DINDIN-I

KA TUAR DAM THEILO

By : Vanlalpeki Fanai

"Ṭhianpa, i bialnu hlui chanchin chu kimchang deuh hlekin min han hrilh ve teh. A thlalak ringawt mai hi kan hmu fo a, a ho duh riau" tih nuah nuah pahin a bul lawk a rialno chu a ban zui zat a, a thawk khat nghal piap bawk. Chutihlaiin kei chu ka lo nui suk ringawt a, duh ai chuan lu chu a hai tawh lam hret ani e. Nimahse duhtawk mai erawh chu ka la tum bau lo thung. Ka rialno ken ve thung chu uluk zet a mitsiai khum ngar ngar chung hian

"I hre duh meuh ang maw? Mahse e ṭhianpa, zanin chu duh aiin ka kai riau a ka sawiṭhat theih pawh ka ring lo. Nak- naktuk zan lamah ti mai ang hmiang" tih pah chuan ka irh zui uk uk. Ani pawh chu bang bik hauhlo mai, a ṭhu bu lûk lûk reng a a meng peih ṭawk ṭawk tawh hi ani ber e.

"Eee ni e, nang meuh in i tih te chuan.. aw ṭhianpa, ka haw, ka haw dawn aw, phawts" tih pah chuan a ding zui ṭuih ṭuih. Ka chelh lui duhtawh biklo, a chhan chu mut ka chak takzet tawh a ka ti lui thei ngang tawhlo bawk ani.

Ka mu tui lai chu ka ṭhangharh hlawl. Ekhai aw! Ka lu chu ava han nâ tehreng em. Ka tui hal huam bawk nen chuan zing dar 5 velah ka tho chhuak ta chhap chhap. Tun ang hunah hian ka tho ngailo hrim hrim a, hnathawk tur a chhuah fo chu ṭul ve bawk mahse mahni chauh a khawsa tih takah ka che awlsam a ka hmanhmawh ngai lemlo bawk. Ka han tho chhuak chu zan lam a kan ṭhian dun sulhnu pawr lutuk mai kha ka hmu hmasa ber. Rialno pahnih chhuatlai a let bul te leh kan zu in zawh loh bottle chhung a la awm te chuan ka luak anti chhuak nghal ngawih ngawih thei nia. Ve tlat mai a!

Tlangval senior lam tawh mahni chauh a khawsa mah ni ila zu hi chu ka duh em em hran lo a, weekend ah leh ṭhiante'n min rawn ken sak chang a kalo in ve zeuh tihloh hi chu ka in mang lo ani atih theih awm e. Nia, nizan pawh kha ṭhianpa Rinhlua rilru na khan in pui atan min rawn sawm ngen ngawl em a kalo ṭanpui ve ta mai ani. Ka duh aiin kalo lem hnem deuh ani chek ang chu ka lu pawh a na ṭha ngut ngut kher mai.

"U Ruatpui, hei i chawhmeh tur ka nu in va pe rawh ati che a" ti lâng lâng chungin kan ṭhenawm lawk a awm, tleirawl chhelo tak Maliani chu a rawn nui lut sen sen mai. Plate niawm tak hian engemaw hi a rawn chawi lut vâ vâ bawk.

"Eh! Maliani hi ilo fel ber mai, min ngaihtuah ṭhin a khawi maw" tih pah hian a plate ken lai chu kalo ken chhawk sak vat a, rawtuai bai tui hmel em em mai chu lo ni reng in.

"Ahh kei a fel vang pawh ani chiahlo, ka nu hian i ei tui loh mawlh hi a hlau ṭhin a, ti daih ilaṭ school kal i tumlo emni?" Atih zawm zat. Kei chuan amah melh zauh chung hian a plate chu kalo sil pah mawlh mawlh.

"Dawn e, hei tihian chaw ka ei anga ka hman chu ani mai. Nang zawk vawiin eng nge itih dawn a?" Chutia ka melh leh zauh ṭhin chu a hria tih ka hre mai a, a lai chhe leh teuh kher. Min hmuh tawh hi chuan a lai ṭhin hle ani tih hi ka hre tawh hrim hrim bawk.

"Thawmhnaw ṭhui tur ka ngah phian a ka nileng ang ka ring. Anih chuan chaw chu ei tawh rawh i tlai ang, keipawh ka'n phei ve tawh ange" ti zung zung in a plate chu a rawn ban zauh a, a tlanchhuak zui daih. Ni e, he tleirawl hi chu a duhawm ve thlawt in ka hria ani. Hmeichhe sâng lam inkhaithli thlarh mai hi ani rauh a, a sam sei hnâp mai leh dum hlap te chu sâng takah a ṭawn kawh vah zel. A awm maimai te pawh hi a biang no chek chu a taisen hlar zel lehnghal a, amah hrim hrim hi hmeichhe harhvang leh ṭawng duh ve tak niin fiamthu nise a hmel phu lo hian a duh ve hrep a, a ṭhiante zingah phei chuan a langsar lawr lak tihtur ang chi kha niin hmuh pawh a nuam thei takzet ani. Tin, a ngam tlak midang bul a a khawsak dan leh ka bul a a awmdan erawh chu a danglam daih ṭhin thung. Hei vang tak hian keipawhin ka zuam em em hran lo a a mawi tawkin kan in ngam a kan in nel ti mai teh ang. Tih taktak ah chuan kei aiin kum 10 dawn laiin a naupang zawl a, mipa zawk ka nihna ah pawh kei aia naupang hmeichhia lehnghal chu ngam viau a zuam hle awm tak te pawh ka nih vei nen amah chu ka zah ru riau zawk tlat nia.

Nia, kei hi Ruatpuia niin tlangval senior ti a sawitheih mai tawh tur hi ka ni ve a, a hming in tunah hian Sawrkar hna chhete thawk in Lengpui zirna sikul pakhat ah zirtirtu hna vang in ka awm ve mek a, he khuaah hian hna vang in kum 3 lai chu kalo awm ve dawn ta reng mai. Ka hnathawh mek zirtirtu hna hi nuam ka tiin ka tuichilh a, naupang bul a khawsak hrim hrim pawh hi nuam ka ti a, hahthlak ve ṭhin hle mahse ka ning ngai hauhlo thung. Tin, he hna ka thawh aṭanga ṭhianṭha leh hmelhriat duhawm taktak ka chhar tak nual avang te pawh hian he khua hrim hrim hi ka ngainat phah a, tunah te chuan mahni khua ang mai a ngai ve tawh in ka tlangnel tawh phian. Khang ka sawi tak zing ah khan Rinhlu-a hi ka ṭhianṭha ber ani ka ti ngam a, ruihtheihthil te chu ti ve bawk mahse khawtlang tan hian a hnawksak lo kher a, chu chu sawiloh, mi tlawmngai leh chet chhuah a ṭul hun pawh a a hma tawng tu zing a mi ani ve thei ziah. Ani erawh hi chu he khaw mi leh sa niin kan veng kawn lam ah hian nepnawi dawr lian ve pangngai tak hi a hawng a a nghak pah bawk a, chu chu an chhungkaw ei bel ber pawh ani ve hial. Kan ṭhiandun chuan bialnu pawh neilo ve ve tih takah kan inthurual dun phian mai a, thil tihna kawng engkim ah hian kan inpuitawn in kan awmdun zel hi ani hawt e. Ṭhiante tan a inpe zo tak leh ṭhian nih tling em em, mi zawng zawng ṭhianṭha atan a duhawm tur chi ani rauh a. A hetih vang hi nimaw ṭhian dang chu han nei bawk mah ila 'ani lo chu' ka la tih ve fan ni.

"Ṭhianpa, zanin chu harhfim in kalo leng dawn a min hrilh tawh rawh aw" a rawn ti leh ta. A rawn sawi dan teh tawp chu naupangchhia kalo tih tlat pek avang chuan ka nuih a za ru riau. Ka hna bang inchhung ka lut fel chiah tih in min lo call anih chu.

"E...tehreng mai. Ilo riak nghal nghe nghe ang chu. Chutin zankhat thilthu ah a sawi zawh mai theihloh ania" ka nui zui kur kur.

"Lutuk, kan riak anga nimai lawm" tiin kan inbiakna chu kan ti tawp zui a. Hmanhmawh tak a inthlak zuiin inbual tur chuan bathroom chu ka pan leh ta a. Duh thal a rei ka inbual zawh hnu, bathroom aṭanga ka chhuak chiah chu ṭhianpa Rinhlu-a a rawn lut deuh hlawl. A kut ah chuan thilfun engemaw tak hi a la rawn khai lut zui a. Sa nimai hian ka hria a mahse eng sa nge tih zawng ka hre hauh lo mai.

"Bual zo tawh maw? Hei vawksa ka rawn lei a, saw tah Pu Chhuanga te khan an lo tlai talh hlauh mai a, chan loh hlau lutuk in ka rawn chuh ve vat anih hi. Va inthlak rawh kalo siam vek mai ang" ati zui sawk sawk. A khawsak dan dangdai thei lutuk hi a hrechiang lo tan chuan a zaktheilo mange tihtur ang chi hi ani rauh a, amaherawh chu ani leh kei a inkarah chutiang thu lawi lo chu a awm ve hauhlo thung.

"Sa kher chu angai lo asin le, sum hek na mai mai ani. Hrim hrim dawr iva khar hma awm ve a"

"Nia, zanin chu i thusawi tur vang kha nimaw ka helhhawlh ru riau a, hunawl insiam hma kha ka duh deuh tlat ani" ti chung chuan a nui leh kur kur ṭhin. Ṭhianṭha tak hi chu iva ni chiang em ti rilru nauh nauh chung chuan room ah ka lut zui ve daih.

Zan dar 6 a rik meuh chuan ei puar lutuk avanga dul vun mar pang mai chul hauh hauh chung hian ṭhutthleng sei ah kan ṭhu mu dun ar ar tawh a. Ṭhianpa bawk chuan zozial zuk khuk hlat hlat pah hian

"Ṭhiana, in khaw hming kha eng nge ni ta kha(h!) " a rawn ti deuh hû a. Amah pawh en lem lo chuan ceiling chu kalo melh vang vang

"Ka pian seilenna hmun chu Khawnuam khua niin Champhai District chhung a awm ania, tunah erawh a khaw hming hi an thlak tawh thung a, i hre duh kher kher te anih loh chuan sawi lo mai ila, tihian Khawnuam tih ringawt pawh kha a tawk viau chuan ka hria" kalo tih zat zat tak ah chuan a meizial hip mek chu khukchhuah theihnghilh in a hâk ta bawrh bawrh mai. Kei lah chu kalo nui zui kur kur bawk.

"I ngeiawm ṭhin teh e. Ka hria lawm Khawnuam te chu. Ka la kallo tih mai ani e Nghâla" a rawn ti tham zui ṭuak.

Ka chhan let ve hma in amah bawk chuan

"Anih chuan han sawi tawh teh. Hei a tlai leh mai dawn. Khawi maw kuhva kha" a han tih zawm leh zat a. Ka ṭhutna bul a kuhva hring pack chu amah vawm nan ka hmang zui thuai. Tichuan keipawh chu ṭhu ṭha sauh sauh in thupui fun zet leh sermon ropui thlak tur niawm fahran a ka aw te ka then fai khak khak hnu chuan ka ṭawngchhuak ve ta nge nge ani.

"Kan khua, khawnuam hi thingtlang khua niin Champhai aṭang erawh a hla lo hle a, darkar khat tlan vel chu ani ve awm e. In ding lai pawh 300 chuang lai awm ve tawh in nitin hian hmel thar hmuh tur an awm ve reng a, chuvang chuan mihring cheng mek zat erawh chiang fakin sawi dan tur ka hre mai lo. Lo chhut ve tawh mai rawh In 300 aṭang khan. Thingtlang khua mah ni ila a mi cheng te hi kan khawsak phung a changkang tawhin kan phak tawk tawk ah chuan khawpui nun zia pawh kan copy nasa ve tawh hle a, chubakah khawpui hnaih khua reng reng hi chu khaw lian lemlo tak pawhnise kan khawsak a sâng ruih zel tih chu i hriat kha. Keini khua pawh chu mite ngaihdan ah ram hnathawk a eizawng deuh vek tur ah min dah ṭhin a, an ngaihdan ang em em erawh kan ni hauh lo thung. Umm,, eizawnna kha chu dahṭha ila kan point ah lut nghal ang aw" ka han tih chuan Rinhlu-a pawh chu alo ṭhu ngil nghal sauh sauh a, a hmel aṭang chuan ka thusawi tur hian a ti phur tawh hle ani tih ka hre mai. Kei erawh ka phur tehchiam lem lo, a chhan chu kum engemaw zat chhung kalo nat pui tawh thil kha ani miau mai a, mahse ṭhiante lawm nan chuan tiin ka sawi mai dawn chauh zawk anih hi.

"Tun a achanchin ka sawi tur Dindini hi kan khaw chhuak, kan khua a piang leh seilian ani ve lem lo a, champhai aṭanga thildang vang zawk a an chhungkua a rawn pem lut hi anni nghe nghe. Zep thu chenglo, an chhungkua chu chhungkaw khawsak harsa ve tak niin amah hringtu pa hi zu ngawlvei, zu duh ve tak hi ala ni zui bawk a, pawn lam ah ṭhian kawm in ṭhiante bulah chuan nui huah huah ve mahse inchhungah erawh nupui fanaute rikrap zawng in a khawsa tlat ṭhin thung. A hetih vang hian a fanu Dindini chu nula pangngai tak pawh nimahse amah rimtu tlangval inleng pawh a nei thei ngai meuh lo. Tlem a a pa be thiam leh zu in pui thei deuh ho hian a khat tawkin an rim ve ṭhin hi ani deuh mai a, Dindini leh a nu tan khan a hrehawm ve ṭhin ngawt in ka ring ani.

Dindini hi kan khuaa an rawn pem hlim chuan nula kum 18 mi vel chauh ala ni a, i hriat ang in thingtlang ah te chuan hmeichhia pawh an nulat hma bik em hi. Pasal nise an nei hma em em bawk. Thlalak ah chuan hmu tawh tho mah la, amah hi hmeichhe te lam leh sa inphut mawi tak, ngo lampang hmai bial kerh mai hi ani reuh a. A hmelṭha hlemai han tih hluai tur chu nilo mahse a duhawm ve thlawt ani. Mize zawi awi leh ṭawng tlem tak niin ṭhian pawh a siam zung zung lo ve khawp mai. An inchhung khur ngaihtuah in a inthlahrung ve te pawh ani mahna le. Sawi tak ang khan kan khua a an rawn insuan luh hlim te chua tumah in an chhungkaw khawsak dan engmah la hre ve hlawm heklo. Chutia nula chhelo leh nungchang mawi em em bawk si rawn awm thar ta chu kan khaw rawlthar ṭan tir aṭanga tlangval senior chen khan kan lo hmu tai ṭhum hlawm mai a. Chung zing ah chuan sawi hmaih hauhlo turim keipawh hi ka tel chiang bal. Kei ngat phei chuan ka han vei zui rei em em khawp a, midang zawng in an beisei tawhloh hnuah pawh kha bem ngam taktak silo hian ka la vei bur reng tho mai. Kan khaw highschool ah chuan a lut zui ve ta bawk a, ṭhian thar te pawh a nei ve ta nual. Hetihlai hian kei erawh college zirlai niin college ka rap ṭan ve chiah a, kan khuaah zir zawmna awm tawh heklo le, Champhai college ah lut in in ka luah hrang ve a ka awm ve ta ren rawn ani. Kartawp thlen hun hi ka nghakhlel thei em em a friday anih tawh dek dek hi chuan mawng a hawlh ang mai hian ka za zek zek zel. Class kan bang ta maw tih rual rual in kan khaw lam pan chuan ka phit haw nghal ṭhin ani.

Kan khua ka thlen hnu pawh in han phurna em em tur thil chutiang awm hauh lo mahse, Dindini mawlh kha. Ani nen khaw hmun khat a kan han awm ho ringawt ṭhin pawh kha ka tan chuan a hlu a, a nuam dangdai ve em em mai ani. Chutihlai chuan vanneihthlak deuh maiin Dindini te nen a school kal ho leh inkawm ve ṭhin ka cousin Lalramsangi hnen aṭang chuan Dindini phone number chu ka nei thei ta hlauh. Khatihlai a ka lawm zia kha e, eng ṭawng mah hian a sawifiah theih pawh hi ka ring lo hial. Nimahse a number ka neih zan erawh chuan be nghal mai lo in ngaihṭha fahran hian ka han kawl ve ta ren rawn phawt a. Mahse rei erawh ka rial lo kher asin. Number ka neih aṭanga ni hnih ral hnu chuan ka va be zui nghal mai. Nge, midang in min lo chet khalh mai ang tih kha ka hlauthawng ve em alawm.

"Hi!"

"Tunge aw?"

"Ka dp i hmu thei lo ani maw? Eng lo, hetah vengsang ami Ruatpuia kha"

Kum lamah upa zawk chu ni mah ila ka zak ru chem chem thei. Chutia ka hming ka han hrilh hnu chuan a reh zui ta daih a, mahse ala online reng tho si. Tu phiangsen nge maw a biak dawn le aw tiin kalo inhrosa dur dur thei. Minute 10 ṭha zen zawn ka nghah leh hnu chuan a rawn seen ve ta hram a, typing inti rawh ti a rilru zawng zawng nen ka phun ser ser lai chuan a rawn type ve ta hram.

"Awle, anih chu mawle" deuh teh tawp a.

Keimah ah hian eng rilru mah a pu ve lo nge ni ang? Nge hmeichhe polite lo tak ani zawk? Aaa chu erawh thil ni thei pawh va ni suh. Kei, khawnuam tlangval hmelṭha leh luck Ruatpuia hi ani lakah khan engtihnamah ka ni lo thei ang maw? Ka hmelṭhat tehlul nen hian. Reply mai dan tur hretawh siloṭ reply leh biak chhunzawm erawh chak tih hriat em em maiin emoji hlir hi ka han thawn ta tuarh mai a!

"I mu ve tawh em?"ka ti zui leh ringawt.

"Mu dawn chiah a muttui aw"

Hmm, a induh thiam vel dawn khawp mai maw. Hmeichhe ṭhenkhat anga zankhat thil thu a bem tluk theih chi chu ani dawn hauhlo. Lawm deuh reuh, lungawi tehchiam silo chuan muttui le tih chu ka va thawn a, ka nui deuh suk ringawt mai.

Mahse ka vanneihna a kal tluang kan ti dawm nge ni, a tûk zan aṭang chuan a hma aia pangngai daih zawk hian kan inbe chhunzawm thei ta hram. Amah ah chuan ka puar khawp ka hmu a pum puar el awl zet in zan mu pawh chu ka chhing ve thei ta ani. Khami hnu aṭang phei chuan inbiak chu a dan tur ah ngaiin nitin zantin hian text leh call hmang chuan kan inbe ta tlut tlut ṭhin. Nimahse, an inchhung a va lenchilh erawh chu chak viau mah ila ka la ngam thlawtlo, chubakah amah pawh khan a duh bik ka ring chiah lo bawk. A pa a sual ropui. Ka haw hnuah te khan alo hau zui hrep emaw te kha ani anga a chi dawn loh emai.

Thla khat chuang zet phone hmang a kan inbiak zui tak ah chuan innel in inngaina tawh tak hi kan ni a, khawi lo kal nikhua a han inhmuh thut chang te pawh hian tlem chuan la che lai deuh ṭhin mah ila hun hmasa lam ngaihtuah te chuan hmasawn tawh tak hi kan niawm e. Engemaw chang phei chuan be hmasa tu hi ka ni hman ngai meuhlo zawk ani.

Zankhat chu zanriah kan kil zo kan insengfel vel mek tih hian kan khaw information aṭang chua chhiat tawh thu hi an rawn puang ta dum dum mai a, kan hawi phawk nghal hrû mai. Mitthi chu kan khaw pa lâr, pa fiamthu duh zet leh phawk tak, fiam hlawh tak leh mite fiam rawn ni ṭhin Pu Ramliana chu lo ni reng in. A awm ve tho e, a natna kha a rei ve tawh ngar ngar em a a khum bet tih thu kan hriat aṭang phei kha chuan kan khaw chhung hi a reh duk thei nia mawle. Tunah lah chatuan ram min pansan ta mai chu ani si a kan khua chuan kan chân ropui in a uiawm ka ti takzet zet ani. Pu Ramliana chanchin sawi a kan chhungkua kan lo rik zui nak nak lai chuan ka phone a rawn ri thut. Ka'n en nak chuan ka duh em em tleitir mengmawii chu alo ni reng mai. Ve teh mial chuan! Min lo call hmasa tu hi a ni khat viau tak asin.

"Aw Dindin"

"URuat,zanin i lengkhawm ve dawn em?"

A aw mawlh hi ani ka tuar zo lo lek lek ṭhin mai.

"Umm kal ve ang chu tlangval te kan ni ve tawh si a"

"Awle, anih chuan minlo sawm la"

A ṭawng dan vel chu a inthlahrun hmel reuh mange.

"Eh,, nang te chu highschool naupang chauh ila ni sia, i chhungten an phal ve dawn emni?" Kalo ti let hê hâw a. Chutah,

"Phal e, kan school ah pawh zirtirtuten mitthi kan neih pawh a kal ve zeuh zeuh ṭhin turin min ti alawm. Thingtlang khua ah te chuan ṭhalaite indaih loh na a nasa em a, kal rual kan ni ve tawh tho bawk si"

Nia, a sawi dik reng mai. Keini ang thingtlang khuaah pawh In 300 bawr vel lek awmna ang ah hi chuan mihring indaih loh na a nasat ang bawk hian khawhar In lenkhawm ah te pawh a bikin ṭhalaite hi hmuh tur kan tam lo thei hle a, khawchhung ah ṭhalai kan ṭhathnem tawhloh sa nen a awmchhun te lah hi ramdang leh khaw dang a awmbo tawk kan la awm veleh zel bawk si a, ṭhahnemngaih chu a na ve ṭhin in rual awh pawh na ve thei tak ani"

Chumi zan chuan tlaivar tur kan ni tho bawk a tiin dar 8 velah chuan muangchang hian ka insiam ve ṭan ta a. Chutih pah te pawh chuan Dindini nen kan la in text ngar ngar tho. Rei fahran mai uluk tak a ka sam ka siam leh hnu chuan ka hman chu ani ta der. Engmah sawi zui tawhlo in kan In chu ka chhuahsan nghala, Dindini te veng lam ka pan nghal nal nal. Kan mitthi te veng leh Dindini te veng hi a inkalpawh tlang vek bawk a, a remchang phian mai. An in thlen hma kawng kawi ah hian ani chu a ṭhiannu pakhat nen hian an lo ding zum zat mai a. Ka hmel an hmuh rual in an phun nghal ser ser bawk. Hmeichhe ho tak hi chu.

"Ehemm! Eng nge kha tah khan in tih a? In bialpa te in nghak ani maw?" Ka ti kher. Chutah an nui zui hak hak a. Dindini zawk chuan aw lai deuh lek lek hian

"Nangmah kha kan lo nghak che mawle" alo ti thuai.

"Anih chuan kal mai ila, ṭhalai dang pawh an kal ṭan niin ka hria" tiin kan pathum chuan mitthi in lam pan in kan inzui ve ta diah diah a, ka awmdan vel chu kalo suangtuah ṭhin dan chiah chu nilo mahse nuam ka ti ru veng veng mai a, a mipa ber chu ka tha te a khur ru der der thei hial a ka hriat chu ni. A zialo angreng mange.

Titi pah nak nak chuan kan kal ve zel a, mitthi in pawh kan thleng zui ve ta mai. A chhung kan han lut chu rin aiin ṭhalai hmel hmuh tur an lo awm nual tawh mai a, keini 3 han inzui lut thut chu mak min ti deuh nge an hawkdâk ve hranpa tih chu ka hrelo, kan lamah chuan an mit a lo fu deuh ṭhap ni hian ka hria. Ka tleirawl hruai te pahnih pawh chuan ka hnungah min zui zel in an zak ve hle ani tih hriat tak hian an kûn deuh reng bawk. An vawikhat lenkhawmna tur te ani si a an zah lutuk loh nan tiin ṭhutna tur pawh chu bangkil lam ka pan pui ta a. A mipa ber chu a kil ber ah chuan ṭhu in ka sir chiah ah hian Dindini pawh a rawn ṭhu zui ve nghal. A rawn ṭhu fel chiah tih rual in ka mal ah te, ka nâk ah te leh ka bân puam te aaaa a rem lai lai ah ani mai, min rawn sik zui ta nawk nawk mai anih kha le. A sih na chu rin aiin a na reuh phian lehnghal a. A hmel ka va en nak chuan alo sen deuh ṭân ṭân tawh a,amah lah a kûn daih mai bawk si. A hmai ah chuan thlanfim te pawh a bawl ṭek ṭek nimai hian ka hria. Ka tihngaihna hrelo lutuk chuan ka han nuih suk ringawt a, a biang a piai zauh pah chuan min sih na kut nem thep mai chu ka hum sak nghal thak bawk. Chhete chuan ka zak ve det mai, mahse ani pawh kha eng ruai ani bik hauh lo. A kut chu laksawn tum hian a han ti che zeuh tak na in kalo hum nghet sauh mai si a, a ṭang lui duh ta bik lo ani ngei ang rawn hawi chhuak ve in min rawn melh no deuh ralh. Kei lah chuan kalo en chiang nasa mai si a, rei pawh min en ngam lo chuan a hawi sawn leh ta vat a. A khawsak dan naupang chhia thei lutuk hi chu ka duh ṭhin mange.

Zan a rei tual tual a, a tute mah chu han zai ring fal peih pawh kan awm ta meuh lo. Mutchhuahna thlarau chuan chu inchhung chu rawn tuam ṭan in kiltin ah muthlu hmel hmuh tur an awm ta pheuh pheuh mai a. Keini ṭhian thum pawh chu kan bang bik hauhlo a,a bul chiah a ṭhu a ṭhiannu mu thlu chuan a dar ah a lu nghat in ani pawh chuan ka dar ah a lu chu rawn nghat zuiin a chhing zui diar diar bawk. Ka nuam ti lutuk khan a muthlu lai chu ka kaitho phal awzawng lo a a ka nui vur vur lo chauh ani. A hmun te khan zir in huaisenna chhete chu nei phei ila chuan a taksa lum ther ther te kha duat tak a kuah zui vawng vawng hi ka chak ber hial ani.

Tichuan khaw fing te pawh lo chat in khua pawh chu a var ve ṭan ta a. Leilung te pawh a rawn lang ve leh ṭan ta.

Hemi ni hi class kal tur ka nih leh tawh avangin ka peih lemlo hle a. Hma takah tukṭhuan te eiin hmanhmawh tak chuan Champhai lam pan turin ka in khalhchhuak leh ta. Tlai alo ni leh anga ka haw leh mai thei dawn der silo, chumi kar tluan deuhthaw chuan class ka kal leh ngei a ṭul dawn si a tiin Dindini chu ka ngai lawk . A nihna takah chuan phone aṭanga inbiak ringawt chu ka kham khawp lo ṭan a, amah ka duhna nise a pung tual tual zel mhlemaiai bawk si. Vala hi ka talbuai zual zel zawng ani e. Chutihrualin Dindini ve thung hian keimah ah eng ang rilru nge a put ve ang tih mawlh chu ani ka hriat chak rual a ka hreh em em lawi si chu. Kalo rindan leh suangtuah dan maimai chuan ani pawh hian min hnar lutuk bik hian ka ring lo a, chhete tal a min duh ve na neilo ni se hei chen chen min biak peih tawh bik chu ka ring chiah silo. Mahse le, hmeichhe mawl tak a ni lemlo a min lo be ṭha ve satliah ringawt te pawh ani thei tho.

Ning chung chung pawhnin kan han ti ve nek nek a kart tawp chawlh hun chu alo in herchhuak veleh ta mai e. Eng thil dang mah hi ngaihtuah kual a ṭul tawhlo, a rang thei ang ber a mahni khaw lam pan a tlan haw nghal chu rilru ah a lian leh ber tawh ani. Khua ka thlen rual rual in Dindini chu ka call nghal a. Ka insum thei ṭhin lo.

"Umm URuatpui"

"Dinte, zanin chu kalo leng dawn emni aw ka tia. Thil hrilh tur che ka nei a"

"Awi! Eng thil nge ni ta? A hmanhmawh thlak viau em le"

"Hmanhmawh thlak ve tho mai. Tinge i phal vaklo emni lo len chu"

Chutia ka tih veleh chuan a han ngawi deuh dat a. A thaw zui halh mai.

"Phal lutuk. Mahse maw, a pa hii... englo, nimin aṭang khan ih, englo ania" a sawi hleitheilo tih ka hre mai. Lo pawt chat vat in

"Awle ka hrethiam e. Lo kal luih chi anilo anih chu"

"E URuat, zanah a chahthlak hunah a theih chuan kalo hrilh che anga, pawnah kan inhmu mai dawn emni?" A thu rawn sawi leh zet chuan kalo beidawn tawhna ruam ata chu min khai chhuak ta ka ti lo theilo. Ka thaw deuh hawk mai a.

"Awle, ngei ngei thei se aw. A rei dawn lo ania" tiin phone chu kan ti tawp ta ani.

Zanah chuan min lo biak hun chu ka nghak ta ngat ngat a, ka awm hle hle thei tawh meuh lo ani e. Dar 9 a rik hnu pawh chuan text emaw call takngial pawh ka la dawng lo ani a. Ani hi a theihnghilh tawh aniang a tiin thinrim ru ṭun chung a mut mai kalo tum lai tak chuan a rawn call ta hlauh.

Aw khur der der chung hian

"Pi Zualtei te in kawt ah khan kalo nghak ang che" a rawn ti deuh thawr a, a dah zui leh daih. Engatinge mi In kawt berkher ah chuan inhmuh a duh tlat le. An in aṭang pawh in Nu Zualtei te In chu a hnai tehchiam silo a, he nu hi ah. Alo kawlhrawng ru phian zawk emni aw?

A sawi ang ngeiin Nu Zualtei te In bul ka thlen chuan alo awm tawh a. Engmah pawh ka sawi chhuah hma hauh hian kawngsir thim deuh lai ah chuan min pawt lut ta nawk. Chutah ka hmui zawn a a kut zungchal rawn dah pah hian

"Ssshh! Ṭawng ring suh aw. Hei Pi Zuali te inah hian ânu te an awm ania. Kan ṭawng an lo hre palh ang" ati nghal sar sar. A thusawi chu ka pawm ani tih hriat nan ka lo bu nghat nghat bawk. He nu te reuh hian min ti hrilh hai thei lutuk a ka sawitur te chu ka ti bo ta vek nimai in ka hria.

"Eng thil nge min hrilh tur chu. A pawimawh hmel bawk sia" tiin a nui deuh lek lek bawk.

"Aaaa...Dindin, englo ania, bialpa i nei em?" Ve ta hram a. Ka zawhna avang chuan a nui deuh ta sâng mai. A nuih kalo ti za vel lek maimai te hi anilo maw le aw tih ka ngaihtuah lai chuan aw thawp sat hian

"Ummm nei e" a rawn ti ta anih chu!

Ka ring phallo lutuk kha ka nghing lawih nimai hian ka hria a. Ka zak tel ve deuh bawk nen amah pawh melh ṭha ngam mang lo chuan ka hma zawn chu ka en ngar ngar.

"Ani maw? Khawi ami nge a?" Chutah le, ka rinloh lutuk thil chu a thleng ta. A aw zawi fiah fel tak mai si chuan rawn ṭawng chhuak lenghal in

"Ihmaw! Ka bul mai ah hian a ding mek a" tiin min rawn nuih pah sen sen ta mai anih kha. Chuveleh kei chu amah lam hawi chuan ka inher nghal vut a, ka lawm lutuk khan eng thil nge tih hmasak ber tur pawh ngaihtuah hman tawh lo hian ka kut pahnih chuan a khabe ah ka han dawm sak chawt a, duhthawh leh uluk zet mai chuan a hmui khur dar dar mai chu ka fawh sak ta ringawt. A tir ah chuan min lo chhang let hauh lo a, a zeilo ve hle niin ka hre bawk. A ding tlawn reng ringawt mai a, mahse khang thil tak te khan amah ka duhna te chu a ti zual in a rilru mai nilo a zavai chuan ala thianghlim zia min hriat nawn tir ani.

Kan han in fawp zo a hmel ka han en chu alo maimitchhing ve diar diar ani tih ka hria a, a hmel duhawm tak leh paw no phek mai chu thla eng de riai riai avang chuan ka hmu chiang hle si a, ka en ning thei mawlh lo ani. A khabe a la dawm sak vang vang pah chuan a hmel duhawm tak chu hnai set sawt ah hian ka melh leh vang vang, chutihlai chuan ani pawh chu muangchang a rawn meng ve tawh in chutia kalo en reng ani tih a han hre thut chu a zak leh hnuhnawh hle ani ngei ang, hnuailam bih in a kûn zui ta daih mai. Chuveleh kei chuan kuah nghal thlawp in ka awm ah chuan ka bei tir ta hle hle a, ka hlim ani ka hlim.

"Uruatpui, kan dinhmun hi i hriat tawh tho ang in a inthlau ropui si a, nakin lawk ah min iai anga min kalsan leh mai lo ang maw? Ka hlauthawng ngawt mai" a rawn ti ta sep sep.

"Ngatinge chutiang te i ngaihtuah a? Duhdan phei chuan tunah hian hruai haw nghal daih che asin ka chak ber"

Chuveleh "i over emai" tiin a han nui leh hak hak ṭhin a. Reilote ah amah bawk chuan

"Taktak in Uruatpui, inṭhen duh miahlo ang aw. Kei chu inṭhen hi ṭha ka ti lo, ka zei lem lo viau na in tih hlim che chu ka tum ve zel ang" a thusawi dan vel chuan ka nuih a ti za angreng. A ṭawngkam naupang chhia thei lutuk mawlh mai hi ni.

"Lutuk, nang in i theih chhung chu kei chu min ngaihtuah suh"

Kan ngawi dun leh ta vang vang a. Ka awm ngheng reng chung chuan a muhil ta daih emaw ka ti hial. Ka ngaihṭha lo chuan a dar tawn tawn ah vuan in kan inhmachhawn leh ta ran mai. A mitmeng aṭang chuan a mut a chhuak ṭan tawh ani ngei mai, a meng de set set a. Chutah duhthawh tak leh dimdawi tak si in a hmui vam hiam bawk chu lungchim tak chuan ka han fawh sak leh ta a. Tun ṭum chu chhete in min lo chhang let ve tawh tlat. Umm, hma a sawn chak viau dawn hi tiin ka hlim rilru veng veng ta mai.

Kan han inthlah meuh chu kan thaw dun halh halh thei nia. Sana chu ka bih zui vat a. Alo tlai tawh viau lehnghal.

"I nu ten haw an duh ṭep tawh anga va lut tawh mai la, hei zan a rei mai dawn nula ini bawk si. Bo rei an lo ti lutuk ang che" tiin a sam pawr deuh chap te chu ka han tuai mam sak leh thuai thuai a. Chutah hnuai lam melh ran chung leh mitmeng dul deuh raih hian

"Hetah hian ka nu ho in kan riak dawn alawm. Mahse nia, mut chu a hun ve tawh reng" a rawn tih leh takah chuan kei chu kalo hrilh hai angreng hle a. Chhan let mai nachang pawh kalo hrelo. Chutah amah bawk chuan

"Uruatpui, min hrethiam dawn nia. Zanin pawh ka rawn biak lawk loh chhan che kha chu, ka pa zurui in inchhungah buaina a siam leh a, ka nu kha kutthlak te a tum a hetah hian kan tlanchhiatsan ta ringawt alawm" tiin a mittui a hru nghal niap niap. Ka khawngaih lutuk avang chuan ka kuah bet leh ta thlawp aṭ chiang zet a a hmel chu en leh in a mittui lo luang thla tur te chu kalo hruk hul sak leh zung zung bawk.

"Lungngai miah suh aw ka awm hi. Zanin chu ka bulah lo riak daih mai la" ti a ka han fiam zauh chuan a ṭah chhuak em em pawh chu reh in a nui chhuak halh a, na lo te hian ka bân puam ah chuan a rawn chum zui taih taih. Tichuan ka kuahna ata chu tal chhuak in

"Anih nangpawh haw ve tawh rawh. Keipawh ka'n lut ve ange. Motheri'n min lo call ṭep tawh ang" tih pah chuan ka biang ah a rawn chuk zeuh a, Nu Zuali te in lam pan pah chuan a tawlh hnung zui ta hret hret. Keipawh muangchang a inher pah chuan inchhung a a luh thleng in ka thlir zui ve ta ani.

"Lalrinhlu, ilo muthlu hman elo!? Iva han laktlak loh tak e aw" tih pah in a dar ah ka va tlawh deuh sawk. Chuveleh vai deuh ruai hian a rawn meng zui zat a.

"Ehee! Khawnge ka muthilh na hmun hi" te chu ala rawn ti tak deuh deuh. Ka va han ngei maimai tak, ka peih vaklo chungin ka nunhlui min sawi chhuah tir leh a, ala muthilhsan daih zui.

"Hmela, engmah ka hrilh tawh dawn lo che" tih leh thawh chu rual in choka ah thingpui lum tur chuan ka luhsan ta daih.

"Avan zialo ve...ka muthilh lai reng reng ka hriat loh chu. Thingpui i lum dawn tihna mi?" Ala rawn ti ham ham. Keipawh chuan a lak a lungawi loh kual vel chu awmzia vak a nei ngailo ani tih hria in ka nem leh ta deuh.

"Dawn e, dam chuan nak zan lamah kan chhunzawm leh mai dawn nia. Zanin atan chuan a tlai tawh emai" kalo ti ta zawk a. Ani pawh ka awmna lamah chuan rawn phei ve chhut chhut in

"Ni tawh mai. Nakzan ah chuan inchung zawl lamah kan ṭhu chho daih anga a ziaawm tawh ang chu" ati ve bauh bauh. Thingpui sen hâng te kan in zawh leh meuh chuan sana pawh in alo kawk tlai leh ta vah mai a, mu tur chuan room lam kan pan zui hnak hnak. Khum kan mu fel chiah tih in Rinhlu a chu a hnâr nghal der mai a, kei erawh chuan a chanchin ka sawi zawh tak ka hmangaih leh ka thinlung lalnu ni ṭhin, tun thleng pawh a theihnghilh harsa ka la tih em em mai leh theihnghilh pawh ka duhloh, hriatreng tlak ni tawh silo nunhlui min hnutchhiah tu Dindini ngei mai chu ka la ngaihtuah zui ta vang vang a. Tunah te hian a mu ve tawh angem? A pasal kiang ah zal in kei chu min rawn ngaihtuah ve tawh dawn der silo. Kha leh chen kan lo inkawp a kan lo inzui ve tawh na khan amah ah hriatreng na te a hnutchhiah ve miah lo emni dawn? Heti em em a hmeichhe pakhat vang mai a ka nun a inthlak danglam nasa ta lutuk hi keipawh hian mak ka in ti a, ka la inhrethiam theilo fo ṭhin. Mi te chuan an ṭhen tak an hmangaih te chanchin hi sawi nuam an la ti fo ṭhin, nimahse kei erawh chuan ngawi reng a ka ngaihtuah chhuah leh ṭhin hi a tawk ka ti viau a, a chhan chu maw ka nâ ani. Tun thleng pawh a min la ti na fo reng tu chu anih tak hi.

Zingkar ah chuan a tihdan pangngai te bawk in ṭhenawm nula Maliani chu plate chawi chung hian a rawn lut leh ta a. Hetihlai hian Rinhlua pawh kha lo tho chhuak tawh in chutia Maliani hmel a han hmu thut chu a hamhaih deuh tih a awmdan aṭang chuan ka hre nghal. Alo melh deuh ngut ngut thei nia.

"URuat, hei khualṭha i thleng animaw?" Tiin Maliani chu a rawn nui lut leh sen sen a. Keipawh in lu buk zauh pah hian

"Anih lel lul hi. Nizanah thawnthu ngaithla turin a rawn riak lut rawih mai" kalo ti let ve thuai. Chutah Maliani bawk chuan rang zet hian

"Eng thawnthu maw?" Alo ti var. Chuveleh Rinhlua nen chuan kan lo in melh deuh zoh a.

"Pasalṭha thawnthu maimai mawle. Kan la sawi zo hleitheilo, hei i chawhmeh min suah chu ava tui dawn ve a, i fel ṭhin ngawt mai nang hi chu" tiin thudang ah ka pakai zui ta daih.

Maliani pawh chuan sawi mai tur a hre tawh lo ani ngei ang, keini ṭhian dun chu min melh tawn ralh ralh pah in a plate chu a ban zoh a, min chhuahsan leh ta ani. A chhuak fel chiah tih in Rinhlua pek chuan

"Ṭhiana, khawilam tleirawl chhuak thar lehpek nge?" A rawn ti zui sur sur. Chutiang zawhna chu a rawn siam leh mai kalo rin lawk avangin mak pawh ka ti hranpa lo.

"Ṭhenawm te nula neihchhun anih kha. Hrim hrim in Lengpui khaw chhuak zawk hi ini si a thil hi i hrelo ka ti" ka'n tih chuan ham zui bui bui chung hian

"Tunlai mi te hi ka hretawh lo, kan khua nise kan lo ṭhang nasa ve tawh a in hriat sen chi pawh ani tawh bik hleinem. Kha, a chhiat loh reuh kha a melh dan che pawh kha a dik miahlo ania" a rawn tih leh chuan kalo nui liam ta ringawt.

Tukṭhuan eikham hnu chuan mahni hna ve ve thawk turin kan chhuak leh ta diak a. Ani pawhin hma tak a dawr khar leh a chaw rawn ei leh riah nghal chu a tum ṭha leh ta a, eng nge maw ni, muthlu maimai chung pawh khan ngaihnawm ati viau aniang chu. Umm a duhdan chuan han awm zel phawt ila ka chawm char char phawt mai ani ang chu. Ṭhianṭha ania lawm le.

Zanriah pawh kan tlingtla fel veleh ta e. Kan insengfel zo tih in Rinhlua pek chuan bangkil a ka dah ṭawl ve reng ka guitar hlui leh ṭawng tawh lam chu a rawn khaichhuak ta nawlh mai a. Makti zet hian amah chu kalo en reng ringawt.

"Engatan nge itih? A ṭawng tawh tehmai ania" ka han ti deuh hluai chu rum zet a min melh pah hian

"Engatan nge guitar hi ti vak se min tih a. Ka perh dawn mawle" alo ti hmuk.

"Umm engpawhnise ti rawh, inchung zawl ah chuan han ṭhu chho phawt ila. A key pawh kha zawn chawp leh fe angai tawh ang" tiin ka chhuak zui daih.

Inchung zawl aṭang chuan van boruak thiang tak mai chu alo lang chiang hle a, kawlkil aṭanga inthlahrun hmel tak a lo dâk ve dek dek thla chawr no riai mai pawh chuan chung zan boruak thiang lutuk te chu a rawn ṭawiawm ṭha hle ni hian a hriat a. Ral hla tak a arsi awmkhawm de sep sep te kalo thlir mek laiin

"Chantawk khawrel hi nâ ka ti duhlai,

Hmangaihna par tlan dun lai a,

Chun leh zua biahthu hnawl ngamloh vang a,

Lengdang par chu min thliahsan tak mai le"

Tih hla, Lalrindiki Khiangte sak ngei mai kha aw tham chial chual hian Rinhlua chuan a rawn sa chhuak ta thut. A zai kar lakah hian a guitar perh chu alo ri veleh tleng tleng ṭhin bawk a, zaithiam lem lo hle mahse a hla rawn sak berkher chu hman aṭanga tun thleng in ka thinlung khawih ṭhin tu hla alo nih vang nimaw, boruak in mung vel mek zawng zawng te nen chuan inchawih rual ka tih ruk em avangin ka awm deuhh nghulh mai a, ka tha chu a zawi hnawk nimai hian ka hre bawk. Thu dang reng reng sawi thei tawhlo hian chu hla ngei mai chu lungchim tak chuan kan sa zo dun ta ṭhak mai anih kha. Ka lung chu a leng thar vawng vawng a, ka ngai ani. Ni e, ani kha ka ngai takzet ani tunah hian. Tunah ngei hian ka kiangah han awm ve se la bulṭan ṭhat leh atan ka va han duh tehreng em. Lam ang let in ka kiangah hian alo kir dawn tawh lo emni? Lengdang ṭang bel a min liamsan hlen tur chuan kalo la phal taktak theilo anih hi ka ti ta.

"Ṭhianpa, i insum thei dawn lo in ka hre tlat. Zai chu duhtawk ila kan point ah bawk khan i han lut dun leh dawn ang hmiang" tiin a guitar pawm lai chu a sirah chuan a han tung ṭha leh te te a. Ni e, ni e ka insum ang, mipa ka nih hi mawle ti a inhumruh sauh sauh chung chuan ka ṭhu ngil leh vel phawt.

"Umm Dindini nen kan inngaihzawnna pawh chu a tir ah kha chuan a kal tluang viau mai a, eng ang pawhin a pa chu rui chhe viau ṭhin mahse inhmuh chu kan ṭhulh ngai chuanglo. Holiday te anih lem loh kha chuan kar khat ah ni hnih leh zan hnih bak hun hi kan nei ve ngai meuh silo a, ava han hrehawm duh ṭhin tak. Chutihlai kar ah vanduaithlak leh zual deuh mai hian college pawh chu Aizawl lamah ka insawn angai ta thut mai. Ka chhang chiah ka farnu hian Aizawl lamah puanṭhui zir a duh ve ta tlat a, amah mai a In han luah ai chuan tiin kei, an nuṭa neihchhun chu class kal pah a awmpui turin rem an lo ruat fel diam tawh hi ani a. Semester laklawh lai mahnise chhungte thu chu hnial ngam bik heklo le, hreh lutuk tak mai hian Aizawl chu ka pan ta nge nge anih kha. Ka kal dawn ni hian Dindini chuan School tlanbo ṭhak in min rawn thlah liam ve a, a ruk in a mittui chu a tla tih pawh ka hria, mahse engtin vak nge katih bik ang ni ka chhungte duhdan hnial kalh tur chuan chawm hlawm ve mai kha ka la ni miau a, tihtheih kalo nei biklo em atin ni.

Aizawl ah te chuan han awm ve ren rawn mah ila ka khawvel chu a ruak bik ngawih ngawih a, hawi na lam apiang a hmelhriat pWh nilo insulpel zut zut te chuan ka awmdan mek ah hian ka lungawi tawk loh zia leh ka mal tlat zia chu min hriatchhuah tir lek ṭhin si. Ka thinlung lalnu kha ka ngai ani tih chu hrilh nawn leh vak pawh ka ṭul tawh lo. Nitin phone hmang chuan inbe ve fo mah ila ka duhkhawp lo ṭhin hlemai.

Thla 5 vel awrh Aizawlah chuan ka awm tawh ang tih ah kan khaw middle school a thawk turin zirtirtu thar mi pathum lai chu an lak belh ani tih ka han hre ta a. An zavai chuan khaw dang mi niin an zingah pathlawi pakhat a awm ve bawk tih te thlengin ka ṭhiante chuan min rawn hrilh ani. A tir ah chuan engmah buaina ka neilo, zirtirtu an indaih lo a an lak belh ve ani mai ka ti liam thei. Mahse maw, ka cousin Ramsangi thu min rawn hrilh zet hi chuan min ti bangbo ve takzet thung ani.

"Uruatpui, kan khaw middle school a rawn thawk thar pathlawi leh Dindini hi tunlai chu an inzui lai hmuh tur an awm leh zeuh ṭhin a, nangmah nen khan in la inbe fo tho niin ka hre bawk sia, eng nge thil awmzia hi ni ang aw ka rawn ti anih hi" tih thu chu!

Ni e, kan la inbe ṭhin tehmeuh mai. Chu mai anilo, keiin amah ka thlakhlelh tluk zet in ani pawh khan min thlahlel ve tho niin ka hria. Hetiang ngaihdan nei chung leh amah ah chuan rinna thuk tak kalo nghah ve lai tak a chutiang thu thinṭhawng ka han dawng ta thut mai chu hriatthiam har ka tiin ka tha te chu a zawi nghal hnawk thei. Nimahse, kei chu Aizawl a awm daih ka ni a, engmah hi mit ngei a hmuh ka nei ve hleinem inzui satliah chauh pawh anni thei a, Dindini thung chuan alo duh let ve kher pawhin ka ring phal heklo. Chutiang vel a inhnem lungawi chawp chung chuan amah chu ka call zui nghal. Thil nihna diktak hriatchian ka duh vang nimaw, ka aw te chu a zaidam thei ang ber ngaihthlak nuam thei ber tur a ka rin hmang chuan ka han ti nem zual ta deuh a. Hun dang nidang nen amah ah pawh chuan danglamna awm in ka hre bawk heklo.

"Dindin, thil engemaw zawh duh che ka nei a"

"Aw min zawt la"

"Kei tih loh mipa dang hi biak inei lo ang tiraw?" Ka zawhna vang chu ani ngei ang, za lo tih hriat tak hian a han nui hul deuh hak mai a.

"Chutiang ngaihdan hrim hrim chu khawi aṭanga i rawn neih nge mawle aw? Ka hmangaih che a i bulah ka thla a muang in ka hlim ber tih i hre bawk. Mi nazawng thu hrilh che kha lo ring nghal ngawt suh aw. I tan chauh ka awm ania"

Chutia a han tih leh takah zet chuan kei val lungmawla hi ka lung a dam leh ta suai suai mai anih chu! Ni e, Dindini ka hmangaihna hi a lem nilo in hmangaihna diktak pawh ni ve in ka hria a, a thianghlim hle bawk. A tan ka rinawm hle tih lah Pathian pawh in min hriatpui ve hial ang chu. Tih taktak ah chuan rawlthar chhuah hlim aṭanga tleirawl ho titi siamtu ber kha ka ni ve phak hial. Kan khuaah mai nilo, Champhai a college ka kal hunlai ata tawh khan hmeichhe ho hian min be hmasa tlangpui bawk alawm le. Tunah lah Mizoram khwpui ber Aizawlah awm in ka taksa ka vun ka engkim mai chuan Aizawl boruak chu alo ngaih nasa mai si a, Pathian zarah ka ṭhat vanglai hun ka hmang chho mek zel ani a, insawitheih vang nilo se, ka awmna hmun apiang ah hian hmeichhia ka chhai rual tawh te phawt hi chuan min hlah an tum lo emaw tih mai tur hian min bawr ve hat hat ṭhin asin. Nimahse, ka thinlung kil khat riak reng leh ka hmangaih a ka duh awmchhun chu kan khaw lian lem lo tak a ka thinlung lalnu ka enchimloh Dindini chauh kha ani tlat thung. A tan ka in serh hrang tawh a a tan chauh a nung turin ka ṭawngṭaina ah thleng pawh in ka inhlan ve fo mai. Chuvang chu nge tih hrelo mah ila ka ring tawk em em a, ka rinawmna vang hian ani pawh kha ka tan a inserh hran ve reng ka la ring fan bawk ani.

A khat tawk hian ka cousin Ramsangi lah chuan Dindini leh chu zirtirtupa inzui chanchin vel chu min rawn hrilh ta fo mai a, nimahse amah Dindini ka ngei aṭanga a rinawm zia thu te ka la hriat tlat avang erawh chuan rin dan chintawk neih kalo tum ṭhin. Mahse, chutiang ringawt chu thil awmdan ani ta lo nge ka hrethiam ta lo tawp.

Zankhat chu kan khuaa ka ṭhian kawm ve ber leh dawt min hrilh ngailo tu ṭhianpa Sangtea hnen aṭang chuan thu ngai chiah chu ka dawng veleh ta. Sangtea rawn sawi dan phei chuan anni pahnih chu an in huat hmel loh hle a, champhai ah te pawh kal dun ṭhin in chu zirtirtupa chuan thilpek te pawh a leisak fo ani awm asin. Chu mai ala nilo, chu pa chuan an inah te pawh lenchilh fo in Dindini zawk pawh chu zirtirtupa inluah ah te chuan a leng lut ve fo tho tih te thleng in min hrilh ta anih chu mawle.

"Ṭhiana, Dindini hi chân hlen i duh anih loh chuan ilo haw phawt angai niin ka hria. Thil engkim hi rawn fiah ve la i kal leh zawk mai dawn nia" tiin Sangtea pawh chuan ngen takte hian min rawn ngen bawk a. Keipawhin a thu min chah chu ṭha tiin remchang ka dap ru ta reng.

Vanneihthlak takin kar hnih chhung exam kan neih hnuah chuan chawlhkar khat vel chawlh kan nei thei dawn ta hlauh mai le. Nimahse, ka haw tur thu erawh ka chhungte tihloh tu midang mah ka hrilh duh lem lo thung.

Tichuan tluang takin exam tenau chu ka zo fel a, a tûk ah kan khaw lam pan tur chuan ka inkhalh chhuak ve nghal zat bawk. Kan khua ka thlen hnuah pawh Dindini nen chuan inbe reng tho mah ila engmah ka awmdan vel chu ka hrilh duh chuang hauhlo a, thil thleng engkim kalo hriat tawh te pawh kha hrelo ang maiin hun chu a ngai reng in ka hmang liam vel maimai chauh ani. Mahse a tuk lawkah chuan tum lawk miahloh hian ka dawr kal tur leh a dawr kal ve tur tho chu kan in tawk ta hlauh mai. Ka hmel a han hmu thut mai kha a hrilhhai in a hamhaih hle ani tih chu ka hria, a ding deuh chawt a, che miahlo chuan min en ngawt ngawt ringawt mai. Kei erawh chuan za fahran lo hian ka han nuih deuh suk a, chuveleh ani pawh chu rawn che sawn zui ve in a inthiamloh hmel hle nghe nghe bawk.

"Ilo haw dawn tih pawh i sawi lawk miahlo a" ati zui niah niah.

"Min zawt bawk silo a, ka sawi ta lo mai anih kha" ka ti ve deuh kher. Chutah,

"Hmm iva han khirh reuh tak. Hetiang thil te chu in zawh kher pawh angai emni? I sual si" tiin a tum deuh bâr bâr mai. Kei chuan tukkhum thak lo pui hiah nuah nuah pah hian

"Taktak a, kalo haw thut a, ka hrilh buai ta lo mai che anih kha. Ila hre dawn tho ka tia" ka ti leh ta ringawt. Tichuan inkalsan tawh lo in dawr ah chuan kan inzui lut dun ta nge nge.

Zan dar 7 a rik meuh chuan nula rim tur in ka inring tawh pen pawn hle. Ka rimtui neih ang ang te pawh chu phuh chhuak in nalh inti tawk tak mai hian darthlalang hmaah chuan ka han inthlek leh ngial phawt a. Ka nui zui sak.

"Tlangval, khawvel mipa zawng zawng zingah hian i hmelṭha ber a i chhelo ber bawk hauhlo tih hi hre mah la, i fuh ve tawk ani tih hi hria ang che. Tin, tunah hian Khawnuam khawchhung a nula hmelṭha ber leh to ber i rim dawn bawk. Chumai chu ala ni lo cheu! Ani chu i bialnu ala ni lehzel bawk ania, iva han vannei lel lawl tak em" ti rilru mawlh mawlh pah chuan ka sam thur deuh bim bem te chu ka han tuai deuh thuak thuak a, tichuan Dindini te veng lam pan tur chuan ka chhuak zui ta ani.

An In ka thleng ṭep, pen nga pawh a awm tawhlo ang tih ah hian inchhung aṭanga Dindini leh mipa tu tih ka hriatloh nui ri har har thawm chu ka hre zui ta mai. Ka ke pen chu a tawp nghal chawt mai a, thawm ngaithla tur chuan reivaklo chhung chu ka ding ngawi ta reng ringawt. Mahse, mipa ka nia lawm le a chhungte hian min duh emaw duhlo emaw, engtin pawh min lo ti dawn mahse keiin an fanu hi ka duh thung alawm ti rilru chung chuan ka insehruh ta sauh sauh a, hma lam pan bawk in ka ke chu ka pen zui leh ta phawt.

Kawngka chu vawi 3 vel ka kik hman ang tih ah Dindini ngei mai chuan min rawn hawn sak ta hram a. Chutia rinloh lutuk mai a ka hmel a han hmu thut chu a hamhaih lehpek kher. Inchhung lam a lehhawi leh zauh pah chung in

"Eng, eng nge ilo tih dawn!?" A rawn ti ta anih chu. Kei lah chu zam duh lo laklawh ve tlat tawh.

"Aw.. kalo leng dawn anih hi. Eng nge ni vak ang?" Ka ti zui hmiah. Chuti na na na chu ti niawm tak hian kawngka chu a han hawng zau ta deuh a.

"Lo lut la" ati chuai raih.

Karei!! Inchhung ka han lut chu amah leh ka hriat ngai mi pawh nilo, mipa pakhat chauh hi an lo awm chu niin! A chhungte khan mipa inleng neih an phalsak mang lo emaw kalo ti ve char char a, min bum nge thildang vang zawk? Ka hmel an hmuh rual a an khawsak dan phung danglam nghal vek leh an nui hmel bo ta daih te kha ka hai mawlh silo.

"Uruat, ṭhu rawh. I van fel em em" ti zawi sep chung hian chu a inlengpa bulhnai ah chuan a han ṭhu zui daih bawk a. Keipawh ṭhutthleng dang ah chuan lawm fahran lo hian ka ṭhu zui ve mai bawk. Chu a inleng pa lah chuan mikhual emaw min lo ti veleh chhawng nge ka hrelo, min en duh hle mai. A tawp ah phei chuan Dindini bulah

"Hei Dinte, tunge ni? Khawi lam tlangval nge ni a?" Ati ta nge nge. Kei erawh chu kalo in humruh nasa tawh thung.

"Nia, ka ṭhianpa Ruatpuia anih hi. Aizawlah college a kal daih a i hre hman lo ang. E taka, Uruatpui, hei hi kan khaw middle school zirtirtu thar ania, Umasena anih ve hi" ati leh zung zung.

Engtin maw? A ṭhianpa Aizawl a college kal ta daih mai kalo nih tak a!!? Umm ka man thiam e, he pa ngei hi alo nih dawn hi zawimuang a ka hmeichhe hmangaih min lak kian sak tu chu. Hreptak a!

Chutah Masena chuan nui kur kur chung hian

"Aw alo anih chu. Nia, ka awmna hi ala rei lo ve bawk a, mikhual emaw kalo ti mai dawn che alawm. Leng ve reng rawh hei, a chhungten an zinbosan daih mai a, ka kut ah an dah tawp mai anih hi!"

Ekhai aw! Ka thu hriat zozai te chuan ka ṭhu lai chu min pawt ding lo chauh nia mawle. Chuta karah mikhual zawk in mikhual hmuh te chuan min lo hmu veleh chhawng a, thin hi a rim hluah hluah ani ti ila ka sawifiah zo kher awm lo e a. Ngawi reng hian an pahnih khawsak dan vel chu kalo thlir reng ringawt a, ka awm ve reng avang chuan Dindini awm erawh chu a nuam chiah lo a a khawr deuh ṭut bawk niin ka hria. A la hma bawk a a hun hma chuan kei mipa hi tlawm thlak takin ka va han haw mai awm biklo tak em tih chu ka ngaihdan ani. Chu mihring pa awm ti nuam lo tawk tur vel chiah chuan a khat tawk hian ka ṭawng chhuak veleh zauh ṭhin bawk. Mahse an sawi dan in pathlawi lung fing tih takah ka thusawi engamah chu a ngai thutak in a ngai haw duh miahlo mai a, chu inchhungah chuan neitu nihna a bikin an makpa rangkachak emaw a inti hial tawh ni ber in ka hria. A khat tawk a phone bih pah zeuh zeuh leh Tv melh pah zauh chung chuan dar 9 chu alo ri ve ta mai e. Ka ṭhutna aṭanga tho chhuak hluai pah chuan ka kekawr ipte chu ka han zen deuh ruk ruk mai a, chutah Aizawl bazar ngei mai a ka lei sak ve ṭhi man to lo fahran chu ka phawrh chhuah zauh.

"Dindin, kha i ta tur" tih pah hian a kut ah chuan ka hmehbel nghal zat. Anni pahnih chuan maktih hmel fe hian min en nghal hû mai a. A bikin Dindini mak ti hmel leh chi ai hmel mawlh kha. A khawngaihthlak letling hial awm asin. A inleng pa erawh chuan a zia thup tih hriat tak hian fiamthu ah alo la thei zel thung a.

"Euu!! Dintei chu, vannei ṭhin bik mange aw. Inthlahrung lo khan la ta che" alo ti ve zut zut thung. Thil ṭha ber ni dawn se chuan chu mihring pa chu hnek chawpchilh nghal bur mai kha ka nap takzet ani. Mahse thil ṭha ber anilo a, a mualpho thlak thei bawk. Ṭhi ka pek zawh rual chuan engdang mah sawi tawhlo hian chu inchhung chu ka chhuahsan zui vang vang. Diktak a sawi chuan e haw kawng pan a ka kal chhung zawng pawh khan ka mittui tla mai tur kha ka dang ṭawk ṭawk ani ber a, ṭah chhuah hawm hawm a i hming lam meuh a awrawl tawp tawp a au chhuah kha ka chak ber ani asin. Hetiang hian engtinnge min tih theih zawk le ka ti Dindin? Ni e, ka ṭhian rinawm tak leh ka cousin te pawh in inkar thil thleng te chu min lo hrilh tawh ngei mai. Mahse mit ngei a hmuh ka neih ve loh vang chauh leh ka rintawk em vang chauh che in an thusawi te kha mên ah thlak in thu ho maimai ah kalo chhuah sak zel anih kha. Tunah, zanin ah ngei mit in ka hmu ta si cheu a, heti chung pawh hian maw rin che hi ka la duh fan. A chhan chu nangmah ring tur che khan min ti fo ṭhin anilo emni? Anih chuan engah nge i thutiam te hi i vawn nun leh siloh. Mipa thinlung hi a nâ a,a rum ve vawng vawng ṭhin ani tih hi i hrengai lo tihna emni zawk? Heti khawp a tam thip ka hria a ka hmu tawh chung pawh hian e min ṭhen lo la ka la duh fan asin. Hei hi min fiahna thil maimai ani angem tiin Vala hian inhnem ka la tum ruh zel a, ka phallo, ka phal hlawllo che asin.

Eng rilru nge ka put tih pawh inhre lo in kha zan ka haw hnu khan ani chu ka va text leh hram pek a. Ihmaw ṭhianpa, eng nge ka va thawn tih hi i hre duh em?" Chutah Rinhlua chuan ka hau chung a min lo en reng pah hian a lu chu alo bu nghut.

"Aw, eng thu nge?" Alo ti vat a.

"Min ṭhen suh" tih thu hi ka va thawn leh hram anih kha. Ka message chu a seen vek a min reply lo thung. Min reply hun nghak in zanlai thleng chuan ka phone ka bih nawn leh ṭhin a, mahse chhanna erawh a awmlo. A tawp a tawp ah chuan mipa rilru chu lo chhuak in eng nge ka bialnu a nihna ala bo hleinem ti chungin ka va call ta nge nge anih kha. Chutah chuan a ṭhianpa, kha mihring pa ngei khan call chu alo chhang ta asin leh! Kha hun kha i hria em? Ka call hun kha zing lam dar 1 lai ani tawh. Chu inah chuan eng nge ala tih ve reng ang tih chu tu hrilh hriat mah hi ka ngaiin ka inhre tawhlo ani. Ka nâ lutuk chu ka mit deuh sulh thei a, dan hman rual ani lo ka mittui luang te kha. A vawikhat nan hmeichhia vang in ka ṭap ve ta asin. He hmeichhia hian min ti na takzet ani.

"Chhuihthangvala ka tlâwm,

I him i hlimna tur ka dâwn,

Ka thlah che angai, ka nâ

I tan pangpar an tam, kei itan hlîng

Sam ang ṭhen zai i rel tawh mai ang

I tan chhawrthla a chhuak leh mai ang,

Kei erawh ni tla liam ang

I hlim tur mitthla'n a lang,

Sam ang ṭhen zai i rel tawh mai ang"

Khatiang thil a thlen tawh hnu kha chuan thudang hriatbelh leh hmuh belh pawh ṭul in ka hre ta lo a, rilru na leh pangkhing takin Aizawl bawk chu a hma thei ang ber in ka pan leh ta nge nge ani. Aizawl ka thlen leh hnu hian ka thil tawn te khan ka nungchang leh awmdan chu an lo ti danglam zo ta nge tih ka hre bik hauhlo. Ka farnu chuan zawhna mak pui pui hi min zawt leh nulh nulh ṭhin mai a. Ni e, alo danglam ta viau te pawh chu ani mahna le, hun rei tak ata ka hmeichhe duh ruk ṭhin em em leh ka bialnu anih hnu thleng pawh a ka la duh leh ka hmangaih zui tak khan min bul a, min duhkhawp lo in mi pasal hlui ngei mai lakah chuan min rinawm loh san ta chu ani si a, keiin theihtawp in a tan ka ti a ka rinawm theihtawk in kalo rinawm ve em em a, ka thiam phak bak in atan kha ka awm ve ṭhin asin. Eng nge ka chet dan leh awmdan ah hian duhkhawp loh a neih ang le ka ti ṭhin. Ka tlin tawk loh na zawng zawng te kha sawi mai se, insiamṭhat tumin kei mipa hian hma kalo la ve thei mai lo emni? Hrilhhai tak a min siam leh tur si hian engvang in nge a tir ah khan thawnthu sei tak piang tur hi alo tih tawp zui zawk mai loh le. Keimah ka in huat tluk zet hian ka hmangaih pawh kha ka hua a, a na thei ang ber a kal hlen tir chu ka duh. Mahse chu chu mipa diktak leh hmangaih tu diktak tihdan tur niin ka hre lawi silo.

Awle, ka buaina ngai a buai reng tur leh thil ṭul lo a inhnamhnawih a hun pawt muang reng tur ka ni lo tih hria in khatiang thil kan inkar a alo thlen tak hnu kha chuan keimah pawh chu insiamṭha ve hret hret in thla 3 zet a ral leh hnu chuan ka tuar thiam ve angreng tawh khawp mai. College lam a min zui awl lo tu nula pakhat, Hriatsangi chu hun awl hnawhkhah nan leh ka nunhlui te theihnghilh phah theih nan tiin ka kawp ve ta chawih mai a. Ani chu alo lawm thiam kher asin. Kan han in kawp ta chu a intithei hle kan ti dawn nge, min chhuang zawk tih pawh hi ka hrethiam lo. A ṭhian kawm bik deuh te chuan kam inkawp thu chu kar lo ah an hre ta vek reng bawk a. A lehlam zawng a ngaihtuah chuan ka tan tak pawh a nuam ru riau thei. Min chhuang em em reng tu bialnu han neih kha chu mipa tamtak tam chuan a nuam ve alawm. Mahse ti teh ang. Mahse tih thumal a sawi rik loh theih ṭhin silo lai hi a buaithlak na ber chu ani e. Min hmangaih em em tu leh ka bul a awm nuam ti tak, ka tello a awm rei thei map lo hmeichhia ka tawng leh a ka kalsan tak hmeichhia erawh kha chu Hriatsangi nungchang letling thawk hi ani si a, Hriatsangi chuan a hmangaih leh duh em em a nei thei a, Dindini thung chuan amah hmangaih a ngaihsak awl lo tu mipa a kalbo tir ve thung a, kei erawh chuan englai mah a min thlahlel ve ngailo tu leh min hmangaih ngai miahlo tu mahse, ka theihnghilh theih hauh siloh chu ka thinglung hian ala zawng reng thung a, ka engkim pawm thiam vek tu Hriatsangi hi ma khawngaih ṭhin ngawt mai. Ani nen hian he ka thinlung tenawm leh nunrawng tak avang hian rei kan daih lo ang tih pawh hi ka hlau hlel lo e. Ani, i thinlung zawng zawng a i hmangaih let theihloh mi chu hun rei tak i chelh bet thei bik dawn emni?

Hetih chhung zawng hian Dindini leh a bialpa thar te pawh kha an la inkawp zui ve reng anih tihte chu tute hnen emaw aṭang chuan ka la hre chhunzawm ve zel tho a. Thu inang reng pawhnise mi hrang hrang hnen aṭang a ka dawn anih tawh phawt chuan ka dawnsawn dan hi a ngai reng a, ka nâ em em vek zel ani e. Ka awmdan engkim chu Hriatsangi hian a hrethiam ang tih mawlh hi ka hlau ṭhin ani. Kei chu min hlimpuiin ka kiangah chuan engdang mah hi angai lo ani si a, chu chu hria in keipawh theihtawp takmeuh hian ka insum ve a, tih hlim hram hram ka tum reng a a duhna hmun apiang ah kalpuiin a duhzawng a sawi apiang te chu tih sak zel ka duh bawk a, min mamawh hun apiang a atan a awm chu ka tum bawk. Chung te chu tih hlawhtlin chin ka nei nual a, ka tih theih loh hun alo thlen pawhin ani chuan tute emaw ang lo tak hian min hrethiam zel a min phatsanna rilru emaw vui vaina thu pakhatmah a chhak chhuak ve ngai hauhlo. Chutih a hnek in min vuan nghet sauh sauh a, ka awmna hmun apiang chu a ta emaw tih theih tur khawp hian nuam a tiin a tlangnel nghal em em vek ṭhin. Hetiang te anih vang hian ani chu tihnat ka hlau em em ṭhin a, ka natna tawrh mek te hrereng in midang tih nat ve kher kha ṭul ka ti bawk heklo. Mihring ve bawk ka ni a, hrechhuak thei leh theihnghilh hun nei nei ve thei ka ni tih hre chung in Dindini pawh zawi zawiin ka nun ata chu a la kalbo ve anga, ka la theihnghilh chhunzawm ve ngei ang tih hi ka ring tlat. Chuvangtak chuan Hriatsangi hlimna hi tihchhiat ka duhlo a, keimah vang a a mittui hi tlak tir ve kher pawh kha ka duh heklo. Tihian min hmangaihna leh a dawhtheihna te hian ka chhungril hneh hun ala nei ve chek anga tiin mahni chu ka in hnem pah mawlh mawlh ṭhin.

Nikhat chu ka nau a awmlo bawk a tiin in la free zet hian inah chuan kalo awm a, boxer chauh ha in kawr pawh ha lem lo chuan ṭhutthleng ah kalo mu deuh duai. Chutihlai tak chuan kan kawngkhar chu a rawn in pawt hawng ṭhuai mai a, ka phu chiang tehkel e. Ka'n hawi chhuah nak chuan kawngka bulah hian Hriatsangi chu alo ding ngawi reng ringawt a. Min la melhrum em em zui. Rang zet hian ka tho chhuak ve nghal a,sawi mai tur pawh ka hre lo hial. Chutah ani chu rawn kal phei tawr tawr in chiang em em leh na zet mai hian ka hmai ah chuan min rawn beng ta sawk mai anih kha. A hma ai khan ka phu nasa zawk daih. Ka biang rawn thip zawk mai dawm vung vung pah chuan ani chu ka melh deuh hû a

"Eh! Engnge thil awmzia Bawihi?"

Chutah le, awrawl vin leh ring fahran mai chuan min au khum ta tak tak anih kha le.

"Ilo tenawm hlemai! Nang hian i khawhar hnem atan chauh maw min lo hman ṭangkai a!? Hmela, ka hua che, ka haw ngawih ngawih che" tiin a remna lai apiang ah chuan min chum zui zawt zawt a, a ṭap deuh pur bawk nen. A tawp a tawp ah chuan a dik theilo tiin amah chu ka man bet ta ringawt.

"Hei! In bengdai la min ngaithla rawh. Tu in nge chutiang thu chu lo hrilh che a sawi teh" ka ti ve ta hrâk mai.

Aw khur deuh hlawk hlawk chung in ani thung chuan

"Engvangin nge a tir khan min hrilh mai loh. Ka hmangaih zia che pawh i hre vek a, tinge hetia min tih leh si?" Tiin a mittui luang mek te chu a han hru zui deuh pawk a. Kei chu kalo thaw deuh halh thei. Engpawhnise tiin ṭhutthleng ah chuan ka ṭhut tir ta phawt. A hmel a lungngaihna leh thinrimna in pawlh sawp nuaih te ka hmuh chuan ka lainat kher asin. Dim te hian a dar ah chuan kuah zuiin zaidam zawk hian

"Ihmaw Bawihi, thil chu i hre ve nial nual niin ka hria. Mahse i hre ziktluak silo lai tak hian ati thinrim che anih hi. Ka sawitur hi lo ngaithla la, chumi hnuah chuan min kalsan duh anih leh ka chelh buai hauhlo ang che. Mahse, hei hi chu min hriat sak la ka duh ani. Nang hi ṭhen che ka duhlo a ka nupui ni thei la ka duh zawk asin" ka ti ta sup. Chuveleh ani chu rawn hawi chhuak in ka mit ah chuan chiang zet hian min rawn melh ta kiau a.

"Eng thil nge ka hriat fiah tawk loh te chu han sawi la" a rawn ti sap.

Kei erawh kalo thaw deuh hak a. Tichuan Dindini nen a kan chanchin ngaihnawm lem lo tak chu ka hrilh ta vek ani. Amaherawh chu ka la theihnghilh thei thlawt lo ani tih te, a chanchin leh a hming sawi rik a awm apiang a ka chhungril la su dup dup ṭhin te erawh ka hrilh kimchang ta lemlo thung. Nia, chung zawng zawng thleng a a hriat ve vek kha ṭul ka ti lemlo. Amah inrintawk loh na neiin ka tan hian tling tawk lo riau a inhriatphah na kha a nei ang tih ka hlau ve tlat ani. Ka thusawi a ngaithla zo chiah tih chuan ka in rin hman hma hian min rawn kuah thlawp mai a. Zawi sap in

"Ka tihpalh aw. Amah nen khan in la inkawp reng dawn emaw ka tih vang ania" tiin ka âwm ah chuan a bei zui hle hle. Kei erawh kalo ngawi maimai thung a, a sam te chu ka chulsak vel ta ringawt.

Awle, Aizawlah pawh hun rei tak chhung chu kalo khawsa ve ta reng mai. Kan khua ka haw lohna pawh kum chuang lai ani ve ta der. Ka ṭhiante leh ka chhungte chu ka ngai hranlo tihna nilo in haw chak loh na chhan mihring nei kha ka ni miau mai a, a hmel chu hmuh ka hreh ngawih ngawih a ka tello a a hlim nui ri te leh laitual a han leng vel tur hmuh te kha ka chak hlawllo ani ber. Mahse ka duhdan ringawt chu thil awmdan tur ni thei bik heklo. Kum tawp Lal piancham hun lawmawm alo thlen leh meuh chuan chhugte min ngenna avang hrim hrim pawh in ka haw ve ngei tawh chu a ṭul ang. Sawi tak ang khan Aizawlah chuan ka khawsa rei ve tawh thawkhat a, krismas vawikhat pawh mahni khaw lam a hmang lo in Hriatsangi te nen kan lo tlingtla zo ve tawh tlat. Chuvang chuan he hun tal hi chu mahni chhungte bulah chhungkaw kim a hman ve chu ka ba tawh niin ka hria. Hriatsangi erawh Aizawl mi leh sa anih vangin a ngai ah bawk chuan hun alo hmang liam leh dawn ani si a, ka kalsan tur te kha kei ai mah in a huphurh zawk a, a rukin a mittui tla chu a hru zauh zauh ṭhin tih pawh ka hre thei. Ka haw ni tur thlen hma chiah hian ka farnu erawh sumo in alo han chho daih tawh thung a, kei chu ka bike neih ve chhun hmang ngei mai hian ka haw thung ang. Hriatsangi nen hreh zet a kan inthlah liam hnu chuan mahni chauh a khaw kar kawng thui tak mai zawh turin Aizawl chu ka chhuahsan ve ta hram e.

Kan khua ka thlen tuk ah hian ka ṭhianpa Sangtea chu ka haw tih hria in alo lang chhunzawm ve zat a. Kan inhmu thut chu kan hlim dun ngei mai. Ka thil hawn sak ho tham te te chu pe in ani pawh a lo lawm thiam nasa. A hmel aṭang chuan eng thil emaw tak min hrilh duh a nei leh tawh ani tih hrethiam nghal in midang lak aṭang chuan ka in terek hran pui daih.

"Hawh ṭhianpa, chair kha lo keng chhuak la hetah, varanda lamah hian i titi dun teh ang. Inhmuh a khât ṭhin emai" tiin ka au zui lung lung. Ani pawh phur zet hian chair chu kengin a rawn chhuak zui ve mai bawk. Kan ṭhu fel chiah tih chuan

"Ṭhiana chu ilo haw khat lutuk a sawitur ka ngah nen kalo theihnghilh ṭhen tawh zawk" tiin a han nui zui kur kur a. Ka tihngaihna hrelo chu ka nui liam ve ringawt. Chutah, a hma aia thutak zawk hian

"Taktak a ṭhianpa, ka thu hriat ṭhenkhat te hi sawi nuam chu ani miahlo a mahse kum te hial a vei ve ta bawk nen nangpawh in ngaihthlak harsa chu i ti tawh bik em lo ang chu" min zawt pah tih hriat tak hian min rawn melh deuh hâw mai. Keipawhin ṭawngkam a chhang let ta lo chuan ka lo bu zui nghut nghut. Chuveleh a inthiam lo leh deuh nge chu ka hrelo, a nui hul hak mai a.

"I hmel hmuh hi chuan hming pakhat hi alo lang zui ve lo thei ṭhin silo a, min hrethiam dawn nia"

"Eng thil nge maw sawi i tum le? I pehhel rei lutuk sawi thuai teh"

"Haha awle awle. Englo, Dindini chungchang bawk ania" kei chu kalo nghing leh dawt tawh. Eng tak chu sawi leh ang maw tiin ka thin chu alo phu dup dup hman tawh a.

"Khang kum i awmbo chhung zawng pawh khan i hriat angin a mipa kawp nen khan thawm an nei reng a, a nu leh pa te lah chuan an duh pui hlum lo chauh emaw tihtur hi niin, mipa satliah chu inleng atan pawh a an duhloh laiin ani thung kha chu sawrkar zem zen te alo nihna ah an bawh huam hi ani ber e. A bikin a pa hi a zualkai lehnghal a. Mahse maw, an lo ngaih ang ngawt in thil erawh a kaltluang hauhlo thung.

An fanu khan nei ngei se an duh avangin hun thawl pawh kha an pe tam narawh e. A tawp ah phei chuan Dindini kha a ruak ta lo nge nge a!" Chu thu a sawi lai chuan amah chu makti zet hian kalo en reng ringawt a. Chu chu hria in amah bawk chuan

"Ṭhiana, mak ti lutuk suh. Kha kha a bulṭanna chauh ani zawk ania. Ka'n sawi zawm zel anga. Khatia nau a pai thu an han hriat khan Dindini pa te chu an lawm ru hle a, inneih tir rum rum pawh kha an duh hial. Mahse, an naute pa ber, pathlawi ti a kan lo hriat vek tawh kha pathlawi awzawng chu lo ni lo in! Nupui fanau nei lai hi alo ni zawk reng si a, Dindini te lakah chuan a dawih aw a chhuah leh ṭan ta ani. Khami ṭum a Dindini pa thinrim zia tak kha aw. Zu chu ṭhahnem tak a in rui in a fanu naupai mek kha dimna tel map lo hian a vaw ta chiam mai anih chu mawle. Diktak chuan a thiamloh kha tamtak a awm ve tho asin. A naupai kha a thla ala tam lo bawk a tiin chumi ṭum chuan an tih tlak sak ta nge nge a. Hmuhtheih khawp hian Dindini taksa pawh kha a tlachhia ani. Tun hma kan khaw tleirawl chhelo leh hmelṭha, ti tuai no nalh tak ṭhin kha ani tawhlo reng reng nia, tunah pawh a hmel chu hmu la i hai tawh hial maithei. Ka'n sawi zawm zel mai anga, khatia a nau an tih tlak sak hnu aṭang kha chuan zirtirtupa nen pawh reivak lo chhung kha chu an thawm a dai ve ta hial a. Khawlai ah an inzui chhuak hmuh tur a awm tawhlo a, Dindini tak pawh kha a khawlai leng hmuh tur a tam lo sawt khawp mai. A zak ve hle te pawh aniang. Mahse, hun tam pawh a la ral lo ang tih ah hmanni deuh lawk taktak aṭang khan ani an inzui lai hi hmuh tur an awm leh ṭan tawh a. A mipa khan a nupui fanaute a chhuahtir tawh thu leh Dindini chu nupui atan a neih a duh tak zawk thu a rawn sawi leh e an tia! Chumi chin chu thuchiang engmah ka hre chhunzawm ta lo. Ka rindan chuan an inru emaw nau an pai leh pawh ani maithei. Thawm ri ret ret chu ala awm tlat. Mahse ṭhianpa, ka chiang chiah tawhlo bik lo ani" ati zui ta niah niah a.

Karei maw! Ka thu hriat zet chu leh. Ka ṭhianpa chu eng chhanna nge ka pek tak ang le? A bul a ṭhu mek, engkim thilthleng a hrilh zawh tak a ṭhianpa hi kum pawh vei mahse a hmeichhe hmangaih lak a a rilru leh thinlung puthmang ala danglam loh nasat zia a hre mawlh silo. Dindini hi ka la hmangaih thlawt ani tih chu ka sawi dawt theilo, amaherawhchu he ka thinlung sehhel leh ngawhngawl lutuk hi chuan kum hnih lai pawh her liampui tawh mahse a theihnghilh in a paihbo ve ṭhak thei lo thung anih hi. Hmân leh tun hi a danglamna a hre ve lo a, kum 10 pawh ral mahse a hmangaih hming kha an lam rik apiang in he a thinlung tenawm tak hi alo phu nawn ve fo dawn anih hi. Chu chu tumah hian an hriatthiam pui phak ve tawhlo a, an hrechhuak tur lah ani heklo. Ka ngaihzawng ni mek, ka bialnu Hriatsangi ngat phei chuan a hre tur ani lo lehzual. Ka khawngaih zozai tawh lutuk tlat.

Ania sin, ka nunhlui vang a thinlung na tak a ka rum chhuah chang leh ka beidawn ngawih ngawih chang te pawh a ka kiang a ding reng ṭhin chu Pathian leh Hriatsangi chauh hi anni ka ti ngam sak. A theihtawp chhuah in min hnem ve ṭhin a, ka kutah chelh in min be mawlh mawlh a, min tih hlim hram hram kha a tum ve bawk ṭhin. Na tak a ka rilru hliam tawh alo nih vang te hian kawng engkimah puitling lo tak a chet chhuah chang te pawh kalo nei ve fo, chung hunah te chuan Hriatsangi hian ka ai a awh zo em em ṭhin a, min dawm hram hram hi ani ber awm e. Chu mai ala nilo, ka hriat phak tur leh ama pindan chhungril thleng pawh hian ka tan a ṭawngṭai ṭhin asin. Hetiang khawp a min ngaihsak leh min hmangaih tu, hmeichhe rilru khauh leh puitling hi engtinnge kei mipa nep tak mai hian ka thlah phal tehlul ang le? Ka ti na phal teuhlo mai. A teuhlo lutuk.

Ṭhianpa Sangtea'n khatiang thu thinṭhawng taktak min hrilh hnu aṭangin kar alo vei veleh tawh a. Hun pui pawh zawimuang chuan kan hnaih ve zel e. Mitin mai te chu mahni zawn ṭheuh ah kan buai em em vek a, hun pui hmuak mek tih takah a nuam thei ang ber a hman tum ṭheuh kan ni bawk nen ka chhungte leh ṭhenawm khawveng te ho pawh chu nitin mai bazar tur hian khawpui lam pan in an in chhuah chhawk ani hawt e. Thlasik boruak tih takah khua lah chu a vawt em em mai a, chutih naklaiin ruah alo sur ve chhen bawk. A vawh dan zia chu sawiloh hian a fiah zawk ka ring.

Urlawk thlen hma zan chiah hi ani a, ruah pawh a sur leh bur bur tawh. Vawt ka tih fal bik em avang chuan meilum pawh chu duhkhawp lo hian khum lam ka pan a, ka inthawlh lut ta kuk mai. Mut maimai pah a phone khawih ka tum lai takin call ka dawng ta nawlh. Ka number save loh aṭangin ani lehnghal a.

"Hello"

Chutah, lehlam aṭang chuan hmeichhe aw ngei mai hian min rawn chhang ta.

"Ilo haw thu hi min hrilh a! I dam em?"

Chu aw ngei chu! Tunge anih tih hi hrilh nawn kher ka ngai tawh awmlo e. Mahse maw, keimah a chapo ve na te, thinrimna leh thikthu chhiatna rawn irhchhuak te chuan chu mihring chu tunge anih tih hrelo tur chuan min tilui ka ti mai. Ka hrelo der ta tlat a.

"Aw tunge inih le aw?" Ka ti let ngat.

Chuveleh ani chu a han nui deuh hak hak a.

"Ka number..ka numb..number pawh i nei tawhlo ani maw? Umm, a ṭha vek alawm Uruatpui" za lo tih hriat zet in a nui zui leh halh. A ṭawng dan maimai chu ruih neih a ang ka ti hlemai a. Mahse chu lam chu ka ngaihtuah tur pawh niin ka hre chiahlo e.

"Dindin" ka ti chhuak ta hlawl.

"Aw keimah...keimah Dindini kha. Tunah chuan min hre ta..englo ania" atih lai mek in keimah bawk chuan

"Tinge min lo call a. Kan pahnih inkarah hian sawitur ala awm emni?"

"Iva uikawm reuh tak e...min biak vang hian i chil per kha a hek phah viau tihna mi? Mawh! Ka aw i hriat leh vang ringawt pawh hian i sam te kha an tlak kawlh phah vek dawn tihna mi? Mawhhh sawi tehh"

Ekhai!! A rawn pâwr ta mah mah. A ṭawngkam chuan ka nuih a ti za ru hle a, mahse he nu hriat ah hian