BUMTU HLAUHAWM!?

BUMTU Hlauhawm 

BY : Vanlalpeki Fanai

‘' Hey, tho rawh. Lo insiam zo vek tawh ang chu tih laiin’’ 

Lalhlimpuii mu tui lai chu a meng zui kawk thei. Phak chual chunga a han hawichhuah nak chuan a khum bulah a thiante 4 zet chu an lo ther fir fer tawh tih a hmu a, a khap zui fak fak. Chutah, mit nuai chat chat chung hian,

‘’ Nge a!?’’ ti zui raih in, a thiante erawh chu an lo chek deuh hlak.

‘’ Awi! Hlimi, Hlimpui, vawiin hi I piancham tih pawh I hre tawh na nge!? I bei zialo hle mai’’ ti let erh in, an chum zui zawt zawt. Chutah, Hlimpuii chu rawn harh chhuak deuh zawk in, ni tak, vawiin hi a kum 26na piancham a ni tak alawm le! Phiangsen chuan! Engtin nge a theihnghilh theih zawk a? Hotelah room pakhat book in, chutah chuan party pawh buatsaih an tum a nih kha le. Ava han laktlak loh thin tak em. Tho zui sawk sawk in a thawmhnaw bawm a hai leh rawk rawk a, kawrfual pakhat rawn khai chhuah nawlh pahin a thiante lam hawi chung chuan,

‘’ Heihi ka ha mai dawn emni? Ava buaithlak tak’’  a tih nuah nuah lai chuan a thiannu Rochampuii a rawn inrawlh ta vat a.

‘’ Kalsawn the. Va inbualfai phawt la, I hak tur chu kan lo thlang fel mai ang. Zanin hi itan zan special tak a nih dawn avangin mi special tak kan sawm tel ve nghe nghe a, hetiang mai mai hi chu I ha chhuak tur a ni lo’’  

Hlimpuii hmel mawlh chu a danglam nghal sawt sawt thei. Nia, a thiannu thilsawi zozai te kha a awmzia a hrelo ve thlawt alawm.

Lalhlimpuii pa hi 1st class contractor niin, mi hlawhtling tak a ni a, hna a hmu tha in a hnaah pawh a rinawm a, a taima hle tih hi amah hrechiang tute sawi dan thin a ni. Tin, a nu pawh hi naupang specialist ve tho a ni a, Hlimpuii hian a nu leh pa te hi a chhuang thin em em bawk. Amah hi an fa neihchhun a nih lehzel bawk avangin duat a hlawh em em a, a tan hian in leh lo, an chenna ni lo thleng pawh hian an neih sak nual. An chhungkaw khawsak hrechiang tute chuan an makpa tur vanneih dan tur mawlh hi an sawi ru fo thin mai. Amah Hlimpuii hrim hrim pawh hi nula pangngai tak a ni ve a, mipa lama lerh lem lo ve tak niin, ngaizawngtu a hmuh zawh ang ai hian bialpa hlui tia  sawi tur a ngah lem lo viau. Chutihrual chuan an neih sum te hian a tlin em a, thiante nena hlimhlawp bawl leh, shopping tura chhuah tih vel erawh hi chu a hrat ve hle thin a, nitin deuhthaw hian thil thar pawh a nei e, ti ila kan sawi sual tehchiam lovamg. Tin, sawi hmaih hauh loh tur pakhat chu, an chhungkaw thla tin sum lut hi a namain lo hle a, a nu leh pa te thawh hlawh chu thuhran nise, Hlimpuii hming ringawta café lian leh changkang tak tak an din atang ringawt te pawh hian an kum tin mamawh leina phuhru tur sum hi chu a lut reng a ni tih hai rual a awm lova, nula hausa leh hmeltha bawk nih fawm in,a tan chuan khawvel hi vanram tlafual a ni hawt mai a, thian a ngah in hmelhriat nise a ngah narawh e. tlangval mai ni lo, hmeichhe tamtak awh nula nun nei tu a ni e, pawh ti ila kan sawi sual tam lo turah ngai ang.

Zan hun rawn herchhuak in, an tum ang ngei chuan an hotel room bookna lam pan in an inkhalhchhuak zui ta sap sap a. Tunah chuan a thiante ho pawh an rawn pung leh ta sawt mai. A thian kawm bik te hi chu tlemte chauh nimahse, heng ho hian thian dang leh an kawppuite an rawn hruai ve hi chuan an pung ta hluai thin reng a ni. 

Room an thlen hnu reiloteah party pawh chu an țan nghal mai a, chu room chhung chu an khat mawi tawk angreng hle. Hahdam fahrana wine no dawm chunga alo thut veng veng lai chuan a thiannu Rochami bawk khan a rawn kheuh tho leh ta zawk mai. Hawi vut vut chunga a han din chhuah ve nak chuan a hma lawkah hian amah ena lo ding nui var var mipa hmelchhe lo zet chu a hmu ta thut a.  A meng phar zui awk awk thei. Hrilhhai fahrana Rochami va melh kar chung chuan,

‘’ Hei, deary, tu nge ni a? Engvanga min en reng nge a nih’’  a sawi zawh rualin a bula mipa ding chuan a kut a rawn phar chhuak zui vah a.

‘’ Chibai le, ka hming chu Zonunsiama niin, nang chu, Hlimpuii ini tih chen in ka lo hre ve tawh a’’ za lo tih hriat taka kiai zui leh sak in Rochami chu ava melh pah zeuh. Chuveleh, Rochami pawh chuan hrechhuak thut niawm tak hian,

‘’ E taka, deary, amah hi a nia mi special lutuk hmelhriat tur inei kan tih kha. Hei, zanin pawh helai hmuna rawn kal ve tur hian kan sawm nghe nghe a. Pawi iti em lovang chu maw’’ tih paha anni pahnih melh tawn zak zak chung chuan a wine ken lai chu a han lem zui leh khalh a. Reilote an ngawih tlan vang vang hnuin an rinloh tak mai hian Hlimpuii pawh chu a rawn nui chhuak ta var var mai. An thaw zui nghal sawng sawng thei. 

‘’Pawi lul love. Inchibai ila. Zanin chu nuam deuh in hun kan hmang ho ang chu tiraw?’’ ti zui ve barh barh in, in tur te chu ava laksak vat vat a. A hmelhriat thar pa chu alo chhelo the hrep bawk nen, Hlimpuii pawh a phur thar ta viau. Tichuan, chu zan, a piancham lawmna party pawh chu nuam ti em em a hmang zo in, an rui tlang hlawm hle a, han inbuaipui tawn tur bik pawh hi an awm chuang lo reng reng. Mahse, vanneihthlak takin an hmelhriat thar Zonunsiama kha alo fing fel hlauh a, Hlimpuii zurui chatthla nawi lutuk te pawh chu buaipui vekin an chenna thleng a thlah thlap bawk.

‘’ Ka lu chu a na ngei mai’’ 

Phun nuah nuah chunga rawn thuchhuakin, a han in enchiang chu, a zan lam party dress nen a ngai ngaiin a lo la awm hi a ni a, a chek zui tlak tlak thei. A lu na ber bur tawh sa nen a phone lah chu alo ri ve chhen bawk a, a ner sawk sawk tawh mai.

‘’ Nge maw ni sek le ‘’ tih paha phone a han en chuan a number save loh atang alo ni the tlat. Vin angreng fe hian,

‘’ Eng nge ni a!? ‘’ a han ti zui tuarh a, mahse, lehlam atang chuan mipa aw fiah leh puam țalh hian, 

‘’ I tho tha maw miss?’’ a rawn ti chiah chu a ngaihna hre lo fe in a hawi zui hu hu.

‘’ Tu nge I nih a?’’ a sawi zawh rualin lehlam ami chu a rawn nui deuh hak hak phawt a. A aw mawlh mai kha a nalh in lairil a fan kher mai. 

‘’ Min va theihnghilh hma em em ve aw. Nizan lawkah pawh party naah zu kan in dun tawh kha’’

Chutia a rawn tih veleh chuan hrechhuak nghal in a zak leh hnuhnawh hle a, a insik zui deuh nawk nawk bawk. Tichuan, rei pawh inbe zui tawh hran lo in phone an dah leh mai a, khum atang a chhuk fel chiah tih ah, Rochami kha a roomah a rawn lut nghal zat bawk. A thiannu pawh chu lo be lumlam hran em em lovin bathroom ah a luhsan daih a, hei hi chu an thianho tih dan ve reng  a ni a, an ngai pawimawh tehchiam lo.

‘’ Deary, nizana kan rawn hruai pa kha I duh ve mai lo mi?’’

‘’ Zonunsiama kha maw?’’

‘’ Aw ni e, a fel asin. Chubakah, a pa hian damdawiin pawh an chhungkaw hming in a nei nghe nghe a, an khawsa thei reuh lutuk. A nu nise, college lecturer a ni tel bawk a, an dinhmun tur chu I hrethiam ve mai ang’’

Hlimpuii thung chu a lo ner deuh sak. Sum leh paiin bawm viau mahse, mipate hi an neih it sak vangin ala um chhin ngai lo. A duhzawng chu amah ngei hian a lei thei a, a kal duhna hmun apiangah nise, buaina em em nei lovin a kal thei zel bawk. Chuvang a nia, a nunah hian mipa an lal loh em em a, a thiante chauh pawh a tleipui tawk viau ni.

‘’ Hmm,, an khawsa thei tih vel mai mai. Kei chu min hriat vek tawh kha Deary, tunhma pawhin mipa ka lo ring sual fo tawh a, ka sum leh pai chauh min hmangaihpuitu ni lo, keimah ngei min hmangaih a, min pawmtu tur hi a ni ka duh tawh zawk ni. I hrethiam tiraw ka sawi awmzia chu? ‘’  a thiannu en deuh kar paha rawn ti chungin a kiai deuh sak. Rochampuii pawh lu buk nghat nghat pahin a lo nui ve var var mai. 

‘’ Chuvang alawm Zonunsiama hi ka thlan sak che. Ngaihtuah la, ani hian a duh leh mamawh engpawh nei thei turin sum anei a, I neih rosum eng thilmah hi a mamawh in ka ring lo. Chuvang chuan Deary, ani hu a tha tih hria la, thlang ang che. Hei, tunah pawh hian min rawn tir phei a, I that leh that loh ka rawn fiah che nih hi. ‘’ Hlimpuii chu alo bu ve nghat nghat.

‘’ Awle, kan la hre chho zel ang chu’’   ti sapin a thaw zui leh hak a. Pawnlam thlirin a hawi zui ta vang vang. 

Nia, he nula Hlimpuii hi hmeichhe hlim thei leh, vei em em pawh nei lemloa khawsa puat puat thin nimahse, hmangaihna kawngah hian a tluang lo ru ve em em a, tu hriatpui siloh hian mittui tla khawpa tah ruk chang pawh a nei ve ta nual mai. Mipate hian amah ah hian eng ber nge an duh tih hi a hrechiang thawkhat tawh hlein a hriaa, mahse, chhungril nun ruak lutuk hnawh khat tur chuan kawppui a mamawh ve thin tho si. Duhzawng a nei a, hmangaih zawng a nei ve thei tho bawk si, a inven sen loh luatah bialpa pawh a nei leh nge nge thin a, a bialpa hnuhnung ber phei kha chuan a duhtawka a sum a eisak zawh hnuin, rilru na takin a kalsan leh ta kha a ni a, khami chin chu ngaihzawng pawh nei leh tawh loin tihuan kum 3 zet chu  alo khawsa ve leh tawh a, tunah, Zonunsiama vangin a rilru thlak danglam sak a ni leg tan mek chu a nih hi. He tlangval hi a rintlak dawn em a hrethiam hauh lova, mahse, tun atana a hmuh theih leh hriat phak chinah erawh hi chuan ala laktlak hmel fu niin a hre thung. Chuti a nih chuan tiin, khawhar zualpui hnem atan Zonunsiama zawhna pawh chu a chhang let ve ta hram a. An inkawp zui chu a ni ta der.

Anni pahnih inkawp chu inhmeh titu an tamin lawmpuitu lah an ngah phian a, hawina lam apiangah nise, a tha zawnga sawi zui an hlawh dun in, innei ngei se ti tu pawh an kat nuk. Nitin in an hmel chu hmuh dun tur a awm a tihtheih a, an inzui awllo hi a ni hawt e. an inkar pawh a tha takzet ni hian a lang. Hetihlaia Hlimpuii lawmna em em pakhat chu, a mipa tawn tawh zingah hepa Zonunsiama hi a danglam fal nalh tih hi a ni a, nia, Zonunsiama hian a sum leh pai eisak a tum awm ala hre lo va, engpawh ti dun se, sum thehchhuah  țul hun apiangah mipa a nihna ang pawhin a chawi hreh ngai lo va, a bialnu sum  bawm hi ala zen sak lo tlat bawk. Tunah chuan mipa nihphung tur diktak nei leh, mipa a nihna anga che chhuak thin mi a tawng ta angah ngaiin a hlim hle a, nuam pawh  ati takzet a ni. Chu chu thudang ni ta se, he a bialpa hian a piancham leh hunpui lo thleng apiangin thilpek a pe awl ngai lo va, a tam thei ang bera awmdun chu a duh thin nghe nghe. Hlimpuii hi a hlim a, tunah chuan atana khuanu ruat mipa ngei tawngin a damchhung hun chu thawveng taka hmang ve thei tawh turah a inngai. A lawm zia hi sawiin a siak lo hial awm asin.

‘’ Bawihi, zanin kha ilo theihnghilh palh hlauh a nge aw. Ka nu leh pa hmuh kan ngaih dawn kha’’  a bialpa thil rawn sawi chuan a thin a phu ati phu zui leh dut dut tawh. A hreh takzet a ni. Mahse, țhulh thiang a ni lo tih a hriaa, a kaltlangpui ngei bawk ang. A bialpa chhungte chuan an lo iai mai a ngem? An mi duhzawng a lo ni lo tlat a ngem, tih mai mai ngaihtuah chuan a rilru a hmang kual chiam chiam a, a thaw zui leh halh thin. 

Tlai lo niin, zawimuang leh phur lemlo taka alo insiam ve bek bek lai chuan a bialpa pawh a rawn thleng zui ve ta mai. A thaw te chu tawt deuh up up tawh ni hial hian a hriaa, rilru in a tawngtai mawlh mawlh ringawt. Tichuan, rei pawh thang tawh lovin an chhuak zui a, nidang leh hun danga sawitur a han hriat theih barh barh nen, tun țum zet chu a khâ a chih tlat. Nia, hetiang thil te hi a nunah hian a vawikhat tawnna tur an ni ve a, a demawm hran bik loh e.

Nunsiama nu leh pa te mawlh chu an lo fel in, an be tha em em a, an polite hmel takzet. Tin, an chenna hmun vel hrim hrim pawh chu a changkang ru phian mai a, mi harsa zawk zawk tak chu an ni lo tawp ang le. Mahse, chung thil vel chu Hlimpuii buaina leh kal chhan ber a ni ve hauh lo va, a bialpa a hmangaih chhan lah a ni bawk hek lo. Chung ai mah chuan amah an lo dawnsawn dan ah a lawm a, thinlung takin a hlim takzet. A bialpa hian nu leh pa tha tak a nei tih hria in, tunah chuan khawvel pawh hi a hmu thar sur tawh awm asin. Tin, hemi zan vek hian Nunsiama pa, Pu Chhuanmawia chuan an chhungkaw eizawnna te, an damdawiin din chungchangte chu lo hrilh ve in, a hospital hming nen lam a hrilh vek a, chutiang zelin, Nunsiama naupanlai te sawikai zel in, amah ngei pawh chu mo atana an duh thuai thuai thu te a lo hrilh ve luam. Chu zet chuan Hlimpuii thin a țhawngin, awm dan tur a hre lova, a lai chhe nghal vek thei. Tichuan, palai hmel a hmuh thuai tur thua inthlah in, zan hun chu an hmang zo ve ta.

He zan zet hi chu Lalhlimpuii a a muhil thei lo chiang the e. Nakin lawka a pa nimai tur Pu Chhuanmawia thusawi te kha ngaihtuah let in, palai chu rawn tir vat vat se a ti ru hle a, a nghakhlel tawh takzet a ni. Mahse, a lehlamah erawh, pasal nei tur anga a han insuangtuah chhin chuan a hreh ru ve em em tho a, a chhan bulpui berah pawh amah tihloh chu a nu leh pa te hian fa dang an neih miau loh vang a ni. Chhungkaw inngai leh induat tak an nih vang hian inkalhlatsan chu an harsat tlang hlawm khawp ang le. Mahse le, heihi a tan hun tha inherchhuah lai a ni ve miau a, hmeichhia a nih angin pasal pawh a chhia a tha la nei tur tho tho a ni bawk. Nakin lawkah a nu leh pa te chu hreh hke mahse a kalsan tho an la ngai dawn a, danglamna a awm vak pawhin a hre leh ta lo zawk. Tin, khaw hmunkhatah tho pasal pawh a nei dawn a, an intlawhpawh thei reng dawn tho alawm le. Buaina tur a awm lo ve.

Sawi lawk tawh ang ngeiin Hlimpuii chuan palai hmel a hmu ve ta. Engkim mai chu a hma atanga lo hre lawk vek tawh an nih angin a kaltluang purh mai a, karlovah, an inneihni tur pawh tifel in, palai hmel an hmuh atanga thla khat liam hnuah inneihna tur pawh chu an relthlu fel thei ta a ni. Hlimpuii leh a thiante ho phur lutuk pawh an phak ang tawk tawk chuan an lo inbuatsaih ve nasa a, inneihna a zawh hnua party an huaihawt dan turte chu an rel fel leh vek tawh. Huau huau lawm tihtakah, party a telloh hi chuan an famkim hleithei lo a ni ber e.

An thiannu mawlh chu a hun ropuiah chuan a lang mawilo ang tih hlauvin a mo kawr chen chuan an duan sak vek a, an buai phah nasa hle.chutiang bawk in mipa lam pawh an inbuatsaihna a kal chho mup mup reng a, an inneihna hmanpui tur pawhin an thawhpui te leh an laina hnai mi thahnem fe chu an sawm khawm tawh bawk. Hmelhriat leh thian, laina hnai ngah tihtakah, an inneihna rawn hmanpui tute ho pawh an thahnem tham in, an theuneu lo kher. Ram chhunga mi langsar leh , mi chung en ni phak ho hmel kha chu hmuh tur an chikim khawp mai.

Inneih programme a zo a, thianho party pawh țan a ni ta. Ei leh in tur an stock sa ang ang te pawh chu a bo a bang awm lovin an kuit fai vek a. kai tha hem hem tak an ni e. mo leh mo neitu pawh an bang chuang hek lo. 

Nupa tuak thar te chu an inhmeh in an hmeltha dun vek vawk bawk a, hmuh an nuam dun kher. An nupa nun chu a hlim hmel in, an awhawm ngawih ngawih bawk niin a lang. Fa mo ni tura mi inchhunga han lawi luh ve rup chu Hlimpuii chuan a thiam lo ru hle a, mahse, a pasal leh chhungte zawk hi mifing fel tak an lo nih hlauh avangin a awm thiam chhunzawm ve leh mai a, chhungkaw inpawhna pawh a that zual phah hlauh.

Inneih bultanna ah chuan tu nupa pawhnise, an inhmangaihna ala nasa in, an inhiptawnna nise a sang em em ang tih chu hriatsa ni mahse, Hlimpuii te nupa erawh an induhtawnna hi a thuk bik emaw tih mai tur a ni a, a pasal chuan a ngaihsak in, a thiamloh leh hriat loh thleng pawhin a hrilhfiah thei zel a, a zirtit awllo a tihtheih bawk. A chhungte hmaah chuan a nupui a phawrh mualpho ngai lo bawk. Engpawh tiin khawi hmunah pawh kal se an inzui awllo a tihtheih a, an inngaihzawn lai hun ang chiah khan nupaa an insiam tawh hnuah pawh sawiselna tur lai reng reng hi an awm lo va. Hmuh an nuam takmeuh a ni.

Mahse, Pathian rorel dan hi a danglam thut thut thin ve bawk a, a ruat sa nge tih pawh hriatloh hian nupa hlim leh inngeih tak nia kan hriat thin te pawh hian tu hriatpui siloh ah  buaina lian tak an lo nei ru ve fo thin a, chutiang chiah chuan Hlimpuiite nupa pawh hi an nupa khum chungah ngei chuan buai rukna neiin, an lo inhawisan ve bar bar thin a nih reng chu. 

Hun engemaw lai atang khan Hlimpuii chuan a pasal Zonunsiama khawsak dan chu danglam tan niin a hre ru deuh a, a chhan pawh, Nunsiama chu a haw hun pangngaia rawn haw lovin zan rei tak tak thleng pawnlama hun a hman thin vang a ni pakhat a, engemaw chang chuan an hna thil te pawh han chhuanlam ve bawk mahse, a rei hnuah erawh chuan biak tlang theihloh a awm zeuh zeuh a chin avangin a  nupui tan ngaih han tih thatna chi rual a ni ta lo. Tu hriatpui siloh hian rizai hnuaia an buai rukna pawh a lo rei tawh fu a nih hmel. Chutiang chu an dinhmun mek nimahsela, Hlimpuii hian tu hnenah mah ala sawichhuak duh chuang lova, a pasal hmel tih balh chu a hlau ve viau te pawh a nimahna. 

‘’ Khaw nge ila awm a? Tun chen chen hian eng thil nge itih sawi rawh’’  a pasalin a call a lo lak rual rual chuan a ti nghal bawrh bawrh. Mahse, a lehlam atanga rawn chhangtu chu a pasal awzawng lo nilo in, hmeichhe aw zawk a ni ta tlat.

‘’ I pasal chu a muhil mek aw. Hei, tui takin ka bulah hian a muhil ve mek e. Ngaitha tak khan lo awm rawh’’ ti chungin phone lah chu a dah zui daih a. Hlimpuii thinrim lutuk chu a thaw ri hlawp hlawp thei tawh hial.

Kha hmeichhia kha tu nge? Engvanga a pasal phone kha lo chhan sak ve ngawt nge a nih a? A thusawite kha thudik a nih chuan tunah hian khawi hmunah nge an awm ang. A rilru chu a buai ta takzet mai. Rilru mumal pawh pu hleithei lo khawpin roomah chuan a teikual sek tawh a. Engtia hmalak tur nge a hrethiam ta lo tawp. Sana a han en a, zinglam dar 3 chiah a la ni. Khawvar hun nghah pahin chairah chuan a thu thla deuh hnawk a, alo muthlu zui ta a ni ngei ang, a harh leh meuh chuan khua pawh lo var ve tawhin, a pasal ngei mai chu bathroom chhung atang inbual zo hlim tih hriat tak hian a rawn chhuak ve chiah bawk. An inmelh no lo the e.

‘’ Nizanah khawnge I riah?’’

A sam huh hnep hnawp tak chu towel hmanga hruk hul sawk sawk pahin Zonunsiama chu a rawn hawichhuak zawk a, a nupui zawhna te pawh kha tham loh hmel zetin a țhen khum sak duh chauh.

‘’ Zonunsiam, min chhang rawh aw’’  rawn ti leh țhat ri ah chuan Nunsiama pawh a mitmeng a danglam nghal zawk.

‘’ Khatiang awrawl khan min be miah suh. I hriattur chin chu ka hrilh mai ang che’’ ti nghat in, thawmhnaw a inbel chhunzawm mawlh mawlh a. A nupui awm dan engmah pawh ngaihtuah tawh lemlo chuan a chhuak zui nghal hmak bawk.

Thinrim leh rilru na fe in Hlimpuii pawh inhnuai lamah a chhukthla zui ve mai a, a ngaihtuahna leh a hun tawn engkim mai avang chuan phurna reng reng nei hauhlo mahse, a pasal chhungte hriatah erawh chuan tihlan a duh hauh lo. Mittui tling piau chungin eirawng a bawl chhunzawm a, a pasala nu leh pa te zing tho pawh chu thingpui alo chhawpsak fel thlap.

Hemi nileng pawh hian a pasal nen chuan vawikhatmah an inbe lo va, nidang leh hun dang ang kha chu nise a pasal hian office atang pawhin a rawn be leh daih tawh emaw a ni a nga, chutiang chu an inngaihzawn lai atanga an nitin hun hman tawh dan ni thin in, tunah erawh tihian, tu hriatpui siloh in an buai ru dun em em chu a ni ta si a. An khawsak dan hi a rinphak bak thil a nih miau avangin awm dan tur a hre lova, a chunga thleng ve thei tur pawha a lo ruat loh chu a thleng mek bawk si. A na ru vawng vawng a, a chi-ai takzet a ni.

Khua rawn thim in, office ban hun tawh ah pawh a pasal hmel reng reng chu hmuh tur ala awm ta lo. Fate na na na chu nupui nei tawh mahnise, nu tan chuan ngaihtuah an lo na lo theilo a. Nunsiama nu, Pi Ziri pawh chuan a fapa chanchin chu Hlimpuii hnenah chuan a zawt ta sek mai le. Hlimpuii lahin a chhanna tur chu nei bik hek lo. Theihtawka thup bo ve chu tum mahsela, nu thinlung a dam thei thlawt lo va, a call sak ta nge nge a nih kha. Nunsiama pawhin a rwn haw mek thu sawiin, a rawn thlen har tawh dawn loh thu a hrilh takah chuan Pi Ziri pawh ngaihtha takin a mu zui ve ta mai a. hetihlai hi zan dar 9 a ni tawh nghe nghe awm e. A pasal hna bang chu nghah chhuah hram a duh avangin mut chhuak tawh hle mahsela, ala meng lui ve hram hram tho a, a meng țawk țawk tawh hi a ni ber.

Dar 10 a rik leh meuh chuan Nunsiama pawh a rawn thleng ve ta hram. Na zeta room kawngka chu rawn khar deuh țhuaiin, chair a lo muthlu mek a nupui pawh chu a harh phah zawk.

‘’ E, ilo thleng tawh a ni maw. Inbual nghal ta che’’ alo tih niah niah na chu chhang let lovin a briefcase khai zawk chu khum chungah a theh thla pawp mai a, a nupui meng hram hram tawh lam chu rum zeta hawi leh chung hian , zawi fiah tak, ngainatawm chuang hauh silo aw ki chuan,

‘’ Engvangin nge ka nu kha min rawn cll tir a. zahna hi ilo tlachham reuh hle mai’’ tih leh, a nupui sama rawn țham chu a rual ta mai a. Hlimpuii phu nasa lutuk pawh alo țe deuh tuarh thei. Chutah, thinrim aw khur dur dur chung hian a pasal bawk chuan,

‘’ I eng nge ka nih a, ka nunah hian rorel ve phet ilo tum sawi rawh’’ 

‘’ Ka pasal I ni lo emni?’’ 

‘’ Ka tan chuan nang hi I thi tawh! Ka hmangaihna che hi khami ni, ‘tiam tlat e’ kan tih ni atang khan a tawp tawh aw’’

Chu thu zet chuan Hlimpuii chu ava han țhawng tehreng em! 

Hei hi  a pasal. Pathian leh mite hmaa thu a lo tiam pui ngei kha a ni em?

‘Nang chu kawppui tha tak neiin pasal fel tak thlazar hnuaiah I awm thin a, a duat hmel em em mai bawk che nen’ tia an lo fak der ve na thin zozai kha tunah chuan thu awmze nei lo niin, mittui ti tla tu tur mai an ni ta. A pasalin chiang zeta a en karna chu melh let ve reng in, tlawm mai a tum bik hauh lo. 

‘’ Nunsiam, eng nge I rilru hi ni ta a. Diktak chuan maw, kan inneih hnu hian kan mamawh engkim leinan I sum hi kan la hmang lo asin. Ka puala rawn lut thin, ka thla tin sum hmang vekin anih hi kan khawsak. Nia, kan inngaihzawn chhung zawng kha chuan engkim in phal vek alawm. Ka tan khan ui reng I nei ngai lo’’

‘’ Ngawi rawh! Tun hi sum leh pai chungchang sawina hun a ni emni?’’  a thusawi lai pawchata a rawn tih ve pawh chuan ani erawh chu ala tlawm duh bik miah lo thung. Ni e, he a pasal laktlak loh zet hnenah hian a nihna anga engkim sawi vek a hun tawh reng a ni.

‘’ Thudik ka sawi, Nunsiam, ka ngawi thei lo aw. I nihna, I mizia diktak a rawn lanchhuah takah chuan ka hriatchian phah ta che a ni e. kan inthen bawk ang. Tin, ka pa ngeiin kan nupa hminga ro thil tamtak a dah te pawh hi pakahatmah I chang dawn lo hre rawh. Hria ang che’’ ti let ve khar khar in, a pasal chu kalsan mai a han tum a, ani thung chuan alo pawt let vat.

‘’ I ti nge ti lo chu kan hria ang  chu. Chuan, kan inthen ang maw? Kan inthen bawk hek lovang’’ ti hmarh in bathroomah a luhsan daih a. Hlimpuii chu alo thaw zui halh mai.

Tun maiah khan eng chungchang te nge a sawi tak vak mai le. A thinrim luatah a insum zo ta thlawt lo a ni e.

A pasal hnena a sawi tak ang khan, Hlimpuii pa, Pu Challura hian an nupa hmingin Café leh Hotel building pakhat ve ve chu a dah fel vek tawh a, a nihna takah chuan an inneih thilpek atan khan a hlan te pawh a tihtheih zawk mah awm e. Hetiang thil hre ran chung leh, a nupui hi hmeichhe hausa tak a nih zia hrereng in Zonunsiama pawh hian hetiang neuh neuh hmang hian a nupui rosum chu chhuhsak tumin a bei țan ta tihna emni ang.

Kha zan ral hnu atang phei kha chuan an nupa nun chu hmuhtheih khawpin a hlim lo zual hle a, Hlimpuii ngei pawh chuan thupsen loh chin a nei va ta nual mai. Mahse, zawhna a dawng a nih lemloh chuan chhanna a chhak chhuak zung zung ngai lem lova, a pasal chhungte pawhin zawhna chu nei fo mahsela eng thilmah a sawi chhuak tha duh ngai hek lo. He mihring hi then vang vnag a kalsan a duh, chutihrualin, thil tih zung zung theih erawh a ni chuang hauh silo chu a buaina a ni. A chhan pakhat ah pawh, mualpho a hlauh chu thuhran nise, a pasal hnen atang ngeia vauna rapthlak a dawn vang a ni leh a, ni e, thah a vauna hial a tawk tlat atin lawm. Inthen chungchang a sawichhuah apiangin a pasal chuan amah emaw, a chhungte chu thahsak ah a vau thin a, a ti duh tak tak mai ang tih pawh a ring nghet bur. Ani hi chuan eng thil pawh hmachhawn se pawi a ti lo. A nu leh pa te mawlh hi hnuh luh a duh lo zawk a ni, tin, an inthen a nih vaih chuan an nupa hminga a pa thilpek te kha engmah tihfel ala nih theihloh avangin a pum hmawm thei dawn hauh lo va, he a pasal kutah hian a hlan ngawt theilo bawk. A nun chu buaina hlir a ni ta mai e.

Ni khat pawh a rilru tawt lutuk awmngaihna hrelo chu a thiannu Rochami hnenah kal in, ava inbunruak ta vek. Rochami chuan alo lak thutak sak ta hle. A ngawihbopui mai mai ve thei ta hauh lo nia.

‘' Deary, police ah kan report ngei ngei tur a ni. Chutiang zawnga invau chu thil namai a ni hleinem. Eng aiah nge I ngawih bopui tlat zawk a’’ tia fuih phur sauh sauh in, a ruk thei ang ber chuan police ah an thlen ve ta ngawt. Mahse, an tum ang ngawtin thil chu a kal thei ta hlek lo va, finfiahna tha nei miau hek lo le. Beidawng zeta haw dun leh hnak hnakin, Rochami erawh chuan tih dan tur ala ngaihtuah pui reng thung. A enchhin nan a pasal hnenah chuan inthen a duh thu sawi nawn leh tur leh, a chhan dan engkim te pawh record thlap tur chuan thu a han rawn ve leh ngial a, Hlimpuii pawhin lungsi lemlo tak chuan a lu a lo bu ve nghat nghat.

Tichuan, mahni in lam ve ve pan in, thil tul zualpui a tihfel leh hnuah a pasal lo haw hun tur chu thinphu dut dut chungin  a lo nghak leh ta ran a. A dan ngai te bawkin Nunsiama chu a rawn tlai lehpek hle. Mahse, tun atan chuan a ngai pawimawh duh lo lui ve tlat. Pangngai taka lo lan kha a tum ber a ni bawk. A pasal mawlh mai chuan mak a tih hmel kher asin. Nia, hetiang thil hi an nupa inkarah hian a thlen lohna chin a rei tawh takzet a, a hming chauha nupa tihtakah, khum khat an la in țawm a ni deuh ber awm asin.

Chutianga a tha thei ang ber a chhuah luih ve hram hram lai chuan a hmaah lehkha phek pan tak hi a rawn tla thla nawlh. Makti fea amah dinchilh reng tu a han en chhoh pah chuan,

‘’ Eng thil--’’ a sawi zawh hmain Nunsiama chuan a khabeah a rawn dawm sak chawt a. Ha chang țhial bap bap chungin zawi ser sawr zet hian,

‘’ Sign rawh!’’ a rawn ti ram hmak.

‘’ Eng nge an nih a. Lehkha hriatchian loh ah ka hming hi ka sign ngawt thei lo a ni’’  ti let ve nawk nawk chunga thawhchhuah a han tum chu a pasal bawk khan alo nam țhu leh sawk. A hlauthawnna lamah a tiril chu a khur tan a, a pasal mawlh mai chu a hlau a ni.

‘’ Sign mai rawh. Tichuan, inrem takin kan inthen thei tawh bawk ang. I hrethiam em? Inthen kha I duh a ni lo emni?’’ 

Hlimpuii chu a meng phâwk nghal hrû thei. He mihring hian eng chungchang nge maw a sawi tak hi le.

‘’ Awle, lehkha hi ka’n chhiar chiang ve phawt ang aw.’’ tih paha lehkhaphek a lek kan lai chuan rang zeta lo phihthlaksak vatin, rum zet hian a rawn melh pah rawm rawm bawk a. chutah le, chemte lian lem lo tak rawn phawrh paha a nupui chu lek khum vang vang chung hian a sehchilh ta rap rap mai bawk.

‘’ I chhiar kher hi a țullo. Ngawi rengin I sign dwn nge ni a, tunah  hian I hnuk ka chhat zawk dawn’’

Tunah chuan thil engkim thleng mek zawng zawng te hi a hrethiam ve ta. Ni e, he a pasal tenawm tak hian an nupa hminga thil awm zawng zawng te kha ama hminga thlak turin a duh tih a hriaa, chumi hnuah chuan ani hi chu engtinpawh in awm tawh mahse pawi tihna a nei reng reng lo. Um,,a pasal, amah hmangaihtu diktak emaw tia alo kawp ve char char thin hian amah ni lovin, a neih rosum chiah a ni a lo hmangaih sak zawk ni. Mipa tamtak a kal tir tak te ang bawk khan. Heng zawng zawng hi hmanah khan lo hre daih tawh se zawng, hetiang hi a thleng hauh lo tur. Hetia pasalte hlau reng renga nun hman pawh hi a țul miahlo tur asin le. Mittui tla zawih zawih chungin a pasal hmel mawlh chu a en ta reng ringawt a.

‘’ Engvangin nge heng zozai hi ka chungah I thlen tir. Min hmangaih lova min duh tawh hlawllo a nih te chuan tha takin kan inkalsan thei reng alawm. Hetiang zawng hi chuan ti lul lo the bawiha’’ 

‘’ Chutiang sawikual duah a țullo. Sign vat mai rawh!’’ rawn ti zui leh tuarhin, Hlimpuii pawh a phu ve zawk. Tichuan, zawimuanga pen chu lak sawn pahin sign tum niawm tak chuan paper chungah a han tin ren rawn phawt a. mahse, thawklehkhatah a pen ken lai ngei mai chuan paper zawk chu thaichhe vek in, room atang a tlanchhuak zui ta daih. A nupui khawsak dan tehthut avang chuan Nunsiama pawh alo hawi buai deuh hman tawh hle a. mahse, rang zeta um chhuak ve nghal in, inhnuai a zu thlen thlak lai chuan a chhungte  chuan an lo melh deuh țhap mai. A thinrim thar leh ta kher.

‘’ Zawngi, ka lehkha pawimawh engkim I thai chhiat man kha chu I hmu tur a ni’’ tih pah hian a nu leh pa inkara lo ding a nupui chu kut thlak ava tum zui ta mai a. Rang takin a pa a lo inrawlh vat thung.

‘’ E,, Zonunsiam, eng thil nge I hriat tak hi le. Duhtawk thuai rawh’’  tih pahin sofa awmna lamah a nawr phei zui rawk rawk. Chutih chhung zawng chuan Hlimpuii pawh kha a nu phenah lo biru kual ve in, a pasal awm dan tenawm leh mak zst avang chuan a hlauhthawnna ala reh hleithei lo a, a tiril khur lah chu a reh thei bawk hek lo. 

An boruak tlema a reh tak deuh hnuah, pa ber bawk chu rawn tawng chhuak lehin,

‘’ Mama, zanina ka thu hriat hi a dik reng em? I hnen atang ngeia hriat hi ka duh a ni. Tin, thudik ao nih tehreng chuan mak ka tiin pawm thiam harsa ka ti hle bawk ang’’  pa berin a tih zawh rual deuhthaw chuan Hlimpuii kha alo inrawlh ve vat.

‘’ Aw pa, thudik vek a nih kha ka sawi. Engpawh chu nise, kei hi ka chhuah phawt a țul a ni. Tichuan, he mihring pawh hian a duh leh hmangaih chu nei mawlh se la, hetiang reng renga awm hi chu ka tlin tawh thlawt lo a ni e’’  a sawi zo chiah tih ah, a pasal a rawn inrawlh ve nghal zat.

‘’ Aw, chhuak ang che. Eng thil nge thleng zel dawn tih pawh kan hre chawp zel ang chu. Chhuak rawh. Tikhan chhuak nghal rawh’’ ti hlawk thlawkin, a thochhuak hman uaih bawk a. mahse, a pa bawk khan a rawn pawm bet leh vat.

‘’ Zonunsiam, a zahthlak hle mai. Nupui nei chungin ngaihzawng inei a, tichung chuan I nupui I la khing let ve ûr ur bawk a maw? Min tizak hle mai ka ti. Engpawhnise, Hlimi, lo va haw phei phawt mai la, inthen hlen erawh chu ngaihtuah hauh suh ang che u’’  Hlimpuii am hawi paha ti lehin, a hmelah pawh a fapa chunga a lawm loh zia chu namen lohin a hmuh theih awm e. A kekawr ip zen leh ruk ruk pahin  cellphone a rawn phawrh zui a, tichuan, a driver a call leh hnuah, Hlimpuii pawh a seilenna hmun lam pan chuan a haw ve leh ta rih phawt a ni.

Thil awm dan avang chuan Hlimpuii chu han thaw ve hawk thin mahsela, a chhungril zawng zawng erawh chu a thawveng famkim hauh silo. Sawifiah thiam theih siloh thil tamtak hian a kam țun reng a, a hlim thlawt lo. Mahni in lama a let leh hi a chhungte chuan sawi buai an nei hauh lova, a chhan diktak pawh hre fumfe ve chuang lo mahse, an hmangaih em em an fanu vang hian an ngawi mai a, tu thiamloh zawk nge tih lah an buaipui bawk hek lo. An hriatchian ve zawng chu, an fanu thinlung hi natna hlirin a khat a, a buai takmeuh bawk a ni tih zawng hi a nimai e.

‘’ Ramluahpui, ka office-ah rawn leng phei la ka va duh ve’ ti chang fakin Nunsiama chu a meng kual deuh ralh ralh mai a. A mitmeng ringawt pawh hi nunrawnna hlira khat nimai awma mawi a ni.

Phone hmanga a biak zawh chiah Ramluahpuia kha a cousin niin, tette atanga inzui thin leh, a thuhnuaia a dah theih a unaupa a ni a, tun hunah pawh hian mamawhna lian tak a neih leh vang chauhin a ko te pawh kan ti thei ang chu.

A call atanga darkar pawh tling loah Ramluaha chuan office a rawn thleng chawpchilh ve nghal a. A unaupa leh a boss ni bawk Zonunsiama thu hi chu a zah in, a che rang vat vat thin the e.

‘’ Unaupa chu eng thil nge ni ta a. I rawn sawi dan ah khan a hmanhmawhthlak hmel bawk si a ka tia hei, ka rawn kal nghal rum rum a nih hi’’  tiin, inthiamlo hmel deuh reuh hi a pu bawk a. Nunsiama pawh  alo bu zui ve nghat nghat.

‘’ Chhun thil I ei tawh em? Thil kan sawi dun tak tak hmain inhnawhpuar phawt ila’’ 

Ramluaha thung chuan a ril a țam loh thuin a lo chhang let ve vat.

‘’ Awle, a nih chuan, nang leh kei hian thil engemaw tihtur kan nei dawn a. kan hlawhtling hlauh a nih chuan I hlawh tur pawh a chhe lo ang tih ka tiam ngam a che’’ a unaupa thusawi chuan a beng verh nghal zakin, a meng bial zui kawk kawk bawk.

‘’ Han sawi chiang deuh la, eng chungchang nge?’’ lo ti leh vat vat in, Nunsiama thung chu za lo zet hian a lo khi ve suk.

‘’ Mi tuemaw a nunna kan lak a ngai dawn a ni!’’ 

Ramluahpuia chu a meng bial zui kawk! A thu hriat zet chuan a țhawn nat em avnagin a hmaa thu a unaupa pawh chu a melh zui deuh tlawk tlawk.

‘’ I uang emni?’’

‘’ Ka uang lo. A rang thei ang bera kan chet chhuah nghal a ngai a ni. Min pui thei ang tiraw? Chuan, I hkawh tur hi a chhe dawb lo tih hrereng rawh’’

‘’ A tu chu nge kan dahthat dawn a. I timak ka ti hlemai unaupa’’  Nunsiama thung chu ngaihsam tih hriat fe hian alo nui deuh hak hak duh chauh a.

‘’ Ka nupui hlui Lalhlimpuii saw I dahtha thei a nih ngat chuan sum leh paiin ka vur ang che. Nang hian ka thu I hnial ngai lo tih ka hriat avang in, helai hmuna ko che pawh hi ka ni. Ka chanpual atang 100 ah 50 hi chu I ta tur chiang bal an nimai. I hrethiam em?ka nupui hlui kha hmeichhe hausa tak a nih zia pawh I hriat tawh ang khan, lawmman pawh a chhe thei lo. Tunah hian a thla tin sum lut atanga 100 a 50 hi ka kut vek an la ni a, a chhan chu, inthen felna kan la nei miau lo. Mahse maw, ani hi a thi a nih phawt chuan engkim hi ka kutah an awm vek dawn. Chuan, min pui thei dawn ta em le?’’ a rawn tih leh hmarh hmarh hnu chuan Ramluaha pawh khap fuk fuk chungin alo inngaihtuah ve nasa hle. A unaupa thilsawi avang khan a rilru pawh a buai ve takzet a, a lehlamah, an monu hlui Hlimpuii nen khan an inngaina in, an inkawmngaih ve em em si a, hetiang taka nunrawng hi chuan a chungah khan a che thei dawn emni le. Mahse, a lehlam a nagihtuah ve thung erawh chuan a hma lawka thu hi a thisen zawm a unau ngei a ni ve a, amah phatsan chu nuam a ti dawn hauh lo. Engtin nge ngaih dan a siam fel tak ang le. Tun hi a sum dinhmun tlakhniam lai tak niin, hna nise a hmu mumal miahlo bawk a. A tan chuan hei tluka tawktarh tha hi  awm kher tawh awm love a.

Thutlukna siam harsa ti taka alo inngaihtuah rauh rauh laiin a unaupa lah khan a ngaih dan chu a lo zawt ve sek bawk nen, a tawpah zawng, a chhan ngaihna hre tawhlo tihngaihna hre bawk silo chuan a thutlukna chu ‘aw’ tiin a siamfel ta ngawt. Nunsiama erawh chu a lo phur hmel kher. Tichuan, an hmalak zel dan tur an sawifel leh fe hnuin Ramluaha pawh chuan a chhuahsan thei ta hram a ni.

Kawppuite nena han inthen meuh chu a hunlaiin hrehawm tinreng kha tuar ve bawk mahsela, tunah erawh chuan hun te pawh an lo liam ve leh ta nial a, Hlimpuii chuan mal leh riang ngawih ngawiha inhriat chang a nei ve ta fo mai. A pasal hlui Nunsiama lahin amah chu rawn biak tumna emaw, hruai kir leh mai tumna ang chi kha engmah a neih awm hriat a ni lova, a reh hlen tawp mai a ni. Hetihlai hian inthen hlen tur anga thil tihfel pakhatmah an la nei bawk silo, Hlimpuii tan tak pawh chet lak dan chu a vang ve khawp ang. Nunsiama tan khan a tling lo hle anga inngaihna a neih nasat pauh leh, a natna chu a zual ting mai a ni si.

‘’ UHlimpui, vawiin chu rawn len ka tum deuh a, inah I awm ang chu tiraw?’’ amah rawn be tu chu tudang nilo in, Ramluahpuia a lo ni reng. An inbiaklohna rei tawh zia pawh chu a hrechhuak nghal uarh uarh thei hial. Tichuan, a lo awm tur thu hrilhin an inbiakna an titawp zui a, a ngaihtuahna an kal thui zui kher. 

A pasal hluii a rawn tir a ni thei a ngem, tihte thlengin a ngaihtuah kual a, ngaih dan fumfe tak pawh a nei hleithei lo. Engpawh chu nise, tha taka lo dawnsawn chu a phu ve reng a ni tih hrerengin Ramluaha rawn thlen hnu pawh chuan a hmel leh awm danah, hmuh hrehawm a lang lo va, hlim hmel alo pu lui hram hram zawk a ni.

‘’ Chuan, eng chungchang ber maw I rawn len luh chhan chu. Pawimawh thil a nih loh chuan I rawn kal hi ka ring vak lo bawk a. a dik em?’’  ti sapin, chiang leh uluk tak chuan a bula thu mek Ramluaha chu a han en deuh ran ran phawt a, ani Ramluaha erawh chuan a hmel reng reng chu a lo melh tha ve ngam hauh lo. A buai hmel in, ngaihtuah tamtak nei hmel a pu a, a mitmeng nise a buai ru hle tih pawh a hriat vek. Chu mai chu nilo in, a han thu te reng reng pawh chu a nghet lo angreng hle a, a kut a tiche sek mai.

‘’ Luahpui, ka thusawi kha ilo ngaithla em?’’ a rawn tih nawn leh takah chuan Ramluaha pawh a phu deuh zawk. Phawk fea rawn hawi chhuak cung hian mitmeng bial kawk khawpin Hlimpuii chu a han melh hrawk mai a. hlimpuii tan tak pawh a ngaihthat thlak viau hran loh. Chutah, hlauthawng tih hriat aw khur dur dur chung in Ramluaha chuan,

‘’ Uhlimpui, eng lo a nia, he thil hi ka ti thei thlawt lo  a ni. Min ngaidam rawh aw’’ 

A thilsawi awmzia chu a hriat loh em avangin Hlimpuii a lo țhen sak.

‘’ Eng ngaihdamna chungchang nge maw I swi hi le. Kimchang takin I buaina chungchang hi min hrilh vek rawh. Hlauh I nei nge, engmah hlau suh aw’’  tih pahin a kut te chu ava vawn sak de de a.

‘’ I pasalin I nunna hi titawp turin min duh a ni!’’ 

Hlimpuii hawi kual lai chu tawp hmakin, chiang kek kawkin Ramluaha chungah bawk a mit a fu leh ta.

‘’ Eng thu maw I sawi zawh chiah kha. Nang hi’’ ti ban charh in, a tho zui hluai a. A thin a rim zui phat phat thei.

‘’ Chhuak phawt mai rawh Ramluah’’ tih leh pahin kawngka lam a kawk zui va va a, a thinrim tih vak ngaihna hresilo chu a thaw zui leh halh halh thin bawk. Chutah, rang zeta rawn din chhuah ve pahin Ramluaha chuan,

‘’ Ni lo UHlimpui, ka kalsan thei lo che. Nang hian kei hi min mamawh a ni’’ ti chungin, a hmaa ding mek thinrim leh rilru nat lutuk vanga thaw halh halh thin chu beng daih a han tum a, pakhat lahin a kut te chu a lo vai kian sak zel si. A tawpah phei chuan a tihngaihna hrelo lutuk chu a au zui ta nghek mai. Hlimpuii dar tawn tawna vuan chung hian aw khur hlawk hlawkin, 

‘’min ngaithla rawh. Idea ka nei!  Nang hian kei hi min mamawh’’ tiin a sawi pah nawk nawk tawh bawk. A hma ai ngawt kha chuan Hlimpuii pawh chu lo inbengdai ve tawhin, a mittui tla tur te chu a han hru pah leh zeuh thin bawk a. A țhen deuh sak sak. Chutah, hnuailam bih ran chung chuan,

‘’ Engtin’’ a rawn tichhuak sap a. Ramluaha pawh a lo thaw zui ve hak mai.

A pasal, a hmangaih leh a engkim nia a hriat thin khan midang hmang tangkaiin a nunna ngei hi tihtawpsak a lo tum a maw!? Rapthlak a ti takzet.

Chu zan zet chu Zonunsiama tan muthilh a harsa ngang a ni a nge, a khum chungah muhil theilo in a inlettawn sek a, sana nise, a bih awl hek lo bawk. A khat tawka thaw leh halh thin in a tawpah phei chuan a țhu chhuak ta nge nge. Eng thil emaw tak helhhawlh leh nghah chu a nei a ni. Sana bawk chu bih nawn leh in, zing lam dar 3 a lo ri chiah a, a insumthei ta thlawt lo mai. A phone phawrh zuiin tuemaw chu a call ta nge nge. Lehlam amiin call a rawn chhan rual rualin ani chuan ram zet hian,

‘’ I ti ta em/ iva rei ve a’’ a ti zui hlak. Chutah, lehlam atang hian Ramluaha aw ngei mai chuan inrintawkna nasa tak nei tih hriat zetin,

‘’ Ka zo fel chiah. Thlalak rawn thawn che ka tum lai tak a ni e’’ lo ti let ve nghalin, Zonunsiama chu a țhen deuh sak. A thaw huai thei nia.

Tichuan,

‘’ Rawn ti vat rawh’’ tih leh, phone dah chu a rual a, a thaw lehnghal kawk kawk thei.

‘’ Lalhlimpuii, Hlimpuii. He he! Tunah chuan I neih engkim mai hi ka kutah an awm thei dawn ta. Chawh tak rawh! Kha leh chen kha leh chen a der maia ka lo lem thinna che kha tunah chuan a rah thlum tui tak ka chang ve thei dawn ta e. Thi mawlh the!’’ ngeiawm fea a phun mawlh mawlh lai chuan a message tone rawn riin, a en nghal vut. Aw le, a chiang thawkhat ta. Hei ngei hi alawm a lo hmuh duh em em thil chu. Nui vur vur chung hian a message dawn, Ramluahpuia’n a nupui a dahthat zia tihfiah nana a ruang thlalak hrang hrang a rawn thawn ho te chu thlir vel in, a lungawi hliah hliah tih chu a hmelah a hriat e. A faifuk zui nghal hlarh hlarh mai.

A ruahman ang thlapin engkim a kal tih a hriaa, a hlim. Chu mai chu ala ni lo cheu, a nupui bo thu chu ni 2 liam hnuah report lutin amah ngei pawh a pasal a lo nih tawh naah police hnen atang kohna a dawng ve zat tho a, mahse, lem ang der thiam mihring tihtakah, a pha kual thiamin, an inthen hnu atanga a nupui hmel chu vawikhat pawh a hmuh leh tawh loh thu a sawi tak reng ah chuan police ho pawhin rinhlelh list atang an peih fel hmak. Mahse, khawi hmun dangah mah lo chhuak bo lo tur erawh chuan thu an chah ve thlap. 

Tichuan, a nupui bo thu an hriat atanga chawlhkar khatnaah chiah police hnen atang bawk call chu dawng lehin, a nupui hlui ruang an chhar thu chu hrilh a ni ta a. chutah le, a tuarna ber ang hrimin a mittui te a tla vel a nih chu le! A tap hawm hawm reng a, ruang an hmuhna hmun an panpui lai te pawh chuan mu leh mal neilo in a talbuai vel nasa hle. Police ho tihngaihna hrelo pawh an inenkual a, an khap fuk fuk ringawt tawh.

‘’ Lo kal zel rawh kan thleng tep e. Fimkhur tak khan aw’’  tiin police 3 vel chuan hma an hruaia, amah Nunsiama chu a laiah kaltirin, a hnung dawltu atan constable 2 hi an kal ve bawk. Chutih chhung zawng pawh chuan Nunsiama chu ala insut hruih hruih reng a, a tihngaihna tak pawh an hre ta lo ve. Tichuan, hmun pakhat, Ramluaha’n a nupui ruang a hnutchhiahna hmun chu thleng zuiin, ruang chu kawr țawp leh rimchhe em em chhungah , rem lo fahran in a lo mu ta ngei mai a. Ruang hmel a han hmu thut chu Zonunsiama pawh phu zawkin, a zuang dawrh thei. Thlalak atang ringawta hmuh leh, a taka han hmuh meuh chu a lo danglam deuh te pawh a nimahna. A hmunhma a lo rimchhe ve hrep bawk nen, a uak zui ta bawrh bawrh mai. A uak zawh rual rualin a mittui kha a tla lehnghal pang bawk.

‘’ Ka pu Inspector, ruang hi tu hmuhchhuah nge ni reng reng?’’ a zawhna chu Police SI pakhat chuan rang zeta lo chhang letin,

‘’ A hmu tu maw, alo kal mek e. I hnunglamah khan’’ rawn tiin, Zonunsiama chu hnunglam hawiin a inher zui vut a. A thil va hmuh vang chuan a vawihnihna atan a phu zuang leh zawk.

 Ramluahpuia maw!? Hepa hian hetah eng thil nge a rawn tih ve. Ramluahpuia rawn kal mek chu ngaihthat lohna nasa tak nen rum fein  alo melh reng a, a mitmeng hmang chuan thil awmzia lo zawh fiah pawh a han tum ve sasawi a, mahse, a țhelh chiang khawp.

An bul a rawn thlen phei chuan hlim em em a nui sang chung hian Ramluaha chuan a darah a rawn ben sak thak thak phawt a, ani erawh chuan a khawsak dan mawlh chu mak tiin a ka deuh hau tawh.

‘’ Unaupa, I hlim vak na nge? I duh ang thlapin thil zawng zawng an thleng vek tawh a, nui ve tawh ta che’’ ti ham hamin ruang awmna lam chu a hawi zui daih a. Thil diklo engemaw tak chu a awm chiang a ni tih pawh Zonunsiama hian a hrechiang hle. Mahse, chu chu engtin nge a hriatchhuah theih ang.

‘’ Ramluah, tuna I sawi zawh chiah kha han sawi nawn leh lawk the. Kei hi ka nupui ruang bulah hian nui turin min duh a maw!? I mawl hlemai’’

‘’ Aw, chu chu I tihtur diktak pawh a ni reng alawm. Ni leh lo, ka ruang thalak I hmuh zan zan la khan hlimin I nui tawh zawk tak e’’ chu aw rawn chhuahna lam en chuan an hawi zui țhap a, khaia! Misual kut tuar tih hriat ngawih ngawih leh, hmui duk vek tawh, nunna nei tawh lo tih hriat taka saruak deuhthawa kawr țawp leh rimchhe tak chhunga mu reng Lalhimpuii ngei mai chu rawn tawng chhuak ve in, a rawn tho chhuak leh ta mai a! Chulai hmuna mipa dang awm ve ho chuan pawh chhuah tumin an lo bial laih laih bawk. Thil kal kual dan hrethiam tawh lo hulhual Zonunsiama chu a meng phar nasa ta hle a, a nupui leh police ho hmel mawlh chu a melh chhawk zak zak ta mai. Chutah, za lo fahrana rawn nuih deuh hak pah hian,

‘’ Min bum intum a ni. Nangni ho hian intiam ruala min bum intum a ni’’ tin khur hluk hlukin hnunglamah a tawlh let hret hret bawk a, tlanchhiat tumin thawklehkhatah, a inher ta thut. Mahse, a che fuh chhunzawm ta chuang lo. Amah veng tura ruat sa, a hnunglama Constable 2 ding te khan lo man bet chatin, misualpa chu an hual chep ta. A tan chuan tlanchhiat lehna tur chuang reng a awm lova, thudik sawia inpek tawp mai loh chu, a tan hmun him reng a awm ta lo.

‘’ I nupui rosum tam tham tak it avangin a nunna tihtawpsak tum ta a. Ngaithla rawh. Keini police leh mipuite I bum emaw I intih lai khan nangmah ngei hi bum let ini zawk tih I inhre miahlo. Nia, I hrelo hulhual. I nupui bo thu report I dawn hma daih khan I cousin Ramluahpuia hi station chhungah a rawn tlanlut a. keini hi thil nihna engkim min rawn hrilhfai vek in, a intiam anga engmah a tih theihloh thu leh,  a nunna chu I tihtawp sak mai a hlauh thu pawh sawi telin, mak kan lo ti tlang khawp mai. A chhan chu, hetiang case hi Mizoramah hian a thlen awm kan la hre hauh lova, chuvang tak chuan, thubuai siama man nghal rum rum lo chein I duh ang thlap khan chhaih kual che chu kan chak ta viau zawk a, tichuan, dahbo I chak em em I nupui ngei mai chu make-up professional ruaiin , thah ngei ni anga a lan theihnan kan chei kual tir ta vel a.  Tikhan, nang lahin ilo awih em em bawk si. I nau Ramluaha ngei pawh hi I haw viau ang chu tiraw. Mi kuta rulkaw zen I tum vangah ngai la, hahdam daih rawh. Kan mi rin ber ber te hi kan tana thangkamtu anni hlauh thin a ni tih hriatphah nan pawh hmang zui hlauh la, I hlawkpui phian maithei a ni. Tunah chuan rorelna sang zawk I hmachhawn dawn tih hria la, I hremna pawh a nep hauh lovang tih kan ring. Eng anga ukil tha pawh ruai rawh. Tutemah hi I sum hmanga i tham lungawi theih kan awm dawn lova, I chan tur chu a chhe ber tih kha a ni tawp. Khawnge, I hmel hmuh reng pawh hi ka peih ta love’' ti leh nghut nghutin a hmaa thu, SI chuan a thawhsan daih a. zonunsiama erawh chu a thil tawn mek te hian an țhawn em avangin a melh ngai melh chuan a thu zui tlawk tlawk ringawt a. A thin a rim takzet bawk. Mahse, tihtheih dang reng reng a nei tawh chuang lo tih a hre thung.

Hetiang hi an fapa Zonunsiama chunga thilthleng mek  a nih laiin, an mualphona leh zahna belhchhan tur thil an tawn belh zel bawk a. chu thil chu engdang ni lovin, an chhungkaw hminga damdawiin an dah chungchang kha a ni. Nia, Hlimpuii nu, Doctor Saidingliani khan a fanu chunga thilthleng te hi rapthlak a tih em avangin a makpa hluite chhungkaw hriatchian tum chuan a ruk takmeuh meuhin hma alo la ve bek bek a, chutah chuan he thil hi hriatchhuah a ni ta a ni.

kha Damdawiin kha Zonunsiama te chhungkaw ta reng reng a lo la ni lova, diktaka sawi chuan Zonunsiama pa, pu Chhuanmawia unaupa ta zawk lo niin, ani chu a boralna pawh a rei ve tawh angreng hle a. Tichuan, a nupui fanaute hnen atangin a hnehchhuh a nih tak ber chu. Tin, a fapa in a nupui hlui chunga a tih ang chiah khan, Pu Chhuanmawia chuan a unaupa ngei nupui fanau te chu thah ah hial a lo vau nasa thin bawk a niawm e. chung zawng zawng pawh cu police lam hian chiang zawka chhui chian atan an dahtha rih phawt a. Tunah rih chuan an fapa case mawlh hi chinfel hmasakah neih a ngai tlat a ni. 

‘’ Mi tenawm diktak a ni. Ka haw ngawih ngawih’’ tih paha tap hlap hlap chung hian Hlimpuii chuan a thiannu Rochami chu nghet zetin a han kuah vawng vawng phawt a. Rochami pawhin a thiannu hringnun kawng bumboh zet chu a hriatpui ve vek avangin hrehawm a ti takzet. Nghet leh duat taka lo kuah let ve chial chung hian,

‘’ Hmanah khan hetiang thil hi a thleng ang tih lo hre lawk ila chuan e, I kut ka chelhna kha ka thlah lovanga, I kalsawn hauh lo bawk ang. Min ngaidam hram rawh aw thiannu’’ tiin an tap zui dun ta hlap hlap a.

***       ***        ****       ***      ********      ******         ******         *******