COLLEGE BOY(JAY LYNN)

COLLEGE BOY( JAY LYNN)

BY : Vanlalpeki Fanai

‘’ Jay Lynn alo lut ve dawn’’

‘’ Jay Lynn alo lut ve dawn maw!? ‘’ 

‘’ Dawn chiang e. Niminah miss Mahmuni khan a sawi lawk vek alawm’’ 

Kan class hmeichhe ho chu chutiang ringawt sawi chuan an phili buai em em reng a, thil awmzia hi ka hre ve lo reng reng kei chuan.

‘’ Tu nge Jamie chu’’ ti hu hu in, ka thiannu Tluangpuii chuan min rawn melh rang nghal vat a. ka dar ka lo chhin ve âk thung.

‘’ Jamie a ni lo. Jay Lynn alawm’’ a rawn tih let hmak rual chuan kei ka lo nui deuh ar ar thung a, min la melh rang nasa. 

‘’ Mi hre lo ve te’’ zawi sapa ka tih zawh rual chiah hian miss Mahmuni aw chu kan hre nghal a, ka hawichhuak nghal vat. Chutah, a hnung maiah chuan mipa ria sang lam leh sam sei deuh reuh hi rawn lut ve in, a zak nge chu ka hre lo, a kun deuh chhal reng a, a hmel pawh hmuh chian theih nghal loh chuan a! 

Miss Mahmuni chuan a lama pawh hnaih sauh sauh pah hian nui var var chungin,

‘’ Awle hei, semester laklawh lai mahnise zirlai thar duhawm em em mai kan nei thei dawn a,  a hming chu---’’ a tih laiin ka hnung lawka thu ka thiannu Tluangi khan min rawn khawih in, thu ho zet hi ka beng bulah ala rawn sawi zui a, ka nui chhuak deuh hak hman lehnghal. Hmalam ka va en leh nak chuan kha zirlai thar pa khan chiang em em hian min lo en reng tih ka va hmu a, ka melh let nghek. A tum deuh bur reng mai bawk sia min huat hmel ngawih ngawihin ka hria.

Miss Mahmuni’n inhmelhriattirna a neih zawh hnu chuan ka bulah ala rawn thu zui a, mitmu bial pawp pawp khawpin keiin ka lo en ve reng thung. A lehkhabu phawrhin a hma zawnah a bur nghal ngar ngar mai a, kei chu ka la hawi deuh vual vual reng ringawt. Chutihlai chuan kan class hmeichhe ho reng reng chu min awt tih hriat tak hian kan lamah an mit a bur fur tawh hlawm a, a eng chu an hria nimaw. Tluangpuii takngial pawh chuan ka hnunglamah min rawn sik leh zeuh zeuh thin a, ka ning khawp mai.

‘’ I hming hi Jay Lynn tih ringawt emni?’’ amah melh kar chunga ka va tih chuan rum zet hian min rawn melh ve deuh zawk a, ka la en ve reng tho. Chutah, bul hmek hmuk zet mai hian,

‘’ Aih’’ rawn ti ve in, ka lo nuih ve sak thung. 

‘’ A nih leh tu. Ajay tihna zawk emni?’’ ka tih leh tak kherah chuan ka hmazawna lehkhabu chu a lamah pawt pheiin thil engemaw hi a ziak ta mual mual a, ka hmaah bawk a rawn nawr phei lehnghal. Chuta lehkhabu ka han en chian nak chuan hawrrawp lian fahran mai hian,

‘’ TIMOTHY LALMUANPUIA’’ tih ringawt hi alo inziak deuh kuau mai a! Awi! A kâ ngei mai khan han sawi that ve mai tur a nia. Tawng chhuah lamah harsatna a nei deuh nge, min be chaklo ve hrim hrim zawk nge, a zaktheilo reuh e. ka biak chak bik em em vang pawh ni miahlo, tlawmngaih chhuah vang zawka zawt khaw mawi ve mai kha ka ni reng sia. A lu len thlak lutuk em mai a!

Chumi chin chu inbe tawh lo in kan ngawi dun leh ta reng a, a khat tawk hian ka va melh leh zeuh zeuh thin . Mahse, ani thung chuan min hlau ta emaw tih tur hian min thut hlat deuh tlat a, hawi pawh a rawn hawi duh lo reng reng. Ka nek tla daih law law zawk dawn nge maw ni, ve khanglang hian!

‘' Lalrinkim, nuam iti hle mai maw’’ rawn ti lang lang thawmah chuan ka hawi let deuh zawk a, hmm, Rochhari te thiandun leh bawk chu. Lerhkawh-I te thiandun, mipa thar lam leh chhelo hre em em. Zah hre silo pahnih, hneawm-I te! 

‘’ Eng chu’’  ti let deuh hu in ka lo ding ve mai bawk a, ka hnungzangah an rawn beng ri zui thlawrh mai. A thip zawk thei lehnghal.

‘’ I bula thu mipa vang khan mawle’’ Rochhari bawkin a rawn tih leh chuan ka meng nur nasa nghal hle a, ho ka tih zia hi ka sawi tam peih lo zawk. 

‘’ Tu pawh rawn thu se engatanmah ka ti lo e a’’ ti nghutin ka inher a, ka kal leh dawn lai tak chuan Rochhari thiannu Meme-I zawk khan ngeiawm zeta nui hak hak chung hian,

‘’ Engatanmah pawh ti la Jay-a kher hi chu I phu lo ve chiang e! In inhmeh lo hrim hrim’’ a rawn tih leh kher chuan ka beng a chhun ve ta tlat pek a, ka ding zui leh chat.

‘’ Kha pa, ka bula thu sam thur deuh kha ka phu lo ang maw!? Awi! A ve lutuk cheu chuan, ka phu nge phu lo in lo en dawn nia’’ ti let nghatin ka kalsan a, an ni thung chuan min nuih har har reng mahse thudang erawh an sawi chhunzawm tawh lem lo thung.

Kei Lalrinkimi, hmeichhe ngo leh sang pangngai tak, feet 5 leh inches 3 ni bawk, hmelchhia tia sawi tur ni bawk silo hian mipa te zingah hian phu loh ka nei ang maw!? An la hre dawn alawm. He an mipa duh rawn leh ngaihsan em em Jay Lynn, Timothy Lalmuanpuia hi eng ang takin nge ka zunah ka uai tit theih tih chu an la hmu ang. An hmu dawn chiang sawhbeh! Ka rilrua ti ve pang pang chung chuan ka room darthlalang hmaah ka ding zum reng a, a chang leh kawng dawm in, a chang leh ka ban te chu ka han phar kual vel thul. Heiha! Ka vau pung hi chu ti na ve hle thin mah ila ka zeilo lutuk khat tlat hian min hnuk tla leh thin a, tu mipa pawhnise thiantha ah bak ka chhuah ve thei ngailo. Aw Lalpa, zei dan thuruk min han hrilh the. Zei tak nih ve ka duh. Zahtheihlohna tlemte nen hian min rawn vur lul the. 

Jay Lynn inti, Timothy Lalmuanpuia chu kan class mai ni lo, kan college pumpuiah chuan hriat a hlawh chak em em a, engvang ber nge hre ve lo mah ila a bula thu ka nih ve miau avangin ka lo intithei thin lutuk ringawt.

‘’ Tluangi, he pa hi engtia rawn lar chhuak nge a. sawi sawi mahse ka hre fuh thei lo reng reng’’  Tluangpuii bula ka han tih chuan min rawn nghawk sawk chung hian,

‘’ Hawi zau ve deuh la, instagram account te hi nei ve la, Ig atang an thianho vido pawh a rawn viral a nih kha. An chhelo asin. Amah tak hi chulam thiam a ni tel a, guiter perh pawh a thiam raps, model a ni bawk’’ tiin a sawi tui hluah hluah hle maia, ka lo ner ve char char thung.

Instagram ah hian account ka nei lova, facebook pawh a khat mawi tawkin ka lut ve thin. Whatsaap leh youtube tih vel te, netflix te hi ka tuipui awmchhun chu an ni mai a, nia, Ig ah chuan account chu la siam ve ngei tur a n, rual pawl nan pawh a tha dawn tlat.

‘’ Ajay, test tur kha I thiam em?’’ classrooma ka thutna hmun ka thlen rual rual chuan Jay-a bulah ka han ti nghal thar thar a. melh pawh min melh duh miahlo in a lu chu alo thing ve ringawt.

‘’ Tikhan min ko tawh suh’’ ka thut fel hnuah chuan zawi sup hian a rawn ti ve leh thung a. ka nui suk. 

‘’ Awle, I duh loh te chuan ko tawh lo ang che Ajay’’ 

Chuveleh, rum zeta rawn hawi pheiin min nin hmel fe hian a han thaw zui deuh halh bawk a, ka lo en ve reng bawk si nen, a lai leh deuh nge chu ka hre lo, ka beng bul seta rawn kun hniam chung hian ,

‘’ Min koh leh chuan I chalah hian ka pen fawk tawh ang che mawli’’ rawn ti sar sarin kei erawh ka nuih alo za tulh tulh thung.

‘’ Aw le, a tawp nan Ajay’’ melh rang deuh chunga ka han tih leh hram chuan a insehruh nasa pan pan tawh hle tih pawh ka hrereng. Mahse, lehlam min hawisan a, lehkhabu te chu rilru pe lo zet hian a bih ve ta ngur ngur zawk a, ka la nuih ru leh rah rah thin thung.

‘’ Jay-a khan eng nge a rawn hrilh ruk vel che a. Hnimhnai angreng bawk che sia’’  Rochhari te thiandun leh bawk chu. Peih lo zeta anmahni va melh chung chuan,

‘’ Hmeltha min tih thu a sawi!’’ ka ti liam ve puat ringawt a, ka thil sawi vang chuan ka inchhir leh lek lek hman a, mahse, ka sawi zo vek tawh thung. 

‘’ I hmel ang kha a tha tih chi a ni lo hrim hrim. Beisei sang ve reuh lutuk’’ ngeiawm zeta min rawn tih leh erawh chuan chhang let peih tawh lo in ka kalsan nal nal zui a, a duhzawng ka nih leh nih loh ah ka buai lo, ka la induh tir dawn a chu chu a nimai.

Amah Jay-a ka duh ngawih ngawih leh hnaih ka tum vang ngawr ngawr pawh ni lo in Rochhari te ho min en hniamna leh deusawhna zawk ka hne tawh em avang hian hreh ru ve hle mah ila Jay-a chu ka be lui char char a, min chhang tha peih lo eng ang mahse ka be lui zel tho. Min chhan that peih loh pauh leh tihbuai ka chakna chu a nasa tak tual tual lehnghal a, engtin nge maw hetiang mipa luhlul leh ngen hmel ltuuk hi kan tunlai hmeichhe tam zawk te hian an ngaihzawn a, an vei em em reng theih zawk le ka ti. Keimah ang maia mawl satliah vek emaw an nih tih laiin kei ai fe pawhin an lo la mawl zawk a nih dawn hi.

‘’ Jaya’n bialnu a nei an ti!’’ Tluangpuii chu ka melh phawk nghal hru thei mai.

‘’ eng nge khatia min melh vak. A nei an tia lawm’’ a rawn tih leh chuan amah ringawt chu ka lo la en ve ngar ngar a.

‘’ I chiang maw’’ ti supin, pawi chu ka ti ru ve reng. Alo neih tak tak vaih chuan Rochhari te lakah ka tlawm a nga, ka thiltih tum engkim a bam vek bawk ang. A pawi the ang chu. 

Chutah, Tluangpuii bawk chuan,

‘’ Nimin tlaiah bike-a an inphur chhuak lai an lo hmu a, lam an zirna hmunah pawh an inkawm bik zel an ti bawk’’ a rawn tih leh lek phei chuan ka thin chu alo phu ve dawt dawt tawh a, tak tak ni lo hram se ka va han ti tak em. 

‘’ Ajay, I bialnu ka hria nia aw’’ a hnungzanga ben thuk pah chuan a bulah zu thu thla in ka ti nghal a, min rawn melh deuh zawk. Zawi sup hian,

‘’ Tu’’ a rawn tih rual chuan kei lahin nui uarh uarh chung hian,

‘’ Tu tih tham te a nei tawh vel’’ ka lo ti leh daih a,

‘’ Mawli’’ min rawn ti lehnghal hmak tawh.

Fiamthu chu duhtawkin thutak a hun tih ka hriaa, ka va melh leh ralh ralh thin.

‘’ Taktaka, I bialnu kha a chhiatloh hmel lutuk a, ka hmu chiang chuang lo na in’’ awi ka va han daw thei tak em! Mi sawina azarah bialnu a nei tih ka hre ve chiah a, chu pawh a chiang chuang si lo.

‘’ Bialnu hi ka ngah tawh e’’ tih pah chuan za em em lo tih hriat zetin a rawn nui chhuak leh ta hak hak a, ka thin alo phu leh zaih zaih tawh mai.  chutia a ngaihna hrelo zeta ka lo hawi bial mai mai lai chuan ka hmaah rawn kun hniam thutin ka mitah tak chiang em em hian min rawn en ta reng mai a, a nui hmel a bo vek tawh si nen ka hlau ta lek lek mai.

‘’ I hriat duhzawng a nih takin, bialnu ka nei lo aw’’ a rawn ti ringawt nia! A thil han sawi ve duh dan te hi a ngeiawm thei țhak țhak asin aw.

‘’ Aw a nih chu ‘’ ti let v hmukin lehlam ka hawisan a, chet lak dan tur pawh min ti hrelo takzet tawh a ni. Min ti hamhaih vek. Tin, ka sawi lehpek thin ang, engtin nge hetiang mipa maksak lutuk hi ka hmeichhiatpuite hian an duh a, an vei em em theih zawk le ka ti. A mak hi ka ti tawp thei lo.

Vawiin chu sawrkar chawlh a nih angin class kal a ngai lo bawk a, in lamah ka tawm nileng ang tiin rilru ka siamfel sauh sauh mai. Tukthuan eikham rualin inchhunga khawih tur ang ang ka tifel fai zung zung phawt a, chawhnu lamah chuan roomah ka tawmbo daih thung. Chutah, Tluangpuii thusawi kha hrechhuakin instagram ngei mai chu account siam ve tumin ka han install sauh sauh a, a tawpah chuan ka siamfel ve ta der mai. Awi! A engamah hmain hmelhriat ho ka han hmu nghal ngawt ringawt a, ner sawk sawk chung hian an ni ho chu ka ngainat zawng an nih loh angin ka thaibo nghal puat puat bawk. Ka duhzawng an awm a nih chuan ka follow ve mai ang. A ninawm.

A hmasa ber atan Jay-a chu ka han zawng hmasa leh te te a, ka hmu nghal vat bawk. Hm, a mizotawng takin ani chuan zuitu pawh alo ngah narawh e. A luck ve thawkhat hle tih chu hre tawh tho mah ila, tunhma daih atanga ka mi hriat zawng a nih ve loh avang khan mak erawh ka la ti tawp thei chuang lo. Tichuan, follow duh chuang lem lo in a profile te chu ka han en kual hmasa leh thuak phawt a, engati nge maw, engtiklai mai pawh hian lungawilo hmel hi a put reng mai le ka ti. Chawllo lekin a chhungte hian an hau thin nge, ka hrethiam thei hlawllo. A awm dan hi hahthlak ka tih zawng tak.

‘’ Hey, Lalmuanpui, pa tak te hian awm ve la. Mizo mipa diktak keini ang hian pangngai takin I nung ve thei lo emni? Hmeichhe mit lak tum reng renga han awm tawp mai chu’’ canteen chhunga kan awm laiin Jay-a chu mipa pathum hian an rawn dinchilh a, an be buai niin ka hriaa, an awmna lam hawiin ka inher vat bawk. Um, thil ei paha a thu ngawi mai mai lai chu 2nd semester zirlai mipa pathum hmel hmuh nuam lo fahran te chuan lo dinchilh in an kut zungchal te chuan an lo nawr leh sawk sawk thin hi a ni a, ka en ve ta reng. Chutianga an tih bawrh bawrh lai pawh chuan Jay-a chu a awm ngaiin ala awm reng a, a ei ngaiin a ei zel a, a kun deuh tlat bawk. A ruk tak chuan a inhumruh ve nasa hle ang chu.

‘’ Awi! A sualthiam thlak e. Eng nge sawtia tih saw a tul kherna’’ Tluangpuii leh Remi ten an rawn tih chuan keipawhin an lam hawia la mengrum ve al al chung chuan,

‘’ An thik a nih saw’’ tih leh ka thutna thawhsan chu ka rual a, Jay-a te awmna lamah chuan ka tleh phei nghal bawk.

‘’ Hei, hetah hian eng buaina nge in lo neih a. jay-a hian in pawi a sawi emni?’’ va ti ve khar kharin chung mipaho chuan min lo en deuh thap ringawt a, ka zam duh lo lui ve ngat thung.

Chutah, hun rei pawh an ngawih hmain an zinga pawr fal deuh pakhat chuan kei chu min rawn din hnaih ta sauh sauh mai a,

‘’E,, tu nge I nih ve a. kan buainaah hian kan ko ve reng reng che emni? Hmeichhia lehnghal, zak rawh’’ rawn ti khur khurin kei chu ka lo khap deuh fak fak reng a, canteen chhunga midang lo awm ve ho pawh chuan kan thawm chu hria in min rawn en deuh ha ha tawh bawk.

‘’ Jay-a hian buaina a siamsak hauh lo che u. Tu nen mah buaina a nei ngai lo bawk. Kalsan vat ula a tawk mai’’ ka tih zawh rual rualin an zinga pakhat chuan ka dar veilama rawn nam sawk chung hian ring zetin,

‘’ Hei hmeichhia, lo inrawlh ve suh aw. Nge ni a, I hmeichhiatpui tiin Jay-a hi I rawn țan ve deuh zawk ni a. ka beng hrep zawk dawn che nge le’’ tih paha ka hmai rawn ben a tum lai chuan tuemaw hian a kut chu lo manbehsak in, Jay-a a ni tih pawh ka hriaa, ka thinphu a rang zual sauh bawk.

‘’ Mipa tan hmeichhe kut thlak hi a mawi lo hulhual. I duh leh keimah hi min hnek zawk rawh’’ rawn ti hniam supin  amah ringawt chu ka melh vang vang reng tawh a, ka tiril khur pawh ala reh hleithei meuh lo. 

‘’ Nang hi’’ tih leh, Jay-a hmaia hnek rik chawrh chu a rual nghal a, kan au deuh that thei nghe nghe. Chumi chin chu canteen chhungah buaina a chhuak nghal a, thawm a turu in kan ri zui nuai nuai hi a ni ringawt. Kei erawh chu an intihbuaina karah khan tihtur ber hre silo hian ka lo la hawi kual ve zak zak reng a, ,mahse, tuemaw hian ka banah rawn chelhin canteen atang chuan min tlanchhuahpui ta nghal a, chu chu tudangmah ni lo in Tluangpuii kha alo ni bawk.

Thaw hlawp hlawp chungin classah kan tlan lut a, ka thaw seng mang lo chu a ni ber e.

‘’ Mawli, nangmah vang vek a nih kha I hria em. Iva han laktlak loh tak aw. Jay-a kha ngaihdam dil ngei ngei ang che’’ ti hlak hlakin Tluangpuii chuan min kal hual thuak thuak reng a, kei erawh ka melh ngai melhin ka lo la thu ngawi reng.

‘’ Va inrawlh ve kher kher kha eng nge a țulna. I thluakah hian eng thil nge lut a’’ a rawn tih nawn leh takah chuan keipawh ka ngawi reng thei tawh lo. 

‘’ Inhmuhsitna hi ka pai ve thei lo. Khang ho khan Jay-a an hmuhsit zia kha I hre ve lo emni? Thiamlohna ka neih pawh ka hre ve lo ve’’ ti let ve ta vatin Tluangpuii thung chuan min lo la en ve reng.

Tichuan, canteen chhunga intibuai ho chu office ah koh luh niin an zilhhau nasa hle a, kei erawh min sawi lang ta lo thung a nih kha. 

‘’ Ajay, ka tihpalh aw’’ Jay-a hnungah chuan zawimuangin ka kal ve zel a, ani erawh chuan min lo ngaihsak miah lo thung.

‘’ Ka sawi chu I hrelo emni?’’ tih pah hian amah chu ka va kalpel deuh thuak a, a ding zui ve chawt mai. Mahse, ngawi renga min kal pelh leh mai a tum lai chuan a kutah lo man behsakin chiang zet hian min rawn melh ve ta kawk mai. Reivaklo chhung chu kan inmelh leh ren rawn phawt a, tlem chuan keimah ah hian nuamlo tihna leh zak ruk deuhna chu a awm ve chiang alawm. Mahse, ka ti lui ngar ngar a, zah țit țet a hun lo tih pawh ka hria. Ka tum lo bawk. Chutah, ka inring lo lai chala rawn nawr sawk chung hian , 

‘’ Kalsawn the mawli’’ a ti leh sap ringawt a. ka lo ner deuh sawk thei. Khatiang thil a thlen hnu atang kha chuan a hma ai zawngin Jay-a nen pawh kan inbe ve thei ta deuh a, ka lakah chuan a zam reng tawh biklo tihna a nih chu. Mahse, chuti chung pawh chuan khirh fet fet tak ala ni tho. Inkawmngeih leh inngaina tak kan ni e tia sawitur chu kan la ni chuang hauh lo. Beih fe ala ngai dawn. Chutihrualin, keimah zawk hi ka dik lo chho tual tual a, a tira thian ang chauh a kawm tum leh midang tih elnan chauha induh tir tum si khan ka rilru ka control theilo tial tial a, a ni telin ani chu ka vei na tulh tulh ka ti mai. Ka thlahlel a, a hmel chu hmuh tam ka chakin a kiangah chuan awm tam ka chak tulh tulh bawk si. A ruka ka nihna tenawm leh zahpuiawm tak hi hre ve lo se tih ka duh rualin amah ka duh rukna chu hriattir ka duh thung a, ka tilang thiam chuang bawk silo. Rilru in ka tawngtai tluk tluk ringawt mai a ni. 

Tunah chuan college campus chhungah pawh amah er a tibuaitu a nei tawh ngai lova, chutiang zelin keipawhin tibuaitu ka nei ni a a hriat chuan a hmel hmuh tur a lo awm vat thin bawk. Ka bula a khawsak dan zawng zawngah hian kei hi min duh tiin ka sawi thei hauh lova mahse, a ruk erawh chuan min ngaihven a min ngaihsak ve tho tih erawh ka hria. Ka hrechiang lutuk.

Ni khat pawh Rochhari te ho nen chuan indinchilh meuhin thu pakhat vang hian kan lo inhnial laih laih reng a, chutia kan lo rik deuh mam mam lai chuan Jay-a kha kan bulah lo kalin ngawi reng hian kei chu ka darah min rawn kuah ringawta, min kai hrang nghal daih a nih chu! A eng chu a hria nimaw tih melh a ka melh reng laiin ani chuan nui deuh sak chunga min rawn chhuk melh pah hian,

‘’ In buaina a ho ve si’’ ti leh supin ka thutna thin ah chuan min pawt thu nghal rawk a, amah chu ka la en ve reng.

‘’ Kan buaina I hria mi’’ lo ti let hlakin ani chu za fahran hian a rawn nui leh ringawt a,

‘’ Hre lo ve, mahse, hmeichhe buaina chu a ho thin’’ alo ti tawi leh tak ringawt a. ka melh ve ta nghek. Chutah, ka rilruah chuan eng sual hnathawh nge rawn awm tih pawh ka hre tawh biklo, amah en vang vang pahin,

‘’ I number min lo pe!’’ ka han ti ringawt a, a rawn hawi phawk angreng khawp mai. Mahse, thudang sawi buai tawh lo in paper them a pawt thla nghal a, a phone number pawh chu a ziak ve leh mai bawk a, kei ka lo nui suk thung. Heti hi chuan a duh emaw duh lo emaw, ka be buai char char thei tawh ang chu ti rilru chungin ka nui ru leh var var thin a, tifuh hi ka inti ve hlat hlat em asin. 

‘’ Jay-a te lam zirna hmunah va kal ve ila’’  Tluangpuii leh ringawt thin hi a! 

‘’ Ka duh teuh lo mai. Eng nge kan va tih a nga’’  ka lo tih chuan rang zet hian,

‘’ Aw, a lam lai kan en ang mawle. Kal rawh, va en ve chhin ang. Hmeichhe dang pawh an kal nasa thei lutuk an tih kha’’ rawn ti leh hramin, ka sam te chu min țawn that sak mawlh mawlh a, min hnuk chhuakk nghal bawk. 

An lam zirna studio kan va thlen chuan Jay-a hmel chu hmuh tur alo awm mai lo lehnghal a, a rukin ka zawng kual deuh ngat ngat mai. Chutihlaiin Tluangpuii swi ang tak tak khan hmeichhe thenkhat, Jay-a lam lai en tum tih hriat fe fe ho chu an lo ther ve fer fur bawk a, kei erawh ka zak tha leh deuh tlat nia. Jay-a hmel a rawn lan hnuah lek phei chuan min rawn hmu mai ang tih hlau in ka biru kual deuh zuk zuk thin a, Tluangi bawk khan min rawn țham chhuak leh thin. Um, a tawp a tawpah chuan min rawn hmu ve ta nge nge e. chhuanlamah ka lo bye bye zuk zuk a, mahse, min hria ang pawhin a awm miah lova, min melh deuh zawkin a hma zawn a en leh a, a tihtur chu a ti leh miah miah ringawt. Ka hmel a hmuh rual khan a thin te pawh a phu ve zawk lo emni? Kei chu ka țim deuh sawk asin le. In an loh theih khawp mai.

Chulai hmuna awm ve reng pawh chu ka tui thei tawh thlawt lova, Tluangpuii phur em em a lo rak chel chul lai chu pawt hrang nghal nawlhin pawnah ka kal chhuahpui zui hlawk hlawk mai. Ani pawn a chhan chu min zawt lem lo in ngawi reng hian min zui ve mawp mawp ringawt a. kan in kan thlen hnuah pawh Jay-a leh studio chungchang vel chu kan sawi zui hran tawh lova, sawi pawh ka duh hek lo. 

Semester laklawh atang chauh a rawn lut mahnise, a rawn tirh atang hun tam a liam ve leh tawh a, inhre ngailo pawh kan ni hek lo. Khatia hriat ngai loh melh taka min han melh vel kha kei thinlung liani hian ka tuardam thei leh tawh thlawt lova, ka chapona leh induhtawkna te hi an rawn irhchhuak ve leh thin tlat. Midang tan chuan ho viau angin lang mahse ka tan erawh a ho lo lutuk mah mah. Thu dun reng kan la ni zui a, inhriatloh der tih vel kha a theih loh hrim hrim.

‘’ Nimin tlai khan studio ah ilo kal ve a’’ 

‘’ ka lo kal a mi? Min hai a nih chu’’ ka ti let ve deuh ngat. Chutah, ngaih dan nih loh hmel zeta ner sak sak chung hian,

‘’ Min la rawn bye zui a, ka mumang a nih zawk ka ring’’ ti lehin kei lah chuan rang zet hian, 

‘’ Chu chu a na mi? Mi zingah chuan biak ilo harsat ve hmel hle mai. Ka lo kal te kha ka inchhir tawh’’ ka lo ti let ve leh kher bawk a, min melh ta vung vung ringawt. Chumi chin chu min chhang tawh lo in kan inbe zui ta lo va, class ban hnu thleng pawhin kan inbe leh ta lo. A awm dan atang chuan min pehhel a tum riau in ka hriaa, kan inhria tirh ang mai khan kei chu min hre ngai lo ang maiin a khawsa chho leh tlat tawh a ni. Amah hnaih tuma tan ka lak ve leh heti hian min hlat dan tur a zawng ve zel a, ka bei te hi a dawng lek lek thin. Chutihnak alaiin amah chu ka la vei na ang tual tual lehnghal a, biak ka chak rualin ka huphurh em em tho bawk si. A hmel ka hmuh rual te chuan zamna hlirin ka khat vek a, tunhma ang lo tak khan a kiangah chuan ka zak thar leh ta viau bawk a, a number pawh kha la kawl tha ve thlap mah ila ka be ngam thlawt rih lo. Classroom ah nise min biak hmasak loh chuan be hmasa tu nih ka hreh thin a, ani lah hian min be hmasa khat bawk si, ava han hrehwm duh thin tak. Aw Lalpa, he mihring nen hian engtikah nge kan inngaihzawn ve theih ang le. Ka twt up up reng tawh mai. 

Class test neih hun alo thleng a, thiam pakhatmah pawh ka nei lo. Ka zir miau lo va. Chutihnakalaiin, test hun chhung te chuan thutpui neih an phal silova, Jay-a nen pawh kan thu hrang daih. Ka rilruah eng thilmah a lut thei tawh lova, Jay-a chiah ka ngaihtuahnaah chuan ala awm rih miau si nen, a khat tawk hian a thutna hmun hnung lampang chu ka va hawi phei leh thin a, vawi khat phei kha chu kan mit a intawng chiang the asin. Ka  țim sawk thei. Mahse, ka va hawi nawn lehnaah erawh chuan ani chu alo kun leh ngar ngar tawh thung a, ziah tur a hriat hmel angreng bik khawp mai. 

‘’ Jay-a chu I thiam hmel bik e. Test leh hunah chuan min hrilh ve tawh rawh aw’’ hmeichhe pathum vel hian a kawng kal lai chu lo bawr laih laih in an kuah bet lo chauh bawk a, kei chu amah pawh melh tha ngam lo chung chuan an hnung lawkah ka kal ve zel a, a hnuah phei chuan chak zetin ka kal pel deuh fuaa, min lo koh ve te ka rin tehreng nen, a ngawi hmak! He pa hian keimah ah hian eng rilru mah a pu ve lo tihna nge ni ang a, a inthup thiam lutuk zawk ni ang aw ka ti thin. Hetiang rilru hi ka pu chho zel dawn a nih chuan inthup theih loh chin ka la nei ngei dwn a, engtin nge ka tih ang ka hrethiam tawh bik lo. Ani chu college ah pawh mi hriat hlawh chin leh nulate duh rawn, thiamthei leh talent ngah bawk si, college boy an tih ang tak tak kha a nih ve avangin keimah ka insit ngawih ngawih thin a, ka phu ve lo nia hria in min duh ve thei ttura ka han ring ringawt te pawh chu ti diklo ka intiin, zaktheilo ka inti takzet bawk. Khawvel hi chu a fair tawk lo ve thlawt alawm. Kan duh em em ten min duh lova, kan duh loh leh sit em em ten min neih tumin min hel leh ngar ngar thung a, her rem dan te hi awm sela ka ti thin ngawt a ni. Ka ning. 

A ni telin Jay-a hnen atang chuan ka tla hrang ta tual tual a, ka hla zel a, ani pawhin min hnaih tumin hma a rawn la bik bawk lova, tihian, amah duh ru em em chungin kan zuih ral dawn ta a nih hmel. Rochhari te thiandun lahin insawitheih chu an la bansan duh lova, a bikin, Jay-a te nen whatsaap lama an inbiak fo thu te chu sawi nuam an tih zawng a ni a, ka hriat tur kher  a han sawi chu nuam an ti lehzual niin a lang. Kei lah hian hmasawnna reng reng ka nei ve thei bwk silo nen, ka ning ka hne tawp.

‘’ Tunlai chu I fuh lo thei riau in ka hria’’ tia min ti tu an awm avang chuan ka hawi chhuak deuh zawk a, Jay-a alo ni ve the tlat. Amah nuih deuh sak chung inti zawi awi fahran chung hian,

‘’ Nia, ka fuh thei lo’’ lo ti liam ve maiin ani chu ka bulah a rawn tawlh hnai ta hrut hrut a, ka thin alo phu leh dup dup tawh mai. 

‘’ I bialpa in a hau che nge’’ a rawn tih leh chuan nui deuh var var chung hian ka lu chu ka lo thing leh mai a, 

‘’ Bialpa ka nei lo’’ ka ti mawl deuh tawp. Chu zet chu a awih loh hmel kher mai le. 

‘’ Ka phone number kha ka pe ve che in ka hria, a dik em?’’ a rawn tih leh chuan ka zak ru leh chem chem tawh a, tawngkaa chhang lo in lu ka lo buk khum ta ringawt a nih kha. A thuhrimn a number pawh chu ava han sem chhuak nasa tawh awm em em. A lerh ve phian a nih dawn hi ka ti. 

‘’ Min lo pe let leh daih rawh ‘’ 

‘’ Eng maw?’’ 

‘’ Ka number kha’’ 

‘’ Engatan?’’ a ngawih vang vang hnuah nui var var chung hian,

‘’ Min biak I tum chuang silova, a tui-ek hman vek ang’’  a rawn tia nih chu! Ka zak veng veng thei. Hm, he pa hian ka biak hun a lo nghak ru ve char char tihna a ni ang maw. A fuh dawn e.

‘’ Biak I duh phawt te chuan ka rawn be dawn che nia. Be tu I ngah dawn sia ka tia ka lo khek vel alawm’’ ti ve leh maiin, a lu chu alo thing deuh nar nar reng a, min chhang let tawh lo in  a thutna hmunah a tawlh phei leh a, kan ngawi dun leh ta vang vang mai. Hetih hunlai taka ka awm dan hi ka sawi thiam lo zawk. A nuam ka tih ruk em em rualin ka zam ve deuh bawk a, keia biakna ve mai mai alo nghak reng tih ka han hriat hnu phei chuan awmngaihna pawh ka hre lo lek lek tawh. Lo ngawi tak rawh se, tun atang chuan a nin tur khawpin ka be buai tak tak dawn alawm tih ngaihtuah chung chuan ka nui chhuak deuh ta vur vur a. 

Hemi chin hi chu whatsaap lam atang inbiak kan thulh ta mang lova, Ig ah pawh min follow ve ta thlap mai. Tun dinhmunah hi chuan ka hlim a, engdang vak mah hi ka ngaihtuah kai hleithei lo a ni ber. Rinai takin phone atang chuan alo ngampa ve phian a, swi tur a hria in fiamthu nise a duh ve angreng phian bawk. Classroom leh college campus vela a awm chut chut ang ngawt kha chu alo ni hauh lo. Keipawh hian ka biak thin chu amah tak tak a ni lo emaw tiin ka ringhlel hman hial a, ka video call ngat a nih kha. Mahse, amah ngei chu alo ni ve tlat bawk si. Mak tak a ni. A tir lamah chuan biak hmasak zeuh ngai thin mahse a rei hnuah erawh min be hmasa tu zawkah țangin tuktin min wish a, classah pawh min be tha thei tawh nasa. Ka bulah chuan nuam a tih hmel hliah hliah a, fiamthu te thawhin min tihlim bawk a, keipawn nuam ka ti takzet.

‘’ Hey nang kha lo ding the'’ vin zeta rawn ti ri ka hriat chuan ka ding nghal zawk thei a, tudang ni lo in Rochhari te thiandun leh tho kha an lo ni e. Hneawm hian. 

‘’ Eng thil nge ni ta’’ zaidam taka ka tih zawh rual chiah in Meme-I zawk khan ka kuta rwn vuan chung hian dimlo zetin min hmer ta ngat ngat maia, a na ve tep a ni. 

‘’ Jay- a hi lo be ve fo tawh suh aw. Ka ta liau liau a nih tawh hi I hria em? A thuhrimin nang ai chuan ka level pawh a sang zawk hrim hrim a, in inhmeh lo lutuk’’ ti hmarh hmarhin ka kut chu ala hmer deuh vang vang reng mai. Hemite pahnih hian eng thil chiah hi nge maw an hriat le ka ti. Jay-a nen kan inngaizawng tih thu pawh ala awm lova, min thik nghal em em mai chu a nia. A thuhrimin anni pahnih zingah pawh hian a bialnu an awm lo hrim hrim  a, zaktheilo dun ve ngawt mai.

A vawikhat thlenna chauh ala ni bawk a tiin an ni thiandun thusawi chu ka ngai pawimawh duh hran em em lo a, Jay-a pawhnise ka biak loh phah lova, college ah pawh kan inzui ngai rengin kan la inzui tho. Chutianga kei nen inzui ve reng ta na na na chu inngaizawng emaw kan nih ti tawk an awm lo thei lova, college chhungah chuan kan thang chhuak hneh angreng hle. Mahse, sawifel tura ka tih angin ani pawhin insawifiahna story leh status a nei zung zung a, tlem a tlemah inngaizawng tia swi hlen kan hlawh lo chauh a nih kha.

Insawifiah tura ka han tih kher nachhan pawh an ni ang public figure chin tawh tan chuan engkim maiah fimkhur a tul zia la hriatthiampui tlat a, bialnu neilo a nih vanga lo duh leh vei em em tute tan pawh kei ka lo inrawlh ve chhen tur kha amah thlauhthlak phahna tham a tlin ve miau avangin kei hi ka inthuhruk thiam a ngai miau sia ni. Mahse, inngaizawng tak tak lo ni ta ila chuan hetiang thil vel hi chu a tawrh theih tho erawh ka ring thung. A ngai pawimawh vak dawn teuh lo. 

Chutiang na na na chu min itsik a kan inzui hmel hmu thei miah lo an lo pung ve zel bawk a, min tihbuai chak hrim hrim mihring an pun chhoh ve zel avangin ka khaw hawi pwh a zim sawt viau a, ka rilru natna tura tawngkam neih leh min tawng khum fak fak na te pwh chu ka dawng hnem ve ta malh malh khawp mai. Engemaw chang chuan tawrh hrehawm tih leh nat ngawih ngawih chang pawh ka nei ve tho a mahse, tihsual ka neih loh zia hretu chu keimah tho ka nih angin ka tuardam thei leh mai thin zawk a ni. Nia, mihringte hi chu dawhtheih chin nei vek kan nia, tihsual kan nei lo chung pawh a min bei duh tu an awm reng hi chuan tawrh theih loh chin kan lo nei ve fo mai hi alo ni. Chutiang bawkin keipawh min beihna tam zawk chu ngawihpui maimai thin mah ila, a rei tak hnuah erawh chuan tawrh peih loh chin ka nei ve ta ngei a. Hmaichhan ngeia min ankhum bawrh bawrh pawh tih tawh naklaiin social media thleng thlengin min la rawn umzui duh hlawm zel a, hmeichhe thenkhat a rapthlak zual ho phei chuan Jay-a chu ka kherh ngat ngat a ka umzui zel ang te hiala thu an lo theh darh chuan min timualpho a, chutiang reng renga hringnun hman chu a hahthlak ka tih tawh em avangin amah pawh hrilh duh lo chuan inthiarfihlimsan dan ka zawng ta ringawt mai a ni. Ka be tha duh lo tan a, a call leh text ka chhang duh lo tan bawk a, classah pawh a bulah thu duh tawh lo in Tluangi bulah zel ka thu a, a ngaihna hriat loh hmel tak leh hamhaih tih hriat zet hian min rawn en leh ringawt thin. Mahse, ka hmu lo der zel thung. Pehhel dan zawngin ka buai ngat ngat a, amah hlat thei ang bera awm chu ka duh a, harsa hle mahse ka tihtheih ve chu ka ring tlat a ni. Ka tum bawk.

‘’ Kimkim, I pawi ka sawi emni?’’ hnunglam atanga min rawn ti tu an awm avang chuan ka ke pen lai tawp chawtin ka ding zui a, min rawn be tu kha tu nge a nih tih ka hai lo, ka damchhung pawhin ka theihnghilh tawh ngai lovang tihtur khawpa ka mi hriat chian amah Jay-a, Timothy Lalmuanpuia ngei kha a ni. Chhing sawk chung hian hmalam ka hawi lui ngar ngar phawt a, ka ding tlawn reng ringawt bawk. Tichuan, muangchanga min rawn pan hnai chung hian hnai takah min rawn dinchilh leh ta nghal a, a mitah pawh ka lo melh tha ngam lo. 

‘’ Kimi, I lung tih awi lohna ka neih chuan min ngaidam dawn a nia, mahse’’ a tih lai chuan lo pawt chatin,

‘’ Kan inzui tawh loh hi a tha zawk. Min hrethiam dawn a nia’’ ti leh sapin, ka kut a rawn vawnna chu ka phelhsak a, ka kalsan nghal nal nal. Harsa chu ka ti ve alawm mahse, hei hi kan pahnih tana tha tur zawk thil a nih angin ka tih ngei erawh a ngai miau si a ni. Pawi pawh ka ti lutuk ringawt. Kum lamah nise kei aia naupang  zawk ala nih angin a hma hun tihchhiatsak ka duh lova, kei hmeichhe vang mai maia a hma hun eng tak buai chuar tur kha ka thlir lawk hian ka ngaingam thei thlawt lo a ni e. 

Khatiang thil a bula ka sawi tak hnu atang kha chuan tunhma zawng aiin min rawn be tlem ve tawh a, a hun awl ngah lo chu thuhran , a online reng chung pawhin min pehhel dan tur chu a zawng ve ta hret hret ka ti mai. Chutihrual erawh chuan ka status leh story rawn en zuk zuk erwh ala nei tho a, kei lahin ka rilru ngaihtuahnaa thu awm te chu inbunruahnan taka ka lo hman thin avangin mak pawh min ti ve thin khawp ang ka ring. Eng ang pawhin biak chu duh ve thin mah ila ka insum hram hram a, ka insumtheihloh mai ka hlauh luatah movie te ka en nasat phahin lehkhabu nise ka chhiar nasa bawk e. mahse, rilru kil khatah erawh hi chuan amah tho kha a cham veng veng thin sia, ka eng tih mah hi a tui thei tak tak lo a ni ber e. 

Heng hi ka nihna up beh tuma ka paibo reng chu nimahse, ka thup seng thin lo fo tho va, a ruka a lam zir lai va enthlak te, a che tla vel hmuh duh vanga an studio vela va kal ruk te erawh chu zawimuangin ka hrat chho leh ta tual tual thung a, inthiamlo ru thin hle mahila amah hmuh chakna chuan a turin min tur reng mai si a, ka insumthei leh ta lo a ni ber e. min rawn hmu mai ang tih hlau in ka biru kual fova, min hmuh ve theih lohna tur hmun atang chuan a hmel mawlh chu uluk takin ka thlir thin. Amah hual vela hmeichhe chhelo leh hmeltha tak tak awm ho te chu a ruk takin ka thik a, ka awt bawk a, amah an biak paha a taksa an dehsakna te pawh chu awt ru hle chungin leh, inpetruh fan fan chungin ka thlir liam ve thin. Heng a taksa nalh leh piannalh tak te hi engtikahmah ka ta an ni ve thei ngai dawn si lo. Khawvel hi chu a fair lo ve ngawt mai ka ti.

‘’ Engati nge Jay-a nen hian in inkawm tawh ngai loh a. Inhauhna te in nei emni?’’  Tluangpuii’n uluk zeta min en chung chuan a rawn ti a. Amah melh in ka lo nui suk ringawt. 

‘’ Amah nen chuan nei love. Hetia kan awm hi ama tana tha tur zawk a nia. A bak a awm lo’’ lo ti let ve sap sapin ani chuan min la en reng a, a ngaih dan erawh a nih hmel loh kher.

‘’ Thingtlang nula I nihna hi I insit mah mah thin Kimi. Diktaka sawi chuan khawpui nula te aia I that loh bikna hi ka hre lo reng reng. Insit duh tawh suh. Khawpui nulate tih theih loh tamtak hi iti ve thei asin. I ngaihtuahna kha thlak danglam vat ang che aw. Ih, ka hmuh dan chuan Jay-a hian a duh che niin ka hria! Mahse, hetianga I khawsak khum tak tlat avang hian a hnaih lui ngam lo che a, I hua emaw a ti te pawh a ni maithei. Inbe tha leh vat ula ka ti’’ a rawn tih leh chuan thil thui tak ngaihtuahin ka lo ngawi ve vang vang a, ka hrethiam tawh lo. Nia, Tluangpuii sawi ang khan kei thingtlang atanga khawpui lama college kal ve mai mai hi chuan Jay-a te ang tlangval chhuak hlim hlawt chhelo leh mi hriat hlwh ni bawk si lo kawm ve vak kha chu a zahthlak a, ka insitin mite min ngaih dan tur ka dawn tello theilo a ni e. ka khawsak dan hi min dem duh tu tan chuan ka dem awm thei viau pawhin ka ring a, mahse, amah vanga ka buaina leh vauna tawh zozaite kha awm nawm loh phah rawihna tham an nih ve miau avangin he thil hi ti lo theilo dinhmunah ka ding bawk si a ni.

Hun a kal bek bek a, kei chu ka dinna ngaiah la ding rengin ka rilru pwh sawhsawn ka la tum hran lova, tunah chuan ka awm dan engkim te hi pawm thiam ve tan tawhin ngaiah ka nei lek lek tawh hial a, Jay-a hmel ka hmuh loh chuan ka dam deuh huai huai a, a chanchin ka hriat tam loh hlei hleiin ka dam nimai hian ka inhria. Mahse, zan khat erawh chu amah atang call ka dawng ve ta nawlh mai a! A tirah chuan lak mai nachang pawh hre lo in ka phone chu ka melh ngawt ngawt ringawt. Chutah, call chu a tawp thei takngial dawna hria in ka han la ve ta hram a, ka thaw pah leh hawk hawk thin bawk.

‘’ ilo la ve hram e. I dam tha em?’’ rawn ti hmasa berin,

‘’ Umm’’ ti ringawt hian ka chhang thung a. chhuanlamah a han khuh leh deuh khak khak phawt. Chutah,

‘’ Naktuk zanah show kan nei dawn a, min lo tawiawm ve ta che’’ a rawn ti ta mai a nih chu! Ka thin hi alo phu leh zaih zaih tawh. Chhang let lawk lo in ka ngawi reng a, ngaih dan han siamfel mai dan tur chu ka hre lo hle a, ka rilru a insual buai vek a ni ber. 

‘’ Min chhang la’’ a rawn tih leh hnuah chuan harhchhuak deuh zawkin,

‘’ Aw nia, eng show maw?’’ ka ti chhuak deuh nuai a, alo nui deuh hak.

‘’ Kan kal a nga I hre mai ang. Tlai dar 5 velah ka rwn hruai ang che aw, lo inpeih sa la’’ 

‘’ E he! Ava hma dawn em em. Ti nge a’’ ka tih leh chiam hnu chuan nui hawk hawk chung hian,

‘’ Fashion show a ni dawn a, inbuatsaih hma ka ngai alawm hrethiam em?’’ a rawn ti ve leh mai a, ka fiah ve ta kuarh e. Tichuan, chumi zan atana kan inbiakna chu duhtawkin call kan ti tawp a, a reh zui vang vang nimai hian ka hria. Ka ruak huai thei. A aw ka hriat ruala ka la danglam nasat zia ka ngaihtuah letin amah ka lo thlakhlelh zia ka inhre nawn thar leh a ni ber a, ka ngai zui ta veng veng. Tichuan, a tuka thil thleng tur suangtuah reuh reuh chungin  leh, phur lutuk vanga  țim ru sung sung chung chuan zan mu chu ka chhing ve thei ta hram a.

A tuk a rawn herchhuah chuan zan lama ka thil tihtur te hrereng in ka phur sauh sauh tawh hle a. mawnga hawlh ang mai hian ka za sek tawh ka ti mai. Hemi ni berkher hi inrinni alo nih ve bawk avangin chhun lamah chuan inchhung sekrek khawihin ka buai nileng thak a, ka zan lam tihtur hmabak mawlh mai chuan min kam tlat avangin ka thiltih lai engkim maiah ka phur em em reng a, ka nghahhlelh rualin ka huphurh tel bawk si. Ka awm dan chu a hrehawm nuam vel vek hi a  ni ber e. sana ka en sek tawh a, ka duh aiin tlai dar 5 chu a ri har hrep mai ka ti. Hna ka zawh veleh zanriah ka ei hmasaa, ka inbualfai leh meuh chuan tlai dar 3 lo ri ve tawhin ka insiam nghal a, duhtawka ka insiam zawh meuh chuan dar 4 alo ri hnai thuak tawh a, ka induhkhawp thei der lo lehnghal. Ka inchei dan mawlh chu ka inbihchian pauh leh sawiselna tur ka hre zel bawk si a, hetiang chuan Jay-a lo thlen hunah pawh ka la hman ve thei lo tawp ang. Um, tihian a simple thei ang berin kal ila, make-up inhnawih chhah vak loh hi keipawhin ka inhmeh zawkin ka hre deuh tlat. Hmuh ka nuam zawk bawk ang chu.

A hun a thleng ta. Jay-a chu a chhiat loh ngaiin a rawn chhelo lehpek hle mai a, mahni insitna bawk ka nei leh tawh. A bulah chuan khur lo chauhin ka kal ve tawp a, bike hmanga min rawn hruai avangin a hnungah amah dek lo tur chuan ka inring ru ve ngar ngar a, ka hah vek thei.

‘’ Min rawn kuah rawh. Zak suh’’ a rawn tih chuan ka phu deuh zawk thei a, engtin nge ka zah leh zah loh te chu a rawn hriat theih zawk ni. An duhnaah chuan mipaho rilru lo chak zia hi aw. Tichuan, a sawi leh duh dan ang ngei chuan a kawngah dimtein ka va kuah ta a, zawimuanga kuah nghet sauh sauh chung chuan thawklehkhatah ka kut chu a rawn hmer deuh salh mai a, ka duh aia nasa in amah chu ka kuah ngheh phah ta daih. Chuveleh, a bike khalh dan speed chu tisang sawtin chak ve pangngai tak hian min tlanpui ta par par mai a, midang khalh chu nise ka hlau maithei. Mahse, heihi chu Jay-a khalh a ni tlat. He pa hi chuan ka thla hi a timuang ve em asin. 

Show an neihna hmun tur kan thleng a, rin aiin kalkhawm pawh an lo tam ve tawh angreng. Engamah hmain kei chu ka han zak lehnghal em em ringawt phawta, mite chuan min en duh deuh bik ni hian ka hre tlat zel bawk si. Thing bik niin ka inhre bawk a, ka sa zui pup pup thei mai. Mahse, nghet zeta min kaitu Jay-a ka neih tlat avangin ka zam chhe duh bik hauh lova, a phenah chuan hawi pawh hawi tha ngam mang lo in ka kal ve ngar ngar ringawt mai a ni.

Kan thlen atanga darkar chanve ral hnu velah show pawh chu  țan a  ni ve ta a. keipawh thlirtu mipui zingah a hmasa pawlah chuan thu ve in Jay-a lo chhuah hun tur ka lo chang ve char char a. A rawn chhelo leh dawn lutuk hi ka thu nghet hleithei tawh lo, ka za vek. A hmasa lamah chuan mizo hmeichhe model chhelo tak tak te chuan designer kawr thar mawi leh nalh tak tak te chu rawn ha chhuakin, an hnungah mipa model pakhat hian  a rawn zui nghal zat bawk a. chumi dawt leh ah chuan ka duh leh vei em em Jay-a ngei mai chu a designer kawr hak fit leh dangdai tak mai nen chuan a rawn chhuak ve ta zan zan mai a, ka lo thlir uluk fal em em bik tawp ta a ni. Tichuan, a let leh dawn lamah kei chu min rawn hmu fuhin ngaihnobei tawk lek hian min rawn nuih deuh sak bawk a, ka chhan let dan tur hre lo lutuk khan ka lo by liam ringawt a, a nuih a zat hmel phian. 

Chulai hmunah chuan hun kan hmang zo va, refreshment awmna lamah Jay-a bawk chuan min rawn zawng hmu lehin, a thian thenkhatte nen pawh inhmelhriattirna hun te min neih pui lawp lawpa, an chhelo in an changkang hlawm bawk si  , an boruak hip ang chu ka hip zo ve lo lek lek thin mai. Mahse, mi hawizau leh changkang rual awm khawm tihtakah a tu a te mah chuan kei chu min en hranna an nei lem lova, ka tlangnel zui phian. 

Kan haw theih meuh chuan zan dar 9 lai alo ri hem tawh mai a, ruah alo la tla cherh cherh zui nen, bike hmanga haw tur kan ni bawk si a tiin midang haw rem vek tawh hnuah pawh chuan show an neihna bathlarah khan amah nen chauh kan la ding dun khar mai a. kan pahniha min thlah haw mai duh tute chu awm bawk mahsela Jay-a zawk chuan a duh ve tlat lo. Kan pahnih tana hun tha awmchhun chu bawhpelh a duh lo ni berin ka hria. Vawt tih vanga ka khur leh hlak hlak thin chu hrethiamin a jacket hak lai a hlip vat a. min rawn sin tir nghal. Ngawi rengin kei chuan a hmel mawlh chu ka lo en ve char char a, chutah, ka inrin hman hma in chiang zet hian ka mitah tak mi rawn melh ta kiau mai a, ka inthup seng tawh lo. Zak chung chungin amah chu ka lo en let ve ta reng ringawt a nih kha. 

‘’ Ih’’ khur hlak hlak chunga ka tih lai chuan ka kut vawt thlar mai chu rawn hum lumin a thawk khum leh ham ham thin a. A chet dan mawlh mai hian min thawng em a, lo dawnsawn dan tur ber pawh ka thiam thlawt lo a ni e. 

‘’ Kimi, ka duh che’’ ti supin chiang em em hian min la en reng a, ka sa chhuak vek thei.

‘’ A,, dawt sawi suh’’ nawi niaih a ka lo tih leh lai chuan rawn nui deuh sukin ka biang a rawn khawih leh a, min en chikin kan inhnimhnai bawk si ava han zahthlak duh tak.

‘’ Dawt ka sawi hleinem. Hman atanga tun thleng hian I laka ka rilru put hmang hi ala danglam chhin eih lo. Ka duh tak tak che Kimkim’’  a tih leh chuan sawi mai tur ka hre tawh lova, ka chil ka lem khawlh ringawt. 

Um, hman atang khan ani hian min lo duh ru ve reng tawh tihna a nimaw, kan thuhmun chiah a nih chu.mahse, nia, zep tur a awmlo, a tirah kha chuan he pa hi ka duh hleinem, hmeichhe tamtak in an atchilh a, an um rawn luai luai lai te pawh khan ka thinlungah hian hna ala thawk ve eih lo a nih kha. Mak ka ti thin zawk. Rochhari te thiandun tih elnan hrim hrim a be tha leh hnaih lui char char kha ka ni a, mahse, engtik lai atang khan nge tum loh deuha ka lo duh chhoh tak hi ka hre mai thei tawh lo. Tihian, tunah erawh chuan ka duh ve takzet tawh a ni tih ka hriaa, ka hloh phal tawh hauh lovang. A nih chuan eng thil nge ka la nghah chu ni a. min duh thu a sawina hi ka hnar phal dawn emni? A teuh lo mai. A inring lo lai biangah chuan dawmin thawklehkhatah ka fawp ta chawt mai a! A meng bial deuh kawk hman. Mahse, a rei hnuah erawh chuan amah zawkin ka khabe chu rawn dawm in, duhthawh tak hian chu zan khaw vawt leh thim ruih hnuaiah chuan kan infawp ta vawng vawng mai a.

Zan lama kan awm dan kha ka mumang emaw tiin a tuk zing ka than harh rual chuan ka biang ka han beng vak vak a, ka insik deuh chhen bawk. Ka hlim em a ni. Zan lama thil thleng te chu ka mumang mai an nih loh zia tifiah turin ka phone chu a rawn ri ta ral ral mai a, ka la nghal vat.

‘’ Aw Ajay!’’ 

‘’ Mawli, tikhan min ko ve ziah suh. Rawn inlak ril tum ve nak alaiin iti ho zo vek’’ tih pahin a nui chhuak deuh hawk a, ka lo nui ve ringawt.

‘’ Ni dawn tak. Ka bialpa ini tawh tak e. Ajay tiin ka ko tawh lovang che Muanpui’’ kan ti leh hram a, alo chek zui hlak thei. 

Tukthuan eikham hnuah class kal turin min rawn sawm zui a. chutia a hma ang bawka inngeih leh hlim em ema kan inphurchhuak lai min hmuh fuh leh tak fo ah chuan tunhma pawha lo buai tawh thin Rochhari te leh hmeichhe ninawm thenkhat ho bawk chu an rawn lawr leh ta zut zut mai a, a nuam lo angreng thin viau a ni. 

Ni khat phei chu college canteen a ka lo awm lai hian Meme-I leh hmeichhe pakhat, ka hriat chian em em pawh ni lo hi ka bulah chuan rawn thu ve in, ka thil ei lai te chu an rawn khawih sawn chhen mai a, soup bowl te pawh chu min nawr sawn sakin ei hleithei lo khawp chuan min siam chu a ni ta der. Kei chu ka la ngawi deuh reng a, anmahni melh chung chuan ka khap deuh sak sak tawh thung.

‘’ Eng nge in duh a’’ chang faka ka tih chuan ngeiawm zet hian an han inmelh leh ralh ralh phawt a, chutah, nui deuh hak chung hian Meme-I zawk chuan ka soup bowl chu la kangin ka lu chungah a rawn lek ta larh larh mai a nih kha.

‘’ Hei hi nia kan duh chu’’ tih ahin rang zet hian soup hmang chuan ka lu ah a rawn leih ta mai a nih kha le! Soup kha chu dai vek tawh mahsela an thiltih duh dan chuan min thawng nasa em a, ka tho chhuak zawk thei. 

‘' Eng thil nge in tih hi’’ tih țhat țhat pahin ka inthing kual deuh nawk nawk reng a, ka mittui a tling piau mai bawk. Chutihlai chuan engtin nge kan awm dan kha alo hriat ka hre biklo, Jay-a chu khawi emaw lai atang hian a rawn lang zui ve ta nawlh bawk a, rang taka ka kut rawn vuan chung chuan ka hma lawka ding chunga keimah min nuih sawh tute pahnih chu rum zeta melh chung hian,

‘’ A thleng nawn leh a nih chuan hmeichhia in ni tih hi ka theihnghilh tawh ang’’ ti deuh hmakin canteen atang min kai chhuak dawr dawr a, toilet ah min luhpui nghal bawk.

Soup hmanga min leihna ka sam mawm leh thang huam te chu ten miah lo in tui hmang chuan min tihfaisak zung zungin a khat tawk hian a tihngaihna hre lo lutuk chuan min han kuah leh ringawt thin a. kei chu ka rilru no alo chhuak fel leh der tawh. Ka mittui chu a luang ngiai ngiai a, ka zak a, mipa pakhat ka hmangaih vang maia hetiang thil ka han tawng bik hi ka thin a rimin ka rilru pawh a na takzet bawk a ni.

‘’ Inthen mai ang. Keini pahnih hi chu inkawp rem tura duan kan ni ve lo a niang e’’ men țuau chunga ka han tih chuan khauh zet hian ka biang tawn tawnah a rawn dawm nghal vat a, uluk leh chik zetin min en deuh reng bawk. Chutah, thinrim la chambang aw khur hlak hlak chung hian,

‘’ Aih! Kan inthen lovang. Ka venghim ang che nga, kan paltlang dun vek dawn alawm. Kan pahnih hian khawvel hi I hmachhawn dun ang aw. I duh em?’’ a rwn ti ve leh ta a. Reivaklo chhung ka ngawih leh ren rawn hnuah kan pahniha khawvel hmachhawn chu thlang ta zawkin ka bu zui ve ta nghat nghat a ni.

*****    *****    ******     ******        *****      **        *****       ******      **    ****     ******