Pa Nghak-a!

                       KA ṬHENAWMPA!

                         By : Vanlalpeki Fanai 

Thingtlang khaw pakhat aṭang Aizawl khawpuiah, mi pheikhawk dawr lian ve tak mai nghah hlawh turin ka chhukthla ve rawih a, mi lehkhazir sang ka nih lemloh avang leh lehkhazir hi ka chemkalna lam anih bawk loh avangin zirna ka chawlhsan hma hle a, hnathawh ka thlang ta zawk a ni ber ang chu. Aizawl veng pakhat, tlem a daifem deuh ah hian in mal din, chhungkaw hnih luahtheih tur a pindan hnih an siam ni si ah hian a kaw lehlam zawk chu luahlut ve in, tunah hian thla khat em pawh ka la khawsa lo ania. Tin, ka in luah lehlam zawk chu pa upa pakhat lam hian luah ve thung in, ani hi chu kei aia lo awm hmasa daih tawh kha a ni a, a tlangnel tawh viau pawhin ka ring e. A hming pawh Lalramnghaka niin, Pa Nghak kanti mai ṭhin a, ka pa te rual daih tur hi a ni ve tawh hrim hrim bawk. A sawidan chuan Kulikawn lamah sawn sam mehna dawr neiin, chu chu a sum lakluhna ber pawh anih hmel bawk.  Han let leh lawk ila, kan awmna hmun hi a fianrial tih dawn a ṭhenawm te chu nei ve tho si, mahse, ṭhenawm inkarhlat taktak a awm hi kan ni hlawm a, a reh ṭhin viau. Ka dawr nghahna hmun pan tur ringawt pawh hian bus stand awmna pawh pan vang vang tham ala ni a, mahse le, vanneihthlak tak a ka pa in scooty min neihsak ve chinah erawh chet vel a awlsam phah ta phian mai. Tin, he in hi in dang ṭha zawk ka hmuh hma chu ti a luah lut ve mai kha ka ni a, ka awmna la reilo hle mahse, ka tlangnel ve ṭan tawh phian.

"Kimte, i chenna in pawh rawn hmuhpui che ka duh viau na in, i awmna lai vel i sawi kha ava hla tham reuh lutuk a, haw leh dan tur mawlh hi ni ka huphurh ṭhin"

Dawr a ka thawhpui leh ka ṭhian lo ni ta, Tlanengi chuan rawn ti bai bai in, a hmel ka va en a, ka nui ta ringawt. Diktak chuan ka chenna hmun hi hla tham deuh lo se zawng, ani hi chu a hunawl apiang deuhthaw a rawn leng lut duh tur chi kha niin ka hria a, nitin deuhthaw hian rawn kal a chak zia thu pawh hi a sawi fo mai.

"Aw, i haw lo anga, chaw te eiin zan i riak nghal mai dawn alawm. Emaw, ka thlah leh mai che anga scooty pawh awm tho a" katih erawh chuan riah em chu tihchi a tihloh bakah thlah tehreng pawh ni ila, ka haw lehna tur kha min ngaihtuahpui ve leh tho si a. Ho viau angin lang mahse, keini pahnih tan erawh buaina tham tak chu a ni lawi si.

Dawr hi kan hawng rei ṭhin a, in ka thlen ve meuh hi chuan khua pawh alo thim chhulh tawh zel. 

Hemi zan pawh hian dar 6 rik dawn ah in ka thleng chauh a, ṭhenawmpa in zawn ka thlen lai hian ani chu alo reh ṭhiap a, a thim deuh khap bawk niin ka hria. Ala haw biklo ni turah ka ngai ve mai. Ka inah chuan lut thuaiin ka intihfai chhung a lo hmin hman tur hian dal ka chhum hâng leh te te phawt a, ka inbualsan ta a ni. Chutia, zai rât rât pah a kalo inbual sawr sawr lai chuan ṭhenawmpa inchhung aṭanga thawm ri deuh ṭhuai lo chhuak chu ka hre ta mai a. Ka zai lai tawp chawt khawpin thawm chu ka han ngaithla chiang leh a, a reh zui leh daih lawi si. Pa Nghaka chu alo haw tawh emni ti dawn ila, a kawngka hawng thawm takngial pawh kha ka hre hmasa bawk silo. Kan in hi thingphel hmanga daidan mai mai kha anih avangin thawm chhete pawhnise inhriatpawh hi a awlsam em em a, tin, khatiang khawp a lian, thawm han siam thei tur chi ui emaw, zawhte tih vel pawh a vulh awm hi ka hre bawk silo, mak ka ti ru angreng hle.

"Pa Nghak!" 

Ka inbual zawh hnuin ring angreng tak chuan ka han ko ta lauh lauh a. Mahse, min chhangtu reng reng an awmlo thung. A la haw ve lo anih dawn hi ti rilru neuh neuhin chaw ka chhuang leh a, a hma lawk a ka thawm hriat kha chu ngaihtuah chhuah nachang pawh ka hre leh tawhlo zawk. Ngaihṭha tak hian ka awmzui leh mai a. Phone te khawihin ka zai pah rut rut reng a, karlovah zanriah ei pawh ka hman ta mai e. Chutia, zanriah ei tum a kalo inpuahchah vel lai tak chuan ṭhenawmpa thawm hria in a faifuk rût rût ri te pawh ka hre ve ta. Reiloah ka hming ngei chuan min rawn ko ta chiah bawk a, hei hi chu kan tlai tin tihdan kha a ni ve reng reng a ni. 

"Zanin chu iva haw tlai em Pa Nghak"

"Nia mawle, ka hna ka laklawh deuh atin ni. Chaw i eitawh em?"

"Ei kalo tum chiah a, rawn kil ve nghal ta mai che"  ka tih chuan nui ri deuh hak in

"Ee ka la ṭam chhelo e, tui deuh khan han ei tawh. Hei, ka tlai a leiah zanin chu chawhmeh han suah hman che pawh in ka khawsa ta lo anih hi. A zialo mange aw" a rawn ti leh bul bul. Kei erawh kalo kiai sak ringawt. Zandang ah chuan ka haw khalh ngai meuh loh avang hian chawhmeh pakhat tal min rawn suah ziah ṭhin a, a nuam tihzawng tak pawh niin ka hria. Tichuan,  Pawi katih loh thu a chhanna ka pek leh hnuin chaw chu ka ei zui a, ka puar em em lehnghal.

Zanriah ka eikham awm vel aṭang hian Pa Nghaka chu a thawm a reh leh daih tawh ṭhin a, a chaw eitur thawm emaw, a che vel hrim hrim thawm riva pawh hi hriattur a awm vak tawh ngailo. Engemaw chang chuan keipawh hian mak ka ti ru viau ṭhin a, mahse, a reh em mai tiin han bia ila, mi chu a rawn chhang let rang thei fu thung. Hriatthiam harsa ṭhin tak pawh a ni awm e. Tin, amah hrim hrim hi pa ṭawng duh tak kha a ni hranpa lova, a kawm nuam tawk leka ṭawng duh ve pangngai niin, ka tan a awm hrehawm tur leh nuam lo thei tur ṭawngkam han phuhchhuah emaw, chetzia pawhnise engmah hi tihlan a nei ngai hauhlo a, amah hi ka sawitawh ang khan ka pa te rual daih tur a ni bawk a,a nungchang vang hian kei chuan kalo ngaina ru ve in, ka pa ang deuh ah ka chan a, ka duhsak em em bawk.  Han sawi kai ta zel ila, ama sawi dan chuan Lunglei lam mi niin thingtlang khua aṭanga lo kal ve tho a ni bawk a. A nupui fanaute hian motor accident vangin a rual a an boralsan tawh thu pawh a sawi ve kauh kauh ṭhin a, kalo lainat ve thei khawp mai. Tichuan, an khaw hlui, a nupui fanaute nen a an khawsakna ṭhin hmunah chuan awm pawh awmzui ngam tawhlo in leh an sulhnu hmuh fo mai te pawh chu hrehawm a tih ṭhin em avang in tihian Aizawlah a eizawnna sam meh aṭanga bulṭan ṭha leh turin a rawn pemlut ve rawih mai hi a ni awm a. A ruk tak a ka thinlung a khawih ve em avang hian a khat tawkin chawhmeh leh eng ilo, a mamawh tur ang ni a ka rin man to silo te chu ka hawnsak ve fo bawk. A ṭhenawmah hian ka awmna thla khat em pawh la tling ve lo mahse, ka mi ngainat zawng tak alo anih vanh hian kan inpawh nghalin kan inngaina hma hle. Ani pawh hian a fanu ang chiah in min en tih ka hria a, a thlamuan phah hmel viau. 

Zan dar 9 a ri chho a, Pa Nghaka pawh a muhil leh tawh a ni ngei ang, a reh ṭha tawh angreng viau. Mahse, a reh viau e ka tih lai chuan thawm ka hre leh ta tlat. Nui ri kur kur thawm ngei chu! Dar 8 leh a chanve khan ani Pa Nghaka khan a mut tawh dawn thu min hrilh a ni si a, mahse tun a nui thawm hi a chenna inchhung ngei aṭang alo chhuak leh bawk si. Mak katih deuh hlek avang chuan ngaihṭha vak lo hian ka va ko leh ta ngawt. Mahse, min chhang si lo hian a nui kur kur reng thung a, a phone bia in a ṭhiante emaw a chhungte a be ve pawh a ni mahna, han tih dawn pawhin a ṭawng lai reng ka hre lej silo. A mak pawh ka ti hle. Mahse, ngaihṭha vaklo a thawm ka ngaihthlak hnu darkar chanve tehmeuh a ral ang tih ah chuan thawm danglam engmah hriatzui tur awmlo hian a reh ta dûk a. Tichuan, keipawh ngaihṭha fahran lovin muthilh tum chuan ka inlet zui thak a, hriatloh karin kalo muhil ve ta mai bawk. 

Khua a lo var a, ṭhenawmpa thawm pawh ka hre ve leh tawh. A khuh khak khak reng a, hritlang a kai ta emaw kati hman viau dawn a, zial zu mi kha a ni ve hrim hrim a, a nihdan tur ve rengah ka ngai leh mai.

"Pa Nghak, nizan kha phone i hmang nge ni, i mengrei riau in ka hria a" ka va tih lai chuan a khuh chu tawp zuiin a thawm pawh a reh ta hmiah. Mahse, min chhang tawh dawn lo emaw ka tih hnuah rawn ṭawng chhuak leh in ka phu zawk thei nia.

"Zanriah eikham hnu, dar 8 velah khan ka mu zui daih a, chubakah, ka phone hi a chhia a, a khawharthlak ṭhin khawp mai" a rawn tih takah chuan ka ding chawt. Mak kati ngei mai. Zanah khan a nui kur kur ri kha ka hrechiang hle si a, a mak tih bak chu han sawi mai dan tur pawh hi ka hre ta lo a ni ber.

Dawr ka thlen hnuah pawh zan hmasa lama ka thawm hriat ringawt chuan ka rilru luah zuiin, ka awm a nuam thei der lo mai a. Chu ka inluah ah chuan thilmak danglam a thleng ta nge, tunhma aṭang alo thleng daih tawh ṭhin zawk ni ang tihte thleng mai chuan ka ngaihtuah ta hrep a, chu erawh, thil ni turin ka ngaingam chiah bik silo. Thla 1 em pawh la cheng velo mahila, thla chanve chuang lo khawsa ve tawh ka nihna ah eng thawm mak leh danglam mah hi ka hrengai silo a, rilru chu a kal thui duh ve khawp mai. Mahse le, eng em a nilo turah ngai phawt ang tiin ka inhnem leh ta zawk a, awm a nuam zui ta deuh.

Hna ban hnua ka han haw leh te pawh chu tlemin tim deuhna hi ka nei ve bawk nen, Pa Nghaka lah alo la inkalh ṭhap bawk si. Khua a thim ruai tawh a, a nuam lo duh ve reng. Mahse, vanneihthlak tak hian kan ṭhenawm hnai ve ber a awm, Pi Tluangtei chawhmeh zuar  chu a rawn chawlh kawi tak hlauh avang in tlemin awm a nuam ta chauh a, alo ṭawngduh vei phian bawk nen, khawhar chu hnem ve tak a ni e

"Kimte, i ṭhenawmpa zin hi alo la haw miahlo emni?" A rawn tih chuan ka hawi phawk hman viau. Ni e, a tira sawi awm tak kha kalo sawi hmaih a ni. Pa Nghaka hi helaia chawlhkar khat leh tlem ka awm hnu lawk khan an khaw lamah an in leh lo vel han tlawh pah tiin a zin kha a ni a,  mahse, chawlhkar khat em pawh a thang lo tih ah lo let leh in tihian ala awm zui char char a ni si a, chutihrualin anni ho hi chuan lo hre ve kher lo mahse, a awm ka ti tho. Kan inṭhenawm dan hi a hnaivai hranlo em atin ni.

"Chawlhkar khat awrh ava thang tih ah alo let leh daih alawm" ka tih chuan Pi Tluangtei pawj lo kiai ve sukin a tho zui ta ṭaih ṭaih a, a chawhmeh phurhna êm chu chawikang leh in

"Aw anih chu mawle, kan lo hre tawh renh reng hleinem. Khawnge, khua a tlai tawh si a, ka'n phei phawt ange, chaw eitui, muttui le" ti leh sawk sawk in min chhuahsan zui a. Engpawhnise, Pa Nghaka khawlai chhuak te hi an lo hmu ve ṭhin lo em ni aw ka ti ru neuh neuh, mak ṭhin khawp mai. 

Pa Nghaka siamkep pah tiin ka rawtuai bai pawh chu ka duham angreng hle a, ka siam uluk viau bawk. Mahse, zan dar 7 a rik tawh pawh chuan ṭhenawmpa thawm chu ala reh hmiah mai a, a laklawh aniang e tiin chaw chu ka eisan leh a, ka insengfel a ka ṭhut hman ve meuh chuan dar 8 alo ri thuak tawh. 

Chutah pawh, ṭhenawmpa thawm riva reng reng hriattur ala awm lo cheu nia. Chanchin ngaihven a han zawt vel tur pawhin a phone chhiat thu kha a sawi si a. A buaithlak hle a ni. Mahse, patling a ni ve a, ṭhian leh chhungkhat laina hnaite bulah zanriah te chu a ei ve daih thei tho alawm te ka ti leh hnuhnawh. Amaherawh chu, ka awm a nuam thei chuang reng reng lo a, kan awmna fal ve deuh bawk nen hian khua a har duhin a nuam lo pah ve reng. Tichuan, awm nawm nan leh chhuanlam ah tiin ka bialpa, kan khua ami ngei Rinnunga chu ka han call ta ngawt. 

Rinnunga nen hian kum 2 chuang inzui ve tawh in kan la nghet ṭha angreng phian a, karah buaina neuh neuh te chu awm ve ṭhin mahsela, kan chingfel leh zung zung mai ṭhin. Ka hmangaih ang chiah hian ani pawhin min hmangaih ve tih ka chianga ,ka nat chang pawhin hrehawm alo ti a, chutiang chiah chuan keipawh ka ni ve tho. Hetia Aizawl ka han awmsan daih pawh hi a tirah chuan a remti lo hle in ka hria a, mahse, a tilang tehchiam hran lo. Mi rilru puitling tak anih avang hian a ngaihdan nilo deuh thilthleng ah pawh engmah a tilang ve chiam ngai lova, min dawm thiam in ka duhdan a zah thiam em em. Heng te hian amah ka duhna chu a tizual hle ṭhin te pawh kan ti thei ang chu. 

Zan mut harsat ṭhin tih takah dar 11 velah pawh chuan earphone vuah in youtube channel te chu ka la thlir kual vel mai mai a, mahse, dar 12 a rawn rik meuh chuan mutchhuak in min rawn zem ṭan ve a, ka ham ta bai bai. Ka earphone hlip a muthilh mai ka han tum chu thawm bawk ka hre leh ta. Engdang a nilo, patling aw thum chher chhur, ṭawng bul bul thawm ngei hi niin ka hria. Ka hawi phawk nghal hrû a, ka khur ru leh ta der der mai le. Tu ṭawng ri nge, eng thu nge a sawi tih te chu hre hauhlo mahila, ṭhenawm Pa Nghaka inchhung aṭang ngei thawm lo chhuak niin ka hria a, mak pawh kati viau. Sana ka han bih vat a, zanlai dar 12 alo pel vû vû tawh bawk si. Tun ang hunah hian ṭhenawmpa chu alo haw ve chauh tihna nge ni anga, mi biak a nei zawk ni ang. Mahse, mi biak chu lo nei ta pawhnise, a lehlam ṭawng ri hriattur a awm miah silo lai chuan min tibuai a ni. Ngawi reng hian a phun bul bul ri chu ka ngaithla ta reng a, a thusawi pakhatmah ka hrethei ikhaw lo. Heti khawp a inhnaihchilh si, engtinnge a  thusawi pakhat tal pawh chu a hriatchian theihloh tih hi ngaihtuah tham tak a ni. Ka tiril ah mi ṭham in, ka hlau ru ta kher. Ngam leh ngamlo hian ka khum bul mai a tukverh chu thawmdim takin ka han hawng chhin a, a in lam ka thlek chuan ka va dak chhuak ta ngawt. A tukverh lah chu lo inhawng huai in, a parda zar pan tak mai pawh chu alo in chhem phe hlap hlap ṭhin a, amah lah ala phun bul bul reng mai si nen, ka rap tawh viau. Mahse, ring lutuk lo a ka han koh takah chuan thawm pawh chu reh zui leh hmiah in, thereng vuak thlak ang hlauh hi a ni ta mai e. Chutiang anih tak si ah chuan keipawhin au zui duh tawh biklo in muthilhsan ka tum a, tin, Pa Nghaka kha a ṭawngvai ni turah ka puhthlu hmiah bawk. Tichuan, ngaih ti ṭha chawp chung leh harsa ti fe chung chuan ka lo muhil veleh ta a ni. 

Khawvar hnuah Pa Nghaka chu thil awmzia te sawiin ka han zawt zui leh a. Mahse, a bo hmel angreng khawp mai. Kei ai mahin ka zawhna te kha alo hriatthiam loh hmel zawk a,a awki aṭang ngawt pawh a bangbo tih chu a hriat theih. Thil in zawh chi a ni em tih hrelo mahila, zan lama a haw har em em nachhan te ka han zawh leh erawh chuan kalo rinlawk ang chiah in a ṭhiante nen zanriah an kilho thu leh an inhmuhkhawm thu chu min hrilh ta nge nge a nih kha. Engpawhnise, keimah hian ngaihṭhat lohna tur ka zawng ve hrim hrim nge ni a, ngaihṭhat lohna tur thil hi a awm zawk tih pawh ka hre ta niaih love. Ka thil hriat ang ang te ka chhungte hnena ka han thlen ve nak chuan, insawnchhuak mai tur leh inluah tur dang remchang ka hriatloh pawh a chhungte leh midang bel zawk mai turin min rawn ti ta chul a, an ngaihdan ah chuan thil awm lo em em pawh niin ka hre hran lo. Nia, nula ve mai ka la ni a, chutah, aizawl veng daifem takah inluah ve in thawm mak tak tak te ka la hre ṭhin zui. Chumai pawh ala nilo, ṭhenawm hnaiber atan patling ṭhankin uaih tawh, parawl lehnghal ka la nei lehzel a. Hei hi an hriat hlim pawh khan tute mahin min duhpui biklo hle a, mahse, amah Pa Nghaka hi ṭhenawm hnaivai deuh ten a sual loh thu leh pa ṭha tak a nih thu te, chutianga hmeichhe chunga han chemawi lo duh tur chi kha a nih loh zia thlengin an sawi nual a, chumi anih avang chuan keini lam pawh kan ngaih kha a ṭha chawp veleh ta chauh zawk a ni. 

Tlai khat erawh chu in ka thlen khalh lo ve leh hlauh mai. Inchhung ka lut tih a hriat rual hian a zai rut rut thawm kha a reh hmak a, a che vel thawm pawh hriatzui tur a awmlo nghal. Mahse, chutiangin kei chuan ka ngai thutak in ka va ngaihtuah zui em em hran lo thung. Room chhete ka neih ve ah chuan lut zuiin ka inthlak a, ka room hi puan pan te zar hliah mai chauh a ni a, ka inchhung thil te pawh a hmuh tlang theih riai ruai bawk. Chutia ka inthlak, room aṭanga ka chhuak leh chiah chu, ka kawngka zawnah tak Pa Nghaka kha ngawi reng leh rum em em a meng chung hian alo ding run mai a, chiang zet hian min lo la en kur zui! Ka phu zuang dawrh a, ka sa nghal pup pup thei bawk. Mahse, amah Pa Nghaka ani tih ka hriat leh mai avang chuan ka han thaw deuh huai phawt a.

"Awi! Lal Pa Nghak, min va han tiphu  nasa em em ve!" Ka tjh chuan ngawi rengin a rawn lut a , a kut a a ken plate chu dawhkanah dah leh maiin ngawi reng bawk chuan a  chhuak leh ta ringawt. A awmdan danglam ta lutuk chu hrilhhaih zet hian kalo thlir reng ringawt a, sawitur reng hi ka hrelo a ni ber.

Khua a rawn thim zui a, a inchhungah chuan thawm nei reng mahse, min biak a tum ta hauhlo nia. Ka va biak ve lahin min chhan chu sawiloh, ka biakna te kha han hria ang pawh hian a awm leh der lo mai a, thawm erawh a nei chhunzawm reng tho si. Hriatthiam harsa ka ti hlemai. Tin, hetihlai vek hian hlauh lamah pawh kallo in, mak tih lamah a kal zawk mah bawk. 

Zan mut hnu thleng pawhin ṭhenawmpa chu ala ri ve rak rak reng a, ka be zui tawh lem lo thung. Hemi zan hian kei thung chu ka meng hleithei der lo mai a, a zawn a zan tam kalo tlaivar titih ṭhin vang pawh a ni ngei ang. Dar 10 velah mutchhuak in min rawn zem chiai chiai in kalo muhil ta niin ka hria. Chutia, ka mu tui lai chu kut niawm tak hian ka malah min rawn kheuh zeuh angin ka hre ta tlat pek a, ka harh zawk thei nghe nghe. Thinphu dup dup in ka hawi zui ruai a, mahse, eng thil mah chu ka hmu zui leh ta chuang lo. Eng thilmah hmuh leh hriatzui tur awm ta lo chu, ka taksa chak loh vangah puhthlu in muthilh leh mai ka han tum a, mahse, ka hnungzangah hian chiang takin a rawn kheuh leh ta zeuh mai le. Phu dawrh chung hian min rawn kheuhna lam hawiin ka inlet vat a, khai! Ka khum bul maiah chuan mihring ruangam niawm tak ding chunga mjn rawn bih kur tu hi ka va hmu ta anih kha! Mutnaah hian dim light ka chhit ṭhin avangin tunge a nih a, eng hmel pu nge tjh erawh chu chiang takin ka va hmu theilo thung. Hlau lutuk a tho chhuak in, bangkil lamah ka tawlh lut nghal rawk rawk bawk. Chutihlai te pawh chuan che miah lo hian ani chu ala ding reng mai a, min la thlir reng nimai hian ka hria.

"Tunge inih. Eng thil nge i duh a?" Khur hlak hlak pah a ka tih lai te pawh chuan a che eihlo nia! Diktak a sawi chuan ka khum bul a ding reng hi mihring niin, min rawk emaw keimah min tihnat tum, misual ni turah ka ngai a. Khatia ṭawngkam ka neih leh thawm ka chhuah tawh ber te chuan min kalsan mai lo anih pawhin min rawn bawh nghal rum rum kha ka ring zawk. Mahse, a che miahlo tlat. Anih chuan he mi hi, rilru lama mi pangngai pha chiahlo tihna emni ang? Hriatthiam a har mange. 

"Kimte, eng thil nge ni ta?" Rawn ti tu avang chuan ka phut belh leh zawk a, mahse, ṭhenawmpa aw a ni tih ka hriat leh hnuah erawh thaw huai chung hian tukverh chu ka hawng zui ta rawk rawk. Chutia tukverh ka hawng, ka va hawi let leh chuan kha mihring niawm tak ruangam kha hmuh tur alo awm ta hauhlo a! Ka hawihai angreng hle. Tin, Pa Nghaka min biakna pawh kha chhan let mai nachang ka hretawh heklo. Ka inchhung khawilaiah emaw alo biru reng em tih hriat chu ka tih makmawh anih angin hreh tak leh thawmdim thei ang ber chuan khum aṭang ka tawlhthla ta zal zal a. Room parda ka zarna bul maia switch chu on leh in, eng hnuaiah chuan hrilhhai tak hian ka hawi zui ta vual vual. Eng thil mah hmuh ka nei ta lo bawk. Ka in hi a zau lem lo a, chutianga han bihruk kuam theihna tur room dang lah a awm heklo. Mahse, ngaihtuah leh in, huaisen ka chhuah a, bathroom lam chu chemte nen ka pan phei ta vat. Chutah pawh chuan tu mihring mah an awm lova, han luh ruk theihna tur zawhte leng takngial pawh hi a awm bawk silo. Ka kawngkapui nise, a inkhat ṭha thlap a, thilmak tak a ni tihloh rual a nilo. Tin, Pa Nghaka pawh kha ka chhanlet loh tak vang a ni ngei ang a thawm a reh zui leh daih a, a muhil leh tawh pawh a ni maithei. Tichuan, engmah han hmuhzui tur nei tawh heklo, hreh zet leh ṭi ru zet chung chuan khumah ka lawn leh a, muttheihloh chhuanlam ah tiin Rinnunga ka han call harh ta ngawt. Varṭian thleng a inbia in, eng thil danglam mah ka hmu zui leh ta lo bawk a. Ka hahdam ta deuh. 

Mutmu tuah ṭha lo tihtakah, dawrah pawh ka zawi nileng ṭhak hi a ni mai a. Hmai a uang theilo hle. Chutih mek laiin In lama han haw leh pawh ka hrehtawh ngiang a, mahse, nula pumpa, mahni in a han haw ngamloh ngawt mai lah kha thil zahthlak ah ka ngai ve tumhrang bawk nen, ka ṭhiante bulah pawh chuan ka sawichhuak duh ta lemlo . 

Vanneihthlak takin hemi ni hi inrinni a ni hlauh a, tlaiah ka ṭhiannu Tlanengi chuan zanriak nghal turin min zui haw thei dawn bawk. Ava lawmawm tak. 

"Sunday inkhawm te i duh dawn lo emni?" Tia ka zawhna chu Tlanengi chuan

"Ka chak hran love. Kohhran huang chhunga ka teiluh lohna chin hi a rei ve tawh khawp mai. Diktak chuan, KṬP ah te pawh han active ve chu chak ṭhin mahila e, hruaitute ho hian min ti phur zo thlawt lo a ni. An inkawm khawm ang let let a, an kal hrang ang pet pet a, duh hun hunah min hmelhriatloh kal pelh ang ngawk ngawk bawk a, ka thei ve lo" ti hmarh hmarh in kei erawh kalo nui vur vur thung a.

"Chutiang te chu ngai pawimawh duh mah ta che. Anni mihring ve mai mai vanga Pathian fak tur leh inhmang tur ini lo tih kha hrereng zawk la" ka'n ti leh chu, a hma aia ring leh pawr zawk hian

"A dik alawm. Mahse e ṭhiannu, mihring khawvelah kan la cheng miau si a, mihring ang zawng hian a in en loh theih ṭhin silo a ni" a rawn ti leh nghek. Dik pawh kalo ti viau ta mai. A sawi ang khan, mi te ber leh hnuaihnung ber fa te pawhin a bik in KṬP  ah te han inhman ve hi a ruk tak chuan an chak in an duh ve reng, mahse, Pathian mi thlan pawh nilo, mihringin hruaitu kan thlan chhuah te hian engatinge member hnuh hnaih aia dah hlat hi kan thiam em em zawk aw ka ti ve ṭhin. Nihna chhete leh tihtur in bituk sak ngawt hi thil ṭha ti ah in ngai lo hram se, ṭhian anga kawmngaih tum leh tih tlangnel dan hram zawn hi kan tihtur niin ka hre ve tlat. Ruihhlo ngai te ah chauh nilo, mi pangngai taktak kan tihte zingaj ngei pawh hian ṭhalai pawl a active peihlo, pawnlam a sual rawngbawl tura vak chhuak ta kan tam phah hle anih hi. An chenna hmun a va kalchilh a, va ṭawngṭaisak leh ringawt hian eng kawngro nge a sut le? In zawt teh u. Tin, hruaitute kan intihkhawm let let a, thlei bik leh enhran bik, hlauhtlawn bik chen a kan la neih chhung zawng chuan ṭhalai lo awm lehzel turte chen hian ṭhalai pawl  a inhmang hreh hi kan la pung tual tual anga, kan kiam zel ang tih pawh ka sawi ngam sak. Mihring aṭang hi chuan kan in teh tling ngai dawn lova, chuvang chuan, piantharna chang taktak hruaitu kan thlang chhuak theilo anih pawhin mirethei te hmangai a, ngaihsak tu leh dawmkan duhtu, thleibik nei ve ngailo mihring mi ṭha tal hi chu i thlang chhuak thiam ve hram tawh teh ang u. 

Khawthim rual deuhthaw hian ka chenna hmun chu kan thleng thei ve hram a, ṭhenawmpa pawh alo haw leh der tawh mai. Kan thawm a hriat rual in a rawn au nghal chel chul bawk a, chawhmeh min siamkep thu te pawh a sawi luam. Kei kalo nuih kar kar laiin ka ṭhiannu erawh chu chair ah ṭhu chung in ṭit hmel zet hian alo hawi kual hruk hruk thung a, maktih hmel takin min en leh veng veng ṭhin bawk. Tin, ani hi zan lama ka thil tawn leh thawm hriat ṭhin te kha vawikhatmah ka la hrilh ve ngailo a ni a, chutia engamah hmaa a han awm ringawt mai pawh chu mak kalo ti lehpek viau. Mahse, ka awmna hi sawi fo tawh ang khan a fal ve riau a, mi huaisen vak lo tan phei chuan nuam han tihtur em em hmun kha a ni lo ve bawk a ni. 

"Ṭhenawmpa itih chu kum engzah bawr vel nge ni ang?" Zawi ser sawr taka a rawn tihtakah chuan kei lahin uangthuang deuh reuh a lo chhang liam ve puat in

"I fin tehlul nen, a aw phawi aṭang te khan i hrethiam thei ruak lo emni? " kalo ti duh chauh a.

"Engmah ka hrethiam theilo"  ti hmuk in a hmel lah chu ala thutak ngel ngawl viau lehnghal a, inbual harh tura ka tih hnuin bathroom ah a lut zui leh a, a che reng reng chu a ṭi tlat nimai hian ka hria. A ngaihna tak pawh ka hrebik ta love.

Rawngbawl kan ṭan zui mawlh mawlh a, Pa Nghaka pawh faifuk hlarh hlarh chung hian a ri ve khut khut reng mai. Chutia titi pah chung zela chawhmeh kan siam mawlh mawlh lai chuan Pa Nghaka inchhung aṭang ngei thil ri bur hi kan hre leh ta a, ka hriatdan berah chuan na taka chhuat a tlu dup thawm hi ni berin ka hria. Tlangengi nen chuan in melh nghal hrek hrek in kan mitmeng aṭang pawh kan hlauthawng hle tih chu a hriat theih. Kei chuan Pa Nghaka chu au zui nghal chulin a ṭhat leh ṭhat loh ka han zawt zui a. Min chhang lo hian a reh leh ta vung vung. Thawm chu a reh rei tak deuh avangin Tlanengi ngaihṭha lo pawh chuan phun ser ser pah hian

"Eng nge thil awmzia, va ngaihven chhin teh" a rawn tih tak avang chuan ka ṭhutna thawhsan a kal mai ka han tum a, mahse, chutihlai tak chuan lehlam aṭang Pa Nghaka aw ngei chu ka hre leh ta.

"Chu sazu phiangsen chu le!" Ti bul bulin a rawn nui chhuak ta huk huk. Keichu kalo thaw zui thei.

Muthmunah chuan phone khawih pahin thil chi hrang hrang kan sawikual leh duah a, zan a rei ta deuh maw tih ah kan muhil dun ve ta hram. Hemi zan hi chuan vanneihthlak takin eng thawm mah ka hrelo a, hmuh lah ka nei heklo. Ka lawm viau nghe nghe. Tin, ṭhiannu Tlanengi mawlh hian a hre ve ang tih kha ka hlauh ber a ni a, han hre ve na se zawng, keimah min hmuhdan thleng khan a danglam dawrh thei tlat. Mahse, zing ka han ṭhanharh ve meuh chuan ani chu lo tho chhuak daih tawhin nî pawh alo tlangsang fu tawh. Room ka chhuahsuan rual chiah chuan pawn aṭang hian a rawn au lut ve lawng lawng a, phak zetin kalo melh reng ringawt.

"I ṭhenawmpa chu zing zingah khawnge a lenbo ṭhin a. Chawlhni ah lehnghal" a rawn tih chuan ka lo bangbo deuh. Chawlhni tuk dangah chuan thawm a nei ziah si a, a awmzia ka hre ta bik hauhlo mai.

"Ka va hremai biklo ve. Tûk dangah te chuan a awm ziah asin. Khawiah emaw a kal lawk te pawh a ni ang"

"Ka thawhna a rei lutuk tawh. Pawnah ka teihawi char char a, mahse, a kawngka saw  tala nen a inkalh reng tho mawle. In dangah a riak zawk te hi a ni mai lo maw?" A rawn tih leh chuan ka meng phawk ta deuh. 

"Chutin, zan hi a riakbo maimai ngailo asin" tih pah a ka va chhuak chu, ṭhenawmpa in chu tala nen hian alo inkalh thlap mai nia. Tlem chuan mak ka ti ve deuh. Amaherawhchu, ngaih han tih ṭhat loh viau na tur thil erawh awm in ka hrelo lemlo a, a leng bo ve satliah ah ka ngai mai. Ka ṭhiannu hi zawng, kei ai maha hlauthawng leh chi ai hma chi kha a ni ve hrim hrim a, ka hrethiam tho e. 

Tukṭhuan kan eikham a, tihtur em em nei tawh heklo, kan pahnih chauh chuan kan in card den ta ringawt. Kan in leh a vel chu a reh ṭha ṭhin bawk a, kan thawm pawh a na dun hle. Thawmdim vak kha ṭul miau heklo i. Chutia kan lo rik dun ham ham lai chuan thilmak tak ka hre leh ta. Thilmak han ti ila, keimah min ko thawm a ni zawk mah ang chu. Mipa aw ngei hi a ni bawkin ka hre leh ta nghal a, Tlanengi chuan min rawn melh zawk pah hian

"Chu, an koh che chu. I chhuak dawn lo emni?" A rawn ti sup a, kalo meng nur zui nghal hle. Chutianga min rawn ko fak fak thei tur mipa lehnghal, henglai hnaiah hmelhriat ka neih awm pawh ka hrelo a. Pa Nghaka kha chu a ni dawn der bawk silo. Lu thing nar nar chung hian

"I beng chhe ri mai mai aniang. Deng tawh rawh" ka ti zui nghut. Tichuan, engmah pawh sawizui  tawhlo in kan deng chhunzawm leh mawlh mawlh a, mahse, rei pawh a riallo ang tihtur ah hian min ko ri bawk chu kan hre leh ta mai. Rang zet hian khum aṭang chuan ka chhukthla sawk sawk in, pawn a ka va chhuak chu boruak alo reh duk bakah, nî lah kha a han sa ṭha em em khawp a, men pawh harsa zawk tak a ni. Kan chhak daih motor kawngpui aṭanga min rawn ko thawm kha lo chhuak ni a ka hriat tlat avangin chulam en chuan ka dak chho ta vung vung. Tlanengi pawh chu lo chhuak ve thuaiin a rawn hawikual ve nasa fe mai a, mahse, mihring hmuh tur reng reng an awmloh avang chuan kan han in en leh ringawt ṭhin. Min rawn melh pah a mitko san ak chung hian

"Mipa mawl deuh deuh hmelhriat lah hi i nei thei a, a buaithlak " ti hmukin inchhungah min luhsan leh ta daih. Kei thung chu ka ngaih kha a ṭha thei tawh hauhlo. Khatianga min rawn ko lauh lauh ngam tur mipa hmelhriat Pa Nghaka tihloh chu ka nei lo hrim hrim he Aizawl khawpuiah hian. Chumi anih vang erawh in chu thil chu thilmak leh hlauhawm angah kan puhthlu ngawt thei chuang hauh lovang. Tichuan, pawnah reife chu ding zuiin , inchhung ka han lut leh chu Tlangengi kha alo ding khur nasa mai hi niin! Chumai pawh ala nilo, Pa Nghaka nen kan indaidanna bang lam hawi chuan alo ding khawng reng nia. A chhan hriat tum a ka va pan hnai, a dar ka han khawih chiah chu, rawn phu phar awk in mitmeng vai ruai hian min rawn melh ta ngawt ngawt. Ala khur der der reng bawk nen a awmdan chuan ka ngaih ati ṭha ta hauhlo mai. A dar a sawi deuh nawk nawk pah hian

"Tlani, hei, eng nge thil awmzia hi? Engvangin nge hetiang hian i awm a? Sawi teh"  min ti hlauthawng em a, ka aw pawh a lawi rût thei. Chutah,

"Hetah hian ka awm duhtawh lo, inah ka haw duh Kimte. Min va thlah rawh!" A tih tak chul avang chuan ka awm a nuamlo zual a. A thiltawn chu ka hrechak ta zek zek. Rang deuh hian roomah ka kai lut nawk nawk a, khumah ka ṭhuttir leh hnawk. Ala khur der der reng mai chuan hlauhna min pe ve ngawt a, ka ngei lek lek zawk mai.

"Hei, min en teh. Eng thil nge i hmuh a? Sawi rawh. Chuan, engmah hlauh tur a awmlo bawk aw. Ṭanpuitu biak tur pawh ka hre ṭeuh ania" tiin ka ṭawng thlamuan pah mawlh mawlh a, tui in tur te pe leh in tui a in tak hnu chuan a pangngai ṭan ta niin ka hria. A mit a khap deuh fak fak phawt a, hnuailam en in a kut chu a khal pah niap niap bawk.

"Sawi rawh. Eng thil nge i hmuh. Keimah ka fiah vek ang"  ka thusawi zawh chiah kha keimah ngei pawh hian ka awihlo. Mahse, ka tih ngei erawh a ṭul niin ka hre tlat bawk si. Chutah, 

"Aih, engmah hmuh ka neilo. Mahse, i ṭhenawmpa inchhungah hian ṭawng bul bul thawm kha ka hria a, amah lah a awm bawk silo, mak hi ka ti em a ni. Dawt sawi miahloh chuan, nizan i muthilh hnu pawh khan zawite te a phun sur sur thawm hi ka hrereng a, a changin hla deuhah a ṭawng a, a chang leh khum bul lawk lawkah te khan a rawn ri leh ṭhin a, mak ka ti lutuk. Kimte, inluah tur dang kalo zawnpui ang che aw. Hetah chuan awm zui tawh suh. Tunah pawh hian min lo zui haw daih rawh" a rawn tih takah chuan tlem in ngaihṭhat lohna min neih tir ve ta deuh. Ka hlau em tih chu hrelo mahila, nuam erawh chu ka ti chiah bik ta lo. Mahse, thil hrechiang hmasa uk lova chutia mahni in luah lai han rauhsan tawp mai pawh chu tlawm ah la in ka ṭhiannu min sawmna pawh kha ka pawm ngawt thei ta lo a ni. 

"Hawh, chutia i awm ngam tawh siloh chuan ka va thlah haw phawt ang che" ti lehin ani pawh chuan engdang sawi tawhlo hian min zui nghal a. An inah chuan rei pawh ṭhu khawmuang loin ka let lehnghal vang vang a, ka bet hleithei meuhlo. Kan veng ka thlen hnuah ka In pawh pan zui ta lo hian Pi Tluangtei te inah ka lut zui ta rawih a, vanneihthlak tak hian anni chhungkua pawh an lo awmkim ṭhap e. Nidangah pawh leng lut ngai hleilo, chutia ka hmel an han hmu thut chu mak an tiin an ri zui chel chul mai. Lehlamah, anni chhungkua hi zawng, mi ṭawng duh leh polite ngang kha an nia, chutia min lo lawm chiam mai pawh chu a awmlo hran hauhlo. Ka duh te min lo zawh leh luam hnuah kei chuan pehhel kual vel lo hian ka inluah chanchin te chu ka zawt ta ringawt. Chutianga ka han sawichhuah tak phawng vang chu nge ka hrelo, maktih hmel deuh tak hian an chhungkua chuan min en vung vung hlawm a, ngaih anti ṭha lo hman teh e. Mahse, rei pawh rial lovin Pi Tluangtei pasal, Pu Rohluna chuan nui vur vur chung hian 

"A engtia, chutiang thu daih daih te min han zawh tak ni. I ṭhenawmpa a ṭha vaklo nge, a thuhrim in an khua ava zin te kha alo haw tawh reng reng em?" A rawn ti daih. Kei chuan thaw halh chung hian

"Haw tawh e. A rei ve leh tawh angreng. Mahse, nia, sawitur ting chuan a In lam aṭang khan thawm mak deuh hlek leh hriatthiam harsa deuh hi chu a rawn chhuak ve ṭhin a. A awmlo emaw tih lai te pawh hian a thleng ta fo mai. Hriatthiam a har khawp mai" kati deuh nuah nuah. Mahni ṭhenawmte rel angah pawh ka inchan deuh reuh a, nuam chu kati bik chiahlo. Mahse, dawt ka sawi bik tlat lova, ka inthiamlo lutuk hran lo bawk. Pi Tluangtei thung chuan thingpui min rawn pek pah hian

"I hriatsual mai mai a nilo maw le. Khu in khu a rei ve tawh angreng  a, tunhma aṭang i ṭhenawmpa tihloh, chhungkaw pakhat khan an luah ve tawh a nimai a, chutianga i thawm sawi ang hria reng reng an awm thu pawj kan va hre ve lo ve aw. Tin, kan hriattheih chinah, khu in aṭang khuan ruang takngial pawh hi a chhuah awm kan la hremiah lo mai. I thil hriatte chu an va mak dawn ve aw"  lo ti leh zung zung in, pa ber pawh alo inrawlh leh vat

"Chutia i awm a nawm loh viau te chuan inneitute pawh zawt fiah chhin la, nangmah pswh helamah i tan hmun ruak a awm reng bawk ania. Inthlahrung duh reng reng suh aw" lo ti leh zung zungin midangho pawh chu an lo bu zui tliar tliar a, a nuamlo duh angreng. Mahse, ka ngaih pawimawh em em loh thu leh ka hlauh hranpa vak loh thu te chu hrilh ve in reipawh ṭhu tawh lo chuan ka haw san zui ta a ni.

Vanneihtlak tak hian Pa Nghaka pawh chu alo haw veleh tawh a, a kawngkapui alo inhawng hiau mai. Keilah chuan a remchang em mai tiin kalpah chuan ka han dak lut ve zuai a, light ala on loh avang erawhin alo thim deuh khap thung. Chubakah, khawnge amah chu a awm tih pawh ka hrelo nen, a reh ṭhuap si a, a nuamlo duh ve angreng. A hming te chuan han ko ve lauh lauh mahila, min chhang tur reng a awm lova, dawr velah a kal zawk anih te ka ring ta vel mai mai. Tichuan, ka lu a nat em avangin reipawh ko tawhlo in in lamah ka pheisan ta a. Lut zui sawk sawk in ka mu zui ta daih. Ka lu mai nilo, ka taksa khawilai mai pawh chu a na vel vek tawh a, ka mit lah nise a thip vei phian bawk nen. Kei hi ka damlo dawn a ni chiang mai tiin ka huphurh lawk hle. Damdawi eikhalh thuai tum in peihlo zet chuan ka han tho chhuak leh a, hetihlai hian Pa Nghaka pawhin thawm a rawn nei veleh tawh a, mahse, ka be duh ta lem lo. 

Damdawi chu ei sawk sawk in kawngka ka kalh ṭha leh thlap a, ka mu lum leh ta daih. Ka luhai vir muai muai leh taksa nuamlo ṭhem ṭhum nen chuan men pawh meng ṭha peihlo hian ka maimitchhing deuh vang vang a, ṭhenawmpa zai rût rût ri te leh kan chhak kawngpui a motor lian tlan thawm zawng zawngte hrereng chung chuan kalo muhil ta a ni ngei ang. Kut vawt zetin ka ke a rawn phih deuh lawp avang chuan ka ṭhu chhuak hlawl mai a. Ka han in enchian nak chuan puan pawh kha lo sin tawh lo in khum mawng lamah an lo tla hlawm vek tawh mai a, keimah lah chu ka la huh chuap zui bawk nen awm a nuamlo duh kher. Tunge ka ke a min rawn pawttu kha ni ta ang tih ka ngaihtuah chhuah rualin ka khur ta der der lehnghal a, mahse, ka damlo taksa chaklo thil hriatsual vel mai mai ni tur ah ngaiin, ka ngaih kati ṭha chawp leh zawk. Tichuan, khum mawnglam a ka puan tla chu chhar tumin zawimuang hian ka zu ban ts de de a, ngawi teh, khumhnuaiah chuan eng thil emaw ni hi tawlh lut zawk angin ka hmu tlat nia! Ṭe ṭhat in ka ṭhu kang lehnghal zawk a, puan pawh chu ka chhar hman ta lo. Phawk fe hian khum mawng chu ka melh ta ngawt ngawt a, thawm lah nise s reh zui em em mai bawk, engtia awmtur nge tih hi ka hretawh lo a ni ber. A fiahnan khumhnuai lah chu ka bih zui ngam awzawng bawk silova, ava luhaithlak thuah hnih tehlul. Ka tihngaihna hrelo, hlau ve tho bawk si chuan dim taka tukverh chu hawn leh rak rak pahin ṭhenawmpa bawk ka ko leh ta ringawt. Min la chhang lawk theilo lehnghal a, ka tawt up up nimai hian ka hria. Mahse, minute 5 lo liam a ral lovang tihtur ah hian aw tham chhal in rawl a rawn chhuah ve ta a. Keilah chuan rang lutuk in ka thil tawn leh hriat te, khumhnuai takngial pawh ka bih ngam tawhloh thu te chu aw lawi zet hian kalo hrilh ta zung zung. Chuveleh ani chu a rawn tho chhuak ni ngei tur a ni, a ri deuh sut sut reng a. Reilote hnuah kalo rinlawk ang deuh hian ka kawngka chu a rawn kik ta dat dat. 

"Lo hawng rawh le, keiman ka rawn hnawhdarh sak vek ang che"  a rawn ti tham leh ṭuak. 

Khum aṭang chuan ka chhuk ngam angem ka hrelo. Mahse, ka tih ngei a ṭul a ni tiin insehruh chung hian dim zet leh khur der der chungin ka ke chu chhuatah ka dahthla ṭan ta a. Ka ke in chhuat a deh rual deuhthaw chuan rang lutuk fahran hian choka lamah ka phit phei nghal. Eng ber nge ka hlauh chu ka hrelo, mahse, engkim mai hi ka rap vel vek tawh a, khum hnuaiah chuan eng thil emaw tak, tawm deuh reng turah ka ngai nghal hmiah bawk. Chu ber chuan min ti hlau ni pawhin ka hria. 

Pa Nghaka pawh rang taka rawn lut zawm ve nghal in room lamah a phei tlang ta thuak a, kei erawh chuan room thleng in ka zui lut ve ngam tawhlo thung. Chutah, room zar hliahna puan chu keu leh dek dek in amah Pa Nghaka thiltih lai mek chu kalo thlir khur ve ngar ngar bawk a. Ani erawh chuan khumhnuai te chu bih deuh thuak thuak pah hian chhuat te chu a han beng ri leh vel thul. A landan chu, ui leh zawhte hnawhbo tum hi ang berin ka hria. 

Rinlawk  leh rin ngam ni chiah silo ang deuh in khumhnuai ah chuan eng thilmah a awm ta lo hlauh a, mahse, ka hlauhna erawh a nep phah chuang hauh silo. Chu chu a hrehawm lai ber pawh a ni kan ti thei ang chu. Bathroom thleng a min enkual sak leh thuak thuak hnu chuan kawngka lam pan pah hian

"Eng thilmah anih dawn loh kha Kimte. Zawhte emaw sazu tih vel i hmuhsual mai mai anih ka ring. Zanin chu i awm nawm theihna turin kalo meng ve reng dawn nia aw. Hlauhtur a awm tawhlo e" ti leh zung zung in min chhuahsan a, keipawh ngawi reng hian kalo bu zauh ringawt. A chhuah fel hnuah kawngka te chu khar ṭha lehin khum lam bawk chu tim dai hian ka pan phei leh a, light ka on kim vek tawh tho avangin a eng ṭha phian a, tlem chuan boruak pawh a ziaawm ta deuh e. Chubakah, Pa Nghaka kha ring lutuk ni silo hian a zai leh rut rut tawh a, kan khum dahna hi in ep chiah anih bawk avangin a zai ri chu ka hrechiang thawkhat hle. Chu ringawt pawh chuan ka awm tinuam huaiin ka mu ṭha veleh mai. Han ṭhut tlaivar ngawt dawn in ka khawsik kha a rawn awm leh ṭan tawh si a, ka peih ikhaw der silo.

Tichuan, mu meng kar chung chuan thil chi tinreng ka ngaihtuah kual a, phone takngial pawh ka khawih peih heklo. A khat tawk hian Pa Nghaka pawhin min rawn ko leh nulh ṭhin a, muthilh tum turin min rawn  ti ve reng bawk. Ka dawihzep luatah midang mu ṭha theilo in ka han siam ta ringawt a, nuamlo ka tih bakah ka inthiamlo ngawih ngawih. Mahse, eng nge tihtheih ka neih bik chuan. Ka hlau em a ni. 

Ka harh leh meuh chuan khua lo var tawhin, ni alo tlangsang tawh hle . Chutihlaiin ka khawsik erawh chuan min la thlah ṭha duh der lo thung a. Ka phone sana ka han en nak chuan chhun dar 12 hi alo ri vû vû tawh mai nia. Tlanengi missed call engemawzat alo awm bawk. Hna a ka kalloh chhan min rawn zawt dawn a ni ngei ang chu. Tin, chutihlai vek chuan ṭhenawm Pa Nghaka inchhungah chuan thawm ri ṭuk ṭuk leh ṭawng nak nak reng hi a awm reng mai a. Ka hriatdan berah chuan bungraw chawikual vel leh au lung lung ṭhin ni berin ka hria. Kei a damlo khawsik bengchhet zo ta langin an thusawitr lah chu chiangkuang pawn hriat theih zu han nei miahlo a!  Ka hriatchian ve ber erawh

"Ala leng thei ang maw? Kha, heipawh" tih vel chauh chu a ni a. Va enfiah a, eng thil nge an tih tih chu va zawt chiang tur takngial pawhin ka tho chhuak ṭha peih der silo. Tun dinhmunah tak hi chuan damdawi la tur takngial pawhin ka tho peihlo achha chu a ni e. Mahse, ka rilru pangkhing erawh chu a ngaih a ṭha thei der lo thung a, hlauhthawnna hlir hian a khat tlat . 

Pa Nghaka chu sawi lawk pawh awm miahlo in a insawn thut dawn em maw ni le. Chutiang rilru pu te anih chuan min hrilh lawk ve te pawh kalo ring kha a ni a, hetiang kaihhnawih hrim hrim hi a sawi ngailoh avangin insawn a duh ang tih ngaihtuahna pawh ka lo nei pha ngailo hrim hrim. Chubakah, a insawnchhuak taktak anih vaih chuan kei hi engtinnge ka awm tak ang le. Helai hmun reh leh fal takah hian mahni chauh in ka khawsa zui ngam tawh dawn emni? Tin, inluah tur lah hi a vang nasa ṭhin mai si a, a awmchhun te lah namen lo in an man a to ṭhin bawk si. Engtinnge ka awm tak zel ang tih ringawt ngaihtuah chuan ka hah leh ta hluah hluah a, ka thaw deuh kawk thei hial. Chutia, rilru tawt up up a kalo in ngaihtuah ve mek lai chuan motor tinung thawm hria in, reiloah thawm awm zawng zawng pawh chu an reh zui ta duak a. He hmun fal leh reh takah hian mahni chauh a awm leh turin min kalsan ta hlawm a nimaw ka ti vawng vawng mai. Ka khua a harin, ruak ta riau hian ka inhria a, ava han hrehawm tehreng. 

                      

Mahse, nikhaw dul reih rawih leh chawhnu lam boruak uap churh te chuan ka taksa natna te chu rawn tuam zui hlup hlupin min sawp chau zual hle a, hriatloh kar hian kalo muhil leh ta daih. Mumang maksak leh nuamlo em em hlir  ata chu  harhchhuak leh zawkin khua alo thim chhulh tawh thung a, ka ni khat hmanral dan mawlh chu ho ka tiin hrehawm pawh ka ti narawh. Engpawhnise, damdawi ka ei ngei a ṭul tiin ka tho chhuak ve ta hram a, mak tak hian ṭhenawmpa thawm chu ka hre leh ta mai. Ding detin a thawm chu ka han ngaithla leh lailawk a, faifuk rût rût pah a chhuat vel a teikual thawm hi ni ngeiin ka hre ta bawk. Phur zet hian

"Pa Nghak" ka han ti tham ṭiak mai a. Chuveleh, a faifuk ri chu tawp zuiin thawm a reh leh hmiah. Mahse, reilote hnuah awki zangkhai fe mai hian

"Kimte, i damlo emni ka nau? I thawm a reh riau mai a" a rawn ti ta zung zung. Kei thung chu kalo thaw huai thei. Mahni chauh a awm tur riakah kalo in dah tawh laiin Pa Nghaka ala awm ve reng tih ka hriat chuan ka lawm em em ringawt mai a ni. Anih chuan, chawhnu lama ka thawm hriat zozaite kha eng tihna nge an nih tak ang. Ka bengchhe ri leh ka mangchhia mai chu anni thei lo tih ka chiang nasa ropui mai si. Amah Pa Nghaka hi zawt tawp ila a ṭha ang tiin chawhnu lam a thawm awm zozaite chu ka han zawt ta ngei a. Alo nui deuh huk.

"Kan khaw lam a ka ṭhiante nupa in ka bungraw hlui ṭhenkhat an rawn khawm anih kha. An in dang ve ṭan dawn a kha" a rawn tih leh lek phei chuan ka thaw zui swng sawng. Tichuan, damdawite ei pahin kan titi chho zel a, ka na te pawh chu ziaawm huai hian ka hre thei nghe nghe mawle. 

Chhun lamah ka mu nasa bawk a, ka damdawi eiin hna alo thawk ṭan bawk nen, ka mut a chhuak thei ta der lo mai. Khum bul tukverh chu hawngin ka dak zui vauh vauh a, kan kawmthlanga raw kung ding thelh sung mai, thliin a chhem rik sung sung te chu en in a thawm ka ngaithla pah ta vel mai mai. Hetih hun hi zanlai dar 12 vel chu ni tawhin ka ring a, Pa  Nghaka erawh a reh leh ṭhap tawh. Ka tihtur hrelo, muhil thei bawk silo khawhar tal vel chuan ka phone hmet eng in Rinnunga ka han call harh leh ta ngawt. Hetiang hian ka duh hun hunah ka call harh ringawt zel mai sia, min ning ang chuan a khawsa ngai hauhlo thung. Tin, ṭawngkam vin leh ngaihthlak nuamlo min hman khum ngailo bawk. Heng te tak hian amah ka duhna hi a tizual lo thei ṭhin lo a ni. 

Chutia, zawite te te a ka bialpa nen kan inbiak sar sar lai chuan thawklehkhatah hian nui kur kur thawm ka hre leh ta mai. Ka'n ngaihthlak chian leh hnu pawhin patling nui thawm ngei a ni tih ka hre ta bawk. Ka ṭim deuh sung sung thei a, ka khur zui leh der der bawk. Nui ri lo chhuahna lah kha ka rinloh leh maktih tur takin ka khum ep chiah, Pa Nghaka mutna zawn aṭang chuan ala ni lehzel bawk a, ka rap zual ta kher. Ka melh ngawt ngawt ringawt tawh. A nui ri chu ring tual tualin a hnuah phei chuan a ṭap zui ta hial nia! Ka hlauh luat ah ka phone lah chu khum leh bangrel inkarah hian ka thlauh ta daih mai lehnghal a, ava han buaithlak ṭhin tak.  Chutah, Ka phone thlauh chu ban tumin khum kil chu ka han zen thla teh ngawt a, engmah zu hmuthei tawh heklo, kut khur dar dar in khumhnuai te chu ka theihchin chin ah ka dap ta chiam. Chutihlai pawh chuan thawm kha la wm ve reng tho in, a rikna chu a sawn duh der lo lehnghal a. Pa Nghaka chu thei leh theilo hian ka koh pah reng bawk. Mahse, chhangtu ka nei chuang der lo nia. Awle, ka phone niawm tak chu man fuh ta hlauh in ka la kang dawn chiah tih ah thildang engemaw tak hi ka khawih fuh leh ta mai! Ka kut chu ka la sawn zawk a, phone pawh chu a hma aia hla zawkah a persawn leh ta daih. Ṭap thawm leh nui ri inkarthlak chhen lah chuan min la hual vel reng bawk nen, hlauh nen thinrim nen ka insehruh ṭung tawh mai. A khat tawk hian Pa Nghaka chu ko reng tho mahila min chhawntu tur reng an awm theilo nia. A mu hlum ta mai emni aw ka ti hial a ni. 

"Tawp rawh u. Tawp tawh teh u" ti a au tuar tuarin khum aṭang chuan khur zawih zawih hian ka chhukthla a, ka ṭap pur mai bawk. Hlauh thinrim tha nen a ṭangkawp in ka khum lian lem lo tak chu ka han chawi sawn ta nawlh mai a, ka tum angin ka khumhnuai ah chuan eng thil mak leh danglam mah hmuh tur alo awm hauhlo. Ka phone erawh chhar zui thuai in pawnah ka tlanchhuak nghal a, Pa Nghaka in lam ka han thlir nak chuan pawnah tala lianpui hian alo inkalh bur mai! Hei hi thil theih a nilo, kha leh chen kha zanah pawh a thawm ka hria alawm le, tia phun zui mawlh mawlhin hlauh pawh ka sawi thei tawhlo, ka hmazawn ah chuan ka kal mawp mawp a, Pi Tluangtei te in lam ka pan dawn a ni. 

Khua lah chu rinai tak a alo vawh vur avangin kei, boxer nen chauh a chhuak ta chu ka khur chhe lo chauh. Hetia Pi Tluangtei te in lam ka pan chhung zawng pawh hian ka hnungah min zuitu awm ang tlat hian ka hria a, ka pen rual a pen ve zelin, ka din rual chiah in a thawm alo reh ve ṭhin bawk. Lehhawi meuh a hnunglam ka han thlir ngial pawh chuan ka kalna hnu kawng te chu alo thim phei vek a, eng thilmah hi hmuhtur a awmlo mai pawh a nilo, a reh hian a reh tlawk tlawk. Tichuan, chak zet zet a kal in , pen sawm vel ka pen leh ang tihah vanneihthlak tak hian ka kalna tur hmun, Pi Tluangtei te in pawh chu ka thleng ve ta hram a. Alo reh ṭhiap tawh. Ni e, tun hun hi mi tam zawk mut reh hun ni tawhin, zing lam dar 1 a ri tawh hial ang. Tunah hian zah ka sawi thei tawhlo a, hlauh luatah ka lu a chhum lo chauh zawk a ni e.

Kawngka ka kik karh karh hnua an rawn hawn chuan ka ṭap lo chauh tawh. Vawt tih lutuk vanga inkuangkuah hlan chungin kalo ding reng a ni tih an hmu chu an meng phawk nasa nupa teh e. Nu zawk chuan inchhung lam a min kuah luh sawk sawk pah hian

"Eng nge thil awmzia tun ang hunah. Buaina i tawk tihna emni?" Ti sar sar in puanlum hi a rawn la leh vat a. Min sin tir sawk sawk bawk. Pa zawk Pu Rohluna thung chu ka hmaah ṭhu in alo la ngawi reng a, a mitmeng aṭang erawh a ngaih chu a ṭha vak biklo niin ka hre deuh. Engmah phei chu a sawichhuak lem lo thung. Ngawih reng theih ni tawh heklo, anni pahnih lah chuan min en kar tawh mai si a, mahse, ka thiltawn rapawm leh maksak taktak te ka han sawichhuah dawn ngial chuan hlauh luat ah ka mittui an rawn tla zel bawk si, ka sawi hleithei meuhlo. Chutah, Pu Rohluna chu rawn ṭawng chhuak ve in zawi sup leh vawt ruih si hian

"I ṭhenawmpa in i chungah thilṭha lo tih a tum emni?" A rawn tih chuan ka va melh zawk a, ka lu ka thing zui leh nawk nawk. Ka la inhnit faih faih reng lehnghal. Ka awmdan vel chuan a ti bangbo hle tih hriat tak hian an in melh leh ralh ralh ṭhin a, kei lah ka la ṭawng chhuak hleithei mai silo nen, hrehawm zawk tak a ni e. Mahse, nu berin zaidam zawk a

"Ekhaii! Insum reng reng suh. Hmanhmawh lo bawk la, kan lo nghak reng dawn che a nia"  a rawn tih takah chuan insumthei tawhlo in ka ṭap chhuak ta hawm hawm mai a. Ka ṭah zawh meuh chuan ka thawl hawk ni hian ka hria. Tichuan zawimuang in thilthleng engkim te pawh chu a zavaiin ka hrilh ve ta vek a. Pa Nghaka bungrua te pawh an rawn la niawm a ka hriat thu te pawh kha hrilhin Pi Tluangtei chuan phawk fe hian

"Alo nih chu mawle. Keini chhungkua lah zanhnih riakin kan Lo lamah kan lo kal vek mai si a, chutiang pawh kan hre ve reng reng hleinem. Mahse, chumi hnuah pawh amah Nghaka nen chuan in la inbe tho tihna maw ni a?"  A rawn tih leh chuan ka lu kalo bu nghat nghat a. Kan inbiak reng thu leh, hmel erawh kan inhmuhzui tak loh thu chu ka hrilh ve. An chek zui tlak tlak mai. Pu Rohluna thung chuan ngun tak a thil ngaihtuah hmel hi pu in, a lu a rawn bu ve ta zauh zauh. 

"Um, engpawhnise, zanin chu hetah, Mami bulah lo riak ve phawt la, naktuk lamah tihdan kawng dang deuh kan dap dawn ania, engmah hlauh tur a awmlo aw, hetah chuan khawi a thlarau sual leh bawlhhlawh mah an lo kal ngai lovang" rawn ti dap dapin, amah chu kalo en kar a. Ka thla pawh ati muang suai suai thei. Tin, Pi Tluangtei pawhin an pa thu chu lo zawm ve vatin kei chu an fanu Mami bulah min muttir zui ta nghal a. Ka lawm takmeuh. Tichuan, zankhua a buailo leh mumang ṭhalo pawh nei chhunzawm tawhlo chuan thlamuang takin ka muhil zui ve ta a ni. Hahdam leh thlamuang taka muthilh theih tluk hi alo awm tam love.

Khawvar hnuah erawh Pa Nghaka chungchang a kan thiltih dan tur te chu relin,  a hmasa ber atan Pa Nghaka in chu luh chhin phawt kan duh ta a. Ka in kalhna chahbi leh Pa Nghaka chahbi hman lai hi a inmil ve tho avangin ka chahbi chu a kawngka hawn nan kan hmang dawn bawk a ni. Tichuan, tukṭhuan pawh an kiangah kil ve zelin, chaw eikham veleh Pi Tluangtei te nupa nen kan pathum chuan kan in lam pan turin kan inzuichhuak ta nghal. A ruk tak chuan ka hreh tawh takzet. Ka ṭih ngawih ngawih tawh zawk ti ila a sual tam awm love. 

Hna ka kalloh rei tak deuh avangin Tlanengi lah khan a khat tawk hian min rawn call ve chhen bawk a, biak pawh ka be mumal hman meuh lo. Ani lah chuan thu pawimawh hrilhtur che ka nei alo ti ve sek a, engpawhnise, call ah chuan hun kan la neih loh em avangin text message lo hnutchhiah zawk tur chuan kan inti ta ringawt anih kha. 

Pa Nghaka in chu ka chahbi hmang chuan kan han hawng ta a le, ka mengphawk nasa ta mai. Ka rinloh lutuk hian a inchhung chu alo ruak huai mai nia le!  Chu inchhung a bungraw awmsa, ṭhutthlengsei chhe tawh tak pakhat leh, khum ding awn bei bui tawh tih chauh loh chu eng thilmah hi alo awm tawh lova. Mak tak a ni, mak tak. Chutiang bawkin Pi  tluangtei te nupa pawh chuan mak antih thu ringawt an sawi chamchi mai. Pu Rohluna zawk chuan khum chhe tawh tak chunga ṭhut thlak hnawlh pah hian zawi supin

"Heng hi thil ni thei a ni dawn emni? Nimin chawhnu lamah bungraw la thawm niawm tak i hria a, a zan lawkah lah Nghaka khawsa thawm vel i hre leh bawk si. Tunah tihian" a tih lai chuan kei chuan rang zet hian

"Aw, a ei rawngbawl thawm pawh ka hre ngei alawm. A faifuk ri te zawng zawng nen"kalo ti zauh. Pu Rohluna bawk chuan chiang zet a min rawn melh leh kawk pahin 

"Kei chuan Nghaka kha ka hmuhlohna chen a rei tawh khawp mai a, helaia i rawn insuanluh hlim reivaklo hnu aṭang khan a haw tih thawm hria in, khami chin kha chu ka hmu leh ta reng reng lo. Aizawl a a awmlai na na na hi chuan a hna kal tur emaw, a haw lam tal hi chu ka hmu fo ṭhin kha nia, thil han awm kual vel dan hi a mak dawn khawp mai. Tute emaw, a chanchin han hre tur deuh hi zawhchian chu a ṭul a ni"  atih takah chuan hlauhna hlir hian ka khat zui a. Ka mittui a tling zui leh piau bawk. Eng ber chu nge min tihlau tu tih hrelo mahila, hlauhna hlir hian ka thau ah min rawn man tawh tlat thung si. 

Pu Rohluna thurawn angin chawhnu lamah chuan an fanu Mami nen kan inneitute, Laipuitlang lam pan chuan kan inkhalh chhuak ta hmiah a. Chanchin engemaw tak an lo hriat tak hlauh ah tia kal ve mai kan ni nghe nghe. An awmna chu thlengin, ka hmel an han hmuh chuan min lo lawm thiam hle a, mak antih zawk thu te pawh an lo sawi luam mai. Tichuan, khawmuang tawhlo in, kan kal chhan diktak te sawiin Pa Nghaka chanchin engemaw tal an hriat leh hriatloh ts chu ka han zawt ta a. Ka ngaihbel nge chu ka hrelo, khatia zawhna ka han zawt zo chiah tih khan an hmelah mak tihna hmu in, chi ai hmel hi ka hmu tel thei tlat. Nu zawk phei chuan ka hau chung hian min lo en reng nia mawle. Reivaklo chhung kan ngawih ṭhap hnu ah pa ber thu rawn sawi chhuah chuan min va han ṭhawng tehreng em!

"Khu in i rawn luah hlim a pa Nghaka zin thu kha ila hrereng in ka han ring a" atih lai in kei chuan ka lu kalo bu zeuh. 

"Khami ṭum a a zin kha i sawi angin alo haw leh tawh reng reng lo a ni tih hi hria la ka va duh em!!! " ka lo mengphawk nasa ta kher. Chutiang bawkin ka nau hruai, Mami pawh chu a hmelah mak tihna hlir hi ka va hmu thei. Ka khur ru zui nasa lutuk kha thup bo tum hram hram mahila, awmzia erawh a awm lo hle. Tin, ka inpetruh fan fan ringawt bawk. Aw khur khur der chung hian

"I sawitum awmzia chu, Pa Nghaka kalo hmuh leh biak fo ṭhin kha a thla mai tihna maw ni a!? Dawt chu in sawi em silova maw?" Ka ti chuai ta raih mai. Nu zawk chuan min khawngaih hmel tak hian min lo en ngawih ngawih tawh a, sawitur a hriatloh hmel kher bawk. Chutah, pa zawk bawk chu rawn ṭawng chhuak ve leh in

"Ka hrelo le, mahse ni e, khatia a haw ta kha ram lamah feh tur ang taka kalin zan thum chu ava thangbo ta ngei a, an khaw ho phei chuan ram a riak anih ring in ngaihṭhat lohna pawh an lo nei lem chuanglo a, an ngaihsak zuilo tihna anih ber chu. Mahse, ni li lai a thangbo na chiah tihtur ah an khaw tlangval pahnih ram kal tur te hian thingkung a alo inkhai hi an va hmu ta mai a ni! A bak i thiltawn leh hriat te kha chu awihawm loh viau dawn mahse, a tawngtu ini miau a, sawitheih kan neilo a ni e. Chu ai mah chuan  a boral thu hi in lo hriat vek tawh zawk kan ring hrim hrim  a, chuvang ania engmah thu leh hla pawh kan rawn neih miahloh ni. Tin, a bungrua rawn la tute pawh kha a chhungte ngei annih kha. Sawi ta zel ila, i ngaihtuah dan a ni em tih chu hrelo mahila, in pawh khu i luahlum zui zel ngamlo anih chuan keini pawhin sawibuai kan neilo aw, a rawp chhe ve ṭan tawh a, ṭhiahdarh vek a, a thar sak leh te pawh kan lo rilruk tawh hrim hrim" tiin a lungawi lo zawk em maw ni ka ti hial.

Mahse, a thlirna tlang aṭang kha chuan a awm ve viau mai. In neitu anni a, chutianga mahni in leh lo ngei a thil danglam a thlen thu han hriat kha chu a neitu tan zawng, a lawmawm tehchiam in ka ring lo khawp mai. 

In neitupa in a hriat ang ang a han sawi takah chuan kei chu kalo hul huk nimai hian ka inhria a, sawitur reng reng hi ka hretawh lo a ni ber. Nge, sawitur chu ka hre ṭeuh a, ka sawichhuak thiamlo zawk ni ang tih pawh ka hrehrang thei tawhlo. Mak tihna hlir hian ka khat a, hlauhna chuan hmun chang tho mahsela, ka mak tihna chuan ala chang sang zawk fo mai. Tin, hetiang thil vel hi ka pian a hnulamah kei hian ka tawn ve pawh kalo inring phak ngai lo zawk . Tawn fo atan lah ka duh bawksak heklo. 

Chau zet hian Pi Tluangtei te inah bawk chuan ka lut leh rawih a, ka in lamah kha chuan mahni chauh in ka thleng thla ngam tawhlo hrim hrim. Anni chuan chanchin te min lo zawt zung zung in, Mami zawk khan engkim thil thlen dan te chu a sawi ta vek. Kei erawh ka la ngawi reng thung a, ka ṭawng chhuak hleithei hrih mawlh lo a ni zawk mah awm e. Chutia chanchin kimchang an han hriat takah chuan pa bet tihloh midang zawng kha an lo phu dual tihtheih hi a ni a, mak pawh ka ti viau hranpa lem lo. Chutah, pa ber chuan lu buk nghut nghut pah hian

"Umm, thil awmzia engkim Kimtei'n min hrilh hmasak na aṭang tawh khan hei hi chu kalo rindan sa deuh a ni tawh a. Nghaka kha pa ṭha tak mai niin, mahse chutihrual chuan pa vanduai tak a ni tel thung. A nupui fanaute khan motor accident a an boralsan tak aṭang kha chuan amah hretute sawidan takah, ngai hi a awh thei tawhlo ani ber a, a khua a har em em reng a, pa ṭawng duh tak ni ṭhin kha pa ngawichawi ber ah lo changin, pa zaidam leh thin nel tak ni ṭhin pawh kha, pa thinchhia leh thinram takah alo chang zo ta a ni ber ang chu. Tihian, a nupui fanaute a ngaih luat ah khawvel hi thlahlel zo tawhlo in ama nunna ngei chu a la ts si anih hmel a. A khawngaihthlak in, a chungchangah hian thildang a inrawlh ka ring thei tlat lo hetah kher hi chuan. Chuvangin, Kimtei pawh i thil tawn engkimte kha hriatreng tlak ah ruat tawhlo la, i Pa Nghaka kha a khawngaihthlak zawk a ni tih chiah hi ngaituah tum la, i hahdam mai ang. Tin, thildang daih, in neitute sawidan takah in pawh khu mahni chauh chuan luah zui chi a ni tawh dawn lo bawk a, khawvar hunah i bungrua te senghawiin hetah hian i duh chen chen i khawsa ve anga, kha lam kha chu i thuneihna a ni tawh awm e. Lo lungngai miah suh aw, kan awm reng hi" ti dap dap in a thusawi te chuan ka ngaihtuahna an ti kal thui ta hle a, a sawi ang tak khan Pa Nghaka chu han hlauh zui viau pawh tum mahila, khawngaih lamah a kal ta daih. A nun kha a ruak in, kan hriatpui miahloh khan alo khawhar ru ve ngawih ngawih ṭhin anih kha tih chu ka ngaihtuah chhunzawm ta neuh neuh. 

Tichuan, zanriah ei fel hnuah reilote titi ho leh phawtin Mami nen chuan khum lam kan pan dun ta zawk a. Tunhnaite hi ka buai ve deuh bawk nen phone pawh ka khawih ṭha mumal lo kher a, whatsaap ka han en nak chuan chat engemawzat hi lo awmin chung zingah chuan ka ṭhiannu Tlanengi message chuan ka mit a la ta chat mai. Hawng nghal vatin, ka chhiar zui nghal a. Ka hriat hnu vek ni tawh mahse, ka mak tihna erawh chu ala pangngai reng tho. Tlanengi chuan

"Ṭhiani, i chenna hmun kha a rang thei ang berin i dam fel veleh chhuahsan la ka duh. Kha hmunah khan mihring nilo, thil pangngai lo nangmah chenchilh tu che an awm tih ka hria a ni. Diktak a sawi chuan ka rawn tlawh ni che pawh khan ngaih han tih ṭhat na tur thil reng reng kha ka hmu tawh lova, a chhan pakhat pawh, i ṭhenawmpa bia anga i inhre tlat te kha a ni awm e. Kei chuan khatihlai khan betu i neih awm reng reng hi ka hre ve lo a, nangmah zawk in min fiam emaw ka ti hial asin. Sawi ta mai mai ila, in kan thlen rual a i ṭhenawmpa chenna lam ka va thlek phei pawh khan ani chu a kawngkapui pawh tala nen alo inkalh ṭha thlap a, mahse, inchhung kan luh aṭanga reiloteah tikhan biak nei angin i awm leh rauh si. Mak ka ti khawp asin. Engpawhnise, type duah tawhlo mai ang, engkim chu hmaichhan ngei ah ka la hrilhfiah leh vek zawk ang che aw. Lo dam la, i insawnchhuah theih hunah min rawn hriattir ve dawn nia. Hetah, kan bulah hian i awm dawn nia, ka chhungte pawh engkim ka hrilh hre tawh a, an remti tehmai ania. Inluah tur ṭha tak zawnpui tur che pawh an hual hmel khawp mai. Chuan, i hman hunah min lo call ngei ngei la" tih thu hi alo ni a. Ka hlauhna, maktihna leh lawmna te chu a inpawlh sawp ta nuaih mai. 

Hetiang hunah hian ṭhianṭha leh ṭhenawm khawveng ṭha takte hi an lo va hlu in, thisen a inzawmna awm hauh silo ah pawh chhungkhat laina hnai ang mai a awmdan an lo va thiam tehlul em. Hetiang mi hi chuan Pathian malsawmna hi dawng ngawih ngawih bik se ka ti ṭhin. Anmahni mihringpuite tan hian an hlu ve emm!

****    ****     ****     ****    ****    ***    ******