JERIKOH RESORT

JERIKOH RESORT

BY :        Vanlalpeki  Fanai

‘’ Min pui r’u, min tanpui r’u !,’’ tlanchhiat hlawp hlawp paha au țe ruai chung hian hmeichhe pakhat chu ram pilril hmel tak chhungah mahni chauhin hmalam pan chung chuan a tlanchhe pah zel a, a khat tawk hian a hnung leh hma, a sir vel te chu a thlek pah leh zeuh zeuh thin bawk. Chutia, amah umtu nei niawm taka a tlanchhiat pah reng lai chuan thawklehkhatah a hma zawn takah chuan chempui leh silai keng mipa lian thelh thawlh tak mai chu rawn lang deuh thutin, chu nula pawh chu meng phar awn awn chung chuan a ding ve ta nghal chawt a. 

‘’ Min kalsan rawh. Inah ka haw duh a nia. Khawngaihin,’’ tap zawih zawih chunga a dilna chu pawmsak a nih loh hmel kher. A tlansawn leh dawn lai tak chuan a chhip samah an rawn țham ta nghek zawk a! Au ruai ruai chung hian a lo tlan tawhna lamah bawk khan an hnuk kir leh ta zawk a ni.

College pakhata zirlai naupangho chuan exam an zawh tawh avangin reilote chhung chu chawlh lailawk an hmu thei dawn a, an lawm hle. A bik takin Mercy te thianho mawlh chuan chu hun chu an thlahlel a, an nghakhlel zual emaw tih mai tur. 

An thianho hi mi panga lai niin, mipa pathum leh hmeichhe 2 te an ni a, an zingah hian Tetei leh Chhantea te chu inngaizawng nghet tak niin, thian atanga bultan chho ve tho an ni bawk a, kum 2 lai chu an inzui ve tawh nghe nghe a ni. An ni pahnih tihloh midang zawng hi chuan ngaihzawng han sawi tur em em pawh an nei hran lova, zan hnih khat fawr pui te chu lo nei ve tawh bawk thin mahsela, an be chhunzawm hran tawh ngai lo thung. Chutihrualin, Mercy hi chuan minister fapa bialpa atan a nei ve thung a, an inkawp rei ve tawh fu bawk. Mercy hi a hmel a thaa, a duhawm viau bawk. Tin, amah hi hmeichhe lian leh sang lemlo tak ni ve in, a meng bial kiau reuh a, samtawi ni bawkin a inhmeh reuh hrep mai. A khaikhawm nan hmeichhe te fel tak leh chhelo em em a ni e, a tih theih ang chu. 

‘’ Oliver, hmanni deuha I cousin te kalna hmun kha khawilai nge ni kha. Chawlh kan nei thei tho bawk a va kal ve the ang u,’’ Mapuia chuan rawn ti deuh ham ham in an thian dangte pawh chuan an rawn en nghal thap bawk a.

‘’ Nia, Oliver, a hmun te chu han sawi la kal ve ang u,’’ hmeichhe pahnih, Mercy leh Tetei ten an rawn tih ve leh tak zelah chuan Olivera pawh a ngawi reng thei ta lo.

‘’ Umm, Buarzo khaw pelh hretah sawn intihhlimna tur hmun nuam deuh mai an hawng thar e an tia, UHlupuii te pawh kha chutah chuan ania an va kal. Thla khat chuang lai cham tura kal kha an ni bawk a an lo la haw miahlo tak asin. A awmna hmun pawh ka hria alawm kan kal ve dawn nia,’’  a thil rawn sawi leh zet chuan a thian pali lai mai te hmel lan dan chu thlak danglam nghal vekin, tha thona leh phurna hlir hian an khat tawh a ni ber e. hmeichhe pahnih te ngat phei kha chu phur lutuk vangin an inkuah deuh chung chung tawh a, an chiau chul mai bawk. 

‘’ Hi! Naktuk atang hian hun reilote chhung chu ka zinbosan lawk dawn che a,’’ a khum chunga mut zal ar ar pahin Mercy chuan a bialpa Zonunfela chu phone atangin alo be pah mawlh mawlh mai a. A nui deuh kar kar reng bawk.

Chutihrual vekin Tetei leh Chhantea te pawh kha zan danga an tih fo thin dan ang tho in hotel room pakhat chhungah hian an lo tawm dun leh kar tawh mai a. An ni pahnih hi chu inngaizawng satliah mai mai angin an khawsa tawh loa, nupa nun thleng pawhin vawi duailo chu an lo chesual fo tawh reng a ni.

‘’ Bawiha, nang hi chu I duham ve ngawt in ka hria a ni,’’ tih paha a bialpa biang vel chul sak heuh heuh pah chuan Tetei chu a han nui leh sen sen thin a. chhantea pawh a bialnu chunga bawh ur ur pah hian alo meng si leh sap tawh mai.

‘’ Engah maw?’’ a tih sup zawh rual chuan Tetei bawk khan,

‘’ Naktuk atang chawlhkar khat chhung vel chu chawllo lekin I ta ka ni char char thei tawh dawn thoa, zanin angah hi chuan mahni in lama riah ve te pawh a pawi miah lo asin le, ka chhungte hoin min ngai dawn lutuk’’  chhantea thung chu za lemlo tih hriat zet hian alo nui vei suk.

‘’ Ka bula I awm tam pauh leh ka thlakhlelhna che hi a zual ve zel sia lawm,’’ thawk lak hak pah in a bialnu sir lamah chuan a let thla zui tap a. Tetei pawh a lo thaw ve ham ham mai. 

Olivera leh Mapuia te thung hi chu ngaihzawng nei ve lo tihtakah, a tuk lama an kalna tur atana an thil mamawh tur ni a an hriat thil chi hrang hrang te khung felin an buai dun ve hle a, an inkeng duham phian mai bawk.

‘’ Oliver Bawiha, naktuk chuan khawilamah maw han chhuah thawven intum a’’ a room kawngkaa ding chung hian a nu chuan a rawn be thut mai a, a phu deuh zawk thei. Mahse, a nu hmel en thei tura insiamrem vat vat chung hian,

‘’ A,, Buarzo khaw piah deuh ah sawn Resort an siam thar a, kan va kal ve chhin dawn emaw ni kamn ti deuh. A nuam khawp ang ka nu,’’  tih pahin a nu chu a nuih zui deuh vur vur a.

‘' Chuti a nih chuan iu Hlupuii te ho nen pawh khan inva inhmu thei ang chu. An kalna kha a rei ve leh deuh tawh a, rawn haw leh a hun tawh riau a ni. I patea te pawh an ngaih a that viau tawh loh kha aw,’’ 

‘’ A,, ka nu chu, UHlupuii te ho chu thla khat chuang thangbo tum sa hrim hrima kal kha an nia, thla chanve em pawh an la thangbo hleinem le, inhmanhmawh lutuk mah mah thin a nih hi’’  lo ti let zung zungin a racksack ken turah chuan eng engemaw a vawm lut nghal pawp pawp bawk a, a nu pawh chu a ngaihsak chhunzawm leh tawh chuang hek lo bawk. 

‘’ Nu, ka kal a nia. Bye phawts u,’’ a bag lian zet ah that mawlh mawlh pahin Mapuia chuan a motor chahbi a ban zui zat a. A nu pawhin choka lam atang chuan fimkhur tura chahin a rawn au zui ve leh lauh lauh bawk. Mahse, chhang let tawh lemlo in motor a tinung vut vut a, chak mangkheng hian a tlanchhuak zui nghal puat . 

Innghahkhawmna hmun tur an tih lamah chuan a thiante pali pawh kha an lo kim ve thap tawh a, an thawmhnaw ken ang ang te motor hnunglama an vawm luh fel meuh chuan an sawina hmun pan turin an chhuak zui ta. Ring angreng fe hian car tape ah chuan hla an play a, an zai pui a, an khek vak vak a, an in au leh lung lung thin hlawm bawk. 

Beer can kheuh hawn sar sar pah hian Chhantea chuan, 

‘’ A hmunah chuan ka che na viau ang chu,’’ ti chunga nui vur vur in a bula thu a bialnu biang chu a han chuk sak leh zeuh thin a. chutihrualin an sira thu ve reng Mercy kha chuan uluk leh chik em em hian a phone alo kheuh ve neuh neuh reng thung a. A bialpa nen an inbiak lai hi chuan tihbuai thiang a ni lo thin reng a ni. A hrawk let hrep duh zel!

Chawhnu hun a rawn inherchhuah leh meuh chuan an nguai țan tawh angreng hle a, khawlum leh ni sa vel vawl bawk nen, tutemah chuan hla pawh an ngaithla tha peih meuh tawh lo. Driver tih loh chuan tukverh lam hawiin pawnlam an thlir deuh fur tawh a, a khat mawi tawka Mapuia’n ,

‘’ Kan thleng tep’’ a rawn ti leh thin tih chauh lo chu an motor tlan thawm bak thawm dang hriattur remg reng a awm tawh lova. Mutchhuahna hri a leng emaw tih mai tur hian an muthlu leh ngawih ngawih thin bawk.

‘’ Kan thleng e, tho r’u kan thleng!’’ tia au vak vak thawmah chuan rawn harh zui sap sapin an mit an nuai chat chat hlawm a, an ham pah leh bui bui thin bawk.

Resort an thlen lai hian khua a thim deuh chhulh tawh bawk nen, a chhunglam pawh chu light an on eng sep sep tawh mai a, a lian in a nawm hmel angreng hle a ni. Resort staff hoin an thuamhnaw neih ang ang te an lo lakchhuah sak zung zung lai chuan anni ho chu a hmunhma vel thlir kualin an la hawi duh angreng phian hlawm a, chutah, Chhantea pek chuan,

‘’ Hetiang khawpa Resort changtlung leh nuam hi Mizoramah an siam ve thei ang tih rin ngaihna reng reng ka lo hre ngai lova, ropui tak a ni!’’ ti deuh supin a han thaw zui leh ang halh halh thin a. Ropui chu a tih hmel hluah hluah bik khawp mai.

‘’ Staff ho hian min en hrek hrek reng mai a nuam miah lo,’’ Tetei’n a beng bula a rawn hrilh ruk sar sar na pawh chu ngai pawimawh mang lo in a nui vel mai mai a, chutah, ring angreng fe hian,

‘’ I chhelo ve em a ni ka duatlai,’’ ti lung lungin Resort chhung taktakah chuan an lut dawn ta. 

Gate ang deuh hleka siam thing ban pahnih nei hi lo awm in, a chung sangah chuan thingphek hmanga siam tho signboard ve deuh reuh hi a lo intar leh bawk a. An thlir chho thap.

‘’ JERIKOH RESORT’ tih fiah taka lo intar kalh mai chu hmui phun chunga chhiar zui sap sapin an in enkual leh he haw hlawm phawt a, an nui zui hak.

‘’ Chibai u le, chibai tha em em u!’’ tia rawn be thut tu an awm takah chuan an phu rual deuh dual mai a, an hmazawn en in an hawi sawn nghal vat bawk. Chutah, an hma lawkag chuan pa tereuhte, dulkiar ling leng leh chalkawlh ral mai pakhat hi anmahni en a nui vur vur chung hian alo ding reng tawh a ni tih chu an va hmu thut. An phu zui leh dual thei. Chutianga anmahni rawn be tu pawh chhan mai ngaihna hreloa an in enkual hu hu lai chuan chu pa bawk chu a rawn tawng chhuak hmasa ah țang leh in, ala nui var var reng tho.

‘’ Chibai u, helai hmun enkawltu sawmkima hi ka ni a, he hmun an din tirh ata kha kei lo chu enkawltu an la awm miah lo bawk. Chuan, kan resort nuam leh changkang em em mai tlawh tura inlo kal ve avang hian kei leh thawhpuite chu kan lawm takzet a, kan zavai aiawh in lawmthu ka sawi ni rawh se. Le, tun atan chuan inroom tur theuh ah lut tawh ula, han intifai hmasa phawt ta che u. nuam taka hun hmang turin ka duh che u tih kha hrereng r’u aw,’’ ti zung zungin a mit a rawn siai kher a, a kalsawn nghal daih.

Tichuan, mahni room turah theuh lut zui nghal dial in Tetei leh Chhantea te kha chu an thleng dun leh mai a, an room piah chiah ah hian Mercy a awm dawn bawk. Chu resort chhunga riahna room reng reng te chu an zau em em vek mai a, chhungkaw member tam vaklo tan phei chuan khawsak mai theihna tham hial a ni awm asin. A boruak nise a nuam in a thawveng halh mai a, a hmunhma a rem in a zau tha hle a, resort bial chhung ringawt pawh chu hmun zau pharh tha tak a nih tawh laiin a hual vel chuan ram ruak leh thing hmun hlir in a bawh khat vek bawk si. Boruak tha hlang chauh lo chu hip tur dang reng a vang ve viau awm asin.

Shower hnuaia rilru engthawl leh nuamti zeta zai ar ar paha alo inbual sar sar lai chuan a room kawngka chu rawn sawi dawt dawttu an awm ta tlat. Rang takin shower chu a off vat a, thawm ngaithla pahin a zai lai pawh chu a tawp zui hmak bawk. Mahse, eng thawm danglam mah a hriat chhunzawm leh tak siloh ah leh, a room bul chiaha Tetei te thian dun nui ar ar thawm a hriat chhunzawm tak si ah chuan thaw zui deuh huaiin shower bawk chu a on tha leh a, a inbual chhunzawm lehnghal.

A inbual zo, bathroom a chhuahsan rual in khum chunga a phone lo let deuh bal chu a han ban chhunzawm nghal zat a. zonunfela kha biak a tum tehreng nen, network awm lo a inti tlat mai nia! A down nghal vek thei. 

‘’ Hrep taka!’’ tih sup pahin phone chu khum chungah bawk a theh thla leh tawp a, a sam a chhem ro san ta daih. A hmai chei mawlh mawlh chunga darthlalang hmaa alo thut veng veng lai tak chuan kawngka kik thawm bawk kha a rawn awm leh ta. Phawk deuh hra chung hian kawngka lam chu a melh ngawt ngawt reng a, a hlauthawng titih tawh hial. Mahse, 

‘’ Room service. Zanriah a ei theih tawh e,’’ pawnlam atanga an rawn tih tak lauh lauh ah chuan a thaw chhuak deuh sawng sawng thei a. hmanhmawh zeta insiam zui leh zung zungin pawnlamah a teichhuak ve thei ta hram. A thiante ho thawm kha chu a reh deuh thap tawh avangin choka lamah an kal tawh pawh a ni maithei e. Um,, a rin ang ngeiin a thiante ho hmel chu choka chhungah a zu hmu leh ta vek a, dawhkan sei leh lian zet mai kil in zu no dawm chung hian an lo bengchheng tawh angreng hle. 

‘’ Mercy, hetah, ka bulah hian lo țhu rawh,’’ Mapuia’n a rawn hui tak zoh zoh ah chuan a thutna lam pan in a phei zui ve ta hlawk hlawk. Mapuia bula thut thlak sat pah chuan,

‘’ Khaw nge midang hi an awm vek a,’’ ti nghal sar sarin, Mapuia chuan a rawn thlek phei deuh haw mai.

‘’ Hei kan awm kim vek hi. Chuan, Pu Sawmkima sawn min rawn kilpui ve bawk a,’’ tih pah hian a piahlam chu ava melh zawk a. Resort enkawltupa Sawmkima khan a lo nuih ve vur vur bawk.

‘’ Ni lo, ka tih zawk tak chu, he hmunah hian keini thianho tih loh pawh hi midang tamtak an kal ve ngei a nga. Chu zawk chu mawle. A thuhrim in, ei tu tur kan tlem sia eitur lah chu ren lek lovin an chhawp nghek mai bawk sia’’ ti leh sar sar in dawhkan sei pet put chunga eitur thahnem tham fe inchhawp hnup mai chu a en kual chhin vel a, a awm a nuam thei der lo nia. Chutihlaiin, Mapuia lah chuan aw nem leh dam zet mai hian,

‘’ Tui deuh khan ei rawh. An chhawp phal mah nak chuan ei nghek mai tur. Ho lutuk’’ tih pah hian ar bawp niawm hem hmin niawm tak tlang lian zet mai chu a ban nghal zat a. Tui tih hmel deuh hian a ei zui buan buan a, Mercy lah chuan a chaw reng reng chu ei nachang pawh hrelo in a thiante ho khawsak dan mawlh chu a melh kual ralh ralh reng tawh a, nuam an tih hmel in, enghelh reng an neih hmel hlawm siloh. Anmahni ang chuan ti nge ani hi a awm ve theih miahloh. Helai hmunah hian nuamchen tur leh intihlim tura kal a ni ve tho bawk si. Eng aiah nge hlauhthawnna hlir mai hian a khah tlat bik reng mai le. Chutah, chaw pawh chu ei ta lo in a tho thut a, choka atanga tlanchhuak zuiin a thiante koh zuina pawh chu hrelo ang hmak hian a hmalam ah a pen deuh hmawk hmawk tawh a. An room pan mai tuma a kal lai chuan thawm a hre ta tlat. Chupawh thawm danglam em em ni hran lovin, music playa au thawm leh mihring hlim thawm ngei ala ni zui. Tichuan, an room lama kal ta lo in chu lam kawng zawh chuan a kal peng ta zawk a. 

E khaia! An thlenna room hnunglamah chuan intihhlimna hmun zau leh nuam fahran hi alo awm reng niin! A chhungah chuan mihring pawh an lo zi ve nuai nuai mai a. Thenkhat an lam su lawp lawp a, a then te erawh chuan zu no dawm pahin pool chhungah an ke te an chiah dai pah bawk. A then nise tui chhungah an lo liluh piap piap bawk a, an chikim hle a ni. Chung thil zozai a han hmuh ve tak si ah chuan tlemin Mercy hmel pawh chu hmuh a nuam leh ta deuh a, a nui sen sen. Mahse, tun atan chuan a chauh ve deuh avangin mut hahdam chiah a duh rih zawk tlat. Chutia let leh mai tuma a inher lai tak chuan a hnung lawkah a thiante ho kha lo ding khawm ve tawhin, amah chu hma lamah an nawr lut ta rawk rawk zawk a, nui uarh uarh reng chung hian,

‘’ Mut ala hun lo aw. Hetiang ti tur hian alawm mawle helai hmun kan pan ni. Rawn kal mai mai rawh’’ tih pahin an kai lut dawr dawr a. Tetei khan zu no chu lo pe nghal chat bawkin a kuah zui leh bawrh bawrh. Chutihlaiin, mipa ho ve thung kha chu an inphelh sek te te a, tui chhhungah an zuang lut nghal sap sap mai. Chutihrual chuan a kam vela hmeichhe thu ho kha an lo au dar dar reng bawk am Tetei leh Mercy pawh chuan nui rah rah chung hian an thiante chu an lo au fiam ve reng bawk.

‘’ HAW RAWH U! ‘’ ti tuarh thawmah chuan mercy mu tui lai chu a tho chhuak zawk thei. A han hawi kual ngial a, a bul velah chuan eng thil danglam mah hmuh tur a nei chuang silo. Thaw hlawp hlawp chung hian a khum atang chuan a chhuk thla zawt zawt a, kawngka ava hawng ta ringawt. Mahse, eng thilmah han hmuh zui tur chu a nei ta chuang lo thung a nih kha. Chutiang na na na chu tihtur dang vak nei heklo, kawngka kalh tha leh rawk rawk in khumah bawk chuan ava mu zui leh ringawt a. A awm erawh chu a nuam thei tawh lo reng reng. Tunhma in mangchhia takngial pawh hi a man awm a la hrengai lova, a nihna takah chuan mumang nei lova muthilh hi a ngah zawk mah awm e. mahse, zanina a mumang zet hi chuan a tihlauthawng em em a, a tan chuan thil thar hlak a ni e a tihtheih hial ang chu.

A room kawngka kik thawmah a mu tui lai bawk chu rawn harh chhuak leh zawkin, a meng deuh siar siar a, khua pawh chu a lo var ve leh uarh tawh mai. Kawngka pawnlam atang chuan thawktu pakhat aw hian tukthuan ei theih tawh thu a rawn hrilh takah chuan thaw zui deuh halh in a inlet leh thak a, mahse, a mutna bul lawka a thil va hmuh chuan a ti phu zuang tho zawk thei. A thil hmuh chu engdang nilo in a khum tlang lehlamah khan amah en reng chunga tu emaw mihring nge, thlarau a nih tih pawh a hriat loh thisen in a bual huh vek ni bawk si chu lo thu ve reng in, chiang em em hian alo en reng a nih kha. A mitvai mai mai nge tih hriat tuma a mit a han nuai chat chat hnu chuan kha thilmak pawh kha alo bo zui leh ta daih a. Thawpui thawh meuha thaw chhuak hawk in khum atang chuan a chhukthla leha, mahse, a hmazawn darhthlalang ah cbuan thil hmuh ava nei leh ta thung! Nichin lawka a thil hmuh zawh chiah kha a hnung lawka ding reng ang maiin a han hmu nawn leh ta a. a meng bial nghal kawk kawk a, a chesawn hleithei tawh heklo. Hnai leh chiang zeta inmelh dun vang vang in a tu ve ve mah chu an che sawn hauhlo a, Mercy zawk chu khur ru nasa tawh tak hi a ni ringawt.

‘’ Haw rawh u! ‘’ a hnunga ding, mihring nge thlarau tih pawh a hriat loh chuan rawn ti thum dut in, a aw atang chuan hmeichhe ngei tih erawh chu a hre thei thung.

‘’ Engvangin maw?’’ tia a chhan letna chu chu thil chuan thinrim aw khur hlawk hlawk chung hian, 

‘’ Helai hmun hi inngaih ang kha a ni lo. Haw rawh u!’’ ti leh tuar chung hian amah chu a thamral zui a, hmuh zui tur a awm ta lo. Hlauhthawn vanga thaw hlawp hlawp in  a han hawi kual vel ngial a, hmuh zui tur a awm map tawh lo. Eng thil chiah nge a chunga thleng te hi ni ta ang. A thiante ho khan an hmu in an hre ve thin a ngem? Chu chu eng pawh lo ni ta se, a thil sawi awmzia kha eng nge ni thei ang. Helai hmun hian that lohna eng nge a neih. A rilru a buai a, a mit sulh sulh thei a, a mang vek bawk. Kawngka rawn kik leh dawt dawt thawmah chuan a phu nawn zuk a, a thin a phu zaih zaih reng mai bawk. Kut khur dur dur chunga ava hawn sak erawh chuan pawnlamah Tetei kha mitmeng phelh phang chung hian alo ding ngawi reng tawh a, chutia a thiannu hmel a han hmuh tak thutah chuan thawveng awm tak hian a thaw zui deuh huai.

‘’ Tukthuan einaah I rawn lang ve silova, I tho chiah emni?’’ Tetei chuan lo tichhuak sap in, Mercy chu a meng kual ralh ralh phawt a, chhan mai dan tur pawh a hre lo angreng hle.

‘’ A,, ih, eng lo a nia’’ a tih niah niah laiin Tetei bawk khan a kekawr ipte atang chocolate pakhat hi a rawn phawrh zauh a, Mercy pek pah chuan,

‘’ Kha la rawh. Nizanah pawh engmah I ei tawh lo lehnghal a nia,’’ ti leh sap in mercy kutah chuan a hmehbel nghal nawk nawk a, a kalsawn leh daih. A kuta chocolate chu en vang vang in a khap deuh fak fak reng tawh a. a khat tawk hian a thaw leh halh halh thin bawk. 

Zawimuang in khum chungah chuan a thu thla riai riai a, a chocolate ken lai chu ei mai tumin a kheh pah mial mial bawk. Mahse, chutihlai tak chuan a room kawngka bawk chu a vawi engemawzat nan rawn insawi leh dawt dawt in, a hawi phawk nghal hrâ a, a phu zawk thei. Zawimuang leh hlauthawng ru tak chunga thawh chhuah leh pahin kawngka lam chu a pan phei ta dan dan a, a tiril khurh nasat tawh zia mawlh mai chu sawithiam hleihtheih chi pawh a ni tawh awm love. Mahse, kawngka rawn chum dawt dawt chunga an thian olivera aw ngei maiin,

‘’ Mercy, lo chhuak vat the. A pawimawh lutuk a nia’’ a rawn tih tak nghekah chuan thaw zui deuh hawk in, hmanhmawh angreng fe hian kawngka pawh chu ava hawng zui ta rawk rawk zawk a. An tihlauthawng tam tawh mange. Chutah, pawnlamah chuan thaw ham ham chung hian Olivera ngei mai chu alo ding reng tawh a, an inmelh chiang kek kawk hle. 

‘’ Oliver, eng thil nge thleng a?’’ zawi sapa a tih zawh rual chiah in Olivera pawh chuan hah hmel fe chung hian,

‘’ UHlupuii thiannu kan hmu a, UHlupuii awmna ah min hruai dawn. Ilo kal ve duh in ka ring deuh a,’’ a tih leh takah chuan Mercy chu pawnlamah a han tawlh chhuak zeuh a. midang awm leh awm loh te en kual chungin,

‘’ Khawnge an kal vek a?’’ a ti zui leh ngawt.

‘’ Pawnah min nghak vek tawh. Ilo kal dawn em?’’ Olivera bawkin  a rawn tih leh pawh chuan amah chu va en deuh hrek hrek in, peih loh hmel angreng fe chuan a lu chu a bu zui ve ta nghut nghut zawk a. Tichuan, room kawngka pawh chu khar tha zui tawh hran lo in an inzuichhuak nghal mai a. olivera sawi ang tak tak khan an thian dangte ho chu tualzawl zau lamah phur leh tha tho tih hriat angreng tak hian an lo ri dar dar reng tawh a. Anni pahnih rawn inzuichhuak hmel an hmuh ve tak si ah chuan Mapuia khan nui var var chung hian,

‘’ Kal nghal ila, min lo nghak rei tawh lutuk ang’’ rawn ti nghal in thudang pawh sawi tawh lo chuan resort hnung lam pan in an an liam zui ta diak a. mercy chuan thil awmzia hi hriat chian pakhatmah a neih ve loh avangin ala bangbo angreng hle mai a, a hawi kual ralh ralh reng bawk.

‘’ Mapui, tu nge min nghak mek tu chu. Thil awmzia te hi ka hrethiam ve miah lo’’ a tih nuah nuah laiin Olivera thung khan alo sawifiah ta zung zung a. 

‘’ Ka cousin Hlupuii thiannu kha kan hmu deuh thuta, chuan, an chanchin te zawt in ani chuan Uhlupuii awm mekna te min hrilh a tum a, min hruai turin min lo nghak mek a nih hi’’  mercy chuan ala hrethiam thei ta chuang hauh lo mai.

‘’ Hlupuii chuan awmna hranpa bik a nei tihna emni? Ka hrethiam thei lo’’ a tih leh niah niah laiin Chhantea kha a lo inrawlh ve ta thung a.

‘’ A,, keimahni ang hian riahna hmun bik an nei ve a ni ang chu’’ a rawn tih leh pawhin Mercy thluak chu ala buai pha tlat tho. A hrethiam lova, hlauhthawn rukna engemaw tak hi a nei tel reng tho bawk si. Helai hmun pawh hi nuam a ti tawh miah lo. Mahse, eng thu mah chu sawichhuah pawh a tum tawh lem lova, ngawi reng in an hnungah chuan a kal zui ve mawp mawp ringawt.

An la kal dawn chauh emaw tih laiin inhnuai pan thlakna tur niawm tak hmun biru zet leh thim rik rek ni si chu thleng zuiin, hnah hring zam pharh duai hnuaiah chuan hmeichhe cher sang zet pakhat hi anmahni lo en reng chung chuan a ding tih an va hmu thei a. mercy mawlh mai chu hlauhthawnna in a khat leh tawh. Mahse, a thiante hmelah khan hlauhthawnna emaw, mak tihna ang chi eng thilmah a lan tlat loh avangin chu nu ngei chu an mi hmuh tur leh anmahni lo nghak tu chu ni turah ngaiin , tlem chuan a awm pawh a nuam leh ta deuh.

‘’ Kan rei ilo ti em’’ olivera’n a tih sup laiin chu nu chuan an thianho chu uluk leh chik zet mai hian a rawn thlek kual leh te te phawt a, mak pawh an lo ti zawk viau. Mahse, hun rei pawh chulaia an din khawmuan hma chuan chu nu ngei mai chu a rawn tawng chhuak ve ta khauh a,

‘’ Rei ti love, min zui r’u’’  rawn ti sap in a inher zui a. 

Inhnuai panna thim rik rek leh kawng tereuhte ni bawkah chuan hawi hu hu chung hian an lut thla ve ta zel a, hawi kual nasa hlawm tak hi an ni awm e. mapuia chuan a hma chiaha kal nula chu va umzui dat dat chung hian,

‘’ Thiannu, kan kalna hi eng hmun nge ni reng reng a? A lan dan chuan room rauhsan tawh niawm zawk te pawh a nih hi le’’ zawt pah deuh reuh a a han tih chuan chu nu pawh chu Mapuia lam hawiin a rawn thle phei zawk a, chiang zet hian a melh kar mai bawk. A mitmeng chu a rum in, amah lah kha a sang nasa mai si a, hrechiang lemlo tan chuan a rapawm thei lek lek ang chu. Mahse, zaidam tak mai hian,

‘’ Aw, a zavai hian an rauhsan tawh a, mahse, keini thianho bik kha chuan helaia riah hi kan duh tlat avangin leh, midang chim buai theiha awm kha kan peih ve loh avangin a man tlawm zawkin min awm tir thei hram a ni e’’ a hmel en aiin  a tawngkam chhuak chu a ngaihthlak a hahdam phian zel a, hlauhthawnna hranpa pawh an nei chuang bawk hek lo a nih hmel. 

Tichuan, ngawi renga kal zelin, a tawpah chuan kawngkhar uk leh lian fahran awmna hmun chu an va thleng ta a. An ding zui thap. Eng nge thleng dawn tih ngaichang niawm fahrana an lo hawi kual hrek hrek laiin anmahni hruaitu nula bawk khan anni ho chu uluk leh chik em em hian a rawn en kual leh ta den den phawt a. A nui ta sak.

‘’ Kawngkhar hi hawng ula a chhungah Hlupuii chu alo awm mai ang’’’ zawitea rawn ti lehin kal mai a han tum ngawt a, Mapuia khan a lo dang bet chawt.

‘’ ilo lut ve dawn lo emni?’’ ngawi renga ding in Mapuia chu a melh ta vang vang mai a, a chesawn eih lo nia. Hun reilote chhung chutianga a awm hnu chuan rawn tawng chhuak ve leh hram in, a nui deuh var var reng lehnghal.

‘’ lut lovang. Intihhlimna lamah thiante hovin min nghak reng a’’  rawn ti leh maiin an kal tawhna lamah bawk chuan hmanhmawh lo angreng tak hian a let leh ta vang vang a. An thlir zui thap mai. Mapuia hrilhhai tihngaihna hre silo chuan la en zui vang vang  paha mitko san ak pah hian,

‘’ Dangdai ve!’’ a ti zui sup a. kawngka chu pawh hawn  a tum nghal bawk. Chutah,

‘’ Lawkin!’’ rawn ti țhat thawmah chuan ani pawhin a thiltih tum chu a han chawl lailawk leh phawt a, aw lo chhuahna an hnunglam en chuan an hawi nghal thap. Khatia rawn au chhuak hlut tu kha tudangmah nilovin Mercy ngei a lo ni a, makti fe hian amah chu an en reng ringawt tawh. 

‘’ Mercy, eng thil nge ni ta?’’ Tetei’n amah en kar chunga a rawn tih sar sar lai chuan Mercy chu inthiamloh hmel angreng tak hian alo menh kual hrak hrak phawt a, hlauhthawnna hlir hian a kjat ru reng mai bawk si.

‘’ Oliver, I unaunu chu hetah hian a awm dawn tih I chiang a maw? Call hmasa phawt la ka duh hle mai. Ih,, kei chu ka ngaih hi a tha thei tawh miah lo a nia’’  ti sawk sawkin a thiante ho chu phawk deuh hra chung hian a melh kual ralh ralh tawh a. An ni pawhin Mercy chu maktih hmel fe hian an lo la en let reng hlawm.

‘’ Nia, Oliver, han call chhin tak the a’’ Mapuia’n a rawn tih ve takah chuan Hlupuii chu call hmasa phawt turin an rawn ti zui ve ta sap sap a. olivera pawh a harhchhuak zawk a ni ngei ang chu. Lu buk nghut nghut pahin a kekawr ipte te chu a han dap kual nghal ta zung zung a, mahse,

‘’ Roomah ka phone ka dah daih. Phone inkeng thla hlawm em’’ ti hul hakin midang ho chu an lo thaw deuh halh thin a. 

‘’ ka keng thla lo, a battery low tawh a’’ tih leh,

‘’ Signal ka nei lo’’ lo ti nak nak hlawmin a beidawnthlak thin kher.

‘’ A,,, Mercy, hlauthawng suh. A thiannu ber pawhin engkim a sawi chian vek tawh kha. A hmunhma vel hian a tihlau mai mai che a nih kha, lut ang u’’ tih leh zung zung pahin Olivera chuan Mapuia chu a kalpel fuaa, kawngkhar chu a hawng zui ta țial țial bawk. Kawngkhar hlui leh chhah angreng tak a ni a, a inhawng thawm pawh chu duh aiin a bengchheng reuh phian. 

Zawimuangin Mapuia leh Olivera te chu an pen lut hmasa ta ber a, an hnungah Tetei leh Chhantea te khan rawn zui ve nghal zat in, Mercy erawh chu ralmuang lo ru zet hian kawngka bul lawkah chuan a thep kual a thep kual a, a lut hreh ngawih ngawih.

Hlupuii thiannu khan chu pindan chu luah man tlawm zawk chawia an luah thu kha sawi ve tho mahsela rauhsan tawh leh, hun rei tak tlawh pawh tawh loh pindan ruak a ang zawk mah! Maimawm ril a zam kual nuai a, a hnawkin thil chhe dah khawmna hmun niawm zawk tak a ni. 

A  tawp a tawpah chuan Mercy pawh kha ți dui chung hian a lut ve ta nge nge a, room chhung awm dan vel a han hmuh rual erawh chuan ngaihthat lohna hlir hian a khat zui nghal thei. 

‘’ Oliver, khawiah nge Hlupuii chu ‘’ kilkhat atanga Chhantea’n a rawn tih tak lung lung ah chuan midang ho pawh chu an rawn hawi chhuak ve ta sap sap hlawm a. olivera chu an en nghal thap.

Olivera hmelah chuan ngaihthat lohna leh awm nawm lohna a hmuh theih ve tawha, a hawi buai angreng hle bawk.

‘’ Thiante u, eng thilmag hriat ka nei biklo tih chu inhriat ve vek tho kha aw. Mahse, a thiannu sawi dan ah kha chuan helai hmun hi a ni ngei a, min hruai thleng thlap tho chu a ni bawk si a’’ rawn ti deuh hû in, kilkhata lo ding ve reng Mapui chu a lo chek tlak tlak reng tawh a, an inmelh kual leh relh relh thin bawk.

‘’ Hlupuii thiannu kha I hrechiang meuh em? A thiannu ngei tih chu I chiang reng reng maw?’’ Mercy chuan a rawn ti ve leh ta khauh a. A  thian dangte ho pawh chuan an lo tuihnih ve leh tliar tliar. 

‘’ Aw, hria e. Nunmawii a nih kha. UHlupuii thian dangte ang chuan ka nel ve viau lo na a, kan inbe zauh zauh tho’’ Olivera chuan rawn ti lehin, amah vek chuan,

‘’ Hawh u, room hi a hnawkin a zau si a, a bungrua emaw, engemaw tal I zawng the ang u. A dik thei lo’’  a tih leh lai mek chuan pindan kilkhat atang hian Tetei kha a rawn au chhuak ta țhat țhat mai a. an tlan khawm nghal vat. Tetei lo dinna pindan kilkhawr leh hnawk zet mai an va thlen phei ve nak chuan khur zawih zawih chung hian ani chu a hmalam melh reng chungin a lo ding ngawi reng a. mak an ti nasa.

‘’ Eng thil nge I hmuh a’’  zawhna zawh paha an hmalam an han en nak  chuan chair tlabal zet chunga mihring thu zawi ngiai mai leh, a taksa phuarbeh saka a kâ hnawh phui vek ni bawk si chu an va hmu ta thut mai a! An au zui țhat țhat thei hial. Bangbo zeta an inmelh kual ralh ralh hnu reivakloah Olivera bawk khan hlauthawng awrawl tih hriat fe mai hian,

‘’ UHlupui!’’ a rawn tichhuak ruai ruai a, a lam pan chuan a tlan phei nghal vat bawk. A thiante ho chu lo phu zui dualin han buaipui vak dan pawh an hre lo angreng hle a, an hawi an hawi ringawt.

‘’ Min rawn pui vat ta che u. kan chhuah vat a ngai a nia’’ rawn ti tuar tuar in Olivera chu a mangang tawh kher. Chuveleh, anni ho pawh chuan Hlupuii phuarna hrui hnawk nuai mai phelh tur chuan an pui zui nghal ta sap sap hlawm a. chutihlaiin Tetei thung kha chu hlauhthawn luatah a chesawn hleithei tawh der lova, khur der der chung hian kilkhatah tap zawih zawih chungin a lo ding tlawn ve reng ringawt. A ka hnawhna leh phuarna te an hlihsak mawlh mawlh pah chuan Hlupuii chu tih harh tum hian an ko pah reng bawk a. A khat tawkin a rawn rum ve leh hlat hlat thin thung. A phuarna zawng zawng an phelhsak kim hnu chuan kal pui an han tum ngawt a, ani taksa chau leh zawi vek tawh nen chuan alo chesawn  hleithei ta awzawng lo mai chu niin. A sak tlat. Mipa pathumin theihtawp chhuaha an han beih ngial hnuah erawh chuan thawhchhuahpui theiin kawngkharpui lam chu an pan pui ta zung zung a. mahse, an thleng phei tep tih ah kha kawngkhar rit leh hlai zet mai kha na em em hian pawnlam atang chuan a rawn inkhar ta hmak mai a nih chu! Hnugtawlh dawrhin Hlupuii leh amah chelh bettu mipa pahnih te chu chhuat charah chuan an thal zui ta reng mai a, Hlupuii pawh a rawn rum chhuak deuh hawk thei. Rang fahran hian Tetei leh Mercy te chuan kawngka chu nam hawn tumin an han bei zui ve ngial a, an hlawhchham țhak thung. Tichuan, Hlupuii chu pakhatin lo dawm bet ran in a bak zawng kha chuan kawngka chu nam hawn tum hian an han bei leh ta fat fat mai a, mahse, an thei lo. A theih loh hulhual hi a nimai. Chutia kawngkharpui lama an lo buai nak nak lai chuan Hlupuii kha ring lemlo angreng tak hian a rawn tawng chhuak ta a. An en zui nghal thap bawk.

‘’ Thang a nih kha! Helai hmun hi inchhuahsan thei lovang!,’’ zawi em ema a rawn tih chuan amah chu maktih hmel leh uluk zetin an en zui nghal thap hlawm. Thil awmzia engkim mai hi an hrethiam thei thlawt tawh lo a ni. Chutihlaiin Tetei hlauthawng thlabar lah kha a khat tawk hian alo insut ri leh hraih hraih thin bawk a, awm a tinuam lo zo vek.

‘' Hlupui, I thilsawi kha a aia chiang zawkin han sawifiah leh hlek the. Eng thang nge ni sawi chu?’’ Mapuia’n a rawn tih leh sar sar laiin Hlupuii chu anmahni an melh tur hian thei leh thie lo in a rawn dak chhuak ve ta țawk țawk a. mitmeng chau leh da vâ riai mai hian an hmel te chu a rawn en kual leh ren rawn phawt.

‘' Helai hmun chhuahsan tur chuan nunna thapa inbeih a ngai! A theih loh’’ ti leh nghut in Olivera a rawn inrawlh ta vat bawk.

‘’ Mahse, I thiannu khan helai hmunah hian min rawn hruai thleng a, hetah hian inkhawsak thu pawh a sawi vek asin. Engtin nge hetiang hian ila awm theih bik a?’’ aw țial ruai chunga a rawn tih leh chuan Hlupuii chu a rawn meng chhuak ve leh hram hram a. olivera pawh chu thei leh theilo hian a han melh chho leh hram hram. Chutah, anmahni en reng paha rawn kiai sak chung hian,

‘’ Tu ka thiannu maw!? Thian ka nei reng reng hleinem’’ a rawn tih chuan an che deuh hrut thei.

‘’ Nunmawii kha I hre tawh lo maw!? Kan inah pawh I rawn hruai ve fo tawh kha’’ 

‘’ A thi tawh!’’ Hlupuii chhanna zet chuan an zavai maiin a țhawngna takzet a, an phu zui dual a ni ber e.

‘’ Engtin maw?’’ ring fahran a Tetei’n a rawn tih leh takah chuan Hlupuii pawhin a hma ai maha ring leh vin zawk hian alo chhang let ve ta thung a.

‘’ A thi tawh. In hrethiam em? Helai hmun atang hian mikhual damchhuak an awm tawh ngai lo! Inhria em? He resort hi an hawnna pawh ala rei viau lova, keini thianho tih loh, kan  hma chiah ah khan mikhual tlem azawng chu an lo awm sa ve nial nual a, mahse, kan thlen hnu reivakloah khan an haw lai hriattur awm miah lo hian an bo diak ringawt! Mahse, ngaihthat lohna chang em em pawh kan hre zui ta lem chuang lova, kan awm ve mawp mawp. He hmun hian hre tu ala ngah lem loh avangin kan thlen hnu pawh khan chhungkaw pahnih khat tih loh chu nangni bak hi in rawn thleng thar leh awm pawn ka hre ve tawh lo kei chuan’’ rawn ti lehin, anni thian ho chu an hawi he hu tawh mai. Engtin nge heng hi a nih theih zawk le. A hma zan lawkah pawh mihring khati zat kha nungdam ngeiin an lo hmu tawh a ni si a, engtin nge hetiang hi a nih theih zawk. An lo tihder mai mai lek te hi a ni hial zawk lo maw.

‘’ Hlupui, he room-ah hian tu in nge dah reng reng che a. Eng thil chiah nge in chungah hian thleng han sawila,’’ Mercy chuan fiah fai taka rawn ti ve in, Hlupuii pawh a lo bu ve nghat nghat mai.

‘’ Helai kan thlen zan kha chuan eng buaina mah kan nei lo. Mahse, a tuk zanah zanriah ei turin choka lam kan pan khwm sap sap a, chutah chuan thilmak leh rapthlak chu kan tawng chho ta mawlh mawlh mai a ni. Kan zanriahei turah khan mihring kut țang pakhat leh mihring beng ngei mai chu ka hmuh thut avangin ka țe chhuak ta chiam a, ka thiante pawh chuan an hma dawhkan chunga thleng chhungah chuan mihring tisa them eng engemaw an hmuh chhunzawm ve tak zel avangin tlanchhuah san kan tum nghal a, mahse, tuna kan thil tawn mek ang chiah hian kalh khum vek kan ni ta si a, chhuahna tur chhetemah a awm hek lo. Chhuahna tur zawnga ka thiante ho an phet buai chung laiin kei chu hlauh luatah dawhkan hnuaiah harsa zet hian ka lo biru hman hlauh a, ka him phah ta a ni’’

‘’ I thiante chu engtia thi vek thei nge an nih a. nang lah I damchhuak daih bawk si’’ Chhantea khan rawn ti ve leh thungin Hlupuii chu a lo ner deuh sawk tawh. 

‘’ An kap hlum vek! Ka hrebik lo, khawi atang nge an rawn kah kha ka hre miah lo. Ka beng ka hup țawk țawk a, ka mit nise ka chhing tlat bawk si nen,’’ a tih leh chuan an ni ho chu hlauthawng zet hian an hawi kual nghal ruai ruai mai a. Room chhung chu a phui tha in chutianga silai rawn rawlh luhna mai tur chi awm in a lang tlat lo. Mahse, chu chuan helai pindan atang hian him dam takin a chhuahtir vek thei ang tih erawh a kawk hauh chuang lo.

‘’ chuan, engtin nge choka chu I tlanchhuahsan theih tak a’’  Olivera khan rawn ti ve leh zatin, Hlupuii pawh chuan hnuailam chu a bih ran ran reng tawh a. An thianho thil tawn zozaite kha a ngaihtuah kir ve tih chu a hmelah a hriat theih mai. A mittui nise a tling piau reng mai bawk si.

‘’ Thawm a reh fel vek hnuah kawngka kha amahin a rawn inhawng leh ringawt a. Hlau hle mah ila tlanchhuah ka ngai tlat si, tichuan, ramhnuai lamah khan tlanchhe zelin min umzui nghal tih pawh ka hria. Ka hlauh lutuk na lamah ka tlan hleithei lova, min rawn nangching ta vat reng a, chuan helai hmunah hian chhanchhaktu ka hmuh hun nghakin khungbeh ka lo ni ta a nih hi ‘’ a sawi zawh leh meuh chuan midangho chu thawpik tih hriat zet hian an lo thaw leh halh halh thin a, lung a zing duh map map viau ang le. Kawngkharpui tih loh kha chu chhuah theihna tur hmun dang reng reng a awm eih lova, hmanrua nise han hman mai tur hriamhrei pawh hmuh tur a awm chuang hek lo. A hnawk vel em em ringawt mai a ni.

‘’ Tih dan tur kan zawn vat a ngai. Helai hmuna awm reng tur hi kan ni lo. Ti r’u, chhuah dan tur ngaihtuah hlawm the ang u. Bang te hi a tihchhiat theih maithei asin,’’ ti leh zung zungin Mapuia chu kalsawn nghal daih a. midang ho pawh chu an kal darh ve ta sap sap. Chutihlaiin, Hlupuii erawh kha chu a taksa ala chak tawk loh em avangin a thutna hmun ngaiah khan zawi em em mai hian alo la thu ve ngawih ngawih reng a. A nau te ho che vel chu peih leh peih lo hian alo thlir kual ve hram hram a ni ber mai. Chutia, mahni tawka buai em em a an lo phar kual sang sang lai chuan thil ri deuh rawk thawm hi hria in, Chhantea au țhat ri pawh chu an hre chhunzawm leh ta nghal a, an hawi phawk nasa lehpek hle. 

Mercy pawhin a thil tih lai chawl meuh in a thiante ho kal khawmna lam pan chuan a tlan ve nghal sawk swk a, an awmna hmun ava thlen phei ve nak chuan Tetei khan lungchhe vankai hian a chhuat chara tlusawp reng a bialpa chu a lo kuah bet tlat a, a tap hawm hawm reng bawk. Chutihlaiin midangho chuan ngawi reng hian an lo thlir reng ringawt a, Mercy thung chuan a  thiannu chu hnem tumin a zu kuah ve nghal vat thung. Chhuat hnawk leh bal zet chungah chuan Chhantea kha a thin hnuna thal mu bur vu vu chung hian thisen nen alo mu kawi nuai mai a, Mercy cbuan a rap takzet. Melh pawh a melh tha ngam hek lo.

‘’ He thil hi khawi atanga rawn kah chhuah nge  a nih ang’’ tia a thiante ho  a zawh kual lai tak chuan an chunglam atang hian thil engemaw rawn tla ri fur fur thawm an hre leh ta mai a, chutihlai chuan Hlupuii kha mangang tih hriat zet hian alo au chhuak deuh hluai bawk. Mahse, Mapuia bula ding Olivera chu na taka rawn deng thlu zui nghal tawp in, an darh deuh hak thei. Chutah, Mercy chuan Tetei duh lo chung banah chuan kaih sak lawp pah hian tlanchhiatpui a tum nghal vat a. mapuia pawhin chhuatlaia lo la thu reng Hlupuii kha va kaitho zui ve leh sawk sawkin kawngka lam bawk chu an han pan hmasa leh te te phawt a, mahse, a hma ang tho khan ala hawn theih tlat loh. Rilru hah tih hriat zeta thawk halh pah hian Mapuia bawk chu a han hawi leh ta zung zung a, chutah, Mercy zawk chuan pindan kil thim leh chep zeta toilet lo awm chu kawh va va pah hian,

‘’ Tah sawn. Saw tah sawn biru ang u’’ tih pah hian Tetei chu a kai phei nghal dawr dawr mai a, Mapuia pawhin hmun him dang zawk hre chuang hek lo le, Hlupuii kuah bet chung chuan Mercy thu chu awih in a kawhna lamah chuan an inzui phei ta diah diah a ni. Hlupuii hian tlanchhiat tuma ramhnuai lam a pan lai khan a ke ah hliam na angreng tak alo tawh tawh avangin a țhen leh chak chak thin a, tihngaihna dang lah chu a awm chuang der bawk silo.

Tichuan, chu pindan zau tak chhunga toilet hlui leh chep zet chhungah chuan inhnawhkhawm nghal rawk rawkin rem leh rem lo hian an tawm zui ta kar hlawm a. Tetei phei kha chu a lungchhiat ala reh fel bawk silo nen, a insut ri leh hraih hraih thin. European commode chunga thut fel at pah hian mapuia chuan zawi angreng takin,

‘’ Kan fimkhur hle a ngai dawn a nih hi. Min enthla tu an awm vek a nih hmel a, engtin nge. Khawi atang nge tih chu ka hre chuang lo’’ ti sar sar in a thianteho chu a han en kual te te hlawma, an hmelah chuan hlauhthawnna nasa tak a hmuh theih avangin a rilru pawh an tihah takzet zet a ni.

Chulai hmun chep leh nuam lo fahran chhunga darkar chanve dawn an tawm tlawk tlawk hnu chuan Marcy kha rawn ding chhuak hluaiin, room chhung te chu a han bih kual leh rih thin a, a awm dan tehthut chu a thiante ho khan hrethiam lo tih hriat takin an lo melh deuh hrak hrak reng mai bawk.

‘’ Mercy, lo thu rawh. An hmu fuh palh hlauh ang che’’ Tetei khan zawi ser sawr taka a rawn tih laiin Mercy thung chuan hrelo ang hmakin alo awm khum thung a.

‘’ Mapui, thawm a reh vang vang bawk sia, kan va thlithlai kual chhin dawn emni?’’ tiin mapuia zawk chu ava be ta daih. Chuveleh, Hlupuii kha phawk hra chung hian a rawn hawi chhuak ve ta vut a, Mercy leh Mapuia te chu uluk fe hian a rawn melh ta vang vang mai. 

‘’ A țullo. Hmun tinah hian mit lawng maia hmuh theih loh camera an kam vek tih hre ta che u. He room chhung hi thang vek a nih hi hre ta che u. chuvang chuan kan tawmna hmun tih loh hi chu hmun him dang pakhatmah a awm lo a nia’’ a rawn tih ve takah chuan a hma aia nasa mahin Tetei khan a lo hlau zual tawh zawk a, tap ring tha ngam silo hiaj a insut leh hlarh hlarh thin mai. Chutihlaiin,mirhing luhlul lutuk tihtakah Mercy leh Mapuia te thung chuan Hlupuii thilsawi pakhatmah kha an beng kawrawngah an thun chhin eih lova, toilet chu chhuahsan in pindan lamah bawk chuan an lut leh ta tho. Thawmdim takin an pen phei zel a, an hawi kual leh zak zak thin. Mahse, thawm dangdai emaw, anmahni ti na thei tur thil reng reng hmu a an hriat zui tak siloh avang chuan chak deuh hlek hian kawngkharpui awmna lamah chuan an duk phei ta par par zawk a, an thleng ve mai. Reilote chhung chu thawkna hun han nei hmasa leh te te in , chumi hnuah chuan mak tak maiin kawngka chu a rawn inhawng chik ta țuah țuah mai a, an hamhaih lutukna lamah an inmelh zui deuh vang vang phawt. Mahse, pangngai taka awm zui leh thuaiin Mercy zawk chuan,

‘’ Kan thiante kha kan hruai vat loh chuan’’  ti zung zungin an thiante awmna lamah bawk chuan an tlan let lehnghal a. chulai hmun atang chuan harsa tak hian an inhruaichhuak thei ta hram a ni. Thawm dim takin pawnlamah an pen chhuak zal zal a, an hawi kual zak zak reng bawk. Tichuan, a ngaihthat thlak nia an hriat hnuah zawimuang leh thawmdim tak bawk chuan an inchhawm chho leh ta bek bek a, mahse, thui pawh an la kal hman lovang tihturah hian khawi atanga lo chhuak nge tih pawh hriat loh in thal mu pakhat chuan Mapuia nghawngah tak chuan a rawn chhun tlang ta zawk mai le! A ke pen lai tawp chawt in hmalamah a eu awrh a, a meng pual nghal vek thei bawk. Mercy pawhin thawm a hirat ve takah chuan ding zui chawt in hnunglam ava hawi a, țe that that chung hian Mapuia awmna lamah chuan a tlanphei ve ta nghal. Chutihlai chuan Hlupuii khan lo au zui ve lawm lawm mahse Mercy erawh rilruah erawh chuan Mapuia bak a awm thei tawh lo. 

Taksa khur chur chur chunga chhuat chara mu hlawm reng mapuia taksa chu va pawm deuh nawk nawkin Mercy chu a tap par tawh a. A phal thei thlawt lo a ni e. A hminga ko pah reng chung chuan a nghwnga thil tlang tu thal mu te chu kut khur zaih zaih in a han khawih chhin vel a, ring taka auvin a tap zui ta ruah ruah mai le! Chutianga a khawsa lai lo thlir reng tu Hlupuii leh Tetei pawh chuan an mittui chu dang zo lo in an lo inhru pah leh fap fap thin a. An lainat takzet. An thian kawmngeih leh an hmangaih em em ten an mit hmuh lai renga rapthlak tak taka an han thihsan tawp tawp mai chu tawrh thiam a harsa ve khawp ang le.

‘’ Mercy, a tawk tawh e. kan kal a hun tawh a nia’’ zaidam taka rawn ti tu Hlupuii hmel chu mittui tla par chunga han thlek chho chung hian a khap deuh fak fak reng a, Mapuia ruang mawlh mai chu a zu en leh thin. Kalsan tawp mai chu a hreh ngawih ngawih a ni ber e. mahse, tunah hian dinhmun derthawng leh khirh takah an awm mek a ni si a, helai hmuna chambang thei hi an ni ve lo tlat. Dam ve te an la duh a nih si chuan.

Tichuan, inhnuai thim leh thawpik zet mai chu himdam taka chhuahsan fel theiin resort kawt zawl zau takah khan an chuang chhuak leh ta hlawl mai a. Alo reh duk mai. Mihring hmel hmuh tur pakhatmah a awm lova, a reh hian a reh tlawk tlawk reng zawk. Mercy bawk chuan hah thaw hlawp hlawp chung hian,

‘’ Room lamah khian kan kal thei a ngem? Tanpuitu tur kan call a ngai a ni’’  rawn tichhuak leh halh in Hlupuii leh Tetei chu an lo bu zeuh zeuh reng a. Tichuan, fimkhur takin an riahna room pan tur chuan an inchhawm leh ta bek bek a. Hetah hian Hlupuii khan hliam a tawrh tawh miau avangin dawm beh tlat a ngai reng si a, kal vel pawh a sawt loh phah thin khawp mai. Mahse, tibuaitu nei lo na na na chu room-ah pawh chuan lut zui ve thei maiin, kawngka an kalh fel nghal hmak a, Hlupuii leh Tetei kha chu chau tih hriat tak hian khum an let thla nghal tawp mai bawk. An luhna room hi Mercy riahna bik kha a nih ang in ani chuan a phone a zawng nghal zung zung a, harsa lo takin a lukham hnuaiah a hmu nghal mai bawk. A hmasa ber atan a bialpa Zonunfela kha call hmasa te te in, hlauthawng aw khur hlak hlak chung hian tanpuitu rawn thawnsak tur chuan a han hrilh ta zung zung mai a, Zonunfela thung chuan a ngaihna a lo hriat loh hmel kher. Mahse, a bialnu chu a fiamthu mai mai lo a ni tih a hriatchian hnuah erawh chuan a rang thei ang bera police rawn tirh a tum thu te chu a sawi ve ta nge nge a. Ngaihtha famkim lo angreng tak chung hian Mercy pawh a thaw ve ta siai siai mai. 

‘’ Mercy, motor I khalh thiam em? Kan car awmnaah khan kan kal theih chuan haw nan kan hmang thei ang’’ Tetei chuan meng phelh phang chung hian Mercy chu a rawn melh kar mai a. mercy pawh a lo harhchhuak zawk thei. Helai pan nana an hman motor ngei mai kha resort pawnlamah an dah ringawt a, chahbi a awm tho chuan khalh theih loh nachhan tur awmin a hre tlat lo. 

‘’ Car chu keipawhin ka khalh thei tho asin. Khalh tur a awm phawt chuan ‘’ Hlupuii’n a rawn tih ve leh takah chuan Tetei chu alo thaw deuh huai. Mahse, he room chhuahsana an motor dahna lam va pan tur pawhin thil buaithlak tak chu ala awm thei tho. Misual tualthah hmang te kha khawiah nge an khawsak ve ang an hre tlat lova, tunah pawh hian an lo hmu ru reng thei tawh tlat a ni. A hriat miah loh.

‘’ Khua hi thim se chhuah dan tur kan ngaihtuah tha dawn a nia,’’ Mercy’n a tih ve takah chuan Hlupuiite pahnih pawh chu khum chungah bawk an let thla zui leh tap a, chau tak hian an thaw pah hle hle mai.

Tetei riltam pum ri leh rawk rawk thin chu Hlupuii nuih tiza tawk alo tling em em maia, inmelh zawk chung hian a khat tawkin an nui dun leh kar kar thin. Chutihlaiin mercy kha chuan thil hriatchhuah a neih belh leh ta. A khum hnuai bih duk duk pah hian thil engemaw hi a ban zui ta zauh a. chutah, chocolate pakhat chu rawn lek chhuah va va pahin Tetei bulah ava thu thla nghal hnawk.

‘’ Kha, tukin zinga min pek kha ka la ei miah lo. Ei daih rawh u,’’ tiin Tetei kutah chuan a hmehbel zui nghal nawk nawk bawk. Anni pahnih riltam lutuk tawh lah chu an lo lawm nasa mai a, an khi var var.

Zawimuangin khua pawh chu a rawn thim ve chho ve tan ta riai riai a, tunah chuan anmahni tanpuitu tur lo lan hun chiah an nghak ta. A khat tawkin tukverh atang chuan pawnlam chu an thlir chhuak leh vang vang thin hlawm a, mahse, mak tak hian mihring dang hmel hmuh tur reng reng ala awm chuang miah lo mawle! Khawiah tak chuan tawmbo hlawm ang maw.

‘’ Mercy, police motor alo thleng. An lo kal tak tak a nia aw, ka va han lawm tak,’’ au ring ngam chiah silo, phur em em a rawn ti sar sar chung hian Tetei chu tukverh bul velah chuan a tei kual a teikual tawh a. mercy thung chu phawk hra chung hian khum atang a rawn chhukthla ve vatthung. Chutah, tukverha a han dah chhuah ve nak chuan Tetei sawi ang tak tak khan kawt zawl zau lamah chuan police motor pakhat hi lo ding reng tawh in, a chhung atang chuan police uniform ha mi pahnih hi an rawn chhuak ve nghal zat bawk a. chutihlai vek chuan mak tak maiin a hma zawnga tawmbo char char resort enkawltupa Sawmkima leh a staff mi pathum te kha an rawn inzuichhuak ve leh ta chiah bawk. An thil hmuh mek avang chuan Mercy ngaih chu a tha thei tawh hauh lova, heng police ho hian eng thil nge an hriat a, hetiang zat lek mai anmahni tanpui tura an rawn tirh liam tak mai le, tih chu ngaihtuah in a thin a phu deuh dup dup reng bawk. Nge, resort enfiah tur ringawt hian an lo kal hmasa tihna ni ta ang. Fiamthu an thawh lo asin le. 

A lan dan ah chuan police pahnihte leh resort enkawltupa Sawmkima te chu an inbe mawlh mawlh tih a hriat theih a. Eng chungchang tak chu sawi ang maw. Mahse, chutia tukverh bul mai atanga thinphu dup dup chunga an lo thlir ve reng lai chuan police pakhat chu leiah a thal zui tawpin, a khur chawr chawr ta mai a! Ala dam zawk a thianpa pawh khan zam map lo hian a pistol chu a rawn phawrh ve zat. A hmaa ding mek Pu Sawmkima chu hnai set sawtah a tin reng mai bawk. An awm dan engkim lo thlira lo hmu ve reng tu Mercy te thian thum chu phu zawih zawih tawhin an au chhuak lo chauh bawk a, an hlau takzet zet a ni. A bikin Tetei mawlh chuan a tilui thei hlawllo tih a hiat hle a, a khur chhe takmeuh tawh.

‘’ Police pakhat zawk kha an hruai sawn daih a nia aw!’’ khur hlawk hlawk chungin Hlupuii khan a rawn ti veleh a. Tetei leh Mercy mawlh mai chu an hawi phawk nasa tawh the e. kha police kha engtia tih nge an tum. An that ve nghal mai a ngem le. 

Mercy chu thawm dim fe chung hian a khum awmna lamah a dawk phei deuh zawk a, a racksack chu ava hai zui nghal rawk rawk  mai. Chutah, chemte lian lemlo tak pakhat hi rawn phawrh chhuah zauh pahin a kekawr ipte ah chuan a ak tha nghal thak bawk a. A phone bawk chu a bann zui lehnghal zat. Kut khur hlak hlak chungin a bialpa number bawk kha a han hmetchhuak leh ringawt a. Alo la chhang har em em zui. A thinrimna chu sosang nasa tawh tak a ni mai e. vanneihthlak tak hian a beidawn hnulamah Zonunfela pawh chuan call chu a rawn chhang thei ve ta hram a, a buai zia thu mawlh a rawn sawi nghal luam nia! 

‘’ Kan uang emaw iti emni? I poice rawn tirh te kha eng nge an awmzia?’’ ti nghal hluk hlukin a chhan let ve hma chuan a phone battery lah chu alo la inshut down hman daih bawk a. Thinrim lutukin a au chhuak nghek lo chauh tawh mai. Khum atanga thawh chhuah hluai pah hian,

‘’ Kal ang u,’’ a han ti ringawt a. A thiante pahnih thung kha chu an lo hawi phawk nasa dun ngang mai.

‘’ Engtin nge kan chhuah theih a nga. Min kaphlum hman vek ang,’’ Hlupuii chuan khur hlak hlak chunga rawn ti ve nghal zatin, tetei thung kha chu a maimitchhing vang vang reng a, ala khur chhe nasa hle reng bawk. Mahse, Mercy bawk in thupe aw deuh taka,

‘’ Tih dan a awm ang. Police ho motor saw hman sak kan tum phawt anga, a theihloh chuan inphen nan hmangin kan motor dahna lamah kan kal mai dawn nia, hetah hian kan tawmsen reng thei lo,’’ ti leh zung zungin a thiante pahnih chu torchlight leh pepper spray a ken tir ve bawk a. Room atang chuan an inchhawm chhuak leh ta hnak hnak mai. 

Thawm dim thei ang ber hian corridor ah chuan an pen phei zel a, light a eng lutuk hran lo bawk nen ala him hmel phian. Mahse, chutia kawt zawl zau lam pana an la kal chhut chhut reng lai chuan an hma maiah hian staff pakhat hmel rapawm zet kha rawn lang thutin, Tetei chu alo au chhuak hman hial mai a. mahse, chu pa chuan hmanrua a ken awm an hre hauhloa, anni hmeichhe pathum te lek mai mai chu tharum hmanga hneh theih a inring deuh te pawh a nimahna. Chutah, anmahni en a khik vur vur pah hian an lamah a rawn tawlh hnai zel ta a=mai a, tichuan, thawklehkhatah amah hnaih ber tu Mercy chu a lamah a pawt leng nghal dawrh bawk. Ani mercy pawh alo inrin loh lutuk avangin a au chhuak ve that that thei a. A hlauthawng ta hle. Chu pa lah chuan a kekawr kawng atang hian chemte pakhat rawn phawrhchhuak ve in Mercy hrawn zawn vel chu a tin kual sek a, chuti chung chuan a hmaa ding hmeichhe pahnihte hmel chu ava en leh thin . Chutah, rawn nui chhuak vir vur chung hian,

‘’ Helai hmun hi chhuahsan in duh a nih chuan in thiannu nunna hian a tawrh ngei a ngai dawn a ni. A nih loh chuan kawng dang reng reng a awm lo’’ ti hluk hlukin Merxy chu a kuah nghet sauh sauh mai a. mercy pawh hlauthawng tih hriat tak hian alo thaw ve hlawp hlawp tawh. Hlupuii leh Tetei te khan eng thu mahin an chhang let hauh lova, an hmanraw ken beitham zet nen chuan inring reng in an o awm ve ngat ngat ringawt. Chutah, a thiante chu thei leh theiloa va mitmei zauh zauh chung hian Mercy chuan, 

‘’ Tete, tunah!’’ a rawn ti deuh tuar mai a, chutihrual chiah chuan Tetei pawhin a pepper spray ken lai ngei mai khan chu staff pa mitah tak chuan a han kahsak ta nghek mai a, staff pa chu mit hupa au ruai ruai chung hian a talsawn chiang kher mai. Chutihlai vekin Mercy khan a chemte pai lai hmang ngei chuan a hnungzang leh a taksa hmun hrang hrangah alo vit ve mawlh mawlh bawk a, Hlupuii pawhin theihtawp chhuah hian staff pa chemte hmang ngei khan amah chu a theihna lai apiangah a lo vit ve sawk sawk reng bawk. Tichuan, a hliam zozai te chu tuar lo in corridor lai takah chuan a thal zui ta der a. An inchinfel hnua kal leh mai an han tum lai tak chuan staff dang pakhat hi an thawm hria in an hma lawkah chuan a rawn lang leh ta heu mai! Che lo chang lo in an inmelh tawn thap bawk. Mahse, hun rei pawh khawhral tawh lo hian Tetei bawk khan a spray ken hmang ngei mai khan chu pa mit bawk chu a rawn kahsak leh ta ngheng mai a, a talbuai hun chu remchang ah la in Hlupuii leh Mercy bawk chuan an hmanraw ken lai ngei mai chuan an lo khawih rawn leh ta a ni. A tlin rei ta bik chuang love. Chumi hnu chuan che zui ngam mai loin an dinna hmunah an ding ngawi ta rneg phawt a, mahse, thawm a reh ta tlawk tlawk. Minute 10 chuang an ngaihchan hnuah pawh thawm a reh tak daih si avangin hmanhmawh ru tak, thawm dim em em chung si chuan police motor awmna lam bawk pan turin an che chhuak zui leh ta nghal a, thil danglam han hmuh tur phei chu a awm zui ta lem lo a nih hmel. 

Kawt zawl zau ah chuan tlan phei deuh hlawk hlawkin Pu Sawmkima office lam te kha an va hawi phei pah leh zauh thin a, mahse, thawm a reh thap reng mai. Police motor dinna hmun chu tlan thleng thuaiin Mercy’n a hmalam kawngkhar a hawn lai tak chuan silai puak țhuai țhuai thawm a hre ta thut a! A han hawi chhuah leh nak chuan seat hnunglama thut tum a thiante pahnih kha tualzawlah chuan nunna nei tawhlo tih hriat tak hian an lo let reng tawh mai nia! Chutah, silai ri lo chhuahna lam ena a han hawi chhuah ve nak chuan Pu Sawmkima ngei mai kha ama office kawt maiah pistol la keng khu vang vang chung hian alo ding reng tawh a ni tih chu ava hmu nghal. Chu mai chu ni lo in, chiang taka amah melh chung hian a lam pan chuan ala rawn pen chhuak zui bawk a. Tlanchhiat a hun tih hria in a luh lohna kawngkhar lehlam atang chuan a dawk chhuak nghal ta zawt zawt. Motor chu inphen nana hmang pahin a hnuailamah a tawlh lut zauh a, motor hnuaia thir chu nghet zeta vuan chung hian theihpatawpa nasa in a invuan tang chhunzawm a, a  biru fel thei ta. Pu Sawmkima pawh kha car bulah chuan rawn thleng phei ve tawh in a hawi kual nasa hle nghe nghe a, car hnuai vel biha a rawn kun kut kut alai te chuan Mercy chu chauh tawh nen a lo thaw tha ngam mang tawh lo hial a, a hlauthawng tawh takzet zet a ni. Tin, Sawmkima ke bul lawka a thiante leh police pa ruang let pheng phung te pawh chu hmuh loh der tum em em mahsela a thei thlawt bawk silova, a hah phah zual takmeuh. 

‘’ Kan zawng phiangseni chu khawiah tak kalbo ang maw’’ tih hmuar hmuar paha motor hmalam a chum rik chawrh thawmah te chuan Mercy chu lo phu ve zawkin a thaw leh hak thin bawk a. sawmkima lah kha chulai bawr velah chuan a thep kual reng mai bawk nen, a awm dan atang chuan kal hlatsan a tum loh hmel khawp a ni. Mahse, vanneihthlak tak bhian rei pawh nghak tawh lo in Sawmkima chu a office lam pan tur chuan a inher let ta hlauh mai a. Chuveleh, Mercy pawh chuan motor hnuai a invawn behna chu zawimuanga thlah thla riai riai in hmanhmawh ru tak chung si hian Sawmkima hnung chu a zui ve ta hret hret mai a. Thawm a dim thiam bawk nen Sawmkima pawhin zuitu a nei tih hre miahlo in hmalam pan chuan a kal pah ve mawp mawp reng a. chutah, Mercy chuan a chemte pai bawk kha rawn phawrh chhuak lehin Sawmkima tihnat tum chuan a inring tha tawh angreg hle. 

Office an thleng tep tih ah Sawmkima pistol ken lai ngei mai chu va thai per sak zauh in a hrawkah a tai phei nghal kawk bawk a, ani Sawmkima pawh chu phu chiang rem rem tak a ni. A hrawk atanga thisen rawn luangchhuak mek dawm beh vung vung pahin a rawn hawi let ta țual țual a, a na tawrh mek avang cbuan a țhen deuh chawk chawk reng mai bawk. Mercy lah chuan a thih zui mai ring in pistol kha a chhar lawk a, motor awmna lam pan bawk khan a inhersan leh ta vut. Mahse, thui pawh ala kal hman lovang tihturah hian Sawmkima bawk khan a ke rekah chuan rawn vawnsak deuh thutin a tlukna lamah pistol pawh chu hla deuh takah hian a persawn daih leh ta nghal a. mercy hlau phu nasa lutuk chu a țe chhuak deuh that nghe nghe. Tichuan, a hmalam pana bawhvah mai a tum lahin Sawmkima khan a ke rekah bawk chuan a rawn man bet zui tlat mai si a, a duh ang tak pawhin a che zui thei ta lo. Marwh chu, hliam la tuar ve lo zawk na na na chuan a tawpah zawng bei let ve theiin sawmkima hmaiah tak chuan chiang em em mai hian a zu tlawhsak ta nghek mai a, a ke a rawn vawnna pawh chu thlah chiang mai mai tak a ni. Chuveleh, rang taka inperh tho nghal zawt in a chemte kha a phawrhchhuak nghal zat a, vilik zauh zauh pah hian Sawmkima chu a thutbet nghal chat bawk. Thinrim zeta thawk ham ham pah hian a kawr awmah a han țham sak nghek mai a, chemte hmang chuan a tin pah nghal zat bawk.

‘’ Hei, min en rawh. Nang mi tenawm leh bawlhhlawh hian khawiah nge police pakhat zawk kha I thuhruk sawi the'’ ti ram hmarh in, Sawmkima lah chu hliam tuar mek nimahse tlawm mai a alo la tum bik chai lo. A nui sang reng a, a khat tawk hian a hliam nat vang chuan a rawn țhen leh sak sak thin thung.

‘’ Sawi ta che’’ Mercy’n ring deuh taka a han tih nawn leh takah chuan thaw hleithei tawh lo tih hriat zet leh tawng harsa tih hmel tak hian,

‘’ Ka,,, ka office,,chhungah ka,,ka staff pahnih ngawt min thahsak avangin ka kaphlum!’’ thei leh thei lova a rawn tih chuan Mercy chu alo thaw chhuak deuh hawk.

‘’ Chuan, engvangin nge heng mikhual zozaite pawh hi I tihhlum thin sawi vat rawh. Sawi ta che’’ ti leh nghek nghekin Sawmkima chu a sawi pah nawk nawk a, ani Sawmkima pawh chu peih leh peihlo hian alo la nui chhuak ve sawng reng tho nia! Chutah, a tawngka chhuaka zamna tel map lo chung leh, zawi angreng tak si chuan,

‘’ Mihring sa hi a tui! ‘’ a rawn ti a nih chu mawle! Chu zet chuan Mercy dawhtheihna leh ngilneihna te kha an țhiat darh zo ta vek a, a insehruh ta fan fan mai. Thinrim lutuk aw khur hlawk hlawk chung hian,

‘’ Min rawn bei nawn leh kher lo la chuan I thih kher pawh hi a ngai miah loh tur, tualthah hi ka hreh viau asin, mahse, pawi ka ti lutuk’’ tih sap pahin a hrawk hrui chu a chhah sak nghal hmak a, thisen hi a rawn chik chhuak nghal zawih zawih thei. Chung thil zozaite chu hmu lo leh hrelo ang maia thawhsan in Sawmkima thawk rik bawrh bawrh lai te pawh chuan motor awmna lam pan hian a kal ngat ngat reng a, a thisen ni lo, a thah tak te thisen ngei mai kha a kai berh liai luai mai bawk. 

Tichuan, police motor bula a thiante pahnih ruang let reng pawh chu motor chhungah chuan harsa ti zeta dah lut lehin , a tira police an kahhlum tak ruang erawh kha chu a thiar lut ve ta lo thung. Chahbi lo invuah sa thlap chu herh nung zuiin, motor chu a nung zui ta vut vut mai.

Helai hmuna an thil tawn zawng zawng leh a thiantha te chunga thilthleng engkim mai kha a mitthla ah rawn lang nghal zut zutin mittui tla pur chunga insut hraih hraih in khawchhung panna kawng thui leh reh em em ni si ah chuan hmalam panin a inkhalh chhuak ta par par mai a.

*****           *****          ******         *****          *****          *****          ********