DEAR AMY __THEN HNIHNA

DEAR AMY__THEN HNIHNA

Vanlalpeki Fanai 

********************

Aw le, tun tumah hian nula pakhat Zorinpuii leh a thlarau thian, Amy te chanchin ngaihnawm tak kan ngaihthlak chhunzawm leh dawn a ni. A thawh khatna lamah khan a thlarau thian Amy chuan, a bialpa sual lutuk tak mai lak atangin Zorinpuii a chhanchhuah bakah, tuna amah enkawltute hi a nu leh pa dik tak an nih loh thu a hrilh a nih kha. Tun tumah hian eng nge thleng zel dawn kan ngaithla ang.

Zorinpuii dawr nghak ning lutuk chu a khat tawk a ham leh bai bai ṭhin in a mit a nuai zui chat chat bawk. Chutihlaiin a nau chhawr, Hmingtei leh Rohlua pawhin inchhaih hawr hawr pah hian bungrua an remfel vel mek a, a khat tawkin dawrtu an awm ve reng bawk. Chutia, mahni buai buai a an lo buai ve reng lai chuan Zorinpuii'n aw mak danglam a hre leh tlat tawh. A hawi zui ruai a, a nau te pahnih an nih ring a ava en lahin anni chu an lo la in ban zuau zuau reng a, amah chu rawn ngaihsak awm pawhin an lang lo. Tin, hetihlai tak hian customer takngial pawh an awmlo bawk ani. Chu aw nelawm loh zet mai a han hriat leh tak si ah chuan a awm pawh nuam zui theilo in a hawikual rulh rulh reng a,  a hmai a uang lo hle bawk.

"U Zorin, u Zorin, i ṭha em?" 

A hming a an ko mawlh mawlh thawm a han hriat thut takah chuan harhchhuak leh uarh in a hma lawkah hian an customer niawm tak, tlangval hmel fai tak pakhat leh a nau Hmingtei lo ding reng chu a hmu zui thuai a. Hmingtei zawk chuan ngaihṭhat loh hmel zet a amah chu lo en vung vung in tlangval niawm tak erawh kha chu alo nui var var thung. Maksak takin alo awm reng ani tih a han hriat takah chuan a zak leh hnuhnawh hle a, tihtheih a awm tawh mang silo.

"Aw, aw, eng thil nge ni ta. Kalo muthlu hman zuai pek anih kha" tiin thupha a han chawi ta zung zung a, chutah, Hmingtei zawk chuan ban chuar hian

"Meng kur chungin i muhil tihna mi?" Alo ti let khauh mai chu an bula tlangval kha lo nui ri leh hak in pawisa hi a rawn phawrh zui zat bawk a.

"Kha le, ka thil leina man aw. Meng reng chunga muthilh hi thil nuam dangdai deuh mai asin" rawn ti ve supin pawisa chu Zorini a pe a. Zorini tan chuan a zahthlak dan a thuahhnih ngei mai. A mitah pawh en ngam tawhlo in a pawisa kir tur a pe leh zung zung a, tlangval pawh chu a chhuak zui ve ta ani. Tlangval hmelṭha leh chhelo tak mai hmaah tih zah in a awm phah a, tunge maw khatia rawn kotu kha ni reng reng dawn le aw. Alo ngaihtuah zui nasa deuh mah mah chu ani. A ngeiawm takzet.

"Ka haw mai ang. Tlai lamah chaw ei chhuahna tur ka nei a"" ti leh in a tho zui a, a bag ak sawk sawk in dawr chu a chhuahsan nal nal.

A kawng kal ṭha lai te chu amah hual vel a kal ve reng, hmuhtheih siloh hian hual tlat in a hre leh ṭhin a, ding meuh in a han hawikual vel thul. Mahse, a rin ang a eng thil mah a awm tak siloh ah chuan ngaihṭha lo zetin In lam pan bawk chuan a pen zui leh ta hlawk hlawk zawk a ni. 

Vawiin hi Zorinpuii kum 27 na piancham niin, a lawmnan a ṭhian tlemte nen hotel pakhat ah zanriah kilho an rel ve a, chumi tur atan chuan ania, dawr pawh kha hma takah a chhuahsan fel daih ni. 

Inah haw hmasa phawtin a inthlak fel leh te te a, chutihlaiin a nu leh an nula lak thar Maliani, tleirawl ni zawk mah te chuan eirawng lo bawl dun in Zorinpuii pawh an lo be zui luam. Mahse, ani erawh chuan chhang zui em em hran lo in room lam a pansan ta zawk a. A room kawngka a hawng chiah tihin thilmak a hmu chhunzawm leh ta mai. A  mur chhuak vek a, a kawngka bulah chuan chelo hian a ding khawng ta reng ringawt bawk. Chu a thil hmuh chu engdang mah ni lovin hmeichhe kawrfual bal ṭet hrip hrep ha hi amah hnungchhawn zawng a tukverh bula alo din ngawih reng vang zawk ani.

"Amy! Ini em?" Zawi sap leh aw tham chil chel chuan a han ti thla ngawt a. Chu nu pawh chu alo che ve hrut mai. Mahse, ala ngawi reng thung. Amy kha ni tura a rin leh tak si ah chuan va kal hnaih hretin a khur dar dar reng thung a. Thlek hâ hâ chung hian

"Amy!" Ati leh sap. Ani chu rawn che leh hrut in amah lam hawi erawh chuab a rawn inher duh der lo thung. Chutah, zawite, rapawm ru deuh tak si hian a rawn nui ta kur kur mai a le   . Zorinpuii pawh a hma ai khan a ṭim nasa tawh awm e.

"I ṭhian hlui kha ka ni e"

Zorini chu alo meng buai hman lek lek a, mahse a reilo hlauh.

"Tu, tunge i hming?" Chu nu bawk chu a rawn nui leh ta kar kar. Mahse,

"Fahrah in a i ṭhian hlui ngei kha ka ni e" 

Ava ninawm zozai tak e aw. Chu thil ringawt pawh chu Amy pawh khan a sawi ngun tawh nangiang. Insehruh ṭeuh chung hian Zorini chuan

"Fahrah ka ni phiangsen lo!" Tih pahin a kawr haklai chu a hlip zui sawk sawk a. A hlau zui duh ta vak lo nge, awm ve lo ang mai hian a insiam san ta mawlh mawlh. Mahse, reivaklo hnu a a han hawichhuah leh erawh chuan kha nu awzawng kha hmuh tur alo awm tawh lova, chhete chuan nuam han tihlohna a nei ve det.

"Thlarau leh bawk" tiin a ner sak a, a insiam zui leh mai.

An chaw eina hmun tur hotel ava thlen ve nak chuan a ṭhiante ho chu an lo kim ṭhap tawh a, amah chiah an lo nghak tawh hi alo ni. A ṭhiante zing a a upa ber leh chhelo tak mai, Akimi chu rawn ding chhuak ve nghal zatin, aw zangkhai fe mai hian

"Awle, birthday girl pawh alo thleng ta a, kan ṭan thei chu ani mai lawmni?" A han tih zung zung hnuah chuan midang pawh lo bu zui tliar tliar in Akimi bawk chuan hmundang hawi zauh pah hian faifuk hmangin tuemaw chu ava ko zui raih a. A mi koh awmna lam Zorini'n a han hawi phei ve nak chuan le, chhun lama amah rawn dawrtu, alo chet zahthlak khumna pa ngei kha ani tih ava hre chat a, a zak lutuk chu a sen zui ṭawn ṭawn mai. Chu pa lah chu nui var var chung hian an lam pan in a rawn kal tak deuh deuh a, Zorini erawh alo hawi chhuak ngam tawh thlawt lo ani e. Mahse, an bul a rawn thlen chuan innel tih hriat deuh hian Akimi nen khan an inbe zui ta mawlh mawlh a, chu pa pawh chuan Akimi thusawi ngaithla a buk zauh zauh pahin Zorini chu  a rawn melh leh zauh ṭhin nia; ala nui var var reng lehnghal. Chutia, hmun leh hmun deuhthaw a a han hmuh leh takah chuan chhelo a tiin, a felfai thlup mai a, a pian nise a nalh narawh e. A sa inphut mawi tawk chiah leh a mawi tawk chauh a a biang chum  lam hlek te chuan ati lang duhawmin a lan chhiat phah chuang hauh silo. Sanglura ai kha chuan a naupang zawk daih anga, a innocent hmel fe zawk bawk tih zawng zawng thleng in alo ngaihtuah kim thlap hman anih chu. A kalsawn ta maw tih rualin a tho chhuak zawt a, Akimi bân chu va chelh zui leh rawk rawk chungin a meng phelh phung mai lehnghal.

"Kim, kha pa kha tunge a!?" A sawi zawh rualin a ṭhian dangte chu an lo eehh dual a, Akimi pawh a ṭhen ve sak tho.

"Hotel Manager hi ania, Zairempuia, ka ṭhianpa anih kha. Engati teh thut nge ni a?" Akimi'n alo tih takah chuan thaw deuh huaiin leh mak tihna la nei deuh tho chung si hian..

"Aa..chhunah khan min rawn dawr ve a, engmah ani hranlo, kalo che ṭhing deuh hlek alawm le" ti niah niah in midang chu an lo nui zui leh dar dar. Akimi thung chuan pangngai tak hian

"A fel asin Zairema hi chu, kan pa ṭhianṭha lutuk mai hi ania" ti leh zung zung in Zorini erawh chuan a lu alo bu nghat nghat tawh. Mak takin Zairema chu a mitthla ah a cham zui ta vung vung mai a, a nui hmel leh a hmel pawisawi lo zet te, a taksa lian leh hrawl em em mawlh mai te kha.  A lu chu thing zui nawk in a hawichhuak ve ta hram a, a room chhunga a thil hmuh te kha chuan chhete mahin a rilru an luah leh tawhlo chiang teh e.

Tichuan, chawhlui te chu kil hovin a ṭhiante'n wine an in sap sap laiin ani erawh chuan juice hi a in ve thung a, a hlim tawk ve viau tho. Akimi kai deuh tawh lah chuan ring fe mai hian Zorini chu rawn ko lauh lauh in

"Zorin, mate, zanin a kan thil ei in man zawng zawng hi Zairempuia khan min free vek aw! A nuam e!" Tih pahin a nui thler zui duar duar a, kut an beng zui dar dar bawk. A ṭhiante ho chu an rui tawh bawk a, an bengchheng in an thawm pawh a ṭha sawt kher. Mahse, chutia an ei leh in man lo free sak ve ringawt tur chuan Zairempuia nen khan han in hmelhriatna hranpa pawh an nei miah silova, mak chu ati ve det. Tin, a ngaih a ṭha fahran lo bawk. Amah hi nidang zelah te pawh a rawn zuam phah ang tih te a lo ngaihtuah kai leh daih tawh a. Heiham, engpawhnise, hlim tak hian hun chu hmang ve phawt mai teh ang ti rilru leh zawk in a juice chu a lem zui khalh a, a nui pah sen sen reng bawk.

"ZORINPUI!"

A mu tui lai chu harh zui kawkin a tho chhuak leh ta hlawl mai. A hawi hû hû a, thil hmuh zui phei chu a nei lem lo thung. 

"Tunge?" Tiin a hlauh luat vang a a thlanfim bawl te chu a hrui leh niap niap. Zawhna a zawh hnu reilote chhung chu thawm a han reh ve duak a, mahse le, thawklehkhat ah, hmeichhe zai rût rût thawm hria in, chu zai ri a han ngaihthlak chian chuan a hla sak chu a hriat hnu niawm tak pawh niin a hre ta hial. Mahse, chu erawh, a chiang ngam lo tlat.

"Rawn inlan rawh" a han ti leh ṭhat a,  khur ru der der reng mai. A sawi zawh rual chiah hian zai ri lah chu a ring tual tual emaw tih mai tur hi ani a, a hlau tawh nasa. A tihngaihna hrelo chuan a room chu chhuahsan in a nu leh pa te inkarah ava inthawlh ta kuk a. A muhil zui thei chuang hlek lo. Mahse, zing khawvar hma hret in a chhing ve ta diar diar a, thawh pawh a hai phah nasa teh e.

"Bawihi, Sanglura chu tualthah case in maw man anih tak a?" Tukṭhuan eilai hian a pa zawk chuan a rawn ti ve khauh mai a. An nula awmpui Maliani leh a nu chu an lo meng bial ve kawk kawk mai. Chutihlaiin Zorini thung chuan a lu lo buk nghauh pah hian a pa chu a melh deuh zawk a.

"Aw ni e. A tihsual leh pawikhawihna kha a ni miau si a, a ṭang rei thei ta biklo anih kha. Keini lam lah kan lo chiang ve miau bawk si a" a tih laiin a nu chu a rawn inrawlh ve vat.

"Kan te itih? Tu nen nge in ṭan dun reng reng a. Chanchin lah hi min hrilhchiang ve ṭhin silo a, Sanglura chu engpwhnise, a zialo hlemai. Mak pawh ka ti" alo ti ve hlak hlak. Zorini thung chuan nin hmel zet hian

"Ka ṭhian pakhat nen mawle. Engkim han sawi pawh hi a chakawm vak loh ve bawk. Thu lawmawm lam te alo ni chiah bawk silo nen" tih pah chuan a tho zui ta daih a. A pa bawk lo inrawlh leh in

"Chu, i ṭhian itih chu hmuh ve a va chakawm ve. Lo hruai ta che a rem hunah" a rawn tih leh erawh chuan a thin a phu nghal dup dup a, chhan tawhloh mai tur emaw ni a ti rum rum na in dik a ti leh chiah silo, aw ṭial zet hian

"Case chinfel anih hnu khan a kalbo leh daih alawm. A hna vangin vairamah a kal leh daih tawh" ati liam ta puat ringawt. Mahse, vanneihthlak tak hian a chhungte chuan engmah an zawt zui ta lem lova, a thaw huai thei nghe nghe. Tichuan, insiam zuiin dawr lamah a kal ta daih a. Amy kha a rilru in a ngaihtuah ta neuh neuh bawk. Lo kir leh har tawh ati a, a ngai reuh hle bawk. Tunhnai a amah rawn tibuai fo tu hi chu Amy kha anilo tih a hrechiang a, a ngaina lovin a ṭih ru deuh nghe nghe. Chumai pawhni lovin a hmel a rawn in lan ṭha duh der silova, thlarau sual leh chimawm tak pawh anih a ring thiam ve mai.

Dawr a thleng, a ṭhu fel chiah tihin kha tlangval chhelo em em, a ṭhiannu Akimi'n Zairempuia a tih ngei mai kha alo lut chhunzawm ve zat a. A lo che lai zui lehnghal ringawt tawh. Zairema chuan nui var var chung hian white paper a duh nual thu a rawn sawi sup a. Ani thung erawh in hmai sen ṭan ṭan in alo en ve kiau. Hetihlai hian tirh mai turin a nau te an la awm tlat silo a, khup sai hlak hlak chung chuan a tho zui a, chuti em em a chu pa hmaa a han lai chhe ṭhin mai chu a awm ang lo ati viau mai. A in ten ru hle bawk.

"I damsam lo emni? Iva khur nasa em" rawn ti sup tu avang chuan a phu deuh zawk a. Hnunglam hawi a Zairema hmel a va en nak chuan uluk zet leh ngaihtuah hmel tak hian ani chu alo thlir reng mai. Za lo zet a nui lui ve halh in

"Aa. Aih, haha. Dam lutuk e. Ka khur nasa ve thei hrim hrim a" te ati kual ta nawk a. Zairema ve thung chuan mitko lo san deuh âk chung hian

"Aw anih chu. Ava mak duh dawn ve aw"

"Kha aw, i duh ang zat chu" tih pahin dawhkanah white paper chu a han chhawp hnawk a. A man rawn pek tum a Zairema'n pawisa a rawn lek chhuah lai takin ani thung chuan nui var var pah hian

"A ngai lo. Min pe duh suh. Ka birthday a thil engkim min free avang khan hei hi ka lawmthu sawi ve na ni rawh se" alo ti thung. Pawisa chu pek luih ngial pawh tum mahse a duh miau loh avangin a tawpah zawng, Zairema pawh a beidawng ve ta ani ngei ang, lawmthu te sawi luamin a chhuahsan ve thei ta hram a ni. A chhuak fel chiah tih in a han ṭhu deuh hnawk a, phun hmuar hmuar chung leh heh ti sawi nawk nawk chung hian a khup te chu a chum zui pawp pawp. Nia, tlangval chhelo awm lai kher a an lo khur leh hlawk hlawk ṭhin hian a ti mualpho lo chauh ṭhin chu anih hi ah.

Nileng maiin a bengah chuan amah ko thawm niawm tak hi a cham reng a, a tu a te mah chu amah han ko hmel pu reng an awm map bawk silo. A buai leh ṭan tlat mai chu eng nge thil awmzia ni ta ang le. Amy nilo, thlarau dang amah chenchilh a awmchilh reng tu hi an awm leh ṭan tawh zawk emni ang.

A zanriah eikham, a room chhung a lut, light a han on chiah chu, a room side table chunga tuemaw, hmeichhe pakhat kawrfual bal zet ha niawm tak lo ṭhu hi ava hmu fuh ta mai a. A phu zuang zawk na in rawl erawh a chhuah ring hman lo hlauh.

"Tunge inih?" Atih hlak hlak lai chuan chu side table a ṭhu reng hmeichhe samtawi muat mai chu rawn lehhawi in an in melh zui ta reng ringawt. A hmel chu a rapawm zawngin a awm hauhlo na a, a bal in a mit lian hle a, a meng bial kuau mai. Chumai pawhni lovin ala nui hui leh ta nghal a, Zorini chuan khawilai ami emaw rilru kimlo hi rawn lut ta mai ni tur ah a ngai hman hial nghe nghe. Mahse, chu chu thil nihdan erawh a nj ngawt thei bawk silo. A buai ani. Chutia, reitwk an in melh vang vang hnu chuan hmeichhia chu rawn ṭawng chhuak hmasa ah ṭang in

"Zorin" a ti a, a nui zui kur kur mai. A aw mawlh mai kha vawitam tak  alo hre tawh ṭhin tlat nia. Ni e, a awm mai mai leh a mu tui lai te a hming ngei a rawn ko leh zaikhum tawh ṭhin tu aw ngei kha ani e. A chiang lutuk. Chutah, Zorini chuan ban deuh chuar hian

"Nang, nang hi ka hria che" chutia a han sawi  takah chuan a hmaa ṭhu chuan phur hmel ta riau hian a rawn en leh a, a nui sâwng reng bawk nen a mitmu lian kel kawl nen a hmel chu chhelo hle mahse, a balh bawk em avangin a hmuh chu a hahthlak lam hret ani e.

"Aw, i naupanlai ṭhian, Rindiki kha ka nih hi. Didik, min tih ṭhin kha"

"Aih, chutiang nilo in, i aw zawk kha a nia ka tih chu"  a chal a dawm zui vang vang. Rindiki erawh chuan la phur fe chung hian

"Aw, kalo koh ziah che kha. Chuan, kan tetlai pawhin kan inkawm ṭhin bawk alawm"

"Ka hrengai lo che!" Chu thu zet chuan thlarau Rindiki lung chu a ti awi vaklo ni tur ani. A tum zui ta bûr mai a, a meng hnual nghal rawih bawk. Alo phur ve tawh tehlul nen Zorini chuan a aw chauh alo hre ṭhin zawk ani reng si a, engtinnge anih theih zawk le ati hial mai. 

"Anih chuan, nang hi mi nung damlai i ni tawhlo tihna ani thei em?"

Phur fahran lo chungin Rindiki chu alo bu leh zuk zuk a, ṭawngka chuan a chhang tawh lemlo thung. 

"Chuan, eng ti turin nge helai hmunah hian ilo kal tak le"

Zawimuanga rawn hawichhuak in a mitah tak a rawn en leh ta kuau mai a. Zorinpuii pawh alo zam ve lek lek thei. 

"Thudik engkim hrilh hre tur che in kalo kal"  

Zorinpuii chu alo chek zui tlak tlak mai a, a heh a pet sawi zui pan pan bawk.

"Thudik hriattur te ka lo nei ani maw?" Ti supin ngai pawimawh lo tih hriat zet hian bathroom ah a luhsan ta daih a. A hmai chu a phih zui phar phar. Bathroom aṭanga a chhuah leh erawh chuan kha thlarau kha lo awm tawhlo in a reh ṭhiap tawh thung a,a mitko chu san zui leh âk in a thaw halh bawk.

"Thlarau maksak zet zet hi ka tawng ṭhin a" ti zui sap in a hmai chu cream a tat leh mawlh mawlh a.

Zairema khan kuah in alo nuih var var a, a kutah chuan chelhsak zuiin phul hmun hring mawi em em ah hian alo tlanpui dawr dawr mai. Chutia hlim taka an tlan dun reng lai chuan an piah hla deuh takah hian tuemaw, anmahni lo thlir reng tu niawm tak hi Zorini cbuan a mitsir in ava hmu leh zeuh zeuh ṭhin a, a awm a nuam ta hauhlo mai. A tlan lai chawl meuh a a thil hmuhna lam a han en chian nak chuan an nula awmpui Maliani niawm tak lo kal liam tur chiah hi ava hmu ta a. Hla tak aṭang chuan a hming lamin a han au zui vau vau ṭhin a, mahse, a hre thei lo nge Maliani thung chu a rawn hawi thei tawh ṭhaklo. Eng thil ti turin nge maw chulai hmunah chuan a rawn awm daih theih ni tih alo ngaihtuah lai takin amah ko thawm a hre zui a, a mangram nuam tak ata chu a harhchhuak chiang kher bawk. A han men chian nak chuan a nu ngei mai khan a hmai bul set sawtah hian alo bih reng chu niin. A meng phar awn awn a, a nu chu a tawlh hlat san vat. Mangang awrawl lawi zet hian

"Nu, eng nge khatia min lo en reng a. Eng nge thil awmzia?" A tih tak chulah chuan a nu pawh rawn pangngai leh vatin a mit te chu a han khap deuh suk suk a. A lu a thing zui nawr nawr bawk. A khawsak dan chu a fanu chuan a hrethiam lo hlemai.

"Aa eng em em ni love. Ka mit hi a na dawn nge tih pawg ka hrethiam biklo. A fiahlo ruai reng mai a tunlai chu"

"Chupawhnise, khatiang em em a han in bih hnaih te chu a. Ka hlau hman ṭep che anih kha" alo ti let ve khar khar. Chutah, a nu chuan nui deuh suk in

"Lo kal rawh khu, inleng inei ania" tih leh chhuah a rual a. Zorini thinphu erawh chu reh zui mai thei lovin a awm ngai chuan a han awm leh ren rawn phawt. Mahse, reiloteah inthingharh in room chu a chhuahsan a, inhnuaiah chhukthla zuiin, inhnuai a han thleng chu, Zairema kha ṭhutkhawmna lamah alo ṭhu deuh run nia mawle. Chutia a mipa vei ruk em em hmel a han hmu ta thut chu, awmdan tur a hrelo hle a, a lai chhe zo leh ta vek hi ani ber e. Zawimuang a pen chhat chhat in a bulhnaiah ava ṭhu ve ta hram a. Chutihrual chiah chuan Maliani khan thingpui a rawn chhawp zui ve chat bawk. Chutia, anni pahnih hmel a han hmuh leh takah chuan a mumang mak tak kha hrechhuak zui leh uarh in a sawichhuak hman lek lek mai a, mahse, mumang mai mai tiin a ṭhulh leh ta zawk a ni.

"Zanin chu kan hotelah chawhlui kil dun ila! Lawmthu sawina ah min ngaihsak la!"  Zairema'n a rawn tih chuan a ngaihtuahna ata harhchhuak zawk in a hmel pawisawi lo zet chu ava melh zui ta thuai a. Lawmthu sawina atih chu a man phaklo nghal hle bawk.

"Eng, engtia lawmthu sawina nge?" 

Hmai zangthal hâ chunga a han tih let ve takah chuan Zairema pawh lo nui sakin a thaw deuh ham ham. 

"White paper a thlawn a inpek ngawt thu a awm hleinem!" Zorini chu a harhchhuak kawk thei. Chutah, a kut phar chhuak hluai chung leh awki sang angreng fe hian

"Aa khang te chu ka lawmthu sawina zawk anih kha. I tan eng thil mah tih ve zel a ṭul lo ania" a rawn ti deuh hlut.

"Umm, anih chuan, zanriah ei chhuak dun turin ka sawm thei che angem? Lawmthu sawina kha chu dahṭha ila" aw ngaihnobei zet a Zairema'n a rawn tih leh takah erawh a hmui chu a chip chiang hle a. Ṭawng miahlo a in melh dun leh vang vang in a tawpah zawng, a pawm ve tih hriat nan a lu chu a bu ta nghat a. Zairema pawh a lawm hle tih a hriat, alo nui leh var var mai. Tichuan, phone number te in pe zuiin tlai lam a inhmuh ngei tum chuan an inthlah ta phawt a.

Zairema a chhuak chiah tihin a nu chu a rawn lang chhunzawm ve zat. A hmelah chuan phurna nasa tak hmuhtheih in a thatho hmel hle lehnghal.

"Iiii Bawihi, tlangval chhelo leh smart tak anih kha le. Khawi ami nge. Awi ka fanu, a duhthu che a sawi anih chuan maw, ṭha takin chhang let ve ngei ngei rawh" a rawn ti deuh hluah mai. Hei chiah hi ania a nu mizia a hne ṭhin em em na pakhat chu. A diktak chuan Sanglura pawh kha a tirah a duh hran lo a, mahse, a nu cheng chawng bawk hian mi hausa fapa mal a nih thu te hrilh awl lovin a duhpui hlum lo chauh ani si a, a hnuah erawh a nungchang te khan hip chho in a hmangaih ve ta hial ni khan a inhre nghe nghe. Mahse, a tawpna erawh kan hriat vek tawh thung kha. A nu alo inrawlh ve tawh hi chuan engmah hi a fel theilo niin a hria a, tun ṭumah pawh hian lo inrawlh buai ve lo law law se a duh takzet mai. Ni e, Zairema hi a mipa chhelo tih zawng tak chu ani ngei e, mahse, hun reilote chauh liam taah khan alo tihsual chhiava tawh avangin hmangaihna hi a hua a, mipa dang awlsam taka han hmangaih leh thei mai tur chuan a inring chiah lo. A dik alawm, khawhar hnemtu chu a mamawh tehmeuh mai. A nunhlui leh a kalsan tak hringnun te kha hriatthiam sak a enkawl thei tu chu a mamawh lutuk tlat. He tlangval, pawisawi lo hmel tak leh dam thlup mai Zairema hian chung zawng zawng te chu a rawn phuhru zo meuh angem tih chu kan lo thlir dawn a ni.

[0:20 pm, 12/10/2022] Peki: DEAR AMY-SEASON 2(2)

"Zorinpui, zanriah eitur in kha pa kha chhuahpui miah suh ang che" aw hian a rawn ti leh ringawt tawh. A ṭhutna bawr vel thlek pah a hawi vut chung hian

"Eng aiah maw ka chhuah pui loh ang?" Ti chhuak ṭhat in a nau chhawr te pahnih pawh amah en chuan an rawn hawi rual nghal ṭhawt a. Chu chu hria in Zorinpuii pawhin chhuanlam alo siam zung zung. A ṭhutna aṭanga tho chhuak in a bag bawk chu a la leh sawk a

"Tlaiah kalna tur ka nei leh a, dawr chu in kutah awm leh mai rawh se aw" hmanhmawh ru taka ti chung hian a nau te chhanna pawh nghak tawh lovin a chhuak zui vut. A kalkawng tluan in inhnialpui tur a nei chhunzawm leh ta nghal a.

"Rindik, i tan eng nge ka nih a, min tihbuai reng mai le. Kalbo tawh rawh" ti hluk hluk in a pen pâwk pâwk a. Mi tamna lai ah phei chuan en a hlawh in an melh hrek hrek  hlawm ani tih pawh a hrechang tawh lo hial. Rindiki lah khan a hnung mai ah zui ve zel in zawi sup hian alo chhang let ve hmuar hmuar reng a. A ṭawng chu zawiin mihring thawm pawh tam hle mahse, Zorini erawh cbuan a hrefiah ngang mai thung.

"Zorin, pawi ka ti khawp mai. Ani pawh kha itan hian mi ṭha ani dawn lo tlat ani" a rawn tih leh chuan ding meuh in a han leh hawi a. A mengrum nasa tawh teh e.

"Nang hian engmah i hre lawk lovang e a. I hmel aṭang hrim hrim pawh khan i fing dawn lo tih a hriat! " ti let erh in a inher vut a, a pen zui leh hmawk hmawk. 

Inchhung an lut a, a nu chuan lo be sawm chiam mahse a mood ah a awm tlat lo. Chhang let lem lo hian a room a pan nghal nal nal a, room a han lut chiah chu darthlalang hmaa hmeichhe pakhat lo ding reng hi a han hmu zui leh ta mai. A phu nasa lutuk chu mit deuh sulh in a âwm a dawm zui ta vang vang. Mahse, tuemaw lo ding reng chu tudang ni lo in thlarau Amy ngei kha alo ni ta tlat. Chu chu a hriat in Zorini pawh a pangngai leh vat a, a nui ta sen sen mai. Amy pawhin hlim hmel lo hmuh ve thuai in ,aw ngaihnobei leh zawi sap hian

"Ilo damṭha em Zorin?" A rawn tih takah chuan Amy lam chu rawn pan hnai thuaiin a hmaah a han ding det phawt a. A mittui a parawl kiang thei nia. Ni e , he thlarau hi a ngai in alo thlahlel ve tawh em atin ni. Amy chu hel kual that that pah hian

"Amy, nangmah taktak ini em?" A han ti leh ngawt ṭhin a. Ani chu alo nui deuh hak hak. Chutah, a kawrfual hak lai hmawr pawh parh pah hian

"Ni chiang e, hei i kawrfual min pek te zawng zawng nen khan kalo kir leh alawm. I bulah hian kalo let leh ang ka tih kha theihnghilh mah ta che" tih pah chuan Zorini darah ava vawnsak zui a. Chuveleh Zorini pawh in a kut chu lo vawn sak in lungawi hmel zet hian a chhing zui ta diar diar. Chutia anni pahnih inthlahlel tih hriat taka an ngawih dun vang vang lai chuan khuh thawm hria in, thawm lo chhuahna lam en in an hawi rual dun vat a. Kawngka bul a lo ding ngawi reng, Rindiki kha alo la awm ve reng ani tih an hre chiah. Chutah, Amy chuan Rindiki kawh zauh pah hian

"Ka nau, thlarau khawvela ka unaunu,Rindiki anih saw. I hriat ve tawh tho kha" alo ti sap a. Zorini erawh a meng dur zui nghal hle. A thawmhnaw hak lai hlip leh sawk sawk in

"I nau hi hrilh rawh. Zaninah zanriah kilpui tur ka nei a, alo remti lo ve ngawt ania" a han tih deuh hmuk ah chuan Amy thung chu alo meng tal tap mai a. Thaw zui leh halh in Zorini bulah chuan a va pen hnai hret. Chutah, zawi sap bawk hian

"Zorin, Zairema kha i chhuahpui tur a nilo. Didiki hian a sawi dik reng alawm. Kha pa pawh kha i tan hian mi ṭha ani dawn lo ani"

Amy lehzel pawhin chutiang thu a han hrilh ta chu Zorini a lawm tawh lo hle. A kawr ken lai chhuat a paih sawk pah in a meng dur khap khah hlemai a. A insehruh pan pan bawk. Mahse, a tu a te mah chu be chhunzawm duhlo in bathroom ah a luhsan daih a, chutihlai chuan Rindiki zawk khan Amy melh chung hian a mitko alo san vei âk thung. Amy pawhin Zorini luhlul zia hi chu hre ve tawh in 

"A duh chu tih tir phawt ang" ati ve ta ngawt.

Bathroom aṭanga Zorini lo chhuak leh chuan anni pahnih ding ngawi reng chu rinhlelhna nen a melh tawn zak zak pah hian khumah a ṭhu hnawk a. A phone ban leh zauh pah in

"Ka chanchin in lo sawi emni?" A han ti thla ngawt a. Chuveleh, anni pahnih thung chuan lu an lo thing zui nawk nawk. A phone chu a beng a chuktuah leh in

"Aw Zairem, i hman hunah min lo sawm phei mai rawh aw" ti nghatin phone chu khumah a thehthla leh tawp a, a insiam san ta mawlh mawlh. Hetihlai tak hi chuan thlarau pahnih te kha hmuh tur an awm tawhlo thung a, khawiah nge an kal tak tih chu Zorini chuan a hre nek love.

Sawi lawk tawh ang ngeiin Zairema pawhin Zorini chu a rawn sawm ta thlap a. Chu zanah chuan Zorini tan zahna tur thil engmah thleng zui lo in boruak ṭha leh muanawm tak hnuaiah a ṭhianpa nen an hotel chhungah ngei chuan zanriah tuihnai tak kil dun in an hlim dun khawp mai.

"Zorinpui, tho rawh! Tho vat rawh!"

Zorinpuii mu tui lai chu pawh thawh nawk ang mai hian a ṭhu chhuak lawp a, a hawi buai nasa teh e. Mahse, a hawi buai rei lem lo thung. A chhan pawh, a bul lawkah chuan thlarau pahnih Amy leh Didiki te kha an lo din khawng reng vang ani a. Chutia an hmel a hmuh leh takah chuan pangngai zui leh thuaiin thawk a han la deuh halh phawt a.

"Nangni pahnih leh bawk maw ni a? Tun ang hunah eng thil nge ni leh ta?" Ti zui chuar chuar in a tho a, tui ava in zui khawlh khawlh.   Chutah, Amy chuan inthlahrung aw dai hian

"Zorin, tunah hian zing dar 8 a ri tawh a, damdawiinah kan kal thuai a ngai ani" rawn ti sap in a bul a ding ve reng Didiki chuan lu alo bu nghat nghat bawk. Mahse, Zorini chuan bung nghut a lo chhang let in

"Damdawiinah chuan eng nge ti se min tih a? A hman pawh ka hman lo hrim hrim" ati duh lek.

"Record bu enfiah tura kal a ṭul tlat ani Zorin"

"Engatan maw? A thuhrim in chutiang te chu dan phalloh ania, pawnlam miin kan en ngawt ngawt thei hleinem. In mawl dan em em hi aw"

"Tihdan a awm ang, min ring rawh. Min zui tawp la a nimai"

Zorini chu rilru hah hmel zet hian alo thaw ve hak a, a ning tawh kher.

"Engpawhnise, record bu en chu ka tan a pawimawhna min han hrilh phawt teh u"

Amy leh Didiki chu an lo in melh zawk a, chutah, Amy zawk bawk chuan

"Zorin, a hma pawh a kalo hrilh tawh ang che khan, nang hian i chhungte i zawn chhuah an ṭul ani"  tih pahin lungngaih hmel zet hian a kun zui ta daih.

"A mak ka ti Amy. Fahrah ka ni lo, ka tih vek tawh kha. Eng aiah nge nang hian min rin theih miahloh le"  chutihlai chuan Didiki zawk kha lo inrawlh ve vat in

"Zorin, eng ang pawhin kan thusawi hi awihlo mahla, nangnen hian fahrah inah khan kan cheng dun tawh tho tho. Duhlo hle mahla, chu chu i pawm a ṭul miau"

Rum zet hian Rindiki ṭawng mawlh mawlh lai chu a rawn melh rawm rawm reng lehnghal a, a hmel landan aṭang ringawt pawh a ning tawh in a hne hluah hluah tih a hriat theih awm e. 

"Chuan, eng ti tur ber in maw min duh a. Tin, ka nu leh pa te chu zawngchhuak pawh ni ila, engtin vak nge ti se min tih? A lem e"

Amy alo inrawlh ve vat.

"Zorin, an chenna chu keini hian kan hria. Chutia, va zawn chiam pawh a ṭul hran lovang. Mahse, nangmah ber hian i nihna i hriat a, i pawm ngei theih hi kan duhpui tlat si che a ni. Chuan, anni khan an la beisei reng che a, an ngai in an thlahlel bawk che. Nangmah nghak hian nitin an hun leh tha an seng thlawn ṭhin asin"

Chuveleh, Zorini chuan vin leh fiak ṭhak hian

"Min ngai a, min la thlahlel si anih chuan engvangin nge home ah min hnutchhiah a. Sawi teh u, nangni hian dawt vek anih hi in sawi char char le. Tun aṭang chuan keimah in min awmtir ula, zalen takin min dah tawh ta che u, ka phu ve lo emni? In thusawi engmah hi ka awih therte lo ania aw" ati leh ta hrep. Chutia a tih aṭanga minute 10 pawh ala ral lovang tihtur ah Maliani kha lo kalin Zorini chu maktih hmel fe hian a rawn en ta reng mai a.

"U Zorin, ka pi in tinge i au leh tak vak vak a ti che a. Khu, inleng anei a, ṭawngṭai dam thei a inti in ka hria, lo chhuk ve rawh se ati nghe nghe bawk che ania" 

Hmm, leh bawk a. A nu chuan eng in sawiselna nge alo neih leh tak ang aw. Ni dawn tak e, a mit kha a sawisel fo tak alawm tunlai chu. Maliani chu melh zawk pahin

"Umm, kalo chhuk ang"  ti hmak in bathroom ah bawk a lut zui leh ta daih a. Makti tak hian an lo thlir zui ṭhap.

A inbual zo, inhnhnuai a han chhukthla chu, a rin ang ngeiin ṭawngṭai damthei inti Pi Khuangchhingi bawk kha alo awm leh tawh a. A nu nen inṭhutchilh ran in an lo titi mawlh mawlh mai. Chutihlai vek chuan sofa pakhat zawk ah hian insi rial in thlarau pahnihte pawh kha an lo ṭhu ve reng. Zorini hmel an hmuh rual chuan nuih sak pah in Amy zawk in

"I nu hi tunlai chu a mit a ṭhalo tih ka hre mai"  alo ti sap a, a nui zui leh var var. Zorini chuan a chhang let ṭep a, mahse, harhchhuak leh zawkin ngawih a chuh ta thung. Tichuan, Pi Khuangchhingi ṭawngṭai duah hluah darkar chuang fe a ngaihthlak leh hnuin dawr lam a pan ve ta chauh a. A thuhrim in a nu hian engvang nge maw Pi Khuangchhingi ṭawngṭai lai hian a koh ve zel nachhan hi a hrethiam theilo ani e. Mahni thu a ṭawngṭai nachang hrelo ati te pawh ani ta ve ang a. A ṭha vel vek e.

"Naktuk chu in ṭhianho khan hotel ah zanriah tur kalo buatsaih sak leh ang che u chu"  Zairema chuan call hmang hian a rawn ti khauh mai. A ngaihna a hriat lemloh avangin Zorini thung chu alo meng zau kawk hman a. A insiamṭha leh vat thung. 

"Eh! Engvang teh ngawtin nge chutiang te chu aaaa i inseng hnem leh dawn lutuk" a ṭawng te pawh a bah nawk ta mai. Zairema pawhin nui hak hak chung hian

"Tunkar kan hotel tlawhtu leh mikhual kan neih ṭhat em avanga a lawmna tur mawle"

"Aw haw! Chungte chu, thawktu ho nen in lawm tur ani zawk dawn lo emni?" Alo ti let vut. 

"Nia, kan lawm dawn tho a. Nangmahni kha ka ngai pawimawh hmasa zawk che u tihna anjh ber chu"

Zorini pawh a hma aia thutak zawk hian a in ngaihtuah zui ta vang vang. Ṭha a ti in a chak ru viau bawk si. Lehlamah zahthlak tihna chen a nei ve tho bawk nen. Chutia an hotel tan pawh engmah thiltih nei ve silo, a thlawn a va ei leh nghek zel mai chu a zak ve pah reng. Mahse le, a ṭhian te thu thu anih thu hrilh in an inbiakna pawh an ti tawp zui ta phawt a. Akimi a be nghal vat. Ani lah chu amah ai mah a lo phur zawk in an ṭhian dangte pawh alo sawm nghal tur thu a sawi ta zung zung a, an hlim dun ta kher.

Chutia hlim taka alo nuih vur vur lai chuan amah phatsan a bum tawh tu, a ṭhian hlui Liandingi kha dawrah chuan lo lut ve hlawl in, a hmel lah chu a hlim loh hmel em em bawk. Zorini chuan lo biak mai nachang a hriatloh bakah a be chak tehchiam hran lo hle. Amaherawhchu, amah ang tho a mipa laktlak loh tawng ve tho kha ani a, tlem chuan khawngaihna erawh a nei ve deuh e. Chutia a dawr meuh a rawn teilut ve ta chu, lo biakloh ngawt chi ni heklo. Phur lutuk lo leh zawi sap hian

"Eng thil nge i duh ve tehmial a?" Tiin a mit ah pawh a melh duh map lova. Liandingi erawh alo hui leh pap pap ṭhin thung. Reimawi tawk tak a han ngawih leh vang vang hnu chuan rawn ṭawngchhuak ve in a aw te chu a khur der der leh ta nghal.

"Zorin, mate, i chunga ka chet dan zawng zawng ah khan i mi ngaihdamna beisei phak tur ni tawh lo mahila, heti ringawt hi chuan hrehawm kati em mai. Ih englo, kei hi min la ngaidam thei ang tiraw?" Ti chungin a meng khup zui lap mai. Zorini pawhin a hmel chu chiang taka lo en ve reng in, a tunhma nun a a pawikhawihtu kha lo ni tawh mahsela, a ṭhian anih na ang leh a hmeichhiatpui a nihna ah khawngaih a lainatna chen a neilo thei bik silo. Chutiang rilru a put theihna chhan tak zawk erawh, a rilru ṭhat vang chaub ani ngei ang le.

Zawimuang a a ṭhiannu kut chu va vawnsak de de pah in

"Inthiamlo lutuk mah ta che. Ka chungah hian eng pawi liantham mah tihsual inei hleinem. A ho lutuk, hun liam tawh anni a, theihnghilh tum tawh rawh. Keipawhin ka hriatreng tawh loh hi. Thingpui in ang aw" ti sawk sawk in a nau te chu eitur lam tur chuan a tir liam nghal a. Reiloah chhanna nem chuan Liandingi lungngai hmel pawh rawn ti danglam in a nui zui ve ta sen sen mai.

"Zorin, naktuk tlaiah chuan hotelah khan i kal ve tur anilo ang" a pindan chhung a lut chiah tih in Amy kha alo phe nghal vut vut a. A rilru a buai hmelin a hmai pawh a uang hran lo fe mai. Zorini erawh in a bag chu khum a thehthlak sawk pah hian

"Keimah ber min sawm a, ka kal loh ten le" alo ti nghat.

"Hun i ngah lo ania aw Zorin. Chubakah, he Zairema pawh hi i tan mi ṭha ani lo tih kan hrilh tawh che kha" 

Amy chu a dang duh hauhlo mai. Mahse, Zorini thung chu inbengdai hmasa ah ṭang in a thinrimna te kha a thup zui ve hram hram a, zaidam zawk hian

"Chungte chu kan la hre chhawm chho zel dawn alawm duhtak Amy. Ka'n intifai ve phawt ange aw" ti chung a kiai sak in a inthlak khum leh ta mial mial mai. Thlarau pahnihte erawh an lungawi tehchiam lo hle tih chu an hmel aṭang pawh a hriat theih awm e. An meng dur khap mai.

Chu zanah chuan eng thil danglam mah thlengin ti zui lemlo mahse, Rindiki zawk chuan zankhua in a zaikhum char char a, a hneawm kher. Zai bengchheng tawhlo hram tur a a han tih lahin Rindiki thung chuan a hla sak chu ngun taka ngaithla tur leh thil engemaw tak hriatchhuah tum turin alo ti then mai si a, Zorinpuii tan hriatchhuah mai tur a vang in a hla sak kha hriat tawhna nei mahse, tun hunah tak hi chuan ngaihtuahna fim a hmang thei hlawl lova, muthilh chiah a duh tawh a ni.

Vanneihthlak tak hian khua pawh alo var ve ta hram e. Zorinpuii tan chu thil chu thawk huai na tham ani ngei ang le. Phak chuap in a tho a, tukṭhuan eikham rual in dawr pawh a ngaihsak thei tawhlo, a mu leh nghal hmak. Hetah hi chuan Rindiki zawk kha awm ve tawhlo in a reh zui hmiah a, khawvar rual deuhthaw khan a bo zui ve daih niin Zorini cuuan a hre nghe nghe. Khum chunga bawh phek thlar pah in chau aw zet hian

"Amy, khawnge i nau kha?" A rawn ti tham chual mai. A khum mawng lama ṭhu ngawi ve reng Amy pawhin rawn hawilet zawk pah leh phur hmel fe hian

"Ka kalbotir ta hrih anih kha" alo ti sap. Chuveleh Zorini pawhin phur hmel ta sawt ang hrim hian

"Umm, a pawi chai lo, ani kha zawng a buaithlak lam hret chu anih kha. Ka tlin rei chi pawh ani nek love" ti leh hlak in lehlam a hawisan a, a muhil zui ta daih.

An ti ve nek nek a, chhun hun chu liam in tlai dar 5 alo ri ve ta der. Zorinpuii pawh inbualfai zui sawk sawk in a insiamzui leh malh malh a, kilkhatah hian Amy erawh alo ding ngawi reng thung.

"Amy, ilo kal veleh dawn em?" A hmui a hnawihsen tah mawlh mawlh pah chuan a han lehhawi thuak a. Ani Amy thung chu lo ṭhen sak chung leh zawi reih rawih tak hian

"Hrelo le, ka chak em em hran lo khawp a" alo ti duh lek. Zorini pawh lo ṭhen zui ve sak in a hmel bawk chu darthlalang ah a thlek zui leh vang vang.

"Kha chu, i thu thu ani mai, ka kal dawn ania" tih leh a room chhuahsan a rual a. Amy thung chuan chesawn hauhlo hian a kal liam tur chu alo thlek zui ve reng ringawt.

An zanriah kilna tur hmun Zairema te hotel ava thlen chuan a ṭhiante pawh kha lo kim ṭhap tawhin a hmel an hmuh rual chuan an lo ri nghal chul bawk a. Zairema erawh buai hmel zet hian an bul velah chuan alo la tei fua fua reng thung a. A teihawi vel pah a Zorini lo ṭhu reng a rawn hmuh takah erawh a kut chu rawn phar chhuak zauh in a rawn nui ta var var a, chutihrual deuhthaw chuan a ṭhiante khan fiam in an lo eee rual dual thung. Zorini pawh a lai chhe lehpek hle e.

Darkar a liam zel a, Zairema'n a rawn zawm ve hman meuh chuan zan dar 7 lai lo ri tawh in chaw pawh an order fel vek tawh. Zorini ṭhiante ho lah chu an wine in khan hna a thawk ṭha deuh tawh nge ni, an ṭawng duhin an thawm a ring leh tawh hle a, chutihlaiin Zorini erawh a la ngawi kar reng thung. A rinloh dan deuh hian Zairema pawh chuan wine chu a lem ve ta karh karh mai a, a tawpah phei chuan a meng si deuh sap tawh nia. Chaw an ei zova, an puar tlang ta maw tih ah Zorinpuii ṭhiante ho chu Zairema bawk chuan in tur lam sak lehin anni pahnih erawh inchung lamah an chho zui ta daih a. Luahtu awmlo rook ruak pakhatah hian lut dun leh in khum fai leh zau nuam em em lo awm ah chuan a kuah ṭhu zui ta hnawk. Zu hian mihring nungchang alo tih danglam nasat theih zia chu Zairema aṭang hian a lang fiah hle awm e. A chhan pawh, a ruihloh lai te chuan tlangval ngawichawi leh zezawi tak, ṭawng tlem em em si kha ani a, a ngainatawm bawk. Mahse, a han rui ta chiah mai erawh chu, danglam nasa tak a ni. A zaktheilo sawt a, Zorini takngial pawh chu kuah in fawh te a tum zui ut ut. Mahse, Zorini zawk chuan lo dangbet in a fawh tumna chu alo hnar khauh mai a. A rilru hi ala in peih chiahlo niin a hre ve deuh tlat. Mahse le, mak  tak hian Zairema chuan chutia a hnar na chu thinrim ah la chho in a hrawm zui nawk nawk a, khumah chuan bawhbet zuiin a fawp ta nawk nawk mai. A thaw hulh hulh reng lehnghal nen a tenawm in a hlauhawm ru duh ta takzet mai. Harsa ti zet hian hnuailam aṭang 

"Tho teh! Ka thei lo. Ṭha te te a thilsawi pawh awm lova hetia in pawng beih ngawt mai chu a tihchi loh aw Zairem" ti sar sar in alo nam ve ṭang ṭang a, mahse, a tha a chakin a palian nasa mai si a, a hneh meuhlo chu ani e. Chutihlaiin Zairema thung chuan aw khur dawr dawr leh sehchilh rap rap hian

"Ka tichhe vek dawn che. Nang hian hlim taka khawvel chen ve hi i phu hlawllo" a rawn ti chhuak ta mai. Zorini hamhaih lutuk pawh alo meng bial kawk thei a, a hlau ta takzet bawk. Chutah, tihtheih dang nei a a inhriat tawh thlawt loh avang chuan ring deuh a au leh ṭanpuitu tur koh mai chu a rilruk ta a ni. Mahse,

"Min pui" ati chhuak chiah tihin a hmui chu kut lianpui hian a rawn hup phui leh ta hmak si a, a mangang takzet ta. Mahse, chuti mai a beidawn erawh a tum hauh lo. Amah bawhbet a khawihchhiat tum em em tu Zairema mipatna chu a khup hmanga chhoh dawm a tum leh a, mahse chutihlai tak chuan banga frame intar lian zet mai chu a rawn tla keh ta chuaih mai le. Chutihrual deuhthaw chuan Zairema pawh thochhuak ve hluai in Zorini thung chu a ṭhu chhuak zawk a, a thawmhnaw te inbel ṭha leh sawk sawk in room chu a rang thei ang ber hian a chhuahsan nghal bawk.

A thil tawn teh hrep te khan anti hlauthawng in tlawm thlak ati a, a rilru na bawk si chu ṭap pur chungin a ṭhiante awmna lamah a han tlanthla thuai a, mahse, a ṭhiante hmel reng reng hmuh tur  lo awm tawh lovin an aiah Amy zawk kha alo ṭhu fel at a, alo nui var var reng bawk. Chutia Amy hmel a han hmuh tak si ah chuan thaw zui leh halh in amah chu him ta riau hian a inhre thar a. A lawm rilru hle nghe nghe. 

"Amy, roomah khan nangmah hi emni lo kal kha" ati deuh nuaih a. Amy thung chu alo bu zui nghat nghat mai. 

"Ka hrilh lawk vek ang che khan Zairema hi i tan mi ṭha ani lo kan tih kha Zorin. Kan thusawi lawk te hi engmah i awih duh ṭhin lova, a buaithlak ngawt mai"  ti tham chalin a kun zui ta daih a. Rang zet a va ṭhut chilh zui pah hian

"Amy, ka tihpalh ani. Ihmaw, Zairema khan ṭawngkam rapthlak zet mai min hman khun asin"

"Ka hria e Zorin. He Zairema hi e i rin ang mihring kha chu ani lovang. Misual leh i chunga phuba lak duh vang chauh a hetia ti ṭha che pawh hi ani reng ani. Amah hi tu midang mah ni lovin i bialpa hlui Sanglura cousin anih hi!" A rawn ti ta mai. Zorini makti leh hamhaih mengphawk nasa lutuk chu a hmuhnawm tham hial zawk awm asin. Amy bawk chuan la sawi zo lo cheu in

"Sanglura chunga hremna i pek tak avang khan phuba lak nan tiin hetiang hian chet a thawh zui a, a bulṭanna ah chuan ṭhatchhuah hle mahse, khawihchhiat vek che a i nunna thleng pawh a tawrh tir che hi a hnial hauh lovang. Mahse, Zorin, lungngai miah suh. Kei ka awm a, tunah chuan he thil hi buaina lian ber ah neilo la ka ti. Ka sawi awmzia chu i hriat ve tho kha" tiin mit a han siai khum zauh a. Tho chhuak lehin pawnlam a pan zui daih bawk. Zorini pawh chuan a thusawi awmzia hrelo leh a thilsawi takte avanga thinrim insehruh ṭeuh chung hian ngawi reng in a zui ve mai bawk.

An chhuah fel hnuin Zorini insumthei tawhlo chuan a thu sawi awmzia chu a zawt zui ta nge nge. Amy thung chuan awlsam fe mai hian

"Damdawiinah kan kal angai. A hma pawh a kan lo sawi tawh ang kha ani mai" alo ti sam et. Chutia a han sawi leh takah chuan thil awmzia hre chhawm leh in Damdawiin record bu en turin an duh ani tih kha a hre chawp leh vat. A lawm lo teuh hle.

[0:20 pm, 12/10/2022] Peki: DEAR AMY SEASON 2(3)

"Amy, fahrah ka nilo ka tih mawlh mawlh kha. Tin, i nau Rindiki pawh kha ka hriat zawng lah ani bawk heklo. A hla sak ve fo te pawh kha ka hrengai lo reng reng" ngeiawm zet hian a han nui pah hak bawk a. Amy chu alo inrawlh leh vat.

"Zorin, ani kha ka nau ani lo. Ka ṭanpui mai anih kha" a rawn tih tak fak ah chuan Zorini pawh ṭawng zui tawhlo in a kal ve mawp mawp.

Inchhung an lut a, a duhdan ang ngeiin a nu leh pa te pawh an lo la meng ve e. An bulah chuan va kal hnaih sauh pahin awlsam zet hian

"Nu, pa, kei hi in fa lak ka ni emni?" Ati liam puat. Chuveleh, a nu leh pa te pawh chu rang zet a rawn hawichhuak in an meng phawk hle. A nu zawk phei chu a meng â deuh ruai lehnghal emaw ni. Zorini chu mak a tih hmel fal bik ngawih ngawih nia. Mahse, a pa chuan chhanna rawn pe thuai in

"Leh ta mai mai ṭhin chuan mami. A sawitur hriatloh thlak em mai a" a rawn ti nghut a. Amy lam hawi pheiin Zorini chu a nui zui deuh sak a, mitko san âk pah leh engmah pawh sawi zui tawhlo chuan a room lam a pan ta zawk a ni. Amy pawh lawm lo leh engmah tih theih em em nei hrih silo chunga insawh tau nghawng nghawng in step ah a chho zui ve bawk. A lawmlo takzet ani tih chu a hmelah pawh a lang fiah hle awm e.

Zairema'n a rinna a tihchhiatsak ve leh a, a hma ang khan a ṭhiannu Liandingi lah a ring thei tawh heklo. Chumai nilo in Akimi te ho lah khan an phatsan ni tlat a hriatna a han nei ṭha leh rih a, tin, a khat tawk hian a nu lah chuan chiang zet zet leh maktih hmel fe a en vung vung in amah chu a hre ta lo emaw tih maitur hian alo awm khum ṭhin vei nen. Hetihlai hian a tan a awm reng leh phatsan ve lo tu, ṭanpui vartu hnai reng a neihchhun Amy chauh ni a hria in, ani lah chuan a nu leh pa diktak te zawngchhuak turin alo ti ve sek mai bawk si. A rilru a buai ve tawk hle a ni. Lehlamah, Amy hian dawt a hrilh ngai lo tih a hria a, a tan a ṭha tur lo chu engmah sawi in a tihsak ngai heklo tih pawh a hre bawk. Amaherawh chu, tun ṭum a a ngiat ah kher hi chuan ani hian dik a inti ve tawkin, fahrah a nihna lai reng reng kha a hrethei lova, a naupan zual lai chu chiang takin sawi fak fak thei tawh lo mahse, a hriatchian em em erawh tuna a nu leh pa te hi niin, an kianga a awmdan chauh hi mitthla tur a hria a, fahrah in a a khawsak lai hun emaw, nu leh pa dang a neih awm lai reng reng hi mitthla tur chhin eih pawh a hre lo. A ngaihtuah thui poh leh a bo ting niin a inhre bawk.

Hetihlai pawh hian Amy khan a vil uluk em em a, dawrah kal se, lo awm ve zel in, inah lah a kal hrang ṭha duh der lo. Hun thawl neilo inti in Amy chu a ning ru ṭhin hle a, mahse, reilote a hmuhloh chhung erawh chuan a ngaihtuah leh vung vung a, a ngaih a ṭha chuang der bawk silo. A ngaihtuahna leh rilru puthmang takngial pawh hi amah ngei pawh hian a hrethiam tawh bik chiah lo anih ber hi maw.

Pathianni niin Zorini inkhawm bang inchhunga a han lut chiah chu, a nu khan kawngka chhung lamah hmunphiah nen alo chang reng chu niin. Lo vuak a tum ta mai. Mahse, a vuak hmain amah chu alo inveng ṭha hman hlauh zawk a, vannei tak a ni. Makti taka a nu hmel â ruai mai chu en zui vang vang pah hian a khur ru der der thei hial.

"Nu, eng thil nge tih i tum tak mai hi le. I damṭha meuh a maw?" A tih sap hnu in a nu pawh chuan hlauthawng aw hlak hlak hian alo chhang ve vat a.

"Ka hrelo, ka damṭha chiah em tih hi ka hrelo. Tin, nang hi ka fanu i ni chiah em tih pawh hi ka hrelo lehzel! Ka hmuh hnu ini em!?" A rawn ti ta mai a. Chu, a nu ṭawngkam mai mai chuan a chhun nâ in a ngaihna a hrelo ta hle. Mittui tling zui piau a a hawichhuah leh nak chuan Amy kha inchung panna step tawpah lo ding ve reng in anni nufa awmdan chu ngawi reng hian alo thlir ve reng ani tih ava hmu thei. Chutianga a nu duhtak mai in a lakah chutiang ṭawngkam a han neih tak si ah chuan thinrim rilru na insehruh ṭeuh chungin a kalsawn san ta zawk a. Amy chu sutlang zawkin a room lam a pan ta nal nal. Na zet hian khumah a ṭhu hnawk mai a, a inhumruh nasa ve hle. Amy pawh kha a kiangah lo ding ve tawhin ala ngawi reng thung. A rilru chu alo hah ve hmel takzet a ni.

"Amy, i thil duh kha tih hlawhtlinsak che ka duh a ni. Tunah zawng, ka thei tawhlo ani e. A hma zawng khan ka nu hian sawichhuak lo mahse, tunah erawh ṭawngka ngeiin a sawichhuak ta a, min tihnat hial a hreh ta lo bawk. Tun aṭang chuan i mi sawite kha zawnchhuah a, an fa ngei ka ni tih hailan a ṭul ta a ni. Min pui ang tiraw?" Ti khur dar dar pah a Amy hmel a han en chuan ani pawhin chiang tak hian alo en let ve kiau a, a lu alo bu deuh nghat nghat bawk. A inpeih thawkhat tih lantir nan a kut chu Zorini darah a rawn nghat charh bawk a. Ani pawh alo thaw zui halh mai.

Khua alo var a, tukṭhuan ei lai te pawh chuan Zorini nu mawlh mai kha ala dik hleithei lo. A hma lawk a ṭhu a fanu chu mak tih hmel fe hian a rawn thlek leh vung vung ṭhin a, a khap fak fak reng bawk. Zorini thung chuan melh pawh melh ṭha duhlo in a ṭawng duh bawk heklo a, a pa takngial pawh chu a be peihlo a ni e. A ruk tak hian an boruak chu a rit churh a, a tu a te mahin ṭawng emaw han inbiak tumna an nei silo nen an nula Maliani pawh chu a awm a nuam lo ru angreng hle. Amy thung kha chu chutia  tukṭhuan ei a an ṭhut ngawih reng lai te pawh chuan rilru engthawl tih hriat tak hian an piah mai bathlarah alo zai kal rât rât a, a duhdan te Zorini'n a han pawm ve takah chuan a lawm in a thawveng sawt hle te pawh ani mahna. A hmai a uang reuh hle.

A chaw thleng chu chawiin Zorini chu a tho ta nulh a, chutihpah chuan

"Vawiin chu dawr ka nghak hman dawn lo a, damdawiinah ka ṭhiannu tlawh lawk ka ngai a"

A sawi zo chiah tih in a nu chuan

"Khawnge dawr i neih a!?" Alo ti heu.

A zawhna avang chuan pa ber leh midang ho pawh an meng phawk ta hrâ a, amah pawh chu maktih hmel zet hian an en zui ta ṭhap. Chutah, pa ber chuan

"Mami nu ṭhin hi a, tunlai chu i che maksak thei riau mai a. I damsam lo nge maw ni?" A rawn ti ve sup. Mahsela, nu ber chu a ngawih leh tak daih si avangin a tute mah chuan ṭawng chhunzawm zai pawh an rel ta lem lova. Zorini pawh insiam turin inchung lamah a chho zui leh ta a ni.

"Amy, ka nu hian dik lohna a nei niin a hre ve em?" Damdawiin lam pan a an kal hlawk hlawk lai chuan a bul lawk a kal ve chu a han zawt ta khauh mai a. Mahse, a rinloh dan daih hian Amy thung chuan ngaihsam hmel fe a lo chhang let in

"Ka hrebik lo ea!" Alo ti duh lek. Zorini duh khawp chhanna chu a pe lo chiang teh asin.

Tichuan, damdawiin pawh thleng chawpchilh ve nghal in a compound ah chuan an han ding tawi leh rih a. Zorini bawk chu a rawn ṭawng chhuak hmasa leh

"Amy, kan kal chhan ber, record bu en tih vel chu he hmun a hnathawk te hian min phalsak dawn hauhlo ania aw. Ruahmanna dang te i nei em le?" A rawn ti deuh sap. Chutah, Amy chuan hawikual deuh zak zak pah hian

"Min zui tawp rawh" rawn ti sar sar in damdawiin chhung lam pan chuan a kal zui ta mai a. Hlauthawng tak hian pakhat pawh in a zui ve ngawt a, a tha te chu khur chhe mai dawn hian a han hre leh ta nghal. Ava hun lo ṭhin tak em! 

Damdawiin chhungah chuan kal zel in Amy hnung chu a zui ve char char tawp. Damlo awmna ward leh cabin engemawzat an kalpel tawh a, doctor leh nurse tih te, thawktu dangte pawh an kalpel nual tawh mai. Vanneihthlak tak hian a tu te mah chuan an lo en zui lo hlauh bawk. Amy lah chu inringtawk tih hriat tak hian a hmaah a kal sauh sauh mai si a, ani ve thung erawh hlau leh khur in a zam chhe lo chauh tawh ani lawi si. An thleng thui zel a, mi veivak pawh an awm meuh tawh lo tih ah hian room pakhat zawnah Amy chu a ding ta chat mai le. A rual deuhthaw hian Zorini pawh alo djng ve chawt. Chutah, Amy bawk chu hawikual leh that that in bangkil  sâng taka security camera lo invuah reng chu a han hmu fuh ta chat mai a le. Zorini lah chuan hlauthawng aw khur der der leh zawi sup chung hian

"Engtinnge ni dawn. A chhungah pawh a awm hrim hrim ang chu" alo ti hmanhmawh a, mahse, a zawhna chu Amy chuan chhang let lem lovin a bia ani tih pawh a hriat hmel loh zawk mah. Camera chu che miahlo hian a melh ngar ngar reng a, a meng rum hle tawh bawk. Chutihlai chuan engmah hrethiam lo Zorini kha alo hawihai nasa tawh viau a, camera leh Amy hmel ngawt chu entawn in alo hawi ve zak zak reng. Minute 10 hnu velah Amy chuan rawn thaw hawk pah hian

"Umm, ka tichhe thei ta. Lut ang le" a rawn ti ta mai. Makti zet hian Zorini chu alo ang phuau thung a, ropui a ti in Amy chu chhuan hmel fe hian a en ta tlawk tlawk. Record bu dahna room ah an lut dawn chiah tihin tuemaw hi a rawn au ta ṭhat mai a. An phu dun zawk nghe nghe. Hawirual ṭhawt a anmahni rawn au tu an va en nak chuan doctor uniform ha thlap mipa pakhat hi rum zet a anmahni melh reng chung chuan alo ding chu niin! Zorini chu a khur chhe nasa tawh teh e. Amy chu a kiu hmang a nghawk zeuh a han tum ngawt a, a theilo tih a hrechhuak leh. Heiha!

Doctor chuan bung deuh nghut hian

"Helai hmunah hian eng thil nge tih ilo tum a. Luh ruk i tum emni?" A rawn ti khur khur. Zorini hlauthawng lutuk chuan a chil chu lem leh khawlh phawt in doctor mitah tak chuan a han en ve ta ran a, zam chhe lo turin a infuih ve hram hram bawk.

"Ihhh aaaa inthiarna tur ka zawng a, hei hi mi tu emaw khan min kawhhmuh mai si a" a han ti zet chu doctor pa alo ner nasa. Amy pawh a bang chuang lo. Chutah, a kutzungchal hmanga chu room lam rawn kawh vû vû pah chuan ngaihsan loh hmel zet hian Zorini chu a rawn melh leh kawk

"Chhiar la, hetah hian inthiar theihna a awm pawh i ring reng reng em maw ni? Hahthlak ṭhin hlawm mange" ati leh hluk. Chuveleh, Zorini chuan doctor sawi ang in chu room kawngka chunga thil intar  'Head of Department' tih lo awm kuau lam chu a han thlir chho a, za lo zet hian a ṭhen zui ta sak. Zawite bawk in

"Ka tihpalh lutuk ka pu. Kalo enchiang miahlo a ni" tiin doctor pa chu a kalpel ta fua a, doctor pawh chu engdang sawi tawh lovin hmundang pan tur chuan a inher zui ve ta mai bawk. Zorini chuan thui pawh ala kal hman lo tihtur ah Amy bawk khan rawn ko zui leh in, a lo hui zauh zauh mai a. Hawi zak zak pah hian a tlan let leh ta vat. Tichuan, tu midang mah rawn hmuthei tu an awm tawhlo tih an chian hnu chuan a tawp a tawpah zawng an lut fel ve thei ta hram e. An vanneih leh em em na pawh chu room chu inkalh lo a alo awm vang chauh a ni e. Chu room chhung chu Zorini rinloh dan takin alo thim khup mai a, mahse, chutia mahni duhdan dan a light han on ngawt chi lah ani der lo thung. Amy bawk chuan a tihtur ti leh in security camera bawk chu a melh chhe leh ta ṭhak nia. Zorinpuii hian ropui alo ti ṭhin teh asin aw. Kut a beng ri hial lo chauh a ni.

"Zorin, i phone phawrh la, zawng nghal char char ang. I file bik kha theihnghilh miah suh" rawn ti leh sar sar in Zorinpuii pawhin a phone chu rang tak hian alo phawrh ve sawk sawk.

"Nang te chu thlarau i ni a, phone light i mamawh ve lem emni?" Alo ti zauh.

"Keima tan ka sawi hleinem. Zawng thuai thuai mai teh. A tam tham si" alo ti let nghut bawk. Zorini chu a ṭhen leh sak mai. Amy bawk chuan phur zet hian

"Hei, hetah lo kal teh, hei hi i pian kum 1996 ho bik dahna anih hi. En vat rawh" a rawn tih hlut takah chuan Zorini pawh Amy lo dinna lamah khan tlan phei ve thuaiin a phone light hmang chuan chung file hlui zet zet tawh ho chu a han chhun kual ta zung zung a, a tam tham bawk nen a hautak ru fu mai. A rei tak hnuah phei chuan Zorinpuii zawk chu a beidawng lek lek tawh a, a thaw leh halh halh ṭhin. Chutia file hlui chi hrang hrang keu kual a an lo buai dun em em lai chuan thawm hria in anni pahnih pawh an tawp zui chawt. An hawi phawk nghal hru a, hlauthawng tih hriat tak hian an in melh ralh ralh tawh mai le. Chu thawm chu engdang nilo in, an awmna rawn pawh hawn tum thawm ni ngeiin a hriat a, anih chuan chu roomah chuan tuemaw lo lut tur an awm ngei tih chu hrilh hriat hranpa pawh an ngai tawh awm love. Thinphu dep dep in kawngka lam chu an hawi dun ta reng a. Mahse, thawm chu a reh zui leh tak daih avangin a ngaihna an hrelo dun kher. Chutia, thawm ber a reh leh tak daih si ah chuan tiin ngaihngam lo zet hian file lam bawk chu an buaipui chhunzawm leh ta zawk a. An buai leh ṭan chiah tih ah ṭawng thawm an hre ta! Anmahni rawn be tu ṭawng thawm ngei mai chu!

"Hetah hian in lo awm reng tawh ani maw!?" Zorini chu a phu zawk a, Amy awmna lamah a tawlh pah rawk rawk bawk. Mahse, chutia rawn be tu chu tudang nilo in an ṭhiannu Rindiki lek kha alo ni si a, an thinrim hnuhnawh hle. A hmel lah chu a hma zawng ai khan a pawr in a bal zual a, naupang bal zet hi a ang ber in Zorini phei chuan alo hre tawh. Chutah, Amy chuan lungawi lo tih hriat tak a bul hmek hmuk hian

"Nangmah emni pawnlama thawm siam reng tu kha?" Alo ti hlur mai. Rindiki pek chuan nui vur vur chung hian

"Aw ni e. Thlarau mai ka ni tawh tih hi ka theihnghilh alawm le. Ih, sawtah khan doctor chhelo deuh mai ka rawn tawk a, chu, chuvang ania kawngka pawh kha ka kut hmanga pawh hawn ṭalh ka tum ni!" A nui vur vur reng a, a mawl hmel takzet. A sawi zawh rual in Amy chu alo ner nâwng nâwng a, awm ang lo atih hmel hle. He thlarau vakvai Rindiki zet hi chu a dangdai thei deuh a ni e.

"Aw, ka hmu ta e. Hei le!" Tiin Zorini kha a rawn rak chhuak ta hlut mai a. Amy chuan alo khap dai vat thung. File hlui uk tawh zet chu keu nuap nuap in ama hming chuanna ngei ani tih chu a chiang thawkhat viau. Tin, a pian kum, ni leh thla zawng zawng te nen chuan a chiang hle. Mahse, mak deuh mai chu a mah hringtu nu leh pa te hming mawlh mai kha ani danglam ta chu. Tuna amah enkawltu a nu leh pa anga alo hriat leh alo pawm ve char char tawh, Chuauthangpuia leh Lalrinfeli te hming awzawng chu lang ve lovin, amah hringtu taktak te hming zawk, Lawmsangzuala leh Lalrinkimi te hming ani lo inziak ta daih chu! A thil hmuh zet chuan a ṭhawn nat em avangin chhutah a ṭhu thla hnawk a, a file ken lai chu bih ruh chungin a ka hau ringawt. Tin, a thil hmuh leh hriat ten a ṭhawn em avang khan ṭah pawh ṭap theilo in a insehruh ngawt ngawt a, a thinur hle tih pawh a hmel aṭang khan a hriat theih awm e. Chutihlaiin a ṭhiante pahnih thung chu a sirah ding chungin an lo ngawi kar thung a, a khat tawk hian Rindiki zawk chuan Amy chu alo nghawk leh zauh zauh ṭhin. Mahse, Amy thung chuan lo khap bet zel in thawm chhuah lo tur hian alo ti leh zauh ṭhin a. Chhuat a ṭhu, an unaunu, mangang em em a indawmkun reng chu ngawi reng hian an thlir dun ta zawk a ni.

Hun a ral a, darkar khat zet zawt mai chu hmunah chuan an tawm tawh ang tihtur ah Zorini chu rawn ṭhuchhuak hluai in a mit te pawh a sen rum thei tawh hial. 

"Kal ang u. Chuan, khawiah nge ka chenna fahrah in pawh chu a awm reng reng tih ka hre duh a ni. Engkim hi ka chian vek phawt dawn" ti zung zungin file chu a zakzeh ṭat bawk a. Amy chu alo che nghal zung zung. Rindiki chu pawnlam a nawr chhuak zawt zawt chung hian

"Ti rawh, pawnlamah min hmu thei tur mi an awm em tih va fiah hmasa phawt ang" tiin kawngkapui chu an sutlang thuak a, Zorini erawh inchhungah alo la tawm rih thung. Reilote hnuah Amy bawk kha rawn lut leh in Zorini hnenah chuan hmanhmawh hmel zet hian

"Hmanhmawh rawh. Tumah an lo kalloh lai tak ani e. Chuan, i file kha, kha ai khan han thukru ṭha deuh teh" a rawn tih leh sawk sawk takah chuan Zorini pawhin a file chu a kekawr kawngah zep in a jacket hak  lai chuan a hliahkhuh zui leh thlap a. Thawmdim tak hian a chhuak zui ve thei ta a ni.

In an va thleng a, Zorini chuan engdangmah sawilo hian a pa car chahbi la chhuak in chumi ni la la chuan fahrah in lam panin an pathum bawk chuan an tlan chhuak lehnghal. 

Kawngtluan in tute mah an ṭawng lova, mahni ngaihtuahna kawm in an ngawi ṭhap ringawt. Zorinpuii rilru tawt lutuk pawhin awmdan thiam harsa ati a, sawichhuah tur ber aa hrethiam heklo. A bing mup mup a, a vai ruai bawk a, a chhungril chu chi ai na in a khat tlat bawk. A lung a chhia a, ṭap chhuak tur em chuan ala in phalloh bakah hun ala ti hauhlo mai. Tin, hmeichhe chaklo tak anih loh zia tihlan pawh kha a duh bau lo bawk. 

Reiloah an tum ram chu thleng in motor aṭang an chhuk ta sap sap. A thurualpuite hmel a han enchian nak chuan Rindiki zawk kha fahrah chenna in lam hawi hian alo khi deuh vur vur mai. Chu chu a hmuh in a runtawk hi a tling lehpek hle a, a chhan a zawt ta ngat. Mahse, Rindiki zawk chuan la nui vur vur chung hian

"Chhungmaw pakhat in fa atan min rawn lak hma zawng kha chuan he hmunah hian kalo cheng ve ṭhin a. Ka seilenna hmun anih ang leh ka chhungte taktak anga kalo hriat ṭhin te annih angin ka ngai a, ka hlimpui in ka ṭahpui bawk ṭhin. Tin, nang hian vawiinah thudik engkim chu i hretawh dawn bawk a, ka lawm a ni" alo ti let duah. Tichuan, a tute mah chu ṭawng chhunzawm tawhlo in inchhung lam pan tur chuan an pen chhuak ta zawk a ni.

Inchhung an lut a, fahrah naupang tamtak lo zi nuaih nuaih mai a han hmuh chuan Zorini pawh tihdanglam a awm ve in anni ho chu lainat hmel em em hian a melh ve vung vung. Tin, inchhung awmdan leh a hmun hma hrim hrim chuan a lung ati leng in hmuh tawhna nei ang tlat a inhriatna hi a nei veleh deuh ṭhin a, chutihlaiin chiang taka han sawichhuah fak tur nunhlui erawh ala nei fumfe thei chuang hauhlo. Ngaihtuahna fim tak ala hman theih loh vang te pawh ani ang e. Chutia alo hawi veng veng lai chu tuemaw hian rawn bia in a harhchhuak chiang kher. A hawisawn vut a, amah rawn be tu a han en nak chuan nu upa lam tihtheih tur, zaidam hmel tak leh nun ngil hmel em em, hlim hmel pu sang mai hi alo ni reng. Chu nu lah chuan amah Zorini chu chiang tak leh fiah em em hian alo melh kiau reng a, a zam awm duh zawk khawp ang chu.

"Ka fanu, eng thil nge i rawn tih ve dawn le. Puih theihna che ka nei em aw?"  He pitar hian ka fanu tiin a ko ngawt a maw? Chutianga koh chu hmanah pawh khan alo hlawh tawh ṭhin ngei alawm. Mahse, tunge amah ko tu tur awm ang reng reng erawh chu hriatchhuah theih a nei mai hrih lo. He pitar ngei pawh hi alo ni zawk reng thei tho. 

Zam tih hriat taka hawikual deuh ruai phawt in a ṭhiante kha a han melh kual vel pah a, anni pahnih erawh chu nui var var chung hian naupang in umkualna karah an lo ṭhu daih niin. A thaw zui halh. Ni e, he thlarau pahnih, nawi ve tak leh nuihzatthlak ru takte  tello hi chuan a kim tawhlo riau ani amah pawh hi. Chutah, thaw deuh halh in a hma mai a ding pitar bawk chu a han en leh ta a. A kekawr kawng aṭang hian file kha rawn phawrh in pitar chu pek mai a han tum zet a, mahse, chu pitar zawk chuan zaidam tak hian

"Hawh, ka fanu Zorin, ka office lamah i lut phawt zawk teh ang" a rawn tih tak si ah chuan a meng bial kawk thei. Engtinnge a hming te alo hriat theih zawk a. Thilmak tak chu a ni. Tichuan a ṭhiante lam en a anni in lu an lo buk khum tak zauh ah chuan chu pitar hnung pawh chu a zui ve thei ta hram a ni. 

Dawhkan hlai pui mai ah a file ken chu dah leh in a hmaa pitar ṭhu pawh khan zawimuang hian a lo ban ve nghal mai a. Keu zui nuap nuap in a lu chu a bu ta tlat tlat mai. A meng zim sun mai bawk nen Zorini thin chu alo phu dep dep tawh a. Chutah, zawimuang a rawn hawichhuak leh in zorini mitah chiang tak hian a rawn en leh ta kar. A kum a tam tawh hmel ngaihtuah in a mitmeng chu a la fing ru phian a, pitar â lo tak ani ang tih pawh Zorini chuan a ring thiam mai e.

"Ka fanu, nangmah ngei kha ini e. Ka hai lo che asin. I tetlai hmel kha ala fiah em atin. Aw, ilo va han ṭhanglian tawh in i hmel te chu ava ṭha tehlul em ve" lungchim tak hian a rawn melh vawng vawng a, a meng de sar sar mai bawk. Zorini thinphu chu rang nasa tawh tak hi animai e. Mawng a hawlh ang mai hian a za et et tawh a, a ṭhu nghet hleithei tawhlo bawk. Tin, a tiril lah kha a khur nasa em em mai a, hetiang anih chuan ani hi fahrah anga enkawl tawh niin, he hmunah ngei hian alo cheng ve tawh ṭhin tihna ani ang maw? Chutiang chu engtinnge a thlen theih zawk le. A nu leh pa te chu an boral daih tawh tihna emni? Ni leh lo, Amy khan a nu leh pa te chuan amah hi an la nghah reng thu a sawi tak anih kha. An fanu hian a zawnchhuah hun an lo nghak reng tih thu a hrilh tawh tak kha mawle. A kut khur dar dar leh vawt thler mai chuan a hmaa ṭhu pitar kut vun chuar tawh tak leh cher ṭhuak mai chu va ban in a mitah a melh kiau bawk a.

[0:20 pm, 12/10/2022] Peki: DEAR AMY- SEASON 2(4)

Aw khur hlak hlak hian

"Ih, ka, englo, kei hi fahrah niin he hmunah hian kalo cheng ve tawh ṭhin tihna ani em?" Ati chhuak ta phawng. Chuveleh, pitar pawh chu lo nui ve in a nui hmel te chu a ngainatawm hliah hliah. Zawimuang a a lu chu buk zauh pah hian

"Aw ka fanu, a nihna takah chuan nang hi fahrah ini love. Nu leh pa inei a, hei, he lehkhabu chhunga inziak ang hian i nu leh pa te pawh Lawmsangzuala leh Lalrinkimi te anni a, mi ṭha leh fel, rintlak tak pawh anni bawk e"

"Chuti si, engvangin nge helai hmunah hian min dah a. Min duhlo tihna emni?" A mittui a tling piau tawh. Rang zet a a lu chu lo thin nawk nawk pah hian pitar bawk chuan

"Ni love, ni lul love ka fanu. An duh in an hmangaih lutuk che. Chuvang zawk chuan a ni hetah hian an rawn dah tak che"

"Engmaw? Eng nge thil awmzia?"

Pitar chuan a chil a han lem deuh khalh a, a mitmeng aṭang chuan thil tamtak a ngaihtuah kir tih pawh a hriat theih. Chutihlaiin Zorini thung chuan eng thil mah hi a hrethiam phak ve tawh lova, hmangaih in duh nise eng aiah nge a chhungte khan fahrah inah mahni fa te chu an dah ngawt ang, tih ringawt alo ngaihtuah tawh thung. A thin te chu a ur ru ṭeuh thei nia. Chutah, muang ban charh hian pitar bawk kha a rawn ṭawng chhuak leh ta a.

"Ka fanu, i nu leh pa te kha nupa inhmangaih lutuk an nia, an fel in an rilru pawh kha a ṭha takzet e. Nupa kawpchawi ka hmuh tawh ah chuan an la inhmeh ber awm asin. Mahse, vanduaithlak tak maiin i nu zawk khan a pai lai che hian thisen a tlachham lutuk ta a, a thihpui lo chauh che a ni. Tikhan, mi thisen dawng in thisen thianghlim lo kher alo dawng fuh palh ta hlauh mai a! I pian fel hnuah pawh doctor te thurawn ang in a hnute tui a pe ngam ta lo che a, damdawiin a chhuahsan hnu thleng khan nangmah vang hian an buai nupa ṭhin teh asin. An chhungten an diriam zui a, khawtlang nise an bang heklo. Nang chu an enkawl theihloh thu che leh midang kut a hlan zawk mai tur che in thu an lo rawn ṭhin bawk. Mahse, an hmangaih in an lainat em em che a, i pian aṭanga thla 5 chhung kha chu an bulah hun an la hman tir ve hram hram che. Mahse, vanduaithlak takin i pa lehzel pawh khan chu thisen thianghlim lo chu chhawm chho ve in, an hrisel lo zui ta zel bawk si a. Nang han enkawl chhunzawm thei chi ziazang annih loh piah ah, khatih hunlai a mihringte kha kan lo mawl em a, diriam leh cheksawlh, hlauh leh ṭih zui hlawh in nang thleng thleng khan i tuar thei mai dawn a an hriat tak avangin hetah hian an rawn hnutchhiah ta ngawt mai che a ni. Hriatthiam i tum hram hram mai aniang chu tiraw ka fanu"

Zorini makti leh ṭhawng lutuk, rilru na bawk si chu a ṭhu khur ngawt ngawt tawh a, a mittui a tling pam mai bawk. Nia, a sawi kha a dikna chen a awm ang. Tun ang khawvel changkang tawh ah mah hian HIV+ te hian diriam an la hlawh chawk ania, khang hun, a pian hma leh pian hnu kum ang vel a mihringte phei kha chuan an ṭih in an hmusit khawp ang tih chu tu hrilh hriat mah a mamawh bik love.

Zorini a ngawih tak reng ah chuan tiin pitar bawk kha a rawn ṭawng chhuak leh a.

"Ka fanu. I rilru ti na lutuk duh suh aw. Thil thleng engkim te hi Pathian ruat dan vek anni tih hria la, a duhdan in engkim a rel fel ṭhin zawk ania. Nangpawh, hetah kum 3 vel i awm hman tih khan tuna i nu leh pa te hian fa atan an rawn la ta che a, hei, i tisual lo khawp alawm. An hmangaih che a, an neihchhun inih ang in an duat in an ngaihsak bawk che. Nangmah hringtu che i nu leh pa bulah pawh khan ṭhanglian mahla, anni nen hian a danglam tam vak chu ka ring lo. Mahse le, ni e, hringtu nge nge chu hringtu anni a, a tluk thei an awm lovang chu" alo ti leh dap dap. Chuveleh, Zorini chuan 

"Tunah hian khawiah nge an awm? Ka hmu duh a ni. Ka duh takzet ka pi. Ka kuah vawng vawng chak asin" a rawn ti chhuak ve hram a. Pitar-i erawh a hmel landan lo inthlak thawk in a ngui deuh ta rawih ni hian a lang a. Zorini hrilh chu alo hai hman lek lek. Mahse, zuai raih hian

"Pawi kati khawp mai Zorin bawihte, an natna vang leh natna dang dang vang in kum hmasa mai khan min lo kalsan ta a ni e!"

Zorinpuii thu hriat zet chuan a ṭhawn nat zual em avang in a inhumruh ngat ngat tawh a, tunah tak hi chuan a tliak hnawp ani pawh ti ila kan sawi sual awm lo asin. A chunga thilthleng te hi a tawrh phak bak anni a, thu thinṭhawng tak vek niin a tan chuan thu thar vek kha anni bawk. Engmah pawh sawi tawhlo in a ding hluai a, office chu tlanchhuahsan vat in pawnlam a pan zui ta nal nal. Tichuan, motor ah ṭhu lut vat in a ṭap khur ta ngar ngar mai a, a ri in ṭap chhuak kher lo mahsela, a thinlung chhungril ber aṭanga lo irh chhuak natna chuan mittui ava sur tir hnem si em. Hetihlai hian a ṭhiante pahnih pawh kha lo lut ve tawh in an lo ṭhu ngawi ve reng bawk a. An unaunu ṭap chu ngawi reng leh mittui tling piau hian an lo thlir ve reng ringawt. 

Darkar chanve chhung tehmeuh chutia an awm hnu chuan Zorini pawh rawn pangngai ve leh ṭan in motor te chu a han tinung veleh mai a, zawi sup hian

"Amy, ka chhungte thlan awmna chu i hria ang tiraw? Ka kal duh a ni"  a rawn tih chuan Amy pawhin rang tak hian a lu a lo bu zeuh. 

Tlan leh vang vang in darkar 2 hnu velah Amy sawina hmun thlanmual chu an va thleng ta thuai a. He hmun hi Aizawl aṭanga hla lo te, khua niin, a mi chengte pawh tlemte taktak anni awm e. An thlanmual pawh a lian hran lovin, thlanlung lah a tlem narawh. Amy chuan hmahruai zel in a tawpah chuan thlan pahnih lo awm ṭhiang rial hi an zu hmu ta reng a.

"Zorin, hei hi i nu leh pa te thlan chu ania" tiin thlan lung lam chu a kawk zeuh . Zorini pawhin muangchang a pan in thlanlung hmaah chuan a han ṭhu hnawk phawt a. Thlanlunga hming inziak melh ngat ngat pah hian

"Amy, ka nu leh pa te hian min lo la nghak reng ni khan i sawi si a, engvangin nge dawt min hrilh tak mai" a rawn ti chang deuh fak. Mahse, Amy chuan zaidam tak leh zawi raih si hian

"Zorin, dawt ka hrilh lo che. Nung dam a an la nghah thu che ka sawi lova, an rauthla talin an la nghah thu che leh an beisei reng thu che ka sawina zawk anih kha. An boral tawh thu kha hrilh tlang nghal pawp che ila chuan, tun ai hian i ngai pawimawh lovin zawnchhuah tumna pawh i nei lo mai ang tih kha ka hlau em a ni"

"Rauthla tal in maw!? Khawnge anmahni chu. Engvangin nge ka hmuh ve theih loh tlat a, nangni pawh duh hun hunah ka hmu thei tho si cheu a"

"Kan kiangah an awm reng e. I hmuh theih tur a duan an nih ve loh vang chauh a hmu lo mai inih kha. I kiangah khan awm in an thlir reng che aw. Hmangaihna leh lainatna nen an thlir mek che"

Zorini chu a hawikual nasa teh e. Mahse, a hmuh ve theih miau loh avang erawh in a beidwnthlak takzet thung. An thlanlung kuah chung chuan a ṭap zawih zawih a, ngaihdam a dil reng mai bawk. Chulai hmunah chuan reitawk tak an awm hnu pawhin Zorini chu a haw ṭha duh lawk lova, a mittui pawhin hul tik ni reng a nei bawk silo nen. A chau hluah hluah hi ani ber e. Mahse, a tawpah zawng, a ṭhiante nawrna a nasat em avangin a tho chhuak ve ta hram a, an haw ve thei ta.

Motor an chuan laiin Amy bawk chu alo ṭWng chhuaj leh a, inthlahrung aw dai hian

"Zorin, heng thil zawng zawng thlenna chhan ah hian keini hi min puh vek rawh. A chhan chu tihngaihna dang hlwl kha kan hriat tawhloh vang ani a"  Zorini chuan amah rawn melh lem lo hian chang fak in

"Eng thil nge sawi i tum?"

"Aaa..i nu chungchang ah khan. Khatia nangmah hrelo ang tak che a a awm theih nan khan keini pahnih hian a mit kan khawih sak a, tichuan, tunge i nih a hre ta lo ṭhin che a ni. Englo ania, khatia kan tih tak mai nachhan pawh kha, nangmah hi nawr kal che kan duh miau si ani. Kan thusawi kha i pawm duh tlat silo a, engtinnge kan tih tawh chuan ang" a awki chu a a sang ṭha hle. Chutia a sawi lai te chuan a hnung a ṭhu, Rindiki kha alo bu tlauh tlauh ṭhin a. Zorini erawh chuan Amy chu chiang zet leh mit sen rum chung hian a rawn melh ve zawk a, engmah phei chu a sawi zui ta lem lo. Ni e, a nu kha tih danglam in awmlo se chuan tunah te pawh hian thudik engmah a hre kher lovang. Thudik a hriat nge ṭha anga a hma anga nun mai mai kha tih chu ngaithla tu duhtak, nangmah kha lo in zawt tawh mai ta che.

In an thlen hnu pawhin engmah sawi zui lo hian a room ah a tlanchho puat a. A nu pawh lo pangngai veleh tawh in a fanu chu alo be sawk sawk na a, Zorini erawh chuan a chhang let lem lo thung. A hrilhhaithlak fu ang le.

Khumah ṭhu hnawk in a indawmkun zui ta tlawk tlawk a. A chi ai tawp theilo bawk. Thaw hawk in a room chhung te chu a han thlir kual vel a, eng thil mah hi an hlutna pawh awm in a hretawh lo hial. Mal ta riau leh riang bik ta riau a inhriatna a nei zui a, chu inchhung thil engkim mai te chu a ta pawh ni ve lo a hriatna a nei zui nghe nghe. Thil zawng zawng hi a lem vek anni a, chuangtlai mai niin a inhriat phah ta bawk.

Zan dar 10 a rik pawh chuan muhil theilo in a khumah a let a let kual a. A thaw leh kawk ṭhin. A tawpah zawng, a tihngaihna a awm ta lo aniang e, a tho tharh a, a pa office ah lut ru zal zal in a pa zu dahṭhat um khat chu ava ru chhuak ta a. A roomah let leh in kawrlum chhah ṭha tak a hak leh hnu chuan inhnuai lamah a chhukthla a, car chahbi bawk kha ban leh , car chhungah zu chu a vawikhatna atan a tlak ta piap piap mai le. In ngai ve lo tih takah a rui hma hle lehnghal a, um chanve pawh a la khiat hma chuan a kai ṭha der tawh mai. Chak zet a tlanchhuak in a nu leh pa te thlan awmna lamah bawk a kal leh ta a. A hlatsan phal tawh meuhlo chu a ni e. 

Thlan a thleng a, a ṭap zui hawm hawm bawk. Khawvelah hian mal ta riau a inhriatna neih chuan hma hun thlir thiam a harsa a, kan nâ in kan rum chhuak vawng vawng fo ṭhin anih hi. Tun a Zorini dinhmun mek pawh hi dem ngawt theih ani awm love. Tu chungah pawh thleng ve thei ani a, a hrehawm a zahthlak dan tur leh a nat dan tur zia hi ka sawichhuak thiamlo hial zawk. A duhthlanna a ni bik hauh silo lai te hlei hlei hian natna ava hnutchhiah hnem tak em.

"Zorin, hetiang hian i awm tur ani lo asin. Hawh, haw tawh ang, khua pawh a var mai dawn ania"

Amy aw a hriat rual chuan rawn hawichhuak zawk in a lu alo thing zui nar nar mai a. Thlan lung ngheng chung chuan beidawn hmel zet hian a ṭhu zawi leh ngawih ngawih bawk. Rui aw tih hriat tak hian

"Ka nu leh pa te anni a, kha chen kha kalo enkawl thei tawh hleinem. Tunah chuan ka kalsan thei tawh thlawt lo a ni" alo ti ve tlat. Amy chuan thawk leh halh pah hian

"Chupawhnise, tun a i khawsak dan kher kher ah hi chuan an lawm in ka ring hauh lo. Thil thleng zawng zawng te kha an duhthlanna ni bik lo mahse, siamṭhat theih pakhatmah a awm tawh lova, her danglam theih lah ani tawh hek lo. I hma hun thlir la, hma hun eng tak ila neih hi tichhe lul suh. A nihna takah chuan tun a i chhungte pawh hian hmangaih tawp lovin an hmangaih che a, an rilru ti na thei tu ber leh tihlim thei tu ber pawh nangmah hi ini e. Chuvangin, tho la, hun kal tawh te chu liam tir tum hram hram zawk rawh. Tin, keipawh hi mitthi tawh mai ka ni tih ka hria a, mahse, chumi vang ringawt chuan ka damlai a ka tih hman loh tamtak te kha tih leh ṭalh tumin ka bei hah duh kher lo asin. Ka chunga thil thleng te hi pawm dan thiam ka zir mai chauh zawk a ni" a rawn tih dap dap hnu chuan Zorini chu lo nui sak in zu bawk chu a han tlak leh pap pap phawt a. A rui tawh angreng hle. 

Chutihlai vek chuan an bul thingkung zar a lo ṭhu mek, Rindiki kha thla eng no nghulh lam hawi hian alo zai chhuak ta vang vang a. A hla rawn sak pawh chu engdang ni lo in vawitam tak Zorini alo sak khum tawh hla ngei kha a ni bawk. Zorini pawhin chu hla a han hre leh zet chu, a rilru kal ding lai te alo ni bawk nen, hriatchhuah riai ruai nei in chutiang hla niawm tak an sak ṭhap ṭhap ṭhin lai niawm te kha a rawn hrechhuak veleh ṭan a. A mittui a rawn hnam zui leh sak mai. Tichuan, Rindiki zai chu zawite te a lo zawm ve in an pahnih chuan van dum pawl raih a thla eng no nghulh mai lam hawi chung chuan an zai dun ta rât rât a. Amy thung chu thlanlung pakhat chungah hian ṭhu in rilru hah hmel fe hian alo thaw leh halh ṭhin a. Zorini chu lainat hmel zet hian alo thlir vang vang reng thung. 

"Aw..he nau vanduai reuh zia hi chu aw. Thudik dang hi tun atan chuan hrilh hriat ngam pawh ani tawh awm silo. An awmpui nula chanchin saw, chiang zawk han hre ngat se zawng, a nun a khawloh phah vek loh pawhin a thihpui duhtawh hial awm si a.. hetiang a i awm chhung chuan Zorin, engtikah nge maw Maliani chungchang hi ka hrilh hriat ngam tak ang che le. Nang leh i nu hian i pa thuruk bawlhhlawh leh lian tak hi in hre ve der silo a aw" ti rilru neuh neuh in thla eng lam chu a hawi ve ta zawk a. 

*  **   **    **   **   **  ** **