KEIMAH LEH KIMA

KEIMAH LEH KIMA ( Fiction)

Vanlalpeki Fanai

‘’ MC ah min lo kalpui lawk the. Nimin kan bazar naah thil ka theihnghilh pek a’’ min rawn call tu chu tudangmah ni lovin ka thiannu Rindiki a lo ni a. A mi sawmna pawh chu amah kher nilose chuan ka peih pawh ka ring chiah lo. Hnaah ka kal a nih loh chuan chhuahvah hi ka harsat angreng thin viau a, vawiin chu ka off day a ni ve bawk a, kalpui ve leh hram ang ti rilru chungin ka inthlak nghal ta sawk sawk a, ka tha erawh chu a tho lem lo hle thung.

Chhun dar 12 chho velah Diki chuan a scooty hmanga min rawn hruaiin MC lam pan tur chuan kan inphurchhuak zui vat a. chu ni sa the hrep lah chuan min han chhun chiang em em thin khawp a, hetiang reng reng chuan khawvel mihringte hi kan dum ut vek mai dawn asin. Hmelthat nen a inmil hranpa viau lo. 

‘’ Rawn hmanhmawh ve la, ni a sa bawk si, a chhungah lut vat ang,’’ ti leh lung lungin MC kawt kan thlen rual rual chuan scooty chung atang ka zuang thla nghal nulh a, stepah ka va ding zui daih bawk. Chutihlaiin Diki ve thung kha chu a scooty chungah ala thu a, a buai hmel em em a, a meng dur tha tawh angreng viau mai lehnghal.

‘’ Lo ding rawh. Chahbi hi ka pawt chhuak thei miahlo a nia! ‘’ a mak thei thin. Chek hlak hlak chung leh peihlo fe chunga a bula ka tlan phei leh lai chuan chahbi chu a lo phawi chhuak thei ta hlauh mai a, thawk zui hawk pah hian, 

‘’ He scooty țawng lutuk hi ka la vaw darh vek ang mawle! ‘' ti hluk hlukin min rawn kal pel nghal fuaa, a lungawi lohna lamah ka awm ve tihte chu hria ang in a awm leh tawh lo reng reng a nih chu! A timak thei ve ngawt mai.

‘’ Min lo nghak ve la’’ tih paha um zui dat datin a bân vai lai chu va man beh sak ka tumna lamah kawngka zawnah tak chuan ka ke lehlam zawk chu ka chhuih bah palh ta khut mai a! Chhunglamah chuan ka tlu bawkkhup zui nghal thlawrh mai. Chal tauh bawp hian ka tlu bawk si a, thildang chu a na hran lo, mahse, ka zak a ni.

‘’ Awi! ‘’ tih paha ka thiannu leh ka bulhnaia awm ve security leh midangte’n min rawn buaipui zui sap sap lai te pawh chuan ka hawi chhuak ngam tawh lo hrim hrim a, ka zak lutuk kha thlawbo vang vang mai ka duh hman hial.

‘’ I na em?’’ an rawn tih leh lai te chuan la hawichhuak ngam silo hian ka chal tuai noh noh chungin ka lu chu ka thing leh ringawt thin a. ka chal mawlh mai chu a pawng hrim hrim ang. Tichuan, na em em nei ta lo chu an ni ho pawh chuan min kalsan ve leh ta mai a, keipawh ka thiannu ban vuan bet tlat chung chuan khur ru der derin ka kal chhunzawm ve leh mai a, zahna kawna han din meuh zawng alo namai lo angreng hle mai.

Step kal theiah chuang chho in chutah pawh chuan ka chesual lehpek teuh hle a, ka ke chheh hi  dik thei thlawt lo vawiin zet chu. Ka thiannu khan min rawn dawmbet hman hlauh lo phei se chuan a vawihnihna atan ka tlu mualpho leh thei hram ang chu mawle. Engpawhnise, vawiin ni hi ka vanneih ni a ni ve lo hrim hrim a nih dawn hi.

‘’ Rinpui, I duh leh tah hian hawi thawven pahin min lo nghak la, sawlai dawr saw a nia ka kalna tur chu, ka reilo ang’’  rawn tiin Diki chuan kan piah deuha pheikhawk dawr awmna chu a kawk zui vu vu a, keipawhin lu buk nghat nghat pah hian, 

‘’ Nimai, va rei suh ang che. Ka chal lah hi a na tulh tulh mai lehnghal a’’ ti let supin, ka chal chu chiang zet hian a rawn melh ta vung vung a. A khi suk.

‘’ Engtinmah a awm lemloh kha. Tlemin a sen ve deuh tih a nimai’’ ti lehin, khik vur vur pah chuan min kalsan ve ta hram a. ka chal bawk chu ka tuai zui leh noh noh mai. 

Lalrinpuii niin, aizawlah hian thawmhnaw dawr lian leh lun ve pangngai tak nghah hlawh tura rawn awm ve ka ni a, kum chanve vel chauh ka la khawsa ve nghe nghe bawk. Ka la tlangnel hranpa em em lova, ka bel lemlo bawk. Kei hi chu thingtlang nula leh, thingtlang khuaa chawrchhuak tihtakah, ka che reng reng te pawh hi khawpui angah chuan “ava țhing’ an tih tur ang chi a han chet chhuah leh khut khut te, țawng chhuah phawng phawng leh chetsual mai te ka sam lam ru em em a, mahse, ka nungchang nawi ru zet leh naupangchhia em em te hi chu ka thlah hleithei chuang der lo thung. Thingtlang nula ka nihna hi ka zahpui ngai lova, keimah pawh ka inzahpui chuang hek lo. Tin, ka hun awl neih ang angah thawnthu phuahchawp han ziah ve mai mai te hi ka hratin nuam ka ti angreng viau thin a, mi hriat hlawh tham khawp erawh chuan ka la inziak thui lemlo thung. Hun awl reilote tak tak ka neih changa ziak ve thin chauh ka nihna ah hian a tih tak tak theihloh a ni ber e. 

‘’ Rei min lo ti em?’’ rawn ti ham hamin Diki chuan pheikhawk niawm tak hi a rawn khai phei a, a nui pah vur vur reng bawk.

‘’ Rei ti love, en the, floor hnuaiah khuan thla te la dun ila, I duh ve loh pawhin min hmehsak tho ang che,’’ ka lo ti let duah thung. Ka chhanna vang chu nimaw, ka ang phuau chung hian min han melh leh vang vang thin a, chutah, ngaih dan ni lo zeta amah va melh zak zak chung chuan,

‘’ Nge, I duh ve lo tihna mi?’’ ti leh hmukin sitep kal theiah bawk chuan kan chuang dun leh ta vang mai. 

‘’ Duh e. Duh tehreng mai. Khawpui miho hian thingtlang ho aizawl kal chu mc ah thla an la ngei ngei an ti thin a’’ rawn ti chuai raih in, a sawi tum leh ngaihtuahna chu ka lo hmu tlang nghal vek. Ho ka tih zawng tak a ni. Ka awm dn tur leh ka thlalak duhna hmun lehzelah hian thu an rawn nei lo ve chiang e. ka sawi tam peih lo.

Step kan chhuahsan rual rualin a kutah chuan ka kai phar nghal lawp a, a phu deuh zawk thei.

‘’ Khatiang vang mai mai khan buai suh. A sawichhuak tu pawh thingtlang mi ve tho. Lo kal rawh, sawmi dawr lang thei tur sawn hetah hian la mawlh mawlh ang,’’ tih pahin a kil lamah chuan ka kai zui ta rawk rawk a. Hna ka kal tih loh ah hi chuan chhuahvahna hun hi ka nei ve vak thin loa, tihian, chhuah ve chhunah chuan thlalak pahnih khat hi neih ve ngei ngei ka duh thin bawk. Ka la awm tho em mai a.

‘’ Khawi a nih chuan, va inpost nghal char char rawh. Min hmehsak ve bawk ang che,’’ ti hluk hlukin, a duh ve tho tih kha chu ka hriat rukna a rei tawh. 

Thiannu Rindiki pawh hi thingtlang nula ve tho a ni a, aizawlah hian a chhungte dawr nghahsak tura rawn chhukthla ve bawk a ni. Kan duh dan leh ngaih dan tam zawk hi chu a thuhmun fo thin reng a, hei vang hian ka thian dang zawng zawng zingah pawh ani nen hi chuan kan inzui tam in kan inkawp nasa hle reng a ni e. A pawng a takin a intichangkang ngai lova, thawmhnaw manto uchuak lah a inbel rep rup ngai hek lo. Tlawm takin a nung a, tunlai thalai thawmhnaw manto hak hi changkanna emaw ti tlat ho phei hi chu a melh tha peihlo law law zawk. Inti changkang taka khawsak hi kan tlin loh bakah, kan thiam ve lo a ni mah zawk e. 

Tichuan, thlalakna kan lo inhmeh chhawk zak zak lai chuan kan awmna lamah mipa sang tha tak tak pathum hi rawn lang ve hlawl in, keini thian dun thla laa lo buai em em lai chu an zinga pakhat khan min rawn en duh fal em em mai a, kan mit a intawng leh chat thin mai. Min kal pel ve leh mai dawn emaw tih laiin an pathum chuan an ding khawm ta te te a, eng thu emaw sawi hian an nui ri leh hak hak thin bawk. Meizial pet kawh va va chung hian an zinga pakhat kha kan lam en in ala rawn hawi zeuh zeuh thin tih chu ka hrereng a, kei lahin ka lo melh ve hman zel bawk si nen, kan mit chu intawng chiang thin tak a ni.

‘’ Khawi, vawikhat chiah kan pahnih in selfie leh zuai ila, kan kal tawh dawn a nia,’’ Rindiki’n a rawn tih chuan ka lo inpost chhunzawm lehnghal zat a. kha pa pawh kja ala rawn hawi zuk zuk reng tih chu ka hre vek. Mahse, ka melh tha duh tawh hauh lo thung.

‘’ Awi! Kan lang tha thei thlawt lo Rinpui. Nangman han keng ve tawh zawk te phone hi ‘’ tih paha a phone ken lai min rawn hmehbel nawk nawk lai chuan mipa aw hi kan hre ta thut.

‘’ Ka lo hmehsak ang che u ‘’ rawn ti thum dut ri ah chuan phawk hra chung hian kan hawi chhuak dun ve ve a, karei karei! Nichin lawka meizial zuk hlarh hlarh paha min rawn en reng tu pa kha a lo ni daih! Ka thinphu ri te chu keimah ngei pawh hian ka hre pha tawh hialin ka inhria. Chutah, Rindiki lah chuan phur em em chunga a phone chu lo pek nghal chat pah hian nui vur vur chungin,

‘’ Yes, kha min lo hmehsak tak the. A phone kengtu zawk hi kan lang chhe vek zel a’’ ti zung zungin phone chu a kutah ava hmehbel nghal chawt a, kei chu min rawn pawt sawn nghal bawk. Chutih chhung zawng pawh chuan kan mit leh mit mawlh chu a intawng nawn mawlh mawlh hi ka ti mai. Kan thla min laksak chhung zawng te pawg khan a mitmeng rum leh pa zet khan min rawn melh leh bik thin ni tlata ka hriat avangin awm dan tur ka hre lo nghal vek a, ka kut hmalam suih fel thlapin ka ding tlawn zuar reng ta ringawt mai a nih kha.  

‘’ kha u le, inlang tha zual lutuk’’ tih paha nui hmel pu deuh reuh chung hian kei chu min rawn melh ngat ngat a, phone an inpek fel hnuah a thiante awmna lam chu va pan ve lehin ka lo thaw deuh huai thei thung. A mi uap kha ava han na rem rem ve le. Mipa hi ka vawikhat hmuhnaah khatiang khawpa ka chet buai phahna kha ka la hrengai lova, mak ka inti zawk. 

Chutihlaiin, ka thiannu awm dan ah erawh chuan eng danglamna mah hmuh tur a awm ve hauh lova, a melh ve lo hrim hrim a chuvang te pawh chu a ni ang. Kei lah chu ka ngaihtuahna thleng te hian a khawlo zova, ka dik hleithei tawh der lo mai. Hm,, tha ve leh mai ang.

Ni a ral a, ka thiante ho nen pawh kan inhmu leh hleithei tawh meuh lo. Hna ah buaiin kan hun tam zawk chu hnathawn nan chauh kan hmang a tihtheih a, a nih loh chuan inchhungah tihtur awm ang ang te tiin, story ka ziak a, ka buaina tawk hi chu ka hmu ve thin viau. Mahni tawka buai thin tihtakah, ngaihtuahnaah hian mipa an lang leh tawh meuh lova, MC chhunga ka mipa tawn pawh ngei mai pawh kha ka hrechhuak leh tawh ngai miah lo. Hriat ngai lo leh, tawn zui tur awm lo na na na chu a vei rei theih tak tak loh a nih dawn hi. Inbe chhunzawm char char tal chu ni ila ka hma hun tur hi ka sawi lawk thei miah lo ta a.

Chawlhkar tawp a lo hnai leh ta. Zan mut paha kan thianho whatsaap groupa kan nawi nak nak lai chuan Lalkimtei hian nui lai emoji rawn dan thla tuar chung in,

‘’ Tun sunday chu inhmukhawm hlawm ang u,’’ tih hi a rawn sawi lang ta hlawl mai a. An phur pui hlawm nasa. Chutihlaiin kei chu ka la ngawi reng a, ka phur em em hran lo tlat. A chhan pawh, hlawh lak ala hun lova, pawisa ka nei miah lo. Mahse, ‘Daifim Resort’ hming an rawn lamrik tak meuh ah chuan hman atanga ka lo kal chak tawhna hmun kha a ni ve bawk nen, ka ngawi rei thei lo chiang asin aw.

‘’ Nia, inhmukhawm vat ang u’’ tih chu ka va sawi ve ta nge nge a, an phur tulh tulh nimai hian ka hria e. Tichuan, kal dan tur te sawiho in pawisa thawh khawm leh țul dang dang te chu kan han sawi chhunzawm ta zel a. pawisa nei hauh silo in ka phur zui ve em em ringawt. A hmun pan dan turah kha chuan ka lungngai lo, Rindiki scooty țawng zet kha a awm ve chhung chuan rinawm takin ka chuang reng peih. Ka kal duhna min thlenpui theih chuan ka lawm tawk viau a ni.

Sawi lawk tawh ang ngeiin sunday chu a rawn thleng a, vanneihthlak tak hian khua pawh a tha angreng a, chawhma inkhawm ban hun kha kan tum dan a nih angin ka thiante inkhawm chu ka lo nghak ve ngat ngat ringawt. Ka helhhawlh tawh ni berin ka hria e. Insiam zo thlapin ka online vang vang a, ka thian hlui Amuantea’n min rawn be ve hlawl bawk. Ani nen hian tunhma chuan school khatah kan lut ve thin a, kan inkawp chawt. Mahse, awmna hmun te alo danglam chhoh tak si ah chuan tihian inhmu chhunzawm thei tawh lo in kan zuih ral chu a ni ta ber a. A khat mawi tawk hian min rawn be ve leh nawlh nawlh thin thung. Kei mi hawihhai lo leh hawi zau lo lutuk hi chuan biak hmasak nachang reng reng ka hre ngai  lova, hauh pawh ka tawk fo reng a ni. Mahse, chutia kan lo inbiak tui lai tak chuan Rindiki call ka dawng thut a, min rawn vin hrep leh ta nghal.

‘’ Sana te kha en ve ta he hu che. Group lamah pawh an rawn koh luai luai che kha. Kawngpuiah kan nghak che rawn chho nghal rawh,’’  a rawn ti nghek mai. Hmanhmawh lutuk hian compact ka inhnawih tha leh mawlh mawlh a, min nghahna kawngpui lam pan chuan ka tlanchho zui ta hlawk hlawk bawk. 

Kawngpui ka han thlen chhoh chuan a sawi ang ngei ngeiin an lo awm kim țhap tawh taktak a. min la melh rual thup zui bawk nen thiante mahnise, ka zam chhe lek lek thei hial mai. 

‘’ Țhingi, I inchei rei theih tehlul nen, eng the ual chu iva rawn ni chuang silo ve’’ Lalkimtei mai mai chu. Ka make-up hman thiam loh zia te chu kei aiin an hrechiang daih zawk alawm le a. Hmeichhia chu ni ve mah ila kei hi zawng, make-up ka thiam lova, thiante zingah rau rau pawh hian ka chul ruap thin nimai in ka inhria. Mahse, ka confi ve tawk. Kimtei chu lei va chhuah zawk zawk chung hian Diki scooty hnungah ka zuang chho zui tharh a, tichuan, ‘Daifim Resort’ lam pan tur chuan kan inzuichhuak nghal ta dam dam a ni.

A hmun kan va thleng chu boruak alo nuam in a hmunhma nise duhthusam ka ti mai. Thianho, chhungkua leh inngaizawng te  tan pawh heng bak baka hmun nuam dang han pan tur hi chu kan ramah hian a vang ve ang ka ring. Ka hre tlem zawk nge ka hre chuanglo a. khaw thim thleng rawk sapatal tura kal kha kan ni bawk a, kan hmanhmawh hranpa lo hle. A hmasa ber atan thiante ho chu pool lamah an inkhawhlut nghal sap sap a, kei, Diki leh Kimtei te erawh chuan tui chen chu kan thiam ve lem loh avangin a kamsir velah kan ke chiah dai pah chuan kan lo thu hahchawl ve dar dar thung. Tuichen dan chu kan mipa ho chuan min zirtir pawh tum eng ang mahse ka ngam teuh lo mai. 

Chawhnu lama kal chauh kan nihna ah  khua chu a tlai chak angreng phian mai a. kan awm dawn chauh emaw tih laiin khua a rawn thim titih a, zan lam party nei tur niawm taktak te pawh an rawn thleng thar ve leh ta.  khua a thim chiang țan tih ah chuan chu resort chhunga an bukte siam lamah chuan kan lut khawm nghal diak a, rawn kal thar ho pawh kha an rawn lut zui ve leh mai.

Keini thianho pawh zanriah ei tum nghal kan nih avangin dawhkan sei tha tak kil chuan kan lo thu khawm leh thap tawh a. kan titi pah mam mam bawk.

‘’ Kan chaw order alo la thleng chuangloa, hawh u, lo selfie vel mai mai ila, lang kim vek thei tur khan aw,’’ tih pah hian Hriatpuia chu a tho chhuak nghal hluai a, ding chungin phone chu a han lek kang zui vah a, keini ho pawh kan theih ang ang chuan kan lo inpost kual ve nasa mai. Mahse, Lalkimtei lrh Tlanengi mawlh mai kha an sa a tha dun angreng bawk si a, buaina hi nei leh thin in an lan kim theih loh thu sawi chuan an lo inkhak fak fak reng mai. Chutihlaiin midang ho chu kan nui ru tet tet reng thung a. An pahnih tih ve dan fo kha a nia, an thinrim rei tak tak ngai lo. Chutihlai vek chuan kan piah lawkah khan rawn kal thar ho niawm takte kha thianza ho in an ri ve laih laih reng bawk a, an hmel phei chu ka la hmu chiang chuang hauh lo. Chutah, an zinga pakhat chu kan lam hawi hian a rawn inher ta zuk a, kan mit leh mit chu a intawng leh ta. Ka țek chhawk thei. Nia, MC chhunga thla min laksak tawh tu ngei kha lo niin. Zanin phei hi chuan a rawn chhelo lehzual a, ka wine in lah khan hna a lo thawk tha deuh nge tih pawh ka hrelo, ka hmu tha em em ringawt mai nia! Ni leh lo, a hmel saw chutiangin a tha em em hauh lo, mahse, a sang a, a pian a nalh bawk a, chumi mil tur chiah chuan a mitmeng nise ala pa em em zui bawk si. Keizawng, tih atin ka awm nawn leh dawn a nih ber hi a! 

‘’ Rinpui, hei, I muthlu emni?’’ ka thiante ho min koh luai luai thawmah chuan mangram ata chu harhchhuak zawkin, thil awm dan ka han hriat fiah leh meuh chuan kan lam hawi chunga phone rawn lek chhuak reng leh, chiang taka min lo melh reng tu kha pa ngei mai kha ka han hmu zui thut a, ka phu zawk. Chu mai chu ni lo in, a phone atang chuan kan thianho thla chu alo la mek tih pawh ka hre nghal mai. 

‘’ E he! Iphone elo!? Kan va lang tha dawn ve a,’’ tichhuak hlutin ka khi leh vur vur thin a, ka thiante ho chuan min rawn khap leh sup sup tawh. Mahse, chuti chung chung pawh chuan ka pangngai hleithei tawh tlat lova, ruih ve deuh nen, ka thinlung hawlh tlang tu mipa khan kan thla alo la mek bawk si, ka che khir kuit țhaks a tih theih ang chu. 

Zanriah kan ei lai ka hre lova, mahse, haw tura ka thiante min sawm lai vel kha chu mumang ang ruaiin ka hre thung. A bak zawng chu hriat ka nei ta lo a ni e. chiang zeta ka harh leh hmasakna ber chu car lum nuam tak chhungah niin, driver seat bul maiah ka lo muhil tih ka inhre bawk a. ka hit chhuak vek thei. Tu car nge tih hriat tuma driver thutna lam ka va en nak chuan kha pa bawk kha! Mc leh nizan lawka kan thianho thla min laksak tupa bawk kha a lo ni leh nia! Engtin nge hetiang hian kan lo awm dun ngawt theih zawk. Khawiah nge ka thiante ho zozai pawh kha. Ka taksa te chu en fiah nghal zung zungin diklo leh felhlel a awm awm ka hrelo hlauh a, ka thaw zui hak mai. Mahse, engtin nge he pa motor chhungah hian ka lo mut theih tih lai mawlh hi a ni ka la hriatthiam theih loh chu. Min kidnap tihna emni!!? Chutiang thil ka han ngaihtuah chhuak chiah chu hlauhthawnna in ka khat nghal vek a, insehruh fan fan chung hian kuangkuah fel at a a muhil lai chu ka sawi harh ta nawk nawk a nih kha.

‘’ Hey, zaktheilopa, eng thil nge itih hi sawi rawh’’ tih pahin a kawr awmah ka va țham zui nawk nawk a, a rawn meng chhuak deuh siar siar bawk.

‘’ Sawi vat rawh aw. Police ka ko dawn a nia’’ ka han tih leh hmak hnu chuan ham bui chung chungin a rawn țhu ngil hmasa leh te te phawt a, a mit chu a nuai zui chat chat reng bawk. Chutah, ka thilsawi te kha ngai pawimawh lo tih hriat tak hian a phone chu a ban nghal thurh a, a en zui leh vang vang phawt.

‘’ Tlai tawh ve. Chhuk tawh rawh,’’ rawn ti chhuak supin, kei chu ka lo hawi zui haw haw mai. Eng thil chu nge maw a hriat chiah chu le. A mawl deuh hlek nge, diklohna a nei zawk? Tunah chuan chhelo ka tih ve na zawng zawng te kha vawmbo ang duak an ni tawh a, ka thinrim ta hluah hluah mai. 

‘’ Iva han zakthei lo tak. Insawifiah pawh la tum eihlo zui,’’ ti leh hluk hlukin a malpuiah tak chuan ka tha neih zawng zawng sawm khawmin ka va chum ta chawrh mai a, alo au chhuak ve țhat thei.

‘’ Aiah! A na! Iva mak reuh e aw, chhuk tawh rawh ka tih chu,’’ rawn ti veleh bai baiin, a samah ka lo țham sak chawt a, ka thing zui leh nawk nawk. Ka thinrim puakkeh chu lan chhuah tir dan dang ka hre thlawt lo a ni ber ang chu.

‘’ Hey, min thlah vat rawh. Vawiin hian shooting ka nei dawn a nia, I mak e’’ hnuailam atanga rawn tichhuak țawk țawk chung chuan a au chhuak ruai ta mai a, ka thlah ve ta hram a ni.

‘’ Tu mimawl in nge nang ang mipa polite lo lutuk hi model atan te lo chhawr duh che a. mawla!’’ tiin a ke ah chuan ka chhir zui sak leh hram a, ka chhuak hmak. 

Motor atanga ka chhuak chiah chu kan in chhak kawngpuiah kan lo ding reng a ni tih ka hrechhuak nghal a, ka khap fak fak thei. Kei hi, thil ngaihtuah chiang mang lo in ka lo che chiam em ni ang tih te chu ka nbgaihtuah chhuak nghal uarh. Um,, engpawh ni rawh se, Rindiki ka biak a ngai tih ka hria. Ani chuan zan lama ka khawsak dan engkim kha a sawi tha duh zawk ang ti rilru neuh neuh chung leh, titau bar bar chung chuan kan in panna stepah chuan ka chhukthla ta hnak hnak a. 

Inchhung ka luh rual rualin ka chenpui ka putea chuan zawhna min lo zawt nghal mawlh mawlh a. chhan dan tur ber hrelo in ka hawi vel mai mai a nih kha. 

Ka putea hi nupui țhen tawh niin, aizawlah hian eizawnna neia khawsa char char tawh a ni a, fa a nei lo bawk nen, tihian kei hian remchang takah hmangin ka zu fin ve ta rawih mai kha a nia, hmeichhia a ngaihsak lova, a hlei lo viau a, nupui han neih leh mai pawh hi a tum hmel hran loh viau bawk. 

‘’ Lalrindik, nizan khan eng thil chiah nge thleng min han hrilh the. Engvanga min hawsan vek nge in nih a,’’ ti hluk hlukin ka thinrim ala reh hleithei lova, ka țap lo chauh. Chutihlaiin, Diki thung chu za em em mai hian a rawn nui chhuak leh hak hak thin a, ka inpet ruh teuh mai.

‘’ Nizan ang em em khan vawikhatmah rui tawh suh ang che. A,, rui ve tawh ngai suh nang chu. I hahthlak em mai,, rawn ti hmasa te te phawt in, ka lo chhang let vat.

‘' Ka in ve ngai lova ka thiam lo tih te chu I hre vek alawm. Min lo veng zawk ta che’’ ka ti let hmuar hmuar a, alo la nui reng.

‘’ Taktaka thiannu, nizan khan I rui lutuk a, chaw eikham hnu phei kha chuan biak tlak I awm tawh lo hrim hrim. Dar 8 velah haw turin kaih thawh che kan tum a, mahse, I țhu zawi tlat a, I tho duh mang bawk silo. Min la hau let hrep zui lehnghal a. ka zak tawp. Chuan, kha pa, thla min laksak tupa khan a car a rawn phurh haw che leh, keini chu min zui pah a tum thu a rawn sawi ve ngawt a, mahse, kan ngaihtuah em avang che in kan remti lo lawk lo nghe nghe. Engpawhnise, tihngaihna dang awm hek lo, khua lah kha a tlai zel bawk si a, a phur ta nge nge che a nih kha. Chuan, in kawmchhak kawngpui thleng khan kan rawn zui ve zel che a, chutah pawh chuan motor atang khan ila chhuk leh duh chuang miah lo a. darkar khat chhung kan buaipui hnuah che kan beidawng a, kha pa kha misual a nih hmel bawk siloh nen a kutah kan dah ta ringawt che a nih kha’’ a rawn tih chuan kei chuan vin zet mai hian,

‘’ Min hnuk thla mai ta che u. In ti mak ve e ka ti’’ lo ti let hram in Diki pawh chuan rang zet hian,

‘’ I mawl sia e țhingi, I taksa kan khawih chet deuh khan I ning a I au vak vak a, a mualphothlak alawm le. Chubakah, khatiang chunga haw ai chuan khatia I riak bo kha a tha daih zawk. I putea ngaih dan tur che ngaihtuah ve ta che’’ min rawn ti let leh zek a. ka zak ru chem chem thei. Zak tak ka ni. Tikhan ka thiamlohna vekah pawisawi hleilo midang min buaipui hah em em tu kha ka lo hrawk hrep mai a nia le(h!) chu mai ala ni nang, kut pawh ka thlak hial a nih kha. Mahse, eng nge, ani pawh khan a tirah engkim sawi ve nghal mai tur a nia, a mawl ve hrim hrim. Ngaihdam chu ka dil bik hauh lovang mawle.

Hna ka bang a, rawngbawl paha IG reels vel ka han en nak chuan ka mit la tu video pakhat ka hmu fuh ta hlauh. Chupawh chu engdangmah ni lovin, mizo mipa 5 hi stepah an lo ding a, meizial pawh an zu tel nghe nghe. Chutia an ding lai chu video a rawn cover tu awmin an che vel reilote kha a la kual a, an chhelo hlawm phian. Ka en nasat poh leh mizo an ang lo tihna riau ka nei a, japanese tlangval niawm zawk tak te pawh an niin ka hria. Mahse, mizo mipa ngei chu an ni bawk si. Tichuan, an zing ami stepa ding leh helmet niawm tak keng pa chuan ka mit a rawn la nghal var var mai a, ka en nawn tluk tluk phah. A hmel mawlh kha ka hmuh tawh hnu ang riau a hria hre leh in, ka hrechhuak zo chuang bawk silo. Ka en nawn tluk tluk a, ka rawngbawl lai pawh ngaihsak hleithei lo khawpin zu han en nawn ngat ngat peih a! Chu video tawi chu download nghal in, phur em em mai hian Kimtei leh Rindiki te ka thawn ve nghal a, ka status zui bawk. Caption ah chuan,

‘’ Helmet kengtupa ngat hi’’ tih chu ka dah tel a, ka vei zui nghal ngut ngut mai chu mak ka inti zawk. Tunhnai hian ka lerh thar deuh hrim hrim niin a lang riau. Tichuan, ka status zawh rualin phone chu ka dah a, rawngbawl ka chhunzawm san leh daih. Phone pawh khawih tawh lemlo in story te ka ziahsan ta mai mai a, putea rawn haw hnuah chuan zanriah te ei fel leh te te in, ka inbual zawh leh meuh chuan zan dar 7 alo ri thuak tawh a, phone pawh chu ka khawih ve leh hman chauh. Mahse, phone ka en a, whatsaap ka han luh leh meuh chuan thilmak ka hmu ka ti mai. Chat chu en thla zai zaiin, Kimtei leh Diki pawh khan min lo reply tawh tih chu ka hmu a, mahse, ka la seen duh rih lo. Chung zawng zawng aia ka mit la tu chu tuemaw hnen atanga message ka dawng leh, a number alo in save sa thlap zawk a chu a ni. Kima hmar tia im save atang chuan ka status comment na kha ka dawng a, nui lai emoji rawn dah lang telin,

‘’ Eh!’’ tih ringawt chu a rawn thawn a nih chu! A tu nge Kima hmar pawh chu ni reng reng a. Hetiang hming pu hi hmelhriat ka neih awm reng reng ka hre lova, ka contact ah nise an awm ngai hek lo. Ka phone a nia, ka save leh save loh chu a hre tu tur ber ka ni. Mahse, a dp ka han en erawh chuan engmah a hmuh theihloh a, status a nei ve bawk silo nen ka țhen deuh sak ringawt. 

‘’ Helmet keng pa hi I duh ve tihna emni?’’ tia va reply in, hmeichhia a nih zawk te chu ka han ring tha leh hnuhnawh vel a, rinhlelh ngaihna ber pawh ka hre tawh lo a nih chu. Ka reply zawh hnuah ka thiante min chhan letna kha en lehin, Kimtei chuan hmelchhia a tih thu a rawn sawi tawp a, Diki thung chuan a hmel a pa a tih thu leh, ang tih deuh a neih thu chu a rawn sawi ve thung. Kan rilru te hi a inang thin a nia. Tichuan, Kima Hmar tia insave pawh khan min rawn reply ve tawhin,

‘’ Ka hmangaih alawm’’ ti ringawt hian min rawn chhang let pek a! Ka nui ri zui hak. Chutah, thil hrechhuak zawkin,ka thin chu a thawk leh ta.

‘’ Tu nge I nih a? ‘’ ka va tih chuan a seen rang viau na a, min reply har phian. Mahse, minute 20 hnu vel ka nghah vang vang hnu chuan,

‘’ Keimah ngei chu ka ni ve e’’ tih chauh hian min rawn reply leh a. ka be peih tawh lo e a. ka hriat lohin group vela ka awmpui number ka lo save te pawh a ni leh pek mahna tiin tihian lo awm ve phawt sela, buaina min thlen hran loh chuan a tawk mai e tih pah hian phone chu ka dah a, story ka ziah san nghal daih.

A tuk khaw var hnuah chuan kha video tawi khan rinai takin mi duh a lo hlauh phian a, a thleng thui ve ta phian. Facebook lamah nise, group tin deuhthaw ah post hmuh tur a awm a, anni ho chu mizo mipa chhawr tlak loh leh tangkaina nei lo ang hial te a chhuah in an caption pawh a tuihnai lo angreng thin hle. A mak ka ti, an hre ril thei awm bik thin hi ka tia lawm heng fake account ho hian. Chu video viral mawlh chu ka han en nawn leh thin a, helmet kengtupa ka ralkhat duh em em mai chu en chik bik thin in, ka hriat hnu hi chu a ang ve deuh a ni. Mahse, video kha a tawi mai bakah a fiah lo angreng si a, hriatchian lemloh te phei chu han hriat belh vak dan tur a awm hauh lo mai.

‘’ Heng ho hi an va rawn lar thar the thut ve a’’ ka dawr nghahna neitu Nu Machhungi’n a rawn tih lai chuan a phone ken lai chu ka lo bihpui ve nghal zat a. kan sawi zawh tak chiah video bawk kha alo en ve chu niin. Ka nuih zui sak mai.

‘’ Nia, an chhelo ve angreng hlawm em a’’ lo ti let maiin amah leh tho chuan,

‘’ Dawrah pawh hian tunhma kha chuan an rawn lut ve leh zuk thin tak asin. Kan thawmhnaw zawrh te hi thalai ho duhzawng kha a ni ve bawk taka’’ ti mawlh mawlhin amah chu rang zet hian ka va en leh nghal kawk thei a. ka phur lutuk ringawt mai. 

‘’ A nih chuan Nu Machhung, an hming te pawh I hre hlawm hial ang chu’’ zawh pah titih a ka han chhan ve erawh chuan ka phurna ti hnual rawih thei tur hian a lo alo thing deuh nawk nawk mai a. ka ner zui deuh nang nang thei.

Eng thil nge maw ka hriat reng reng le ka ti. Tunhnai hian ka hriat thin pawh ni lo mipa bik hi duh ka ching thar riau mai a, ka vei zui thei em em mai lehnghal. Mahse, kha pa, mihring polite lo zet kha chu hmuh nawn leh pawh hi ka duh tawh lo bur. A sualthiam em mai. Bangbo leh lungawi lo zetin min dah a, insawifiah ala tum miah lo lehnghal. A hnu thleng pawh khan ngaihdam dil emaw, thupha rawn chawi ve te pawh a neih ka ring a nia. Chutiang chuan rawn ti se chu sawitur tlem a zawng te pawh ka lo nei ve mial maithei asin. Hm,, a pawi love, kan inhmu nawn tawh lo turah ngai phawt ang. A hmel pawh kha ka theihnghilh lek lek tawh mai.

‘’ Naktuk chu chawlh lo dil la, hei aizawl ka rawn chho tawh a inhmuh ka chak riau mai. A pawi itih hran loh chuan,’’  Amuantea kha lo niin, ka phur viau hran lo. A chhan pawh, hnaah ka kal a nih hran loh chuan a hranpaa chhuah vah hi ka peih viau thin lo tlat a ni. Mahse, khang hun leh chena ka thian neihchhun leh khawi kipah pawh ka zui kual thin lo ni tawh kha chu chuti maia awlsamin ka thlauhthla ngawt theilo tih hi ka hria alawm. Chuvang tak chuan a mi sawmna pawh chu lo pawmsak ve in nu Machhungi hnenah chawlh chu dil ve ka tum ta a. ka call nghal bawk. Min lo remtihsak tak hlauh ah chuan muthilh hma tiin video bawk kha ka en zui leh ta a, helemt kengtupa mawlh mai chu ka en ning thei lo. Status ah bawk chuan,

‘’ Helmet kengtupa mawlh kha, muttui bik riau le’’ tih chu ka hmang leh ta ngawt a. Rawn hmu ve thei dawn lo mahse hmeichhia hi chuan kan hrat ve hrim hrim in ka hria. Kan mi veizawng te hi kan biak phaka awm ang maia han biak vel kan hrat tlat. A nuam ve bawk em a ni. Bts ka vei nasat zual lai phei kha chuan aw, ka bulhnaiah an awm ta mai emaw tihtur hian ka khawsa thei. 

A tuk khua chu rawn var in. Amuantea thu min hrilh te kha hre pah rengin chawhnu lamah muangchang hian ka insiam chho ve bek bek a, ka tha chu a tho lo takzet. Bialpa pawh nei silo, thiante ringawt hmu tura insiam ve fe ngai thin hi a ninawm tawh. Mahse, ka thiante hi chu ka hmangaihin ka duhsak ve em em reng tho. 

Amuantea'n a hman vek tawh thu a rawn sawi chuan min hruaina hmun tur te hrilh in kawngsirah hian ka lo ding deuh vang tawh a. Ala rawn thleng har hrep zui. Mahse, chutia amah nghak chunga ka lo din hawi veng veng lai chuan ka hma maiah hian car var pakhat a rawn ding su dat a, a glass chu a down nghal bawk. Hm,, kha pa bawk kha a rawn lang leh ta hlawk mai. Ka lo rinlawk loh em avangin ka meng zau deuh kawk hman a, mahse, ka insiamtha leh zung zung thung. Chiang angreng taka min rawn melh vang vang chung hian,

‘’ Khawnge I kal dawn a. Hruai I ngai em?’’ a rawn tih chuan ka hnar ka lo tum khum dat a. 

‘’ I duhna hmun apianga phurh kual theih hmeichhia emaw min ti emni?’’ ka lo ti let deuh kher bawk. Mahse, ka thusawi chu ngai pawimawh lo niawm fahran hian a lo nui duh leh ringwt a, a bula thu ngawi reng hmeichhia lah khan kei chu rum zet zet hian min lo en ve reng ringawt bawk si. A zakthei lo e, engtinmah ka ti tap silo. 

‘’ Thinchhenu, I thil ngaihtuah dan te hi a mak thei lutuk’’ a rawn tih leh chuan ka lo meng dur naasa ve tawh hle.

‘’ I lerh ve e,,’’ ti ringawtin a bula hmeichhe thu chu ka zu melh deuh zuk a, ka ngei tlat. A pawi la han sawi loh tehreng nen min la melhrum ngat ngat peih tho nia mawle. Tichuan, chu pa bawk chu rawn nui chhuak leh hak hak in, a tawng leh dawn chiah tih ah, min rawn ko thawm hi kan hre ta a. kan hawi rual deuh thawt thei. Kan chhak lawkah chuan Amuantea ngei mai kha a bike chunga thu chung hian alo ding reng tawh hi a lo ni a, ka han nuih var var.

‘’ Lo chho la’’ a rawn tih chuan kha pa kha zu melh leh hrawkin,

‘’ Ka kal a nge’’ ka ti sap a, ka tlansawn nghal bawk. Ani chuan eng thumah rawn sawi ve tawh lo mahse min la en zui vang vang tih erawh ka hre ru vek a, ka ngaihsak lo lui ve ngat.

Diktaka sawi chuan khatia a hmel ka han hmuh leh takah kha chuan tlemin ngaihtuahna te pawh an lo danglam ve leh hret a tihtheih a, a hma zawnga ka lo vei ruk ve tawh tho kha nihna laiah chuti maia han thlauhthlak chu harsa ka ti ve te pawh a nia nge. 

Amuante nen chuan hotel nuam tak pakhatah zanriah tuihnai tak mai kil dunin kan ti ti reng bawk a, kan tunhma chanchin, kan inzui nasat theihzia te kha sawi chhuakin kan nui dun leh har har thin. He pa nen pawh hian kan inkawm nasat thin lai ata tawh thutak pai ngai reng reng lo kha kan nia, kei phei hi chuan mipa ang pawhin ka en ngai lo tihtheih a ni hial awm e. Tunah tihian, kum alo upat hnuah pawh kan che zia leh hawiher, tawngkam te thleng pawhin thutak hmuh tur reng reng hi ala awm ta chuang lova, a hlimawm phian. Tin, tun atang chuan amah hian company pakhatah hna a thawk ve tawh dawn a, aizawlah hian a khawsa ve tawh dawn bawk nen ka inhmu fo thei tawh dawn a nih hmel e. 

Haw tura hotel kan chhuahsan rualin kha car var niawm tak bawk kha a kawtah chuan ka hmu leh ta mai a. kha mihring motor ngei kha niin ka hre bawk. Ding ngawi reng chunga motor ringawt ka lo en vang vang lai chuan khawi emaw lai atang hian amah ngei kha a rawn chhuak ta nawlh mai a! Kan hmel a rawn hmuh chuan diing zui chawt in, uluk fe hian min han melh leh te te a, a lai ve deuh a nih hmel a nui tawp. 

‘’ E, hetah hian a nimaw in lo awm ve reng a. kei chu ka haw dawn chiah a, a nih leh, zan hun hman nuam ule’’ ti leh zung zungin hmanhmawh hmel fe chuan car chhungah a lut zui ta sawk sawk a. A tlanchhuak nghal nal nal bawk. Chutia a tlanchhuak ta chu ang phuau chunga ka lo thlir liam veng veng laiin Amuantea khan min rawn nghawk harh ta zoh mai a. ka phu zawk.

‘’ Kal ila’’ tih pahin a bike awmna lamah min kai nghal dat dat a. ka rilruah lah chuan kha pa ringawt kha mai a awm leh tawh bawk si nen, hetia a khat tawka kan la inhmuh fo si chuan insumtheih loh hun ka la nei ngei pawhin ka ring tlat. Ka hma hun ka sawi lawk thei lo.

Kha video tawi viral ta lah khan boruak chu a luah hneh tulh tulh a, sawiselna leh fakna a inrikchhawk sek reng bawk. Hriatchian nei ve lo kei chu ka lo ngawi mai a, mahse, an sawiselna comment leh post ka hmuh fuh erawh hi chuan insum harsa ka ti ve ngat ngat thin hle. Tute nge an nih a, eng nge an thawh thin tih pawh hre hauhlo mah ila ka ralkhat țan ve em em ringawt a, hetiang sawisel loh tak tak pawh nei lo fake account ho hi an hnawksak ka tiin ka haw ve em em ringawt bawk.

Chutihlaiin, kima Hmar tia number lo in save ve ngawt lah kha tunlai chu a status a broke thei viau mai a, a phun hlak hlak zel. 

‘’ Midang sawisel hi a nuam viau emni? ‘’ tih te, 

‘’ Mi nunah buai lo la, I nun chauh kha buaipui zawk rawh’’ tih te chu a rawn hmang ve nawk nawk thin a, ka hrethiam lo viau. Han zawhfiah vel chu chak viau mah ila tu nge a nih tih pawh ka hre silova, ka tan a nuam hran hauh lo. 

Chawlhkar tawp lo thlengin ka thiante ho chu an rawn pawr leh țan ta. Len thawven dan tur mawlh chu rawn ngaihtuah lehin, mipaho erawh kan sawm ve ta lem lova. Min ti chhangchhe mai mai thin. Tichuan, a tawp a tawpah zawng, kan mipaho tello in ‘Hangi lunglen tlang’ lama han teihawi vel chu kan rel thlu ta rup mai a, ka phur tawh kher. 

‘’ Pute,  “Hangi Tlang’ lamah kan leng thawveng mai mai dawn a nia aw’’ ka tih chuan min en deuh run run a, a nui hauh lo.

‘’ Rawn haw tur kha I awm lo leh ringawt a nge. Khatianga I awm leh chuan I nu leh pa te ka hrilh tawh dawn a nia’’ ti hmukin meizial a țan a, a zu khu zui hlut hlut. Ka sawi ber tur hrelo leh inthiamlo deuh bawk si chu ka han nui lui kual vel te te a, ka tep deuh chap chap reng bawk.

‘’ Khatin tep chuap chuap suh. Han leng ula, rawn haw hma ang che u. kan tunlai khawpui boruak hi a thianghlim viau hran lo a nia, haw tlai chi a ni lovang. Fimkhur a tha’’ ti leh nghut in a meizial chu ashtray-ah a nawr hlum zui nawk nawk a, kei chuan a che vel chu ngawi reng hian ka lo en reng ringawt. Mahse, ka awm dan min rawn hmuh rual chuan rum zeta min rawn melh chung hian,\

‘’ Ava mak e aw. I zu ve duh tihna mi? Va insiam vat ta che’’ a rawn ti leh thut mai a, ka harh nghal kawk thei. Tichuan, hmanhmawh fe chunga insiam nghal sawk sawkin ka hman ve meuh chuan ka thiante pawh kha an rawn thleng kim leh vek tawh a. Tichuan, kan tum ram lam pan tur chuan kan tlan liam zui ta mai a, kan phur thak hlawm viau.

A hmun kan han thleng chu midang pawh an lo awm ve nual tawh a, a khawharthlak hran loh hle. Thlen rual ruala selfie nghal zung zungin statusah bawk ka han phochhuak leh zat a. Putea leh KIma hmar inti te khan an rawn comment rang vut vut kher. Putea phei chuan,

‘’ Thawveng hle suh’’ tih ringawt hian a rawn comment a, ka nui tawi tak. Kima ve thung kha chuan,

‘’ Eng nge intih dawn a?’’ a rawn ti a nih chu. Hangi tlangah hian engti turin nge kal se min tih ang le. Kan leng a ni ve mai a. Tichuan, a tlang hming put chhan berah te khan va țhu kual vel in thla pawh kan la nasa hlawm kher. Nuam tak a ni. Chumi zawh chuan thut hahchawlhna hmun remchang te zawng leh te te in kan eitur ken ang ang chu kan phawrh chhuak zung zunga , kan nui uarh uarh reng bawk.

‘’ Awi! Saw nu sawn mawng lem a vuah chiang lutuk’’ rawn ti sur surin Tlanengi chu a nui zui kar kar reng a, a kawhna lam en chuan keini ho pawh kan țhen zui ve țha mai. Chutihlai vekin Kimtei lah chuan,

‘’ A pheikhawk pawh saw, lo chhuk rawh inbe lawj ang tihna tham lawih a nih saw. Awi, khawpui nulaho inchei duh dan hi aw’' ti vang vangin min inchei dan sawisel reng reng chuan kan la hlim ve em em zuia, a nuam phian tho e. 

Chutia kan thian pali leka kan lo rik ve ham ham lai chuan kan bul lawkah car var pakhat hi a rawn ding deuh dat a, kan lo en deuh thap. Mahse, a chhung atang chuan kha pa ngei kha a rawn chhuak leh ta zan zan mai nia! A car ka hmuh rual khan amah chu hrechhuak tho mah ila, heng laiah kher kher hi chuan a rawn inlan ve hi ka lo ring phak miah lo. Amah chauh ala ni lehnghal a. chutah, a kekawr ipte zen țat chung chuan kan lamah a rawn phei ta zan zan mai a, ava han chhelo ve chiang tak. Zep tur a awm lo. Rindiki chuan min rawn nghawk zoh chung hian,

‘’ Saw, a rawn zawng che a nianga’’ rawn ti sur sur in midang pahnihte pawh chuan zawite te hian min lo chhaih zui nghal sur sur a. ka tum zui bur ringawt. Nge maw, min rawn zawn ve ngawt ang le a. Tun thleng thlengin a hming takngial pawh ka la hrelo a nia. Min zawng awm lo em mai. Mahse, ka hmazawn taka rawn din chat pah hian kei chu min rawn chhuk melh nghak run mai bawk a, tihngaihna dang hre bik hek lo, ka lo melh chho ve ha ha ringawt.

‘’ Eng nge a’’ zawi supa ka tih lai chuan a lo nui deuh sak mai.

‘’ Hre chuang nang. Ka lo tel ve duh a’’  rawn ti lehin ka sirah chuan a rawn thu thla nghal chat bawk a. ka che lai leh vek tawh mai. Chutihrualin ka thiante ho ve kha chu za em em silo hian an lo nui hak hak reng mai a, ka va melh leh nghek nghek zel ringawt. Min tilai zual vek alawm le. Amah hi a chhiat loh piahlamah, a langsar vuah mai a, chulai vela hmeichhe awm ve ho te pawh chuan an rawn thlek leh duk duk thin nimai in ka hria. Uluk deuh hleka amah rawn en tu an awm tih ka hriat rualin a hmel chu ka va en nghal vat thin a, mahse, keimah min lo en daih zel. Zah loh theih pawh a ni lo, a zahthlak duh tak tak zawk. 

‘’ Selfie mai mai ang aw’’ tih pahin amah bawk chuan phone chu a rawn lek chhuak leh vat a. iphone camera ah na na na chuan kan lo hmeltha ve hlawm khawp mai. Chumi zawh chuan kan pahnih chauhin lak dun a duh leh ta tlat a, hrethiam lemlo hle mah ila kan la dun ta nbge nge a nih kha. Ka lang tha raps.

‘’ Ka leng hla bawk sia, ka’n status nghal a nge’’ nui var var chunga tiin a phone chu a bih ta ngar ngar phawt a. chutihlai chuan Diki khan aw zangkhai angreng fe hian,

‘’ I hming pawh hi kan la hre miah lova. Tawngkam mawilo nilo se, I hmel hi chu kan lo hre ve tawh viau tho a’’ tih pahin inhmelhriattirna pawh a nei pah zung zung a, kei thung chuan amah ringawt chu ka lo en leh tawh. Chutah, a phone chu ak tha leh te te in, kan thianho hmel chu chiang zet hian a rawn en kual leh ang ren rawn phawt a, ka lo zak thin.

‘’ Vanlallawmkima ka nia. Kima min ti mai dawn nia. Chuan, in hming pawh a nalh hlawm lutuk e’’  ti sapin a nui zui hak hak a. kimtei khan Diki hnunglam atang chuan min rawn sik leh nawk nawk thin a, kei chu ka lo phu deuh zawk. Ka phar chhuak hluai nghe nghe.

‘’ Lalkimte, min tihlau alawm’’ tih țhat pah hian chhuanlamah a hnungzang te chu ka va chum sak zui dup a. ka bula thu Kima inti chu a lo nui ve leh hak hak thin. Tichuan, kha zan resorta ka awm dan te kha Diki chuan rawn sawichhuakin thupha te a han chawi nghal luam a, lawmthu a sawi pah bawk. Chutah chuan keipawhin ngawih reng chu a tha lo tih hre ve in a chunga ka chet dan leh tawngkam engkim chungah khan ngaihdam ka dil ve ta ngawt a. A mitah pawh chuan ka melh tha ngam tawh lo nghe nghe. Chutah, ka rin loh tak maiin amah zawk chuan,

‘’ A ho mai mai chutiang. I phone kha han en zawk the'’ rawn ti daihin, rang em em hian ka phone chu ka phawrh chhuak ve nghal vat a. E he le! Kima hmar tia in save atang khan  message ka lo dawng leh chu niin. Kima hmar inti hi he pa lek hi maw a lo nih a! Engtin nge a hming a sawi lai te pawh khan ka lo hriatchhuah miah loh theih zawk le. Ka mawl e.. 

Tunlawka kan thlalak ho kha min lo thawn vek a, status ah chuan keimah nena kan lak dun bik kha ala hmang zui. Caption ah te lah chuan love emoji dum ngat hi ala dah zui a, ka ner ta nang nang mai.

‘’ Kima hmar tia ka save hi nangmah ilo ni reng a maw!? Engtin nge I number hi ka neih theih zawk a’’ ka tih hlut takah chuan ka thiante kha an rawn hawi rual nghal thup a. chutah, dimtea ka chal chu rawn pen keuh pah hian,

‘’ Thil engkim kha hriatchhuah theih ila nei lo taktak emni? I phalna thlapin I phone-ah hian ka save sak che a nih kha. I number min pe bawk a’’ a rawn tih leh lek phei chuan ka han ngaihtuah chhin vel a, a ni tak ang. Car chhunga kan inpek vel kha mumang ang ruai chuan ka la hre ve alawm. Huiham! Zahthlak thei em maia. Wine a ni emaw, ruihtheih chi reng reng hi kuhva pawhnise, vawikhatmah ka ti leh tawh ngai lovang. Ka che khir thei bik em mai.

Tlai dar 2 a rik meuh chuan haw turin kan insiam zui sap sap mai a, ka thiante ho chuan Kima bula haw mai turin min nawr nak nak mahse Diki chu ka khawngaih leh deuh tlat bawk si. Min thlah haw chu tum viau tho mahse ka zak nge, Diki chu ka khawngaih tak tak zawk tih pawh ka hre tawh lo. Ka buai vek. Mahse, a hma ang tho khan Diki scooty zawk chu a nuar leh ta tlat mai a! A nung tha duh țhak lo nia. Chu chu hria in Kima pawh khan kan awmna lam chu a rawn pan leh ta nal nal a, a theihtawp chhuaha tih nun a tum takngial pawhin a thei bik chuang lo. Chutah, hah thlan hluam chunga kan hmel rawn en pah chuan,

‘’ Ka motor-ah sawn lo chuang phawt mai ula, hei chu a siam thiam ko ila, tih dan an hre mai ang’’ tih pahin a phone a phawrh nghal a, mechanic niawm tak chu a be chhunzawm ta mawlh mawlh bawk. Phone a hman zawh rual chuan rawn hawichhuak lehnghal in, Diki hnenah chuan,

‘’ Tihian hung sawn phawt ila an rawn buaipui nghal ang. Lungngai suh aw an rintlak a nia’’ ti leh zung zungin scooty chu langsar lo lamah a nawr sawn te te a, kan kal thei ta chauh. ka lo chahthlak tawhna a car chhung lum nuam leh cool raih mai chhungah chuan chuang lehin a bulah min la thut tir zui a, ka lai ru veng veng thei. Rindiki nen eng engemaw sawia an phul hlut lai te chuan ka ngawi deuh reng a, sawi ve tur hi ka hre lo a ni ber e. mahse, nuam erawh chu ka ti em em thung bawk si. Ka awm dan hi a hahthlak.

Chumi zan atang chuan tih tak taka inbe chho tan in, keipawhin a hma ai  ngawt kha chuan ka be tha ve tawh a, nuam pawh ka ti angreng fu. Bul zet zeta a fiamthu thawh ve thin te chuan min tihlim thar riau a, phur mai mai tak ka ni.

Tichuan, a tuk atang ka hna kal leh naah pawh amah kher chuan min thlah deuh thlap tawh a, dawr chhungah erawh a rawn lut ngai lem lova, chu dawra ka lo thawk daih erawh chu mak pawh a ti ve viau niin a lang. Nia, tunhmaa helai dawr an lo tlawh ve fo thin lai khan ka hmel hmuh tur la awm dawn hek lo.

Dawr chhunga ka pen luh rual rualin Nu Machhungi bawk kha hmanhmawh hmel em em hian a phone keng va va chungin a rawn tlan ta hlawk hlawk mai a, ding zum zat chungin a awm dan chu ka lo en ve reng ringawt. Chutah, ka bul a rawn thlen rual rual chuan kha video viral leh bawk kha min han en tir ta chung mai a,

‘’ En the hei, I duh em em helmet kengtupa hming hi ka hrechhuak tawh a nia aw. Nuam iti dawn lutuk’’ a rawn tih chuan keipawh ka lo phur ve nghal em em a.

‘’ Tu nge min hrilh vat vat the. Engtin nge ig ah a indah ang?’’ ka tih let tak sekah chuan nui vur vur chung leh intithei tih hriat fe mai hian min han en tha leh ren rawn phawt a.

‘’ Hm,, engpawhnise, chumi hma chuan hmanni deuha zaithiam chhuak thar Naomi thawmhnaw rawn order kha vawiinah rawn lak a tum a, lo va tifel hmasa phawt zawk ta che. I haw dawnah ka hrilh zawk dawn che nia’’ a ti leh daih a nih chu! Nghahhlelh ve tawh tehreng nen, ka van ngei thin tak. Chutihlai chuan kan inbiak dan zawng zawng hmu a lo hre ve vek tu ka thawhpui Dingi chuan nuihza insum fahran hian,

‘’ Hemite pitu em em thin hi chu aw’’ alo ti sup a, a nui zui awr awr bawk. Tichuan, lungawi lo ru tak, lawm ru viau chung si chuan Naomi kawr order rawn lak tur chu ka va buaipui ta zung zung zwk a, ka nu Machhungi khan zaithiam chhuak thar a ti ve ngawt a, tu nge naomi pawh chu ka hrengai chuang lo reng reng. Hm,, a hahthlak. Chhun dar 12 a rawn rik meuh chuan tlemin ka chau ve ta deuh . Naomi kawr chauh ni lo, thildang thtur hi a tam ve thin em mai a a chauh theih viau mai. Chutia, mahni tawka kan lo phar buai ve lawp lawp lai chuan ka phone chu rawn riin, ka han en nak chuan Kima alo ni reng a. ka phu deuh zawk.

‘’ Aw, eng nge ni ta’’ ka han tih chuan inla zei fahran hian,

‘’ Tlangval in nula a call a nih chuan chhan dang vak a awm dawn emni thinchhenu’’ a rawn ti ve khanglang. Chutihlaiin, kei lah chu lo insum hman thin hek lo, aw per sin em em mai hian,

‘’ A ve lutuk a che’’ ka han ti leh hram a, ka ngam tlak deuh ka thiante ka bia emaw hi ka inti leh thin. Mahse, ka chhan dan kha a ngai ahw hran lo tih hriat takin a rawn nui deuh hawk hawk thei a, ka thaw sawng sawng mai.

‘’ Tak taka Rinpui, thil hrilh duh che ka nei a. ih, zanin chu khawiah emaw min kalpui lawk ta che’’ a rawn tih leh chuan a thutak tawh viau tih ka hriaa, keipawh ka insiamtha ve ta vat. A thusawi awmzia ka zawh leh hnuah chuan,

‘’ Zanin hian movie premiere a awm dawn a, chutah chuan a hminga sawmna ka dawng ve sia min kalpui ta che ‘’ a rawn ti leh a nih chu! 

‘’ Hm,, kei min sawm ve hleinem. Ka ngam lo ka zak’’ tih pah chuan ka lei ka chhuah deuh zuk a. mahse, amah bawk chuan a hma ai maha thutak zawk hian,

‘’ Zah tur a awm lo e a. ka bulah I kal dawn a a theih vek’’ a rawn tih leh hram avangin ka hnial lui thei ta bik lova, ka pawm ta ngawt a nih kha. Mahse, eng kawr nge ka hak tak ang a rawn sawi har bawk si tiin ka rilru chu a buai leh zo vek tawh a, rang lutuk in nu Machhungi bulah ka tlan phei nghal vut. Chutia hmanhmawh fahrana ka tlan min lo hmuh chuan ani lah khan thilmak ka tawng emaw tiin makti fe hian min lo thlir reng tawh a.

‘’ Eng thil chu nge ni ta hluam hluam a. I ek a chhuak emni?’’ lo ti hlutin ka ner deuh sawk. Ka hah lutuk na lamah tawng pawh tawng hleithei lo hian ka thaw hmasa leh hlawi hlawi a, ka hmai te pawh chuka zap thaw vak vak tawh mai. Ka zia ve ta deuh.

‘’ Nu Machhung, puih ka ngai a nia’’ mangang aw rawla ka tih takah leh ka awm dan mak a tih deuh avang bawk chuan thiltha lo ka tawk emaw tiin a thutna hmun atang a rawn tho chhuak deuh hluai thei a, a meng phawk hru thei bawk.

‘’ Han sawi thuai la eng thil nge’’ hlauhthawn hmel zeta a rawn tih ve chuan kei chu ka lo inbengdai thei ta deuh. Thil awmzia ka han hrilh leh zet erawh chuan min ngei hmel kher. Chutah, min rawn ben țhelh fua fua chung hian,

‘’ Thingi, awi iva han che țhing tak aw. Min ti hlauthawng hman alawm le. Chutiang mai mai te chu dawr chhunga I nalh tih ber hi va ha chhuak ve hmak la a nimai alawm. A fual I duh pawhin a awm vek a’’ a ti hluk hluk a, ka lo nui uarh uarh mai. Nu Machhungi hi chu nu tha tak leh zau ngang hi a ni a, kan inngamtlak em em bawk. Hauh ka țul chang apiangin min hau bawrh bawrh a, duat leh hnem ka mamawh hunah nise ka nu ang maia ka inhnemna bul ber a ni bawk. Ka chunga a khawsak ang hian ka thawhpui Dingi emaw, midang hrim hrim bulah a khawsa ngai hauh lova, an innel ve satliah thin chauh a tih theih zawk ang chu. Amah hi ka putea ang maia kawppui then tawh a ni a, fapa pakhat neiin ala fel em em zui a an ngaihtuahawm lemloh hle. Tichuan, a thutna chu kalsan in kawrfual dahna roomah ka lut nghal a, kawrfual simple leh mawi tho si hak tur chu ka va zawng ta nghal chuk chuk. Reife ka zawn hnuah Nu Machhungi bawk khan min rawn enpui ve ta nge nge a, a tawpah chuan kawrfual khup chen vela fual hnalh, silk puan deh nuam em em mai hi min thinchhuahsak ta hram. Ka'n hak chhin vel te chuan mawi tih hmel em em a nui sang chungin min lo thlir uluk ve hle a nih kha. 

‘’ Kha kha va ha la chuan haw hma bawk ang che aw. Hetiang hunah chuan kal tlai bik kha a chi miah lo ang aw. In veng a hla tham si a, tunah hian haw nghal mai rawh’’  ti leh zung zungin ka va han  lawm tak. 

‘’ mi felnu, ka lawm lutuk’’ tih pah hian ka tum lawk pawh ni em em lovin ka kuah ta thlawp a. ka hnugzangah a lo beng let ve thek thek mai. Tichuan, ka bag te chu la leh sawk sawkin chhuah mai ka tum lai chuan amah bawk khan min rawn ko ding leh ta rih a.

‘’ Rinpui, lo ding lawk’’ a tih chuan ka hawi let vut a. chutah, chiang leh uluk zeta ka mita min rawn en chung chuan,

‘’ Thil kha ka la hrilh hleinem che’’ rawn tiin, kei chu ka lo hawihai deuh hlek a, mahse, amah bawk chuan nui ar ar chung hian,

‘’ Helmet kengtupa hming kha’’ a rawn tih leh takah zet erawh chuan ka nui chhuak nghal ta vur vur. 

‘’ Han sawi vat the. Ka beng tih vir te hi I thiam lutuk mai ‘’ ka sawi zawh rual rualin amah bawk chuan nui har har cung hian,

‘’ Kima Hmar a nih kha! Ig lamah pawh chutiang hming chuan va zawng la, I hmu vat ang’’ a rawn ti leh zet chuan eng ang taka na in nge min nghawng ka hrethiam lo. Ka phur nge ka helhhawlh nge, engtin chiah nge ka awm tih hi ka inhrethiam tawh tehnuai lo e a. 

‘’ Aw, a nimaw. Ka follow nghal dawn chiang’’ tih leh tlanchhuah chu ka rual a. Busa ka chuan chhung zawng te pawh chuan KIma ig profile ngawt chu check sakin ka buai ve hle. Hm,, amah ngei alo nih hi. Mahse, kha video viral ah khan ti nge a hmel kha a danglam em em mai le. Ala naupan hmel bakah a lang thau deuh tlat niin ka hre zawk. Awi! A mak dawn e. Amah hi ka mipa duhzawng tak a ni ve hrim hrim nge intawng tura ruat kan ni zawk. A hming takngial pawh ka hriat hma atang ka lo vei tawh a, video viral ah lah amah ang ka tih ber kha amah a ni tih hre miah lo in ka vei zui leh bur bawk a. hm,, amah hrim hrim hi ka duh chi tur taka duan mihring a nih dawn hi ka ti ta mai. Ka hriatchhuah hnuah ngat phei chuan ka vei zual em em a, zan lama kan inzui dun tur ringawt te pawh chuan min ti awm hle hle thei tawh lo hial.

In ka thleng a, intifai nghal zung zungin ka sam la huh chhap te chu ka han hru hul leh nawk nawk bawk a. ka intihfel zawh ah chuan eirawngbawl chhunzawm nghalin mahni tawkah ka buai ve hle a ni. Chutih chhung zawng pah chuan Kima leh ka thiante ho nen kan inbe pah reng a, helmet kengtupa kha amah ngei a ni tih chu ka hriat tawh thu pawh ka la hrilh duh ta chuang lo. 

A hun a rawn inherchhuak ta. A ruk chuan zam ve tak ka ni. Anni ho chu khawpui tlangval niin khawpuiah pawh mi hriat hlawh chin ngat kha an ni ve bawk si a, chutihlai chuan kei ve lah hi thingtlang nula ve mai ka lo ni ve bawk nen, hetiang mi hi a ni tih ka hriat hma atang lo inhmelhriat daih tawh mah ni ila, mahni insitna lian hi chu ka nei ve lo thei thin lo a ni e. Engpawh chu nise, ka ti luih pakhatmah a awm chuang lova, ka duh a ka zui dawn bawk. Chu chu a nimai. Mihring ve bawk a nia lawm le a.

A car hmang ngei khan min rawn hruai lehin, ka hmel leh inchei dan a han hmuh meuh chuan a mitmeng te pawh kha a danglam ve deuh ni berin ka hria. Nalh min tih hmel lutuk ringawt. A bul chiaha ka thut thlak zawh rual chiah hian zawi supin,

‘’ I nalh lutuk’’ a lo ti a. ka nui ver ver. Chutihrualin ani pawh kha a rawn chhelo leh zaih zaih hle mai a, coat suit dum dak hlarh hi rawn ha in, a sam hi video virala a lan dan ai khan a lo tawi hret tawh zawk bawk nen, a lang pa zual hliah hliah mai. Ngam leh ngamloa amah va melh zoh chung chuan,

‘’ Nangpawh I chhelo’’ ka ti liam puat a. A lo nuih ve sak tho kha.

Tichuan, kan kalna tur hmun vanapa hall chu reiloteah thleng zuiin, a chhunga lut ve tur mipui zi huai huai karah chuan kut inkai chung zelin kan lut ve ta zan zan mai a, mi ho lah khan min em duh bik riau te khan ka hre bawk thin nen ka zak lutuk kha ka biang te hi an sen vek in nia ka rin ni. A sa hut hut tawh mai.

‘’ Kima, he lamah’’ hmeichhe aw kan hriat rual chuan kan thutna piahlam chu kan hawi rual dun țhawt a, mak tak hian hmannia a hmeichhe rawn phurh mengrum deuh nu tho kha alo ni leh. He nu hi a bialnu hlui ve deuh nge, an chhungkhat tih pawh ka hre biklo. Amah hnaih hian hmuh tur alo awm ve fo mai. Kima chu rawn melh no ralh ralh chunga a nuih sen sen laiin ka hmel a rawn hmuh ve thung kha chuan a hlimna zawng zawng te chu ka lakbosak zo ta emaw tihtur hian a meng dur nghal em em ringawt a, ka hlau. Kima tihngaihna hrelo pawh chuan a ban va vai khum zoh zohin a nuih liam ve ta ringawt a. hmalam chu a hawisan lehnghal daih bawk. Programme țan ala nih loh avangin mihring pawh an la zi nuai nuai reng a, chutihlai chuan Kima thutna bul chiah ah hian a thianteho niawm tak pawh kha an rawn thu thla ve ta sap sap mai. Um, an ni chiang lutuk. Video virala ka hmuh te ho vek kha an nih hi. Ka mur leh ta sung sung mai. A nung chunga an lo chhiat loh lehzual hlawm si zia hi. Tichuan, kima’n inhmelhriattirna te rawn nei leh te te in, kan inchibai leh sap sap hlawm a. An hmel hmuh a nuam hle. Kan piah lawka thu ve hmeichhe mengrum thei pawh kha rum em em hian ala rawn hawi phei ve sek reng a, amah chu huatna chhan tur nei lem lo mah ila a ninawm tawp. 

Programme țan dawn ruaiah Kima bul chiaha thu a thianpa Timothy khan min rawn kheuh zeuh chung hian,

‘’ Rinpui, nuam deuh khan aw’’ rawn ti supin a kiai deuh sak bawk a. keipawhin lu buk nghat nghat pah hian duhsakna ka lo hlan ve ringawt. Eng nge, han sawi mai tur ka hre hleinem.

Movie chu an tichhuak tan a, ka rin loh dan daihin tualthahna lam alo ni tlat. Ka hlau leh țan der tawh chuan a khat tawk hian Kima ban awm hle hle lai chu na zet zetin ka va hmer leh ringawt thin a. Engtinmah min lo tilet hauh lo mahse ka hriatchhuah rualin ka inthiamlo lutuk a, ka thlah leh rang thin kher. Tichuan, hlau ru em em leh țang tluan chhuak zakin movie pawh chu ka en zo ve ta vek a, ka hmuhnawm tihzawng pawh a ni ngut love a. ka hah phah the hrep em mai. Zanin hian ka thiante ho kha ka bulah awm ngat se chu cinema an en emaw inti in an bengchheng viau ang mawle. An ni ho vang vek khan a nia ka lungphu te pawh hi an khaw loh zawh tawh ni.

Kan hun hman tur ang ang te hmang zoin haw alo hun ve leh ta. Haw mai tura kan lo inpuahchah lai tak chuan ka zun a rawn chhuak leh ta tlat. Laklawh ve thin asin.

‘’ Thiante bulah hian ka lo nghak ang che’’ a tih avang chuan hmanhmawh ru zet in toilet lam pan chuan midang karah ka inzep phei ve ta zela.  Toilet pakhat chu alo ruak hlauh.

Toiler atanga ka chhuah leh chuan Kima te thianho pawh kha mipa toilet bulah ding khawm chungin zial bawk chu an lo pet leh fur tawh hlawm a. ka ner deuh sak mai. Kei chu min raqn hmuh lem loh avangin an lam pan chuan muangchang hian ka phei ve chhet chhet a, ka la insiamtha pah mawlh mawlh reng bawk. Chutah, an bul chu ka thleng phei tep tih in a thian zinga pakhat khan ka chungchang a sawi mek tih chu ka va hre pha ta mai a, ka ding det.

‘’ Khatiang te rawn hruai reng reng che. Khawi ami nge a? A țhing e’’ a tih ri ngei mai chu. Chu mai chu duhtawk lovin midang pakhat a raw tawng chhunzawm ve leh a, ani pawh chuan,

‘’ Dik chiah e. zep loh ah chuan Sangsangi pawh hian tikhawp in ala zar buai hneh ve che a, zanina I hmeichhe rawn hruai nen kha chuan lei leh van an ni ringawt mai’’  rawn ti ve lehin an thusawi te chu hre ve thei lo zawk hial ila ka duh mange. Ka na ngut ngut thei. Chutihlaiin, Kima thung kha chuan an thilsawi te chu ngai pawimawh lo tih hriat takijn a zial zuk lai chu thuk zet zet hian a han hip leh vang vang thin a, 

‘’ In sawi ho em maia’’ tih sup paha ka awmna lam a rawn hawi chuan keiin chiang leh uluk fahran hian ka lo melh let ve reng mai a, 

‘’ E, saw, a lo chhuak tawh e. kan kalsan phawt mai ang che u aw’’ tih paha an in mangtha liam liam hlawm lai chuan anni ho chu kalpel thuakin pawnlamah ka tlanchhuak nghal daih a. min rawn kohna pawh kha ka hrelo awm hmiah hmiah tawh.

‘’ Eng nge thil awmzia?’’ tih paha ka kut a rawn man beh lo thin thlak sak deuh hmakin vin zet hian,

‘’ Keimahin ka haw thei. A ninawm’’  kalo ti hluk a, ani chu a hawihai zui nasa the e. 

‘' Khatia au vak vak kha a tha lo. Midangin an hre palh anh che’’ zaidam deuha a rawn tih leh sar sar lai hnu chuan ka awm dan chu a diklo tih hre ve in ani hian ka huat a hlawh nachhan tur a awm lo tih ka hrechhuak hnuhnawh a, ka inbengdai ve ta hram. Chhang let tawh lovin ka ngawi reng a, hnuailam ka melh deuh tlat bawk.

‘’ Hawh lut ang. Khua a tlai mai dawn’’ tih paha ka thutna lam motor kawngkhar a hawn lai te chun min chelhna a kut chu ka lo thin tlak sak leh hram pek a, ka thinchhe ve thei ngawt mai. Motor chhunga a rawn thut fel hnu pawh chuan be peihlo in ka la ngawi reng a, ka hmazawn en in ka la tum bar bar reng mai. Chutah, rawn thawk deuh huai pah hian,

‘’ Ka thiante ho thilsawi kha chu engahmah ngai suh aw. An rak satliah ve mai mai a nih kha’’ tih pah hian motor a tinung vut vut a, ka la chhang let duh ta chuang lo. Kan kawmchhak kawngpui thlenga min thlah thlen hnuah pawh kei chu tawng duh miahlo in motor atang ka tek chhuak nulh a, a rawn chhuak zui ve nghal bawk. Step ka rap tan chiah tih ah chuan,

‘’ Zanin avang khan ka lawm lutuk. I nalh in I hmeltha takzet bawk a nia. Chuan, muttui aw’’ a rawn ti leh hram a, hawi let miah loin ka mangtha a, ka kalsan ta vang vang.

Engvanga sehhel tlat nge ka nih tih hi ka inhrethiam thei lo. A thiante a chhan let dan ah khan ka lawm zo lo nge, ka bula a khawsak dan ah hian ka lawm tawh chiah lo tih pawh hi ka hrethiam tawh lo e a. 

Khaitiang htil a thlen hnu atang kha chuan kan inbe chhunzawm lo ta vang vang a, ka status thar apiangte chu rawn view nghal zat zat thin mahsela a status erawh ka mut sak hmak thung a, ka view sak duh lo lui ve ngat. Ani nena chanchin kan han neih loh atang chuan ka thiante bawk ka bel tam leh tawh a, story nise ziahna hun thawl ka ngah thei tawh bawk. Hetihlai hian kan chanchin engkim leh Kima nihna zawng zawng video viral chen khan ka thiante ho hnenah hian ka hrilh kim thawkhat leh viau tawh a, an lo phur ve tawh tehlul nen, tunah chuan kan inbe lo leh der tawh chu a ni si a, min hauh rawn luai luai reng mai thin. Kimtei leh Tlanengi ngat phei kha chuan,

‘’ Nang ve tehlul hian milar I nih theihna chance I hloh ta vek a nih chu’’ an ti hial a, min nuih leh nghek nghek zel. Chutihlaiin, Rindiki thung kha chuan,

‘’ Ngaihdam dil la, thupha te va chawi leh rawh. I mawl zek zuk thei em mai. A thiamloh pakhatmah pawh a awm eih loh kha țhingi’’ min ti hluk hluk a, ti nge, mi reng reng hian țhing hi min tih theih m em zel le. Mahni tawka chhelo intih ve hlarh hlarh thin nen hian aw.

Zan khat chu eng thil nge ka hriat pawh ka hre hauh lo. Mi status ka en kual mai mai pah chuan Kima chu rilruah a rawn lang deuh thut mai a, a status te ka va view ta ringawt. A status ah lah chuan

‘’ Amah kha ka ngai’’ tih ringawt hi alo la hmang zui a, ka țim ur ur thei. Tichuan, keimah mi tihchhan nge ni a midang zawk tih hriat nan a helmet kenna video ngei mai kha status-ah bawk chuan ka hmang ve ta thung a. caption ah pawh  ‘ Helmet kengtupa hi ka ngai’ tih ringawt ka dah bawk. Chuveleh, a rawn en hmasa ber tuah țangin ala rawn comment zui.

‘’ Um ka lo kal e’’ tih ngawt hian min rawn reply a, ka bangbo angreng. 

‘’ Khawnge I kal dawn’’ ka tih let chuan 

‘’ ka mu mai mai. Ka kal peih lo’’ a lo ti leh ringawt a. Awi! Ka ngaih ve tawh tehreng nen a chawk ho zo leh ta vek mai.

‘’ Mawla’’ ka va ti let chiah chu rang fahran hian a rawn cll nghal ta mai a. ka nui chhuak deuh hawk thei.

‘’ Fingi, inhmu lawk ang’’ rawn ti nghal thawr in, sana ka en vata,  zan dar 7 chauh alo la ni hem mai. Ala hma angreng viau e. chhuah that leh vel chu peih lo hle mah ila a hmel kha ka hmu chak tawh angreng viau si a, chubakah, putea hi engtin nge ka tih tak ang. Tun ang huna chhuah ka dil chuan a phal dawn miah lova, a pawi lo, Rindiki nen khan an inngamtlak a, an inbe ve thin tho tiin Diki chu putea lo call lawk tur leh, chhuanlam min lo siamsak tur chuan ka va be ta rawih mai a. Tichuan, Diki nena inhmu tur anga chhuakin Kima nen zawk kan inphurchhuak daih.

Aizawl khawpui chhung eng pe tuarh mai thlir vang vang theihna hmunah chuan kan thu dun ta ran mai a. sawitur hi ka hre thlawt lo. Ka ngawi vang vang. Mahse, a hmazawn ral hla tak thlir vang vang chung chuan rawn thawk halh pah hian,

‘’ In ngaizawng ang!’’ a rawn ti tawi tak mai. He mihring hi ka hrethiam thei lo. Min ngaihsak thiam a, a changin tawngkam pawh a bei uluk thei viau. Mahse, engemaw chang hi chuan a zei lo leh khat tlat thin bawk a. Tuna a thil rawn sawi dan the tawp te pawh kha engtia han chhan let ve tur nge tih hi ka hrethiam thei lo reng reng. Amah chu ka han thlek chho dek dek a, chutah, min rawn kuah deuh thut chung hian ka mitah pawh min la en chuang miah lo in,

‘’ Ka bialnu ni ve tawh la’’ a rawn ti tha leh. Hm.. Mawi hnai taka han chhan let ve dawn pawhin ava han harsa tehreng.

‘’ Awle, I in ngaizawng ang hmiang’’ a mizo film tawngkam taka ka han tihtakah chuan fiah leh maktih hmel fe hian min rawn chhuk melh nghal run a. Ngam leh ngam lo in ka lo en let kar thung.

‘’ Tikhan kan inngaizawng tawh tihna a ni em?’’ a rawn tih leh pawh chuan awlsan zet in ka lo bu let nghut nghut a, tihngaihna vak pawh hi ka hre bik tlat lo a tin ni.

‘’ A nih chuan’’ a sawi zawh rual rualin kei lah chuan,

‘’ Eng’’ ka lo ti vat. Chutah, chiang em em a min rawn chhuk melh leh chung bawk hian a thaw khu hlat hlat mai a, min kuah nghet zual sauh bawk.

‘’ In ngaizawngte chu an infawp thin’’ rawn ti leh supin zawimuang hian ka hmui chu a rawn fawp ta nghal a. ka lo indawh mawl ve ringawt. Reiloah inla hrang nghalin ka awm dan chu ka han siamhtha leh sat sat phawt a, chutihlaiin ani lah khan,

‘’ khati zawng kha emni?’’ alo ti ve sek. Ka tihngaihna hrelo lutuk khan ka ner khum ka nawk nawk ringawt a nih kha.

Tunah chuan Kima Hmar bialnu ka ni a, ka bialpa a ni ta bawk. Thil reng rengah khan min zahpui emaw, min pehhel leh ka laka zep then leh thup hni hne tih vel kha a neih ngai awm ka hre miah lova, a che fair ve thawkhat thlawt. Tin, amah ena a luck tur zia ngaihtuah in a lerh hauh lova, hmeichhia ah hian kei tih loh chu a thianthate ngawig ngawih bak a be lo niin ka hria. Sawi tak ang khan hmeichhe mengrum thei deuh Sangsangi lah khan engtiklai pawhina zar buai thin ti ila kan sawi uar hran lo ang chu. Kei thleng thlenga min rawn be thin in a tawngkam lah kha a han na thei em em khawp a.

‘’ Nang thingtlang nula ve mai mai nen kha chuan hun rei hi in inkawp ka ring love. Kalsan vat zawk rawh’’ tih ang chi te hi min tawngkhum duh dan a ni thin a, Kima bulah phei chuan engmah ka sawi lang ngai lem lo thung. Hmeichhe buaina tiin engatanmah a ngai leh dawn chuang lo tlat.

Hetiang hi kan boruak a nih chhoh lai mekin Amuantea kha a rawn lang ve leh hlawl thin a, kan inah te hial pawh a rawn chuangkai fo tawh mai. Ka bialpa neih chungchang chu lo hre ve in, amah pawh a hre tel nghe nghe a, bansan tur chuan min tur ta sek nia! A sawi dan chuan Kima te ang mipa hi chu duh duh thing lawr thin leh, a ngai reng ringawt duh khawp lova thlak kual chhen thin mi an nih a rin thu a sawi vel a. A rin thu a nih chu! A hrechiang in an inhnimhnai tih pawh a ni miah lova, ava han thu lo ve chiang tak aw. Mahse, khati zawnga Kima te alo beih vak vak chhan kha a hnua ka hriat leh dan chuan keimah ah a ber nih a tum a, min lo ngaihzawn ruk reng vang zawk a lo nih chu mawle! Ka be duh tawh lo nghal hmak bawk a nih kha. Thian leh thian inngaihzawn hi ka duh ve lem lova, thian anga bul kan tan a nih chuan thiantha leh rinawm nih tum ila, thian ah bawk hian tawp leh rawh se. Hetia a ruk a rala inbeih ngat ngat mai hi chu ka duh dan a ni ve hauh lo.

‘’ I ril a tam tawh em?’’ rawn ti sar sarin kei chuan ka lu ka lo thing nawk nawk thung a, hemi zan hian dine-out ang a tih deuh tlat avangin kan chhuak dun ve ta rawih kha a nia, ka hmanhmawh lutuk na lamah ka hmai vel pawh chu mumalin ka chei tha hman miah lo lehnghal. A pawi lo, ka hmelthat loh phah chuang lovang chu. Zawimuanga ka kut rawn ban de de pah hian,

‘’ Hmeltha nu, min nei duh em?’’ rawn ti leh sapin, ka lo nui deuh var var thei. Chutah, a hmel lan dan chu a rawn inthlak danglam nghal vek thei a, a pum a na ta emaw ka ti hial hman. Mahse, 

‘’ Ngati nge I hmel kha’’ ka tih chuan hul hak mai hian,

‘’ I ha hmai ami kha eng nge a?’’ a rawn tichhuak nulh. Chutah, ka ha hmaia thil awm chu en fiah nghal thuaiin ka phone camera atang ka ha hmai en tum chuan hotel chhungah khan ka țhen kual ta vak vak mai a. 

‘’ Lipstick a nih hi! ‘’ ring fahrana tichhuak hlutin tissue paper ngei mai chuan ka hru reh ta nawk nawk a. mahni lo maha inchei hi thiam tawh loh nak alaia tlaiah khan min tur hmanhmawh leh lutuk a, lipstick pawh ka inhnawih pherh phah vek. Ka hnawihsen hman lah kha hnawih mawi harsa berkher alo ni zel bawk si a, ka zak lutuk chu hotel menu hmanga inhliah khuh char char in ka hawi chhuak lawk ngam tawh lo reng reng.

Ka hmuh lai chuan nui chhuak tha duh hauh lo mahsela a nuihza lutuk insum hmel ka hmuh khan keimah ber bera chu ka nui phuh leh ta țhawt mai a! A rawn nui chhuak ve ta hawk hawk mai. Kan va han laktlak loh dun tak e aw. 

Nu Machhungi lah khan chanchin engkim mai hi a hriat ve tawh avangin kan awm dan engpawh mai chu hriat ve chak hian alo phe kual ve char char a, dawr chhungah pawhnise ka hrilh hriat hma chu min um kual char char peih a ni ber e.

‘’ inneihpuiah min sawm a! ‘’ ka han tih tak hluaiah chuan ani pawh a rawn au chhuak nghal hlut thei a, min kuah leh ta chung chung mai. Ni e, zan hmasa lawka zanriah kan ei chhuah dun naah khan inneihpuiah min sawm miau a tin ni. A thutak a, a uang hauh lo bawk a, a ngenngawl viau zawk a nih tak kha. Chutia, min kuah chung chungna chu thlah dul deuh thutin rum fahran hian min rawn melh leh ta nghek. A mak thut thut thin e. 

‘’ Dawt nge thutak. Engtin nge thudik tih ka hriat ang’’ ala rawn ti hram a. Nu Machhungi em em hi chu aw. 

‘’Kha, hei hi en rawh’’ tih pahin intithei zet hian ka kuttang pakhata zungbun mawi fahran chu hmuh chian theih tur ngei hian ka lek chhuak zui ta larh larh a. keimah tak pawh chu ka hawi sang deuh vah tawh. Chutah em chuan sawi buai nei tawh loin a awih zui ve ta mai. Khik suk pah hian,

‘’ Nu man ka ei ve loh vaih hi chuan maw, hnar hnek a nimai’’ ti leh hmuar hmuarin min kalsan zui a, ka nui deuh vur vur reng.

Mizo dan diktakin palai an kal thlap a, a hun tur pawh sawisel niin ka thiante ho phur lutuk tawh chu an awm hle hle thei tawh lo a. ka awmna ber ka putea ngei mai pawh chu pathlawi lungleng tihtakah, a țang ru ve hle tih ka hre thei. A khat tawka a lu a meh tir loh leh a coat suit neih ang ang te chu a endik reng a, a siamthat tir thul. A awm dan vel chuan a ruk tak hian min ti lawm veng veng mai.

Man hlan hun a zo va, tunah chuan biakin chhung ngeia kutsuih hun chiah kan hmabak ta.  ka huphurh rual rualin ka chak ru ve em em lawi tho si. Chutihlaiin, ka thiante ho phurthak tawh lutuk lah chu an inchei dan tur buaipuiin an hun zawng zawng deuhthaw an lo hmang ral ve bawk a, a bikin, mo thian ni ve lo tur Kimtei leh Tlanengi te mawlh mai chu, an hmanhlel a ni. Ka pasal nimai tur Kima thiante ho an rawn chhelo dawn tih hria in an țang lutuk ringawt tawh.

Kan khaw lam atang pawh a thei theiin min zui haw ve bawk a, putea chenna inah pawh chhungkhat laina hnai thenkhat ho chu rawn thleng khawm ve tawhin, kan thahnem ta hle. Hetiang hunah hian in neitute an hmai zahawm ka tia, mahse, tunlaia aizawl khwpui chhunga inluah tur nei tamtak te ang lo tak hian putea inluah neitute chhungkua hi chu an fel a, an zau hle a, kan hun tawn mekah pawh hian min hrethiam in thilpek te hial min rawn pe ve zawk a nih kha. Ka lawm lutuk ringawt.

Tunah chuan kima thiante pawh khan hmeichhe țhing lutuk min ti tawh ngai lova, whatsaap lamah group te siamin min rawn add ve nghe nghe zawk. Min chhaih fiam laih laih reng a, a nuam tawh takzet.

A hun chu a lo thleng a, zingkar chuan kan buai leh char char. Thawh ka la hai lek lek zui a, a zialo tak tak a ni. Tukthuan te ei vat vatin Nu machhungi kha hma lutuk takah a rawn lang ve hlawl mai a, kan lo nuih hak. Ani hian kan intiam tawh ang ngei khan ‘nu man’ a ei ve a, min rawn pe tha em em mai lehnghal. Tunah pawh tihian a phur ber berah a rawn țang leh thei a, ka lawm takzet. 

‘' Nu Machhung, lo thu lawk rawh aw’’ ka tih zawh rualin ka putea kha lu mawm hlap leh sam pial hlarh chung hian room atang a rawn chhuak ve nawlh bawk a, kan lo en duh hlawm nasa. Kei leh thian atana ka hman tur Rindiki chu room lamah min chei tu tur ho chuan kan lut bo nghal ta diak a. uluk zetin min chei chhunzawm ta mial mial. 

Mo kawrfual mawi tak leh ropui em em ha chunga biakin chhung zahawm tak ka rah luh hnalh hnalh lai chuan keimah ah zamna aiin ka hun ropui min lawmpui tura chung zat zat mihring rawn pung khawm ta mai chu lawmna hlirin ka khat zui a, ka mitmu chiah tiche kual ralh ralh chung chuan ka lungchhe thei lek lek zawk. 

Tunah chuan thutiam hun a zo va, zungbun hlu tak chu inbun tir lehin pasal nei ka lo ni ve ta. Kima hmela hlimna rawn lang chhuak kha hmuh hmaih theih a ni lova, lungchim takin kan inmelh vang vang a nih kha.

Biakin chhung programme chu zo in, pawnlam pan hian kan inzuichhuak leh mek a, kawngkharpui bula flower girl ho in nuamti taka min lo phuh seng seng lai chuan an bulah khan Tlanengi leh Kimtei pawh nui hawr hawr chunga phusa fe mai hian ka va hmu ve hlawl mai a. An ni chauh nilo in an kiang lawkah chuan hlim lo leh lungawi lo tih hriat fahran a Sangsangi lo ding zum ve reng pawh kha ka hmu tel nghal. Keini pahnih chu nelawm loh zet hian min lo melh ran reng mai bawk. Tichuan, an ni ho chu kalpelin, kan hnungah khan min rawn zui ve ta mai bawk a. chutah, tu emaw hian rak țhat chunga,

‘' Aiah! Țhingi'’ a rawn tih ri chu hria in kei leh Kima pawh kan hawi let rual zawk a, e khai! Sangsangi chu kan hnung maiah chuan  a lo tlu bawkkhup reng a nih chu mawle! Midangho khan buaipui nghal vat vat in, a then erawh an lo nui kar kar reng a. Diktaka sawi chuan keipawh chu ka nuih a za ve. Chutih tawh nak alaiin a bul maiah khan Kimtei kha tifuh intih hmel zet hian a lo nui țhen deuh țha reng a, um,, Sangsangi tluk nachhan pawh chu ka hrethiam ta chiah e. 

Car cheimawi chhunga kan luh leh dawn a ruaiah piah deuh hleka Nu machhungi leh ka putea te lo ding dun chu hmu in, khunkhan fahran mai hian an lo titi dun mek a, nu Machhungizawk chu ka va ko zeuh. Tichuan, ka pangpar ken lai ngei mai chu an lamah va theh phei thutin, nu Machhungi chuan rang zet hian alo dawng deuh nawlh. Chutah, awmze nei deuha mitko han tihsan leh ak pah hian motor chhungah ka luhsan ta nghal a. putea chuan lai tih hriat fe in a lu thak lo pui te kha a hiat zui deuh nuah nuah mai.

‘’ Tunah chuan ka pasal diktak ini ve ta’’ tih paha Kima ban kham ar ar chungin a hmel chu ka han en chho leh ha thin a, ani pawhin chauh hmel taka khap ban chuar chung hian thum deuh in,

‘’ Ni e, țhingi’’ min rawn tih chuan ka mu lai chu tho chhuak zawkin, titau der chung hian ka che deuh sawk sawk mai bawk a,

‘’ Ka haw leh daih dawn mawlhmuar’’ tih paha khum thawhsan ka tum lai chuan nghet zetin ka banah a rawn man deuh chawt a. ka hawi let rang kher mai. Chutah, chiang leh uluk em em a min lo melh vung vung chung chuan,

‘’ Ka nupui ini ve ta’’ a rawn ti ve khut a, a nui leh sak bawk.

Kan duh leh hmangaih em em te neih theih tluka hlu hi khawvelah hian vanneihna dang a vang ve viau ang ka ring. Chuvangin, kei chu mi vannei ber berte zinga chhiar loh thiehloh niin ka inhriaa, ka hlim a ni. Tichuan, ka lukham hnuaia ka dahthat lehkhabu chu zawimuanga phawrh zal zalin mi rawn hmuh rual rual chuan phawk hra chung hian,

‘’ Kha chu eng thil nge a?’’ a rawn ti deuh hu mai a. Amah en paha lo nui var var chungin kei chuan,

‘’ Kan pahnih thawnthu hi tunah chuan ziah zawh vek a ni tawh a, mi zawng zawng hriat ve atan tunah chuan youtube a thawnthu chhiar thin ho hnenah an chhiar theih turin ka theh lut dawn’’  ka tih chuan nghet zet hian min rawn kuah leh vang vang a, ka bianga rawn chuk zeuh chung hian,

‘’ I ho mai mai e a, țhingi!’’ min rawn ti!!

******         *******      *****     ******        ******       *****     ******