisei tur engmah ala neilo. A nun dan ngai reng in a nung a, danglam awmchhun chu eng lai mai pawh a a luak chhuak leh taksa na em em chu niin, chu erawh a awmna hmun țawp leh thim hrehawm lutuk chuan  a Ken tel nimai turah a ngai. 

" Khawnge Zochhuanmawii chu in dah bo sawi rawh u" ti tuarh tuarh in Tluangpuia chu Zochhuanmawii te in kawtah chuan harhfim lo tih hriat tak hian a rawn au nghek nghek mai a, Zochhuani pa pu Zika te thleng thleng chuan a kut zungchal in a kawk sawk sawk reng mai. Ngawi reng in Pi Dingtei chuan pawnlam a au țial ruai ruai reng a Fanu bialpa chu thlir reng in a thin chu rim ve hle mahse Engtinmaj tih let a tum lova, a pasal awm loh lai a ni bawk nen chutia ngawih phawt Mai chu a thlang ta zawk. Mahse, hun rei nghah ngai lo in Pu Zika pawh a rawn haw ve leh mai bawk a, hetihlai hian Tluangpuia kha tual velah chuan la țhu kun ngâwih ngâwih mahse la Chutia Pu Zika hmel a rawn hmuh takah chuan a rwn inperh tho leh ta vat Mai a. A mitmeng reng reng te pawh chu harhfim lo tih hriat tak a ni ringawt. 

" Ka pu, khawiah nge ka hmangaih Zochhuani in dah bo min hrilh rawh. Hmuh ngei ngei ka duh a ni" pangngai taka lan tum chuan han ti ve bawk mahse la, Pu Zika pa fing leh fek fawn em em mai hian a rui tih chu alo hrethiam ve vek. A hai hlawl lo. 

" Haw phawt rawh. Nakinah harhfim jn rawn Kal leh la kan sawi dun dawn nia. Haw phawt rwh le" zaidam taka a han tih chuan Tluangpuia thung chu a thinrim leh ta tlat. 

" Nang pu.. Pu.. Nang hian thudik engkim min hrilh duh hi ka  ring ang maw? Ka ring lo. Keimah vanga i hrem thin dan zozai te kha hre lo turah min ngai suh aw. Mi Mawl ka ni lo ka pu" ti chuar chuar in a ding țha hle hle te chu a khât tawk hian a rawn pai leh chawn chawn thin a. A taksa chu zu leh damdawi hnathawh vangin a zawi ngawih ngawih bawk. Pu Zika chuan chhang let buai peih lo in in chhungah a luhsan ta daih a. Chu veleh, Tluangpuia kha rjng leng lawng a rawn au țha leh in, a an a chhe si a, a bengchheng hle mai bawk. 

" Thiana, a dik dawn lo. Tihdan ngaihtuah vat teh. Thenawm khaw veng te lakah pawh a mualpho thlak lutuk alawm. Min ti Zak ngawih ngawih" Pi Dingtei'n a rawn tih tak sar sar ah chuan Pu Zika pawhin a phone chu a phawrh ve vat a. An khaw police station chu call nghal in thil awmdan a sawifiah zung zung a, an inbe rem thei ta hlauh. Pu Zika'n a phone zawh hnu reivaklo ah police motor chu rawn ri ruai ruai in mi kawt tual a lo la au vak vak Tluangpuia chu eng khaw sawi set set lo hian an ranw hling ta chat mai a. An Kal pui zui ta a ni. 

Chung thawm zozai te pawh chu in hnuai lawk a awm Zochhuani chuan alo hre ve lehpek reng reng lova, sawi tawh ang khan Concrete phui țha tak a ni a, thawm in hriat pawh mai mai theih a ni lo tlat. Bangkil thim lamah chuan pum dawm a thingthi in a lo luak leh barh barh thin a, chu lai hmun chu a zunram thiar nan a hmang bawk nen a tui hul lo hle a, a țawp takzet zet bawk.

Duhtawk a luak bawrh bawrh zawh hnu chuan zawi hnawk in a mutna lam bawk ah a rawn phei leh hnuk hnuk a, a lan dan ringawt pawh chu a khawngaihthlak takzet tawh. 

Thla khat chuang zet khung beh a nih hnu pawh chuan chhuah phalna thu leh hla reng reng a nu leh pa te hnen atang chuan hriattur ala nei thei lo fo a, chaw pe tura an rawn Kal zuai bawk an thawm ri va hriattur pawh a nei hek lo. Tlai khat pwh a nu zawk chu a chaw keng chuan a rawn chhuk thla veleh a, chutah chuan Zochhuani kha kawngka bulah lo thu in, zawi em em hian a thaw hle hle tawh a tihtheih a, a meng țawk țawk tawh bawk. 

" Nu, ka chhuah hun tur chu i sawi thei lo emni? Kei hian beisei tur ka nei tawh lo tihna emni??" lo ti sar sar in, a nu chu a han tawi khaw muang ta hret a. Mahse, a beisei chhanna erawh a rawn pe leh Chuang hauh lo mai. 

" I pa lungawi na khawp zan I la awm hleinem" rawn ti hul hak in thu dang reng reng a sawi tqwh lova, a kalsawn leh ta a ni. 

A nu kalsawn rual in beidawng em em hian Zochhuani chu a thaw leh hak thin a. Tihnghaihna reng reng a hre tawh lo. Tu in nge he hmun atang hian rawn hruai chhuak thei anga, engtinnge he lai hmun țawp leh thawpik zet atang hian  chhuah tir a nih theih ang. A awrawl tawp tawp a au turin chakna reng reng a nei tawh lova, thawm bengchheng tak chhuah tur pawhin hmanrua reng reng a awmloh chu thuhran nise, awm pawhnise tha reng reng a nei tawh bawk hek lo. Tun dinhmun ah hi chuan tlan chhuak thei tehreng mahse khawi hmun mah hi a tlan thlen theih pawh a inring lova, chakna pakhat mah a nei tawh lo a ni. A tlusawp ngawih ngawih. 

Thla khat zet a awm tawh hnuah pawh beisei tur a neih ve tak siloh ah chuan inti harh lui hram hram in, a tui in tur neih chhun, a chhungte rawn pek la awm hram hram kha a theihpatawp in a han in ve ta bawrh bawrh a. Mahse, harh zui kawk kawk chu sawi loh, a luak a rawn chhuak nghal a, uak zui that in rang lutuk hian bangkil thim lam bawk chu a pan leh ta dawr dawr mai. Chaw leh thildang pawhise, mamawh leh duh khawp ei ta lo na na na chuan luak chhuah tur takngial pawh a nei Mang silova, a hneawm ta hluah hluah. A rilru chu tih harh tum in a hla thiam chhuah ang ang te pawh chu zawi te te in a han sa ve rat rat thin a, Tluangpuia nena an hla duh em em te pawh kha mittui tling piau Chung hian a sa ve rat rat reng mai. Chu mawlh chuan a khawhar na chu rawn ti zual in, Tluangpuia chu a ngai thar leh ta em em a, amah vanga hetiang tuar mek hi nimahse, a rilru leh thinlung engkim, a taksa thlenga nei tawh tu a nih vang khan a thlah theih erawh a inring si lo. Thlah theih chu sawi loh, tunah pawh tihian a ngai leh em em mai chu a ni si a. A awmna hmun te hi rawn hria in rawn ngaihven nachang a hre tawh a ngem. Thla khat chuang lai mai chu inhmu thei lo in an awm ta der chu a ni si a, a rawn ngaihven ve eiih a ngem. Nge ni a, ngaihven duh lo in hmeichhe dang nen hlim lai par an chen dun tawh zawk ni ang. A ngaihtuah thui ngam lo. A mit chu a chhing zui sawk thei a, an pahnih chauh a hun an hman dun lai zawng zwng te kha rawn lang nghal uarh uarh in, a mit atang mittui a rawn tla a, hruk hul pawh a tum Chuang lo. Engvang a kha mihring, amah hmangaih miah lo tu leh hmang tangkai mai mai tu kha vei a, hmangaih a, thlah thei miah lo nge maw a nih teh hrep le. Hmeichhe Mawl tak a nih zia chu inhre fiah tawh mahse la, a thinlung ril ber hian ala thlah ve thei tlat silova, chu chu a buaina a ni. 

" Tluangpui, ka ngai che" tia phun chhuak sep sep in a mutna thin khum tlabal tak chungah chuan kawm chial mai hian a muhil ve leh ta nge nge a. 

" Pu Zik, hei, kan fapa pawh thla 1 teh meuh chu jail lamah min lo khung bo sak ta bawk a, chutin pawi khawih em em a neilo bawk nen, min remtihsak hram ula, lak chhuah hi min dil pui tawh mai dawn emni le. Hei, a luh zan atang khan Kan nu phei hi chu ala muhil hleithei der lova, a hrehawm tawh em mai. Khawngaih in a tihsual te kha chu min theihnghilh sak tawh mai ta che u. Ti nawn tawh lo tur pawhin kan hrilh nasa ve anga" an in chhunga rawn len chilh meuh in Tluangpui pa chuan thutak fahran hian a han ti charh charh a. Pu Zika pawh chuan alo ngaithla uluk ve kher. A bu deuh nghat nghat reng bawk. 

" Nia, a tir taktak atang khan keini chhungkua hi min hnim hnai lo Turin lo hrilh ngun deuh ula chu hetiang thil hi a thlen kher pawh a țul lo tur a nia. Hei hi chu kan thiam loh hulhual ni pawhin ka hrelo, um engpawhnise, tun atan chuan lak chhuah chu ka remtihsak ang che u nga, mahse, lehpek a awm leh a a rawn inlan leh a nih vaih zawng in ka hmelhriat neih thatna hmang hian in inchhir rum rum na tur pawh ka ti duh tawh maithei a nia. Va kal rawh u. Police duty ho chu ka lo phone dawn a nia" lo ti ve ta hlauh in, Tluangpuia pa lawm lutuk kha a nui zui ve ta suk a. A thil sawi te kha a pawm hle a ni tih lantir nan a lu pawh chu a bu ve nghat nghat. 

Tichuan, Tluangpuia chu bail chhuah niin, hemi ni atang hian ani pawh in lamah khung beh a ni chho a, țul tawpah lo chuan pawn chhuah pawh phal sak a ni ta lo hial. Ani ang tlangval chhuak hlim, tha za leh Harhvang lutuk tan chuan chutiang thil hmachhawn chu a harsa duh em em mai a, Zochhuani hmuh dan leh a awmna hriat duh ringawt cuan a hmanhlel in, a nau Ramtea tal chu hmuh theih dan kawng pawi a dap nasa hle. Chutihrual in, Ramtea pawh kha pawn chhuak tam lo tura khuahkhirh a nih lai tak a ni ve a, a u chaw pe tur phei chuan a tirh pawh an tir ngam tawh lo hial. Pa ber phei kha chuan Ramtea chu mi nazwwng be lo tur leh an chhungkaw thuruk hi mi nazawng bula sawi chhuak lo turin a ti tawh hial a. Mi nazawng chu swi loh, tu bulah mah a them takngial pawh hi hrilh hre lo turin a chah hmak mai a ni. Zawhna alo dawng palh a nih pawhin a unau nu chu ram danga hnathawk tura an thawn chhuah tawh thu sawi turin a hrilh thin. Chutiang chuan amah leh a nupui pawh hian midang chu dawt hmangin thu an fah ve thin bawk a ni. 

"Pa, Engvang in nge ka u hi in la khung bo reng a. A fel tawh viau ang chu" zan riah kil lai a Ramtea'n a rawn tih chuan nu ber kha nuam tih loh hmel tak hian alo meng khup deuh lap tawh a. Chutihrualin a pa zawk erawh chuan pangngai tak hian

" Bawiha, mihring hi khawvelah enkawl leh siamthat harsa ber kan ni a, chuti maiin I farnu khuan a tihsual leh suahsualna khu a sim thei in I ring emni. Naupang chhia a ni tawh lo lehnghal a, thla khat chhung lekin sual hi sim a, paih bo hlen theih a ni lo" a rawn ti ve a, mahse, Ramtea thung chu ala zam duh bik hauh lo mai. 

"Mahse pa, chhuah tir ila, ram dangah emaw kan awm tir daih anga, UTluangpuia nen pawh an inhmu thei tawh kher nang. An beidawng ve mao dawn alawm" ala rawn tih țalh takah chuan a pa khan no lo zetin ava melh ta ram ram phawt a. Ramtea chu a meng khup zui nghal duam mai. 

" Chu chu i rindan diktak nge i farnu I khawngaih lutuk na lamah chhuah tir dan I zawng zawk. Ka han hrilh ang che. Khu I farnu khuan e keini I nu leh pa te hi a kum Chuang fe min bum in min ti lungawi tawh lova, hremna nise a chikim in ka tawrh tir tawh. I hrelo emni, a school chawlh hlim ah pawh ram danga hnathawh sawi mawi in Kal a tum a, mahse, saw a bialpa leh bawk sawn lo thlem lungleng leh in a Kal loh phah leh a, tun hun hi kan thleng a nih hi hre ta che. Chuvang in nang chu lo ngawi tawp la, i nu nen engkim kan ti ang" a rawn ti leh ta nghek mai a, Ramtea tan chuan țawng luih ve na chi a ni tawh lo rneg reng. Engpawhnise, a unaunu chungah chuan eng pawi mah a thleng lo turah ngai chhin ang. 

A tuk zingah chuan a nu in tukthuan tur leh tui in tur a rawn pe ve leh ta a. Zochhuani chuan alo pawt khaw tlai leh te te phawt. 

" Nu, tunah hian thla thar ni engzat na nge ni tawh" lo tiin, a nu pawh khan tha takin alo chhang let ve Mai a. Thla thar ni 7na an hman mek thu a han hrilh chuan Zochhuani chu a meng phawk chiang ta hle. Reilote a ngawih leh det hnuah amah bawk chuan 

" Nu, ka thla bi neih hun hi a danglam dawn a nih loh chuan ka neih a hun tawh a, mahse," a tih laiin pawn a la ding rneg a nu khan

" Chuti chu i mamawh tur pads ka rawn dah ang" lo ti hman zuai in, Zochhuani zawk chuan rang em em hian

" Ni lo, ka thla bi neih hun a pel tawh a, ka nei thei lo zawk a ni! Chuan, englai pawh hian ka luak hi a chhuak reng a, ka khel nise a na thei em em bawk" a sawi zawh rualin a nu khan pawi tih hmel em em hian

" Chuan, I rai tih thu hi min hrilh I tum emni?" a rawn ti ve leh ta a. Zochhuani chuan zawi te in a rai a nih a rin thu chu alo sawi ve ta bawk. Chuveleh thawm chu reh zui hmiah in, rilru hah hmel fe a thaw hak ri hian a zui nghal a, a Fanu hi a rai a nih taktak vaih zawngin a pawi thui viau ang tih chu hriat sa, engtinnge a tih tak ang. Nu a nih angin a Fanu chungah hian mawhphurhna tamtak a neilo thei lo a, mahse, tihtheih a neilo. 

" I pa ka lo hrilh dawn nia" ti hul hak in a kalsan leh ta phawt a. Zochhuani mittui chu dan sen rual loh hian a rawn tla nghal ngiai ngiai reng bawk. Eng aiah nge hetiang vanduaina thuah thip hi a chungah a rawn thlen bik. Mi fate pawn an duh ber an nei thei a, phalsak nilo mahse an nei lui tho tho thjn. Ani hian engvangin nge a hmangaih leh duh ber chu a neih ve theih loh bik. Neih theih chu sqwi loh, ti khawp a hrehawm leh rapthlak hi a hmangaih tan khan a tawrh bik a țul miau si a, a thisenz zawm amah hringtu a nu leh pa hnen atanga hremna hmuh a tan chuan a rapthlak in a lulai deuh mah mah lo Maw le. Mahse, a tawrh tur a khuanu Ruat a nih si chuan a tuar chhuak ve Mai a ni ang chu. 

Unau hmel hai hun vel a ni tawh maithei. Tui taka alo muthilh ve barh barh lai chuan a tawmna kawngka bawk chu a rawn ri leh ta rawk rawk mai a, a harh deuh zawk thei nghe nghe. Tunge tih hriat tuma muangchang a a han thawh chhuah nak chuan a pa ngei mai kha thinrim tih hriat tak hian a rawn lang leh ta nawlh mai a. A hlauthawng tawh kher. Khum chunga lo awm, a Fanu bal leh sam thur em em, chak vak lo tih hriat taka zawi nguai a lo thu mek chu rawn pan hnai sawk sawk in a rawn beng thal leh ta țhuai mai a nih kha. 

" Pasal neilo in nau ka pai itia maw!? Tu fa nge? Kha zawng laktlak loh tak fa kha maw I Pai a? Ti tla turin ka nawr dawn lo che. Mahse, a piang lovang! He chhungkua hian mi laktlak loh fa a mamawh lo" ti hlawk hlawk in a Fanu sam chu a țham sak a, a thing kual nawk nawk a, chhuat char ah te chuan theh tlu in a chhir zui a, a pum ah kher kher a chhir sak zawt zawt bawk si a, Zochhuani chuan lo inven ve chu tum viau mahse a thei lo. A che hman meuh lo zawk. A rawl neih zawng zawng a au chhuak ve in a na ti lutuk chu a țe deuh ruai ruai reng bawk a, a pa chuan a sawisa hnehsawh hle. A landan ah mai chuan sawisak hlum hial pawh chu a hreh lo niin a lang tawh. 

A duhtawk a a sawisak zawh hnu chuan kal mai tum a inher in, chhuat chara let hlawm reng a Fanu thisen kai hnuang chu a zu melh leh ta hram a. 

" Hun rei tak chhung chu chaw leh tui I dawng lo ang. I awm awmin ilo awm tawh mai dawn nia" ti leh kher in a Chhuahsan a. Kawngka pawh chu pawn lam atang khan a kilh bet leh thlap bawk. 

Zochhuani na tuar rum ham ham thawm chuan khawi hmun mah a thleng ve lova, ngaihsak a enkawl tu a nei hek lova, a landan ah hi chuan hmangaih tu pawh neilo ang mai a ni tawh si. Thil pakhat tih sual vanga hetiang hremna hi tawrh zel tur a nih dawn chuan Khawvel sual takah hian awm ve tawh lo Mai a duh zawk ngei ang. 

" Nu, a na em mai min tanpui rawh" ama hriat tawk leka phun sep sep in Zochhuani taksa na leh khawsik in țham vel chu vawt tih vangin a khur hlak hlak reng tawh a. A tlun lo chauh tawh bawk. He a tawmna room ah hian puansin tur pakhat chauh chu hnutchhiah niin, chu pawh puan hlap pan tak mai a ni a, ani khawsik tlun hlawk hlawk tawh tan chuan a beitham in eng tihna mah a ni der silo. Nachhawkna damdawi mum pakhat takngial pawh pek a ni lova, tunah phei chuan chaw leh tui nise an hrek hmak a, pek phal a ni tawh lo. A hmabak chu thim hlir niin, thim in a hual vel a, a thih hun nghak in ala nung ve hram hram e a tihtheih ang chu. 

" Pa a, Zo-I kan hrem dan hi I duhtawk thei tawh mai lo emni? A sawi ang taktak a nau te hi alo pai a nih vaih chuan tuma hriat hma hian tih tlak sak ta law law ila, kan mualpho tam lo zawk bawk anga tihte ka lo ngaihtuah a" Nu Dingtei'n a rawn tih chuan Pu Zika khan a mut dan chu a han siamtha hmasa leh te te phawt a, a khuh zui kharh bawk. 

" Tih tlak chu a duh I ring tihna emni?" zawi thum sat a rawn ti ve in, Pi Dingtei thung chuan 

" A duh theihnan theih tawp kan chhuah ve ang chu" rawn tiin, an pa bawk chuan

" Nimahse la, khu hmun atanga lak chhuah kher khu chu țul ka ti lo a nia. Heng laiah thenawm hnai te an rawn tei lut ve zeuh zeuh reng a, a tih chi loh lutuk ringawt" rawn ti ve leh in, Pi Dingi pawh chuan tawngkaa chhang tawh lo hian a rum khum nghat a. An nupa chuan thil tamtak an ngaihtuah tih hriat tak hian inbe tawh silo in an mu meng kar reng ringawt a, țawng erawh an tum tawh hauh lo thung. 

Zing khua a rawn var a, ni chhuak eng mawi tak te chuan Zochhuani tan eng thil țha mah rawn her chhuahpui ve lo in satna a rawn keng tel thung a, Zochhuani erawh chu a tawmna ngaiah tihtheih nei silo in ala tawm ve tlawk tlawk reng. Hetih hun chhung zawng hian an thenawm khaw veng te pawn a awmna chin chu a chhungte hnenah zawhna lo nei ve thin mahse, a nu leh pa te kha chuan ram danga hnathawk tura a kal tawh thu in an lo chhang liam mai țhin a, nu leh pa te berin chutianga an chhan tawh miau chuan midang tan awih loh ngawt theih a ni lo. Hetiang hian a tih sual rah seng in khung beh a tawk mek ang tih hi tu pa fa mah hian an ring dawn lo. An ring lo hulhual zawk ang. 

Tichuan, an sawi lawk tawh ang ngeiin chumi ni atang chuan Pu Zika te nupa khan an Fanu chu thlem tinreng in an thlem țan ta a. Eitur nise an pe țha tan viau bawk. 

" Bawihpui, kan hmangaih che tih hi I hria tiraw?" a nu chuan a Fanu sam pheng leh pawr zet chu chul sak hliau hliau chungin a han ti țan ta a. Zochhuani pawh chu ngawi reng hian alo bu ve nghut nghut. 

" I nau pai lai hi tih tlak I duh em. I hremna hi a tawp hun tur hriat a ni silova, tun hi a tih tlak hunlai tak chu a nia, chuan, nula angin tunhma ang khan I awm leh thei dawn alawm" zaidam taka a han tih leh chuan mak tak hian Zochhuani thung chuan a lu chu alo thing zui ta nawk nawk mai a. Pi Dingtei pawh chu a meng phawk nghal hru thei. 

" Tinge I duh loh. I enkawl thei dawn emni. Engtinnge I enkawl theih anga" tlemin a aw ki pawh a vin ve lek lek țan. 

" Ka fa a lawm. Tih tlak ka phallo. Ka ti tla dawn lo" lo ti let nghut in a nu bulhnai atang chuan a tawlh sawn zui ta daih a. Melh pwh a melh duh hek lo

Chutah, a Fanu chu melh vang vang Chung hian a tho zui nghat a, Chang deuh fak in, 

" Awle, I thu thu alawm. Mahse hre rawh. Ka beidawng dawn lo a nia. I ti tla tho tho ang" ti nghat in a Chhuahsan a, a dan ngai te bawk in kawngka pawh kha an kilh bet zui leh ta thlap.

A nu chhuah fel rual chuan Zochhuani chu a țap zui nghal hawk thei a, khatiang thil tenawm ti tur khan engtinnge a hringtu nu hian a tih theih zawk a hrethiam lo. A thinrim a, a ten hluah hluah bawk. Tin, he nau te hi hrisel taka a pai chho zel thei a nih phawt chuan tih tlak a tum hek lo. A thih pui dawn a nih pawhin pawi a ti tawh lova, a thih pui țhak mai zawk tur a ni. Saw Khawvel țawp leh hneawm zetah chuan chhuah leh chakna pawh a nei tawh lo zo a, a thlahlel tawh hek lo. Ni e, chhuak leh pawhnise eng thil nge a tih ang. A hmangaih ber kiangah awm ve phal sak a ni miau lova, a tan chhuah leh hi a chakawm lem loh viau. 

" Ramte, lo ding lawk teh" Ramtea khaw lai leng chu tihpalh thil thu in Tluangpuia khan alo hmu fuh tlat. Chutia amah ko tu an awm takah chuan Ramtea ke pen pawh chu tawp chawt in a han leh hawi a, chuta Tluangpuia hmel ava hmuh thut takah chuan rang taka inher in a Kal chak ta sauh mai a, Tluangpuia pawh chuan rang em em hian a um zui nghal vat. Reiloteah um pha vat in, a kut chu ava vawn sak ta chawt bawk a, 

" Engvang in nge i tlan chhiat a, biak che ka duh a, engah nge min tlan chhiat San" tiin, a lungawi lo angreng khawp mai. Ramtea pawh chuan inthiam lohna nen Tluangpuia chu ngam leh ngam lo hian a han melh leh zauh thin a, Tluangpuia erawh kha chu tlemin a inthlah dul ta deuh.

" Ka tihpalh UTluangpui, ka hmanhmawh deuh hlek vang a nia" lo ti ve in, a hlauhthawnna lamah a aw te chu a khur lo chauh. 

" Ramte, I u Zochhuani hi Khawnge a awm tak vang vang a, eng vanga ngawi reng a min tlanbo san nge a nih le. A awmna tal chu min hrilh thei em" zaidam angreng taka rawn ti ve lej in, Ramtea zam chhe tawh lutuk khan a chil chu alo lem ri ve khalh thei. 

" Ka hrelo. E ka tih, au chu Singapore ah hnathawk turin a Kal daih a". A dang te chu a awk lo chauh tawh a ni ber e. A zam lutuk na lamah a thlan nise a tla Phang tawh bawk a. A in tal awk lo chauh tawh a ni. 

" Ava mak teh thut ve. A Kal dawn tih pawh a sawi ri ngai miah lo asin. Min lo haw viau zawk tihna nge le aw" ti nuah nuah in Ramtea a chelhna chu a thlah dul a, Ramtea pawh chu a thlun phelh ang par par in mahni in lam kawng ah chuan chak tak hian a pen zui ve ta hlawk hlwk bawk. 

Chumi chin chu hun te liam in Zochhuani pum pawh chuan hma a rawn hruai lian ve ta hle a, a hlimpui tawk a tling viau. Nia, a nu leh pa te thlemna atang khan tal chhuak in an beidawn san țhak a, 

" In thu thu a awm tura rawn chhuah leh ai chuan ka hmel ka hmuh theihna tur darthlalang lian tha tak min rawn chhawp sak zawk rawh u" alo ti heu mai bawk si nen, an ni chuan beidawnsan in tihian a duh dan ang ngei in darthlalang chu an dah sak a, an chhuah tir ta lo bawk. Tunah chuan midang reng reng hi mamawh tawh lo niin a inhria a, a pum chhunga awm mek nakin lawka lo piang tur a fa hian a ti hlim tawkin tu dang mah a ngai lem lo. A pian hma hawt hian a hmangaih tawh em em zawk a ni e. 

A fa lo piang tur hian tih hrehawm chang tamtak nei ve mahse amah ah chakna thar a thlen hnem hle thung a, hma hun a thlir thui in, a phur thar em em bawk a, naute hmel mawlh mai chu hmuh hlan nghakhkel in nitin zantin a dul kawh tak mai chu a chul hliau hliau reng a, a be pah reng bawk. 

Tuk khat erawh chu a nau Ramtea khan eitur rawn pe ve thung in, thu thin țhawng tak mai hi a rawn hrilh ta tlat. 

" U, țap miah suh aw" ti hmasa te te in Zochhuani thung chuan a nau thil sawi tur chu hriat loh hlau tak hian bang phen atang chuan uluk zetin alo ngaithla a, a beng te chu a dawh hnai hle. 

" Mama, sawi vat vat teh. Eng lampang nge" lo ti thuai in Chutah Ramtea chuan Tluangpuia boral thu chu a rawn hrilh ta mai a! Zochhuani chu a nghilh zui dup thei. Sawi tur hrelo chuan a ngawi ta reng ringwt a. A țap thei mai lo zawk. Chutia a ngawih tak reng avang chuan Ramtea kha rawn tawng chhuak lehin

"U, I țap em. Țap lo tiraw? Ka chho dawn aw.. Ilo ei teuh dawn nia" rawn ti leh in a kalsawn ta a. Zochhuani chu a țap zui hawk thei. 

A âwm a rawn hnawh ut ut tu chu chum dawt dawt in nasa fe hian a thaw chhuak leh hawk hawk thin a, a sawifiah thiam silo na lutuk chuan a rawn tuam zui ta hlup hlup mai. Tha zawi em emin a mutna lamah a tawlh ta hnak hnak a, a va mu zawi nghal hnawk thei. 

Tunah chuan a phurna te khan an kian san mek niin a hria a, chakna leh tha tho na reng reng a nei leh ta lo. A chuai țan mek a nih hi. 

A hmangaih hun hnuhnung takngial pawh hmang ve thei lo leh, a ruang dai takngial pawh kil ve thei lo a hremna dawng mek Zochhuani chuan eng thil mah a ei duh tawh lova, tui takngial pawhnise a kâ ah hian a lut thei hek lo. Chutianga chawlhkar hnih Chuang zet a Khawsak hnu chuan a taksa pawh in alo tuar ve hle ni tur a ni, a pum chhunga nau insiam mek, hrisel lo sa em em chuan a lo tuar em em mai hi alo ni a. A pum chu rawn na vak in, thisen a hloh nual a, a luak nghek nghek reng bawk a, reilote ah nau a chhiat zui cju a ni ta der. Buaipui tu neilo, mahni mai a inbuai a nihna ah a talbuai em em reng a, a hlau takzet bawk a. A lusun mangang talbuai sa tawh nen chutia nau lehzel a han chhiat takah chuan tuar thiamlo zualin a Keh chhe vek tawh a. A dam ve reng hian chhan nei pawhin a hre tawh lo. 

A nau chhiatna thisen chhuak kawi nuaih karah chuan țhu in a țap hlawp hlawp reng a, a rual deuh thaw a a hmangaih pahnih a chan ta Mai chuan a nun dan hloh tir vek in, mi â ang mai hian a khawsa zui a, a khât tawk hian a ngaihtuahna kawm in a țhu ngawi leh vung vung thin a, a nui chhuak leh hawk hawk thin bawk. Tunah chuan mi ang lo diktak a lo ni ta. 

Chung lam a khawsa a nu chuan a nau chhiat thu a hriat rual in, nu a nihna ah a fanu chu a lainat ve ta deuh a ni chek ang chu. Lak chhuah tum in a bei țan ta a. Mahse, a hautak hle. 

" Ka nu, Khawvel chen a nuam ka tih em em lai leh ka thlakhlelh ve chhung zawng khan Helai hmun hrehawm leh thim em em, hmun țawp takah hian khung beh niin, dah bo ka ni a, zalenna ka nei thei hek lo. Tunah chuan ka hmangaih hmasa ber in min boral san a, beisei tur ka nei tawh silo a, ani nen a kan fa piang mai tur lahin min kalsan leh ta bawk si, ka tan chuan eng thil mah hi thlakhlelh a beisei tur a awm ta lo bawk a, hetah hian ka thih hun nghak in ka awm mai a nge. Ngaihtuah ka ngai lo. Ka thih a, ka nunna a tawp rual in kei chu ka dam ang. Ka dam hlen hmak zawk ang. Min thlem buai duh tawh suh u"  tia lo chhang in, an ni chuan an Fanu tawngkam leh che zia mawlh chu an han thlir a, beisei tur nei tawhin an inhre lo. Fanu neilo ang mai a khawsa in Fanu neilo ang bawk in an Khawsak alo țul ta a ni. 

Hringnun chu a kal ngai rengin kal mahse, Zochhuani te chhungkua erawh chuan ngai an awh leh tawh ngai lova, tunhma a an khaw tleirawl hmeltha leh nula hmeltha tak la ni mai tur an Fanu khan hma lam pan thei tawh lo in tunah chuan mi pangngai a pha ta silova, chutihrual chuan Pa  ber Pu Zika kha a hriselna a tla hniam ve zel a, chu chhungkuaah chuan lungngaihna leh tahna in thla a zar mek a ni ta ber e. 

Zai rat rat chungin a sam sei leh bawr chhawr tak chu a zut pah delh delh reng a, darthlalang chhunga alo lang ama hmel, hmel tih tlak pawh ni tawh lo khawp a sawr bawl leh hliam ser hlir in a tuam khah chu en in, ala zai pah rat rat reng tho a. Chutah, a zai lai chu tawp in a ngawi zui ta vang vang mai. A tawpah chuan eng thil nge a ngaihtuah tih pawh hriat lou hian a rawn nui chhuak ta sak a. 

****************************************************