RAUTHLA DUHAWM CHU

RAUTHLA DUHAWM CHU~!

BY : Vanlalpeki Fanai

Ruah sur bur bur chuan ka haw na tur kawng min dangin kawngpui sir maia mi dawr bathlar hnuaiah chuan ruah sur ban hun nghakin ka ding ngawi ve ran mai a, ka rinaiin a sur tam zek bawk nen, a sur rei bawk si ka ning ta kher. Darkar khat chuang zet ka nghah hnuah chuan han ve thei hramin ka dinna hmun atang chuan ka kalsawn nghal nal nal a. chutia ngaihtuahna kawm melh melh chunga ka hmalam ka lo pan ding ngar ngar lai chuan ka hnung lawka min zui thawm niawm tak pen ri ka hriat leh thin avangin ka han hawi let zuk thin a, mahse, chutiang tur chu ka hmu miah chuang si lo. A thuhrimin tun hun hi chawhnu lam dar 3 vel chauh la niin khua nise ala eng ut bawk a, inzui rukna hun atan chuan ala hma mah mah deuh in ka hria. Khaw chhung vek a nih angin mihring vei vak hmuh tur an awm ve reng bawk a, rin tur ber pawh chu min ti hrethiam tawh lo a ni. Mahse, kan in peng ka thlen dawn a ruaiah pawh chuan ka hnung lawka ke pen thawm awm leh thin chu hre ve zelin a khat tawk hian ka han hawi let leh zawk zawk thin a, tuna ka awmna hmun hi chu hmun reh deuh lai a nih tawh avangin a nuam hranpa tawh chiah lo. Hmuh tur awm siloa ke pen thawm awm ve reng chu thil nihphung pangngai pawh va ni suh.

In ka thleng a, inchhungah chuan ka tlan lut nghal rawk rawk bawk a, ka thawm hria in ka nu chu choka atang a rawn tlan chhuak zui zat bawk. Phawk zeta min rawn melh pah hian,

‘’ In va rawn in um lut nasa ve’’ lo ti ringawtin kei chuan thawk lak deuh halh pah hian,

‘’ Tu nen mah kan rawn in um lo ve a’’ ka lo ti deuh hluk thung a. chutah, amah bawk chuan pawnlam te chu va thlek pah leh hu hu chung hian,

‘’ I hnung lawka rawn kal mipa cher sang deuh khan a rawn um lut che emaw ka tia, a hmel pawh ka hmu chiang chuang lo’’ ti nuah nuahin choka lamah bawk min luhsan leh mai a, kei chu ka ding khawng zui reng ringawt. Ka hnung lawkah mipa pakhatin min lo zui a maw!? Chutiang reng reng chu ka hmu ve mang bawk silo. Chutah, chokaa tlan luh pah chuan,

‘’ Nu, ka hnungah chuan midang lo kal ve an awm tak tak em? I chiang maw?’’ ka va ti nawn leh ta kher a. ka nu pawh chuan maktih hmel fe a min rawn en chung hian,

‘’ Awm e. kha, tukverh te atang khan ka lo hmu thei reng che u alawm. Vawiin chu rawn thlah haw tu thian thar i nei a nih hi ka lo ti mai asin ‘’ rawn ti lehin, mak ka lo ti tulh tulh. Kei lahin pen thawm tih loh chu eng thilmah ka hmu ve bawk silova, a nih chuan kha ke pen thawm ngei mai kha zui ru tu ka neih vanga ka hriat tihna a ni ang maw. A mak dawn hle mai. Ngaihtha lo zetin room-ah ka lut a, muangchang in ka inthlak pah bawk a, tun lawka thil thleng tih loh kha chu thildang reng reng ka ngaihtuahnaah hian an lut hleithei tawh lo reng reng. A nuam lo duh ve em a ni.

Zan riah kan eikham a, lehkhazir tura pindan ka luh hnu reivakloah kawmthlang huan lam atanga min rawn ko thawm niawm tak chu hre lehin, rang zet hian tukverh ka hawng zui nghal vat. Kei hi mi dawihzep zawk zawk ka ni hran lova, ka huaisen viau lem lo bawk. Thawm chauh hriattur awm ang chi te hi a tak hmuh tur a awm loh chuan finfiah emaw, hmuh kher zel ka duh thin a, a nih loh chuan a pawng a takin ka hlau nghal ngawt ngai lo. Chutia tukverh hawng meuha ka dah chhuah hnu pawh chuan eng thilmah hmuh leh hriattur awm chuang hek lo le, ner sawk chungin tukverh  bawk chu ka khar tha leh mai a. khaw dur len khawm tu thli thaw fur fur thawm bak chu hriattur awm zui lo in a reh leh ta vang vang mai. Ka lehkhazir pawh an ti tui nek tawh lo. A ninawm lampang zawk a ni.

‘’LALTHLAMUAN!’’ ka beng bul seta min rawn ko ri ah chuan harhchhuak nghal zawkin, ka thu chhuak deuh hluai mai a, khua pawh ala var lo tih chu ka hre thei. Chuti a nih chuan khatia min rawn ko tu kha ka nu leh pa te an ni lo tih ka chiang a, ka unaute ngat phei chu tun ang huna an la thawh ngai loh avangin an ni dawn lo tih a chiang bawk si. Mahse, thawm kha a reh leh zui leh daih avangin ngaihthat lohna em em pawh nei lo chuan ka tho nghal nalh a, khua a var tep tawh tho bawk nen inphihfai sawk sawkin insawizawi tur chuan ka tlan chhuak ta zawk a ni.

Pawn ka chhuah chuan boruak alo la vawt angreng viau lehnghal a, mi thenkhat exer la ve tur tlan mek te pawh ka hmuh ve pheuh pheuh avangin awm nuam tak chung chuan ka hma zawnah ka tlan chhunzawm ve mai. Chutia earphone vuaha hla ngaithla chunga ka tlan zel lai chuan kawngsir thim deuh laia tuemaw lo ding niawm tak chu va hmu thutin ka ding zui chawt. Mahse, rei pawh ka en hman lo ang tih ah ani chu a hmalam panin a rawn tlan chhuak ta hlauh zawk a, chuti chung pawh chuan tu nge a nih a, khawilam mi nge tih erawh chu ka la hrefiah thei chuang hauh lo. Kan khua hi thingtlang khaw lian ve pangngai tawh tak niin, a mi chengte pawh mumal takin kan inhre kilh kelh vek tawh bik lova, kan lo awm darh ve hlawm bawk nen mikhual leh pem thar hmel phei chu hre hrang viau lo tak ka ni. Tuna ka mipa hmuh erawh kha chu tute emaw mikhual tlangval a nih ngei a rinawm a, a inthuam dan leh pian zia atang reng reng pawh khan kan khaw mi sa chu a ni lo tih ka hre thei. A hmel zawk kha ka hmu chiang thei lo mai pawh a.

School kal tura ka insiam laiin ka nu chuan min rawn din chilh chung meuh hian,

‘’ Tukin kha dar engzatah fakau nge I thawh a? Khua ka han en a, ala thim tha angreng bawk si a. iva tho hma awm em em ve’’ rawn tiin, kei chuan ka neck tie awrh that mawlh mawlh pah hian,

‘’ Tho hma e. ka harh laklawh lutuk a, exer la turin ka chhuak nghal daih alawm’’ ka lo ti liam ve mai a, chutah, amah bawk chuan kawng dawm meuha min rawn thlek vang vang chung hian,

‘’ I chhuah dawnah khati vak vak khan kawngka kha sawi ri tawh suh ang che! A thuhrimin exer ka la itia, helai hnaiah I tei I tei a, thawm I dim lo si, I bengchheng lutuk alawm’’ a rawn ti leh ta heu mai nia! Amah va melh zawk chung chuan,

‘’ Awi! A awihawm loh thei e. Pawn ka chhuah rualin kawngka tha deuhin ka khar thlap a, kawngpuiah ka tlan chho nghal aw. Heng laiah ka tei hawi vel lo hrim hrim’’ ka sawi zawh rual rualin ka nau, a naupang zawk chuan ring ling leng zet hian,

‘’ A umami chu dawt I sawi reng sia! Kawngah hian I tlan thlaa, thaw vak vak chungin I rawn tlan chho leh a, kawngka hi I rawn sawi ri leh vak bawk a nih kha!’’ ala rawn ti tak deuh deuh! An thusawi hi a awmzia ka hrethiam lo in mak ka ti tulh tulh mai. An ni ho hian an hre dik lo nge, keimah hi ka dik lo zawk tih pawh ka hrethiam tawh lo . Ka awm te hi an tinuam lo zo vek. Engdang mah sawi tur pawh hre tawh lo in school kal tur chuan ka chhuahsan nghal a, kal kawng tluan mai pawh chuan rilru nuam lo reng reng a kal ka ni bawk nen, ka kalna turte en lo in ka inchhuih leh khut khut thin bawk a, ka dik lo vel vek. School-ah pawh thiante zinga awm peih lo in mahni chauh chuan ka tla hrang lui ngar ngar a, ka thiante che vel chu classroom atang ka lo thlir ve ringawt. Chutia ngawi renga ka lo hawi veng veng lai chuan kilkhat atanga keimah min lo melh char char tu mipa pakhat chu va hmu fuhin ka thu khawng zui awt thei a, ka meng phawk deuh hru bawk. Ani lah khan a mit pawh khap lek lo in min lo la en char char mai bawk si, eng thil chu nge maw a hriat le tih pahin ka thutna hmun chu ka thawhsan zui nulh a, chu pa awmna lamah chuan tlan phei ve nghalin ka thiante lo ding khawm lai pawh chu ka nek phei deuh buan buan thei. Ka hmanhmawh ve em a tin ni. Mahse, a thutna hmun ni a ka hriat thingbuk hnuai ka va thlen phei erawh chuan tu mihring mah hmuh tur lo awm tawh lo hian a reh thap thung a, ka hawi ka hawi ta ringawt. Chutah, ka hnunglam atang ka hmeichhe thian thenkhat te khan

‘’ Muani, eng thil nge I zawn chiam chiam a. I va rawn hmanhmawh reng reng ve’’ rawn ti chel chulin ka bulah te chuan an rawn ding hawi nghal vual vual hlawm a, kei erawh chuan eng thilmah a nih loh thu leh, sava mawi dangdai deuh ka hmuh thu chu lo hrilh ve in ka nui der kual vel ta ringawt. Chuveleh, kan thian pali zinga a pa ve deuh ber, kei ai maha la pa zawk Zuii chuan a pawnfen chhunglam ipte țhui ruk atanga zial rawn phwrh zal zal chung hian,

‘’ Ti ve dawn em. Kan ti zo chiah a’’ mitko san ak paha a rawn tih chuan,

‘’ Pawi miah lo’’ ti chungin ka lo ban zui zat bawk. An ni ho pawh chuan rang taka min din hliah nghalin an phenah meizial chu ka  țan ta zung zung a, meizial ka hip lut ka thawk chhuah leh hma chiah chuan kan school panna step lam kha han hawi chho in thil hmuh ka han nei leh ta mai! Ka zial zuk lai pawh chu hak chhuak nghal bawrh bawrh in ka thiante khan ka hnungzanga rawn chum zui laih laih chung hian thil awmzia min zawt a, fimkhur turin min ti liam liam bawk. Ka thil han hmuh kha engdangmah ni lo in step hmasa berah mipa kha alo ding tih ka han hmu a, uluk zetin kei chu min lo melh ve reng bawk nen, chubakah, amah kha tudangmah ni lo in nichin lawk pawha helai atanga mit tla lo leka min lo melh tawh tu tho kha a ni nghe nghe. Engvanga min melh leh vung vung zel nge maw a nih le. A pawi te hi ka sawi nge, a duh loh dan in ka awm zawk nge. A che maksak thei riau. A thuhrimin school uniform pawh a ha ve lova, helai hmunah hian eng nge a rawn tih ang tih chu ka buaina a ni tel bawk.

‘

‘’Kan school-ah hian mipa rawn thawk thar an awm emni?’’ ka ti ta nge nge a. An ni ho lah chu kei ai mah mahin an lo la bo zawk zui a. ka hriatchhuah theih loh hmel khawp mai. An hriat loh thu an sawi chu duhtawk mai lo in,

‘’ Mipa hmel thar lam hi hre viau thin suh’’ te chu min la ti tak deuh deuh hlawm a. ka hmuh ang kha chu hmu ve hlawm ngat se zawng, kei ai mah mahin an buai maithei ni. Nia, maksak deuh deuh khan lo awm thin mahse kha pa kha a hmelchhiat hmel loh riau. Hnai tak takah hmu lo mah ila a mitmeng kha a thuk lam deuh hi niin, a hmel a thutak ran mai bawk a, a chhiat vak hmel loh tlat a ni. Engtin chiah nge ani kha ka hriat chhuah theih ang tih chu hre hauh lo mah ila hriatchhuah ngei erawh ka duh a, hmuh nawn leh pawh ka duh. Chiang taka hmuh nawn leh hi ka duh takzet a ni. Biak chian ka chak tlat.

Ka school bang inchhung ka luh rual rualin ka nu lah chuan,

‘’ Inthlak la vengsangah han kal lawk the. Chawhmeh siam tur pawh kan nei hleinem han lei rawh’’ lo ti nghal zung zungin ka ner deuh nang nang thei a. vengsang berkhera kan khaw bazar han awm tlat mai hi chu ka kham. A hla si, kawng a chho ulh thei si. 

‘’ Khaw nge ka nau te hi’’ ka han tih chuan

‘’ Tui chawi turin ka tir chhuak vek. Vawiinah tui nise a rawn dir lehpek lova, kan buai phah hle a ni’’ a ti leh hluk hluk a. keini chhungkua hi chu kan veng chhung rau rau ah pawh mi zawng zawng kawmthlang an tih ang chi a khawsa kha kan ni ve a, kan kawm thlang ram zawng hi keimahni ram chhete leh ram ruak vek an ni tawh a, hla vak loah hian tuikhur lian lo tak mai awm in, tui hna a tha em em a, mahse, thingtlang khua mah ni ila tui connection te kan neih veek tawh avangin tui chawi tura tuihkhur rawn pan duk duk hi chu an awm tawh meuh lo. Tichuan, ka nu sawi ang chuan ka inthlak zawh hnuin vengsang lam pan chuan ka chhuak chho ta hnk hnak mai a, zingtin exer la ve thin si ah chuan ka va han rawl thei ber awm e.  

Vengsang ka thlen chhoh meuh phei chuan ka hah lutuk hi ka thaw hlawi hlawi tawh a, kawng reh deuh laiah dingin kawng dawm meuh hian thaw pui ka han chhuah leh tak tak maia, a nula thalai tih chi loh thin ngawt mai. Chutia thaw hluam hluam chunga ka lo din vang vang lai chuan ka hnunglam atang hian min rawn be tu an awm deuh thut mai a, ka phu zawk thei. 

‘’ Va hah awm ve’’ rawn tiin, a hmel ka han en nak chuan thil ka hrechhuak nghal zawk. Amah kha, kha pa kha a ni chiang lutuk. Aw, ngawi renga min lo thlir thin tu mipa ngei kha amah hi a ni chiang alawm. Chhan let nachang hrelo a ka en tak rengah chuan min kal pel leh maiin a hnungah hmanhmawh zet hian ka han umzui leh hnuhnawh a.

‘’ Lo ding lawk thianpa, min lo nghak’’ ka tih chuan a ding ve mai a. mahse, a rawn hawi let chuang hauh lo. A bul ka thlen phei chuan thaw hlawi hlawi chung hian,

‘’Ih, nangmah hi turaw min lo thlir reng thin tu kha. I niin ka hria. Ti nge, ngawi renga min lo thlir vung vung zel a’’ nui sang chunga ka han tih ve chuan a mitko chu alo san deuh ak mai a, a ngaihna a hriat loh hmel kher. Chutah, zawi sup leh aw vawt ruih mai hian,

‘’ Engtikah’’ rawn tiin kei chu ka lo thaw leh ham ham. Amah hi a ni ta lo nge maw ni aw ka ti hman hial.

‘’ School-ah min lo en reng kha’’ ti ve lehin ani lah chuan a biangsum lang kalh a rawn nui chung hian,

‘’ School ka kal tawh hleinem’’ alo ti leh mai a, hmalam pan chuan a kal nghal daih bawk. Keipawhin umzui duh tawh lo in a hnunglam chu ka thlir zui vang vang ringawt a, amah ngei hi chu niin ka hria asin le. Nge, amah ang deuh phirpui te a nei a nga chu zawk chu ni ang tihte chu ka ngaihtuah ta mai mai a. min tibuai the hrep mange a.

Bazar chu han thleng chho in kha pa tho kha a ruk thei ang ber hian ka la zawng leh ta fan a, hmuh tur erawh chu a awm tawh lo thung. A nih chuan vengsangah hian chawhmeh lei tura kal chu a nih loh hmel phawt a, tu inah nge a thlen ang aw tih ngaihtuah a ka hawi kual leh laiin damdawiina thawk ka hmelhriat patling pakhat chu ka hmu fuh ta hlauh. Ani lah chuan biak hmasak ngai miah lo hian min rawn be hmasa zung zung lehnghala, ava han tihzia tak aw. Chu chu remchangah hmangin kei lah chuan la hawi kual deuh ralh ralh chung hian,

‘’ Ih, Lal pa Rem, in vengah hian mikhual tlangval pakhat a awmin ka hriaa, hemi vengah hian a thleng tlatin ka hria’’ ban deuh chuara ka tih chuan ani chu alo nui deuh vur vur mai a, min chhaih chak tih ka hre reng, chuvang chuan ka lo nui duh lo lui ve ngat.

‘’ Tlangval kher kher maw. Ava buaithlak dawn ve. Taktaka, keini aia thingtlang ve lehchhawng ami ka UHmunmawia fapa kha hmanni deuh khan aizawl atang a rwn zin chho ve a, mahse, a haw thla chiah thung a. Nimin piah lawk khan a ni nghe nghe’’ rawn tiin kei chu ka lo ner deuh sak thei. Kan sawi chu a in an loh hmel em avngin ka zawt thui duh ta lem lo bawk. 

‘’ Awi, a nih leh, ei rawngbwl a hun tawh sia  ka kal phawt ,mai ang. Alo awm takin ka ti ve mai mai a nia’’ ka han tih leh chuan nui vur vur chung hian,

‘’ Mikhual dang chu kan nei lo tlat. Tlangval ngat phei chu’' tih pah hian ani pawh chu nui huk huk chungin a kal liam ve ta vat a. kei erawh chuan nichin maia ka hmuh tlangval bawk kha a ni ka la ngaihtuah ni. A hmel te kha tha in chhelo tho mahse chutianga han ngaihzawn enah pawh ka la en chiah chuang lo. Amah ni ngeia ka hriatin khati taka min lo en thin zawk kha a chhan diktak hriatfiah ka chak zawk a tin ni. 

Zawi zetin in lam pan chuan ka haw ve leh hnak hnak a, mahse, ti nge maw, ka kawng kal reng reng hi zui ru tu nei ang maia ka inhriat tlat thin le ka ti. Hawi let ve zuk zuk thin mah ila chutianga min rawn zui thei tur mi reng reng an awm ngai bawk silo a, min tibuai ru takzet.

Zan riah eikham fel hnua lehkha ka han zir pawh chuan min hual vela tuemaw lo awm ve tlat ang mai te hian ka han hre leh thin a, a chang leh, ka hminga min ko niawm tak te hria in, ka hawi tawn zak zak reng a. vawi khat phei chu ka lehkha chhiar kha ka lo muthlu ve sek bawk nen, ring zeta ka hming ngeia min rawn ko thawm chu hria in ka meng chhuak kawk. Chutah, 

‘’Nu, min ko emni?’’ tih pah hian ka han au chhuak nghal nghek mai a, ka nu lah chuan vin zetin,

‘’ Ko mai mai lo che. Zir tha hle hle rawh’’ rawn ti let zekin ka ngawi nghal hmak. Ka ngaih erawh chu a tha leh tawh hauh lo mai. Ngawi reng hian ka meng kual hrek hrek reng a, min rawn ko tu an awm leh takin tiin ka ngaichang pah a ni ber ang chu. Mahse, thawm erawh a reh zui ta vang vang a, lehkha pawh chu chhiar chhunzawm peihlo in ka khup fel zui hmak. Lung muang zeta ka mut lai te chuan min rawn phih tho lawp tur angah hian ka ngai tlat pek a, ka thil ngaihtuah dan vel chu ka duh lo takzet. Chutih nakalaiin ka khum bul chiah tukverh tereuhte chu ring lutuk mai hian ala rawn intheh hawng thuai zui a le! Ka au chhuak hluai nghe nghe a nih kha. Chuveleh, sitting room lama awm ka chhungte ho chu boruak ngaihven turin an rawn tlan lut ta sang sang mai a, phawk zeta han inmelh leh he haw chung hian, 

‘’ Eng nge ri deuh  țhuai kha. Ti nge I au chiam chiam’’ ka nu chuan rawn ti nghal hlawk hlawkin, ka lo la meng phawk hru.

‘’ Hei tukverh hi’’ tih pahin tukverh inhawng dar huau lam chu ka kawk pah zeuh bawk a, ka nu bawk chuan, 

‘’ Thli a thaw a tukverh a intheh hawng. Eng nge chutah chuan buaina I neih. Kalh tha ve thin ta che’’ ti zui leh hramin ka  pa leh ka unaute chuan ho tih hmel zet hian min la kalsan daih zui a, ka nu erawh min la melh ul ul chung hian ala ding reng. 

‘’ Ka kalh reng e a’’ tih nuah nuah pahin tukverh chu ka han khar tha leh mai a, mahni lo maha hlauh nak alaiin min la hrawk char char zui. Ka nu hi chu a chimawm thiam ve thin ngawt a ni. Mi hauh thiami a nih hi.

Tukverh ka khar that hnu chuan rei pawh meng hleithei tawh lo in ka muhil zui ta nimai hian ka hriaa, mumang ka lo la nei zui. Mipa pakhat hian ka kut chu rawn chelhin khawi hmun emaw hi min panpui dwr dawr mai a, hmun nuam tak a ni dawn emaw tih laiin khuar thuk tak awmna hmun mak takah hian kan chuang chhuak hlawl mai a nih chu! Min kaitu chu chiang taka en ka han tum a, a hmel reng reng ka hmu fiah thei bawk si lo nen, min vawnna kut te chu phelhsak tumin ka chai buai ngat ngat a, ka thei chuang hlek lo nia. 

‘’ Hey, min kal tir rawh’’ ka han tih tak tuarh ah chuan chawp leh chilh hian min thlah ta thut a, khur thut tak chhungah chuan tum lawk pawh awm hauh lo in ka tla thla ta vawn vawn mai a nih kha! Ka au chhuak ruai ruai a, chu chu a takah lo au chhuakin ka harh ta hlawl mai. Chuveleh, ka nu bawk khan vin zet hian,

‘’ Lalthlamuan, engah nge maw I au chhuah chiam chiam zel le. Rawn tho la, chaw ei a hun’’ a rawn tih nghal avangin thawh a hun tawh tih ka hrethiam mai a, phak chual chung hian ka inperh tho zui zat bawk. Ka nu hnenah cka mumang chu thiam dan tawk tawka hrilh ve in, ani lah chuan awlsam zet mai hian,

‘’ I mumang a nih chu. School I tlai a nge’’ a lo ti liam puat a, a hmuh loh turin rum zet hian ka melh zui nghek. School kal tura ka chhuah hnuah min la rawn au zui hram chung hian,

‘’ School ban rualin I pi Thiangi te inah khan rawn kal kawi ang che. Kan zikhlum tur min lo lei kep a’’ a rawn ti leh lang lang a, ka chhang peih tawh lo. A tul te chuan ka nau te pahnih pawh hi tir ve thin mai se la tha tur a nia, upa ber ni si hi min tir phar reng ringawt mai. 

Nilengin school-ah pawh mood fu lo deuh in ka awm tluan leh zak tawh a, ka mumang mawlh kha ngaituah chhuakin ngaihthat lohna hlir hian min tuam chhuak vek ka ti mai. Ka awm a nuam thei thlawt lo. Chawlh lawk laia ka thian ten zial zuk ruk an an rawt pawh chuan kal ve peih lo in class-ah ka tawmsen deuh reng a, a khat tawk hian pawnlam te chu ka thlir phei zeuh zeuh thin. Nia, kha hriat ngai loh tlangval kha hmu leh dawn tlata inhriatna hi ka nei lian miau a tin lawm. mahse, vawiin chu a reh vang vang mai a, hmuh tur a awm lo. Engvangin nge ka mumangah khan khatia min lo tih kher kher le tih ka ngaihtuah a, ka tan hian mi tha a ni lo nge, thil min kawhhmuh tum a nei zawk ni ang. Rilru a buai ve ta map map mai nia. Ka tawng ngun ve ta em a tin ni. 

Tichuan, school ban rualin ka nu thu min chah ang khan Pi Thiangi te in lamah zikhlum la kawi tur chuan mahni chauhin ka kal leh ta nghut nghut a, an in ka thleng, inchhung ka lut dawn tep tih ah an kawngka zawn taka an thutthlengsei dah chunga lo thu ka va hmuh chuan ka phu zui leh zawk. Kha pa, kha tlangval bawk kha hetah alo awm leh tawh nia! Mit khap lo lek leh uluk em em mai hian min lo melh reng mai a, min ti tim vek theiin ka hriat phah.

‘’ ih, pi Thiangi te hi an awm em le’’ ban chuara ka han tih chuan alo bu ve nghut a, mahse, min chhang hauh lo. Chutah, tapchhak lam atangin pi Thiangi zawk khan min rawn chhang ta a.

‘’ Aw, kan awm e. Tu nge ni?’’ tih pahin a rawn tlanchhuak a, ka hmel a rawn hmuh rual chuan nui var var chung hian,

‘’ E, in zikhlum tur I rawn la dawn emni? Lo kal rawh'’ ti zui sawk sawkin kei chuan an thutkhawmna lam bawk kha ka va melh leh a, kha pa pawh kha a thut ngai renga lo la thu in kei chu min rawn melh tawh lo hian ding takin pawnlam chu alo melh ngar ngar tawh zawk a.

‘’ Kha le, hei zawk hi in ta tur aw’’ tih paha pi Thiangi’n zikhlum min rawn pek hnu chuan keipawhin kha tlangval melh ru zoh zoh chung khan inchhung chu ka chhuahsan leh mai. Mahse, pawn ka chhuak chiah tihin pi Thiangi fapa tlangval awmtha duh lo leh sual em em mai URicky-a kan tih mai nen chuan intawk chawtin, ka kalna turte chu min han kian tha duh lo ve vel a, zu rim nise ala nam hum hum zui. Chu mai ni lo in a mitmeng atang reng reng khan ruih dang pawh a nei ang tih chiang sa a ni a, ka hlau tlat zel he pa hi chu.

‘’ URicky, min kal tir mai mai rwh’’ tih paha ka han namsawn dawn te chuan zu han cheswn tha duh miah lo a. chutah, thinrim ru deuh, fiamthu anga sawi tho si chuan

‘’ I kalsan vat loh chuan UTluangtei hnenah ka sawi vek ang’’ ka han tih tak nghekah chuan tawlhswn nghal nal nalin, a rawn nui ve ta sun sun a.

‘’ Muante, ka fiam ve mai mai che a nih kha aw min hrethiam rawh’’ ti nuah nuahin an in lam pan chuan a pen phei ve ta țuang țuang a. uTluangtei hi a bialnu chu ni hauh lo mahsela URicky-a hian a veiin a duh ve em em mai a, a hlau bawk. Chutihrualin UTluangtei hi kan veng nula fel leh hmeltha tia hriat lar kha a ni ve a, keini naupang takngial pawh hian hmeltha kan ti ve thei lutuk. URicky-a hian a ngaihzawnna a rei tawh angreng a, a hel nasa thei tluk tluk hle . Chutihrual erawhin UTluangtei thung chuan ani chu engatanmah a ti lo ve thung a, a nun hi a siam that hmasak phawt loh chuan a duh loh thu pawh a hrilh an ti. chutiang zelin URicky-a pawhin a hmeichhe hmangaih tan liau liau a nun chu siamthat han tum ve thin mahsela, ruihhlo zunzam chu alo chak zawk a ni chek ang ,tun thlengin ala thlah hleithei lo chu a nih ber hi. A khawngaihthlak zawk.

‘’ Min pui rawh’’ tih sup paha min rawn kal pel fua tu chu ka han en a, amah tho kha alo ni! Mahse, a kal chak zui tak em avangin a hnung daih atang chuan keiin,

‘’ Thianpa’’ tih pah hian ka umzui ve dawr dawr a, a rawn hawi duh leh miah lo. A kal ngai reng chuan a kal zui hmawk hmwk reng a, motor kawng kan lehin vengsang lam panna ah kal chho zelin, umzui ve ka tum lai tak hian motor lian pakhat chu a rawn tlan tlang hlauh mai a, a tlan liam leh meug chuan kha pa kha alo bo zui daih tawh. A kalna tur awm ang thlir chuan ka hawi ka hawi a, a mawng phe takngial pawh chu hmuh zui tur han awm miah lo a! Mihring ni tur atan chuan ka ring ta chiah lo deuh a ni. A khawsak duh dan a maksak thei riau. 

Tum bur chungin inchhungah ka lut a, ka zikhlum ken pawh chu dawhkanah dah ri chawrhin ka nu lah chuan rang em em mai hian,

‘’ Lehkha I zir dawn loh chuan tuikhurah zu insu lawk the. Tui lah hi an la sem thei silova, a buaithlak tlat’’ a rawn ti ve nghal zat. Ka va han ner nasa mai mai tak aw. 

‘’ Ka nau te ho pawh hi tir ve thin mai la, min tir bik reng ringawt mai’ ti bai baiin room-ah ka lut tlang a, ka nu bawk chuan choka atang hian ring zetin,

‘’ I nau te chu an insu fai thiam hleinem mawle. Phun phun lo khan zu kal vat mai rawh’’ ala rawn ti hram. Huiham, schoola hun ka hman chhung zawng te pawh khan eng thil hi nge an lo tih tjin le ka ti. Mi buai ka nih hi. Tichuan, inthlak fel sawk sawkin thawmhnaw suk turte ka han dap khawm țan a, peih lo zet hian tuikhur lamah chuan ka inphur bawr thla ta pur pur mai a nih kha. Tuikhurah pawh chuan midang lo awm ve lo se ka duh, ka be peih lo. 

Ka duh ang thlapin tuikhurah chuan midang tumah hmuh tur an lo awm lo tak tak a. Thaw deuh hak chung hian thawmhnaw bal ho chu surf nen ka han chiah leh te te a, chutihlai chuan ka awmna chhak hnim pik leh thingkung hlir dinna hmun atang chuan mipa au ruai ruai ri niawm tak hi ka hre ta thut mai a, ka thiltih lai chawl meuhin thawm chu ka ngaithla zui ta kar. A reh ve leh mai tho na in ka awm erawh chu an tinuam lo lek lek tho a, muangchang hian thawmhnaw pawh chu ka su lui ve zel tho. Mahse, a hma aia chiang leh rei zawk mah khan ka awmna thlang lam ram ruak atang ngei mai chuan mipa na tuar thawm au ruai ruai bawk chu a rawn ri chhuak leh ta mai a! Ka phut nasat lutukna lamah ka ding chhuak nghal zawk thei. A au satliah lova, na em em tuar ang mai hian a țe chhuak vawn vawn mai a, keimah hual vel te chuan a au kual ni berin ka hre lehnghal. Ngaihthlak hrehawm tak a ni. A rei tak hnuah phei chuan ka tawrh theih tawh thlawt loh avangin tuikhur chu ka tlan hlatsan vat a, khur hlawk hlawk chungin inchhungah cbuan ka tlu lut deuh rawk rawk tawh a, ka nu leh ka nau te chuan maktih hmel deuh hian min lo buaipui nghal zung zung bawk. Ka nu phei chuan rak chel chul chung hian,

‘

‘’ Awi! Lalthlamuan, engtia zia nge min va han tihlauthawng em em ve mawle'’ tih pah chuan min kaitho zui sawk sawk a, ka duh vang ni hauh lo mahse ka taksa te chu an la khur chhuak vek tihtheih a ni a, ka duh ang angin ka chesawn kual thei lo bawk. Ka awm dan maksak lutuk chuan ka nu chu ti hlauthawng zualin ka pa a be nghal chul ta mai a, a rang lama rawn haw vat tur pawhin a ti nghe nghe. Ka pa pawh chu a rang thei ang berin a hnathawhna hmun atang chuan a rawn tlan haw ve ta ngei mai a, hetih lai pawh hian kei chu thutthleng chungah lo thu in ka khur erawh kha chu ala reh hleithei miah lo thung a, ka che thei lo. Ka rilru erawh chu a harh vek thung si. Hrehawm duh tak a ni.

Ka pa in min rawn sawi deuh nawk nawk paha,

‘’ Bawihi, engtin chiah nge I awm. Eng nge thil awmzia’’ a rawn tih chuan ka thla hi a muang zui ve sawng sawng thei nimaiin ka hriaa, zawi zawiin ka taksa khur dur dur te pawh chu an reh chho ve ta zel bawk. 

‘’ Eng thil nge I tawn min han hrilh the le. Thiani, eng nge thil awmzia hi ni a’’ a han tih lang lang lai te chuan ka bengah erawh  kha pa na tuar țe thawm chiah kha alo awm leh tawh thung a, a hrehawm dan chu sawi mai ai pawh hian sawi lohin a fiah zawk ta ve ang. A rapthlak a ni. Ka nu chuan tuikhura ka insuk thu leh hlau hlawpa ka tlan haw thu te kha ka pa chu lo hrilh ve in, ka pa bawk chuan,

‘’ Ka fanu, I thil hmuh leh hriat te chu han sawi tawh rawh le. Engmah hlauh tur a awm tawh lo aw’’ zaidam taka a rawn tih leh phei chuan ka hnuk no rawn chhuakin ka tap ta zawih zawih maia. Ka pa pawh chuan min lo kuah bet tawp ringawt. Tichuan, tap hlawp hlawp chungin tuikhura ka thil hriat zawng zawng te kha ka chhungte hnenah chuan ka sawi chhawng ve leh ta vek mai a, makti lutuk in an lo inmelh tawn zak zak hlawm mai. 

‘’ Thla ai thawm te hi I hria nge maw ni dawn le’’ ka pa in ngaihtuah muk tih hriat taka a rawn tih chuan ka nu thung erawh chuan,

‘’ Chutiang ni turin kan khuaah hian damlo na  em em an awm pawh ka va hre lo ve. Chutiang nei ila chuan kohhran lam pawhin kan hre daih tawh a nga, a,, thildang engemaw tak zawk a nih ka ring. I beng chhe ri te hi a ni lek zawk lo maw!’’ rawn ti leh hramin amah chu ka va melhrum zui nghek.

‘’ Bengchhe ri mai mai hlau a tlanchhe rual pawh ka ni tawh lo. Min ring duh lo mah ula ka thil tawn kha ka hrechiang ve tawk’’ lo ti let ve pang pangin roomah ka lut a, ka mu zui daih. Ka pa pawhin ka nu chu a hau zui nghal tih ka hriaa, ka khi ve suk ringawt. Eng thil pawh tawk ila min hmuh pui ve kher loh hi chuan ka nu hian a awih tha duh ngai miah lo a. Nu huaisen tak kha alo ni ve hrim hrim bawk nen, tunah pawh tuikhura ka tlansan tak ka thawmhnaw bal ken te pawh kha khaw thim dawn a ruaiah amah chauhin a zu la leh vek a nih kha. A huaisenna hi a fakawmin a awhawm thin ngawt asin.

Zan khua chu rawn thim in ka awm a nuam thei lova, ka mu zal mai mai te pawh chu chau hluah hluahin engtikawng mah hian ka mu rem hleithei thlawt lova, ka inlet tawn sek. A tawpah phei chuan ka khua chu a rawn sik ta nge nge a, ava han thawpik thlak tak. Mahse, chuti chung chung chuan lo muhil in, mumang ka lo nei lehnghal a, ka mumangah lah chuan tuikhur ah bawk khan ka lo va kal leh a, ka lo au deuh vak vak bawk. Tin, a chhak ram thing leh hnim pik a khat chhungah te khan lo va tlan kual thuak thuakin thil zawn hi ka nei ngei bawk a, ka zawn ber erawh hre chuang lo chuan hah thi lo chauhin ka lo tlan kual puat puat reng bawk si a, chu mai chu duhtawk lo in  tuikhur thlang lama lung pher hlai em em awmna hmunah te chuan lo tleng thla leh puat puatin ka thil zawn lai chu hmuh ngei tum hian ka lo bei hah chiam mai a ni. Ka harh chhuah leh meuh erawh chuan thlan hian min lo bual huh dup tawh thung a, ka thaw zui hlawi hlawi thei. A hrehawm dan kha rapthlak tak a ni e. 

‘’ Pa’’ tiin thei leh thei lo hian ka pa mu tui lai chu ka va ko dat dat reng a, ala hre har em em mai lehnghal. Mahse, vawi 10 vel zet ring lutuk lo a ka koh hnu chuan rawn harh ve thei hram in, rang zet hian min rawn ngaihven nghal thuai a,

‘’ Bawihi, eng nge ni ta. E,, lum iti emni I thlan ava chhuak nasa ve. Eng nge mumang tha lo inei leh tawh nge’’ tih zung zung pahin ka chal te chu a rawn dek a, a phu deuh zawk mai ni hian ka hria.

‘’ Ekhai! I pang ava sa ve. I nu ka’n kai tho lawk a nge aw a damdawi dahna ka hre ve lo tlat’’ ti leh zung zungin keimah vanga a vir buai lutuk chu ngawi reng hian ka lo thlir tlawk tlawk ringawt a, ka khawngaih zawk. Tunhnai hian engvanga tal buai em em reng mai nge ka nih ka hre lova, keimah hi thilmak hian min hual velin min umzui reng a, min tibuai tak zet a ni. A chhan diktak hre tura bul han tan dan ka hre lova, hmalak ngaihna pawh ka hre chuang bawk si lo. Pathian hnena a puihna dila tawngtai tawp mai loh chu tih theih dang reng reng hi ka nei lo a ni ber e. 

Khawsik hlat hlat chung pawhin inchhungah chuan tawm reng peih hek lo, school kal tur chuan ka chhungte remti lo chung chung chu ka chhuak lui leh ta hram tho a, schoolah pawh che chang peih lo in class-roomah ka thu deuh chawrh chawrh reng a, tute pawn min rawn hmu se ka chhang tha peih lo. Ka melh peih țawk țawk a ni ber. Chutia dawhkan bawh a ka lo awm nguai nguai lai chuan ka bulah tuemaw hi rawn thu thla ve in a hmel chu en chian ka han tum a, mahse, a phe ruai nimai hian ka hria. Ka khawsik in min la thlah loh avanga mitmeng fiah lo nge ka nih , amah kha a dik lo ve hrim hrim zawk. A hmel mawlh chu en chian ka tum pauh leh a fiah lo tulh tulh nimai hian a lang a, a manganthlak zawk.

‘’ Chawlh lawk a nih hi va infiam ve ta che’’ ka lo tih chuan a rawn nui chhuak hakin ka hriaa, dawhkan bawk chu ka bawh leh zen zen tawh. 

‘’ Min pui ang tiraw?’’ ring lemlo tak hian a rawn ti leh sup. A aw kha. Kha tlangval ka hmuh thin aw ngei kha niin ka hre deuh tlat a, min tiharh zawk hian ka hre nghe nghe. Thu ngil zawk chungin a hmel chu ka han en thin a, ti nge le a hmai zawn tak chu hmuh fiah a harsat em em le ka ti. Ka bih hnaih poh leh hmuh chian a harsaa, ka mit te chu ka nuai phah vak vak lehnghal. 

‘’ Eng nge I hriat a khatia min bih hnaih vak vak. Bell a ri tawh a ka rawn lut a nih hi’’ lo ti daihin, tun lawka min rawn thutchilh tu pa kha chu alo bo pil leh hmiah tawh. Tin, ka mit pawh a fiah tha ve leh tawh a, ka bula thu ka thiannu hmel pawh chu chiang takin ka hmu leh thei ta bawk. Eng thil chiah nge maw ka chungah hian thleng ta hi le. Ka hne zozai ta hle mai. 

Khawsik lu na ber bur leh ti chiai chuai chung chuan school atang tha zawi em em chung hian ka haw ve leh ta hnak hnak mai a, mahse, chutia ka lo kal ve bek bek lai chuan tuemaw hian hnunglam atang min rawn su her lawih chung in,

‘’ Min tanpui loh chuan I damtha thei lo ang. Ka tibuai zel dawn tho che’’ rawn ti supin a tlan zui leh nal nal mai a, um tur chuan chakna ka nei bawk si lo nen, mitmeng fiah lo ruai chung chuan a tlanna lam chu ka thlir zui ve ta ngawt ngawt ringwt. Ka hmuh dan maiah chuan kha tlangval tho kha chu niin ka hriaa, he pa hian eng nge ka lakah hian a duh tih ka hrethiam lo. Eng tihsak tur atan chiah nge min duh ang tih phei chu hrethiam lo tak ka ni. Thil thui zawk han zawh belh dawn ila a kalbo nghal daih zel bawk si a, puih duh si, a chhan diktak sawi duh chuang si lo, mi maksak ve tak a ni e.

Ka pa in ka chanchin min lo zawh chuan ka ziaawm theih loh thu leh, ka khawsik pawh ala reh theih loh thu chu hrilh ve in room-ah ka lut a, inthlak pawh inthlak mumal peih lo hian khumah ka bawk zui nghal thlawp mai. Chutah, ka pa bawk chuan,

‘’ Damdawi I ei nual tawh si a, khatiang reng chu a tha lo tlat. Han inthlak la, zanriah ei kham lamah damdawiin kan pan dawn a nia’’ rawn ti lehin, chhan pawh ka lo chhang peih lo. Eng thilmah hi tih phurna leh tih chakna reng reng ka nei hauh lova, ka tha a zawiin ka na em em reng ringwt mai a ni. 

Tichuan, chaw pawh chu chhete tak tak bar ve in, kawrlum ka ha leh thuak a, ka pa nen damdawiin lam pan tur chuan kan chhuak dun ta nghal bawk. Eng thil nge ka hlauh tih pawh hre silo hian kawngtluan mai chuan hlauhna hian keimah ah bu a rawn khuar tlat mai a, a khat tawka thli thaw leh vuk vuk thin te, thli thaw in thing hnah a chhem chet sung sung ri te chu hlau in ka hawi kual hrek hrek reng tawh a, hetiang mi hi ka ni ngai lo. Huaisen tak leh hlauh nei lo chu ka inti ngam lova, mahse, ka nu ka chhun deuh avang hian huai lamah pawh ka nau te ho hi chuan min tluk lo vek. Hlauh em em ka nei ngai lova, fiah hmasak phawt zel ka duh thin ka tih tawh kha. Mahse, tuikhura ka thil tawn the hrep atang khan hlauh tur hi a zawn in ka zawng emaw tihtur a ni tawh a, tun dinhmunah ngat phei hi chuan sawi tawh ang khan thli thaw ri mai mai pawh ka hlau a, keimah min tihlum tur misual te hi rawn kal dawn tlata hriatna ka nei thul. Ka buai vek. 

Tichuan, damdawiin kan thlen hnuah doctor duty chuan check theih ang zawng zawng te checkin ka thisen min laksak bawk a, mahse, result erawh chu a tha vek thung si. 

‘’ I khawsik hi a sang angreng em a, I damdawi ei a hniam bawk si a, eng lo In ti ang. Zanin chu drip khai nan te hun hmang ila, chaw I ei mumal lo nen I taksa a chhe riau mai a, hei hian a tichak lo zual che a nih hi. Hetah hian zanin chu riak phawt mai ula naktuk khawvar hunah I awm dan a zirin tih dan dang kan ngaihtuah tha leh dawn nia’’ a tih chuan ka pa nen kan lo inmelh deuh zawk a, damdawiina zan khat lek han riah tur pawh chu ka va han peih lo tak em. Tichuan, ka pa chu in lamah haw leh phawtin, puansin tur leh mamawh dang la tur chuan min kalsan leh ta phawt a, a kal chhuah rual khan ka khua te hi a har nghal veng veng thei nia. Ka awm dan hi ka inhrethiam lo tulh tulh. Ka pa a rawn let leh hnu chuan drip pawh min khai chhunzawm nghal ve maiin a khai chhung a rei thei si a,  ka huphurh lawk hluah hluah. Mahse, chutia ka lo mu chuan mumang nge a tak tih pawh hriat hran theih loh thil hi tawng chhunzawm lehin, kan awmna ward luhka ber kawngkapui atang chuan kha tlangval ngei mai kha rawn lut ve leh in, kei chu ngaihnobei zet a min rawn nuih var var chung hian min rawn pan hnai ta sauh bawk a. Tichuan, ka mutna bulah ngei ngawi renga rawn ding chungin,

‘’ Min tanpui duh loh chuan I dam tha tawh mai mai lo ang tih thu ka sawi kha ila hria em’’ zaidam deuh si, thupe aw ni tel tho bawk si chuan a rawn ti leh ta mai a. ka meng zau nghal kawk kawk thei. Chutihlaiin, amah chhan let tuma ka han tawng chhuah ve dawn erawh chuan eng thu mah hi ka kâ atang hian a ri chhuak thei ta reng reng lo thung a. ka twng thei lo. Ka ang deuh phuau ringawt. Chutah, nui var var chunga min lo en reng chung chuan ka drip khai lai te chu rawn phih thla hlawk hlawkin ka kuta venflon invuah bur te pawh chu a pawt phelh leh ta zung zung mai a,  ka  țe chhuak nghal tuarh tuarh thei. Ti suh tih paha amah ka han pawh nawk nawk lai chuan thil thleng engkim mai chu a rawn inthlak danglam leh ta vek mai a! Chu damdawiin chhungah chuan kha tlangval hmel reng reng kha hmuh tur awm lo in, ka bula ding mek doctor zawk chu ka lo pawt chiam chiam hi niin, ka pa pawh chuan dan beh min lo tum nasa hle bawk. Tin, chu ward chhunga damlo awm ve midang ho pawh chuan kei cu mak tih hmel zeta min lo thlir thap chung hian an thil tih lai pawh an chawl thuap hlawm mai a, ka va han zak hnuhnawh tak em.

‘’ Bawihi, eng thil nge itih. Eng nge I hriat’’ tih paha ka pa in min rawn sawi leh tak nawk nawk hnu chuan a hma ai mah khan harhchiang zawkin ka thaw chhuak deuh hawk bawk a, doctor hnenah pawh ka thiam dan dan te chuan thupha chu ka han chawi ve leh mai bawk a nih kha. Zah luatah thlan in min bual huh vek a, meng pawh meng tha ngam tawh lo in ka mit chu ka chhing zui ta vang vang ringawt. Chumi chin atan hemi zan hi chuan eng thil danglam leh buaithlak mah tawng chhunzawm tawg lo in tui tak chuan ka muhil zankhua ve ta țhak a, drip an rawn phawi lai pawh hre map lo khawpin ka lo mu tui tehreng a nih chu mawle. Tin, zing ka thanharh hnu atang khan ka taksa ah sawiselna lai tur em em hre lo in keimah chu ka zangkhai vah bawk a, ka harh tha ta mah mah zawk bawk. Nuam tak hi a ni ringawt mai e. 

‘’ Bawihi, I ril te a țam em? Tunlai chu I damloh a leiah chaw mumal I ei thin siloa, eng nge ei chak I neih ka zu leisak ang che’’ ka pa in a rawn tih pawh chuan ka ril a tam loh thua lo chhangin, haw vat vat ka duh tawh zawk thu ka lo sawi daih thung a, ka pa pawh chu a khi ve vur vur ta ringawt. Chutia ka pa nena kan lo inbiak mawlh mawlh lai chuan Vengsang lama awm Lal pa Rema ka tih mai kha ward chhungah chuan rawn lut ve nawlhin, kei chu min rawn hmu nghal chat bawk a. Pa Rema hi he damdawiinah hian hun rei tak atang twh khan clerk hnathawkin alo awm ve tawh a, tunah pwh hian ward chhung vel enfiah turin a lo lut a nih ka ring deuh bawk. Nui vur vur chunga min rawn pan hnaiin,

‘’ Kan nula fel em em chu engtizia nge ni. Nizanah emni in rawn luh a’’ rawn ti nghal bawrh bawrhin ka pa chuan alo chhang zel thung a. Reivaklo ka chungchang sawia ka pa nen an inbiak hnun Pa Rema bawk chuan a phone rawn phawrh chhuah pah hian,

‘’ E taka Muante, hmannia thil min zawh lai khan ka phone hi ka lo keng remchang mai lova, hei hi nia ka sawi kan mikhual tlangval ka tih chu. A felin a hmel te hi a tha a sin. I duh ve mai dawn emni le’' tih pahin a phone chu ka hmai zawnah a rawn lek va va mai a, ani hian min fiam a chak leh tawh a nih ka lo ring mai. Mahse, a phone ami thlalak ka han hmu chiah chu ka va han phu nasa tehreng em! Amah kha a ni. Amah ngei mai kha! Chiang tak taka ka hmuh hnu lawka a mawng phe pawh hmuh zui tur awmlo a min kalbosan leh thin tu kha tlangval ngei mai kha alo ni! Thut ngil nghal awt pahin kei chuan,

‘' Lal pa Rem, he pa hi in mikhual tlangval chu a nih tak tak chuan aizawl lamah a haw thla awzawng lo! Khami ni bazara kan inhmuh ni pawh khan amah hi ka hmu a, min rawn be nghe nghe. Chuvang a nia a chanchin kha ka han zawh kher che ni. Khami hnu lawkah pawh khan schoolah te ka hmu’’  tiin ka hmuh thin dan engkim deuhthaw chu pa Rema hnenah chuan ka sawi zo titih ta vek a. ka pa pawh chuan mak tih hmel em em hian ngawi rengin min lo ngaithla ve deuh tawp ringawt.

‘’ Phirpui a nei te a nih ngawt loh chuan amah ngei kha a ni e!’’ ti leh hramin, Pa Rema pawh chu khp fuk fuk chung hian alo thaw ve ta hak hak mai a. chutah, a kawng dawm meuha hawi kual leh ralh ralh chung in,

‘’ Ava mak awm ve mawle. Amah hi ka unaupa neihchhun min boralsan tawh tu fapa a nia, a nu hian a pa boral hnu lawk khan pasal dang umsan in, a rawn ngaihven zui leh ta hauh lo bawk a, tichuan, Rintea, tuna kan tlangval kha an khuaah pwh chuan awmzui duh ta lo in aizawl lamah zirna chhunzawm pah tiin hnathawh turte a zu zawng ta bawk a, amah a fel chi leh taima chi alo ni ve bawk nen hna pawh chu a hmu nghal  mai reng bawk. Tikhan reilote chhung cham turin kan bulah a rawn zin ve kha a nia, thla khat erh awrh chu a rawn cham ve ta awm asin. Mi in luaha khawsa leh hnathawh lai nei a nih bawk avang khan  duh chen chen cham thei kha a ni ta silova, a haw na pawh ni 2 vel chu a liam ve leh tawh lo maw. Hei min la rawn be leh miahlo kan lo I ru ve reng a, a buai a nih ringin keini lahin kan zu be bik bwk silova, I rawn sawi chhuah takah chuan ngaihven deuh chu a ngai a nih chu a’’ ti ve in, a rilru chu a hah hmel ta angreng hle a, ka lo inthlahrung ru ve ngawih ngawih. Tin, ka awm a tinuam thei miah lo bawk. 

Pa Rema’n min kalsan hnuah ka pa chuan ka thil sawi zawng zawng te kha min zawt nawn leh vekin, thudik a nih leh nih loh engkim chu min zawt tha leh vek a, keipawhin hlauthawng leh ngaihtha lo zet chuan thudik a nih zia chu ka lo hrilh ve mial mial bawk. Ka pa pawh chuan han sawi zawm vak ngaihna chu hrelo mahse a ngaihtuah ulukin a rilruah an cham zui tih chu ka hrethiam mai a. sawi tur hre tawh lo chuan kan ngawi dun ta rauh rauh mai a nih kha.

Damdawiinah chuan zan khat dang pawh riah belh tawh lo in inah kan haw ve thei ta hram a, kei chu ka thawveng deuh huai mai. Tin, ka taksa te pawh an damtha tawh em em a, en mai chuan damdawiin luhpui ngai khawpin ka damlo ang tih hi rin a harsa zawk. Ka tha chak ve em a tin ni. 

Damdawiin kan chhuahsan tuk atangin school pawh ka kal ve lehnghal mai a, kan thianho khan a hma ang bawkin meizial pawh kan zu ru leh hlat hlat thei tawh. Tin, hetia ka taksa a han dam chhoh leh hnu hian kha tlangval hmel pawh kha hmuh tur awm lo in a bo zui hmiah mai a, min han tibuai ta lo chu ka taksa pawhin a lo ngeih hle tih k hrethiam chiah. Ka zangkhai deuh vah mai a ni. Mahse, ka rinlawk dan ang ngeiin rei erawh min rial leh ta hauh lo mai le! 

Damdawiin kan chhuahsan atanga a ni hnih na tlai lamah ka school bang chu keimah chauh bawkin in lam pan chuan ka kal leh hnak hnak tawh a, chutihlai chuan ka hma hla vakloah hian mipa pakhat hi amahin a kal ve mek tih ka hmu bawk. Chu mipa chu chiang zawk leh ding meuhin ka han en ta tak tak a, kha tlangval, pa Rema te mikhual Rintea tia a sawi ngei kha ni a hria in biak tum chuan ka kal chak ta sauh sauh mai.

‘’ Lo ding the. Min lo nghak rawh’’ ti chul chung chuan ka umzui ve dawr dawr a, mahse, ka kohna chu a hrelo nge a hre duh lo zawk tih pawh hriat loh hian a hma zawng ai a chak khan a kal leh ta sawk sawk mai nia. A tawpah k tihngaihna hre tawh lo lutuk chuan ring angreng fe leh vin deuh țhatin,

‘’ Ka tanpuina min dil fova, pui tur che khan min ngen fo bawk a, mahse, I khawsak dan han en hi chuan tanpui ngai mihring pawh I ni ta lo in ka hria. Ka tanpuina hi I mamawh tak tak lo tiraw’’ amah tih el paha ka han tih takah chuan a kal lai chu tawpin, rawn hawi phei chuang hauh lo hian a nui ta kur kur mai! Ka ding zui chawt. Hun rei angreng fe chutianga kan inngaihchan hnu chuan amah bawk chuan pawr zet mai hian,

‘’ Kan la intawng leh dawn nia!’’rawn tiin , chutihlai tak chuan ka hnunglam atanga ka thiante min rawn ko thawm ka hriat avangin ani chu hnunglam ka hawisan zuk a, ka han hawi phei leh erawh chuan kha pa kha hmuh tur awm lo in alo pil bo leh daih tawh. Khawi lamah nge a kal tak ang ka hrethiam tawh bik lo. Ngaihruat ngaihna hlawl pawh ka hre bawk hek lo. Ka thiante ho pawh chu ka ngei phah lek lek thei hial mai.

Inchhung ka luh rual rualin room lama ka kalsan tak ka phone ri kha hre nghalin, hmanhawh zet hian ka tlan lut deuh puat a, ka nu lah khan min lo ko zui deuh tuarh mahse ka chhang hman tawh lo. Phone ka han en chuan ka number save loh atangin call chu ka dawng tih ka hre mai a, ka la hreh angreng hle. Mahse,

‘’ Hello’ ka tih rualin mipa puitling aw hian 

‘’ Aw, Thlamuani ini ang maw?’’ a rawn ti nghal vat. Kei chuan Thlamuani ka nih thu chu lo hrilh ve vatin eng thil nge a duh tih pawh ka zawt nghal var a. chutah, lehlam ami chuan hlauhthawn nei ang mai hian,

‘' Muante, I pa Rema ka nia. Hei tukin chu tuk dang ang lo takin aizawl lam atang call ka dawng mawlh mawlh reng mai a, chu pawh thildang vang ni lo in ka u fapa Rintea chanchin min rawn zawhna hlir ala ni lehnghal! Ah,han sawi tawp mai ila, kan nau-a hian aizawl hi a thleng thla lo a ni!’’  a tih lai huan keiin lo pawt chat vatin,

‘’ Chuti chu an khaw hlui lamah a kal tihna emni ang? ‘’ ka lo ti vat a. Pa Rema pawh chu a rawn thaw deuh hak mai.

‘’ An khaw hlui lam phone number ka neih ang ang te kha ka han call hlawm a, tute mahin Rintea hmel chu an hmuh loh thu an lo sawi tlat. Ava kal chang pawha thlenna atan bera a hman thin a nute-I te takngial pawhin a kal loh thu chu an lo tho a, chutiang zelin a nu pawhin a fapa reng reng a hmuh loh thu chu min lo hrilh hlawm a ni’’ a rawn tih leh chuan ka insum zo tawh lova, school ban ruala Rintea hmel ka hmuh nawn leh dan leh a thusawi te kha Pa Rema chu hrilh ve in, a ngaih chu a thalo zual ta hle mai a. a thaw deuh hawk hawk reng mai. 

‘’ A phone ah a call tlang theih tawh bawk silo a maw Nau-a chu aw! Engtia han tih chi nge maw ni dawn le. A awm dan I sawi hi kei chuan ka hrethiam ve ta hauh lo mai ka ti. Engpawhnise, police ah ka lo va thlen hmasa ve phawt a nga maw, ngaihtha taka awm hi tum phawt mai ila. Tlangval puitling an ni ve tawh a, mahni inveng him thei tur chu an ni ve tawh alawm’’ rawn ti lehin, a nihna takah chuan amah kha a rilru a nuam tawh miah lo tih ka hria, a rawn tawng chhuah dan te pawh kha mahni leh mahni inhnem chawp tum tawngkam mai ma a ni tih pawh ka hrethiam vek. 

Kan inbiakna kan tih tawp hnu chuan rilru ipik leh hah zetin khum chungah ja thu thla deuh hnawk thei a, ka thaw zui leh ham ham ringawt. Heng thil zawng zawng ka hmua ka tawn hnu hi chuan amah kha tlangval Rintea kha nung dama ala awm theih hi ka ring tawh lo ve ngawt a, rin chhan tur chhete mah ka nei lo bawk. Chutiang chungchang vel ka han ngaihtuah thui deuh phei chuan ka thaw ipik lutuk chu awmngaihna pawh hrelo in ka hawi ka hawi ringawt. Tihtur leh tih hmasak ber tur pawh hi ka hrethiam ve lo a ni. 

Zan riah ei lai te pawh chuan thildang reng reng ngaihtuah lo in Rintea chungchang hlir chu ka ngaihtuah tawh a, ka chaw ei a tui thlawt tawh lo a ni. Chutah, ka phone chu rawn ri lehin rang zet hian ka tho zui nghal vat bawk a, ka beisei ruk ang ngeiin pa Rema ngei alo ni leh chiah bawk. A rawn sawi dan chuan police ho puihna hmangin Rintea chu an tawng pawng zawn phawt dawn a nih hmel a, call tlang theih a nih tawh miau loh avangin  a phone awmna hmun chhui zui theih ni hek lo. An rin zawn tawp mai dawn a ni. Chuta thil thar engmah an la hmuhchhuah loh chuan khawtlang mipuite pun in zawn hna thawh mai an rel tlu nghal a, a thi emaw, a dam emaw, han hmuchhuak leh hram se ka va han ti tak em.

Chumi zan ka mu chu muhil leh hil lo inkarah awm rengin ka buai ru em em mai a, ka inlettawn sek reng ringawt. Chutah, tuemaw hian ka kut chu rawn vuan thutin min phih tho lawp mai a! Ka au chhuak theilo ka meng bial deuh pawp pawp ringawt tawh. Ka taksa chu chunglamah kang chho zelin kan inchung rangva te pawh ka han dek lek lek tawh hial a, hnuailam ka han thlir thlak nak chuan ka chhungte kha chu tui em em hian anmahni khumah theuh an lola mu barh barh hlawm bawk si! Au chhuah chu tum eng ang mah ila ka tum nasat poh leh ka hlawhchham zual nimai hian ka hriaa, ka ka te chu hnawh phui ang tlat hi an nimai e. chutiang chuan ka taksa chu pawnah dah chhuah niin leiah ka tla hlawm leh tawp a, mahse, na reng reng chu ka hre zui miah lo thung. Pawna ka awm hnu hian khua alo eng uarh tih hre ve chiahin, chhunlau vel a nih tawh ngei pawh ka ring thlap. Tichuan, hrilh tu nei ang maiin ka hmazwn ah ka kal zel ringawt a, khawi hmun nge ka pan dawn a, eng thil nge ka tih dawn ka hre bik lo. Ka kal tawp mai a ni. Chutah, kawngpui kha han chuang chhuak leh hlawl maiin chutah chuan Rintea leh URicky-a lo inbe lai chu ka han hmu fuh ta a. an thusawi pawh reiloah ka hre phak ve mai bawk. Rintea zawk chuan,

‘’ Hei aizawlah haw thlak ka lo tum a, counter ka pan dawn chiah a nih hi. Ka hman tawh lo viau asin mawle’’ ti nuah nuahin URicky-a thung chuan ruih nei tih hriat taka ner deuh sak sak chung hian,

‘’ Zu kal mai mai the. Tuikhur awmna te kha chu I hre tho a ni lawm ni? A nghah reng che kha’’ tih pah hian  țhen sawng chungin Rintea darah te chuan a han ben sak tha leh vel a, tichuan, Rintea pawh chu phun deuh nuah nuah chung hian kan in lampang pan chuan a chhukthla ve nghal ta a ni. Kei chuan lo zui ve vatin, kawng lakah ka nu pawh khan alo be ve nghe nghe a, a kalna tur alo zawh chuan Rintea chuan nui sang chung hian,

‘’ Khulai tuikhurah khuan Tluangtei a insu a, a keng seng leh siloa a nghak che min rawn ti a nih hi’’ tih pahin ka nu chu a kal pel leh mai a, ka nu pawh inchhungah a lut zui ve leh mai. Chutia amah zuia ka lo kal ve bek bek lai chuan ka hnunglamah pen thawm zawite hi hria in ka han hawi let nak chuan URicky-a khan thawm dim leh muang em em hian Rintea chu alo zui ru ve tih ka han hre chiah a, hlauhthawnna hliri ka khat nghal.ka hlauhthawn luatah Rintea hmaah te chuan tlan in a hnunglam en tur chuan ka han ti ve ngial a, mahse, ka thil sawi chuan awmzia reng a nei tawh chuang bawk silo. Pawi tak a ni.

Tuikhur kan thlen thlak chuan URicky-a sawi ang thil kha engmah hmuh tur awm lo in UTluangtei hmel reng reng pawh hmuh tur alo awm hauh lova, Rintea chu mangang taka hawi kual ruaiin let chhoh leh mai a tum lai chuan a hnunglam atang hian URicky-a khan lung lian ve lampang in a lu ah chuan a rawn chhutsak ta nghek mai a, a bawh thlu zui chat bawk. 

‘’ Nang aizawl tlangval hian ka nula chhai lai Tluangtei hi min rawn chuhpui a nga maw!? Teuh lo mai. Hre rawh. Kei lo hi chu tu midang mah a nei dawn lo aw. I thi dawn. Vawiin hian I thi dawn khawp’’  tiin a rek pah chawt chawt bawk a, hnuailam atang hian Rintea pawh khan rawn khawih ve thin mahsela, URicky-a chhutna hliam kha a na angreng tawh em a, duh ang takin a che tha thei lo tih ka hria. Chutihnak alaiin URicky-a bawk chuan a kekawr hnunglam ipte chhung atang hian chemte hriamm hmel em em mai rawn phawrh chhuak lehin, Rintea taksa rem lai laiah chuan a han vihsak zui ta zawt zawt mai a, ka lo au deuh tuarh tuarh thei. Chutah, URicky-a chuan a rehna kut kha thlah palhin, Rintea zawk chu a tha neih ang ang sawm khawmin a rawn che chhuak ve leh thung a, theihtawpa na hian amah beitu chu han tlawh leng deuh dawrhin, URicky-a pawh hnunglamah a kat ve nawk nawk mai. Tichuan, Rintea chu thei leh thei lo in a rawn tho ve ta hram hram a, puih theih ka va han chak tehreng em. Thei leh theiloa a rawn dinchhuah lai chuan URicky-a khan a lam panin chemte bawk vhu a rawn vilik phei leh ta valh valh mai a, ka thin hi alo phu leh zawih zawih tawh. A kâ atanga thisen rawn phuh chhuah that pah leh a hliam awmna hmun dawm bet vang vang chung chuan,

‘’ Min ngaidam rawh. I bialnu a ni tih hria ila chu ka be bik hauh lovang.ka haw anga, ka rawn inlan leh tawh miah lovang. A tha em? Khawngaihin min ngaidam la min kal tir hram rawh’’  a tih pawh chuan URicky-a chu ala lungawi thei tlat lo. 

‘’ Chutianga ti tur chuan min beisei maw? Nang hi I mawl deuh tak tak nge maw ni le. Kut ka thlak hrep tawh hnuah che nungdamin ka chhuah che a nga maw? Teuh lo mai. Kha kha I chantawk’’  tih pah hian thei leh theiloa lo ding Rintea pumah chuan ava vihsak ta thawih mai a, thisen chu a rawn baw chhuak nghal hawk thei nghe nghe. 

‘’ Thi rawh! Thi rawh! ‘’ tih pah hian URicky-a chuan duhthawh zetin a vih chhunzawm leh ta mawlh mawlh a, Rintea na tuar hmel chu ka hmuh luih theih tawh thlawt loh avangin ka hmai ka lo hup ta ringawt. Rei fe hnuah ka mit menga ka han hawi chhuah leh nak chuan URicky-a khan a mi thah ruang chu a ke hmawrah lo hnukin tuikhur chhak lam ram ruak kha a panpui tih ka han hmu ta mai a, ka umzui ve nghal vat. Thui pawh ka la umzui lo ang tihturah hian ka mumang kha hrechhuak nghalin, helai hmunah ngei hian a ni Rintea khan min lo hruai tawh ni. A tir atang khan thah a nih dan leh a ruang thuhruk a nihna hmun zawng zawng hi min hrilhfiah tumin a bei nasa ve em em a, mahse, a theilo. Keimah hi ka lo inhawng tawk lo tlat a tin ni.

Khur thuk lutuk lo lo awm saah chuan a mi thah ruang leh bag ah lai te chu hnuk lutin, a hah lutukna lamah a han thaw pah leh hlawi hlawi thin bawk a, kei chuan ka lo thlir deuh tawp. Ruang dahthat a zawh hnu chuan hnawmhnawk a hmuh theih ang ang hmanga khuh tha lehin, a chemte pawh kha tuikhur thlang lamah a vawmbo zui nghal a, tichuan a hawsan thei ta hram a ni. 

Chung thil zawng zawng ka hmuh hnu chuan khur hlawk hlawk chungin ka khum chungah ngei khan a harhchhuak leh ta hlawl mai a. khua pawh alo eng țan ve uarh tawh. 

Tho zui deuh sawk sawkin ka chhungte ho chu ka kai tho leh sawk sawk bawk a, thil awmzia leh ka thil hmuh dan engkim mai kha ka han hrilh ve chuan ka nu chu maktih lutuk vang hian nikhaw hrelo angrengin alo awm lek lek hial a, ka pa nen chuan kan han buaipui leh te te phawt. Mahse, reilote hnuah rawn harh tha ve leh maiin mangang tih hriat zet hian,

‘’ I pa Rema te call rawh’’ a ti chul mai bawk a, keipawh chuan hrechhuak ve zawkin Pa Rema chu ka call nghal vat vat. Tichuan, thil engkim chu police hnenah hrilh ve nghalin ka mumanga ka hmuhna hmun te kha an va dap tha leh ta a. chutah chuan dwt ka sawi loh zia tihfiaha rawn awmin, ruang țawih uih leh rimchhe em em tawh chu hmuhchhuah a ni ve thei ta a ni.

Chung thil vel chu thawventhlakin, han thawkpui huai ve mah ila keimah ah hian kim lo engemaw riau hi a la awm tlat reng a, ka ruak deuh huai nimai hian ka inhria. 

URicky-a pawh chu man in jail lamah phurh liam ni tawh mahsela kei erawh chu ka la famkim ve thei tlat lo nia! Ni e, kha tlangval mi nung damlai emaw tia ka lo en zui leh ka lo um duan duan ngei mai kha mitthi a ni tawh tih hrechhuakin khawvelah hian hmuh tur a lo awm ve tawh hauh silova, ngaihtuah chian chuan ka tan hian a na ve duh reng mai. A chhan chu, ka ngai a, ka hlau lo bawk a, hmuh nawn leh hial mai hi ka chak a ni. Um, nia, engtik ni ah emaw chuan ka tawnmang lamah tal a tana ka thiltih chhete avang khan lawmthu chauh tal te chu min la rawn hrilh ve ang chu maw... ka lo nghak reng dawn a ni.

************     *****       *****    ************      *****    ***     *************    *****  ********