RAMTHANPUII

MATE (Based on True Story )

BY : Vanlalpeki Fanai

Thingtlang nula nih ve man ah, inchhung sekrek khawih tur  a tam in, indaih loh a na thei hle a. chauh thlak thin tak a ni e. Duh duh huna tirh phar theih tur mo emaw, awmpui takngial pawh kan nei ve si loh avangin thil engkim mai hi ka kut vek a ni a, tlai hun a rawn her chhuah meuh hi chuan ka thinchhe tawh thin hle. 

Kan khua hi, a hming tarlang ta lo zawk mai ila, aizawl atanga chawhma kal vel ni ve in, thingtlang khaw lian ve tawh tak kan ni e, tih chauh hi dah lang mai the ang. Tin, kan chhungkua hrim hrim hi member pali niin, tunhma atanga chhungkaw inlungrual leh țangrual thiam ti a sawi kan ni ve thin a, a khaw mihlun kan nih piah ah, a hming tak takin ka pa hian kan khaw high-schoolah zirtirtu hna thawk ve in, khaw mite zah leh chung en pawh kan hlawh ve hle thin a, ka pa lah nise, mi tha tawp niin, thil țul lo a sawi mai mai ngai lova, thu tawp han siam ngawt pawh hi a awlsam lo angreng hle bawk. Chutihrualin, ka nu thung hi chu mi zaidam lemlo leh, a ngaih dan te pawh zep buai ve vak ngai lo mi a ni a, a uikawm thei hle. Amah hrechiang lo tu mi tam zawk hi chuan an ngaina thei lo reng bawk a ni. Kei tak pawh hian ka nu ai chuan ka pa hi ka ngaina mah zawk a, min duattu zawk a nih bakah, a bula awm nuam ka tiin, ka pa ka duh zawk thu hi ka sawi ve fo thin. 

‘’ Rampui, I awm maw?’’ tia min rawn ko lang lang thawmah chuan ka hmunphiah lai chu chawl lailawk zawk in ring zet mai hian ka lo chhawn zui ve vat a. Thiannu Rinkimi hmel chu kawngkaah a rawn lang nghal zawk bawk.

‘’ Lalthian, hawh, bazarah min zu kalpui lawk the a. mahni chauha tei ruk ruk hi chu nuam ka ti chiah lo deuh a. Insiam buai vak pawh a ngai lo a nia, tikhan I nalh zawk’’ ti nghal zung zung in, ka hmunphiah lai te chu min rawn phiah chhawk nghal zung zung a. ka nui suk. Kan khuaah hian thian dang tamtak chu nei ve bawk mah ila, he nu aia thiantha leh ngainat zawk dang hi ka nei bik chuang lo. Chutiang bawk in ani pawh hian min en ve tho a. kan inkawm chawt mai a ni.

‘’ A tihzia hlauh chu. Keini pawh chawhmeh lei tura chhuah ngai ve tho alawm kan nih ‘’ lo ti let ve sawk sawk in ka sam ka khuih that leh thuak thuak hnuah kan chhuak nghal a. 

Kan veng bazar hi kan chenna atang hian va hla ve deuh tho mahse, tei chhuah nulh hi kan awlsam dun ve hrim hrim a, nula naupang tak lo nih tawh bik loh nen phei chuan, han lan nalh vak kha kan care tawh tehchiam lo.

‘’ Lalthian, han hawi phei lawk the'’ tih paha Rinkimi’n min rawn nghawk tak zauh ah chuan rang fe hian a melhna lam chu ka va en ve nghal a. kan bul lawka workshop chhungah chuan kan veng rawlthar pakhat hi lo awm ve in, chiang leh uluk fe hian kei chu min lo en reng a ni tih pawh ka va hmu nghal. Mahse, keimah ah khan engtinmah hna a thawh awm pawh ka hre lova, ka danglam chhin eih lo tihna a nih chu.

‘’Hmingmawia kha I hre ve thin ang chu’’ thiannu Rinkimi bawk in a rawn tih leh chuan lo bu deuh nghat in,

‘’ Hre ve tho e. Eng nge chu chu’’ lo ti let deuh hu chung hian antam tel lian tha fe mai chu ka han thlang kual pah vel bawk a.

‘’ Nizanah an rawn leng a, I number min dil avang in ka pe a nia’’ 

A r thil rawn sawi leh zet chuan min tihphu deuh dawrh. Ve leh ringawt thin hian. Khatiang naupang lutuk lakah lehnghal, bat ka nei lo ve. Chhanna ka pek tak mai loh ah chuan amah bawk chu rawn tawng chhunzawm lehnghal in,

‘’ Tunlai chu khuaah hian a awm tam ve deuh a, zan lamah pawh an rawn leng lut fo. I chanchin mawlh mai hi a rawn kalpuite hriat loh tur hian min zawt nasa thin khawp a’’ nui har har chunga a rawn tih leh takah chuan chiang zetin amah chu ka va melh kawk.

‘’ Eng thu nge maw I sawi reng le. Naupang mai a nih kha, naupang. I hria em? Chiangkuang ve hlek rawh’’ ti hlukin ka dinna chu ka sawn ta daih a. Ani pawh chuan min tibuai chhunzawm ta bik hran lo.

Thiannu Rinkimi’n a sawi zawh tak Hmingmawia kha kan thenawm hnai rawlthar chhuak hlim hlawt niin, a hmeltha reuh phian a, a pian nise a dik zaih mai bawk. A sang tha angreng hle. An chhungkaw khawsak dinhmun te hian zir phei se chuan mipa vannei leh kan khuaah pawh a to pawl tak tur chu a ni ve phak te pawh in ka ring thin. Mahse, rel thu chang lo se, an chhungkua hi khawsak harsa ve tak an ni a, an unau hi pathum niin, amah hi a upa ber a ni nghe nghe. An chhungkua hian huan chhete nei ve in, an enkawl tha hle a. chu chu an sum hmuhna hnar ber pawh a ni ve thin. Mahse, tunah chuan tihian, Hmingmawia pawh kum te a rawn tling chho ve ta bawk a, lehkhazir vel chu a chemkalna zawn a lo nih lem loh piah ah, chhungkaw dinhmun ten a lo zir bik bawk si lo nen, a țul apiang thawk ve turin zirna pawh a chawlhsan ta ngawt a nih hmel. Aizawl lamah a chhungte bel in workshop velah te a han inhlawh ve lawp lawp thin a, tunlai tak hi chu a lo haw thlak lai pawh a ni maithei. Ka hmu ngun riau.

Rinkimi sawi dan ang ngeiin ka number chu an lo inpe tak tak a nih hmel e. Mut hmuna ka phone ka lo bih kual mai mai lai chuan whatsaap message rawn thleng in, number save loh hi a lo ni a. ka han en nak chuan amah Hmingmawia ngei kha a lo ni bawk. Inthlahrun hmel zeta 

‘’ Hi’’ a rawn tihna chu ka seen ringawt a, ka reply ta lem lo. Keini, nula senior tia koh lawl lawlna pawh dawl zo tawh chin tan hi chuan anni ang hi chu an nau deuh hlek ka ti a, kum tling lo khawih chhiat tum ah te min puh reu reu ang tih hlau in ka inthlahrung ru tlat. Mahse, a message te chu reply duh miah lo mah ila, min rawn biak erawh a țhulh duh hauh lo. Chutiang na na na chu tiin keipawh in a tawpah chuan ka chhang let ve ta nge nge. Kan inbiak țan tirh vel lai chuan a kum naupang lutuk ringawt chu buaipuiin ka tui lo ngawih ngawih a. min biakna pawhnise, a rultawk te te bakin ka chhang ngai hek lo.  chuti chung chung pawh chuan min biak a țhulh lova, a rei hnuah phei chuan ka ngaina ve ta phian a, mak pawh ka inti zawk hle. Text mai chu duhtawk ta lovin kan incall fo va, kan inah em chuan ala rawn chuangkai ngam lo thung. Mahse, pawnlama chhuah remchan kan neih apiangin inhmuh hi chu kan tum ngei ngi thunga, inngaizawng ang chiah chuan la khawsa hauh lo mah ila, kan inhnar lo tawn tih ka hria. Zan hnih khat lek min lo biak loh pawhin hrehawm ka ti a, ka khua a har veng veng thin. Chutihrualin, chutiang chungchang vel chu a bulah engmah vuivaina ka nei ngai lova, ka ngam bawk hek lo.

Zan khat erawh cu rinloh tak mai hian kan inah chuan a rawn chuangkai ve hlawl mai a. ka meng phawk nasa angreng hle. Ka nu leh pa te pawh an lo la men ve tho avangin ka inthlahrung deuh bawk a, mahse, ka pa zawk chuan tha em em a lo be ve zel in, an titi pawh a rual dun phian. Chutihrualin, ka nu erawh kha chuan a melh peih ngawr ngawr hi a nimai a, biak chu sawi loh, Hmingmawia chu a ngaihsan loh hmel hle niin ka hria. Mahse, ka ngai pawimawh tehchiam duh hran lova, awm nawm loh phah nan lah ka hmang duh bawk hek lo. Tichuan, ka pa thluak that zarah, ka nu nen chuan hma takah min mutsan in, ka nui deuh vur vur thei.

Hemi zan hian rei pawh leng lovin hma takah min hawsan leh mai a, mak takin min haw san hnu atang chuan ka ngai thar ta veng veng mai nia! Keipawh hian ka awm dan leh a laka ka rilru put hmang zozaite hi ka hrethiam chiah tawh bik lo chu a ni. Tihian, a chhun a zan deuhthaw in inbiak kan țhulh ngai lova, mahse, min duh thu emaw, chutiang lam reng reng chu a sawi chhuak ngai chuang bawk si lo. Kei lah in, hmeichhia ka nihna ang in eng thilmah sawi hmasak chu ka tum bik hauh si lo. Kan innghak tawn vel ni ber hian ka hre tawh nghe nghe.

‘’ Rami, nizana I inleng pa kha chu rawn kal nawn tawh lo mahsela a pawi ka ti hauh lo a nia!’’ ka nu thu han sawi duh dan tehtawp pawh chu. Ka zing tho hlim hlawl mood pawh a off vek thei alawm le.

‘’ Mami nu leh ngawt ngawt thin hi a! Hetiang te chuan infanute pawhin pasal tha tak an nei thei nang le. Khirh ah pawh hian chintawk a awm ngai a nia’’ a zing thingpui dawt hlak paha rawn ti ve leh in, kei erawh ka lo ngawi tlat thung. Chutah, ka nu bawk chuan aw hriam leh vin angreng fe si hian,

‘’ Ka duh lo! Chu chu nimai. Kei chu, sawi tam vak pawh hi ngaiin ka hre lo. Pasal tur a duh a nih te chuan mi puitling zawk leh tha tak tak an tam alawm. Nizana I inleng te ang kha chuan e, he inchhung hi an tilang zahawm loh zawk tlat’’ 

Chuveleh, ka pa chu za fahran lo hian a lo nui ve deuh hak a.

‘’ Thiani, zan khat a rawn leng ve dek dek a, ilo huphurh mah mah a ni lo maw. Chawhmeh te kha tui deuh in han siam phawt mai the'’ tih paha nui huk huk chung hian dawhkan chu a thawhsan ta daih a. keipawh ngawi reng in bathroom ah ka lut tlang ve nghal.

Ka nu em em thin pawh hi a. ka pa sawi ang deuh khan, Hmingmawia chu zan khat a rawn leng ve dek dek a, alo hmu thei lo nghal ringawt chu a nia. A zialo angreng khawp mai. Ka nu mahnise, a che over mah mah thin hi ka mil thei lo fo. Kan inmil thei thlawt lo thin zawk a ni.

Tichuan, tukthuan te eifel in inchhung sekrek zawng zawng ka khawih fel leh te te phawt a. ka zawh theih meuh chuan chawhnu dar 1 alo ri ve der tawh mai. Inbual zui leh sawk sawk in, ka hmai te pawh ka han cheimawi ve liam luam a, chumi zawh lamah bazar turin ka chhuak zui nghal. Dan pangngai te bawk in bazar thlen hma chuan workshop ah khan Hmingmawia ka hmu leh ta. Ani pawh chuan min rawn hmuh ve tho avangin a rawn nui deuh ver ver a, a hmeltha takzet a ni. Chutah, a awm dan chu a thiante ho in rawn hmu fuh in an fiam zui ta laih laih mai a. A zah hmel angreng hle. An hnathawhna hmun chu kalpel leh thuaiin, bazar kawng lam ka zawh zel a. mahse, ka hnunglam atang hian min rawn ko tu an awm ta thut. Chu pawh, tudang ni lovin, amah Hmingmawia ngei kha a lo ni. Hawi kual zak zak chung leh, a lu thak lo pui hiah nuah nuah pah chuan min rawn pan hnai zel a, lai tih hriat fe hian a nui deuh var var reng bawk. Chutah, a hnunglam thleka ka han en nak chuan a thianteho bawk kha workshop chhungah chuan an pil zuk tih ka va hmu thei a, ka nuih a za ru angreng hle. 

‘’ URampui, thil hrilh duh che ka nei a, zan inah, ih, I remchan chuan ka lo leng nawn leh thei a ngem le?’’ a rawn tichhuak niah niah hmel chu en in, ka nui chhuak lo chuah tawh a mahse, ka insum hman leh hram. A lai chhe hmel te hlei hlei hi hmuh a nuam in ava han tha chiang ser sawr tak em. Mi hausa tak fapa ni tur atan hian ka lo it leh ngawih ngawih thin mai.

‘’ URampui, min chhang la ‘’ ka harh zui deuh zawk. Eng thil te hi nge maw ka lo ngaihtuah kual leh tak chiam thin hi le. Eng nge a sawi kha, e, zanah lo len a duh tak a nih kha. A hmuh laia ka awm dan zet chuan min tizak ve angreng khawp mai.

‘’ A,, ilo leng leh ang chu. Chutiang te chu inzawh hranpa vak a ngai hleinem. Lo leng ngei ngei rawh’’ ti sawk sawk in, lawmthu te min hrilh leh nawk nawk hnu chuan kan inkalsan thei ta hram a. ka thaw hawk mai. Kum naupangte ni siin, kei nula senior ultra hi min uap hneh thin riau. Chutihrual erawh chuan, a bula awm kha a hahthlak hauh lova, a thlamuanthlak ka ti dawn nge, a hlimawm ru angreng viau lawi si. A zûn ngai hian ka kûr ka kur tawh chu a nih hi maw.

A sawi lawk tawh ang ngeiin zanah chuan a rawn lang leh ta ngei a. Tun tum chu thian pakhat a rawn hruai tel ve khiah bawk. A tha vek tho ve. Dan ngai te bawk in ka pa chuan that a lo chhuah leh em em a, kan inlengte pahnih pawh chu lo be sawm thuai thuaiin fiamthu a sawipui a, kan nui ho leh dar dar thin. Chutihrualin, ka nu erawh , ala dur tha khap khap hle thung mai. Ka pa hi awm lo ngat se chuan he keipui sahuai hian a zia chhe tak hi a chhuah duh tawh hial maithei  ni. Min hringtu ngei ni lo phei se chuan ka hma hun tur hi ka sawi lawk thei lo hial.

Dar a rik meuh chuan ka pa pawhin mu turin min luhbosan ta daih a. chutihlaiin, ka nu ve thung chu a chimawm a chhuah emaw tih mai tur hian ala thu ve tlat a. Tv remote te chu hum in ala thu meng ve kar mai. Ngeiawm duh tîk têk tak a ni. Dar 9 lai a rik leh hnuah erawh chuan a insumthei tawh thlawt lo a ni mahna, hreh hmel fe hian mu tur chuan min kalsan ve ta hram a. A lut fel chiah tih in Hmingmawia chu ka bulah a rawn țhu phei nghal nalh a, ka lo nuih sak.

‘’ URampui, I nu hi chu a den deuh a ni’’ ti chungin min sik pah nawk nawk mai. Kei lah chuan nui hawr hawr chung hian, 

‘’ A den lo a ni ang. Inhlauh hmel vak loh kha’’ lo ti let in, kan infiam zui bawrh bawrh a. chutihlai chuan a thian rawn hruai, Mawizuala kha a tho deuh thurh.

‘’ Hminga, ka mut a chhuak tawh em mai, ka nghak chhuak lo mai ang che aw’’ ti sup in, min hawsan zui a. kan pahnih chauh chuan kan awmdun ta ran mai. Diktaka sawi chuan a boruak khan min ti zam lo bik miah lova, sawitur dang vak hriat loh phei chuan nuam lo ru veng veng tak a ni.

‘’ URampui’’ zawi zeta a rawn tih sar sar lai chuan ka lo ip deuh zawk a, chang fek fawk mai hian,

‘’ Min û ziah tawh lo la, ka upat hmel zual thin em mai. Mipa zawk I nia, hmeichhia hi û dut dut duh lem suh. A ho lutuk’’  tiin, ka nui leh ta har har. Ani pawh, za vak lo chung chuan alo khi ve sak sak tho. Mahse, ka sawi atang rei pawh riallo ah chuan a ngai te bawk in min ko leh ta tho. Ka tihngaihna hrelo lutuk lah chuan a hnungzangah lo chum zui dawt in, ka kut a rawn man bet thut a, ka inring lo lai tak chu chiang zet mai hian min rawn fawp ta chawt a nih kha. Ka tha a khur zui nghal der der thei. 

‘’ Min hau suh URampui, ka duh em che a ni’’  inthlahrun hmel fea a rawn tih chuan sawi tur ber pawh ka hre ta lo. A hmeltha zet cbu ka lo en deuh tlawk tlawk ringawt. Tichuan, rei pawh leng zui lo in leh, thudang em em pawh sawi tawh lo chuan min hawsan ve ta phawt a. A khawsak dan engkim mai vang khan mut hmunah pawh ka la inngaihtuah chhunzawm nasa mai a, ka rilru diktak pawh hi ka hrethiam chiah tawh biklo. Nghah chhuah tur nei ang maiin ka helhhawlh țun reng mai a, ka phur em em ringawt mai a ni.

Ka nu zing tawngtai inkhawm bang leh, ka zing tho hlim hlawl chu intawk chawt in, min melh no lo the asin aw. Mahse, a pawi chuang love. Ka mipa duh leh ngaih em em kha ka ta a ni tawh a, tunah hi chuan  nula leng rei satliah ka ni tawh dawn bik hleinem, tih chu rilruah rawn lut in, ka nui zui var var. Rawngbawl turin chokaah ka luhsan  nghal daih.

Tukthuan eikham hnu, inchhung sekrek khawiha ka lo buai lai tak chuan kawngka kik ri ka hre thut. Hmanhmawh taka kawngka ka va hawn nak chuan Hmingmawia nu û, nu Matlani kan tih thin hi a lo ding reng a! Ani nen hi chuan tunhma atanga innel em em leh, infiam bawrh bawrh thin kha kan ni a, tin, amah hi chawhmeh zuara vak kual thin kha  a ni ve reng reng bawk. Kan in ngei pawh hi a vawikhat rawn chuankaina a ni tawh hauh lo. Chutia, kan han inhmu leh ta chu ri zui dun hlutin, ka hui lut deuh sawk sawk a, a chawhmeh phurhna em te pawh chu chhuatah ka chawi thlaksak nghal zung zung.

‘’ Rampui, I chhungte an va reh ve’’ rawn ti hmasa te te in, kei chuan ka nu a awm ve thu ka lo hrilh thuai a. chuveleh, a bula thutna awl awmah chuan thu ve turin min hui nghal zeuh zeuh bawk.

‘’ Lo thu ve lawk la. Thil engemaw te te kha ka lo hre ve a’’ tih pah hian a nui zui var var. A sawi tum awmzia chu ka hriat nghal vek avangin tlem chuan ka lai ve det mai. Mahse, hrelo der leh te tephawt in,

‘’ Eng chu maw’’ ka han ti phawt a, room lama awm reng ka nu mawlh kja ka ngaichang pah deuh nghe nghe bawk.

‘’ Tukinah, Hmingmawia hna kal tur kha a rawn lut kawi a, inchanchin ka lo hriat phah ve a nih hi. Awi, a hmel kha a hlim sia, a phur vei lutuka, taktak thil a ni em tih ka rawn hrechak mai mai’’ a rawn tih leh sar sar lai chuan ka lo nui deuh put put tawh a. ka zak ru veng veng mai. Kan nau-a chu ava han phur awm surh surh ve aw ka ti. A lawmawm zawk mah e.

Nui har har paha nu Matlani chhan let ka lo tum lai tak chuan ka nu kha room atang a rawn chhuak hlawl. Rum fahrana min rawn melh ran ran chung hian,

‘’ Ramthanpui, tlai tin in bazar tura I chhuah a ngai tawh lovang. Inah hian tawm tlawk tlawk tawh ang che. Chuan, Matlani pawh, helai hmuna I rawn kal chhan hi  a ho khawp mai. Nutling, chhungkaw chawmlai nei I ni a, I thil buaipui hi chu a ho mah mah. Taka, innau Hminga kha a chhungte hnenah min lo hrilhsak la, hetah hian rawn leng lut ve fo tawh suh se aw. Kan duh lo’’ ti leh hmawk hmawk in bathroom ah a lut zui a. kei leh nu Matlani chuan makti fe hian kan lo thlir zui veng veng ringawt. Kei tak phei chuan rapthlak ka tiin, ka nu khawsak duh dan kha ka awih lo hial a. kei chauh ni lo, mihrang daih bulah pawh khatiang tawngkam kha a hmang duh a nih chuan ava han tawrhhlelhawm chho dawn tak em.

‘’ Rampui, ka chhuak phei phawt a nge. Hun dangah kan la sawi leh zawk dawn nia, tiraw?’’ tih pah chuan a tho zui țaih țaih a, chhan let mai ngaihna pawh ka hre lo zawk. Ka zak a ni. Mahse, amah bawk chu rawn tawng chhunzawm lehnghal in, lainatna mitmeng hian min en reng tih pawh ka hria.

‘’ Pawi ti suh. Engmah hi ka sawi chhuak lovang’’ rawn ti leh sap in min kalsan ta hnak hnak a. ava han nuam lo ber mai tak em. Engtin nge ka nu rilru puthmang mawlh mai hi kan thlaksak theih tak ang le.

Hetiang hian ka nu chuan kan inkarah buaina chawh thawh tum fo mahsela, Hmingmawia nen erawh inhmuh chu kan țhulh phah chuang hauh lova. Kan inthlahlel tulh tulh zawk. Inah pawh rawn chuangkai ngam tawh lo mahse, inhmuhna tur hmun sawiin kan țhulh ngai eih lo. Kan induhna, inhmangaihna leh inthlakhlelhna te a pun ang zel In ka nu pawh a che na ve tial tial ka ti mai a. chutihlaiin, ka pa thung hi chuan kan awm dan te hi a hrethiam ngai lo nge, a ngawi hle hle. Ka chungah pawhnise, a khirh zual chuang bawk hek lo.

‘’ U Rampui’’ a ti leh ta!

Eng nge maw he pa hian a unaunu ang maia min koh fo le. A bialnu ang hian min ngai thlawt lo nge, min zah lutuk tih pawh ka hrethiam ta nak lo ve.

‘’ Khatin min ko fo suh ka tih kha’’ tih pah hian a tukkhum chu a ri zui nghal fawk a. Ani erawh, a lo nui duh lek thung.

‘’ Khatianga koh che kha ka duh zawk. A cute ka tia!’’ 

‘’ Tak takin URampui, naktuk hian aizawl lamah chhoh ka ngai tawh a’’ a rawn tih chuan keipawh ka thutak ve ta deuh.

‘’ Eng nge itih leh dawn. Hetah hian I awm hlen tawh dawn emaw ka tia’’ lo ti let ve vat in, ka hlauhthawn luatah, ka thin pawh a phu zui dup dup thei. 

‘’ Helaia awm reng leh I hmel hmuh fo te chu ka duh alawm. A baka chak hi ka nei bik lo. Mahse, kan chhungkua chu I hre vek a, ka pa lahin zu hi a nghei thei thlawt bawk silo, kei lah, hnathawhna lama ka lo chauh deuh phei chuan a hahthlak dan a thuah hnih thin em a ni. Chubakah, hetah chuan hlawh hi a pung thei ve silova, hrawk chawm lai ka ngah ve bawk nen, ka tan chuan aizawl lama awm leh phawt hi a tha zawk tlat a ni’’    

A thilsawi zawh chiah te kha thleng thei lo se ka ti. A sawi ang tak taka min awmbosan a nih chuan kei hi engtin nge ka lo awm ve tak ang. Khaw hmuna kan awm chung pawhin kan inhmu hleithei lo va, hun nise, kan ngah dun tawk bawk hek lo. Ka rilru a hah in a buai ta map mai. A kalbo leh tur chu ka ngaingam thlawt lo a ni ber e. Hemi zan hian kan inhmuh ruk fo na thin school hlui lamah kan awm dun leh ran tawh a, dar 10 bawr velah kan inthlah haw ve thei hram bawk. Chu pawh chu hreh takte in ka hreh a, inruka, tlanbo daih mai te ka duh hial. Mahse, ka bialpa hi kum lamah nise ala naupang em em si a, chhungkaw dinhmuh khirh tak ala nei vei bawk nen, kan tan hi chuan kawng ala kaw ve hlawllo te pawh kan ti thei ang chu.

A tuk khaw rawn var leh te chuan phurna pakhatmah min pe tawh lova, ka hmangaih hmel chu ka hmuh phakah a awm tawh lo tih ka hriat phei chuan ka tha a zawi takzet. Tukthuan pawh ei mumal thei lo in ka awm zuai nguai reng a, ka pa lah chuan ka damlo ta emaw tiin damdawi eitur te min lo hrilh deuh chhen bawk. Chutihrual in, ka nu ve thung hi chuan ka awm dan engkim hi a man em em vek a, min huat hmel ngawih ngawih niin ka hria. A mawh love, a fanun neihchhun ve hian a hmuhsit a, a diriam em em thin, mi rethei leh hnuaihnung fapa kha a hmangaih miau atin ni. Nu tamtak te pawh  hian an fanute chunga thilthleng tur atan chuan an lo duh bik miah lo maithei asin.

Aizawla min chhohsan hnu pawhin Hmingmawia nen chuan inbiak kan țhulh ngai lova, min ngaih zia thu leh, inhmuh a chak tawh thu ringawt chu min hrilh thin a. kei lah bang chuang bik hek lo. A chang phei chuan kan inkar buaithlak leh khawlhkham lutuk te hi ka ngaihtuah kual nasat chang hi chuan phone call ah te, video call te thleng pawhin ka tah khum leh lawp lawp mai thin bawk. Chung erawh chu thleng fo lo se ka duh a, a mithmuh laia mittui tih tlak reng pawh hi min ngaihnep phah mai ka hlauvin, tha ka ti bik lo hle. Mahse, ka insumthei lo thin zawk em a, ka ti palh leh thin chauh zawk a ni e.

Hun a kal ve bek bek a, keini pahnih inkar pawh chu a ngai reng kha la ni ve mek in, ka nu pawhin a sawi chhuak tawh ngai lem lo. A chhan pakhat nia ka hriat pawh, Hmingmawia chu aizawlah ala khawsa miau a, a hmel hmuh tur awm ta ngai lo na na na chu ka nu ngaih pawh a tha ve deuh a ni ngei ang. Hetihlai hian kan la inbe urhsun thei hle tih hi hre ngat se zawng, engtin tak buaina chawk chhuak leh ang maw.

Inhmangaihte ni, tia kam sawi mai thin  ‘Valentine’s Day’ pawh rawn herchhuak ve leh in, ka tan chuan eng thilmah hi beisei tur a awm ve lo va. Ka ngam hek lo. Mahse, chumi ni denchhena a rawn haw ve vang vang erawh ka lawmin ka hlimpui em em a, thildang hi ka ngai bik lo reng reng. Tin, ka beisei ngam miahloh laiin thil tha tak, make-up bawm man tam ve fe hi min rawn hawn tlat pek a, ka lawmna a thuahhnih a nih deuh ber chu. A thil min hawnsak min rawn pe tur pawh chuan a ruk tak meuh meuha kan inhmuh a ngai leh bik tlat a, a retheih thlak thin ngawt a ni.

‘’ Zanin chu ka riak a nga, naktuk vartian rualin ka chho lehnghal ang. Hna kan ngah viau na in, he hun hmanpui tur tal chea rawn haw ve hi ka duh tlat bawk sia, chawlh ka dil ta ngawt a nih hi’’ tia phun sap sap in, ka kut chu a khal pah neuh neuh reng a. ka lung chu a lo chhe leh deuh tlat pek. Mahse, insum hram hram chung hian,

‘’ Nia, theihtawp chhuahin han thawk leh phawt la, kei lah, heti ve mai hi ka ni si a, ka innghahna tlak miah bawk silo nen. Nang, a mipa zawk tal hian rilru I neih hle loh chuan engmah kan ni thei dawn lo a nia. Ka sawi tum hi I hrethiam ang chu tiraw?’’  lo ti let ve in, chiang fe hian min rawn en kar mai a, a nui sak.

Chu zan duhawm leh kan hun neih ve chhun pawh chuan min her liamsan leh ta. Kan pahnih tan hian hun tha zawk hi engtikah tak herchhuak ve ang maw.

A thil min pek chu ka khumah dahthla tawp in bathroom-ah ka luhsan nghal daih a. Rei pawh awm lovin ka chhuak ve lehnghal mai. Mahse, khawnge, khum chunga ka thil dah kha!? Alo bo hman daih nia mawle! Ka dahna te kha ka hresual zawk a nih ring in room chhungah chuan ka han zawng kual nghal vut vut a, hmuh tur a awm hauh lo. Chutia, beidawng taka ka lo hawi vual vual lai chuan ka nu kha rawn lut ve in, ka make-up bawm ngei mai chu a rawn lek larh larh bawk. Chuveleh, kei chuan va laksak tum hian ka ban nghal arh arh a, ka thei der lo nia!

‘’ Mu rawh! Ngawi hle hle khan mu hmak rawh! Hei hi chu I ta tur a ni lo aw’’  ka nu ngei chuan a rawn ti ram hmak a nih chu!

‘’ Nu, eng thil nge maw I sawi thin hi le. Kha kha keima ta ngei a nih kha, engvangin nge ilo lak ve ngawt a, khawi’’ tih paha ka va pan hnai leh chu min lo nam let sawk a! Chutah, ka ngaih hlut em em make-up bawm chu chhuata vawm darh chuaih pah hian amah bawk chuan vin zet in,

‘' Ramthanpui, kha mihring nen khan inla inkawp zui zel a nih chuan maw, he inchhungah hian I cheng ve thei tawh lovang. Chhuak mai rawh, chuan, engkim hi I duhthlanna ni bawk rawh se’’ ti leh nghek in min chhuahsan nghal a. kawngka te pawh chu dimlo baksak hian a khar ri zui bur bawk. Kei erawh chu thinlung na leh mittui tla zawih zawih chungin chhuatah ka țhu sawp nuai a. A thil vawm chhiat te kha melh deuh ngawih ngawih bawk. Ava han pawi tehreng em! 

Ka bialpa kha mi awmthei fapa a ni hauh lova, heng thil te pawh hi ka tan liau liau a neih zawng zawng seng in a rawn lei ve hram hram asin le, tia tap hlap hlap chung chuan ka chhar khawm pah mial mial a. chutihlai chuan kan thawm kha lo hre ve in ka pa mu tawh pawh chu a rawn thochhuak leh. Ka lo awm dan maksak zet chu a rawn hmuh rualin a țhawng ve hle a, mak a tih hmel khawp mai. Tichuan, zawimuanga ka bula rawn thut thlak ve pahin ka darah a rawn vuan a. Thil thleng vel chu uluk takin a ngaihtuah niin ka hria. 

‘’ Mambawih, tap tawh suh le. Heng te hi chu a thar kan lei leh mai dawn alawm. Ti rawh le, han thianfai la mut a hun tawh a nia’’  ti chungin ka sam te chu a rawn chul hliau hliau a, kei erawh, ka lung a lo chhe tulh tulh thung. Eng ang pawhin make-up bawm chu min lei nawn sawmsarih mahse, Hmingmawia min pek ngei kha a nih loh chuan a hlutna tur k hre tawh lo ve. 

Khawvar hnuah pawh kei chu ka chunga ka nu chet duh dan avang khan ka la lungawi thei thlawt lo va, ka tho chhuak duh eih lo. Mahse, hemi ni hi inrinni a nih ang in ka pa pawh inah a awm ve hlauh a, room-ah min rawn luhchilh in min thlem heuh heuh reng.

‘’ Mambawih, vawiin chu in lamah ka awm nileng hman dawn tho a, aizawlah han chho ta che! I duh leh naktuk pawh I cham tlang nghal a nga, han kal rawh. Chuan, taka, kan sikul thil pawimawh chah duh ch ka nei nghal bawk a, I rawn ti fel mai a ni ang chu. Le, ti rawh le, tho la scooty saw va tifai phawt ta che’’ 

Ka pa thusawi vang chu nimaw, ka phur thar hluai a, ka meng zau nghal kawk bawk. Chutah, engdang sawi set set loin ka inperh tho nghal zawt a, ka phur takzet. Ka pa chu duhthawh zeta kuah leh te te in khum atang chuan ka țum thla chhak a, scooty silfai tur chuan pawnlamah ka dawk chhuak nghal. Tichuan, ka tihtur ang ang ka tih zawh fel hnuah Hmingmawia chu ka kal tur thu hrilh in, min lo hmuak tur pawhin ka ti nghal bawk a. Ani pawh alo phur ve khawp in ka hria. Mak takin, hetia ka aizawl chho tur hi ka nu khan min sawi buai sak miah lova, min be chuang bawk hek lo. Mahse, chung thil mai mai te chu ka thengthawngah hian an thawkna tehchiam lo. Ka pa ka lamah a țang tlat a, chhungkuaah pawhnise thu neitu zawk a nih ang in ka nu pawhin a hlau der thiam ve thin tih ka hria. Hetiang hi kan dinhmun ni mahse, ka nu chu ka hnual suat tur tihna erawh a ni hauh lo ang.

Aizawl ka thlen lai hian khua a thim deuh chhulh tawh a, Hmingmawia pawhin a intiam lawk tawh ang ngeiin min lo hmuak thlap. Tichuan, ka innghahna tur ka pa farnu neihchhun, ka nî Sangpuii te in lamah min thlah leh phawt a, kan inthen leh ta rih a ni. 

Ni Sangpuii hi ka pa farnu neihchhun niin, a fel takzet a, chhungkua a ngaihsak thiam in a huikhawm thiam hle a, tutemah hi min thlahthlam ngai lo bawk. Chutiang zelin, a pasal fanaute pawh hi an zau em em a, min duat thiam thin hle. Aizawl ka kal chang hi chuan anni hnen tih loh, midang bulah ka thleng ngai lova, a bikin, ka nu chhungte bulah ngat phei chuan ka innghat duh ngai lo. An hausak zia chu thuhran nise, an changkang leh lutuka ka awm thiam ve lo a ni ber e.

Zan khatna atangin Hmingmawia pawh a rawn leng nghal a, nuam kan ti dun hle. Inchhung lumah ngei, thlamuang leh mitmei ven tur awm hauhloa duh ber te nen han awmdun tluka hlu chu a awm lo in, a nuam takzet. Inrinnia chho ka nih ang in, a tuk chawlhni ah pawh chuan nileng deuhthaw hian kan leng kual dun a, kan hlim dun takzet. Kan haw lamah chuan a inluah ah min hruaiin, a nuam reuh phian a, mipa , mahni chauha khawsa leh rawlthar chhuak hlim hlawl awmna atan chuan ka rinai daih in a felfai phian mai a, amah ka duhna te pawh chu hetiang te te atang hian an pun phah thin niin ka hria. 

Thingpui te in dun leh te te in, min thlah haw mai dawn emaw ka tih lai chuan khumah min pawt thu leh a, duhthawh zet hian min kuah zui ta vawng vawng. Min thlakhlelh zia ka hriat tluk zetin keipawh hian ka thlahlel ve bawk. Ka lo kuah let ve chial mai. He hunah ngei hian a ni, kan insumtheihna zawng zawng te chu tihchhiatin an awm a, angel te dai ngai loh ram kan fan dun takna hmasa ber chu.

Thawk ham ham paha min rawn kuah deuh chial chung hian,

‘’ Zanin chu riak ve law law mai la’’ a rawn ti sup. A hmel thutak em em mai chu lo en let vat in, 

‘’ A chi loh. I bulah ka riak dawn tih hi ka chhungten an hriat vaih chuan ka nasa lo dawn lutuk’’ ka tih lawm lawm pawh chuan chhuanlam tur min hrilh in, a tawpah chuan ka nî te pawh ka va be ta nge nge a nih kha. Ka duhna te phalsak ka han ni chiah erawh kha chu, k hlim em em a, a nuam ti ber berah ka  țang leh roh bawk si. Rawng te chu bawl dun in, kan inchhaih nui har har reng a, kan hlim a ni. 

Zanriah kan eikham fel meuh chuan tihtur dang vak awm tawh heklo, khumah bawk kan awm dun leh ran tawh a, fiamthute thawhin kan nui awr awr reng mai. Duhtak te nena tibuaitu awm miahlova, khum khata zal dun leh, zan hun hman dun mawlh mai chu a nuam in, a tluk thei tur dang reng reng ka hre lo. Chutia, nula leh tlangval inhmangaih tawn tak leh, thisen lum ve ve innawk ta reng chu a vawikhat dang leh atan sual ah bawk hnuh luhin kan awm leh a, insum hi a harsa a ni. Ka hmangaih hnenah hian ka thianghlimna leh zahawmna neih ve chhun ka hlan tawh a, tunah chuan neih zawng zawng ka hlan fel ta. A ta ka ni a, atan hian ka inpumpek bawk a, amah ka duhna leh hmangaihna te pawh chu a zual ta sawt nimai hian ka hre nghe nghe. Ka inchhir miah lo bawk a ni. 

Tunah chuan kan inthen hran a lo hun leh ta. Kan huphurh dun lutuk chu kan tap lo chauh niin ka hria. Hreh zet hian kan inthlah liam a, inhmuh leh thuai pawh kan tum bawk.

Khua ka thleng a, inchhung ka luh rual rualin ka nu thinrim hmai sen ka hmachhawn nghal. Min dinchilh deuh run mai bawk si a, a zamawm duh angreng hle. 

‘’ I nî te inah I riak lo ! Khawi hmunah te nge I han fawr kual vel a Ramthanpui, dawt min hrilh hlek suh ang che. Sawisak hrep mai che hi ka duh a nia’’  ti nghal bawrh bawrh in a inhumruh nasa hle tih chu ka hriaa, keipawh sawi tur hrelo in ka dinna ngaiah ka la ding zum ve reng ringawt. Mahse, chutihlai chuan vanneihthlak takin ka pa kha a rawn inrawlh ve vat a.

‘’ Mama nu vak vak thin hi aw. Sangpuii pawhin a thiante inah a riah chhuah thu a rawn sawi vek tawh kha mawle. Thinrimna tur ringawt hi zawng lo the u a, inbula awm pawh hi a hahthlak lulai em mai’’ tih pahin a tv en lai a hmet thim hmak a, room lamah min luhsan ta daih. Khatiang reng renga ka pa lungawilo hmel leh,ngainatawm loh awrawl kha ka la hrengai hauh lova, ka hlauthawng takzet. Tin, ka nu tan tak pawh chuan ka hlauhthawnpui deuh avnagin ngawih ah ka tlak hlauh a, ka thiamchanna tur chuan chhuanlam dang takngial pawh ka siam ve duh ta lo law law. Ka ngamlo a ni zawk mah. Chutiang na na na chu ka nu pawhin min tih zui vak ngaihna a hre ta lo nge, ngawi renga inher tau sawk in, room lamah min luhsan ta nge nge. Ka thaw zui huai mai.

Aizawl atanga ka haw thlak hnuah thla pawh a liam leh ta der mai. Keimah hi ka diklo ru riau in ka inhriaa, ka thla tih bi a danglam ta! Ka tihngaihna hre lo leh, ka inbunruahna tur duh lutuk chuan ka thiantha ve ber Rinkimi chu hrilh chawt in, ani chuan a rang thei ang bera pregnancy test kit lei vat tur chuan min lo ti ta khauh a. chu pawh, ka lei ngam loh thu ka hrilh leh tak zelah chuan amah bawkin min rawn leisak in, min rawn pe vang vang. Thiantha neih hi chu a hlu takzet ka ti mai. Tichuan, a ruk thei ang ber In chu test kit hmang chuan ka zing zun hmasa ber chu ka test ve ta rawih a, chutah, ka rinlawk deuh, rin ngam chiah siloh ang ngeiin result chu a positive ta tlat mai le! Lawm tur nge tah tur tih pawh ka hrethiam lova, awm dan tur ber chu ka hrethiam lo thlawt a ni. Ka buai vek. Mahse, sawi tawh ang khan, thiannu Rinkimi  bawk chu a tangkai leh ta. Eng thumah ka sawi ngam thlawt loh avangin Hmingmawia pawh min biak sak vek a, chutah chuan inruk mai chu min rel thluksak ta a nih kha! 

Hmingmawia'n a theih ang anga lo inruahman lawk tura min tih ang in, ka lo insiam ru ve nial nual bawk a. hetah hian kan tum anga kan awm thei a nih chuan, Rinkimi te huan thlam lama tlanchhiat kan tum phawt a, ei leh in tur lam pawh a lungngaihthlak hran lo a niawm e. keipawh ka chhungte chuan min ringhlel mai ang tih hlau in a theihna lai apiangah ka insum ve nasa em em a, chawhmeh rim tihtheih loh tlat ka neih țum pawhin chhuanlam ka siam a, chaw eiloh ah ka tlak leh mai thin. Chutiang zel in, ka theithur chak huam huamna chen chuan ka tilang hreh em em a, ka insum ngar ngar. Hrehawm duh mai mai tak a ni. 

A hun a rawn thleng ta. Kan inrukchhuah hun tur mawlh chu. 

Zan lo niin, Hmingmawia pawh aizawl atang a rawn haw thleng ve tawh a, zanrei lamah min hruaichhuah chu a rawn tum bawk a ni. Hemi zan berkher hian kei lah chu ka mut a chhuak hma em em a, zan dar 9 velah te chuan ka ham leh bai bai thin bawk. Ka awm dan zet chu ka nin luatah dar 9 a rik meuh chuan khumah ka lawn a, ka mu zui ta hmak. Ka lo muhil ta a ni chek ang chu, ka phone ri ral ral reng chuan min tiharh chiang hle a, sana ka han en nak chuan zing lam dar 2 lai alo ri tawh nia. Khai leh! Inperh tho nghal awt in, phone chu ka chhang vat a. Hmingmawia pawh a lo țeu hlar tawh mai. Ka inthiam lo angreng hle. Tichuan, tih dan turte min hrilh in, kan kawmthlang kawngkawi thim laia a din reng tawh thu chu a rawn sawi ta a, thawmdim takin kawrlum te ka ha zui sawk sawk a, ka bag ken tur racksack pawh ak tha leh thuai thuaiin, thawmdim tak bawk chuan room chu ka chhuahsan leh. Kawngkapui mawlh chu dim theihpatawpa hawng zui leh rak rak in, pawn khaw vawtah chuan ka chhuak ta. Khua lah chu a thim chiang nasa mai bawk si nen, chhete chuan hlauh ruk deuhna min pe ve a, mahse, Hmingmawia’n min hmu thei vek tawh tih ka hriatna chuan  tlemin ka eng a ti thawl ta deuh. Kal zel in, a awmna nia a sawina hmun ka thlen thlak chuan alo awm reng tawh tak taka. Tichuan, muangchang tawh lovin thiannu Rinkimi te thlam lam pan chuan kan kal zui nghal nal nal.

Kan tlanchhiatna hmun hi hmun nuam leh thawveng halh mai nimahse, hemi zan berkher hi chuan ka thla a timuang zo hauh lova, thinphu dep dep chung leh Hmingmawia kuah bet reng chung khan ka muhil ve țhak zawk a nih kha. Chutihlaiin, Hmingmawia ve thung chu a muhil miah lo tih ka hriaa, a zing tho hmel te pawh chu a mitmeng a diklo in, a meng bui lâk thei. Mahse, ka lakah chuan zep bo a tum nasa tih hriat tak hian a muttui thu leh mumang bo thaka a muthilh thu a sawi nasa a, ka awihsak em em hran lo thung. 

Kan awm chhunzawm lehzel dan tur sawiin, rawng kan bawl pah bawk a. kan tum lawk dan ah chuan, zanin chu hetah hian riak leh phawt ila, tichuan, a tuk chawhma lamah khawchhung chu lut in aizawl kan pan daih mai dawn a ni. Hlawhtling thei tak ang imaw. 

Tukthuan eikham hnu chuan tihtur dang vak nei tawh hek lo I, ka thei thur rawp zia a hriaa, huan mawng lamah chuan thei lawh tur a awm takin tiin a chhukthla hnak hnak a, a kal liam tur chu thlirin ka lo khawngaih ru veng veng thung. Tunah hian a chhungkua enkawl mek in, a rilru pawh a hah ve em em a, chutilai karah kei hian buaina hlir ka lo thlen ve leh bawk si. A tan hian ka va han laktlak dawn loh tak em tih ringawt chu ka ngaihtuah tawh. Ka inthlahrung a, hrehawm ka ti ru em em a, tihngaihna dang lah chu a awm tawh chuang bawk silo. Hma hun hi a thim ngawih ngawih ni te pawhin ka hriaa, ka thlir thui ngam thlawt lo. Mahse, a hun taka che thin Pathian nung neitu kan nih ang in, amah ah chauh ka innghat ngam tawh a ni ber e.

Huan mawng atanga a rawn let leh chuan nimbu tui hmel em em mai hi a rawn hawn chho nual mai a. chil put ru zet in ka lo nui har har tawh. Râwp tih hriat fea ka thei thur ei lai te chu lainatna mitmeng nen min lo thlir reng tih ka hriaa, nuam lo chu ka ti ve pah reng. Mahse, ka chakna hi a rei lulai tawh em a, ka insumthei thlawt lo zawk a ni.

‘’ Kan naute lo piang tur hian nangmah hi chhun ber che sela, a hmeltha mah mah dawn lutuk tlat’’  tih pahin ka dul bawr vel chu a rawn zut leh mial ,mial thin a. chu thil vang chuan keipawh ka lo nui ve sak. 

‘’ Mate, chhun tur diktak zawk chu nangmah hi I nia. Naupang hi chuan an pa te hi han chhun fuh em em mai se la a dik vek mai’’ ti chungin lungawi f mai hian kan hma lawka thla de no riai, rawn lawr dek dek lam chu ka hawisan ta daih a. Ani erawh chuan thawk sak sak pah hian ka kut a khal neuh neuh reng a, ka dul bawr vel bawk chu a zut nawn leh thin.

‘’ Khawiah chuan nge an awm a? Zahpuiawm dun lutuk mai’’  ti hlawk hlawk thawmah chuan ka mu tui lai ka harh kawk thei a. Hmingmawia phei chu a lo tho daih tawh a ni ngei ang, thlam chhungah chuan hmuh tur a awm miah lo. Ka tho chhuak deuh chiah tih in thlam kawngkaah tak chuan ka nu a rawn ding ta thut! Tum loh lutuka ka nu hmel ka hmuh thut vang chu ni maw, ka mit deuh sulh nimai hian ka inhriaa, ka tha a zawi nghal vek thei. Amah mai ni lo, a unaupa, ka putea hmel rum zet ka hmuh chhunzawm leh hnu phei chuan hlauhna hlir in ka khat nghal vek tawh a. ka khur ru der der ta mai. Chutah, ka nu ngei mai chu ka awmna lamah rawn vung pheiin, dimlo zet hian min phih zui nghal lawp a, ka ban pawh chu a na zawk thei. 

‘’ Laktlak loh nu, tunah hian I rawn haw nghal lo a nih chuan e, tuithlar I hlawh ang tih hi hre rawh’’  ti țhat țhat in thlam chhung atang chuan min pawh chhuah a tum nghal a. theihpatawp takmeuh in thlam ban vuan chung chuan ka lo țang kawh ve ngar ngar bawk. Min chelh behna a kut mawlh chu , phelhsak tum chawt chawt chung hian,

‘’  Min thlah mai the. Tuithlar chungchang chu inthu thu ni rawh se, pawi ka ti lo. Ka hmangaih ber leh ka naute pa bulah  hian ka awm reng dawn’’  ka hmai chu a rawn thip nghal zawk thei. Rum elhkhena min la melh run run chung hian ka nu bawk chuan,

‘’ I zaktheilo hlemai. A fa te pawh ilo pai lehzel a maw!? Khawnge, haw ila, thi khawp hialin ka han sawisa the ang che. Tluanga, min rawn pui vat rawh’’ ti leh sawk sawk in, thlam kawngka bula lo ding reng ka putea pawh chu a rawn phei nghal vat. Tunah chuan pahnih leh pakhat kan ni ta. An tha tangkawp mawlh chu ka hneh zo thlawt lo a ni e. Hmingmawia hming lam mawlh mawlh in theihtawp takmeuh meuh chuan han au chhuak ve mah ila, khawiah nge alo kal hman ka hre biklo. A rawn inlan thei reng reng silova, ka mangang lutuk chu che zui tur awmloin ka tlawm ta hi a ni ringawt.

Motor chhunga min nam luh hnu thleng pawhin ka hmangaih Hmingmawia hmel reng reng kha hmuh tur aal awm hauh lova, ka hrethiam thei thlawt lo. Khawiah chuan nge alo kalbo hman ang le ka ti.

In kan thlen hnuah pawh ka nu bawk chuan ka phone chu min laksak zui hmak in, a switch off zui hmak. Ka tahchhuak lutuk chu ka duh ang thal pawhin ka tap hleithei lo zawk a. ka awmah hian min hnawh a, a sak tlat. 

‘’ Tun chinah chuan pawn pawh I chhuak tawh lovang. I hria em? I naupai chungchang pawh kha tuman an hriatbelh tur a ni lo! Hre rawh. Ka duhlo ka tih chuan ka duh lo a nimai. Zaninah iu mama pawh  arawn thleng tawh dawn a, eng thilmah thleng lo ang hmak in awm ang che’’  ti leh piap piap in roomah min kalh khum a, ka zawi nghal vek thei. 

Ka nu in, I u mama tia a sawi kha ka unau neihchhun niin, tunah hian regiment tanglai mek a ni a, kum khatah hian vawihnih chauh te a rawn haw ve thin. Kumin atan cuan tun hun hi a vawikhat chhuti rawn neih ve na tur a ni a, a lo haw mek  a nih chu. Ka ngai a, ka hmuh chak thin tehlul vei nen, tun tum zet chu ka huphurh takzet zawk a ni. Eng thilmah hi tunhma ang khan a thleng dik thei tawh lova, chhungkaw inlungrual leh hlim em em pawh kha kan ni tawh bawk hek lo. Engkim bultan tu leh thiamlo hulhual chu ni mah ila, ka tihluih hi pakhat te pawh a awm bik lo asin. Duh thlang thei ni ila, keipawh hian hetiang em em hi chu ka thlang bikin ka inring lo. A fanu ka nihna zawnah ka nu hian hrehawm ka tuar mek a ni tih te hi hrethiam ve se ka va han duh tak em.

Tlai lo ni leh in, ka umama pawh aizawl atang chuan a rawn thleng ve tawh a, ka pa nise a hna atang a rawn bang ve tawh bawk. Tunhma boruak ang kha chu nise, ka u hmel ka hmuh rual rual te chuan lawmin ka zuang leh tawh emaw a ni a nga, ka hlimin ka bengchheng leh tawh ngawt ang chu. Chhungkua chawk hlima boruak siamtu ber ka nih thin ang khan tunah pawh ka ti ngui leh mek chu a ni si a. mahse, ka nu thung chuan dawt thu lo hrilh hmak in, ka damloh thu  a sawi a, ka pa chuan thil awmzia engkim hre vek mahse ka umama hriattur atan erawh engmah a sawi chhuak duh lemlo thung. Ka hun tawn mekah hian eng thilmah in min tiphur zo thlawt lova, ka hmuh phaka awm reng reng te chuan lungngaihna min thlen nimai hian ka hria. Min tichau zual ngawih ngawih bawk.

Room chhunga khung beh chawt ka ni a, sittingroom chu thlen phei ve pawh phalsak ka ni meuh lo. Mahse, heng thil zawng zawng hi ka umama leh ka pa te chuan an hrethiam pha ve hauh lova, ka u phei chuan ka damloh vanga inkhungbet chawt ni turah min ngai tak tak a, a ngaih pawh chu a tha lo hran lo. Ka u hnenah hian thil awmzia engkim hi ka hrilhfiah vek law law dawn emni aw tia ka ngaihtuah chang chuan hrilh tak tak pawh ka tum hman rum rum thin a, mahse, ka ngaihtuah chian leh deuh erawh chuan buaina lian zawk a thleng thei dawn a ka hriat avangin leh, a chawlh chhung reilote tal hi chu hlim engthawl takin hmang se ka duh pui leh thin avangin ka ngawi hlen ta mai. Rilru hi a thawveng lo takzet a ni e.

Thlam atanga min hruai chhuahna pawh chawlhkar khat lai chu alo liam ve leh ta. Hmingmawia thawm riva reng reng hriattur ala awm lova, ka phone nise min chhuhsak daih bawk nen, ka tan hian kawng a ping hluah hluah a, ka thiannu ve ber Rinkimi a rawn len ve chang hian chanchin chu lo zawt ve thin bawk mah ila, ka nu hian min vil uluk em em zel bawk nen, eng tak tak mah kan sawi thei ngai lo a ni ber. Rinkimi sawi dan thenkhat ah chuan, Hmingmawia rilru na leh tihngaihna hre lo chu zu lamah țuan zeuh zeuh in, a pa zurui nen pawh an intihbuai fo thu te min hrilh a, aizawl lamah pawh a la chho thei meuh lo niin a sawi. Chu zawng chu a chanchin ka hriat theih chin nimahsela, min ti mangang a ni. A thinrim rilru na hian thiltha lo tak tak tiin, a thlen tir mai ang tih ka hlau thar ta hle a, tihtheih lah chu ka nei chuang miah bawk si lo. Thaw hi ava han veng lo tak em.

Chutih nakalaiin, zan khat ka mu chu zanlaiah ka thangharh hlwl mai a, ka han inhriatchian meuh chuan ka pum leh tai bwr te, ka taksa pum mai chu alo na chhuak vek tih ka hre nghal. Ka han indap kual nak chuan karei leh! Ka taksa hnuailam ah chuan thisen a lo awm nuai tih ka hre ta. Thei leh thei lo hian bathroom ah ka vak lut a, ka chau a ni. Ngaihtuahna fim ka hman leh theih meuh chuan ka pum chhunga naute kha a awm tawh lo tih ka hriaa, a bo hmak! Ka naute kha a awm tawh lo a nih chu! Hetiang thil hi engtia thleng nge a nih zawk le. Nau hi engvanga chhiat ngawt nge ka nih. Naupaiin an huat tur chi, ei leh in ka neih awm ka hre miah lova, damdawi nise ka ei ngai hek lo. Ni leh lo, zanin zan tir lamah khan ka nu ngei mai in juice min rawn pe a nih kha. Khatah khan nau chhiat theihna tur damdawi alo pawlh a ni thei a ngem? Zan dangah pawh juice chu min rawn pek fo avangin hlauhthawnna nei lo hian ka lo in ve tawp a nih kha. Hrep tak chuan le! 

Tap zawih zawih chungin ka mu leh a, ka muhil thei tawh lo. Ka taksa ruak ta huai te, zâng ta sawt mai te chu ka hre chiang em em a, ka pum chhunga awm reng thin ka naute mawlh kha ka ngai a ni. Ka duh bawk. Tichuan, mittui tla pur chung chuan khawvar hun ka nghak  tluan ta țhak a. 

Khua a rawn var a, ka nu pawh zing tawngtai inkhawm kal turin a tho hma leh hle tih ka hriat rual chuan ka chhuak zui ve nghal zat. Khum ka thawhsan ruala ka taksa na em em te kha, sawitur hi tamtak a awm a ni.

‘’ Nu, ka chungah hian eng thil nge itih tak hi I hria em? Khawvela nu awm tawh zawng zawngah hian I nunrawng ber mai e. ka haw lutuk che’’ ti khur hlak hlak in ka tap pah reng bawk a, ani thung chuan no lo fahran leh, a ngaihna hriat loh hmel fe hian min rawn en deuh hâw mai nia.

‘’ Eng thil chu nge maw I rawn sawi tak chiam le?’’ rawn ti sup in, chhanna ka pek ve hma chuan umama aw ka hre ta tlat.

‘’ Mami, eng nge thil awmzia? Kha, I pawnfenah te khan thisen a kai niin ka va hre ve! ‘’ tih ri ah chuan hnunglam en in ka nu nen kan hawi rual thawt. 

Umama chu ka hnung maiah hian a lo ding a, kei chu chiang fe hian min lo thlir vang vang tih ka va hmu a, sawi leh mai tur ka haihchham ta.

‘’ I farnu ve kha a â zo tawh a nih kha. Ngaihsak suh. Ramthanpui, I thuamhnaw te kha va thlak la, eirawng va bawl rawh!’’  ti leh hluk in, pawnlama chhuah mai a tum chu, ka lo au zui deuh țhat.

‘’ Nu, hetiang mai mai hi chuan min ti miah suh aw. Nizana ka juice in ah khan eng thil nge min pawlhsak sawi rawh. Umam, nangpawh hian hre ve vek rawh’’  ka tih leh tak nghekah chuan ka nu chu a rawn hawi let rang kher. Umama pawh chu phawk fea meng chung hian a lo che ve det a. A awm dan atang chuan thil awmzia hi a hre lo takzet a, a bangbo hle a ni tih pawh ka hria.

‘’ Mambawih, mama nu, eng thil nge thleng a. zingkar kar atangin inri hluai mai a. E,, Mambawih, I kawra thil kai te kha eng nge ni ta a. eng thil nge thleng mek hi sawi rawh u’’  rawn ti hlawp hlawp tu ka pa chu kan en nghal țhap a. Alo meng phawk nasa fe tawh mai. Aw le, kei chuan thuruk te hi ka zep bo ve reng peih tawh lova, a zavaiin ka naupai dan zawng zawng te nen lam chuan ka pa leh umama hriattur ngei chuan ka sawi fai ta vek a nih kha. Ka sawi zawh ruala an hmel lan dan mawlh mai kha. Thil tha lo lian tham zawk a thlen belh chu hlau hle mah ila, eng thilmah hi ka zep buai peih tawh lo. 

‘’ Awi ah! A na lutuk!’’   ti țhat thawm ah chuan ka harh chhuak leh chiah a. eng dang a ni lo. Ka pa thinrim insum zo lo chuan ka nu chu a hmai alo va ben sak ngei a ni. Ka umama khan ka pa chu rang takin a lo dang bet ve nghal bawk a, kei erawh chu chet chhuah tumna reng rneg nei lovin ka awmhmunah ka lo la ding khawng ve reng ringawt. Ka mittui erawh chu dan sen rual loh hian an luang thung alawm. A na em a ni.

‘’ Vawikhatmah hi zing tawngtai inkhawm tur pawhin chhuak ve tawh suh ang che. Hman ata tawh, nu ber khawsak dan tur ang hian ila awm chhin ngai miah lova, mahse, ka hrethiam zel che. Chu chu hmangaihna vang chauh a ni bawk. Hetiang I nihna tenawm lutuk zawng zawngte pawh hi keiniho hi chuan kan sawichhuah sak lovang che. Mahse, hre rawh. Pawnlam mite hian I nihna an hriat fiah hunah meuh chuan maw, insiamthatna hun I ngah tawh lovang. Kal la, I fanu hnenah hian ngaihdam dil ang che. Chu chu ka ngaihdam theihna che sang ber ni bawk rawh se’'  ka pa bawk chuan thinrim awrawl khauh tak hian a rawn ti leh a, ka nu chu kan melh kar hlawm mai. Hetiang em em a ka pa a thinrim tawh hi chuan ka nu pawhin ngawih a chuh thin ka tih tawh kha. Tunah pawh hian ui dawih zawk ang maiin a ngawi daih tawh a, a mittui chu a tling deuh kung thei bawk. Tichuan, a inchhir tak tak vang pawh ni lo, ka pa a hlauh vang chauh zawk in ka bulah chuan a rawn kal hnai hret a, hreh hmel zet hian ngaihdam chu min rawn dil ta a nih kha. Keipawhin tihtheih dang nei hek lo chu, thinlung zawng zawngin ka sawi chhuak em tih pawh hre lo hian ka lo ngaidam mawl ve tawp a, ka thinlung erawh a dam hauh si lo. Tichuan, boruak pawh chu dai chhunzawm nghal in, mittui tla teuh chung huan room-ah bawk ka tlan lut leh vat a, tap zawih zawih chung hian ka thuamhnaw te chu ka va thlak deuh sawk sawk bawk.

Kan chunga pawikhawih tute, thilsual leh diklo titu pawh hi thinlung zawng zawnga kan ngaihdam chuan siloh chuan a vuak let a na em em a, kan dam famkim tak tak chuang lo a nih hi ka ti ta. Ngaihdamna thu han sawichhuah mai hi chu a harsa lo. Mahse, thinlung hian min tawmpui ve si loh chuan natna dang dang kan insiam zel mai a lo nih dawn hi.

Ka chanchin engmah pawh hrelo in thiannu Rinkimi a rawn leng lut leh hlawl mai a. Roomah hruai lut nghal sawk sawkin  tap zawih zawih hian nau ka chhiat thu te chu ka lo hrilh ve zung zung. Khatihlaia a pawiti lutuk hmel mawlh kha aw, a mittui hial a tlak phah ve nia. Tichuan, ka nu thiltih dan thup then chungin a dang zawng chu Hmingmawia hnena lo sawi ve tur chuan ka chah ta ngawt a. mn hawsan ve ta hram a ni.

‘Hmangaih vangin’ Bzi tochhawng hla ngei mai kha laptop ah play in ka ngaithla deuh vang vang a, ka mittui bawk chu a rawn hnam leh ta. Hetiang reng reng chuan kei hi hun rei pawh ka dam thei dawn emni le, ka tawrh zozaite hi midang hrehawm tawrhna nen chuan khaikhin tlak ni miah lo mahse, ka phur zo mang lo chu a nih si hi maw. Lalpa, kawng min hawnsak hi I tum miah lo nge, min ensan tawh zawk. Ni e, kei zawng, mi tenawm leh bawlhhlawh mai ka ni a, endawng tlak lekin ka nun nise ka hmang ve bawk atin ni. Engkim mai hi ka thiamloh vek anni e, thiamna reng ka nei lo. 

‘’ Chhuak rawh! He inchhung rawn rap leh tur pawh hian tlinna reng I nei lo. Ila rawn kal ngam zawk ka ti hlemai’’ ti bawrh bawrh thawm ka hriat avang chuan khum atang ka inperh tho zawk a. ka hla ngaihthlak lai pawh chu ka off nghal hmak. Chutah, tawng ri ka han ngaihthlak chian ve nak chuan Hmingmawia aw pawh ka hre tel nawk tih ka inhriaa, room atang chuan ka tlan chhuak nghal vat. 

Kawngka bulah chuan ka nu leh umama lo ding in, tuemaw hi pawnlamah chuan an lo nawr chhuak mek tih pawh ka va hmu nghal. Zah reng ka hre tawh lo. An bulah chuan va tlan phei ve nghal in, an inkarah ka va inrawlh kut ve nghal thak a. pawnlama an nawr chhuah nawk nawk pawh chu tudang nilovin Hmingmawia ngei kha a ni tih ka va chiang e!

‘’ Khawi maw’’ tih pah hian pawnah ka tlanchhuak a, Hmingmawia kut chu ka va man zui chat. Chuveleh, umama chu rawn au zui that in, inchhung lamah bawk min hnuh luh a tum nghal zat a. ka nu pawhin țawng zawt zawt chung hian kei leh Umama chu min lo ko ve sek bawk. Mahse, chuti maia awlsam chuan ka hmangaih kut hi thlah ka tum hauh lo.

‘’ Hminga, Mate, lo len I tum emni? Hawh, lo kal rawh’’ tih paha inchhunga luhpui ka tum lai chuan Umama bawk kha a rawn inrawlh leh vat a. Tun țum chu a ti mai mai lo tlat. Ka sam pheng leh khawro zetah chuan rawn țham nghek in, a na kher.

‘’ Lut mai rawh Mawli! Ka sawi tam vak peihlo a nia’’ ti lh nghut in, Hmingmawia ka vawn behna pawh chu min phelhsak nghal vat a. Hmingmawia pawh chuan min ngaihtuah tih hriat taka min lo melh ve țawk țawk chung hian,

‘’ Lut phawt mai rawh URampui. Hun dang ala awm leh mai ang’’ tiin a inher a, a kal zui nghal nal nal.

Kei chu inchhungah min hnuk lut in roomah bawk min theh lut leh rawp a. chhuatah chuan thu zui hnawk in, ka tap leh ta hlarh hlarh mai. Tihtheih hi ka va han nei lo tak em aw. Tunah chuan ka Umama takngial pawhin min țan tawh lo chu a ni si a, ka pa nise, an hna thil avangin aizawl lamah hun rei fe chhung chu a cham ala ngai dawn bawk si. Ka khawvel hi a chep hluah hluah a, mi tang diktak ka lo ni ta. Engtin nge he hremhmun atang hian ka talchhuah theih ang. 

Khaw var engmawi tak leh, ni rawn chhuak siar siar te pawh chuan beiseina pakhatmah min pe thei tawh lova, min tichau zual ngawih ngawih zawk a ni. Nitin maia tih dan ngai hlir, awmphung danglam miahlo han tem eleh tur chuan chakna leh phurna reng hi ka nei tawh lova, ka khawvel hman mekah hian ka alwm zo tawh thlawt lo a ni e. 

Ni khat Rinkimi rawn leng chuan idea danglam tak mai hi a rawn nei leh ta a. chu chu, Hmingmawia nena kan inhmuh theih dan tur chungchang a ni nghe nghe. A sawi dan chuan Hmingmawia chu zantin hian an in lamah alo va chuangkai thin a ni awm a, a chang phei chuan mittui nena a haw leh thin thu te nen lam min hrilh. Anni chhungkua pawhin an lo khawngaih thei em em a, ruahmanna han siampui dan vak erawh chu an hre miah silo. Mahse, reilote tal kan inhmuhtheih nan chuan Rinkimi’n ruahmanna alo siampui leh hram a, chu chu, zanin ngei hian thleng thei sela a duh nghe nghe bawk. Tichuan, an ruahmanna ang ngeiin ka chhungte mut reh hun chu ka nghak ta ngat nagt a. Rinai takin an mu har hrep lehnghal. Mahse, vanneihthlak takin zan dar 9 leh a chanve velah chuan an reh zui ta thap. Chuveleh, kei chu thawmdim thei ang bera tho nghal sat sat in sitting room lamah ka chhuak phei nghal a. pawn ka chhuak leh chiah chu khua pawh alo vawt kher. Mahse, ka thawveng deuh huai thung.

An sawi lawk tawh nag ngeiin Hmingmawia chu hmuh phak maiah alo awm reng tawh a. chiang fea min lo melh vang vang lai chuan a bul hnaiah phei vatin ka va kuah zui chawt. Ani pawh chuan nghet zet leh, min thlahlel tih hriat tak hian min lo kuah let ve vat a, ka thla a muang suai suai nimai hian ka hre hial. 

‘’ URampui, engtin nge ka rilru engkim mai te hi ka han phawrhchhuah tak ang le. I tan hian ka tling zo thlawt lo a ni tih lah kan hre vek a, heti cung chunga inkawp reng hi chu a harsa ve thin ngawt mai. Diktak chuan tunah pawh hian min zui haw duh dawn ta la ka hruai haw hreh miah lo che asin’’ rawn tichhuak sap sap in, kei chu a awmah ka lo bei deuh hlun a, sawi ve tur ka ngah lutuk na lamah hian sawi chhuah hmasak tur ber ka hrethiam lo zawk fo a ni. Reilote chhung kan ngawih dun vang vang hnuah kei chuan,

‘’ Mate, kei hi alawm itana tling zo lo te chu. I hriat vek tawh ang in, kan naute lah ka venghim zo silova’’  la tih lai chuan ka hmui a rawn hup chat a. chiang kel kawl hian kan in en ta reng mai. Chutah, zawi sap bawkin, 

‘’ Chutiang sawi suh. Mipa ka nihna ah I nat dan tur chu hriatthiampui vek lo che mah ila, I na dawn tih ka hria. Keipawh ka na tho. I hrehawm tawrh zozaite hi a nat tawh sa nen, tihnat belh che hi ka duh lo bawk a ni. Heng zawng zawng te hi keimah vang veka thleng anni tih ka hriat hian ka inthiam thei mawlh lo. Min hrethiam hram dawn a nia’’ a tih ve lai chuan sawi lawk pawh awmlo in a hmuiah chuan ka han fawhsak chawt a. A țhawng ve deuh a ni chek ang, a meng zau kawk thei. Zawimuanga inthlah leh riai riai in, ka biang tawn tawna rawn dawm chung chuan chiang zetin min la en reng.

‘’ Tunah hian min zui haw duh a ngem’’ 

A rawn tih leh lai chuan thil tamtak ka ngaihtuah kual a, ka theilo tih hi chiang takin ka hria. Ka duh dan zawng zawng hi tun atan chuan umzui a, ti hlawhtling thei ka ni lo tih pawh ka hria. Ka tan chauh ni lo, a tan pawh hian a pawi thui dawn tih hi ka chiang tlat a tin ni. Ni e, tunah hian ani hi umzui leh ngat ila chuan , ka chan chuan maian chan pawh a tluk kher awm love. A chhan pakhat pawh, ka hian tih hreh engmah a nei dawn lova, ka pa nise, a nawr luiin a bum thei dawn lutuk tlat bawk. Ka putea pakhat zawk hi police SI awm ve in, min chhui zui tir a tum a, chutah chuan thiam lohna nei miah lo ka bialpa chu case siamsak chawpin an man dawn tih pawh min vau lawkna thu hlaah khan an sawi fel vek tawh. Chuti chung chung chuan engtin nge he pa hi ka umzui ngam tehlul ang. An thutiam ah hian an rawn ding ngei bawk ang tih lah a chiang nasa mai si a. ka tan chuan a thawpik thlak hluah hluah asin. Mahse, heng thil vel te hi amah Hmingmawia bulah chuan ka sawi lang duh miah lova, heti em em a ka chhungte’n an hmuhsitna leh diriamna hi hriat belh fo lo se ka duh vang pakhat a ni bawk awm e. chuvang chuan hemi zan pawh hian a mi sawmna chu hreh tak chungin ka lo hnial leh ta zawk a ni. A tir chuan a han hrethiam lo lek lek dawn a, mahse, kan dinhmun khirh turu zia hria in, a nem zui leh ta chauh.

Hmingmawia pawhin a hna ngai thawk leh turin Aizawl bawk chu min pansan leh ta. Inhmu fo theilo mah ila ka ngai em em a, ka ruak huai nimai hian ka inhre bawk. Hetihlai pawh hian ka phone kha pek let ka la ni lova, khua a har thin khawp mai. Laptop atanga facebook connect ka tum lah chuan kan wifi password an lo thlak daih mai a, ka tan a thawpik thlak zual takzet a ni. Mahse, vanneihthlak tak hian ni khat chu, ka nu leh ka umama awmloh hlan in ka pa hnenah password chu ka zawt chhuak thei ta hlauh a, ka lawm kher. Tichuan, facebook velah pawh ka online ve leh thei ta e. Tlemin awm a nuam a, a engthawl thlak ve ta deuh alawm. Chutah, thil hrechhuak leh zawk in, fb atang bawk chuan Hmingmawia leh Rinkimi chu ka va be ta thin a. Rinkimi zawk chu a active vut vut bawk a, min lo chhang let zung zung mai. Mahse, ka biak duh ber Hmingmawia zawk hi a online khat riau mai a, ka message pawh vawikhat chiah ala reply mawle. Aizawl a chhoh atang khan thla hial a vei leh tawh a ni a, min ngai ve miah lo zawk nge maw ni. A ti ang lo ka ti hlemai. Ka down nghal vek thei. Engemaw chang chuan a online reng pawhin ka message chu a chhang duh miah lova, hei hi min ngaia min thlahlel em em tu Hmingmawia chet duh dan ni tur atan chuan ka awih thei lo. Hei leh chen hi mumal tak pawhin kan inbe thei tawh lo a ni a, chutihlaia, kan inbiak ve theih tak veleh a a han induh ta tlat mai hi chu ka la na ve thlawt. Min haw ru viau zawk tihna emni ang. Chutiang turin a pawi ka sawilai ka hre miah bawk silova. A chhan han zawt ila, workshopa an buai thin thu leh, zanrei tak tak thlenga hna an thawh thin thu chu min hrilh ve zel a, keipawhin a sawi ang ang te chu pawm lo ru tak chungin ka awih ve zel mai. A bak tihtheih dang ka nei chuang hleinem.

Aw le, tunah chuan hun pawh an liam ve bek bek a, Hmingmawia pawh aizawlah chuan la awm ve reng in, a hlawh atang chuan amah leh a chhungte chu a rawn chawm thin a. tunah chuan a pa pawh khan zu te chu thlah chho ve hret hret in, an chhungkua pawh an khawsak a pangngai țan ve viau tawh. Hmuh pawh an nuam sawt khawp mai. Chutiang zel in keipawh, ka chhungte chuan min thlah zalen ve hret hret a, mahse, pawn chhuah erawh chu an la phal lutuk chuang lo. Tin, ka phone pawh kha min la pe let duh miah lo bawk a, mahse, laptop ah thildang tamtak ka khawih thei a, ka mi biak duhzawng te ka be thei tho bawk nen, ka awm thiam tawh viau zawk e. Pawnlama ka chhuah ve theih chang apiangin Hmingmawia te inah ka kal ziah a, an chhungkua hi chuan harsatna min siamsak miah lo tih hi ka hre nawn awn awn thin.  engkim hi ka nu harsatna siamchhuak vek anni a, buaina zawng zawng te pawh hi amah vang vek an ni ka ti ngam sak. Chutihlaiin, hmingmawia nu lah hian ka hmel a hmuh tawh hi chuan a fapa hmu tura Aizawl kal puiah min sawm fo lehnghal a, khawvela ka thil chak ber nimahsela, phalsak ka ni miau si lo. A hahthlak takzet a ni.

Ni khat chu, chhuat nawt chunga ka lo zai rat rat lai hian thiannu Rinkimi a rawn tleh lut hlawl mai a. A hmel a pawrin a hlim lo hle nia ka hriat avang chuan phawk fe hian ka lo en deuh tlawk tlawk ringawt. Chutah, a thut hahdam hnua a thu rawn sawi zet chuan min va han deng na chiang tak em! 

‘’ Rampui, ih, tap suh aw!’’  ti hmasa te tein a han thaw leh halh phawt a. kei chu ka lo hmanhmawh ru tawh nasa.

‘’ eng chungchang nge ni ta a’’  ka tih leh chuan hawi kual zak zak chungin, zawi sap hian,

‘’ Hmingmawia chungchang a nia’’ 

Chuveleh, ka chhuat nawh lai pawh chu dah fel sawk sawkin a bulah chuan ka va insawn zui tharh a. ka hre chak tawh takzet a ni.

‘’ Han sawi vat vat the. Ka nghakhlel lutuk’’ tih paha ka han thu fel chiah chu, he thu hian min deng zui ta a ni. Ni e, Hmingmawia nupui ruk thu ngei mai chuan! Ka tha a zawi nghal vek thei a, mu leh mal pawh nei lo hian ka riat zui deuh nawk nawk. Engtin nge ka tih ang. Hmingmawia chuan nupui a rawn hawn a maw! Hetiang thil hi engtin nge a thlen theih zawk le. Kei chu a vawi engemawzat nan tihnat in ka awm a, ka tliak nawn leh ta. 

Rinkimi haw lai reng reng ka hre lova, ka chhungte rawn haw lai lah ka hre chuang bawk hek lo. Ka nung ve mai mai hi a ni ber ang chu. 

Engtin nge hetiang thil hi a thlen theih zawk le. Dawt chu an sawi silo maw. 

Ka nu lah chuan ka rilru chu tihnat belh tum niawm fahran hian Hmingmawia nupui ruk thu ringawt chu min sawi rik khum sek lehnghal a. ka pa in alo khap ta hial a nih kha.

A chanchin ka hriat dan zet chuan min țhawn nat em avangin zan ka mu hleithei lova, chaw nise, kuttum tiat takngial pawh hi ka ei hleithei silo. Hun reilote chhung khan ka tla rawk rawk a, chhe chak tak ka ni. Mahse, ka hmangaih kha a hlim a ngem le. A nupui thar kiangah chuan a thinlung zawng zawngin a hlim ve a ngem le. 

Rinkimi min hrilh leh dan chuan, a nupui ruk chhan pawh hi keimah vang ngei alo ni a. Ni e, kha zan, kan inhmuh hnuhnun ber zanah khan lo zui haw duh ila chuan, ni leh lo, ka zui duhloh chhan kha chiang takin lo hrilh tlang ta law law zawk ila, hetiang thil hi a thleng kher lo maithei asin. Ka lo mawl em a ni e. ka tih awm tawk lek lek hi engvanga keimah bawk hian ti leh thin nge maw ka nih le aw. A tuarna tu chu keimah tho ka ni leh thin si.

Ni engemawzat a liam hnuah, ka lung hi a dam thei tak tak dawn chuang lo tih hria in Rinkimi min sawmna ang chuan mo thar en ve pawh chu ka remti ta nge nge a. Hreh hle mah ila, kal ngei chu ka duh ve bawk si nen, Hmingmawia te in lam pan chuan kan inzuichhuak ve ta rawih a nih kha.

Hmingmawia'n ka hmel a lo hmuh rual chuan a awm dan zawng zawng a hloh vek tih ka hre mai a, melh takngial pawh min melh tha ngam miah lo. A nupui erawh chuan kan nunhlui te kha hriat nei ve hek lo le, tha takin min lo be siam siam thung a, a fel hmel khawp mai. Amah Hmingmawia chauh nilo in, a chhungte ngei pawh kha an mitmeng leh awm dan atang chuan ka lakah an inthlahrung tih ka hre thei a, ka dem hran lo. An fapa thiamloh ni lovin, keimah ngei hi. Ka mawl em vang zawk a ni si. Tutemah hi ka thiamlo hran lo ve. 

Tunah chuan neih reng ka nei ta lo. Ka naute ka chân tawh a, mawl luatah ka hmangaih neihchhun in min kalsan bawk. Engkim buaina hi ka nu atanga rawn irhchhuak vek nimahse, min hringtu ka nu a nihna ah ka ngaidam thei lutuk. Kei ve mai mai hi phuba la tura duan ka ni tlat lo.

Mate, kan thawnthu chu tihian a tawp dawn ta tihna chu a ni si a. I muthmunah te khan I hriatchhuah chang apiangin min lo ngaihtuah chhuak ve thin la. Chutiang hun alo thlen chang pawhin nangmah kha lo indem lutuk suh aw. Ni e, kei nen hian sulhnu kan nei tawh a, sulhnu satliah a ni hleinem tiraw? A thukin a ril em em asin. Mahse, I tawn thar di nena in inkar tihchhiat phah nan erawh chuan min rawn hmang lul suh ang che. Ka hrehawmna belhchhah tur hi chuan khawngaih takin natna min pek belh tawh lul suh. 

Mate, kan thawnthu chu a tawp ta!

****       ****       ****         *****     *******      ***     ******      *****        *****        ***