DEAR AMY__THEN THUMNA

DEAR AMY_THEN THUMNA

Vanlalpeki fanai 

"Zorin, hetianga awm reng tur hi chu ini lo mawle. Engkim chu a nih tur ang vek anni tawh a, liam hnu koh let leh a theih tawh heklo. Chuvangin, i hmakhua ngaihtuah la, hma hun eng tak i neih te hi tichhe lul suh aw"

Rui tih hriat taka ṭhu bu lûk lûk Zorinpuii chu Amy chuan zawite hian alo zilh ve malh malh reng a. Zorinpuii thung chuan meng chiang hlei lo a rawn melh pah ṭawk ṭawk chung hian

"Amy, ka duat, oh my dear Amy, ka vanglai hun ka chen ve anih hi. Hrethiam teh" ti chuar chuar in a kun zui leh hnawp a, chhuat chu a bih run reng bawk. Amy thung chuan chhang zui tawh lemlo hian rilru hah hmel zetin a bul chhuat a ṭhu Zorinpuii chu a melh kar reng a, a khat tawk hian a thaw leh hawk ṭhin thung.

Ni e, he mihring rilru kehchhia Zorinpuii chunga thilthleng te hi a namai lo in, paltlang pawh a harsa hle ang tih chu a hriat. A harsatna tawh tawh zozaite hi an liantham a, a khirhkhan ṭhin bawk nen, a khawngaihthlak takzet a ni. Tikhan, hun engemaw chen chu fa lak mai a ni tih pawh inhrelo in a khawvel alo hmang chho ve tawh a, hmeichhe puitling taktak anih tawh hnuah chauh fa lak tih inhre thar ve leh in, a nu leh pa, amah hringtu te lah an hmel pawh hmuh tur awmlo in an boral tawh thu chauh a hre zui leh mai bawk si. Hengte hi a harsatna tawh zinga liantham zual te chu lo ni ta se, a karlakah hian amah tibuai a, a khawvel ti hrehawm tu mi hrang hrang an lo lang veleh nawlh ṭhin bawk. Nula vanduai ve tak a ni a, te pawh kan ti thei ang chu. Tunhma zawng kha chuan hmeichhe chak ve ṭhin tak kha a ni na in, tunah erawh a tlusawp a, a kehchhe ta. Tin, a khawvel hmachhawn mek te hi a thim hluah hluah bawk.

"Amy, ka vanduai bik ngawih ngawih tiraw? Hmeichhe vanduai leh harsatna ngah tak chu ka ni ve in ka hria. Khawvelah hian thisen zawm ka nei lova, mi chuangtlai mai ka ni tawh"

"Ekhai! Zorin, chutiang zawngin thu an la kawi ngailo. Thisen zawm te chuan hlutna tamtak nei ve mahse, tunlai khawvelah chuan harsatna kan tawhin kan chhehvel ami te hi an ṭangkai a, kan tan pawh an thawh hlawk daih tawh zawk asin. I hre diklo deuh anih dawn kha. A lungkuai zawng hlirin thil i ngaihtuah vak vak a, en ta che, nang ber hetia i han awm tak chinah chinah i chhungte hlim hmel hmuh tur tlem sawt zia hi. An nui hmel hi ka hmu tawh ngai lo reng reng. Chuvang chuan, anni hi thisen ah laichinna nei hauhlo mahla, an hmangaih leh duhsakna i dawn tam tawh zia ngaihtuah hian hetianga awm khum tur hi chu i nilo tih in hrechhuak hram teh"

Zorinpuii pawh chuan uluk fe a lo ngaithla ve in, a mittui a khap per ta sak. Amy thil hrilh zozaite kha diklo pakhatmah an awmlo tih a hria a, insiamṭhat pawh a duhin a tihtur a ni tih a hre ve e. Mahse, tun mai atan chuan hetia sual lam kawngzawh a han tal bawraw kual vel hi nuam ala ti rih tlat. Chuloah, zuruih te zawng, a nuam ve em! alo ti ve ta hial mai!

Hun hmasa lamah khan Zorinpuii chuan a nu leh pa dik takte hre chhuak tain, fahrah ina an dah chhan leh an boralsan tawh thute pawh a thlarau thiante pahnih, Amy leh Rindiki zarah a chhuichhuak ta a nih kha. Eng nge thleng zel dawn I’n ngaithla teh ang.

Khatiang boruak a thlen hnu aṭang kha chuan thlarau pakhat, Rindiki zawk kha chu bo zui ta vang vangin, Zorini phei chuan khawnge a awm tih pawh a hrechang tawhlo hrim hrim. Mahse, tihian, Amy thung hi chuan la kalsan ve duh mailo in a chenchilh ve reng a, engemaw chang bik a a pensan zauh ṭhin tihloh ah hi chuan a thlahthlam lo te pawh kan ti thei ang chu. Zorinpuii vang chauh hian a awmna tur hmun diktak, thlarau khawvel lama kal pawh hreh phah in, mihringte chenna khawvel hi a thlakhlelh phah a, a nihna takah ama tan pawh awm hleithei lo khawpin he nula pakhat ve mai, Zorinpuii hi a buaipui ta chu a ni si. Ni e, he nula hi a vanduai reuh em a, a khawvel hrehawm takte hian Amy tumloh dan takin a unaunu ang hialah ngai in, alo hmangaih ta te pawh kan ti thei ang chu. Hetiang hringnun a hman tak aṭang hian a stationery dawr te pawh kha thlahthlam chho ṭan in, a nu leh Maliani hi an buai phah erh a, a tu emaw zawk zawk chuan dawr chu an in nghah chhawk ṭhin hi a ni deuh mai. Chutihlaiin, ani Zorinpuii thung chu a lenchhuah loh leh, inah a tawm ngut ngut a, a lo chatthla vei thul. A chhungte lu pawh a tihai ta takzet e.

Ni khat chu leng chhuak leh in, hemi ṭum hian a ṭhian hlui mipa pakhat, Mawipuia tia an koh ṭhin nen hian zu an in dun leh a, an rui vei phian mai. An spot na lah chu hmun fianrial te alo ni vei chhap nen, chutia hmeichhia leh mipa, hmun fal a zu in dun ta karh karh chu a mipa insumtheihlohna chhuak in, a zu inpui a ṭhiannu Zorinpuii chu a hmutai ta ṭan tlat. Ava kuah vei chut. Zorinpuii chu rui ve tawh tho mahse, hetiang thilah hi chuan hmeichhe fair tak a nihna lo lang leh ṭhin in a rawn meng bial ta kawk. Rum zet a Mawipuia melh pah hian

"I zaklo emni? I kut kha la sawn rang rawh"

Mawipuia chuan ngaih pawimawh loh hmel fe a lo ṭhen khum sawng chung hian a lamah a han pawt hnai dawrh zui a. Zorinpuii pawh a phu chiang hle. A ṭhianpa kut chu vaithlak tumin a bân a han vaikual ta vak vak a, awmzia erawh a neih tehchiam hmel loh. Sehchilh rap rap chung hian Mawipuia chuan

"Rawn kal mai teh. Nang, hmun fal a ka zui inpui theih ve mai mai hi, engatanmah ka ti hleinem che"  Zorinpuii chu a hlauthawng tawh teh e. A ruih zawng zawng pawh kha an reh ta vek ni hial hian a hria. A meng kawk kawk a, ṭanpuitu a mamawh a ni. Chutah, a rilruah chuan a ṭhian Amy kha lo lang zawkin a han ko zui ta ringawt a, awmzia awm tak ang maw. Chutihlaiin Mawipuia pawhin amah chu theih ngei tum a bei ve sauh sauh chung hian

"Tu Amy maw i han koh ve ngawt a? Nuih iti za zawk ea. Hmeichhia ve tho lehnghal" nuihsawh tih hriat taka ṭhen khum sawng chung hian a rawn ti leh hlak hlak. Zorini lah chuan hnuailam a ṭang chung hian tha tawpin a hmaiah a lo nawr bet ve bawk a, an buai dun teh e. A tu ve ve mah chuan tlawm tum hauhlo in an ṭan hmunah an ṭang mar pat reng a, ṭan an la khawh dun ve reng. Tha lah thlah thiang a ni heklo. Mawipuia tan lah chuti maiin, buan chaklo zawk nimahse, a tlawm thei bik ṭhaklo a, a thuhnuaiah a dah thei bik miahlo. Tin, Zorini pawhin hmeichhe zurui ve mai mahnise,  hetianga a zu inpui mipa leh, hmeichhe laka rilru ṭha pawh pu hleitheilo, hmeichhe zahawmna leh hlutna hrethiam phak hauhlo mipa lakah hian in phalrai  a, a thianghlimna hloh chu alo tum bik awkawng lo a. Chuvang chuan, a thih ṭhak thleng pawhin ṭankhawh ngai mahse a ṭang tlang rat mai tur a ni tih chu a ngaihdan nghet bur a ni tawh. Mahse, mak tak leh vanneihthlak tak hian chutia an lo buai ṭauh ṭauh lai chuan thawklehkhatah Mawipui zawk chu a hnunglamah kat zui dawrhin a leng ta lawp mai a, chhuat châr ah a hlawm thla nawk. Zorinpuii chu thil awmzia hrilh a ngailo chiang hle. Thinrimna leh hlauhthawnna nen, tha khur hlawk hlawk hian a tho zui a, tichuan, chhuat char a let hlawm reng Mawipuia chu ṭhutbet zui ve vatin a hmaiah a beng ta sawk sawk mai. Mawipuia lah chu a ruih vanga tha ngah tawhlo sa nen, chhuat char a a insawhna taksan na ṭhem ṭhum nen khan a mu zawi reng mai a, Zorini khawih ang ang pawh chuan alo awm ve ta ringawt.

"Zawng hmelchhepa, khanglang che hian. Nangni ang mipa rilru sukthlek diklo leh bawlhhlawh lutuk vang hian alawm mizo hmeichhe tamtak ten kan zahawmna kan hloh phah ṭhin ni. Mipa rilru diktak pu mi chuan eng anga hmun fianrial leh fal ah pawh hmeichhia zu in pui thei mahse e, mutpui kher a tum lovang, nangni ang mipa rilru piangsual ho avang hian alawm kan ramah pawngsualna pawh a thlen fo ni. Chawh tak rawh!" tiin na zet hian a malah a pet leh ngheng. Mawipuia pwh chu alo rum ve kawk thei. Kal mai tuma a han inher let nak chuan a hnungah Amy kha alo ding ve reng tih ava hmu zui a, an in nuih sak. Amy chuan mitko san ak chung hian 

"Sawiṭha ve aw" alo ti a, tichuan, inlungrual tih hriat takin chulai hmun reh leh fal tak pawh chu an kalsan ve thei ta a ni.

In an thlen hnuah Zorinpuii chu a han inbualfai hmasa leh te te a, a harh chiang ta deuh. Amah nghak a lo ṭhu reng Amy bulah chuan va ṭhu zawm ve nghalin, a thaw leh hak. Chutah, Amy kut chu dimte a laksak pahin a mitah a en zui kiau bawk a. Ngaihnobei zet a han nuih sak pah hian

"Ka lawm e aw. Vawi engemawzatna atan i chungah hian lawmthu sawisenloh ka ba leh ta a ni. Nang hi chuan min kalbosan tawh miah suh aw" tiin a mittui a parawl kiang lehnghal. Amy pawhin mitkhap sak sak chung hian alo en ve reng a. 

"Zorin, ka kalbosan che i duhloh chuan i awmdan hi thlak leh tawh la, a hma a nangmah tho kha ni leh tawh rawh" rawn ti ve sapin a hmel aṭang chuan a lungngaih hmel em em bawk. Zorini chuan chhanglet mai lo hian a melh ngai a melh ta vang vang a, a inngaihtuah nasa hle tih chu a awmdan ah a hriat mai. Chutah, harsa tih hmel taka rawn nui chhuak ve var var in

"Awle Amy, ka tum ang. Ni e, ka thei alawm. Ka sawi awmzia chu, kati thei em em ang. Hetianga ruihhlo ngai leh zu ngawlvei tia miten min sawidan tur leh hriat hlen dan tur ka ngaihtuah hi chuan ka duhin ka ngaingam bik reng reng lo. Chuvang chuan, tun aṭang hian thlah kalo tum ange. Eng aiah nge maw ka theihloh bik ang le. Tiraw?" tiin a mittui a khap per leh sak a, a nui zui var var bawk. Chutihlai chuan Amy pawh kha lawmna mittui nen alo la khap ve sak sak reng mai.

Harhfim tih hriat taka inhnuai lam a han pan chu, a nu khan maktih hmel zet hian ka hau chungin alo en reng ringawt. Amy pawh kha inhnuaiah lo awm leh daih tawhin chaw ei dawhkan chungah alo ṭhu fel at thung a. Zorini chu alo nuih deuh sen sen reng bawk.

"Eng nge khatia mi melh vak kher a!?" Zorini chuan rawn ti hlukin, a nu pawh rawn harhchhuak ta niawm tak hian alo inthing zui leh nawk.

"Aa eng nilo e, ka fanu hmel lo ṭhat zia hi mak ka ka ti thar deuh em a ni"

Zorini thung chu lo ner ve sakin chair ah a ṭhu zui nghal. A lai deuh reuh bawk.

"Khawnge Maliani hi" a rawn ti leh. Chuveleh, a nu bawk khan awki zangkhai fe mai hian

"Dawrah a kal a, vawiin chu. I pa nen an lo haw mek niin ka hria"

Amy chu awmze nei tak hian alo meng bial kawk mai. Mahse, chu chu Zorinpuii khan a hmu ve lo thung.

"Ti daih ila nu, Maliani hi khawi khua nge a nih a? Nu leh pa te hi ala nei em?" a rawn tih leh chuan Pi Rinfeli pawh ngaihtuahna hmang ve tih hriat tak hian chairah chuan a rawn ṭhu thla hnawk a, a thaw zui leh ham ham.

"Maliani hi maw, i pa sawidan ah chuan, nu leh pa neitawh lo niin, a pi leh pute berh ve takah bulah khawsa ṭhin in, an khua tak chu Kolasib niin, amah hi i pa ṭhianpa fanu anih ber chu. I pa naupanlai ṭhian a nia, Maliani pa kha. Chung vel chu i pa sawidan ber ania, ka hre tam biklo khawp mai"

"Anih chu mawle, thawkkhat lai khan ka pa hi Kolasib lamah a zin fo kha ka ti reng a ni"

"Nia, heng vel vang hi a nih bakah a hna vanga zu kal kha alo remchang em a"

Zorinpuii chu lo bu leh nghat in Amy erawh ngawi reng hian inchung lam panin a chho nul nul a, Zorini pawh chuan alo en zui ve vang vang bawk. Chutah, Amy chu umzui ve thuaiin room an luh rual deuhthaw hian Zorini chuan

"Amy, hriat i nei leh tawh emni? Mawh! Tinge khatia i awm teh thut a" hlauthawng tak hian a ti zui sawk sawk. Amy chuan thaw halh chung leh chiang mangkheng a amah chu rawn melh pahin

"Zorin, i nu nen hian bum in in awm mek a ni tih hi hre rawh u!"  Zorini chu alo phu zawk thei.

"Engtinmaw!?" rawn ti muang fan raih in khumah a ṭhu a pah zui hnawk a, Amy pawh chu a rawn ṭhu zui ve zat.

"Aw, dawt ka hrilh ngai che emni? I nu in i pa chungchang a hriat dan hi thudik tawk lo a ni e. Engkim i chhui chian vek a ṭul aw. Anih loh chuan khuareiah in la buai dawn tho tho ania Zorin. Tin, ka sawi lawk ang, hun dang leh ni dang ang khan ka thuswi te hi min awihlo sak ngawt tawh suh ang che. Ka lawm ngawt ang"

Zorini chuan chhan let mai nachang pawh hrelo in amah chu alo melh ngawt ngawt ringawt tawh a. Chutah, Amy bawk chuan a dar a rawn vawn sak pah hian

"Zorin, i awih dawn lo tih chu ka hria, mahse, min ring turin ka duh che. He chhungkaw member tlem tak chhungah hian i rin phak bakin buaina a inphum ru hnem ang. Ihmaw!"  atih lai mekin Zorini chu a rawn inrawlh vat a.

"Umm, engpawhnise, eng thil nge thudik tih hi min han hrilh teh. Aaa eng aiah nge maw thlamuang tak leh lungdam tak hian ka awm ve mai mai theih miahloh le!" tiin a indawmkun zui vang vang. A hne hluah hluah tawh hi a ni ber e.

Amy erawh in thudik engkim chu hre vek tawh mahsela, a sawi chhuak hreh hle tih chu a hmel landan aṭang ngawt pawh chuan a hriat theih awm e. Han thaw zui leh hawk pah hian

"Maliani hi i pa ṭhianpa fanu a ni lo!"

Zorinpuii chu rawn hawichhuak zawkin, Amy mitah tak chiang tak hian a rawn melh ta kawk a. A bangbo hle tih chu a hriat.

"Ih, anih chuan eng nge thil awmzia chu. Tu fa nge. Awi! Thudik chu han sawi teh" ti sar sar in a tho chhuak hluai a, a veikual ta sek mai.

"I pa fanu ngei a ni e!"

Zorinpuii teihawi sek pawh chu ding chawtin, maktih hmel fe hian Amy chu a rawn melh leh kawk.

"Engtin a!? Nang hi" awihlo tih hriat zet chuan a han kiai ta sak a. Amy pawh za lo leh inthiamlo hmel zetin alo ṭhen ve ngawt.

"Aa Amy, tun lawk a i thil sawi zawh chiah kha chu ka awih thei tawhlo. Engtinnge nang hian thil zawng zawng te hi ilo hriat ve zel theih zawk a, ih, thlarau ho detective ini tihna emni!?"  a thu hriatte vanga rilru buai tih hriat taka meng â ruai chung hian Any chu a rawn melh kawr. A mitmeng aṭang ringawt pawh a thluak leh rilrute chu an fim lo tih a hriat ta takzet. Ni e, Zorinpuii hi a â lo chauh tawh a ni e. Amy chuan thawhchhuah ṭial ṭial pah hian

"Engkim chu hrebik vek love, aa tun atan chuan hetiang thu hriat hi ila inpeih chiah lo a ni ange. Ka tihpalh a ni Zorin" tih leh tukverh awmna lam pan a rual a. A bo zui ta daih mai. Zorinpuii pawh chu a hawi hai zui nasa teh e. Chutiang teh thut a Amy a han khawsa ta mai leh, a bo ta mai chu a awih theilo hial a, a ring thiam heklo bawk. A lung te chu chhe zui rum rum in, a mittui a rawn luang leh ta ngiai ngiai a, chhuatah chuan ṭhu sawp zui hnawkin a thaw ta kawk kawk mai. Vanduaina leh harsatna ten an hmuah tawp theihloh leh an kiansan duh miahloh Zorinpuii nun hi a khawngaihthlak takzet a ni.

"U Zorin, tho teh. Ka pu in a be duh che ania"

Zorinpuii chu rawn meng chhuak siar siar in, a bul lawk a amah lo ṭhutchilh reng tu ,Maliani hmel a han hmuh thut takah chuan hmuhloh tur hmu ang mai in rang zet hian a tawlhsawn ta rawk rawk mai. A khawsak dan vel chuan Maliani pawh tiphu ve zawkin, an inmelh ta reng ringawt a. Chutah, a awmna hmun a han hriatchian leh nak chuan a room chhuatah khan alo muhil reng tih chu a hre ve ta chiah.

"Chhuak nghal rawh!" ti zui tuarhin a tho zui zat bawk a. Maliani chu a meng phawk nasa tawh hle. Mahse, chhang let lemlo leh engmah pawh sawi zui tawhlo cjuan room chu a chhuahsan ve ta zawk a. Amy thusawi te kha ala hriat ve reng avangin thinrimna hian a khat reng ringawt tawh. Inhnuaiah pawh chuan tûm bur chungin a chhukthla ve chhut chhut a, a chhungte chuan zanriah lo kil mek tawhin, a hmel an rawn hmuh chuan an chaw ei lai tawp meuh hian an lo thlir ṭhap ringawt. Ani pawh a dinna hmunah chuan ding zui chatin, a pa nen chiang zet hian an in melh leh ta ran mai. Chutah, bung nghutin

"Eng nge? Ruk ka ru emni, khati vak a min lo melh a!?" ti chung hian kutsil turin silhmun lam a pan nghal. Nu ber chuan tlawn titih awrawl in

"Bawihi, thleng kha rawn in lak ve nghal mai rawh aw. Hei, i chawhmeh duhzawng hlir kan hmeh a, i ei ṭeuh dawn nia" alo ti sawk sawk. Mahse, ani thung chuan a chhang let ve lemlo. Chutah, pa ber bawk kha rawn inrawlh veleh in

"Nula te ini ve tawh a,ni leh lo, i nula lutuk tawh mah mah zawk. Engpawhnise, hetiang a khawsa reng tur hi chu i ni lo asin le. Hei, engkimah Maliani hi alo fel em a, i ai pawh a awh zo hle zawk a, i mualpho lo mai mai tih hi inhre teh" a sawi zo chiah chu, thleng a ri zui bur. Hawi chhuak nghal ṭhapin, Zorinpuii chu dawhkan bulah alo ding a, a thleng ruak ken lai kha dawhkanah alo nghat chawrh hi alo ni. An va han phu chiang hlawm tak. Thinrim insehruh pan pan chung hian Maliani chu a melh leh hrâwk phawt a, chutah, a room lam bawk pan tur chuan a tlanchhe leh ta daih mai. A chhungte sawitur hrelo lutuk erawh chuan an thlir zui ṭhap ringawt.

[24/10, 1:21 am] Peki: DEAR AMY (2)

Roomah tlan lutin khumah a bawk zui leh thlawp a, a ṭap ta hliam hliam mai. A nu khan rang takin rawn umzui ve bawk mahsela, inthlem tih vel chu a duhdan alo ni bau lo. Tin, eng thu mah hi a sawichhuak theilo bawk a ni. A rilru hi hliam a awmin, natna hlirin a khat a, mahni in khawngaihna nen a khat tlat bawk. A tawt lutuk te chu puak keh dawn nimai hian a in hre hial tawh nghe nghe.

"Amy, khawiah nge maw i awm tak daih le. I lung ka ti awilo zawk nge, ka va han ngai tak che em aw" tiin zanthiang leh boruak nuam tak hip pahin balcony ah chuan a ding vang vang a, a hawi kual vel pah reng bawk. Amy kal ta lah kha reh zui vang vang in, ni hnih lai mai chu thawm pawh a rawn nei tawhlo a, khawiah tak ṭuan zui ang maw? Nge ni a, Zorinpuii lakah hian beidawng tawhin a awmna hmun tur, thlaraute khwvel lamah chuan a let leh tawh zawk ni ang. Khawvel mi te hian a lawmna kan siamsak zo lova, buaina hlir kan lo thlen ve chhen bawk nen, a hne ta lutuk anga, khawvel ram hi a hnuchhawn ta tihna emni ang? Zorinpuii'n a hming meuh lama a koh mawlh mawlh hunah pawh hian kohchhuah tur reng a awm ta silo chu a ni a. A chungah khan eng thil ṭhalo mah chu a thleng em lo turah ngai teh ang.

"Kal rawh, tah khan lut tlang rawh. Ava han mak tak, lut ta che roomah khan"

Zanrei tawh lama a bathroom chhung a thawm awm reng avang chuan Zorinpuii pawh chu a hawi buai kual leh hle a. Bathroom lah hi a mutna khum sir lawk a awm kha a ni ve bawk.

"Aw, tah khan lut rawh. Room anih kha"

Chu aw chu, Amy aw ngei kha niin a hre si a, tunge maw bathroom chhungah kher chuan tun ang hunah a biak tak chiam chiam ni aw, ti a thawh mai a han tum chu bathroom chhung aṭang ngei khan hmeichhe tleirawl niawm tak, mengphawk hrû mai leh samphiar sei tak nei, taksa zen thlar mai hi a rawn chhuak ta heu mai a! Zorinpuii phu nasa lutuk pwh chu a khum chungah ding ngil awtin, an in melh zui ta vang vang mai le. Chu tleirawl te lah chu a han meng phawk chiang khawp lehnghal a, a mitmeng pangngai ve hrim hrim nge ni anga, a hlauthawng lutuk tih pawh a hriat hran ta love. Chutia an lo in melh reng ringawt lai chuan Amy pawh kha bathroom aṭang bawk chuan a rawn lang veleh ta hlawl. Zorinpuii chu a mangang chhe lo chauh tawh a ni.

Chutah, aw ṭial ruan mai hian

"Amy, eng nge thil thleng mek te hi ni ta a? Eng, engah nge bathroom aṭang kher khan in lo luh tak mai?" a chi ai teh asin. Mahse, Amy chuan nui deuh sâng chung hian

"Hihi, Zorin, tihpalh lutuk aw, He nau hi alawm, in kawngkapui lam aṭanga rawn luh kha a inthlahrung vei khanglang a, tihngaihna dang ka hretawh hlawllo a ni"

Chuveleh, rang fe mai hian thlarau pakhat zawk chuan

"Thlarau ka ni tawh a, dangdai deuh a kal vel te pawh kha ka duh ve alawm le!"

Zorinpuii leh Amy te chu an lo nui ri deuh hak. A sawitunu lah chu ala hawihai nasa em em zui lehnghal a. Mahse le, thutak zawk hian Amy chuan

"Zorin, hei hi Rosangpuii niin, dinthar vengah an awm a, nimin tlai khan inawkhlum a chhar niin, a thlarau nen hian kan intawng fuh a, kalo hruai ta ngawt mai anih hi!"

Zorinpuii hrilhhai chu alo meng phawk deuh hlek. Amy thusawi awmzia kha a hrethiam lo miau a ni.

"Chuan, eng ti turin nge min duh a. Mahni duhdan a in awkhlum anih tawh tho a hnu, engtinnge ka tih vak bik ang"

Amy in chhanna a pek hma in Rspi kha alo inrawlh ta vat a.

"Ka inawkhlum silo alawm!" alo ti zeuh.

Chuveleh, Zorinpuii pawh chuan a ngaihna hriat loh hmel tak leh phawk deuh hu chung hian

"Chuti, tunge khai che a, hran khum hrep mai la ti nia!" a han ti liam puat mai chu, Amy ngaihdan alo ni ta hauhlo. Mengrum em em leh sehchilh nawk chung hian

"Zorinpui, i ṭawngkam leh i ngaihtuahna ṭhalo te kha paihbo nghal rawh. Keini hi thlarau sual kan ni ve lo ania. Tin, midang rikrap zawng a che ṭhin te chu ramhuai sual bawlhhlawh te chauh an ni e. Chuan, keini pawh hian mihringte rikrap theihna leh tihṭhaih theihna chu nei ve tho mahila, ṭul loah chuan kan tilang ve mai mai ngai lo thung" alo ti deuh duah. Zorinpuii pawh chuan lu bu deuh nghat nghat chung hian

"Ka hria e,ka hria e. Ka uang ve lawk anih kha. Anih leh, Rsp, tuin nge that che a, khai bawk che tih chu han sawi la" ti a rawn hawi chhuak ve in a sawi zo chiah tih ah a room kawngka a rawn in theh hawng ta ṭhuai. An zavai mai chuan phu rual dualin Rspi phei kha chu khumhnuai ah alo biru hmanhmawh a. Thlarau mai a ni tawh tih kha a theihnghilh ta a ni ngei ang le. Chutia, kawngka rawn hawngtu an han en nak chuan Zorinpuii pa a lo ni reng mai. An hlauthawng takzet.

"Aw, pa,eng nge i duh ve tehmial a?" a tih zawh rual chiah hian Pu Chuauthanga chuan ram hmakin

"Tunge i biak? Tlangval i tawmpui emni?" a rawn ti deuh khur khur. Mahse, Zorinpuii'n lu thing nawk nawk pah a

"Tumah ka be lo. Chukchu pakhat hi a rawn tlan phei puat a, kalo hau a nih zawk kha!"

Hetihlai hian khumhnuai a biru, Rspi kha Amy chuan pawhchhuah tumin ngawi reng hian alo buaipui ve mek bawk a, Zorinpuii chuan a zu mitsir leh ralh ralh ṭhin bawk. Rinloh tak maiin Pu Chuauthanga pawh chu alo bu ta nghut a, engmah sawilo hian a kal zui veleh mai bawk. Zorinpuii leh amy thawveng ta huai hmel chu hmuhnawm tham tak hi a ni.

"Amy, i ṭhiannu chu engkim sawiturin han ti zawk mai teh. Ka tan ṭawng rik reng leh thawm neih a tihchi tawhlo tlat" rawn ti leh zung zungin, Amy pawhin a thusawi chu lo zawm ve in Rspi chu a han melh leh te te a, tichuan, thil thlendan kimchang sawitur chuan an inti ta nge nge.

"Ihmaw U Zorin, bialpa hi ka nei ve a, ka duh ṭhin hle bawk. A hming pawh Zothantluanga niin a chhelo a, an hausa a, a fel em em viau bawk ṭhin. Mahse, kum 2 kan inzui hnuah, thawkkhat lai aṭang khan ṭhian kawm te zirloh a leiah, zu in te rawn hrat chho ve ṭan in, damdawite hial pawh an bar ṭhin tih ka hre ta a. Khami chin kha chu hlimni hmel hi kan hmu mang ta lo a tih theih awm e. Kan inhau reng a, a ṭhiante lah hian keimah hlir hi min puh chhe daih zel bawk si. Ka bialpa lah kha ṭhiante thuawih chi leh ṭhiante ṭan tlat chi hi alo ni ve leh bawk a, kan buai phah ta fo mai a ni. Tichuan, zan khat chu ṭawngkam ṭha taka min rawn ko chhuakin a ṭhiante nen pawh in ngaidam tawn tur leh, anni pawhin ngaihdam min dil chu an duh thu a sawi teh tlat a, keipawhin lo awih veleh maiin ka zui chhuak ve. Mahse, an ṭhianza ho awmkhawmna hmun ka va thlen chuan lo rui nuaih tawh hlawmin, ka hmel an hmuh rual khan an nui zui ta dur dur mai a, an sahawk hi a ni ber ang chu. Keichu a laiah dingin, min kal hual tuau tuau a, mipa vek annih avang khan ka thlanchhe theilo, min lo man bet hman zel bawk si. Ka bialpa ber mai chuan min nuihsawh pah hian leiah min namthlu ta a, kut te min thlak zuiin min pawngsual a nih chu! Kut min thlakna kha chu na viau lo mahse, min pawngsual zui ta kher khan min ti na in, ka tliak hnawp hi a ni ber e. Tichuan le, an zavai in pakhat te te khan min pawngsual ta vek a, a tawp berah ka bialpa ṭhianṭha ber, Rohluzuala kjan min rekhlum zui ta a ni! Ka ruang chu motor ah phur haw in kan inhnuai, kudam atan a kan hman ṭhin ah hian thawm nei hauhlo hian min hnuk lut leh a, kudamah chuan inkhaihlum ang taka ka lan theihnan min khai zui ta a nih kha! Tichuan, ka thlarau rehthei tak leh ṭanpuitu neilo hi vak kualin tihian, U amy  nen kan intawng ta hlauh mai a. Kan rawn pan nghal tawp mai che a ni e. Khawngaihin thudik hi min sawichhuah sak la, ka thihna phuba pawh hi ka thlarau zalen ve theihnan min rawn laksak hram rawh aw. Ka lawm dawn em mai" mittui tling piau chuan a ding khur pah hlak hlak reng a. Amy pawhin a thu hriat hnu vek ni tho mahse,ala pai dam theilo a ni chek ang , a mittui tla tur te chu alo hru pah ve mial mial.

"I thil tawn te chu ava han rapthlak ve le Rsp, ni e, lo lungngai lo phawt la, naktuk lamah kan thusawi min awihsak thei tur Police kan pan nghal dawn ania. Ngaihṭha tak khan lo awm la, tun atan chuan ka'n muhil ve tawh phawt ange aw" tiin a mu ṭha zui leh thuai a. In lukhup hlun in a muhil zui ta bawrh bawrh.

Reiloteah khua pawh rawn var zui ve nghalin, a chhungte bulah chuan dawr a nghah hmanloh tur thu leh, Maliani bawk in lo va buaipui leh rih mai tur a a duhthu te chu a han sawi leh zung zung a. Mahse, a pa bawk kha lo inrawlh leh vatin bul hmek hmawk zet hian

"Maliani hi mihring ve tho a ni a, chau ve thei tho anih hi. Inah lah i tih ai engkim ti in a buai a, dawr lehzel ah chuan chhawr hah tum lo teh aw" alo ti khanglang chu Zorinpuii ṭek leh nasa tawh tak a ni. Sawi ngaihna pawh hi a awm tawhlo zawk hial ang chu. Chutah, ngeiawm zet a ner nawng chung hian

"Nia nia, a nghah kher a ṭul hleinem. Dawr te chu awmpuite kut a dah ai chuan nau chhawr lai ka nei tho a, an rintlak zawk bawk" ati let ve ta kher.

"ZORINPUI!!" a pa chuan rawn ti zui ṭhawtin, ani erawh chuan ngai pawimawh lo zet hian inchungah a chhohsan ta daih a, a insiam san ta mawlh mawlh. Eng em chu a thleng zui ta lo hlauh e.

"Zorin, tuna i khawsak dan aṭang hi chuan eng thilmah i hrechhuak dawn in ka hrelo. Fing takin awm la, Maliani leh i pa pawh hi ṭha takin be bawk la, an lakah i thinrimna hi tilang fo tawh lo teh. Rspi buaina hi han chinfel sak phawt mai ila, ka pui taktak tawh ang che"  Station an pan lai hian Amy khan a rawn ti ve hlak hlak a, Zorinpuii thung chuan chhang let lemlo mahse, ṭha chu a tih ve hmel tho. A ngaihtuah zui vang vang bawk niin a hriat.

An tum ram chu thlengin, station chhungah chuan an inzui lut ta diah diah a. Vanneihthlak zet mai hian a hma pawh a an lo dawr tawh, Sanglura case vanga alo inhnialpui hrep tawh Police Inspector ngei kha lo awm leh in Zorinpuii lawm lutuk chu a kûk raih lo chauh. Chu inspector pawh chuan Zorini hmel chu lo la hre ve in, phawk fe hian a rawn melh ta reng a.

"Hi! ka pu inspector, ilo dam em?"  ti deuh ham ham chung hian a hmaah chuan ava ding ta ran mai. Inspector pa chuan a mitah pawh lo en ṭha ngam lo in hmundang a melh kual zak zak.

"Aw,dam ve e. Eng thil nge i duh leh tak" alo ti zawi halh.

"Ṭhu tur talin min han ti ve phawt la mawle. Case ropui deuh nen kalo kal leh tawh a nia"

Inspector bawk chuan thaw hawk chung hian a hmaa chair chu a han kawk zauh a, ṭhu turin a ti zui leh bawk.

"Englo ania ka pu, a hma ang bawk khan nula thihna chungchangah min pui leh la ka ti a ni. Kha, dinthar veng nula nimin piah lama inawkhlum ruang an chhar tak chungchang kha ania"

Inspector chuan meng zau kawk pah a amah rawn en chung hian

"Nang hi, i pangngai chiahlo nge maw ni. Ka hrilh ang che mami, mitthi tawh te hi khin an harsa lo ka tih tawh kha"

"Ka hria, mahse, ka case hmasa zawkah pawh khan chakna ka chang tho a ni lomni? Eng nge maw min hnial hmasak ve ziah ni. I bawhzui dawn em?" alo ti chang leh fak fak mai. Chutah, inspector chuan chil lem ri zui khulh pahin

"Nia, han sawichiang phawt la, bawhzui tlak anih te chuan kan tum leh a ni ang chu" a rawn ti ve takah chuan Zorini pawhin a thu hriat ang ang te kha a han sawi ṭan ta a, police pa chuan chiang zet hian alo en ve reng bawk. A ngaihdan ah chuan he nula hi a chiang vaklo niin a hre tlat.

"Chung zawng zawng chu amah nula boral ta thlarau khan a hrilh fai vek che a maw!?" nui deuh ruh ruh chung hian a rawn ti khauh mai. Zorinpuii ngaihdan chu alo nilo nasa.

"Min hrilh lo se, khawi aṭang nge ka va hriat ngawt theih ang le" lo ti ve nghutin inspector erawh kha chuan la nui ruh ruh chung hian

"Aa,ilo phuahchawp te pawh a ni thei a, tin, dawtsawi te hi ilo hrat viau thei tlat"

"Case hmasa aṭang tawh khan dawt anih loh tur zia chu hre ve mai rawh. Hetiang mai mai phuahchawp a vak kual tur hian hun lah ka nei bawk heklo. Hei hi bawhzui vat mai teh, a nihloh chuan"

"A nihloh chuan eng nge?"

"I thuruk liantham dang hailan tur ka la hria ania aw" tih pahin police pa bula ding, Amy leh Rspi te chu a han melh ta zawk a, anni thung chu an lo ṭhen ṭha mai. Chutah, inspector chuan aw lawi rût chung hian

"Awle, awle, ka han fiam kual mai mai che anih kha. Kan duh anga thil a kal theih chuan trial neih hunah khan ilo in ruahman ve a ngai dawn a nia" ti ta zung zungin constable pakhat chu a ko phei leh ta a. Tichuan, thil ṭul zualpuite a tihfel leh hnuin station pawh chu an chhuahsan leh ta a . A tu a te mai pawh chu thawl ta huai ang mai hian an thaw leh sawng sawng ṭhin a, an hmel hmuh pawh a nuam e. Mahse, Rspi bawk khan hlauhthawn hmel fe a Zorini chu rawn be leh in

"Kan police te hi an che hmanhmawh lo in, case liantham ah pawh hian an ṭuan a fum tlat a, an serious lo riau zel mai a, kei chu an ti zuzi mai mai ang tih ka hlau ngawt mai" a rawn ti khauh. Mahse, Amy thung chuan dam tak a lo chhang let ve leh in

"Chutiang an nih tak leh tihdan dang kan zawng leh mai dawn alawm. Lungngai suh. Chutiang em chu a thleng lo turah ngai ang. Sanglura chungchangah pawh khan hma an lak chak viau kha maw. A diktak a sawi chuan, police hna chauh pawh nilo, sawrkar hnathawk tam zawk te hi chu, tling leh tling lo, duhsak vang a lak mai mai hi an ṭhahnem tawh em a, heng ho hian hna thawk ṭha lo in, hnaah an chianglo bawk a, zoram ṭhanmawh bawk te vek annih hlawm hi. Mahse, i chungchang bikah chuan hahdam rawh. Kan awm alawm" ti leh zung zungin a nui zui var var a. Zorinpuii chu alo chek tlak tlak mai.

"Thlarau ve si thil hi hre ril thei bik ka ti" tih pahin alo thlek ngawih ngawih nia. Amy lai lutuk chu alo sen ṭawn ṭawn thei bawk.

"Vawiinah pawh Maliani bawk dawrah kaltir leh in, khawnge nang i han theuleu ve thung a!"

Zanriah kil lai chuan pa berin a rawn ti leh ta nghut mai. Mahse, Zorinpuii'n a chhan let hma in a nu zawk alo inrawlh ve thuai a.

"Ah, pa a, keiman Maliani chu ka kaltir zawk anih kha. Ka nuamsamlo em a, chuvang a nih kha"

"Nang chu lo inrawlh suh aw. Zorinpuii hi ka bia tih i hrelo emni?"

Pu Chuauthangpuia chu a meng shalla tawh ngiang mai. Zorinpuii lam hawi leh vut pah hian ram hmak in

"Zorinpui, ka bia che tiraw? Min chhang ta si che. Khawiah nge i han then kual vel chu han sawi teh"

A pa awmdan vel chu den tawh tak hi a ni awm e. Mahse, Zorinpuii chuan a chaw ei thleng thawhsan nalh pah hian ring zetin

"Awmpui a nihna angin a awmna te chhungkua chu a pui ve zel tur a ni dawn lawmni? Eng aiah nge tunhnai ah hian Maliani hi heti vak a a thlavang i hauhsak tak le ka pa. Ka hrethiam ta hauhlo mai che. Chuan, in pahnih inkarah hian eng thil chiah nge awm tih hi min lo hrilh ve teh u" a sawi zawh rualin a biang chu a ri zui thlawp. Nu ber pawh lo au ve ṭhatin, Maliani thung chu alo ṭhu khawng reng ringawt a. Rilru na leh mittui tling piau a a pa chu melh vawng vawng pah hian

"Pa" a ti chhuak sap. Chutah, Pu Chuauthangpuia, pa sehhel leh rorum ru zet mai chuan thinrim aw khur hlawk hlawk chung hian

"Maliani hi awmpui satliah a ni lo aw. Chu chu lo hretawh rawh"

"Aw, a nih chu. Kalo hre tawh ang. Kei hi, in fa hrin diktak ka nih ve loh avang hian min hmusit bik alo nih hi. A tawk khawp mai" ti tuar tuarh pah hian a room lamah a tlanchho a, a nu chuan theihtawp in alo ko zui ve lawm lawm bawk. Mahse, kohna chhang let thei pawhin a khawsa tawhlo a, a mittui dir zung zung chungin khumah a ṭhu khur ta hlak hlak mai. Reilote hnuah Maliani au ṭhat thawm chu hrenghal in, Amy kha thaw hlawp hlawp chung hian roomah chuan a rawn tlan lut ve zat bawk a. Thaw hlawp hlawp pah hian

"Zorin, i nu khu, nikhaw hrelo in a tlu ringawt ania!"

Thinphu dawt dawt a a ṭhuthmun chu thawhsan leh thuaiin inhnuaiah a tlan thla leh ta. Amy sawi ang tak tak khan a nu chu dawhkan bul chhuatah lo tlusawp rengin, a pa leh Maliani khan an lo buaipui pah reng bawk a. Ani ve thung erawh a che hleithei tawh der lo, a ke pen pawh sak tlatin, a muang zui ruih a, a vai ruai hi a ni ta ber e. A pa chuan a nupui buaipui pah a amah a rawn ko lawm lawm te pawh chu hla taka au ri ang mai hian a hre chang chang a, a hmu ve riai ruai bawk. Engkim thleng mek te chu an hla ta du vek a nimai. Mahse, Amy'n a beng bul lawk a ko lawm lawm chung leh, a taksa chu a rawn sawi pah tak reng ah chuan harhchhuak leh vatin a nu bulah a tlan thla ta vat.

"Doctor lo call rawh. Maliani nen hian kan lo buaipui ang, hmanhmawh rawh" a pa chuan lo ti zung zungin a nu taksa zawi ngiai mai chu a pawm kang lawp a, inchungah a tlanchhohpui nghal bawk. Zorinpuii pawhin hmanhmawh zet a a phone lak leh pahin an chhungkaw doctor ve ber pakhat chu a han call ta nghal thuai a, a nu te room lamah a tlan lut ve nghal bawk. Room ava thlen ve chuan Amy kha a nu kiangah lo ding in, alo kun vei ngaih leh ta nghal a, Zorinpuii chu a hlauthawng takzet.

"Pa, ka nu chu a thi lo ang tiraw?" ti a ṭap chhuak in a nu taksa zawi ngiai leh engmah hrelo a mu zawi reng chu va kuah a rual a, ala ṭap zui hawm hawm bawk. A pa pawh chuan zaidam tak hian

"Lungngai suh u. Doctor alo thleng anga, engkim a ṭha leh vek ang" ti supin a thaw leh halh ṭhin. Room chu reiloah a chhuahsan ta nghal bawk. A pa leh maliani te an chhuah hnu chuan a bul lawk a ding ngawi reng Amy kut chu a han vawn sak ta chawt a, mittui kar aṭang Amy hmel en pah chuan

"Duhtak Amy, ka nu hi i tidam leh thei ang tiraw? A harhchhuah leh theihnan hian khawngaihin min pui lul rawh" tiin a mittui a sur zung zung. Mahse, mak tak hian Amy chuan a lu alo thing ta tlat. Zorinpuii pawh alo meng phawk nasa teh e.

"Zorin,ka theilo, ka tihpalh a ni. Hetiang tidam thei tur hian eng thil tihtheihna mah pek ka ni lo a, min hrethiam dawn nia"

"Tihdam theihna i nei tawhlo maw!?"

Maktih hmel zet a rawn ti ve in a beidawn hmel ngawih ngawih. Chutah, Amy chuan zawi sap hian

"Nei e, mahse, natna khirhkhan leh liantham ah cuan eng thil tihtheihna mah kan neilo, min hrethiam rawh.Hetiang hi chu Pathian leh doctor te tihtheih chi a ni e"

Zorinpuii chu a insehruh ṭeuh tawh mai.

Reiloteah, doctr pawh chu lo thleng ve maiin, a tihtur ang ang te a han tih zawh hnu chuan amah ngaichang a lo thlir reng tu, Zorinpuii te pafa ho lam hawi cbuan a rawn thaw zui ve halh mai a. Anni ho chu an thin alo phu dup dup tawh thung.

"Eng lo a nih hi! Thu thin ṭhawng deuh a hriat vang a ni ber a, a bp hi a sang angreng viau bawk a, mahse,a harhchhuak har tawhlo ang. Hlauhthawn awm em em chu a nilo aw. Hahdam rih sela, a ṭha leh vat mai turah ka ngai" a rawn tih takah cbuan anni pafaho chu an lo thaw sawng sawng thei. Amy takngial pawh kha kilkhatah dingin alo khi ve sak a. A lawm hle a ni tih pawha hriat viau awm e. Pa berin lawmthu alo hrilh luam hnuah amah doctor bawk chu rawn ṭawng chhuak leh in,

"Nakinah amah rawn vil tur hian nurse pakhat ka rawn tir dawn ania. Hlauthawng suh u. Taksa chaklo thawmhnaw a nih ve bawk kha" ti leh in a chhuahsan fel ta a ni.

Doctor thusawi dan chu lawmawm in thawventhlak haui tawh mahse, Zorinpuii erawh hlauhthawnna leh nuam lo tihna hlir hian a khat tlat thung a. A pa bula a ṭawng duhdan te avang khan a inchhir takzet bawk. A bikin, amah hi an fa hrin a nihloh thu thleng mai a a han auchhuahpui piap mai kha chu a inchhir leh hnuhnawh takmeuh. A nihna hi amah chuan inhre ru khiau tawh mahsela, a chhungte hriattur ah erawh vawikhatmah ala sawichhuak ngai lo a, a zawt chhunzawm bawk heklo. Khatianga a rawn sawichhuah tak phawng maiah chuan a nu kha a nghawng na hle tih a hriat mai a, a taksa chaklo sa tawh khan tuar zo lo in hetiang thil hi a lo thlen phah ta a ni ngei ang.

Khum chunga mu zawi reng, a nu chu kal pawh kal hlat san phallo hian a vil deuh chawt reng mai a. A nu hmel chu a thlir pah ngawih ngawih reng hi a ni ber e. Zanriah kil hunah pawh phur lemlo taka chaw chu ei ve in, a pa thung kha chu ala ngawi reng mai a, Maliani erawh ṭawng leh zeuh ṭhin mahse, a tute mah cbuan han chhan tinah pawh an tin hran lo ni hmiang, an ngawi dun reng ringawt. Chaw pawh chu, tlemte taktak eiin inchungah a chho lehnghal a, a nu a kiangah a han ṭhu leh chat. Hetih chhung zawng pawh hian Amy kha chuan nu ber chu lo la tlansan ve lo in, a vil deuh chawt bawk a. A ruk tak chuan nuamlo a tiin, a inthiamlo em em, a chhan pawh, khati khawp khan Zorinpuii hian amah ah beiseina a nei lian ve si a, ani lahin a tihtheih phak bak a nih thu chauh sawitur alo hre ve bawk nen. Zorinpuii lakah hian a inthiamlo takmeuh a ni. Mahse, amah Zorinpuii thung hi chuan han huat zui phah nan leh biak duhloh zui nan erawh a hmang hauhlo thung a, lawmawm pawh ati viau.

"Amy, hei, Amy" zawite in a bul a la ṭhu ve reng Zorinpuii khan rawn ko sar sar in, ani chu a harh deuh zawk. Chutah, rum zet a rawn melh pah hian

"I muthlu emni? Thlarau te chu an muhil ve ngai emni?" a rawn ti leh hluk tawh. Amy tihngaihna hrelo lutuk pawh chuan khik deuh sak pah hian

"Muthlu love, thil engemaw kalo ngaihtuah ding deuh alawm mawle. Eng thil nge ni ta?" ti zawm ve zatin, a nihna takah chuan a awmdan kha amah pawj hian a hrilhfiah thiam chiah biklo. Muhil chu inti phal chiah lo mahse, khatihlai tak kha chuan awm ve lo ang mai hi niin a inhre tlat a, a thim mup bawk a nih kha. Mak a tiin, a ngaih lah a ṭha bawk heklo. Mahse, Zorinpuii bawkin zawi ser sawr tak a

"Ka nu hi, a kutṭang a rawn che ania" a rawn tih leh takah chuan lo meng zau kawkin a hlim ta phian.

"A nimaw, chuti chu a harhchhuak har tawh hauhlo ang. Ava han lawmawm tak em Zorin"tih leh Zorini kuah chu a rual ta mai a. Zorini pawh alo phu ve zawk mai. Nia, hei leh chen hi lo awmdun tawhin, an taksa te chu han intawk zeuh zeuh ṭhin mahsela, insi riala inkuah ang em hi chu an la nei ngai lo ve tlat. Tih vak ngaihna awm heklo, Zorini pawhin lungchim taka lo kuah let ve mai loh chu.

An inkuahna ata an inthlah fel chiah tihin room kawngka chu an rawn kik ta karh karh mai a. An hawi rual zawk. Lut tur a an sawm zawh rual chiah hian nursw pakhat lo lut ve nghalin, a rawn nui pah var var bawk a. Zorini te pawh chuan doctor sawi nurse kha a ni tih lo hrethiam ve nghalin an lo dawngsawng ṭha hle.

Pi Rinfeli Bp te chu check leh zung zungin a zawh fel hnuah Zorinpuii lam haw chuan a rawn nui var var.

"Va chaw hahdam tawh rawh. A rawn harhchhuak ṭepin ka ring. Ngaihṭha tak khan lo awm la" a rawn tih takah chuan Zorinpuii pawh dam famkim chiahlo mahse, a nu te room chhuahsan chuan a room lam pan in a kal ve ta nghal a. Eng thildang mah ngaihtuah hah lova muthilh ve chu a duhin a tum bawk a, a tawpah zawng a muhil thei ta nge nge e. Mutmu a tuah ṭhat tawk lohna kha a rei ve tawh bawk a, chu zan zet zawng, a mutui teh asin. 

Khawvar rual deuhthaw a Amy in a rawn koh tak chulah chuan thawhphan pawh awmlo hian a ṭhu chhuak zawk mai a, Amy'n nui hmel pu sâng hian alo en reng mai tih a han hmuh cjuan a ngaihna a hrelo angreng hle. Chutah,

"Eng thil nge a? Min tiphu nasa lutuk alawm" ti deuh bal balin khum aṭang a chhukthla ṭiah ṭiah a. Tui intur in filter awmna lam a pan dawn tihin Amy bawk khan

"I nu alo harh tawh a, a ṭha tawh lutuk. Chuan, Maliani bulah nangmah ko tur che in a tir mek a, ka rawn thlen khalh anih hi" a rawn ti chu, hawi let thuakin, tui pawh in ta lo chuan a tlanchhuak vut. Corridor a kal lai hian Maliani nen chuan intawkin thil awmzia alo hrilh ve zung zung a, mahse, a chhang let peihlo. Kaltlang hmakin a alo biakna te pawh chu hria ang pawhin a awm duh miahlo nia! 

Chau tih hriat taka lo mu bem mai a nu hmel a han hmuh chuan inti thawveng lui leh hram in a mittui te chu a nu hmuhloh ah a han hru zauh bawk a. A pan phei vat. Tin, hetihlai vek hian a pa pawh kha lo awm ve in, a huphurh lawk hle nghe nghe. A pa chuan ṭhutna turte lo kian leh sawk sawkin, a nu kiangah chuan ṭhuthmun a han rem zui ve ta a. A nu pawhin zawimuang hian a rawn ban ve de de mai. Chu chu a hmuhin a kut chu alo chelhsak thuai a, a lung a chhe lehpek tlat.

"Nu, dam thuai thuai rawh aw, ei chak te i nei em? I ril a ṭam em?" a tih zung zung hnuah a nu chuan zawite hian

"Maliani khan min lo zawt tawh a, eitur a siam mek ang. Ka ṭha aw. Ihmaw, Bawihte, hei, i pa nen hian kan lo sawi mek a, i chungchang hi"

Chawl detin an pa chu ava melh leh zawk a, zorini thung chu Maliani hming a hriat leh vang pakhat khan alo inhumruh ṭeuh tawh mai. A nu bawk chuan zaidam tak hian

"Ka fanu, nimin lama i thusawi pakhat kha ila hre ve reng anga, ih e, nang hi, ni e, kan fa hrin leh ka chhulchhuak chu ni hauhlo mahla, i pa nen hian hmangaihna tawp lovin kan hmangaih thung che tih lo hria la, chu chu ka duh ber a ni. Khawi hmunah pawh kalin, zawng kual chhin mahla maw, keini i nu leh pa te tluk hi chu i hmu lovang tih kan sawi lawk ngam. Hetiang chungchang i lo hriat ruk tawh vang hi a ni ang maw, ṭhalo taktak a hun ilo hman chhoh tak ni. Bawihi, khawngaih takin keini hi min kalsan lul suh aw. I tello hi chuan engmah lo mai kan ni tih hi hria la kan duh khawp mai. Ka thisen leh chhualchhuak ngei fa pawh nei ila, nang ang hi chuan kan hmangaih theih kher ka ring lo. Tin, mi sawidan leh thusawi tih vel mai mai ah buailo la, chhui chiang hmasa phawt ṭhin ang che aw" rawn ti dap dapin a pa pawh chu alo bu ve nghut nghut mai. Zorinpuii mittui pawh a tling leh piau tawh.

Chutah, pa zawk pawh khan dam dap hian

"Ni e, nang hi engtikawng mahin kan fanu i nihna a bo ngai dawn lova, khawiahmah min kalbosan emaw, min phatsan hi kan remti ngai dawn bawk heklo. Chhungkua kan nihna angin inhauh te, han inhnial rap rap chang te pawh a awm ang, a awm tur a ni. Chutih hunah pawh chuan khatiang ṭawngkam leh ngaihdan kha chu rawn thehchhuak ve tawhlo la  ka duh ngawt mai. Chulo ah, nang hi kan fa lak i ni tih te hi khawi aṭang nge maw ilo inhriat theih ka ti. Mi te hi an ṭawng duh ṭhin lutuk a" a rawn tih leh chuan Zorinpuii pawhin Amy va melh zawk pah hian nui sak chungin

"Ka ṭhian pakhat hnen aṭangin" alo ti ve mai a. A nu leh pa pawh in en pahin an khi suk ringawt. Pa zawk bawk chuan la nuih vur vur pah hian

"Ka ṭhiante hi i ti zo vek a, ṭhiante hi kawm tam lutuk suh u" a tih chuan Zorinpuii' n a nu leh pa te chu a han kuah zui leh thlawp phawt a, mittui luang zaih zaih chunga anni chu a phatsan dawn loh thu leh a hmangaih em em thu chu hrilh lehin an biangah a fawp tawn leh te te. Tichuan, dawr lama kal turin a insiam a, in chu a chhuahsan fel ta ani.

"Zorin, Rspi ṭhiante ho pawh kha Police in an khawm kim vek tawh a, tunah thu zawhfiah turin station ah an kawl mek anih chu" dawr a chhuahsan leh hnuin, kawng lakah Amy nen an intawk hlawl mai a, chu thu pawh alo hrilh hre ve nghal zung zung bawk a ni. Lawm avangin Zorini chu alo deuh sak mai. Chubakah, an innghahna ber police ho in chutia tlin tak mai a hna an thawk tih a han hriat chuan lawmloh chi rual pawh hi a ni awm love.

Zorinpuii room an thlen hnuah Amy bawk khan

"Zorin, nangnen hian kolasib lam kan pan a ṭul dawn niin ka hria"  Zorini chu rawn hawichhuak vutin, a ngaihna hi a hrelo ṭhin teh e.

"Ehe! eng thil nge kan tih dawn a, chutah chuan" alo ti let hû ta mai a. Mahse, Amy erawh chuan zaidam leh khunkhan zawk hian

"Maliani chungchang hi hriatfiah kan ngai alawm. Ni lawm ni?" Zorinpuii thin chu a phu leh ta dup dup mai.

Aw vawt raih mai a rawn ṭawngchhuak ve thungin

"Amy, i sawi zawng zawng te kha ka ring lo a, ka awihlo e tihna nilo se, tun dinhmunah chuan ka nu hi ala ṭha vak lo bawk nen, thu dengkhawng tak han hrilh leh tur pawhin amah hi ala inpeih chiahlo chu kati deuh a ni"  Amy chu alo thaw leh hak mai.

"Ka hria e Zorin, ka hrethiam lutuk. Mahse, nangmah hian han finfiah hmasa phawt mai la, i nu erawh chu a taksa damṭhat hunah ila hrilhfiah mai dawn a"

"Engvanga hmanhmawh em em nge maw i nih le. Thil hriat chakawm leh nuam zawk zawk lah a ni mang bawk silo" Zorini chuan lo ti leh nghutin Amy thung chu alo inthing deuh nawk nawk. A mitmeng te chu rawn fiahlo ṭanin, a vai ta ruai mai a. A lu lah chu namen lo a na zui lehnghal in, a awmdan teh hrep chu amah pawhin a hrethiam ta lo takzet. Zorinpuii pawh chuan a hrethiam biklo hle ang le. Alo en tlawk tlawk ringawt mai. Chutah, Amy chuan aw khur hlawk hlawk chung hian

"A.....aaa a chhan chu, kei hi" tih bak chu sawi thei lo in, a lu na lutuk vang chuan eng thildang mah a sawi chhunzawm thei ta lo. A lu dawm chung chuan a ṭhen zui ta tlawk tlawk a. Zorinpuii tihngaihna hretawh lo pawh chu lo thochhuak ve vatin a ding khawng zui reng ringawt a, chutah, hlauthawng aw zawi sup hian

"Amy, engtin chiah nge i awm a. I ṭha meuh em?"  hlauthawng tih hriat tak hian Amy chu a melh ngawt ngawt ringawt. Mahse, vanneihthlak takin minute reilote hnuah Amy chu rawn pangngai chho leh maiin, mitmeng phelh phung chung hian Zorinpuii chu a rawn en ta kar mai.

"Zorin, kei hian hun ka ngah tawhlo a ni. Chuvang chuan, ka ṭanpui theih lai che hian i rilru siamfel vat rawh" tih pahin khumah chuan a rawn ṭhu zawi deuh hnawk a. Chutihlaiin, Zorinpuii thinphu erawh chu a reh fel hleithei der lo thung a, tin, ngaihdan han siam fel mai ngaihna lah a hre bawk heklo. Amy awmdan teh thut nen khan a ngaihtuahna a buai zoin a chi ai vek tawh a, a thaw dep dep ringawt.

"Zorin, kei hian hun tam ka nei tawhlo!" rawn ti chuai leh raih  ri ah chuan harhchhuak hlawl hian a hawi chhuak ta vut. Amy chu a melh zui leh ngawt ngawt bawk a.

"Awle, awle Amy, i duh angin kolasib ah chuan kan kal ngei ang. Mahse, eng ber nge kan tihtur hi min hrilh rawh. Ka pa ṭhianpa kha tunge anih ka hrengai lova, Maliani awmpuitute, a pi leh pu lah ka hrengai bawk heklo" a rawn ti zui sawk sawk. Mahse, Amy zawk chuan hahdam taka rawn chhanglet ve thuaiin

"Thlarau ka ni tih hi theihnghilh lo la, chuan, ka bula i awm lai reng reng in engkim awmna zawn chawp vak i mamawh ngailo tih hrereng rawh. A rang thei ang berin kan kal anga engkim hi kan fiah vek bawk ang"

"Thudang daih Amy. Nang hian ka nu saw i tidam leh tiraw? I awmdan dikloh zia aṭang hian ka hai miahlo ania"a rawn ti leh daih mai chuan Amy mitmeng a ti buai hman hial. Mahse, nui sen sen pah hian

"Chung Pathian hnenah damna ka dil sak mai a nih kha. Ka inrawlh ve lo hrim hrim. Ka tello"

Zorinpuii thung chuan a awih lemlo hle. Mahse, chhang let tawhlo in a tho nulh a , room chhuahsan pah hian

"Ka zinbo hma in ka nu ka va tlawh leh phawt ange. Ka ngai dawn riau" a rawn ti leh sup. Amy pawhin a lu chu lo buk zauh pah hian a hnung a rawn zui veleh zat a.

Tunah chuan Zorini nu pawh kalsan ngam a ni ve tawh ngei anga, Pathian zarah a ṭha chho ve zel a, nurse pawh khan a vil reng bawk nen. Tin, chaw leh thildangte pawh ei ve thei tawhin a ziaawm chho hle tawh a, Zorinpuii te pafa tan pawh ngaih han tihṭhatloh viau na tur kha a awm tawh tlat lo. Zorinpuii tan tak hian, thawk huaina tham chu a ni awm e.

"Pathian zara kan dam anih chuan naktukah zin chhuahna tur ka nei a, Malian, dawr saw chu ilo enkawl hman lo anih pawhin ka nau te an awm tho bawk a, ka nu hi lo enkawl ṭha zawk turin ka duh che"

Zanriah an kil laia Zorinpuii'n a rawn tih chuan pa ber alo hawi phawk leh angreng. Hetihlai hian Pi Rinfeli thung kha chu zanriah kil tur pawhin a rawn tho chhuak ve lo thung a ni. Pa ber chuan phawk fe hian

"Chu,khawilamah nge i inkahchhuah dawn a. Eng chungchangah nge ni. Hei, i awmloh lehzel chuan in lamah an lo va buai dawn ve aw, keilah ka hna ngah lai tak mai a ni si a" rawn ti ve zung zungin Zorinpuii thung chu alo ner sak. Hetia Maliani an lakluh hnu aṭang hian a pa mizia leh thusawi duhdan, biak dan hawi te pawh hi danglam ta vekin Zorinpuii hian a hria a, mak pawh a ti em em hran tawhlo nain, a rilru erawh chu a na ve det. Hmm, lo ngawi tak rawh se, anni pahnih hi pafa ngei anni tjh chu fiahin ala awm dawn khawp alawm. Chutih hunah a chungah pawh a pa hi a inluling vak thei tawhlo ang chu. Ve mai mai a.

"Zorinpui, ka zawhna che kha min chhang dawn nange a!?" a chaw eikham, kut a silfai laiin a pa bawk khan a rawn ti hriam leh hrâk. Hawi let zawkin anni pahnih dawhkan kil a lo la ṭhu te hmel chu a han en thuak a. A ngei tur tawk lek hian Maliani lah khan alo la melh kiau zui a. Chutah, ṭhen deun sak pah hian

"E, kalo la chhang lo che nimaw. Aaa ka ṭhiannu in thingtlang khaw lamah pasal a nei dawn a, biakin hawng ngat te anni ve a, a hlu ve bawk nen min sawm nasa bawk a, ka lan ve loh chuan" ti leh zung zung a inchung lam pan mai a tum chu, a pa bawk khan

"Tu i ṭhiannu nge? Khawi veng a khawsa" ava han dilchhut tak em. Chutah, ning tih hriat zet a thaw halh chung leh inher vut chung hian

"Rochhingi, Bethlehem" ati puat a. A chho zui nal nal. Chutiang hmingpu ṭhian a neih chu sawiloh, bethlehem ah pawh pawh ṭhian a neilo hrim hrim tih a han ngaihtuah thung chuan a nuih a za ru hlemai. A pa khan hrechhuak ngat se zawng, a ngei dawn lutuk tlat ni hian a hria a, mahse eng nge a ni pawhin nupui leh a chhungkua bumin dawt hmang vekin a nung ve tho alawm le, tih chu a ngaihdan a ni zui bur.

"Zorin, i hman tawh chuan kal mai ila. Khua a tlai zel ania aw"

Amy khan pawnlam aṭangin a rawn ko lang lang mai. Ani Zorinpuii thung erawh a roomah la awmin a phe kual vut vut . Chutia, Amy rawn au thawm a hriat takah chuan balcony lamah phei zui vutin ring fe mai hian

"Aw, ka nu ka va hmu leh lawk ange" a han ti lung lung mai a, a lo au ta vak kha a inchhir zui lehnghal. Mahse, vanneihthlak takin a au ri chu hretu an awmlo a ni maithei, tumah an rawn dikdak zui lo tlat.

Tichuan, reilote taktak a nu ava hmuh leh hnuin inhnuai lamah a chhukthla ve ta a. Maliani pawh be ta lemlo chuan a pa car chahbi a ban leh zeuh a, a pa car zawk khalh chhuak dawn a ni. Motor kawng te alo ṭha phian bawk a, an tum ram kolasib khawpui ngei mai chu darkar 3 leh tlemte hnuah thleng zuiin, tourist lodge vengthar lamah an in nghat zui ta bawk. Chawhma lama chhuak kha anni bawk a, an thleng hma vei chhap bawk nen, an thlen lai vel tak hian khua pawh la eng uarh in, room an la fel leh te te a, tichuan, inbual harh zui lehin, lodge compound leh a chhehvel enkual chuan intih harh pah tiin an teikual ta vel mai mai. 

"Zorin, zanin la la hian kan kalna tur hmunah khan kal nghal a ṭha dawn. Hun khawhral tam thei pawh kan nih loh hi" pangpar nalh tak tak te chu khawih kual dan dan pahin Amy chuan a rawn ti leh a. Zorinpuii pawh alo bu nghat nghat mai. Amy bawk khan a hma zawn melh ding ngar ngar pah hian

"Ka damṭhat lai han nise aw, mi nung damlai nih leh kha a chakawm ve ṭhin mange. Ka chhelo thei ngawt ang" a rawn ti chhuak phawng mai chu Zorinpuii nuih alo za nangiang. Nuih zui kiah kiah in, Amy pawh chu za fahran lo hian alo kiai ve suk suk.

"Thlarau nilo la chuan hetiang hian thil awmzia i hre zung zung thei nang. Lerh ve reuh lutuk mai" tih pahin  a inhersan leh vut a. Amy thung chu alo mengrum nasa mai.

Zanriah te an kil zawh leh phawt hnuin Amy sawina Venglai lam pan chuan an in khalhchhuak ta par par a.  Venglai an thlen hnu pawhin an kalna tur ber chu zawn chawp pawh ngailo hian Amy khan alo hre leh chat tawh. Assam type lian vaklo leh rawp ve lam tawh hi lo niin, Zorinpuii chuan kawngka a kik zui ta karh karh a. Thawm a reh ṭhat em avang chuan Zorinpuii phei kha chuan an awmlo emaw ti hman in, a beidawng lek lek tawh a, mahse, Amy zawkin a lu chu kawngka chhunglam a va rawlh luh zawk pah hian zawite in

"An rawn hawng dawn e. Kum upa lam tawh annia, hrethiam rawh" a sawi zawh rual deuhthaw hian kawngka inhawng ri rak rak thawm an hre zui mai a, Zorinpuii thin chu alo phu zawih zawih tawh hi a ni ber e.

Chutia, kawngka rawn hawngtu chu pitar zawk niin, a kum pawh a tam thawkhat tawh ang tih chu a hriat theih mai. Aw khur beuh beuh chung hian pitar chuan

"Ekhai! Lo lut tawh. Tun ang hunah eng thil nge ni ta nula" lo ti ve sawk sawkin inchhung a lut tur cuan a hui pah zeuh zeuh bawk.

"Ṭhiana, hei lo kal ve teh. Inleng kan nei dawn ania, nula hmelṭha tak mai alo kal tlat" tiin amah lah chu a nui zui kar kar reuh a. Zorinpuii hmuhdan ah chuan pitar fiamthu duh ve tak leh nuih duh tak a nih pawh a ring thiam nghal. Karlovah, pa zawk pawh chu lo chhuak lehin, ani pawh pa upa ve tawh tak tur chu a ni. Ṭhutthleng seia ṭhut pahin Zorinpuii chu a han hawi kual vel chhin a, rinai takin an inchhung bungrua leh engkim mai te chu alo tharlam em em a, a changtlung ru phian nia. Maliani hian a hnathawh hlawh hi khawl khawm zel mahse, chutianga ṭhahnem tham ala nih dawn loh avangin, a pi leh pute inchhung  ti changtlung tur hi chuan a pa pawh kha alo inrawlh ve animai lo maw? Huiham! A ngaihtuah thui poh leh a buai a ni e.

Chutia, a ngaihtuahna seng paha alo ṭhut ngawih veng veng lai chuan a hmaa ṭhu, pa zawk khan rawn be ve in

"Bawihi, eng ti tur berin maw ilo kal le. Eng thu mah ila sawi chhuak mang bawk silo a, zanin riahna turte i haihchham deuh emni aw. Sawi hreh suh aw"  ti zung zungin an nupa chuan an rawn melh ta reng a. Chutah, Zorinpuii thung chuan a lu lo thing nawk nawk in

"Nilo e ka pu, kei chu thildang vang zawk a lo kal hi ka nia. Ih, nangni hi, Maliani pi leh pu te kha inni ang chu maw?" a tumdan ang pawhin zawhna chu a chhep chiahlo niin a inhria. Chuveleh, anni nupa chu in melh deuh zawkin, nu zawk kha alo ṭawng chhuak ve ta thung.

"Nula, Maliani ṭhiannu ini tihna emni? Kan nau chungah chuan eng thil nge thleng le aw" tiin a ngaihtuah zui hmel ta phian. Mahseṭ Zorinpuii chuan lu thing leh nawk nawk chung bawk hian

"Aih ka pi, ṭhian chu nilo e, tin, a chungah chuan eng thil mah a thleng lo e. Kei hi, ih, aizawla a awmna te chhungkaw fanu kha ka ni a, chu zawk chu" a rawn ti ban leh chuar. Zorinpuii thil han sawi tak avang chu nimaw, anni nupa pawh hahdam ta huai ang hian an lang a. An khap zui fak fak mai. Chhanna an rawn pek hma hian Zorini bawk alo ṭawng chhuak leh

"Hetah hian thil engemaw han zawh fiah duh vang cheu a lo kal mai ka ni bawk a" chuveleh, rang zetin pa zawk khan

"Eng thil nge ni ta!?" tih pah hian a meng zau deuh kawk bawk. Zorinpuii hian sawichhuak hreh ngawih ngawih mahse, hei leh chen hi a kalpui ve tawh a, engmah tilo a han let leh ngawt emaw, zuzi tir mai mai chi a ni tawhlo tih chu a hrechiang. Mahse, a sawi hreh thlawt a ni e. Chutia a sawi ang nge a sawilo ang tih ngaihtuah a alo in khap buai lai chuan a beng bulah hian Amy khan zawi ser sawr takin

"I phone camera kha" a rawn ti ta a. Zorini chu harh deuh zawkin, rang tak hian a phone chu a han phawrh pah leh sawk sawk a, camera chu on zui lehin, a ṭhutna bula a bag dah rinchhan tir chung chuan phone pawh chu a nghat zui ta a, tichuan, a sawitur ang ang te pawh a sawi a hun ta tih a hre bawk.

"Eng lo ania, ka pi, ka pu, in tunu Maliani hi ka pa, Chuauthangpuia fanu a ni tih ka hretawh a, chu chu, nangni pawh hian in hre ngei tih ka hre bawk. Mahse, tunah hian fiahna ka duh avangin leh nakin lawka kan chhungkua kan buai zui loh nan tia rawn kal mai chauh ka ni. Khawngaihin, chanchin engkim, in hriat ang ang te kha min han hrilh ve ta che u. Min puih theih chuan ka lawm ngawt ang. Tin, he thu hi ka nu pawhin hre ve law law se, Maliani pawh hi an fanu ang taka an enzui theihnan ti ka ni bawk a" a rawn tih takah chuan a hmaa ṭhu, nu tar leh pa tar tawh tak te chu an lo meng zau veleh kawk ṭhin a. Chubakah, an thu hriatte chuan a ṭhawngin, an rinloh lam daih thil a nih tih pawh an awmdanah khan  a hriat theih awm e. 

A thusawi te an chhan let tak mailoh ah chuan, Zorinpuii chu rawn hawichhuak ve in, ngenngawl aw tak hian khawngaih bawk chu a rawn dil leh hram. Anni erawh chuan amah chu chiang taka lo la en ve rengin, nuamlo an tih hmel ta hle zawk. Chutah, aw khur hlak hlak hian nu zawk khan

"Mami, chutianga thil nihna diktak i hriat tawh tho te chuan, keini tan han sawi leh vak tur a awm tawh dawn emni? I hriat ang ang kha i nu bulah chuan thlen mai la, ava ṭha zawk awm em"

"Nilo e, ka pi, ka nu bulah chuan Maliani hi ka pa fanu a nih thu hrilh ringawt ila, ka pa in dawt sawi ah min puh emaw, ka nu ngei pawhin min lo ring lo thei tlat a tin ni. Tunah hian an awih ngei theihnan leh a fiahnan in aw hi ka record vek a, chu chu ka nu hnenah ka pe dawn chauh zawk a ni"

Pa zawk khan thaw hak chung hian

"Umm , ṭhiani, thlalak kha va la ta che. He nula te hi a tum a ruh reuh em mai, engkim chu hrefiah law law sela, an chhungkaw tan pawh a ṭha zawk tak ang" a rawn tih ve tak sup ah chuan Zorinpuii pawh lawm avangin alo thaw ve hawk thei.

Reiloteah nu zawk chuan thlalak pakhat hi rawn keng chhuak vâ vâ in, Zorini kutah chuan a rawn hmehbel ta chawt a.

"Thlalak a mi kha i pa leh kan fanu, Maliani nu te annih kha. Kha kha an nulat tlangval lai niin, a rei ve ta khawp mai"

Zorinpuii'n thlalak a han en chuan, an sawi ang ngeiin a mipa zawk chu a pa, Chuauthangpuia alo ni reng tih a la hre thei. Tin, an fanu, Maliani nu antih pawh chu en chet chet chuan Maliani nen tak pawh an in ang reuh hle in a hre bawk. Putar bawk kha rawn ṭawngchhuak veleh in

"I pa hi a tlangval lai chuan hetah kolasib ah hian a rawn awm ṭhin a, hna a nei bawk a, kum engemawzat kha chu a cheng ve ta awm e. Tichuan , Maliani nu nen hian lo in hmel duh chho in , an inngaizawng ta fe reng a, mahse, kum 1 awrh an inzui hman ang tih ah khan i pa chu a post sawn sak niin, aizawl lamah an transfer ta daih mai a, kan fanu hian a ngai thei khawp lehnghal. Sawrkar zem zen tihtakah, hun a ngah loin, a rawn zin fo thei bawk heklo. Khatianga kan fa neihchhun lungleng khawhar lutuk a awm ṭhin kha kan lainatin kan khawngaih thei em a, a remchan veleha lo zin thla tur pawhin kan chah ta ringawt a nih kha. Tichuan, a hun neih hmasak ber, a kalbo aṭanga kum 1 liam hnuah chuan rawn zin veleh in, an pahniha an han inhmu leh zet kha chu, an hlim em em a, lawm avangin kan fanu phei kha chu a ṭap thei hial. Tichuan, kan bulah cheng in thla 1 dawn chu min rawn awmchilh hial a, a ngaih luatah kan fanu lah khan a hna lam reng alo ngaihtuahpui tawh heklo, keini lahin nachang kan hrebik heklo. Thla 1 chhung chu kan lo mikhual ve ta ngawt mai a nih kha.

Thla 1 hnuah hreh taka inṭhen leh in min haw san ve ta a, a haw aṭanga thla liam awrh tihtur ah hian kan fanu chuan a ruah loh thu min hrilh zui ta tlat mai. Kan hriat hlim a kan buai zia tak kha aw. Chanchin han inhrilh zung zung na turin khatihlai khan mobile phone te ala awm ve mang silo a, amah biakpawh theihna tur chu kan dap ta ruai mai. Chutihlaiin, kan fanu lah khan kalchilh tawp mai chu a duhthu alo sawi ve chhen a, mahse, a mualphothlak tiin chu erawh, kan remtihsak ta lo thung. Tichuan, vanneihthlak takin helai a awm laia a ṭhian kawm ve ber ṭhin hnen aṭang a biakpawh theihna tur office landline number chu kan hre ta hlauh mai a. Mahse, kan biak kha kan tihsual lian kan ti dawn nge, i pa chuan nupui a neih daih tawh thu min lo hrilh ta a nih kha! Kan fanu in chanchin a hriat tirh chuan e, a na em em a, a tliak hnawp hi a ni ber e. Tichuan, rilru na leh zak bawk siin nau chu a pai tlang ta ṭhak a, a hrin hunah pawh damdawiin pan duhlo in hetah, nau chhar thiam nen inah kan chhar sak ta ngawt mai a ni.

Hun leh kum te a han ral a, i pa pawh a thawm a reh zui ta vang vang. Fanu a neih thu kha chu hre ve tawh mahsela, a tan rawn kal fo kha thil tihchi  ni tawh heklo, keini pawhin kan dem ta lutuk lo e. Amaerawhchu, a fanu tan tiin a khat tawk hian naute mamawh leh eng ilo hi chu a rawn thawn ve fo ṭhin. Tichuan, Maliani'n kum 10 hmel a rawn hmuh ṭum khan kan fanu chu natna chi hrang hrangin tlakbuak chho in, reiloah kan chân ta reng a. Khami ṭum khan i pa pawh a rawn in lan ve nghe nghe. Tin, Maliani vang liau liau hian sum ṭhahnem tak pawh min pe anih kha. Tichuan, reh zui leh vang vangin, Maliani kum 15 naah chiah a rawn inlan leh a, tah pawh chuan pawisa a pe leh nual bawk. A bak zawng chu, a ngai chiah niin, a reh leh vang vang ṭhin a, Maliani mum 20 chamah khan amah rawn inlan lo mahse, sum tam tham tak hi a rawn thawn leh thung. A bak zawng chu, tihian, tunah Maliani hi kum 25 mi ni ve tawhin, a hruai haw duhthu min hrilh a, mahse, kan lo remti mai biklo. Kha leh chen kan lo enkawl tawh bakah, kan neihchhun ngawih ngawih anih tawh bawk avangin kan phal ngawt thei biklo, mahse le, kan harsa em a i hmuh ang hian, a pa ni bawk, ṭha taka lo enkawl thei tur ni bawk hnenah chuan awm se, keini kianga a awm ngawt reng ai zawngin a changkan phah dawn tih pawh kan hria. Mahse, a tir aṭanga engkim thupbo tawh a nih avangin i pa tan pawh khan a fanu anga rawn hruai luh ngawt kha chu chhungkua in buai nuaih thei tih kan hria a, la thup rih zawk mai turin kan lo ti ta a ni. Tin, kha kha i pa duhdan zawk tak pawh niin kan hre bawk. Thil engkim hi a pawi zo ta vek anih hi maw" tiin a thaw zui leh halh. Zorinpuii thung chu mittui tling pam chung hian alo ṭhu ngawi kar reng a, han sawi ve mai tur lah a hre bawk heklo. A kha chu a chih zo ta a ni ber e.

[24/10, 1:21 am] Peki: DEAR AMY (3)LAST

Kum kha leh chen, amah hringtu ang taktak a alo en tawh leh ngaih hial tawhin hetiang taka thuruk liantham alo thup bo thei mai hi mak a ti thar lehin a rilru pawh a na thar leh takzet. Amah hi chu sawiloh, kha leh chen kha a nu pawh alo bum tawh a ni awm si a, a lai a na in, a nu ngei pawh chu a khawngaih hluah hluah a, eng thilmah hi a hre ve lo taktak a nih ngai chuan, a pa ngei mai hi mipa tenawm ber leh bumtu diktak chu anih ngei dwn hi. An chhungkaw chunga thilthleng engkim mai hi rapthlak a tiin, zahthlak pawh a ti hle a, a pa takngial pawh chu a ten hluah hluah hi a ni ta mai e.

Insehruh pah ṭeuh a ding hluai chung hian a phone chu a la leh te te a, chutah, 

"Ka pi, ka ngenna min tihhlawhtlinsak duh avangin ka lawm e aw. Malsawmna tamtak in hmuak cheu se, reitak dam turin duhsakna ka hlan bawk che u" ti zung zungin a chhuak ta nghal a. Rang taka motor chhunga luh leh pah chuan steering vuan in, a hmer zui ta ngat ngat mai. A khawvel hmandan zawng zawng te a han ngaihtuah chian chuan vanduai bik ta riau ni a inhre thar lehin, a ṭah a chhuak ut ut. A hmasa ber atan, bum a tawk phawt a, phiarruk niin a ṭhianṭha ten an phatsan bawk. A hnu lehzelah pawh mi ṭha lo dang tawng chhunzawm leh in, ṭum hnih ngawt mai khawihchhiat tum a beihna a tawk a, mahse, Amy alo awm ve ṭhin vang chauhin a harsatna tamtak erawh sutkian sakin a awm thung. Kum tamtak chhung amah enkawl a chawilian tute chu a nu leh pa diktak anni lo tih hrechhuak leh in, a kehchhe vek tawh bawk a, mahse, a tuardam thei dawn chiah tih ah tihian thu dengkhawng takin lo hmuah zawm lehin a na thar leh chu a ni der mai. A hringnun khawvel hi a hring hlawllo te pawh kan ti thei ang chu. Amy hi awmlo ngat se zawng, khawvelah hian hmuhtur a awm tawh  kher pawhin a inring lo hial. He thlarau vakvai pakhat hian chakna thar leh huaisenna pe in, a hma lam kawng thui takte pawh zawh thei turin chakna leh tumruhna a pe awl lova, tin, a tihlim em em bawk. Hei vang chauh a dam hi la thlahlel ve niin a in hre ber tawh a, amah Amy pawh hi a duhsakin a hmangaih ngawih ngawih tawh ni hian a inhria. Ni e, min duhsak a, min hmangaihtu na na na chu mi pangngai chuan ṭhatna bawk a rulh let ve hi kan duh ṭhin reng a ni.

"Zorin, tho tawh teh. Khu, tukṭhuan ei turin an kalkhawm sup sup tawh ania. A tlai tawh"  a mutui lai chu Amy bawk khan rawn kaiharh lehin, peihlo zet hian a tho ve ṭiah ṭiah a. A hmai te phihfai leh te te in, dinning hall ah a chhukthla ve nghal. Amy pawh khan alo zui veleh zel bawk.

Dinning Hall an han thleng thla chu thu mak tak sawi hian an lo ri leh mar mar ṭhin a, an hawi hrek hrek bawk nimai in Zorini chuan alo hre nghe nghe. Eng thil tak chu thleng ang maw ti a, chaw a han bar tur chiah chuan a hnung lawk a ṭhu te titi chu a hre pha ta. Mipa zawk chuan

"A mak ngawt mai tiraw. Zan thum chuang kan riak ve tawh a, nizan ang thilthleng kja chu ka vawikhat hriatna leh tawnna liau liau a ni" a ti sur sur mai. Reivakloah a bul mai a ṭhu hmeichhia pawh chuan rawn tuihnih ve in

"Chu chiah, keichu zanin pawh hi riah tawhloh mai ka duh. He lodge hi a hrang deuh anih ka ring ta tlat mai. Hawh, insawnchhuak daih ila" alo ti let ve ta mai. An thusawi dan kalhmang avang chuan Zorinpuii chu a bo telh telh tawh a, nizan a thilthleng antih te pawh chu pakhatmah hriat pawh a nei ve heklo. A mu tui awm hle niin a hria a, a ngaih a ṭhalo rum rum zawk. Tichuan, a bula ding ve reng Amy chu han mitmei zauh in a ni lah chuan mitko hi alo san khum ak ringawt a, he nu te hi a zawhfiah ngei a ṭul dawn a ni. A hre ngei ang le, eng nge thleng tih chu.

"Amy, nizanah chuan lodge chhungah hian eng thil nge thleng a, i hriat ngei ka ring tlat"  room chhunga an luh tawh hnuin a zawt ta chiah. Mahse, Amy chuan a zawhna te pawh chu lo ngaihsak awmlo deuh hian a awm vel mai mai a, a hrelo der ve hmak mai. Chung te tak chuan Zorini rinhlelhna ti zualin, he nu ngei hi buaina siamtu chu a ni ang tih pawh a rin phah zo vek tawh. Amy che buai kual vel lutuk chu ṭhut pah a thlir reng cbung hian a rawn chhanlet hun tur alo nghak ngat ngat. Chutah, ko leh ṭhatin, Amy erawh alo phu zawk a. Zahzelah tukverh parda hlai pui mai te chu a khâp kual vel ta mai mai a, ava han che lai kual tak em aw. Zorinpuii bawk chuan chang fak a a zawhna ngai tho zawh leh pah hian

"Nangmah hi ini hial lo maw. Tinge khatia i awm kual chiam chiam a" ati zui nghut bawk. Amy khawsak dan naupangchhia lutuk avang chuan a ruk takin a nuih za hle mahse, a insum hram hram zawk a ni ber. A tum lui bur bawk. Chutah, Amy chuan fiah mang lo leh a hmel pawh rawn en lemlo chuan

"Aaaa,,,, ihhhh, officer pakhatin hmeichhe tleirawl pakhat mutpui alo tum lai hi ka zu phawk pek a, diktak chuan, i muhil hma sia, ka khua a har em a, ka vak kual ta vel zawk mawle. Ihh, kha kha, tumloh deuhin ka hmu a ni ber e"

"Chuan engtin? Pawngsual a tum tihna emni?"

Amy chuan a lu lo thing leh nawk nawkin

"Tumlo e, an pahnih khan an ruih hmel em em a, a bikin hmeichhia kha a ruih hmel zual. Chet pawh a che ṭha ve theilo reng reng. A meng thei der lo bawk a, a mipa khawih ang ang khan a awm tawp mai a ni"

"Chu, a duh vang reng a room a tawmpui ve tho a ni a, eng nge chutah chuan ilo buai ve vak"  zorinpuii chuan rawn ti leh khur khurin, Amy hmel thung chu alo pha dai mai.

"Ka ten alawm. Tikhan, patling sen zet tawhin a fanu ang rual vel tur hrai ruiin, a zahawmna tihchhiatsak a han tum ania, ka ten lutuk. Kan ram tenawm leh bawlhhlawh sawtzia hi e Zorin. Ka rilru hi alo na ve ngawih ngawih ṭhin asin. Chuvangin, zankhua in ka tibuai ta anih kha" Zorinpuii chu a nui chhuak lo chauj tawh a. Mahse, la insum hram hram chung leh ram hmak in

"Anih, engtin chiah nge i zuk tihbuai a. Dinning hall ah khan an va sawi duh em em"

Amy chuan lo ṭhen sak pah hian

"Thlahrang ho tih ang hian, rawl te ka chhuah vak a, light ka on-off sak a, an khum te pawh sawi che in, ka nuih khum vak vak bawk a, min hmuthei ve bawk silo nen, an hlau teh asin aw. Room danga awm ho kha chuan ka nui thawm vel an hria a, chubakah, khamite pahnih hlau lutuk kha room aṭang a tlanchhuak in an au chiam chiam bawk a, chuvang anih kha mi tam zawkin an hriat darh tak vak" ti chung hian nuam tih hmel takin a nui har har mai. Zorinpuii insumthei tawhlo pawh a rawn nui chhuak ve ta hawk hawk mai.  Chutianga Amy a han che vel tur chu hmuh alo chak ve zawk takzet mai.

Thlen man zawng zawngte tifelin, chhun pachang ah kolasib chu an chhuahsan leh ta a. Tlai thim thet thet rual hian Aizawl cbu lut leh in, mahni in an thlen rual rual hian Zorinpuii chu a lut tau nghal sawk sawk a, Maliani khan lo chiau au ve bawk mahse, a chhang let peihlo thung. Inchhungah chho tlang in, a nu te roomah a lut hmasa leh phawt a. Mahse, a nu erawh a muthilh chiah thu nurse khan lo hrilh in, ani pawh a chhuak veleh mai.

"Zorin, Maliani kha i be ṭha duhlo ve ringawt a, tihsual engmah a nei ve lo asin. Engkim bulṭanna chu i pa vek hi a ni tih hre ta che" Amy bawkin alo ti leh sar sar.

"Huiham! Amy, ka hria, ka hre lutuk. Mahse, tunah chuan min nawr lui lo teh, ka thei hrihlo a ni e. Ka chau a, ka na ngut ngut bawk" tih pahin khumah chuan a han let zui thlawp phawt a. A thaw ta hle hle mai. Amy pawhin a dinhmun tur chu hrethiam in, a be lui zui duh ta biklo a, a ngawi ve mai. Zorinpuii hi zawng, a duhlohna ah chuan nawrluih a, tihluih hi a harsa ve thlawt tih pawh a hre ve tawh thawkhat viau. Tin, Zorinpuii bawk hian mihringte nihna hi a phawk chhuak chiang hle in a hre bawk a, engkimah kan tan a ṭha tur zawk pawhnise, a ṭhalo lam kan zawh lui ngar ngar a, kan tuang tichhah in kan pawngpaw luhlul ve hlur ringawt. A tawpah erawh, inchhirin thilṭha ni a kan hriatte chu kan han bawhzui veleh bawk a, khua kan lo tlai duai tawh ṭhin si. Chutiang chiah chu he Zorinpuii pawh hi niin a hre nghe nghe. Chuvangin, tun mai a lo nawr chiam leh zilhhauna lo pek vel kha a awmzia tehchiam dawn lo tih pawh a hria e. Ngawih phawt mai hi a finthlak e tiin a chhuahsan ta rih zawk a.

Chumi zan vek chuan vanneihthlak takin a nu pawh a rawn tho chhuak peih ve ta khiah. Zorinpuii chu alo lawm fal ngei mai. A nu bulah chuan tap zui chawtin, a thlah phal meuh lo chu a ni e. Tin, a nu hmel a hmuh rual khan lungchhiatna leh amah khawngaihna in a khat nghal a, thuruk leh buaina liantham la inthup mek ni a a hriatte hi engtinnge a nu bulah hian a han hrilhfiah tak anga, engtikah nge tih ringawt chu a rilru ah riak reng in, a thinlung tak pawhin a nui thei tawh meuhlo. A nu in a hriat ve hun tur hi a huphurh sa ngawih ngawih a , a hrilh hre lo thei dawn bawk silo. Tunah hrilh lo mahse, reiloteah chuan a pa hian thup sen theih loh hun emaw ala nei ngei anga, tunah pawh tihian a mizia a danglam ṭan tawh a ni a, an la buai dawn tho tho tih chu a hre sa vek. A rilru thawpik leh hah tawh zia hi thu hmang mai a han hrilhfiah thiam chi pawh a ni awmlo e a.

Hun ral leh hretin, Kolasib aṭanga an haw na pawh chawlhkar khat vel chu a liam leh tawh awm e. Hetihlai hian a nu pawh kha ṭha chho ve zelin, tunah chuan nurse awmpui pawh a mamawh tawhlo a, in leh a velah te chuan duhtawkin a teikual ve leh thei tawh. Tunah chuan, ṭawngṭai dam thei Pi Khuangchhingi a mamawh tawhlo a, Pathian ah chauh damna famkim leh nunna hi a awm tih hrefiah ve tawh in, a nun pawh a hma zawng ai khan a hlim tawh zawk bawk. Nunthar nen hmalam a pan ve thei dawn ta a ni. Ava han lawmawm tak em! 

Zan khat chu, zanriah an eikham hnu deuh ah hian a rooma a awmlaiin a pa bawk khan rawn ko leh tuarhin Zorinpuii chu a thin a phu nasa ngei. Mahse, a awmdan chu insiamṭha leh thuaiin, a phone sik neuh neuh pah leh ngai pawimawh lo awm fahran hian a han chhukthla zui ve a. Inhnuai a thleng thla chu a chhungte  chuan an lo melh ṭhap. Chutah, fiah kek kawk leh zam loh hmel tak a a pa va melh chung hian

"Eng nge?" a han ti bul deuh hmuk a. A pa chu alo mengrum nasa teh e. Chutah le, chang fek fawk leh hriam zet mai hian a pa thung chuan

"Tun aṭang chuan hre rawh. He inchhungah hian ila khawsa ve duh ngai anih chuan, he in leh a vel a tihtur awm zawng zawng te hi mahni thu a tih ve nachang hretawh la, awmpuite tih ringawt ah dah tawh suh ang che. Chaw eikham rualin i bibo nghal a, zingah lah nise i tho tlai ber ziah bawk. Eng thil chiah hi nge maw i hriat pawh hi ka hrelo" a thinrim em avang chuan a aw te pawh khur hlawk hlawkin a ha chang a ṭhial pah bap bap mai. A sawi zawh rual hian Zorinpuii lah chuan thinrim leh aw khur hlak hlak a ṭawng ve in, phone chu a nu pek tauh sawk pah hian

"Nu, kha hei hi ngaithla chhuak vek rawh. Kolasib lama Maliani pi leh pute ka biakna video tawi anih kha. Keini nufa hi bum a awm char charin, min thlakna tur fa dang ka pa hian alo thukru bo reng alawm le!" ti zat zatin a phone chu a nu kutah a hlan a, ani erawh room lamah ṭap pur chungin a tlanchho leh ta daih. 

A dik alawm, a pa sawite kha thudik lo engmah an awmlo e. Mahse, ti teh ang. Tunhma, awmpui an neih hma zawng kha chuan inchhung khurah a tihtheih ang ang te ti ve in, a nu pawh a theihtawk takmeuh chuan a pui ve ṭhin tehmeuh e. Mahse, a pual a dawr hawng ve kha anih miau avangin in lamah hun awl a ngah biklo a, nula te lo ni ve ta chuan, ngaihzawngte pawh neiin, ṭhian kawmte an lo duh ve a, khanglai hun zawng zawng ah khan a pa hian sawiselna pakhatmah a nei ngailo. Hetia, Maliani an awmpui tak veleh a han thar thawh leh chiam te, amah chu engkim a a han mawhchhe zo ta vek mai hi tawrh harsa a tiin, a hrethiam thei thlawt lo bawk. Fa lak mai a nihna hi a pa hian hre lutuk in, a fa bik an enkawl ve tak chinah chuan alo en hrang ta awm hlemai tih ngaihdan te a neih phah ta hial. He inah hian a awmzui thei tawh dawn lo anih chuan khawiah nge a kal tak ang. Amah hringtu a nu leh pa te lah kha an boral ve ve tawh si a, anih chuan, fahrah inah khan a kir leh mai dawn emni ang? Hetiang ringawt hi chuan a thei tawh biklo, hetiang a inthlei bikna leh in enhranna tih vel hi a tuar thei tawh hlawllo a ni. A hrehawm in a hahthlak em mai. 

Mittui hruk niap niap pah a khum a alo ṭhut reng lai chuan Maliani ngei kha rawn lutin, inthlahrun hmel zet hian a rawn ding zum ta reng a. Zorini thung chuan melh pawh alo melh peih hlawllo.

"U Zorin, ka pa thusawi te kha ngai thutak lo hram rawh aw. Heng ka thiltih zozai te avang hian hrehawm ka ti ngailo a, ka chau bawk heklo. Ih, engkim buaina zawng zawng te hi keimah vang vek anni a, ka tihpalh lutuk. Chhuak tur an awm anih chuan keimah ngei hi ka ni e"

Zorinpuii thung chuan vin ṭhat hian

"Kalsawn teh. Va mu rawh. Tunah chuan khatiang thu vel te kha ka ngaithla peih hrihlo ania. Va mu phawt teh" alo ti duh lek a. Maliani pawhin eng thudang mah sawi tawh lo hian a chhuahsan leh ta ringawt a ni.

Maliani a chhuak fel chiah tihin, a nu alo lut ve thung a. A lo la melh ṭha peih chuanglo. Thawmdim taka a hnunglam a rawn ṭhut thlak ve sat sat pah chuan Pi Rinfeli chuan a aw te a han thian leh kharh kharh phawt. A hmelah chuan hrehawmna leh lungngaihna ang chi,Zorinpuii lo hlauhthawn ang thil reng reng te kha engmah hmuhtur a awmlo lehnghal a, mak zawk tak a ni.

"Ka fanu, ka thusawi tur hi ngun takin lo ngaithla la, min ring turin ka duh bawk che aw" a rawn tih chuan ṭawngka in chhang let lo mahse, Zorinpuii chu alo che hrut thung. A nu pawhin ngai pawimawh duhlo in, a sawitur ang ang te chu a sawi lui ta tho a.

"Ih e ka fanu, tuna i thu rawn hriat ang ang te hi kei chuan ka lo hriatna a rei tawh teh asin!" a sawi zawh hnuin Zorinpuii chu lo kang awkin, a nu hmel chu makti zet hian ava melh ta vang vang phawt a. Eng thu mah phei chu a sawichhuak ta lemlo thung. Chutah, a nu bawk chu rawn ṭawng chhunzawm lehin

"Maliani hi i pa fanu tih ka hriatna a rei tawh a, mahse, engkim hi i lakah kan zep tlat thung. Chumi avang erawh chuan i mi ngaihdamna pawh hi ka dil nghal duh che a ni. Atir aṭang khan engkim hi ka hre vek tawh a, mahse, nang hi kum 3 mi lek i nihlai a adopt che kha kan niin, khatihlai khan Maliani chu kum 1 mi vel chauh ala ni ve awm e. Pathian zarah a nu kha ala dam ve tho a, ala hrisel ṭha bawk nen, i pa in sum leh a mamawh tur hmanga a zu ṭanpui fo tihloh kha chu, nangmah ah hian kan luangliam in, kan duhtawk viau che a ni.Mahse, vanduaithlak taka Maliani nu a boral ta tih kan hriat ṭumah erawh kha chuan, kan enkawl dawn emni aw kan ti ve hman a, amaherawhchu, a pi leh pute khan an lo remti bik hauhlo thung. Chu chu, kieni chuan tilui duhlo in, nang hi kan duhtawk che ka tih tawh kha. A khat tawk a, i pa in a zu tlawh ṭhin leh, pawisa a zu pe ṭhin khan min ti awm nuam tawk em em tho. Tin, heng zozai thil kan han zep nachhan pakhat pawh, i rilru tihnat hi kan hlau em em a, bumin i awm ve tih hi in hrelo bawk la kan duh vang pakhat a ni. Mahse, Maliani kan awmpui hnu reivaklo ah khan a chungchang thudik hi hrilh ngei che kan tum ve alawm, mahse le, vanduaithlak takin i nihna, fa lak i nih thu zawk kha ilo hre veleh tawh bawk si a, thil hi a chingchivet kual ta nuaih mai a, min hrethiam mawlh mawlh rawh aw. Tin, i pa chet duhdan ah hian engmah lawm lohna tur thil a awmlo tih hria la, a hmangaih luat vang che ah ngai la, a fa hrin aiin nang hi engkimah laktlak zawk bawk la a duh vang chauh a ni tih hi hriatthiam hram tum rawh. Keini hian engtikahmah kan phatsan dawn lo che a, kan chelh che in kan thlahthlam ngai bawk heklo ang che. Kan hmangaih lutuk che asin bawihte" tiin a rawn kuah zui ta thlawp a. Zorinpuii insumthei tawh lo pawh chuan mittui nen a nu chu lo kuah let ve chawt in, an ṭap dun ta ham ham mai.

Chutihlai tak chuan Amy kha hmanhmawh zet a rawn tlanlut in, a sam te chu a pawr pheng phung mai a, a meng phawk hrâ lehnghal. Zorini chu chiang taka rawn melh kawk pah hian

"Zorin, thlarau pakhat i ṭanpuina mamawh a awm mek ania, sawtah! Tun lawk khan accident tawkin thah a ni a, a thattu erawh amah chuan hre tho mahse, a tlanbo zui daih, hmanhmawh rawh!" a rawn tih tak chiamah chuan Zorinpuii pawh a nu kuahna ata chu talpit zawkin a meng phawk ta hle. Chutah, ring zet mai hian

"Taktak maw!?" ati nghek. Chu chu a nu khan hrethiam lo in a fanu hmel chu maktihna nen alo en ve hâ mai a. Zorinpuii erawh a insum hman tawh thlawt lo a ni e.

"Amy, khawilai ah nge?" ti chul chung hian a inthlak ta sawk sawk mai. Chutihlai te pawh chuan a nu khan a awmdan mak zet chu alo thlir ve reng. Mahse, Zorinpuii thung chuan mak deuh mai hian a nu chu a awm ve tih pawh a hrechang tawhlo hrim hrim a. A phe kual vut vut ringawt. Chutihlai vek in Amy lah chu a lu kha a rawn na leh tih hriat tak in kawngka bulah chuan alo ding khur leh ngawt ngawt tawh a, lu dawm vang vang chung hian a ṭhen leh ta sawk sawk mai le. Zorinpuii chu mangang nasa tawh tak a ni. 

"Amy, engtinnge i awm. I lu a na leh tawh emni?"

"Zorin, Zorin,ka theilo, thlarau khawvelah khan kei hi  koh luh tum a beih mek ka ni. Ka duhlo. Ka thei hrihlo. Zorin, min ṭanpui rawh!"

A TAWP LAILAWK! 

****      ****       *****   ******      ****    ****    *******