MISUAL CHU A KAL TA!

MISUAL CHU A KAL TA!....

Vanlalpeki Fanai

*****************

‘’ Tho rawh tho rawh ‘’ tih paha min rawn sawi hlawk hlawktu an awm avang chuan ka mu tui lai chu ka harh zawk. Inleh thuk paha ka han en chian nak chuan ka khum bulah ka nu hi alo ding reng tawh a, a meng nur nasa hle lehnghal.

‘’ Nu, eng thil nge ni chiam chiam a? Ka mumang nawm tehreng nen ‘’ lo ti nuah nuahin, ka ham zui nghal bui bui bawk a. chutah, ka nu chuan ram hmak hian,

‘’ I thianpa Hmangaiha kha an inhnuaiah inkhaiin an hmu tlat mai! Tho la, va kal ve thuai thuai rawh ‘’ 

Chu thu zet chuan min va han țhawng tehreng em! Tichuan, ka mu lai chu inperh tho zawkin thawmhnaw ka inbel zui leh sawk sawk.

‘’ Nu, I rawn uang chu a ni em silo maw? Ka awih lo hlemai’’ ti leh nuah nuahin kekawrtlawn chu ka inthawlh sawt sawt a. Ka nu thung chu alo chek hlak. Mi pawh chhang tawh lemlo hian min chhuahsan leh daih a, kei ka lo thaw deuh hak thung.

Chhuah ka tum chiah tihin ka phone a rawn ri a, ka han lak chuan țhianpa Mama lo niin, ka nu thil min hrilh ang chiah, Hmangaiha inkhai thu bawk kha min rawn hrilh ve leh ta. Chutah zet zawng, awihloh pawh tum sateh mahila a loh theih tawhloh a ni e. Mittui hnâm sawkin phone chu ka ak tha leh a, khap deuh sak sak chung hian In chu ka chhuahsan fel thei ta hram a ni.

Kan țhianho hi mipa hlir panga niin, min rawn call zo chiah tu Mama kha thianho zingah rau rau pawh hmeichhe mi deuh ber niin, bialnu hi a nei awl ngai meuh lova. Kei leh Hmangaiha tuna chhiat tawk mekte hi inkawmngaih zual bikin thianho zingah pawh a inngamtlak ber an tih ang chi kha kan ni ve thin a, Hmangaiha hi mi zawng zawng tana ngainatawm chi nungchang nei niin, a zaidam hle a, chutihrual erawh chuan thianho zingah a hram hraw thei hle a, a pawr ve thin viau. Tin, kei hi Zonunkima ni ve in, mi pangngai vantlang ve mai ka ni a, ka dawhthei viau ngai lo. Ka la sawi telloh pahnih Dinliana leh Ropuia te pawh hi mi vantlang an ni ve a, an chuti the lua bik chuang lo. A bik takin Dinliana mawlh hi. Argentina Professional Football Player Dybala hi a ngaihsan uchuak em avang hian a hming lemah pawh Dybala tih ngat kan phuahsak a, kan ko kher thin bawk. Hetia kan han phuahsak chhan tak pawh hi Dybala chu a an em vang lam nilo in a an loh lulai zawk em avanga a lawmna atana ko ve mai kan ni. Hlauh maia! Tin, kan thianho hi Higher zirlai vek kan la ni hlawm a, kan khuaah zirna rûn pawh hi kan kan kai vek bawk. Awle, ka peng thui lutuk deuh ta. 

Hmangaiha te in ka va thlen phei lai chuan mi pawh an lo awm luih luih tawh a, ruang erawh chu kan khaw PHC lamah an lo kalpui mek a niawm e, tichuan, midang zik nuai nuai na karah Mama leh thian dangte nen pawh inhmu in kan inkuah chawih hlawm a, kan nâ a ni. He thil thleng mek hi rin thiam harsa kan ti a, pawm thiam kan duh. Chutihrual erawh chuan  kan la phal thlawt silo a ni. 

Ropuia chuan țah insum aw lawi fe mai hian,

‘’ Engvanga hetiang thil ti hi nge a nih ang le. Thianpa chu a ngaihtuah tawi ka ti em mai ‘’ a rawn tih chuan Dinliana, Dybala tia kan koh khan chang fak hian,

‘’ A chhan diktak chu hre lo mahila an chhungkaw khawsak engkim deuhthaw kan hre ve vek a, kei chu a nu leh a farnute vang bak hi a nih ka ring lo e ‘’ rawn ti ve in Mama khan a lo khap zui vat a. keipawhin zai sup hian, 

‘’ I thusawi hretute an lo awm reu reu a nge. Hawh u, inchhung singsak lam te chu va pui ve zawk ila. Hetiang thil a tihchhan hi chu khuareiah ala langchhuak mai ang. In rilru kha tihahdam rawh u. Lut ang’’ ti leh zung zung in, anni pawh chu an lo bu ve tliar tliar a, inchhung lam pan chuan kan inzui nghal dam dam.

Inchhung singsak vel pawh chu an lo zo fel thuak tawh a, tih em em tur chu alo awm tawh bar lo niin kan va teihawi ta vel mai mai a. chutianga midangho nen titi luama hun kan lo hman mawp mawp lai chuan kan YMA President, Pa Rinthanga chuan call dawngn, mak tak hian ani chu kan lo ngaichang deuh țhuap mai a, chutah le, rei pawh rial lo hian Pa Rinthanga chuan inchhunga awmho zawng zawng hriattur ngeia ring leh fiah chuan kan thianpa Hmangaiha marphu chu an hmuh leh thu leh, a thawk pawh a rawn pangngai leh thu chu a rawn sawi ta mai a! Makti hian kan hawi phawk nasa ta mai. Thenkhatte lah chu an lo phu zui mar mar bawk. Keini a thinte ho erawh chu lawm avag hian kan han inkuah khawm leh rih a, marawhchu, thinlung takin lawm a kim hleithei lova, thla  nise ala muang tawk bawk heklo.

Pa Rinthanga bawk chuan, 

‘’ Kha kha damdawiin lama kalpuitu a nu leh pa te thu rawn thlen dan chu a ni rih mai a, ngaihchan rih erawh a pawi hauh lovan. Tihian, an thu ngaichang ni pah fawmin thil vel te pawh hi lo la khawih danglam leh rih lo ila, nghak phawt zawk ang aw’’ a rawn tih leh chuan thinphu dep dep hian kan awm fur tawh niin ka hriaa, rilru chu a buai zo a ni ber. 

Thianpa chu aw..  han țang fan fan thei se ka va han ti em. Thiana, tuar hram hram a, hneh ngei ang che aw.

Chutia kan lo din ngawih rauh rauh lai chuan Mama kha rawn țawngchhuak lehin,

‘’ Hawh u, hetia lo awm ve reng ai chuan damdawiin lamah te pawh han chho ve zawk ila ‘’ rawn ti leh hlutin, ha kan lo ti tlang hlawm hle a, a sawi ang ngeiin kan thianho chuan kan inzuichhuak nghal diah diah.

Damdawiin panna kawngah chuan kan khaw nula fel leh chhelo tak Mahlimi chu hmu zui lehin, ani chuan chanchin te min lo zawt khaw tawi leh rih a, kan hriat ang ang te pawh kha hrilh ve leh luamin kan inpel zui mai. Kan kalsawn chiah tih hian Ropuia lah pek chuan,

‘’ Zaithiam inthukru a nih kha ‘’ rawn ti supin amah chu kan en nghal thap. Chutah, amah leh bawk chuan,

‘’ Aw, eng nge? Inawih lo mi? Putea nen hian an inzui hnem em a, kohhran thalai lamah nise an inhmang dun bawk. K ȚP night vela a zaina record pawh ka en tawh. A thiam khawp mai’’ a rawn tih leh chuan Dybala a rawn inrawlh vat. Ner nawng nawng chung hian ani chuan,

‘’ Hmm..chu, a inthuhruk loh tawp chu. Kan khuaah pawh hian hretu an awm nual tawh zawk ang. Keini chauh hi a hrelo tu kan ni hial ang chu’’ 

‘’ Ni reng e, a inthup ka ti lova, inthukru ka ti zawk alawm. Hetiang khaw te mawlmang lutuk nilo ah hian seilian se chuan a lar chhuak daih tawh ang. Tihtak takah te chuan C.Ronaldo pawh hi Tidim vela piang ta daih se, kan hriat bik kher ka ringlo. Inchawikan a, inchawimawi thiam te hi a pawimawh ve asin’’  Ropuia bawk chuan rawn ti lehin, dik ti zet hian ka lo bu nghat nghat thung a. Ni e, talent te pawh hi min haichhuahsak thiamtu a zirin kan lo chhawr tangkai thei ve chauh a nih dawn hi ka ti thin. Talent ropui leh tha pawh nei mahla, I chhehvel ami ten hlutsak nachang che an hriat siloh chuan nangmah tihnualtu mai chauh anni ang. Mahse, talent ropui neitu chu nangmah inih angin, ti thi lo la, bei fat fat rawh. I hlawhtlin ni hmel an hmuh huna an awm dan tur kha ngaihtuah reng ang che. 

Tichuan, damdawiin kan thleng a, a kawtah chuan thianpa Hmangaiha nuhrawn, Pi Thianghlimi chu phone hmangin a lo teikual vel tih kan va hmu nghal chat bawk. A bulah chuan kalhnai nghal thuaiin, ani pawh kan hmel a rawn hmuh chuan a nui ve sen sen a. A hmel a that tehlul nen hian a rilru hi a chhe mah mah a ni, tih chu rilruah a rawn lut leh tlat tawh. A bulah chuan rei pawh kan la ding hman lo ang tihturah a phone chu ak tha leh in, keini ho chu min rawn en leh te te a, a nui leh sak.âââÍ

‘’ Va lut ve ula, Inpa Siama te pawh an awm kha ‘’ a rawn tih chuan Dybala a lo hawi phawk hrû a, 

‘’ Hmangaiha chu hmuh an phal tak tak tawh maw!?’’ tiin a phur ta kher. Chuveleh, Nu Thianghlimi pawh chuan la nui var var chung hian,

‘’ Phal ve tawh e. A tha zel ang chu’’ lo ti leh sapin, phur zet hian keini ho pawh damdawiin chhung lamah chuan kan tlanlut nghal. Thianpa hmel hmuh chu kan phur tlâng tawhin kan helhhawlh ru riau bawk.

Damlo mutna khum engemawzat inhung tlar dul lamah chuan lut zelin, thianpa khum pawh chu bangkil lamah kan va hmu zui ta mai a. Pa Siama’n kan thianho hmel a lo hmuh rual chuan a hlim tih ka hriaa, a thla pawh a muan hmel viau a nih kha. Zawimuanga a fapa hmel dâng bei mai en pah chuan ,

‘’ Bawiha hei, I thiantha te an lo kal a nia. Lo chhawn ve ta che’’ a tih lai chuan thianpa hmel chu ka zu en a, khumah ngil at a lo mu in, tukverh lam hawi hian a thle sawn deuh tlat a, a mit erawh chu a meng reng thung. Mahse, a bekah chuan mittui a rawn luang thla tih ka hre thei a, a luang zui ngiai ngiai reng mai. Chutianga pa ber a tawngchhuah hnuah chuan keiniho pawh insiamtha vatin, a khum sirah te chuan kan Țhu thla zui sawt sawt a, Hmangaiha chu biak țawng kan tum nasa hle bawk. Mahse, a khat tawka a mit a rawn khap leh sak thin tih mailoh chu  chhanna pakhatmah a kâ atang chuan kan dawng hauh lova, a beidawnthlak duh kher. Mahse le, a thil tawn zawh chiah rapthlak tak avang te khan tawng chu ala chak lo emaw, a thei rihlo te pawh a ni mahna. Engpawhnise, a taksa chu a kâng tha zel tih kan hre tawh a, class kal leh turte kan nih angin keini ho pawhin ngaihtha tak chuan kan hawsan ta rih phawt a ni.

Schoolah pawhnise, nilengin Hmangaiha tihloh chu rilruah an awm thei miahlo a, ngaihtuahna a luah ngut ngut reng mai bawk nen chuan lehkhazir pawh a tih hleihtheih thlawt loh. Engvanga hetiang thil hi ti mai nge a nih ang? Sawi thuak tawh ang khan Hmangaiha hi chhungkaw lamah a vanduai ve reuh a, tunah hian amah hringtu a nu chuan boralsan daih tawh in, nuhrawn a hrawn mek a, a nuhrawn lah hian amah aia kum 3 chuanga upa zawk, fanu rawn chhawm ve lehin chu lah chu pasal a neih fuhloh zarah, fa pakhat nen a rawn let leh tawh bawk si a. inchhungah chuan Hmangaiha tihhrehawm hna hi an thawk ta emaw tih mai tur a ni thin a, thianpa pawhin an inchhung chu a ngainat loh phah hle bawk. Tin, Hmangaiha pa, Pa Siama hi pa zaidam tawpkhawk alo ni ve leh zel a, amah Hmangaiha tihloh hi chu fa dang reng reng an nei lo bawk. Pafa zaidam leh ngilnei lutuk an nih vang hi nge, a nupui thar leh a fa chhawm te chuan an zuam em em ni ang aw, te hi kan ti mai mai thin. Kan hriat phak be chinah ringawt pawh Hmangaiha rilru natna tur thil hi an ti nasa em em a, kan hmuhpui loh leh hriat ve phak tawh loh chinah ngat phei chuan engti ang takin a thinlung hi hliamsak nasa ang maw. Thlanlung hnawih var, chhung lam erawh ruang țawih leh bawlhhlawh hlira khat tlat si ang hian Nu Thianghlimi pawh hi a pawnlam lan dan chu vantirhkoh tha mi ang mai a ni a, a chhungril eraw tuiek leh sulrul in a khat tlat thung si.

Zan a lo ni a, kan lehkhazir tur neih ang ang te kan zir zawh hnu, zan dar 7 velah chuan keini thianho pawh inthurualin damdawiin lamah bawk chuan kan inkapchhuak leh ta dial a. Boruak chu a vawtin a reh duk lehnghal a, chubakah, kan khaw PHC hi a awmna a han tlangsang deuh hlek a, a khat mawi tawka thli thaw fur fur thin nen chuan a nuam duh lo khawp mai. Damdawiin chhehvelah hian mihring chenna in pakhatmah ding a awm tawh lova, thing ding lian tak takin a hual vel  niin thli a tam phei chuan thawm a nasa thei hle.

Hmangaiha pawh zinglam ai ngawt kha chuan a hmel chu hmuh alo nuam ve deuh tawh a, mahse, a awm dan vel avang hian lung erawh chu a awi thei mawlh lo a ni. Khuma mu reng chung chuan mitkhap miahlo in inchung lam a melh ding ngar ngar reng a, a khat tawk hian a rawn khuh leh kharh thin thung. Keini a thiante ho chuan a bulhnai set sawtah pawh thutchilh ve reng mahila min biak a tum lova, kan awm ve tihte chu hria ang pawhin a awm eih lo nia! 

‘’ Pa Siam, engtikah nge inchhuah theih inrin deuh’’ ka tih chuan Pa Siama chu alo khuh deuh kharh phawt a, chutah, inkuangkuah hlun chung hian,

‘’ Doctorte kha chuan naktuk zing emaw, chhunlai vel ni tur ang khan an sawi a, ka chiang lo le, hei hma kan sawn ve hret hret a zel a, zanin bak chu kan riah ka ring lemlo a’’ rawn ti chuar chuarin keimah bawk chuan dinchhuah hluai pah hian,

‘’ A nih chu mawle. Chuti a nih chuan inchhuah fel hunah in lamah te kan la rawn kal leh zawk dawn a nia. Tun atan chuan ala biak hleihtheih loh chu thuhran nise, khua a tlai lam tawh bawk nen kan kal phawt a nge ‘’ ka ti ta zung zung a, ka thiante ho pawh chu an rawn tho zui ve sap sap.

Damdawiin chhung kan chhuahsan fel, kan kal leh dawn chiah tihah hian ka bul maia kal ve reng Dybala chu a rawn țe tuarh mai a, kei chu min rawn nek pah rawk rawk chung hian,

‘’ Ehe! Hmangaiha! Inlo hmu ve em? Hmangaiha kha!’’ a rawn ti ta chul mai. Kan hma chiaha kal Mama leh Ropuia te pawh chu rawn hawi rual nghal țhawtin, an meng nur nasa kher a. Hepa hian eng chungchang nge maw a aupui tak chiam chu.

‘’  Mawla, Hmangaiha t chu inchhungah, khumah a mu reng tih I hre lawm ni? Chhah viau thin suh’’ Mama chuan rawn ti ve hlak hlakin, kei leh Ropuia thung chu kan lo nui phuh țhawt. Mahse, Dybala chu ala beidawng duh mai ta lo. Phawk hrû a meng chung hian hnunglam te chu a han hawi leh hruk hruk thin a, ka kut lehlam chu a chelh bet tlat reng bawk.

‘’ Khang chu hria e, ka hriat vang alawm helaia Hmangaiha hmel ka hmuh pawh khan mak ka tih em em. Min kalpelh fua pah hian min su thawi bawk’’ a rawn tih leh pawhin a tu a te mah chuan kan lo ngai thutak duh ta silo a, tum bûr chung leh min si lo chauh chuan a haw thleng ve ta țhak.

A tukah pawh chuan a dan ngai tein class chu kan han kal leh phawt a. Ban hnuah pawh zir tur awm ang ang te chu zir leh phawtin, thianpa Hmangaiha te in lam chu kan pan leh ta sang sang a. A chungchangah hian zawhna a tamin maktih a hlawh em em a, engtia damkhawchhuak leh thei nge a nih tih hi zawhna tam ber a ni a, Pathian hnathawh a tihloh theihloh. Nunna hi a hlu a, keini duh dana tihtawp a tih nun leh ngawt theih a ni lo tih hria in, kan nunna țheuh hi hlutna chang hre thar ang u. chuvangin, Hmangaiha pawh hian a thiltih rapthlak lutuk ang chi kha chu a tihnawn leh tawhloh hram beisei phawt ang.

Mahni In lum nge nge chu alo thlamuanthlak deuh te pawh a ni a nge, hemi zan hian thianpa hmel pawh chu hmuh a nuam angreng tawh hle a, tlak duah hran lo mahse mi te pawh alo nuih ve var var peih tawh alawm le. A mutna bul maia thut paha kan lo titi nak nak lai chuan Dybala bawk khan a ek a chhuah thu leh inthiar a duhthu sawichhuak hlutin, bathroomah a tlanlut titih chu a ni der a. kan lo nuih tet tet. Chutah, bathroomah chuan rei pawh ava țhu hman lovang tihturah hian rawn au chhuak tuarh tuarhin, rang lutuk hian roomah bawk khur hluk hluk chung chuan a rawn tlan lut lehnghal vat. A thawm a nat em avang khan keiniho chu min ti ralkhel zo a, Mama phei chu a thutna hmun atang alo dingchhuak hluai tawh.

‘’ Eng nge a? Eng nge Laldinlian. Tinge hmeichhia ang mai I rak vak vak zel a?’’ vin khar khar chunga Mama’n alo tihtakah chuan Dybala pawhin a chil lem khawlh chung hian Mama chu ava melh ve zoh a, chutah, aw khur dur dur chung chuan,

‘’ Ka thu fel chiah tih khan an commode chung zawna ventilation atang khan rawn bih kur tu hi an awm tlatin ka hriaa, chu, chu pawh, chhuata ventilation thla hlim lo lang atang khan ka hmu nghe nghe. An awm ngei alawm. Thla hlimah khan ruangam a rawn che chiang a ni. Ka daw lo ‘’  ti hlawk hlawkin amah chu kan en țhap. Chutah, kei lah pek chuan ngaihsam hmel zeta lo chhang let ve thuaiin,

‘’ Nang hi chu I dawih deuh a ni. Mipa inih ve kha thianpa, tlanchhe duai duai zel tawh suh’’  kalo ti zet chu a la na ta ngei mai. Ring fe mai hian,

‘’ Ka daw lo, ka dawih vang pawh a ni miah lo. Tinge, min rin ve theih ngai miahloh a? Diktak chuan nizan damdawiinah pawh khan’’ a tih laiin rang zet hian kei chuan a hmui chu ka va hup ta vat. Chutah, ring khawng awt chung hian khuma thu reng Hmangaiha chu a rawn hawi phei ta mai. Chiang em emin kei leh Dinliana chu min la rawn melh zui lehnghal a. hrehawm ka lo ti kher. Chutah le, thu pe aw zet hian Hmangaiha chuan zawi supin,

‘’ Dinlian, nizan damdawiinah chuan eng thil chiah maw ilo hmuh a. Han sawi the'’ a rawn ti ta chiah mai. Ka thin chu alo phu dep dep thei. Mahse, Mama chu rawn inrawlh ve vatin nui lui hak hak chung hian,

‘’ A.. Hmaa, eng thilmah a ni love. Damdawiin thli thaw nasa lutukah khan hmuhsual a nei pek a. chubakah, ani hi chu I hriat ang khan mi dawih chi a nih thin kha. Ala ngai reng ‘’ ti leh sawk sawkin, rum fahran hian Dinliana chu a rawn melh ta nghek. Chuveleh, Hmangaiha bawk chuan a hmalam chu ding taka melh ran ran chung hian ram hmakin,

‘’ Thu zep neih tih vel kha ka duh ve hauh lo a nia ‘’ a rawn ti leh hmak. Eng thil nge thleng mek te hi ka hrethiam ta lo tawp mai. Heng hi kan thianpa Hmangaiha khawsak duh thin dan kha niin ka hre lova, danglam ka ti sawt viau bawk. A awm dan avanga hrilhhai leh makti zet chuan amah chu ka en ta ngawt ngawt ringawt a. kan boruak a nawm tak loh em avangin rei pawh thu tawh lo chuan zan dar 8:30 velah kan hawsan ta dial a. Haw kawng tluanin Dybala chu kan hau tluar tluar bawk. A khawngaihthlak thin mang e.

‘’ Bawiha, tho rawh. Chaw eila, thlan laihna lamah va kal ve rawh. Mitthi kan nei a nia!’’ tiin ka mu tui lai bawk chu ka nu in min rawn kaitho leh a. mitthi kan nei maw!? Tu nge ni leh ta. Ka thuchhuak chiah tih hian roomah chuan Mama a rawn lang ve nghal a, kei chuan mut khamloh vanga mit thip mitsiai sun chung hian amah chu ka lo en ve vat bawk a, khumah chuan ka phone ka dap pah reng bawk. Lalmama chuan,

‘’ I message dawn kha han en ve lawk the. Ropuia leh Dybala te nen chuan kan dawng vek’’ rawn ti ringawtin, ka phone pawh chu lukham hnuaiah ka dap fuh ve chiah bawk. Eng tak chu ni ang maw tih nuah nuah paha ka whatsaap message ka han en nak chuan Hmangaiha hnen atang hian thu mak tak ka lo dawng reng mai a. chu chu- 

‘’ Pi Tuahremi a thi dawn!!’’ tih ngawt hi lo niin, phawk fe chung hian Mama bawk chu ka han melh leh a, ani erawh alo țhen ve sak. A mitko rawn san leh zeuh chung hian,

‘’ A rawn thawn hun che kha en la’’ a tih leh chuan rang zetin ka bih lehnghal a, chu message chu zing lam dar 3a a rawn thawn tih pawh ka hre ta. Ka thin a phu zui nghal dup dup thei. Chutah, Mama bawk chuan thawk deuh hluai pah hian,

‘’ Keini pawhin khami dar zatah chiah khan thu inang kan dawng vek! Chu pawh, Hmangaiha hnen atang vek in. Chuan, tukun zing dar 7 vel bawr khan Zoremi nu, Pi Tuahremi kha an huanah tlusualin damdawiinah a boral nghal!’’ a rawn tih leh chuan dar zat ka en vat a. tunah hian zing dar 8 leh a chanve chiah chiah a lo ni. Makti lutuk in ka khapzui fak fak a, ka chil te cuka han lem leh khawlh thin. Engtinnge hetiang thil thleng turte hi Hmangaiha tehlul hian a lo hriat lawk theih ang ka ti a ni. Tihpalh thil thua a lo hre thei a nih pawhin eng aiah nge, keini ho chu min rawn hrilhhriat ve kher. Amah kan hmuh dan turte a danglam zuivek a hlau lo emni? Nge ni a, a thup seng lo zawk.

‘’ Chuan, thu awmze zawtfiah tur hian Hmangaiha bulah chuan inkal tawh hrim hrim em? ‘’ thlanmual kawng pana kan kal laiin la thiante chu ka han zawt tha leh a, ngaihtuah muk tak nei hmel pu hian an lu an lo thing nak nak hlawm mai. Ni e, he thil hi ngaihthah a palzam mai mai chi niin a lang dawn lo. Thil serious lutuk a nih hi. Tin, mi thi tur lo hriat lawk ngwt mai pawh chu a rapthlak lu hret. Hma hun chu hre lawk hauhlo mahila, ka chungah leh ka laichin hnaivai, ka thiante chunga thleng atan chuan ka duh bau lo mai. Ka ngaihtuahna ah takngial pawh an la lut chhin ngai lo hrim hrim.

Pi Tuahremi thihna leh a kaihhnawih boruak vel chu zo fel in, keini pawh pangngai tak hian class kan kal leh thei tawh a, Hmangaiha pawhin school chu a rawn rap ve leh thei ta. Hetihlai hian a message maksak chungchang vel kha chu hriatzui kan nei leh tawh lova, thawm nise a dai chhunzawm ve lehmai bawk nen, a tute mah chuan sawichhuah tumna pawh kan nei ta lo a ni. Mahse, hetihlai hian sawi leh sawi hnu, Hmangaiha mizia erawh a hma ang kha a ni tawh hauh lova, a zia chu a zawiin a ngawi ngal zel a, tunhmaa fiamthu hmanga pâwt pâwt thin mi kha a ni ang tih rin ngaihna reng a awm tawh lo. Tin, a bialnu ve deuh reuh, kan chhaih fiam fo leh amah pawhin a huat ngai lemloh Lalhminghlu-I takngial pawh chu hria ang in a awm tawh der lova , a hmeichhia in alo biak ve na te zozai  pawh chu a rultawk bak hian a chhang let meuh lo. Chu chu sawiloh, engemaw chang phei chuan kan biak ve na te pawh hi a beng thleng lovin boruakah an thamral  zo thin nge tih mai tur hi a ni a, chhanna pe loa ngawih ral mai mai chu a ching sawt riau a ni. A thiante mawlh hian a khawsak dan chu mak kan ti tulh tulh a, zawhna nise kan ngah narawh e. mahse, kan chhanna dawn ve chhun te chu,

‘’ Engmah a ni lo’’ tih zawng hi a nimai a, abeidawnthlak thinhle.

Ni khat chu class chhungah thilmak deuh mai a thleng ta thut a, chu pawh engdang vang ni lovin Hmangaiha vang bawk a ni. Chhun chawlh lai niin, a tam zawk chu classroomah kan tawm țhap a, primary school naupang ang maia chhun chawlh lawm chiam rual kha kan ni tawh lo ve tlat. Chutia titi mar mar paha hmeichhe ho nen kan lo inkoh rak chiam lai chuan thawklehkhatah dawhkan bawha muhil emaw kan tih, Hmangaiha ngei mai chu rawn thu ngil awtin, chunglam en hian a dâk chho ta vah mai a, amah nise a meng kuau reng mai bawk nen, a awm dan chu a dik hlawllo a, a rapawm deuh reuh bawk. Chutianga a awm lai vek chuan a bân pahnih te chu hnuglamah ngil tak hian a thlak mar thla vek bawk a, ka sawithiam dan ber chuan kawchhung atanga ramhuai rawn phuhchhuah tum ang mai hi niin ka hria, ka sawi thiamlo, a hmuhnawm loh thlawt a ni. Kan thil tawn mek chuan min țhawn hlawm em avangin hmeichhe thenkhat phei chuan țap hlarh hlarh chung hian mit an hup a, thenkhat erawh bangkil lama tawlh rawk rawk chungin an țe țhat țhat thung. Chutah, kan thianpa khawsak dan chu a dik hauhlo tih hria in kei leh ka thiante chu kan inmitmei kual vat a, tih dan kan zawn vat a ngai. Kan thiana hi a mualpho tur a ni lo. Tichuan, a thutna lamah va kal hnaiin amah chu kan han sawi deuh nawk nawk phawt a, a hming te chuan kan ko chul mai bawk. Chutihlai vek chuan Dybala khan midangho chu thawm bengchheng chhuah lo hram hram turin alo ti ve ngat ngat bawk a. thawm ri nuai nuai pawh kha a zia ta deuh e. 

Kei leh Mama’n thiam ang tawk tawka kan buaipui fe hnuah chuan Hmangaiha taksa pawh chu rawn zal ve riai riaiin, nakinah phei chuan a mit a rawn chhing a, zawimuang chuan a dawhkan chu bawh lehin muhil ang chiah khan a awm leh ta thlap. Makti lutuk in kan inenkual hrek hrek hlawm a, thil thleng mekte hi hrilhfiah thiam pakhatmah kan awmlo. Chutihrualin kha thil thleng kha school pawnlama rik chhuah tir lo hram turin classmate ho pawh chu kan fuih ve luam a, amah ngei pawh hian a chunga thil thleng te hia sawichhuak a nihloh chuan hrelo se kan duh bawk. A hre palh hlauh a nih chuan zah lutukna lamah khua a hmu ngam lo leh mai ang tih kan hlau a, a nunna lak tumte khan alo bei leh chiam ang tih chu kan hlau ru takzet.

‘’ En la, Didiki music video thar ber a nih kêng kûng hi’’  tihpah hian Ropuia chuan a phone kenlai chu min rawn pe sawk sawk a. ka han en ve nak chuan ka mit ka hup lo chauh. Sexy be reuh lutuk tlat. Heta Didiki kan tih hi kan khaw nula tho niin, a hmingpum pawh Lalrindiki a ni a, tihian tleirawl a hriat chhoh atang zai lamah kalin, a bultanna ah chuan Pathian hla te a sa ve al al thin a, mahse, amah alo chhiatloh bakah, an neih te khan alo tlin em a, mi hriat pawh hlawh chho ve zelin tunah chuan lengzem hla a hrut ber tawh a, mizoramah na na na hi chuan duhtu leh ngaisangtu pawh an kat fer fur tawh. Tin, hla thar a tihchhuah apiang hi a hit nghal em em thei zel a, karlovah ‘Milian view’ pawh a nei zung zung thei thin. Chutiang chu nimahse, kei hi chuan ka han ngaisang lo leh tlat pek a, a chhan ber pakhat pawh, mi hriat hlawh a nih hma khati khawpa inkawm nel ve thin si kha, mizoram hriat a han hlawh chho takah chuan a thian hlui leh khua te hi a hre tha duh ta tlat lova, social media atang takngial pawhin kan ko eih zo tawh mang lo. Tin, hetiang a nih tak chinah hian khuaah pawh a awm khat ta em em a, aizawl chu a pian seilenna emaw a ti ta hial niin kan hria. A thiam leh tumruh em avanga larchhuak pawh nilo, a neih sumin a tlin em avang zawka mi hriat hlawh ta mai mai hi ka ngaisang peih ve vak silova, amah pawh hian lar thut chu zo lovin tunah chuan a music video te pawh hi en tlak a bar pawh an awm tawh lo chu a nih hi. Ani ai hi chuan kan khaw nula ve tho, tukhawkha in an la hriatloh Mahllimi kha zaithiam ka tiin, chawisan tlak pawh ka ti fe a, a bei chho zel a nih chuan hei hi chu a daihrei phian ang.

Awle, Hmangaiha chunga khatiang thilmak a thlen hnu khan eng thil danglam mah chu thleng chhunzawm a awm leh tawh hran lova. Kan intiam ang ngeiin a awm dan te kha hrilhhriat a ni lova, a hre lo bawk. Mahse, engkim hmua hre ve vektu classmate ho chuan țih hmel zet hian an en leh hrek hrek thin a, an hnaih tha ngam meuh tawh lo ni ber hian ka hria. Chung thil ringawt te pawh chuan keini a thiante pali rilru hi a ti na thei hle a, mahse, tihtheih dang em em kan nei chuang silo. Kan thianpa lama țan tlat mai loh chu. 

Zanin chu biakin lamah țhalai hla zir tur an induhthawh deuh avangin hruaitute ho pawhin sawmna an rawn sem kual ringawt a, kei leh ka thiante ho pawh chuan zir ve ngei kan tum. Hmangaiha te in lama innghahkhawm kan tih angin kei chu ka lo va thleng phei hmasa leh ber tawh a, mahse, rei pawh ka thu hman lovang tihturah thian dangte pawh rawn thleng ve nghalin, kal mai kan tum lai tak chuan Lalhmangaiha leh bawk chu, a zun chhuah thu sawi puat pah hian  bathroomah a tlan lut nghal thuak a, kan lo thaw hawk hlawm mai. Minute 5 zet kan nghah hnuah pawh a thawm chu a reh tak em avangin Dybala chuan ring leng lung fe hian 

‘’ HMa-a, I e nghal emni? Iva han rei em em ve mawle’’ a tih chuan kan lo nui zui hak hak a. mahse, Hmangaiha thung chuan chhanna a rawn pe ve hauh lo. A reh vung vung mai. Marawhchu, a inthiar nghal a nih ring in ala hma deuh tho bawk a tiin kan lo nghak leh ren rawn phawt a, a luh atanga minute 20 zet hnuah chuan Hmangaiha ngei mai chu pawnlam atang hian a rawn lut ta nawlh mai nia! Kan va han phawk tlang tehreng em! 

‘’ In va han rei em em mawle, minute 20 chuang lai pawnah ka nghak che u ‘’ a rawn ti nia! Sawi ber tur pawh hrelo hian keiniho chu kan lo inenkual hû hû hlawm a, a mak tih mai loh chu sawi chiam dan tur kan hrelo. 

Kan thutna bul lawk, hmuhtheih maiah hian a luhna bathroom kha a awm si a, rawn chhuak chu nise kan hmu em em ang. Nge, min tihthaih nan an bathroom ventilation atang khan a zuang chhuak ni ang, chu zawng, a awihawmloh lutuk. An bathroom ventilation hi an vuah sang hle a, lawnchho dawn pawhnise vawnchhan tur awm miahlo in a mam chho pur ringawt. Thawm chhuah miahlo phei chuan a lawn chho ngut lovang e. 

Ka ngaihtuahna a kal ding vang nimaw, hla zirnaah te thleng pawh chuan ka la ngawi vung vung reng a, thiante min biakna te pawh chu hre miahlo a anmahni zawk lo melh leh ngut ngut chang ka nei thin bawk. A tawpah zawng, min sawiharh leh nge nge zel a nih kha. Khati chung chung pawh khan hla zir chu ka tlingtla ve țhak tho va, eng hla mah thiam neilo in ka haw ve mai bawk.

‘’ Hei, thiante u, inhaw tlang nghal dawn emni?’’ tia min rawn au lang lang tu kan han en chu Hmangaiha bialnu țhelh Hminghlu-I kha alo ni reng a. hla alo zir ve reng tih chu ka hre chiah. 

Ropuia chuan lo chhang let vatin, haw mai kan tum thu chu lo hrilh ve thuaiin, Hminghlu-I hmel chu a hnual deuh rawih nimai hian ka hriaa, chutah, zawi sap hian,

‘’ Scooty nen ka rawn kala, mahse, min chhiatsan daih bawk sia, ih, kan veng lama hawpui tur ka nei ve bawk silo nen, min lo ‘’ a tih nem diai lai chuan rang zet leh inla polite fein Dybala pek chuan Hmangaiha chu a rawn țhâm chhuak nawk nawk mai a, nui sawng chung hian, 

‘’ Kha, hei hi va inthlah tir rawh. Haw hma mahse mut bak tihtur a nei lo’’ tih pahin Hmangaiha bawk chu Hminghlu-I dinna lamah chuan a nawr phei rawk rawk. Midang zawng erawh chu kan lo nui deuh put put a. mahse, amah Hmangaiha ber erawh chu a hmel ala thutak run reng a, a meng dur tha hle lehnghal. A peih emaw, peihlo emaw, engmah sawi buai neilo ta chu an inzui chhunzawm ve mai bawk a, keiniho lah chuan an hnunglam atang kan lo au fiam zui lawm lawm bawk. An kal liam ta maw tihah kei chuan,

‘’ Bawiha chu a peihloh hmel angreng si a, I nawr lui duh kher a nih kha mawle’’ ka tih sup chuan rang fe hian Dybala chuan,

‘’ Ho lutuk. A inla mitak der ve mai mai a nih kha. Hawsan daih ang u’’  rawn ti ve lehin kan nui zui ta ham ham. 

Zan dar 10 a rik meuh chuan mutchhuak hia min rawn zem chiai chiai tawh a, ka ham leh bui bui thin. Chutia mut mai tuma room lam ka lo pan lai tak chuan ka phone rawn riin, min tiphu deuh zawk nghe nghe. Nia, a ri khat ve bawk em a ni.

‘ Tun ang hunah Hmangaiha chu eng thil nge ni ang aw’ tih nuah nuah paha call ka han chhan nak chuan Hmangaiha țap hlawp hlawp thawm niawm tak hi ka hre ta mai a, ka phone pawh chu ka beng atanga hla takah ka dahsawn deuh zawk thei. 

‘’ Ehee! Hma-a, Bawiha, nangmah ini chiah em?’’ tih hlut pah hian pawnah ka tlanchhuak zui a, chutah, ani chuan țah aw țuau mai hian,

‘’ Kima, thianpa, thil diklo tak mai tih ka nei a nia aw. Lo tlan thuai rawh ‘’ rawn ti ve in min ti hlauthawng ta ngei mai. Eng lam nge a nih ang tih takngial pawh rinngaihna ka hre eih lo. Tichuan, thildang pawh ngaihtuah tawh lemlo in ka phone chu ka benga la chuktuah reng si chuan ka hmazawnah ka kal ve ta mawp mawp mai a. Hmangaiha insut thawm chu ka ngaithla pah a ni ber e. ani lah chuan thil thleng te chu ala sawichiang thei bawk silo nen, a awmna nia a sawi lam pan chuan ka kal ve zel ringawt mai a ni. 

A awmna niawm  a sawi hmun hi kan veng chuan hnuailam niin, mihring khawsakna hmun a ni vak tawh lova, a thim in a reh tha kher bawk. Thianpa chu heng lai laiah eng thil nge maw a tih le tih paha ka hmazawn ka han chhun eng chiah chu, khaia! Hnimpik tak karah chuan Hmangaiha chuan eng thil emaw ni hi hnuh luh tumin alo bei mek tih ka va hmu ta mai a! Ka ding khawng zui awt thei. Chumai nilo in, amah khan thisen tamtak a kai tih ka va hmu thei nghal vek a, a hmai velah te pawh thisen perna hnu niawm tak a awm fer fur tih ka hria. Eng thil tak chu ti ni maw? Tia amah kalo melh vang vang lai chuan rawn dingchhuakin, ka lamah a rawn phei zui a, kei chu ka lo tawlhhnung hret. 

‘’ Thianpa, min hlau suh. Ih, thil ka tisual palh a, hei, tual ka that palh a lawm. Ka tihpalh takzet a ni’’ tih pah chuan a hmaia thisen kai te chu a han țham fai leh pawk mai , a thaw zui ham ham bawk.

‘’ Tu nunna nge I lak tak? ‘’ aw khur ru der derin kei chuan ka lo ti let nghat. 

‘’ Hminghlu-I ! ‘’ a han ngawi leh vang vang a, keipawhin sawi mai tur ka hrebiklo. Min țhawng em a tin ni. Chutah, amah bawk chuan rawn sawi chhunzawm lehin,

‘’ Hman atang khan min hnial ngailo tihnka hriaa, tah hian tawmpui mai mai atan ka hruai nghe nghe a, alo duh ve zel bawksi nen, ka  hrelo, ka inrinlawk hmain ka khawih ta a ni’’

‘’ I thu a hnial ngailoh vang chuan remchang chuhin pawisawilo hi I dahtha ta a maw? Eng hmanrua nge I hman reng reng a? Chemte pawh ilo pai thlap tihna emni?’'  ani chu a ngawi leh dat phawt a. Mangan hmel zetin a hawi pah ruai ruai bawk. Chutah, rawn thawk deuh halh pah hian,

‘’ Helai thim chin kan thlen hian ka tlawh thlu tawp a, bawhbet vatin a hmui ka hmeh chip sak bawk. Tichuan, a chauh thleng hnawpa hnek zui lehin a chet that peihloh hnuah lung va la in ka chhu hlum!’’ a tihlai chuan ka lo țim deuh sawk thei. 

Hetiang thil rapthlak lutuk hi ka thianpa, ka thiantha ngawih ngawih ni si hian a ti thei ang tih rin ngaihna ka hre lo. Ava han hrehawm ngat ngat tak em. Chutah, ka kut chu rawn vuan leh thutin, kei hu ka lo phu deuh zawk thei a. 

‘’ Thianpa, min hum rawh. Min hum thei ang tiraw? Khawngaihin, ka duhthlanna vanga ti ka ni lo asin. Eng lo, keimah hi keimah ka ni lo, engtinnge ka sawi dawn. Keimah ah hian midang cheng ve an awm mek a ni. Thianpa, min hum rawh aw’’ a rawn tih leh tak sawk sawkah chuan mittui luang ngiai ngiai chung hian ka lo bu ve ta zoh a. Tichuan, eng thil te nge ka ngaihtuah chiah tih pawh inhre lo chuan hmalam ah pen chhuakin, phone light te chu ka han hmet thim leh te te a, Hminghlu-I ruang let reng mai chu thimtham karah chuan thuhruk dan zawngin hnimpik lamah kan hnuk liam ta. Hah thaw hlawi hlawi hian leiah chuan kan thu dun leh hnawk a, a tu ve ve mah chuan tawngchhuah mai pawh kan la tum rihlo. Tichuan, chulai hmuna awm reng chu a himlo tih hria in thianpa chu kawng dangah ka hawpui ta sawk sawk a. A ngawi deuh reng mai bawk.

In kan thlen lai hian ka chhungte chu vanneihthlak takin an lo mu reh thap tawh mai a, thawm dim zetin inchhungah chuan ka luhpui zui a, ka roomah kan lut tlang nghal. A thawmhnaw hak turte ka pek fel leh hnu chuan muhil turin ka han ti a, chiang zeta mi rawn melh kuau chung hian a khap deuh fak fak. Ka ngaihbel nge ka hrelo, a hmelah chuan inthiamlohna tamtak hmu niin ka inhriaa, ka hrethiam chiah biklo. Ka biakna min chhan tak mailoh ah leh, ala chetsawn miah bawk siloh avang chuan,

‘’ Muhil phawt rawh. Hetah hian riak la, khawvar hunah engkim chu  a tha leh vek mai ang’’  tiin a bulah chuan ka han thu thla ve a. He ka thian, a mihringpui ngei mai thattu hi engvanga humhim tlat nge ka nih ka hrelo. Ka hriatchian erawh chu ka thiantha a ni a, a lungngaih ka duhlo in buaina a tawh ka phal ngai heklo. Tin, tunhnaiah hian a awm dan  leh a nungchang engkim a danglam a, a diklo vel vek  tih hrechiangtu pawh keimah tho ka ni. Hetiang thil hre vek chung hi chuan ka thiantha hi thuneitute hnenah ka hlan thei thlawt lo a ni ber e. Heng vel vang te pawh hian a thiltih kha a duhthlanna hmang ngeia a tih a nih chu ka la ring thei chuang miahlo. He ka thianpa nun hi a khawngaihthlak hle zawk niin ka hria kei chuan. Chutihrualin, amah mai nilo, ka thian dangte chunga thil thleng zawk pawh lo ni ta  se, tuna ka tih ang tho hian ka tih ve ka ring tlat bawk. Chuzawng, ka hrelo le, a thleng ve lo turah gai thung ang.

Tichuan, ka bulah zan chu riah  tirin, ka khum min țawm bawk a. mak tak hian karlovah a muhil hnar nghal suk suk thei nia mawle. Engtinnge a theih zawk le ka ti. Pawikhawih zo hlim hlawl a ni tih pawh hriat miahloh a a han muhil nghal bawrh bawrh thei mai chu a vanneih vang nge vanduai vang zawk. Kei thung chu ka la mu meng kar reng a, zanina kan thiltawn zet te khan ka mutchhuak zawng zawng pawh umbo zoin, ka harh tulh tulh mai. Kan chunga thil thleng te hi thian dangte kha ka hrilh ve ang nge, ni leh lo. Inven sen loh chin kan nei hlauh dah a nge. Keiin ka hriatpui a, ka zeppui rih phawt hi  a tawk viau a ni ka ti leh ta zawk.

Rinloh tak maiin zing khawvar hma deuh chuan ka lo muhil ve ta a ni ngei ang chu, ka harh meuh chuan khua pawh a lo var chiang tawh a, ka thianpa mutna ka va thlek vat a. Ani chu alo awm tawh hauhlo nia. Thu chhuak vatin ka call ta nghal a, alo la rang ngei mai.

‘’ Dar engzatah nge I thawh a. ngawi renga ilo chhuah daih mai’’ ti nghal hmawk hmawkin, ani chu alo nui deuh hak hak a. 

‘’ Ka chhuak hma angreng. Nia, I muttui hmel em a, ka tiharh duh ta lo che a nih kha. Ti daih ila thianpa, engvangin nge I bulah khan kalo riah ve ngawt a. ka thanharh rual khan I thawmhnaw ka inbel tih ka hre leh bawk a, e, chu mai chu ala ni lo, ka thumhnaw zawkah khan thisen khawro niawm takte, lei nawi te alo awm niai mai a, ka khai haw a ka halral zui vek mai ‘’ a rawn ti ta heu mai nia!  min ti chi-ai hamhaih buai nghal vek thei. 

Nizan lawka a pawikhawihna rapthlak tak mai kha a hre tawh lo tak tak ang maw!? Engtinnge heng hi a nih theih zawk. Ni e, tunhnaiah a nungchang chu a inthlak danglam nasa tih ka hre nameuh mai. Mahse, hei em em hi chu ka awih theilo a ni. Hriatloh der a zep bo a tum zawk emni ang? Chutihrualin, a thawmhnaw thisen kai te erawh a halral vek thu min hrilh lawi bawk si. Ka thianpa chungah hian eng thil chiah nge maw thleng le. Ka hrethiam ta lo tawp mai.

Rilru a buai tawh sa tehreng nen, tukthuan ei lai tak chuan ruang chhar a nih thu chu an la rawn au tak ang dum dum a, ka chaw hmuam lai pawh ka hak țhelh  nghe nghe. An ruang chhar lah chu tudangmah nilo in, zan hmasa lama Hmangaiha pawi khawih ngei kha a ni bawk si. Thaw hi a veng lo hluah hluah. Thaw hawk chung hian chaw ei dawhkan chu ka thawhsan thurh a, chaw ei pawh a tui nek tawh lo ve.

Ruang chharna lamah chuan ka kal ve ang nge,  kal be lovang tih ngaihtuah a room chhunga kalo teikual ruai lai chuan ka message tone chu rawn riin, ka han en nak chuan Hmangaiha hi lo niin, 

‘’ Thianpa, ruang an chhar!’’

Messgae dang rawn lut lehnghalin, amah vek a ni nghe nghe. 

‘’ Thiana, Hminghlu-I ruang an chhar!’’

‘’ Nizan khan ka thlah haw tiraw?’’

‘’ Hminghlui hi keima thah a ni thei em?’’

‘’ Thianpa, keima thah ngei a ni tiraw? Zep suh. Zingah khan ka kawrah thisen leh lei nawi alo kai nual ka tih kha’’

‘’ Hminghlu-I hi ka thah ngei niin ka hria. Engtiinge ka tih ang?’’ tih hi alo ni nuai mai a. ka rilru buai sa a rawn belhchhah takzet. Chutah, ka chhan let ngaihna hrelo lutuk chuan insehruh fan fan paha type zui hmawk hmawkin,

‘’ LO NGAWI MAI MAI PHAWT RAWH!’’  

Tih chu ka va thawn ta ngawt. Ani pawh a reh zui ve mai. Chutianga Hminghlu- ruang ber an chhar tak siah chuan zan lama amah thlah hawtu kha Hmangaiha hi a ni tih te pawh chu hretu an lo awm thut thei tih ngaihtuahin, a thianpa ka nihnaah thu zawhfiah te pawh kan tawk thei tih hria in, Hmangaiha nena kan inbiakna tharlam  zawng zawng te chu ka delete fai ta vek a. A hrehawm duh ngat ngat hlemai.

Room ka chhuahsan chiah tihin Mama, Dybala leh Ropuiate chu an rawn lutkhawm ve nghal zat a, ka roomah bawk min nawr lut leh. Mama chuan hmanhmawh fe a kawngka kalh kalh rawk rawk pah hian,

‘’ Kima, ruang chhar  anih thu kha ilo hre ve tawh ang tiraw? ‘’ a rawn tih chuan ka lu ka lo bu deuh nghut. Naupang thuawih laileng ang mai hian ka thu fel hle hle lehnghal. Ka inkhawngaih zawk mang e.

‘’ He thil chungchangah  hian  amah hnuhnung bertu nia rin Hmangaiha  pawh stationah hruai chhoh a ni tawh a, thu an zawtfiah dawn’’ a rawn tih chuan kei chu ka lo phu deuh zawk a. ka mit nghal sulh sulh ni ber hian ka hria e.

‘’ Hmangaiha’n a hmu hnuhnung ber tih thu chu keini nilo, tuin nge lo hria a. nangni ho hian insawichhuak emni zawk?’’  lo ti let ve khar kharin Dybala chuan a lu  alo thing zui nawk nawk a. 

‘’ Sawi lul love. Kawnglakah an lo hmu ve te pawh a ni ang chu. Kan thianpa hi chuan hetiang thil hi  a tih ka ring theilo. Ka ring hlawllo’’ 

‘’ A ti emaw, ti lo emaw, kan thianpa hi kan theihptawpa kan humhim a ngai a nia hre rawh u. keini hi chuan eng pawh hriat nei ila a chhiatna tur a nih ai chuan ngawih kan thlang mai tur a ni. A nun khawngaihthlak leh hrehawm theih zia kan hre vek a, tunhnaia a buai rukna zawng zawng pawh kan hria. Chuvangin kei chu, Hmangaiha hian a kut ngeiin pawi hi lo khawih palh pawhnise a duhthlanna vang a nih ka ring chuang lo. Tih tir tu an awm a nimai’’ ti zung zungin ka insawikhalh a nih tak ber chu a. 

Hminghlu-I kha ka ui lova, tualthah hi ka support tihna ni lovin, liam tawh chu liam tawh a ni a, a duh vang pawh ni miahloa pawikhawihtu an man vang ngawt hian nunna a rawn kir tawh dawn lo. Ni e, thudik chu sawichhuak ila, dikna in ro a rel a nga, a tha khawp ang chu. Mahse, ka tih chu ka tih. He case bikah hi  chuan sawi tak ang khan tualthattu mahnise, ka thiana hi ka țan lo thei rih lo a ni. Suahsual vang leh tualthah chak vang hrim hrima thil ti ni ta se, eng aiah nge kei kha min rawn koh tehlul ang. A duh phawt chuan ruang kha a thehthang bo thei lutuk ringawt. A buai a, tibuaitu a nei bawk a, chenchilhtua nei a ni tih hi ka chiang khawp.

Awle, stationa an zawhna zawng zawng pawh felfai takin a chhang vek a. An inkawt thleng a thlah hnuah a kirsan leh mai tih thu thleng chuan a sawi fai vek. Tichuan, kei chu min sawi bo zuiin anmahni in ngeia a riah thlap thu pawh a sawi tel a, a chhan chu, kan in atanga a chhuah lai khan khua ala var chiang lova, mi nawlpui thawh hun ala ni lo tlat. Ka chhungten kan inah ka riahtir tih an hre lo ang bawkin, a chhungte chuan a riak chhuak em tih an hre lo bawk. Tin, a phone an check sak naah pawh kei nena kan inbiakna thenkhat te kha chu alo delete fai vek tawh mai a, mak ka tih rualin ka thaw huai thung lawi si. Kan fihlim hlen a ngem tih chu hre chiah lo mahila chhete chuan ka thawven phah ve deuh e.

Tichuan, hun te liam leh hretin, Hminghlu-I thihna case pawh chu la buaipui reng nimahse thawm chu  areh zui ve tial tial a, keini thianho pawh kan khawsak dan chu a pangngai țan leh tawh viau. Hmangaiha pawh tunhma ai khan a zia chu rawn danglam ve țan in, hmana a mizia, thawveng leh nawi em em kha a rawn lang leh tawh ka ti mai. Thianho zingah pawh fiamthu thawh a min ti nui tam ber tu a rawn ni leh țan ta. Rilru kilkhatah hian engemaw riak reng chu awm mahsela, tun hun hi ka hlim vanglai tak chu a ni leh thung si. Ni e, hetiang kan tawnlohna kha a rei ve tawh em asin. 

A hma pawha ka lo sawi tawh kan khaw nula zaithiam lar, Lalrindiki bawk kha tunah chuan zu ngawlveiah chhuakin, kum naupangte ni si khan ruihhlo tello chuan a khawsa thei tawh lova, a perform dawnah te pawh rui chunga a kal fo avang leh zai hleithei lo khawpa a khawsak tak ziah avang chuan hmingchhe ta nge nge in, facebook group lian hrang hrangah pawh amah sawichhiatna post hmuh tur a awm ta nek nuk mai a, a mualpho nasa hle a ni. Chutiang chu a dinhmun alo nih tak siah chuan a chhungte pawhin khaw lamah ko hawin enkawl an tum ta phawt a. Inenkawl tha thei tak ang maw. Khua a rawn haw hnu atang a hmel chu vawikhat chiah ka la hmu ve a, alo chhe tawh lutuk ringawt. Ka thianteho phei chuan an ten ngawih ngawih.  chutihlai vekin, kan zaithiam pakhat Mahlimi zawk kha chu mi hriat em em te la hlawh ve lemlo mahse, zai tura sawmna erawh chu kan khua leh a chhehvelah hian a tawng ve fo va, tin, ani hi chu biak te a nuam em em reng a, biak hmasak hi kan chang ve ngai meuhlo. Hmel hlim  min hmuh reng thei a, hmuh a nuam em em reng mai a ni.

Class kan bang, lehkhazir tur awm ang ang ka zir zo chiah tih chuan ka message ri bawk chu hre leh in, ka han en chuan Hmangaiha hnen atang alo ni a. Mahse,

‘’ Zanin dar 7 hian tihtur in nei. Thiante u, Didiki nunna mawlh kha lo chhanhim ang che u. inawhhlum tumin tun atang hian a buai vel mek tawh ang! Muangchang suh u aw’’ tih hi a rawn thawn leh a nih chu. Lalhmangaiha mai mai chu a pangngai viau tawh emaw ka ti a, eng fiamthu nuihzatthlak loh lutuk nge maw a rawn thawh leh tak hi le. Message chu ka chhiar zo chiah tihin phone call ka dawng zawm zat a, Dybala alo ni. A message dawn ang chu ka dawng ve em tih min rawn zawt a lo ni. Chuan, kan thian dang pahnihte pawhin an dawn ve thu chu a rawn sawi nghal zat bawk. A mak thin hlemai a. Dybala nen kan inbiak zawh chuan Lalhmangaiha chu ka call ve nghal vat a, call lah chu alo chhang duh reng reng lo nia. Umm,, engpawh ni rawh se, an inah va kalchilh ila, thil engkim hi hriatfiah vek a awlsam zawk ang tiin ka tho nghal nulh a, ka chhungte pawh hrilh tawh lemlo chuan ka tlanchhuak nghal vang vang.

Chutah, inthurualsa ang hrim hian ka thian dangte hmel pawh chu Hmangaiha te in kawtah chuan ka hmu nghal zat a, kan inmelh hû hû hlawm mai. Tichuan, thudang pawh sawi khawmuang tawhlo in inchhungah kan inzui lut a, Hmangaiha hmel reng reng chu hmuh tur alo awm lo. Hetih hunlai hi unau hmelhai hun vel ni tawhin, zanriah ei hunlai a ni tawh bawk a, Pa Siama te chhung pawh chuan zanriah an lo kil ve mek. 

‘’ Khawnge, Lalhmangaiha?’’ ka han tih chuan rang fe hian nu Thianghlimi khan min lo chhang ve a, 

‘’ Pawimawh ti turin ka chhuak lawk dawn a tia, chaw pawh min lo eisan mai ru a tih vangin kan lo eisan a nih hi ‘’ lo ti deuh zung zungin keini pali chu kan inmelh kual leh hrek hrek a, khawmuang tawh lo hian kan tlanchhuak lehnghal.

Rindiki chungchang kha rilruah lo lang hmasa berin, chumi buaipui tur chuan kan kal hmasa leh te te a,  chulamah pawh chuan min lo kalsan daih tawh a ni maithei  tih chu kan rilruah a awm vek bawk.

Tichuan, engdang sawi tawh lo hian Rindiki te in chu kan pan hmasa ta ngawt a. Rinlawk ang deuh hian Didiki chu an inah alo awm lo chiah bawk. Thu muang hman kan ni ta lo. Sana ka bih vat a, dar 7 a ri hnai thuak tawh mai si, khawiah tak  ani chu kal ang maw ti a ka lo ngaihtuah lai takin Ropuia kha a rawn au chhuak ta hlut mai a. 

‘’ Ka hria, a awmna tur chu ka hria ang. Min zui r’u’’ a rawn tih leh tak nghekah chuan chhanglet tawh lo in kan zui nghal dat dat. 

Kal zelin, khawchhung atanga hmun fal deuh hlek kan thlen hnuah chuan In tereuhte pakhat lo ding thim hmak mai kan va hmu zawm ta reng a. kan bangbo lehpek hle. Chutah, kawng dawm meuh a thawk hluam hluam pah hian Ropuia bawk chuan,

‘’ Heihi DIdiki pa ram a nia, hetah pawh hian an kal ve fo mai. Chuan, a bul chiah saw kan ram lei thar a ni ve thung a. ih.. Heihi thlam ve deuh reuh a ni na in Didiki hian a luahlum tam zawk. A thiante ho hruailuh nan ber a hmang chawk bawk. Ti r’u, va enchhin ila, alo awm leh ngei ka ring tlat’’  a rawn tihnleh tak hluam hluamah chuan muangchanglo hian kan inzui phei ta diah diah a. 

Atir khan chu thlam chu a thim phui vek emaw kan lo ti a, han kal hnaih takah erawh, êng chhete hi alo awm ve tih kan hre thei chiah. Ala reh tha em em zui lehnghal. Hmangaiha pawh chu helai hmunah hian a kallo a nih si chuan khawiah nge a kal anga, eng thil pawimawh nge a tih tak ang. A thiante hriatpui ve chiloh chu eng anga pawimawh tak ni ang maw?

‘’ Ehee! ‘’ tih tuarh thawmah chuan harh deuh zawkin, ka hmalam ka han en ve nak chuan kan hma lawk ceilling fanah hian Rindiki ngei mai kha a lo inkhai tih kan hmu ta thut a, ka meng phar awn awn thei. Inchhungah chuan tlanlut vatin, Dybala chuan rang zetin a ke lam atang chuan ava chhoh dawm nghal a, a au zui țhat țhat bawk.

‘’ Hmanhmawh r’u, hrui zei chahna tur khi ngaihtuah vat vat the u’’

Kan phe nghal zung zung a, a lan dan atang chuan Rindiki hnuk chu ala chat fello tih a hriat a, a rawn rum deuh kawk ri pawh kha kan hre thei. Chuvang chuan muangchang thei kan ni lo a ni.

Ka thiante pahnihin hrui zei chahna tur an lo zawn mawp mawp laiin kei thung chuan ‘Tualchhung Group’ whatsaap lamah Didiki nu leh pa te number ka lo zawng ve mek bawk a, rei pawh zawng loin ka hmu zui thuai a, ka call nghal vat. An rawn tlan nghal tur thu sawia kan inbiak zawh rual chiah chuan kilkhat atang hian Mama khan bakcheh lian fe mai rawn lekchhuah larh larh pah hian 

‘’ Ka hmu ta’’ a rawn ti țhat. Tichuan, rang lutukin Ropuia chuan Mama chu a han kokichhuan zui a, fan pawh chu an han ban pha ve mai bawk. Mahse, ka ngaihtuah mai mai a, enhtinnge Didiki hian hrui hi fanah khian a han bah tan theih le aw ka ti. 

‘’ Zonunkim, min rawn pui ta che, a rit tawh lutuk’’ Dybala’n a rawn tih țhat thawmah chuan harh zawkin a bulah ka tlanphei thuai a, thil hi ka lo ngaihtuah kual nasa mah mah thin a ni.

Chutia kan lo buai map  map lai chuan veng chhung information atanga thupuang ri kan hre ta. Um, thudang a ni lo, Hmangaiha, kan thianpa Hmangaiha inawhhlum thu ngei a ni!! Chu thu kan han hre zet chu keini thianho pawh kan thiltih lai chawl meuhin kan han inenkual leh hrek hrek phawt a, kei nbat phei chu ka tliak hnawp ni ber hian ka inhria. Hetiang thil hi engtinnge a thlen nawn leh theih. Thianpa, I nun hi alo va han beidawng awm em em ve mawle. I nunna tihtawp hi engvanga chak em em nge I nih ang aw?

Ka bul lawka thilthleng engkim te chu an phe kual nuai nuai nimai hian ka hretawh a. thlam chhunga mihring rawn tlanlut lai te, buai em em a ka thiante an phet vut vut laipawh chuan mumalin engmah ka hre tawh lova, ka lo awm mawl ve tawp hi a ni ber e. 

Chiang leh fiah zawka thil ka hriat leh hmasak ber chu  Hmangaiha ruang kila ka țhut tawh hnu kha niin, a hmel chu uluk leh ngunthluk em em in ka lo en reng tih ka inhrechhuak a, tin, ka bul maiah chuan ka thiante 3 pawh kha an thu ve tih ka hre chiah bawk. Inchhung khat tlata mihring rawn inhnawh tuau tuau te chu thlir lehin, ka bul lawka mu ngawi reng ka thianpa hmel mawlh chu ka la zawng kual fan a nih chu mawle! A na em a ni.

Thianpa, I nunna hi tihtawp tumin theihtawp I chhuah a, I ngaihtuahna nise I seng ve nasa bawk. Chuvang alawm, keini I thiante ho pawh hi midang nunna chhanhim turin min tirh bo ni. Tiraw? Midang nunna kan chhan hman kha ka inchhir lo, mahse, a lehlamah, chhanchhuah ka duh a humhim ka chak ngawih ngawih ka thianpa khan I nunna chu ilo la ve mek tho si. Engvangin nge kan chungah hian hetiang thil hi I tih tak mai le. I chhungril natna te chu keini hian kan hnem zawh che I ringlo tihna emni? I thiante hi min lo va ring lo awm em em ve a mawllian. En la, țap ve mai mai ngai lo Mama leh Dybala te pawh an mittui a luan ral hnem tawh zia hi I hmu em? Mawlchhah pa, rawn tho mai mai the.

Kan thianpa ruang dai chu piallei thuahriat hnuaiah zalh fel a ni ta.he leiah hian kan hm tawh ngai lovang. Chu ringawt pawh chu țahpui tham natna chu ava ni si em. 

Thianpa ruang vuiliam a nih tukah chiah pangngai takin phone pawh ka en ve hman chauh a, message fahrah te te a lo tam leh khawp mai. Mahse, chung zinga pakhat chuan ka mit a la ta chat. Chu chu tudang min rawn thawn mah ni lovin, ka hmangaih ka thianpa hnen atang ngeia ka dawn hi a lo ni a. min rawn thawn hun ka en leh chuan a intihhlum ni, a nunna a tihtawp hma ngeia min rawn thawn a nih chu  a rinawm.

‘’ Thianpa, Kima, he thu hi chu nangmah chauhin a tawp nan I dawng tawh ang. A chhan chu maw, nang hii ka nunah leh ka khawvelah hian mi pawimawh I nih vang chauh a ni. Intihhlum ka tumna hmasa zawk a tlawlh atang khan keimahah thilmak sawifiah hleihtheih loh rawn thleng hi a tam ve hlemai a, min ti hrehawm thin takzet bawk. A chhan chu maw, mi rilru puthmang leh ka chunga an rilru put dan te ka hre thei ta tlat pek a, khangho kha chu keipawhin hnaihloh ka duh zawk. Chuan, ka mumang lamah thleng chu ka thilpek dawn chuan rawn belhchhah lehin, mitthi tur te ka lo hmu lawk leh bawk a, thiana, khatiang thil tawn kha chu a nuam hauhlo asin. Ihmaw, tunah chuan heipawh hi zep bo ngaiin ka hre tawh lo. Hminghlu-I ka thah chhan leh vang kha engkim ka la hre vek. I him zawk nan leh ruahmanna dang ka neih vang in ka haider ta mai a ni. Nia, tualthah hmang ka ni lo. Hminghlu-I'n ka chunga a rilru put dan ha ka duh lo zawk a ni. Kha hmeichhia kha mi tha a ni miahlo, kei hi min hneh a ka neih zawng zawng leh ka chhungte neih thleng pawha ei ral vek kha a duh a ni. Chuan taka, ka pa hi a hmutai bawk tih ka hria! Chhungkaw hlim kan ni ngai lo, chuvang chuan kan kehchhiat lehzualna tur kha ka duh lo a tin ni. A zaktheilo reuh khawp mai. Awle, thianpa, tual ka thah zana ka thawmhnaw hakte kha I hnena ka sawi ang khan ka halral reng reng lova, police hnenah thudik engkim hrilhin ka hlan fel vek tawh e. mahse, chhuanlam siamin haw leh lawk ka duh thu ka sawi a, tihian keichu ka thi dawn ta a nih hmel. Tunah hian inchungah police pawhin min la nghak reng. Thiana, nang chu I fihlim tawh aw. Ka thihna hian zahna kawnah thlen lo che se, ka chhungte pawhin mualphona khum lul suh se. Thianpa, ka ngai ngawt ang che. Misual chu a kal ta, inlo ti ve thin dawn a nia, mangtha le! ‘’ tiin. Ka chhiar zo chu ka mittui a hnam sawk thei. Lalhmangaih, a bul atang bawkin  min vel tha leh a ni hawt alawm le. 

Um..he I nunna I tihtawp chhan hi chu kumkhua atan ka lo ngawihbopui a nge. I phu lutuk e. mahse maw, mawllianpa, damdawiin kawta Dybala tibuaitu leh inbathroom chhunga lo bihthla tu kha chu I rawn sawifiah leh ngei a ngai ang aw. 

‘’ Tunah chuan ka thil tumah pawh tlem tlemin hlawhtlinna hmel ka hmu ve țan ta’’ ti siam siamtu Mahlimi hmel hlim sâng chu ka han en a. A hmel chu hmuh a nuamin a hmeltha takzet bawk. 

Ni e, a tuina, a talent zai lamah khan zawimuanga ke pen chho ve zelin, mi hriat pawh a hlawh chho ve zel a, tunah rih chuan Mizoram chhungah hian a hming leh amah hrelo hi an tam tawh lo khawp mai. Ka lawmpui takzet. Tichuan, a kut no leh nel thap mai chu zawimuanga va vawnsak pahin, a mitah chuan chiang takin ka en kal bawk a. min lo en ve reng. 

‘’ Ihmaw, khawvelah hian mi hriat hlawh deuh thut nih te, haisak thut te hi duh reng reng loh tur. Chu ai chuan, nangmah anga mahni tuina hria, tha thlah miahloa kal chhohpui ve bek bek leh mi invawng te hian zawimuanga mi hriat an hlawh ang zelin, an damchhung in miin an hre  tawh thin. Indaihrei duh zawk daih tihna a nih chu. Hma hun eng tak ila nei zel e’’  ti ve supin, hlim hmel pu sâng hian ka darah a lu a rawn nghat a. Tichuan, Hmangaiha  thlanlung awmna lam hawiin ni la tur sen phût mai te chu kan thlir lian dun ta zawk a.

****         *****           *********           *****         ****       ****        ******          ****      *****