BLIND

BLIND...

****    ***** ******

Vanlalpeki Fanai 

TICK! TICK! TICK! TICK!

Ka harh hlawl mai! Ka thlan te chu a tla bat a,ka sa chhuak vek a,thlan in min bual huh hlup nimai hian ka hria.Ka tho kang zawt a,light ka on nghal.Sana ka'n en Chuan zing lam dar 1:30 alo ri chiah! Engvang teh ngawt a harh nge maw ka nih le? Ka mut lah chu a chhuak maplo. Aaaa...engpawhnise tiin ka tho chhuak a,verandah ah thlifim dawng turin ka tei chhuak nawlh a.Mi mut reh hunlai tih takah ala reh thiap a,veng hrang hrangte chu ka thlirkual vel a,an eng de sep sep te chu a mawi angreng phian.chutia ka hawi ruai ruai pah chuan kawmthlang kawngpui chu ka melh thla thuak a,hmundang ka hawisawn hman tawhlo,ka phu zuang teuh hlemai.Ka thil hmuh chu hei hi ani.

Kawngpui atang chuan keima lam hawi a mihring ding,lo hawichho vung vung chu ka hmu thut anih chu! Ka hmu tih a hriat rual chuan ngawi reng hian a in her a,a kalbo ta daih lehnghal. 

"Mak hlemai" tia mitko san ak chung hian keimah leh keimah chu ka in dap ruai a,a nihna takah chuan ka hmuh rual Khan ka lungphu a rang a,thlan in min bual huh lehnghal vek.Rang luttuk in khumah ka tlanlawn a ka inlukhup daih.Mahse ka muhil tawh lo chiang kher mai.

Phak chuapin zingah ka tho a,verandah bawk ka pan leh..kawngpui ka hawithlak chuan beisei chu ka nei mahse mihring leh motor zi nuaih nuaih bak an awm tawh silo.

Breakfast ei zawh rualin ka insiam a,hna a kaltur chuan ka chhuak ta a.Mahse nilengin ka hnaah chuan ka rilru ka pe thei hlawllo.Zan lama ka thil tawn ringawt chuan min chiah a,ka thawhpuite min biakna hre mumallo in ka nileng hun chu ka hmang tluan ve zak ta tho a.In ka thlen hnu chuan ka chauh em avangin zanriah pawh ka kil peihlo, ka mu thlawp a,kalo muhil rei viau hman in ka ring.Thil ri bur thawm ka hriaa chiang luttuk in ka harh.Ka zuangtho nghal. Ka hawi â ruai a,mahse engmah a thleng zuilo.Sana ka en Chuan zing lam dar 1:30!!

Ava mak ve! Motor chesual thawm ang deuh kha ka hre si a,a reh leh daih a tiin verandah ah ka tlanchhuak..ngai teh!  Kawngpuiah chuan kha thilmak bawk kha ka hmu leh ani.Hemi zan hi Chuan alo hawi chho lo a,hriatrengna thlanlung phun hmaah chuan a thu a,a indawm kun ngawih ngawih mai! Engnge thil awmzia?Ka ko vak mai dawn nge ka en mai mai zawk dawn?Engatinge hetah kher alo awm thin? Tun ang hun chiah ah lehnghal hian.

Biak tum chuan ka ang hman zuau a,mahse ni leh lo! Nilo! An khawtlang tan a mi hnawksak takte pawh alo ni thei a,misual tak pawh alo ni thei,fimkhur a tha zawk!tiin ka rilru ka siamfel nghal a. Mu turin ka luhsan ta daih a.Khum ka lawnkai fel hman chiah,ka rilru ka thlak leh.Ka tlanlet leh thuai a,mahse streetlight eng bawm tu rannung thlawk mai lo chu thil che vel pawh hmuh tur alo awm tawh lo. Ka hnar ka tum dat a, "mi mak tak zawng ani" ka muthilhsan ta zawk a.

Nilenga office a han thut ngat ngat mai hi chu a hahthlak ve duh thin khawp mai,mahse ei hmuhna kha ani ve miau bawk sia,zan lama mut tlem nen chuan hahthlak tak ani.Ka tuarchhuak ve zel zawk a.Awle, khatiang thilmak kha chawlhkar khat chuang chu zantin ka tawng ta a.Kar a liam fel meuh chuan chau tawh tak ka  ni. A chhan erawh ka hremai theilo,tumah hrilh ka tumlo a,a tulna lah ka hre heklo.Kar khat chhung zet min tihbuai hnu chuan mak deuhin a reh ta vang vang a,ka mut hnem phah khawp mai.Keimah pawh ka thawven phah hawk in ka hria.

Thla khat chuang zet chu a reh ta.Lehlam zawng tak chuan a ngaihawm te ka tia.Mahse zankhat chu a rawn lang leh tlat mai.A hma ang kha chu ani ta hauhlo.Inbual tur a bathroom luh ka tumlai tak chuan ka room tukverh inkhar ri rak rak thawm ka hre thut a,rang luttukin ka hawilet nghal,engmah danglam chu a awm hran lo nain ka ngaihthalo chuan khar tumin ka let leh,tukverh chu ka kalh a,ka hawilet leh chiah chu ka hmaah hian tlangval sang lampang, naupan hmel tak,hmelfai puak mai,mitmeng fiah kalh a min lo en reng tu hi alo ding anih chu!! Ka phu ropui luttuk chu hnunglamah ka Kat dawrh a.Chuveleh chu tlangval chuan 

"Oh khaih!  Ka tihpalh! Tih hlauh che kha ka tum miahlo ania"

"Engmaw???! Tumlo la thawm te pawh i rawn nei hmasa ve ang chu,mawl leh luttuk" kati hmuar hmuar a.

"Ka tihpalh takzet ani! Surprise che ka tum a" rum tawk a melh chung hian  " i nula surprise dan ava thing ve" kati let hmuk a.Chuveleh ani chu a nui suk a.

"Ka inbual dawn" ti leh hmuk chung chuan bathroom pan mai ka tum,mahse rang luttuk in ka hawilet nghal.Amah chu ka en vang vang,a chhip atanga a ke ler thleng chuan ka en kim dap.Chutah makti zet hian ka kawk a,ka ang phuau ringawt.Ani thung chuan a ngaihna a hriatloh hmel phian.

"Nangmah hi ini tiraw? Ini chiang luttuk,zep tur awmlo,i dress zawng zAwng te pawh"

"Engmaw? Nia keimah te chu ka nia lawm"

"Awi leh!  Zanin chu i insumthei tawh lo animaw? Pawn atanga min thlir kha duhtawk lo in ka room ah...haha..Ka awih theilo" ka nuih ta ngheng mai a.A tihngaihna hrelo chuan min rawn nuihpui ve a tum zet a,mahse vin thak hian kei lah chuan 

"Nui suh!  Tunge inih? Engtin nge ka roomah hian ilo luh theih? Nangmah vang hian khang karkhat chhung kha chu ka mu manglo asin.Tunge inih a?khawi a awm nge inih?" Kati ta duah a.

"Ding chung hian i zawhna zawng zAwng chu chhang ila min ti emni?"

"Naaa thu rawh.Anih leh."

"Hehe.."khumah chuan a thu a.Ka en reng ringawt a.Zawi sap hian

"I zawhna chu nakinah ka chhang vek ang che.Mahse min ngaidam thung dawn nia.Hetianga ka siam avang che hian.Tih hlauh che hi ka tum pawh anilo hrim hrim,ka tum miahlo " Ka zawhna a chhanloh avang chuan ka lungawi lo kher mai. "Hmmh. .Ka inbual dawn " tiin bathroom ah ka luhsan hmak a,ka chhuah leh chuan alo awm tawhlo a,ka hrilhhaiin ka inthiamlo lehling zawk. Kalo polite lo mah mah ani.

Kha mi hnulam atang kha chuan engtiklai pawh hian min tibuai ani ber tawh.A khawharthlak loh lehling phian a,mahse mak ka tih deuh erawh chu alo kallai hriat miahloh a alo lang thut thinte, ka chhungte emaw midang tumah a hmu duh ngailo te leh a be ngai miahlo te,a dress ngai reng te,amah ka biaklaia midangin maktih hmel deuh a min en reng thin te chu a ngaihna ka hrelo a,mak kati ve thin.A dress ngai mahse bal pawr pheng phung a a awmlai ka hmu ngai hauhlo thung.

"Tinge mobile phone te hi i neihloh a?tun ang laiah tlangval lehnghal "  A nui hak hak a. "A leina tur ka neilo a" 

Ka rum khum dat.Amah pawh en chuanglo chuan "nangmah en hi chuan phone lei theilo hmel i pulo "

"Ka number i duh animaw ka hremai,ka hrethiam mai e" tum lawkna pawh awm lovin ka chum ta awrh a.

Kan inhriathnu atang kum te pawh alo vei ve ta der mai.Inkawmngaih tawh tak kan ni.Kan innel luttuk mah mah tawh zawk.Kum a vei meuh chuan a thawmhnawte pawh alo danglam ve ta alawm. A bula awm hi nuam ka tiin,fiamthu a duh hle a,min tinui reng mai ani.Zawhna han zawt ila nilo baksak a min chhan hi a hrat a,kei lah lo titau nghal ziah bawk nen. Mahse min fiam min fiam chuan a nuihloh theih thin loh.

"Tun atanga ni 10 ral hunah chuan ka hmel hi i hmu mai mai tawh lovang " hi ati zauh zauh thin a,min tih thinrim a tum naah ngaiin ka awihsak duh ngailo.

"I hming hi nalh kati e Lalhriatreng(hmingpum kherin kan inko thin)

"Engvangin ??"

"Aw. .kan inhmuhloh hunah pawh ka hrereng tawh dawn che lawm" chutia ka tihrual chuan a hmelah lungngaihna alo lang chhuak a,a nui hauhlo.

"Inhmuh tawh loh chu ivan chak awm ve a" a awki pawh a ram hmak mai.Ka awmdan chu insiamtha vatin a kut Ka la a,nghet zet hian ka vawnsak a,

"Nilo e,ka fiam che lawm,nikhat pawh hmulo che in ka awmtheih loh hi,lungngai hma emai,min kalsan anihloh chuan kalsan che ka tumlo,ka thiantha ber ini" tiin a darah chuan ka lu ka nghat zui a.Chumi hnu chuan tumah inbe tawhlo in kan ngawi ta hle hle a.

KIK!      KIK!        KIK!

"Ava han bengchheng tak!" Ka rizai ka tlawhhlim thuai ,

"TUNGE! !?" kati vin tuarh.

"Lo hawng vat vat rawh" Hriatrenga aw ngei ani tih ka hriathnu chuan ka in ha fel sawk sawk a,ka hawng nghal a.Ka thophang hmel leh ka sam la thur bem bum te chu min nuih chung hian "ehee tho tlai si, ramhuai pitar i ang luttuk " atia min nuih vak vak lehnghal. Titau chung hian kei lah chuan "mut ka khamlo, engnge ilo tih dawn zing zingah" kati bur bur a.

"Bazar ila,thil ka leisak ang che" amah chu ka en nghal vat. "Eng chu?"

"Aw. .i duhber nimai lawm" ka nui nghal var var.

Phur zet hian ka insiam a,kan chhuak ta a.Bazaar leh kan kalna hmun apiangah chuan a banah ka kai a,ka phur khawp mai.Mihring kan kalpelh reng reng chuan maktih hmel zet hian min en a,a then phei chu an rawn hawilet ang he haw.

Thawklehkhatah Hriatrenga chuan ka ban chu a dahthla thut a,ka nui tawp hmak.  "Kha vang kha aniang miin min enzui duh emai,a zahthlak " ati sur sur a. "Min zahpui" ka tia ka la na kher mai.Thinrim teuh chungin ka kalsan leh ta nghawng nghawng a.

Zanah pawh min hmu turin alo kal leh a,mahse ka tihtauh laklawh avangin kalo be duhlo a, "ka mut a chhuak,haw mai rawh" tiin ka mu lui tlat a,mahse a kal mailo. Khumtlangah chuan a thu in min awmpui reng a,engtia rei nge a awm ka hrebiklo.

Zing alo ni a,ka rilruah amah chu alo awm hmasa leh ber.Mahse ka thin atih rim avangin ngaihtuah loh a biak hrihloh ka tum tlat a.Tukthuan ei a dawhkan kan kil thaplai chuan "Hriatrenga hi chu a fel 've ngawt mai,ka duh duh hunah ka tihtauh khum a,min thlem lungawi phet hi a tum thin a" kati luam a,ka chhungte chuan mak min tih hmel hle.Ka nu chuan zawisap hian " chu chu tunge?" Ka nu zawhna chuan min deng angreng kher.

Awki sang angreng tak hian "aw. .in hrelo amaw?zantin deuhthaw alo kal a,in la hrelo ami? ! Zan chauh pawh nilo,chhunah te pawh englaipawhin alo leng a,engtinge in hriatloh theih?"

"I pindanah hian i tawmbo reng a,kan  Lo hre velo nih chu"

"Chupawhnise kawngkapui atang alo lut ve tho ang chu mawle,avan mak! In lo hmu ngai miahlo amaw!?" Chaw bar thulh thakin an hmel chu ka melhtawn a.

Ka pa chuan "ah ni e,i thiantha anih chuan alo tlangnel deuh anga,kan hmuhloh laiin i pindan alo kaltlang thin pawh ani ve thei tho mai.Mahse fimkhur la,tunlai khawvelah chuan tumah hi rinloh tur ania, mipa ngat phei chu ringlo tawp rawh.Kawm chu kawmtur annia,mahse khawi tlangnel vakloh tur aw nula inni ve tawh a,hmingchhe reng thei inni" ka pa thusawi chuan ka rilru  A hneh bakah an khawsazia avang chuan ka awm an tinuam lo lehlawi bawk si. Nilengin ka hnaah pawh ka rilru ka pe hleitheilo a,Hriatrenga chu ka ngai em em bawk si.Mahse biak tawhloh mai te ka duh rum rum thin.A chhan chu ka chungah hian felin tha viau mahsela, miten a bula ka awm apianga makti taka min en thin avang te leh ka chhungte hmuh loh leh hriat miahloh a ka pindan a rawn thleng mai thin te hi eng emaw chu amah ah hian zep ruk a awm a,ka lakah hian zepruk a nei chiang ani tih ngaihdan ka nei thar thut a,ka biak chak viau rualin ka hrehphah leh thin.

Zan alo thleng a,ka awm a nuamlo tulh tulh lehnghal a,mut mai ka duhthu ka chhungte chu hrilh pahin room lam ka pan chho a,step ka rah zawngte chuan ka taksa chu a chau hluah hluah nimaiin ka hria,ka tha chu a khur der der a,a ngaihna tak pawh ka hrelo. Tukverh khar that pahin kawngpui chu ka zu hawithla hram a,ka rin leh hlauh ang ngeiin streetlight dul ruih hnuaiah chuan Hriatrenga ngei mai chu alo thu kun lap mai niin. Parda zar mai ka tum chu ka inthiamthei thlawtlo,tukverh chu ka hawng a,verandah ah ngei mai chuan ka ding leh ta vang mai.Zahzelah aw ka han thian kharh a,chuveleh rang zetin ani chu a rawn hawichhuak nghal,min rawn nuih seih a,a tho deuh uaih bawk.Mahse ka rilruah ka pa thusawi kha lo lutin inthiamlohna hlirin ka khat leh tawh.Ka hlim hmel chu lungnihlohna ah inthlakin rang fahran hian ka inher a,tukverh te kharin parda ka zar phui ta hmiah a.

A hawihil dan tur kha ka ngaihtuah chuan ka khawngaih luttuk,mahse thlah hlen ka duh ani.Ka thlah hlen duh nachhan hi keipawhin ka hrelo.Kha zanah Khan chhinkhat pawh ka chhinglo a,theihse he rilru chhia hi pulo ila chuAn a kiangah khan thu ve in kan nuidun leh hawr hawr tur ania.Ka mittui ka khap per sak sak a,sana ka'n en chuan 1:30 ! Ka thaw halh a,muthilh tum a ka in leh ngial pawhin ka theilo ani.

Chawlhkar khat leh ni tlemte chu kan inbe tawhlo reng mai,hnaah te ka buai ve bAwk a,Hriatrenga chu ka rilruah pawh awm tlem tak ani.Mut dawn ah erawh kawngpui lam hawithlak chu ka sim theilo.Ka rin leh beisei ang ngeiin alo awm leh nge nge thin a,ka thla ati muang ve viau thin.

Zanriah kil laiin kanu chuan 

"Bawihi,naktuk chu iu mama thlan kan tlawh ve dawn em niang,tihfaite pawh angai tawh ang,kan tlawh khat riau mai"

"Luttuk,nia thlan hi kan kal ngailo kalo ti ve reng reng a,kan kal dAwn nia"

Khua alo var a,ka rinai daihin khua a nuamlo,zingkar atang ruah a tla ser ser reng a,chhum lah chu a zing phui mup mai reng bawk si.Thlan chu kan kallo mai dawn emni kan ti ut ut a,mahse kan lo urlawk nasat tawh nen bakah hna thulh phah nan te kalo hmang 've tawh vei nen kan kal ta tho a.

Thlan kan thlenlai chuan tlemin khua a nuam deuh a,ka umama thlan awmna kan pan mek lai chuan thlanlung pakhat ka kalpelh tak chuan ka mit a la ta riau a,ka inher a,

"Lawk aw nu " tiin chu thlanlung enkawl uluk tih hriat fahran mai a fai hlarh mai chu ka enchiang ta a.A thlanlung chu Granite niin mitthi thlalak pawh lian leh fiah tha em em mai hi an lo tar kuau bawk.Thlalak ka hmuh chuan ka phu zawk,thlanlung chu en leh in boral tawh hming ka han hmu zet chu ka tlu thelh a,hnunglamah kanu in min lo dawmbet vat a.Chu thlanlungah chuan he thu hi alo inziak a:-

Kan Fapa Neihchhun,

F.Lalhriatrenga, kum -20

**************************

Ka thaw te chu chham mai dawn in ka hre hial a,kanu chuan min vuan tlatlo pheise chuan ka awmdan tur pawh ka hrelo.Ka thil hmuh chu ka ring theilo a,midang a hming ang pu ve zawk anni ang te ka ti thul.,mahse a thlalak ah pawh chuan amah ngei chu ani si. Thlan pawh tifai lovin kan haw leh ta ringawt a.In thlen rual chuan engmah pawh ti peihlo in ka mu nghal hmak a.Ka harh leh meuh chuan khua alo thim mup tawh a,ruah  alo sur bur bur bawk.Rang takin inhnuaiah ka chhuk a,kanu leh pa chu ngui nghiai hian an lo thu a,ka hmel an hmuh rual chuan an meng da va riai a,an tho nghal hluai bawk.Ka nu chuan min tlawn  tih hriat tak hian

"Bawihi,i tha em?engnge i an?" Chhan pawh chhang lovin an hmaah chuan ka ding a,ka thinlungah hian zawhna hlir a awm a,ka zawt seng kherlo ang,thinrimna hlirin ka khat bawk a,ka puakkeh lo choh ani.

"Nangni hian ka lakah zep innei emni?Hriatrenga hming ka sawilaia in awmdante,vawiin a kanu in Hriatrenga thlalak leh a thlanlung a hmuh a a hlauthawng hmel leh makti hmel te kha ka hai theiin in ring emni?Eng nge ka lakah nangni ho hian in zep? Hriatrenga hi in hretawh ani tiru? Thil zep ka duhlo,min hrilh rawh u" ka sawi zawng te chuan ka lungchhe luttuk chu ka tawng thei tawhlo a,chhuatah chuan ka thu ta nuaih a,ka mittui tla chu dan senrual pawh anilo.

Chutia an hmaa lungchhe vankaia an fanu tlusawp nuaih a awm hmuh chu hrehawm anti ve ni ngei tur ani.Ka pa chuan "Ka han hrilh ang che,mahse lo thu chho phawt teh " tiin thutthlengah chuan min thuttir a,tah chu insumin ka pa thusawi chu ka ngaithla ta ani.

"Kum 17 inih laia bus accident a i tel ve kha ila hria em?a thla tel tehmeuh nikhua i hriat mumalloh kha"

"Umm engtin nge ka theihnghilh theih ang?mahse engnge inzawmna a neih?"

"Ka sawi dawn alawm,accident i tawhlai khan inu nen hian kan rilru a hahin kan buai em em a,iu mama lah accident vang tho in kan lo chan tawh a,nang lehzel hi chu chan che kan hlau a,kan duhlo em em ani.Damdawiin ah thla chanve lai kan awmpui che a,khatihlai Khan tuna I thianpa Hriatrenga pawh hi alo kal ve thin a,school lama i thian anih ringin kan lo ngaina ve thei khawp mai.Alo kal apiang hian eitur emaw thil chi hrang hrang hi alo kensak thin che a,a fel khawp mai.Thla chanve ral hnuah thla chanve dang chu in lama enkawl turin kan hawnpui ta che a,in a kan haw hnuah pawh Hriatrenga chu alo la kal zantin a,zankhat erawh chu a lungngaih hmel em avangin inu hian a chhan alo zawt ta a.

Ani chuan " naktuk hian ka zirna chhunzawm turin Bangalore ah ka chhungten min tirhliam an tum a,mahse Mami hi ka ngaihtuah a, ka kalsan thei bawk silo,ka rilru hi a buai nuaih ani" tiin min hrilh a keini erawh chuan nangmah ngaihtuah lo tur leh a hma hun ngaihtuah zawk turin kan lo ti ve bawk ani.Khami zan kan In atanga a chhuak kha reiloteah kawngpuiah motor in tlangval a sut hlum  thu kan hre ta mai a!

Rang takin kan tlanchhuak vat a, streetlight bul maiah sawn a ruang chu zalhin mipui an lo pungkhawm chiam a,police te pawh kan ko a(chutih lai chuan kanu chu alo insut faih faiha)a ruang vuiliam naah pawh kan kal ve nghe nghe ani,hetianga i hmuh tur a minung ang mai a a rawn inlan pawh hi mak kan ti inu nen chuan"

"Kalo harhchhuah hnuah he thu hi engvanga min hrilhlo nge innih?"Ka tap leh pur tawh.

"Nikhua i hrelo rei em em a,ilo harhchhuah atanga kum chanve zet kha chu mu leh mal i neihloh kha i hrelo emni?chutiang thu rapthlak te chu kan hrilh ngam che i ring reng reng emni?"

Ka insumtheilo ka tap uar sauh sauh a.Ka rilruah thil pakhat alo lut,ka hrechhuak zawk mai.Hriatrenga Khan kan inbiak thin lai Khan "Tun atanga ni 10 hnuah chuan kan inhmu tawh lovang"ati anih kha.Kha thu a sawi hnuhnun ber atang Khan vawiin/zanin hi ni 10 na chiah chu ani.Tap hlawp hlawp chung chuan ka tho a,room ah ka tlanchho thuai a,tukverh ah dakin Hriatrenga chu hmuh tumin ka mit ka lenruai a,mahse ka hmu hauhlo.Min mangtha lovin a kal maithei lo ang.Pawnah chuan ruah chu sur nasa hle mahse Ka kal ngei angai.Rilru fim pawh pu hmanlo in pawnah ka tlanchhuak a,ka hnungah kanu leh pa te chuan nihliap nen min umzui bawk.

Ruahsur buan buan hnuaiah chuan damloh pawh pawisa lovin thlarau chu ka zawng ta anih chu.Âtna chikhat ani mai angem? Khang hun kan inzui ve thin lai zawng zawng a miin makti taka min lo en haw haw thinna chhan te kha ka hrefiah tawh asin.An hmuh ve loh vang choh che ani.Lo chhuak rawh min kalsan thei lovang" ti chungin a hmingpum te chuan ka ko lawm lawm a,ruahsur bengchheng nen ka au tuarh tuarh ani ber.Ka tlankual sek a,kiltin ka hrutkual a,a awm silo.Zandangah kha chuan ka koh kher ngailo in ilo kal thin ani lom ni?Tinge?Engvang nge ka koh che hian min chhan leh siloh?Chutiang a ka phekual sek chu kanu leh pate pawh chuan min hmu mahse min tihbuai an duhlo tih hriat takin kawngsirah dingin mittui tla zawih zawih hian min lo thlir reng a,an fanu hi a duh loh naah chuan tihluih ka harsat zia hrechiangtu ber chu anni hi anni.

Ka beidawng luttuk leh chau tawh luttuk chu ka ding khur ta hlawk hlawk ringawt a.Keima hriattawk lek hian "Hriatreng,lo chhuak hram rawh,mihring zingah khawsa in an tih ang apiang ti turin damhlen ve thei tawhlo mahla, ka hmangaih che,ka tan chuan nang tluka min tihlimtu leh hlu hi an awmlo,lo chhuak hram teh " Ka beiseina chu a bo tan der tawh.Rei ngial ka nghah leh hnu chuan ka beidawng ani,phurlo takin ka nu leh pa awmna lam pan chuan ka kal a,anni chuan an inkarah min kaltirin min kuahlum an tum nghal vat bawk.Kal tum a kan inherlai tak chuan hnunglam atang hian "Ti mai hian emni min kalsan dawn?Mangtha te chu ti ve phawt ila?" Hriatrenga aw ngei ani.Rang zet hian ka hawilet a,a ban phar chhuakin alo nui sang bawk.Rang zetin ka tlanlet a,ka va pawm nghal chawt a.Chutihlaia ka lawmna leh hlimna chuan a tawng sang khawp mai.

Rei zet kan inpawm vawng vawng hnu chuan kan hmel chu chiang takin kan in entawn a,ani chu a nui sak a.

"Tinge i tah a?"

"Itan ka tap alawm,ka ko vak vak che a,ilo kal har em nih kha"

A nui leh hak a,min kuah hle hle chung hian 

"I hnena ka sawi tawh ang khan engkim vang khan min ngaidam dawn nia,i thiante leh mi reng reng in keimah avanga makti taka an enzui leh an sawizui thinna che avang te khan.I hnenah khan thudik ka sawi anih chuan minung ka ni tawhlo tih hi ka hrilh ngei che angai dawn si a,min hlau anga ka kiangah i awm duh lovang tih ka hlau a,chu chu ka ngaingam silo ani"

"Eng ber maw thudik itih chu"

"Ka Hmangaih Che tih hi mawle.Accident i tawh hma atang daih tawh khan ka ngaihtuahna luahkhattu ilo ni tawh asin.Chuvangin ka thlah theilo che ani,kalsan che hi ka va hreh tak em"

"I kallo thei mai lom ni?khang thil ka tawn zawng zawng te kha chu engahmah ka ngailo,an hriat ve loh vang chauh ani,ka hmangaih che asin keipawh hian"

"Min mamawh hun apiangah min ko thin dawn nia aw, i kiangah ka awm zel ang,ka hmangaih che " chu thu a sawi zawh rual chuan thli chu na tak maiin a rawn thaw ta chiam mai a,kan inkuahna atang chuan ka tlahrang chiang hlemai.Thli thaw chu a nasa zel a,chutihlai vek chuan ka hma zawnah hian khawi atanga lo awm nge tih pawh ka hriatloh thil eng luttuk mai hian min rawn chhun a ,ka mitah tak a chhun avangin Hriatrenga pawh ka hmuthei tawhlo.Ka hriat leh chuan kanu leh pa ten ka ban tawn tawnah min lo kai a, "I lut tawh ang u,Hriatrenga chu a kal tawh" an tih ri hi ka hre leh a,chumi chin chu eng thildang mah ka hretawh lo a.Ka harh chhuah leh chuan khua alo var iarh tawh ani. 

Ka Hmangaih ber chu a kal ta! Zantin hian kawngpui lam hawi hmasa lo chuan ka muhil thei ngailo.Engmah awm tawh dawn lo mahse beiseina in ka la khat tlat si. Khang kan hun lo hmandun zawng zawng te kha ko kir thei ila chuAn e,ka chetkhalh awm si che a.Engvangin nge i damlai khan hetiang thil te hi kan lo tawn ve mailoh le? I hmangaihna khan ka mit a tih del sak a,i nihna hrelo in kalo hmangaih em em si che a,tlem a tlemah mite hmuhsit pawh ka hlawh phah lo choh a,mahse ka hmangaih tho che asin.Tin,i Hmangaihna vek khan i mit pawh a tih del sak che anih kha.Mitthi Khawvel atang minung khawvelah ilo kal a,ka kiangah hun i hmang a, ka rinhlelh loh nan che mihring damlai ang chiah a khawsak pawh i tum,ka hria lawm.A harsa ngawt ang i awmdan kha tiraw?

Ka inlet thawk a,ka mittui tlak chak avanga tling piau chu ka khap per ta sak a.

*****.    *******.     ******* **********