DEAR AMY__THEN LI NA

DEAR AMY - ȚHEN 4NA 

Vanlalpeki Fanai

THUHMA -  He thawnthu  ‘Dear Amy ‘ tihah hian thlarau David tih hmingpu a rawn lang thar ve dawn a, he hming neitu David-a hi ka  Țhiantha tak mai niin, october thla khan min lo boralsan tawh a, chuvang chuan he thawnthu pawh hi a pual liau liau in ka rawn hlan tih kha min lo hriatpui ula ka duh a ni. Ngaihthlak nuam vek ule.

****    *****     ****      **********

‘’ Bawihi, tu nge Amy chu. Chuan, tumaw hmuhtheihloh I biak chiam chiam thin kha. Kan lakah hian zep nei lo the aw. ‘’  Pi Rinfeli chuan mangan hmel zet hian Zorinpuii chu a melh tlawk tlawk a, Zorini erawh chhan tumna em em pawh a nei chuang lo. A melh ngai chu melh in a hui leh pap pap ringawt thin. Amy awm dan the thut kha a hrethiam thei hlawllo te pawh a tihtheih ang chu. A rawn inlan thut a, hmanhmawh em em in a khawsa zui leh bawk a, mahse, mak tak maiin a bo zui ta daih a nih kha! Khatiang thil a thlen hnu khan thla pawh a vei leh nual tawh a, Amy chu hmuh zui tur a awm ta reng reng lova, a thawm a reh zui hmak. Tin, tuna a zawhna dawn ho te pawh kha Amy a bo hnu atang hian nitin deuhthaw a nu hian ala zawt awllo tihtheih a ni a, chhanna fumfe erawh a pe mumal ngai lo thung. Pangngai taka khawsa zuiin a dawr pawh tha takin a nghak ve leh reng thei tawh a, tin, a unaunu lo ni ta Maliani chungah pawh khan a sual chu a chhuah em em ngai tawh lo bawk. Inngainaa inkawm nel tawh han tihtur chu anni hauh chuang lo na a, hma erawh an sawn ve zel e.

‘’ Amy, I lung ava han len hmel em em , eng nge thil awmzia? Puih theihna che ka nei em?’’ rawn titu Davida avang chuan thlarau Amy lunglen hmel em em a lo hawi veuh veuh lai chu a rawn che deuh hrut. Amah rawn betu thlarau ve tho Davida chuan a lo nuih deuh var var bawk. Chutah, Amy bawk chuan va nuih let ve sen sen chung hian,

‘’ Mihring khawvela ka inlan leh dan tur mawlh hi ka buaina a ni ‘’ lo ti nghalin hmundang a hawisan leh thuai a, Davida thung chuan a thusawi te chu a hriatthiam loh hmel hle. Mahse, Amy bawk chuan rawn sawi chhunzawm leh in,

‘’ David, nang chuan ka harsatna tawh te hi min hriatthiampui chiah lo m aithei, a chhan pawh, he thlarau khawvelah hian mithar mai ila ni a ‘’ a tih lai chuan Davida a rawn inrawlh vat. 

‘’ Nia, hriat vak hi ka nei lo khawp mai. Min hrilh ve theih chuan ka lawm khawp ang ‘’ a rawn tih leh takah chuan Amy chu alo thaw deuh hak. Davida pawh chu melh tawh lo chuang lo in,

‘’ Mihringte khawvelah khan thiantha tak ka nei a ni ‘’ tia  bul țanin Zorinpuii nen an intawn dan leh thil engkim te kha a hrilh ve ta zung zung a. Davida chu alo kiai leh sak thin. A chanchin engkim mai a han sawi zo chiah chu Davida pawh lo thaw deuh huaiin, han sawi mai tur chu a hriatloh hmel hle a, chiang takin Amy hmel de sar sar te chu alo en ve tlawk tlawk ringawt. Chutah, Zorinpuii bawk chuan 

‘’   David, min tanpui thei angem? ‘’ a rawn tih leh thut takah chuan Vida pawh a lo phu zawk. Mahse, inngaihtuah nan hun rei a mamawh lo tih hriat tak hian a lu chu a bu ta zauh zauh mai a. Amy alo țhen deuh sak.

Zprinpuii inbual lai chu thawm mak tak a hriat avang chuan a han chawl lailawk det a, a ngaithla zui vang vang. Mipa thaw huam huam ri niawm tak hi bathroom khawi emaw lai atang chuan rawn ri chhuakin a rapawm duh phian mai. Chutia, thawm ngaichang paha alo din ngawih vang vang lai chuan mipa aw thum bel bul hian, 

‘’ Zorinpui ‘’ a rawn ti ta dut mai. Towel pawh inbel hman tawh mang lo chuan bathroom atang a tlanchhuak thurh. Khuma țhut khur dar dar pah chuan bathroom lam chu ava melh leh zeuh zeuh thin a, eng thawm mah phei chu a hriat chhunzawm ta lem lo hlauh. Mahse, chutihlai tak chuan a hnunglam atangin mipa aw thum bawk khan,

‘’ Zorinpui ‘’ a rawn ti leh zet chu a hawilet rang ngei mai. Chuta hnunglam a han en nak chuan mipa te lampang , lu lian leh khabe ruh kual lian zet, amah en paha lo ding khawr hlau ngei mai chuva hmu phutin a phu zuang zawk a, a țe chhuak nasa hle nghe nghe.

‘’ Tu nge? Hei, tu nge inih a?’’ ti deuh chul chung chuan a bula thawmhnaw hak tur a dah hmang chuan a inkhuh tha nghal sawk sawk a, chutihlaiin kha pa pawh khan a mit chu hupin a lo che buai ve mek bawk. 

‘’ Zorin, tihpalh. Engmah kha ka hmu miah lo a nia ‘’

‘’ I hmu, I hmu, I hmu vek’’ 

‘’ ka hmu lo tak tak’’

‘’ I hmuchiang khawp mai. Eng nge I hmuh sawi rawh ‘’

‘’ Ihh,, eng lo, a zavai khan ka hmu a ‘’

‘’ Dawt sawi suh. Engmah I hmu lo bawk! ‘’

Zorinpuii chu a talbuai ngei mai. Saruaka alo awmlai berkher mipa lehnghal in an rawn hmu chu a ngaihdan a ni lo hle. A mi hriatzawng ala ni map lo leh ta nghal a. A thinrim ru teuh tawh mai. Mahse, thu dang a  sawi leh hma in Davida zawk kha a rawn inrawlh leh ta hlauh a.

‘’ Zorin, ka hming chu David Zorammawia niin, David emaw, Vidte ti te pawhin min ko thei ang. Tin, I ngaih angin kei hi minung damlai ka ni tawh lo bawk a, chutin zak lutuk duh tawh suh. Hetah hian --’’  atih mek laiin Zorini chuan

‘’ Leh bawk a ‘’ alo ti deuh hluk. Mahse, Davida thung kha chu alo khi sak duh chauh. Rawn sawi chhunzawm lehnghal in,

‘’ Helai hmunah hian tirtu ka neih vang chauh a rawn kal ka nia ‘’ 

‘’ Tu in  nge rawn tir che?’’ 

‘’ I thiannu Amy khan ‘’ 

Chuveleh Amy chu lo phu deuh zawkin a meng bial ta kawk kawk mai. Chutianga a thla tel tehmeuh alo hmuh tawhloh a thlarau thiannu hming sawi rik a han nih takah chuan a rilru te pawh lo thar leh in a lunglenna chu an ti zual leh hial a, mittui hial a kochhuak ta. Țah aw țuau hian 

‘’ Vida, Amy nen chuan in inhmu thin tihna maw? ‘’ tiin a mittui tla tur te chu a han hru pah leh zeuh thin a, Davida chuan a rawn hmuhpui ang tih a hlau hle nghe nghe. 

‘' Hmu thin e, thlarau te khawvel, kan khawvelah chengin englaipawh hian hmuhtheihin a awm thin alawm ‘’

‘’ A nih chuan engvangin nge kei hi min hmu tura a rawn inlan tawh ngai miahloh. Ka ngaih thin tehlul nen’’ 

‘’ A theilo miau atin ni. Tunah hian hremna a tawk mek a, hlihsak ala ni lo bawk’’

Chu thu pawh chuan Zorini hrilh chu a tihai angreng hle. A chhan tur awmang te a han ngaihtuah ngial pawh chuan a hriatthiam phak bak anni tlat thung si.

‘’ Engpawhnise, tun atan chuan ka kalsan leh rih phawt che anga, remchangah Amy nena ininhmuhtheih dan tur ruahmann siam turin ka la rawn inlan leh zawk dawn nia. Tikhan ka hmel hi lo chhinchhiah tawh la, theihnghilh suh’’ tiin Zorini chhanna pawh nghak tawh lo chuan a bo zui leh ta mai a. Zorini pawh chu a hawi buai zui hle.

Amy chu an khawvel lamah hrem mek niin, thlah zalen a ni rih lo maw? Hrem ngai khawp eng sual nge alo khawih ang le? Keimah vang vek a ni a ngem? Tih ngaihtuah chuan a thaw leh hak hak thin a, a ipik zui churh thei. Engpawhnise, kha thlarau Davida rawn inlan leh hunah kha chuan zui dan tur engemaw tak a ngaihtuah ve ngei chu a  țul ang chu. Amy hi a hmu leh ngei tur a ni.

‘’  Heng hi kudam lamah ka’n dah lut daih a nge ‘’ tih pahin parcel lian vaklo pakhat pawm chung chuan Zorini chu a dawr hnung kudam lamah a lut nghal a, light a han on chiah chu boruak a lo danglam leh var tawh mai. Fur lai niiin ruah a sur loh chuan a dawr chhung hi a uap thei em em a, mahse, chu cu he kudam chhungah hi chuan a thleng dik ve hauh lo mai. A boruak chu danglam lutuk hian a lo hik vur mai nia! Mak chu han ti ve viau hman mahsela a ngaihtuah zui duh ta lem lo thung a. A kaltlang ta tho. Chutia, parcel rem thaa a lo kun kut kut lai chuan kudam kil thim lai atanga aw  niawm tak lo chhuak leh thin chu ava hre leh ta a. mahse, eng thu nge a sawi erawh chu a hre fuh thei chiah lo thung. Hriat theih siloh a phun leh ser ser ang chauh hi a ni mai e, a hriat ve chhun chu. Ding chhuak hluaiin a han hawikual vel ngial a engmah phei chu a hmu zui ta lem lo. Thawm nise a ran rik chhunzawm tawh bawk siloh avangin ngaihtha em em tawh lem lo chung chuan a thiltih lai chhunzawm turin a țhu țha ve leh mai a, a awm chu a nuam lutuk tawh lo viau. Mahse, engtinnge a tih chuan ang, engmah lah kha hmuh tur awm miau hek lo. Chutah, rei pawh a țhu hman loang tihturah hian thawm ngai bawk chu a hre leh ta tlat a, a hawichhuak nghal zawk. Thil che zeuh takngial pawh hmuh tur awm silo chu ngaihtha em em tawh lo mahsela, nuam a tih tawh chiah loh avang zawk chuan kudam atang a chhuak zui ta ringawt. A chhuak fel chiah tih in Amy kha bangkil lam atang chuan a lo au  ve vak vak bawk a. A rawl neih ang ang te chuan Zorini chu han ko ve bawk mahsela, a hrethei lo tih hriat tak hian amah Zorini lah kha a khawsa tlat mai bawk. Engtinnge a tih tak ang le. Rilru hah hmel zeta thaw hawk chung hian a dinna hmunah chuan a han insawh leh nghek thin a, awmzia erawh chu a neih tam loh hmel kher.

‘’ David, min tanpui leh hi ka ngai a ni ‘’

‘’ Eng thilah maw sawi la ‘’ 

Amy chu a thaw zui deuh halh mai.

‘’ I hriat angin kei chu hremna hnuaia awm mek ka ni a, tihtheih ka nei tlem khawp mai. Zorini bulah khan min va kalsak leh la, pangngai taka kan inhmuh leh theih hlauh chuan engkim hi a tha vek dawn a, tin, a hma ang chiah khan thil pawh hi a awm leh thei bawk ang. Khawngaih takin min va kalsak leh mai ta che’’ 

Davida chu alo nui hul hak mai. Chu thil chu tihreh tawh hle mahsela a mi ngainat em em Amy thu hmu kha a nih miau si avangin a zawm lo phallo.

‘’ Chuti chu Amy, ka rualin lo kal la, keimah kaltlang hian Zorini chu I be mai dawn alawm ‘’ a rawn tih chuan Amy chu alo meng nur nasa hle a, a lu te chu a thing deuh nawk nawk bawk. 

‘’ David, ka thei lo. A dawrah pawh khan harsa takin ka  kal hram a, chupawh chu manchhuah ka nih hlauh chuan ka tan a pawi thei. Zorini te chenna bulhnaia kal hi phalsak ka ni lo. Ni lo, mihringte chenna khawvela kal hi remtihsak ka ni rih hleinem. Ka tan hian nasa takin a pawi thei asin. Chuvang chuan, min hrethiam la, min pui thei ang tiraw?’’ chik zeta Davida en kar chung chuan a rawn tichhuak ta sawk sawk mai a. Amah Davida pawhin inthiamlo hmel tak hian a thusawi te chu lo ngaithla ve in, a lu chu alo buk khum leh zauh thin. Tichuan,

‘’ Awle, Amy, ka pui em em ang che ‘’ ti sapin a chhuahsan fel ta.

‘’ Pate, nute, indamtlang maw? Khawnge Bawihpuia te ‘’ ti chul chungin sofa chunga lo țhu mek nupa niawm tak te chu Zorinpuii chuan ava kuah nghal chuk chuk mai a, chutiang bawkin anni pawh chuan an lo lawm let ve hle.

Hemi ni hi Zorinpuii pa nau, a pate Lawmzuala piancham vawi 66na niin, an chhungkua hian a piancham lawmpui turin a patea te chenna Mamit lamah an zu kal ve vang vang a. A pate Lawmzuala hi sikul zirtirtu pension tawh a ni a, tunah hian kohhran upa nihna a chelh mek bawk. Amah hrim hrim hi pa țha duam mai leh mi te harsatna hriatthiamsak em em thin mi a ni a, a hna a chelh lai ata tawh khan mi dik tak leh tha a nih zia a lanchhuahtir fo thin a, a unaupa, Zorini pa ang lo tak hian eirukna lakah pawh fihlimin a do em em reng zawk a, chumi vang tak pawh chuan an unau hian inmuhfuh hleihtheih loh chang an nei fo thin. Mahse, unau na na na chu rei a lo inhmelmak theihloh te pawh a ni ang, an inkar pawh tihian a tha ve leh mai thin. 

Tichuan, a patea piancham lawmna zanriah te chu hlimtlang taka kil ho in, zan hun pawh  nuam pawh chu nuam takin an hmang chhunzawm ta zel a. zorinpuii pawh a cousin te ho nen chuan ar te kang leh te te in a hlim ve hle. Mahse, chutia fiamthu te thawh a an lo rik dar dar lai chuan Zorini nui hmel chu a bo ta hmak mai. A cousin Bawihpuia thutna hnunglam chu melhin  a țhu khawng ta reng ringawt a. zawimuang hian a tho zui țial țial bawk. A awm dan the thut chu a unaute pawh chuan an hrethiam lo lek lek mai.

Bawihpuia hnunglama a thil hmuh chu eng dang n lo hian, thlarau Davida ngei kha alo ni leh a. thinphu dut dut chung hian chulam pan chuan a kal ve zel bawk. Davida lah chuan hmel hlim pu sang a amah chu lo en let ve reng chungin a ding zum reng thung.

‘’ Zorin, pawi ka ti lutuk. Inhlimlai rawn tihbuai che hi ka duh dan a ni bik miahlo a nia ‘’ 

‘’ Chuti si, engvangin nge ilo kal?’’

‘’ Eng lo, I hriat ang khan Amy’n min rawn tir tlat atin ni. A pawimawh lutuk a ti tlat bawk si ‘’ 

‘’ Amy maw!? Khawiah nge amah chu. Ka hmu duh ‘’

‘’ Aih! A thei lo. Ihmaw Zorin, Amy sawi danah chuan I tanpui ngai mihring tuemaw an awm a, chu chu-’’

Zorinpuii chuan nin hmel fe a lo thawk deuh halh pah hian ,

‘’ Leh bawk a! En the, kei hi eng aiah nge thlarau te hian min dah zalen intum miahloh le, ka ti. Nangni leh keini hi kan inang thei hleinem Vida’’ Davida hmelah chuan inthlahrunna leh nuam lo tihna a rawn langchhuak nasa nghal hle a, chu chu Zorini pawhin alo hmuh hmaih hauhlo. 

‘’ Umm, engpawhnise, eng thilah ber maw kei hi min rawn hmuh duh a? Sawi thuai rawh. Saw, ka unaute sawn min rawn hmu hlauh a nge ‘’ tih zung zung pah chuan a phone a phawrh pah zat a, a be der ta chiam. Chuveleh, Davida pawh chuan a khawsak dan vel chu lo nuih sak pah hian, 

‘’ Ka sawi tawh ang khan, nang hian tanpui tur I nei a ni. En the, I hnena ka rawn kal hian nang hmuh duh vang chea lo kal ka ni lo. Amy min ngenna vang chauh a ni tih hi hria la ka duh. Hrim hrim in, eng aiah nge nang hmeichhe cher lutuk hi ka han hnuhchak tehlul ang che le ‘’ a rawn ti deuh zek chu Zorini run tawk alo tling leh kher. Ner nawng nawng chunga a hmel chu rawn en pah hian zawi sapin, 

‘’ I lu bur len tehreng nen chutiang te a min han tih le. A tu chu maw ka tanpui tur chu. Sawi thuai the'’ Davida thung chu alo nui ri hak.

‘’ Tak taka ‘’

‘’ Zorin, tu nge I  biak reng a. ivan rei tawh ve ‘’ an hnunglama thu te chuan rawn tiin, Zorinpuii pawh chuan chhuanlam a siam leh ta zung zung. 

‘’ Ramhlun Northah kal la, petrol pump bulah khan concrete building lian tak lo awm in, chutah chuan va kal ang che. 2nd floorah nula pakhat, a hming Hmangaihtluangi tih hi a awm a, mahse, amah tak chu a thi tawh thung! A chhungte iva hmu zawk dawn a ni ‘’ 

‘’ Iva han sawikual nasa tak. A tawngkam thiamloh thlak mange ‘’ tiin Zorini thung chu alo nui deuh hak a, Davida erawh a lan dan chu ala pangngai hle thung. 

‘’ Lo țawng ve chhen lo la, ngun takin ngaithla hle hle ta che. Hmangaihtluangi hi  nula chhelo leh hmeltha tak a ni a, mahse, amah ertu, a college thiante hovin an that a ni! Chu chu tuman an hriatpui lova, a chhungte pawhin a thian kawm thin te chu rinhlelh ngaihna an hrelo hrim hrim ‘’ a sawi laklawh laiin Zorini chu alo inrawlh leh lailawk a,

‘’ Lawkin Vida, an fanu chu a thiante ho in an that a ni tih hi ka va hrilh tawp dawn I tihna a ni em? I mawl emni? Tuin nge ka thusawi te chu fiahna pawh awmlo in min awihsak se I tih reng reng a?’’ lo ti let ve hluk hlukin Vida chu a lo chek ve hlak thung. 

‘’ Ka la sawi zo reng reng hleinem. I kal anga, amah Hmangaihtluangi chu iva hmu mai dawn alawm. Inchhung I luh hma pawhin I hmuh hial zawk ka ring. A lo nghak reng ang che’’ Zorini chuan thil thui tak a ngaihtuah tih hriat tak hian hnuailam melh in a melh ngai chu alo melh ding ta vung vung a, a rilru a buai hmel ve hle. He thil hi a ti leh duh tak tak a ngem? Nun pangngai nena khawvel chen kha a nuam em em a, a zalen hle bawk a nih kha. He thil hi a buaipui leh a nih zawng in, a nun a buai phah leh hle dawn tih pawh chiang takin a hria a, a huphurh lawk a ni. Mahse, a lehlam zawng chuan heng thlarau fel tak tak te avang hian nun dan mawi neiin, khawvel hi nuam tihna te pawh a lo neih phah ve bawk a, a bikin thiantha Amy hial a tawng a nih kha. Tin, tualthahna case pahnih ngawt chu alo chinfel pui ve tawh bawk a, a thawk tha hle a ni lawm ni? Awle, hei hi a kaltlangpui leh ngei tur a ni ang. A tha e. engkim hi an tha leh vek ang. Amy nen chuan inhmu thei rih lo mahsela, chung khuanu hian hun tha hawnsak lehin an la intawng leh ngei ang tih pawh a ring nghet tlat bawk. Pathian kutah awm rawh se.

Zangena Petrol Pump a thlen phei chuan mihring an lo zi nuai  nuai mai a, a hawikual nasa. Davida sawina address kha zawng ru deuh in hawikual nasa tak a ni. Chutah, petrol pump bul maiah chuan concrete chhawng sang leh lian tak chu va hmu zuiin a han belchiang leh deuh a, a kawtah chuan dawr a awm tih pawh a hre nghal. Ni lo, a bul lawkah chuan nula sang tha tak leh dawldang tak, hmel ngui zeta amah rawn en reng tu chu an awm tih ava hmu ta chat. Awle, saw ngei saw a mi hmuh tur thlarau chu a ni ngei ang ti rilru neuh neuh chung chuuan a dinna lam pan chuan a phei nghal nal nal a. A bul ava thlen phei chuan alo rinlawk ang chiahin thlarau Hmangaihtluangi chu a lo ni ngei e. an inhmachhawn dun reng hnu pawh chuan han sawi mai tur chu an hre lo dun hle a, an inmelh deuh ralh ralh ringawt. Chutah, rual zeta rawn tawng chhuak dun in, 

‘’ Nangmah hi ‘’ an inti tawn țhawt. An nui dun ta har har mai. Chutia mahni chauh a a han nui ta awr awr mai chu a bul vela mihring kal te chuan makti zeta en in an kalpel suau suau a, an rawn lehhawi tak țawk țawk bawk. Chu chu hria in chhung lamah an inzui lut ta vat a, an la țhen dun țha reng mai. Mahse, reivaklo hnuah pangngai taka awm a hun tih hria in, Zorini zawk chu a rawn tawngchhuak ta thung a. 

‘’ Hetah hian tanpui ngai an awm tih hi hrilhhriat ka ni a, chuvang a nia-’’  Hmangaihtluangi chuan lo pawt chatin nui sang chung hian,

‘’ Chuvang alawm hetah hian ka lo nghah reng che. Ihmaw Amy kha ka thlarau thiantha tak a ni ve a, tanpui ka ngaihna leh ka hriatloh thil tamtak ah hian amah kha min buaipui tu ber a ni thin. Nang chuan I hre kher lo vanga, kan thlarau ramah chuan buaina tur hi a tam ve a, a bikin keini ang mithar tan hi chuan ‘’ tih pah chuan zah hmel hian a rawn nui deuh sen sen phawt a. Zorini chuan alo en chik ngang mai thung.

‘’ Tichuan, I harsatna ber chu min han hrilh tawh ta che. Puih theihna che ka neih chuan ka ti em em ang’’  lo ti sapin, Hmangaihtluangi pawh chu a lo bu deuh nghat. Mahse, a ruk tak chuan a buaina tawh te chu a sawi hreh tih pawh a hriat theih a, sawi nuam a ni lo ang tih pawh a hriat theih awm e. mahse le, a sawi ngei a ngai a, a nih loh chuan tanpui dan tur a awm dawn lo tihtheih a ni. 

‘’ Awle, ka sawi ang. Kei hi college zirlai mai ka la ni a, chuan, he building 2nd floor hi a pumin kan luah vemek bawk. Kumin hi Master ka zir zawh kum tur niin, tihian harsatna namailo tak ka chungah alo thleng zawm leh ta si a, ka zirlaite pawh ka zo ve thei dawn ta lo a nih hi. Tin, fashion designer hlawhtling tak ka nih tumna te pawh kha an thamral zo ta chu a nimai a ‘’ 

‘’ Han sawi the. Eng nge I chunga thil thlengte hi ni reng reng. Thah nge I nih a mahni intihlum ‘’ 

Chuveleh, phawk hra hian Hmangaihi chuan a mitah tak a rawn melh ta kar mai a. zorini chu alo phu deuh uih nghe nghe. Chutah, aw tham chil chel chung hian,

‘’ Ka intihlum lo. Thah ka nih hi! Thikthu vanga thah ka ni. Anni ho khan kei hi min er em em reng a, engkimah anni ai khan ka tha zawk miau si a, an demawm hran loh e. mahse, chu vang ringawt chuan thih hi ka phu bik tihna emni? Misual ber pawhin thih hi chu an phu bikin ka hre theilo. Ka na asin Zorin. Ka na ngawih ngawih. Ka bialpa ‘’ tiin a sawi chhunzawm thei ta lova, a mittui chu a luang zaih zaih mai. Zorini pawh sawitur hrelo chuan alo ding ngawi ve reng ringawt a, an boruak chu rit a ti hle bawk. Han hnem dan tur vak lah chu a hre chuang bawk silo nen, a khap leh fak fak thin.

‘’ Thla 2 liam ta khan picnic turin kan thianho chuan kan chhuak a, hetah hian ka bialpa pawh chu alo tel ve nghe nghe. Tin, ka bialpa Sangpuia  hi hna tha tak chelh lai a ni a, mipa fel leh tha ziktluak tak hi a ni nghe nghe bawk. Chubakah, hmeichhe dang vang hian buaina kan nei hauh lova, a lerh lo hle tihna a nih chu. Kan hlimdun in tudangmah hi kan ngai miahlo thin. Kan hetih vang pawh hi a ni maithei e, ka thiantha te emaw tia kalo rin ve em em ho zingah khan min er a min thik ngawih ngawih tu an lo awm tak ni. Anni ho chuan ka dinhmun leh ka thil neih engkim mai te chu lo awt ve in, keimah min tihchhiat duh nan an hman phah ta a, infuihpawrh kualin kei chu min dah bo dan an lo zawng ta ngat ngat mai hi a ni awm e. ka htiatthiam ve meuh kha chuan ka nunna atan alo pawi hman tawh si a, kan heti zo ta a nin ber hi. Ih e, kan picnic ni khan ka ruilo a, zu ka tem chhin lo hrim hrim bawk. Chuvang chuan thilthleng engkim te kha chiang takin ka la hre vek a, ka sawi thei vek bawk. Tui chen zir pahin kan thianho bik cu poolah khan kan ri dar dar reng a, chutihlai chuan ka bialpa pawh a thian pakhhat rawn hruai nen khan bukte lamah eitur siamin an lo awm ve mek bawk. Kan inhmuphak lo hrim hrim tihna a nih chu. Tichuan, ka thiante ho chuan beer te in leh in an rui angreng tawh hle a, an thawm pawh a tha thawkhat. Kei chu tawngkam ngeiawm tak tak hian min khei fek fek tan a, chhang let lemlo hian ka nui liam mai. Mahse, chutia min tih deuh sek takah chuan ka nin em avangin kalsan tuma ka han thochhuak tur chiah chu ka banah min rawn vuan in, thawklehkhatah pool chhungah chuan min phihthla ta mai a, keia tui hleuh thiamlo talang chuan inhaichhuah ka tum nasat pauh leh  ka  buai ting a ni ta mai si. Ka thiante hmel chu han hmu thei ve bawk mahila min chhanchhuah tumtu pakhatmah an awmlo! Ngawi renga min thlir mawl tawp chungin an la nui sawng leh ta nghal. Anni  ho hi khang kum liamta chhunga ka thiantha tia ka lo sawi te kha chu an ni si a maw! Min ti na em asin. Ka thlarau chu ka thlah ta! Chuveleh, rang mangkheng hian bukte lamah chuan mangan hmel fe in an tlan phei ta sap sap a, mipate chu an va pun ta a nih kha. Kei chuan ka taksa kha ka chhuahsan fel vek tawh a, a sir atang hian an che vel chu ka lo thlir ve ngawih ngawih ringawt mai a ni e. Mangang taka ka bialpa in ka taksa zawi vek tawh tui chhung atanga a rawn pawmchhuah lai te khan awmngaihna min ti hrelo asin. Mumang mai mai nise hi ka ti thin. Mahse, a ni silo. Engkim thleng te kha a tak vek an ni ngei si.

Hetiang thil ka chunga titu ka thiante hi ka theihtawp chhuahin inpuantir tum chuan han rikrap ve bawk mahila, ka hlauhawm tawk lo nge, an luhlul ve hrim hrim chu ka hrelo, ka thu an awih duh miahlo nia mawle! Chuvang a nia Amy hnenah tih dan tha zawk dang a hriat takin tia ka han rawih tak ngawt mai  ni. Ani kha mifel tak alo ni hlauh a, nangnen kan intawn theih phah ta a nih hi. Ka lawm khawp mai ‘’  a sawi zawh meuh chuan Zorini pawh alo bu ve nghat nghat. Ngun taka ngaihtuah hmel pu chung leh zawi sap si hian,

‘’ Lawmthu chu nakinah ‘’ ti hmukin inchung lamah a chho ta dawr dawr a, Hmangaihi pawh chuan a zui ve nghal zat bawk.

Inchhung an han luh chuan  Hmangaihi nu leh pa niawm tak, nu valai tak leh pa hmel sar vuah mai te hi sofa chungah chuan an lo țhu ngawi dun reng a. Nu zawk chuan inkeu sa thlapin album pakhat hi a malchungah alo nghat thlap bawk. Tin, an banglaiah chuan Hmangaihi thlalak lian angreng fe mai hi an lo tar kulh bawk a, hmeichhe hmeltha tak a ni tih chu Zorini pawh hrilhriat hranpa kher a țul tawh awm lo ve.

Chutia an inchhunga hmelhriat ngai loh nula rawn chuang lut ta chu maktih hmel fe hian an lo en reng ringawt a, an hamhaih hmel fu bawk. Mahse, nu zawk chuan rei pawh riallo in alo chiau au ta zung zung zawk a. zorinpuii pawh tlem chuan a awm a nuam ta deuh e. chutihlaiin, Hmangaihtluangi lah chuan zawi sap hian,

‘' Ka nu leh pa te chu an fel lutuk ‘ alo ti leh sur sur thin a, Zorini pawh lawmloh in a nui leh vur vur thin.

‘’ Eng thil nge ni ta ? ‘’ an rawn tih takah chuan Zorini chu a zam chhe leh teuh kher. Sawichhuah nghal pawp pawp tur nge, pehhel ve hlek tur ni ang tihte thleng chuan a ngaihtuah kim hman vek. Mahse, thu pehhel kual vel thiam lem lo tihtakah.

‘’ In fanu chungchangah thil hriat ka nei a’’ a ti ta ngawt. Chuveleh, anni nupa chu phawk fe hian an rawn hawichhuak a, an inmelh zui ralh ralh mai bawk. Nu zawk chuan rang fe mai hian,

‘’ Eng chungchang ber maw nula, han sawichiang thuai the a ‘’ lo tiin,  a awm dan atang chuan a helhhawlh ru hle tih a hriat theih bawk. Zorini zam deuh tawh lah chuan a kut te chu sik pah neuh neuhin a meng tal ralh ralh a, a chil te chu a han lem leh khalh thin. Bul tan dan tur mawlh chu a hrelo takzet a ni. 

‘’ Ih,, a thihna chungchangah hian hriat ka nei a’’ tiiin a a hriat ang ang leh a hriat dan te chu a sawichhuak țan ta a. Hmangaihtluangi nu leh pa te mawlh mai chuan awih harsa an tih hmel kher. Ni e, mi pangngai tan chuan heng, thlarau te thu leh hla hi awih mi pawh niin a lang lova, a harsa ve hle ang. Chuvang tak chuan an sangawi zawnpui Zorinpuii hi chu mi pangngai chunglamah te pawh kan dah thei hial ang chu. 

‘’ Ka thusawi engkim kha in awih thei lo a ih chuan tihngaihna ka hre bik vak lo a, mahse hei, ka bulah hian in fanu ngei pawh a țhu ve tih erawh hria ula, ani chuan nu leh pa fel tak in nih zia te, kohhran bel tlat leh fate hmangaihna ngah tak, thenawm khawveng tan pawh a mi hnawksak lo tak innih dan te thleng in min hrilh a ni. Tin, kei ngei pawhin ka hmuh dan chuan Hmangaihtluangi hi hmeichhe fel leh ngainatawm tak a nih ka ring nghet hmiah. Biak reng a nuam em mai ‘’ tih pahin a thutna dinglam chu a han thlek zauh a, a nui zui leh ta var var. A awm dan engkim mai chu a hrengai lo tan chuan maksak hi a tling a, thilmak en a en pawh awlsam tak tur a ni. 

Chutah, pa ber chuan rawn buk nghat nghat pah hian,

‘’ A,,Mami, I thil rawn sawi te hi han awih a awihloh dawn pawhin eng thilmah hmuh leh hriat kan nei ve miau silo va, tun maiah chuan ngaih dan siamthiam harsa kan ti hlemai. Tihian ti the ang, nakinah a bialpa Sangpuia pawh kan lo be rawn ve anga, chanchin kan la inhrilh leh zawk dawn emni? I biakpawh theihna tur dah la, eng lo, chutia thil han tih rum rum theih pawh niin a lang lem lova, nghak phawt mai ang hmiang. Mami thlarau cbhu zahawm viau mahse, hun kan la mamawh niin ka hre tlat mai ‘’ pa zawkin a rawn tih chuar chuar lai chuan nu ber chu alo insut hraih hraih reng a. A lan dan chuan sawi ve tur chu ngah hle mahse, engmah han sawi thei hmel kha a pu tlat lo thung. Chutiang na na na chu Zorinpuii tan pawh tihtur em em awm tawh heklo. A phone number te chu dah in a chhuahsan leh ta zawk a. thil engkim mai chu diktak leh fel thlarhin thleng thei vek se a duh kher mai. Chu chu a tawngtaina pawh a ni reng a ni.

‘’ UZorin, inhnuaiah ka nu leh pa ten an ko che a, ilo chhuk lawk hman em ?’’ rawn titu Maliani chu chiang zeta han thlek chho in, ani chu hlauh vang nimaw, alo tawlhhnung deuh zawk thei a, ZOrinpuii thung chu za fahran lo hian a khi zui ve suk mai. 

Inhnuai a zu thlen thlak chuan a  nu leh pa te khan thil engemaw hi khunkhan takin an lo sawi dun tih a hre mai a, an inthuthnaih phian lehnghal. Mahse, an awmdan vel chu ngaihtuah loh hmel tak hian a nu bulah a țhu thla tharh.

‘’ Nu, pa, eng thil nge inlo sawidun sur sur a. ava han ril awm bawk em ‘’ zawt titihin a phun chhuak deuh sup a, phone a en san leh daih thung. Chuveleh a pa chuan chiang chiang zeta rawn melh chung hian fiah zetin,

‘’ Ka fanu, tunlai I khawsak dan hi hriatthiam harsa kan tih thu kan lo sawi mek a ni e ‘’ rawn tiin, Zorini chu a hawichhuak deuh zawk. Mahse, vei loh hmel zeta a phone bawk chu bih leh  pah in,

‘’ Engtia awm dan amw? ‘’ ati liam [puat. Chutah, nu zawk chu rawn inrawlh ve vatin, aw hriam deuh hraih hian,

‘’ Mamit a kan zin lai pawhin I unaute khan thil engemaw sawi chu an nei a ni. Zanah tuemaw rei deuh I biak thu te, amah reng reng an hmuh ve loh thu te ‘’ a tih lai chuan Zorini alo nui chhuak deuh hak a, ngai ho tih hriat fe in a nu thusawi te pawh chu a lo chhang liam vel mai mai.

‘’ Khang te chu phone ka hman vang a ni tih pawh an hre vek a, a mak thin ngawt mai ‘’ 

‘’ Aih a dik lo. I khawsak dan hi hman deuh atang khan ka chik ru ve tawh che a, I diklo ru riau a ni. Hmuh tur awm silo biak te, nuih vur vur te, a dang pawh a tam lutuk. I dik lo chho vel vek a ni mai e. I unaunu ngawi ngawih Maliani nise iti tha duh der lo a, hei leh chen kan hnena a khawsa tawh chung pawh hian hlim taka intiti dun emaw, ininzui awm reng reng hi hmuh tur ala awm miah lo. I dik lo tih pawm la, insiamthat tum the aw ‘’ pa zawkin a rawn tih leh tak fak fakah chuan Zorinpuii nui lai hmel chu a bo chiang hle. Khang a lo khawsak thin dan zawng zawng, a bikin, thlarau nen a an inkungkaihna chungchang bik thil te kha a nu leh pa te hian an lo hre ru reng tawh tihna emni ang. Engtiang a rei nge an lo rinhlelh tawh ang le. Nge ni a, anni hi thil thlen dan zawng zawng te kha a hrilh fai ve vek zawk dawn. Chu chu a tan leh a chhungte tan hian a tha zawk mai a ngem? Ni leh lo. Khatiang thu vel an hriat a, thlarau nen an inbe fo thin tih an hriat vaih zawngin a chhungte hian an pai dai mai mai hauh lovang. An ngawih bopui dawn hauh lo. Ni e, a nu zawk hi chuan alo hrethiam thei pawh chu a ni mahna, mahse, mhase, a pa hi chu den mu ția dawn lutuk.

‘’ Zorin, Zorin, Zorinpui! ‘’ 

Chu kohna zozaite chu a hre miahlo a ni tih hriat tak hian Zorini chu a hma zawnah a kal mawp mawp reng a, a bul maiah chuan Amy kha akal ve reng a ni tih pawh a hre hauhlo bawk. A kohna te a hriat theih tak siloh ah chuan tiin a bul vela bawlhhlawh bawm inhung leh thil han tihtluk mai theih tur ang chi te chu ti tlu rum rumin, a awm ve a ni tih chu hriattir a tumruh hle a, mahse, a beidawnthlak a ni. Zorinpuii chuan chung thil te chu hmu vek thung mahsela, a ngaipawimawh hran hauh lo. Amy thiltih vek an ni ang tih phei chu a ngaihtuah phak lo hrim hrim. Hetihlaia Amy beidawng lutuk hmel mawlh hi, ziahlan theih nise zawng, inkhawngaih ve ngawt hian ka ring a ni. 

Engti anga nasa pawhin a thiannu chu inhmuhtir han tum e bawk mahsela a hlawhchham a ni e. A hremna chu hlihsak ala nih miau si loh avangin a tan tihtheih a tlem hle a, hetiang reng a nih chuan ani hian kawng dang a dap mai a țul dawn tih pawh a hria. Chu erawh, Zorinpuii tan hian a harsa in a khirh ve fet maithei. Eng aiah nge a han khirh loh tehlul ang ni. Mihring damlai tan thlarau hmuh tum leh thlarau khawvela intahluh tum chu ‘Hriau benga sanghawngsei luh tir tum ang vel a harsa a ni dawn tih chu hriat sa. Eng nge thleng dawn, ngaichang phawt ang.

‘’ Ka hremna hi titawp tawh lul rawh. I tan hetianga tih kher hi eng nge a sawtna’’ tiin Amy chu an ț khawvel lamah lunghnur zet in alo phunchhuak ve nasa mai a, a insawh ngheng ngheng tawh bawk. Hetihlai vek hian a bulah chuan Davida tihloh kha chu tu midang mah an awm ve lem lova, ani chuan Amy chu ngawi reng leh lainat hmel fe in alo thlir ve reng ringawt. Amy lah chu lei charah țhingthiin vanvadak meuh hian a tawngtai mawlh mawlh reng. A Pathian hnenah chuan a thlarau damna atan a dil awl lova, mihringte khawvel ala thlakhlelh zia pawh a tilang tel bawk a ni.

‘’ Aw Pathian, min khawngaih la, ka dilna te hi mal min sawm sak ang che ‘’  kalsawn tuma a inher lai tak chuan khawi atanga lo chhuak nge tih pawh hriat loh hian aw a rawn chhuak ta mai a, amah mai ni lo, Davida chawp chuan phu nasa dun tak an ni.

‘’ Ka fanu, I dilna hi ka hria e, engkim I duh zawng zawng te hi ka hre vek. Ka thinlung phekah hian chhinchhiah ngheh tlat an ni tawh aw. Mahse, I hremna hi tihtawp mai ka tum rih lova, I tan hian khawvel mihring khawvel saw chu a bawlhhlawh mah mah a ni ‘’ chu aw chu a thum tha in, chulai hmun velah te chuan a thangkhawk rum rum nimai hian a hriat a. Mahse, chu chuan thil hlauhawm a rawn thlen lo a, a thlamuanthlak em em zawk si a ni. Aw lo chhuahna zawnga Davida hawi kual ruai ruai laiin Amy thung chuan aw nem leh zaidam tak mai hian,

‘’ Lalpa, chu chu ka hriatin ka lawm takzet a ni. Mahse maw, khawvelah khan a lo thlawnin ka awm bk ngawt lo tih chu I hriat kha. Sual inthup tamtak hailan tur hi ala awm țul a, chu chu nangpawh hian I hai lo. Khawvel lama an mithiam te leh sual do tura thupek chhuah thei tu te sawn an hna an thawh muan em avangin khawvel hi a chhe sawp tual tual si a, khawvel dang chu sawi loh. Mizoram bik hi thlir ve la, sualna cht nasat zia leh rapthlak turu tawh dan hi. A zavai hian ka haikiang thei ang chu ka ti thei hauh lo a, mahse, pakhat chauh pawh kalo sutkian ve khan a țha zawk iti lo vem ni? ‘’  Van lam hawi chung chuan a chhanna dawn tur nghak in a dak chho leh ta veng veng a, mahse, a reh leh hmiah tawh. Aw lo chhuah hun ngaichanga rei fe mai a hawi kual leh hnu pawh a a reh tak daih si avang chuan Davida nen chulai hmun kalsan chuan hmun dang an pan ta zawk a ni.

A phone rawn ri vawl vawl ri avang chuan a ngaihtuahna ata harhchhuak zawk in phone chu a melh deuh zawk a. number hriat ngailoh hi alo ni tlat mai. A melh leh vang vang hnu in a la ve ta hram e. tim deuh dai hian

‘’ Hello ‘’ a han ti a. chutah, lehlam atang chuan mipa aw puam deuh țalh hian  fiah zetin,

‘’ Zorinpuii ini turah ka ngai ngawt a. ka tisual em aw?’’ rawn ti nghal in, Zorinpuii chu a khur ru der der thei. Tihsual nei ang hrima a tkasa lo khur ve chhen thin chu a ning ta khawp mai. A chhan tak mai loh avang chuan lehlam atang bawk hian,

‘’ Hello, ka tawng hi I hre thei em aw? Zorin, pi Zorin ‘’

‘’ Nula ka nia, aw, ah, Zorini ka ni e. Eng thil nge ni ta’’ a ti bah ta nuai mai. Amah rawn betu chu a nui deuh hak ni hian a hriaa, alo tawng sual ta kher kher chu a zak ru hle. 

‘’ Awle, a nih chuan nula Zorin, hetah hmannia I rawn kalna Hmangaihtluangi bialpa Sangpuia kha ka ni a, I remchan chuan hmuh che ka duh deuh a, a rem a ngem le aw?’’ a rawn tih leh takah chuan Zorinpuii pawh alo thaw deuh huai thei. Mahse, ala zak pah reng tho mai.

‘’ Engtik hunah nge I theih zawk a? Kei chu min mamawh hun apiangah ka awm reng aw ‘’ lo ti let ve in, inhmuhna hmun tur te chu an sawidun leh te te a, inbiakna pawh chu an titawp zui ta a ni. 

Stella café ava thlen phei chuan hawi buai leh hlekin reiloteah mipa lian thelh thawlh tak pakhat hian a darah a rawn vawn sak ta thut mai a. A lo phu deuh zuk nghe nghe. A han hawi chhoh nak chuan mipa hmaitlang tha leh sar vuk mai, taksa ngheh hmel tlet tlut zet mai chu a lo ni reng a, amah chu chiang fahrana rawn en in a nui deuh sun sun bawk. A ngainatawm angreng phian mai. Chutah, aw dam dup hian,

‘’ Pawi itih lemloh chuan kan kal nghal daih mai dawn emni? ‘’ rawn ti hul hakin, Zorinpuii pawhin lu a lo bu ve zauh a, an tum ram lam pan chuan an chhuak zui nghal.

Station an thlen phei lai hian a chhungah chuan indopui a chhuak ta emaw tihtur hian an lo ri nuai nuai a, a bengchheng kher. Mahse, a kalpui pa zawk chuan a mipa nihna hlen in, lut hmasaah a țang ta hlauh a, rinlawk ang tak hian station chhung chu a lo buai hle. Mipa pakhat phusa tak mai man beh tumin police awm ang ang ho chu an lo vir kual zak zak hlawm a, eng dang vang a ni lo. Chu misual chuan chemte a ken vang chu a ni pakhat. Dawhkan pakhat chungah dingin a chemte ken lai chu a vilik nasa mai hi a lo ni a, intihpalh hlauhthawn thu ah an lo bawh huk ngam lo hi a lo ni. Mahse, Zorini te luh ve hnu atanga rei pawh riallo ah chuan dawhkan atang a rawn zuangthla ta a, chhuahna kawngka lam pan chuan a tlan titih ta mai. Mahse, chuveleh, rang zet hian Sangpuia khan a kut chu alo man beh sak hman hlauh. A manbehna chu a na thawkhat bawk a ni ang, misualpa pawh chu țe zui ve țhawt in a chemte ken lai pawh a thlauh zui ta thuai a, tichuan, an him ta ti tawh mai the ang. Station atanga an chhuahpui lai te pawh chuan ala sapatal nasa in, ala au bengchheng hle a, Zorinpuii lah chuan a chevel chu hmuhnawm tih hmel tak hian a lo thlir dauh dauh reng a, a kalpui pa lam reng a ngaihtuah tawh lo bawk. Chutah, amah rawn nghawk zauh tu an awm tih hria in a hawichhuak ve thuai a, Sangpuia khan chiang fe mai hian a lo melh leh kar tawh chu niin. A zak ru lehpek hle. 

Tunhma pawh a an lo pan fo tawh Inspector hmaah chuan va țhu lehin, inspector hmel a hmuh rual chuan a zam ta deuh tlat. A chhan pawh eng dang vang ni lovin tun țum chu mihring pangngai a kalpui ve miau mai a, chutah, mipa chhelo ve tak ala ni zui lehzel bawk nen, a zam ve hlek a ni. Chu inspector lah chuan a nuam tih loh sa rawn tizual tur ting hian a lo melh no tehchiam bawk silo a, Zorinpuii chu a hawi lawl lawl lo chauh tawh. An kal chhan diktak sawia anni pahnih inbiak lai te pawh chuan ani chu thildang daih ngaihtuah hian alo hawisawn leh veng veng thin a, an thilsawi reng reng  te chu hriat fumfe pawh hi a nei lo hial.

‘’ Nula, I thianpa thusawi hi a dik em? A sawi ang hian thil chu a thleng reng emni?’’ rawn ti tu thawmah chuan hawichhuak ve vat in, a ka deuh hau mai. Mahse, țawngkaa chhang ta lo chuan a lu alo buk khum ta ringawt zawk a, chuveleh, police pa chuan rum zeta  rawn melh leh pah hian,

‘' A thuhrimin nangnen hian tunhma khan indawrna kan nei tawh lo maw? A dik em?’’  a rawn tih leh tak hmarh ah chuan Zorini pawh a inngaihtuah fim țan a, he police laktlak loh zet hmaah hian a zam reng tur a ni lo tih pawh a hria. Țhu țha sauh sauh a han dak deuh vah mai a, a nui leh ta var var mai. Chutah, fiah angreng fe mai hian,

‘’ Aw nei tawh e. Tuna ka case rawn ken luh chungchangah pawh hian min ring dawn lo tih ka hriat avangin I background -’’ a tihman chauh tih chuan Inspector chu a lo khuh ta khak khak mai a. Rang fahran mai hian,

‘’ Awle, ka ring che alawm. Mahse, tun bak hi chu I case angah hi chuan kan inpuih theih ka ring tawh lo. Thilmak leh awihawm loh ‘’ a tih mek lai chuan,

‘’ Kan la hria ang chu ‘’ Zorinpuii chuan lo ti let nghatin, awm pho lah hian alo thu sang vah bawk a, a confi hmel leh ta kher. Nia, he police, vau chawp kher loha a hna pawh thawh tum miahloh hmaah hian a zam chhe bik tur a ni lo reng reng. Ve mai mai a! 

Anni pahnih han inbiak vel dan leh tawngkam te makti fe a lo entawn zak zak tu Sangpuia chu a ka hau tawh mai a, a ngaihna a hre lo ve bawk em a ni. 

‘’ Chuan ka pu, kan case chu tihfel theih a beiseiawm a ngem? ‘’ Sangpuia’n a rawn tih leh takah chuan anni pahnih pawh an lo inthlahdul leh ta hlek.

‘’ Aw nia, han beisei phawt ila. Tihtur țul ang ang te han tifel ila, thil tisual tu ho pawh rehchhuah dan kawng a awm mai ang. Lo thlaphang suh u. kan awm hi’’ a rawn tih leh tak zung zung hnu chuan an thaw dun huai mai. Chulai hmunah chuan rei pawh awm zui tawh lo in an chhuak leh mai a, Zorini chu a awm dan a danglam leh vek tawh. Eng nge maw, hepa bulah hian a zam ruk tlat reng le. Engtin a ti pawh a ni der silo a, a kimki em em reng mai chu a nih hi.

‘’ Zorin, hun ila neih theih chuan thil te ei kawi leh lawk ang hmiang’’ a rawn tih leh pawh chuan tawngkaa chhang loin a lo bu leh ngawt a, pawi a ti em em lo tlat. A bulah hian zak ru reng tho mahsela a ngaina riau si a ni. Mipa rilru kawi pu mi a nih loh vang te pawh a ni a nge.

Chutia thil ei paha an lo titi dun mawlh mawlh lai chuan dawr chhungah Hmangaihtluangi rawn lang ve in, Zorini chu a rawn nuih ta sen sen mai a. A tirah chuan a bialpa a zui nilen em avang hian a rawn lungawi lo turah alo ngai ngawt pek a, mahse, a ngaih dan chu a dik lo chhiava tih hre ta thuai. Hmangaihtluangi chuan a dinna hmun atanga rawn au vau vau in,

‘’ In inhmeh lutuk. A hmangaih har lovang che tih hi ka ring tlat. Mipa diktak a nih kha aw. Chuan, ka lawm e’’ a ti leh a, amah chu a thamral zui ta riai riai. Zorinpuii hamhaih lutuk pawh chuan nui sak chung hian a thingpui chu a han dawt leh hlak a, Sangpuia thung chuan a awm dan chu alo hmu fuh lo hlauh mai. A dik ang, hepa hi mipa satliah mai mai chu ni dawn in a hre lo tlat.

Hun liam leh hret in, Sangpuia leh Zorini te pawh chuan an inbiak chu an țhulh ta hlek lo. A dawrah te pawh rawn leng lut in, inah te hial a rawn tlawh awl ta lo va, inngaina tawh tak hi an ni e. Marawh chu, Zorinpuii zawk hian inthiamloh chang a nei fo thin a, a chhan pakhat pawh, kha thlarau khawngaihthlak tak Hmangaihtluangi hmai kha ala zah rih ni berin a hriat. A ngaih dan ah chuan a awm lo viau hran hauhlo. Mahse, ani chu mitthi tawh a ni a, hringmi te khawvelah hian engtikah mah a rawn let leh thei tawh dawn lo. Kal tawh kal tawh ni sela, mitthi ngaia kur reng zawng ala dam te tan hian a that ber loh bakah kan tih fo tur pawh a ni bik lo tlat. Thihna hi chu a na tawpkhawk em a, a na tehmeuh mai. Mahse, hmalam pana kal zel tur kan ni tlat a ni. Tin, he thlarau Hmangaihtluangi pawh hi a damlai ata misual leh rilru kawisawi pu mi kha a lo nih bik miau siloh avangin, chutianga a bialpa hlui leh mihring nula lo inhmel duh ta pawh chu a hrethiam in a pawm thiam a, a dan tur ve reng ah a ngai nghet tlat bawk.

Chutianga inzui reng leh inbe fo ta na na na chuan an case te an lo chingfel hnai bawk nen, hmalam pan dun turin thu pawh an thlung fel ve ta diam mai a, Zorinpuii chu hlim tak hi a ni ringawt. Mahse, buaina dang a neih leh tak ber chu, tuna mi pawh hian a bum leh mai a ngem tih chu a ni. Amah chu han inzawt tluk tluk mahsela, chhanna neilo ber tu kha a ni mauh mai si a, a nih chuan, a bialpa thar hi a zawt phawng mai dawn emni ang? Ni leh lo, a engemah hmaa a buai em em reng mai chu le.

‘’ Bawihi, vawiin chu bazar lamah iva chhuak dun lawk ang hmiang’’ a nu in a rawn tih chuan alo hawi phawk hra. A chhan pakhat pawh bazar a chakkhai lam khawm vel tur hian a chhuah lohna a rei tawh viau a, Maliani rawn awm ve hnuah phei hi chuan vawikhatmah ala chhuak nawn leh lo hrim hrim. 

‘’ Khawnge Maliani?’’ alo ti ta nge nge. A nu lah chuan rang zet hian,

‘’ A nuamsam lo ve a, nizan atang khan. Kan rei dawn hleinem. Han insiam la ka lo nghak ang che ‘’ a tih takah chuan ihe lovin inchung lamah a tlan chho nghal a. A room a lut chiah tih in khumah chuan Davida kha alo thu reng tih ava hmu nghal. A phu ve zawk mai.

‘’ Vida, eng thil nge ni leh ta. Amy hnen atangin thu pawimawh I rawn keng leh tawh emni? ‘’ a ti nghal sar sar. Davida pawhin zawimuanga thawhchhuah țial țial pah hian a aw te chu alo thian ve kharh kharh bawk a. Aw tham deuh chual chung hian,

‘’ Amy chu I chungah hian a lawm khawp mai’’ rawn ti hmasa te te in, Zorini chu alo bangbo hman leh kher. Hawi deuh zak zak chung hian zawi sap in

‘’ Engah maw? A lawmna tur thiltih ka nei emni? Engmah ka nei hleinem’’ alo ti nghal zat zat. Davida bawk chuan nui suk chung hian,

‘’ Nei e, I hre leh tawh nange, thlarau vakvai pakhat tan thil tha tak I tihsak zawh chiah kha’’

‘’ Kan chingfel tep tih engtinnge I hriat theih a. Amy nise an hrem kha iti bawk si a ‘’

‘’ I mawl reuh hlemai. I mawl lutuk hi I dam tawpah ila thih ve ngei ka ring tlat ‘’ a rawn tih tak zauh ah chuan Zorinpuii chu a nui chhuak ta hak mai a, mahse, harhchhuak leh zawkin a hmui a hup zui thuai.

Chutah, Davida bawk chuan a hma aia thutak zawk hian,

‘’ Eng lo a nia maw Zorin, tunah hian Amy’n in inhmuh leh theihnan ruahmanna siam a tum mek a, mahse, hetah ni lo. Nangmah hian I rawn pan zawk dawn a ni. I thei ang tiraw?’’ a rawn chuan Zorinpuii alo phu zawk thei. Heng ho hian anti bangbo ve thin ngawt mai.

‘’ A nih chuan khawiah nge rawn kal tur. Ka duh alawm. Amy chu ka ngai a, ka hmuchak tawh takzet a ni’’ tih pahin a mittui rawn mittui tling piau te chu a han hru hul leh zauh phawt a, a nui lui ve hram hram bawk.  Țawngkaa sawi mai ai hian Amy kha a ngai a, a thlahlel a ni. Tihian, thiantha tia koh tur pawh nei mumal lovin a thenkual ve mai mai thin a, mihring damlai zingah hian a tan thiantha pakhatmah an awm ve lo niin a hre thin nghe nghe. Ni e, an awm miah lo. A hming chauh in an thian kha a ni ve a, thiantha nihna hlenchhuah hun tur, induhsak leh ngaihsakna lanchhuahtir hunah erawh anni ani chu hnuchhawn ah a țang leh thung thin si. A thiante nia alo hriat ve ho hian an hmaibal phihfai nan bak an lo hmang tak tak lo tih pawh a hrechiang tawh hle. Chuvang chuan, tihian zawimuangin a inlahrang hret hret reng a, a kalsan a, Amy phei chu tawng chhunzawm lo se zawng, a nun khawhar thin dan tur kha. Amy zarah a mit chu tihvar in a awm a, khawvel hi a hmuhfiah phah ve in sualna bawlhhlawh lo ngap tawh zia te thleng pawh hian a hre fiah zual zel a, mahni inhmangaih nachang te, midangte harsatna sutkiansak chak nachang te a lo hriat phah ve ta. Amy hian a nunah thiltha tamtak a rawn thlen a, sawi vek sen pawh a ni lo hial ang chu. Amy hi mitthi tawh thlarau mai mahnisela, van atanga van angel ten khawvel thianfai tura vantirhkoh an rawn tirh thlak ni hial a mawi hian a hre tlat. A ngaisang hluah hluah te pawh a tih theih ang chu.

‘’ Zing ni chhuah hmain inchhung hi chhuahsan la, tichuan, kawng reh leh fianrial tak, kawng ngil tha tak ni thei bawk se. Kawlkil lam hawia chutiang kalkawng awm tawh hrim hrim ah chuan rawn kal ang che. Chak takin I ke kha pen la, I theih anga chak a nih chu aw Zorin. Theihngilh miah suh. Tichuan, ni chhuah rual in thilmak chu alo thleng mai ang’’ ti zung zungin amah chu a hmanhmawh hmel ta hle a. A tawng bah nuai bawk niin a hriat.

‘’ Chuan, chu chu engtik huna tihtur nge. Zaninah a theih nghal mai em?’’ lo ti let ve sek sek in Davida’n a chhan leh hma chiah chuan a room kawngka a rawn intheh hawng  țhuai a, an hawi rual dun țhawt. 

Kawngkaah chuan Zorini nu ngei mai chu lo ding deuh run in ala hawi kual hrek hrek zui a, Zorini chu a hlauthawng hman kher. Chutah, a nu chuan chiang fek fawk zet hian,

‘’ Tu nge ilo biak leh tak mual mual a. iva rei em em bawk ve ‘’ Zorini chu za lo zetin a lo nui hak thung.

‘’ Ka zai a nih kha. Insiam vak pawh ka ngai lo a’’

‘’ Kha kha I zai dan a nih chuan I zaithiam awm lo hlemai. Studio chhungah pawh I laktlak chuang loh ang. Hrim hrim in insiam vak I ngaih loh te chuan rawn chhuk ta vat che. Ka nghak reng che tih pawh I hre vek sia’’  ti leh hmukin a inher a, a kalsan ta daih. Zorini chu a thaw zui huai mai a, mahse, khawnge Davida kha? Zawite tea a koh leh sar sar hnu chuan bathroom chhung atang hian Davida chu a rawn lawr zuk. Nui var var leh aw khur dar dar chung hian 

‘’ I nu khan min rawn hmu dawn emaw ka ti thut a’’ a kutin a hmai te chu a han zap hlau hlau bawk a, Zorini erawh a lo ner nasa ngei mai.

‘’ Hahthlak thin hlawm mange, chuan, engtik hunah maw han sawi chiang thuai the. Chhuah ka ngai a nia’’ a tih leh tak sekah chuan Vida pawhin thutak zawk hian,

‘’ Aw, a hun chu Amy ka zawt leh phawt anga, ka rawn kal leh dawn a nia. Ni hman nuam’’ tih pah hian a pil zuk a, a bo leh ta daih mai.

Inhnuai a zu chhuk leh zet chu a nu kha a lo meng dur tawh nasa. A fanu chu rum zeta rawn melh chung hian ram hmakin,

‘’ Sawi rawh. Tu nge ilo biak kha? Hman ata tawh khatiang khan I ti fo va, ka haider rei tawk ta e. Engkim hi min hrilh vek ang che ‘’ kuangkuah zui hmakin dawhkan chungah chuan a thu ta nalh a. Zorinpuii tan pawh eng thilmah hi zep bo tul in a lang tawh lo. Hrilh hre vek pawhnise engtinnge an tih vak chuan ang. Han inhauh chiam dawn in a tihluih a ni bik lo a, a nihna a lang fiah mai chauh zawk a ni. Tichuan, inbuatsaih em em pawh awm hran chuang lo chuan  a nihna chu a sawi zo ta vek mai a, a sawi zawh meuh chuan nu ber Pi Rinfeli chu a thidang lo chauh ni hian a hriat. A hmel te chu a dang nghal vek a, a ang deuh phuau mai lehnghal. Nu leh pa te chuan, ni leh lo, nu leh pa mai ni lo, I hmelhriat hnaivai te thil tawn ni turah khan han ruat chhin ve la. Zorinpuii chunga thilthleng thin te hi I rap viau ang nge, mak tiin I thidang hial zawk ang. Sawi thiam chu a harsa ve hle ang tiraw. Mahse, hetah hi chuan a thleng miau mai si a, thil thleng tura ruat lawk chu tuin nge thlak danglam thei bik tehlul ang ni.

‘’ Nu, I th em?’’ ti thuaiin, a nu awm dan danglam ta chu ngaihtha lo fe hian a va dawm bet vat a. chutah, rang zetin a nu chuan a ban chu alo vai thlak sak pawp.

‘’ Kalsawn the. Eng mihring nge maw I nih tehchai hi le. Nang hi ka fanu ini thei dawn emni? Ih, dawt hlir tiraw I sawi kha? Chuan, nangmah chauhin I titi mai mai thin a ni lawm ni? Ka fanu, natna I nei a nih hi. Damdawiinah kal ang aw. Doctor kan hmu a nga, I tha leh vat mai ang’’ a rawn tih tak hlawk hlawkah chuan Zorinpuii chu a nu kiang atang chuan alo tawlhsawn ve rawk rawk thung.

‘’ Ka tha vek. Engmah natna lah ka nei hek lo. E, leh lawkin, in fanu chu ka ni reng reng hleinem’’ ti leh hlak in inchung lamah a tlanchho ta nal nal a, a rilru a na kher. He a nunphung mak danglam tak hi an hriatthiampui theih mai a lo beisei tehlul nen khan, a thlawn zo leh ta vek si. Ni e, ani hi chu Amy tih chauh lo chuan an hrethiam thei ve ngai dawn l a nih hi. Amy a thlakhlelhna hi a sang tual tual a, a hmuhchak dan pawh chu turu tawh tak a ni. Davida kha rawn let leh thuai sela, engkim chu tihfel ni tawh se a ti kher mai. Tin, leh lawkin, amah hringtu a nu leh pa te kha eng ang mi nge an nih tehreng? An thlah te ah khan amah ang hi an lo awm ve reng a ngem le. A..ava han luhaithlak thin tehreng em. Thisena inzawmna kal chho zel chuan eng engah emaw inchhun fuhna te chu an nei dawn tih a chiang a, a tu ber chu nge maw a chhun tak ang le. Fahrah in enkawltu nu ber khan a lo hre khiah a ngem? Hria pawhnise, a,,a hriat chu a rinawm chiah lo chutiang thleng thleng chuan. Amy awm lo rei lutuk chu rorel dan tur pawh a thiam thei lo a, amah mai hi chuan eng thilmah hi a chingfel zo lo chu a nih ber hi. A nunah hian Amy a lian tawh lutuk a, thil lian tham engpawh ti dawn se la a thurawn lakna ber han awm ta lo chu a buai the zawng a nih hi a.  

Davida kir leh tak hnu khan ni 4 lai chu a liam leh tawh a, a rawn let leh mai tawh si lo nen , inchhungah lah chuan hrehawm tamtak a hmachhawn mek a, a nu leh pa te chuan an be duh lo mai pawh ni lo hian a melh pawh an melh peih lo hial. Amah be duh tu awmchhun lah chu Maliani chauh kha niin, ani nen lah chuti tehlua in an inkawmngaih chuang si lo va, an inchhung chu a hne hluah hluah tawh a ni ber mai e. mahse, a khat tawka Sangpuia rawn lang ve leh hlawl thin chuan tlemin a awm chu tinuam ve deuh thin mahsela, hlimna tluantling erawh chu a awm chuang hauh lo mai. Amy a ngai a, a thinlung zawng zawngin a ngai takmeuh. Chu chu a nimai e.

‘’ Țhiana, Bawihi hringtu diktak te khuaah khan kan kal chu a ngai a ni. Hetiang ringawt hi chu kei zawng ka hrethiam thei dawn hauh lo mai. Rilru nuam leh hlim hian ka awm thei der lo a nia aw. Ngaihtuah chiang ve deuh la, amah thlahtu te zingah khan hetiang mi hi an lo awm ve reng em tih te kan hriatchhuah a țul a sin. A nih loh chuan he thil hi ngaihthah chi a ni hauh lovang. Kan kan fanu hi a damlo mek a ni’’ ti sar sarin mut hmunah chuan Pu Chuauthanga te nupa chu rilru hah hmel fe hian an thaw leh hak thin a, pa zawk phei chuan thil thuk tak a ngaihtuah tih hriat tak hian a melh ngai a melh vung vung reng a. A nupui thusawi zawng zawng te pawh kha chhan let tumna a neih hmel loh hle. Chutah, Pi Rinfeli’n zawite a,

‘’ Țhiana’’  a rawn tih leh chiah chuan Pu Chuauthanga chu alo vin tha tawh kher. Lehlam hawia inleh vut pah hian,

‘’ Ngawi ve mai mai rawh. A lemchanna vek a nih hi. Eng thilmah tih pawh a țul hek lo’’ ti hmukin puan chu a sin tha leh te te a, a ngawi zui ta daih mai. A pasal awm dan avang chuan hamhaih zet hian a meng kual nghal ralh ralh ringawt a. A ngaihdan ah chuan an fanu hi a damlo a ni. Mahse, a chianna erawh engmah a nei lo thung si.

A ni nga naah chiah Davida chu a rawn lang leh ta heu mai. Zorinpuii chu dawr kal tura alo insiam lai tak hi a ni nghe nghe a. A rawn tiphu zawk lehnghal a nih kha. A lo inhnawih mek a foundation glass bur chu chhuatah keh chuaih khawpin a han thlauh pek a, a au ring the e.

‘’ Awi! Ramlian leh!’’ a’n ti zet chu Davida ngaih dan alo ni lo nasa. Chal chuar nang nang chung hian,

‘’ Tu nge Ramliana chu? David zorammawia ka nih hi aw. Mai mai a che!’’ alo ti let zek! Zorinpuii tihngaihna hre lo pawh a nui zui leh ta ngawt. 

‘’ chu, nangpawh I hmingah Ram tih a tel vang a nih chu I laktlak loh em em. Tak taka, ka uang aw ‘’ ti zung zunginz hmui a hup a, a nui zui leh kar kar.  chutihlaiin, Davida thung chua ngaihna hrelo zet hian a ding zum reng ringawt a, barakhaih fuhlo a intih hmel hle.

‘’ Thutak tawh rawh. Hun hi ka ngah vak lo a nia. Zing ni chhuah hma in rawn kal la, a kawng awm dan engkim chu I hriat vek tawh kha. Khawi hmun pawhnise rawn kal tawp rawh. A lo nghak reng ang che ‘’ ti leh vut vutin kal mai chu a han tum a, Zorinpuii a lo tawng chhuah leh tak avang chuan a han tawi khawmuang leh hret phawt. 

‘’ I lo kal ve a ngem?’’ amah chu chiang leh fiah zet hian a rawn en vang vang tih a hmuh chuan Davida chu a lungchhe teuh kher. A din dan te chu han siamtha leh te te in, ngui hmel pu fe hian,

‘’ Ka chak alawm. Mahse Zorin, khawvel mite hmel ka hmun ngun lutuk hian keimahah danglamna a awm thin a, ka awmna tur diktak thlarau khawvel lam ka thlakhlelhna a bo phah nasa thin em a ni. Enhgtikawng zawng mahin hetah hian  mihring damlai ang khan ka rawn let leh thei tawh dawn silova, ka tan hian a tawrh hrehawm ve thin em asin’’  Zorini pawhin mittui tling piau hian a thusawi lai hmel chu alo en ve kar. Zu hriatthiampuina thuk tak chu nei chiah lo mahsela, chhete tal chuan hriatthiamna chin a nei ve tho.

A hun a thleng ta. Zing dar 3 velah a phone alarm chu rawn ri ralin rang zet hian a hmet hlum nghal thuai a. amah pawh chu a inperh tho ve zat bawk. A hmai te chu phih leh te te in a helhhawlh tawh hle a, cream a inchulh leh thuak thuak hnu chuan  Sangpuia callin a hman tawh thu a han hrilh leh te te a, a biak zawh ah phone chu khumah thehthla leh tawpin bathroom ah bawk a lut leh nghal. Minute 20 vel a nghah hnu chuan an kawta Sangpuia motor rawn ding dat thawm chu hria in, a bag a la lawk a, a tlanchhuak nghal vut. Tichuan, khawmuang zui tawh lo in Sangpuia hriatna hmun, Davida sawi ang kawng ngei mai lam pan khan an tlan ta par par mai a ni.

Kawlkil lam hawia tlan zelin, kawng ngil tha zet chu an va thleng ta nge nge a. khua ala hma deuh bawk nen alo reh tha angreng khawp mai. Sangpuia'n motor a tih din rual chuan Zorinpuii chu a lo thaw deuh hawk mai a, a hmabak chu an phurawm rual rualin a huphurh ru angreng viau tho. Chutah, Sangpuia bawk chuan dimtea a kut chu rawn vawnsak pah hian a mitah tak a rawn en kal bawk a.

‘’ Kal rawh le, I hmabak chu va hlenchhuak ta che. Tha takin ti la, zam reng reng suh aw ‘’ a rawn tih deuh sap takah chuan Zorinpuii pawh tlemin a zangkhai ve leh thei deuh a. Tichuan, motor atanga chhukin a kein lei a rah rual chiah te chuan a mur chhuak vek hi a ni hawt e. A zam ve thlawt a ni e. A kal a, a kal zel a, Davida thusawi,

‘’ Chak takin kal ang che ‘’ tih kha hrechhuak leh in, a ke pen pawh chu a tichak ta deuh sawt. A han kal chak tak ngar ngar ah chuan a tha zawi lutuk te pawh kha alo tho ve tan ta a, a zang ta huai ni hian a inhria. A ke pen chu a chak tual tual a, a hmazawnah chuan eng thilmah a awm tawh lo. A awmchhun chu ral hla fe maia tlang lian tak pahnih in an karcheh kar atanga ni chhuak tur rawn in țham sen phut mai tih chauh lo chu thildang reng a awm tawh lo tihtheih a ni. Hnunglam chu a hawi let leh zuk thin a, Sangpuia reng reng a hmu phak tawh lo nia. Chubakah, khua kha ala eng chiang miau silo a hnunglam chu hmuh thui harsa tak hi a ni tawh awm e. A ke pen chu a tichak tual tual a, hah tawh tak a ni. Chutah le, ni pawh chu rawn chhuak tan ve siar siar in, Davida thusawi te kha a rilruah an rawn nghal mawlh mawlh mai. Zorinpuii helhhawlh dan chu pui tak hi a ni tawh.a ke pen ngai reng a alo pen lai chuan ni pawh ni pawh rawn chhuak sang ve tial tial in, leilung a rawn lang fiah tan ta. Chutihrual chiah chuan khawi atanga rawn chhuak nge tih pawh hriatloh hian amah ko tu aw chu a hre zawm ta vuai vuai mai a, a ke pen lai tawp chawtin a hawi kual ta zuk zuk mai. Amah rawn ko tu aw kha, ni e, AMy aw ngei a ni. Mahse, khawnge amah chu?

Chutia, a ding leh vei ena alo hawi tawn sek lai chuan a hmalam atang ngei hian aw bawk chuan a rawn ko leh ta a. chulam hawi chuan a lu a thle sawn zawk. A hmu ta! Amy ngei mai chu a kawrfual pek mawi em em nen ngei khan a hmazawn kawng ngil cham put leh hla ve tak si atang chuan a rawn phei ta zan zan mai a.  A lawm lutuk awmngaihna hrelo chu alo chiau chul tawh a, a lam pan pah chuan tlan hlir hian a tlan phei ta hlawk hlawk a nih kha. A tawpah zawng anni pahnih chu an intawng leh thei ta e. inhmachhawn ran chung chuan an han inmelh leh deuh vang vang phawt a, an mittui luang ngiai ngiai te pawh chu hruk tum reng reng an awm lo. Tunah chuan Amy chu a kut hmang ngeiin a khawih a, a kuah bawk a, a kuahna te pawh hi thlah theih tawh loh hial a duh rum rum nia. Zawi sup hian Zorini beng bulah chuan,

‘’ Kan nun hmalamah khan keiman ka rawn pan vang vang che a, harsatna leh buaina tamtak hmachhawn chungin ka inngainat tir thei hram che a nih kha. Mahse hei, tunah erawh keimah vangin hei leh chen hi I rawn kal ta chu a ni a, ka tana I inpekna hi Zorin, ka lawm takzet. Hmangaihna diktaka min hmangaihtu thiantha ka nei ve tih ka chiang ta ‘’ tiin Amy chu a phun sep sep reng a, chutihlaiin Zorini pawh kha a bang bik hauh lo. A lo insut ri leh hraih thin. Amy biang tawn tawn a dawm pah chung chuan a han tah nuih leh rih thin a, an hlim a ni. An hlim thlawt. 

‘’ Amy, tunah chuan ilo let leh ta. Kan khawvelah hian I cham hlen thei tawh a ngem?’’ a rawn tih chuan Amy pawh a lo bu vei nghauh nghauh a. 

‘’ I thawhrimna vang leh Pathian hnena ka tawngtai chhan in a awm a, tunah chuan thlarau zalen Amy ka ni leh ta! Ka hlim lutuk Zorin. Nang hi awm lo la chuan kan khawvelah khan hrem mek ka la ni awm si a, emaw, I hmangaihna duhawm tak pawh hi ka dawng awm silo ‘’ 

Chuveleh, Zorini chu lawm lutuk avang hian a lo tap chhuak leh hawk tawh a, an han inkuah tha leh rih thin. An hlim a ni. Chutia an lo inkuah vang vang lai chuan an bulhnai maiah hian khuh thawm hria in an inthlah dul ta zawk a, mahse, thil hlauhthawnawm lam ni lovin Davida kha nui  țha chung hian a lo ding ve reng mai a lo ni zawk a. 

‘’ Lungchim taka kuahtu tur hi ka duh ve khawp mai ‘’  a rawn tih ve sup takah chuan  Zorini chu a dinna lamah ava tlan phei thuai a, Davida lo inring lo lai chu ava kuah bet ta chawih.

Chutihlai vek chuan an lam pana motor rawn tlan thawm hi hre leh in, kawngsirah an lo insaseng deuh dial a. mahse, motor hmel a hmuh rualin Zorini chu a thaw zui deuh huai.

‘’ E, ka bialpa Sangpuia a nih hi. Amy lo kal r’u,’’ tiin motor lamah chuan a han hui leh vat vat a. Amy leh Davida thung chu an lo inmelh ralh ralh thung a, an mitko an san ta ak ringawt. 

‘’ Zorin, I bialpa hian I nihna vel hi a hriatpui takmeuh che em?’’ Amy chuan rilru hah hmel deuh a rawn tiin Zorini erawh alo la nui sang reng mai. Lu han buk zauh zauh pah hian,

‘’ Hriatthiampui lutuk tlat Amy, tun țum chu ka tifuh dawn hle niin ka hria asin’’ lo ti let zat zatin, Sangpuia thung chu a hawihai angreng hle a. A chhan pawh a bialnu chu mahni leh mahni inbe char char nimai a a hmuh leh hriat tlat vang a ni. A khawngaihthlak thei hial zawk dawn alawm le.

‘’ Ti r’u, lo chuang ula, haw tawh mai ang u’’ Zorinpuii a han tih leh pawh chuan Sangpuia chu a lo hawi a deuh he hu mai a. chutah, mawl hmel zet hian a bialnu bulah chuan,

‘’ Motorah hian an rawn chuang ve kher dawn tihna mi?’’ rawn ti deuh hu in, Zorini thung chu a nuih a lo za kher a. 

‘’ Ai! Ai! Ka bula an awm tawh te chuan thlarau angah pawh an inngai tawh lem lo. Zakthei lo deuh mai hi an nia ‘’  a tukkhum a ri zui fawk. Sangpuia tihngaihna hre tawh lo pawh chu a khat tawk hian a lo khi leh suk thin ringawt.

‘’ Eng nge maw Bawihi phone pawh chu a rik sek le. Ala harh thei miahlo tihna emni le aw?’’ ti chuar chuarin Pu Chuauthanga inhnuai chhukthla tur chuan a fanu phone ri chhen thawm chu hria in, phun hluk hluk chung hian roomah chuan ava lut zui nghal a. Khai! Zorinpuii reng reng chu roomah alo awm awzawng si lo. A phone erawh chu khum chungah awm in a lo ri pah ve reng bawk a. A ban zui nghal vat. Number save loh a nih vang chuan a lak hreh hmel hle a, mahse, a han lak rual chiah chuan lehlam atang mipa aw hian,

‘’ Zorinpuii maw, hetah Police Station atangin a ni a, inspector Zokhuma kha ka ni e. Hmannia I case rawn neih kha tunah chuan a hmawr kan bawk tan tawh a, courtah kan inhmu leh mai dawn a nia aw’’ tih thu chu rawn sawi zung zungin phone chu a dah leh ta mai a. Pu Chuauthanga ngaih chu a tha ta der lo mai. An fanu, naupang ang maia an lo enkawl thin hian an hriatpui hauh loh in an hnuglamah eng thil nge a lo buaipui thin ang. Engvangin nge kha police khan a rawn call nachhan ber. Eng case chungchang te nge a rawn sawi tak chiam kha ni ang le. Court te kha ala rawn sawilang tel deuh deuh lehnghal a. Patling pui e ti lo chuan a thin pawh a phu zui ve ta dup dup mai. An fanu hian buaina liantham ah ala hnuk lut mai a ngem? Pa rilru chu a buai ve ta tak tak ta. 

‘’ Eng nge kha tah khan ilo tih reng a. Thingpui a in theih tawh a nia. Eh! Khawiah nge Bawihi?’’  hnunglam atanga rawn titu a nupui vang chuan harhchhuak deuh zawkin phone chu khumah a dah leh te te a, riat nawi vel mai mai chung hian a fanu room chu a chhuahsan ta daih. 

A pasal awm dan mak zet chu hrilhhai takin nu ber chuan a lo thlir liam ve veng veng thung a. 

8

***        *****       ********       ******    ******     ******      ***     ****      ******  *****  ***