CABIN NO 21

CABIN NO.21

BY : Vanlalpeki Fanai

Ka phone ri ral ral thawm avang chuan ka harh zawk mai. Sana ka bih thuai a, zinglam dar 2 lo ri tawh in, tun ang hunah tu tak ni ang maw ti a phone ka han en nak chuan number hlang ringawt hi a lo ni. Ka meng dur angreng hle. Mahse, emergency thil te pawh a ni thei tih chu ngaihtuah chhuak vatin chu call pawh chu ka la leh ta zawk a. zawi angreng fe hian,

‘’ Hello’’ lehlam thawm chu a reh vang vang hnuah, mipa aw vawt ruih leh khauh hmel fe hian min rawn chhang ta daih nia!

‘’ Ka tibuai che a, ka tihpalh’’ ti ringawt in, kei chuan chang angreng fe hian,

‘’ Aw, eng thil nge ni ta a? Thil pawimawh a nih hran loh chuan tun ang huna in call hi tih loh tur asin’’ lo ti let duah in, a rawn nui chhuak ta hak hak mai. Ava han zakthei lo tak.

‘’ Ngaihdam ka dil zawh vek tawh che kha. Iva sualthiam reuh ve’’ ala rawn ti tak deuh deuh. Mipa nghal leh chimawm tak chu a nih dawn hi.

‘’ Tu nge I nih? ‘’ ti let hrak in, a khuh zui ta khak khak phawt a, ka ning tawh kher mai.

‘’ I bialpa thar tur!’’ rawn ti hul hukin, a nui zui leh hak tih pawh a thawmah chuan ka hre thei. 

‘’ En the, mi pangngai tak I nih chuan tun ang hunah hian mi tumah an tibuai tawh ngailo tih hi lo hre ve ta che. Chuan, keini chu chhun lama hnathawk thin kan nih angin kan chau a, ka dah dawn. Midang tihbuai tur lo va zawng mai rawh’’ ti let leh hmukin, min chhan letna pawh nghak tawh lo chuan phone chu ka dah ta hmak a. mipa mawl leh polite lo lutuk biakna hun pawh a ni tawh lo e, ti mawlh mawlh chungin ka mu tha zui leh mai.

Ngurthanpuii niin, Aizawlah hian hna vangin kum 3 tehmeuh chu chatlak loin ka lo awmve ren rawn tawh a. kan khua, kolasib lamah pawh ka haw thla ngai lo tihna a nih chu. Nia, ka hna hi Healthcare Assistant a nih angin damdawiinah kan buai thei ve em em a, chawlh pawh kan hmu ngai meuh lo. Heng a nih vang tak hian zan lam hun pawh am taka  mut nan hman ka duh ve thin a, zan hmasa lam anga pawimawh lo lutuka in call harh tih vel kha chu ngeiawm duh thin tak a ni. Mi pangngai lo zia ka ti mai.

Kan hna hi a hahthlak ve thin rual rual in, kei chuan damlo bula hun hman te, thawhpuite nena awmho te hi nuam ka tiin, mahni chauha khawsak rek rek reng ai chuan teichhuah leh lenkhawthawn vel te pawh hi nuam ka ti daih zawk a. mahse, mahni maia invawmhrang leh, inluah ve ta chu mal taka hun ka hman chang a awm lo thei lo. Bialpa tia sawitur ka nei lova, be tu leh, mipa thiantha tak tak erawh chu nei ve nual mahila, ngaihzawng ang tak taka han en tur hi chuan ka la inpeih lo ka ti dawn nge, ngaihzawng neih hi ka peih tawh lo hrim hrim pawh ka hre biklo, ka kal thui thei ngai thlawt lova, ka serious hleithei hek lo. Heng ka nih vang hian ka thian mipate ho pawhin hmeichhia ang pawhin min en tha peih tawh lova, mipa ang maia min cheibawl chang te pawh an nei thin. A mawh lo ve, ka nu dim dem lo ve em a ni.

Zan rawn niin, hnathawhna hmun atang chuan chau hnepin inah ka haw thleng a, inchhung ka luh rual rual chuan ka phone bawk chu a rawn ri leh ta. Zan hmasa lawka min rawn call tawh tu, number pangngai tho kha ni lehin, ka meng zau kawk thei. He mihring hian eng thil nge a duh a, tu nge maw a nih chiah le, ti chunga call chu chhang zuiin vin zet hian,

‘’ Eng nge I duh? Tu tehchai nge maw I nih le?’’ ka ti nghal hrep. Mahse, thawm a han reh vang vang hnu chuan lehlam atang bawk khan mipa aw vawt ruih ngei mai hian thum leh fiah fahran in,

‘’ Khaih! Khaih! Zaidam deuh khan aw’’ a rawn ti let khanglang! Ka lo chek zui hlak thei. Mahse, kei ve thung chuan inthlahdul emaw, polite taka lo biak ka tum reng reng lo. Hetiang, mipa mawl leh ka hmelhriat pawh ni lo lehnghal hi ka be tha nghal huam peih teuh lo mai.

‘’ Mamawh I neih chuan sawila. Puih I ngaih pawhin sawi mai rawh. A nih loh chuan maw, kei chu mi buai ka nia, nang angin hun ka nei vek lo’’  lo ti let ve hlak hlak in, alo nui hul hak. Nui ve ziah ringawt mai, hneawm lutuk ah! Chutah, ka rilru chu hrethei niawm tak hian, 

‘’ kan nui ve bawk ang chu! Nui thei tura siam alawm kan nih a’’ a rawn tih leh zet chuan meng phar nghal awk awkin, phone ka off hmak. A chhan sawitur chu hre hauhlo mah ila keimah ah hian ngaihthat lohna leh, hlauhthawnna a rawn awm nghal tup tup thei a. ka tiril te chu a khur ru der der thei hial a nih chu. He mihring hian min enthla tihna emni? Chutiang ti tur chuan ruai tu a nei a ngem? Hna tha leh him ka thawk a, en thlak ka țulna reng reng ka hre lo. Nge, amah hi mi mawl tak niin, hetiang hmang hian hmeichhe dangte pawh a lo tibuai thin ni zawk ang. Chutiang chu lo ni ta ang se, tunah ka number a nei vek tawh a, ka him ta lo tihna emni dawn? Ka ngaihtuah chian pauh leh ka hlauhna chu a nasa tual tual a, a aw mawlh mai te kha, nalh in pa hmel viau mahse a hlauhawm ru tlat. A vawt ruih reng a, mi fiamthu duh leh, pa uang thei tak chu a nih hmel tlat loh a ni. Huiham, ka ngaihtuah nasat poh leh ka buai tual tual a nimai si a, a tawpah phei chuan ka tihnghaina hretawh lo chuan ka thianpa Dika call in, min rawn riahpui tur chuan ka ti ta ngawt. A lo duh ve mai bawk a, ka thawl huai thei.

Hemi zan vek hian zanlai dar 12 velah rawn call nawn lehin, Dika mutna sitting-roomah ka tlan lut nghal rawk rawk a, Dika pawh chu kaitho zuiin, chu call chu ka chhan tir ta ringawt. Mahse, mak tak hian a reh zui hmak a, a țawng duh miah lo. Tin, amah atang khan thawm dang reng reng pawh hriattur zu han awm miah lo a! Mak tak a ni. Dika lah chuan meng phelh deuh phung chung hian tu nge a nih tih chu min zawt deuh sek a. ka hriat bik tlat loh avangin chhan ngaihna pawh chu ka hre lo angreng.

‘’ Mi mawl mawle!’’ ti nghut in, mu tur chuan room-ah ka luhsan zui leh daih. Min zawt zui tawh bik lo.

A tuk kan hnathawhnaah pawh lu na bur chung hian hna ka kal a. ka tha a tho lo takzet mai. Hnaah nise, kan buai a, damdawiin ah buaina hkir, chutiang bawkin in lamah lah eng thil mah chu phur leh thatho takin ka ngaihtuah thei tawh lova, ka hne hluah hluah ringawt mai a ni.

Nurse Hlimpuii’n min mamawh thu a sawi lai chuan whattsaap message ka dawng tih ka hriaa, ka en leh hmasa te te. Kha number atang bawk khan lo niin, a dp ah chuan a tukkhum lam chauh langa a thlalakna hi a dah a, a hmel a hmuh theihloh tlat. A taksa pianhmang a lan vek avangin a pian chu a nalh hmel fu roh a, mipa pian atana ka duh ang zawng tak ala ni zui tih ka hriat chuan ka ner deuh sak sak tawh. Mahse, Nurse Hlimpuii bawkin,

‘’ Nguri, I hman dawn tawh em?’’ a rawn tih leh tak lauh lauh ah chuan chu mihring message pawh chu reply ta lovin ka seen ringawt a, hmanhmawh bakleng hian nurse awmna lamah chuan ka tlanphei nghal. Muangchang leh uluk taka damlo ka bualfai leh te te hnuin, damdawi eitur ka pe nghal a, a muthilh thleng rawka ka thutchilh leh hnu chuan staff roomah ka lut ve thei ta hram.

‘’ Zan hmasaa call lo chhangtu kha I pasal tihna emni?’’ a message chu en vang vangin ka kiai ve sak a. A hrengai lo tan chuan khatiang hun tawh a mipa in call an lo chhang daih mai kha a mak duh dawn lutuk.

‘’ Ni love, ka thianpa’’ ti ringawta chhangin alo seen rang vut vut hle.

‘’ Khatiang hunah thian chauh chu a nih a rinawm loh’’ a rawn ti leh. Eng nge a buaina tur awm le. 

‘’ Buaina inei emni? Ka in a nia, ka duh duh ka hruai lut thei. Ka in neitu I nih loh ang bawkin ka pasal leh ka bialpa lah ini heklo’’  ka type leh ta duah mai le. Chutah, nui lai emoji rawn dah lang tuar chung hian,

‘’ Bialpa tur aw’’ a rawn ti a, ka țhen nghal sawk . Zaktheilo lutuk. Hun awl ngah bawk si ti rilru neuh neuh in,

‘’ E’’  ti ringawt in ka chhang let a.A seen ta lo vang vang.

Khami chin kha chu inbe tawh lo in ka chhan letna pawh kha a seen ta lo reng reng a, mak chu ka ti ve deuh. Khatiang tehtawpa inchhan kha ala na viau zawk tihna nge maw ni. Engpawhnise, a thu lo ve chiang em mai.

Inchhung ka luh ruala ka bathroom kawngkhar inkhar țhuai thawm chuan min tiphu thlawk lo chauh. Ka kat dawrh a, thinphu dup dup chung hian ka hawi kual nghal zak zak bawk. Mahse, thawm danglam em em a awm chhunzawm tak siloah chuan thaw dep dep chungin ka pen lut ta țhem țhem a, ka la hawi kual ve reng tho. kha kha eng thil nge ni ta ang. Sazu ni tur chuan a che na mah mah in a hre si a. umm,,a tawpah zawng, zawhte puitling thiltih atan puhthlu in ka inti thawveng ta hlauh. Bathroom erawh chu ka țih deuh tlat avangin eirawngbawl pah te chuan ka melh hrek hrek reng tawh. Zanriah ka eifel a, ka insengfel zawh hnu chuan message pakhat ka dawng tih chu ka hre ve chiah. Chu pawh, tudang nilo in amah leh tho kha a ni. Mahse, a message ka han ensak nak chuan,

‘’ Ka lo leng dawn!’’ tih hi alo ni. Ve ringawt chuan a. 

‘’ Rawn leng lovang. Tu nge inih pawh ka hrelo a nia, I mawl emni?’'  tia ka replyna zozaite chu seen vek tawh mahsela, pakhatmah a reply duh miah lova, min tihlauthawng ta tulh tulh mai. He pa hian rawn kal tak tak a tum a ni ngei ang tih ngaihtuah pah chuan hlauthawng lutuk in room-ah ka tlanlut sawk sawk a, kawrlum ka inbel leh mawlh mawlh hnuah, kawngka chu kalh tha in inchungah ka chho ta daih. Khatiang hmelhriat pawh ni lo leh, eng ang mi nge a nih pawh ka hriat loh, lo hmachhawn tur kha chuan ka engmah hi an la inpeih tawk rih lo tlat. Mi râp thei hial zawk. 

Inchungah chuan zan dar 10 thleng tehmeuh ka len hnuin ka chhuahsan ve ta hram a. ka in panna step ka chhuk lai hian tuemaw chu min tawk zawnga rawn chho ve in, kan intawk zui chawt. Zan khua kha a thim chhah angreng em a, a hmel erawh ka hmu  thei hauh lo thung. Kan inkalpelh hnuah pawh uluk zeta min la thlek zui vang vang avangin ka hlau thar thut a, chak mangkheng hian ka tlan thla nghal hlawk hlawk a nih kha. Tu tak ni ang maw. 

Zankhua maiin thlamuang lo ru tak chuan ka mu lui ve ngar ngar reng a, ka awm dan zawng zawng te hi tu hnenah mah ka thlen ngam bawk silo, a hrehawm takzet. Damdawiin hotute hnenah khan ka shift thlak hi dil ta ila, zan lam duty turah min dah leh daih mai se tihte chu ka ngaihtuah leh ren rawn thin. Mahse, hmanni lawkah staff zawng zawng te chu kan shift thlaksak kan ni zo chiah a, a theih tawh kher pawhin a rinawm tlat loh. Tichuan, thil tamtak ngaihtuah chungin ka lo muhil ve ta a ni ngei ang. Ka harh leh meuh chuan khua pawh a lo var ve iarh tawh a, ka thaw sawng sawng thei. Tichuan, tukthuan bar zui leh sawk sawkin hnathawk tur bawk chuan damdawiin lam ka  pan leh ta hnak hnak. Ka phur tawh lo angreng hle a ni e.

‘’ Thawm a awm. Thawm, thawm ka hria’’  ka mu tui lai chu phun chhuak mawlh mawlh in ka țhu chhuak ta hlawl mai. Thlan hian min lo bual huh vek tawh a, hlauthawng thlabar niawm takin ka lo thaw pah hlawp hlawp reng bawk. Eng thil ber nge ka hlauh pawh ka hre lova, ka mumangah chuan eng thil ber nge ka hmuh pawh ka hre chuang hek lo. Mahse, ka hlau em em reng mai abwk si a ngaihna tak pawh ka hre ta lo ve. Tlem tlema ka hlauhthawn zualpui a reh hnu chuan tui in turin choka lamah chhuah phei mai ka han tum leh a, mahse, thawm a awm. Ka kawngka pawnlama mihring tei vak vel niawm tak thawm chu ka hre tlat a ni. Thawm dim tak hian a pen ri thlep thlep reng a, a kalsawn hla duh miahlo lehnghal. Tu tak chu ni ang maw tiin ka room lam tukverh atang chuan pawnlam chu ka han bih kual vel chhin a, ka hmu hleithei lo. Mahse, thawm erawh chu ala awm reng tho bawk si. Keimah ah chuan hlauhna rawn lutin ka khur ru der der reng tawh a, kut khur hlawk hlawk chunga ka phone chu ban nghal in, inchungpa ka call harh ta ringawt. Hetih hun hi zinglam dar 3 vel ni tawhin muttui hunlai tak a ni tawh a, ka inthiamlo ru takzet a ni. Mahse, ka hlau a, tih dan dang thlawt ka hrechuang hek lo. 

Inchungpa ka call atanga minute tam pawh liam lo ah chuan an In atanga a rawn chhuak thla thawm leh, step a rawn rap ri thlarh thlarh thawm te chu hre chhunzawm nghal in, tlem chuan min thlamuan ve ta deuh. Chutah, ka kawngka rawn kik ri ka han hre leh zet phei chu ka va phu nasa tehreng em! Mahse, inchungpa aw ngei maiin,

‘’ Nguri, keimah. I pa Thantluanga’’ a rawn tih tak lauh lauh ah chuan ka thaw zui huai a. Rang zet hian kawngka hawnsak tur pawhin ka chhuak phei ve nghal. Kawngka ka va hawng chu ani pawnlamah chempui hum chung hian alo ding ve vung mai a, kan inmelh chiang kek kawk the e. chutah, Pa Thantea chuan thum dut mai hian,

‘’ Tumah pawh chu ka rawn hmu mang silova, kawmthlang lam pawh ka chhun kual vek tawh. Thawm  chu I hre ngei si  a maw’’ rawn tiin, makti fe hian ka lo hawi kual ve thut thut a, a mak a ni. Nichin lawk pawh khan kawngka bulah hian ala vei kual reng a ni si a, Pa Thantea ka call zawh hnu lawk pawh khan ala vei kual ngei alawm. Kawmthlang lamah zuangthla ni ta se, amah Pa Thantea hian a rawn hmu hman hialin ka ring zawk. Mihring pangngai a nih phawt chuan chuti em ema a chet ran kha ka ring thei lo hulhual. A awihawm loh lutuk zawk. Chhanna ka pek tak mai loh ah chuan amah bawk chu rawn tawng chhuak lehin,

‘’ Chutia I awm a nawm loh viau si chuan Mama te unau ka rawn riah thlak tir mai dawn emni? Nge, nangmah pawh hi rawn riak chho zawk ta mai la’’ rawn ti lehin, ka lu ka lo thing deuh nawk nawk. Mahni chenna in hlauh vanga han riah chhuah daih kha chu a zahthlak bakah, tlawm thlak ka ti ve deuh. 

‘’ Eng em a thleng tawh lovang. Ka lawm lutuk a nia’’ ti ve in, hreh hmel tak chuan min kalsan leh ta phawt a. kawngka ka kalh zui leh rawk rawk. Chumi zan chuan muhil nawn tawh lo chiang tak ka ni bawk e. 

‘’ Nguri, hmu duh tu che an awm a. counterah lo phei lawk mai ta che’’  countera thu thin Mahmingtei’n a rawn tih chuan damlo damdawi ka lo pek lai tak a ni a, ka hmanhmawh ru ta kher. Ka damlo enkawl mek bulah chuan, 

‘’ Pi, hei hi lo ei leh la, a bak chu eitur inei tawh rih lo aw. Chuan, malis tur chein ka rawn kal leh dawn a nia, ka reilo ang ‘’ ti sawk sawkin ka chhuahsan nghal a. Reception counter ka va thlen phei chuan thutthlengsei pakhat chungah hian mipa, la naupan hmel tak leh, fai vik vek zet mai, ang tha thlerh thlawrh tak ni bawk si chu keimah min hmuh rualin hlim hmel pu sang hian a lo ding chhuak tih ka va hmu nghal a. ka hriat zawng a nih loh avangin mak pawh ka ti ve det. Mahse, pan hnai zelin kan indinchilh zui ta ran mai. Ani chuan nui sâng chunga min en kal chung hian a kut a rawn phar chhuak bawk.

‘’ Chibai le, Ngurthanpuii ini ang maw? Zonuntluanga ka nia’’  a aw mawlh kha. Hriat tawhna nei tlatin ka inhriaa, chubakah, a hmel te pawh chu hmuh tawhna nei ni tlata inhriatna ka nei leh. Ka chiang mai thei bawk silo.

‘’ Aw ni e, tu nge inih a. Eng thil nge I duh ve tak’’  chang deuh faka ka han tih ve chuan alo nui deuh sak.

‘’ Pawi itih loh chuan thingpui inpui lawk che ka duh a. Rem iti em?’’ rawn ti lehin, mak chu ka ti ve deuh. Mahse, pawimawh alo awm te pawh a ni thei a tiin counterah ka va inreport leh phawt a, ka rei hman loh thu ka hrilh hnu chuan kan inzuichhuak ta nge nge a ni.

Ka thawhna damdawiin bul lawka thingpui dawr lian lemlo takah chuan inzui lut ve in, kan inhmachhawn leh ta ran mai. Order te kan tihfel leh zung zung hnuah chiang zeta min rawn melh leh vang vang phawtin, a nui deuh sak. A hmeltha phian mai ka ti.

‘’ I sawi duh chu han sawi tawh la’’ lo ti chang leh fak in, a ruk tak chuan ka rum lutuk mah mah em aw ka inti ve tho. Mahse, he mihring hi ka mi hriat zawng pawh a ni ngai lova, ka tlangnel khum viau na chhan tur point khat takngial pawh ka hre hek lo. 

‘’ Ah,, englo, min hau miah suh aw’’  raw ti hmasa te te in, ka lo ning ru tawh angreng kher.

‘’ Inlak zei vak kha a ngailo ang. Sawi mai rawh’’ lo ti let leh hmukin, a nui leh mai a. 

‘’ Khang phone call leh text zozai I dawnna thin kha ih, keimah vek hi ka nia’’ a rawn ti a nih chu! Makti fe hian ka lo meng phar awk thei a, inhumruh teuh in amah chu ka en ta ran ran reng bawk.

‘’ Ka tihbuai tawhna che vang khan min ngaidam thei a ngem? Ka thiamloh a ni’’ rawn ti leh sap in, inthlahrun hmel zet chuan hnuailam a bih reng mai a. ka ngei hluah hluah.

Tichuan, kan thingpui chah a rawn thlen a rawn thlen lai takin kei chu ka lo ding chhuak deuh hluai a, ka hmaa thu tlangval pawisawi loh hmel zet pawh kha ka la melh vang vang reng.

‘’ Min tih thlaphanna leh hlau hlawpa min siam tawhna kha engtia siamthat leh nge I tum a? I hmel leh I pianzia en hi chuan mawl deuh tur ini lo mawle. Um, mangtha’’ ti hlakin ka chhuak nghal vang vang a, thingpui min rawn pe tu nula khan dawr kawngka thleng chu min rawn umzui ve  nghal in,

‘’ Tu in nge thingpui te hi in dawn ta a!?’’  rawn ti lawm lawm mahse hrelo ang hmakin ka awm khum a, ka kal deuh hmawk hmawk. Amah, kha pa ngei khan engkim chu lo buaipui ve tawh mai rawh se. Thinrim zetin damdawiin chhungah pawh ka pen lut hmawk hmawk a, ka kalsan tak ka damlo enkawl awmna lamah khan ka lut tlang pawp pawp tawh. Cabin ka thleng phei tep tih in staff room atang nurse Hlimpuii kha phone lek vu vu chung hian a rawn tlan chhuak ve hlawp hlawp bawk a, ka hmel a rawn hmuh rual rual chuan,

‘’ Nguri, hei, I phone a ri char char a nia. Lo chhang lawk mai the'’ rawn tiin, amah chu ka va kal hnaih nghal vat. Mahse, ka phone ka han en nak chuan kha pa, tun lawka thinrim engphiara ka kalsan tak tho kha lo ni leh in, rang zet hian call chu ka la nghal a,

‘’ Eng nge?’’ ka ti țhat. Chutihruala ka bula lo ding reng nurse hmela mak tihna rawn lang chhuak kha ka hai mawlh lo. A hrilhhai hmel takzet a ni. Mahse, chu chu kalsanin veranda thlanglam ah phone chu ka chhuahpui zui ta daih zawk a. 

‘’ Thinrim lo hram la, hetianga ka rawn tihbuai fo che hian chhan tha tak a nei asin’’ a rawn tih chuan kei ka lo pawr tulh tulh.

‘’ A chhan chu eng nge? Thil pawimawh tak pawh va ni suh. I lerhkawh awmngaihna hrelo lek I nih kha” ti let hrep in, ani chu a lo thaw deuh hak a. ka huat tawk hi a tling thin mange.

‘’ Khawngaih takin hun min pe ve rawh. Ka duh che a ni!’’ a rawn tih chuan min țhawng ve em a, sawi zui tur hre tawhlo in ka ngawi ve ta hlek. Engtin nge min duh theih ka hrethiam lo. Tunhma in kan lo inchulnel tawh a, kan lo inhre tha tawh e, tih lah ni bawk silo. Khawi atang nge ka number te hi a neih tih pawh ka hre lo a nia, rin chu a harsa ve khawp mai.

‘’ Min lo be tawh suh. Ka duh ve lo che’’ ti let nghat in call chu ka hmet tawp a. inchhungah ka lut zui nghal. Ka awm dan pangngai reng pawha ka rilru a hah tawh tehreng nen, a belhchhah tu tur dang hi chu ka mamawh tawh lo viau asin le. 

Khatianga ka tih hrep hnu atang kha chuan ani pawh a reh zui ve ta tlawk tlawk a. Hnaah kan lo buai ve thin bawk nen, ka ngaihtuah zui vak hman lo thin zawk a, phone pawh ka khawih tlem phah khawp mai. Hna atang ka haw a, ka mu a, ka thawh hnuah nise, hnaah bawk kal lehin nileng țhakin damdawiinah kan buai leh a, chu chu ka nitin hun hman dan ni thin mahse, ka hlim a, tibuaitu em em nei loh tihtakah ka thawveng ve halh tho mai. Ka kjawhar hlau in ka thiante nise an rawn kal awl lova, keimah zawk hian duh ang tawka lo kawmna hun ka nei lo thin mai pawh a, vui nasa ve thei tak an ni.

Ni khat pawh, ka off day a nih angin thiannu Biakthangi nen chhuah dun kan rel ve ngei a, kan chhuak ta ngei bawk. Bazarah sanpiau va hawp ang a tih deuh tlat avang chuan bazar lam pan turin kan kal nghal a, kan lut chho tep tih ah, thilmak deuh ka hmu leh ta.

Kha tlangval Zonuntluanga leh hmeichhe pakhat, dawr chhunga an inzui lut tur lai chu va hmu hman in ka ding chawt. An inhuat loh hmel em em si a, makti zet hian ka thlir zui ta vang vang mai a nih chu! A chhan ka hre lo, keimah ah hian diklo engemaw tak hi a awm nghal rum rum mai. Ka thik tihna emni ang? A ni thei lo. Ani thik tur khan sulhnu kan nei lova, chutiang chu a thleng hauh lo mai. Mahse, keimah ah hian diklo hi chu a awm chiang si a ni.

‘’ Eng thil nge I en zui vang vang a. min pawt ding chawt a ka tluk tep lehnghal kha’’ Biakthangi’n a rawn tih tak hlukah chuan harhchhuak nghal zawkin ka hawi deuh vut vut. 

‘’ Eng ni love, ka hmelhriat ka hmu emaw ka ti thut a, alo ni leh silo a’’ tih pah chuan kan kal zui leh mai a. ka rilru a insual nasa ta hle. Ka awm pawh a nuam tawh miah lo. Ka thiannu thusawi leh min biakna te pawh chu ngaithla liam vel mai maiin, ka beng kawrawng ah hian an lut thei hauh lova. Min nghawk harh leh zawk thin.

Bazar atanga kan haw hnu pawhin chau zet hian inchhungah chuan ka vak lut lo chauh tawh a. zawi zet hian thutthlengseiah chuan ka thu nghal ngawih ngawih. Zawimuanga ka phone bawk chu phawrh lehin whatsaap ah ka lut a, engdangmah ka ti lo. Kha Zonuntluanga phone number kha save hauhlo mah ila chat ah chuan alo la awm ve reng avangin ka hmet chhuak zui vat. A dp te chu thlek deuh vang vangin eng thil nge ka ngaihtuah ka hrethiam tawh biklo. Ka khawhar rukna chu amah ah burrbun vek ka duh a. Ani hi biak ak chak a ni. Tichuan, kan inbiakna hlui te kha chhiar tha leh vel in, tawngkam mawilo taktaka ka reply na te chu tun hnuah ka inthiam loh phah ta viau zawk a, ka țah nuih titih ringawt.

‘’ Vawiin kha, iva zui chhelo em em’’ tih chu type in ka va thawn ve ta ngawt a. A hma ang tho khan lo seen rang leh vut vut tak a ni. 

‘’ Khawiah?’’ tih zawngin min rawn chhang a. ka ner deuh nawk. A hre lo der vel khanglang dawn a nimaw?

‘’ Dawr pakhat chhungah I bialnu nge, I nupui zawk ka hrelo. In inzui lut lai ka hmu che u lawm’’ tih thu ka va thawn leh chuan a rawn call ta chat. Thinphu dup dup chung hian call chu ka lo la ve mai a, a aw mawi leh vawt ruih mai kha ka hre nawn leh ta. Mak tak hian a aw ka hriat rual ringawt pawh chuan tihdanglam ka ni zui leh a, keimah ah danglam engemaw tak chu a awm chiang a ni. Ka sawifiah thiam chiah silova, ka tawt up up thei.

‘’ I hriattur chu maw, kei hian phirpui ka nei tih hi theihnghilh lo la. A hming pawh Hmangaihsanga a ni e. nangmah ang bawk khan midang tamtak pawh hian min haipawlh ve fo tho a, I demawm hran hauhlo a nia’’ tiin a khuh zui leh khak khak a. sawitur ber pawh ka hre ta lo. 

‘’ A nih chuan, thil engkim vang khan ka tihpalh aw ‘’ ti sapin, ka nui lui ve hak hak. Ani pawh chutiang tho chu niin, tunhma ang khan sawitur chu a hre barh barh tawh viau lo. Nia, keimah vang vek hi alawm. Khati khawp khan tawngkam chhe tinreng in tawngkhum phiar phiar thin mah ila min la be tha ve duh hi ka lawm tawk em em zawk a ni. 

Hemi zan atang chiah hian ka nun bul chu a rawn intan chho leh ka ti mai. Mipa pakhat vangin ka kahwvel a inthlak danglam a, tunah chuan hmangaihnaa luanliam vangin ka nui ve leh thei ta. Ni e, a taktakin asin ka nuih ve tawh ni. Ani nen chuan inngaizawng ang em em in la khawsa dun lo mah ila min ngaihtuah thei hle a, ka awm dan leh thiltih engkim te hi hriat ve vek a duh thin nghe nghe. Hna atanga kan haw hun hi zan khaw thim hnu te a nih thin avangin min ngaihtuah a pe na em em zel a, lirthei lam chu nei hauhlo mahsela damdawiin kawtah hian ka hna ban hun nghakin alo awm kar tawh thin a, tichuan, ka chenna hmun thleng min thlah leh thlap zel. Chutiang zelin, hna kal dawn ah nise min rawn call harh tu a ni fo va, damdawiin thlenga min thlah hnuah a haw leh chauh thin bawk. A hma zawnga mawl tia ka lo koh fo thinna kha sût lehin, mipa mawl tak leh misual a nih loh zia a tilang fiah tukh tulh a, a dawhtheihna leh, a mi ngaihsakna chu thlahlelin , mawl tia ko tawh tu ngei kei hi ka buai ru ta fo zawk a nih hi mawle. Heng atang te pawh hian kan mihring hriatchian loh kan judge duh dan ah fimkhur a ngai hle niin ka hria a. Engamah hmaa midang kan tehna hmanrua hi thlak danglam a hun tawh takzet. Vawikhat inhmuhna leh inbiakna ah tute mah hi kan inhrechiang ngai dawn lova, chuvang chuan, an tawngkam pakhat lek kha an nun zawng zawng the nan a tlak lo tih hi hre nawn hram the ang u. kei takngial pawhin he tlangval ze zawi awi tak hnen atang hian ka hriat chian ve tawh em hi. 

Ni khat chu, chhun chawlh paha kan in video call laiin toiletah phone chu ka luhpui leh daih a, bang ngheng ar ar chung hian amah chu ka be pah mawlh mawlh. Chutia, a hmel pawh en lemloa ka lo tawng mawlh mawlh lai chuan ka phone screenah chuan thil diklo a awm tih hria in ka en zui ta vat. Khai aw! Ka biak mek Zonuntluanga hmel chu lo dâng var pup in, a mit hnuai erawh  lo dum kual ruih thung a, makti fe hian ka en ta tlawk tlawk mai. Chutihlaiin, ani thung kha chuan che lo chang lo hian min lo thlir ve reng thung a, a mit takngial pawh chu a khap eih lo niin ka hre nghe nghe. 

‘’ Tluanga’’ hlauthawng aw khur hlak hlak chunga ka koh hnu minute 3 ral hnuah chuan rawn harh chhuak hlawl niawm tak hian a inthing zuu ta nawk nawk mai a. A mit te pawh chu a nuai zui leh chat chat bawk.

‘’ Ka lo mu thlu hman a nimaw?’’ rawn ti tham țiak in, mak tak hian a hma lawka a hmel lan dan engkim te kha zu han pangngai leh vek tawh a mawle! Engtin nge hetiang hi a nih theih zawk. Amah nge dikloa keimah zawk hi. Thil thleng mekte hi ka hrethiam ta lo tawp mai.

‘’ Tun lawka I hmel lan dan kha’’ ka tih leh lai chuan za lo fahrana rawn nuih chhuah hawk pah hian,

‘’ I hmuh sual a nih dawn chu. Ih eng lo, hei ka buai lawk dawn a, zanah kan inbe leh dawn nia aw’’ tiin call pawh a dah zui a. min ti bangbo hle mai a.

Hemi ni vek hian thilmak dang tawng chhunzawm lehin, ka damlo enkawl lai pitar, mahni pawha insaseng thei tawh lo kha a khumah chuan zangkhai hmel vah hian a lo thu chhuak tih ka va hmu leh a! A cabin chhung ka ka va luh rual khan chiang leh uluk zet hian min lo en reng mai a nih chu! Ka phu nasa kha ka zuang dawrh thei hial in ka hria.

‘’ Pi, vawiin chu ilo tho harh peih ve a nimaw? Nuam lo zual lai deuh te ila nei em? Han sawi la, ka lo malis leh ang che’’ ka tih chuan a mit pawh khap eih lo hian ka che vel ringawt chu min en thung a, a cabin chhunga ka teikual vel te chu mit tla lo lekin , taksa dang che miah silo hian min lo en kual ve zel a nih chu mawle! Ani hi hetiang hian a kahwsak ngai pawh ka hre lova, mi rap ru ta tlat mai. Tichuan, a bulhnaiah pawh kal tha ngam tawh lo in hla deuh hlek atang chuan ka va be ta ringawt mai a, ka țih tawh takzet.

‘’ Pi, ka biakna che kha I hre tha thei em?’’ tia ka han zawh leh chuan vawikhat vel chu chiang angreng tak hian a rawn khap ve ta sak mai a. ka phu zawk.

‘’ I mipa hmangaih kha tu nge a nih ka hria asin. I rilru leh ngaihtuahna chhunga awm reng I mipa hmangaih kha tu nge tih ka hria!’’ rawn ti thâm zui chialin, thawklehkhatah, nidanga a tih ngai hleih loh hian khum atang chuan a rawn vak thla ta mai a nih kha! A taksa cher em em ruhrel inkhak ri rawk rawk te chu hretheiin, chak fahran hian ka dinna lamah chuan a rawn vak phei ta zawt zawt mai a! Ka hlau lutuk awmngaihna hre tawh lo chu pawnah tlan chhuak nghal in, counter lam pan chuan ka au phei ta ruah ruah mai a nih kha. Min lo hmu tu apiang te chuan thilmak hmuh in min hmu nge ni, min en zui vang vang hlawm a. Hlau hlawpin staff roomah ka tlu lut rawk rawk a, ka tawng chhuak lawk thei lo nghe nghe. Ka thawhpuite ho in thil awmzia min lo zawh sap sap pawh chuan mangang takin ka la hawi kual ruai ruai reng a, pitr damlo mawlh khan min rawn umzui ni tlata hriatna ka nei bawk si nen, a hrehawm duh takzet. Mahse, tui intur te min pek a, min thin harh nawk nawk hnu erawh chuan zawi zawiin ka harh chho ve ta tial tial a, a tawpah phei chuan thil thleng engkimt te kha ka sawichhuak ve thei ta hial. ka sawi zawh rual rualin nurse duty ho chu ka damlo awmna cabin lamah an tlan phei nghal ta sap sap hlawm a. kei thung chuan ka zui ngam tawh lo hrim hrim a ni. Mahse, hun rei pawh an va thang hman lo ang tihturah rawn let lehin, an thu rawn ken chuan min va han tihrilhhai nasa zual tak em.

‘’ Nguri, I pitar enkawl saw a lo chatthla daih tawh alawm! A lo berah, darkar tha vel chu a liam tawh maithei’' rawn ti tu, nurse Hlimpuii chu en in ka meng zau nghal kawk mai. Chutiang chu lo ni ta ang se, Zonuntluanga nena kan inbiak hma hret khan alo thi fel der tawh tihna a ni ang maw? Chhun thil ei tura ka chhuahsan lai vel kha a ni ngei ang. Mahse, engtin nge pitar thi tawh chuan a khum chunga thu chungin kei hi min lo biak theih ngawt ang. A,,, eng thilmah pawh hi ka hrethiam tawh lo. Ka buai a ni. Vawiin hian ka buai zual takzet. Eng thilmah hi an kal fuh hleithei thlawt lo a nih hi mawle. Zonuntluanga nise, khatiang khan diklo zetin a lan dan ka lo hmu sual tawh a, tun lawkah lah pitar thi tawh hnu kha kahti khawp khan ka hmu maksak leh angreng bawk si. Ka dik lo. Keimah ber zawka hi ka diklo tawh chu a nih hi. Um,,, hahdam ka mamawh ngawih ngawih. Chawlh hahdam vang vang ka duh a ni. Ka chau lutuk te pawh a ni a nge.

Chawlhkar khat chhung tal chawlh ka dilna lehkha chu pawmsak niin, chawlh ka hmu thei ta. Engthawl taka hun hman leh, awm hahdam vang vang ka duh a ni. 

Ka chawlh theih chhung hun reilote chu am taka hmangin In lamah sekrek khawih tur ka zawng a, ka intibuai lui char char. Hetih chhung zawng pawh hian Zonuntluanga kha zan lamah a rawn kal awl meuh lo. Ka thil tawn engkim chu hrilh hre lo mah ila ka awm dan ah thil diklo a awm tih hria in, min duat thar em em a, eiturte min siamsak in a chang phei chuan min riahpui hial thin bawk. Mahse, khum khatah mu dun lovin kan intawk chhin eih lova, ka duh lo chung chung pawh min tilui ngai chuang hek lo. Hei tak hian amah ka duhna a tizual a, min zah der thiam in, ka thu nise a awih em em reng a, ani aia ka upatna chu thuhran nise, hmeichhia zawk ka nihna ah ngaihsak leh duat mamawh zawk ka nihna hrethiam in min dawm thiam takzet zet a ni.

Tunah chuan inngaizawng nghet ang tak takin kan awm ve tawh bawk a, kan inngainatna a zualin han inzahpui țit țet te, lai deuha han chet vel te kha a awm ta lemlo bawk. Tlem a tlemah kan invawihkhum lo chauh tawh a ni.

Kan inzui ngawrh tulh tulh a, kan thutak tual tual bawk a. Thikthu pawh pe chhe thei tik tek tak kan ni. Mahse, engemaw ti zawng tak chuan a nuam angreng viau lawi thin a, a titau hmel leh a thikthu pe chhe hmel mawlh mai te hi hmuh nuam ka ti si a, ka thlem tha duh ngai lo.

Ka chawlh neihchhun pawh ka hmang zo a, hna ka thawk ve leh ta. Khatiang thil maksak lutuk ka tawn hnu kha chuan eng thawm mah hre zui leh tawh lo in, nun pangngai tak ka hmang chho leh ta kha a ni a, keimah pawh ka harhvang in ka zangkhai ta vah mai. Mahse, tlai khat ka hna bang chu inchhung ka luh hma hian in neitupa, pu Thantea bawk khan min lo ko ding zuiin, a hmel chu a uang lem lo hle tih pawh ka hria.

‘’ Aw pa Thante, eng thil nge ni ta?’’ pangngai taka ka han ttih chuan ani chu a lo meng hnual nghal ruih a. sawi tur pawimawh engemaw tak chu a nei tih pawh a hriat mai.

‘’ Tunlai hi I dam tha meuh em?’’ tia bultan hmasa te te in, ka damthat tawh thu chuan ka lom chhang ve vat bawk. Chutah, han hawi kual leh vel zung zung phawt in,

‘’ Mak tih deuh mai hi ka nei a. Thup mawi leh sawi mam pawh ka thiam chuang lo tih kha lo hre hmasa la. Ngaihthlak dan ilo thiam mai a ni ang chu’’  rawn ti hmasa leh zetin, a sawi awmzia chu ka hrethiam lo ve em a, ka hawihai ta angreng viau.

‘’ Han sawi la’' dam thlapa ka lo tih leh hnu chuan,

‘’ A,, eng lo a nia, hei, thenawm khawveng hnai ho hian I lut chhuak tur hi an lo hmu ngun deuh che nge ni, mahni chauha I titi mawlh mawlh te, I nui lai te leh kalpui nei niawm taka I khawsa thin lai vel te hi an lo hmu fuh thin viau che a nih hmel a, min rawn hrilh tlat a ni. Han awih lo viau mah ila ka bulah hian an sawi ngun tak em avangin vawikhat kha chu I phalna pawh la hmasa lo hian I inchhungah ka  lut ru tawh a , mahse, alo felfai phian bawk si. Chuan, nimin tlaia I hna bang kha kan nu leh kan fanu hian an lo hmu fuh ve che a ni awm a, thawm I rawn nei haw niin an sawi tel nghe nghe. Mahse, I kalpui emaw, I mi biak awm ang reng reng chu an hmu ve thei hauh lo thung a, atir kha chuan phone hmang ni turah an han ngai ngawt chea, mahse, alo ni miah bawk silo nen, mak an ti dun viau a ni awm asin. Heng thil hi eng nge an nih chiah min hrilhfiah thei a ngem?’’ a rawn tih takah chuan ka hawi buai zui ta hle.

Pu Thantea thusawi engkim kha diklo pakhatmah a awm lo, mahse, kei chu tlai tin deuhthaw in Zonuntluanga nen kan haw rual a, in thlengin min thlah thlap thin ka tih tawh kha. Chutiang zelin, hna ka kal dawnah pawh min rawn hruai thlap zel a nih kha. Kei hian tu nge ka hmuh a, tu nge ka biak ka hrechiang viau si. Chuti a nih si chuan anni ho hian engtin nge Zonuntluanga kha an hmuh ve theih loh, thilmak a ni. Ka bulah zel a kal a, a chang phei chuan kut inkai hial pawhin kan kal dun thin. Ka kiangah a awm a, ka chiang lutuk tlat.

Chutah, ka hmaa ding reng leh ka chhanna nghaka min lo thlir reng tu Pa Thantea chu va melh deuh zawkin, nui hmel pu lui hram hram chung hian,

‘' Ah,, Pa Thante, an sawi uar mai mai a ni lo maw le? Chutianga hmuh theihloh ka biak awm chu ka va han hrelo em. Engemaw chang chuan ka thianpa hian min rawn hruai a, min thlah haw ve leh thin bawk a, a bak chu thildang a awm lo a ni’’ ti ban deuh chuar chung hian Pa Thantea pawh chu alo bu ve a nghut nghut a. ka zam chhe tawh angreng hle.

‘’ Nia, hmeichhia hi chuan thil te hi inla vawng hma mah mah thin a, keimah ngeiin mita hmuh ka neih ve miau loh avangin han awih chin tur pawh ka hre ve ta lo ve. Ilo fimkhur deuh tawh mai dawn a nia’’ ti leh charh charh in min kalsan a. keipawh ngaihtha fahran lo chuan In lamah ka peng zui ve ta mai. Ka ngaih reng reng hi a tha thei lova, ka awm lah a nuam thei bawk heklo. Engtin nge, engtiklai pawha ka bula awm kha an hmuh ve theih loh zawk le ka ti. Ka hrethiam ta lo hle mai. Engpawhnise, tun atang chuan Zonuntluanga nen pawh helai hnai velah hi chuan inhmu tawh rih lo ila a that zawk ka ring ta deuh a. a nuam duh lo ve em a tin ni.

Zankhua in mut hmunah ka ngaihtuah chhunzawm char char reng a, thildang ah reng reng ka rilru ka pe hleithei tawh lo. Ka mut a chhuak thei lova, ka buaina chuan mutchhuak zawng zawng pawh an umbo zo ka ti mai. Chutihnakalaiin ka bathroom chhungah lah chuan thawm mak tak tak alo awm ve reng bawk a, tho chhuakin va en mah ila hmuh tur engmah a lo awm ngai chuang silo. Buaina a rawn belhchhah angreng khawp mai.

In neitupa thil min hrilh te kha Zonuntluanga hnenah chuan pakhatmah ka sawi lang duh miah lova. Hrehawm a tih phah dawn lutuk tlat. 

Tuk khat ka hna kal tur chuan thilmak dang ka tawng leh ta. 

Tha te tea ka kawng kal lai chu tuemaw hian ka bânah rawn man thutin, ka inher kual zawk thei a, kawnga kal ve midangho pawh chuan ka awm dan the hrep chu maktih hmel takin min en zui haw haw tawh mai. Chutah, chutianga min kuaiphar tu hmel ka han en chian nak chuan, hman deuha ka damlo enkawl boral ta, pitar tho kha a lo ni leh nia mawle!! A sam a thur angreng hle tihloh ah chuan damdawiina a awmlai ang chiah chiah kha a lan dan chu a nimai e. ka au zui țhat thei. Mahse, ka hmui min rawn hup sak deuh chawt chung hian,

‘’ I bialpa, I mipa hmangaih em em kha ka hria! Ka hria! Pialralah intawng leh ngei ang che u’’ ti chungin rapthlak zet hian a nui leh ta kar kar mai a. min deusawh niawm takin ani chuan a kut zungchal cher em em hmang chuan min rawn kawk ngar ngar bawk a, min nuih dir ta tlek tlek mai nia! Ka hlau tihngaihna hrelo, kal ngaihna hre tawh bawk silo chu ka dinna hmun, kawngsir maiah chuan thu sawp nuaiin, ka au zui ta nghek nghek mai a! Zah pawh ka sawi thei tawh lo. Ani lah khan kei chu min nuih ker ker chung hian motor insulpel zut zutna lamah chuan a bi bo zui ta daih a. chumi hnua thil thleng engkim chu hriat zui nei tawh lo in ka awmna hmunah chuan ka thal deuh tawp a, ka harh chhuah leh hnuah erawh, ka thawhna damdawiin khumah ngei khan ka lo mu tawh a ni tih ka hre chiah. Ka awm dan mawlh chu ka hriatthiam loh em avangin ka harhchhuah rual rual chuan tlanchhuah ka tum nghal ut ut a, nimahse, nurse leh doctor duty ho chuan damdawi chak tak hmanga min rawn chiu hnan leh avangin ka zal ta chauh a ni. 

He zan zet hi chu ka harh nawn awn awn reng a nimai e. A chang in kha pitar hmel rapawm zet kha ka hmu a, a chang leh, zonuntluanga mangang hmel te ka hmu thul. Doctor leh nurse ho buai phili zeta an au chel chul lai te pawh chiang lo ruai in ka hmu leh thin bawk a, mahse, heng zawng zawng hi a tak an ni lo tih ka hriat a, ka pawm a ngai.

A tawp a tawpah chuan chiang em em a rawn harh chhuak hlawlin, ka thu chhuak zawk a. ka thaw zui kawk kawk mai bawk. Banga sana intar ka han en chuan zan dar 11 chiah chiah hi a lo ni tawh a, chhuah pawh ka tum buai peih tawh lo law law. Ka thawhah zualpui a reh meuh chuan ka thawl ta huai ni hian ka inhriaa, ka hahdam huai. Mahse, ka riltam tawh zia erawh chu hrilh nawn kher ngai lovin ka pum lam chuan a rawn hrilhfiah chiang hle a, a ri kal ruih ruih reng mai. 

Nurse Tluangpuii kha rawn lut vat in ka harh tha tawh tih a hriat chuan min rawn nuih nghal var var mai a. ka riltam zia thu chu ka lo hrilh nghal var. Tichuan, rang takin eiturte chu min chahsak ta thuai thuai a, ka that leh that loh pawh min zawt awllo in min be deuh reng bawk. Ka thawl zual sawng sawng thei. Zanriah ka ei zawh hnuah meuh chuan ka taksa te pawh chu an lo chauh ve tawngkhawng a ni a nge, ka mut a rawn chhuak leh ta em em a, Zonuntluanga chuan min rawn bia em tih lam ka ngaihtuah thei lo. Ka muhil zui nghal bawrh bawrh.

Ni zungin ka mutna zawn tukverh a rawn chhun tlet sar sar lai chuan ka mu tui lai pawh ka harh ve nghal a. Rang takin phone chu ka ban vat. Rinlawk ang ngeiin Zonuntluanga missed call leh text pawh a lo awm leh nual tawh a. ka call back ve nghal. Rang zeta min lo chhang nghal in ka damlo min kan tur pawha a rawn kal hman rih loh thu a sawi niah niah a, zan lama kan inhmuh mai tur thu sawiin call kan ti tawp ta rih. Ka thaw zui hawk mai. Um,, kan thenawm khawveng nu ho hian hmuh hmaih an nei nge, in neitute lakah hian min puh hmingchhiat an duh ve hrim hrim ni zawk ang. Ka hrethiam ta hrep lo ve a. 

Chhun a rawn thlen meuh chuan ka damtha vek vawk tawh bawk a, chawlh min pekna pawh lo hnial ve zat in, hna chu ka thawk chhunzawm nghal. Khua a tlai tual tual a, ruahsur tur intham vel chu a rawn thawk na țan ta angreng hle. Thli nise, na zet zet in a rawn thaw tak ang fur fur a, current awm lo nen, damdawiin pawh chu a thim tha tawh mup mup khawp mai. Damdawiin inverter chhiat lai tak lo ni ve bawk nen, thawktu ho pawh bati leh lantern khaiin kan inkalpel suau suau tawh a, kan buai takzet a ni. Chutah, tam mangkhenga darkar khat chuang fe a rawn sur buak hawk hnu chuan hán ve leh maiin, haw alo hun der tawh hi a nia, a thei thei chu kan haw zui nghal sap sap bawk.

‘’ Bawiha, zanin chu power house bula waiting shedah khan ka lo nghak mai ang che aw. Nge, min lo nghak zawk dawn’’  In lam panna busa ka chuan laiin Zonuntluanga bawk chu ka va be leh. Diktaka sawi chuan tunhnai te hian kan inhmu khat em a, ka ngai ve takmeuh a ni. Ni dang ang lo tak hian ka text na te pawh chu a rawn seen har em em mai a, a buai ve tak tak a nih te pawh ka ring ta rum rum hial. Zanin pawh hi a lo kal thei lo mai anga tia ka ngaihtuah lai te chuan ka țim leh sawk thin a. ka hmuh chak tawh lutukna chuan eng thilmah hi indanbeh tir ka duh lova, lo kal sela a tawk a nimai.

In ka thlen fel hnuah ka biakna pawh chu rawn chhang hman ve ta chauh in, a hman chiah thu leh, a thleng hmasa zawk zawk beidawng lova innghah ah tiin kan rel tlu ta ngawt a. ka va han phur tawh tak em. Eirawng chu bawl chhunzawm nghal char char in, zanriah ka ei fel meuh chuan zan dar 7 a lo ri thuak tawh. Hmanhmawh ru zet chuan ka insiam ve leh nial nual phawt a, ka chhuak nghal vang vang.

Inhmuhna tur hmuna kan sawi, waiting shed ka han thlen lai hi chuan midang thu ve pawh an la awm nual mai a, amah Zonuntluanga erawh chu a hmel hmuh tur ala awm ve lo thung. Tichuan, amah nghak pahin phone te chu ka lo sik kual vel leh rih phawt a, ka thlen tawh thu erawh chu ka hrilh fel diam tawh thung. Ka thlen thu ka hrilh atanga minute 20 hnuah a rawn chhuah ve mek thu chu rawn sawiin, ka nui zui var var. Mahse, min reply na pawh darkar khat a liam tawh ang tihtur ah pawh chuan rawn thlen tih reng reng a nei thei ta silova, ka bula thu ve midangho pawh chu pakhat te te in an kalbo zo vek tawh a, mahni mai ka ni ta. Ka call a chhang thei lova, text lah a seen thei chuang bawk silo chuan min ti ngaihtha lo țan tawh hle a, ka awm chu a nuam lo takzet tawh. 

Zan dar 11 lai a ri ta! 

Khua lah chu a dur khup khup reng a, ruah mal hraw em em pawh nilo te chuan min rawn tlak tan ta der mai. Ani chu call nawn leh ngat ngat in, tunah phei chuan call tlang theihin a awm tawh miah lova, switch off a inti hmak! Eng nge thil awmzia hi ni ta ang le. He pa hian kha leh chen atang khan min lo bum ve mai mai tihna a ni thei a ngem. Ka ring si lo. Ka ring phal thlawt lo zawk.

Khawlai dung te chu reh diak tawhin, mihring veivak hmuh tur lah an awm tawh lova, ruahsur buan buan ri tih mai loh chu thawm dang hriattur pawh a awm tawh miah lo. Ka thinrimna leh luhlulna chuan min la thunun hneh bawk a, ka thutna pawh chu sawn buai duh hauhlo in ka thu lui ve ngar ngar. Ka huh zawr chhe vek tawh bawk. Mahse, hetia ka rilru nat vanga ka mittui tla te hi tute mahin min rawn hmuh pui hauh lova, ka nat zia nise min hriatpui bawk hek lo. Thuk takin natna ka tuar mek a, ka beiseina neih ve chhun chhete pawh chu lakbosakin ka awm mek chu a ni si. Tu nge min hnem a nga, tuin nge min tuamdam ta ang. Amah chauh lo kha chu tunah hian min hnem thei an awm thlawt lova, ka duh bawk hek lo. 

Zinglam dar 1 thleng ka nghah hnu pawha a rawn lan theih tak siloh ah chuan beidawngin ka haw ve ta a. keh chhe vekin ka haw a ni. In ka thlen hnuah pawh call nawn ka tum ngat ngat reng tho a, mahse, beidawnna belh chhah tu bak an ni thei chuang lo a nih kha. 

Khua rawn var in, zan lama ka ruah dona vang nimaw, ka lu te chu a na bur reng a, ka hnar a ping khat tlat bawk. Engdangmah ka tih hmain phone bawk chu ka ban hmasa leh ber a, mahse, nuihna tur leh hlim leh lawmna tur thil reng reng ka la hmu ta chuang lo. Ka ruak huai mai nia. Zonuntluang, eng thil nge i hriat a, ka chungah hian eng thil chiah nge maw i tih hi le. A na ka ti em mai. Ihmaw, nang ka tawn hma che pawh khan inbumna khurah hian tla lutin, tunah ka inhaichhuak leh țan dawn chiah a, ka nunah hian ilo lang ve ta asin. Mahse, nangpawh hi midang ang thoa bumtu leh khur chhung thuk taka min hnuk liam leh tu chauh a in si. Na ka ti em a, ka tuar zo lo a ni e.

‘' Ngurte, hei, ka pi te damdawiin bill hi lo tih felpui lawk mai ta che. Vawiin chu counter nghaktu a rawn kal theilo tlat mai a, pakhat zawk lah hi call pawimawh a dawng deuh reng bawk si nen, tihtur dang em em a awm chuanglo bawk a, lo pui lawk mai rawh aw’’ staff rooma ka awm laiin nurse Hlimpuii bawk khan min rawn ko deuh lauh lauh. Ka lo hman tehkher bawk nen kei chu ka tlanchhuak zui vat.

Reception counter ka va thlen phei chuan nu upa tawh lam tih hriat tak leh, tlangval niawm tak, sang tha thlerh thlawrh zet mask vuaha jumper lukhum lo khum tlat bawk chu an lo ding dun ran mai tih ka va hmu a. An hmel ka hmuh rual khan keimah ah hian sawithiam theih silo in thil engemaw min kam tlattu a awm niin ka hria. Ka sawichhuak thiam silo.

Counter dawhkana an bill lehkha tur niawm tak lo awmsa chu han en chiang velin ka hmuh tumloh deuh thil ka hmu leh ta! Hei hi Zonuntluanga damdawiin bill maw!? Tichuan, heihi a nu niin, pakhat hi tu nge? Papera Zonuntluanga hming inziak kulh ka hmuh rual chuan inthiamlo ru tak hian zawhna ka zawt ve ta ngawt.

‘’ Pi, Zonuntluanga hi I fapa tihna emni?’’ ka tih sap chuan chiang zet hian min rawn en ve nghal bawk a. mak a tih hmel angreng khawp mai.

‘’ Aw ni e, thla 7 liam taah khan he damdawiinah hian a lo awm ve ren rawn tawh a. mahse, a natna khan a hneh tak em avangin a tlin ta ngang lo a ni e! Khatihlai kha chhungkua kan harsat zual lai a lo ni lehzel a, bill pek tur pawh nei theilo in leiba nen kan chhuak ta phawt kha a nia, hhotute bulah ngaihnathiamna sang ber kan dil a, tichuan, an hun tiam chhunga rul leh tura intiamkamna neiin, vawiinah kan rawn pe ve thei dawn chauh a nih hi’’  alo ti zung zunga , a mittui tla tur te pawh chu a hru pah niap niap reng bawk. Hetihlai hian a bula ding ve tlangval niawm tak khan kei chu uluk leh fiah fahran hian min lo la en ve kal reng bawk a. Nuam lo ka ti angreng fu. 

Ka Zonuntluanga hriat leh, an sawi Zonuntluangab te hi mi thuhmun an ni a ngem? Ka ring chiah lo deuh. Amah ngaihtuah paha bill ka chhut khawmsak neuh neuh lai chuan tlangval zawk kha a rawn tawngchhuak  ve ta sup a. chiang taka min la en reng chung hian zawi supin,

‘’ Ngurthanpuii ini mial em?’’ 

Chu zawhna avang chuan ka thiltih lai pawh chawl meuhin amah en chuan ka han hawichhuak leh rih a. min lo la en ve reng mai. Tichuan, chhan mai nachang pawh hreloa ka melh vang vang hnuah, amah bawk chu rawn tawngchhuak leh in,

‘’ A,,ka hming chu Hmangaihsanga niin, hei, boral ta Zonuntluanga hi ka unaupa, ka phirpui a nia!’’ a rawn ti leh chiah chu ka tlu țhelh titih ta mai a. ka mit deuh sulh thei bawk. 

Engtin maw!? Ani hi Hmangaihsanga niin, Zonuntluanga kha a phirpui a unaupa maw!? Chuan, Zonuntluanga khan phirpui Hmangaihsanga a neih thu kha min hrilh ve tawh bawk a ni lawm ni? Aih, ni lo, ni lo, hei hi thudik ni lul suh se. Heng mite hi ka mipa hmangaih Zonuntluanga chhungte niin, amah ber chu thla 7 liam ta khan a boral daih tawh ang maw? Awihawm loh lutuk! 

Ka mittui tling piau leh ka kut khur ru der der te chu rawn hmu ve in Hmangaihsanga bawk kha a rawn tawngchhuak leh ta a.

‘’ A,, miss, ka tihpalh lutuk aw. I pawisawi ka neih chuan min ngai thiam hram dawn nia. Mahse’’ tih malh malh pah hian a jumper lukhum chu a hlip a, a mask vuah lai pawh a la thla nghal bawk. Chutah zet chuan ding ngil hleithei tawh lo in ka dinna hmunah ngei ka țhusawp ta nghal hnawk a. anni nufa pawh chuan min rawn buaipui zui vat.

Hmangaihsanga hmel ka hmuh chuan Zonuntluanga hmel kha hmu ve angah ka inngai deuh tlat a, ka hrehawm ngut ngut thei.

‘’ Zonuntluanga kha a thi tawh maw?!’’  lo ti khur hlak hlakin, nu zawk chuan ka hnungzang a lo chul pah hauh hauh bawk. Eng thilmah chu tih zawm thei tawh heklo, nurse Muantei’n min rawn thlak ta vat a, kei leh Hmangaihsanga te chu cabin ruak pakhatah inbe turin kan inkhung hrang ta ngawt mai a ni.

‘’ Thla 7 liam taa helai kan rawn luh ni kha I hre tawh lo tak tak maw? Cabin pakhat atanga ruang chhuak pawh kha I hre ve lo maw? Ni e, ka dem hauh lo che nia aw. Keini unau kha chuan I veivak vel te kha chiang taktakin kan lo hmu thin che asin. Sawi tawp ila, khang hunlai khan ka unaupa Zonuntluanga rilru kha I luah hneh thin em em mai a, sawi erawh chu kan sawi chhuak ngam lo thung. Kan awnma bul chiah cabina damlo buaipui tura I kal lai te pawh khan amah zawk chu rawn hnimhnai ve la a lo thin takzet. A vei luatah che I phalna pawh la hmasa loin I thla hi kan la ru nual asin. Ka phone ah ngei pawh hian hmuhtheih in ka la kawl tha nual’’ a tih lai chuan lo pawtchat in,

‘’ I unaupa phone chu inphum tel ve tihna emni?’’ ka lo ti zauh a, min rawn melh zawk. Ka lo țim lehnghal sawk tawh. Zonuntluanga nen khan danglamna an awm lo em a tin ni.

‘’ Aw, a phone kha a duhin a ngaina em em mai si a, phum telloh theihloh a ni tlat a ni. Mahse, chu chu engtin nge I hriat a?’’ rawn ti let nghalin kei chu ka lo thaw deuh hawk. Tichuan, hreh zetin kan chanchin engkim mai chu ka sawi zo ve ta vek a, mak a tih hmel ta kher. A meng phar awn awn thei hial a nih kha. Ka han sawi zawh meuh chuan mittui tla phung chung hian alo inhumruh ve nasa tawh a, ka mitah pawh min en ngam tawhlo In hnuailam en chuan a mittui tla tur a dang bet char char bawk.

‘’ Ka unaupa chuan a damlaia a tih chak leh, a thlakhlelh zawng zawng a tifel ta vek a nih dawn chu! Ka va ahn lainat tehlul em aw’’ ti tham ruaiin a insut zui hraih hraih reng a. keipawh ka insum hleithei tawh lo. 

Zing lam dar 1 thleng thlenga ka lo nghah ve na te, mi reng rengin makti taka min sawizuina leh, min thlir thinna te, sawitur hi ava han tamtak em! Zonuntluang, nghah chhuah chi awzawng ilo ni hleinem le tiraw? Thil zawng zawnga ka dem vek che vang khan min ngaidam rawh. Min ngaidam amwlh rawh. Mahse, ka hmangaih lutuk vang chauh che a ni tih hi chu I hriat kha aw. I nuimawi takte, thiam leh thiamloa ka titau min thlem ve thin lai te pawh kha, thamral leh mai mai tur atan chuan an va pamhmai em. Ka ui takzet.

Insum hleitheilo khawpa ka tah tak hlawp hlawpah chuan Hmangaihsanga khan duat takin min rawn kuah a, kan tap dun hlawp hlawp. 

Hmangaihsanga te nufa in min kal liamsan hma hret chuan a tawpnan tiin zawhna ka zawt leh.

‘’ Hmangaih, I unaupa chu khawi cabin berah nge a awm thin a? a boralna cabin chu number engzat nge?’’  ka tih chuan , cabin awmna lam kawk zauh chung hian,

‘’ Cabin no, 21ah a ni e’’ a rawn ti ta! 

Chu cabin chu. Ka damlo enkawl pitar boral ta awm thinna ngei kha lo niin! A nih chuan, kha pitar boral ta khan thudik engkim mai hi min hrilhhriat ve a lo tum thin tihna a ni thei a ngem? A nih ngei pawh ka ring e. thlarau lamah inzawmna thuk tak kha an nei tawh tlat atin ni.

Tunah chuan engkim mai hi an kalbo zo ta. Ka khawvel chu bur chhia ang maia ruak a lo ni leh ta a ni. A chhuih tu leh, a vawmtu thlekna lam hawi apiangin a ri ve bal bal tawh mai thin. 

Zonuntluang, I damlaia I khawsak duh ang khan I boral hnuah pawh khawsak ve hram chu I tum a tiraw? Khang hun kal ta zawng zawngah te khan engvanga lo hre ve ngai lo che nge ka nih ang. Ka mawl vang emni? Ni lo, khuanu ruat kan nih loh vang zawk asin. I hmel ka hmuh hmasak ber țuma ka hriat tawh hnu I an zia thu ka sawi kha, a lo dik ngei a nih hi tiraw. Tunah chuan maw, ka hmuh tawh hnu I ang mai chauh nilo in ka nuna ka theihnghilh tawh loh tur mi pawimawh kal liam ta ini zawk asin. Kan khawvel ve ve ah hian hlim taka awm hram I tum mai ang aw.

Mit bui luk chungin ka tho chhuak a, zan lamah khan chhin khat takngial pawh ka chhing lo tlat a ni. Hemi ni hi ka off a nih angin in lamah tihtur țul ang ang ka tifel zung zung a, ka buai nileng zak. Chutah, chawhnu her atang chuan khua rawn chhe zuiin ruah a sur leh ta bur bur mai a. ka inbual leh te te hnuah ka mu lum zui hmak. Chutia ka mu chu ka lo muhil hman nge ni, ka kawngka rawn kik karh karh thawmah chuan chuan ka harh leh zawk a. khua pawh lo thim tawhin, ruah erawh chu ala sur nasat hmel viau thung. A khat mawi tawkin kawl lah chu a lo phe eng ve zuai zuai thin a, mi rap deuh reuh.

‘’ Tun ang hunah tu nge maw le?’’ ti nuah nuah chunga kawngka ka va hawn nak cbuan pawnlamah tumah hmuh tur an lo awm lo. Mahse, tuemaw kal liam tur chiah chu va hmu hman in, ka ko zui tuar mai. Chutah, ani chu a han tawi khawmuang hret a, a rawn hawi ta. Hetihlai tak hian kawl a phet nasat em avangin a hmel chu ka hmu chiang thei angreng hle a, amah ngei a ni. 

Inthiamloh hmel taka nui var var chung hian,

‘’ Duhtak, tun bak hi chu kan inhmuthei tawh dawn silo a, ka innghah thlawn tir che avang khan ngaihdam dil tur che leh mangtha rawn ti turin ka rawn kal a nih hi’’  kan dinna chu inhnaih viau hran lo mahse, a thusawi engkim mai kha keimah ah chuan a ring em em vek a, a fiah lutuk. A aw vawt ruih leh ngaihawm em em mai te chu ka hriat tawpna tur maw an lo nih dawn tak a. kei chuan tah aw țiau chung hian, 

‘’ Zonuntluang’’ tih leh, a lama tlanphei chu ka rual nghal a. min lo pawm chawt. A taksa dai diak mai te hi hun rei tak chhung ka chu ka lo khawih tawh lova, ka ngai asin. Lalpa, ani hi chu khawngaih takin min pe let leh mai rawh. Eng thil nge a tihsuala I lak hma em em bik mai le. Min khawngaih la, keini pahnih hi chu min then hrang ve lo hram ta che. Ka tap hawm hawm a, ka intap harh ta țhak. 

A hma ang tho khan khua pawh lo la thim in, ruah nise ala sur bur bur reng bawk a. Tho chhuak vat in pawnah ka tlan chhuak a, mahse, ruah mal tin ten ka ka taksa an rawn theh huh tih mai loh chu hmuh tur ka nei ta lo. Ani chu van hmun nuamah a kal dawn ta. Min kalsan tawh a ni. Tikhan, lo kir tawh ngai reng reng lo turin khawvelah min hnutchhiah a, a kalbo ta. Ihmaw, lei hnu piahlam ram hi a awm tak tak a nih chuan min lo hmuah ve hun tur nghakhlel taka thlir chungin ka mangtha ang che aw. Ka hmangaih, mangtha vawng vawng le!

*****        ******        ****       ****       *****       ****          *******       *****