DEAR AMY SEASON 2 EPISODE 3

DEAR AMY SEASON 2 EPISODE - 3

Vanlalpeki Fanai

*************************************

" Hetiang hi ka inbel duh lo. Ka inhmeh ve lo"  tum bûr chunga ti nuah nuahin khum chungah Amy chu a țhu fel at a. Zorinpuii thawmhnaw pek niawm tak, jeans khup țet keng Chung chuan a khât tawk hian amah Zorinpuii pwh chu ava melh pah leh zeuh zeuh thin bawk. Chutah, a darthlalang hmaa thu mek Zorinpuii pawh chuan ner nang nang chunga Amy rawn melh pah chuan 

" Hmanlai kawr fual rjngawt kha i ha reng a, I țhing thei em alawm. Thlarau țhing thei ber ini" rawn ti hmuk in, Amy thung kha chu a tap lo chauh tawh. 

". Keini ang te chuan engpawh ha Ila tuman mjn hmu thei ve Chuang lova, a ho e. Țhing tih mai mai" alo tih chuan Zorinpuii a rawn țek lehnghal vat. 

" Aw a nih leh saruak khan awm la ti nia. Kha jeans kha a manto chi, hak pawh ka hak that phalloh ngat a nia. I vanneih zia hi e. Ha lo tawp rawh" tih pah chuan na zet hian Amy kuta jeans khup țet awm reng chu ava phih zui leh sawk a. Ala duhtawk mai lo bawk. 

" Zaninah nang chu țhing deuhin kil. Khatah ilo awm leh anga, i inhmeh tawk vel viau ang" rawn ti leh kher in Amy chu alo ner ve sak ringawt. 

Zaninah hian Zorinpuii te thianho in party satliah an buatsaih dawn a, chuta Kal ve tur chuan Amy pawh hi a sawm nghe Nghe. Sawm lo mahse Amy hi chu a Kal ve leh dawn hrim hrim tho a, chuvang a nia, a kawrfual par hmanlai zet kha thlak a, jeans hak tir alo tum ve ni. Tuman an hmu ve theilo tih chu hre tho mahse, Zorinpuii hi chu mi over chi hi a ni hrim hrim a. 

" Sangpuia alo tel ve dwn em?" Amy'n a rawn tih chuan a lu lo thing deuh nawk nawk in, 

"Mipa hrim hrim an lo tel dawn lo. Hmeichhe party bik a nia" zaidam tak chuan a rawn ti țha ve leh Mai bawk a. Amy pawh alo bu ve nghat ringawt. 

Tichuan a hun rawn thleng in Party na lam pan chuan an ni pahnih pawh chu an inzui chhuak leh ta hnak hnak a. Amy chu a phur lem lo kher. A chhan em em chu hrelo mahse a ning ve tawp a nimai. Tih theih nei ve tawh miau hek lo le. 

An party na hmun tur cafe nuam leh changkang tak an va thlen phei lai chuan Zorini thiante ho, hmeichhe panga zet te chu lo awm in Zorini hmel an rawn hmuh rual chuan an râk teng tung bawk a. An inkuah khawm nghal a, an zuang tawr tawr mai bawk. Nia, Helai hmuna a thiante ho hi hun rei tak a hmuh tawh loh te vek an ni a, phaia awm bo te leh foreign lama cheng ta daih te an ni hlawm nen, kum engemaw zat liam leh hnua chutia han inhmuh khawm chu a dan a dang in, nuam an ti tlang kher. 

" Țhu ang u. Zanin chu cafe hi kan ta a ni ringawt mai. Midang kha care an ngai lo aw. Guys" an zinga Sam buang leh piannalh em em Ludy chuan rawn tiin Midang ho pawh chu phur em em hian an lo ri zui leh ham ham phawt a, kil khat atangin Amy khan chu nu hmel chu alo melh uljk kher mai bawk. A hmeltha bawk em a tin ni. 

Chu cafe chu a zau in a hmun a rem țha bawk a, anni thianho tih loh customer dang te pawh awm ve nuaih mahse la an inti buai phalo hrim hrim aa tih theih awm e. Music ring țha taka in play dup dup ri te chuan Zorinpuii awm chu an ti nuam in hetiang boruak hi a hip khat ta deuh a, nuam a ti fal bik emaw tih mai tur, thut pawh chu thu hle hle thei lo in a tho sek a, a khât tawk hian a thiante ho chu thla a laksak reng ringwt. Chutah, an zinga mi tlema vun hang lam leh hmai fang țha phian lawi si Mary chuan rjng zet hian

" Guys, kei hi reilote ah ka haw thlak leh mai a țul dawn a, chumi hma chuan Lunglei ah zin lawk Ila, bialpa ka hmu duh" a rawn tih chuan midang zawng te kha an lo "eee" dual thei a. An thiannu pawh chu an kawh rawn nghal vak vak bawk. 

" Lerh reuh ve a. Sapram atang hetah bialpa i rawn nei daih a" tiin an nui zui leh ham ham phawt a. Chu tih chhung chuan an thil order te kha waiter ho in an rawn pek fel tak avangin an han ei leh rih phawt thin a. Sawitur an hre tlang in an ri leh ham ham thin bawk nen, Amy tihtur hrelo chuan a ning ta deuh a ni chek ang chu, pawn lamah a Chhuahsan ta daih a. Chu cafe hmun hma vel te chu thlir kual in a fang kual ta Mai Mai. Cafe pawh chu a lian in a zau țha tawh tih naklaiin, a chhehvel ram chu ala zau zawk fe a tih theih a, a chhak Tlangah chuan thing hmun țha tak la awm in khawih chet loh tih hriat tak hian thing ding te reng reng te pawh chu an bit em em a, ram țha tak a ni tih a hriat theih. A bak zawng ram ruakah pawh chuan intih hlimna tur emaw, lian tham tak chu ala sak theih dqnw tih pawh chiang takin Amy chuan a hrethiam ve vek a, a ram neitu chu tupawh nise, a awm thei ve thawkhat hle ang tih a chiang viau bawk. Chutia, mi hausa ho Khawsak dan phung uluk taka alo ngaihtuah kual ve chiam lai chuan thawk leh khatah a thlang lama cafe chhung atang khan au ri nuai nuai thawm rawn chhuak in, meikhu, van lama in vial chho tawp tawp mai pawh cafe choka atanga rawn chhuak chu a hmuh theih nghal mai a, rang zet hian cafe lamah chuan a tlan thla ve ta vat vat. 

Customer tamtak, mahni sahim na tur zawng a cafe chhung atanga rawn inhnawh chhuak tup tup zingah chuan Zorini hmel a han zawng ve ngial a, a hmu ve ta hauh lo nia. Chu mai bakah a thiante hmel pawh kha hmuh tur awm lo in anni thianho kha chu an reh ta hmak! Cafe hnuai chiah hi eisiamna choka niin, a Chung zawk kha cafe chu a ni ta a, cafe chhungah te chuan mei khu chu a zam hian a zam phui mup mup tawh bawk nen, mi tamtak chu meikhu vanga khuh bawrh bawrh in thenkhat chuan thawk harsa an ti țan a, ni khaw hrelo a tlu ta phawk phawk pawh hmuh tur an awm nual e. 

Amy pawh khan mangang zet hian cafe chhung chu a pan ve ta vat a, a rin rilruk ang ngeiin bangkil lamah hian Zorini te thianho kha ni khaw hre lo tih hriat taka an dawhkan bawh Chung chuan an lo mu zawi ngiai hlawm tak tak a. A mangang zui ta kher. Ani tehlul hian engtinnge an ni ho hi a chhan chhuah theih tak ang. Cafe chhung atanga lak chhuah an nih vat loh chuan reilote ah mei khu hian a ti hlum vat dawn tih a chiang reng mai si a, chet a thawh thuai a țul, mahse, engtinnge a tih ang. Chutah, a tih theih tawk ni a hria in cafe dawhkan chunga chi leh hmarcha bûr te, a hmuh theih ang ang chu pawn lamah theh chhuak in, chu thil chu hmu fuh tu an lo awm hlauh tak chuan a chhungah mihring an la awm tih an rawn hre vat dawn niin a hria a, a theih tawp a chhuah ta nge nge. A rei hnuah chu thil chuan awmzia neiin, chhanchhuak tu pawl an rawn thlen chuan cafe chhung chu an rawn ngaihven ta vat reng a, vanneihthlak tak hian Zorini te thianho pawh chu ni khaw hrelo a awm nimahse, lak chhuah fel an ni thei ta. Amy chu an Kiang lawkah chuan mittui tling piau Chung hian alo ding ve reng a, chhanchhuak tu pawl ho thil tih mek te chu ngun taka lo en in, a bik takin Zorini, ni khaw hrelo a awm mek, ambulance chhunga an zawn luh lai mawlh mai chu alo en uluk zual hle. A lainat ngawih ngawih a, amah chhan thei tura alo awm hnai lo kha pawi a tiin, a inthiam lo takzet bawk. 

Hliam tuar tamtak te chu rang taka damdawiin panpui an ni a, vanneihthlak takin nunna Chan erawh an awm lo hlauh bawk. Mahse, Amy rilru ti hah zual a, a thin ti țhawng dawt thei tur hian Zorini dinhmun a that loh thu chuan sawi a hlawh ta hle a. Damdawiin a an kalpui te zingah khan Zorini chu a ngaihtuah awm ber a nih thu rawn an sawi ta tlat mai le! Engtinnge a tih dawn. Tih theih a nei a ngem? A ring lo. Tih theih a neih a ring lo. 

Chanchin a hriat rual in Sangpuia zin pawh kha rang takin a rawn haw ve nghal vat a. Ani hi a hna thil ah lo zin chhuak hman in, rei pawh a thang hman lo. A Bialnu chanchin chuan a țhawng na em em a, thildang zawng zawng pawh dah țha in a rawn haw San ta zawk a ni. Aizawl a rawn thlen rual chuan damdawiin ah Kal nghal vatin, a Bialnu, ni khw hrelo a natna khum a mu bal mai a han hmuh chuan a lainat hle a, a insum theilo chu a țap ve zawih zawih ringawt. Chu chu kil khat atang in Amy khan lainat hmel em em hian alo thlir ve reng a, tih theih neih a va han chak tehlul em. Tawngtaisak mai loh chu tih theih a nei bik tlat silo. Ni e, tunhma kha chuan Zorini nu natna te pawh lo tih damsak in alo enkawl tawh pawh a ni maithei e, tunah erawh a thil tih theihna tamtak kha a hloh ve tawh a, ama erawh chu, hriatna țha tak leh danglam em em erawh chu la nei ve in, ala fing țha phian bawk. Thlarau satliah erwh ala ni lul love. 

Sangpuia chuan a theih Chen chen awmpui thin in, a hun tam zawk chu damdawiinah a rawn hmang ral a tih theih a. Chutihrualin a Bialnu Zorinpuii erawh kha chu biak leh koh eih theih ala ni hauh lova, mitthi ang maiin a natna khumah chuan che lo hian a la mu khawng reng ringawt mai a ni. Chu chu a hmuh in Sangpuia Mang chu a ang takzet tawh a, tihnhaihna a hre der bawk silo. Thlahlel leh ngai tih hriat em em hian a Bialnu hmel chu a han thlir leh vang vang thin a, mipa mahnise a lung chu a chhia tih a hriat reng mai. 

Engtikah nge a hmangaih Zorinpuii hian ni khua a rawn hriat leh a nga, amah be leh tura a rawn thawh chhuah leh ang tih chu pa lo chauh chuan hriat a ni silova, Zorini chhungte leh Sangpuia tan tak pawh a luhai thlak dawn teh e. Mihring lam atang chuan tih theih nei hek lo le, Amy pawh chu damdawiin ah awm reng lo in an lo Kal tawhna cafe lamah bawk khan a khât tawka va Kal chu a hrat chho ta țan a. Chutah chuan thil thar mak tak tak pawh ava hriat belh ta nual reng a ni. 

Kha cafe mawi leh changkang tak, ram nuam em em chhung a sak leh din ni si kha a ram chungchang ah buaina tamtak alo inphum ru a ni tih chu va hre chhuak in, hriatchian lehzual a duh ta tlat mai a, a Kal nawn tluk tluk nghe Nghe. Ni e, kha cafe neitute kha Aizawlah pawh mi awm thei pangngai chhungkua ni ve in, in leh lo, ram țha tak tak pawh hmun tinah an nei diah duah reng a, chutihrualin tuna an cafe sakna hmun erawh hi chu an fapa tana din niin, an fapa hming a ni bawk a, a awmzia berah chuan kha ram, kha cafe neitu Pu Tlangdina pa, pa hausa tak maiin a tupa tana a pek niin a lang bawk. Chu chu thil awmdan a nih rualin chu ram it a chhuhsak tum ngar ngar tu chu chhungkaw dang an lo awm ve mek hi alo ni a, chu pawh mi hran nilo in, anmahni Pu Tlangdina thisen zawm te ngei tho hnen atang a ni nghe nghe. Amy chuan rapthlak a ti zawk hial. A thu hriat chu chutah chuan tawp mai lo in, hemi te chhungkua hi hman ata tawh khan ro chungchang ah an lo buai fe tawh a nih hmel a. Tlangdina unaupa te hian an pa ber ro sem dan chu duh khawp lo in a khât tawk hian buaina an chawk chhuak fo thin a, thikna a khât in an chhungkua atang pawh chuan an inti mi hrang chho țan a, suahsual rawng an bawl hi a ni ta hawt mai. Tikhan, an ram it em em mai chu pa ber chuan a tupa duat tan pe leh in, cafe te an han din chho ta a ni tih an hriat khan a hma atang tawh a an thin ur na leh thikna te kha rawn irh chhuak țha leh in buaina chu an rawn zawng chho leh țan ta a. Thu nawi fe fe rawn neiin an unaupa Tlangdina te chhung chu an chawk buai țan ta viau. A tir ah chuan nawi taktakin an khawsa hmasa phawt a, a rei tual tual a an chet duh dan chu a phaw hraw tual tual a, an nun a rawng tulh tulh bawk a, tikhan a tawpah phei chuan an cafe chu hal sakin, buaina lian tham zawk an chawk chhuak ta a ni e. Mahse, he thu bik hi chu Amy tih loh kha chu hre tu an la awm lem lova, a cafe neitu te lahin an unaute chu rinhlelh nachang takngial pawh an hre hek lo. An rilru that lutuk vang te pawh a ni pakhat ve mahna. 

A thil hriat thar ang ang te chu Amy chuan sawi chhuahna tur a duh a, hre fiah lehzual a thudik hai lang turin ani hi chuan tih theih a nei tam silo. Zorini a mamawhna a sang em em a, chutihrualin a mamawh ber lah chuan harh chhuah tih reng reng a nei thei bawk silo. A khât tawk hian beidawng zetin Zorini kiangah chuan ava thu ve leh tlawk tlawk thin a, a melh ngawih ngawih zel ringawt bawk. 

" Zorinpui, harh chhuak tawh hram teh. I chhungte leh i bialpa pawh I ti mangang nasa tawh tehmai nia. Hetiang hian I awm ngailoh kha a mak e" zawitea phun sep sepin Zorini kut chu a hmeh sak niap niap reng a. A unaunu hi a harh chhuah hma loh chuan khaw dang hawisan thei niin a inhre lova, a kut ke ber hetia a han awm ta Mai pawh hi a tan chuan vanduaina tawpkhawk leh hrehawm ber a tling pha hial a ni. 

" Ka Fanu hi ala harh lo fo a nimaw" thawpik tih hriat taka thaw halh chungin Pi Rinfeli chuan Zorinpuii hmel dang bai mai chu a han en ve tlawk tlawk a, a mit meng ah chuan beiseina nasa tak hmuh theih mahse a beiseina chuan a duh dan chu a um pha lo hle tih erawh chu a hriat theih awm e. 

" Ka Fanu hi engtikah nge a harhchhuah ang le" a khât tawka rawn ti leh țhin in a pasal, Pu Chuauthangpuia khan a darah alo kuah a, a thiam dan ang angin alo hnem ve zel bawk. An nupa hmel chu uluk takin Amy chuan alo en ve reng a, ni e, an pahnih hian fa pakhat pwh an hring lova, chutihrualin an fa lak he Zorinpuii erawh hi chu an hrin ang maiin an duat a, an hmangaih a, kawng engkim ah a ber an nih tir thin a nih kha. Entirnan, Zorini hian lo boralsan ta thut se zawng, anni nupa hian awmngaihna tak an hriat pawh a ring lo hial. Heti khawpa an hmangaihna hi Zorini hian a hrethiam hleithei lova, a hrelo der fo bawk a, hetiang kawng ah chuan Amy pawh hian Zorini hi a dem ve lek lek fo thin. 

" A kut a rawn ti che nia! Pa a, en teh hei a mit pawh hi rawn men a tum niin ka hria. Doctor ko vat rawh!" Pi Rinfelin a rawn tih tak chulah chuan Amy pawh a suangtuahna ram atang a rawn harh chhuak zawk a, khuma mu reng Zorini hmel chu rang takin a en nghal vat. A nu sawi ang tak tak khan Zorini chuan harhchhuah tum takin a kut țang te chu a rawn ti che leh zeuh thin a, chutiang zelin a mit pawh men chhuah a tum tih a hriat hle. Amy chu a phur ta Sawt a, doctor ko tura chhuak mek Pu Chuauthanga kha umzui ve ringawt in cabin chu a tlan Chhuahsan nulh a, eng tak chu va ti ve dawn nimaw. 

Corridor ava thlen ve lai chuan hmanhmawh taka Pu Chuauthanga leh doctor pakhat rawn inzui phei chu hmu in ani pawh rang tak hian cabin lamah a let lehnghal a, chutah chuan khum a mu mek Zorini kha fiah takin alo meng tawh tih chu ava hmu ta a, a lung phu hi a su dup dup thei. Rang taka tlan lutin a khum bulah chuan ava ding vat a, a kut chu chelh sakin a mitah chuan a en ta reng. Hetih lai hian Zorini chu rawn meng chhuak ve tawh mahse a mit meng ala harhfim lo angreng hle a, a meng Vai riai bawk. Tin, a Kiang lawka ding reng Amy pawh chu hmu angin a awm hauh lo! 

"Ka Fanu, I harh tiraw? I țha em? I khawi lai nge na han sawi teh" tiin Pi Rinfeli chuan biak harh tum tak hian alo be pah ve reng a, chutihlai chuan doctor leh Pu Chuauthanga te pawh khan cabin chu an rawn lut ve chiah bawk. 

Tichuan, hmanhmawh takin doctor chuan a theih ang ang hian a han check fel ta zung zung a, amah rawn zui tu nurse khan alo pui ve vat vat bawk. 

" Rang taka drip khai nghal a ngai ang. A chaw ei lohna a rei tawh a, a taksa hi a chau hle dawn a ni. Tunah chuan a mit hi Meng mahse a khaw hmuh in awmzia vak ala nei rih lova, mahse,  drip te Kan han khai a nga lo mangang lo ula, a chak chho vat Mai ang" ti zung zung in nurse pawh chuan thuawih tak hian doctor sawi ang khan a ti ve nghal zung zung a. Karlovah drip pawh chu an khai zo mai. Chutia drip an khai chhung zwng chuan Zorini thung kha chu alo muhil leh diam tawh a, tlemin awm a nuam ve ta deuh e. Tunah chuan ni khaw hrelo a muhil ni tawh lo in, tui taka muhil zawk a ni tawh tlat. Chutah, Amy chuan thil pakhat hrechhuak zawk in, khami ni, cafe an Kal ni a Zorini thiante kha a hrechhuak ta zawk a. Rang tak hian a inher deuh vut. Zorini rjngawt alo buaipui na lamah a thiante reng reng kha alo hre Chang tawh lo nia. 

Tichuan, cabin chu Chhuahsan in ala hriatchian pahnih Ludy leh Mary te cabin ah khan ava lut ve ta thawr a. Rinai takin Ludy chu alo țha a, a chhungte nen an lo jnbe mek bawk nen, a chhuahsan leh vat. Mary cabin ah khan lut veleh thung in, ani erawh chu Zorini ang chiah khan harh chhuak lo hian alo la mu bal mai a. A khawngaih ta em em ringawt. A khum bulah chuan va Kal hnaiin a hmel chu chiang tak hian a han en ta vang vang a, hriatchhuah a nei leh ta! He nu hi mi vanduai tak a ni! A tunhma nun a hahthlak in a hrehawm em em a, vanduaina ten an hmuak reng bawk a, a vanduai awl lo bawk. Pasal pakhat nei tawhin chu chuan kut a thlak fo thin a, fa erawh a hrinsak lo hlauh. Chumi hnuah a pasal nen chuan inthen in, bialpa te pawh a nei chho zut. Mahse, mi vanduai a ni a, a nei fuh ngai lo. Ama damlai a a thil tawn ang chiah khan a hmangaih em em a bialpa fa chu Pai ve in, chu pa lah chuan alo nei duh hauh lova, a fa chu a tih tlak loh chuan thah ah te pawh alo Vau thin nghe Nghe. Mary hi hmeichhe derdep leh dawihzep tak mai a nih vangin fa chu a ti tla ta nge nge a, a bialpa chuan a kalsan zui nghal bawk. Tunah hian mipa kawp pui a nei lova, amah erawh chu, a pasal hlui khan nasa takin ala ranw tibuai thin tlat a nih chu. Tal chhuah dan a zawng mek tih zawng zawng thlengin Amy chuan a hmuh sak leh ta vek mai a, heng thil te hi Zorini hian a hriatpui ve a ngem? Hriatpui ta se puih theih dan a ngaihtuah duh a ngem le. 

Tunah chuan Zorini pawhin nasa takin hma a sawn tawh a, a harh țha tawh viau. Tlem tlemin chaw pawh a ei thei țan a, chutihlai chuan tih theih nei silo Amy chu alo țang ve em em zel a, alo phe ve sek ringawt. A che zia lo thlir reng tu Zorini nuih chu a ti za thei em em a, va biak pawh erawh chu a tih chi hauh si loh. A tawp a tawpah chuan an pahnih chauh a inbiak theihna hun chu rawn inher chhuak in, Zorini chhungte chu an chhuak bo ta diak a. Amy chu a rilru a hmanhmawh tawh kher. Zorini chu thut chilh sawk sawk in uluk tak hian amah Zorini pawhin alo melh let ve kar tawh a. 

" Min va ngai tawh em em ve" zawi Sapa alo tih chuan Amy khan ngaihtuah chiang hlei lo in a lu chu a han bu zauh ringawt a. Chutah, Zorini thusawi chu hre chhuak leh zawkin amah ngai tu nih chu a tlawm la ta phian a, rang lutuk leh nasa lutuk hian a lu chu a thing zui lej ta nawk nawk. Zorini pawh alo nui ve ta ar ar mai. 

Chumi hnuah reilote ngawi dun leh hlekin Zorini zawk chuan a aw chu a rawn thian ta kharh mai a, Amy pawh a harhchhuak leh zawk

" I sawi duh te chu min han hrilh tawh la. Sawi duh i nei niin ka hria" awmze nei taka amah melh Chung chuan a rawn ti ta a. 

Amy pawhin muangchang kual vel tawh lo in a thil hriat ang ang, cafe chhunga accident thlen chhan te pawh kha engkim mai a hrilh ve ta vek a. Zorini hmel ah chuan danglamna tamtak a rawn lang zut zut mai bawk.

" Tlangdina unaupa te chhungkua chu khawi hmuna khawsa nge an nih a. An hming i hre tawh em?" Zorini chuan a rawn ti ta nge nge. Chu veleh rang em em hian Amy khan a lu chu alo thing leh nawk nawk tawh a. Ala hriat theih loh thu leh, amah a harh chhuah hun a nghah thu a hrilh nghal bawk. Zorini pawhin a lu chu a lo bu ve nghat nghat.

" Chuan, engtia hma la turin nge min duh. Mi chhungkaw buaina chungchang daih a ni si a, kan lo inrawlh ve hi a tih chi dawn emni" Zorinpuii'n a rawn tih leh chuan Amy kha alo thaw chhuak vei halh a.

" A hmasa berah chuan kha cafe kha mimal ta, chhungkaw 2 buaina chungchang chu ni tehmeuh mahse, customer tamtak awm laiin buaina kha chawh chhuah a ni a, kha kangmei vang khan nunna Chan ta chu awm chiah lo mahse nunna derthawn phah mi tamtak in awm a, tunah hian I thiannu Mary phei kha chu ala harh chhuak miah lo lehnghal. Tin, khami ni khan dinhmun thalo taka ding ve mi pahnih an awm a, Mizoram ah an enkawl theilo tih thu pawh ka hre nghe Nghe. Cafe neitu te khan hmingchhiatna engkim an phur vek a, tunah hian case rit tak neiin police nen buaina ann nei mek asin. Chu pawh, an tihsual awm miah loh ah. I hrethiam tawh em? Chu chu nang leh kei hian Kan chin fel pui thei a, thudik engkim hi kan sawi chhuak a nih chuan an dikna chanvo hmu in an cafe pawh kha tunhma aia nasa in an run leh thei anga, mite tan malsawmna Kan thlensak thei dawn asin. I hrethiam tawh em? "  Amy'n a rawn tih leh tak charh charh ah chuan Zorini pawh a harhchhuak tual tual a, midang dikna chanvo humhim sak a, hai chhuah sak thei tu nih chu a duh leh ta zawk a ni. Mahse, tun dinhmun ah chuan duh aiin a taksa ala chak lo hret tih a inhre thei a, reilote han in enkawl leh hlek se a țha ve thei tawh mai ang.

Damdawiin atanga chhuah chu doctor te pawh in la remti chiah lo mahse amah Zorini zawk chuan in lama haw a duh tawh tlat avangin tih luih theih a ni lova, doctor te remti lo Chung Chung chu a luhlulna hmanga nawr in, ni 4 a awm tlin leh hnuah an in chhuah tir thei ta hram.

In chhung a luh rual rualin duhthawh em em hian boruak chu a han hip lut ta vang vang phawt a, kil khat atang hian Amy khan ei loh hmel zetin alo thlir ve ngar ngar bawk. A nia lawm, Dam chiang veng vawng deuhin han haw mai sela a duh pui tehlul nen, kan Zorinpuii thu duh lutuk hi chuan a thin hi a ti rim thei vawng vawng em.

" Mahni in lum ngei han thlen leh tak chu ava nuam em. Damdawiin rim chhe lutuk rim hriat reng ai chuan a hahdam thlak e" tiin Amy kha a rawn mitmei zeuh a, ani lah chu lo duai lo, ner sawk sawk chunga in Chung lam pan pah hian

" A niang, kha, I hnar te pawh a var hawk hawk thei alawm" tiin a Kal tau zui nghawng nghawng. Zorini erawh nuih za insum tih hriat tak hian a khi deuh vur vur reng a, chhan let en ah pawh a en peih lo.

In lamah chuan Sangpuia pawhin a rawn tlawh awl lova, eitur tui tak tak hi a rawn kensak fo thin bawk a, kil khat atang hian Amy chuan it hmel zetin a thil eitur rawn ken thin te chu alo thlir ngawih ngawih zel a, a chil a put lo chauh. Chung zawng zawng chu Zorini chuan hmuh hmaih lo mahse a sawi chhuak ngai lem lova, a nuih an ti za thin phian zawk.

Damdawi țha leh eitur țha tinreng hmanga enkawl a han nih takah chuan Zorini pawhin hma a sawn chak takzet a, a Dam chak ta kher. Hmuh theih in a hmel a eng Sawt Sawt a, a vun nise a mam in ama tawkah a thau chho ve leh țan ta.

" Damloh hi ilo ngeih zawk a nih hi a. Damlo ziah rawh. Mi damlo te chuan engmah an ei țha theilo a, nanga damlo ve chuan a tui tui ei i tum thung a, dam hi I ning zawk ngawt ang ka ring" Amy lah chuan alo tih khum siah siah zel bawk a. Zorini thengthawng ah an thawk mawlh lo. He nu thusawi tamtak hi chu ngaiah a nei tawh zawk.

Tichuan, muangchang tawh lo in an tihtur hmabak, cafe neitute Ina len luh a anmahni va biak chu tihtur hmasa berah neiin, thildang chu an dahtha ta phawt a. A ruk tak chuan an huphurh dun ve ve, mahse, an sawi chhuak lo ve ve thung. A hun tur atan chuan zan lam pang an han ruat dun ta phawt a, pakhat in chhunah ka hman lo a tih laiin, pakhat zawk chuan Zana Kalna a tan an Chenna veng a hla lutuk, hmeichhia inih kha a lo ti bawk. A tawpah erawh lung rual lo ru dun zetin an lungrual chawp ta ringawt a. Zan hun chu an ti tlu thei ta hram a ni e.

Chu In kawngkhar ngheh leh tlo hmel tak, ropui em em a Siam ni bawk si chu kut khur dar dar chungin Zorini chuan a han Kik ta karh karh Mai a, mahse, boruak erawh a reh duk thung. Chutihlai chuan Amy khan bangkil sira door bell awm chu lo kawh zeuh zeuh pah hian

" Hmet ta Mai che mawle"  alo ti ve sur sur reng a. Zorini pawh a nui tawp. Tichuan, Amy thurawn angin door bell chu a han hmet ri ta ral ral mai a, rei pawh nghah ngailo in nula pakhat hian kawng ka chu a rawn hawng zui ta rak rak mai. Khatih laia Amy intithei leh rem hre inti lutuk hmel hmang mawlh kha Zorini chuan hmu ve ngat se zawng, ava han run dawn tak em.

Tichuan, in chhung zau leh ropui fe mai a an han luh dun takah chuan nasa taka hawi hu hu loh chu  an tum ruh dun nasa mai a, mahse, banga thil intar frame mawi taktak te erawh chu an lo melh palh leh țhin thung.

" Eng thil nge ni ta. Lo țhu phawt rawh" tiin kawngka rawn hawn sak tu nula khan a rawn be chhunzawm leh a. Zorini te pawh an thutna tur hmuh ang angah chuan an thu zui nghal chawt.

" Eng lo, I chhungte hmu tura lo Kal Ka nia. A bikin i pi leh pu te" muang ban charh a a han tih lai chuan choka lam atang hian tuemaw, pa upa lam mah tawh hi rawn chhuak phei in, Zorini hmel a rawn hmuh takah chuan hrilh hai hmel tak hian a han ding khaw muang zui hrat a. Mahse, a pangngai leh vat.

" E, inleng Kan nei a nimaw" tiin Zorini thutna lam chu a rawn pan phei nghal a. Zorini thung kha chuan ngawi reng hian alo melh ve tawp rimgwt. A bul rawn pan phei mek tu chu chu chhungkaw zinga pa ber a nih pawh a rjng thiam nghal mai a, a awm dan chu a hrethiam lo. A hmel khan a ti zam nghal vek nimai hian a hria. A zam chhiat tawh sa nen, Amy chu mihring pangngai ah rawn Chang thut se la engkim hi rawn buaipui mai se a duh takzet tawh zawk. Hetiang thil vel hi ngaiah a nei thei thlawt lo a ni e.

" Nula, khawi atanga lo Kal nge i nih a. Eng thil nge i duh ve tak le?" zaidam tak, fiah fai fu si chuan a hmaa thu, patling hmel nelawm leh felfai thlup mai chuan a rawn ti ta nge nge a. Zorini chu a khur chhe lo chauh hi a ni tawh mai e. A chil a lem zui khawlh thei.

" Aizawla awm ve tho hi ka nia, ka pu, nangmah hi emni pu Tlangdina ber chu" ti hmasa in, a tawngkam thiam loh a leiah, tawngkam chu a chhep sual ang tih pawh a hlau kher. Chutihnakalaiin, a hmaa țhu patling lah khan fiah zet hian alo la en reng mai bawk si a, a rilru chu a hah tawh hluah hluah a nimai e.

" Aw ni e. Kei hi Tlangdinmawia ka ni a. He in chhungah hian pa ber ka ni bawk e. Chuan, ilo Kal chhan chu han sawi ta che le" a rawn tih tak dap dap ah chuan Zorini pawh chu a insiamtha ve ta sauh sauh a, pangngai taka lan a duh bawk.

" Ih.. Ka pu, hetah hian in chhungkaw tana hriattur pawimawh lutuk rawn sawi tura lo Kal ka nia, eng lo, I awih kher lo maithei e. Ka han hrilh tlang tawp che anga, kei hian mitthi tawh thlarau ka hmu thei a!" chumi a sawi laia Pu Tlangdin hmel mawlh chu a hmu tu tan pawh hmuhnawm tham a ni e. A meng zau kawk a, khaw dang a hawi thei tawh lo. Amah Zorini chungah ringawt chuan a mit a awm tawh a, mak a tih hmel takzet zet a ni.

" Engtiklai pawhin chu thlarau chuan min chenchilh a, ka kiangah a awm bawk a, tin, pakhat chauh ka hmu thei lova, thlarau hrim hrim hi ka hmu thei tihna nih chu. Mahse maw ka pu, he thlarau hian min tibuai ngai lem lova, nasa takin min tanpui thin zawk a, kei chauh nilo, buaina lian tak tak nei tanpui ngai tamtak te pawh keimah Kal tlang in alo pui tawh thin. Thudik engkim a hre vek a, a tan chuan a harsa lo. Ka sawi duh tak zawk chu, hman deuh khan ka thiante nen in cafe ah khan Kan rawn chawl ve a, nuam pawh Kan ti khawp mai. Mahse, kan rawn chawlh ni tak khan cafe ah buaina a awm ta a. Kangmei a chhuak a nih kha. Khami țum khan kei leh ka thiante pahnih ngawt pawh meikhu vang khan ni khaw hrelo in Kan lo awm phah ve a, tunah erawh chuan kan țha tawh lutuk thung. Ka pu, saw cafe in sakna ram zau tak saw nangmahni ta ngei a ni em? In hmingin engkim a Kal takzet em? Nge, chuh pui tu in nei thin zawk tih hi zep awm miah lo in min hrilh la ka duh a ni. A chhan chu, ka thu hriat ve tamtak nen hian a inmil thei hlauh a nih chuan in chhungkaw tan hian a țha dawn a. In dikna chanvo humhim sak che u hi ka duh ber a ni bawk. Khawngaih in min chhang ta che"  tlemin a zamna te kha a bo țan tawh a, a tawngkam pawh a pangngai Sawt ta viau e. Tin, amah pawh a inringtwk chho leh viau ta bawk. A sawi zawh hnu chuan boruak chu a dai deuh duak thei a, a reh tlawk tlawk bawk. He patling hian an chhungkaw chanchin chhia zawng zawng hi a bulah hian a sawi ve duh kher a ngem. A sawi duh lo a, a ngawi hmak a nih zawngin anni thian dun hian tih theih an nei tlem khawp ang le..

Mahse, a rin loh tak maiin Pu Tlangdina chuan a thut dan a Siam țha sauh sauh a, a aw a rawn thian khurh khurh bawk a, amah chu fiah tak bawk jn a rawn melh leh ta reng mai.

" Nula, tunhma in ka hmu ngai hauh lo che a, ka hriat zawng lah ini hek lo. Marawhchu, keimah zawk hi thil zep pheng phung nei chi ka ni lo zawk a, ka hrilh ve Mai Mai ang che. Chumi hma in, tun maia i thusawi te kha ka awih ta e ka tihna erawh a ni hauh lo thung aw. Ka awih zawng pawh a ni lem lo bawk" a rawn tih tak charh charh ah chuan Zorinpuii chu alo thaw deuh sawng sawng thei a, a thil sawi ve te kha a awih emaw, awih lo emaw, thudik a hriat phah theih dawn phawt chuan pawi a ti hran chuanglo.

" Keini chhungkua hi Lunglei lam atanga rawn insuan lut Kan nia. Chhungkaw hung tak Kan ni bawk. Tunhma, kan pian ve hma hawt atang tawhin Kan pa ber Rozika hian Mizoram chhung hmun hrang hrang ah sumdawnna alo khawih kual hrep tawhh a, kan harsa lem lo bawk. Tikhan kan unau zingah rau rau pawh kei hian ka pa hnung chu zui chho in a theih dan dan in sumdawnna bul chu ka han țan ve ta a, ka tluang phian lehnghal. Ka unau dang te kha chuan eizawnna hrang hrang neiin sawrkar hnathawk an ni fur bawk a, ka chhang chiah Khawvelmawia thung hi eizawnna nghet nei bik lo, a rem rem thawk a tal ve mawp mawp thin a ni. Tin, chhungkua pawn Kan chhawm dawl leh Kan buaipui rawn a ni țhin fova, heti Chung pawh hian a unaute hi mi zah derna leh hlauh derna chhetemah a nei thei chuang lo. A chapo em em ringawt zawk a ni. Tichuan ka han hrilh zung zung che anga, unau zinga thuawih leh nu leh pate zah der thiam ber kei chu ka pa in min duhsak chho in engkim ah Kan hma khua a rawn ti eng ta em em a, in hmun leh ram țha tak tak pwh min pe ta nual bik reng a nih kha. Chung zawng zawng chu kan nau Khawvelmawia chuan hre ve lo thei hek lo, min thik a, min er ta em em mai a, a nupui fanau te nen tangkawp in keini chhungkua chu min tibuai ta fo reng a ni. Inhnaih taka khawsa e ti lo chuan kan inmil thei ngai lova, min tihbuai dan leh tih thinrim dan ringawt an zawng țan a, huat nachhan tur Kan han neih loh tehlul nen hian tunah chuan unau piang hmun kha hmelma ah Kan in chhuah hi a ni ta ngawt e. Nia, I rawn sawi tum tak cafe sakna ram pawh saw min chuh pui a, min chhuhsak an tum a, Hmanni a kangmei chhuak ah pawh khan an inhnamhnawih tih chu kan hre ru vek alawm. Mahse, chhungkua unau inhmuh thiam loh kha a țha lo ve Kan tih avangin Kan ngawi zawk a ni. Kan ngawih vang tak hian mi tamtak te pawn thiam loh min Chan tir a, hliam tuar zawng zawng te chungah nise mawh Kan phur vek ta bawk si. Tunlai chu kan Chung a pik in kan chhungkaw thaw hi a ipik hluah hluah a ni ber e"  a sawi zawh rual chuan a han thaw zui lej hawk hawk thin a. A sawi ang tak tak khan a rilru a hah hmel takzet. Tin, Zorini chuan amah chu uluk zetin alo en tlawk tlawk bawk.

". A nih chuan Pu Din, engtia hmalak zel nge in tum tak?" lo ti ve leh in Amy kha ava melh zauh bawk a. Amy pawh kilkhat ah, naupang thuawih hmel fahran hian felfai takin alo thu diam reng bawk. A che eih lo. Milim ang mai a ni.

" Kan ngawi ang. Kan tawrh theih loh tawp a thleng a nih loh chuan kan ngawi tawp ang" tia Pu Tlangdina'n alo chhan let takah chuan Zorini chuan tihnghaihna a hre zui ta lo hle a.

" Awle, in thu thu alawm" tiin a thutna chu a thawh San hluai a.

" Kan Kal phawt Mai ang" a ti leh puat a, Amy chu mitmei hmanga signal nghal in an chhuak zui ta nal nal. Chu tah, a hnung lawkah chuan riat nawk nawk chungin Amy khan a rawn umzui ve dat dat reng a.

" Engvang in nge i chhuah ngawt a. I tihtur Ila zo fel reng reng hleinem" a rawn tih chuan Zorini chu alo ding zui dat. Hawi let vutin Amy chu a han melh ta vang vang mai a.

" Eng nge ka tihtur dang chu. Ka tihtheih cju tikhan a zawh tawh kha. Chhungkua thisen zawm an nia, hre reng chungin an ngawih pui a, kei hian eng nge sawi theih ka va neih tawh ang. Mi chhungkua ah hian ka inrawlh buai peih lo ka tih tawh kha" ti hlawk hlawk in hmalam a pan San leh a, Amy pawh chuan a umzui ve zel ringawt.

" Ni lo Zorin, tihtheih Ila nei dawn alawm. Lo nghak rawh. Ka thu hriat ruk hi a thleng dik a nih ngat chuan tihtheih i nei em em ang" lo ti ve leh mahse Zorini chuan a beng a chhu ngawng tlat tawh a, motor ah a thu lut daih bawk.

In chhung an luh thlengin a tumah mah chuan tawng chhuah zai an rel tawh lova, Zorini lahin eng thildang mah a ngaihtuah chhunzawm duh tawh hek lo. Amy khan eng thu nge a sawi a, eng thil nge thleng tur a sawi tih velah a buai peih tawh lova, a mu zui hmak. A khum sir atang Amy chuan a khawsa zia chu ngeih loh hmel zet in alo thlir ve tlawk tlawk reng a, a ner sak sak reng bawk. He nau luhlul leh tih tih mawh lutuk hi a siamthat theih thlawt loh a ni e tih chu a rilruah a rawn awm nghal a, hman atang tawh khan a thu hi a duh em em reng a, tih fuh a nei Mang Chuang bawk silo. Awmze awmlo a luhlul ve ngawt hian awmzia a neih thui loh zia chu he nu atang hian a chiang viau awm asin.

Zorini rilru ah reng reng Pu Tlangdina te chhungkua in hmuh an Chang leh tawh lova, tunhma ang tho khan a hun chu khawhral leh in Nitin dawrah a țhu a, Sangpuia nen pawh an inhmu Nitin leh tawh a, an leng chhuak dun fo bawk. Chutihlaiin Amy thung kha chu pawn lam ah ama buai buaiin alo buai ve a, in chhungah hmuh tur a tlem thei hle. Chu erawh, kan Zorinpuii chuan hria ang pawhin a lang lova, a ngaihven hek lo bawk.

Zan khat erawh chu, dawr atanga a haw, in chhung a luh rual hian tv chunga Amy lo thu ar ar chu ava hmu hmasa ta ber a. A melh zawk. Kal tlang mai tuma in Chung panna Step a pan lai chuan tv en a lo thu ngawi reng a nu zawk khan a rawn ko ta thut a. A ding chat.

" Bawihi, tlai lam chanchinthar hi lo en ve mah teh. Hei, hmanni cafe in va chawlhna te, a neitu te Fanu naupang kha a chhun thil ei zo a tlu tawp a, a chil phuan a tla bawk a, a thi ringawt an tih hi! Anmahni cafe chhunga thil thleng tho a ni leh bawk a, a mak zozai khawp mai. Tûr te hian an hrai nge maw ni dawn le" ti zui nuah nuah in, a nu thil sawi chuan tlem jn a awmdan chu a ti danglam ve hlek a. Ngaihven zui vak ngaihna erawh a hre Chuang silo. In Chung panna step ah chuan chho zui ta tho in, a ngawi reng a. A rilru ah erawh a nu thil swi hlir kha a awm thung. Room a luh rual rual hian Amy pawh kha alo thleng zui chawp chilh ve nghal a. A râk chhunzawm nghal char char hi a ni ringawt e.

" Ka sawi kha. Tihtur i nei dawn ka tih che kha" rawn ti hmasa ber in, Zorini chuan alo melh zui deuh kawk a.

" A eng berah chuan maw tihtur ka neih leh dawn a. An Fanu in thil a ei sual palh a, a thih pui bawk a, chu tah chuan eng nge ka tan tihtur awm. Police in an tihtur chu an hria a an ti vek mai ang chu" alo ti zui hlak. Mahse, Amy thung kha chu a dang duh ta hauh lo.

" Zorinpui, I ngawh hi ti ngawl viau lo teh aw. Tunah hian saw mite chhungkua sawn buaina lian tham an tawk chho mek a, chu pawh an thisen zawm te hnen atang ngei ala ni zui. Nang hian thudik i hria, tunge he thilah hian inrawlh a, tu berin nge buaina chawk chhuak thin tih pawh I hre vek. Eng vangin nge i ngawih reng a. Thudik chu va sawi chhuak mai ta che. Hlauh i nei emni? " ti piap piap in tun țum chu a thin a rim hmel takzet a, Zorini pawh chuan mak a ti tawh zawk.

" Amy, mi chhungkaw buaina a nih hi. Diktak chuan a lehlam chhungkua pawn heng zawng zawng thlen tir tu chu tute nge tih an hre vek tho a, an zep tlat alawm le. Kei hian eng thil mah ka va ti kaw lo tawp ang le. Ngawi Ila a fuh zawk" alo tih leh pawh chuan Amy chu a la zam duh lo

A ngawi thei tlat lo. Nasa takin a lu chu a thing zui nawk nawk a, a meng Sen vek tawh bawk a. A thin chu a rim takzet zet a ni e. Zorini pwh chuan a awmdan mak lutuk chu a hlau lek lek tawh mai. 

" I puang zar em em ang" tiin room chu a Chhuahsan nulh a. Zorini nuam ti lo khan inhnuai thlengin a um thla ve nghal bawk. Mahse, inhnuai a zu thlen chuan hmuh zui tur awm lo hian Amy chu a bo zui leh ta daih a. Choka ah chuan a hawi a hawi ringawt. Chu tah, a nu lah khan lo hmu fuhin

" Bawihi, eng nge ni i zawn chiam chiam a, Iva hawi kual nasa ve" a rqwn tih chuan Zorini pawh chu a harh ve leh chauh a. 

" A.. Eng nilo, thli kha ka rawn um a!" a tih tak heu mai ah chuan a nu leh a nau Malini kha an lo in melh zawk a, an hawi hai nasa viau bawk. Sawi zui tur pawh hrelo in Pi Rinfeli pawh chuan a tv en lai a off a, roomah a luhsan ta ringawt. 

" Zorinpui, tho rawh! Tho nghal rawh! Che ta che " ti nghek nghek thawm a hriat takah chuan Zorini chu inperh tho zui zawk in a hawi buai nasa lehpek hle. Mahse, a bul lawka Amy lo ding reng a hmuh takah chuan pangngai ve leh maiin, a khi suk ringawt a. Sawi tur em em pawh chu a hre ta Chuang lo. 

" Tho la, tukthuan i ei fel zawh ah tihtur Kan nei dawn a nia. Ka hrilh ang thlap che hian khawsa ang che" thu pe aw taka Amy'n a rawn tih tak hmarh hmarh ah chuan hnial lem lo in a tho chhuak a, ham bai bai Chung hian 

" Awle Boss" a ti ve ta ngawt. 

" Amy chuan eng tak thu thar rqwn hre leh ang maw" tih ngaihtuah rauh rauh Chung chuan tukthuan pawh chu tui ti lo zetin a tling tla ve hram a. A puar leh puar loh pawh a hre nek lo e. 

" Amy, ka hman a nia" tiin bathroom chhunga tawm mek Amy chu a han ko leh lang lang thin a. A rawn chhuak Har hrep lehnghal. Eng tak chu ti ve ang maw tih alo ngaihtuah lai mekin Amy chu sam pawr zet hian a rawn chhuak ta chhap chhap mai a. Zorini nuih chu a ti za kher. 

" I kua a dik lo emni?" uang pah ti tih a alo tih lai chuan Amy chu a ner deuh sak sak reng a. Chhan pawh a chhang let peih hek lo. 

" Kal Ila. I hriat tur chu tunah hian Pu Tlangdina te chhungkua khan an Fanu chunga thil thleng hriat fiah duh vangin station an pan mek a ni a, kan thleng rual hial maithei. Chutah tak chuan nang hian inrawlh hun lo hria la, engkim puanzar sak ang che. He case hi tawp tawh se. Thil engkim hi fiah takin rawn lang tawh se ka duh. A bak thil thlen dan kimchang chu a tlachawp in ka la hrilh leh dawn che nia" tiin kawng tluan deuh thaw chuan a hrilh phei ta mial mial a. Zorini pwh kha a khât tawkin alo bu ve leh nghat nghat thin. 

Station an thlen lai hian mihring an tam angreng hle a, case hrang hrang pu lut an ni bawk a, an ri nuai nuai a tih theih awm e. Police duty ho pawh chu țhu hle hle hman awm lo in an phar buai viau bawk a, Zorini leh Amy pawh mi tamna zingah chuan zawn nei tih hriat takin an lo hawi kual ve nasa. Mahse, chutia an lo hawi kual ve vak vak lai chuan station kawtah chuan motor nalh leh changkang tak hi a rawn ding thum ve ta dat a. A chhung atang chuan Pu Tlangdina te chhungkua kha a mal te tein an rawn chhuak zui ta diah diah bawk. Zorini chu a zam leh titih der tawh. Mahse, engkim hre thin AMY kha a kiangah a awm ve tih a hriatchian erawh chuan a zamna te chu vawm bo ang duak hian an kiam leh țhin a, engkim mai hi a hmachhawn ngam leh zawk thin chauh a ni. 

Pu Tlangdina'n Zorini hmel a rawn hmuh chuan alo la hre ve ni ngei tur a ni. A rawn nuih ta suk a.

" Nula, hetah daih daih te eng nge i rawn tih ve dwn a" rawn tiin, Zorini chu a lo kiai ve suk. Tin, a bula rawn Kal ve nutling, la naupan hmel angreng tak leh nu te lampang hmeltha phian si chu a nupui a nih pawh a ring nghal mai a. A mitmeng atang chuan țap zo hlim tih pawh a hriat viau awm e. Ni e, nimin lawkah an Fanu duat tiang khan an Chan zo chiah a, tunah buaina hlir in a hmuak leh bawk si, an Chung chu a pik ve khawpin a rinawm.

" Ka pu, Helai hmunah hian min mamawh dawn tih ka hria. Lut ang u" inti zam duh lo taka Zorini'n a han tih leh takah chuan midang ho chu an ngawi mai a, an zui ve Mai bawk.

SI lo thutna lam chu va pan deuh sawk sawk in ani chuan an harsatna chu alo zawt ve vat bawk a. Hetih lai hian Zorini leh Amy te kha chu kil khatah an lo ding ngawi ve rih a, boruak awmdan a zirin Zorini pawh puak chhuak thei reng a ni tawh e. Thu hriat thar a ngah tawh em em a, thudik vek a ni tih a chiang bwk a Amy zarah, a inring tawk leh tawh hle.

Pu Tlangdina chuan SI hmaa thut hmun han rem that sauh sauh pah chuan

" Ka pu, ah keini hi tunlai chu buaina neuh neuh kan ngah riau Mai a, police te nen pawh Kan in hmachhawn ngun ta viau e. Kha, Hmanni lawkah pawh Kan cafe kangmei chhuak vangin buaina namen lo Kan tawh tawh kha. Chumi hnuah hei nimin chhun khan Kan Fanu te ber in mual min han liamsan leh a, chu pawh thih țha a thi lo in, chhui zui ngai chi bawk a han ni leh a. Ah, sawi pawh hi a hrehawm zawk e"  a tih mek laiin Zorinpuii kha a rawn inrawlh ta chat mai a! An hawi phei nghal thap.

" Pawi khawih tu I hre reng a, I ngawi tlat a nih kha! Pu Din, pawi khawih a in chhungkua chawk buai tu hi thu neitute hnenah hian sawi chhuak la, pe rawh. Tichuan, he case hi a tawp anga buaina in nei tawh hek lovang" rawn ti ve in, police SI chuan uluk zet hian Zorini chu alo melh ve ngat ngat tawh a. A mitmeng a thip bawk si nen a zam awm duh kher ang chu.

" Nula, tunge i nih ve le" SI chuan rawn ti ta nge nge in, Zorini pawh kha an awmna lamah chuan zam hmel pu duh tawh hauh lo hian a rawn phei ve nal nal mai a. An lo thlir thap. Tin, Amy kha alo țang na hle tawh a, a kut pawh a hum ruh nasa lutuk a a sen vek tawh hial.

" Zorinpuii ka ni e ka pu. Helai hmuna ka rawn Kal ve nachhan chu thudik puangzar turin a ni bawk. Ni e, he ka pu Tlangdina nen hian reilote Kan lo inkawm ve tawh a an buaina tawh chungchang ah. Tin, kha an cafe a kangmei chhuah ni khan ka thiante nen Kan chawl ve bawk. Kan chawlh lai taka kangmei kha rawn chhuak a ni a, rei tak chhung chu ni khaw hrelo in damdawiin ah Kan lo awm ve hman hial a ni. Ka sawi tum tak chu, heng an buaina zawng zawngah hian Ka pu Tlangdina hian tunge inrawlh a inhnamhnawih a hrechiang hle a, mahse a tlangzarh duh miau loh avangin nimin mai ah pawh a Fanu nunna khan alo tuar leh ta si a, pawi ka ti khawp mai. Chuvang chuan, ka inrawlhna tur eng thilmah awm hauh lo mahse thudik a bul atanga a a tawp thleng a hre tu ka nih ve avang hian engkim hi puan chhuah sak a an buaina hi tih tawp sak ka duh a ni. A nih loh chuan hemi te chhungkua hian buaina lian leh rapthlak zawk an la tawng dawn chauh" rawn ti ve hmarh hmarh in, pu Tlangdina nupui kha alo inhnit ri ve ta faih faih a. Sawi chhuah duh nei si, a pasal hlauh vang a ngawi mai mai a a ang ta berin Zorini chuan alo hre tawh. Chutah SI bawk khan Chang fak hian

" I thu hriatte chu engpawhnise han swi hmasa la. Boruak in thil awmdan chu ala rawn hril zel ang chu"  a rawn tih leh takah chuan Zorini chu alo phur ta sauh.

" Awle, kei hi min ring lo Maithei a, mahse, Mizoram chhunga case tamtak ah hian police te ka lo pui tawh thin. Chu chu ka fin fal vang leh ka thiamna vang nilo in, min puitu thlarau duhawm tak ka neih reng vang zawk a ni. Pu Din, I bulah chuan ka sawi tawh kha aw. Tunah pawh hian chu thlarau chu ka kiangah a awm ve reng a, kei chuan ka hmu thei. Tin, thlarau satliah a ni lova, Khawvel buaina te chingfel tura Pathian bel Ruat zawk a tih theih ang chu. Pu Dina te chhungkaw buaina pawh hi a tir atang khan engkim min hrilh tu a ni a, ka awih lo zawk. Chubakah mi chhungkaw inkara lo inrawlh ve kha ka duh loh vangin ngawih ka thlang a. Mahse, tihian an ni chhungkua lah chu an buaina a lian tual tual a, nakinah phei chuan an Mang vek lo ang tih a sawi theih hauh loh. A chhan pawh, Pu Dina unaupa, pu Khawvelmawia khan a unaupa te chhungkua hi a itsik em avangin Tûr hmanga hrai hlum vek a duh thu alo sawi tawh tlat a tin ni! Tichuan, an Fanu kha tu thah nge a nih in rin tak. Pu Din, nimin a in chhuah bo lai khan in cafe ah I unaupa kha alo Kal a, sazu Tûr a rawn keng bawk. Mahse, i choka hnathawk te khan eng nge a Ken an hriatpui lova an ngaihven hek lo. Tichuan, I Fanu chhun thil ei tur an pek ah khan a rukin sazu Tûr chu alo pawlh sak ta a. Khatiang boruak kha in tawng ta a ni e. Heng zawng zawng i hriat hnu hian thil sual titu hi ila zep tlat dawn em? I zep bo reng chuan a mal te te in in la tuar vek bawk ang. Ka sawi hi awih la zawm la, man tir rawh"

" Hetianga ka chhungkua puh hming chhe tur hian tunge maw inih le! Ka unaupa te chhungkua ai pawhin nang hian min lo ER zqwk a nilo maw? Tu nge inih?" a thutna thawh San in Pu Tlangdina chu a tho chhuak zawk a, a thin a rim hmel kher bawk. Chutihlaiin Zorini thung kha chuan hlauhna chhete mah a nei ve eih lova, a thut ngai rengin ala țhu thung. Tin, nu ber țap pawh kha ban zai rel lo in a insut rjng tual tual a, a awmdan ah a hlau hle tih chu hai rual a ni lo.

" Nang er tur che hian tunhma in hmelhriat sa na che ka nei ngai lo. Eng dinhmun ah nge in rin tih lah ka hre hek lo. Ka sawi kha I hre fuh lo emni? Thlarau ka bia a, ka hmu thei. A chiang tawk em? Buaina duh lo a ching fel thin mi, chin fel tum tlat thin mi Kan nih avang hian nangni ang thudik hre kur Chung pahw a ngawi tlat thin te hi an kâ Kan lo an tir tawh thin zawk a ni e. Ka Pu, keini chuan thudik chauh kan duh. I thisen zawm rau rau ah u unaupa, I laka rilru țha pu ngailo kha nge i thlan dawn a, hmalam hun eng tak nei chunga a nunna thlah tu I Fanu kha. I rilru Siam fel rawh " rawn ti zui ve leh pang pang in Pu Tlangdina thinrim chu a inseh ruh nasa tawh hle a. A thinrim takzet tih pawh a hmel ah hai rual a ni ta lo.

" Ka duhthlan tur chu ka thu neihna. Ka chhungkua hian ka thu an zawm a, ka thu lo in eng thilmah an ti ngai hek lo. I hria em? He chhungkaw buaina ah hian inrawlh ve turin Kan sawm lo che a, chuvang chuan min lo VA haw San tawh mai ta che" aw khur dur dur chunga a rqwn tih leh chuan Zorini kha ala zam map lo,, a thut hmun rawn thawh San zawk Chung hian Pu Tlangdina chu fiah em em in a melh ve ta kar a.

" I chhungkua in a kawi a ngil a I thu ann zawm vang a nih hi thudik puang chhuak tur pawn huaisenna an neih hauh loh. An hlau che tih hi hre rawh" a sawi zawh rual chuan Pu Tlangdina khan kut thlak a tum ta Mai a, an ri zui hlut. Chutihlai chuan Bang kil lama chhuar in hung kha a rawn che ta dawt dawt mai a, nasa taka sawi tu awm ang mai hian a che hlawk hlawk a tihtheih awm e. Anni ho chuan thlir zui thap in, Zorini tih loh kha chuan mak ti em em hian an en reng ringawt a, an hlau bawk. Chu chu duhtawk mai lo in Amy chuan a thil tih theih a lantir zel a, chu SI room chu a ching let a ni ta ber e. Chutah, Pu Tlangdina nupui hlau tawh lutuk khan a beng hup chunga mit chhingin

" Tawk rawh! Duhtawk tir rawh. Thudik chu sqwi ang che. Thudik chu sawi rawh. A tawk tawh. Ka peih tawh lo. He buaina hi ka duh tawh lo ka hne lutuk"  a rawn tih tak nghek ah chuan Amy pawhin a thil tih lai chu a ti tawp ve ta vat a. Thawm reng reng chu a reh zui hmiah.

" Eng thil nge maw I sawi chiam chiam tak le" vin tuarh a a nupui lam hawi chungin Pu Tlangdina chuan a ti zui that a. Mahse, a nupui thung kha alo zam duh ta bik hauh lo.

" Ka peih tawh lo. A tir atanga a tawp thlengin buaina min thlen awl lova i hre vek. Kan thup sak a, chhungkaw mualpho leh buai Kan duh loh avangin Kan ngawi a, a ni em em tawh lo. Tunah chuan eng thil rapthlak nge Kan chungah an thlen tir tak hi I hria em. Thudik hi sawi ila duhtawk ang. Ka peih tawh lo"

" He thlarau hmu thei inti thusawi hi ilo awih ngawt a nga maw? Nangpawh chu I Mawl hlemai"  a sawi zawh rual chiah jn a nupui bawk chuan țap hlawp hlawp Chung hian

"Eng nge ni vak. Dawt a sawi Chuang emni? Thudik Kan hriat sa vek a nih kha a rawn sawi chhuah. Kan sawi duh loh leh i zep bo hlir a nih kha a rawn sawi. Eng nge thu dang la awm Chuang. Kei chu ka tuar thei tawh lo" tiin SI chu chiang zet hian ava melh ta kak a.

" Ka pu, he nula thil sawi zawng zawng kha thudik vek niin, kan pa unaupa hian Kan chhungkua ah buaina namen lo a rawn thlen a, min tichhe ta vek a ni. Man ngei ngei ula ka duh bawk. Tualthattu a nih kha" a ti ta piap piap mai a. Amy leh Zorini chu an lo in nuih ve ta sak. Chutihlai chuan Pu Tlangdina khan sawi tur reng reng a hre ve tawh lova, a ngawi hmiah. Chu lai hmuna an tihtheih chu alo zo ta a. Mahse, an Chhuahsan hma in Zorini leh bawk chuan

" E chuan ka pu, in choka hnathawk te pawh zuah hlek suh ang che u" a han ti leh hram a. An kalbo zui ta a ni.

Nui ar ar chunga khuma mut thlak pah hian Zorini chuan

" Case an ching fel ta bawk a. Tunah chuan Lunglei lama zin ka chak ta hle mai" ti phar phar in a zi uan uan rneg bawk a. Amy kha alo ner ve leh sak sak.

" Lunglei ah chuan eng nge Iva tih ang" zawi Sapa a lo tih chuan Zorini chu a han thaw deuh ham ham phawt a. A hmel atang ringawt pawh chuan a eng a thawl in a thaw hi a veng hliah hliah tih a Hriat awm e.

" Kan zin ang chu.. Kan thian ho a Kan sawi lawk vek tawh kha a nia. Kei, Ludy leh Mary te, kan Kal ang. I peih leh min zui ve dawn nia" ti ham ham in inbual turin bathroom a pan a. Amy chu alo ner sawk sawk.

" Lunglei ah tlangval chhelo zawn in tum a nih kha. Lerh hlawm lutuk" ti sup in a chhuak bo ve nghal a.

****************************************************