KA PASAL

KA PASAL

BY ; Vanlalpeki Fanai

‘’ Vawiin te chu kan chhuak dun ve hman ang chu’’  min zawt pah titiha min melh kar chung hian ka bialpa, ka pasal ni tawh mai tur Ramenga chuan a rawn ti a, min nuih var var reng bawk. Kei erawh chuan ka lo melh rang hmasa leh phawt a. 

Ani hi private school lian ve pangngai tak pakhatah thawk mekin, kei hian a hmingin pheikhawk zawrhna dawr lian em em pawh nilo ka hawng ve bawk a, mahni tawka buai ve ve tihtakah, zan lama a rawn len loh hi chuan chhunah hun awl kan ngah lo dun khawp a, engemaw chang hi chuan hun awl insiamchawpa len chhuah dun lawp lawp pawh kan nei ve tho.

‘’ kan nula tlangval rei tawh dawn silova, a thlah nan chhun chaw te pawh kan ei chhuak dun ve ang chu. Vawiin atan school lamah period ka nei tawh hranlo a, pu ten min hrethiam hlauh’' ti barh barhin a hmel chu ka han en a, a phur hmel phian lehnghal.  keipawhin chutiang na na na chu tiin thawk lak halh pah hian ka thiltih lai te ka dah fel phawt a,

‘’ Awle, pu berin I tihte chuan tuin nge hnial ngam ang le. Ka hman chu a nimai’’ ti ve in, min lo nuih var var a, kan inzuichhuak nghal bawk.

Ramenga nen hian kum lamah pawh kan inthlau hran lo hle a, kei ai hian kum 2 chauhin a upa nghe nghe. Mipa hmeltha leh piannalh tih tur chi kha a ni hauh lova, a palian hran lo bawk. Chung zawng zawng ai chuan ka thinlunga a thawhnat dan hi ka rilrem zawng tak a nih angin ka thlang a, ka vuan tlat reng a, tunah chuan nupaah hial pawh insiam kan lo tum ve ta. Mipa a nih anga a tihtur a ti mai thin te leh, a țawng tam lohna te, hmeichhia ka nih anga a tawk chauha min enkawl dan a thiam thinna te hian amah ka duhna leh hmangaihna an tizual em em a, mipa hleitling leh pian thiam, sang thlerh thlawrh hmeltha ver vawr bawk si tia sawi tur nilo mahse, chung ho ai chuan amah ka duhna hi an sang fe zawk a ni. Eng nen mah tehkhin ka duhlo ang bawkin ka thlakthleng phal bawk heklo.

‘’ Tunah hian kan unaute Lalramenga leh Vannunhlu-I te chuan Pathian leh kohhran hmaah thu an lo tiam ta a. Tun atang chuan nupa diktak, tisa pumkhat an ni ta tih ka puang e. Pathianin a zawm tawh chu mihringin then suh se’’ tiin kan inneihna thu chu Pathian leh kohhran  hmaah kan thlung fel ve ta reng mai a. ka thaw huai thei. Ka nghahhlelh leh huphurh ruk em em ni bawk hun duhawm leh hlimawm chu hmang zo in, zan hun alo thleng a, ka chau ve ta takzet. Kum 3 zet kan inngaihzawn chhung khan vawikhat pawh nupa nun hmang chhin loin tun hun hi kan lo thleng thei a ni. A hlim tih ka hriaa, chutiang bawkin keipawh ka hlim. 

Ka pasal Ramenga te chhungkua hi chhhungkaw awmthei leh khawsa thei tak tia sawitur an ni bik lova, chutiang bawkin keimah lam pawh mi pangngai ve mai kan ni. Mahse, dinhmun vanga inhmangaih leh innei kan ni hran lova, kan pahnih leh chhungkaw inkar a that a, kan inlungrual tlan chuan a tawk viau ka ti mai. 

‘’ Ka nupui duhtak, kum chanve dawn chu kan innei ve ta reng mai a. Rinaiin nau hi kan pai har ka ti’’ ti sur surin ka chalah a rawn fawp zeuh thin a. kei chu ka lo meng siar siar thung. Nia, a rawn sawi ang tak tak khan kum chanve chuang chu kan lo innei ve ta reng mai. Mahse, eng nge a chhan ka hrebik lo tlat heti em em a ka rai har chhan hi. Dik lohna ka nei nge ni a nga, amah ah hian fellohna a awm zawk ni ang. Heng hi chu kan thuneihna piahlam thil daih a nih avangin han sawi mawi vak dan tur ka hre lova, tihngaihna ka hrebik lo tlat. 

‘’ I hlauthawng hma lutuk a nih kha. Kan la pai ve em em ang. Mi fate mahin kum 10 hnuah te alawm an pai chauh le’’ nui hak hak chunga  ka han tih chuan a hma ai maha thutak zawk hian amah bawk chuan,

‘’ Damdawi chu ilo ei ve em lo maw! ‘’ rawn ti leh supin, chiang zet hian ka han melh chho nghal kawk a. ka lawm viau lo.

‘’ Eng damdawi nge ei se min tih a? Iti zialo ka ti’’ 

‘’ Aw hmeichhe thenkhat fa nei peihlo ho hian damdawi an ei thin an tia’’ a rawn tih leh chuan a ban puamah na zetin ka lo sih sak ngar ngar a. A țhen sawk thei.

‘’ Chutiang ti duh tur chuan min ring ve suh. Mahni lo maha pai vat vat chak nakalaiin’’ tih pah hian ka hawi tau deuh hmak bawk a, a rawn nui ve ta huk huk mai. Chutah, a lam hawi tura min kawihher pah hian nui var var chungin,

‘’ Zanin atang chuan a hma aia uar zawka kan beih sauh sauh a ngai dawn a ni’’ a rawn ti ta khanglang a, ka lo chum zui awk. Amah leh bawk chuan,

‘’ Tak taka, naktuk lamah chuan chhun chawlh laiin kan va in entir ve dawn a nia. In entir loh ringawt pawh a tha lo’’ a rawn tih leh erawh chuan a awmah ka bei ta hle hle a, duat tak hian min lo kuah ve bawk.

A tukah chuan a sawi tawh ang ngeiin chhun chawlh hunah doctor chu kan va pan dun ta a. mahse, that lohna kan neih loh thu min hrilh avangin ngaihtha tak chuan kan haw dun ve leh mai.

Mahni hna ve veah kan buai chho a, inchhungah pawhnise, unau pianpui dang nei ta lo chu keimah hi a che thei ber ka ni leh mai a, zep nak emaw, ka chau ve thei phian. Mahse, ka pasal berin min duat a min ngaihsak chhung chuan eng thilah mah hian vuina tur ka hmu lem lova, chau ve thin hle mahila hmangaih taka min kuangkuahtu ka nei tih ka inhre tlat. Nupa inkarah chuan fate hi min suihzwmtu leh nupa nun tinghet a malsawmna thlen tu ni tehmeuh mahse, kan lo nei thei ta lo a nih pawhin ka vui hauh lo. Kan nupa hlim ila, chhungkua dam tlang bawk ila chu chu ka duh ta ber mai.

‘’ Duhtak, zanin chu chaw ei tura nghah ka ngailo ang aw’’ ka message dawn chu en vang vangin ka thaw deuh halh a. ka call nghal bawk. 

‘’ Eng nge awmzia?’’ ka va tih chuan rawn nui deuh hak hak chung hian,

‘' Hei. Ka thawhpuite ho in zanin tlai na na na chu chaw eikhawm an rawt pek a. Lo hnial bik nih kha a nuamlo’’ a rawn tih leh chuan pawi tihna em em ka nei ta chuanglo. 

‘’ Awle, lo haw har lo la’’ tiin kan inthlah ve leh mai a. ka ruak nghal huai nimai hian ka inhria. Ti mah mah pawh min ti dawn se, duhtaka ka neih ka pasal hi chu ka ngai ve thlawt a n tin ni. Tichuan, khua rawn thim zuiin zan a lo thleng a, rinai tak chuan an va rei ta hrep. Zan dar 8 a rik pawhin thawm ala rawn nei miahlo a, mahse, thiante nena inhmukhawm anni si a tiin ka va be buai duh hran lo thung. Dar 10 a ri a, ka nu leh pa te chuan min mutsan tawh. Kei thung chuan amah nghah pah tiin zing chawhmeh tur ka lo siam lawk vel mek a, chutihlai chuan kawngkharpui rawn ri rak rak thawm chu hria in ka tlanphei nghal vat. Rin ang ngei ngeiin ka pasal chu alo ni a, mahse, a hmel kha a rawn dik ta miah lo mai. Rawn kal pei khut khutin ka mitah pawh min en tha ngam hauh lova, kei chuan ka lo thlir deuh tawp. 

‘’ Rameng, zu I rawn rui haw elaw!?’’ chang faka ka han tih chuan min rawn melh ve zohin hnuailam a en leh a, din ngil ve hram hram chu a tum tih ka hrereng. Ka hnaihchilh duh hauh lo bawk. Chutah, inthiamlo tih hriat taka nui vur vur chung hian,

‘’ Rui ve deuh. Ihmaw Bawihte, thian, thiante kha an tilui tlat aa’’ sehchilh nawk nawka a rawn tih chuan a tukkhuma va bensak lawlh mai chu ka duh tawh a, ka insum leh hram. 

‘' Kal rawh. Room-ah chho ang. Mut hmain inbual ngei ngei ang che’’ tih pahin na zet hian a banah ka va phihsak a, room lamah chuan kan inchhawm chho ta hnawk hnawk mai a ni. Room thlen rual rualin khumah a thal thla nghal tawp a, keiin a thawmhnaw leh pheikhawk te ka lo hlihsak laiin ani chu ruih lutuk vanga meng tha peih lo chung hian awmze nei lo zet zetin a lo riat ve nawk nawk thung a, a chawnah te chuan ka bensak leh pawp pawp thin. Ka thin hi a ti rim em a ni. A thuamhnaw engkim ka hlihsak vek hnuah a biangah chuan ka va bensak leh thek thek a,

‘’ Hey, intiharh rawh. Inbualfai hmasa lo chuan mu miah suh ang che. I rimchhe si’’ tiin ani chu a rawn rum chhuak  țiah țiah a, a inbualna tui siamsak turin bathroomah ka luhsan nghal. Mahse, bathroom atanga ka han chhuah leh nak chuan zawng kahthlak ang der hian alo thal fel reng tawh a, ka melh ngawt ngawt ringawt. Tihngaihna em em awm tawh hek lo, zankhua in a lam pawh hawi duh lo chuan ka muhil ve ta țhak a nih kha. 

Ka biang rawn za leh ner ner thin chuan ka mu tui lai chu min tiharh in ka meng chhuak nghal siar siar a, ka han men chian nak chuan ka pasal khan ka biangah alo chul vel tih ka hrethiam chiah. Chubakah, alo inbualfai diam tawh a ni tih hriat tak hian a rim pawh a tui veng veng ta mai. Mahse, zan lama a rawn haw dan avang khan ka lung chu ala awi hleithei chiah chuang lova, rum zeta han melh chho chung hian ka thu chhuak nghal zawk thei. Ani lah chuan nui var var chunga min la en reng chung hian,

‘’ Duhtak, ka tihpalh’’ alo ti nghal sup a. ka dam deuh huai tho na in chuti maia chhuah erawh chu ka tum bau lo. Tum bar bar chunga amah la melh vang vang pah hian,

‘’ Engvangin nge zu te I rawn ruih haw ve reng reng a, nidangah pawh I in ngai chuang emni?’’ ka ti khar khar. 

‘’ Na,, nang chu, min hau tawh lo la. ka inthiamlo ve lutuk tho a nia’’ ner nang nang chunga a rawn tih chuan ka nui chhuak teuh tawh kher. Ka insum hman ta hram a. 

‘’ I rawn ruih haw leh vaih chuan ka hawsan daih tawh ang che, hrereng rawh. Pasal zu in mi ka duh loh avangin nang hi ka thlang che a, ka tifuh viau dawn emaw tih laiin I rawn rui haw ve a, ka lawm miah lo’’  tum bar bar chunga ka han tih leh chuan nui vur vur chung hian min rawn kuah ta hle hle mai a, tal chhuah erawh chu ka tum bik chuang lo. 

‘’ Ka ruih leh vaih chuan emaw, zu far khat pawh ka in leh a nih chuan saruakin khawlaiah ka lam tawh ang aw’’ tih pahin ka khabe-ah a rawn piai ta zeuh a, nuih phuh țhawt chung hian ka lo chum zui nghal awk.

Hemi hnu atang hi chuan rawn ruih chu sawi loh, a rim a ra hriattur a awm tawh lova, rinhlelhawmin a khawsa tawh ngai bawk hek lo. Kan hlim ngai rengin kan la hlim a, hnaah kan buai dun leh em em a, a tawpah phei chuan inchhung che tur nula pawh kan la ve ta hial a nih kha. Kan nu leh pa te hi kum lama upa ve tawh tho an lo ni nen, engkimah khan han rin tawp chi an ni tawh bik lova, chuvang chuan an remtihna thlapin awmpui pawh hi kan la ta nghe nghe. Tunhma zawng ai khan a tu a te pawh kan hahdam deuh a nga, a tha dawn em a ni.

 

Hun thawl neih chang apianga zin dun nuam ti em em mai kha kan ni bawk a, a hnaah pawh chawlh lailawk te rawn la ve in kan zin chhuak leh vang vang zel. Chung hunah chuan hotelah te kan thleng mai a, hmun nuam leh thawveng tak takte tlawhin zan kan riak a, kan pahnih chauha hun han hman dun tluk chu awm theiin ka hre lo a ni. Kan karah min dip daltu fa kan la nei lo bawk a, he kan hun thawl neih chhun hi nupa reka hman dun atan chuan duhthusam diktak a nimai e. Tudang mah hi kan ngai biklo tlat.

‘’ UHlute, URamenga khan zanin tlai chaw ei chhuahna tur a neih thu a rawn sawi a, I u khan a hman hunah min rawn be mai rawh se a ti che’' tiin dawr atanga ka haw cju kan nula Sangkimi khan min lo hrilh nghal a. ka hlauthawng leh ringawt. Ani reng reng pawh chu keimah min rawn biak ve mai tur hi a nia, rilrua phun mawlh mawlh chung chuan inchungah ka chho nghal a, kan pa chu ka be nghal bawk.

‘’ Aw, keimah min rawn biak ve mai tur che a nia’’ pangchang aw taka ka han tih chuan nui hawk hawk chung hian,

‘’ Ka call che a I la thei lo alawm’’ a rawn ti a, mak ka lo ti angreng hle. A miss called pawh ka hmu lo reng reng nia. 

‘’ A nih chuan rawn haw har tawh suh aw. Zanin chu ka chau deuh riau a, ka mu hma duh ang’’ lo ti ve leh zatin, ani pawh chuan thuawih hmel em em hian a rawn haw har loh tur thu chu a sawi leh ta zung zung a, kan inbiakna kan titawp nghal bawk. 

Hemi ni hian hna lama kan buai deuh avangin ka chau angreng phian mai a, ka menrei peih pawh a ring chiah lo. Tichuan, zanriah kil zawhah kan nula chu a țul țul ka han tihpui leh ang lawp lawp a, meng hleithei tawh lo in ka nu te ka mangtha zawh hnu chuan room lam ka pan a, ka chatthla chu a ni der. Mahse, zing dar 2 awm velah zun chhuakin min kaihthawh avangin peihlo zet hian ka inbeng kang ve ta hram a, rroom chu alo la eng pup mai. Hawi kual nghal zung zungin khum chu ka han en a, ka pasal alo awm miah lo! Thinphu dup dup chung hian ka tho chhuak a, ani inthiar turin a tho ve em ni ang tih ngaihtuah paha bathroom ka pan chuan  chutah pawh alo awm chuang lo. Ka hlauthawng zual sawt thei. Chutah, ka  zunchhuak pawh chu theihnghilh hmakin roomah chuan a thawmhnaw a awm leh awm loh ka han en kual leh vut vut a, engmah a awm lo; a phone takngial pawh hmuh tur a awm chuang lo nia. Ani hi a rawn haw tlai deuh a nga sitting-room lamah alo mu ta mai emni ang tiin ka tlan thla nghal rawk rawk a, chutah pawh chuan hmuh tur ala awm chuang lo reng reng. Kan nula hi a mengrei thei deuh atiin a room lamah chuan ka tlan let leh a, ani chuan phak chual chung hian kawngka chu min rawn hawnsak in, mit la nuai chat chat chung hian,

‘’ UHlute, eng thil nge ni ta’’ a rawn tih rual chuan midang hriat ve hlau tak a awrawl zawi si hian,

‘’ Dar engzat thleng nge I men. I URema hi alo la haw miahlo tihna emni?’’ ka han ti chu a rawn meng phar deuh awk thei a. a ngaihna a hriatloh ve hmel hle. 

‘’ Dar 12 velah ka mu phei a, alo la haw siloa tiin kawngka pawh kha nam thlak theihin ka dah ringawt. Tunah pawh alo la haw lo maw?’’ tia min lo zawh let ve takah chuan mangang leh thinrim ru teuh hian ka lo thaw leh hak hak thin a.

‘’ Haw lo’’ tih paha inher vut chung hian room lamah ka tlanchho leh nal nal a. phone chu la in Ramenga chu ka va call nghal bawk. Mahse, vawinga zet ka call hnuah pawh a lak tak mai siloh avang chuan beidawng zet hian ka hawi ka hawi ta mai a. thinrim ngaihna tak pawh min ti hrelo zawk hial a ni. Ka phone hum ruh ngawt ngawt chung chuan thil ni lo lo ka ngaihtuah kual a, ka mittui te chu a rawn tla ringawt.

Muhil tawh lo in khumah chuan ka let tawn sek reng a, ka phone nise ka bih awl hek lo bawk. Mahse, ani chu a reh vung vung a, awm ve lo ang mai a ni. Khua tal chu var vat vat se la, engkim hi hriatfiah tawh ka duh takzet a ni e. Ngaihtuahna kawm chunga zan khaw hun ka hman ral hnu chuan khua pawh chu rawn var ve ta hramin, ka mu hleithei tawh lova, ka tho vat. Chutah, ka phone bawk chu ban leh nghalin Ramenga chu ka va call leh a. A tawpah chuan alo la ve ta hram e. ka thaw sawng sawng thei. 

‘’ Khaw nge I riah’’ chang faka ka han tih chuan muang ban cherh churh zet hian,

‘’ Bawihte ka tihpalh a ni’’ a rawn ti leh ringawt. Kei chuan ka insumtheihna ka hloh fel der tawh a, ka duh aia vin mah chuan,

‘’ Tihpalh tih kha ka duh lo. Khawiah nge I awm khaw nge I riah tih kha sawi mai rawh’’ ka lo ti let ta hrak mai. Reilote a han ngawi det a, chumi hnuah inthlahrun hmel em em hian,

‘’ Hetah ka thianpa Rosanga te inah ka riak a’’ a rawn tih rual rualin keimah bawk chuan,

‘’ Inah hian I rawn haw ve thei mai lo tihna emni? In leh lo riahna tur neilo ini emni? Swi rawh’’ ka thinrim lutuk chu eng ang pawhin insum tum ve mah ila ka tum nasat poh leh a harsa ka ti a, a rim tulh tulh bawk si. Ka tap teuh tawh. 

‘’ Bawihi ka tihpalh. Nizan kha ka lo rui lehpek a’’ 

‘’ I rui tih chu ka hre sa vek. Rui lo la khatin I awm nang. Chu zawng ai chuan engvangin nge min rawn hrilh hre miahloa I riah bo ngawt a, mi nikhualo ini emni? I thiante tal khan an rawn sawi theilo tihna mi’’ ti zui leh buan buan in ani chuan zaidam te hian,

‘’ A pawi khawp mai. Kan lo chatthla palh vek a tin ni’’ a rawn ti leh mai a. ka thaw chhuak hawk. 

‘’ Ih maw, I thiante kha kawm tawh lo la ka duh. I tan hian mi tha an ni lo tlat’’

‘’ Bawihi, ka thawhpuite vek an nia, han inkawm loh ngawt theih pawh a ni lo a ni’’ inthlahrun hmel em em chunga a rawn tih leh chuan keiin vin zet hian,

‘’ I thawhpui an nih chuan thawhpui angin en mai rawh. Ka duh aia nasaa in inkawp leh a nih chuan ka haw ang, ka haw em em ang. Nizana I khawsak dan pawh kha ka nu te ka la hrilh lo, engtia tih nge I tum a’’ lo ti let ve lehin a han ngawi deuh vang vang phawt a, rawn thawk chhuah halh pah hian, 

‘’ Hetah hian tukthuan chu ka ei nghal mai ang. Hna pawh ka kal nghal mai ang chu’’ a rawn ti leh a. ka thinrim chu kalo la inhumruh ngat ngat. Mahse, tih lan vak erawh chu ka tum tawh lo thung. 

Tichuan, tui lemlo zet chungin dawrah pawh ka kal ve leh tho a, a hmingin ka kal ve mai mai chauh hi a ni ber. Ka nau ten engkim an ti vek a, min awl hneh em zawk a, ka hahdam phah hlauh. Haw hun a ranw thlen chuan hmanhmawh angreng tak hian dawr ka chhuahsan a, in lam panin ka kal deuh hlawk hlawk.

In ka thlen lai hian Ramenga chu alo la haw ve lova, nidangah pawh ka thlen khalh ziah hrim hrim na in, hemi ni chu ka fuh lo laklawh tawh a, thinrimna tur ringawt ka zawng ka ti mai. Thut pawh thu khawmuang hman lo in phone ka phawrh leh sawk sawk a, ka call nghal bawk. Alo la rang ngei mai.

‘’ khaw nge ila awm ‘’ chang faka ka han tih chuan ani chuan aw nem leh zaidam tak hian min rawn chhang let a,

‘’ Ka lo haw mek. Ka lo thleng a nimai’’ a sawi zawh rualin phone chu ka off hmak a. ka tawt up up nimai hian ka la inhria. Ka thinrim chak ngawih ngawih reng te chu tih reh dan tha deuh awm se ka duh lutuk.

Tichuan, kan inbiak zawh atanga rei pawh rialloah  chuan ani pawh chu rawn thleng zui ve maiin, ka lo melh tha duh eih lova, kan nula khan alo biak sawm mawlh mawlh lai te pawh chuan ka la ngawi reng. Chutah, min rawn biak hma chu tiin inchungah ka chhohsan nghal a, ka hnungah min rawn zui ve zat. Room ka thlen rual rualin ani chuan inthiamlo tih hriat tak hian,

‘’ Duhtak, nizan thil thleng vang khan ka tihpalh takzet aw. Ka ti nawn leh tawh lovang’’ amah chu ka va melh zawk a, zan lama a khawsak dan vang chu nimaw, a sam te chu a pawr chapin ka hriaa, a hmel pawh chu a dik chuang lo. 

‘’ I tihsual hmasak khan eng thil nge ka sawi. Hetianga khawsak hi I chin phawt chuan ka hawsan tawh ang che ka ti lo emni? Tunah hian ka haw dawn em min hrilh rawh. Eng aiah nge hetianga mi puitling lo zia hi rawn nei ve ngawt nge inih a. Rameng, hetianga khawsak hi I inhmeh ve lo aw. Ngun takin ngaihtuah rawh’’ midang hriat ve hlau tak chung chuan ka han chhang let ta a. melh pawh min lo melh tha ngam hauh lo mai.

‘’ Duhtak’’ a rawn tih leh sup lai chuan a thusawi tur chu ka lo tihtawpsak vat thung a. 

‘’ Thudang ka ngaithla peih tawh lo. Va intifai zawk rawh. Thu kal hnu sawifiah leh tum hi thil awmze neilo mai an ni e. Tun hi a tawpna ni se, I bawhpelh tawh lo hram ka phut bawk ang’’  ti ve lehin, ani pawh chu a ngawi zui mai a, thudang sawi tawh lo in intifai tur chuan bathroom ah min luhsan ta a ni.

Hetianga ka pasalin khawsak a han hrat ve ta mai hi a chhan diktak hriat ka duh. A lakah hian eng thil nge tih dik loh ka neih a, tihsual palh ka neih tak ang. Eng thil chiah nge nupui tha ni tur hian ka han tih ngai ang le. A tan hian ka lo tling zo thlawt lo tihna emni? Ni lo, chutiang ni ila tunah hian a nupui ka ni thei dawn emni? Nupa nun kawng hi thil awl ai leh zawh nuam tak a ni hran lova, inngaihzawn lai anga thil reng reng kan palzam theih ang ngawt kha a lo ni tawh bawk hek lo. Engkim hi nupa inkar a nih tawh chuan a boruak a dang hlak vek a, thutak leh puitling thei ang bera engkim kan  lak a hun tawh hle bawk. A nih chuan kei hian ka tlin ta lo tihna em ni ang? Ka tlin ang. Ka tlin tur a ni. Harsa hle mahse engkim hi ka sual chhuak vek thei ang. Ka pasal mit leh thinlungah hian kei aia hmeichhe tha leh tling tawk hi an awm ngut bik lo ve. 

Thaw chhuak hawkin khum atang chuan ka tho chhuak a, ka pasal rawn inbual zo pawh chu hmel hlim ka lo hmuh ve thei ta hram. Chutianga ka lo nuih leh thei mai chu maktih hmel fe hian min rawn en deuh vang vang phawt a, chutah, lawm tih hriat taka min rawn kuah deuh thlawp chung hian,

‘' Mi felnu, ka hmangaih lutuk che’’ tih pahin a rem lai laiah chuan min chuk pah mawlh mawlh a, ka lo indawh mawl ve tawp.

‘’ Duhtawk the. Inhnuai lamah an buai sia puih an ngai. Nangpawh in ha fel la rawn chhukthla ang che’’ ti let ve in ka chhuksan a, ani chuan min la en zui deuh rneg. Inhnuaia ka chhuksan hnu chuan a phone hmang thawm ka han hre zoh zoh thin a, mahse, tu nge a biak a engt thu nge a sawi tih erawh chu ka han hre pha lo thung. A thiante leh thawhpuite ho be turah ngai maiin thildang chu ka tihsan leh daih a, zanriah kil hunah a rawn chhukthla ve ta chauh a nih kha.

Zan tir lamah chuan tha takin hun kan hmang a, ani pawhin school lama a thawh zawh tak loh hna thenkhat a rawn hawn te chu thawk ve in, keipawh dawr pawisa lo lut vel chhutin ka buai ve angreng hle a, chutia mahni buai buaia kan buai dun mawp mawp lai chuan a phone call rawn vibrate ri chu ka hria in tun ang hunah hian call a dawng khat em a, mak ka lo ti ve deuh chuan ka va melh nghal zawk. Mahse, ani erawh chuan a call dawn chu chhang ta mai lo chuan a melh vung vung a, a hmet tawp leh mai thin. Ka thil tih lai pawh theihnghilh thakin a awm dan chu ka en ta vang vang mai a, min hnungchhawn zawnga thu a nih angin min rawn hmu ve lem lo thung. Chutah, vanneihthlak tak hian inthiar turin bathroom lam a pan ta hlauh a, chutihrual chuan ka keipawh rang lutuk hian khum atang ka zuangthla ve nghal. Dawhkana a dah a phone chu amah ngaichang pah reng chung chuan ka va ban ta zoh mai a, a lock ve ngailo bawk nen awlsam takin ka en sak thei mai. Chutah, message la hawn loh pakhat hi alo awm nghal pang bawk a, a save dan atang chuan an thawhpui tuemaw ber chu niawm tak a ni. Estheri office tiin a insave kuau alawm! 

‘’ Engkim kha I nupui bulah ka sawi vek dawn’’ tih hi alo thawn a nih chu mawle!

Meng phar awk awk chung hian chu message chu ka en ta reng ringawt a, thildang pawh ka ngaihtuah hleithei tawh lo. Chutia a phone bih a ka lo kun ngar ngar lai chuan

‘’ Eng nge ilo tih a’’ zawitea rawn ti ri ka hre thut a, ka hawichhuak nghal zawk. Ka pasal chuan hlauhthawn hmel zeta min lo en reng chung hian kei leh a phone chu a rawn melh tawn deuh zak zak bawk a. ka insiamtha zui vat.

‘’ Hei hi tu nge’’ tih hmak paha a phone ka han lekchhuah tak larh ah chuan rawn kal hnai ve nghalin phone chu a rawn bih ve a, a mitmeng kha chu a danglam ve deuh in ka hria. A khap sak sak reng mai.

‘’ Office a ka thawhpuinu, min rawn fiam ve mai mai a nih kha’’ ti chunga ngaihsam hmel fea thut leh mai a tum lai chuan keiin a darah lo kuaiher deuh sawkin, a phu ve zuk thei.

‘’ Khatin ngaihthat hmel deuh khan awm der vel suh aw. Zep then I nei tih hi ka hre ve vek a nia. Han sawichiang the ani hi I eng nge a nih a’’ ti leh pang pangin ka thinrim lutuk chu ka khur hlak hlak thei tawh a, ani lah chuan min la ngaihsak tha duh miahlo bawk nen ka thin chu rim tawh tak a ni.

‘’ Lalrameng, I ngawi tlat dawn maw. Ka call dawn’’ tih paha a phone ka han khawihsak leh takah chuan phone chu rawn phihthla ve sawkin, vin zet hian,

‘’ Iva ninawm ve mawle! I pasalin eng thilmah a ni lo ka tih chuan ngawi ve ta mai che’’ a rawn ti that mai! Tunah khan eng thilmah ni lo message chu a fiahna zawn tumin call ka tum a, a phallo maw!? He pa hian ka lakah thup tum a nei a, zep then a nei bawk. A tawk ni rawh se.

‘’ um, ka haw ang. I thiltih dan hi hre ve lo turah min ngai suh. Nizanah pawh kha nu nen khan I thiante inah in riak a, ka hre dik tiraw. Ka haw khawp ang’’  ti hmak hmakin ka insiam zui ta mawlh mawlh a, ngawi reng hian min lo en ve reng. Ka mamawh zualpui ka ken kim hnu chuan chhuah mai ka han tum a, min rawn ko let leh.

‘’ Eng thil nge I hriat a’’ tih paha min rawn en reng chuan va melh let ve kar bawkin ka insehruh fan fan mai a, ka puakkeh lo chauh tawh a ni.

‘’ eng thil nge ka hriat a, eng nge ka tih tih chu I hrechiang e. ka haw dawn a nih hi’’  tih leh nghat pahin ka inher deuh sawk a, inhnuai lamah ka chhukthla nghal. Vanneihthlak takin inhnuaiah hian tumah hmuh tur an lo awm tawh lo hlauh a, ka chhuak tlang nghal vang vang bawk. Min dan tumna a nei lova, min ko let lo bawk a, chhuahsan hi a phu a ni, ti sauh sauh chung chuan scooty ka la chhuak a, khawlai dung te chu reh tawh angreng viau mahse hlauh reng reng hrelo in ka hmazawnah ka tlan mawp mawp reng tho. In ka thleng a, a chhung ka luh rual rualin call ka dawng nghal. Ramenga alo ni chiah bawk. Chhang duh lo chuan ka off sak zel a, vawi nga tehmeuh min rawn call hnu pawh a ka lak duh tak miau siloh ah chuan a beidawng ve ta nge, a reh ve ta mai bawk. Chutia thil awmzia pawh sawi hmasa lova ka han haw ve ringawt mai chu ka nu leh pa te hrilh pawh la tihai angreng hle mai a, min zawt chhen mahse intihthawven ka duh rih thu chauh sawiin ka room ka pan san a, ka mu zui hmak.

A tukah pawh Ramenga chuan khawvar rual rualin min rawn call harh lehpek a, ka la chhang peih chuang lo. A peih chen chen chu min han call se la, a peih chhung chu ka reject ngat ngat peih tih rilru pu in ka chhang duh lo zel a. a tawpah phei chuan ka switch off ta hial a nih kha. 

Phur lo zetin dawrah ka kal leh a, ka tunlai dinhmun fuh lo leh khirh thei lutuk hi ka nau chhawr te pawhin an hrethiam ve deuh a ni chek ang, ka biak hmasak loh chuan min be buai ngam lova, an  ți duk thei. An khawngaihthlak zawk.

Nileng thakin phone ka off tawh a, tlai haw hunah phone chu on leh chauhin Ramenga message pawh alo tlar thla dul hman. Ngaihdam in dilna a tam ber a, hmaichhana engkim sawifiah a duh thu a tam bawk. Ka chhang let peih ta chuang lo thung. Mahse, inchhung ka han luh chuan rinloh lutukin Ramenga hmel chu ka va hmu ta phut mai a, ka ding zui chawt thei. Ka nu nen chuan lo thu dun in khunkhan zet hian thu engemaw an lo sawi dun sar sar tih chu ka hriaa, ka nu pawh chu ka ngei hman lek lek. Tullo lutuk mai. Ka hmel an rawn hmuh rualin ka nu chuan an bula thu phei ve tur chuan min han ti nghal vat bawk a, hreh zet leh muangchang hian ka va thu ve ta ngawt a nih chu. Keini pahnih min entawn zak zak chung hian ka nu chuan,

‘’ Mami pawh nizanah sawi lawk miah lo in I rawn haw ve ringawt a, engmah min hrilh tha duh bawk silo. Hei Rama hi rawn kal hlauh lo phei se chuan a chhan diktak pawh kan hre ve dawn lo tihna a nia. A thuhrimin hetianga nupa intihthiam loh hi a tha lova, nangpawh haw phei ang che. Inthen te, tul hlei lova mahni in lama haw zuk zuk te hi chin tam loh tur. Puitling taka thil ngaihtuah hmasak phawt hi a tha ngai a nia. Hrereng rawh u’’ a rawn tih chuan ka lo inhumruh ve ngawt ngawt a. Ramenga erawh chuan dik tih hmel zet hian a lu alo bu vei nghut nghut thung.

‘’ Hrilh loh che u ka tum em em pawh a ni lo. A mood-ah khan ka cheng lo lutuk zawk a’’ ti ve niah niahin ka nu chu ka va melh deuh zawk a, fiah zet hian min lo la en reng.

‘’ Tikhan tha takin haw phei ula, tul tawp a nih loh chuan helam chu min rawn ngaihtuah hauh suh ang che u. Rama nu leh pa te pawh an hmai zahawm lutuk e’’ ti leh zung zungin, kei chu muangchang hian ka tho chhuak a, sawi tur chu ka ngah. Mahse, tun hi sawi hun diktak a ni em tih ka hriatchian loh miau avangin ka ngawi a nga, ka haw phawt dawn a ni. Kawngtluan in kan inbe miah lo ti ila, min rawn be thin mahse ka ngawi reng. A thusawi te pawh chu hrelo ang hmakin ka awm vel mai mai bawk.

In kan thlen hnuah pawh ani chu ka la biak chak miau loh avangin ka ngawi deuh reng a, midang min biakna erawh tha tak takin ka chhang zel thung. Mahse, ka pasal Lalramenga kha a ni miau a, lungawi lo hmel min hmuh ve duh chuang hauh lo. A thiamloh zawk a ni tih a hrechiang a, a dawhthei bawk.

‘’ I nu hnenah khan engkim ka lo hrilhfiah vek tawh a. kan buaina chungchang vel kha’’ tiin zan mutnaah chuan min rawn kuah deuh hlu hlu a, ka chesawn eih lo. Amah bawk chuan zawi angreng tak hian,

‘’ Bawihi, thil zawng zawngah khan thiamna pakgatmah ka nei lo mahse, ka insawifiahna min ngaihthlaksak erawh hi chu ka phu ve asin’’ tih pahin ka biang te chu a rawn chul leh thin a, ka la chesawn duh chuang eih lo. A thiamloh leh tih dikloh thilah kei hian a thusawi leh insawifiah tumna chu ka ngaihthla ang maw. Dawt phuahchawp bak va ni suh. Chutia ka ngawih tak tlat si ah chuan tihngaihna hrelo zeta a thaw ri leh halh thin chu hrereng in ka muthilhsan ta daih a. zing ka han harh leh chuan min la kuah bet chial chung hian alo muhil ve tih ka hre chiah. Ner sak chungin min kuahna kut chu ka dah sawn sak a, ka phone lo ri ve chhen nen ka ning angreng kher. Mahse, min lo call tu chu tudang mah nilo in ka nu alo ni daih a. ka la rang phian.

‘’ E, Bawihi, in tho ve tawh maw. Nizan lam te in mu tha em?’’ rawn ti hmasa te te in kei chuan kan mut that thu chu ka lo sawi ve leh mai a. chutah, amah bawk chuan a hma aia urhsun leh uluk zawk hian,

‘’ A, nimin lama ka sawi tawh ang deuh khan I pasal kha ngaihsak la, tul hleilo a nupa inthen leh inhauh tih vel te kha chin tam loh a tha. I pasal chauh ngaihtuah loin a chhungte kha I rilruah dah lian hle bawk ang che. Nimin khan in buaina chungchang niawm taktak kha a rawn sawi nual mai a. Nia, Ramenga hi chu pa hmeltha leh sar vuah chu ni hran lo mahse, a felna hrim hrim pawh hian hmeichhe rilru hi a la ve thei dawn lutuk a, a thawhpuite zingah pawh mi pasal a ni tih hrerenga lo beisei leh duhtu an awm a nih hmel e. amah pawhin tihsual chu a nei ve tho tih pawh a pawm vek a, chaw eikhawm apianga a rui ve thin kha a dik biklo tih a inpawm vek a nia. Chu chu remchangah hmangin kha a thawhpuinu khan chet khawloh pui alo tum ve niawm tak a nia. Mahse, ka kut hmawr pawhin ka khawih lo a tih kha aw. Khami zana a riahna in neitu a thianpa te khan chu nu chu an va thlah hawsak ta ngawt bawk a, mahse, phone atang erawh chuan amah mutpui anga sawiin dawt thu hmanga a rawn vau thin thu a sawi bawk. Nangpawhin I hmu a I hriat ve tawh kha. Bawihi, hre tura ka duh che chu, tunlai hmeichhe tamtak te hian zah nachang an hre tawh mang lova, an nasa lutuk tawh. Chuvang chuan I pasal pawh hi I hmangaih a damchhung kawppui atan tak tak I nei tawh a nih chuan fimkhur la, enkawl tha ang che.tunah chuan thudik engkim I hre tawh bawk a, I tihtur chu I pasal tana nupui tha tak nih leh, thinrima tihtauh khum bur bur loh te kha I zir thar an ngai a nih chu aw. Ilo hrereng dawn a nia’’ ti dap dapin, ka nu thusawi chu ka han ngaihutuah chiang a, ka dam thlap mai. Nu te nge nge hi chuan kan nat hlau in fate hi min lo va ngaihtuah tak em aw. Tin, a rawn sawi ang deuh tak tak kha ka pasal chunga thil thleng diktak pawh chu a nih ka ring thlap bawk a. ka biak that peih miau loh avang khan thudik hre tlak ni mawlh heklo. Ka nu in a rawn sawi hlauh chu ka tan hian vanneihna a ni ringawt. Ka thawveng deuh huai thei. Tichuan, ka pasal mu tui lai chu va melhin, keima hriat tham leka zawi si hian,

‘’ Min ngaidam rawh’’ ka ti sup a, inhnuaiah ka chhuksan nghal daih. 

Hemi hnu atang hi chuan kan nupa inkar pawh a tha chho ve bek bek zel a, ani pawhin chaw eikhawm leh huau huau tih velah khan min kalsan duh tawh ngai lo. A hna rawn ban apiangin thil engemaw tal min hawnsak thei reng a, a rei hnuah chuan keipawhin ka ching chho ve ta viau. Chutianga thilpek han inpek vel chu a nuamin alo hlimawm phian mai a, nun hi a tihlim ve veng veng thei.

Tlai khat pawh a tih dan ngaiin thil chu min rawn leisak leh a, zan lama hman chi hmai hnawih tur tha deuh hi a ni nghe nghe. Mahse, a thil min hawnsak min pek lai chu kan nula Sangkimi khan rawn hmu fuhin, a awh ve hmel ta em em mai a. kan pa nen chuan nuamlo ti ru deuh hian kan in en leh ringawt thin. Chutah, kan pa zawk chuan a thilpek chu ka kut ata rawn lak sawn nawlh pah hian,

‘’ Kimi, hetiang hi I duh ve tihna emni?’ a tih hnu reivakloah Kimi lah chuan nui sang chung hian,

‘’ Aw, khatiang ang hmai hnawih tha chi kha ka la hmang ngailo hrim hrim, cheng zahnih khat man hi ka hman ngam tawk chu an nimai’’  rawn ti ve in, kan pa lah chuan inti thilphal zet hian a kutah ava hmehbel deuh nawk nawk ta mai a! 

‘’ Kha nei rawh! I UHlutei ta tur chu kan lei leh mai dawn alawm. Nei rawh nei rawh’’ ti chungin a nui vur vur a, ka lo melhrum nghek thung. Mahse, Sangkimi khan nuamlo a ti ang tih hlau in ka hmel lan dan engkim chu ka thup leh ta hram zawk a, ka ngaih dan erawh a ni viau lo. Mipa ho pawh hi ah

‘’ Kimi kha ti nge I pek daih a. A manto tehreng nen’’ ka tih bai bai lai chuan nui var var chung hian min rawn kuah a,

‘' Hmai hnawih manto kha a hmang ve chak sia, nula te an ni ve tawh a’’ 

‘’ Chupawhnise, hlawh neilo pawh a ni bik lova, a lei ve thei reng alawm’’ lo ti leh hramin ani chuan thutak zawk hian,

‘’ Aw,, I ngai thutak thei sia aw. Chubakah, kimi te hi chhungkaw awmthei tak an ni lem lova, henga kan hlawh pekte hi chu ama tan pawh a hmang ngam hleinem. Naktukah khatiang chiah kha ka rawn hawnsak leh ang che aw’’ a rawn tih tak siah chuan lawm viau lo mah ila lungawi awm taka khawsak chu ka tum leh ta zawk a. mahni nula awmpuite em han thik chu dik theiin ka hre lo. 

‘’ Bawiha, helaia ka țhi dah kha ilo hmu mial em?’’ ka thawmhnaw hak tur zawnga drawer ka han pawh hawn chuan kan pa thi min pek manto tak mai kha a awm lo tih ka hre chiah.chutah, maktih hmel zeta rawn hawi phawk hrâ chung hian,

‘’ Eng țhi maw? Ka va hmulo ve’’ a rawn tih chuan ka rilru a hah lehnghal vek tawh. Hetah hian ka dah tih kha ka hrechiang hle si a, khawiah tak awm ang maw. Hemi tlaiah hian kan thianten kan nupa chu zanriah kilpuiah min rawn sawm ve in, kha țhi pawh kha awrh chhuah ve ngei ka tum bawk. Mahse, engtin nge ka tih tak ang. Tlereuh tih vel hi ka lawm ve hranpa vak lova kha lo kha chu han awrh chhuah tur dang pawh ka nei miah lo lehnghal. 

‘’ I hman ve dawn tawh em’’ tia kan pa in min rawn koh tak sekah chuan rilru khingbai zetin ka chhuak ve mai bawk a. ka phur tawh lo zo vek mai. A man a to sia ka ui em a ni.

Mahse, thiante te hmel han hmuh a, eitur tuihnai tak tak min chhawpsak han ei takah chuan tlemin ka dai leh ta deuh chauh a. ka rilruah chuan ka pasal leh thiante ho tih loh țhi chungchang vel kha chu a awm leh tawh hauh lo. 

Haw alo hun a, thiante nen chuan inthlah liam leh te te in, kan in kan thlen hnua inchhung kan luh rual rual chuan kan pa chuan min rawn nghawk ta zoh zoh mai a. chutah, kan piah lawka lo ding zai hlarh hlarh kimi lam chu kawk leh zeuhin,

‘’ Bawihi, țhi saw. I sawi kha a ni lo emni?’’ zawite hian a rawn ti deuh sur sur ta mai a. ka enchiang ve nghal vat. Alo ni ngei bawk e. Thinphu dut dut chung hian Sangkimi dinna lamah chuan ka tleh phei ve nghal zat a. kan pa pawh chuan min lo zui ve nghal.

‘’ E, UHlute, in va ei puar bawk maw’’ nui sang chunga a rawn tih chuan keiin ka chhang let lova, kan pa zawk khan zawi angreng tak hian kan puar thu chu a lo hrilh ve thung. Amah chu dinchilh sauh sauhin a nghawnga a awrh mek ka  țhi ngei mai chu ka han melh vang vang phawt a. maktih hmel deuh hian keini nupa awm dan chu a rawn entawn ta zak zak mai. Chutah, zawimuanga a thi chu kawhsak zeuh pahin,

‘’ Hei hi drawera ka dah ka țhi kha a ni tiraw?’’ ka han tih sup chuan chiang zet hian min rawn en nghal a. reilote a ngawih leh det hnuin harhchhuak thut niawm tak hian a thil awrh lai chu a khawih leh ta sawk sawk a.

‘’ E! Ni tak! Ih, thlalakpui nan ka lo hmang a, tihpalh lutuk Uhlute’’ inthiamloh hmel zeta min rawn melh ralh chung chuan a phelh nghal mawlh mawlh a, min pe zui ta mai bawk. Kei chuan thu tam sawi ka tum lo. Intih nalh nana ka thi alo hmang ve duh hi chu ka lawm lo pawh a ni chiah lo, ka hriatpuina telloa a lo la ve ngawt zawk hian a ni min tilawm lo em em chu. Tichuan, amah kal pelh thuak pahin,

‘’ Tun atang chuan min dil hmasa zel tawh dawn a nia’’ ti nghutin roomah ka chhohsan a, a inthiamloh hmel lutuk kha ka khawngaih leh angreng zawk. Mahse, tih lan kher erawh ka tum chuang lo thung.

‘’ Tun atang chuan I thil hlu te reng reng hi midang hmuh ve theih turah dah tawh suh aw. Kimi hian kutkem a nei tihna nilo in, buai zual zel a hlauhawm’’ kan pa in a rawn tih chuan ka lo bu deuh nghut nghut a. mihring kan inang thei bawk silo nen, awmpuite ban phakah ka thil hlu engmah hi ka dah lang tawh lovang.

Khatiang thil a thlen hnu atang kha chuan Kimi chu ka chik zual phah bawk a, ka lakah a inthlahrungin a hrang ta deuh tlat ni te hian ka hre leh thin. Ka be hmasa a nih loh phei chuan min biak te hi a tum ta mang lova, midang bulah erawh a nui har har reng thei thung. A khawsak dan chu maksak ka ti a, ama tihsual ni zawkah kei min han haw daih mai pawh chu hrilhfiah ngaihna tak ka hre lo. A mak ka ti. Midang laka tlaktlum a tum rualin kei erawh chu min hlat tial tial thung. Engemaw chang phei chuan ti tura ka hrilh thil tamtak hi tlaiah han haw ila, tih loh bawk hian alo awm chang a awm fo ta mai a, a chhan ka zawh lahin, a theihnghilh thu a sawi loh leh, a nawmsam loh thu te a sawi leh daih a. Nileng lenga phone khawih peih tho si, mak hi chu ka ti ve thin a ni. A khawsak dan chu kan pa bulah han thlen ve mah ila, ani lah hian a țan em em vang pawh ni lo, buaina a duh loh vang zawk hian a thlavang chu a hauhsak hram zel a, nupa pawh kan thu a inhmu lo leh zoh thin chu a nimai a, hetiang a nih takah chuan tiin ka dawh hram hram a, midang ka hmaizah zawk em avang hian a tlawm hmasaah ka țang a, ka ngawi tawp mai a ni.

‘’ Thiani, in nula saw in bula a khawsakna a rei tawh em?’’  ka dawra rawn leng lut ka thiannu Becki’n a rawn tih chuan tlemin min tiphu ve zawk a. Amah melh reng chung chuan ka bu zui ve ta ringawt.

‘’ A,, ka han zawh hlawl chhan che pawh engdang ni loin, nimin khan nangmah rawn hmu tur che hian ka lo kal a, mahse, in in lamah ilo leng daih sia, inah khan in nula leh inpa chiah hi an lo awm a, eng lo, ka sawi thiam dan chuan inpa a en vel dan leh biak dan hrim hrim kha, amah relchhiat tumna ni lo se maw, a pasal ang maiin alawm a cheibawl le! I chik ve ngai miahlo emni?’’ midang hriat ve hlau tak chuan a rawn ti ta sar sar mai. Ka melh ngai melh hian ka hawi deuh vang vang phawt a, hetiang kher kher hi chu ka lo la ngaihtuah ngai miah lo tih ka inhrechhuak. Ka pasal zawk pawhnise, rinhlehlh theih tura a khawsak awm hi ka hre lova, nula dang lakah pawh buaina kan nei tawh ngailo. Mahse, ni e, tunhnai hian ka lo sawi tawh ang khan Kimi khawsak dan hi chu a danglam ve deuh alawm. Tun atang chuan tlem tlema chik dun deuh hi an ngai dawn a ni. Ka thiannu hnenah erawh chuan eng thumah ka sawi duh lo thung a, mahni in ka inpetruh fan fan reng mai. 

Inah haw in engmah danglam ka hmu hran lo. Kan pa hna bang pawh chu tha takin ka lo dawngsawng ve leh maia,Kimi erawh chu ka awm vang nge ka hre lo, ala ngawi deuh reng mai. Ka pasalin a mitmei a hmuh lai ka man fuh hran lova, a bulhnaiah a khawsa ngai bawk hek lo. Ka pasal lak atang chuan rinhlelh tur pakhatmah ka hre lo twp. Um, engpawhnise, tha te te a awm hi zir phawt ila, ka thiani pawh khan alo ngai thutak mah mah pawh a ni ve thei tho. A pawimawh berah chuan hlim hi dah hmasakah nei ila, buai reng a tha lo ve.

‘’ Bawihi, zanin chu ka lo haw tlai leh deuh dawn a, ka thianpa fapa neihchhun piancham a nia hei, min ngai pawimawh ve bawk nen, I mut a chhuah chuan lo mu daih mai rawh aw’’  rawn ti lehin, engmah ngaihthat lohna ka nei tawh lo. Khatia kan buai hrep hnu khan ka pasal hian ka duh loh zia hria in zu far khat pawh a in tawh ngai lova, chaw eikhawmna velah pawh kal leh eng ang mahse harhfimin a awm tluan ve tawh thin. Tunah hi chuan ka ring tawk thlap tawh ka ti thei ang. Tichuan, a sawi ang tak takin hun chu ava hmang rei ta phian a, call pawh call buai duh lo in zan dar 9 bawr velah ka mutsan ve mai bawk. Mahse, zing lam dar 3 vela ka han harh leh chuan alo mu ve ta reng reng si lova, makti zet hian thawhphah pawh awm lo in ka thu chhuak nghal zawk. A hma ang tho khan room te chu ka en kual nghal a, a thawmhnaw leh a phone vel te chu a awm vek tho si. A nih chuan khawiah nge a kal tak ang. Bathroom ka en a a awm chuang lo. Ka tihngaihna hrelo chu amah enfiah turin inhnuaiah ka chhuk ta ringawt a, alo thim thap mai. Ani zan muhil theilo hi khawlai velah alo tei harh ta mai mai emni ang tiin kawngkapui lam chu ka pan a, mahse, kawngka pawh chu chhung lamah alo inkalh tha thlap bawk sia, makti fe hian ka ding deuh chawt ringawt. Tihngaihna hrelo zeta inchung lam pan ka tum leh mek lai chuan step bul chiaha Kimi room chhung atang khan thawm ka hre ta mai! Ka hawi phei deuh zawk a, ka thinlungaj hian thil tha lo hlir chu rawn lut nghalin, ka zam chhe ta lek lek mai a nih chu. Khur ru dar dar cbung hian Kimi room lam pan chuan ka pen phei hret hret a, a room kawngka chu alo inkalh loh avangin muangchangin ka hawng nghal bawk. Um,,saruak deuhthaw in ka pasal chu Kimi khum bulah alo ding mek a, hmuh hmaih theih loh tur khawpa chiang hian Kimi chuan a thawmhnaw kha alo phelhsak tih pawh ka hmu! Taksa khur der der chunga anmahni va melh ngawt ngawt chung hian,

‘’ Rameng’’ ti thawp satin, awrawl ring pawh ka chhuah hleithei lo. Ka na a, ka zawi vek bawk a ni. Chutia a hming ngeia ka han koh takah chuan ka awm ve tih hria in an rawn hwi rual nghal thawt a. ka hmel an rawn hmuh ruala an makti leh țhawng lutuk hmel mawlh mai kha sawifiam thiam theih chi pawh a ni lo.

‘’ Khawi maw’’ tih leh, Kimi chu a khum chunga nam thluk a rual a, ka lam panin a rawn tlan nghal bawk. Hetihlai hian keipawh ka dinna ngaiah khan lo la ding ve reng in, kawngka biang vuan chung chuan engkim kehchhe vekin ka lo awm a ni.

‘’ Bawihi, inssawifiahna hun min pe rawh. I hmuh ang kha thil thlen dan diktak a ni lo a nia’’ a sawi zawh rual rualin a hmaiah chuan ka lo beng nghal pawp a, ka tap chhuak ve thei chiah bawk. 

‘’ Mi tenawm. Mi tenawm I nih hi. Thih ka duh. Tunah hian thih nghal ka duh. Ka keh chhe vek. Ka rin ve na che zawng zwng kha reilote chhungin iti kehchhe vek tawh. Nang ring nawn leh tur che khan ka bei a, a hlawhtlinna ka hmuh hnu reiloteah a hma aia nasa zawkin tihian min tina leh a, mihring pawh I  ni lo, ramsa inih hi’’ tih piap piap pahin ka beng a, ka chum bawk a. ka au ring vei bawk nen, ka nu leh pa te muhil pawh chu rawn harh in, kan awmnaah chuan an rawn thleng thla ve tawh a. kan lo khawsak dan vang chuan an hamhaih hmel dun khawp mai.

Ka nu zawk chuan min rawn kuah bet nawk nawk chung hian,

‘’ Hlute, eng nge thil awmzia. Eng thil nge thleng a’’ ti hlawk hlawkin, a hlauhthawn hmel em em a. kei chu ka lo la tap hlarh hlarh reng thung.

‘’ ka chhuak dawn. Ka tlin tawh thlawt lo a ni. He mihring hi reilote chhung chauh pawh ka nei peih tawh lo’’ ti leh hlawk hlawkin kal mai ka han tum a, ka pa zawk chuan min lo dangbet ve vat. Chu em chu tawn tlang lui ngam biklo in ka han ding khawmuang leh rih a, ka kun daih bawk.

‘’ Eng thil chiah maw thleng chu han sawi the. Hetia a chhan ber pawh sawifiah hleithei loa buai nuai hi ka duh ve lo reng reng. A chhan chu sawi rawh u’’ vin deuh hleka a rawn tih leh chuan muangchangin mittui nen Kimi leh kan pa hmel chu ka va en ta phawt a, 

‘’ An ni pahnih kha zawtfiah tawh mai rawh u. mi tenawm pahnih an nih kha’’ ti leh hluk hlukin ka kalsawn a, ka pa in Ramenga hmai a ben rik thuai thawm pawh chu ka hre hman. Mahse, hawi kir duh tawhlo in roomah ka lut vat a, chu in chu ka chhuahsan zui ta a ni.

Ka khawvel hian awmzia a nei lo bik ngawih ngawih ni te hian ka hre thin. Hlim takin pasal ka nei a, atan chuan lal fanu ang mai kha ka ni thin. Mahse, lal chhungkuate pawh hian buaina an lo pumpelh bik hauh lo. Hringnun hi ka hrefiah tulh tulh a, hlimna tur ka hmu tlem tual tual a, nuihna tur thil te pawh a zawna zawn chawp a lo ngai ta. Hmeichhe tan ngat phei chuan kan pasalte hi kan khawvel pakhat an ni ve a, pasal nei fuh deuh an hlim a, an thlamuang bawk a, nei fuh lo erawh chu tihian mittui nen khawvel hmachhawn turin kan nung ve hram hram chu a nih hi.

Ka chhuahsan atang  khan nun hlim lai reng reng ka la nei lova, min rawn biak pawh a tumna engkim ka hnawl fai vek bawk a, thla khat chuang lai liam tawh hnuah pawh min rawn biak a tumna chu ala thulh ngai hlek lo. Call ka off hmak hmak a, message zozaite pawh kha ka chhiar seng ta awm lo ve. Inah chuan min rawn kalchilh ngam dawn lo tih ka hriaa, a chhan pawh, ka chhungte chu an thinrim ve rih em vang  ni ber. Sum chhuah leh bungraw laka inthen hlen tumna ang chi kha boruak engmah la awm lo mahse, keimah ber hi ka chhungte pawhin min ngaichang deuh reng a, mahse, eng thilmah ka la ngaihtuah fel thei lo tlat. Ka â vek a ni. Room chhungah ka tawm tlawk tlawk a, tumah ka be peihlo bawk a, min kawm hlim tuma ka thiante rawn leng takngial pawh ka lo chhawn tha peih meuh lo. Chaw ka ei mumal thei lova, zan ka mu tlem in a tawpah phei chuan ka taksa chakna te khan tlin bik hek lo, ka damlo ta nge nge a nih kha. In entir tur takngial pawha ka chhuah peih miau loh avangin ka chhungte chuan in lamah doctor min kohsak tawp a, chutah chuan min țhawng dawt thei thu dangla chu min hrilh hre ta a ni! Nau ka pai! 

Chu thu chuan tlemin min ti awm nuam ve leh deuh a, mahse, engtin nge ni ta ang. Ka naupai na pa chu sawi ngai lovin ka pasal ngei a ni tih a chiang mai a, marawh chu, ani kha then hlen tuma rilru leh ngaihtuahna ka lo neih ve lai tak a ni lehzel bawk si. Nu leh pa te ber kan dam tha a nih si chuan fate tih fahrah hi ka thil duh lo ber a ni thung a, keini nupa ngat phei chu hun rei tak hnua naupai ve thei chiah kan la ni zui bawk nen. A lawmawm dan hi a dang ta raih mai a ni.

‘’ Hetiang in nih tak si ah chuan Mami, nangpawh in lamlet la, I pasal bulah chuan haw leh ta mai che. Naute tan pawh chu tluka tha chu a awm dawn chuang lo reng reng’’ ka nu in dam dapa a rawn tih chuan ka lo ner deuh nawng nawng phawt. Ka lu chu thing zui leh nak nakin kei chuan,

‘’ Nu, ka la duh rih lo. Eng ang pawhin a fa hi chu pai mah ila tunah chuan ka haw duh lo. En thlak phawt a ngai ka ti. Vawitam hmeichhe dang vangin kan lo buai tawh a, ka ngaidam zel a, tun țum hi chu a em em tawh mah mah, mit ngeia ka hmuh a ni lehnghal. Ka la dam famkim thei reng reng hleinem’’ lo ti let ve duh in, ka nu chu a han thaw deuh hak phawt a, chutah,

‘’ Mami, a hma pawhin ka hrilh tawh che kha. I pasal hi pa tha leh fel em em a ni a, tunlaiah a ni ang mipa hi an tam tawh lo tih hmeichhe dang pawhin an hre ve reng a, bum thluk an tum a nimai. Ihmaw, Rama hian nang lo hi chu ala hmangaih theih ka ring chhin ngailo. Mipa a nia, hmeichhe zar buai tu a hmuh zawh miau kha chuan tluk palh chang a lo nei ve mahna. Ngaidam tu kan nih theih hi a hlu ber ania Mambawih. Tun rum rumah ila haw duh lo a nih pawhin I naupai thu tal hi chu kan hrilh ve vat tur a ni ang. A fa a ni bawk a, ani tluka hriat hmasak phu hi an awm chuang hleinem’'  a rawn tih leh chuan ka lo thaw deuh hak hak thei a, tawngka pawha chhang peih tawh lo in ka buk khum leh nghat a, ka kalsawn ta daih. Nia, eng ang pawhin duh lo sawmrarih mah ila ka pum chhunga naute hi ka pasal Ramenga fa kha a ni tlat. Chuvang chuan hriat ve a phu a, a lawm em em bawk ang tih ka chiang. 

A intiam ang ngeiin ka nu chuan Ramenga chu alo va be ta ngei a nih ka ring.call ka dawng leh ta ngat ngat mai a, ka chhang let peih lo thung. Mahse,  a message rawn thawn pakhat erawh chuan ka mit a la ve ta hlek.

‘’ I duh emaw duh lo emaw, ka rawn kal dawn. In nufa tana tha tur eitur ka rawn keng bawk ang’' tih hi lo niin, ka chhiar nawn deuh tluk tluk a. mahse, ka reply duh leh ta chuang lo. Rawn kalin rawn kallo se, ka hmel erawh rawn hmuh luih țalh tum lo se a nimai tih chu changchawiin ka inpetruh ta fan fan a, kan hun kal tawh te kha ngaihtuah tha lehin, ka thin a rim thar leh ta ngawt mai.

A sawi tawh ang ngeiin zan a rawn thlen chuan a lo kal ta ngei bawk. Ka nu leh pa te hian huatna em em an nei tawh lo bawk a, an lo be tha phian. Kei chu ka thinrim ru teuh mai. Chu chu engpawhni ta se, a hmel mawlh mai kha. Kan inhmuh loh chhung thla 2-3 leka alo tlak chak dan em em kha aw ka ti. A pawr fap mai a, a cher ve hlek bawk tih chu ka hria. Chutah, nui var var chunga min rawn en chung hian,

‘’ Bike nen ka lo kal pek a, hei, ka thil rawn kensak che pawh ruahin a nan hun vek mai. Mahse,  chhe thei thil chu a awm chuanglo’’ tih pahin a sarang khai lai chu min rawn pek mai a han tum a, kei erawh chuan hrelo ang hmakin ka lo hawisan daih. Ka nu tihngaihna hrelo lutuk khan min rawn melh nghek pahin inthiamlo deuh hian a thil rawn ken chu ava laksak ta zawk a, kei erawh chu thutkhawmna lamah ka phei nghal daih.

A rawn len chhung zawng khan vawikhat pawh ka be duh lova, mitmei takngial pawh ka hmuh hek lo. Ka nu leh pa te bulah naupang fel em em niawm tak hian ka thu ngawi ve kar reng a. sawitur chu ngah eng ang mah ila ka be chak thlawt lo a ni e. Darkar khat vel a thut hnu chuan ka ning ta deuh hlek nen ka tho chhuak hluai a,

‘’ Ka han mu hahdam mai mai the ang. Nangpawh lengrei suh khua a chhiat hi’’ ti ringawtin roomah ka luhsan daih a. mangtha tangkial pawh ka ti ta lo a nih kha. 

Engtik hunah nge a haw ka hre lova, inhnuai lamah khan ka chungchang hi an sawi em ka hre zui hek lo. Ka hriat leh zawng chu a thi tih thu hi a nimai!! Aw, a thih thu khan min rawn deng deuh thut a, ka zan mu lai chu min rawn kaitho nawk nawkin damdawiinah min tlanchhoh pui nghala, a ruang an lo postmortem zawh hnu, engmah a hre tawh lo tih hriat taka a mu ngawi reng mai hmel bak kha chan tur pawh ka han nei ta lo. Ka zawi vek a, ka na em em a, ka tlawm a ni. Ka chhe nawn mawlh mawlh a nih ber hi.

Kan in atanga a haw kawngah khan khua alo chhe ve tak bawk nen, chhum a zing chuai bawk si a, kawngkawiah hian motor pakhat nen an lo intawk palh a niawm a, ani chu kawng thlang kham sang lamah khan a thlawk thla ta mai a niawm asin. A thih dan ngaihthlak pawh chu ka duh lova, ka beng hupin ka tap ngar ngar ringawt mai a ni. He mihring hi ka pasal a nihna kha ala bo miah lova, kan awm hrana kan intihthiam loh lai nimahse, ka nat dan erawh ala pangngai reng tho. Min vilh ngut ngut mai a, ka khawvel hi a tawp ta mai dawn emaw tihtur khawpin a chavai zo vek. A hrilhhaithlak em a tin ni. A chunga ka lo khawsak tawh dan vang khan ka inchhir tawp thei lova, ka ngaihtuah chhuah chang apiang hian ka la na ngut ngut reng thin. Aw,, kha zana a hmel rawn pawr fap leh taksa cher em em tak te kha aw. Min mamawh ngawih ngawih tu kha engtin nge awlsam taka ka lo kal tir theih mai zawk chu le. Mangtha muttui tih thu tal kha lo hrilh ve ila aw. Hetiang em em hi chuan inchhirin ka tap reng bik lo tur asin. Upaten, ‘ Nupa țâng then chu dar lehlam sahthlak ang a ni’ an lo tih thin kha tunah chuan a takin ka tawng ve ta reng mai chu a ni sia, a nat dan hi a rilin, kawchhungah min vit ngar ngar reng bawk a, chutihlaiin, pawnlam lang thei chinah min la sawisa zui bawk si. A nat dan hi a na lutuk em a, sawifiah ngaihna tak apwh ka hre lo zawk.

Ka pasal boral hnu hian nau ka neih hma chu tiin Ramenga te inah ka khawsa leh phawt a, a sulhnu hlir kha hmuh tur a awm bawk si nen, nitin mai hian tah loh lai ka la nei lo ti ila, ka sawi uar awm lo ve. Mi nupa kawpchawi hlim taka an leng leh an inbe lai te ka hmuh fuh chang phei hi chuan ngawi rengin ka lo thlir leh ngawt ngawt a, ka lo inhumruh leh teuh thin. Ka duh dan ni lo mahse, ka chan tur renga ruat a ni a, ka tawrhthiam a ngai a ni tiin han infuih thin mah ila, mittui bawk hian a rawn zui leh thin si. A rapthlak em a ni e.

Ni khat chu ka exer la zo rooma ka luh rual hian Kimi khan min rawn um lut ve nghal zat a, ka lo en tawp. Ani hi kha kan buaina vang khan lo hnawtchhuak hial tawh mahse, an chhungkua hi an harsa em em a, amah Kimi hi chhungkaw chawmtu ber a lo ni ve bawk nen, ka pa te nen hian inhmehriat hnaivai an lo ni tho bawk a, Kimi nu ngaihdamna dil vang leh thupha chawina vang liau liau in khawngaihna nen helai hmunah hian an la lut leh ta ngawt mai a ni. Kei chuan amah hi huatna chhetemah ka nei tawh lova, chung zawng ai chuan keimah hi ka inhaw ber tawh zawk. Ka tihtur ti loin ka tih loh tur hlir ka lo ti tawh a, ka inhua. Ka inhaw ngawih ngawih.

ka kuta rawn chelh chung hian Kimi chuan,

‘’ UHlute, thil hrilh tur che ka nei a. khawngaihin min ngaihthlaksak ve hram ta che’’ inthiamlo tih hriat taka min rawn melh leh ralh ralh chung chuan a han ti a, keiin ka lo nuih ve var var thung.

‘’ Aw,, han sawi la, eng thil nge ni ta’’ ka tih chuan, he thu hi a rawn sawi ta a.

‘’ Khami zan, ka rooma min rawn hmuh dun zan khan maw, eng thilmah kan ti dun lo asin. Ih, diktaka sawi chuan engkim kha ka thiam loh leh tih dikloh vek a nia. I țhi ka awrhsak ve ringawt che min laksak hnu atang khan I lakah hian ngaihdan diklo deuh deuh nei chho in, URama kha pa tha leh fel tak a lo ni ve bawk si nen, ngaihzawn chu ka tumruh ta em em a, a tir kha chuan ka tider vel mai mai tho. ,mahse, a rei hnuah erawh kha chuan ka duh ta tak tak a, mak ka inti in a zialo pawh ka ti ve lutuk. Mahse, a rei tulh tulh a, ka in control theilo tual tual a, a rilru kha hnehsak dan tur ringwt ka zawng ta a ni. Tichuan, kha zanah pawh khan a chaw eikhawmna atang khan zinglam dar 12 velah rawn haw in, kei chu ka lo la meng reng. Khatia rooma a rawn inthlak hnu khan a phone-ah rawn call in ka roomah khan sazu nghal zet pakhat ka hmuh thu leh, ka hlauh zia thu dawt hlang hlak chuan ka rawn hrilh ta a, ka ko thla ta a ni. A rawn thleng thla rang ve khawp mai. A rawn thlen hlim chuan dawt hmanga bum chhuak tih takah thil awmlo pui chu kan han zawng dun ta phawt mai a, darkar chanve vel lai chu kan zawng dun ta awm e.mahse, a awm miau silova, beidawnga min chhuahsan leh a tum laiin kei chuan zah pawh dawn lo hian a kawngah ka va kuahbet ta chawt mai a, a țhawng nasa ve the asin. Mahse, thu tam pawh a sawi hmain a hmuiah khan ka fawhsak leh chawt a, min lo nam kat nghal dawrh bawk. Mahse, beidawng duh lo in ka bei leh zel a, ka pawt a ka chul kual ruai rneg bawk a. Ih, vawikhat phei kha chu ka hmaiah hian na zetin min rawn beng nghe nghe. Kei lahin chumi chu chhuanlamah hmangin ka vau let ta a, ka kawr chu phelh sawk sawkin, nang leh ka pi leh pu te hnena amah hek chhiat ka tum thu chu ka hrilh ta  a. ka duh dan anga a awm lo a nih chuan ka tih mualpho ngei tur thu ka hrilh. Ka va han zaktheilo tak em aw’’ a sawi zawng chuan a mittui rawn tla in a han tap leh rih thin a, keipawhin makti fe hian amah chu mittui tling piau chungin ka lo melh ve ngar ngar bawk.

‘’ Ihmaw Uhlute, URama khan nang tluka duh leh hmangaih hi chu a nei miahlo asin. Duh ni se kha  zan tih loh pawh kha hun tha a ngah mai. Signal ka pe nasa ve lutuk. Mahse, a duh lo, a tumlo hrim hrim bawk. Khawngaihin, ka chet dan engkim vang khan kei hi min ngaidam thei ang tiraw? Khawngaihin'’ tap hlawp hlawp chunga a ranw tih leh takah chuan tum lawk em em pawh awm lo hian amah chu ka va kuah ta thlawp mai a, nghet zeta kuahbetin kan tap dun ta tlawk tlawk ringawt.

Eng aiah nge khang zozai insawifiah tumna call leh text message te kha ka lo hnawl fai vek theih zawk le. Ka va han mawl chungchuang tak em. Kei ngei hi nupui ni tlak lo leh chhawr tlak loh hmeichhe mawl chu ka lo nih hi a. Amah vangin ka mihring huat em em leh ka pawisawitu pawh ka ngaidam thei a, mahse, pawisawi ve lo amah ber mai kha engtin nge ni ta ang. Ka ngaihdam vek tawh thu leh, ka ngaihzia thu ngaithla leh tur pawh hian alo kir tawh lo ang maw. Vawi duailo a hlimtha chu thlirin ka biaa, min chhangtu reng an awm tawh si lo. I fa lo piang tur hmel tal hi chu hmu ve hman la ka va han ti tak em. Engtin nge ka koh kir leh theih ang che le. Min kalsan a nih pawhin ka bulhnaiah hian awm reng la, kal hla suh. I hmuh phak loha ka awm chuan hun rei I khawsak theih ngailoh kha. Min mamawh ber alawm tiraw?

****     *****      ****     ****     ****     ****      ******       ****      ****     ****      *****