A mak ka ti

A MAK KA TI!! 

Vanlalpeki Fanai

***********************

" Pa, ka nu chu alo kir tawh lo ang. Beisei bo mai a ni tawh. Chuvang in keini pafa hian hma lam pan tum Ila, kan chak zawk ngei ang" tiin, ka nu bo tak thut avanga mangang em em leh lungngai taka indawm kun mek ka pa chu ka han hnem ve mial mial a. Ka khawngaih takzet. Ni e, ka pa hian ka nu kha a hmangaih a, a khawngaih bawk a, a Kal hlatsan thei ngai heklo. Chutihrualin ka nu thung kha chu amah rel thu Chang lo nise, nu harhvang leh rual pawl em em mai a ni rauh a, a mawng a Zang thin in a beng var viau bawk. Ka pa mizia nen chuan inmil lo ve thin tak a ni. Ka pa hi pa tawm chawt chawt leh tawng tam lo tak a ni a, a zakzum ru thin em em bawk. Chuti chuan an nungchang inpersan dan tur chu in hrethiam tawh maiin ka ring.

Tichuan, ka pa chu mitmeng dul ruih chunga rawn hawi chhuak in ka mitah tak min rawn melh a. A chau tih ka hrethiam.

" Ni e ka fanu, I nu khan ka hmangaihna diktak hi hrethiam nise chuan heti hian a kalbo lo tur. Kei aia hmangaih tu mipa dang hi chu a tawng dawn hauh lo asin aw. A hriatthiam hunah meuh chuan khua hi a tlai tawh awm si a" zawi angreng taka rawn tjin, kei chu ka lo bu nghat nghat ringawt a. Hnem dan leh hnem ngaihna ber pawh ka hrelo. Patling a ni tawh a, kei lah naupang mai ka la ni bwk a, kei aiin a chin fel dan tur chu a hre zawk ngei ang ka ring.

Ka nu kha hmeichhe rilru chhia leh midang laka suahsual chhuah mi a ni ngai lova,midang nen buaina a neih pawh ka hre ngai hek lo. Mahse, sawi leh sawi hnu, hmeichhe pawn lawm tak leh a khât tawka thiante nena zu in zeuh zeuh a hrat hnu atang kha chuan inchhung Khawsak a buai zo a, chhungkua a thlahthlam tial tial a, a fate min ngaihsak lo in a pasal ka pa takngial pawhin ngaihsakna leh duatna a dawng tlem tulh tulh a, in chhungah hmuh tur a vâng pharh bawk. Chutiang chu kan dinhmun ni chho in, tu hriatpui siloh hian keini chhung chu kan buai ru ta em em a, nupa inngeih leh inhau ngailo ni si kha a khât tawkin an in bauh ve ta zauh zauh mai. Fa pathum zinga a upa ber ka nihna ah Kan chhungkaw dinhmun leh awmdan mek hre fiah tu ka ni ve a, ka rilru a hah in ka thaw hi a ipik ve thei khawp a ni.

Kei hi Lalmawizuali niin tunah hian kum 17na ka hmang ve mek a, nau mipa pahnih, kum 14 mi leh kum 11 mi ka nei bawk. Ka nau te pahnih hian Kan chhungkaw buaina buai chuar leh ril tak mai hi hre ve lo se, rawn hrethiam ve lo se tih ka duh thin a, mahse, rei tak chhung erawh chu a thup bo theih hauh loh ang le.

Hun a Kal zel a, ka nu chuan a khât tawka zu in zeuh zeuh ringawt chu duh khawp lo in ngaihzawng neih a ching leh ta tlat mai a. In chhungah hian hmuh tur a awm ngai tawh lo reng reng. A pasal fanau ten amah Kan mamawhna te, fa in nu a mamawhna leh pasal in nupui a mamawh zia te chu a rilru ngaihtuahna ah an awm pha tawh lo hrim hrim a. Chhungkua a nei ve tih hi a khât tawk chauhin a hrechhuak thin niin ka hria. Khawiah nge a Kal a, khawi hmunah nge zan a riah a, a pum puarna tur a hmuh thin tih pawh Kan hriatpui lo țan a, a phone nise a zu man tur a tan alo ti ral hmiah mai bawk si. Hei hi chhungkaw nu ber Khawsak dan tur a ni thei dawn emni? A teuh lo mai. Khawtlang ah Kan hming chu a chhe țan a, rual pawh pawl ve ngam lo in Nitin schoolah nise chhaih nawmnah Kan tawk țan a, thian Kan neilo tial tial a, keini unau, neitu neilo ang mai a tla ve Mai Mai chu a tu a te mah chuan min hnaih duh hek lo, min hlat tulh tulh a, thian ti a sawi tur Kan neilo tual tual a, mittui hi a rukin a tla tam ta malh malh hle. Heng zawng zawng hi ka nu vang a ni e. Ka mawh chhiat lo theilo.

" Au, school ah leh inkhawmnaah pawh ka thianten min be duh tawh lova, kawm tur pawh ka nei tawh lo. A hrehawm thei lutuk"  mittui tling piau Chung hian ka nau, Ka chhang chiah Lalropuia chuan hrehawm tih hmel em em in a rwn sawi ve mial mial a, ka khawngaih takzet. Hnem ngaihna tak pawh ka hrelo. Keimah pawh hi mi lungngai, hnem chawp ngai ve tho ka ni a, hnem tu zawnga buai ru em em ve mek ka ni asin le. Hmeichhia ka nihna angin nu ka mamawh a, hmangaihna leh duatna ka mamawh bawk a, mahse chu chu tun atan chuan van a rah ang hlauh an ni rih bawk si. Ka tan chuan Khawvel hi a hrehawm ipik zozai em mai.

Ka nu leh pa te hi kum lama la upa lo ve ve an ni a, kum naupang te an nih laia innei niin, ka nu kum 23 na hi ka tawmpui a, ka pa erawh chutihlai chuan kum 27 mi a ni ve tawh. Kum naupang lutuk a pasal nei a nih vang hian ka nu hian nulat akham lo emni ang aw tih te hi ka ngaihtuah ve fo tjin a, chutihrualin ka pa pwh kha nupui a neih lai khan naupang tak ala ni ve tho a, nula lamah a hlei chhunzawm Chuang hauh silo. Kan dinhmun hi Pathian hnenah vawi tam ka thlen tawh a, tap chunga ka tawngtaina nise vawi tam tak a ni ve tawh a, tun thlengin chhanna erawh ka la dawng lo thung. Pathian khian ka tawngtaina te kha a ngaithla a ngem? Vawitam a tanpuina ka dil ve tawhna te khan a beng an thleng phak a ngem? Beidawng a rum mai ka tum lova, ka chakna neih zawng zawng te hi sawm khawm a a hma ai mah a tawngtai nasat chu ka la tum sauh sauh zawk. Beidawng a indawm kun thei ka ni lo.

" Pi, zanin tlai chaw chhum tur Kan nei tawh lova, tunlai chu ka pa in hnathawh tur a hmu thei bawk silo, I pi te buhfai va puk lawk mai rawh min tia ka lo Kal ringawt"  tiin ka nu nu, ka pi hmaah chuan inthlahrung deuh hian ka ding zum zat a. Ani thung chuan melh pawh min lo melh peih lo. Ni e, hetah hian ka han sawifiah leh lawk anga. Ka nu chhungte hian ka pa hi an duh lo hle thin a, ka pa hi fahrah, nu leh pa belh tur neilo a nih bakah chhungkaw harsa ve tak atanga rawn chawr chhuak a nihna te hi an sit a, an iai thin a, tin, amah an duh tawh loh sa nakalaiin an inneih lai khan ka nu kha ala naupang ve bawk si a, chu chuan ka pi te thin hi a ti ur fo reng a, tun thleng hian keini pawh nise min rawn ngaihsak țha duh lova, tunah ka nu kha heti hi a han ni leh a, min ngaihsak duh loh sa naklaiin tunah phei chuan ka nu a rawl bo daih tawh a, an tu leh fate Kan ni tih hi a hriat pawh an hre țha duh tawh lo nimai in ka hre thin. Chutiang chu thil awmdan nimahse keini pafa thung chuan an ni lo hi chu belh tur dang Kan nei hauh silo a, ka pa chhungte belh tlak an awm lo nen, kan tan chuan kawng hi a tawp ve chiang em a ni. 

" Hna a thawh loh miau chuan chaw pawh in nghei ngam mai tur alawm. Thawk peih silo, nghei ngam Chuang silo" ti hlak hlak in a thutna atang chuan a tho chhuak țaih țaih a, choka lam a pan nghal. A kalna a Kal ve Mai ka han tum chu rang zet hian min rawn melh vat a, chutah, ram hmarh in

" Ding rawh. I rawn Kal ve zel pawh a țul lo. Ka rawn pe mai ang che" ti leh hlukin kei chu ka lo ding chiang kher. Hetiang hi pi in a tu leh fate a en dan tur a ni thei dawn emni ka ti. Ka nu leh pa te chungchang chu engpawh lo nise, keini an fate hian an eng pawi nge Kan sawi, tawnhriat neilo in kan piang chhuak a, nu leh pa nise Kan duhthlan theih ni bakw hek lo, kan pian chhuah rual khan nasa takin an pawi Kan sawi nghal tihna nge. Sual sa a piang mihring ni mah Ila mihring mithmuh ah sual Kan la khawih ve ngailo asin. Naupang rilru thianghlim tak pu rual chauh kan la ni e. 

Tichuan, a buhfai min pek phal zat, tlai lam chhum khawp daih chiah chiah chu khai haw in ka nau Ropuia nen chuan kan inzui haw leh hnek hnek a, ka nau kut chu kaiin sawitur pawh ka hrelo, ka ngaihtuahna Kal bing lutuk chu thildang ah ka rilru ka dah thei thlawt lo a ni. 

" Au, Aa pi te hian tinge min duat loh em em le tiraw. Ka thiante chu an pi ten an duat a, thil te an leisak a an pe thin a. An pawm bawk thin"  ka nau chuan rawn ti leh in, amah chu ka melh pah zawk ringawt a. Chhan ngaihna tak pawh hi ka hre thin lo. Keimah ka in khawngaihna ai mahin ka nau te pahnih ka lainatna hi a zual zawk a, hei tak hian min ti Chau zual thin a ni ber. Nitin zawhna chi hrang hrang harsa tak tak min zawt awl lova, chhanna ka pek loh pawhin an zawhna chu a bang Chuang silo. Pathian hnena ka harsatna thlen mawlh mawlh mai loh chu kei hian tih theih ka nei tlem em a ni. 

Ka pi min lo dawnsawn dan zawng zawng te kha ka pa bulah chuan hrilh ve kher a țul ka ti lem lova, amah mah rilru hah tawh sa nen a rilru chu tihah belh chhahsak ka duh tawh lo. 

Ngawi reng in eirwng chu ka bawl chhunzawm a. Ka  pa erawh chu kawmchar lamah ngaihtuah bing nei tih hriat tak hian rilru ipik hmel em emin a thu ngawi char char thung. Ka nu Kal bo atang khan hetiang hian biak hleih theih loh khawpin a awm fo thin a, ka nau te pahnih phei chuan an hlau titih thin hial. Chu erawh, a chhan diktak an hriat loh vang a ni a, kei chuan ka hriatchian miau avangin ka hlau lova, ka khawngaih lutuk zawk tlat. Ka nu chanchin a sawi ri ngai lova, ka zawh ngawih ngawih pawhin a sawi tha duh ngailo. A chanchin chu hriat a chak rualin hriat tam erawh a duh lo thung a, a hlau ni ber in ka hria. Vawikhat erawh kha chu a ngaih zia thu a rawn sawi chhuak ve a, a ngawi zui daih thung. Ka ti ta Mai mai a, amah ka pa hi zu in mi nise chuan tun angah te hian zu leh sa nen a chen a nga, keini a fate pathum hi kan va han rethei zual dawn tak em ka ti thin. Mahse, vanneihthlak takin zu hi a huat takmeuh meuh in a haw hlauh a, chuti nilo se keini unau Chan tur chu fahrah te In a ni ringawt tawh ang. 

Tichuan eirawng pawh chu karlo ah bawl zo in, chawhmeh siamtur a awm lem lo bawk a, zanriah chu ka peih hma hle. Chaw ei ka Siam zawh rualin ka nau chu ka pa ko turin ka tir nghal a, ani pawh a tlan zui vat. Zanriah kil tura lo Kal ka pa hmel ka han en chuan ka rilru hi a rawn na thar leh vawng vawng thei a, ni e, a hmel a tla duk tawh a, a hmai a thim em em bawk a, a mitmeng nise a Vai ruai ni ta berin ka hria. Mu leh mal pawh hi a nei chiah lo. A chaw ei a tui thei tawh lova, ei loh aiah tak tak bar hnih khat hi a bar ve thin. A eng tihmah a tui thei lova, hna han thawk tur pawhin chakna rneg reng a nei lova, rual a pawl theilo zo a, eng thilmah hi a eng zawngin a thlir tawh ngai hek lo. Chu chu tuna ka pa nihna a ni a, hetiang pa hi ka nei ang tih ka ring lawk ngai bik lo. 

" I nu in a kalbo San che u tiraw? Khawnge a Kal a?" 

" I nu chu engtikah nge alo haw ang. Pasal a um emni?" 

" Mawizuali te unau chuan nu pawh an nei tawh lo e, a nu in pasal dang a  um San a" 

Chutiang zawhna leh tawngkam mei nei tak tak chu nitin hian puitling leh naupang hnen atang ka dawng ta fo thin a. Men ngaihna rneg reng min ti hre ngailo zawk. Ka zak a, tlawm thlak ka ti bawk a, hling ang mai hian min chhun na vawng vawng thin. Kha an tawngkam, thumal tawi te ni si khan an mihringpui lakah hian eng ang in nge hna a thawh anga, a nat pui ang tih reng an dawn pha tawh lova, a diriam thei tur berin kei chu min chhu zui ta ngat ngat mai țhin a ni e. Mahse, pawi pawh ka ti tawh Chuang lo, ka pa tawrh ai hi tuar thei Ila, a nat ai na Ila, engkim hi tawrh sak Ila ka tih laiin heng tawngkam ngeiawm taktak te hi kei hian ka lo tawrh chhawk ve ah ka ngai ta Mai. 

Mahse, ni khat erawh chu sual in min bei ve nge ka hre lo, ka rilru ti na a ti hnual ngawih ngawih tu tawngkam ka dawng leh ta nawlh mai a. Ka tuar dam lawk theilo nghe Nghe. Kan school kalkawngah hian chenna In engemawzat Kal pelh tur awm in, Chung zingah chuan ka pi thiannu pitar ve tawh tho, Pi Dintluangi hi a awm ve a, nitin mai hian ka school kal tur chu mi lo be ve thin. A nihna takah chuan tunhma khan min duhsak a, min duat ve thin hle a, kan unau hmel a hmuh rual te pawh khan rem leh rem lo hian min lo ko ding a, eitur te hi a neih ang ang min pe ve thin a nih kha. Mahse, hun a ral a, thil thleng te pwh an lo danglam zo ta a. Chutah chiah chuan a mihring zia chu rawn irh chhuak țan in, ka nu a bo hnu atang phei kha chuan keini pafa chu biak that pawhin min be peih tawh lova, a Chang phei chuan min hrengai lo ang hmak in min Kal pel vel mai mai țhin. 

Hemi ni pawh hian ka school Kal tur chu min lo hmu fuh in min lo ko ding leh ta ngei a. Mahse, tunhma a mjn koh din thin dan nen kha chuan a dan a dang ta zarh mai. A mitmeng ah khan min hmuhsitna leh diriamna ka hmu tel thei a, a tan chuan engmah lo Mai kan ni tih pawh a lang chiang viau awm asin. 

" I nu lah chuan i pa kha a nei duh tawh Mang silova, in lainatawm mai mai mange. Tunah chuan fahrah in ni ve ta reng mai a, chaw eitur te in la nei thei zel maw. I pa nise thatchhe bawk nen, hna a thawh loh phei chuan khaw tlang hian Kan chawm Har tawh lo twp ang che u! " rawn ti kher in, a tawngkam chuan mei a nei a, inhmuhsitna diktak a ni tih ka hriatthiam ve em avangin ka na ngawih ngawih thei bawk a, hei kher hi chu ka Pai dam thei ta hauh lo. Amah pawh chu chhang let ta lem lo in ka in her let vut a, mahni in lam pan bawk in ka tlan let leh ta vang vang. Kawng tluan in ka mittui chu a tla a, ka insumthei lo. Zah pawh ka hre tawh bawk hek lo. In chhung ka luh rual chuan pindan ka pan nghal a, khumah bawk zui thlawp in thinlung chhungril atanga lo chhuak min hnawh tu chuan chhuahna tur a zawng emaw tih mai tur hian ka țah chhuahpui ta hawk hawk a, ka țap rjng kher lehnghal. Chutah, ka țap thawm chu hria in ka pa khan rang tak hian min rawn pan ta vat a. Min rawn thut chilh nghal. Ka sam te chu rawn chul pah hliau hliau Chung hian a thiam ang tawk tawkin min hnem ve a tum a, kei erawh chu ka la tap bang lawk thei chuang lo. Ka zak a, ka na bawk em a tin ni. 

"Pa, ka nu hi ko haw rawh. Hetianga zahna leh hrehawmna zawng zawng te hi ka hne tawh. Ka tuar peih tawh lo. Ka nu hi ko haw mai ang" la insut hlap hlap Chung chuan ka lo ti hlarh hlarh a. Ka pa erawh chuan min chhang mai lo. A melh ngai melh in a ngaihtuahna a Kal ding hle tih chu ka hre thei a, biak buai chhunzawm pawh ka tum ta Chuang lo. Chumi aiah tiin a phone chu zawimuang hian ka lak sak a, ka nu khan a phone te kha alo siamthat tawh takin tiin call chu ka tum ta zawk a ni. Mahse, a number ka hmet chhuak dawn chiah tih ah rang lutuk hian ka pa chuan a phone chu a rawn phih ta zawk mai a, mitmeng phawk hru hian kei chu min la melh reng leh ta nghal. 

" Tinge pa? Ka nu kha call Ila ko haw ang. A rei tawh. Lo haw tawh rqwh se"  ka lo ti zui nghal mawlh mawlh a. Mahse, ka pa thung chuan zawi sup hian aw khur ru dar dar Chung si hiaj

" A țul lo. Beisei tur a awm tawh lo. I nu a ni tih kha theihnghilh tum la, i nau te ho pawh hi hrilhfiah ang che" rawn ti ve in min kalsan zui a, ngawi reng hian amah chu mak ti deuh in ka lo thlir zui ve vang vang ringawt. Ka pa rilru hi ka tih hah belh chhah loh hram ka inbeisei. 

Mahse, hemi ni atang hian school Kal ka duh tawh lova, ka țhulh fel hmak a. School leh Kan khaw chhung boruak hrim hrim hi ka zo tawh lo. Mihring hmel hmuh chak lohna hlir in ka khat a, ka tîm a, ka inkiltawih zo a, tu hmel eng mah hi ka hmachhawn zuam tawh thlawt lo. Tichuan, school chu Kal chhunzawm duh tawh lo in ka nau te pahnih erawh ka tir chhuak thei hram thung a, kei chu in lamah a țul țul ti turin ka in dah fel ta hmiah. Ka pa pawhin a khat tawka hnathawh tur a hmuh ve tak avangin mahni chauh chuan inah ka lo awm mai țhin a, in ropui leh lian lo tak nimahse Nitin hian nileng zaka buaina tham tihtur chu ka nei ve thei zel tho. Chung te chuan ka rilru buaina leh hahna tamtak an la bo ve thei a, mjn chhawk zangkhai ve bawk a, ka hahdam phah daih zawkin ka hre hial. 

Ni khat erawh chu ka tihtur țul te ka tih zawh hma deuh avangin khawhar zet chuan in chhung dung ah ka tei ruk ruk reng a, mi fate angin phone khawih tur ka nei ve bawk silo, ka ning tawng khawng ta lutuk chuan tihtur ber pawh hrelo hian Kan in chu ka Chhuahsan ta nulh pek a, ka pi te in lam ka pan vaanng vang ringawt. An in ka va thlen chuan ka pi chauh chu lo awm in phone hman sak ka han dil nghal tawng a. Mak ti zet hian min rawn melh chho deuh hu thei. 

"Engatan nge phone chu itih ve a. Bialpa i nei em ni?" mjn ring lo tih hriat taka a rawn tih chuan kei chu ka lo lai chhe hman lek lek thei a. Mahse, 

" Nilo e pi, ka nu hi biak ka duh deuh hlek a. Ka pa lahin a phone atang biak a remti Mang bawk silo a, ka ngai deuh hlek a"  lo ti ve zatin, Ani pawh chuan sawi buai nei lo chuan a phone chu muangchang hian min rawn pe ve Mai a. Ka lo ban vat. Mahse, ka call tak tak hma in keimah bawk chuan 

" Pi, ka nu nen chuan in inbe thin reng reng em? A phone te kha a siamtha ta em le"  contact en kual pah a ka han tih chuan ka pi lah chuan 

" Be ngai lo, ka call ve thiam silo a, aman mjn rawn bia te a nih loh chuan. A phone kha chu a siamtha daih tawh nilo emni? Han phone tak teh, engvang in nge a reh em em a" lo ti zui zatin, ka nui sak a ka nu number chu ka hmet chhuak nghal. Mahse, rin lawk deuh leh rin phal loh ang deuhin ka nu chu a call tlang theij ta reng reng loh a. Switch off a inti tlat. Ni e, pasal dang um a tlanbo tih chu ka pa hnen atanga Kan thu hriat dan awmchhun a ni a, kan ring thlap bawk

A chhan chu, ka nu kha  zu leh sa leh mipat hmeichhiatna lamah a fihlim lo hle tih Kan hre sa ve vek a, khatiang a mipa dang a han um ta daih mai pawh kha a mak Kan ti hranpa lo. Mahse, rapthlak erawh chu ka ti thung. 

" Pi, ka be tlang thei miah lo. A number hi a thlak daih nge niang le" beidawng zeta thawk halh pah chuan ka han ti leh ta a. Ka pi pawh chuan min chhan ngaihna a hre vak lo tih ka hre Mai. A melh ngai a melh a, a khât tawk hian a khap leh fak fak thin ringawt. Chutia kan lo indinchilh lai chuan ka pi phone bawk kha rawn ri lehin, rang zet hian Kan en dun vat a. Mak takin ka pa alo ni reng. 

" Kha I pa a nih hi" tih pah a ka pi in phone min rawn pek chuan rang zet hian ka lo ban ve vat. Min rawn ngaihven dawn a ni ngei ang.

" Aw pa" thawk la balh chunga ka han tih zawh rual chuan ka pa pwh khan bung deuh nghut mai hian

" Eng nge khatah itih. Eirawngbawl a hun tawh hi" rawn ti nghal hrak in, kei chu ka dang a ti awk zo vek nimai hian ka hria. Ka pi chu ka melh pah ralh ralh tawh a. 

" A.. Ka leng phei mai mai. Ka lo haw nghal" tiin phone chu kan ti tawp a, rang lutuk hian ka tlan haw nghal vat. 

In chhung ka luh rualin ka pa bawk chuan lungawi lo tih hriat tak mai hian min rawn melh a. 

" Engvangin maw saw tah khan ilo va Kal a. Eng nge thil pawimawh a awm emni?" a rawn ti lehnghal chat a. Ka chhang duh lo hman tep. Mahse, uluk zeta mjn la en tak reng ah Chuan nuam ka ti ta vak bik lova, ka ngawi zui thei tawhhh lo. 

" Tihtur ka nei tawh lova ka khua a Har deuh sia, ka nu an biak theih takin tiin ka va Kal mai mai" ban deuh a ka han tih chuan mak tih hmel fe in min rawn en leh a. A mitah tak pawh ka melh țha ngam tawh lo. 

" Vawi engzat nge i nu kha beisei tawh suh tih thu hi ka hrilh dawn che le. Tinge thu hi engatanmah itih duh miah loh a. Ka thu hi I zawm duh lo tihna emni?" tih charh charh pah chuan a bul mai a chhuat nawhna hrawl fe mai chu a la lawk a min rawn pan ta Mai! Kei chuan chet sawn ngaihna ka hre tawh lova, Ka awmna ngaiah ka lo awm tlawn tawp. Chutah, na mangkheng hian ka mawngah tak chuan a thil ken lai khan min rawn hlap zui țhuai a, ka eu awrh thei. Mahse, ka rak chhin eih lo thung. 

" Vawikhat pwh i nu hming kha lam ri tawh suh ang che I hria em? Ka hre peih tawh lo ka ti lo emni? Nangni unau hian nu in neilo, kei min nei hi in duhtawk lo emni? A nih chuan Engvangin nge ka bulah hian in la Khawsak ve reng a. Thlawk bo vek rawh u" tiin a thinur na sosang lutuk chu a insum hleithei lova, amah zawk chu a tap chhuak hawk hawk tawh zawk. Tichuan, min vuakna pawh chu dah sawn vatin chhuatah chuan a țhu sawp zui ta nuaih a. Ka thu zui ve nghal vat. Amah chu hnem ka tum a ni ber. 

" Pa, ka tihpalh. Min ngaidam rawh. Tun chinah ka nu hming hi ka sawi ri leh tawh ngailo ang" tiin lungchhe fe hian ka inhnit zui ve leh hlap hlap a, ka pa chu ka kuah vat bawk. Ka pa a nat hian ka na a, a lungngaih in ka lungngai ve a, a hlim in ka lo hlim ve thin bawk. Chumi chin chu thu dang sawi tawh lo leh, thil thleng te pawh theihnghilh chhunzawm in Kan Khawsak ngai reng chuan kan khawsa chho ve leh ta a. Ka pa duh dan ang ngeiin ka pi te in lamah pawh khan ka kal nawn leh tawh lo bawk. Mahse, ka Khawsak dan, a nungchang leh mizia engkim mai te chu an danglam Sawt ka ti em em a, ka nu vanga a danglam tawh na kha tunah chuan a hma aia nasa in a danglam zawk niin ka hria. Ka hrethiam chiang viau mai. 

A chaw ei tlem chu thuhran, zan a mu tlem in a mut ve chhunah pawh a harh sek zel a, a Chang phei chuan zanlaiah hian hlauh nei ang maiin a mu tui lai hi a rawn au chhuak leh chiam thin a, a fate hi min ti mangang thin viau. Chutianga a mu tui lai a rawn au chhuah Chang chuan a bulah va Kal in theih tawp chhuah a tih harh tum ve thin mah Ila a meng â vek tawh thin a, min hmu lo ang mai hian a awm thin. Min ti bangbo thei hle. 

Zan khat pawh a ngai ang tho khan a mu tui lai chu hlauh nei ang mai hian zanlaiah a rawn țe chhuak leh ta nghek mai a. Rang lutuk in ka nau te pahnih kai tho in a mutna lamah Kan VA tlan nghal vat a. Chutah chuan a mutna Chung lam rangva chu en in a lo meng â vek tawh a, a ban te pawh chu a phar huang huang Mai bawk si nen, kei chuan va dawm bet vatin ka ko mawlh mawlh reng bawk a. Min ti hlauthawng ve takzet. 

" Pa, I harh em? Harh rawh aw. I țha em?" ti mawlh mawlh in tih harh chu ka tum ve nasa. Mahse, ani thung chuan rin loh deuh mai hian ka kut chu nghet zetin a rawn chelh ta thut a, chu tih chhung zawng pawh chuan in Chung lam chu ala melh reng tho. 

" I nu, I nu! I nu khi I hmu thei em!? " a rawn ti ta a nih chu! Ka phu deuh zawk a, hnung lamah ka tawlh let rawk bawk. Ka pa hian eng chungchang nge a sawi ka hrethiam lo, min ti hlau lek lek thei mai. Chutihnakalaiin ka bula awm ve ka nau Ropuia lah chuan zawi ser sawr tak mai hian ka beng bulah a khât tawkin 

" A u, in Chung khi! En ve chhin teh" alo ti ve chhen bawk a. Ka hlau tulh tulh. Kut khur dar dar Chung hian ka pa chu thei leh thei lo in ka la chelh bet ve ngar ngar reng a, ani lah khan a khât mawi tawk hian 

" I nu ngei a ni ka Fanu" ala ti chhen zui bawk. Ka hlau a ni. Ka hlau. Mahse, ka hlauh zia chu ka nau te hriat ah tih lan ka duh loh em avangin pangngai thei ang ber a awm ka tum lui zel a, ka pa pawh chu ka theih ang tawka hnem pah Chung chuan ka mut that tir leh ta phawt. Chumi hnuah ka nau te pawh chu an room lamah luh tir leh in kei chu taksa khur ru dar dar Chung hian ka pa bulah khan ka la thu lui ngar ngar thung a. Ka mut theih tawh pawh ka ring lo. 

Reilote ah ka pa pawh chu a muhil chhunzawm ve leh mai a, mahse a nghet lo takzet. A khât tawk hian a rawn harh sek reng a, a rawn harh apiang chuan tui in tur min dil Chung in ka nu chu a  hmuh chian zia thu a rawn sawi fo lehnghal. Engtia lo hmachhawn tur nge tih pawh ka hrethiam chiah tawh lo e. Chumi zan chu mumal lo deuhin Kan hmang tluan ve thei a, a tuk khaw var mawlh mai chuan hun țha rawn her chhuah pui se ka duh ngawt mai. Mahse, ka duhna te chu engmah lo Mai a ni a, ka duh loh dan hlir zawkin thil chu a Kal leh ta tlat. 

Zingkar atang ka pa chuan mu leh mal a nei theilo nghal a, a hmasa ber atan tukthuan ei duh lo in a mu bo tlat a, kan koh mawlh mawlh pawh chuan a rawn chhuak duh ta tlat lo. Hlauh nei ang mai hian a khumah a puansin lai nen a inkhuh hlun a, a khur dur dur reng bawk a. Damdawi ei tura ka tih lahin a duh țhak bawk silo, min ti mangang ta takzet. Tui ti lo zetin tukthuan chu ka nau te nen Kan ei ta a, hetih chhung zawng pawh hian ka pa kha chu khum chungah mu in a khât tawk hian a rawn rum leh hlut hlut thin a, a khua a sik ti dawn ila a pang chu a dai diak reng bawk si. Ka hrethiam lo takzet. 

Tukthuan bar zawh ah ka nau te chu school Kal Turin ka tir liam ta thuai a, ka pa awmdan maksak tak te kha hmu in hre tam lo se ka duh zawk miau. 

An chhuah zawh rualin ka pa bulah chuan ka tlan lut thuai a, Ani chu a ngai te bawk khan puan hmangin alo la inkhuh bûr reng a, mahse, thawm erawh chu a nei tawh lem lo thung. 

" Pa"  tiin zawite hian ka han ko dek dek chhin a, a reh leh hmak. A muhil ta nge maw ni le. Mahse, kalsan mai duh lo in ka ko nawn leh a, a bulah te chuan thu in zawite te in ka be pah reng bawk a. 

" Pa, chaw ei a hun tawh a nia aw. Tlemte tal ei la. A nih loh chuan i taksa tan khan a țha dawn lo asin" ti leh țhin in min chhang tu awm ta hek lo chu ka ngawi ve leh mai țhin a. A rei hnuah phei chuan awmzia nei dawn loa ka hriat tak avangin choka lamah ka phei San a, tihtur țul ka va ti leh rih ta phawt a nih kha. Nilengin in  leh a chhehvel ah ka buai chhunzawm a, ka pa pawh ka ngaihsak hman ta lo. Ka tihtur ka tih zawh meuh chuan khua pawh lo tlai duai tawh in huan mawng atang chuan ka chhuak chho ve a, ka huan thlawhna ka chau ve reuh phian mai. A hmasa ber a tan ka pa awmdan chu va thlithlai leh phawt in, ani chu puan pawh sin lo hian alo muhil tui hle tih ka hria a, ngaihtha takin ka kalsan leh. Ka nau te pawh chu extra class an nei nge maw ni, vawiin chu an rawn bang Har ve tlat. 

Tichuan, inti fai hmasa ta lo in eirawng ka bawl chhunzawm a, a khât tawk hian ka pa chu ka va bih leh țhin. Ka va en apiang hian a awmdan alo danglam ziah lehnghal a, tunah chuan lo tho chhuak ve tawhin, ngawi reng hian a khum chungah alo thu a, melh pawh min rawn melh lo. A harh țha tawh tho e tiin choka lamah bawk ka phei San leh mai a, hetih lai hian ka nau te school bang pawh an lo thleng ve chiah. An uniform te an thlak sawk sawk hnuah ka pa roomah chuan lut in an va ko mawlh mawlh a, mahse, reilote ah beidawn hmel zeta rawn chhuak dun leh in ka pa chu a muthilh daih thu an rawn sawi a nih chu! Nichin lawk tak tak khan harh țha deuhin khumah a thu luau si a, muthilh na hman awm in ka hre ve thei tlat lo. Ka thil hmuh te kha ringhlel in a awmdan chu ka va en nawn leh ta ngat a, alo muhil taktak. Mahse, a hma ang tho khan alo in khuh leh hlun tawh. Eng nge maw a awmzia hi le. Engpawhnise tiin eirawng chu ka bawl zo ta vat a, chaw ei ka Siam peih meuh chuan khua pawh alo thim ve titih der mai. 

" Nau-a, apa va ko rawh" tiin kan te ber chu ka tir ve ta thung a. Phun nang nag Chung hian ka pa room lamah a tlan lut ve vat. Mahse, rang zeta rawn tlan chhuak leh in a hmel chu a rawn dâng vek thei a, a mitmeng ah nise hlauhna namen lo ka hmu tel thei bawk. Thil awmzia chu lo zawt vatin, ani chuan aw khur hlwk hlawk Chung hian

" A pa saw, a thaw tawh miah lo a nia aw!" a rawn ti ta Mai a! Chaw ei tura ka thu tawh pawh chu ka tho chhuak nghal zawk thei. Ropuia nen chuan phawk fe hian Kan in melh dun a, engtia awm tur nge ka hrethiam lawk lo nghe nghe. Chet lawk nachang pawh ka hre hek lo. Mahse, ka nau Ropuia'n

" U, a pa chu va en ang"  fiah zeta min melh chunga a rwn tih ve takah chuan Keipawh ka harh chhuak zawk a, rang lutuk hian room lamah chuan ka tlan lut ve ta vat. Ka nau sawi ang ngeiin ka pa chu a hma ang tho khan a lo inlukhup leh ta tlat a. Ka tlan phei nghal vat. Tichuan, a inkhuhna puan te chu hlip zui sak sawk sawk in ka ko pah reng bawk a, karei! A khawng vek tawh! Engtinnge a nih theih zawk. Engtinnge hetiang hian a taksa hi a khawng hman zawk a!!? 

" Ropui, a pi te va ko vat rawh. A pa hi a țha lo reng reng" ti tuarh tuarh in ka țap chu a ni nghal der a. Ka insum hleithei lo țan tlat. A taksa a khawng vek twh tih chu hre tho mah Ila thi turah ka dah lova, ka phal bawk hek lo. He khawvela kan neih chhun leh kan tana awm reng kan pa hi a thi tur a ni lo. A thi ve thei turah pawh ka ngai bawk hek lo. A theih loh hulhual. 

Karlovah ka pi te chhungkua pawh chu ranw thleng in thenawm khaw veng thenkhat bengvar zual te nen chuan an rawn lut khawm ta țak țak a. Ka Mang hi a ang zual tulh tulh tawh. Ka pa hian min kalsan tak tak dawn tihna emni? 

Tichuan, puitling awm ve ho chuan ka pa, khum chunga mu khawng reng tawh sawi harh tumin an han bei veleh a, tin, a mar te pawh an dek chhin bawk. Chutah zet chuan a marphu en dik tu chuan beiseiawm a awm tawh loh thu rawn swi in tunah chuan fahrah diktak Kan lo ni ta! Na hi ka va ti tak em. Ka țap chhuak nghal hawk a, mak tak hian kapi khan min lainat tih hriat takin min rawn kuah ve vat bawk. 

" Pi, pa Kan nei tawh lo. A pa hian engtinnge min boralsan theih zawk le... Pi, engtinnge keini unau hi awm Ila a tih ang le tiraw?" tia țap zui hawm hawmin ka mittui chu a Sur hian a Sur ka ti mai

Ka insumthei hlawllo. A na em a ni. 

Tunah chuan nu leh pa tia sawitur neilo, ka nu ka pa tia koh tur neilo naupang riangvai leh belh tur neilo fahrah mai kan lo ni ve ta chu a ni a. Pathian hian engtinnge min kaihhruai zel ang le ka ti. 

Thlan khur thuk takah kan neih chhun Kan pa chuan min muthilhsan hlen tawh dawn a, pa tia koh tur an awm tawh dawn lo. Chutiang zelin a chanchin hriat zui tur awmlo ka nu kha engtinnge a awm ve tak ang? Kan chanchin te hi hria in inchhir in alo kir leh mai a ngem? Mahse, chu zawng, tun dinhmun ah chuan beisei ngaihna pawh ka hrelo a, ka beisei ngam bawk hek lo. Theih chu nise ka pa zawk kha ko kirin ka kuangkuah duh ngei ang. 

Ka pa hun hnuhnung chu a zo a, tunah chuan kan unau thum in khawhar em em in Kan awm ta rek rek mai. A khât tawk hian ka pi te chhungkua khan min rawn tlawh ve thin a, chubak chu innghahna dang Kan nei Chuang lo. Thenawm khaw veng te that zia alo lang chho a, keini unau baihvai lutuk tur chu min khawngaih in min hrereng a, min thlahthlam ngai hek lo. A hun takah Pathian khi a che a ni ka tilo thei lo. 

Hun a ral a, tunah chuan ka pa Sulhnu te pawh a then a zar chu thian fai tawhin Kan khawhar erawh ala in țan dawn chauh thung a. Tin, ka pa mobile phone kha phum telloh a ni a, ka khawih sak ngailo thung. A lukham hnuaiah kan dah a, a boral ni atang khan khawih chet miah loh in ala awm ngar ngar tihna nih chu. 

Ni khat ka lungleng khawhar tihtur hrelo chu ka pa roomah lutin a khumah te ka va mu leh dar dar thin a, a khât tawk hian ka mittui pawh a rawn tla leh fap fap thin bawk. Chutah, a lukham hnuaia Kan dah that a phone chu dap fuhin zawimuang hian ka la chhuak a, a nihna takah chuan ka nu call tumna rilru nena Chu phone chu la chhuak zwk ka ni. Mahse, ka nu chu ka call tlang theih loh avang in thil dang ka en kual ta zel a. Chutah chuan a phone note kha hmet chhuak fuh in note ah chuan ka pa khan thu engemaw tak hi alo hnutchhiah reng a ni tih chu ka hmu ta. Note ah chuan :

Ka fate u, he thil hi engtikah nge in hmuh anga, in chhiar ang tih chu ka hrelo. Mahse, in hmuh Har lutuk chu ka ring lo thung. A bikin ka Fanu, hei hi hrilh che ka duh a, mahse tawngka chuan ka sawi chhuak theilo a ni. Ni e, I pa hian thil lian tham tak ka ti sual a, buaina leh harsatna ka hmachhawn bawk a, I hriat vek kha. Thudik chu eng nge ti a min zawh chuan maw ka Fanu, I pa hian tual ka that a ni!! Aw, ka that tlat alawm! I nu kha mipa dang um in a kalbo reng reng loa, kei hian ka dah țha zawk asin!!? Nâ takin min Siam a, ka thinlung a hliam na em em a, I hriat ang khan. Ka tuar thei thlawt lo khan remchang zawngin i nu chu a tawm thinna hmun, zu hmun sa hmun leh a bialpa nena an tawm thinna ni bawk in chhungah khan luh chilh in ka hruai chhuak a, hruai haw tur anga insawi in ka bum chhuak thei hram a ni. Mahse, hruai haw ta lo in fianrial ka pan pui ta zawk a, tichuan, ka rek hlum ta a ni e. A ruang chu ramhnuaiah phum bo in ka kalsan a, tuman an hrelo. Min hmu hek lo bawk. Ka Fanu, I pa hian pawi nasa tak ka khawih a ni tiraw? Min ngaidam thei angem? Khang hunlai khan I nu khan nasa takin ngaihdam min dil ve na a, ka theilo. Ani ang uire nu, mipa dang laka min tenawm San tawh tu kha thinlung dam takin ka pawm thei tawh lova, ka dam chhung zawngin ka hre bawk ang. Ka thei lo hulhual. Ka ten lutuk. Chuvang chuan kan zavaia kan that tlan zawkna turin a nunna chu ka la ta a, ti khan dawt sawi in I nu chu Mipa dang nen an tlan thu ka hrilh ta che u a nih kha. Ka Fanu, he thil vang hian lo inti hah duh lo la, hma lam pan tum la, i hma hun tichhe thei tur eng thil pawh a awm a nih chuan Kal pelh tum ang che. Ka hmangaih vek che u tih in hriat kha aw. 

Tih thu chu lo inziak in, ka nghilh zui dup nimai hian ka inhria a, ka na vawng vawng thei bawk. Mihring nunna la thei tur in ka pa kha ka ngai ngai lova, a tih theih ka ring lo hulhual. Tin, he thu hi sawi chhuah pawh ka tum lova, ka dam chhung zawnga zep bo ka tum bawk. Chuvang chuan chu a note hnutchhiah pawh chu midang in an hmuh ve hma tiin ka delete hmak a, theihnghilh nghal ka duh. Hriatreng tlak a ni silova. 

***********************************************