DEAR AMY SEASON 2 EPISODE 5 LAST

 DEAR AMY SEASON 2 EPISODE 5 LAST

Vanlalpeki Fanai

*****************

A phone rawn ri leh ral ral thin avang chuan Zorinpuii mu tui lai pawh chu a tho chhuak zawk thei a. Tukin chu kai tho tu dang neilo in a phone ri zawkin a ti harh ve tlat. A phone chu rang taka en nghal in, a hriat ngai loh number atang alo ni teh daih a, a pick ta vat. Mahse, lehlam atang chuan hmanhmawh hmel fe hian nutling pakhat aw hian

" Zorinpuii thlarau be thei kha ini em le aw?" a rawn ti ta heu mai a. A phu zawk nghe nghe. A nihna hi mi tamtak hriat a tan a duh ve lova, a mamawh tute tan a hman chhuah theih chuan a duhtawk viau thin.

" A ka pi, be thei tih ah khan chutiang in thlarau nazwwng ka hmu in ka be bik lo asin. Min rawn pan tute tih loh hi chu a hranpa in ka kawm ngai miah lo" alo ti zui ta nawk nawk a. Mahse,

" Chupawh chu lo nise i hmu thei a I be thei tho a nih chu. Kan mamawh che a ni nula. Kan mamawh takzet che. Engtikah nge i hmuh theih anng" rawn ti lehzel in, Zorinpuii chu a ner deuh nang nang thei a. A peih lo takzet. Hemite hian thlarau ko chhuak thei a ni emaw an ti nge le. A mak thei e.

A khum sir chhuata la mu reng Amy chu tlawh tho sawk in, a phone chu loudspeaker ah a dah zui nghal bawk a. Amy pawhin a lo ngaithla ve ta kar.

" Ih ka pi, in duh phawt chuan hun chu ka nei thei reng a, mahse, thlarau ko chhuak thei ka nilo tih erawh chu min lo hriat sak ula maw. Ka sawi tawh ang khan amah zawkin min rawn pan tawp a nih loh chuan ka tan a harsa ve a" ti leh in, lehlam ami chu rilru hah hmel fe hian alo chek deuh hlak phawt a. Mahse,

" inbe hrim hrim teh ang" a rawn tih tak tlat avang chuan Zorinpuii pawhin a hnial duh ta lem lo thung. Call an dah rual rualin Amy kha a melh nghal ngawt ngawt a. Ani lah chuan meng val pup Chung hian alo melh ve reng ringawt.

" Eng nge khatia mi en reng" Zorinpuii'n a han tih chuan pakhat i chu alo in thing deuh nawk nawk phawt a. A harh hawk nghe nghe.

" A hming zawh tur che lawm. Tunge a nih, an eng nge a nih tih te pawh lo zawt la țha tur" Amy'n a rawn tih chuan Zorini chu a chek leh hlak thin a.

" Hetiang a min rawn dawr tu hi ka vawikhat tawnna a nia. Lo dawnsawn dan ka hrelo hlawm tawp" lo ti let ve in, Amy chuan sawi dik a ti ve tho bawk a. Chhan let ngaihna tak pawh a hre tawh lo e.

Tukthuan ei fel hnu in inhmuhna hmun tura a rawn sawi Hotel Lar ve tak pakhat lam chu Amy nen chuan an pan dun ta vang vang a. A huphurh a ni. Engtinnge hetiang mi hi a ni tih an rawn hriat theih zawk. Tu in nge hrilh ang tih te mai mai chu rilru a inzawt in a ruk chuan a buai map map viau a, a peihlo lawk takzet. Bansan thut te pawh a duh rum rum thei hial a ni e.

Hotel chhung an lut a, counter bul lawkah chuan hmeichhe pakhat, hmai tlang hriam leh thin chhiat hmel em em mai hi thu neih hmel fahran in alo ding hawi ve vang vang tih chu an va hmu ta a. Chu nu ngei chu amah rawn be tu kha a nih hmel bawk. Chutah, Zorini hmel a rawn hmuh rual chuan peih lo Chung chunga rawn nui lui vei sak Chung hian

" Zorinpuii.. Ini ang chu maw" tiin a kut chu a rawn phar chhuak nghal a. Zorini pawhin buk nghat nghat pah in a kut chu alo chibai sak ta thuai.

" Lo Kal rawh. Room ruak lamah eng thawl deuh in han inbia ang hmiang. Sawi tur pawh Kan lo nei nual maithei asin" a tih leh takah chuan  hotel Chhawng Chung lamah an inzui chho dun ta a. An hnungah ngawi reng in Amy khan alo zui ve pah zel bawk.

Chu hotel room ruak lian leh thianghlim tak chhungah chuan lut in, amah lo nghak tu nutling chu khum thianghlim tak chungah chuan a han thu zui ta vat a. Zorini chu thu ve turin a hrilh nghal vat bawk.

" I lo kalna lamah te i chau awm sia, coffee nge i duh ang thingpui" rawn ti hmasa leh in, phone atanga an inbiak lai nen kha chuan danglam a ti tawh kher a. A zaidam hmel takzet tawh.

" Aih ka chak rih lo e. Tui sik awm se ka duh zawk mah a" alo ti liam ve puat. Tui pawh chu a in chak tak tak em tih pawh a hre bik Chuang lo. Mi tihdan a hria a, a sawi ve Mai Mai a ni.

" Awle. Engpawhnise ka hming chu Roluahpuii a ni a, he hotel neitu te fa mo hi ka ni bawk. Ah, han sawi tawp mai Ila, he hotel hi ka pasal pa, Rimawia din leh sak kha a ni a, bultan tu pawh amah tho a ni. Chutah chuan ka pasal nen hian nasa takin Kan pui bawm ve a, tha kan thawh a, thlan tui farin engkimah Kan a țul țul Kan tih pui bawk a, chuvang chuan hei hi chu a boral tak hnu hian Kan Chan ve turah Kan lo dah hmin hmak a, mahse, ka pa khan a boral dawn ni thlengin eng chungchang mah a sawi ri ta lova, tu ta tur nge tih leh tunge nei dawn tih kha a sawi chhuak hauh lo. Rosem na lehkha nise hmuh tur pakhatmah a awm bawk silo a, ukil te pawh Kan ruai ve thlap tho chuti Chung pawh chuan a beidawn thlak takzet a ni. Chuvang chuan amah be thei tu hi kan mamawh ta ber chu a ni a, I hrethiam anga, thil pangngai a nih loh zia chu. Nuih te pawh hi a za duh zawk. Movie velah te chuan thlarau be thei ang chi te cju an awm teh meuh mai mahse, a takah, kan hmuh phak ah ngei hian an awm hi ka ring lo lutuk a, tihian mi rintlak tak hnen atang in nang hi kan rawn zawng hmu thei ta che a. A mak zawk. A vanneihthlak bawk si. Ihmaw nula, he thil ah hian min pui thei a, thil hi a nih dan tur ang thlap a a Kal thei a nih chuan lawmman te pawh pek che Kan in huam a nia. I in chhiarna zat te min han hrilh la tiraw? " rawn ti duah in Zorinpuii chu alo khap deuh fak fak reng a. Chhan ngaihna a hrelo kher.

" Ahhhhh ka pi, chutiang in rate ka nei hleinem. Puih ngai an awm hian ka pui mai a, pawisa leh lawmman ka phut ngailo. Ka la ngailo hrim hrim bawk. An dikna chanvo hmu se, Thlamuang takin heng thlarau te hi chawl se tih hi ka duh a nimai

A bak ka duh lem lo" a rawn tih chuan Pi Puii chu alo nui deuh var var reng a. A bu leh nghat thin.

" Um eng pawh chu nise, hma chu min han laksak phawt Mai la tiraw. Kan lawm dawn em mai" rawn ti leh in Zorini pawhin a theih tawp alo chhuah tur thu chu a han sawi ve a, engtinnge a tih ang a hre Mai bik lo. Amy hi a hman tangkai leh hle a țul dawn tih chiah a hria.

Hotel an Chhuahsan hnuah Amy chu thlarau putar, a hming pawh Rimawia tih chu zawng nghal char char turin a han ti ngawt a. Amy alo ner nasa.

" Hun ka mamawh dawn tih hi hre ve ta che. Anmahni thu a min rawn pan a nih loh chuan chutin awm hmun atang ka hre vek bik hleinem" alo ti let hlak hlak a. A ke te chu a theihpatawp a zau hian a pen ve hlawk hlawk bawk.

" Țum dangah pawh maksak deuh deuh i rawn hruai nawlh nawlh zel kha. I tan a harsa vak dawn emni" alo tih chuan Amy a lungawi lo kher.

" Min mamawh a min zawngtu ve tho an nih loh chuan hmuh mai hi an harsa a nia aw. Um engpawh ni rawh se, zanah ka vak chhuak anga, ka hmu thei mai turah ngai ang. Ala thar hmel bwk a" " alo ti ve leh a. Zorini chu a dawr ah Kal tlang in, Amy erawh a peng bo zui ta daih. An in ngaihsak zui tawh lem lo.

Hun engemaw chen hnuah Sangpuia pawh a Bialnu Zorini hmu turin dawrah a rawn leng ve leh tawh a. Eitur ala rawn keng teuh zui.

" Ka maite, ilo dam țha zel maw.. Lunglei chu a nuam em" rawn ti lut hlut in, Zorini Zak lah chu alo Sen deuh țan țan reng a, a hnathawk chhawr a nau te kha va melh zuk zuk Chung hian lei lam a bih leh ngar ngar thin bawk.

" Khatiang khan midang awm laiin min ko ve ziah suh. A zahthlak" alo tih chuan Sangpuia a nui deuh hak hak reng a. A zahna chu ho a tih hmel kher.

 " Ka zin chhuak leh tep a hna thil ah. Nangmah hmu lova Kal bo daih chu tiin ka rawn kal zuai. Zanah kan thlawk chhuak ang" a rawn tih leh chuan Zorini chu alo meng phawk hra thei a. A phalloh hmel viau.

" Iva zin ngun em em. I cham rei dawn em" lo ti nghal vat in Sangpuia chuan a cham rei loh tur thu alo sawi vat bawk a. Chumi tlai chu zan riah ei chhuak dun turin an chhuak dun leh ta nge nge e.

Pu Chuauthangpuia sawi dan takah, Zorinpuii hi chu in chhungah hian hmuh tur a awm hman meuh lo a ni e.

Zan riah ei tura a chhuak kha zan dar 7 velah in alo thleng leh chauh a, Amy chu hmuh tur alo la awm hauh lo zui. Inthlak sawk sawk in inbual fai tur chuan bathroom a pan leh ta vat a. Bathroom atanga a rawn chhuah leh meuh chuan Amy pawh kha khum chungah alo mu ve ar ar tawh mai. A chauh hmel phian lehnghal.

" Awi awi awi Kan thlarau thla tliak-i chu le(h)! Iva han chau awm em em bawk ve mawle. Khawnge Iva Kal a"  fiam pah ti tih a Zorinpuiin a rawn biak chuan Amy chu alo meng dur țha khap khap hle a.

" Zorinpui" rawn ti ram hmak in, khum chu a thawhsan thuai a. A chauh ve hmel taktak viau a ni.

"Thlarau putar ka zawng mawle. A vâng pherh hrep lehnghal a. Ka la hmu zo lo zui" a rawn tih leh chuan Zorini chu alo thaw deuh hak. He case chu a khirh phian dwn niin a hria a, a peih lo nghal sa hle.  A lehlam ah, Pu Rimawia chhungte lah khan a khât tawk hian Zorini chu an lo call ve chhen twh mai bawk si a, a nun hi nuam ti tak leh eng thawl taka hmanna hun a nei ve thei meuh lo a ni e. Mi nunah a buai a țul Chang a awm, mi chhungkaw buaina ah a inrawlh ve fo a țul chang a awm bawk a. A Chang phei chuan eng hi nge a Dam chhan ni ve ang tih te a ngaihtuah chhuak hlawl hlawl thin a, a chunga Pathian Remruat dan ah pahw hian vui Chang a ngah ve ta khawp mai. Mahse le, amah leh Khawvel siamtu Pathian hian hetiang thil, mite tana malsawmna thlen tu ni thei tura alo duang ve erawh hi chu lawmawm a tih chang a tam fo bawk. A chunga thil thleng te hi a chhungte pawhin an hriat chhuah hun ala amw ve ngei dawn a. Chung hunah chuan engtinnge chhanna a pek tak ang. A in sawifiah zo ngut a ngem. An pawmpui ve ang nge, an do zawk dawn. Tunah rih chuan engmah hi a hrethiam thei lo chu a ni phawt a.

Zan khat erawh chu inkhawm tura alo insiam ve lai takin Amy kha hmanhmawh fe hian roomah chuan a tlan lut hlawk hlawk a. Zorini chuan alo ngaihven vat.

" Ka hmu tawh e. Putar thlarau chu ka hmu ta hram e" rawn ti hlawp hlawp in, a phur hmel kher lehnghal a. Zorini chu alo meng phawk hrû.

" A nih chuan Khawnge amah chu" lo to nghal vat in Amy bawk chuan

" Zanah hetah a rawn Kal ang. Alo Kal hun tur erawh chu a sawi chiang theilo a, mahse zanin ah alo Kal dawn" lo ti leh nawk nawk in, ala thaw hliam hliam reng a. A hah ve hle a nih hmel e.

" A that chu. A thuhrim in tunlai hi Iva chau chhe thei em em ve a. Eng nge thil awmzia" chu zawhna a han dawn takah chuan Amy chu a ngawi zui kar mai.

Mahse, a ngawi rei hauh lo.

" Eng lo a nia. Tunlai chu kan thawh rim deuh bakah keimah hi mahni nihna theihnghilh a nangmahni ang maia awm ve ka lo tum leh țhin a" Inthlahrun hmel deuh hian Zorini chu a rawn melh ralh ralh thin a. A thil sawi awmzia chu Zorini'n a hrethiam hauh lo Mai.

" Eng nge sawi i tum a" rawn ti lehin

" Thlarau anga khawsa lo in mihring ang maiin ka lo awm leh țhin a. Aa hetia ka vah chhuah te hian hmun hla taktak ah ke hlir in ka kal a, Kal hah kher ngailo pawn ka kal thei reng tih chu hre tho mah Ila, mihring zinga tal tam ta na na na chu mihring emqw ka lo inti leh țhin alawm le" a rawn ti leh ta a. Zorini alo nui chhuak leh hawk.

" Mihring chu ini thin ngei alawm. Pawi hleinem tikhan exercise țha tak tihna a nimai a. I in fit tulh tulh mai ang" nuih hak hak Pah a ti leh in a inkhawmna bag a khai lawk a. A Chhuahsan zui ta vang vang.

" Kan Zorinpuii hi chu ah. Suaksual thei leh lutuk" ti nuah nuah jn khumah chuan alo mu zui lej ta ar ar a. Chutia Thlamuang taka alo mut dar dar lai chuan room kawngka kha rawn in theh hawng thut in, khuma mu Amy chu a phu zuang tho zawk thei. Zorini bawk kha a rawn let leh ta emaw tih laiin a nu leh pa te zawk chu an rawn lang ta heu mai a. A thin hi alo phu zui ve dup dup.

" Aw tun lawk pawh khan biak chu a neih ngei kha. Phone a hmang in ka hre bawk silo a" Pi Rinfeli'n a tih nuah nuah laiin A pasal zawk chuan room chhung la en kual vut vut Chung hian

" Nia, Mami hi tihian amah in a phun leh nuah nuah zel Mai a. Dik lohna a nei nge maw ni. Entir chu ala ngai dawn tlat niin ka hria. Han bia Ila a pangngai leh fu zel bawk si a, thil awmzia hi ka hre lo khawp mai" alo ti ve zung zung a. An Fanu room chhung ah eng thil danglam mah an hmuh tak siloh ah chuan beidawng in an chhuak ve leh mai a. Amy chu alo thaw ve hawk hawk mai. Nia, ani jn hetiang a Zorini a Chen chilh zel dawn a nih si chuan nakin lawkah a nu leh pa te hian man chhuah hun an la nei ngei dawn in a hriat a. Mahse, chuti mai a awlsam in Ani hi a kalsan theih a rjng silo. Kalsan lah a duh Chuang bawk hek lo. Hma hun chu anni pahnih kutah nilo in, chunglam thu ni rih rawh se.

Inkhawm ban hun tawh ah pawh Zorini chuan rawn haw tih reng reng a nei thei ta lova, Amy rilru chu a hah tawh kher. Dar nise a hma tawh silo a, inleng a neih tur thu kha a sawi lawk vek asin le, kan Zorinpuii hrep pawh hi ah. A hnaah hian a rilru a pe hlawllo a nih ber hi.

Zan dar 10 velah chuan Amy pawh amah chauh in a hawi a hawi tawh a. Zorinpuii lo haw hun nghak chuan balcony ah a ring a fan leh uak uak thin. Eng em em chu va tii ang maw, tih ngaihtuah a alo la haw kual reng lai chuan thawm danglam a hre ta a. A phu ve zuk. Room chhung lam chu va dak lut in, Zorinpuii khum hnuai atang chuan thawm a rawn chhuak thin tih a hre ta chiah a, mak a ti viau mai. A nihna takah chuan Zorini khum hnuai chhuat chu rawn tawn tlang tum an awm tih a hriat theih a, a ri dup dup reng. Chutah, chutia ngawi renga alo melh vang vang lai chuan khum hnuai atang ngei mai khan thlarau pakhat hi a rawn dawk chho ta zawk mai a le! Amy takngial pawh chu a phu zuang ve zawk mai. Mahse, chu thlarau chu nasa taka an zawn putar Pu Rimawia thlarau ngei kha a ni tih a hriat chian hnu chuan tlemin a hlauhna pawh a zia leh deuh a. Mahse, ava hnaih mai ngam lo thung.

Chu thlarau putar sang țha tak leh cher em em, hmel hmai dawl dang vek bawk si chu han hmuh thut atan zawng a duhawm loh ve chiang em a ni. Zi kual uan uan Chung hian room zau tak chhungah chuan a han hawi kual hmasa leh te te phawt a, a hmel dang bel bul chu thuhran, a hawi her leh mitmeng engkim mai te chu an nelawm loh takzet hi a nimai a, a mit khur a thuk in, a meng thip em em mai bawk si, Amy takngial pawh chuan a hnaih țha ngam chiah lo chu a ni e.

" Khawnge min hmuh tum a min zawng tu chu" rawn ti thum huk in, Amy chu alo khur chhe lo chauh tawh nia! Engvang a he thlarau hi hlau a ngaina lo tlat nge maw a nih le. A ti na tih pawh ni hlei lo. Chutihlai chuan hnuai lamah Zorini leh pi Rinfeli inbe thawm a hre ta a, a thaw deuh sawng sawng thei. Zorini thawm a hriat atanga reilote ah a hmel chu hmuh tur rawn awm in, room chhung a rawn luh rual chuan kha thlarau putar lah khan aw ngaihnobei lo zet hian

" Min ko a, hun Iva vawng dik lo ve" thim zing atang chuan a rawn ti thum ta chhur chhur mai a, Zorinpuii room rawn lut chiah pawh chu a phu nasa ve ta kher. Hawi kual nghal sawk sawk jn Parda in zar thim kara thlarau pakhat lo ding reng chu ava hmu ta a, Amy kha a mitmei leh zawk. Ani chuan hrethiam tak hian

" Pu Rimawia kha a nia. I rei lutuk a Kan lo nghak char char tawh che alawm" felfai taka alo tih chuan Zorini pawh a pangngai zui ve thei ta hram.

" Nia, inkhawm ban rual khan KTP fellowship an ti leh tlat a, haw daih kha chu a nuam chiah silo a, duh ai ka rawn tlai ta a ni" ti zung zung in putar pwh chu a hmaizah tawh lo. A thawmhnaw hak lai te chu a hlip sawt Sawt a. A thlan hliam mai bawk si nen a la chauh hmel fu.

" KTP tih te chu, a nei nung fate active na tawk lek alawm" kha putar lah khan ala rawn ti bauh zui a. Zorini te thian dun chu an lo inmelh leh ralh thin ringawt.

" Taktak, Helai hmuna min koh chhan chu han sawi tawh la. Min star vang chu a ni lo phawt anga" ti thum dut in, thim tham karah chuan amah in a nui leh kur kur thin a. Tlem in Amy pawh kha a awm chu a lo nuam ve ta deuh hlek. A damlai pawhin he putar hi chuan fiamthu a duh ve hle a ring ta zawk a, putar tawng tam lo leh, a țawng chhuah chhun a nuihzatthlak thei deuh a nih pawh a ring.

" Nia ka pu, pawi itih loh chuan hetah lo chhuak phei ve la. Star dawn che pawn I hmel a hmuh theih tlat loh a lawm" thiam takin Zorini chuan a han chhaih kual hmasa leh te te phawt a. Amy nuih kha alo za ngang mai. Tichuan, Zorini sawi ang ngeiin Pu Rimawia pawh chu eng chinah chuan a rawn chhuak phei ve ta nge nge a, Zorini khan uluk zet hian alo en deuh ngar ngar.

" Ti daih ila ka pu, I boral lai khan kum engzat vel nge inih ang le" Zorini bawk chuan rqwn ti leh in, putar chu alo khuh ve khak khak reng thung a.

" Kumin kum tir a boral kha ka nia e, kan thla hman mek chawlh kar thar ah khian kum 90 ka ni ve tawh dawn a. Ka nang hman ta lo a nih ber hi" a rawn ti ve leh chuar chuar a. Amy kha chuan alo khawngaih leh daih tawh. Mahni piancham pawh nang hman lova nunna thlah tu te hi a lainat zual riau zel.

" Aw a nih chu. I chhungte tan chuan i uiawm in I ngaihawm dawn mange aw" Zorini'n a han ti leh chiah chu kha putar khan vin angreng fe hian

" A teuh lo mai. Ka chhungte chanchin min sawi pui dawn a nih chuan ka kal zwk a nge. An ni khan kei hi mjn hmangaihna an neilo. An nei hauh lo!" thinrim taka ti buan buan in amah chu thawklehkhat ah a bi bo zui ta daih bawk a. Amy leh Zorini te chu an hawi hai zui nasa teh e. Chu lai hmun leh a chhehvel ah chuan rang takin zawng kual nghal mai Sela hmuh tur a awm zui hauh lova, a manganthlak tak meuh. Engtinnge a chhungte hnenah khan chhanna a pek leh tak ang tih pawh a hrethiam tawh lo a ni e.

" A khirh dawn hle mai ka tih kha Amy" thaw deuh ham ham chunga a rawn tih chuan Amy pawh khan tihnghaihna tak alo hre bik lo. A chal dawm meuh in chhuar chungah chuan a thu kun ve lâp a, sawi tur ber pawh a hre tawh lo.

" Mahse, beidawng lo phawt ang. Bul kan țan chauh alawm le. A theih hram chuan han zawn hmuh leh tum la, lo hruai leh hram rawh aw" Zorini bawk in a rawn tih leh chuan amah pawh chu rqwn melh tawh lo hian a lu chauh alo bu ve ta nghat nghat ringawt a.

A tuk zingah chuan a rin ang ngei ngeiin Pu Rimawia fate ho khan Zorini chu chanchin an rawn zawt leh ta reng a. Chhanna pek harsa a ti kher. Mahse, dawt phuahchawp sawi ai chuan tiin an pa ber tawngkam kha a nih ang angin a hrilh ve ta ngawt zawk a. Amah rawn be tu ber Pi Roluahpuii pawh kha a thaw ve hawk thei.

" Ka pa chu khatiang khan min ti fo thin a. A nihna takah chuan ka chungte rel leh sawi chhiat thu Chang lo se, keini nupa hian ka nu awm loh hnuah pawh Kan awmpui chawt a, kan enkawl a. A damloh lai zawng zawng pawhin phut let neih vang ni hauh lo in Kan tuam hlawm a, damdawiin ah nise hun neilo Chung chungin Kan awmpui bawk. Kha tih lai khan ama fa hrin ngei ten a laka tawngkam an thlah dan kha amah hrilh ni ngat Ila chuan hetianga buai buai ngai lo hian ro chungchang ah pawh a rilru a Siam fel nghal vek nimai tur. Ka pasal tih loh a fa dang te khan " A ro pakhat pawh hi min sem phal dawn Chuang lova Kan enkawl hah peih lo ka pa chu a buaithlak em mai" tiin tawngkam kha an nei fo tjin a. A hre ve lo Mai zawk a ni e. Chubakah a damloh zual tak tak lai kha a nih avangin ka hrilh hre duh lova, a na zual lutuk ang tih ka hlau a, ka veng thawng a, amah leh a fate Khawsak dan khan vawi tam min vel țap in, ka pa vang hian mittui pawh ka seng hnem asin. Min hringtu diktak zawk te aia ka hmangaih loh bikna ka hre lova, a hrethiam duh tlat lo a ni. Amah hi pa inti mipa ve chi tak leh luhlul em em a ni a. Chutihrualin, a rilru erawh a zau a a țha leh em em lawi a. Fiamthu nise a duh ve viau bawk. Pa cheng vawng tak leh che fel tak a ni a, ruihtheihthil ah a fihlim in in chhung khurah pawh a tawh khirh ve thin viau. Kha tak kha a fa dang te chuan an ngai thei lova, amah hlat phah nan leh thlauhthlak nan tak an hmang bawk a, an thatna duh tu an pa chu a rosum chiah duh ve in an hmangaih lo ka ti ve thlawt a ni. Diktak chuan e Zorin, tunah hian keini nupa hian ka pa ro zawng zawng kha Kan it a ni hauh lo. Chang lo hlawm tawp mah Ila vui vaina Kan nei hek lo. Mahse, felfai takin engkim hi dah se la, a neitu tur diktak kutah awm bawk Sela buaina hi tawp se tih Kan duh. Tunah hian fa u ber Kan nih angin Kan enkawl chu a ni mai a, mahse, thu neihna tam zawk erawh a fa dang te hian an la rawn nei ve fo bawk si. Hei hian rilru nghet min neih tir thei lova, awmdan tur Kan hrelo a ni. Hei vang hi a nia ka pa kha biak tawng ngei ngei Kan duh nachhan chu. I hrethiam tawh ang tiraw. Ka insawi fel a ka insawi khawngaihthlak tihna ah min lo ngaihsak lo la, khawngaih pawh Kan mamawh lemlo e Pathian zarah, ka pa ro tello pawh hian Kan nupa in hlawh țha tak ve ve nei Kan ni a Kan khawsa thei lutuk alawm. Mahse, kan buaina hi I hrethiam ve tho ang chu tiraw? A tawp thlengin min han pui ta che. Kei hian ka pa rauthla kha hmu ve thei ni ngat Ila chuan ka sawi pui thei em em ang. A mizia Ila hrechiang dawn lova, han nghak det la biak dan i hrethiam chho mai ang"  Pi Roluahpuii'n a rawn tih tak duah ah chuan Zorinpuii pawhin thil awmzia chu a hma ai mah khan a hre fiah leh zawk a, phurna chhete chu a nei ve leh ta deuh e. Phone a dah rual rualin Amy awmna a zawng nghal a. Ani chu inhnuai bathlar ah lunglen hmel em em hian alo hawi ve vang vang reng a, a nuih ta sak ringawt.

" Amy, a tawp nan Pu Rimawia kha zawn hmuh leh han tum la. Ka lo be leh ang chu. Tunah khan a monu nen Kan inbe zo chiah a, thil engkim nih dan a rawn sawifiah vek a, amah an pa ber pawh hi a dik tawk lo ve maithei" a sawi laklawh laiin Amy chuan a rawn ti tawp ta vat a.

" Ka lo hre vek tawh e. Nizan khan ka hmu tlang vek tawh alawm. Rawn be tu che a monu kja Mifel leh țha tak a ni a a pasal pawh chutiang tho chu. Pu Rimawia hi pa tawh khirh leh fek fawn tak nimahse pa khawngaihthlak tak a nihna lai a awm. A fa naupang lam ho hian an hmangaih hlawl lova, a ro chungchang ah pawh vawitam thah tumin an lo veh ru tawh bawk. Mahse, a fa upa ber te nupa hian an chhanhim leh hman hram thin a, chu erawh chu amah ber hian a hre lo thung. Ni e, engpawhnise, hmuh leh chu han tum Ila, a ngawh ngawl ve si a, a ngaithla duh ngut a nge maw" lo ti ve zung zung in Zorini chu a harh chiang lehzual hawk a tihtheih ang chu. Tin, Pu Rimawia pawh chu biak a duhna a zual ta sauh sauh bawk a ni.

Chutihrualin amah Rimawia ber mai chu hmuh tur a vâng Sawt em em a, zawn hmuh a harsa hrep.

Pu Rimawia  zawn hna chu Amy kutah dah in ani thung chuan a Nitin hna a thawk a, awmdan phung pangngai in a nung bawk a a chhungte pahw khan rinhlelhna hranpa an nei leh tawh lo. Tin, zawhna a dawng hek lo bawk.

Sangpuia zin pawh kha lo haw ve tawh in, a Bialnu țuanna lamah a rawn lawr ngun leh tawh hle a. Tun țum a zin lo haw phei chu inneih thu te a rawn sawi lang ve ta zuk zuk mai nia. Mahse, Zorinpuii zawk hian pasal neih a chhungkua han din hluai tur chuan in peih ala inti chiah lo deuh a, a chak hran lo hle. Chutihrualin Sangpuia hi a hmangaih em em a, hloh leh pawh a tum lo bur. Amah hmangaih a, hman tangkai tum ve lo tu leh hrethiam em em tu a nihna ah hian kalsan a tum lova, thlah a tum lo hi a ni bûr mai. Chu chu thil nih dan nimahse, pasal han neih em erawh chu ala zuam Chuang silova, pasal lo nei ta se engtinnge tuna a hnathawh thin te hi a chhunzawm theih tak ang. Sangpuia chuan a hrethiam dawn lutuk tih chu a hre tho. Chu ringawt chu innghahna a tan a tlak dawn Chuang silo. A.. Eng ti zawng pawn pasal neih chu ala rem theilo tih a hrechiang. Chuvang in Sangpuia pawh inneih lam thu chu ala sawi thui pui duh ta chiah lova, a hnial bûr lem lo thung. Hetih lai hian a chhungte chuan hriatpui ve ni ngat se zawng, a rang a rangin pasal chu an neih tir anga, hmeichhe pangngai ang thlap in awm se an duh zawk ngei ang. Ni e, tunah chuan tlangval ang maiin a khawsa a, inah nise hmuh tur a awm ngai bawk silo. Hauh nise a haw em em reng mai bawk si a, a lakah hian a nu leh pa te pawn thu rum tak tak an nei țha ngam tawh lova, en liam tawp Chang an ngah ta hle a ni.

Van boruak zau țha  taka arsi pe tuarh leh thla bial eng kung mai te chuan eng boruak țha lo mah rawn thlen dawn hauh lo mahse la, awm nuam lo ru veng veng Chung si hian Zorinpuii chuan van lam chu a thlir chho char char tho a.  Eng ber nge a ngaihtuah tih pawh a inhriat loh lai tak chuan thil mak a han hmu ta. A thlir reng na van Chung sang lamah chuan  hlimthla mak tak hi rawn lang in zau tak hian a inrin kual zui ruih a. Tun maia arsi leh thla te pawh kha bi bo nghal in hlauh nei ang mai hian an bo zui diak a, van boruak ah chuan hmuh tur reng reng an awm ta hauh lo. Chutia thil thlen dan makti taka alo en reng lai chuan a van Chung sang atang bawk khan van ruah tui ni silo thil engemaw tak hi a rawn Sur zui ta seng seng mai a nih chu. A tam tulh tulh a, nakinah phei chuan ruah tam tak rawn Sur ang mai hian a ri ve ta hum hum a, eng thil chiah nge a nih hriat fiah tum in ani chuan a kut chu va dawh chhin in, chu thil zet chu ruah aw zawng a ni hauh lo. Thisen a ni! Thisen hlir a ni zawk e. Chumi a hriat rual chuan room lama tlan luh tumin hmanhmawh tak hian a in her nghal vut a, mahse, thli na lutuk maiin a luhna tur kawnhkhar ber alo chhem khar tak hmak ah chuan au that Chung hian a ding zui chawt. Chu thli lah chuan dimna tel map lo in amah chu a rawn chhem deuh sawk sawk reng a, thisen khan a khât tawk hian a hmai leh a taksa te pawh chu a rawn chhem leh nawk nawk thin bawk nen, a huh phung tawhin a inhria. Chutia mangang em em a alo talbuai viau lai chuan thawklehkhat ah amah kai tho tu awm ang mai hian a rawn harh chhuak ta zawk a. Ni e, mumang rapthlak leh nuam lo tak atang in a harh chhuak a ni. A harh chiang em em mai lehnghal. Chutia a rawn harh chhuah rual rual chuan a room thim em em atanga chhuak tur chiah tuemaw hi ava hmu fuh leh ta chat bawk a. A tho kang zui awk thei.

" Tunge inih?" ti zui that in. A thil hmuh pawh kha a ding ve ta chawt bawk a. A landan ah chuan mihring ngei a nih hmel. Mahse, a chiang Chuang lo.

" Tunge inih" ti nawn leh in, chutaj chuan rawn be tu a nei ta a. Pu Rimawia ngei kha a ni bawk.

" Min rawn zawng nawn leh tih ka hria a. Ka lo Kal a ni e. Mahse, muhil leh phawt Mai rawh" rawn ti dam diai in, amah pawh a ang lo zwk. A zaidam ta viau mai.

" Muhil tawh lo ang. Lo Kal rawh ka pu. Inbia ila, ka mut pawh a chhuak tawh hleinem" lo ti let ve zung zungin an thawm ah Amy chu a rawn harh ve a. A harh ve a han ti Ila, a muhil lo hrim hrim zawk. Hahchawlh nan a hming lek in a mu ve Mai Mai a ni e.

Chutiang na na na chu tiin Pu Rimawia kha an bul hnaiah chuan a rawn tawlh phei ve leh ta a. A hma ai mah khan a hmai te chu alo dãng zual zawk emaw tih mai turin a var hian an var pup tawh. A landan chu a rapawm hle ti Ila a fiah ber awm asin.

" Vawiin lamah ka chhungte ho in an rawn be leh che em" Pu Rimawia chuan rawn ti leh in, Zorini erawh chuan a lu alo thing mai a. Tunhnai ah Pu Rimawia chhungte nen hian an inbe khat hle tih a hrechhuak chiah. Be lo tih hriat nan a lu chu a han thing ve nak nak a, Pu Rimawia pawhin hrethiam takin a lu bawk chu alo bu ve ta nghat.

" An lo be leh che a nih chuan anmahni theuh kha lo inhmangaih tawn turin min han chah sak la. Kei min hmangaih theilo mahse ala dam te tal kha chu lo inhmangaih hram rawh se. Chu lo chu ro hnutchhiah tur ka neilo tih hi min lo hrilh tel sak dawn a nia" a rawn ti ta mual mual mai a. Zorini alo meng phawk kher. Thu Har deuh deuh hi an chah tawn thin a, a sawi chhuak tu nih hrehawm zia hi an hre leh tawh silo tih chu ngaihtuah in a lawm lo ru hle.

" Ka pu, I fate khan an hmangaih reng che asin. I damloh chhung zawnga buaipui tu che I fa upa ber te nupa phei hi chu i hnual suat in I sawi chhe theilo ang. An hmangaih che a j hriat loh lai pawhin an enkawl bang lo che a, chuvang chuan i rohlu engkim mai hi an kutah nghat ngam la Kalo ti ve a ni. Ka sawi theih phei chu awm hauh lo mahse an phu berin ka hria. Hei, I damlaia i chunga thil thleng engkim mai hmu tu ka thiannu hian a hmu tlang vek che a, thudik ngei a ni bawk." Zorinpuii'n țhahnemngai taka a rawn tih chuan Pu Rimawia chu a lo kiai ve suk a, Amy kha va melh leh zauh pahin

" Ava țit hmel ve" an ti sup a nih kha! Ava Chimawm thin tak. A tawngkam avanga lawm lo em em Amy chuan pawn lam a hawi zui hmak a, a tum deuh bar bar reng bawk. Mahse, Pu Rimawia chu rawn thutak leh vatin

" Chu tak chu a nia ka sawi tum nula, anmahni theuh kha lo inhmangaih tum Sela engkim hi a fel thei ang.. Ilo hrilh dawn a nia. Tin, a rem tak leh inhmuh leh pawh Kan la tum ang chu" ti zung zungin a bi bo zui leh ta Mai a. A hahthlak thin hle mai. A Kal bo rual chiah in Amy titau pawh kha a rawn insiamtha ve leh nghal a. Ala tum mawi viau thung.

" Dawih hmel deuh a min han chhuah khanglan chu le" ti hmuar hmuar in a mutna lam a pan zui a, Zorini chu alo khi ve vur vur tawh.

" A star deuh che tihna a ni thei angem?" a huat tur tawk leka lo ti ve zeuh in Amy chu a țek tawh ngang mai.

" ZORINPUI!!" A rawn ti tuarh.

A tuk khaw var rual deuhthaw in Zorini chu a phe buai nghal vut vut reng a, Pu Rimawia thu chah mawlh kha a fate hnena thlen kim vek țul a ti bawk si nen, tukthuan pawh chu puar Mang lo in a bar nial nual a, a tlan chhuak zui nghal vang vang.

A hmasa ber a tan Pi Roluahpuii kha va hmu leh in, zan hmasa lama a pa thusawi te kha a han hrilh ve ta mial mial a, Pi Puii chuan alo pawm thiam viau. Dik pawh a ti. Ni e, chhungkaw hung leh khawsa thei tak ni si khan an thisen zawm an Chen pui te hmangaihna reng reng an neilo theuh a, mahni hma theuh an sial tihna a nih chu. Ka nu hian ka pa hian, ka nau hian ka u hian eng nge a mamawh ang, a ei chak ang, duhzawng te alo nei ru reng a ngem? Tih lam reng reng ngaihtuah tu an awm lova, anmahni pum puarna tur theuh chiah an ngaihtuah vek. An hamthatna tur um jn an phe suau suau a, in chhung khurah pawhnise a tu amah chu an in ngaihsak lo tawn bawk a, sum at in an â theuh bawk a, chu chuan thil țha lo tak rawn thlen in an fa naupang te te chen chuan thil man to leh man tam buaiin an buai phah a, hmangaihna hian an nunah eng kawngro mah a su hek lo. Chutiang kawng ah chuan Pi Puii te chhungkua hi an ziaawm ber a tihtheih a, an Kal hrang nalh bawk. Tunah chuan Pi Puii te nupa ko chu a rih phah zual leh ta hle a ni ber e.

" Ka pa ngaihdan chu dik ka ti viau mai. Mahse, kan buaina bul ber hi engtinnge chin fel a nih theih ang tih hi ka buaina ber chu a ni. Inhmangaih tawn in engtikah nge a tute pawh hi kan awm khawm theih ang tih lah hriat lawk theih Ani silo a, khua rei nghah hial pawh a țul mahna. A țul a nih chuan leh, kan zavai that tlanna tur a nih chuan nghah chu ka pawi ti miah lo. Ka chhungte hi siamthat vek pawh ka duh bawk. Keimah chauh chuan harsa ka ti dawn khawp mai" lo ti ve in a rilru chu a hah hmel ve khawp mai a. Zorini pawh chuan a khawngaih zawk. Engpawhnise tiin, Amy kaihhruaina hmang chuan pi Puii tello in Pu Rimawia fa dang te ho Chenna lam chu a pan țan leh ta a. An hautak khawp in a ring hlawm. Pu Rimawia fa naupang lam ho chu chhungkaw hran theuh nei tawh leh inbengbel tawh ni hlawm mahse colony khatah an la khawsa ho vek a, e... An Chenna hmun an va thleng chu pui tak an ni. Pui tak! A chhung an luhchilh hma hauh atang in an chhangchhiat zia tur chu a hriat theih mai a, an thawm a țha kher. 

A hmasa ber atan Pi Puii pasal chhang chiah te inah chuan luh tumin an Kal nghal phawt a, in chhung an lut dawn chiah tih ah naupang pahnih rawn jn um chhuak te chuan Amy chu an rawn tan tlang zawk leh ta nghal. Hetiang reng reng chuan thu pangngai pawh an sawipui theih ngut dawn emaw ni le. 

" In awm maw. Kan lo le..." a sawi zawh hma hma in nu ber niawm tak nu la valai leh ngo veng mai hian rang zetin. 

"  Aw lo leng rawh u. Awi hei keini chhung zet chu kan ri nuai nuai mai a nia" alo ti nghal zung zung a, Amy nen chuan an in melh leh zawk ringawt thin. Zorini thut na tur a kawhhmuh zawh rual chuan a pasal niawm tak chu ring zet hian a han ko leh ta lang lang a, nu mawng Zang leh viak țha tak a ni ang tih chu hai rual a ni ta lo. 

A pasal, chu inchhung pa ber niawm tak pawh chu alo luh fel rualin nu ber kha a pasal bulah a rawn thu ve nghal zan a. A hawi her a zangkhaiin khual chhawntu atan chuan duhthusam a tihtheih awm e. 

" Eng nge ni ta. Duh leh mamawh te i nei emni? Khawi atang in nge?" Chung zawng zawng zawhna Zornpuiin a chhan zawh hnu chuan amah bawk chuan a sawi chhunzawm lehnghal a. 

" Eng lo a nia ka lo len luh chhan tak zawk chu, kei hian mitthi tawh te thlarau hi hmuh theihna leh biak theihna ka nei thin a. In lo hre ve tawh maithei bawk a, tunah hian in pa ber Pu Rimawia thlarau khan min rawn Kal chilh thin a Kan inkawm ve ta nual mai" a tih lai chuan nu ber khan makti fe hian a ka alo hup ta rjngawt a. A meng phawk țha viau nghe nghe bawk. 

" Ka pa nen in jnbe thei a maw!? Tunah Khawnge amah chu. Ka va be ve duh ve" awih loh hmel taka a pasal zawkin a rawn tih chuan Zorinpuii thung kha chu alo bu ve nghat nghat tawh a. A zam chhe tur hi a nilo reng reng. 

" Bia e. Nizan lawkah pawh Kan la inbia e. Tin, in hnenah hian thu hnutchhiah duh a nei bawk a. Saw, a kut kawih leh a thluak thatna hmang ngei a a din hotel saw lo inchuh buai tqwh lo ula, neih bik tum pawhin buaina lo nei tawh lo ula, mahni leh chhungkua theuh kha hmangaih zawk tumin lo awm Sela engkim hi a țha ang ati a nih kha. Chuvang chuan khawngaihin in pa thlarau in zah vang tal pawh khan a thu hnuhnung chu zawm tum hram ula, chhungkua, thisen hmun khat vek innih naah lo inhmangaih tawh zawk ta che u" Zorinpuii'n a han tih leh chuan thawm dang reng reng awmlo in an ni nupa chu an lo ngawi tawp a. Pa zawk hmel ah kha chuan awih lohna rawn lang chhuak mahse la, nu zqwk erawh kha chuan a awih hmel ngang mai. Tin, a hlauh hmel viau bawk. Hlau rawh se a pawilo. Thuawih phah nana an hman theih dawn phawt chuan a țha a nimai. 

Anni nupa chuan țha taka thlah in, a Chung lawk, unau zinga a mi lai te in zawk ah chuan an lut leh ta a. An ni chhungkua erawh chu a hnuai ami te ang lo tak khan dawr an nuam lova, an țawng nghut nghut bawk a, Zorini pwh chuan nuam lo a ti ru angreng hle a, An ti zam lek lek thei hial bawk a ni. 

" Ka pa thlarau chuan nang hi a rawn bia che a maw!? I dawt phuahchawp hi rawn swi mai mai lo teh. Emqw, I be taktak a nih chuan inhmangaih tawn tih vel ai khan a rosum țhen dan chungchang te lo sawipui zawk la. Kan hlawk pui tlang zawk lo ang maw. Chhungkua Kan buai phah a, nimin maiah pawh ukil te Kan VA hmu a, kha, ka pa thu chhuak leh kut hnu tello chuan engmah a tih tawp taktak theih siloh a, kan buai khawp a ni. Chuvang in hetiang mai mai rawn sawilo hian nangpawn i biak leh theih hunah ani chu lo sawipui la, ka pa te chu biak thiam a Har hleinem. Tiraw?I hlawhtlin theih phei chuan lawmman te pawh a chhe dawn lo hrim hrim a " tiin Zorini zawk chu a lam țang ah Siam a tum ta emaw tih mai tur hian alo thlem ti tih ta zawk a. Zorini erawh chuan a aw a pawh țha duh ve hauh lo thung.

" Engpawhnise, I pa boral tawh thlarau chu zah ve deuh ula, a thu chah hnuhnung te pawh chu khawngaihin zawm sak in lo tum dawn a nia. Thu thar ka neih leh tak leh ka la rawn hriattir leh zawk ang che u" tiin a kalsan ta phawt a. A chau vek thei. A khât tawk hian Amy lah chuan

" An chhungkaw mizia ka ten zia kha e. Thawh thut a chet vak mai kha ka chak lutuk a, mahse, kan ti hlau lutuk ang tih ka hlau sia" rawn ti ve thin in, Zorini chu alo khi ve sak sak reng a. Sawi tur ber pawh a hre tawh lo. An chhungkua hian a bei an ti dawng a, an pa ber thlarau pawh hmachhawn leh turin huaisenna a neih loh phah zo vek tawh.

Rin ang ngei ngeiin a zanah chuan pa ber kha a rawn lang leh ta chat reng a, Zorinpuii chuan a be chak lo takzet. A fate ho nungchang leh mizia mawlh mai kha, chhungkua chu sawi loh, mahni pawh an inhmangaih thei dawn emni tihtur khawp a luhlul leh ngen hmel tak tak vek kha an ni si a he putar hi a damlai khan alo khawngaihthlak thin awm tak hlemai tih te chu ngaihtuah in a khawngaih thar ta takzet a ni.

" Ka fate ho chu eng nge an an hmel itih a.. Fel hmel iti hlawm em" nui put put chunga rawn tiin, Zorinpuii thung chuan beidawn hmel zet a lo thaw deuh halh Chung hian 

" Aa Ka pu, an Chan ai theuh an ro tur chu sem fel la, awm tir tawp mai teh. I thu mjn chah han zawm a, han awih hmel reng reng kha ka hmu lo. An thu an duh in, mahni tawkah țha an inti theuh mai si a, ro ah an buai ber bawk tih chu hriat sa. Chuvang chuan nangpawh ngaihtha taka i awm theih nan thuchah mumal tak Siam fel la, an Chan tur theuh pe fel bawk la, tawp San tawh mai rawh. I tan pawh awmzia a awm tawh Chuang hleinem" alo tih chuan Pu Rimawia hmel chu thutak hlir in a rawn khat leh ta a. Zorinpuii thusawi khan a beng chu thleng mahse a thinlung an hneh lo tih chu a hriat hmel viau. 

" Ni love nula, ka duh dan zawm a inhmangaih tawn taka Khawsak an thiam hun chu kei in nghak theilo mah Ila hun hian a nghak thei alawm. Lo lungngai lo phawt la, a la rawn thleng em em ang" tih pahin kil khata lo ding ngawi reng Amy kha ava melh ta zauh a. A bo zui leh daih bawk. A mak thut thut thin teh e. 

" Ka tihtur chin ka zo tawh a, kei chu ka chawl hahdam thei tawh. An inhmangaih tawn dawn em tih velah ka buai a țul ve tawh lo ve" ti hmak in Zorini chu a mu nghal a. Karlovah a muhil zui nghal bawk. 

Amy thung kha chuan tihtur a nei tih inhre reng in mut mai ala tum ve hauh lova, khaw awmdan thli thlai turin balcony lamah te chuan ala tei chhuak vel chauh. 

Chu zing khawvar chuan Zorinpuii nunah chuan  thil thar engmah a rawn her chhuah pui hauh lo na a, a ruk takin a eng erawh a thawl angreng phian. Zi mar țiah țiah in a khum atang chuan a han hawi kual vel hmasa phawt a, Amy pawh kha alo awm leh tawh hauh lo. Eng vanga kai tho lo nge maw a nih le. Zing tin in a rawn kaitho ve ziah a ni sia. 

Tukthuan ei tuma inhnuai a chhuk thlak erawh chuan Amy kha duhdah zet hian inhnuai sofa chungah alo in kham zuar reuh a, makti zetin a en phawk hru ringawt. 

 

" I chatthla emni" fiam pah a han tih mai chu a tum zet na a, a chhungte ho an awm Kim ve thap avangin a insum hman leh ta hlauh. 

Tukthuan eikham hnu chuan a bialpa hnen atang phone call a dawng leh a, thil phur wm zet mai hi a rawn rawt chhuak hlauh. Chu chu  an pahnih chauh a tuma tihbuai phak lohna a zin chhuah dun a ni. A sawi zo chiah tih chuan a han phur nghal em em ringawt a, a chhungte reng reng a ngaihtuah tawh loh. Rang lutuk in Amy hnenah chuan a sawi chhuak nghal bawk a mahse, Amy thung kha chuan nui hmel pawh hmu hauh lo hian 

" Teh ngawt a Che. I nu in remti mahse i pa hi ngaihtuah la. Mipa nen chauh lehnghal. Kei chu a rem tih sak che hi ka ring lo reng reng" rawn ti ve in, Zorini pawh chuan a han ngaihtuah chiang a, a pa chu a tawh khirh leh dawn tih a hria, mahse, pawilo mai. A Kal em em tho ang. 

Rin lawk ang ngei ngeiin an zin chhuah tur thu chu a chhungte bulah a han sawi chhin a, a pa chuan alo remti lo nghal pang. A nu erawh chuan phal viau mahse a pasal berin thu a neih tawh chuan a kâ hi a chip hmak thin a, a țawng ve tawh ngai lo. Tunah pawh hian a Fanu chu a be lo hmak ringawt a, a phalloh thu emaw, phal thu emqw pawh swi a tum lem lo.  Chutiang zelin A Kal lui dawn ta  a nih pawhin dan buai a tum hran lo bawk. 

Zornpuii thung chuan zin ngei ngei a tum a, a pa berin phallo eng ang mahse a zin dawn hi a ni ringawt. A pa in a rem tih loh thu Sangpuia bula a han sawi chuan a bialpa thung chuan engah teh vak alo ngai lem lova, a ngai awlsam phian.

" Keiman i pa chu ka bia anga engthawl deuhin i zin dawn alawm. Lo lungngai reng reng suh" tiin a han hnem a. Eng tak chu ang dawn nimaw. 

Awle, tunah chuan Zorinpuii pawh a pa phalna leh remtihna thlap in a bialpa, a hmangaih em em Sangpuia kiangah thawveng takin a zin ve thei ta a. Nuam a ti kher. Buaina dang in a chim buai loh lai alo ni bawk nen tuna a boruak hip ang hi chu a naupanlai taktak tih loh kha chuan alo hip tawh ngailo te pawh a tihtheih ang chu mawle. 

" Tihian nupa ni tawh zawk Ila. Tun hun hi kan inneih honeymoon ni ta se tih kalo ngaihtuah a"  Sangpuia'n a rawn tih chuan Zorini chu alo lai chhe lehpek hle. Sangpuia lah chuan a kut chu rawn hum lum sakin a biang te chu a nawk sak leh nel nel thin a, Zorinpuii nuam ti lutuk lah chu a khât tawk hian alo chhing ve leh diar diar thin. Chu chu hrethiam in Sangpuia chuan a Bialnu hmui khur dar dar tawh chu a hmui chhah tap mai nen chuan a han chuk tuah ta a. Zorinpuii pawh chuan alo chhang țha ve kher. Ni lo, ni lo, hetiang thil țha lo hi a ti tur a ni lovang. A pasal a nih hma loh chuan he pa lakah hian a in phal rai tur a nilo tih chu a rilru ah rawn lut ve mahse lo hnial chu harsa a ti tawh hle a, a chakna sosan vanga a taksa rawn danglam nasa lutuk chuan a thawk chhuah tir deuh ham ham tawh bawk. Mahse, 

" ZORINPUI!" aw ring țha takin a rawn tih tak thut ah chuan Zornpuii pawh chu harh chhuak zawk in, a meng deuh kawk a, a awmdan țha lo tak pawh chu a inhre fiah nghal uarh uarh thei. Chutah, a duhthusam hmuh ngei tuma hmanhlel taka lo khawsa mek Sangpuia chu nam sawn rawk rawk in, 

" Ka theilo. Duhtawk ang. Heng chu nakinah ni rawh se" ti rawk rawk in amah pawh chu a tho zui nghal a. Sangpuia chu beidawng hmel zet hian bang ngheng in a țhu chhuak a, a thaw pah ham ham reng bawk. 

An Khawsak dan diklo tak lo thlir a lo hmu reng tu Amy chu kilkhat ah ngawi reng hian alo ding ve reng ringawt a. Zorinpuii pawh chuan inthiamlo tih hriat tak hian ava melh leh zeuj zeuh thin. 

" Ka tihpalh lutuk Bawihte. A thleng nawn tawh lovang" Sangpuia'n a rawn tih chuan Zorini pawh chu ngawi reng in alo bu ve ta nghat nghat a. Tun lawka thil thleng mahnise sawi chhuah tawh loh a theihnghilh nghal hmak mai a duh. A in zahpui a a in ten lutuk ringawt. 

Awle, an zinna ram ah chuan tum aia rei cham in, thla 2 dawn lai chu an thang ta a. Tunah chuan haw alo hun ve ta. Hetih chhung zawng hian Pu Rimawia fate khan Zorini chu an rawn be pawp leh tawh miah lova, an reh zui hmak. Zorini lahin a ngaihsak chhunzawm tawh silova engtinnge an Khawsak zui tak zel a hre tawh hauh lo. Mahse, an zinna ram atang an haw a, in a thlen rual rualin a phone chu a rawn ri leh ta nghal. A han en nak chuan Pi Puii alo ni leh ta ngei a, a thaw zui deuh hawk. 

" aw Pi pui, kan va inbe khat tawh ve tiraw? In țha maw?" ti nghal zung zungin a zangkhai thei ang bera awm chu a tum a. Anmahni vanga a hah rukna te zawng zawng pawh kha thup bo a tum ve hle. Mahse, a rinai takin amah rawn be tu Pi Puii aw chu a rawn zangkhai phian a, a hlim hmel viau lehnghal. 

" Aw mate, kan țha tlang e. I reh thei lutuk a chanchin rawn sawipui che ka duh sia, ka rawn be leh ringawt che a nih hi. En teh Kan chanchin hi han hre ve la chuan maw mak iti in I lawm ve ngawt ang ka ring" a rawn tih chuan Zorinpuii pawh alo phur ve nghal surh thei a. Sawi vat vat turin alo tur sek bawk. 

Chutah Pi Puii pawh chuan zangkhai leh phur em em in, 

" Ih e, kan chhungkaw chungah hian Pathian a che a nih ka ring a, malsawmna tamtak ka ti lo theilo. Khatia Kan pa unaute ho I tlawh kual tuk atang khan an Khawsak phung leh nungchang kha engkim an thlak danglam vek a, ni dang leh kum dang nen chuan danglam tak a ni tawh mai. Zing an thawh rualin ka pa thlan ah an Kal a, pangpar te an Ken sak a, khaw thim dawnah an Kal ziah bawk a, in chhungah nise an fate theuh an ngaihsak in an mamawh an buaipui a, hotel ah pawh tunhma ai khan thahnem an rawn ngai ta viau. Chutihrual chuan thu neihna erawh an sa hauh bur tawh lo thung a, engkim ah an u te hi min rawn hmasa ve tawh thlap thlap thin. Ih e ka sawi thiamlo zawk. A danglam nasa tawh lutuk leh nun thar an han nei ta Mai hi a mak a nimai. A tir taktak ah kha chuan ka ring ngam lova, ka beisei nise a sang hek lo. Mahse, tunah erwj chuan an tana ka tawngtai chhanna kha ka hmu ve ta niin ka ring. Ka ring nghet hmiah tawh" a rawn ti ta a. Zorinpuii chu alo thaw ve huai. Pathian hnathawh ngei a nih pawh a rinawm e. 

" In lo țha tlang maw" rawn ti thum huk ri ah chuan Amy leh Zorini chu an phu zuang lo chauh a. An han hawi let nak chuan an hnung lawkah hian Pu Rimawia kha nui vur vur chungin alo ding reng tih an va hmu a, an thaw sawng sawng. 

" Nula, in hnathawh dan ah hian ka lawm khawp mai. Theih chu nise lawmman pek hial tlak inni a sin. Ka tihtheih hi a tlem tawh em a, min hrethiam a ni ang chu" tiin a lawm zia chu sawi duah lo mahse a hmel ah a lang a, a khawngaihthlak zawk hial. 

" Ka pu, keini hian eng thilmah tih Kan nei hleinem. Thu in Kan va thlen ringawt a, a hlawhtlinna erawh Pathian kut a ni tawh a, kha chu Pathian malsawmna ah ngai ve tawp mai rawh. Tunah chuan nangpawh thlamuang takin i chawlhna tur hmunah Kal tawh la, helam chu rawn ngaihtuah hah duh miah suh aw. A țha hlen tawh ang tih ka tiam a che " Zorinpuii'n dam taka alo tih let chuan Pu Rimawia chu alo bu ve lej nghat nghat a. Chiang leh uluk taka Amy va melh pah chuan 

" Ni e, Pathian malsawmna a nih piah lam ah, a hna hlen taka thawk tu an awm a. A chungah pawh hian ka lawm khawp mai Zorin, amah hi ilo zawt fiah tawh dawn nia, kei chu ka kal tawh phawt ang" tiin an inrin lawk hma chuan a bo leh ta daih a. Zorinpuii chuan Amy lam chu hawi phei vatin a melh nghal hrawk. 

" Engmah ka ti reng reng lo. Darkar reilote ka va intithei ve lawk mai mai a nih kha. An la hlau em em zui a, a bikin inhnuai bera cheng te an nu ber phei kha chuan a hlau lutuk a, a pa thlahrang emaw min tia, sual a tum tawh loh thu a sawi chamchi mai" intithei angreng taka a rawn tih tak zet zetah chuan Zorini alo meng dur tawh hle a. A inhumruh sauh sauh bawk. Chutianga a khawsa lai lo hmu ru reng tu Amy chuan tlan chhiat zuk pah hian 

" Pathian malsawmna a ni ve tho alawm ZORINPUI, misualnu" a ti nghek a, a bo zui daih!

""""""""""""""""""""""""""""""""""""""""""""""""""""""""""""""