HILDA!

             HILDA-NAUPANG MAKSAK CHU!

              By : Vanlalpeki Fanai

"Ka hming chu Hilda Zohmangaihsangi ani a, kum 11 chauh ka la ni bawk"

Chu hmeichhe naupang hmel fel rin ren leh mitmeng fiah kel kawl bawk, ṭawng pawh felfai thlap si chuan thing chair sang er awr a ṭhut pahin a chanchin tlem a zawng chu alo sawi mial mial a. Chutihlai chuan amah hual vel hian patling pahnih leh nutling kum upa lam tawh te hi an ding ve reng bawk. Hmeichhe naupang Hilda chu chiang tak a melh chung hian zawhna chi hrang hrang an zawt kual vek a, Hildai pawhin an zawhna te chu a hriatdan ang ang in felfai tak si hian alo chhang ve zel bawk.

"Anih leh, engvang ber in maw khalai hmun reh lutuk ah khan ilo awm reng nachhan. In chenna hmun leh veng te, in awmna lai te i hretawh lo tihna emni?" Amah hual a ding ve patling pakhat zawk chuan alo ti ve leh. Hildai pawhin chutiang zawhna rawn zawttu pa upa lam chu chiang zet a melh ve kiau chung hian

"Ka chhungte chu an inhau nasa ṭhin lutuk a, ka haw ngam tawhlo" hnuailam en in a kun zui ta daih. 

"A zialo hlemai. Anih chuan khawi veng ah nge in awm tih tal chu han sawi la, kan hruai haw leh phawt che anga, i chhungte pawh hrilhfiah in inhau tawhlo turin kan ti dawn alawm tiraw?" Nu upa lam ding ve reng zawk kha alo ni. A awki aṭang reng pawh chuan a zaidam hmel hliah hliah mai a. Mahse, mak tak mai hian Hilda chuan a lu alo thing nak nak a, a mittui a tling zui ta piau bawk. Engpawh chu nise, a chenna Inchhungah chuan a haw hreh tawh hle ani tih chu a chiang thawkhat awm e. 

Mipa puitling pakhat zawk chu lo ṭawng chhuak ve leh in,

"Khati tlat kha ania, alo awmna hmun a kan va hmuh lai pawh hian engmah a sawi duhtawh lo. Chuvang ania helai ah hian kan rawn hruai luh tawp mai ni" tiin puitling ho hriat tawk lek chuan a han sawi zui ve sur sur a.

Helai a patling pahnih awm ve te hian Hildai hi veng reh lai leh kawngreh ṭha lai tak a alo ding ngawi reng an hmuh avangin a hmun ah ngei zawhna pawh an lo zawt nual tawh a, hruai haw pawh tum in an thlem nasa ngial bawk. Mahse, he hmeichhe naupang te hian engmah a sawiṭhat duh miau loh avangin anmahni In lamah an hruai haw lailawk ta phawt a, chutah pawh an chhungte nen beihpuithlak a zan hnih tehmeuh zawhna ngai reng an han zawh pawh chuan engmah ala sawi ṭha duh chuang eih lo. A ngawi tlat nia. Media lamah te pawh naupang bo ang in thu an han chhuah ve a, ni khat pum hlum tawp an nghah hnuah pawh rawn ngaihven a thu hretu inti takngial pawh an awm ta silo. Child welfare lam biak mai tum a ṭawngka an han neih erawh in Hildai chuan engkim hrethiam ve niawm tak hian a hlau ta em em mai a, zanriah pawh ei duhlo in pindan kil khat ah a tawm zui ngat ngat a, theihpatawp a an thlem hnuah leh tumah an biak sak dawn loh thu an hrilh hnuah erawh chuan a rawn chhuak veleh mai bawk a, tihian mak tak maiin  'Fahrah In' lama awm a duh zawk thu a sawi tak tlat avang hian tihngaihna dang hretawh bik heklo le, a duhdan ang ngei chuan naupang enkawltu neilo dahkhawmna hmun lam pan in an rawn kalpui ta ngawt mai hi alo ni. Tichuan, nutling pahnih lo awm ve te kha he 'Fahrah In' a thawk mek te hi niin, a upa zawk leh he fahrah chhenna hmun atana theihtawp chhuah a a tha leh zung lo seng tawh tu, nu ber ang hial a an ngaih theih tawh, thawk senior em em zawk hi Pi Ramhmuaki niin, nutling pakhat zawk erawh kha chu Pi Hrangliani ani thung. Anni pahnih hian tihian Hilda Zohmangaihsangi chu an lo buaipui zui a, a chanchin rawn ngaihven tu an awm hma zawng chu an kut ah dah in naupang dang tamtak ang bawk hian an enkawl zui ve dawn ta ani.

"Aw, doctor, ka enkawl thei tawh thlawt lo ani e. A ni tel hian a buai zual zel ani si a, ka tan a harsa lutuk" 

Pa upa lam tur pakhat hian Psychologist Doctor Mahruaitei en kar chung chuan mangan hmel fe hian alo ti hlawp hlawp a. A hmaa ṭhu, amah be mek tu leh a harsatna tamtak rawn thlen tawh ṭhin tu chu Doctor Mahruaitei pawh chuan alo en ve kar mai. A aw thian kharh in a ṭhut hmun a siam rem leh sauh sauh a, chik zawk a amah rawn dawr tu chu en leh pah hian

"Tichuan, i nupui awmna atan Mental Hospital chu i beisei sak ta deuh ber tihna emni?" Alo ti thawp sat. Chuveleh Patling retheih hmel tak pawh chuan a chil lem khawlhin a lu chu a han bu zui zoh a, doctor mit ah pawh en ṭha ngam tawhlo hian

"Ani mai ang chu. A awmdan hi kei a chinfel theih rual niin ka hretawh lo. Ka buai takzet ani" alo ti leh sup. Mangan hmel zet hian a hmui a liak zeuh zeuh bawk a. A thusawi chu a pawmpui tak vang em em pawh ni lem lo hian Mahruaitei pawh in a lu chu alo bu ve nghat nghat tho mai.

He pa upa lam tawh hi a hming chu Remruata niin, a clinic ah hian vawi engemawzat chu a rawn leng ve tawh ṭhin a, a buaina ber pawh an chhungkaw khawsak dan niin, a nupui leh a fanu naupangte nungchang mak a tih thu hi a rawn thupui ber ṭhin. Ani lah in a bula rawn hruai tur a a tih lah chuan a rawn hruai chhuah theih map loh thu hrilh in chhuanlam niawm tak hi a siam zel si a, a hnuah phei chuan amah ngei hian an chenna hmun chu ava kalchilh ta ringawt anih kha. Mahse, chutia ava kalchilh takah erawh mak tak in a nupui chu pangngai tak hian alo khawsa thung si a, an fanu erawh hmuh tur a awmlo thung. Hriatthiam harsa pawh ati hle nghe nghe anih kha.

Tin, amah doctor Mahruaitei chungchang hi han sawi lang ta zel ila. A hmingpum chu Vanlalhruaii niin, nula kum upa lam tawh a ni ve a, mahse, a hleitling in a chhelo phian a, a hmelṭha in mitmeng fing leh fiah tak a nei nghe nghe bawk. Tun a a hnathawh lai hi kum 3 chuang lo thawk ve tawh in sawrkar damdawiin ah a thawk nghe nghe. A hna a tuichilh a, a hrechiang bawk a, dawrtu a ngah ṭhin in a hna chungchang kaihhnawih ah hian ṭul leh pawimawh ah pawh koh phar a hlawh thei viau ani. Tin, mahnu chauh a khawsa anih bawk avang hian a che reng reng a felfai thlup a, hmuh a nuam ṭhin viau bawk. Mi te ber aṭanga lian ber thleng hian an harsatna chu an harsat dan a zirin a chinfel sak mai ṭhin. Thlei bik neih a duh lova, a tan hi chuan sum tam tak te hian awmzia an nei thuilo hle nghe nghe. Dik tak leh awmze nei in hna a thawk a, mamawh tute tan a ding reng bawk a, a hlim tawk hle ani.

"Ka hming chu Hilda Zohmangaihsangi ani a, tun aṭang chuan in ṭhianṭha tak nih ka tum ve anga, nangni pawh ka ṭhian in nih theih ngei ka ring bawk ani" tiin kuthmasuih hian fahrah in a naupang tamtak ṭhutkhawm dulna hmaah chuan ding in a chanchin te a sawi a, inhmehriattirna a nei pah bawk. A chanchin a sawi chu kan ti tak nain chanchin sawitur em em a nei lova, a chhungte chu an inhau nasa thei hle tih leh school pawh a kal ve ṭhin tih te vel bak hi chu sawitur a hre tam tehchiam lo nge, thildang hi chu a sawi zui ngai lem lo ani. Chutia in hmelhriattirna a han neih zawh chuan a hmaa ṭhu naupang ho chu kut beng in an lo thum zui mar mar a, amah chu hui zauh zauh pah hian kiang a ṭhu turin an ko sap sap hlawm bawk. Hildai pawh chuan nuih sak pah in naupang ṭhutkhawmna laihawl lam chu a pan zui a, amah ang rual vel tur hmeichhe naupang ria ṭhil ṭhel bulah chuan ṭhut hmun rem ve nghal in chu hmeichhe naupang pawh chuan alo be zui nghal siam siam.

"Ka hming chu Malsawmsangi ania, Sangsang min ti ṭhin. Kum engzat nge inih tawh a?"  Alo tih chuan Hildai chu phur zet hian alo nui zui var var a, a hmel landan aṭang reng pawhin a hlim taktak tih a hriat hle awm e.

"Hilda, hei hi i khum tur ani a, i mutna chung chiah hi Sangsangi khum  ani bawk a, zanah mut hmain inthiar fel vek ṭhin tur ani a, zan dar 8 leh a chanve ah mut ngei ngei ṭhin tur ani bawk. Tin, zingah dar 6 hi thawh hun tur ani a, in tho chat chat bawk tur ani ang. Chuan, zan mut hnuah rokhawlhna dang a awm te anih loh chuan mahni khum thawhsan tawhloh bawk tur ani. Le, in remfel ve tawh rawh le" Chu Fahrah in a thawk ve, nula naupang lam leh hmai hriam zet mai Jenny chuan a han ti zung zung a. Hildai pawh in thuawih hmel tak hian a thusawi te chu a zawm tih hriat nan a lu alo bu ve zeuh zeuh. Nula chu a kalsawn ta maw tih velah a mutna chung a mu ve a ṭhianthar Sangsangi chuan nui kar kar pah a rawn be ve lehnghal in

"Hilda, mut hunah chuan light hi an off vek zel a, a thim thei lutuk mawle. I hlau hrim hrim ang nang chuan" a rawn ti chu Hildai erawh chuan ram hmak hian

"Thim ka hlau lo e" alo ti hmiah. Sangsangi pawhin a chhanna dawn chu a beisei loh lam daih anih avangin a ngawi zui chiang hle a. A ṭhian thar Hildai chu khap fak fak pah hian a en ta reng ringawt bawk. Ni e, anni ang rual hmeichhe naupang tan lehnghal phei chuan chu room zau lian lutuk mai zan lam a a han thim khup tur chu a nelawm loh in a ṭihbaiawm ru hle ta ve ang. Mahse,  an room chhungah hian khum chhawng 30 chuang awm in chu chu hmeichhe mutna hlir ani a, mipa ho erawh pindan hran neiin an awm hrang ve thung. Lehlamah, chu fahrah in chuan hostel room zau takte pawh a iang ve thei awm e a.

"Mental hospital hi i tan awmna hmun tur diktak a ni. Kei chuan i khawsak dan hi ka hrethiam thei tawh lo che ani e"

Pu Remruata chuan ti hmarh hmarh chung in a nupui duhlo chung chu a bân ah a pawhsak dawr dawr a, a nupui Sangkimi erawh hlau tih hriat tak hian a ṭe ruai ruai thung a, a lu te chu a thing deuh nawk nawk bawk. A pasal hmel chu mitmeng â ruai chung a melh chho chung hian

"Kei chauh ka ni lo, amah pawh kha a tel ve ani, kei chaub ka nilo, keimah chauh ka nilo aw" ti khur hlawk hlawk chung in a duhlo chung chu motor chhungah nawr luh zui niin, chak thei ang ber hian Mental hospital lam pan chuan an tlanpui ta a.

"Nu, a nu, lo tlan teh u, Hildai saw, mak deuh deuh in a awm ania" tiin Hildai ṭhiannu Sangsangi chu an hotute room ah tlan lut in a thaw zui deuh hlawp hlawp bawk a. Anni pawh engdang sawi tawhlo hian hmeichhe room lam pan in an tlan zui ta dawr dawr. Hmeichhe pindan an va thlen nak chuan Hildai chu a khum kil lamah tawm in a kut tin hi alo seh mial mial a, a seh thi pheng phung tawh nghe nghe. Chutih pah chuan a melh ngai melh in a bu tlauh tlauh bawk a, a sawi hriatchian theih siloh hian a phun leh sur sur ṭhin a, a awmdan chu a mak in a rapawm thei hial ani. Chutah, an hotunu ber, an nu ber ni bawk Pi Ramliani chuan zu ṭhutchilh thuai in a chal te chu a han deh sak nghal a, a khua a sik lova, damlohna nei ang in a lang hek lo. 

"Hilda, Bawihte, engtinnge i awm? Nâ i neih chuan min hrilh rawh aw" zaidam tak a a han tih rual chiah chuan Hildai bu lawp lawp lai pawh chu a tawp zui hmiah a, a phun ri pawh hriat zui tur a awm ta lo. Amaherawhchu, a melh ngai melh in a hma zawn chu ding tak hian ala en ngar ngar thung a. A awmdan vel avang chuan a bul a awm ho chu an ngaih a ṭha tawh chiahlo kher a, han tih zui vak dan tur erawh chu an hre mai biklo nen, an thlir ngawi ṭhuap ringawt. Mahse, Pi Rami bawk in zaidam tak a

"Hilda" a han tih leh rual chiah chuan Hildai chu amah Pi Rami rawn melh kawk paha a lu chauh rawn ti che sawn chung leh aw thum chher tak chung a

"Hildai ka ni phiangsen lo!" A rawn tih leh zet chuan a bulhnai a awm ve, a ṭawng hre pha ho chu an ṭin darh zui hak a, mak tihna leh hlauhna hian an khat zui bawk. Amah Pi Rami tak pawh chu a dang chuanglo hle a, hnunglamah a tawlh zui ve dawrh mai. Kha aw ri zet kha chu he hmeichhe naupang awrawl hi ani lo tih lah an hrechiang nasa si a, an tawn ngailoh thil alo ni vei chhap nen rapawm ve duh tak tur hi ani e. Mahse, mak tak maiin khatia a rawn ṭawng zawh rual khan Hildai hmel awmdan chu a rawn inthlak chhunzawm a, a bul velah chuan amah en in an lo ding ṭhap tih a han hmuh hnu phei chuan a ngaihna hrelo tih hriat zet hian a hawi kual zui hu hu a, a ṭah a chhuah hmel hle lehnghal. Rang zet a Pi Rami lam hawi pahin

"Nu, tinge hetia min dinchilh ṭhap a. Tihsual ka nei emni?" Tiin a insut ri zui hraih. Chuveleh Pi Rami pawhin lo kuah zui ve thuai in a sam te chu a han chul sak thuak thuak bawk a

"Tihsual engmah i neilo aw. I damlo emaw kan ti a kan lo kal khawm maimai anih hi"  alo ti hlauh.  A rilru erawh mak tihna in a khat a, zawhna hlir hi ani bawk. He hmeichhe naupang hian tun lawk a a khawsak dan leh thusawi te kha hriat zui engmah a nei lo taktak tihna emni ang? Nge lem a chang zawk. A ring thei thlawt lo ani e.

Engpawhnise, tiin Hildai chu a han hnem zui mawlh mawlh phawt a, harsa tak a muthilh tir ta hram in ama room ah a tlan lut leh thuai a, helai hmun a Hildai rawn dah tute patling pahnih hnen aṭang khan eng thil danglam emaw tak hriat theih beisei in a be pawp zui nghal. Mahse, anni pahnih hnen aṭang pawh eng thil thar lam leh maksak mah han hriat zui tur chu a nei leh chuang hauhlo. Mangang tak hian chair ah a ṭhu hnawk a, a thaw zui ham ham bawk. He naupang hi khawi aṭanga lo kal nge, mi pahnih in an va chharna hmunah khan engtinnge alo awm ngawt theihdan. Tunge a chhungte? A nu leh pa hming takngial pawh a sawichhuak duh silova tihian an hnenah chen tirin an kawl mawl ve tawp dawn tihna emni? Naupang himna  atan a pawl lian tak ding ang chi te hi biak mai tur nge. Nilo, kha thil kha chu ngaihtuah hrihlo teh ang, a hma pawhin an ṭhiante khan an lo tum nasa tawh a, a duhlo hle anih kha. Naupang rilru kan ti khawlo zual palh ange tiin a thaw zui leh hawk. Anih chuan, amah bia a, thil engkim zawt chhuak thei tur hian Doctor a ko lut mai dawn nge? Rilru lam harsatna te hi alo nei ru reng anilo maw tiin a in ngaihtuah harh zawk. Chu a ngaihdan chu thil ni thei tak ani tih hre chhunzawm in a phone a phawrh ta vat a. Rilru doctor, Mahruaitei phone number chu a hmet chhuak zat bawk.

Khatiang a maksak leh rapawm ru tak khan Hildai chu khawsa tawh mahse, amah leh a chenpuite chu naupang â mai tih takah a tu a te mah chuan a khawsak dan mak zia kha sawi zuiin an hre zui tawh lem lo a, amah ber a pawh chuan a awmdan te kha hriatzui nei heklo, a hlim in a ninhlei leh hle tawh zawk ani.

"Nang chu mi anglo ini a, kan bulah pawh lo awm ve tawh suh" hetiang a ti tu hi hmeichhe naupang ve tho niin, kum 10 mi Rualthanchhingi ani nghe nghe. He fahrah in a piang leh seilian hi ani a, amah hringtu a nu pawh kha fahrah ve tho niin, Rualthanchhingi a pai lai in he hmunah hian a tlu lut rawk a, Rualthanchhingi a pian aṭanga kum 1 ral hnuah a boralsan zui ta anih kha. Tihian kalna tur dang nei hek lo ta chu fahrah in ah a seilian a, a inti thu thei hle bawk. Tin, sawitur ting chuan amah hi naupang chaltlai leh sual zet mai ani reuh a, a kawlhsen in he hmun a naupang zawng zawng zingah pawh hian buaipui ngai nasa ber ani hial awm e. Chutiang a a ṭhiannu ber ṭawngkam mawilo tak a Rualthanchhingi'n a rawn ti ta mai chu Sangsangi ngaihdan alo nilo hle a, vin deuh ṭhak hian

"Nangmah zawk inih kha mi ang lo chu, i ṭahbelh ropui si a, hetah hian i buaithlak ber anti bawk che. Khatiang khan vawikhatmah ka ṭhiannu hi lo ti ve tawh suh aw" ti chungin Hildai chu a kaisawn ta dawr dawr a. Rualthanchhingi chuan chhang let tawh lo mahse, Hildai kal liam tur nen erawh an la in melhrum nasa ngang ngang hle.

"Naktuk chu Home lamah chuan iva kal dawn ta em? Ka kal ve chak khawp ania" 

Mahruaitei pasal hual Rotluanga chuan sofa chunga ṭhut ar ar pah hian a rawn ti a. Ani hi tlangval upa ve lam tawh tho niin, Hâ doctor ani thung. Mahruaitei te nen hian an hnathawhna damdawiin a thuhmun bawk a, heta ṭang a intawng pawh hi niin tunah chuan an inhual ve hial tawh bawk. Thaw halh pah a rawn ṭhu thla hnawk chung hian

"Ka hrelo le, kal chu ṭha ka tih rual in naupang case ani a, eng lo, i hriat ve tho ang in naupangte chu maksak taktak a han khawsak chang te an nei a, lak serious vek sen pawh annih loh hi. Tun hi a vawikhat thlenna anih hmel tho a, chubakah client kalo ngah ve ṭhin bawk nen tunah pawh hming ziak lawk hi an awm nual tawh a, naktuk tut tut ah chuan ka kal theih pawh ka in ring chiah lo ani"  a thingpui chu a han dawt zui hlak a. Rotluanga thung chuan a bialnu hmel chu uluk leh lungchim zet hian alo en vung vung thung. Nui sak pah in a kut chu a han chelhsak ve vat a, thaw zui leh halh chung hian

"Ni e tiraw, kha lam chu i tihdan dan nimai se. Kei chuan buaina hranpa ka neilo ania. Chu zawng ai chuan, nangnen a inneih a hmun khat a chen dun tawh hi ani ka chak ber tawh chu ni" alo ti daih chu Mahruaitei a hawihai zui teuh hle. Mahse, insiamṭha leh vat in a han nui ta var var zawk a. A hmelṭha reuh takzet.

"I dawhtheihna leh insumtheihna zozai te avang hian i chhuanawm ka ti a, ka chhuang takzet che. Tih taktak ah chuan mahni mai a khawsa ka ni a, chance kan ngah lutuk. Mahse, Pathian zar a kan dam dun zel anih phawt chuan thianghlim tak a inneih hi kan la tlin tih kan chiang dun a. Heng zawng zawng te hi insumtheilo ni la chuan kei hian hmangaihna vang chauh che in ka bawhchhe tawh ngei awm si a, a bul ber chu Pathian ani a, Pathian i ṭih vang chauh anni e" ti zui dap dap in a pasal hual awm ngheng chuan a bei zui ta thlawp a. Rotluanga pawhin alo kuah let ve hlu hlu bawk.

"I pasal hual hi i nei dawn lo! I tan a Pathian bel ruat chu amah kha ni lo in ramhuai fa zawk ani! Nang hi Pathian ni lovin ramhuai fa ngei ini e. Anchhia chu dawng mawlh rawh!"  Chu thu ngai chu vawi engemawzat sawiin hmeichhe pakhat hian alo au khum chiam chiam mai a. A ṭe ring in a nuih zui awr awr lehnghal. A hmel hmuh chian tum a a beih nasat poh leh a fiahlo tual tual zel bawk si chu Mahruaitei mang pawh a ang kher. A mumang rapthlak tak ata harhchhuah tum a a han chet deuh lah chuan delhbet tu awm ang mai hian a che thei hlek lo lehnghal a, a thaw te chu chham mai dawn hian a hre tawh hial. Mahse, vanneihthlak takin thawklehkhat ah a mu lai chu a ṭhu chhuak ta hlawl mai a, a thaw zui hlawp hlawp bawk. A thinphu nasa lutuk leh hlauthawng lutuk chuan a room te chu zawn nei ang mai hian a han melh kual zui ruai ruai a, thla eng chhete alo lut ve tihloh ah chuan a thim ṭha mup mup khawp mai. Chu chuan a hlauhna ti zual in rang tak hian light a on thuai a, engmah phei chu a hmu zui hran lo. Nimahse, a tha khur a nasat zui tak em avang in a tho chhuak a, chokaah lut leh in tuisik ava in ta ngheng. Chu chuan tlem chu chhawk zangkhai ve in a harh phah huai nghe nghe. 

Tunge kha mihring a mumang lam a rawn inlar kha ni ta ang le. A landan chuan hmeichhia ngei chu niin a hre si a, a hmel hmu thei lo mahse, hmeichhia ngei ani tih chu hrilh hriat hranpa pawh a ṭul tawh lo. Engvanga khatia rawn bei ta chiam mai nge anih. Eng nge a thusawi awmzia te kha ni ta ang. Rotluanga nen hian an innei theilo ang maw? Tin, amah ngei pawh hi ramhuai fa anih thu a rawn hrilh anih tak kha. Ni lo, ani hi chu Thangsiama leh Hmingchhuanpuii te fa ngei anih hi. Khawi a ramhuai fa mah anih loh zia chu a laichin hnai te pawh in an hria ang chu mawle. Rilru hah tih hriat tak a thaw halh halh chungin sofa ah chuan a han ṭhu leh rih a, a mutchhuak zozai te pawh kha bo chiang tawh tak hi anni ngawt e.

Zan lam a mutmu a tuah ṭhat loh vang nimaw, a tuk nileng pawh chuan Mahruaitei nun khua chu a nguai hle a, amah rawn dawr tu mi engemawzat te pawh chu beidawng hian a kir tir lo chauh ani. Mahse le, mi fing leh thluak ṭha, rilru zau pu mi ngang ani a, chutiang em chuan tute mah a chhuahtir lo hlauh e.

"Hilda, thlah rawh! Eng thil nge i tih tak hi le" 

Chu fahrah inchhung chu an ri zui leh ta mam mam mai. Thil thlenna hmun an va thlen phei nak chuan le, Hildai khan Rualthanchhingi banpuam chu alo seh thi sak hnuang a, thisen chhuak nual in a vun chhete hi alo seh thlak sak bawk tih a hriat theih. A thil tih rapthlak zet avang chuan an nu ber Pi Rami pawh a chek zui tlawk tlawk a, Hildai chu rapthlak leh makti zet hian a melh zui ngawt ngawt mai bawk. Chutihlai chuan a hliam a nat em avangin Rualthani pawh kha alo chiau ve vawn vawn reng a, mahse an hotu dangte chuan ani chu hruai sawn thuaiin a hliam te pawh chu an enkawl sak zui vat.

"Hilda, tun mai a i thiltih kha a awmzia min hrilh thuai rawh. Anih loh chuan helai hmun aṭang hian i chhuak anga, i chhungte bulah kan dah bawk ang che. Thudik sawi rawh!" 

Hotunu Pi Rami'n a ti zo chiah chu a ke vuan hian Hildai chu a rawn ṭhingṭhi zui ve nghal a,  a ṭap pah hliam hliam bawk.

"Aih ka duhlo anu, khawiahmah min kaltir suh anu. Hetah hian ka awm duh alawm, chuan ka fel tawh bawk ang"  

                           

A ṭhiannu tisa them a seh tlak tel avang khan a kamsir te pawh chu ala thi phung thei a, a landan chu a rapawm ru takzet.

"Anih chuan engvang a khatiang thil te kha ti nge inih sawi tawh rawh. Thudik chauh ka duh aw"

Pi Rami'n alo tih leh hmak hnu chuan Hildai chu a ngawi zui hmiah a, a khap deuh fak fak bawk. Pi Rami chu chhanna a pe tawh dawn lo emaw tih hnuah rawn ṭawng chhuak ve in, zawite hian

"Ruali khan keimah hi mi ang lo tiin min chhaih ṭhin a, warning ka pek hnuah pawh min chhaih zel alawm" a rawn tih chuan Pi Rami alo inrawlh leh vat.

"Chumi vang ringawt chuan khatia tih kha a phu i ti tihna nimaw? Hre rawh, tun aṭang khatiang thil kha iti leh anih vaih chuan e, warning ka pe che anih chu. Nang hi ka hremna tawh khawp ang che. Theihnghilh suh" ti hmak in a kalsan ta daih a. Hildai chu chhuat ah ṭhu hnawk in a insut ri zui hlap hlap. A nihna tak ah chuan, tun mai a a thiltih te kha a tum lawk dan anni hauh lo, tih tir tu engemaw tak hi amah ah chuan awm niin a hria a, a tum lawk loh leh duhdan pawh ni miahlo hian chet a thawh leh thut ṭhin niin a hre hial bawk. Amah hrim hrim hi a pawnlam landan ah chuan hmeichhe naupang fel leh zaidam, ṭawng tlem leh thunun awl em em ang hian a lang a, khatiang a a han che chhuak leh mai ṭhin te pawh kha a ngaihna tak a hre bik lo hle.

Chau tak leh thatho lo chung chungin Mahruaitei pawhin chumi ni chu a tlingtla veleh ta hram a, a chenna in a thlen meuh chuan chau tawh tak hi ani. Ṭhu hnawk in a han thaw zui leh ham ham phawt a, tichuan a nileng hun hman dan te ngaihtuah pahin a bialpa a text zui zat. A bialpa biak paha alo nuih var var lai takin a phone chu a rawn ri thut lehnghal a, a phu zawk thei. Rawn call tu erawh tudang nilovin Fahrah te chenna hmun a an hotunu Pi Ramliani bawk kha alo ni a. Phur lo fahran a call lak pah chuan a thaw zui leh halh. Lehlam aṭang hian

"Doctor, i dam ṭhat chuan khawngaihin naktuk chu lo kal tawh ta che. Kan buai zual zel ang tih pawh hi thil hlauhawm tak ani ta e" a rawn ti nghal zung zung. Mahruaitei erawh a thu hriat avang chuan a chi ai ve lem lo a, a hmanhmawh hranpa bawk heklo. Thaw zui leh hak in

"Nia, kan tum ve phawt ang chu. In naupang thar chu a buaithlak chho hle aniang maw" tiin za lo zet hian a han nui hul hak a. Pi Rami thung chuan hlauhthawnna awki hian lo chhang in

"Aw nia, a buaithlak chho dawn riau in ka hria ani. Keini hnenah engmah lah a sawiṭha duh silova, hetia in kawl mawl tawp mai ai hi chuan nang, hetiang lam a tawnhriat ngah tawh nge nge chuan zawnchhuah dan i hriat zawk kan ring a. Kan lo beisei mai ang che" ti leh duah in call chu a hmet tawp zui ta a. Mahruaitei chuan a huphurh angreng hlemai. A chhan pakhat pawh, ava biaktur mi hi naupang â anih dawn avangin chhanna lo pe ṭha duhlo pawhnise, naupang a nihna ah han tur luih leh awrawl ngaih nuamlo tak han phuh chhuah khum na tur chi kha ani dawn hauh silo, ho mai mai ah hun a va khawhral ang tih pawh a hlau zawk hial awm e. Umm, khua var sela, thil thleng tur chu a hriat mai ang ti rilru neuh neuh in inbualna tur tui a chhuang a, a inthlak zui ta bawk. 

Zan lamah erawh a bialpa lo leng in an titi tui leh phian a, a tuka a tihtur huphurhawm takte pawh theihnghilh ṭhak in a nui leh har har thei tawh.

Khua alo var a, Mahruaitei pawhin engdang sawi lo leh ngaihtuah zui tawhlo in Fahrahte chenna lam pan chuan a inkhalh chhuak zui ta par par. Zep tur a awmlo, tun a a tihtur hmabak hi a huphurh in  chak lem lo hle. Naupang laka ṭawngkam chhehsual palh te a hlau a, zawhna zawh awm chintawk neih a ṭul dawn tih a hre bawk. He hna hi hun rei tak chhung chu lo chelh ve tawh mahsela, kum naupang lam tamtak te pawh lo kawm ve fo tawh bawk mahse, he hmeichhe naupang ang kum rual hi chu vawikhatmah client ala nei ngailo tihtheih ani. Hei vang tak hian a huphurhna pawh a nasa em em a, a châk lo hulhual atih theih zawk awm e. Phurlo hle mahse a lam pan a tlan reng ta na na na chuan a hmun pawh a thleng ta mai reng a. Chu Fahrah chenna in lian leh tlawh pawh khat tih hriat tak a awm fal lurh mai kawt ah chuan a motor ti ding in a chhuk zui zat. A tarmit phen aṭanga chu In leh upat hmel tawh tak thlir vang vang pah chuan a han thaw zui hawk a. A hreh takzet. A chhung a luh mai tum a alo intintuah lai tak chuan hotunu Pi Ramliani khan rawn hmu fuh in a rawn dawngsawng ta thuai a.

"Ka va han lawm tak em! Ilo kal duh chu ka lawm taktak ani. Ti rawh, lut mai ila" tiin a bân ah a rawn chelh vat a, inchhung lam pan in an inzui lut ta. Inchhung a han lut chu pawn boruak a reh ang aiin a chhung ah thung chuan naupang rual awmkhawm tihtak ah thawm alo tam hle a, an zi nuaih nuaih ani ber. Naupang in um kual vel thlir chung a alo hawi veng veng laiin Pi Rami bawk kha a rawn ṭawng hmasa leh

"Ti rawh, lehlam ah" tiin pindan zau lutuk lo pakhat lam pan hian a luh pui ta daih a. A chhung an han lut chu khum engemawzat  hi alo in tlar dul mai, khum inkar tin ah puan hring hi ala in zar phui vek bawk a.

"Hei hi eng hmun nge anih a?' Zawhna siam in a ṭawng ve ta nge nge. Pi Rami thung chuan phur hmel tak leh awki zangkhai vah hian

"Kan damdawiin ve anih hi. Nurse 2 vel kan kawl bawk a, Pathian zarah kan naupangte hi an hrisel ṭha a, luahlum pawh a hlawh tehchiam lo khawp" tih pahin bangkil dep lam a khum lo awm chu an pah zel bawk. Chu khumah chuan Rualthanchhingi kha lo mu in, a bân puam hliam laiah khan bandage alo in tuam var vû a, a muhil mek nghe nghe bawk. Hmeichhe naupang na tuar tih hriat taka muhil bem mai a han hmuh chuan Mahruaitei chu a hamhaih deuh hlek a, mahse, Pi Rami zawk in a chhan te chu rawn sawifiah vat in thil awmdan a han hriat tak ah chuan a thaw zui halh.

"Anih chuan Nu Ram, khawiah nge ka biak tur naupang ber chu a awm ve a?" A rawn tih takah erawh Pi Rami pawh harhchhuak thut niawm tak hian a in her deuh vut a, pawn lam a chhuah pah hian

"Ni tak e, lo kal rawh. An room lamah a awm tak ang" tiin inchung lam a Hildai te mutna pindan pan chuan a kalpui zui leh hlawk hlawk.

He Fahrah chenna In hi a lian in a zau hle a, mizopa chhiar a chhawng hnih ang kha ani bawk. Inchung lamah hian hmeichhia leh mipa room a hrang ve ve a awm in hnuailam erawh choka leh damdawiin te, infiamna hmun tur pindan zau ve tak leh chaw eina hmun te anni nawk. Hnathawk tute erawh hmun hran ah awm in he in bul chiah ah hian lian lutuk lo a sak In dang a awm a, chu chu an office pawh ni nghal in an riak zui mai ṭhin.

Hmeichhe pindan bik an han lut chu alo reh ṭhuapmai a, khum tamtak chu awm ve bawk mahsela, naupang dang zawng te chu infiam tur a inhnuai lam an pan vek avangin a ruak huai mai. Mahse, khum sir ber ah chuan hmeichhe naupang pakhat hi amah chauh in alo ṭhu ngawi reng thung a. A melh ngai melh hian alo zai vei rat rat bawk. Pi Rami'n a  mitmei hmanga kal tur a a hrilh hnuah Mahruaitei pawhin Hildai awmna lam chu a pan ve ta chauh a. A bul ava thlen phei lai pawh chuan Mahruaitei chu hmu ang pawhin alo awm hauh lo. A awmdan ngai reng a awm in a zai pah riai riai bawk. 

"Hilda"

Hildai chu rawn hawi chhuak in chiang leh fiah zet hian a bula ding, Mahruaitei hmel chu a han melh ta kar mai a. A hmel landan chu engtin emaw tak hian a rapawm lek lek thei hial nia. Mahse, Mahruaitei chuan chutiang lam reng reng ngaihtuah lovin a bulah a han ṭhu zui ve zat a. Nui sen sen leh lainat hmel tak a Hildai hmel en reng chung chuan

"Doctor Mahruaitei ka nia. Doctor tiin min ko mai rawh aw. Ilo dam--"

"Eng nge hetah hian i rawn tih dawn a!?" 

Zawhna a rawn zawt let ve khauh mai. A aw chu a hriam in a ngaihnobei fahran lo bawk. Mahse, Mahruaitei chuan ala ngai pawimawh duh chuang ṭhak lo.

"I dam em tih rawn hriat ka duh a. Engatinge infiam turin i ṭhiante zingah i tel veloh a?"

"Ka ṭhiante anni lo alawm"

"Mahse, an tan chuan an ṭhiannu ṭha tak ini dawn asin"

"Ka ni lo!" 

Mahruaitei chu a meng bial kawk hman a, he naupang awmdan leh zawhna chhan duhdan vel chu a khirh hrep dawn hian a hre nghe nghe. Mahse, zaidam zawk a be leh in

"Anih chuan, keimah nen hian ṭhian ni mai ila, kan infiam ṭhin bawk anga" 

chuveleh chiang zet hian a mitah tak a rawn melh ta kiau mai le. A mit chu a la sawn duh eih lo lehnghal a, zawi ser sawr tak hian

"Nunna min pe thei dawn anih chuan ka duh alawm!" A rawn ti ta mai. Rang lutuk in Mahruaitei ṭhu lai chu a tho chhuak zawk a, Hildai chu a melh ta reng ringawt. Ani lah khan hnuailam lo en tawh in alo zai leh rat rat tawh thung. A ngaihṭhat thlak loh hle. Pi Ramliani bula phei hlawk hlawk pah hian a hlauhthawn vanga a thlanfim bawl te chu a han hui pah zeuh zeuh bawk a.

Zawi ser sawr tak in Pi Rami chuan

"Engkim a ṭha em? Eng nge alo sawi?" Alo tih chuan Mahruaitei pawhin a hlauhna chu thup hram hram tumin thawk a han la leh kawk a, Hildai ṭhutna lam phei chu a hawi duhtawh lo hrim hrim.

"Vawiin atan chuan tawk rawh se. Eng thil thar leh danglam mah kan hriat belh ka ring lo" ti chung in a chhuahsan zui daih.

A mut hmun thleng a a ngaihtuah zui ngial pawhin kha naupang thil sawi awmzia tur kha a hrethiam lo mai pawh nilo hian a bo tual tual zawk. Khatiang kum rual lek hmeichhe naupang lehnghal in nunna a han sawi ta mai leh a dil ta mai kha, mihring pangngai ani chiah angem tih chu hriatthiam harsa ati takmeuh. A landan ah chuan kha naupang Hildai kha rilru buai leh rilru lam a harsatna nei satliah niin a hre thei lo ani ta ber ang chu. Eng tak thleng zel ang maw?

Pu Remruata vawk chaw pe zo, inchhung a han lut leh chu thil a danglam nasa in a inchhung bungrua reng reng te pawh chu alo in chinglet nasa mai le. Ani hi kan sawi tawh ang khan a nupui damlo, rilru buai enkawl ngaihna hrelo a mental hospital lama lo dah lut tawh tu kha ani a, tunah tihian amah chauh a khawsa in vawk leh ar te, bawng ṭhahnem takte vulh in hmun fianrial takah ala khawsa zui zel a, mahni chauh a khawsak chu khawharthlak ṭhin viau mahse, a lehlam zawng erawh in rilru buai nasa tak nen a khawksak dun reng ai ngawt zawng in a thawventhlak a ti angreng hle.

Chutia a inchhung bungrua zawng zawng lo in lepse vek mai a han hmuh thut chuan awmngaihna hrelo in a chi ai nghal vek a. A vawk chaw pekna bucket chu thlauh ri zui bawl in inchhungah a tlan kual ta chiam ringawt.

"Ni lo, ni lo, min kalsan tawh rawh. Amah kha ka ni lo, tihsual pawh ka neih ve loh hi. Keimah, kei chu a pasal Remruata zawk ka ni e"

Chutia a phun mawlh mawlh lai chuan a hnung lawk a thirbel chhah ṭha tak awm chu boruak ah kang in Pu Remruata dinna lamah a rawn thlawk phei ta fua mai a, a tukkhum ah tak rawn deng zuiin Pu Remruata chu chhuat char ah a thal ta reng mai le.

Hetihlai hian thuchiang zawk hriat tumin a chenna hmun chu Mahruaitei khan a rawn pan ve mek bawk a. A hmaah eng thil chiah in nge lo hmuak tih chu hre hauhlo mahse, Pu Remruata a biak chu a ṭul tlat in a hria ani. A chhan pakhat pawh, amah rawn be fo ṭhin tu kha he Pu Remruata hi niin, fanu a neih thu leh a fanu pawh rilru lam a chiang zan lo, a awmna chin pawh an hriat takloh anih thu te kha alo hre ve tawh anih kha. Tu fa nge tih an hriat loh, Fahrah in a khawsa mek Hildai chu he Pu Remruata fanu ngei hi alo ni reng angem tih fiah a duh a, a mamawh bawk ani.

Pu Remruata te chenna hmun ava thlen lai hian khua a thim thet thet tawh a, an awmna hmun a fal in ani lah hmeichhia mai alo ni bawk nen, a reh ruih bawk si a nuam lo pawh a ti ve lek lek. Mahse, a nih tur ang ani mek tawh a, hlauh luat vanga kirsan leh mai erawg chu a tum buai hauhlo thung. An in chu alo thim ṭhiap ani tih a han hmuh leh phei chuan nuam a ti lo zual hle. Kut khur dar dar in kawngka chu a han kik ta hram a, mahse, chhawn tu a neilo nghal pang. Kawngkhar chu pawh hawn mai a han tum leh a, a sak tlat. Inchhung lamah an kalh nge maw ni tiin a han ko ta lauh lauh mai a. Mahse, ala reh zui ṭhap tho si. Kawngka chu kalsan in tukverh lo awm hnai ber ah chuan a han dak zui a, inchhung chu thim viau tawh mahse, khua ala en deuh reuh tho avang khan chhete chu ava hmu thei thung. Inchhung hnawk nuaih mai leh choka chhuat lai taka Pu Remruata niawm tak bawkkhup zawng a lo mu zawi reng ava hmuh takah chuan rang takin kawngka lam bawk a pan lehnghal a, mahse a hma ang chiah khan ala sak tlat tho. Hlauthawng kut khur hlawk hlawk in a phone a phawrh vat a, ambulance leh police call nghal in a bialpa pawh a be zui zat. Chutih chhung chuan tukverh in hawng te a awm em tih thlithlai turin in leh a vel chu a hel kual leh ta ruai a, mahse, mak tak hian chutiang thil reng reng chu alo awm hauh silo. A mangang leh hrilhhai bawk si chu a ṭap lo chauh tawh hi ani mai e. Kan sawi tawh ang khan, Pu Remruata te chenna hi a fal hle a, an ṭhenawm hnai ber te chenna pawh motor in kal mahsela, kilometre 3 dawn lai ani awm e. Khua lah chu a thim ruai ani tawh bawk nen a mangang tihtur ber hretawh silo chu inchhung panna step tawite ah chuan ṭhu in a indawm zui ta vang vang.

Police a call aṭanga darkar khat lo liam a ral ang tihtur ah hian Ambulance lo tlan thawm hria in a tho chhuak vat a. Kawngpui lam en in a hawi zui leh vang vang. A rin ang chiah chuan ambulance leh police motor rawn inzui chu a hmu ta reng a, a thaw zui huai thei. Anni ho pawhin an  tihtur ang ang te chu ti zuiin Pu Remruata pawh ambulance chhungah an dah lut ta thuai a, rin aiin a hliam chu alo na reuh phian niin an sawi nghe nghe. Thirbel chhah ṭha takin a tukkhum a  hlap tihloh kha thil thleng a awm zui em tih hriat ni tawh heklo le. Rotluanga pawh lo thleng chhunzawm ve nghal in a bialnu hlauthawng tih hriat tak a lo ding khur hlak hlak lam chu pan leh thuai in ava kuah zui ta vat. Chutia a bialpa meuh a hmuh ve takah cbuan Mahruaitei rilru pawh hahdam zui tawh tak hi ani a, thlamuang tak hian a thaw zui siai siai mai.

"Bawihi, khalai hmunah khan eng ti turin nge i va kal hrim hrim?" 

Mahruaitei chenna hmun an thlen tawh hnuin Rotluanga chuan a han zawt hnuhnawh a. Mahruaitei erawh chuan a bialpa zawhna chu hria ang pawhin a lang lem lo. A hma zawn chu ding tak hian a melh ngar ngar a, a coffee ken lai sa ṭha tak chu dawt leh hlak in muangchang hian a rawn hawichhuak leh

"Min bia emni?!" A tih tak sap ah chuan Rotluanga pawh alo thaw deuh hawk a. A rilru nawmloh na te chu dahṭha  in zaidam zawk hian a zawhna ngai bawk kha a rawn zawt nawn leh ta. Mahruaitei hmel pawh rawn pangngai chho veleh mai in a nui zui ta ringawt a.

"Ka hrelo le, keimah ah hian tur tu engemaw tak a awm tlat a, thil engemaw hriatchian duh hi ka nei ani. Ka hrelo Bawiha, ka buai khawp mai" a tih tak nawk nawk ah chuan Rotluanga pawhin zawhna zawh leh pawh duh tawhlo hian ava kuah ta hle hle zawk a. Ngawi reng in mahni ngaihtuahna ve ve kawm chung chuan an thaw dun ta hle hle mai.

Hetihlai vek hian Fahrah chenna in lam pawh an mu reh ṭhiap tawh a, zan dar 10 a ri tawh nghe nghe awm e. Naupang ho an mu fel tawh em tih enfiah tur a kal, hnathawk zing ami nula la naupang tak Jenny chu room te fang kual in inchhung te chu a endik leh thlap phawt a, tichuan inchung lam enfiah zo in hnuailam ah a chhukthla leh. Choka lam enfiah tum a a lut tur chiah chuan thawm a hre zui ta. A ke pen lai pawh tawp chawt in thawm a hriatna damdawiin lam hawi chuan a ding khawng ta reng ringawt a. Thawm chu engdang nilo in naupang phun ser ser ni ngei pawhin a hre lehzel. Naupang mu ve lo an awm emni aw tih ngaihtuah pah chuan damdawiin lam a pan zui hlawk hlawk a, a chhung a han luh erawh chuan alo thim khup leh ta nghal. Mahse, kawngka bul mai a awm switch chu hmet thuaiin chu eng ah chuan thil hmuh ava nei ta e! Karei! Khum kil ber a damlo mu reng Rualthanchhingi chu a khumah thisen nen a inchiahpiah nuaih hian alo mu tawh a, chu chauh chu thil awmdan ala ni lo cheu. A bul lawk ah chuan hmeichhe naupang Hildai ngei mai kha a kawr leh hmai vel a thisen kai nuaih hian alo ding tlawn ve reng bawk anih chu! Light a rawn en takah cbuan rawn hawichhuak in kawngka bul a ding an Miss chu a rawn melh zui ta rawm rawm mai a. Chutah le, an miss tha khur nasa lutuk leh chet nachang pawh hretawhlo chu rawl chhuah meuh hian a au chhuak ta nghek. Inchhung pum mai chu a khawk rum run thei hial ani. An miss ṭe thawm ah chuan mi zawng zawng harh in damdawiin lam pan chuan an rawn tlan khawm ta khup khup a. Hotunu Pi Rami'n thil awmzia a han zawh vel lai chuan Rualthanchhingi kha thisen nen ala mu nuaih bawk. Mahse, mak tak maiin Hildai erawh a mut kawr fai nen eng thil pawi mah khawih lo ang tak hian inchung aṭang alo chhuk ve mek thung si. 

Hildai hmel a han hmu chiah chu Miss Jenny hlauhthawnna a zual a, a kawk khur zui ta ngat ngat mai.

"He, he nau hi pawi khawihtu chu ani. Pi Ram, he nau hian a that tih ka chiang ani" a tih tak nawk nawk ah chuan chulai hmun a awm ho chu an phu zui dual. Hildai ber mai chu a phu nasa sa ah ṭang in a hamhaih hle tih pawh a hmel ah a lang thei a, a ṭap lo chauh hi ani mai e. Chutiang thu a han sawi ta mai chu Pi Rami tan tak pawh a ngaihna hriat a har hle dawn a, anni pahnih hmel tawn zak zak in chutah, rang zet a Hildai bân chelh sak chung hian

"Sawi rawh. Heng thil zawng zawng hi nangma tih vek ani tih hi sawi rawh, zep nei hlek suh ang che aw" ati zui ta khur khur. 

"Anu, engmah ka ti lo, engmah ka ti lo. Ama tih vek kha alawm" atih hlak hlak lai chuan midang chu an lo in enkual hrek hrek. 

"Tumaw? Tu tih maw ni a? Sawi vek rawh a zavaiin"

"Amah kha!"

"Tunge amah chu. Dawtsawi tum miah suh"

"Dawt ka sawi lo. Amah khan a ti vek ṭhin alawm. Engmah ka ti lo. Ka duh hleinem" ṭap chunga a sawi zawh rual chiah chuan a bân bawk chu phih zui sak nghat in pawn ah a kai chhuak ta dawr dawr a. An chenna hmun aṭanga pen sawmhnih awm velah hian In tereuhte pakhat hi lo awm in chulai hmunah chuan a thehlut leh rawk. Kawngka khar tum a intintuah leh pah hian

"Hetah hian thudik i sawi hma zawng chu i awm tawh ang. Chhuah ruk kha lo tum buai hlek suh ang che" ti ram hmarh in a inher zui leh nghat a. Mahse, kawngka a khar hma chiah chuan hnunglam aṭang thawm lo chhuak in amah chu rawn nuihsawh tu an awm ta tlat. A nui ker ker a, Pi Rami chu a tham lo hle tih pawh a hriat theih awm e. Ani pawh hrilhhai leh bangbo zet in muangchang hian a han inher zui leh riai riai a, ekhai! Hildai khan chiang zet a amah chu lo melh in ala nui deuh kar kar mai nia! Mahse, chuti mai mai a tih hlauh chi chu ani awzawng lo ang. Pathian a piantharna diktak chang mihring kha ani tlat a, a hlau chhin ṭhak lo bawk. Ner sawk in kawngkhar chu a khar ṭhuai a, kalh zui leh rawk rawk in a kalsan ta nal nal mai.

 Rualthanchhingi ruang chu sawngbawl in an bualfai zui a, a zan la la chuan an vuiliam nghal bawk. He fahrah chenna hmun hian hmun ram zau ṭha tak mai a nei a, chutah chuan he hmun a naupang awm te hu an lo boral anih pawhin an in phum ve mai ṭhin. Chutiang chuan he hmeichhe naupang ruang pawh hi an ramchhung ah ngei an vuiliam a, an phum zui ta anih chu. Tin, chu zan chu muhil tawhlo in an meng tlaivar ta ṭhak hlawm a, khua  a rawn var ṭan dek dek lai te chuan naupang te zual ho phei chu an muthlu lawp lawp tawh mai. Khua a var chiang ta maw tih rual in Pi Rami chuan Mahruaitei bawk kha ava call leh a, vanneihthlak takin ani pawhin chumi ni chu an chenna hmun rawn tlawh leh a tum thu alo hrilh ta hlauh. Pi Rami pawh a lawm ngei mai. Tin, thilthleng engkim te kha phone ah chuan hrilh zui ve in, Hildai a khungbo lailawk dan te, police ah pwh eng report mah a thehluh buai duh lem loh dan te chen chuab alo hrilh. Mahruaitei awm pawh chu a nuam lo zual sawt ngei ang le. Tichuan, chawhnu lama inhmuh theih tumin call pawh chu anti tawp zui ve ta a. Pi Rami nen an inbe zo chiah tjh in call dang a dawng leh zat. Mahse, Rotluanga niin call pawh a la zui leh vat a..

"Hello Bawihi, pawi ka ti lutuk!"

"Eng chungchang nge ni a?"

"Hei duty na aṭang ka haw dawn chiah a, eng lo, tun mai khan Pu Remruata chu a chatthla ta anih kha" 

Mahruaitei pawiti lutuk chu a mitsulh thei hial nia. Thuruk tamtak a hriatchhuah theihna tur ber nia a hriatin mual a liamsan leh si anih chuan engtinnge maw hma a han lak zui tak ang le. In control tum tak hian a aw te chu a han thian kual vel te te a, a aw khur dar dar erawh a thup bo zo chuang silo

"Bawiha, englo, vawiin chu min pui leh ta che" ati chhuak ve hram.

"Keimah ka nilo. Engmah ka ti lo bawk. Thil ṭhalo engmah ka ti lo. Amah vek kha, ama tih vek kha ani" tiin a sawi ngai ringawt sawi chuan Hildai pawh a tawmna hmunah alo phun chhuak ve char char a. Hnung leh hma zawng hian a bu zui tlauh tlauh bawk.

"Tunge ka chhungte, chhungte ka neilo. Tumah ka nilo a, kei hi ramhuai fa maw?" Tiin amah leh amah chu a in zawt a, a nui zui ta kar kar mai. Chutihlai chuan pawnlamah a thawm ngaithla ru in Pi Rami kha alo ding ve reng a, chutia hmeichhe naupang ve mai ni a lang in ṭawngkam maksak tak a han chhep chhuak vel chu a ngaihna hrelo tih hriat takin a chal a chuar leh nang nang ṭhin. A nihna takah chuan he hmeichhe naupang hi a khawngaih a, ṭanpui theih pawh a chak. He hmun alo thlen tirh ata tawh kha amah ah hian a rilru bet tlat in ngawi reng te hian alo ngaihtuah zui leh veng veng ṭhin a, a chanchin kimchang hriat a duh a, hrethei tu tur hmuh fuh pawh a duh hle ṭhin. Mahse, chumi avang ringawt chuan mi hrang hrang han rawih ngawt chi ani der silo. Chuvangin, amah be thiam a zawt chhuak thei tu tur ni a a hriat leh rilru lam doctor ni bawk Mahruaitei pawh hi ruai a tibuai fo kha ani reng ani. Alo ngaih anga hmeichhe naupang rilru buai satliah nilo, ramhuai lam tihbuai daih alo nih pawhin ani hi chuan harsatna a neilo a, a nun khalh ngil nan leh kaihhruai nan Pathian thu hmang pawh a beih mai chu a hreh hauh lo. Mahse, tunah erawh chu thil chu van a rah ang ala ni si a. Hriatchhuah tur tamtak hi an la kuh ṭun niin a lang ani.

"Bawihi, eng thil chiah maw Fahrah chenna hmunah chuan kan tih dawn a. I hna nen a inthlunzawm thil te ani emni?" Tiin motor gear tuai vir pap pap pah chuan Rotluanga chu a rawn ṭawng chhuak sup a. Mahruaitei erawh chu pawnlam en in alo thle sawn daih thung. A hna hrim hrim hi thil awl ai ni lo mahse, tun ṭum ami erawh a khirh in  vir kual vei hrep a, hetiang thil hi chu a vawikhat tawnna ani hial bawk. Chau tih hriat taka Rotluanga melh let ve pah hian

"Kan thlen hunah i hre ve zel mai ang. Thil inthup tamtak hi a awm tlat niin ka hria ani" rawn ti sap in pawnlam bawk chu a melh zui leh veng veng. Rotluanga pawhin zawt zui tawh lemlo hian hmalam en chungin gear chu ala tuaivir pap pap reng a.

Darkar tam an tlan leh hnuah Fahrah chenna hmun chu thleng zuiin Pi Rami pawh khan alo lawm hle bawk. An pathum chuan inzui nghal in Hildai an lo dahna lam pan tur chuan kal zui ta dial. Kal pah chuan titi zel in Mahruaitei chuan Pi Rami bulah

"Pi Ram, Hildai taksa leh a hâ tih vel te hi check up in la neilo ang tiraw?" A rawn ti chhuak hlawl chu Pi Rami pawh alo meng buai nak mai. He hmun a rawn dah luh anih aṭang khan chutiang thil reng reng chu amah bikah an la neih loh dan leh a nachang pawh alo hriat mai loh zia te hrechhuak nghal uarh uarh in a inthiam lo lek lek. Mahse le, amah ngawr ngawr chu dem theih ani bik hauhlo ang. A nihna takah chuan he naupang mak danglam takin an chenna hmun a rawn awmchilh ve aṭang khan buaina hlir hi an hmachhawn zui chu ani ta mai si a.

"Ee taka, i sawi takah chuan chutiang lam reng reng amah bikah hian kan lo la nei hauhlo a, a rawn awmna te ala rei falua lo bawk nen kalo mang nghilh daih alawm le aw" pawi tih hmel tak hian a rawn ti zui ta vawng vawng. Mahse, Mahruaitei chuan nui var var chung a lo chhang let thuai in

"Hei ka ṭhianpa hi dentist ani tho bawk a, tin, naupang specialist ani lehzel bawk. Pawi itih loh chuan naktuk lamah kan check ve reng reng dawn emni ang? Tiraw?" Atih leh chuan Pi Rami pawh thawl ta hawk tih hriat takin a thaw zui halh a, a nui zui ve var var mai.

Tichuan, Hildai awmna hmun chu thleng zuiin Pi Rami chuan kawngka a han hawnsak thuai thuai a, ani erawh an chenna lamah let leh in anni chu hun thawl a siamsak ta zawk ani.

Chu pindan zim leh chep tak mai chu a thim deuh khap avangin a rapawm thei lek lek hial mai. Chutihnak alaiin Rotluanga pen lut tur chuan thil engemaw hi a pal ri rawk a, an phu nasa dun teh e. Mahsela, an han en chian hnu erawh chuan hlauhawm lam nilo in Hildai chaw thleng ruak zawk ani tih an hre leh a, an nui zui ta hak hak.

"Eng nge in lo tih dawn?"

Chu aw vawt raih mai chu bangkil thim zual lai aṭanga rawn ri chhuak niin,  anni pahnih pawh a thawhnih na atan an phu dun leh zawk. Mahse, hmeichhe naupang mai ani tih an chian em avang chuan ngai an awh zui leh thuai a, an in nuih sak. 

Hildai pawh êng in a chhun phak chinah chuan rawn ṭhu chhuak ve tawh in a hmel erawh ala thutak ngal ngal hle a, a nelawm viau lem loh.

A mutna khum bul a chair pahnih lo awm sa chu hnuhsawn pahin Mahruaitei chuan nui var var chung hian

"Ilo damṭha em? Hei, a rang thei ang ber a rawn hmuh leh che kan duh a, kan lo kal anih hi" atih chuan Hildai thung chu alo la ngawi reng a, anni pahnih hmel mawlh chu rinhlelhna mitmeng hian a melh tawn zak zak ringawt. Mahse, awki zangkhai zawk a Rotluanga'n a rawn biak ve takah chuan Hildai pawh lo insiam ṭha ve thuai in za fahran lo in a rawn nui ta var var a. A nui hmel hmuh tur a tlem vang nge maw ni, chutia nui hmel chhete a han lantir takah chuan hmeichhe naupang hmelchhe lo tak anih zia pawh a hriat theih uarh awm e.

Hun an khawhral tam hma in an zawh tur ang ang te chu zawh a hun tawh tih Mahruaitei chuan a hrereng a, mahse, bul han ṭan mai dan tur ah chuan a buai thung si. Zahzel ah a aw te chu thian hmasa leh te te in a bag chhung chu a hai ta rak rak mai a.

"Hei en teh, eitur engemaw kan lo ken sak che a. I duhzawng ani em?" Tiin lollipop kuang sei zet cbu rawn lek va va chung hian Hildai chu a han nuih tlawn leh phawt. Chu thil pawh chuan Hildai hmel puthmang chu a ti danglam chuang miahlo. Chumi chuan naupang dangte nen an danglam nasat zia pawh a hril fiah kuarh awm asin. Mahse, nui seih pah hian lollipop chu a rawn ban ve tehmial a, Mahruaitei leh Rotluanga lo insehruh ṭung tawh te pawh chu tlem in a vaw dai thei ta hlauh e.

"Ka lawm e" ti vei sap in a kun zui ta daih. Chutah, rang takin Mahruaitei chuan a khabe ah va dawm sak in

"Bawihte, tunah hian i chhungte bulah kan hruai haw ang che aw. I duh em?" Atih thung chuan a lu alo thing zui ta nawk nawk a. Anni ṭhiandun pawh an in melh zawk. Rotluanga zawk lo ṭawng chhuak ve leh in

"Anih leh bawihte, in chenna veng hming tal sawi la, tichuan, a nu leh a pa te bulah i chanchin hi kan sawi anga, an lo hruai miah lo ang che. I duhloh tlat chuan kan hruai tir dawn lo reng reng che ania. Kan veng dawn che alawm. Ti rawh le, han sawi teh le" alo ti dam thluam. Naupang specialist tih takah naupang han biak vel dan pawh alo hre nual anih hi a. Mahruaitei pawh alo nui ve sak mai.

"Nu leh pa te ka nei hleinem. Kei chu khami fa kha ka nia, ama ta chauh kha ka nia"

Hildai ṭawng chu zawi hle mahse, chulai hmun reh takah erawh chuan a ring in a fiah ṭha hle thung si. Chu thu a sawi zawh rual chuan anni pahnih thung chu mak tihna mitmeng nen in melh zawk in Hildai lam bawk an hawi rual leh. A han sawi vel dan hmang aṭang khan ngaih chu a ṭha duhlo viau ngei ang.

"Bawihte, tunge amah i tih chu? A hming tal min han hrilh ve teh. Biak ve te pawh kan duh ania" 

Mahruaitei chuan alo ti chhuak vat a. 

"Duh duh hunah a biak theihloh! A be duh lo bawk che u"

Anni ṭhiandun chu mak tihna hlir in an khat tawh a, an in melh ngawt ngawt ringawt bawk. Hmeichhe naupang ve mai in a thu lak kual duhdan leh sawikual vel dan chuan Mahruaitei dawhtheihna ti chhe ṭan in hun a khawhral thlawn mai ni hian a inhriattir ṭan tlat tawh a, vin deuh ṭhak in

"Anih chuan Hilda, Pu Remruata kha nangmah hringtu che i pa diktak ani tiraw?" A rawn ti ta hmak mai. Rotluanga chuan lo kheuh zeuh mahsela a ngaihsak duhlo lui ve tlat tawh. Chu zawhna a zawt zo chiah tih chuan Hildai chu muangchang hian a rawn hawichhuak ve ta a, chimawm taka anni pahnih nuih ver ver pah chuan

"A ni kha ka pa ani lo bawk e! Ka pa chu ka sawi tawh kha!" A rawn ti chang zui ta fak.

"Dawt sawi kual reng tur atan chuan ila nau deuh lo maw Hilda! In veng hming kan hria a, a awmna chen in kan hre vek bawk. I nu pawh tun a a awmna hmun nise kan hria aw. Zep bo tlat kha chu tum tawhlo la, engkim a fel vek ani mai. Le, tun atan i tihtur chu hetah hian fel deuhin lo awm phawt la, naktukah khawvar hnuah i hâ kha check up tih a ṭul dawn aw"

"Ani kha ka pa ani lo ka tih chu! Tu fa mah ka nj lo. Amah chauh kha ka pa neihchhun ani ka tih mawlh mawlh chu"

Hildai chu a ṭawng pawh ni tawhlo in a au hi ani ber tawh zawk. Anni pahnih thawh chhuah tum a lo inring mek te pawh chu an tawp zui chawt a, makti zet hian an in en leh vung vung ringawt tawh. Mahse, Mahruaitei zawk chuan thinrim aw khur hlak hlak leh chang fak a

"Awle, engpawhnise, i nu awmna hmun kan hretawh tho a, chutah chuan kal in kan va zawt fiah tawh mai dawn ani. Nang erawh, naktuk hun atan lo in puahchah ang che" tiin an tho zui a. An chhuahsan dawn a ruai ah Hildai bawk chuan nui kar kar chung hian

"Engkim chu in va hriatchian ngei ka beisei" tiin rapawm ru zet hian a nuih zui leh ta kar kar mai a. Anni erawh in rap ru viau tho mahse, ngai pawimawh duh lo in an chhuahsan ta zawk ani.

Pi Rami hnenah pawh engkim thil thlen dan chu hrilh hre ve in tuna a tawmna hmunah hisn lo la dah reng tur leh a tuk lam a in check up tur a an rawn hruai chhuah tur thu chu hrilh in an haw san zui ve ta a.

Zan hun alo thleng a, Mahruaitei chenna in ah chuan zanriah buatsaih in Rotluanga pawh in chaw chu a han ei leh te te phawt a, chhun lama an kalna chungchang mak an tih zia leh an chet lak zel dan turte ruahmanna siam in zan dar 9 velah chuan Rotluanga pawh a chenna lam pan turin a inkhalh haw ve ta hram chauh.

Mut hmunah chuan ngaihtuah zuiin engtinnge hma an lak chhunzawm zel ang tihte ngaihtuah chuan a buai ru ve hle. A landan chuan hemite pathum, Hildai, Pu Remruata leh a nupui Pi Sangkimi te hi chhungkua ngei chu annih hmel ta viau a. Chuti alo nih si chuan a biak tlak ber tur pa ber lah in chatuan ram alo pan san tawh vel rawl nen, tunah chuan nu ber, pi Sangkimi chiah thu zawhfiah tur an nei ta tihna ani a. Ani hnen aṭang hian an fanu anga lang Hildai chungchang leh an chhungkaw thuruk mak inthup zozai te chu an hrechhuak thei ngut angem. Alo biak tlak meuh angem? Zawhna te chu ṭha tak leh fiah fel tak siin alo chhang ṭha duh meuh angem le. Chung zawng zawng zawhna chu ani hian chhanna a nei lo mai ni lovin a chhanna lah a hre heklo. Chhanna zawng zawng te chu Mental hospital a awm mek, Pi Sangkimi chiah in a hria tihtheih tur ani ta. A thaw hawk a, in let zui tap in muthilh mai a tum. Mahse, ngaihṭhat loh na mak tak mai hian rawn tuam deuh hlup hlup in hnunglam aṭanga amah rawn en reng tu chu awm tlat a hriatna a han nei zui lehpek a. Chutihlaiin a choka lamah lah thawm riva hriat tur alo awm ve sek bawk nen. A mu ṭha hle hle theilo chu a tal kual sek tawh. Tho chhuak tur em chuan a huaisenna in a tlin loh piahlam ah thawm chu a lian in a bengchheng hran lo bawk a, ala ngai zam thei zel. Mahse, a hlauh rukna erawh chuan kiansan mai thei lo in a uap bet churh thung lawi si. A tawp ah zawng, a tihngaihna dang hretawh ngang lovin a bialpa ava call ta ringawt a, ani lah chuan alo chhang thei der lo lehnghal. Mangang zet a thaw hak chung hian a ṭhu chhuak hluai a, choka lam pan tumin a tho zui bawk. Ni e, a hresual love, amah thlir reng tu kha an awm chiang alawm. A hmu hman lo chiah zawk ani.

Choka ah lut in thawm ri lo chhuahna ni thei tur awm, tui hmun tih vel te chu a han check ṭha ta zung zung a, mahse tui hmun bul a bawlhhlawh bawm tereuhte a hun chhung aṭang ngei mai chuan thawm chu alo ri chhuak zawk ani tih a hre ta. Chu lam chu pan leh vat in a thleng phei thuai a, chutihlai te pawh chuan bawlhhlawh bawm chhung chu ala ri rek rek reng tho. A bawm chhin hawn tum a a zu ban chiah tih in a chhung aṭang ngei mai chuan sazu dum lian em em mai hi a rawn tlanchhuak ta phut anih kha. A phu phar nasa lutuk chuan zanlai pawh sawi tawhlo in awrawl a chhuah ta chiam a, room lam pan in a au ṭial ta ruan ruan bawk. Khum chungah tlan lawn leh vatin blanket chuan a inkhuh zui ta hmak a, a thaw ta dep dep. Chutia rei ve tawk tak a awm hnu chuan a thil tawn te chu ngaihtuah zui leh in holam a ti hle a, a ma hriat tawk lek si hian a nui zui ta kur kur mai.

"Mahruaite, dar engzat ah nge hna kal turin i chhuah ang?" 

A zing tho hlim hlawt chuan call dawng zuiin a bialpa farnu Saiziki alo ni khauh mai. Mak pawh ati ru angreng viau. A pasal nimai tawh tur farnu mahnise, ani nen kher hian ṭul tawp ah lo chuan an inbe zen zen lo tihtheih ani a, chu erawh, an pahnih inkar a ṭhatloh vang ani lem lo thung. Ban deuh charh hian Mahruaii chuan

"Ka tho chiah a, ka inhnawhpuar leh thuak hnu chuan ka hman ani mai e. Eng thil nge ni ta?"

"Aaa eng em em phei chu ni love. Mama hi ka be tlang thei miahlo a, vawiinah rawn zin phei ka tum deuh a zanhnih vel riak turin, chumi chu han hrilh lawk ka duh deuh mawle"

Mahruaitei chuan han tih vak dan tur bik a hrelo hle a, mahse amah rawn be tu chu tih beidawn a duh bik chuang silo nen a chil te chu lem zui leh khalh in

"Ava mak dawn ve aw. Ih, kalo call ve chhin anga, chanchin kan inhrilh hre leh mai dawn nia aw" ati zui ve ta ringawt. Call chu ti tawp in a tho zui vat a, eitur te siam leh te te in chutihpah chuan Rotluanga chu call a tum reng bawk. Mahse, nidang a a tih ngai loh ang takin a bialpa chuan call reng reng a chhang thei miahlo nia! Mahse, vawi 10 chuang mah a call hnu chuan ngaihṭhat lohna pawh nei lem lo hian chaw chu a eisan a, insiam zui leh in hna kal tur chuan a chhuak zui ve ta mai bawk.

Damdawiin a thleng a, a hna hmachhawp ang ang te a tihfel leh zung zung lai chuan an thawhpui Doctor Romalsawma lo kal in Rotluanga chanchin bawk chu a rawn zawt veleh ta. Chutia a bialpa chanchin rawn zawttu apiang in an biak tlang theihloh thu leh amah ngei pawhin biak a tum nasat zia te a han ngaihtuah chhuah takah chuan amah ah ngaihṭhatloh na tamtak rawn awm ṭan in a thin te chu a phu zui dup dup. Ni e, tun hi a hna kal hun anj tawh a, biak tlang theihloh a awm hun pawh ani tawh chiahlo tih a hria. Tin, a patient turte pawhin an nghak ṭhup tawh ani a, a doctor ber lah call chhang thei lo, hna pawh rawn kal silo in a ngawi bo mai mai chu ani a. Thil fello engemaw tak zawng a awm ani tih chu tu hrilh hriat hranpa mah a ṭul tawhlo a, a kawrchung la vat in a office chu a tlanchhuahsan nghal nal nal.

Kan la sawi rik tel miahloh chu, Rotluanga hi mahni mai a khawsa ve niin thingtlang khaw pakhat aṭanga rawn awm ve hi ani a, a in luahna hmun pawh hi hmun fal leh reh chu ni chiahlo mahse, concrete chhawng tamtak zing a floor pakhat luah ve mai kha ani a, chutin a coloney te nen pawh an in tlawhpawh hran lo a, an inluhpawh khat hle bawk. 

A motor speed chu tisang in karlovah Rotluanga chenna building pawh a thleng zui ta thuai reng a. Rang tak a chhuk sawk sawk in step ah a tlan lawn chho leh zawt zawt. A bialpa awmna floor a han thleng chu alo reh ṭhiap tawh bawk nen nuamlo ati lehpek hle a, mahse hawi khawmuang hman ani tawhlo tih inhria in Rotluanga kawngka ngei chu a kik ta karh karh. Mak tak mai hian rei pawh a kik hma in kawngka chu amah in a rawn in hawng ta ṭiah ṭiah mai a. A hlauhthawnna chu nasa tawh tak hi ani. Mahse rei a nghak hman lo, inchhungah lut zui vat in a bialpa chu a han ko ta lauh lauh mai a, chhangtu awm lo hian a reh zui tlawk tlawk leh ta nghal. A choka leh ṭhutkhawmna lamah engmah hmuh tur a awm tak siloh ah chuan tiin room lam a pan leh a. Ala ko zui reng tho.  Chutah, room kawngka a han hawng chu, a bialpa ngei mai chu khumah lukhup hlun hian alo la mu reng niin. A thaw zui huai a, a lam pan pah a phei zui hlawk hlawk in a ner deuh nak bawk.

"Mut hi chu iva han duh ve tak em. Kawngka pawh kalh lo in i mu a, nizan i haw hnu khan i che na zui awm hlemai" tih mawlh mawlh pah in a puansin lai chu a han hlip thut mai a le! 

Mitmu a neilo! A mitmu awmna tur lai chu kaw hung in a dum huam bawk. Ni lo, a ni theilo. A lukham ah te chuan thisen khawro tawh tih hriat zet hi an bet khir luai mai bawk si a, Mahruaitei hlau lutuk chu a dinna hmunah chuan ṭhu zui hnawk in a khur chhe zui chu ani ta der. Reiloteah nikhaw hrelo in a tlu zui ta bawk. Mahse, minute 20 hnuah rawn harh leh in a awmna hmun chu a han hai dawn dawn a, a bo rei lo thung hlauh. Ṭhu chhuak hluai in a vul vel a thil awm te chu a en kual ta zung zunga , police a call ta ringawt. Reilo ah police te leh hospital lama an thawhpui mi ṭhenkhatte pawh rawn lang zui ve in ani kha chu ambulance ah an chuantir ve bawk a, puankawp lian ṭha tak chu sin tir ve mahse, a tha khur a reh fel thei meuhlo a a hlauhna kiam chuang bawk silo nen a khur bauh bauh reng tho mai.

A room, a khumah ngei mut tir niin a chhungte koh sak ani bawk a, an awmpui ta ṭhap. Mahse, chuti chung pawh chuan hlauhna in a kiansan theilo a, a thil hmuh te kha a ring theilo hulhual bawk. Suangtuahna khawvela alo chen veng veng laiin Rotluanga farnu, Saiziki kha lo lang ve zat in an in inhmu ta chu an inkuah thlawp a, an ṭap zui hawm hawm mai. A nâ ani, a hmangaih a chan a, a na takzet ani. Hei ngat phei chu thihdan pangngai lo anih piahlam ah innei mai tur a inhual na nei nghet vek tawh anni lehnghal a. A nat dan tur hi sawifiah sak mai dan tur ka hrelo ani e.

Kan sawi tawh ang khan a chhungte chuan awmpuiin veng reng mahsela, a hlauhna a reh thei chuanglo a, a chi ai em em reng a, chaw pawh ei ṭha mumal theilo in zan ah nise mutmu a tuah ṭha ngam hek lo. A nunkhaw hman mek chu hrehawm tih piahlam tur hi ani awm e. A bialpa, a pasal nimai tawh tur in rapthlak takin a boralsan a, chumai piah ah hlauhna  namen lo in a han tlakbuak leh ta nghal bawk nen a tan chuan khawvel hi a nunrawng in a thim chhah ṭha ve ngawt ang le. Hetihlai hian hna han thawk thei chi ziazang anilo a, inah chuan a tawm deuh chawrh chawrh ringawt mai ani.

Hetihlai vek hian Hildai pawh Mahruaitei thurawn ang leh a khawsak dan ala ziaawm bik siloh bawk avangin a tawmna ngaiah khan kalhkhum ala ni ve reng a., a chhuak thei lo. Mahse le, engemaw chang chuan a ṭhiannu Sangsangi kha a ngaih ṭhin em avangin leh amah Sangsangi pawmpui na thlap ni bawk siin inhmuhna hun reilote an siam sak ve ṭhin a, hun rei erawh an phalsak hauhlo thung. 

Pi Rami pawhin Mahruaitei te chung a thilthleng engkim chu alo hriat ve tawh avangin pawi a tihpui hle a, a tawrhpui takzet bawk. Chutihrualin chutiang thil maksak tak an chung a a han thleng ta mai erawh chu hriatthiam harsa a tiin pawikhawih tu ah pawh he hmeichhe naupang Hildai lo hi chu puhmawh tur dang alo hre ve tlat lo pek a. Mahse, ani chu hetah khungbeh niin a awmna pawh kalh ṭhat tlat ania, chumai ala nilo, a rukin vengtu an in dah reng bawk si. Chulai tak chu a hrethiam lo ani e. Nge ni a, he hmeichhe naupang hian tih tirtu a nei nge, amah hian midang kut a hmang ṭangkai zawk ni ang. A thuhrim in Pu Rotluanga chu engvanga that ringawt nge anih tak ang, ni e, dentist ani a, a hâ entir tur a kal kha a hreh lutuk te pawh ani ve thei tho. Umm, engmah hi a hrethiam tawh lo a, a buai nuaih ani ber e. Tun atan chuan Doctor Mahruaitei ṭhat chhuah leh hun nghah mai loh chu a tan tihtheih tehchiam a awmlo ani ta ber.

Hun a liam a, thla meuh a vei leh hnu chuan Mahruaitei pawh rawn ṭha chho ve zel in a mangchhia te pawh khan an kiansan ve ṭan tawh a, zan mut te pawh a awlsam phah ve ṭan ta. Hetihlai pawh hian engemaw thut ah tiin a nu zawk in ala awmpui ve reng a, a thla pawh a muan phah ve hle. Chutianga rawn ṭha chho leh ta na na na chu tawm reng thu awm hek lo, hna te pawh thawk ve leh ṭan tawh in amah pawh hmuh a nuam leh sawt tawh viau a, a landan aṭang mai pawh chuab a awmdan chu a zangkhai vah a tihtheih hial awm e. Kha chen hnathawk theilo in chawlh han la tawh mahse, a rilru kilkhat ah thung erawh Hildai case kha ala thi reng reng lo a, mental hospital a kal pawh a hmabak tih a hre reng. Chumi tur atan a inbuatsaihna pawh chu kalpui chho leh ṭan in a rilru te pawh chu case lamah ringawt chuan a dah leh ṭan ta bawk.

Hun ṭha pawh rawn inher chhuak thuai reng in chu hun mawlh chu bawhpelh a tum hauhlo lehnghal.                          

A thawhpuite hnenah thu thawn hnutchhiah thlap in a chawlh hun chhung tur a hriat mai theihloh thu te a sawi tel nghal vek a, tichuan, rilru leh thinlung inpeih sa at in Mental hospital lam pan tur chuan a inkhalh chhuak zui ta.

He mental hospital hi Aizawl khaw chhuah lam hla deuh tak a awm niin, a fal ṭha reih rawih hle a, hei vang tak hian a hmun thlen nan pawh hun chu a duh rei ve phian. Mahruaitei pawhin speed pangngai taka darkar 2 leh a chanve chuang meuh tlan nan hun a hman hnu in a thleng thei ve ta hram. Motor aṭanga chhuk in a hma lawk a In lian fahran leh hlui rep rup tawh zet, pawnlam aṭang mai pawh a ṭihbaiawm thei hial zawk si chu thlir in a han dak chho ta voh voh mai a. Hei ngei hi ani e, Hildai nu awmna damdawiin chu ti sup in a piahdeuh a dil an khuap niawm tak lian vak lo, nu but mai lam chu thlek leh zeuh in a chhung a lut tur chuan a pen ṭan ta. He hmun a kal hma aṭanga an hotute lo be lawk tawh anih angin thawktute pawh chuan an lo dawngsawng ṭha viau a, ani tan tak pawh a hahdamthlak hle awm e. Amaherawhchu, chutihruai in chu hospital  a awm mek damlote mawlh chu ani paltlang harsa ta chu. Manager office lam pan a an kal lai te chuan hmeichhe pakhat sam bawrchhawr zet hian rawn nul thuak pahin

"Ka û, Tekheuh-i kha a dam em? Ka va ngai tawh ve aw" alo ti hlut a, a nui deuh ṭhaw lehnghal nen, chhang let lem lovin an kalpel thuai a, mahse, a hnung mai ah hian palian thelh thulh tak leh lukawlh mul mai chuan lo pawt ding zui leh chawt in

"I pawisa ka ba lo tiraw? Saw, saw ta mi sawn pawisa hi i bat sak min ti reng mai, a mawl asin aw" tiin chu pa chuan bangkil lam chu a kawk zui ta vu vu mai a, Mahruaitei te an han hawi phei ve nak chuan bangkil lam hawi a mi pakhat lo ding, phun mual mual reng bawk si chu an va hmu zui ta mai. Mahruaitei tihngaihna hrelo lutuk chu a ṭhen zui sak ringawt. 

Chutiang zelin chu hmun a damlo awm te chu maksak taktak a khawsa an awm a, ṭhenkhat lah mahni chauh a lo nui vur vur te, a ṭhen te lah fin hmel em em a thil hisap ngar ngar te, ṭhenkhat ve thung chu damdawi ei duhloh vanga an rak tuarh tuarh laiin a ṭhen an lo nui awr awr thung a. A luhai thlak lam mah zawk ani. Mahse, zawimuang a anni ho chu kalpel zelin an manager room pawh chu an thleng ve thei ta hram e. Hmundang ang lo tak in chulai hmun erawh a kil lama awm anih vang nge alo reh ṭha khawp mai. A tir aṭanga amah buaipuitu leh hruaitu tlangval chuan kawngka chu kik hmasa karh karh in an lut zui ta ani 

Chu hmun a an manager chu Mahruaitei rinloh dan deuh hian a pa te reuh hle a, a lu a kawlh ral lehnghal. Mahruaitei hmel a hmuh rual chuan hlim hmel pu sâng a rawn ding chhuak in a kut a rawn phar chhuak vat a, an in chibai zui.

"Ṭhu rawh. Tah khan ṭhu rawh" ti mawlh mawlh in a hma a chair awm chu a kawk zauh zauh. A awmdan zik zek chuan Mahruaitei hrilh a ti haiin maksak ati ru hle nghe nghe bawk.

Muangchang a ṭhut thlak ve pah hian Manager chu a han ṭhen khum ta sak a. A landan aṭang mai pawhin chu hmunah chuan a thlamuang lo a, a zam ru takzet tih a hriat.

"Aw, tichuan helai hmun a ilo kal nachhan chu--?" Tiin a hmazawn a lehkhabu hlai lian angreng fe chu a han keu zui leh nuap nuap phawt a, a chal a chuar nang nang bawk. Mahruaitei'n chhan ve tum a a kâ alo an zuau lai tak hian amah bawk chuan

"Umm, hei hi ani e. Cabin number 56 na a awm mek, Zosangkimi, Pi Zosangkimi rawn hmu tur kha ini tiraw? Ih eng lo, doctor, doctor--?"

"Doctor Vanlalhruaii ka ni e"

"Aa ni tak e. I hmuh duh nachhan hi chiang takin hrelo mahila, an chhungkaw chungchang vang anih ka han ring ringawt a" a rawn ti zui leh nawk nawk.

"Chu chu thuruk ani hrih e. I hriattur awm chin chu ka rawn hrilh tawh che kha" alo ti let ve hmak. Chu zet chuan manager phusa lutuk pawh chu tidai deuh in a meng fiah ta kawk mai a, an bula lo ding ve reng tirhkah kha alo khi sak bawk. Chutah, a hma lawk a ṭhu chu chiang zet a melh leh vang vang in reiloteah a rawn bu zui ta nghut nghut. Tichuan, an bul a tlangval lo ding reng tirhkah chu hui zauh in

"Kan pi hi cabin number 56 ah khan han hruai ta che. Leh lawkin, in fimkhur dawn nia" tiin Mahruaitei chu a rawn ṭhen khum ta zuk a. Ani erawh lo ner zui sawk in a tho a, an chhuak zui ta daih.

Cabin Number 56 kawngkhar chhah leh rit pui mai chu tlangval khan a han pawt hawng ta ṭual ṭual a, a ri rum rum thei ni hial hian Mahruaitei phei chuan alo hre nghe nghe. Kawngka chu zau lutuk lo a hawn sak in

"Ka pi, i duh chuan a luh theih tawh e. Tin, nangmah veng tur che in hetah hian kalo awm reng dawn nia" ti sap in a ṭhen zui ve sak. Mahruaitei pawhin chu chu alo pawiti lemlo hle a, a chhan pakhat pawh he hmun hi a ngainat loh chu thuhran nise, helai bawr a mahni chauh a maltlat vel kha a chak zawk zawk lo bawk. Zawimuang hian kawngkhar in hawngah chuan lut in chhunglam chu a han bih zui dek dek phawt a. Chutah, hmeichhe pakhat, kawrfual ha, sam bawrchhawr zet leh bang lam hawi a lu lo bu tlauh tlauh bawk si chu ava hmu zui ta mai reng a. A ṭim deuh sawk thei nia. Room chhung a luh chian hnu chuan kawngkhar kha zawimuang hian tlangval khan alo khar ve leh mek bawk nen a zam chhe lo chauh tawh hi ani mai e. Mahse, chu chu a duhdan anih loh bakah, inpuahchah lawk thlap a he hmun hi pan kha ani bawk a, a zam chhe tur anilo tih chu a infuihdan nasa ber ani nghe nghe. Zahzelah tiin a aw te a han thian hmasa leh te te. Chuveleh banglam hawi a bu tlauh tlauh nutling pawh khan a thiltih lai chu tawpsan chawt in zawimuang hian amah lam hawiin a rawn in her ta riai riai.

Zam chung chung hian Mahruaitei chuan alo nuih ver ver thung a. Mahse, a harsa takzet. Tihluih chu harsa ve tak ani e. A chhan pakhat pawh, kha nutling, Hildai nu Pi Sangkimi ngei kha ani tih vawikhat alo hmuh tawh avangin la hre tho mahse, a hmai chu a dum in a sawrbawl tawh hle a, a cher chhia in a taksa chu a khur beuh beuh reng bawk nen. Chumai ala ni lo, a mitmeng te chu rapawm ru tak ala ni lehzel a, a rilru a fim tawhlo hle ani tih hriat tak hian a meng phawk hru ringawt tawh.

"Pi Sangkim, ka hming chu, ih eng lo, Doctor Vanlalhruaii ka ni a, helai hmunah hian nangmah rawn kawm chiang tur che a lo kal hi ka ni e" a aw khur nasa lutuk tur chu thup ve hram hram a tum nangiang mai. Pi sangkimi thung chuan chhang ta mai lo hian a dinna lam chu a rawn pan ta chhut chhut mai a. A kut khur nasa tak leh a taksa dang khur hlawk hlawk te, a mitmeng phawk fahran mai leh a engkim zawng zawng chuan tirila fan a, Mahruaitei pawh chu thil vel vang chuan ip nasa tawh tak hi ani ringawt. A hah hluah hluah tawh zawk awm ea. Sangkimi chu a bul chet ah rawn ding in amah chu a rawn hnim kual ta thut thut a, a rim han chhiat zia lah chu namai lo tak hi ani e. Mahse, vanneihthlak tak hian rei pawh chutiang a awmzui lovin a khum lam pan chuan a inher zui leh daih. Ngawi reng a thlir mai loh chu Mahruaitei tan tihngaihna a vang hrih hle a, a en zui vang vang ringawt. A khumah chuan ṭhu in a rawn be ve mai dawn emaw a tih lai chuan bangkil lamah bawk a phei leh a, ava phun zui leh ta mual mual mai le. Chu zet zawng, hun vawng dik tak leh hun hi tangka ani tih hre tu Mahruaitei chuan ngai thei tawhlo in biak ṭawng ngei a hun ta tih pawh a hria. Chhuanlam ah a aw chu thian leh khak khak in

"Pi Sangkim, inkawm lawk chu i hman em? A bikin inchhungkaw chungchang te, i pasal fanaute chungchang pawhnise" a tih lai chuan bangkil lam a ding chu a thil tih lai tawp chawt hian a ding ngawi leh ta vung vung mai a. A ngaihṭhat thlak loh kher. Mahse, Mahruaitei chuan vengtu a nei tih in hrereng chung leh he nu hian a thusawi te hi a hre ve vek ani tih hrereng chungin a thusawi lai pawh chu a chawl zui duh bik miahlo a.

"I pasal boral thu te kha ilo hre ve tawh tho in ka ring a" a tih lai chuan zawi sap hian Sangkimi chuan

"Amah kha a lungawi tawh emni?" A rawn ti khauh. Chu chuan Mahruaitei thusawi lai chu ti tawp chawt in a ngaihna a hriatloh hmel ta kher. Bangbo tih hriat zet a thlek deuh hâ pah hian

"Tunge amah i tih chu. Tunge i pasal thihna vanga lungawi tur chu Pi Sangkim. Min han hrilh ve teh a, khawngaih in"  a nghak zui vang vang a, Sangkimi erawh a din ngai reng a ding chung chuan ala ngawi reng thung si. A hahthlak in inkawmna hun nuam lem lo tak te pawh ani thei awm e. Mahse, a ni hian beidawnsan mai mai chu a tum hauhlo. Hei chen hi a kalpui tawh a, eng thuruk pawh lo inphum mahsela a tawp thleng a kal kha a tumruh tlat tawh ani.

"Pi Sangkim, ka zawhna chu min chhang thei hram angem?" Zaidam taka a tih leh hnu chuan thawklehkhat ah hian Sangkimi chu a lam hawi a rawn inher vutin chak zet hian amah pan chuan a rawn kal zui ta mai a. Mahruaitei alo ip chawih hman tawh. Mahse,  a lai laklawh ah chuan ding chat in aw zawi leh khur khur hlak hian

"Tawpsan tawh rawh. Ani kha i hneh thei ngai lovang. I tawpsan lo anih chuan ala ti hlum ve mai ang che. A veh mek che a, hun ṭha pawh a zawng vel mek ani" a rawn ti ta mai. 

Mahruaitei hriatthiam tur zawng in ani hian thil a sawi ngai reng reng lo a, tunge amah tihhlum tum s veh mek tu a tih pawh chu a hre bawk heklo.

"Pi Sangkim, tu chuan maw kei hi min tihlum ang? Ramhuai in maw?" A tih let leh tak hû ah chuan Sangkimi pawh alo ṭhen ve sawk thei. A ha mawlh mai kha a dum ṭha em em lehnghal a, rapawm duh tak ani. 

"Aw, amah kha. Kha thil rapthlak tak khan a la tihlum dawn che. I pasal hual a tihlum tawh a, a dawttu chu nangmah hi ini! Tin, keipawh hi min veh reng a, keimah hi, kei ngei pawh hi" a tih leh mawlh mawlh lai chuan a thilsawi tak avang khan Mahruaitei chu alo nghing dawt thung. A mipa hmangaih, a pasal nimai tawh tur Rotluanga thihna nen pawh khan heng thil te hi an lo inzawm vek ani tih chu a hre ve ta chiah. A insehruh nghal kher mai.

"Anih leh maw, in fanu Hildai chungchangte kha hriatzui i nei ve em?"

"KA FANU A NI LO!!"

A ṭawng chu a ring in a fiak ṭha hle a, room chhung pawh a khawk rum rum thei hial nia. Mahruaitei phu nasa lutuk pawh chuan maktihna mitmeng nen phawk fe hian Sangkimi chu alo melh ve reng ringawt. 

"Ani kha ka fanu ani lo! Amah, kha ramhuai sual tinreng a khat fanu ngei kha ani zawk" a tih khur leh hlawk hlawk takah chuan Mahruaitei pawh lo pangngai zui leh vat in aw ngaihnobei tak chu a han chhuah lui leh ta hram a.

"Amah i tih chu i pasal Pu Remruata kha maw? Ani te chu a boral daih tawh si a" a tih leh chuan

"Ni lo, kha chu mihring ani e. Midang hi an awm ani. Engkim tichhe vek tu midang an awm. Kal la, thuziak chu va chhiar rawh. Thuruk in ziahna chu va hai chhuak rawh" tiin hlauh nei niawm tak hian a hawi kual hru hru a, a ṭawngkam chhuak pawh a thawp in a zawi ṭha thei hle. Chutihrualin engmah hrethiam  lo Mahruaitei thung chu a bangbo tulh tulh mai si.

"Khawiah nge chu thuruk inziahna lehkha chu ka va hmuhtheih ang. Min hrilh anih loh chuan tihdan tur ka hrelo ani Pi Sangkim" atih leh hnuah erawh Sangkimi chu a ngawi zui leh ta daih a. A sawi hriat hleihtheih siloh a phun zui leh mual mual in a sam bawrchhawr tawh sa zet te chu a pawt ṭil zui ta hmawk hmawk nia. Mahruaitei chuan a awmdan engkim chu hrethiam lovin rap ru hle tawh mahse, ala tuar ve hram hram hi ani ber.

"Ssshh! Thawm chhuah suh. Min enthla reng tu an awm ka tih kha. Haw la, va chhiar chhuak dap ang che. Muangchang miah suh. Ka thlarau zalen nan thuruk chu hailang la, engkim kha hal darh vek bawk ang che. Ti rawh! Ti ang che, hal darh vek la, meivap ah chantir angai. Tunah kal rawh!"  Ti mawlh mawlh in bangkil lam a pan a, a lu chu bang char ah tauh zui chawrh chawrh in a ṭe chhuak ta chiam chiam mai le. Mahruaitei hlau lutuk chuan tuar thei tawhlo in chu hmun chu tlanchhuahsan a tum a, kawngka lam pan a tlan a tum mek laiin pawnlam aṭang kawngka chu an rawn hawng zui ta hlauh. Hmeichhe lian ṭha tak pahnih rawn tlan lut in maksak tak a lo khawsa mek Sangkimi chu an va pawt sawn thuai a, khumah mut tir tumin an bei leh nghek phawt. Chu chu hmu zui thei tawhlo in Mahruaitei erawh pawnlam pan hian chak tak in alo pen ve hmawk hmawk thung a, a khur deuh hlak hlak reng bawk.

Pawn a thleng a, motor kawngkhar hawn a tum leh mek lai hian darthlalang keh chuaih leh a bul lawk a dil lian vaklo nu deuh but mai ri burh thawm chu hre zuiin a hawichhuak leh vat. Karei! Chunglam a han hawi chhoh nak chuan tukverh keh nuaih aṭanga ṭe chul chung hian nichin lawk a Pi sangkimi buaipui tute hmeichhe pahnih rawn dak chu a han hmu ta mai. Rang tak hian dil lam pan chuan a tlanphei ta thuai a, chutihlai chuan chulai hmun a thawkte mipa leh hmeichhia mi engemawzat hi an rawn tlanchhuak ve mek bawk. Dil ava thlen phei nak chuan nunna nei tawhlo tih hriat zet in nichin lawk a a biak, Pi Sangkimi ruang ngei mai kha dil chungah chuan a rawn lâng ta luap luap anih chu! Thil ni thei pawh ani dawn emni? Engtinnge hetiang thil hi a thlen hman zawk a? Ramhuai puihna dawng in Pi Sangkimi tha chu a chak thar ta sawt nge, a hun a thleng ve ta tihna ni zawk ang. A thil hmuh leh hriatte zozai avang chuan a hit chhuak vek tawh a, a tiril khur nasa lutuk te pawh chu thup sen rual anni tawh mawlh lo.

Chutia an phet buai nuaih nuaih lai chuan inthiarfihlim zuiin a motor lam bawk a pan leh ta a. Ṭhu lut vatin chak thei ang ber hian khawchhung lam a pan ta vang vang. Hetih hunlai hi chawhnu lam dar 2 bawr vel ani tawh awm e.

Khawchhung a luh hnuah pawh an inah lut zuaih in Bible a la kawi leh te te a, tichuan, Pi Sangkimi te chhungkaw chenna hlui, an in hlui lam pan bawk chuan a tlan leh ta par par. A rilru pawh a hmanhmawh ru tawh kher mai. In pet fan fan chung a rei mawi tawk tak  a tlan leh hnuin Pu Remruata te chhungkaw chenna hmun hlui, hmun fal leh reh rawih chu a thleng zui ta ngr nge e. Hetih hun hi tlai lam dar 4 dawn ani tawh ngei ang, khaw nuam lo sa nen khua a hnim ruih a, a tlai zual tawh hmel riau bawk. Motor a ti ding dat a, rang tak hian a chhukthla zui nghal. Chu hmun chu a reh in a fal ṭha bawk a, a ngainatawm loh takzet. Chumi belhchhah tur ting in Pu Remruata buaina tawh ni a an crime scene paper tar te kha a lo la intar phe hlap hlap leh ta nghal a. Chumai ala nilo cheu, chu In chuan luahlum tu a nei zui tawhlo tih hriat tak a chul riap mai leh ding ngawi vung vung te chuan ngainat a hlawhtir lo chiang kher asin.

Rei pawh thlir zui lovin crime scene tih intar chu a kal kân thuai a, kawngka chu pawh hawn a tum zui. Mak angreng tak hian chu kawngka lah chu alo in hawng awlsam phian mai a, a chik ṭiah ṭiah lehnghal. Ṭi deuh tak a inchhung a han bih leh chuan a hmuar rim alo nam vung vung tawh bawk. Mahse, a ti tawh a a ti tlang tur ani tih rilru pu in thawmdim tak leh muangchang fahran chuan a han pen lut ṭan ta a. Chhuat te chu thingphel mai annih vang nimaw, han rah zawng te chuan an chik ṭet ṭet ṭhin lehnghal.

"Awm in awm em?" A han ti thla ngawt a. Tumah an awm lo ani tih chu hre tho mahse ngaih tih ṭhat nan a sawi ve hrim hrim te pawh ani ngei ang chu. Inchhung bungrua te pawh a ngai ang angin an la awm ṭhap a, khawih chet zui an ni lo tih a hriat hle awm e. Kal zelin an room awmna ni a a hriat inchung lam pan chuan step ah a lawn chho ṭan leh a,  step te pawh chu rah zawng hian an chik ṭhet ṭhet mai. Ngaihngam lo zet a kal zel in inchung chu a chuang chhuak ta hram e. A thaw deuh huai thei. Kawngka lo inhawng sa hiai leh room lo awm hmasa ber ni bawk ab cbuan lut zuiin alo thim khup lehnghal a. A phone phawrhchhuak leh thuaiin light a han on a, chu room ah chuan a mak a mak hian maimawm hovin ril an lo zam hman tawh nia mawle. Chu erawh, ngai pawimawh ber duhlo in a vai kiang thuak thuak a, a hahchhiau zui leh ṭhat. Tlem a hai thawven takah chuan bangkil lam a chhuar niawm tak, hlui uk khuk mai lo ding chu ava hmu fiah zui thuai. A thaw zui leh halh bawk. Chu lam chu pan in chhuar chu a han hawng rawk a, chukchu fahrah engemawzat hi an rawn tlanchhuak sap sap mai. A phu nasa teh e.  Chu chhuar chhungah chuan thuamhnaw emaw, chhungkaw thil pawimawh tur ang chi engpawh, eng thil mah hi a awmlo tih theih ani a, mahse, a hming chuan chhuar kil lamah puankawp hlui zet felfai taka inthlep pakhat hi lo awm in a hnuai ah chuan thil engemaw lo in zep ṭat a awm bawk. Chu thil chuan Mahruaitei mit chu a la ta riau mai a, reipawh rial lo in chu puankawp hnuai a thil inzep chu a la zui ta vat. A han enchian nak chuan lehkhabu chhah vak lo, a kawm pawh tlabal tawh hi alo ni reng a, tin, phek hmasa berah chuan hawrrawp chhe zet a thu inziak pawb a hmuh theih nghe nghe. A han keu zui leh thuak thuak a, mipa kutziak ngei ni a a hriat takah chuan thil pakhat hrechhuak in Pi Sangkimi'n a hnen a thu a chah pawh kha he thil nen hian inzawm thei dawn in a hre ta tlat pek. Tichuan, thildang pawh buaipui zui tawh lo in chu room chu a chhuahsan nghal a, êng awmna inhnuai lam pan chuan a chhuk zui leh thuai.

Choka lam chu êng ala luh ṭhat deuh avangin a pan ta vat a, chair ah ṭhu zuiin a lehkhabu chhar chu chaw ei dawhkan ah a pharh sawk sawk a, a chhiar zui ta ani.

Lehkhabu chhung a thu inziak chu le;-

Kei hi Lalremruata ka ni a, mi te chuan pa ṭha leh tluangtlam, pawisawi ngailo mi tiin min fak der ve fova, chu chu mi tam zawk min hriatdan leh sawizui ve ṭhin dan ani bawk. Kum sangkhat zariat leh engemawzat kum ah khan Kawlkulh khuaah lo piang in chu hmunah chuan ka seilian zui bawk a, school pawh Kawlkulh ah vek kalin High school ka chhuah hnu hian kum naupangte niin nupui ka ru ve ta rawih mai a. Ka nupui pawh hi kan khaw chhuak tho niin Zosangkimi ani nghe nghe. Tin, ani hi kum lamah pawh kei aiin a ala naupang zui nghe nghe bawk ani. Chutia, kum naupangte a nupui ka han nei ta chu ka chhungte lung a awi lo hle a, min hrem nan tiin Aizawl lamah kan nupa chuan mahnia inchawm turin min tir thla ve ta rawih anih kha. Ni e, a bulṭan naah chuan a harsa ve khawp mai. Kum naupan nen, lehkhathiam san loh bawk nen eizawnna han dap vel kha keini nupa tan chuan kawng a kaw hlawllo a, mahse, Pathian zarah chaw em chu kan nghei love ti mai ang. Nitin hnathawh tur zawng chuan ka chhuak ta ziah a, bazar nuho chawhmeh zawrh tur phur hian kan eikhawp ngawr ngawr chu kan hlawh chhuak ve hram hram ani ber e.

Hun a liam zel a, ka nupui pawh chuan a ruah loh thu min hrilh ta mai reng a, khatihlai a ka lawmna san zia leh ka rilru hahna nasat si zia tak kha aw. Pa ka han ni ve tawh tur kha ka lawm a, a lehlam ah kan retheih zia leh kan nitin eikhawp ṭawk ṭawk hlawhchhuak kan nih zia ka hre nawn leh fo thung si. Chu chu hrethiam in ka nupui pawh khan awm maimai a tum ta hauhlo a, chawhmeh te kharchhawng ve in khawchhung leh veng hrang hrang ah a vah kual pui ta ṭhin ani. Chutiang thil a han tih ve tak ah chuan tlemin kan khawsak pawh alo ziaawm ve hret a, nuamsa erawh kan la ni hauhlo mai. Chutiang zel a thla 4 vel lai kan awm tawh hnu chuan tlai khat kan nu chawhmeh zuar lo haw chu inchhungah a rawn tlu lut lo chauh hi ani mai a. Ka han enchian nak chuan a puanfen hnunglam chu thisen hlir hian alo bual huh ti ila kan sawi uar awm love. Na nei tih hriat tak hian a ner sawk sawk a, a rum dar dar reng bawk. Kei lah pa mawlmang ve mai tih takah a chhan hrethiam lovin thil awmzia te chu kalo zawt kual chiam pek a, chutah kan nu chuan nau a chhiat anih a rin thu chu min hrilh ta phawng mai anih kha. Khatihlai a ka nat zia tak kha aw. Mahse, lehlam ah chuan engmah hi ka thuneihna hmang a kal tur a awm lova, hei pawh hi chung Pathian in kan ta tur a a ruat ani lo ang tih pawh ngaihtuah thiam zuiin a dam zawng hlir chuan thil ka thlir zui ta ani. Kan nu erawh arilru na chu a ruk te hian a ṭap keuh keuh ṭhin tih pawh ka hrereng. Heta ṭang hian ngaihtuahna dang neiin kan nu chu chawhmeh rit taktak phur kual a zawrh tir pawh ka remti lo zui a, kan khawsak phung chu engpawhnise, kei pa ber ka la hrisel ṭha a, Pathian kut ah innghat tawp ang tih chu thupui ah nei chho in keimah hlir chu hnathawk tur pawhin ka chhuak zui leh ta zawk ani.

Hun a liam zel a, kan naute kan chân hnuah pawh kum khat hial alo vei leh ta reng mai. Nupa ni na na na chuan nupa nun te lo hmang ve ṭhin in karlovah kan nu pawh chuan a rai thu bawk chu min hrilh leh ta mai anih kha. Ka lawm lehpek hle. Chutiang bawk in kan nu pawh. 

                              

Mahse maw, hemi ṭum pawh hian mak tak maiin kan nu chuan nau chu thla 2 mi lekah a chhiat leh ta tlat anih chu le. Nâ ka ti a, ka vui hle bawk. Diktak chuan kan hetih leh ka hlauh vang hian ka nupui pawh a theih ang tawk hna thawhtir duhlo a awm hahdam tir ta kha ka ni ve a, ka rilru chu a na ve takmeuh ani. Ka nupui ngei pawh chu ka han dem lek lek hial a, mahse, thil thleng mek te hi a duhdan an nih bikloh piahlam ah kei ai mahin a tuar na zawk lehling phian si a. Tichuan, ṭhenawm khawveng leh chhungte thurawn ang in doctor kan pan a, a chhul te ziahsak in kan pawisa neih ve ang ang te chuan damdawiṭha te chu lei ve in kan in enkawl chho zui ta zel. Ka nupui pawhin hetihlai hian tihsual leh a hlauh tawh em avangin indanna a hmang zui char char a, keipawh ka in veng ru ṭhin nghe nghe.

Kum a vei a, pang a dam a pa berin tluang tak leh taima taka hna han thawh ṭauh ṭauh tak ah chuan kum 2 hnuah helai kan chen mek na In hmun zau vaklo te hi kan lei ve thei ta hlauh. Kan nupa chu kan hlim in, karah fa awmlo mahse kan inhmangaih a, tudang mah hi kan ngai biklo ṭhin viau. Tichuan, kan nu pawh rai lohna tur hmanga la in dang chhunzawm ve zel in hna te pawh a phak anh ang te chu a thawk chho ve leh ṭan tawh a, kum 1 dang a vei leh meuh chuan he kan chen mekna, mite tan a eng tham ni silo keini tan a hlu tak ni ve tlat lawi si In ṭha tak hi kan khawrpum ve thei ta hial mai.

Chutia, hmun reh leh fal nuam tak mai a nupa terek chauh a han awm ve takah chuan a hma ai mah in nun a hlim a, mahni in leh lo ngei mai a awm kan nih vang nimaw, awm chintawk kan lo hrelo deuh nge, a kum leh ah chuan kan nu chu a rai leh ta tlat mai. Hlauhthawnna chhete chu la awm ve bawk mahsela, kan hlim tho e. Damdawi ṭha leh hrisel ei reng ani tawh a, nitin thlantui far khawp in hna hahthlak tak a thawk em em lo bawk nen, amah pawh hmuh a nuam a, a no surh mai. Hetiang tawh ah chuan a hma ang khan nau chu kan chhiat leh hi ka ring phal tawhlo reng reng. Mahse le, mihringte hian thu hi kan lo nei lo khawp mai a. Kan duhloh dan hlir a thil a thlen te hian chunglam chuan kan tan a ṭha tur niin a ruat tlat ṭhin thung si. Naute pawh chu thla hnih lek ah a chhiat zui leh ta ani. Hetah kher hi chuan ka lawm lovin ka lunghnur lehzual a, ka taksa te pawh chau chhe zo in ka beidawng hluah hluah bawk. Ka nupui pawhin hrehawm ati ve hle tih chu hre tho mahila, runluih ka chak ta tlat a, tlai tin hian zurui chungin ka hna bang chu ka haw ta fo reng anih kha. Chumi chin phei chu kan nupa kar a zau sawt a, ka nupui mizia pawh hmuhtheih khawp a danglam chho in ka bul a awm ai cbuan mahni chauh a room a tawm tlat te, lungchhe tak a ṭah kerh kerh te leh mahni a phun ser ser te chu a ching sawt ta hle. A tir chuan mak pawh ka ti lem lova, a rilru na leh khawhar awmngaihna hrelo tal vel ni tur ah ka ngaihsak ringawt. Mahse, alo ni hauhlo nia, ṭha te te a kan inbiak lai reng te pawh hian rawn meng â ruai in min nuihsawh a, a chang phei chuan kutzungchal meuh a min kawk chung hian a nui awr awr ṭhin. A awmdan chu ka hrethiam ta lo hle a, ṭhenawm khawveng chinchang han zawh tur hnaivai lah ka hre map mai silo nen, ka chhungte ngat phei chu ka hrilh hre duhlo tawp ani mai. Chutihrual in engemaw chang erawh chuan a nungchang pangngai tak kha rawn lang chhuak ve ṭhin in tunhma ang tho khan nun pangngai te chu kan hmang dun leh lawp lawp bawk a. Hun reilote anih chang a awm a, kum hial hial te pawh a ṭhat chang a awm ta. Sawi hmaih loh tur chu, hetia a nungchang maksak tak a a rawn inthlak aṭang hian kohhran a bel zui duh ta tlat lova, Pathian hming lam rik leh Bible hnaih a awm pawh hi a duh ta lo kati mai. A hlau ni ber hian ka hretawh zawk. Chutiang a kum 1 dang kan awm dun leh nawk nawk hnu chuan ni khat chu fiah fai ṭha zet mai hian nau a pai leh thu min rawn hrilh thut a. Lawm tur nge ṭha tur tih pawh hi ka hrethiam tawhlo ani. Mahse, ka nupui a nihna ala bo chhin lova, ka nupui in nau a pai thu a sawi chuan kei a pasal hi lo thinrim tur ka ni bik dawn emni? Tichuan, mak tak maiin he kan naupai tak hi chu thla 5 a tlin hnuah pawh khan in sawiselna nei lovin hna te ala thawhpui lawp lawp thei a, a in fit ta zawk hial emaw tihtur hian a awm ṭhin. Keiin hlauthawng thaw dep dep a hun leh ni te ka chhiar kauh kauh lai leh engtikah nge kan naute hi a thih leh mai ang tih ngaihtuah a hun kalo hmanral ve laiin karlo ah nau neih chu alo hun ta der a. Thla 9 niin felfai tak hian damdawiin ah nau chu kan nei zui ve ta hlauh mai anih chu. Lalpa, kan va han lawm em!

Heta sawi hmaih leh miah loh tur chu, he kan naute kan pai chhung zawng hian ka nupui khan buaina a nei ngai lova, a ze duhawm lo taktak te pawh kha lang chhuak lovin a awm tluanparh thei ani tih hi. Chumai chu nilo in, a neih hnu lehzel ah pawh naute in kum 5 a tlin thleng kha chuan mak tak hian kha a khawsak dan phung dangdai tak ni ṭhin te pawh kha a bo ka ti ngam. Mahse, sawi leh sawi hnu, Bible a hnaih duh lova, inkhawm turin biakin lah a pan duh heklo. Chu erawh ala pangngai reng ani e. 

Kan fanu Hilda Zohmangaihsangi'in kum 5 a rawn tlin chhoh aṭang chiah khan ka lo rinphak loh leh beisei phak tawhloh hian ka nupui Sangkimi khawsak dan chu a rawn inthlak danglam leh ta tlat. Tun ṭum phei chu a hma zawng aiin a buaithlak zual tawh a, a haihawt in buaina siam a ching chho sawt hle. Chaw ei dawn a ruai a kan chaw thleng zwng zawng vawm darh leh bungraw suasam te, aaa a tam lutuk em mai sawi vek sen chi pawh ani lo ang. Natna ṭhalo tak a nei anih ring in Doctor ka pan pui leh a, mahse amah ah chuan engmah diklo leh felhlel a awmlo tih min lo hrilh bawk si. Pa hi ka lungngai a, ka indawmkun leh ṭan ta. 

Bawihtei'n kum 7 a rawn tling chho a, a chetdan engpawh mai chu bawraw chho lehpekin a fanu ringawt mai chu a bitum leh ṭan ta a, kan fa pawh ani lo ti a a au chiam chiam ṭhin in a fanu ngei mai chu thah a tum ta fo mai nia! Mahse, hetihlai a mak ka tih deuh pakhat chu, chuti khawp a a nu , nutling zawkin a beih tawh pawh chuan kan fanu khan a nu chu hlau ang pawhin a awm ngai hauh lo a, fel taka ṭhu in nui ver ver chung hian alo thlir vel mai mai ṭhin. Kum 8, kum 9, kum 10, 11. A fanu ngei mai chu a thawn bo ta! A awmpui theih tawhloh thu sawiin a fanu chu ka hnathawh bo hlan hian alo hruai chhuak daih mai a. Ka va han mangang tehlul em! Ni e, an nufa khawsak dan maksak lutuk avang hian vawitam tak mithiam te pawh rawn tawh in, rilru lam thiam ni a an sawi doctor Vanlalhruaii ngei mai pawh kha kalo rawn ve ṭhin. He kan inchhungah ngei pawh hian ko lutin ka nupui nen chuan an inhmu ve tawh nghe nghe anih kha. Mahse, thil hi a mak zozai lutuk a, doctor meuh in a rawn kalchilh takah kha chuan fel tak a lo awm in mi pangngai chiah chiah hi ani tawh thung. 

Chutia a fanu a hruaibo tlai pawh chuan khaw thim hnu fe ah rawn haw in a fanu chanchin chu kalo zawt chul mai a, hetah hian ani thilmak leh rapthlak tak chanchin chu ka hriat tak. 

Ka nupui chuan a fanu chu ka fa anih ve loh thu leh ramhuai fa mai anih avanga dahbo a duh zawk thu min hrilh tak ni! Mak hi ka va ti em. Chumai chauh chu ala ni hauhlo. Kha a ramhuai zawl khan intiamkamna neih puiin fa a neih hun hunah a rulh let nan a tu thlarau pawh pe ṭhin turin alo ti bawk anih chu!! A awmzia chu, keini nupa hian fa kan nei anih chuan kan lawmthu sawinan kha ramhuai hnenah khan tual kan thah a, mihring nunna kan lak alo ṭul ta ṭhin tihna anih ber chu. A hma aṭang daih ani chuan chu thil chu duhlo in ramhuai hnenah thu alo tiam thei tlat lova, nau pawh kan chhiat ta zel reng anih kha. Mahse, a tawp a tawp ah zawng a thluak leh rilru engkim mai chu tihbuai sak a awmin ramhuai ngei pawh chu alo hnar thei ta ngang lova, tichuan, a hming chauh a ka fa nihna nei naute chu ka fa ang thlap in kei hian kalo pawm ta anih kha. He thil hi a tleirawl lai aṭang daih tawh a lo inṭan niin, an ṭhianza ho chuan ramhuai an chhuah zalen palh hlauh mai a, tikhan chu ramhuai bawlhhlawh zet chuan tibuai zui zelin hetah thleng pawh hian a rawn chenchilh a, a kalsan ta lo ani ber e. Rapthlak ka va ti tak em.

Ramhuai duh ang ngeiin fa chu a hring ta a, mahse, a kalsan duh ta hauh silo. Amah mai nilo, a fanu taksa ah thleng chuan awmzuiin kan chhungkua chu kan lo kehdarh phah ta anih hi. Ni e, ka nupui Sangkimi khan ramhuai a pai a, mahse, engvangin nge Mental Hospital ah ka dah daih thung si tih hi zawhna awm thei ani. A chhan chu, nupui ramhuai pai neih ka duh lova, ramhuai pai ti a tlangthan tir ai chuan khatia rilru kimlo leh thluak lam fel lo niawm a tlangthan tir pawh kha ka la duh zawk fan. Ka nupui ka hmangaih em em chu mi â leh rilru kimlo te dahkhawmna hmunah a awm ta chu ani a, a nâ ve thlawt. Mipa, patling mahni ila ka nat loh hi chu ring suh u. A kalbo tak aṭang khan tun thlengin he ramhuai sual leh bawlhhlawh hian min la bei zui zel a, ka nupui in alo tiam tawh mihring nunna leh thlarau chu lak tumin kei hi min bei a, ni e , ka ti duhlo anih chuan kei ngei pawh hi thah ka nih tur thu mumang lamah min hrilh awl lo asin. A hman ṭangkai theih apiang hman ṭangkai tumin a fanu kan ti dawn nge, ka fanu ni zawk ta pawh kha ka hrelo, kha hmeichhe naupang khawngaihthlak tak mai Hildai ngei pawh kha a bei zuiin a hmang ṭangkai khawp ang le. Tin, ka nupui ngei pawh kha a thutiam ah a din tlat loh avangin a zuah bik hian ka ring lo. Kei chu, tihian khawiah pawh kal ila, min umzui reng tawh dawn a, ka tan helai hmun a awm hi a ṭha in, he ka ram chhung ngei a ka tualthih pawh hi a la thlan awm zawk em em.  Hre rawh u, tute nunna mah hi nangni lawmna siamnan ka la lul lovang. Ka chanchin chu ilo chhiar zo ta. He ka thu fahrah leh ngaihnawm loh zet mai hi ilo chhar fuh a, ilo chhiar ve hlauh anih chuan maw, hei hi ka chah duh che chu ani. Thlarau sual leh ramhuai bawlhhlawh ho hi bo hlen dawn hauhlo mahsela, he an tawmpuk leh inkhuar nan a an hman fo, ka In leh a vel hi anni ho tawm bo nan a hman ka remtih tawhloh avangin lo hal chhe vek la, he ka thuziak ngei pawh hi ilo hal ral vek bawk dawn nia. Tichuan, he khawvelah hian thilṭha engemaw tak midangte nunna atan iti ve ni ah ka ngai ang. Tunah chuan, hal ral tawh rawh le!

Thu ziak a chhiar zo chiah chu a thaw zui halh halh mai. He in hi a halral vek ang maw? A thei chiah ang maw? Ni e, a ti thei tur ani. He thil hi a kaltlang puiin a hna chu helai hmun ah hian a thawk zo ngei tur ani dawn lom ni? Ramhuai hmechhe ho mai mai chu le! Ti rilru bawrh bawrh pah a tho chhuak in pawnah a tlan chhuak vut a. Garage ah lut leh in gallon khat pap khawp a khawnvartui lo awm sa chu khai lawk in a bul mai a lighter lo let ngat pawh chu a ban zui leh zat. Garage chu chhuahsan vat in hetihlai hian khua pawh a thim ruai tawh a, unau hmelhai an tih ang hun vel kha ani tawh awm e. 

In ding ngawi reng lam chu hawiin a gallon chhin chu a kheuh hawng zeuh a, tichuan in hual vel chuan khawnvartui pawh chu a leih kual leh zui pawp pawp. A hna khatna chu zo in In hma lamah bawk a han ding ṭha leh rih a, a lehkhabu ken lai, Pu Remruata chanchin in ziahna ngei mai kha a hmawr lam chu khawnvartui ah chhete zu chiah huh leh in lighter chuan hliau a han tum ṭan ta a,mahse thli chhete a lo thawt ve deuh avangin a talh alh thei mai biklo. Chutia lighter talh alh tum a alo buai tlauh tlauh lai tak chuan a hnunglam aṭang hian a hming ngeiin an rawn ko ta tlat. 

Zawimuang leh makti zet a a han hawi let nak chuan Hildai kha maw? Eng nge hetah a rawn tih a. Ni lo, engtinnge helai hmun hi a rawn thlen theih zawk le. Kuthnungsuih chung a nui sen sen pah hian a rawn melh kiau lehnghal a, amah lah chu thisen in a bual hneh hmel em em mai bawk si. A kawr hak lai leh a taksa hmun khawilai mai ah pawh chuan thisen hlir hi a kai ani ber e.

"Hilda, nang, nang hi. Engtinnge hetah i rawn kal theih zawk?" A tih sap hnu chuan Hildai chu a lam pan hian a rawn pen ta chhat chhat mai. Mahruaitei thung chu alo tawlh hnung ve hret hret a.

"An thi vek tawh. Thlarau tamtak ka thawn chho tawh e!" Tih pah hian a kutzungchal ngei chuan Van lampang a han kawk zauh zauh bawk a. Ala nui sen sen reng lehnghal. A hmel landan mawlh mai chu rapawm tak hi ani tawh awm e.

"Tute nge i thah vek chu. Eng thil chiah nge maw i tih le?"

Hildai ke pen lai chu tawp chawt in amah chu chiang zet hian a rawn melh leh ta kawk mai. Mahruaitei chu a khur dar dar tawh hial.

"Fahran chenna hmun a naupang mawl taktsk te leh puitling laktlak loh zet ho kha mawle!"

"Chu chu nang hian i that vek a maw!? Eng ang naupang nge inih tehchai a!?" A awki chu a ring ta phian mai. Chutah, a aia ring zawk mah hian Hilda chuan

"Aw. Kei hi naupang chu ka ni ngei alawm. Ka ti ve thei lo ang tihna maw? Ka pa duhtak in min ṭanpui chhung chuan maw, eng thil pawh hi ka ti thei. Chuan, helai hmunah pawh hian i thi lai thlir turin alawm ka lo kal. Khawi, i meitalh ken kha min han pe teh" tiin a kut chu a rawn phar zui ta vah mai lehnghal. Mahruaitei erawh chuan a lighter ken chu a hum nghet sauh sauh thung a. A tum dan takah chuan chu naupang inring lo lai chu pawmchilh thut a khawnvartui a leih zui leh halhchilh nghal mai chu a rilruk tawh a, hun ṭha a zawng mek bawk ani.

"Lighter chu min pe mai rawh. Tumah i ti na let ve thei dawn chuanglo ania"

"A teuhlo em mai. Nang naupang kum 11 mi lek pawhin mi tamtak nunna i laksak thei anig chuan engvangin nge ka theihloh bik tehlul ang ni. Helai hmun ah hian i thi dun law la2 ang hmiang" tiin thawklehkhat ah Hildai ding khawng reng lai chu ava pawm bet ta chawih a, chutih rual chiah a thawm lo chhuak zozai te chu rapthlak tak anni. Hildai chu a ṭe vak vak a, a nihna takah chuan naupang awrawl pawh hi niin a lang lo. Patling 10 rual vel mangang au rawl ni zawk awm a mawi ani e. Chutah, a kawrchung ipte chhunglam a a Bible ah ṭhat chu hrechhuak zawk in a han phawrh zui leh sawk sawk a, chutih pah chuan Hildai chu leiah bawhbetin a khup hmang in a do zui reng bawk. Rang tak a che thuai thuai in Bible chu a han keu va, a bung leh chang a ngaihtuah hman tawh lo, a hmuh hmasak sak chu chhiar mawlg mawlh in Hildai chu a kut lehlam hian a la chelhbet deuh reng bawk. Ani pawhin talchhuah tum hian alo la bei ve ngat ngat tho. Mahse, Bible chang mawlh mai chuan a thunun a, a duh dan pawhin a awm zui thei ta lo ani e.

Hnuailam aṭang chuan aw pawr ṭial ruai mai hian

"THI RAWH!" a rawn ti hluk hluk. Mahse, a ngai pawimawh duh chuang hlek lo. Bible chhiar pah zelin gallon bur kha a ban pah zeuh bawk a, hetihlai hi chuan Hildai awm chung ah Bible kha a nghat tawh nghe nghe a, ani thung chu awmngaihna hrelo tih hriat tak hian ala ṭe ruai ruai reng a, a tal buan buan bawk. Mahhse, Pathian thiltihtheihna lo lang chhuak in hneh theihloh Pathian anih zia  a rawn fiah a, Hildai pawh a zal zui ve ta riai riai. Chutihrual chuan Mahruaitei pawh inthlahdul ve zel in a mitmei pah reng tho bawk. An bul lawk a lo let reng lighter chu ban leh in a talh ala zui ta a, Pu Remruata lehkhabu te ah khan hliau kaiin In dinna lamah chuan a tlan phei ta. A kang kai nghal zung zung a, a alh ta hluah hluah mai le. Reilote chu In kang thlir a a din leh hnu in a Bible pawmbet reng chung chuan a han hawi let a, mahse le, Hildai kha lo tho chhuak ve tawh in rum em em hian alo melh reng ani tih a han hmu thut chu a per sawn dawrh thei hial. A thaw zui leh hlawp hlawp bawk. Rum chhuak hawm hawm in Hildai lah chuan a lam a rawn pan leh ta nghal a, Mahruaitei pawh a hnung mai a kangmei chhuah hlup hlup na lamah chuan a tum lawk pawh ni miahlo hian a tawlh zui ta rawk rawk mai le.

"Ka rual in hremhmunah i kal ve ang" tih chhar chhar pah a a rawn zuan chu lo bum hman zauh tho mahse, bawkkhup thlawrh hian lei ah chuan a tlu ta tlat. Chu chu pakhat zawk tan hun remchang tak lo niin a ke rek ah a rawn vuan zui vr chat a. Awihawm loh khawp a lainatawm awrawl hian

"Au Mahruaite, i kalna ah min hruai ve rawh. Thih hi ka la duhlo ania, ka hlau ani" a rawn tih hlawp hlawp chuan a buai hman ṭhelh a. Mahse, rei tak in ngaihtuah nan hun a mamawh lo tih a inhria, insehruh fan fan in hnunglam a hawi a

"Nang hi, ka pasal hual ka hmangaih em em leh midang tamtak pawisawi lo nunna chhat tu inih hrep hi. Phiangsen che hian, thi sâwn rawh!" Tih leh Hildai lu ah tak a theihpatawp a tlawh nghek chu a rual a. Hildai pawh a thle nghal hnawp thei. A tha tawp a tlawh kha ani bawk a, a ring ruh chu tliak ngei tur a rin theih ani e. Tho zui leh sawk sawk in Hildai taksa zawi nguai mai chu meialh hlup hlup na lamah chuan a hnuk phei a, meialh tamna lai bikah chuan phih phei dawrh in

"Nang ramhuai bawlhhlawh leh tenawm phiangsen fanu ve mai hi" ti hlak in a kalsan ve thei ta hram ani.

Khatia Hildai taksa, meialh in a han hliau rual chiah khan thawm a nasa em em a, patling 10 rual teh meuh mangang aurawl niawm takte, nutling nuihza fahran a nui awr awr thawm niawm tak te leh, naupang chiau vawn vawn te, a chang a zai leh rut rut ṭhin te an awm nawk mai.

A motor seat ah ṭhu in a glass chhan aṭang chuan meialh in vaw ri hlup hlup lam chu a thlir phei reng a, chutah, a motor tinung zui leh in

"Bumtu vek innih kha" ti sap in a Bible lo let bal chu a han fawp leh zoh a, tichuan, khawchhung lam pan turin a tlan haw zui ta vang vang mai ani.

***     *****    *****    *****     ****     ****   ****